ავტო პანორამა

შარშან „ფორდმა“ 20.2 მილიარდი დოლარის მოგება მიიღო

2012-01-27T16:25:00.001-08:00

Ford Posts Biggest Profit Since 1998

27 იანვარი

გასულ წელს, „ფორდ მოტორმა“ თავის ისტორიაში მეორე ყველაზე დიდი მოგება მიიღო. ამერიკული კომპანიის ქსელურმა მოგებამ 20.2 მილიარდი დოლარი შეადგინა, რაც დიდწილად ერთჯერადმა ოპერაციამ განაპირობა. 1998 წლის შემდეგ, ეს ყველაზე დიდი მოგებაა. შედარებისთვის, წინა წელს, ცისფერი ოვალის შესაბამისი მაჩვენებელი 13.7 მილიარდი დოლარი იყო.

შარშან „ფორდმა“ ეგრეთ წოდებული გადადებული საგადასახადო შეღავათების საწინააღმდეგო შემფასებელი რეზერვი გააუქმა, რამაც 12.4 მილიარდი დოლარი დააზოგვინა. სუფთა მოგებამ სულ 8.8 მილიარდი (წინა წლისაზე 463 მილიონით მეტი) შეადგინა, თუმცა ეს მოსალოდნელზე ცოტაა. ეს კი რამდენიმე ფაქტორმა გამოიწვია. კერძოდ, მაკომპლექტებლებზე გაზრდილმა ფასებმა, ვალუტების კურსების ცვალებადობამ და ტაილანდის წყალდიდობამ.

წლის განმავლობაში, შემოსავალმა 136.3 მილიარდი დოლარი შეადგინა, რაც წინა წლის მაჩვენებელზე 15.4 მილიარდით მეტია. ასეთი შემოსავალი დირბორნელებს 5.7 მილიონი ავტომობილის გაყიდვამ მოუტანა. შედარებისთვის, წინა წელს კომპანიამ 382 000 ავტომობილით ნაკლების გაყიდვა შესძლო. გასული წლის ბოლოს, „ფორდის“ ანგარიშზე 22.9 მილიარდი დოლარი ირიცხებოდა, რაც წინა წლის ანალოგიურ მაჩვენებელზე 2.4 მილიარდით მეტია.

მიღებული მოგება ამერიკულ კომპანიას საბონუსო ხელფასების გაცემის საშუალებას მისცემს. კერძოდ, 41 600 თანამშრომელი, რომლებიც საათობრივ ანაზღაურებაზე მუშაობენ, წლიური ბონუსის სახით 6.2 ათას დოლარს მიიღებს. სხვათა შორის, „ფორდის“ ევროპული შტოსთვის, გასული წელს წამგებიანი გამოდგა. საოპერაციო დანაკარგმა 27 მილიონი დლარი შეადგინა. შედარებისთვის, წინა წელი ამერიკული კომპანიისთვის ევროპაში მომგებიანი იყო (182 მილიონი დოლარი).

„ფორდის“ მარკეტოლოგები ვარაუდბენ, რომ წელს ამერიკის ბაზარზე 13.5–14 მილიონი ავტომობილი გაიყიდება, ევროპის ბაზარზე გაყიდვები კი 14–15 მილიონს მიაღწევს. შესაბამისად, ამერიკული კომპანია ორივე ბაზარზე გაყიდვების ზრდას გეგმავს და ამის მიღწევას, ბაზარზე ახალი ავტომობილების გამოშვებით აპირებს. მათ შორისაა ახალი „ფორდ ფიუჟნი“, „ფორდ მონდეო“, „ლინკოლნ MKZ“ (სამივე D–სეგმენტში), ქროსოვერები „ფორდ ისკეიპი“ და „ფორდ კუგა“ (C–სეგმენტი), ასევე B–სეგმენტის მინივენი „B–მაქსი“ და ქროსოვერი „ეკო–სპორტი“.

გარდა ამისა, „ფორდი“ თავის პოპულარულ პიკაპ „რეინჯერს“ ახალ ბაზრებზეც შეიტანს და გაასამმაგებს იმ ავტომობილების რიცხვს, რომლებიც სერია „ეკობუსტის“ ელემენტებით აღიჭურვება.

„ასტონ მარტინ V12 ძაგატოს“ დებიუტი კუვეიტში ექნება

2012-01-27T13:57:00.000-08:00

First Production Aston Martin V12 Zagato to Debut at Kuwait Concours d’ Elegance

27 იანვარი

საავტომობილო სამყარო ამ ავტომობილს შარშან, ფრანკფურტის მოტორ შოუზე ელოდა, მაგრამ ინგლისურმა კომპანიამ მისი მომზადება ვერ მოასწრო და ამიტომ, გამოფენაზე მხოლოდ სპორტული „ძაგატოს“ სამოქალაქოდ გადაღებილი ვარიანტი წარადგინა. გავიდა დრო და „ასტონმა“ „V12 ძაგატოს“ სერიული ვერსია მოამზადა, რომელსაც პირველად კუვეიტის ელეგანტურობის კონკურსზე წარადგენს.

„მოხარულნი ვართ, რომ „V12 ძაგატოს“ სერიულ ვერსიას პირველად კუვეიტის ელეგანტურობის კონკურსზე წარვადგენთ. „DB4GT ძაგატოს“ წარმოების დაწყებიდან 50 წელი გავიდა და ამ დროის განმავლობაში, „ასტონ მარტინსა“ და „ძაგატოს“ არაერთი შესანიშნავი ავტომობილი აქვთ დამზადებული, რომლებიც ყოველთვის გამოირჩევა ოსტატური შესრულებით, ექსკლუზიურობითა და მახასიათებლებით“, – ამბობს „ასტონ მარტინის“ მთავარი აღმასრულებელი ულრიხ ბეცი.

„V12 ძაგატო“ სწორედ ორი კომპანიის – „ასტონ მარტინის“ და იტალიურ დიზაინ ატელიე „ძაგატოს“ თანამშრომლობის 50 წლის იუბილეს მიეძღვნა. პირველად ის სარბოლ ფორმაში გამოწყობილი, იტალიაში, ტბა კომოსთან ჩატარებულ ელეგანტურობის კონკურს ვილა დ’ესტეზე წარადგინეს, სადაც საყოველთაო მოწონება დაიმსახურა. მოგვიანებით, ორი ასეთი ავტომობილი, ნურბურგრინგის 24–საათიან რბოლაზე გამოვიდა. მართალია, ფრანკფურტის შოუმდე, „V12 ძაგატოს“ ფოტოები ინტერნეტით გავრცელდა, თუმცა შოუზე ეს ავტომობილი არ გამოჩენილა.

„V12 ძაგატო“ „ასტონ მარტინ V12 ვენტიჯის“ შასიზეა დამზადებული. მის კაპოტქვეშ, 6.0–ლიტრიანი V12 ძრავია განლაგებული, რომელიც 510 ცხენის ძალას და 570 ნიუტონმეტრს გამოიმუშავებს. ძრავთან 6–საფეხურიანი რობოტიზებული გადაცემათა კოლოფია შეწყვილებული. ამ ტანდემის დახმარებით, ავტომობილს 100 კმ/სთ სიჩქარის აკრეფა 4.2 წამში შეუძლია, მისი მაქსიმალური სიჩქარე კი 305 კმ/სთ–ს აღწევს.

„ასტონ მარტინი“ მხოლოდ 150 ცალი „V12 ძაგატოს“ დამზადებას აპირებს. თითოეული ბრიტანეთში 330 000 გირვანქა სტერლინგი ეღირება.

„პორშე 911 ტურბო“ სამი ტურბინით აღიჭურვება

2012-01-27T09:59:00.000-08:00

Tri-turbo for Porsche 911 Turbo

27 იანვარი

უკვე 38 წელია, „პორშე 911–ის“ ყოველი თაობის მოდელის ბაზაზე, მინიმუმ ერთი ტურბო ვერსიაც მზადდება. გამონაკლისი არც ახალი 911 იქნება, რომლის საცდელი პროტოტიპიც ინტენსიურ საგზაო გამოცდებს გადის. ამ ავტომობილის თავისებურება ისაა, რომ ის სამი ტურბოკომპრესორითაა აღჭურვილი (წინა ვერსიას წყვილი ტურბოკომპრესორი აქვს).

მისი წინამორბედის მსგავსად, ახალი „911 ტურბო“ სრულამძრავიანი ტრანსმისიითაა აღჭურვილი. მამოძრავებელ ძალას კი მას 3.8–ლიტრიანი, ჰორიზონტალურად ოპოზიტური 6–ცილინდრიანი ძრავი მიანიჭებს. რაც შეეხება ტურბინებს, სამივეს დიზელის ტიპის ცვალებად გეომეტრიის კონსტრუქცია აქვს. მათი წყალობით, ძრავის სიმძლავრე 520 ცხენის ძალას მიაღწევს.

სამიდან ორი ტურბინა დიდი ზომისაა, ერთი კი – პატარა. ამ პატარა ტურბინის სანიშნულება ისაა, რომ ძრავმა აქსელერატორზე მყისიერი რეაგირება შეძლოს. ამგვარად, აჩქარების მომენტში, ძრავს ტურბოაგრეგატებისთვის დამახასიათებელი ჩავარდნები არ ექნება. სამტურბოიანი სისტემა „პორშემ“ ახლახანს დააპატენტა. გერმანული კომპანის ირწმუნება, რომ ასეთი სისტემის დახმარებით, სიმძლავრის ზრდის გარდა, საწვავის ხარჯიც მნიშვნელოვნად შემცირებასაც მიაღწია. ამასთან, სავარაუდოდ, ყოველი კილომეტრის გავლისას, ძრავი ატმოსფეროს 272 გრამი ნახშირორჟანგით დააბინძურებს.

ძრავს ან 7–საფეხურიანი ავტომატური კოლოფი (PDK) შეუწყვილდბა, რომელსაც ძრავთან ორდისკოიანი ქური დააკავშირებს, ან სრულიად ახალი 7–საფეხურიანი მექანიკური კოლოფი, რომელიც „პორშემ“ დამოუკიდებლად შეიმუშავა. გარდა ამისა, ავტომობილი სხვადასხვა დამხმარე ელექტრონული სისტემებითაც აღიჭურვება. ესენია: აქტიური საკიდარი, სტაბილურობის სისტემა, მომენტის გამანაწილებელი და გზასთან ჩაჭიდების მარეგულირებელი სისტემები.

სტანდარტული 911–სგან, მისი ტურბო ვერსია გარეგნულად განიერი უკანა ნაწილით, უდრო დიდი უკანა ფრთით, შეცვლილი ბამპერებით, გვერდითა ჰაერის ამღები „ლაყუჩებით“ და 20–დუიმიანი ბორბლებით იქნება განსხვავებული.

„ჰიუნდაის“ ახალი „სანტა ფეს“ მსტოვრული ფოტოები

2012-01-26T16:11:00.000-08:00

Has the New Hyundai Santa Fe / ix45 SUV been Caught with its Guard Down?

26 იანვარი

ახალი ავტომობილების გამოშვების პარალელურად, „ჰიუნდაი“ თავისი სამოდელო გამის განახლებასაც არ ივიწყებს. მორიგი ავტომობილი, რომელსაც ახალი თაობა შეცვლის, ქროსოვერი „სანტა ფეა“, რომლის მსოფლიო პრემიერაც კორეელებს ნიუ იორკის მოტორ შოუზე აქვთ დაგეგმილი.

ინტერნეტ გამოცემა „ჰიუნდაი ბლოგმა“ ამ ავტომობილის მსტოვრული ფოტოები გამოაქვეყნა, რომლებზეც პირველ რიგში, ყურადღებას ავტომობილის რადიატორი იქცევს, რომელიც კომპანიის კორპორატიული სტილისგან განსხვავებულადაა გაფორმებული. მისი ახალი ელემენტი გახდა განივი „ნეკნები“, რომლებიც მოქრომილია. სხვა მხრივ, რადიატორი ისევ ექვსკუთხა ფორმას ინარჩუნებს. შეცვლილია ბამპერის მოყვანილობაც, მასში კი შუქდიოდური ნისლსაწინააღმდეგო ფარები მოთავსდა. შეიცვლება ინტერიერის გაფორმება, თუმცა „ჰიუნდაი ბლოგს“ შესაბამისი ინფორმაცია არ მოეპოვება.

სამაგიეროდ ცნობილია, რომ ახალი „სანტა ფე“, რომელიც ევროპასა და ზოგიერთ ქვეყანაში iX45–ის სახელით გაიყიდება, ძრავების ფართო გამას მიიღებს. ამ გამაში, V6 აგრეგატებთან ერთად, ბენზინის ოთხცილინდრიანი 2.0–ლიტრიანი ტურბოძრავიც შევა, რომელიც ამერიკული ბაზრისთვის იქნება განკუთვნილი. ევროპისთვის კი, როგორც ყოველთვის, უპირატესობა დიზელის აგრეგატებს მიენიჭება, რომლებიც ჯერარშემოღებული ევრო6 სტანდარტებს დააკმაყოფილებს.

ბარიკელო ინდიქარ–ის ბოლიდს გამოსცდის

2012-01-26T13:45:00.000-08:00

Rubens Barrichello to test IndyCar single-seater with KV Racing

26 იანვარი

რუბენს ბარიკელომ ფორმულა ერთში ადგილი დაკარგა. მაგრამ არაერთხელ უთქვამს, რომ რბოლებში მონაწილეობა ისევე იზიდავს, როგორც მაშინ, როცა კარიერას იწყებდა. მას არაერთხელ დაუმტკიცებია, რომ ჯერ ისევ ძველებურად სწრაფი და ბრძოლისუნარიანია.

და რადგან ფ1–ში კარისკენ მიუთითეს, ოკეანისგაღმურ სერიებზე შეაჩერა არჩევანი. კერძოდ ინდიქარზე, სადაც მალე ტესტებში მიიღებს მონაწილეობას. 40 წლის ბრაზილიელმა უკვე მოირგო „KV რეისინგის“ ბოლიდის კოკპიტი და სწორედ ამ საჯინიბოს მანქანით ივარჯიშებს სებრინგის ავტოდრომზე.

სხვათა შორის, „KV რეისინგის“ პილოტი, რუბინიუს ახლო მეგობარი, ასევე ბრაზილიელი მრბოლი ტონი კანაანია. სწორედ მან მიიწვია ფ1–ის ორგზის ჩემპიონი ამერიკულ სერიაში. არადა, ადრე ბარიკელო კატეგორიულად ამბობდა, რომ ოვალებზე რბოლაში მონაწილეობას არ აპირებს – თურმე მის ცოლს არ სურს, რომ რუბინიუმ ოვალებზე იასპარეზოს, რადგან ასეთ ტრასებს ძალიან სახიფათოდ მიიჩნევს.

მაგრამ მომავალ სეზონში, ინდიქარ–ის კალენდარში მხოლოდ ოთხი ოვალური ეტაპია შეტანილი. ეს კი ნიშნავს, რომ ხიფათი მეტისმეტად შემცირებულია. თანაც, ბარიკელო ჯიუტად იმეორებს, რომ ამ სეზონში რბოლებიდან წასვლას არ გეგმავს.

მოკლედ, ორშაბათს და სამშაბათს ბარიკელო სებრინგის ტრასაზე გავა და ინდიქარ–ის ბოლიდს კბილს გაუსინჯავს. ხომ უნდა იცოდეს, როგორია ამ მანქანის მართვა და თუ მოეწონა, მაშინ მას სწორედ ოკეანისგაღმურ რბოლებში ვიხილავთ.

6 ჩემპიონის სეზონი

2012-01-26T05:05:00.000-08:00

ახალი "კატერჰემ CT01" – იხვნისკარტა ფორმულა ერთში

2012-01-26T04:31:00.000-08:00

„კატერჰემი“ ფორმულა ერთის გუნდებს შორის პირველია, რომელმაც ახალი სეზონისთვის მომზადებული მანქანა წარმოადგინა. გუნდი, რომელმაც წინა ორ სეზონში „ლოტუსის“ სახელით იასპარეზა, ამ მანქანით პელოტონის შუაგულში დამკვიდრებას ეცდება და ეს კიდევ ერთი წინგადადგმული ნაბიჯი იქნება. როგორც ცნობილია, წინა ორ სეზონში, „ლოტუსი“ (კატერჰემი) ახალბედა გუნდებს შორის საუკეთესო იყო, მაგრამ მომავალ სეზონში, მის ხელმძღვანელობას ეს „ტიტული“ ვეღარ დააკმაყოფილებს.

„კატერჰემის“ ტექნიკური დირექტორი მაიკ გასკოინი ამბობს, რომ დროა, მისმა გუნდმა ერთი ნაბიჯით წინ წაიწიოს. მას წინასწარ უჭირს იმის თქმა, თუ როგორი იქნება ახალი მანქანა ტრასაზე, თუმცა პროგრესის იმედი მაინც აქვს:

„ვფიქრობ, პირველ ტესტებს და მათ დროს მიღებულ მონაცემებს უნდა დაველოდოთ, რათა გავიგოთ, რისი უნარი აქვს მას. დღეს კი ხელთ მხოლოდ რიცხვები სიმულატორზე ტესტებიდან მიღებული მონაცემები გვაქვს, რომლებიც იმედს გვისახავს. მაგრამ ეს ჯერ არაფერს ნიშნავს – ყველა გუნდი ცდილობს წინსვლას და პროგრესი მათაც ექნებათ. შარშან მეათე ადგილი დავიკავეთ, რაც ჩვენი მიზანი იყო. ახლა კი დროა, წინ წავიწიოთ.

"კატერჰემ CT01–ის" მთავარი სიახლე, მისი იხვნისკარტასებრი ცხვირია, რაც მანქანას ძლიერ ამახინჯებს, თუმცა გასკოინი ამბობს, რომ ახალი რეგლამენტის მოთხოვნების გამო, ასეთ კონსტრუქციას სხვა მანქანებზეც ვნახავთ. რეგლამენტის მიხედვით, ბოლიდის ცხვირის წვერი გზის საფარიდან მაქსიმუმ 55 სანტიმეტრის სიმაღლეზე შეიძლება იყოს. კოკპიტის წინა ტორსის მაქსიმალური სიმაღლის ზღვარი კი 62.5 სანტიმეტრია.

„რეგლამენტი მანქანის ცხვირის კონსტრუქციის სიმაღლეს ზღუდავს, რაც უსაფრთხოების მოთხოვნებითაა განპირობებული. ჩვენი გამოწვევა ის იყო, რომ შასი რაც შეიძლება აწეული ყოფილიყო, რათა მის ქვეშ, ჰაერის დიდი ნაკადის შესვლა შეიძლებოდეს. ასე მანქანის მდგრადობა და აეროდინამიკური მახასიათებლები უმჯობესდება. და რასაც ხედავთ, ეს ამ პრობლემის გადაწყვეტის ჩვენეული ხედვაა. ჩვენ პირველები ვართ, ვინც ახალი მანქანა გაჩვენეთ. მაგრამ ცოტაც დაელოდეთ და მსგავს კონსტრუქციას სხვა მანქანებზეც ნახავთ“, – დასძენს გასკოინი.

ტექნიკური დირექტორი ამბობს, რომ "კატერჰემ CT01–მა“ FIA–ში ჰომოლოგიზაცია შობამდე. ამასთან, ყველანაირი ქრეშ ტესტებიც გაიარა და ტესტებისთვის სრულ მზადყოფნაშია.

ჰეიკი კოვალაინენი
CT01–ში

დაბოლოს, "კატერჰემ CT01–ის“ შასი მთლიანად „კატერჰემის“ მიერაა შემუშავებული. სამაგიეროდ, ავტომობილი „რენოს“ ძრავით და სისტემა კერს–ით აღიჭურვა. პარალელურად, გუნდს გადაცემათა კოლოფით და ჰიდრავლიკური სისტემით „რედ ბულ რეისინგი“ ამარაგებს.

მოკლედ, საჩემპიონო ინგრედიენტები სახეზეა, როგორი იქნება საქმეში მწვანე და ყვითელ ფერებში გამოწყობილი „იხვნისკარტა“, ამას პირველივე ტესტები გვიჩვენებს...

„ვოლვო“ ავტომობილებს უმძღოლოდ, მწყობრში სიარულს ასწავლის (ვიდეო)

2012-01-25T15:37:00.000-08:00

SARTRE autonomous road-train enters final phase with trio of Volvos

25 იანვარი

ევროკომისიის მიერ შექმნილი პროგრამა „სეიფ როუდ ტრეინს ფორ დი ენვირონმენტ“ (SARTRE) მიზნად ისახავს მსოფლიოში პირველ, სრულიად ფუნქციონალურ საგზაო მატარებლების შექმნას, რომლით მოსარგებლე ავტომობილის მძღოლსაც, მართვად მწკრივში ყოფნისას, შეუძლია, საერთოდ არ გაეკაროს ავტომობილის მართვის სისტემებს.

საავტომობილო კომპანიებს შორის „ვოლვო“ ერთადრთია, რომელიც პროგრამაში მონაწილეობს. ახლახანს, შვედურმა კომპანიამ გამოაცხადა, რომ პროგრამა ტესტირების ფინალურ ეტაპს შეუდგა, რაც იმას ნიშნავს, რომ მატარებლის რიგში სამზე მეტი მიმყოლი ავტომობილის შეყვანა იგეგმება.

ჩატარებული ტესტების დროს, მატარებლის წამყვანის როლს საშუალო ზომის გამწევი ავტომობილი ასრულებს, რომლის საბარგულის სექციაშიც, საჭირო ელექტრონული მოწყობილობებია დამონტაჟებული. გამწევ და მიმყოლ ავტომობილებზე არსებული სენსორებისა და ვიდეოკამერებისგან მიღებული ინფორმაციის გადამუშავება, წამყვან ავტომობილს, მიმყოლების მართვა შეუძლია. ამ დროს კი მაქსიმალური სიჩქარე 90 კმ/სთ–ს აღწევს. მიმყოლ მანქანებს შორის მანძილი მუდმივად 6 მეტრია. წამყვანს თეორიულად რამდენიმე მანქანის გაყოლიება შეუძლია, თუმცა აქამდე ჩატარებული ტესტებისას, მწკრივში მაქსიმუმ სამი მანქანა დგებოდა. SARTRE–ს გუნდი იმედოვნებს, რომ მწკრივში მავალი ავტომობილების რიცხვს 6–მდე გაზრდის.

ასეთი ავტონომიურად მავალი ავტომატარებლების დამკვიდრების მთავარი მიზანი, საწვავის ხარჯის შემცირებაა – უკან მავალი ავტომობილები, წინას მიერ გაჭრილი ჰაერის გაუხშოებულ სივრცეში იმოძრავებენ, რაც საწვავის ხარჯს დაახლოებით 20 პროცენტით შეამცირებს. ამასთან, პროექტის ავტორები ირწმუნებიან, რომ მაგისტრალებზე ამგვარი მატარებლების გამოყენება სრულიად უსაფრთხოა – აქტიური მძღოლების რიცხვის შემცირებით (საქმეს მხოლოდ წამყვანის მძღოლი უძღვება), ადამიანური შეცდომების ალბათობაც შემცირდება...

ვიდეო

„მაკლარენ F1“ 35 000 ევროდ

2012-01-25T14:43:00.000-08:00

McLaren F1 Replica Could be Yours for €35,000 / US$45,000

25 იანვარი

როგორც უნდა დაძველდეს ეს მანქანა, ასე მაინც არ გაიაფდება! მაშ რაშია საქმე? იმაში, რომ ლეგენდარული სუპერქარის რეპლიკაა და თუ მის კაპოტქვეშაც ჩაიხედავთ, ამაშიც მაშინვე დარწმუნდებით – იქ „აუდის“ ზორბა ოთხ რგოლს დაინახავთ. ეს ავტომობილი თურმე პოლონეთში, ძველი მანქანების ერთ–ერთი დილერის სადგომს ამშვენებს. ფასი კი 35 000 ევროა.

ინტერნეტ გამოცემა „ქარსკუპის“ ერთ–ერთ პოლონელ მკითხველს, ეს მანქანა რომ უნახავს, მაშინვე ფოტოკამერა მოუმარჯვებია. მანქანის გამყიდველს მისთვის რეპლიკაზე ბევრი არაფერი უთქვამს. მხოლოდ ფასი მოახსენა – 150 000 ზლოტი, რაც დაახლოებით 35 000 ევრო ტოლფასია.

რაც შეეხება ძრავს, რომლითაც ეს რეპლიკაა აღჭურვილი, ფოტოს მიხედვით შეიძლება ვარაუდი, რომ ის V6 აღნაგობისაა, თუმცა რა მონაცემები აქვს, ამის შესახებ არაფერია ცნობილი. სავარაუდოდ, სიმძლავრე 250 ცხენის ძალის ფარგლებში უნდა იყოს, ან ამაზე ნაკლებიც კი. რა თქმა უნდა, გორდონ მარის შედევრის სიმძლავრესთან ახლოსაც ვერ მივა.

შეგახსენებთ, რომ ის ავტომობილი „ბეემვეს“ წარმოების 6.1–ლიტრიანი V12 მონსტრითაა აღჭურვილი, რომელიც ბავარიული კომპანიის სპორტულ შტო M–ის სპეციალისტებმა მოამზადეს და რომელიც 618 ცხენის ძალას იძლევა.

საინტერესოა, რომ „ქარსკუპი“ „მაკლარენ F1–ის“ კლონის შესახებ ინფორმაციას პირველად როდი აქვეყნებს. ამასთან, ადრეც შინნაკეთი სუპერავტომობილი პოლონეთში აღმოაჩინეს, ოღონდ ის ნამდვილის მსგავსად, „ბეემვეს“V12 ძრავით იყო აღჭურვილი...

„ნისანი“ მექსიკაში ახალ ქარხანას ააშენებს

2012-01-25T13:57:00.000-08:00

Nissan to Invest up to US$2 Billion to Build its Third Plant in Mexico in 2013

25 იანვარი

„ნისანმა“ გამოაცხადა, რომ მექსიკის ქალაქ აგვასკალიენტესის მახლობლად, სრულიად ახალ ამწყობ ქარხანას ააშენებს, რისთვისაც 2 მილიარდ დოლარს გაიღებს. აღსანიშნავია, რომ იაპონურ კომაპნიას მექსიკაში უკვე აქვს ორი ქარხანა, რომლებშიც შარშან 600 000 ავტომობილი გამოუშვა. ახალი ქარხნის წლიური წარმდობა კი 175 000 იქნება და იქ ეგრეთ წოდბული B პლატფორმაზე ბაზირებულ მოდელს გამოუშვებენ.

„მექსიკა ამერიკის ბაზარზე „ნისანის“ ზრდის მამოძრავებელია. ჩვენს ახალ ბრაზილიურ საწარმოსთან ერთად, აგვასკალიენტესის ახალი ქარხანა, ჩვენი სტრატეგიის მნიშვნელოვანი საყრდენია. ის „ნისანის“ პოტენციალს მნიშვნელოვნად გაზრდის, რაც ჩრდილოეთ და სამხრეთ ამერიკის ბაზრებზე, გაყიდვების და ამ ბაზრებზე წილის ზრდას მოგვიტანს“, – ამბობს „ნისან მოტორის“ დირექტორთა საბჭოს თავმჯდომარე და მთავარი აღმასრულებელი კარლოს გონი.

გონს არ დაუზუსტებია ის მოდელები, რომლებსაც აგვასკალიენტესის ქარხანა გამოუშვებს. თუმცა ცნობილია, რომ მის მახლობლად არსებული ქარხანა, ამ პლატფორმაზე ბაზირებულ სედანისძარიან კომპაქტურ „ვერსას“ (ჩვენთან ტიიდას სახელით იყიდება) აწარმოებს. იაპონური კომპანია, ამ ავტომობილზე მზარდ მოთხოვნებს ვერ აკმაყოფილებს და პირველ რიგში, სწორედ ამ ნაკლის გამოსწორებას ეცდება. ამასთან, ქარხანაში წარმოებული მოდელების რაოდენობა თანდათან, ქარხნის დატვირთვის ზრდის კვალობაზე გაიზრდება.

მესამე მექსიკურ ქარხანაში 3 000 ადამიანი დასაქმდება, კიდევ 9 000 სამუშაო ადგილს, ამ ქარხნის მაკომპლექტებლებით მომარაგების ინფრასტრუქტურა შექმნის. ამგვარად, „ნისანის“ სამივე ამწყობ ქარხანაში (ორი აგვასკალიენტესშია და ერთიც – კვერნავაკაში) სულ 13 500 ადამიანი იქნება დასაქმებული.

იმის გამო, რომ „ნისანი“ ამერიკის ორივე კონტინენტზე, მეტწილად არაიაპონურ ქარხნებში წარმოებულ ავტომობილებს ჰყიდის, მის გაყიდვებზე იაპონიაში მოხდარი კატაკლიზმები ნაკლებად აისახა. ამის შედეგი ისაა, რომ კომპანიამ შარშან შეერთებულ შტატებში გაყიდვები 15 პროცენტით გაზარდა და ბაზრის 8.2 პროცენტი დაიკავა. მაგრამ გონს უფრო მეტი სურს. ეს უფრო მეტი კი აშშ–ის ბაზრის 10 პროცენტია. თუ ეს შეძლო, ამერიკის ბაზარზე პირველად გადაასწრებს „ჰონდას“.

გარდა ამისა, „ნისანის“ გეგმებში იაპონიიდან ამერიკის კონტინენტებზე უფრო მეტი ამწყობი ქარხნის გადატანა და ლათინურ ამერიკაში, იაპონურ კომპანიებს შორის ლიდერის პოზიციის ხელში ჩაგდება შედის. აღსანიშნავია, რომ „ნისანმა“ შარშან ჩრდილოეთ ამერიკაში 1.18 მილიონი ავტომობილი გამოუშვა, რაც წინა წლის მაჩვენებელზე 16 პროცენტით მეტია. თანაც, ორივე მეტოქე იაპონური კომპანია – „ჰონდა“ და „ტოიოტა“ უკან ჩამოიტოვა.

საინტერესოა, რომ ახალი დიდი ქარხნების მშენებლობა საშუალოდ 1 მილიარდი დოლარი ჯდება. „ნისანი“აგვასკალიენტესის მშენებლობას ამაზე ორჯერ მეტს მოახმარს და თანაც, მშენებლობა ძალიან სწრაფად უნდა დასრულდეს – პროექტი მის 2013 წელს ამოქმედებას ითვალისწინებს.

პარალელურად, „ნისანი“ თავისი ორი ამერიკული ქარხნის (სმირნა, შტატი ტენესი და კანტონი, შტატი მისისიპი) სრულად დატვირთვით ამუშავებს. არადა, სულ ცოტა ხნის წინ, ეს ორი ქარხანა მხოლოდ ნაწილობრივ იყო დატვირთული. მისისიპის ქარხანა სამ ცვლაში მუშაობს, რისთვისაც „ნისანმა“ რამდენიმე ასეული ახალი თანამშრომელი აიყვანა. იქ სედან „ალტიმას“ აწარმოებენ. რაც შეეხება სმირნას ქარხანას, იქ ელექტრომობილ „ლიფს“, ქროსოვერ „როგს“ და ქროსოვერ „ინფინიტი JX–ს“ აწარმოებენ.

იაპონიიდან ქარხნების ამერიკაში გადატანას კიდევ ერთი მნიშვნელოვანი ფაქტორი განაპირობებს. და ეს ფაქტორი დოლართან მიმართებაში, იენის კურსის გამყარებაა. თავის დროზე, იაპონურმა კომპანიებმა ამერიკის ბაზარზე ფეხი სუსტი იენის წყალობითაც მოიკიდეს. დღეს კი საპირისპირო ხდება და იაპონური კომპანიებიც გამალებით აშენებენ ოკეანის მეორე მხარეს ახალ ქარხნებს.

დაბოლოს, აგვასკალიენტესის ახალი ქარხნის (ძველი მისგან 10 წუთის სავალზეა) ინფრასტრუქტურაში საცდელი პოლიგონიც შევა. მომავალში კი ის „დაიმლერის“ A–კლასის მოდელსაც გამოუშვებს, რომელიც იმავე, B პლატფორმაზე იქნება ბაზირებული.

ერთი კვირა "მაკლარენ MP4-27–ის" გამოჩენამდე

2012-01-25T11:32:00.000-08:00

დღეს თავისი ახალი სარბოლი მანქანა "კატერჰემმა" გვიჩვენა. ერთ კვირაში კი "მაკლარენის" ბოლიდსაც ვნახავთ, მანამდე კი, ფორმულა 1–ის ერთის ერთ–ერთმა ყველაზე წარმატებულმა გუნდმა, თავისი ბოლიდის (MP4-27) ფოტო ტიზერი ფეისბუკით გვიჩვენა. ავტომობილი შალითითაა დაფარული და შესაძლოა, ეს უბრალო ნახატიც იყოს. თუ ნამდვილია, ახლავე შეიძლება ითქვას, რომ მანქანას დაბალი ცხვირი და ისეთივე სარადიატორე კორპუსები აქვს, როგორიც შარშანდელს ჰქონდა.

მაგრამ ნუ ვიმარჩიელებთ, ერთი კვირაც დაველოდოთ...

„ჰირიკო“ – დასაკეცი ელექტრომობილი

2012-01-25T09:06:00.000-08:00

Hiriko folding electric car headed for production

25 იანვარი

ბრიუსელში, ევროკომისიის პრეზიდენტმა ხოსე მანუელ ბაროსომ საზოგადბას უჩვეულო ჯუჯა ელექტრომობილი წარუდგინა, სახელად „ჰირიკო“. ავტომობილის კონსტრუქციაში არაერთი ინოვაციაა გამოყენებული, მათ შორის, დასაკეცი შასი, რისი წყალობითაც, სადგომზე მას „სმარტ ფორთუზე“ სამჯერ ნაკლები ადგილი ჰყოფნის...

სახელმა არ მოგატყუოთ – ის იაპონურად კი ჟღერს, მაგრამ ამომავალი მზის ქვეყანასთან საერთო არაფერი აქვს. კონცეპტუალური ელექტრომობილი, ბასკეთის რეგიონის რამდენიმე კომპანიის მიერ შექმნილმა კონსორციუმმა დაამზადა, პროექტი კი ესპანეთის მთავრობამ დააფინანსა. სამუშაოებს „დაიმლერის“ ყოფილი ინჟინერი, არმანდო გასპარი ხელმძღვანელობდა. პროექტში ასევე მასაჩუსეტსის ტექნოლოგიური უნივერსიტეტის სპეციალისტები მონაწილეობნენ. ავტომობილის შემუშავებისას, ფრანგული ტექნოლოგიები გამოიყენეს, შემუშავების პროცესში კი შვედეთის ქალაქ მალმიოში მცხოვრები ერაყელი ლტოლვილები იყვნენ დაკავებული.

სახელი „ჰირიკო“ სწორედ ბასკური ენიდან მოდის და ის საქალაქოს ნიშნავს. ავტომობილი სრულამძრავიანია – მას ოთხი პატარა ელექტრომოტორი ამოძრავებს, რომლებიც ბორბლებშია ინტეგრირებული. პრეზენტაციაზე არაფერი თქმულა ძრავების და აკუმულატორების მახასიათებლებზე. სამაგიეროდ ცნობილია, რომ „ჰირიკოს“ სვლის სიშორე 120 კილომეტრია, მისი მაქსიმალური სიჩქარე კი 65 კმ/სთ–ს აღწევს.

პროექტის ავტორები აცხადებენ, რომ პატარა ავტომობილში ორი ადამიანი თავისუფლად ეტევა. ინტერიერში მოსახვედრად კი მხოლოდ ერთი კარია, რომელიც წინიდან ზევით იხსნება. ყველაზე საინტერესო ისაა, რომ საჭიროების დროს, მანქანის უკანა ნაწილი იკეცება, რა დროსაც, „ჰირიკოს“ სიმაღლე ემატება. სამაგიეროდ, ასეთ მდგომარეობაში, სადგომზე მცირე ადგილიც ჰყოფნის. სალონში ვერ ნახავთ საჭეს – „ჰირიკო“ ჯოისტიკით იმართება.

პროექტის ინიციატორები პირველ ეტაპზე, 20 ცალ „ჰირიკოს“, ბასკურ ქალაქ ვიტორია–ხასტეისში დაამზადებენ. ამ ავტომობილების ტესტირების სურვილი მსოფლიოს რამდენიმე დიდმა ქალაქმა გამოთქვა. მათ შორის, ბერლინმა, ბარსელონამ და სან ფრანცისკომ. ჯუჯა ელექტრომობილების ტესტირებაში მონაწილეობა გალაპაგოსის კუნძულებზეც სურთ. თუმცა, პირველი ამ პატარა მანქანას (სამ ცალს) მალმიო მიიღებს. საერთოდ კი, პროექტი ითვალისწინებს ამ ავტომობილების იმ ქალაქებში აწყობას, სადაც მათს ექსპლუატაციას მოისურვებენ.

როგორც კი „ჰირიკოს“ საპილოტო–სატესტო პროგრამა დასრულდება, მისი წარმოებაც მაშინვე დაიწყება. პროექტის მიხედვით, ავტომობილის საბაზო ღირებულება 12 500 ევრო უნდა იყოს. თუმცა, მასობრივი წარმოების შემთხვევაში, ფასი ალბათ დაიკლებს.

საერთო სარგებლობის გზებზე პირველი „ჰირიკოს“ გამოჩენა ერთი წლის შემდგ იგეგმება.

„კატერჰემმა“ 2012 წლის ბოლიდი წარმოადგინა

2012-01-25T07:02:00.000-08:00

Caterham F1 team unveils 2012 challenger

25 იანვარი

„კატერჰემის“ ფორმულა ერთის გუნდმა თავისი ახალი ბოლიდი წარმოადგინა, რომლითაც 2012 წლის სეზონში იასპარეზებს. ამ მანქანის ოფიციალურ პრეზენტაციას ინგლისური საჯინიბო ხვალ აპირებს, მისი პირველი ფოტო კი საკუთარ ტვიტერზე გამოაქვეყნა. იმავდროულად, ეს ფოტო ბრიტანულ ჟურნალ „F1 მეგზინის“ ყდაზეც დაიბეჭდა. ნომერი, რომელშიც ეს ფოტო დაიბეჭდა, ჟურნალის გამომწერებს დღესვე უნდა მიეღოთ.

მაგრამ ჯერჯერობით, მხოლოდ სარბოლი ავტომობილის (კატერჰემ CT01) ერთი ფოტოა ხელმისაწვდომი. ოფიციალური რეილიზი და ფოტოები კი ხვალიდან იქნება ხელმისაწვდომი. ამასთან, ცნბილია, რომ ამ მანქანით მომავალ სეზონშიც იტალიელი იარნო ტრული და ფინელი ჰეიკი კოვალაინენი იასპარეზებენ.

„კატერჰემ CT01“ ინგლისური გუნდის (რომელიც მალაიზიელ ბიზნესმენ ტონი ფერნანდესს ეკუთვნის) პირველი ავტომობილია, რომელიც „კატერჰემის“ სახელით იასპარეზებს. შეგახსენებთ, რომ გასულ ორ სეზონში ამ გუნდმა „ლოტუსის“ სახელით იასპარეზა.

ფოტოდან ჩანს, რომ ავტომობილს კეხიანი ცხვირი აქვს – მსგავსი ელემენტი ახალ სეზონში ალბათ სხვა ავტომობილებზეც შეგვხვდება, რისი მიზეზიც ტექნიკური რეგლამენტის ახალი მოთხოვნებია. ასეთი კონსტრუქციის თავისებურება ისაა, რომ მანქანის მზიდ ნაწილზე ცხვირის ნაწილის მიბმის ადგილას, ერთგვარი კეხი წარმოიქმნება. ამასთან, წინა საკიდარის ზედა სამაგრები, ამ გადაბმის ადგილზე ზემოთაა მოთავსებული.

ავტომობილი დახვეწილი აეროდინამიკითაც გამოირჩევა, რასაც ვერ ვიტყოდით მის ორ წინამორბედზე. ყურადღებას იქცევს მოკლე სარადიატორე კორპუსები, რომლებიც უკანა ნაწილში ძლიერ ვიწროვდება და დაბლდება. დაბლაა დაწეული მანქანის უკანა ნაწილიც. ეს კი იმისათვის გაკეთდა, რომ მანქანის ამ ნაწილში, ჰაერის შემხვედრი ნაკადისადმი წინააღმდეგობა მაქსიმალურად შემცირებულიყო.

„მინის“ სამოდელო გამა ათამდე გაიზრდება

2012-01-24T15:14:00.000-08:00

Mini to expand lineup to ten with three new versions by decade's end

24 იანვარი

„ბეემვეს“ ხელში, „მინი“ განუხრელად ძლიერდება და გაყიდვებსაც სულ უფრო ზრდის. ამ პატარა ავტომობილის ბაზაზე, ბავარიელებმა მთელი ოჯახი შექმნეს, რომელიც ამჟამად უკვე ექვს წევრს მოიცავს და მალე მათი რიცხვი შვიდამდე გაიზრდება.

„პატარების“ ოჯახის მეშვიდე წევრი სპორტული ქროსოვერი გახდება, რომელიც კონცეპტუალური „პეისმენის“ სახით, დეტროიტის შარშანდელ მოტორ შოუზე ვიხილეთ და რომლის სერიულ ვერსიასაც ალბათ „ქანთრიმენ კუპეს“ დაარქმევენ. მაგრამ „მინის“ მარკეტოლოგთა ფანტაზიები და წარმოსახვის უნარი ამით არ ამოიწურება. მათი მონდომების შედეგია ის, რომ „მინი“ თავისი სამდელო გამის ათამდე გაზრდას აპირებს.

მაგრამ სანამ ეს მოხდება, „მინი“ თავისი ავტომობილების გადახალისებას და განახლებას იწყებს: 2014 წელს ბაზარზე ახალი ჰეჩბეკი „მინი კუპერი“ გამოჩნდება, რასაც აბსოლუტურად ყველა არსებული მოდელის განახლება მოჰყვება. ამ პროცესის დასრულების შემდეგ კი სამი ახალი ავტომობილის გამოჩენაა მოსალოდნელი.

დღეისათვის „მინის“ სამოდელო გამაში შემდეგი ავტომობილები შედის: სტანდარტული ჰეჩბეკი „კუპერი“, „მინი კონვერტაიბლი“, კუპე, როდსტერი, უნივერსალი „კლაბმენი“ და ქროსოვერი „ქანთრიმენი“. მალე მათ „ქანთრიმენ კუპე“ დაემატება.

რა ტიპის ავტომობილი იქნება შემდეგი სამი, ამაზე ჯერ მხოლოდ მარჩიელობა შეიძლება. ვთქვათ, ერთი მინივენი იყოს, მეორე კი – ღია ქროსოვერი, როგორიცაა კონცეპტუალური „ბიჩქომბერი“ (ფოტოზე), რომელიც პირველად ორი წლის წინ, ჟენევის მოტორ შოუზე გამოჩნდა. მესამე თითქოს ჯუჯა „მინი“ უნდა ყოფილიყო, დაახლოებით ისეთი, როგორიც შარშან, ჟენევაში ნაჩვენები კონცეპტუალური „როკეტმენია“.

მაგრამ ახლახანს ბრიტანულმა გამოცემა „ქარ–მა“ გაავრცელა ინფორმაცია, რომლის თანახმადაც, „მინიმ“ (უფრო სწორედ, ბეემვემ) ამ პატარა ავტომობილის წარმოებისგან თავის შეკავება ამჯობინა. ამის მიზეზი კი ისაა, რომ ამ ავტომობილის წარმოებისთვის მომზადება მეტისმეტად ძვირი ჯდება და შესაბამისად, ავტომობილიც ძვირი ეღირება. სავარაუდოდ, მესამე ელექტრომობილი იქნება, რომელსაც ჰეჩბეკის ბაზაზე დაამზადებენ.

მოკლედ, ისღა დაგვრჩენია, „მინის“ სპეციალისტების ფანტაზიებს ვენდოთ – აქამდე მათ ერთხელაც არ გავუწბილებივართ…

ამერიკაში ავტომობილების საშუალო ასაკი რეკორდულ ზღვარს აღწევს

2012-01-24T14:11:00.000-08:00

Average age of U.S. light vehicles reaches record high, Polk says

24 იანვარი

საავტომობილო კვლევებზე სპეციალიზებულმა ამერიკულმა კომპანია „პოლკმა“ გამოაქვეყნა საკუთარი კვლევის შედეგი, რომლის მიხედვითაც, შეერთებულ შტატებში არსებული ავტომობილების საშუალო ასაკი 10.8 წლამდე გაიზარდა, რაც რეკორდული მაჩვენებელია. ექსპერტები თვლიან, რომ ეს კარგი ინფორმაციაა ახალი ავტომობილებით მოვაჭრე დლერებისთვის, ასევე ავტომობილების სერვისზე სპეციალიზებული და სათადარიგო ნაწილებით მოვაჭრე კომპანიებისთვის.

„პოლკის“ მიერ ჩატარებული ანალიზი უჩვენებს, რომ 1995 წლის შემდეგ, ამერიკაში ავტომობილების საშუალო ასაკი განუხრელად იზრდება, ეს პროცესი კი განსაკუთრებით ინტენსიური ბოლო ხუთ წელიწადში გახდა. თუ მსუბუქი ავტომობილების საშუალო ასაკი 2010 წელს 11 წელი იყო, შარშან ეს მაჩვენებელი 11.1 წლამდე გაიზარდა. პიკაპებისა და უგზოობის ავტომობილების კლასში, საშუალო ასაკის შესაბამისი მაჩვენებლებია 10.1 და 10.4 წელი.

ყოველივე კი კარგი სიგნალია დლერებისთვის, რადგან ავტომფლობელები ინტენსიურად დაიწყებენ ახალი ავტომობილების შესყიდვას, რაც შესაბამისად, მათზე მოთხოვნას გაზრდის. ეს პროცესი კი განსაკუთრებით ინტენსიური მას შემდეგ გახდება, რაც ეკონომიკური კრიზისი გადაივლის.

რა თქმა უნდა, ავტომობილის მოძველების კვალობაზე, იზრდება მისი დაზიანების ალბათობა, რაც რემონტის საჭიროებას ზრდის. ამგვარად, ამ სფეროში მომუშავე კომპანიებს საქმე ემატებათ. იზრდება სათადარიგო ნაწილების საჭიროებაც. მაგრამ ავტომობილების საშუალო ასაკი რაც უფრო უახლოვდება პიკს, მით უფრო იზრდება იმის შანსი, რომ ავტომფლობელები ინტენსიურად დაიწყებენ ახალი ავტომობილების შესყიდვას. „პოლკის“ ანალიზი აჩვენებს, რომ ამჟამად ამერიკელები ერთსადაიმავე ავტომობილს (ახალსაც და ძველსაც) საშუალოდ 53 თვის განმავლობაში იტოვებენ. ეს კი 18 თვით მეტია 2001 წლის ანალოგიურ მაჩვენებელზე.

მაგრამ, როგორც კი ავტომფლობელები ახალი ავტომობილების შეძენას დაიწყებენ, მეორე ხელის ავტომობილებზე ფასები დაეცემა. ასევე შემცირდება მოთხოვნა ტექნიკურ მომსახურებასა და სათადარიგო ნაწილებზეც. სხვათა შორის, ამერიკაში ახალი ავტომობილების გაყიდვების ზრდის პროცესი უკვე დაწყებულია და სავარაუდოდ, ეს ტრენდი რამდენიმე წელი შენარჩუნდება.

საავტომობილო დილერთა ეროვნული ასოციაციის მთავარი ეკონომისტი პოლ ტეილორი ვარაუდობს, რომ წელს ახალი ავტომობილების ბაზარი კიდევ უფრო კონკურენტული გახდება, რადგან „ტოიოტა“, „ჰონდა“, „ნისანი“ და „სუბარუ“ სრულფასოვნად შეძლებენ მოთხოვნის დაკმაყოფილებას, რაც შარშან იაპონიაში მოხდარმა კატასტროფებმა და ტაილანდის წყალდიდობამ განაპირობა. ახალი ავტომობილების ბაზარზე კონკურენციის ზრდას კი შედეგად, ავტომობილების საშუალო ასაკის კლება მოჰყვება.

ტეილორი ვარაუდობს, რომ წელს ამერიკაში 13.9 მილიონი ავტომობილი გაიყიდება. ბევრი ანალიტიკოსი კი უფრო დიდი რიცხვებსაც კი ასახელებს. მტავარი კი ისაა, რომ ყველა გაყიდვების ზრდას ვარაუდობს. ცნობისათვის, შარშან მსუბუქი ავტომობილების გაყიდვებმა ამერიკაში 12.8 მილიონს მიაღწია, რაც წინა წლის მაჩვენებელზე 10 პროცენტით მეტია.

კიმი რაიკონენის პირველი ტესტები "ლოტუსით"

2012-01-24T07:54:00.000-08:00

ვიდეო

არიელ ატომ მუგენი დრიფტზე (ვიდეო)

2012-01-24T04:46:00.000-08:00

„ლოტუსი“ რაიკონენით კმაყოფილია

2012-01-23T17:02:00.000-08:00

Kimi Raikkonen impresses Lotus in his first test since returning to Formula 1

23 იანვარი

„ლოტუსის“ სატრეკო ოპერაციების ინჟინერი ალან პერმენი ამბობს, რომ პირველივე ტესტებზე, რომელიც გუნდის ორი წლის წინანდელი მანქანით ჩაატარა, კიმი რაიკონენმა ყველას დაანახა, რომ ფორმულა ერთში მისი დაბრუნება შეიძლება წარმატებული იყოს.

მსოფლიოს 2007 წლის ჩემპიონი ვალენსიაში იმყოფება, სადაც 2010 წლის სპეციფიკაციის „რენოს“ ბოლიდს სცდის. ინგლისურ გუნდს ფინელი პილოტის დროები არ გამოუქვეყნებია, რადგან ამას არანაირი მნიშვნელობა არ აქვს – ჯერ ერთი, რაიკონენი ძველი მანქანით ვარჯიშობს. მეორეც, ის სადემონსტრაციო საბურავებს იყენებს. მაგრამ ამის მიუხედავად, ტრასაზე მისი შესაძლებლობები აშკარად ჩანს.

„ტრასაზე პირველივე გამოსვლისას, მას კარგი სიჩქარე ჰქონდა. ახლა ძნელია იმის თქმა, თუ რამდენად სწრაფად აღიდგენს თავის უნარს. ის ძალიან გამოცდილი მრბოლია და ვერ ვხედავ მიზეზს, რომლის გამოც, ძველებურად სწრაფი არ უნდა იყოს. ტრასაზე მისი ყოფნისას აშკარა იყო, რომ ჩვენ მსოფლიო ჩემპიონთან ვმუშაობდით“, ამბობს პერმენი და გაკვირვებულია იმით, რომ რაიკონენს ხშირად არაკომუნიკაბელურად ახასიათებენ.

თავის მხრივ, რაიკონენი თვლის, რომ გარკვეული დრო დასჭირდება იმისათვის, რათა თავის საუკეთესო ფორმას დაუბრუნდეს. მან აღიარა, რომ ფ1–ის მანქანასთან ხელახლა შეგუება ცოტა გაუჭირდა. თუმცა, ისიც დასძინა, რომ ამჯერად მანქანისგან და საბურავებისგან მაქსიმუმის გამოწურვა მის მიზნებში არ შედიოდა.

ლითხვაზე, ჰქონდა თუ არა ფ1–ში დაბრუნება წინასწარ დაგეგმილი, ფინელი პილოტი პასუხობს, რომ გასული სეზონის ბოლოსაც კი, სამომავლო გეგმები დალაგებული არც კი ჰქონდა. მას რამდენიმე არჩევანი ჰქონდა და საბოლოოდ, ფ1–ში დაბრუნება ამჯობინა. „ფ1 უმაღლესი დონეა და აქ მოხვედრა ყველას უნდა. და როგორც კი კარგი შანსი გამოჩნდა, მაშინვე „ვისარგებლე“, – ამბობს რაიკონენი.

„ფოლკსვაგენი“ ხუთკარიან Up!–საც გამოუშვებს

2012-01-23T16:34:00.000-08:00

Volkswagen Introduces Five-Door Version of its Up! City Car

23 იანვარი

„ფოლკსვაგენმა“ თავის მინი ავტომობილ Up!–ის ხუთკარიანი ვერსიის ფოტოები და მცირე ინფორმაცია გაავრცელა. ავტომობილი, რომლის კოდური სახელწოდებაც „ნიუ სმოლ ფემილია“, მის სამკარიან ვერსიაზე 475 ევროთი ძვირი ეღირება. მას გერმანული კომპანია პირველად ჟენევის მოტორ შოუზე წარადგენს და შეკვეთების მიღებასაც შოუს დასრულებისთანავე შეუდგება, თუმცა ავტომობილი ევროპელი დილერების შურუმებში მხოლოდ ზაფხულში გამოჩნდება.

ხუთკარიანი ჰეჩბეკის ბორბლებს შორის ბაზა სამკარიანისას ემთხვევა და მისი სიგრძე 2.42 მეტრია. ასევე უცვლელია საბარგულის მოცულობაც – 251 ლიტრი. უკანა სავარძლების დაკეცვის შემთხვევაში, ის 951 ლიტრამდე იზრდება. უცვლელია ასევე მანძილი უკანა სავარძლის ბალიშიდან სახურავამდე – 0.947 მეტრი (წინასი – 0.993 მეტრი). ამასთან, უკანა სავარძლებზე მსხდომი მგზავრების ფეხებისთვის სივრცის სიგრძე 0.789 მეტრია.

სამ და ხუთკარიან ჰეჩბეკები ერთიდაიგივე ძრავებითაც აღიჭურვება. ესაა ბენზინის სამცილინდრიანი 1.0–ლიტრიანი ძრავი, რომლის ერთი ვერსია 60, მეორე კი 75 ცხენის ძალას გამოიმუშავებს. ამ ძრავების ხარჯი 100 კილომეტრზე, თუ ავტომობილი სისტემა „ბლიუმოუშნითაა“ აღჭურვილი, მხოლოდ 4.2 და 4.3 ლიტრია. ერთნაირია ავტომობილების ეკიპირებაც (თეიქ აპ, მუვ აპ, ჰაი აპ, ბლექ აპ და უაით აპ).

გერმანული კომპანია ვარაუდობს, რომ Up!–ის მყიდველთა ნახევარი სწორედ ხუთკარიანი ვერსიის შეძენას ამჯობინებს. ამასთან, ახლო მომავალში, მინი ავტომობილის ხუთკარიან ვერსიებს „სეატი“ და „შკოდაც“ გამოუშვებენ.

FIA რეაქტიული საკიდარის აკრძალვას განმარტავს

2012-01-23T15:44:00.000-08:00

Reactive ride banned because FIA believed it gave an aerodynamic benefit

23 იანვარი

საერთაშორისო საავტომობილო ფედერაციამ (FIA), ეგრეთ წოდებული რეაქტიული საკიდარის აკრძალვის მიზეზი გამოაქვეყნა. განცხადებაში ნათქვამია, რომ აღნიშნული მოწყობილობის გამოყენება, ავტომობილის აეროდინამიკურ მახასიათებლებს აუმჯობესებს, ეს კი რეგლამენტის დარღვევა იქნება.

მოწყობილობა ჰიდრავლიკურ სისტემას მოჰყავს მოქმედებაში, რომელსაც სამუხრუჭე სისტემას ააქტიურებს, როდესაც პილოტი მუხრუჭებს იყენებს. ეს სისტემა პირველმა „ლოტუსმა“ შეიმუშავა და თავის ავტომობილზე, გასული სეზონის ბოლოს, ახალგზარდა პილოტების ტესტებისას გამოიყენა. ამასთან, მსგავსი სისტემა უკვე შემუშავებული აქვს „ფერარისაც“.

თავიდან FIA–მ სისტემა ლეგალურად მიიჩნია, რადგან ჩათვალა, რომ ის მხოლოდ საკიდართანაა დაკავშირებული და მისი მუშაობის ეფექტურობის გაზრდას ემსახურება. რეაქტიული საკიდარის მთავარ სარგებლად ის ფაქტი ჩაითვალა, რომ მისი მეშვეობით, ავტომობილი გზის საფარისგან დაშორებას თითქმის უცვლელად ინარჩუნებს, რისი წყალობითაც, ის მოსახვევებს უკეთესად გადის.

მაგრამ გუნდების დაჟინებული მოთხოვნით, FIA–ს ტექნიკურმა კომისიამ, სისტემის უფრო დაწვრილებით შესწავლა გადაწყვიტა. საბოლოოდ კი გაირკვა, რომ ყველაზე მეტ მოგებას, ის ავტომობილის აეროდინამიკურ მახასიათებლებს ანიჭებს. სისტემის შესწავლისას დადგინდა, რომ მისი ამოქმედებისას, საკიდარის ერთ–ერთი ელემენტის სიგრძე იცვლება, მუხრუჭის სატერფულზე ზემოქმედება განსხვავებულად ხდება (განმარტებული არაა, როგორ). ეს კი არღვევს რეგლამენტის 3.15 პუნქტს, სადაც ლაპარაკია იმაზე, რომ მოძრავი აეროდინამიკური ელემენტების გამოყენება აკრძალულია.

კერძოდ, 3.15 პუნქტში ნათქვამია, რომ ნებისმიერი დეტალი, რომელიც ავტომობილის აეროდინამიკურ მახასიათებლებზე გავლენას ახდენს, ავტომობილის დარესორებულ ნაწილთან მტკიცედ უნდა იყოს დაკავშირებული და არ უნდა ჰქონდეს თავისუფლების არანაირი ხარისხი. ასეთი დეტალები, ავტომობილის დარესორებულ ნაწილთან მიმართებაში, აბსოლუტურად უძრავი უნდა იყოს.

გარდა ამისა, არსებობს ვარაუდი (ამის გამოკვლევა აღარ ჩატარდა, რადგან სისტემის აკრძალვისთვის, ერთი დარღვევაც საკმარისია), რეაქტიული საკიდარის სისტემა, საკიდართან დაკავშირებულ რეგლამენტსაც (10.2.1 და 10.2.3) არღვევს. ამ პუნქტებიდან პირველი საჭის მექანიზმის და საკიდარის ურთიერთკავშირს არეგულირებს, მეორე კი განმარტავს, რომ ავტომობილის მოძრაობისას, მისი აეროდინამიკური ელემენტების რეგულირება არ შეიძლება.

საინტერესოა, რომ FIA გუნდებს რეაქტიული საკიდარის ტესტებზე გამოყენებას არ უკრძალავს. ამასთან, ფედერაცია მიიჩნევს, რომ გუნდებს მისი გამოყენება სეზონის პირველ ეტაპზე – ავსტრალიის დიდ პრიზზეც შეუძლიათ, რადგან ასეთ დროს, ინოვაციების რეგლამენტთან შესაბამისობის საბოლოო გადაწყვეტილებას უშუალოდ რბოლის სტიუარდები ღებულობენ, რომლებმაც შესაძლოა, რეაქტიული საკიდარი რეგლამენტის დარღვევად არ მიიჩნიონ. თუმცა, ბრიტანულ გამოცემა „ავტოსპორტის“ აზრით, ამგვარი სცენარი პრაქტიკულად გამორიცხულია.

„ჰიუნდაი“ i20–ს გარეგნობას შეუცვლის

2012-01-23T14:25:00.000-08:00

Hyundai i20 Facelift to get the i40 Styling Touch

23იანვარი

ჯერ მხოლოდ სამი წელი გავიდა მას შემდეგ, რაც ახალი i20 ბაზარზე გამოვიდა, მაგრამ „ჰიუნდაი“ მას უკვე გარეგნობას უცვლის. ახალი ავტომობილი i40–ის სტილში შესრულდება, მას პირველად ჟენევის, ან პარიზის მოტორ შოუზე ვიხილავთ, გაყიდვები კი წლის ბოლოდან დაიწყება.

ამჟამად, ახალი i20–ის საცდელი პროტოტიპი საგზაო ტესტირების პროცესშია. კამუფლირებული i20 ინტერნეტ გამოცემა „ქარსკუპის“ რეპორტიორმა სწორედ საერთო სარგებლობის გზებზე დააფიქსირა. ავტომობილის ის ნაწილებია შენიღბული, რომელთა დიზაინიც იცვლება. ფაქტობრივად, უცვლელი მხოლოდ სახურავი და წინა ორი საყრდენი რჩება.

შალითებს არ დაუფარავს წინა ფარები, რომელთა მოყვანილობით შეიძლება ითქვას, რომ ისინი ახალ ჰეჩბეკ i30–ის და სედან/უნივერსალ i40–ის სტილშია შესრულებული. სამაგიეროდ, იცვლება წინა და უკანა ნაწილების, ასევე ოთხივე კარის მოყვანილობა და ბამპერები.

„ქარსკუპის“ ფოტო–მსტოვარმა ავტომობილის ინტერიერის გადაღება ვერ შეძლო, თუმცა რედაქციას განუცხადა, რომ სალონშიც ყველაფერი შალითებშია. ეს კი იმას ნიშნავს, რომ ცვლილებები იქაც იქნება. შეიცვლება სავარძლები და მაჩვენებლების დაფა.

„მერსედესის“ მიზანი – 2.7 მილიონი გაყიდული ავტომობილი 2020 წელს

2012-01-22T16:00:00.000-08:00

Mercedes aims to sell 2.7 million cars globally by 2020

22 იანვარი

დეტროიტის მოტორ შოუზე, „დაიმლერის“ მთავარმა აღმასრულებელმა დიტერ ცეტშემ განაცხადა, რომ მისი სურვილია, „მერსედეს–ბენცი“ პრემიუმ კლასის მწარმოებლებს შორის, მსოფლიო ლიდერი გახდეს. კერძოდ, 2020 წელს შტუტგარტელები გაყიდვების 2.7 მილიონამდე გაზრდას გეგმავენ.

პრემიუმ სეგმენტში პირველობისთვის, „დაიმლერს“ სერიოზული მეტოქეები ჰყავს „ბეემვეს“ და „აუდის“ სახით. სამქიმიანებმა შარშან 1.36 მილიონი ავტომობილი გაჰყიდეს, დაახლოებით 300 ათასით ნაკლები, ვიდრე ბავარიელებმა. აქედან 1.26 მილიონი უშუალოდ „მერსედესის“ მარკით გაიყიდა, დანარჩენი კი – „სმარტის“. შედარებისთვის, „ბეემვემ“ საკუთარი მარკით „მერსედსზე“ 120 ათასით მეტი ავტომობილის რეალიზება შეძლო, დანარჩენი კი „მინისა“ და „როლს როისზე“ მოდის.

დასახული მიზნის მისაღწევად, „მერსედესმა“ წარმოება უნდა გააორმაგოს. ამასთან, ცეტშე გეგმავს, რომ მისმა კომპანიამ მოგების მარჟა 10 პროცენტამდე გაზარდოს. გერმანულ გამოცემა „მენეჯერ მეგზინის“ ინფორმაციით, „დაიმლერი“ ახალ ქარხნებს ააშენებს ჩინეთში და ჩრდილოეთ ამერიკაში. ოღონდ, ამერიკული ქარხანა შეერთებულ შტატებში აშენდება, თუ მექსიკაში, ეს ჯერ გადაწყვეტილი არაა.

სამაგიეროდ ცნობილია, რომ ეს ქარხანა 2018 წელს ამოქმედდება და იქ შემდეგი თაობის A–კლასს გამოუშვებენ. ამასთან, ამავე ქარხანას „ნისანი“ საკუთარი ავტომობილების წარმოებისთვისაც გამოიყენებს. ცნობისათვის, „რენო–ნისანი“ და „დაიმლერი“ სუბკომპაქტურ კლასში საერთო პლატფორმას გამოიყენებენ, რომელზეც გერმანული კომპანია A–კლასს დაამყნობს, „რენო“ – ახალ „ტვინგოს“, „ნისანი“ კი – „მიკრას“.

გარდა ამისა, „დაიმლერი“ 2 მილიარდი დოლარის ინვესტირებას გეგმავს თავის ტუსკალუზას (შტატი ალაბამა) ქარხანაში, სადაც C–კლასის, შემდეგი თაობის R–კლასის და ასევე შემდეგი თაობის G–კლასის ავტომობილებს გამოუშვებს. ამასთან, C–კლასის სედანებს „ნისანის“ დეშერდის (შტატი ტენესი) ქარხანაში წარმოებულ, ბენზინის 4–ცილინდრიანი ძრავებით აღჭურვავენ, რომელსაც ასევე „ინფინიტიც“ გამოიყენებს.

მომავლის „ლინკოლნ კონტინენტალი“ სტუდენტების თვალით

2012-01-22T15:44:00.000-08:00

Students Design an All-Electric Lincoln Continental for 2025

22 იანვარი

დეტროიტის მოტორ შოუზე, „ფორდმა“ თავის პრემიუმ ბრენდ „ლინკოლნის“ დიზაინის ახალი ენა გაგვაცნო. გამოფენაზე წარმოდგენილი საშუალო ზომის სედანი MKZ ალბათ მალე დაიკავებს ადგილს დირბორნული კომპანიის შოურუმებში. მაგრამ „ფორდი“ ერთადერთი როდია, ვისმა სპეციალისტებმაც „ლინკოლნის“ მომავალი დაგვანახა.

ამ საკითხზე საკუთარი ხედვა ჰქონიათ ლოურენსის ტექნიკური უნივერსიტეტის სტუდენტებს, რომლებმაც 2025 სამოდელო წლის კონცეპტუალური ელექტრომობილი „ლინკოლნ კონტინენტალი“ შეიმუშავეს და მისი 1:4 მასშტაბის მაკეტიც დაამზადეს. და მათი ნამუშევარიც, დეტროიტული გამოფენის ერთ–ერთი ექსპონატი გახდა.

პროექტის ავტორები არიან ლოურენსის ტექნიკური უნივერსიტეტის სტუდენტები კოლინ ბონათანი და ჯეჰო ჩა. რა თქმა უნდა, ამ პროექტზე მუშაობა „ფორდს“ მიერ იყო ნებადართული. უფრო მეტიც, ამერიკული კომპანიის სპეციალისტებს პროექტი იმდენად მოეწონათ, რომ მასშტაბური მოდელი დეტროიტის მოტორ შოუზე, თავიანთ პავილიონში გამოფინეს.

ბონათანმა ავტომობილის ექსტერიერი შეიმუშავა. ის ამბობს, რომ პირველ რიგში, ბორბლებს შორის ბაზის სიგრძე აირჩია, შემდეგ მათ შორის მგზავრები განალაგა, ელექტრულ ამძრავ სისტემას და კვების წყაროსაც ადგილი მიუჩინა და მხოლოდ ამის შემდეგ გააგრძელა დიზაინზე მუშაობა.

ჩამ კი ინტერიერის შემუშავება ითავა. როგორც მოგვიანებით განაცხადა, მან პირველად მოკიდა ხელი ინტერიერის დიზაინს და იმდენად კმაყოფილი დარჩა, რომ ამ მიმართულებით მუშაობას კვლავაც აპირებს. სავარაუდოდ, ორივე სტუდენტს მომავალში „ფორდი“ თავის სტილის სტუდიაში მიიწვევს.

ლოებმა მონტე კარლოს რალი მეექვსედ მოიგო

2012-01-22T04:19:00.000-08:00

Sebastien Loeb claims sixth Monte Carlo Rally victory

22 იანვარი

როგორც მოსალოდნელი იყო, სებასტიან ლოებმა მეექვსედ მოიგო მონტე კარლოს რალი და ასე დაიწყო კამპანია, რომლის მიზანიც, მსოფლიო ჩემპიონის მეცხრე ტიტულის მოპოვებაა.

არადა, რბოლის პირველ დღეს ისე ჩანდა, რომ ფრანგს დაძაბული ბრძოლა ექნებოდა ფინელ იარი–მატი ლატვალასთან, რომელმაც ასპარეზობა შესანიშნავად დაიწყო. ამაში მას ხელი საბურავების სწორად შერჩევამ შეუწყო, რასაც ცვალებად ამინდში განსაკუთრებული მნიშვნელობა ჰქონდა.

ლატვალას უპირატესობამ მალე ნახევარ წუთს მიაღწია, მაგრამ დღის ბოლო სპეცმონაკვეთზე მან შეცდომა დაუშვა და რბოლა ავარიით დაასრულა. ამის შემდეგ, ლოებმა სოლიდური უპირატესობა მიიღო და ის ხელიდან აღარც გაუშვია. კვირის სუპერსპეცმონაკვეთზეც ის ყველაზე სწრაფი იყო, რისთვისაც დამატებით საბონუსო 3 ქულა დაიმსახურა და საბოლოო ჯამში, ჩემპიონატის კლასიფიკაციაში 28 ქულა ჩაიწერა.

დამაჯერებლად იასპარეზა დანიელ სორდომ, ვისაც პირველივე დღეს, საკიდარი დაუზიანდა. მაგრამ ამის მიუხედავად, ესპანელმა შეძლო მეორე ადგილზე გადასვლა. პირველი ორი დღის განმავლობაში, მას მეორე ადგილს პეტერ სოლბერგი ეცილებოდა, მაგრამ ნორვეგიელმა ბოლომდე ტემპი ვერ შეინარჩუნა და საბოლოოდ, მესამე ადგილს დასჯერდა. სხვათა შორის, სოლბერგს საქმე მეორე დღეს აერია, როცა საბურავები არასწორად შეარჩია.

მეოთხე ადგილი კი მიკო ჰირვონენმა დაიკავა, რომელმაც რბოლა უხეიროდ კი დაიწყო, მაგრამ შემდეგ, რამდენიმე სპეცმონაკვეთზე უსწრაფესი იყო და ისე ჩანდა, რომ სოლბერგს პრობლემებს შეუქმნიდა. თუმცა, მეოთხე დღის ღამის სპეცმონაკვეთზე შეცდომა დაუშვა და საბოლოოდ, „სიტროენში“ თავისი სადებიუტო რბოლა, კვარცხლბეკს მიღმა დაასრულა.

„ყოველთვის კარგია, როცა სეზონს გამარჯვებით იწყებ. პირველივე ეტაპზე მაქსიმალური ქულები ავიღე. საერთოდ, მონტე კარლო ჩემი ფავორიტი რბოლაა. რა იქნება სხვა რბოლებში, ამას მომავალი გვიჩვენებს“, – ნარბოლევს განაცხადა ლოებმა.

მონტე კარლოს რალი. საბოლოო შედეგები

1. სებასტიან ლოები (საფრანგეთი, სიტროენი) 4:32:39.900

2. დანიელ სორდო (ესპანეთი, მინი) +02:45.500

3. პეტერ სოლბერგი (ნორვეგია, ფორდი) 03:14.100

4. მიკო ჰირვონენი (ფინეთი, სიტროენი) 04:06.800

5. ევგენი ნოვიკოვი (რუსეთი, ფორდი) 06:03.400

6. ფრანსუა დელკური (საფრანგეთი, ფორდი) 07:47.900

7. პიერ კამპანა (საფრანგეთი, მინი) 08:31.400

8. ოტ ტაენაკი (ესტონეთი, ფორდი) 10:34.600

9. მარტინ პროკოპი (ჩეხეთი, ფორდი) 16:10.700

10. არმინდო არაუჟო (პორტუგალია, მინი) 16:16.600

საქმე დაიხურა – „შევროლე ვოლტი“ უხიფათო ავტომობილად სცნეს

2012-01-21T15:16:00.001-08:00

NHTSA Clears Chevrolet Volt on Fire Risk, Says Everything's Okay Now

21 იანვარი

„შევროლე ვოლტის“ პრობლემები დასრულდა – საგზაო უსაფრთხოების ეროვნულმა ადმინისტრაციამ (NHTSA – ნეიშნლ ჰაივეი ტრეფიკ სეიფტი ედმინისტრეიშნ) დაადგინა, რომ ავარიის შემდგომ მომხდარი ხანძრები, აკუმულატორების ბლოკის კონსტრუქციის ბრალი არ იყო.

რვაკვირიანმა შემოწმებამ აჩვენა, რომ აკუმულატორების ბლოკის კონსტრუქცია სრულიად უხიფათოა. და კიდევ უფრო უხიფათო გახდა მას შემდეგ, რაც „ჯენერალ მოტორსმა“ მას მოდიფიკაცია ჩაუტარა. ჩატარებული სამუშაოების შედეგად, გვერდიდან დაჯახებისას, აკუმულატორების ბლოკზე ნაკლები დარტყმა მოდის და ის დაზიანებისადმი უფრო მედეგია.

„მიღებული მონაცემების ანალიზის შემდგ, NHTSA იმ დასკვნამდე მივიდა, რომ „შევი ვოლტი“, ან სხვა ელექტრომობილები, ხანძრისადმი იმაზე მეტ მიდრეკილებას არ ავლენს, ვიდრე შიდაწვისძრავიანი ავტომობილები“, – ნათქვამია სააგენტოს ოფიციალურ განცხადებაში.

NHTSA–მ „შევროლე ვოლტის“ გამოკვლევები მას შემდეგ დაიწყო, რაც ქრეშ ტესტებისას ნაავარიები ავტომობილების აკუმულატორების ბლოკებს, ავარიიდან რამდენიმე დღის შემდეგ, ცეცხლი გაუჩნდა, ან ნაპერწკლები ყარა. „ჯენერალ მოტორსმა“ საკუთარი ინიციატივითაც ჩაატარა გამოკვლევა, რომლის შედეგადაც დადგინდა, რომ აკუმულატორების ბლოკის გამაგრილებელი სისტემის დამცავი კონსტრუქცია ადვილად ზიანდება, რის შედეგადაც, იქიდან გამოსული სითხე მოკლე ჩართვას იწვევს.

ამის გამო, „ჯენერალ მოტორსმა“ სასწრაფოდ შეიმუშავა აკუმულატორების გაუმჯობესებული დამცავი სტრუქტურა. გარდა ამისა, გამაგრილებელ სისტემაში დაამატეს სპეციალური სენსორი, რომელიც სისტემაში სითხის დონეეს აფიქსირებს და სითხის დონის შემცირების შემთხვევაში, გამაფრთხილებელ სიგნალს იძლევა.

NHTSA ასევე აცხადებს, რომ ხანძრის შემთხვევები არ დაფიქსირებულა იმ „ვოლტებზე“, რომლებიც უკვე მოძრაობენ ამერიკის გზებზე. ამავე განცხადებაში ნათქვამია, რომ ძლიერი ავარიების შემთხვევაში, ხანძრებისგან არავინაა დაზღვეული, თუმცა იგივე შეიძლება შიდაწვისძრავიან ავტომობილებზეც ითქვას.

„ჯენერალ მოტორსი“ კვლავ პირველია

2012-01-21T15:10:00.000-08:00

GM reclaims global sales crown with volume of 9M in 2011

21 იანვარი

„ჯენერალ მოტორსმა“ გასული წლის გაყიდვების შედეგები გამოაქვეყნა, რომელთა მიხედვითაც, კვლავ მსოფლიოს უდიდესი ავტომწარმოებელი გახდა. ამერიკულმა კომპანიამ სულ 9.03 მილიონი ავტომობილი გაჰყიდა. და ეს მისი მართული გაკოტრებიდან სულ რაღაც, ორ წელიწადში მოხდა.

წინა წელს, „ჯენერალ მოტორსმა“ 8.39 მილიონი ავტომობილი გაჰყიდა, რაც 7.6 პროცენტით ნაკლებია შარშანდლი გაყიდვების მოცულობაზე. შედარებისთვის, „ფოლკსვაგენის“ ჯგუფის შედეგი 8.16 მილიონია, რაც ამერიკული კომპანიის გაყიდვებზე დაახლოებით 11 პროცენტით ნაკლებია.

რაც შეეხება „ტოიოტას“, რომელსაც გენერლებმა ლიდერის წოდება ჩამოართვეს, მას ჯერ წლის შემაჯამებელი მონაცემები არ გამოუქვეყნებიათ, თუმცა პირველი სამი კვარტლის დინამიკის მიხედვით, მესამე ადგილს დაიკავებს. იაპონურ კომპანიას პირველ ცხრა თვეში მხოლოდ 5.77 მილიონი ავტომობილი ჰქონდა გაყიდული, დაახლოებით 8.8 პროცენტით ნაკლები, ვიდრე წინა წლის პირველ ცხრა თვეში. „ტოიოტას“ გაყიდვების კლება, იაპონიაში მომხდარმა სტიქიურმა უბედურებებმა, ასევე ტაილანდში მომხდარმა წყალდიდობამ განაპირობა.

„ჯენერალ მოტორსის“ მთავარი აღმასრულებელი დენ აკერსონი ამბობს, რომ მისი კომპანიისთვის, მსოფლიო პირველობაზე უფრო მნიშვნელოვანი, მოგების მარჟის გაზრდაა. რა თქმა უნდა, გაყიდვების ზრდა კომპანიას მორალურად ამხნევებს, თუმცა გაცილებით უკეთესი იქნება, თუ ეს აქციების ფასის ზრდაზეც აისახებაო.

ამ ცნობის გამოქვეყნების შემდეგ, გენერლების აქციების ფასები მხოლოდ 31 ცენტით, ანუ 1.26 პროცენტით გაიზარდა და 24.82 დოლარს მიაღწია. მაგრამ ეს ძალიან ცოტაა, რადგან მთავრობა ჯერ კიდევ ფლობს კომპანიის აქციების მესამედს და თუ თითო აქციას 53 დოლარად გაჰყიდის, ანგარიშს მხოლოდ ამ შემთხვევაში გაასწორებს. საინტერესოა, რომ 2010 წელს კომპანიის მოგებამ 6.17 მილიარდს მიაღწია, შარშან კი პირველ ცხრა თვეში 8.47 მილიარდი შეადგინა.

ბლუმბერგის საავტომობილო ინდუსტრიის ანალიტიკოსი კევინ ტაინენი ამბობს, რომ „ჯენერალ მოტორსისთვის“ მთავარი სწორედ მოგებაა და არა გაყიდული ავტომობილების რიცხვი და მსოფლიო პირველობა. მას მაგალითად მოჰყავს ის ფაქტი, რომ წლების განმავლობაში, ამერიკული კომპანია მსოფლიო ლიდერი კი იყო, მაგრამ ეს მის მოგებაზე დადებითად არ აისახებოდა.

გენერლების ყველაზე გაყიდვადი ავტომობილი „შევროლე კრუზია“, ბრენდებიდან კი ყველაზე მეტი, 4.7 მილიონი ავტომობილი „შევროლეს“ აქვს გაყიდული. ქვეყნებიდან კი ყველაზე დიდი ბაზარი ჩინეთია, სადაც 2.55 მილიონი ავტომობილია გაყიდული (წინა წელზე 8.3 პროცენტით მეტი). ამ მხრივ, შეერთებული შტატების ბაზარი, სადაც 2.5 მილიონი (ზრდა 13 პროცენტი) ავტომობილი გაიყიდა.

5 კილომეტრი გამარჯვებამდე

2012-01-21T11:11:00.000-08:00

Sebastien Loeb leads in Monte Carlo as podium fight closes up

21 იანვარი

სებასტიან ლოები რომ ამ სეზონს გამარჯვებით დაიწყებს, ეს უკვე ეჭვსაც აღარ იწვევს – მსოფლიოს რვაგზის რვაგზის ჩემპიონმა, მსოფლიო ჩემპიონატის მეოთხე დღის შემდეგაც, კიდევ უფრო გაზარდა მდევრებთან უპირატესობა, რომელთაგან უახლოესს, ესპანელ დანიელ სორდოს, ვინც ერთ დროს მისი თანაგუნდელი იყო, 2 წუთსა და 41 წამს უგებს.

სორდოსაც პრაქტიკულად განაღდებული აქვს მეორე ადგილი, რადგან პეტერ სოლბერგს თითქმის 20 წამს უგებს და სათუოა, ნორვეგიელმა ამ ჩამორჩენის ლიკვიდირება კვირის ერთადერთ სუპერ სპეცმონაკვეთზე შეძლოს, რომლის სიგრძეც მხოლოდ 5 კილომეტრია. არადა, სოლბერგმა ღამის ორივე სპეცმონაკვეთი შესანიშნავად საუკეთესო დროით დაასრულა. მაგრამ ეს საკმარისი არაა.

სამაგიეროდ, მის მესამე პოზიციასაც აღარ ემუქრება საფრთხე. მესამე დღის შემდეგ, მას მიკო ჰირვონენი წამოეწია, მაგრამ ფინელს ღამის პირველივე სპეცმონაკვეთზე შეცდომა მოუვიდა, დატრიალდა და რამდენიმე წამი დაკარგა, რისი ამოქაჩვაც შემდეგ ვეღარ შეძლო. როგორც ჩანს, ის ბედს უკვე შეეგუა, რადგან ამ შეცდომის შემდეგ, რისკის გარეშე გააგრძელა ასპარეზობა.

მონტე კარლოს რალი. მეოთხე დღე

1. სებასტიან ლოები (საფრანგეთი, სიტროენი) 4:29:12.100

2. დანიელ სორდო (ესპანეთი, მინი) + 02:41.600

3. პეტერ სოლბერგი (ნორვეგია, ფორდი) + 03:00.700

4. მიკო ჰირვონენი (ფინეთი, სიტროენი) + 04:05.600

5. ევგენი ნოვიკოვი (რუსეთი, ფორდი) + 06:00.800

6. ფრანსუა დელკური (საფრანგეთი, ფორდი) + 06:55.700

7. პიერ კამპანა (საფრანგეთი, მინი) + 08:21.300

8. ოტ ტაენაკი (ესტონეთი, ფორდი) + 10:27.200

9. მარტინ პროკოპი (ჩეხეთი, ფორდი) + 16:06.300

10. არმინდო არაუჟო (პორტუგალია, მინი) + 16:09.200

FIA–მ საკიდარის რეაქტიული სისტემა მაინც აკრძალა

2012-01-21T09:00:00.000-08:00

Formula 1 teams have been told by the FIA that reactive ride height systems will be banned for the 2012 season

21 იანვარი

ფორმულა ერთის ახალ სეზონს ჯერ სტარტი არ აუღია, თუმცა ტექნიკურ საკითხებზე ფარული ომი უკვე დაწყებულია. მიუხედავად იმისა, რომ სულ ცოტა ხნის წინ, საერთაშორისო საავტომობილო ფედერაციამ (FIA), „ლოტუს–რენოს“ სიახლე, საკიდარის ეგრეთ წოდებული რეაქტიული სისტემა ლეგალურად ცნო, ახლახანს საკითხისადმი თავისივე მიდგომა შეცვალა და მსგავსი სისტემები აკრძალულად გამოაცხადა.

FIA–მ გუნდებს სპეციალური წერილები დაუგზავნა, რომლითაც ახალი გადაწყვეტილება ამცნო. მაგრამ ჯერჯერობით უცნობია ამ აკრძალვის მიზეზი. არადა, ტოპ გუნდებს (ფერარის, მერსედესს და სავარაუდოდ, მაკლარენსაც) მსგავს სისტემაზე მუშაობა უკვე დაწყებული ჰქონდათ. მაგრამ იყვნენ ისეთებიც, რომლებსაც საკიდრის რეაქტიული სისტემის აკრძალვა სურდათ.

საკიდრის რეაქტიული სისტემა პირველმა „ლოტუსმა“ გასული სეზონის ბოლოს, აბუ დაბიში ჩატარებულ ახალგაზრდა პილოტების ტესტების დროს გამოიყენა. ამასთან, ინგლისური გუნდი აცხადებს, რომ ამ სისტემის შემუშავების პროცესში, FIA–ს შესაბამის სტრუქტურებთან მუდმივი კონტაქტი ჰქონდა და მისი შემუშავებაც იმის გამო გაგრძელდა, რომ ამაზე ოფიციალური ნებართვა არსებობდა.

სისტემა იმითაა გამორჩეული, რომ დამუხრუჭებისას, წინა საკიდარზე ზემოქმედებით, მანქანის ძირის გზის საფარიდან დაშორებას მუდმივად ინარჩუნებს. ამასთან, ის მოქმედებაში მუხრუჭების სატერფულზე ზეწოლისთანავე მოდის. ამ სისტემით, კრიტიკულ სიტუაციებში, მანქანის აეროდინამიკური მახასიათებლები და სტაბილურობა უმჯობესდება, რაც პილოტებს მოსახვევების უფრო სწრაფად გავლის საშუალებას აძლევს.

საინტერესოა, რომ „რედ ბულის“ შეფმა ქრისტიან ჰორნერმა ახლახანს სკეპტიკურად შეაფასა ასეთი სისტემის უპირატესობა და განაცხადა, რომ მას მანქანის მახასიათებლების მნიშვნელოვნად გაუმჯობესება არ შეუძლია. თუმცა, არაფერი უთქვამს იმაზე, მისი გუნდი ანალოგიური სისტემის შექმნას აპირებდა, თუ არა.

მართალია, ანალოგიური სისტემის შემუშავება „ფერარისაც“ დაწყებული ჰქონდა, თუმცა მისმა შეფმა სტეფანო დომენიკალიმ განაცხადა, რომ მის გამოყენებას მანამ არ აპირებდა, სანამ FIA ოფიციალურად დაადასტურებდა ასეთი სისტემის ლეგალურობას.

ცნობისათვის, „ლოტუსის“ სისტემა მექანიკურია და ის მოქმედებაში სამუხრუჭე სისტემას მოჰყავს. ამასთან, ის საკიდარის სტრუქტურაშია გაერთიანებული. და რამდენადაც ამ პროცესში პილოტის ხელი არ ურევია, ის ფ1–ის ტექნიკურ რეგლამენტს არ არღვევს.

ინდიქარში „ლოტუსით“ ბურდე და ლეგე იასპარეზებენ

2012-01-20T15:38:00.000-08:00

Lotus ramps up Indy racing program with Bourdais and Legge

20 იანვარი

მართალია, ფინანსური პრობლემების გამო, მალაიზიური საავტომობილო ჯგუფი „პროტონი“ სპორტული ავტომობილების მწარმოებელ ბრიტანულ კომპანია „ლოტუსს“ გაყიდვას უპირებს, მაგრამ ამით ამ უკანასკნელის სპორტული აქტივობა არ კნინდება. პირიქით, ლეგენდარული კოლონ ჩეპმენის მიერ დაარსებული კომპანია სულ უფრო მეტ პოპულარულ სარბოლ სერიაში ასპარეზობს.

„ლოტუსს“ გუნდბი ჰყავს ფორმულა ერთში, გრანპრი2–ში, გრანპრი3–ში, გამძლეობაზე რბოლებსა და კარტინგშიც კი. ახალი სეზონიდან კი ის ინდიქარში დაბრუნდება. ამასთან, ფორმულების კლასებში, ყველა გუნდის მანქანები „ლოტუსისთვის“ საფირმო – შავ–ყვითელ ფერებშია გამოწყობილი.

„ლოტუსი“ რბოლების მოყვარულებს, სარბოლი ავტომობილით განავარდების საშუალებასაც აძლევს, რისთვისაც სპეციალურად შეიმუშავა ფორმულის ტიპის ბოლიდი „ტაიპ 125“. ასევე „ევორას“ ბაზაზე შექმნა სარბოლი ავტომობილი, რომლის დაქირავებაც ინგლისის რამდენიმე ტრასაზეა შესაძლებელი.

რაც შეეხება ინდიქარს, ამერიკულ მსოფლიო სერიაში ხუთი სეზონის განმავლობაში, ყველა „ჰონდას“ ძრავებით აღჭურვილი ბოლიდებით ასპარეზობდა. მაგრამ ახალი სეზონიდან, იაპონურ ძრავებს კონკურნციას „შევროლეს“ და „ლოტუსის“ აგრეგატებიც გაუწევენ. „ლოტუსმა“ უკვე სამ კლიენტ გუნდთან გააფორმა ხელშეკრულება. სამივე თავის მანქანებს იმ სტილში გააფორმებს, რომლებსაც „ლოტუსი“ საკუთარი კატალოგით შესთავაზებს.

გარდა ამისა, ინგლისურ კომპანიას პარტნიორი გუნდიც უკვე შერჩეული ჰყავს. ესაა „დრაგონ რეისინგი“, რომელიც ფ1–ის გუნდის მსგავსად, შავ–ყვითელ ფერებში გამოეწყობა. რაც მთავარია, ის საქარხნო მხარდაჭერით ისარგებლებს და მარტო ძრავების მიწოდებით არ შემოიფარგლება.

„დრაგონ რეისინგი“ ჯეი პენსკეს – ამერიკელ მილიარდერ როჯერ პენსკეს შვილს ეკუთვნის, მისი მანქანებით კი ფრანგი სებასტიან ბურდე და ბრიტანელი ქალი კეტრინ ლეგე იასპარეზებენ. ბურდეს ამერიკაში ყველა იცნობს – ის სერია ჩემპ ქარის (რომელიცინდიქარს შეუერთდა) ოთხგზის ჩემპიონია და ცოტა ხანს ფ1–შიც ფამოდიოდა, ლეგე კი გერმანულ სერია DTM–სა და ჩემპ ქარში ასპარეზობდა, ახლა კი ინდიქარში სახელოვანი ქალი მრბოლის, ამერიკელ დანიცა პატრიკის დაჩრდილვას აპირებს...

ოსტინის ტრასა მზად აგვისტოში იქნება

2012-01-20T14:28:00.001-08:00

Austin venue to be finished in August

20 იანვარი

ნოემბერში ამერიკას ფორმულა ერთი დაუბრუნდება. რბოლა ტექსასის მთავარ ქალაქ ოსტინში, ახალთახალ ავტოდრომზე უნდა ჩატარდეს, რომლის მშენებლობაც ახლა მიმდინარეობს. მართალია, ტრასის (ცირკვიტ ოფ დი ამერიკას) მშენებლობა დაგვიანებით დაიწყო, მაგრამ პრესაში გავრცელებული ინფორმაციით, ის დაგეგმილზე ადრე ჩადგება მწყობრში.

ინტერნეტ გამოცემა „იტალიარასინგი“ გვამცნობს, რომ მიუხედავად იმისა, რომ ცოტა ხნის წინ, რბოლის ორგანიზატორებს შორის დავა მიმდინარეობდა, რის გამოც, ტრასის მშენებლობის საკითხი დიდი კითხვის ნიშნის ქვეშ იდგა, ახლა ყველაფერი წესრიგშია. მშენებლები კვირაში ექვსი დღე მუშაობენ. ისინი ამჟამად პადოკის ინფრასტრუქტურასა და ტრიბუნებს აშენებენ. ავტოდრომი აგვისტოში იქნება მზად, თუმცა ასფალტის ზედა ფენას მასზე რბოლამდე ცოტა ხნით ადრე დააგებენ.

ტექსასური რბოლის ერთ–ერთი ინიციატორი და ტრასის მშენებლობის ფინანსური მხარდამჭერი, საინვესტიციო კომპანია „პროფეტ კეპიტალ მენეჯმენტის“ მფლობელი ბობი ეპშტაინი პირობას იძლევა, რომ ტრასა რბოლას სრულ მზადყოფნაში შეხვდება. მისი თქმით, მთავარი ტრიბუნა, მოზრდილი საუნივერსიტეტო საფეხბურთო სტადიონის ტრიბუნის ტევადობისა იქნება. ამასთან, სხვა ადგილებში მაყირებლებს ხისგან აგებულ დროებით ტრიბუნაზე განათავსებენ.

"ნისანის" პატარა მხეცი სუპერ ავტომობილების წინააღმდეგ (ვიდეო)

2012-01-20T12:11:00.000-08:00

"ნისან ჯუკის" გასპორტულებული R–ვერსია დუბაიში, 24–საათიანი რბოლის წინ, სუპერ ავტომობილებს – "ლამბორგინი გალიარდო LP560-4–ს", "ფერარი 458 იტალიას" და "მერსედს SLS AMG–ს" შეაჯიბრეს. და ვინ მოიგო? ეს ვიდეო ნახეთ და გაკვირვებულები დარჩებით...

ლოები და დანარჩენები

2012-01-20T08:24:00.000-08:00

Sebastien Loeb pulls away in Monte Carlo Rally lead as Mikko Hirvonen flies

20 იანვარი

მონტე კარლოს შემოგარენში გრძელდებარალის მსოფლიო ჩემპიონატის წლევანდელი სეზონის პირველი ეტაპი – მონტე კარლოს რალი, რომელსაც მსოფლიოს რვაგზის ჩემპიონი სებასტიან ლოები კვლავ დამაჯერებლად ლიდერობს. რბოლის მესამე დღეს, მან კიდევ ერთი წუთით გაზარდა უპირატესობა უახლოეს მდევარ დანიელ სორდოსთან.

მართალია, ფრანგი მრბოლი რისკებს ერიდებოდა, თუმცა უპირატესობა მაინც გაზარდა. მართალია, სორდო მას ძლიერ ჩამორჩა, მაგრამ სამაგიეროდ, მეორე პოზიცია გაიმყარა, რაშიც ხელი პეტერ სოლბერგის პრობლემებმაც შეუწყო – ნორვეგიელს მე–13 სპეცმონაკვეთის მიწურულს საბურავი დაეშვა, რამაც დრო დააკარგვინა.

თავის მხრივ, აოლბერგს ახლა მესამე ადგილის შესანარჩუნებლად ბრძოლა მოუწევს, რადგან რბოლის მესამე დღეს, განსაკუთრებით სწრაფი იყო მისი ფინელი მდევარი მიკო ჰირვონენი. ამან მე–12 და მე–13 სპეცმონაკვეთებზე საუკეთესო დრო აჩვენა და სავარაუდოდ, მეოთხე დღესაც, ტრასაზე ერთ–ერთი უსწრაფესი იქნება.

რბოლა შაბათს, შუადღის და საღამოს სპეცმონაკვეთებით გაგრძელდება და კვირას, სუპერ სპეცმონაკვეთით დასრულდება.

მონტე კარლოს რალი. მესამე დღე

1. სებასტიან ლოები (საფრანგეთი, სიტროენი) 3:31:25.200

2. დანიელ სორდო (ესპანეთი, მინი) +02:12.400

3. პეტერ სოლბერგი (ნორვეგია, ფორდი) 03:19.200

4. მიკო ჰირვონენი (ფინეთი, სიტროენი) 03:43.000

5. ევგენი ნოვიკოვი (რუსეთი, ფორდი) 04:28.200

6. ფრანსუა დელკური (საფრანგეთი, ფორდი) 06:39.100

7. პიერ კამპანა (საფრანგეთი, მინი) 07:45.100

8. ოტ ტაენაკი (ესტონეთი, ფორდი) 08:44.800

9. პერ–გუნარ ანდერსონი (შვედეთი, პროტონი) 13:20.800

10. არმინდო არაუჟო (პორტუგალია, მინი) 14:40.700

„ტოიოტას“ უნივერსალ „პრიუსზე“ სოლიდური მოთხოვნა აქვს

2012-01-19T15:44:00.000-08:00

New Toyota Prius V Minivan Sales Off to a Good Start in the States

19 იანვარი

ჯერ მხოლოდ სამი თვე გავიდა მას შემდეგ, რაც „ტოიოტამ“ ამერიკულ ბაზარზე ჰიბრიდული „პრიუსის“ უნივერსალისძარიანი ვერსიის (პრიუს v) გაყიდვა დაიწყო და ის უკვე „შევროლეს“ პლაგ–ინ ჰიბრიდულ ელექტრომობილ „ვოლტზე“ მეტი გაჰყიდა, რომელიც უკვე ერთი წელია, იყიდება.

„ტოიოტას“ პრესმდივანი ქერლი შაფნერი ამბობს, რომ ოქომბრის ბოლო კვირიდან მოყოლებული, იაპონურმა კომპანიამ 8 399 ცალი ჰიბრიდული უნივერსალი გაჰყიდა. შედარებისთცვის, „ჯენერალ მოტორსმა“ შარშან მხოლოდ 7 671 ცალი „შევროლე ვოლტის“ გაყიდვა შეძლო.

ცნობისათვის, „პრიუს v“ 26,400 დოლარი ღირს, ჩვეულებრივ „პრიუსზე“ ოდნავ მეტი. „შევროლე ვოლტის“ ღირებულება კი 39 145 დოლარია. ოღონდ, ამ თანხას აკლდება 7 500 დოლარი, თანხა, რომელიც აშშ–ის მთავრობას, ეკოლოგიური ავტომობილების მყიდველებისთვის შეღავათად აქვს დაწესებული.

„ტოიოტას“ წელს მარტო შეერთებული შტატების ბაზარზე, „პრიუსის“ სახელის მქონე 220 000 ცალი ჰიბრიდული ავტომობილის გაყიდვა აქვს დაგეგმილი, რაც შარშანდელ მაჩვენებელზე 60 პროცენტით მეტია. გაყიდვების ასეთ ზრდას ხელი „პრიუსების“ ოჯახის მომრავლებამ უნდა შეუწყოს. ჰეჩბეკ და უნივერსალ „პრიუსების“ გარდა, გამაში ასევე შედის სუბკომპაქტური „პრიუს c“, რომლის გაყიდვებიც მალე დაიწყება და პლაგ–ინ ჰიბრიდული „პრიუსი“.

როგორც ცნობილია, შარშან „ჯენერალ მოტორსი“ 10 000 ცალი პლაგ–ინ ჰიბრიდული „შევროლე ვოლტის“ გაყიდვას გეგმავდა, თუმცა ამ გეგმის შესრულება ვერ შესძლო, რადგან დილერების შეუფერხებლად მომარაგებას ვერაფრით ახერხებდა. საქმე იქამდეც კი მივიდა, რომ ამერიკულმა კომპანიამ, თავის დილერებს საჩვენებელი „ვოლტების“ გაყიდვის უფლებაც კი მისცა, რამაც გაყიდვების ტემპი გაზარდა, თუმცა ამით საქმე მაინც ვერ გამოსწორდა. ბოლოს კი „შევროლე ვოლტს“ სახელი იმ სამმა ხანძარმა გაუტეხა, რომლებიც ნაავარიებ „ვოლტებს“, ავარიიდან სხვადასხვა დროის შემდეგ უჩნდებოდა.

შარშან, ამერიკის ბაზარზე ჰიბრიდულ ავტომობილებს 2.2 პროცენტი ეკავა. არადა, წინა წელს, წილი 2.4 პროცენტი იყო. კლების მიზეზი „პრიუსის“ მიწოდების შეფერხება გახდა, რაც თავის მხრივ, იაპონიაში მომხდარმა სტიქიამ განაპირობა. ცნობისათვის, „პრიუსზე“ ამერიკის ბაზარზე გაყიდული ჰიბრიდული ავტომობილების ნახევარი მოდის. პრიუსის გარდა, „ტოიოტა“ ამერიკაში სხვა ჰიბრიდულ ავტომობილებსაც ჰყიდის. ესენია ჰიბრიდული „ქემრი“ და „ლექსუს CT200h“.

დასახული გეგმა ვერც „ნისანმა“ შეასრულა. იაპონური კომპანია ამერიკაში 10–12 ათასი ელექტრომობილ „ნისან ლიფის“ გაყიდვას გეგმავდა, თუმცა მხოლოდ 9 241 ცალის რეალიზება შეძლო. ამის მიზეზიც იაპონიაში მომხდარი კატასტროფები გახდა.

„პრიუს v“ ჰეჩბეკისძარიან „პრიუსზე“ მძიმე მანქანაა. 100 კილომეტრის გასავლელად მას 5.6 ლიტრი საწვავი ჰყოფნის. ჩვეულებრივ „პრიუსს“ იმავე მანძლის გასავლელად 4.7 ლიტრი ბენზინი ჰყოფნის. რაც შეეხება „ვოლტს“, მარტო ელექტროენერგიის ხარჯზე გადაადგილებისას, მას საწვავი არ სჭირდება, თუმცა ასე მხოლოდ 50 კილომეტრის გავლა შეუძლია. როცა ენერგიის წყაროდ აკუმულატორებს და შიდაწვის ძრავს იყენებს, მისი ხარჯი 100 კილომეტრზე 2.5 ლიტრია, მარტო შიდაწვის ძრავის მიერ გამომუშავებული ენერგიით გადაადგილებისას კი ხარჯი 6.3 ლიტრს აღწევს.

„შევროლე“ გაყიდვების რეკორდს ამყარებს

2012-01-19T15:28:00.000-08:00

Chevy Sets New Record in 2011 with 4.76 Million Sales

19 იანვარი

გასული წელი რეკორდული გამოდგა „ჯენერალ მოტორსის“ ყველაზე მასობრივ ბრენდ „შევროლესთვის“, რომელმაც მთელს მსოფლიოში 4.76 მილიონი ავტომობილი გაჰყიდა. ეს ამერიკული კომპანიის ისტორიაში რეკორდული მაჩვენებელია. რაც შეეხება „ჯენერალ მოტორსს“, ამერიკულმა გიგანტმა მსოფლიო ლიდერობა დაიბრუნა, რაშიც მას „ტოიოტას“ პრობლემები (იაპონიაში მომხდარი მიწისძვრა და ცუნამი, ტაილანდური წყალდიდობა) დაეხმარა.

საბოლოოდ, „ჯენერალ მოტორსისთვის“ უდიდესი ბაზარი ჩინეთი გახდა, სადაც 2 547 203 ავტომობილი გაყიდა. ეს კი წინა წლის მაჩვენებელზე 8.3 პროცენტით მეტია. გაყიდული ავტომობილების რაოდენობის მხრივ, მეორე ადგილზე ამერიკული ბაზარია, სადაც 2 503 820 ავტომობილი, შარშანდელზე 13 პროცენტით მეტი გაიყიდა.

„შევროლესთვის“ უდიდესი ბაზარი შეერთებული შტატებია, სადაც ამ კომპანიამ 1 775 812 ავტომობილის რეალიზება შესძლო. ეს კი 13 პროცენტით სჭარბობს წინა წლის მაჩვენებელს. მეორე უდიდესი ბაზარი ბრაზილიაა, სადაც 632 201 ავტომობილია გაყიდული.ამ შემთხვევაში, „ჯენერალ მოტორსი“ არაფერს ამბობს წინა წლის მაჩვენებელთან შედარებით დინამიკაზე. „შევროლესთვის“ მხოლოდ მესამე უდიდესი ბაზარია ჩინეთი, სადაც მისი მარკით 595 068 ავტომობილი (წინა წელზე 9.5 პროცენტით მეტი) გაიყიდა.

სხვა ბაზრები, სადაც „შევროლეს“ გაყიდვები მნიშვნელოვნად გაიზარდა, არის: ვიეტნამი (79 პროცენტი), რუსეთი (49 პროცენტი), თურქეთი (30 პროცენტი) და გერმანია (21 პროცენტი). „შევროლეს“ მოდელებს შორის საუკეთესო გაყიდვებით სედანი „კრუზი“ გამოირჩევა, რომელიც მტელს მსოფლიოში 670 000 ცალია გაყიდული. ამასთან, იმ ორი წლის განმავლობაში, რაც ბაზარზეა, სულ 1.13 მილიონი „კრუზია“ გაყიდული.

„ჯენერალ მოტორსის“ დირექტორთა საბჭოს თავმჯდომარისა და მთავარი აღმასრულებლის, დენ აკერსონის თქმით, „შევროლეს“ ასეთი წარმატებები, როგორც განვითარებული, ასევე განვითარებადი ქვეყნების ბაზრებზე, მისი სამოდელო გამის სწრაფმა გაფართოება–განახლებამ გამოიწვია. რაც მტავარია, ახალი ავტომობილები, მთელი მსოფლიოს მომხმარებელთა მოთხოვნებს მაქსიმალურად შეესაბამება. და ეს მხოლოდ დასაწყისია. აკერსონი ამბობს, რომ მალე „შევროლე“ კიდევ უფრო გლობალური მოდელი გახდება – მის მიერ რეალიზებული ავტომობილების 60 პროცენტზე მეტს საზღვარგარეთული ბაზრები აითვისებს.

„ფოლკსვაგენი“ მეშვიდე „გოლფს“ პარიზში გვიჩვენებს

2012-01-19T13:28:00.000-08:00

VW Golf Mk7 (2012) scooped on test in Europe

19 იანვარი

„ფოლკსვაგენი“ მეშვიდე თაობის „გოლფს“ პარიზის მოტორ შოუზე გაგვაცნობს, რომელიც სექტემბერში ჩატარდება. ბრიტანულმა გამოცემა „ქარ–მა“ ახალი ჰეჩბეკის მსტოვრული ფოტოები მოიპოვა, რომელიც საგზაო ტესტების დროსაა გადაღებული. ამასთან, ახალი „გოლფი“ შალითებითაა შენიღბული.

ახალი ავტომობილი „ფოლკსვაგენის“ უახლეს პლატფორმაზეა ბაზირებული, რომელიც მოდულური პლატფორმის (მოდულური ტრანსვერსული მატრიცა) სახელითაა ცნობილი. ამ პლატფორმას გერმანული კომპანიის ჯგუფი თავის არაერთ მოდელზე გამოიყენებს. მათ შორის, „შოკდა ოქტავიაზე“, „აუდი TT–ზე“ და „სეატ ლეონზე“. ეს პლატფორმა იმით გამოირჩევა, რომ სხვადასხვა კლასის მოდელებისთვის მისი მოდიფიცირება მარტივია და იაფი ჯდება და ეს გერმანულ გიგანტს, ავტომობილის მომზადების და წარმოების ხარჯების შემცირების საშუალებას მისცემს. ამგვარად, მასზე შესაძლებელი იქნება არამხოლოდ ჰეჩბეკების, არამედ კაბრიოლეტების, უგზოობის მოდელებისა და მინივენების დამყნობა.ო

„ქარ–ის“ მიერ მოპოვებული ინფორმაციით, ახალი „გოლფის“ საბაზო ვერსია სამცილინდრიანი ძრავებით აღიჭურვება. რა თქმა უნდა, აგრეგატების გამაში ოთხცილინდრიანი ძრავებიც შევა, მათ შორის ისეთიც, რომელსაც ცილინდრების გათიშვის სისტემა მოემსახურება.

ძრავებს ან 6–საფეხურიანი მექანიკური, ან 7–საფეხურიანი ავტომატური (DSG) კოლოფები შეუწყვილდება. ამასთან, ამ უკანასკნელს ძრავთან ორდისკოიანი ქურო დააკავშირებს. გარდა ამისა, „გოლფის“ ტოპ ვერსიებს სრულამძრავიანი ტრანსმისიითაც აღჭურვავენ.

არაა გამორიცხული, რომ ვოლფსბურგელებმა ეს ავტომობილი ჰიბრიდული სისტემით და ელექტროძრავითაც აღჭურვონ. პირველში 2.0–ლიტრიან დიზელთან წყვილში ელექტროძრავი იმუშავებს, რომელსაც ენერგიით ლითიუმ–იონური ელემენტების ბლოკი მოამარაგებს. მისი ტევადობა კი საკმარისი იქნება იმისათვის, რომ ავტომობილმა ერთი სრული დამუხტვით 50 კილომეტრი გაიაროს.

სავარაუდდ, ახალი „გოლფი“ ევროპულ ბაზარზე ამ წლის ბოლოს, ან მომავალი წლის დასაწყისში გამოჩნდება.

ლოებმა უპირატესობა გაზარდა

2012-01-19T11:33:00.000-08:00

Loeb extends lead in Monte Carlo

19 იანვარი

მსოფლიოს რვაგზის ჩემპიონმა, ფრანფმა სებასტიან ლოებმა მონტე კარლოს რალის მეორე დღის შემდეგ, ლიდერობა მნიშვნელოვნად განიმტკიცა. ის ახლა უკვე წუთნახევარზე მეტს უგებს მეორეზე მყოფ ესპანელ დანიელ სორდოს (მინი). მესამე ადგილზე კი ისევ ნორვეგიელი პეტერ სოლბერგია, რომელიც სორდოსთან სამ წამს აგებს.

კარგა ხანს, ლიდერებს კვალში ედგა ლოების ყოფილი თანაგუნდელი, ფრანგი სებასტიან ოჟიე, რომელიც აჟამად „ფოლკსვაგენის“ წევრია, თუმცა მონტე კარლოში კლას სუპერ2000–ის სპეციფიკაციის „შკოდათი“ ასპარეზობდა. თუმცა მეორე დღის ბოლო სპეცმონაკვეთზე, მოყინულ გზაზე ავარია მოუვიდა და რბოლას გამოეთიშა.

„დღეს უფრო იოლი სპეცმონაკვეთები გვქონდა. მაგრამ ზოგიერთ მონაკვეთზე გავლას ტალახი ძალიან აძნელებდა. თუმცა, თავს კარგად ვგრძნობდი და რისკებსაც არ მოვრიდბივარ“, – განაცხადა ლოებმა, ვინც თითქმის ყველა სპეცმონაკვეთზე უსწრაფესი იყო, თუმცა მერვეზე მას სორდომ აჯობა. ოღონდ, მათ შორის სხვაობა მხოლოდ 0.2 წამით და ამით ბევრი არაფერი უხეირია.

მონტე კარლოს რალი. მეორე დღე

1. სებასტიან ლოები (საფრანგეთი, სიტროენი) 2:45:56.900

2. დანიელ სორდო (ესპანეთი, მინი) +01:37.200

3. პეტერ სოლბერგი (ნორვეგია, ფორდი) 01:40.900

4. მიკო ჰირვონენი (ფინეთი, სიტროენი) 03:40.400

5. ევგენი ნოვიკოვი (რუსეთი, ფორდი) 03:51.500

6. ფრანსუა დელკური (საფრანგეთი, ფორდი) 05:19.900

7. პიერ კამპანა (საფრანგეთი, მინი) 06:49.600

8. ოტ ტაენაკი (ესტონეთი, ფორდი) 07:00.600

9. პერ–გუნარ ანდერსონი (შვედეთი, პროტონი) 10:08.900

10. კევინ აბრინგი (ჰოლანდია, შკოდა) 10:31.400

ჟურნალი „ქარ“ „მაკლარენის“ ახალ სუპერ ავტომობილს გვაცნობს

2012-01-18T16:57:00.000-08:00

McLaren P12 (2013): CAR's scoop on the F1 successor

18 იანვარი

თებერვლის ნომერში, ბრიტანული ჟურნალი „ქარ“ „მაკლარენის“ ახალი სუპერ ავტომობილის შესახებ ინფორმაციას გამოაქვეყნებს. ამ ავტომობილის სახელია „მაკლარენ MP12“ და ის ლეგენდარული F1–ის შემცვლელი უნდა გახდეს. ეს ავტომობილი ბაზარზე ერთ წელიწადში უნდა გამოვიდეს. მის შესახებ ინფორმაცია სრულიად გასაიდუმლოებულია, თუმცა „ქარ–ის“ რეპორტიორებმა ახალი MP12–ის შესახებ მწირი ინფორმაცია მაინც მოიპოვეს.

პირველ რიგში უნდა ითქვას, რომ „ქარ–ის“ წყარომ, ახალი ავტომობილის თიხაში შესრულებული მაკეტი იხილა. მისი მონათხრობის მიხედვით, ფოტოშოპის სპეციალისტებმა ფოტო რობოტი შეადგინეს, კომპიუტერით დაამუშავეს და ჟურნალში დასაბეჭდი სახე მისცეს.

მათ MP12 ფილმ „აირობოტში“ მონაწილე „აუდის“ ფუტურისტულ ავტომობილს შეადარეს. რაც მთავარია, მას „მაკლარენის“ პირველ სერიულ სუპერქარ MP4–12C–ზე აგრესიული გარეგნობა აქვს. მისი კაბინა ავიაგამანადგურებლის სანთელს მოგაგონებთ.

MP12 ორადგილიანია. „მაკლარენის“ მმართველი დირექტორი ენტონი შერიფი ამბობს, რომ თავიდან სალონი სამადგილიანად ჩაიფიქრეს, მაგრამ მაკეტზე მუშაობის პროცესში გაირკვა, რომ ასეთი შეთანწყობით, ავტომობილი ზედმეტად დაიბერებოდა. ამიტომ, საბოლოოდ არჩევანი კლასიკურ ორადგილიან ვარიანტზე შეჩერდა.

ადრე გავრცელებული ინფორმაციით, ახალი ავტომობილი კარბონის კომპოზიტისგან დამზადებულ მონოკოკურ შასის დაეყრდნობა და მას აქტიური აეროდინამიკური ელემენტები ექნება. საკიდარის კონსტრუქციაში ადაპტირებადი ამორტიზატორები შევა, სტაბილიზაციის ელექტრონული სისტემა კი ხუთ რეჟიმში იმუშავებს.

რაც შეეხება ძრავს, ის იგივეა, რომელსაც „მაკლარენი“MP4–12C–ზე იყენებს. ესაა 3.8–ლიტრიანი V8 ტურბოძრავი, რომლის სიმძლავრეც, 600–დან 800 ცხენის ძალამდე გაიზრდება. გარდა ამისა, ავტომობილი სისტემა კერს–ითაც აღიჭურვება, რომელიც აჩქარების დროს, წამყვან ბორბლებს დამატებითი მაბრუნი ძალით მოამარაგებს. ისევე როგორც ფ1–ის ბოლიდებში, კერს–ის ასამოქმედებლად, საჭის რგოლზე მოთავსებულ ღილაკზე თითის დაჭერაც საკმარისი იქნება.

დაუზუსტებელი ინფორმაციით, MP12 (ეს ჯერ მანქანის შიდასაქარხნო ინდექსია) ადგილიდან 100 იკმ/სთ სიჩქარის აკრეფას 2.8 წამში შეძლებს, 160 კმ/სთ–მდე ასაჩქარებლად 5.5 წამი ეყოფა. 230 კმ/სთ–მდე კი – 20 წამი. რამდენი იქნება მაქსიმალური სიჩქარე, ეს ჯერ ვარაუდის დონეზეც კი უცნობია.

„ქარ–ის“ ინფორმაციით, „მაკლარენი“ მხოლოდ 500 ცალ MP12–ს გამოუშვებს და თითოეულს 750 000 ევროდ გაჰყიდის.

ლიმუზინი სუპერ ავტომობილის ბაზაზე (ვიდეო)

2012-01-18T15:38:00.000-08:00

Audi R8 V10 Falls Victim to the Stretch Limousine Industry

18 იანვარი

კომპანია „კარბონაიტ UK–ს“ უცნაური ახირება აქვს – სუპერ ავტომობილების ლიმუზინებად გადაკეთებაზე ექავება ხელები. ყოველ შემთხვევაში, სახელი „ფერარი 360 მოდენას“ დაგრძელებით გაითქვა. ახლა კი „აუდის“ R8 V10–ს მიადგა და მისგანაც საოცარი სიმახინჯის შექმნას აპირებს. სხვათა შორის, ორივე ავტომობილი კომპანია „ლიმო ბროკერის“ დაკვეთითაა.

ბრიტანულმა კომპანიამ გამოაცხადა, რომ „აუდი R8 V10–ს“ ბაზაზე ლიმუზინის დამზადებას უკვე შეუდგა და შემკვეთს სასურველ პროდუქტს ზაფხულის ბოლოს ჩააბარებს. მანამდ კი „ლიმო ბროკერმა“ ავტომობილის კომპიუტერული ფოტოები და ვიდეოკლიპი გამოაქვეყნა.

ლიმუზინის სალონში 8 სპორტული სავარძელი ოთხ რიგად მოთავსდება. ავტომობილი უცვლელად შეინარჩუნებს 5.2–ლიტრიან V10 ძრავს, რომელიც 528 ცხენის ძალას ავითარებს. დანარჩენი კი ფოტოებზე და ვიდეოზე ნახეთ...

„ფერარი FF–ის“ ნორვეგიული ვერსია ბიოეთანლს „სვამს“

2012-01-18T15:09:00.000-08:00

Norwegian Firm Converts Ferrari FF into a Bio-Ethanol Supercar

18 იანვარი

გყავთ „ფერარი FF“ და გინდათ, რომ თქვენმა ოთხბორბლიანმა სიამაყემ გარემოს ნაკლებად ავნოს? მაშინ ნორვეგიაში უნდა წაიყვანოთ, „პაციენტი“ კომპანია „კასტომიზედ.ნო–ს“ სპეციალისტებთან „ამკურნალოთ“ და ცოტა ხანში უკან ეკოლოგიურად სუფთა ავტომობილით დაბრუნდებით, რომელიც ბიოეთანოლის დიეტაზე იჯდება. რა თქმა უნდა, ასე იმ შემთხვევაში უნდა მოიქცეთ, თუ გეცოდინებათ, რომ E85 (85 ეთანოლი და დანარჩენი ბენზინი) მარკის საწვავის შოვნა პრობლემა არ იქნება.

„კასტომიზედ.ნო–სთან“ თქვენი ავტომობილის მოდიფიცირება 2 000 დოლარი დაჯდება. ამასთან, თქვენს „კვიცს“ ცხენის ძალებიც საგრძნობლად მოემატება. სტანდარტული 6.3–ლიტრიანი V12, რომლითაც „ფერარი FF“ არის აღჭურვილი, 660 ცხენის ძალას გამოიმუშავებს, რომლის წყალობითაც, ადგილიდან ასის აკრედას სულ რაღაც 3.7 წამში ასწრებს. ყოველი კილომეტრის გავლისას კი ატმოსფეროში 360 გრამ ნახშირორჟანგს გამოჰყოფს.

ნორვეგიული ოპერაციის შემდეგ კი, როგორც „კასტომიზედ.ნო“ ირწმუნება, ბიოეთანოლზე მომუშავე იმავე ძრავის სიმძლავრე 875 ცხენის ძალამდე იზრდება, სტანდარტული აჩქარების დრო 3 წამამდე მცირდება, გამონაბოლქვში ნახშირორჟანგის შემცველობა კი (ყოველ კილომეტრზე) 100 გრამზე დაბლა ჩამოდის.

„პეჟომ“ ლე მანის პროგრამა შეაჩერა

2012-01-18T10:28:00.001-08:00

Peugeot ends Le Mans programme with immediate effect

18 იანვარი

„პეჟომ“ გამოაცხადა, რომ დაუყოვნებლივ წყვეტს გამძლეობაზე რბოლების პროგრამას, რაც იმას ნიშნავს, რომ 24–საათიან რბოლაში მონაწილეობას აღარ მიიღებს.

ლე მანის სერიის რბოლებში „პეჟო“ 2007 წლიდან მონაწილეობდა. გასულ ხუთ სეზონში, ფრანგულმა კომპანიამ დიზელისძრავიან პროტოტიპ 908–ს რამდენიმე ვერსიით იასპარეზა და „აუდის“ ჰიბრიდულძრავიან მონსტრებს სერიოზული მეტოქეობაც გაუწია, 2009 წელს კი ლე მანის გამარჯვებული გახდა.

„ეს გადაწყვეტილება, ევროპაში ეკონომიკური კრიზისის კონტექსტში მივიღეთ. ჩვენმა კომპანიამ გადაწყვიტა, რომ წელს აქცენტი ავტომობილების გაყიდვებზე გააკეთოს“, – ნათქვამია „პეჟოს“ განცხადებაში.

გასულ სეზონში „ფრანგულმა ლომებმა“ ლე მანის საერთაშორისო თასი მოიგეს, სერია, რომელიც ახალი სეზონიდან, გამძლეობაზე რბოლების მსოფლიო ჩემპიონატად გარდაიქმნა. სხვათა შორის, მალე ლე მანს რამდენიმე ავტომწარმოებელი უბრუნდება და ამ ფონზე, „პეჟოს“ წასვლა სრული მოულოდნელობაა.

სხვათა შორის, „პეჟო“ წელს რამდენიმე ახალი ავტომობილის გამოშვებას გეგმავს. მათ შორის, 208–ს კომპანიის ყველაზე გაყიდვადი ავტომობილის პოტენციალი აქვს. მის გარდა, ბაზარზე გამოვა: „3008 ჰიბრიდ4“, 508 RXH, „508 ჰიბრიდ4“ და 4008.

„პეჟოსგან“ განსხვავებით, ტავის სპორტულ პროგრამის შეკვეცას არ აპირებს მისი თანაალიანსელი „სიტროენი“, რომლის საქარხნო გუნდიც რალის მსოფლიო ჩემპიონატში ასპარეზობს. მისი მთავარი პილოტი კი მსოფლიოს რვაგზის ჩემპიონი, ფრანგი სებასტიან ლოებია.

მონტე კარლოს რალის ლოები ლიდერობს

2012-01-18T09:25:00.000-08:00

Sebastien Loeb leads Monte Carlo Rally after Jari-Matti Latvala's crash

18 იანვარი

სებასტიან ლოებისთვის მსოფლიო ჩემპიონის რვა ტიტული საკმარისი არაა, ის ისევ გამარჯვებისთვის იბრძვის. მონტე კარლოში სტარტი აიღო ახალმა სეზონმა, რომლის პირველ ეტაპსაც მონტე კარლო მასპინძლობს.

რბოლის პირველი დღის შემდეგ, ლოები დამაჯერებლად ლიდერობს. ის წუთზე მეტს უგებს უახლოეს მდერვარს, ესპანელ დანიელ სორდოს, რომელსაც მხოლოდ წამით ჩამორჩება ნორვეგიელი პეტერ სოლბერგი. არადა, კარგა ხანს, რბოლის ლიდერი ფინელი იარი–მატი ლატვალა იყო, რომელსაც დღის ბოლო სპეცმონაკვეთზე ავარია მოუვიდა და რბოლას გამოეთიშა.

პრობლემები სხვებსაც შეექმნათ. მაგალითად, სოლბერგს ორჯერ მოუხდა საბურავების გამოცვლა, ფინელი მიკო ჰირვონენი კი კედელს შეეჯახა და მუხრუჭები დაუზიანდა. დღის დასაწყისში ავარია სორდოსაც მოუვიდა, რომელსაც „მინის“ საკიდარი“ დაუზიანდა, თუმცა მოგვიანებით ესპანელმა მაინც შეძლო პოზიციის გაუმჯობესება.

მეოთხე ადგილზე იმყოფება „ფოლკსვაგენის“ ფრანგი მრბოლი სებასტიან ოჟიე, ვინც ამჯერად „შკოდას“ ავტომობილით ასპარეზობს. ოჟიე შარშან ლოების თანაგუნდელი იყო, მაგრამ ახალი სეზონის წინ, „ფოლკსვაგენში“ გადავიდა, რომლისთვისაც ეს სეზონი სატესტოა. გერმანული კომპანია თავისი სარბოლი „პოლოთი“ რამდენიმე ეტაპზე იასპარეზებს, სხვა ეტაპებზე კი (ისევე როგორც მონტე კარლოს რალიზე) ოჟიე „შკოდას“ მანქანით გამოვა.

მეშვიდე ადგილზეა სახელოვანი ფრანგი ფრანსუა დელკური, რომელიც რალის მსოფლიო ჩემპიონატს რამდენიმეწლიანი პაუზის შემდეგ დაუბრუნდა. თუმცა, ის ლიდერს თითქმის 3 წუთით ჩამორჩება.

მონტე კარლოს რალი. პირველი დღე

1. სებასტიან ლოები (საფრანგეთი, სიტროენი) 1:30:30.100

2. დანიელ სორდო (ესპანეთი, მინი) +01:04.200

3. პეტერ სოლბერგი (ნორვეგია, ფორდი) 01:05.200

4. სებასტიან ოჟიე (საფრანგეთი, შკოდა) 02:21.100

5. ევგენი ნოვიკოვი (რუსეთი, ფორდი) 02:26.500

6. მიკო ჰირვონენი (ფინეთი, სიტროენი) 02:30.000

7. ფრანსუა დელკური (საფრანგეთი, ფორდი) 02:49.900

8. პიერ კამპანა (საფრანგეთი, მინი) 04:09.700

9. ოტ ტაენაკი (ესტონეთი, ფორდი) 04:14.000

10. პერ–გუნარ ანდერსონი (შვედეთი, პროტონი) 04:33.800

„მაზერატი“ ქროსოვერ „კუბანგს“ ამერიკაში გამოუშვებს

2012-01-17T17:07:00.000-08:00

Maserati Brings Kubang Sport Luxury SUV Concept to its Birth Town

17 იანვარი

ეს კონცეპტუალური ავტომობილი ახალი სულაც არაა. ისიც ცნობილია, რომ „კუბანგი“ „ჯიპ გრანდ ჩეროკისა“ და „დოჯ დურანგოსგან“ გაიზიარებს პლატფორმას. სამაგიეროდ, აბსოლუტურად ორიგინალური, მიმზიდველი გარეგნობა აქვს, რომელიც „მაზერატის“ სტილის ცენტრში შეიმუშავეს. რაც მთავარია, ამ ავტომობილით, იტალიური კომპანია, რომელიც „ფიატის“ ჯგუფში შედის, ამერიკის ბაზარს დაუბრუნდება.

დეტროიტამდე „კუბანგი“ ფრანკფურტის მოტორ შოუზე გვიჩვენეს. მისი გარეგნობა გაცილებით დახვეწილია, ვიდრე ამავე სახელის მქონე პირველი კონცეპტუალური ქროსოვერი იყო. სტილის შემუშავებას „პინინფარინას“ ყოფილი თანამშრომელი ლორენცო რამაჩოტი ხელმძღვანელობდა. სხვათა შორის პლატფორმას, რომელზეც ამ ავტომობილს ააგებენ, „მერსედეს–ბენცი“ წინა თაობის ML–ზე იყენებდა.

სავარაუდოდ, ავტომობილი „ფერარის“ წარმოების ძრავით აღიჭურვება. რომლით, ჯერ დადგენილი არაა. არსებობს მეორე ვარიანტიც – „კრაისლერის“ 6.4–ლიტრიანი V8 (სერია ჰემი), რომელსაც ამერიკული კომპანია „ჯიპ გრანდ ჩეროკი SRT8–ზე“ იყენებს. გარდა ამისა, მყიდველს დიზელისძრავიან „კუბანგსაც“ შესთავაზებენ. ძრავს კი სრულიად ახალი, 8–საფეხურიანი ავტომაური კოლოფი შეუწყვილდეა.

„კუბანგს“ მხოლოდ ამერიკული კომპანიის კუთვნილ დეტროიტულ ქარხანა ჯეფერსონ ნორთში გამოუშვებენ. ამ ავტომობილით, „მაზერატი“ კონკურენციას „პორშეს“ პოპულარულ ქროსოვერ „კაიენს“ გაუწევს, რომელსაც გერმანული კომპანიისთვის უზარმაზარი მოგება მოაქვს. ასანიშნავია, რომ აქამდე „კაიენი“ ლუქსის კლასის ქროსოვერების კლასში ერთადერთი ავტომობილია. მალე კი მას „მაზერატი კუბანგის“ გარდა, კონკურენციას „ლამბორგინის“ და „ბენტლის“ უგზოობის ავტომობილებიც გაუწევენ.

700C – „კრაისლერის“ უცნაური კონცეპტუალური მინივენი

2012-01-17T15:00:00.000-08:00

Chrysler Boss asks if the 700C Concept Minivan is Stupid, Beautiful or Crazy

17 იანვარი

როგორც წესი, ავტომწარმოებლები და მათი ხელმძღვაბნელები, გამოფენებზე საკუთარი ექსპონატებისთვის საქებარ სიტყვებს არ იშურებენ. მაგრამ თურმე, გამონაკლისი შემთხვევებიც ხდება ხოლმე. დეტროიტში სწორედ ასეთი შემთხვევა მოხდა, როცა „კრაისლერმა“ თავისი კონცეპტუალური მინივენი 700C წარადგინა.

„სულელური, მშვენიერი, თუ გიჟური?“ – ამერიკული ბრენდის გლობალური ოპერაციების შეფმა საად ჩეჰაბმა, ამ ავტომობილის დასახასიათებლად, საზოგადოებას სწორედ ამ სიტყვებიდან ერთ–ერთის გამოყენება სთხოვა. და პრინციპში, გასაკვირი არც არაფერი უთქვამს – ეს ავტომობილი ხომ ჩვეულებრივი ექსპერიმენტია, რომელმაც კომპანიის დიზაინერებს, მომავალი სტილის განვითარების გზა უნდა დაანახოს.

ავსტრალიურ საავტომობილო ვებგვერდ „დრაივთან“ საუბრისას, ჩეჰაბმა განაცხადა, ჩემმა კომპანიამ 700C–ს შესახებ ტექნიკური მონაცემები იმ მარტივი მიზეზის გამო არ გამოაქვეყნა, რომ ამ ავტომობილის მეშვეობით სურს გაიგოს დამთვალიერებლების და სპეციალისტების შეხედულება მის გარეგნობაზეო. მანვე დასძინა, რომ კონცეპტუალური მინივენის დეტროიტის შოუზე გამოტანა ბოლო მომენტში გადაწყდა.

კონცეპტუალური 700C, სერიული „თაუნ ენდ ქანთრის“ ბაზაზე აიგო. „კრაისლერი“ ამჟამად საკუთარი დიზაინის დახვეწას ცდილობს და მისი სტილისტები სწორედ ამით არიან დაკავებული. „ამ ავტომობილით, ახალი სტილის შემუშავების პროცესში, პირველი ნაბიჯი გადავდგით, ეს კონცეპცია მხოლოდ სავარჯიშოა, რომელმაც ახალი სტილის შემუშავებამდე უნდა მიგვიყვანოს. ამ ავტომობილით, ჩვენ ხალხს ვეკითხებით – ის სულელურია, მშვენიერი, თუ გიჟური?“ – დასძენს ჩეჰაბი.

„პორშემ“ პატარა როდსტერის წარმოება გადაიფიქრა

2012-01-17T14:22:00.000-08:00

No “Porsche for the People” Says Company's Boss - At Least Not Yet

17 იანვარი

ბოლო თვეების განმავლობაში „პორშე“ ძალიან აქტიურობს – ჯერ სრულიად ახალი 911 გაგვაცნო, ახლახანს კი ასევე ახალი „ბოქსსტერის“ წარმოებაც დაიწყო. გარდა ამისა, მყიდველს „პანამერას“ ყველაზე მძლავრი ვერსია – GTS შესთავაზა. მაგრამ ამით დაკმაყოფილებას არ აპირებს და წარმოებისთვის კომპაქტურ ქროსოვერ „კაიუნსა“ (კაიენ იუნიორ) და „პაიუნს“ (პანამერა იუნიორ), ასევე ჰიბრიდულ სუპერ როდსტერ „918 სპაიდრს“ ამზადებს.

უფრო მეტიც, სულ უფრო ხშირად იყო ლაპარაკი იმაზე, რომ „პორშეს“ ხელმძღვანელობა ყველაზე პატარა, „ბოქსსტერზე“ მომცრო მოდელის წარმოებასაც გეგმავდა, რომელიც „ფოლკსვაგენის“ ანალოგიურ როდსტერ „ბლიუსპორტის“ ბაზაზე უნდა შექმნილიყო. მაგრამ ბოლო მომენტში, ვოლფსბურგსა და ცუფენჰაუზენში ამ ავტომობილების წარმოება თითქმის ერთდროულად გადაიფიქრეს.

და თუ „ფოლკსვაგენის“ შემთხვევაში, ამის მიზეზი ისაა, რომ მარკეტოლოგებმა პატარა როდსტერი უპერსპექტივოდ მიიჩნიეს – მათი თქმით, ეს ავტომობილი მხოლოდ იმ შემთხვევაში იქნება რენტაბელური, თუ წლიურად 50 000 ცალი გაიყიდება. „პორშეში“ კი ჩათვალეს, რომ ეს ავტომობილი, ყველაზე მეტ კონკურენციას მათსავე „ბოქსსტერს“ გაუწევს...

ფოლკსვაგენ ბლიუსპორტი

არადა, ფრანკფურტის შარშანდელი მოტორ შოუს დროს, „პორშეს“ მთავარმა აღმასრულებელმა მათიას მიულერმა განაცხადა, რომ ძალიან გაუხარდება, თუ მისი კომპანია, პატარა როდსტერის წარმოებას გადაწყვეტს. ავტომობილისა, რომელიც წარსულში პოპულარულ როდსტერ „550 სპაიდერის“ იდეური შთამომავალი გახდება.

მაგრამ გერმანულ გაზეთ „ვირტშაფტს ვოხესთან“ საუბრისას, იმავე მიულერმა განაცხადა, რომ პატარა როდსტერის გამოშვება, მისი კომპანიის იმიჯს დააზარალებს. თუმცა, ასეთი ავტომობილის მომავალში გამოშვება მაინც არ გამორიცხა. დაკიდევ: „პატარა როდსტერის წარმოების დაწყება, ჩვენს საწარმოო შესაძლებლობებს გადატვირთავს. შესაძლოა, ასეთ ავტომობილს კლიენტთა ახალი თაობა სჭირდება“, – განაცხადა მიულერმა, ოღონდ არ დაუზუსტებია, თუ ვის გულისხმობს ახალი თაობის კლიენტებში.

სავარაუდოდ, ის „ფოლკსვაგენის“ პატარა როდსტერის პოტენციურ მყიდველს გულისხმობს – ორივე ავტომობილი ერთ პლატფორმაზე უნდა აგებულიყო და რადგან ვოლფსბურგში პროექტს წითელი შუქი აუნთეს, „პორშესთვის“ ამ ავტომობილის წარმოებისთვის მომზადება ძალიან ძვირადღირებული სიამოვნება გახდებოდა. სწორედ ესაა „პორშეს“ მიერ პატარა როდსტერზე უარის თქმის რეალური მიზეზი. არც იმიჯი და არც საწარმოო „გადაღლა“ აქ არაფერ შუაშია.

ბრუნო სენა „უილიამსში“

2012-01-17T12:11:00.001-08:00

Williams confirms Bruno Senna will race for the team in F1 in 2012

17 იანვარი

ბრაზილიელი ბრუნო სენა მომავალ სეზონს „უილიამსში“ გაატარებს. ის თავისსავე თანამემამულე რუბენს ბარიკელოს შეცვლის და ვენესუელელ პასტორ მალდონადოს გაუწევს პარტნიორობას. ბრუნო სენა ლეგენდარული აირტონ სენას დის შვილია. ფ1–ში მისი დებიუტი 2010 წელს, „ისპანია რეისინგში“ შედგა, გასული სეზონის დასკვნით ეტაპებზე კი „რენოს“ (ახალი სეზონიდან ლოტუსი ჰქვია) მანქანით იასპარეზა. რვა რბოლაში მისი მონაგარი მხოლოდ ორი ქულა იყო, რაც მეტწილად მანქანის რეგრესის შედეგია.

როგორც ცნობილია, „ლოტუს რენომ“ გასული სეზონის შემდეგ, ორივე პილოტი გამოცვალა და მათ ადგილზე ფრანგი რომენ გროჟანი და ფინელი კიმი რაიკონენი მიიწვია. 28 წლის სენა „ლოტუსის“ ახალ მანქანას პირველად ხერესში, პირველი ტესტების დროს მიუჯდება.

„ბრუნომ რბოლებში გამოსვლა 20 წლისამ დაიწყო, თუმცა მალე გამოიჩინა თავი ფ3–ის და გრანპრი2–ის სერიებში. 2008 წლის გრანპრი2–ის სეზონში, რომელიც ძალიან დაძაბული იყო, მეორე ადგილი დაიკავა და ორი გამორჩეული რბოლა მოიგო მონაკოსა და სილვერსტოუნზე. ამასთან, ამ უკანასკნელზე სველ ტრასაზე გაიმარჯვა. გარემოებათა გამო, წინა ორ სეზონში მას თავის გამოჩენის საშუალება არ მიეცა. ამიტომ, მისი შესაძლებლობების შესასწავლად, გარკვეული დრო დაგვჭირდა. ეს ტრასაზე და სიმულატორზე გავაკეთეთ და მისი სახით სწრაფი, ტექნიკურად კარგად მომზადებული პილოტი აღმოვაჩინეთ. მას ახალ გარემოსთან სწრაფად შეგუების და სწავლის კარგი უნარი გააჩნია. ისღა დაგვრჩენია, მისი ნიჭის ჩვენი მანქანით გამოვლენას დაველოდოთ“, – ამბობს ფრენკ უილიამსი.

„თავს პრივილეგირებულად ვგრძნობ იმის გამო, რომ „უილიამსმა“ მე ამირჩია. ამ გუნდს ბევრი მიღწევა აქვს და ვიმედოვნებ, რომ მის ისტორიაში მეც ჩავწერ ერთ გამორჩეულ ფურცელს. ჩემი შემოწმების პროცესი ინტენსიური იყო და დრო, რომელიც ფაბრიკაში გავატარე, გუნდის წევრების გაცნობაში დამეხმარა. აქ ყველა რესურსია იმისათვის, რომ კარგ შედეგებს მივაღწიოთ. საინტერესო იქნება იმ გუნდში ასპარეზობა, სადაც ბიძაჩემს უასპარეზია. გუნდის ზოგიერთი წევრი აქ აირტონის დროსაც მუშაობდა. ძალიან მინდა, ჩემს ქვეყანას, რომლის მხარდაჭერასაც მუდმივად ვგრძნობ, ბევრი სიხარული ვაჩუქო. ვამაყობ იმით, რომ ბრაზილიელი ვარ და მოტივირებული ვარ იმისათვის, რომ ყველას ვაჩვენო ჩემი შესაძლებლობები“, – განაცხადა ბრუნო სენამ.

„ტატას“ კონცეპტუალური ელექტრომობილი დეტროიტში

2012-01-16T16:54:00.000-08:00

Tata eMO proves you don't need a hatch on a hatchback

16 იანვარი

დეტროიტის მოტორ შოუზე, ინდურმა კომპანია „ტატა ტექნოლოჯიზმა“, რომელიც „ტატას“ ჯგუფის ნაწილია, კონცეპტუალური საქალაქო ელექტრომობილი eMO წარადგინა. მართალია, ამ ავტომობილის წარმოება არ იგეგმება, თუმცა „ტატა ტექნოლოჯიზის“ ავტომობილების პროგრამების და განვითარების შტოს პრეზიდენტმა კევინ ფიშერმა განაცხადა, რომ ამ ავტომობილით, მისმა კომპანიამ „ინდური ავტოინდუსტრიის შესაძლებლობები დაანახა“.

სახელი eMO ორი სიტყვის – „ელექტრიკ მობაილიტის“ (ელექტრული გადაადგილება) აბრევიატურაა და რა თქმა უნდა, იმაზე მიგვანიშნებს, რომ ამ პატარა მანქანას, მამოძრავებელ ძალას (ორი) ელექტრო ძრავი ანიჭებს. თავისი მცირე ზომების წყალობით, ეს შესანიშნავი ინდივიდუალური სატრანსპორტო საშუალებაა მეგაპოლისებისთვის. ამ ავტომობილზე მუშაობისას, „ტატა ტექნოლოჯიზმა“ სიახლე დააპატენტა, რაც იმაზე მეტყველებს, რომ ამ სიახლეების სერიულ წარმოებაში დანერგვას აპირებს. თავად ავტომობილიც, მიუხედავად იმისა, რომ მისი წარმოება არ იგეგმება (სიძვირის გამო – გამოშვების შემთხვევაში, ის 20 000 დოლარი ეღირება), სერიული წარმოებისთვის პრაქტიკულად მზადაა.

„ემო–ს“ ხუთი კარი აქვს. ამასთან, ორი უკანა კარი პატარაა და ისინი წინების საპირისპიროდ იღება. ამის გამო, ავტომობილს შუა საყრდენი არ აქვს. ამის საჭიროება არც არის – სალონი იმდენად პატარაა, რომ ძარის სიხისტე ორი საყრდენითაც უზრუნველყოფილია. კომპაქტურობის მიუხედავად, ავტომობილში თავისუფლად თავსდება ოთხი ადამიანი (ძღოლიანად). ავტომობილის სახურავის დიდი ნაწილი შემინულია, რაც ფართო სალონის შთაბეჭდილებას ქმნის. მაჩვენებლების დაფა უმარტივესია. მის მოვალეობას სენსორული მონიტორი ასრულებს, რომელზეც ნებისმიერი ინფორმაციის გამოტანაა შესაძლებელი. მგზავრთა უსაფრთხოებას კი 9 (!) აირბალიში ემსახურება.

ავტომობილს წამყვანი წინა ბორბლები აქვს, რომლებსაც ორი ელექტროძრავი ატრიალებს. მათი მონაცემები არ გამოქვეყნებულა. სამაგიეროდ, ცნობილია, რომ ენერგიით ძრავებს ლითიუმ–იონური ელემენტების ბლოკი ამარაგებს, რომლის ტევადობაც 18.4 კილოვატსაათია. ეს კი საკმარისია იმისათვის, რომ „ემო–მ“ ერთი სრული დამუხტვით, 160 კილომეტრის გავლა შესძლოა. ამასთან, მისი მაქსიმალური სიჩქარე მხოლოდ 105 კმ/სთ–ია.

„ჩვენთვის ეს მხოლოდ საინჟინრო პროექტია, ერთგვარი სავარჯიშო. მის წარმოებაზე არცერთი კომპანიისგან შეკვეთა არ მიგვიღია. მაგრამ თუ ვინმე „ემო–ს“ წარმოებას მოინდომებს, ჩვენ მასთან დიდი სიამოვნებით ვითანამშრომლებთ“, – შოუზე ავტომობილის პრეზენტაციისას განაცხადა ფიშერმა.

„ჰიუნდაი“ „ჯეი დი პაუერის“ რჩეულია კლიენტთა შენარჩუნების კუთხით

2012-01-16T15:45:00.000-08:00

Hyundai tops J.D. Power's Customer Retention Study

16 იანვარი

სამარკეტინგო კვლევებზე ორიენტირებულმა კომპანია „ჯეი დი პაუერმა“ შეაჯამა ავტომწარმოებელთა კლიენტების ერთგულების კვლევების შედეგები, რომლის შედეგადაც, შესაბამის რეიტინგში მოწინავე პოზიცია „ჰიუნდაიმ“ დაიკავა. კორეული კომპანიის მაჩვენებელი 4 პროცენტული ერთეულით, 64 პროცენტამდე გაიზარდა. „ჰიუნდაის“ ასეთი კარგი შედეგი მეტწილად ორმა მოდელმა – „ელანტრამ“ და „სონატამ“ განაპირობა.

„ჯეი დი პაუერის“ ანალიტიკოსების თქმით, „ჰიუნდაის“ ეს მიღწევა იმის შედეგია, რომ კომპანიამ გაზარდა სამოდელო გამა. ამასთან, ინტენსიურად ნერგავს ახალ ტექნოლოგიებს და აუმჯობესებს ხარისხს, რაც მისი ავტომობილების საბაზრო მიმზიდველობას განაპირობებს.

რეიტინგში მეორე ადგილი ერთდროულად ორმა კომპანიამ – „ფორდმა“ და „ჰონდამ“ დაიკავა, რომელთა პროდუქციისადმი მომხმარებელთა ერთგულების დონე 60 პროცენტს აღწევს. ყველაზე მეტად პოზიცია „ჯიპს“ აქვს გაუმჯობესებული, რომელსაც წინა რეიტინგთან შედარებით 17 საპროცენტო ერთეული აქვს მომატებული (51 პროცენტამდე).

გამოკვლევთ ასევე დადგინდა, რომ კომპანიებისადმი ერთგულებისადმი ყველაზე მეტი მიდრეკილება ქალებს და ახალგაზრდა მყიდველებს აქვთ. ამ მხრივ, უფრო ცვალებადები ხნიერი მყიდველები და მამაკაცები არიან. მაგალითად, „ჰიუნდაის“, „ჰონდას“, „კიას“ და „მერსედეს–ბენცის“ ავტომობილებისადმი ყველაზე მეტ ლოიალობას ქალები ავლენენ, „ფორდის“, „კიას“ და „მერსედეს–ბენცის“ ავტომობილებისადმი კი მსგავსი დამოკიდებულება ახალგაზრდა მყიდველებს აქვთ.

„ჰონდას“ ახალი NSX, ოღონდ ჯერ მხოლოდ კონცეპტუალური

2012-01-15T15:48:00.000-08:00

This is the New Acura / Honda NSX Sports Hybrid Concept

15 იანვარი

ხელმისაწვდომი სუპერ ავტომობილი „ჰონდა/აკურა NSX“ წლების განმავლობაში ძალიან პოპულარული იყო ამერიკის ბაზარზე. მაგრამ იაპონურმა კომპანიამ მისი წარმოება კარგა ხნის წინ შეწყვიტა. შემცვლელი კი აქამდე არ გამოუშვია. ამიტომ, ყოველ დიდ ამერიკულ საავტომობილო გამოფენაზე, მისგან ყველა NSX–ის შემცვლელს ელის.

„ჰონდამ“ რამდენჯერმე ისეთი კონცეპტუალური სპორტული ავტომობილი გვიჩვენა, რომლებზეც ყველა ამბობდა, რომ NSX–ის შემცვლელი უნდა ყოფილიყო, მაგრამ ასე არ ხდებოდა. და აი, დეტროიტის მოტორ შოუზე, ყინული გალღვა – იაპონურმა კომპანიამ კონცეპტუალური ჰიბრიდული NSX გვიჩვენა და თან გამოაცხადა, რომ მის წარმოებას 2015 წელს დაიწყებს.

დეტროიტშივე ცნობილი გახდა, რომ ახალ NSX–ს „ჰონდა ამერიკას“ კვლევისა და განვითარების ცენტრში შეიმუშავებენ, მას კი კომპანიის ოჰაიოს ქარხანა გამოუშვებს. ეს კი იმას ნიშნავს, რომ ეს ავტომობილი, უპირველეს ყოვლისა, ამერიკული ბაზრისთვის იქმნება, სადაც ის „აკურას“ მარკით გაიყიდება.

ისევე როგორც ორიგინალურ ავტომობილს, ახალ NSX–საც V6 ძრავი (სერია VTEC) ბაზაში ექნება მოთავსებული. ოღონდ, ამჯერად ძალურ დანადგარს სამი პატარა ელექტროძრავიც დაემატება, რომელთა დახმარებითაც, ავტომობილი სრულამძრავიანი გახდება. სისტემა „სპორტ ჰაიბრიდ SH–AWD–ს“ სახელითაა ცნობილი, სადაც აბრევიატურა სუპერ მართვად (SH – სუპერ ჰენდლინგ) სრულამძრავიანს (AWD – ოლ უილ დრაივ) ნიშნავს.

შიდაწვის ძრავი საწვავი ნარევის უშუალოდ წვის კამერაში მიწოდების სისტემითაა აღჭურვილი, მას კი ორდისკოიანი ქურის მეშვეობით, ტრანსმისია უკავშირდება, რომელთანაც ერთი ელექტროძრავია ინტეგრირებული. კიდევ ორი ელექტროძრავი, მბიძგველ ძალას წინა ბორბლებს ანიჭებს. ეს ძრავები მოსახვევების გავლისას მუშაობს, რაც ავტომობილის მართვას აადვილებს.

„ეს ჰიბრიდული სისტემა, ამ ავტომობილის მართვისას დიდ სიამოვნებას მოგანიჭებთ. „აკურას“ იდეაა, რომ ადამიანსა და მანქანას შორის ურთიერთკავშირი არსებობდეს და ამ იდეის განხორციელების შესანიშნავი ნიმუში აქ წარმოდგენილი NSX–ია“, – ამბობს „ჰონდა მოტორის“ პრეზიდენტი და მთავარი აღმასრულებელი ტაკანობუ იტო და დასძენს, რომ ახალი NSX–იც ისეთივე ტემპერამენტიანი ავტომობილია, როგორიც პირველი იყო. ამასთან, ის გარემოსადმი მეგობრულიც იქნება.“ჰონდას“ კონცეპტუალური NSX–ის ტექნიკურ–დინამიკური მახასიათებლები არ გამოუქვეყნებია. სამაგიეროდ ცნობილია, რომ ამ ავტომობილის შასი და ძარა მსუბუქი მასალებისგანაა დამზადებული. ამასთან, კონცეპტუალური მოდელი ორიგინალურს, გარეგნულად პრაქტიკულად არ ჰგავს.

პეტერანსელის მეათე, „მინის“ პირველი

2012-01-15T09:46:00.001-08:00

Stephane Peterhansel clinches 10th Dakar Rally win and first for Mini

15 იანვარი

სტეფან პეტერანსელმა მეათედ მოიგო დაკარის რალი–მარათონი და ეს ლეგენდარული რბოლა, „მინის“ პირველად მოაგებინა. ფრანგ მრბოლს, ვისაც მსუბუქი მანქანების რბოლა უკვე ოთხჯერ აქვს მოგებული, რბოლის პირველ ეტაპებზე, საბურავების ხშირი დაზიანება უქმნიდა პრობლემებს, თუმცა მოგვიანებით სოლიდურ უპირატესობას მიაღწია და მიუხედავად იმისა, რომ ფინიშამდე ორი ეტაპით ადრე, დიუნებში გაიჭედა და ბევრი დრო დაკარგა, ლიდერობა მაინც ბოლომდე შეინარჩუნა.

პეტერანსელი დიუნებზე

საბოლოოდ, მან 40 წუთზე მეტით აჯობა თავის ესპანელ თანაგუნდელ ნანი რომას, რომელმაც პირველობისთვის ბრძოლის შანსი ბოლოსწინა ეტაპზე დაკარგა, როცა დიუნებში გაიჭედა. „მინის“ კიდვ ერთი მრბოლი, პოლონელი კრჟიშტოფ ჰოლოვჩიკი თავიდან ასევე ლიდერთა შორის იყო, მაგრამ რბოლის შუა ეტაპებზე, რამდენჯერმე მექანიკური პრობლემები შეექმნა და საბოლოოდ, მეათე ადგილს დასჯერდა.

სამაგიეროდ, საბოლოო კლასიფიკაციაში, მოწინავე ოთხეულში შევიდა „მინის“ მანქანით მოასპარეზე კიდევ ერთი ეკიპაჟი, რომლისს საჭესაც რუსი ლეონიდ ნოვიცკი უჯდა. ამან პირველი ეტაპის მოგება შეძლო, თუმცა გამარჯვებისთვის ბრძოლის შანსი მალევე დაკარგა.

პეტერანსელი და მისი
ნავიგატორი ჟან–პოლ კოტრე

„მინის“ ეკიპაჟებს ყველაზე სერიოზული კონკურენცია „ჰამერის“ ეკიპაჟებისგან შეხვდათ, მაგრამ ორივეს გზად ბევრი პრობლემა შეექმნა და საბოლოოდ, მათგან საუკეთესო ამერიკელი რობი გორდონი გახდა, რომელმაც რბოლა მეხუთეზე დაასრულა. დაკარის შარშანდელმა ჩემპიონმა, ყატარელმა ნასერ ალ–ატიამ კი ფინიშსაც ვერ მიაღწია.

გორდონმა ბოლო, ყველაზე მოკლე ეტაპი მოიგო, მაგრამ ნვიცკის დაწევა ვეღარ შეძლო. აღსანიშნავია, რომ რამდენიმე დღის წინ, სტიუარდებმა მის მანქანაზე აკრძალული სისტემა – დაზიანებული საბურავების დასაბერი მოწყობილობა აღმოაჩინეს, რის გამოც შესაძლოა, ამერიკელის შედეგი საერთოდაც გააუქმონ.

საბოლოო კლასიფიკაცია

1. სტეფან პეტერანსელი (საფრანგეთი, მინი) 14:54:46

2. ნანი რომა (ესპანეთი, მინი) + 41:56

3. გინიელ დე ვილიერსი (სამხ. აფრიკა, ტოიოტა) + 1:13:25

4. ლეონიდ ნოვიცკი (რუსეთი, მინი) + 2:11:54

5. რობი გორდონი (აშშ, ჰამერი) + 2:16:53

6. ლუსიო ალვარესი (არგენტინა, ტოიოტა) + 4:05:52

7. კარლოს სოუსა (პორტუგალია, გრეიტ უოლი) + 4:30:24

8. რიკარდო ლეალ დუშ სანტუში (პორტუგალია, მინი) + 5:03:18

9. ბერნჰარდ ტენ ბრინკი (ჰოლანდია, მიცუბიში) + 5:11:18

10. კრჟიშტოფ ჰოლოვჩიკი (პოლონეთი, მინი) + 6:59:38

სუტილი და ჰამილტონი სასამართლოში

2012-01-15T09:01:00.001-08:00

Sutil's F1 career in doubt over nightclub fight

15 იანვარი

ადრიან სუტილს და ლუის ჰამილტონს სასამართლოში წარდგომა მოუწევთ. პირველს, როგორც ბრალდებულს და მეორეს, როგორც მოწმეს. სუტილს ბრალად ადამიანის სხეულის განზრახ დაზიანება ედება.

ერთი წლის წინ, ჩინეთის დიდი პრიზის შემდგომ წვეულებაზე, სუტილმა ბოთლის ნამსხვრევით, „ლოტუს რენოს“ აღმასრულებელი ერიკ ლუქსი დაჭრა. სუტილი ახლა 29 წლისაა და ამ დღეებში იუბილე აქვს. ის „უილიამსში“ გადასვლის რეალური კანდიდატია, თუმცა არაა გამორიცხული, რომ სასამართლოს შემდეგ, ფ1–ში მისი კარიერა დასრულდეს.

გერმანული გამოცემა „ფრანკფურტერ ალგემაინე ცაიტუნგი“ წერს, რომ სუტილი მიუნხენის სასამართლოს წინაშე ამ თვის ბოლოს წარსდგება. ამავე გამოცემის ინფორმაციით, გერმანელ მრბოლს, ვინც გასული სეზონის ბოლოს დაითხოვეს „ფორს ინდიადან“, ერთწლიანი პატიმრობა ემუქრება.

სუტილის მენეჯერი მანფრედ ციმერმანი იმედოვნებს, რომ სასამართლო გერმანელ პილოტს გაამართლებს. თუმცა ფაქტია, რომ გარჩევის დასრულებამდე, გუნდები მასთან საქმის დაჭერას მოერიდებიან. ამიტომ, დიდი შანსია იმისა, რომ ეს სეზონი სუტილს გაუცდება. ციმერმანი ამბობს, რომ დაცვის მხარე, საქმის სასამართლოს დაწყებამდე, დაზარალებულთან შეთანხმების მიღწევას ეცდბა. ის იმეოდვნებს, რომ გერმანელი მრბოლი ამ სეზონშიც ფ1–ში იქნება.

რაც შეეხება ჰამილტონს, ვინც სუტილის ახლო მეგობარია, წვეულებაზე ის ინციდენტის ადგილზე ყოფილა და ამიტომ, არაა გამორიცხული, რომ სასამართლოზე მოწმის სტატუსით დაიბარონ.

როსის სურს, რომ შუმახერს დაემსგავსოს

2012-01-15T06:37:00.000-08:00

Rossi wants to 'be like Schumacher' in decade

15 იანვარი

მოტორსპორტის ლეგენდა ვალენტინო როსი ამბობს, რომ მიხაელ შუმახერის სპორტული კარიერის ხაგრძლივობით აღფრთოვანებულია და სურს, რომ ათი წლის შემდგ, ისეთივე ფორმაში იყოს, როგორშიც ფორმულა ერთის გერმანელი ლეგენდაა.

შუმახერი ფ1–დან 2006 წლის სეზონის შემდეგ წავიდა, მაგრამ სამწლიანი უქმეობის შემდეგ, ორი წლის წინ დაბრუნდა. და მართალია, ჯერ კვარცხლბეკზეც ვერ ასულა, მაგრამ როსი თვლის, რომ შუმი ფიზიკურად შესანიშნავ ფორმაშია და ბედნიერი იქნება, თუ ათი წლის შემდგ, ისიც ასეთ ფორმას შეინარჩუნებს.

„სასიამოვნოა, როცა ხედავ, თუ რისი უნარი აქვს. ის ჩემზე ათი წლით უფროსია, მაგრამ კვლავ შესანიშნავ ფორმაშია და ენერგიითაა აღსავსე. მინდა, ათი წლის შემდეგ მეც ასეთ ფორმაში ვიყო“, – ამბობს 33 წლის როსი, ვისაც მოტოსპორტის უმაღლეს კატეგორიაში, შუმახერივით, მსოფლიო ჩემპიონის შვიდი ტიტული აქვს მოპოვებული.

იტალიელი დარწმუნებულია, რომ მას და გერმანელს უფრო მეტის მიღწევა შეუძლიათ: „მე იტალიელი მრბოლი ვარ და იტალიურ გუნდში გამოვდივარ. შუმახერი კი გერმანელია და გერმანულ „მერსედესში“ გამოდის. და ჩვენ ერთნაირი მიზნები და შანსები გვაქვს ჩემპიონატში“.

როსი დღეს „დუკატის“ წევრია, რომელთანაც კონტრაქტი წლევანდელი სეზონის ბოლოს უმთავრდება. მას ამ კონტრაქტის ორი წლით გახანგრძლივება სურს, რის შემდეგაც, კარიერას დაასრულებს. „ამის შემდეგ ვიფიქრებ, რით გავერთო“, – დასძენს როსი.

„ფერარის“ ახალ ბოლიდს ცხვირზე კეხი ექნება

2012-01-15T05:40:00.001-08:00

2012 Ferrari has ugly 'bump' on nose

15 იანვარი

ახალი სეზონიდან, ფორმულა ერთის რეგლამენტში კიდევ ერთი წესი ამოქმედდება, რომელიც მანქანის ცხვირის სიმაღლეს ზღუდავს. ამის მიზანი უსაფრთხოების გაუმჯობესებაა – ძალიან აწეული ცხვირი, წინ მიმავალი მანქანის ბორბალთან შეჯახების შემთხვევაში, მანქანას ზევით აგდებს. მაგრამ თუ ის ძალიან მაღლა არ იქნება აწეული, შეჯახებისას უბრალოდ დაიმტვრევა და მანქანას უკონტროლოს არ გახდის.

მაგრამ დაწეული ცხივირ, მანქანის აეროდინამიკას აუარესებს – ასე უფრო ძნელია მანქანის ძირისკენ ჰაერის მოწესრიგებული ნაკადის მიმართვა. მოკლედ, ეს წესი მანქანების გარეგნობას ძლიერ შეცვლის, გუნდები კი ახლებურ გადაწყვეტებს ეძებენ, რათა დანაკარგები მინიმუმამდე შეამცირონ.

როგორც გაირკვა, „ფერარიმ“ თავისებური გამოსავალი მოძებნა – მარანელოელებს მანქანის მონოკოკის წინა ნაწილი არ შეუცვლიათ. თუმცა, იმ ადგილიდან, სადაც მონოკოკს უერთდება, ცხვირის ნაწილი ძლიერ დაქანებული და დავიწროებულია და გადაბმის ადგილას ერთგვარ კეხს წარმოქმნის. შესაბამისად, შეცვლილი უნდა იყოს წინა ფრთის კონფიგურაციაც, რისი მიზანიც ისაა, რომ მანქანის ძირისკენ ჰაერის მაქსიმალურად მოწესრიგებული ნაკადი მიმართონ.

საყოველთაო შეფასებით, ასეთი ცხვირი მანქანას (რომლის კოდური სახელწოდებაცაა 663) ამახინჯებს. მაგრამ გუნდის შეფები – ლუკა დი მონტეძემოლო და სტეფანო დომენიკალი, მანქანის აღწერისას სიტყვა „მახინჯს“ არ იყენებენ. „რა თქმა უნდა, ის ლამაზი არაა, რისი მიზეზიც ისაა, რომ ახალი რეგლამენტი გვბორკავს“, – ამბობს დომენიკალი.

მაგრამ მსოფლიოს ორგზის ჩემპიონი ფერნანდო ალონსო მანქანას სხვანაირად აფასებს და ამბობს, რომ ის შარშანდელს „საკმაოდ ჰგავს“. ამასთან, „ბოლო ორ სეზონში რეგლამენტი ისე შეცვალეს, რომ მანქანები ერთმანეთს სულ უფრო ემსგავსება“, – ამბობს ესპანელი.

იტალიური გუნდ თავისი ახალი სარბოლი ავტომობილის პრეზენტაციას 3 თებერვალს ჩაატარებს.

ერთი ნაბიჯი დაკარის მეათე ტიტულამდე

2012-01-14T15:06:00.000-08:00

Stephane Peterhansel on brink of another Dakar Rally win

14 იანვარი

დაკარის დასრულებამდე ერთი ეტაპიღა დარჩა და თავისუფლად შეიძლება ითქვას, რომ რბოლას სტეფან პეტერანსელი მოიგებს. მას ეს ურთულესი მარათონული რბოლა ცხრაჯერ აქვს მოგებული, აქედან სამჯერ ოთხი ბორბლით. სწორედ მან მოიგო მე–12, ბოლოსწინა ეტაპი, რის შემდეგაც, უახლოეს მდევარს, ესპანელ თანაგუნდელ ნანი რომას თითქმის 43 წუთს უგებს.

იმის მიუხედავად, რომ ეტაპი 20 წუთიანი უპირატესობით დაიწყო, ფრანგს თავი არ დაუზოგავს და მთელი ეტაპი რისკის ზღვარზე გაიარა. ერთხელ სერიოზული შეცდომაც მოუვიდა, რამაც ლამის ყველაფერი წყალში ჩაუყარა, მაგრამ გადარჩა და ფინიშამდეც მშვიდობიანად მიაღწია. ნარბოლევს კი განაცხადა, დღეს ჩემი მიზანი მოგება კი არა, უპირატესობის შენარჩუნება იყოო.

„დიუნების გამო, ეს წლევანდელი დაკარის ურთულესი რბოლა იყო და ყველანაირად ვცდილობდი, რომ გუშინდელი შეცდომა არ გამემეორებინა. განსაკუთრებით ნაპრალებს ვერიდებოდი. მოკლედ, დღეს მთავარი მიზანი გამარჯვება არ ყოფილა“მ – განაცხადა პეტერანსელმა.

მისგან განსხვავებით, დიუნების ხაფანგს თავი ვერ აარიდა რომამ, ვინც თითქმის 20 წუთი ცდილობდა ამ ხაფანგიდან თავის დაღწევას და ბოლოს ეს შეძლო კიდეც. მას პრაქტიკულად განაღდებული აქვს მეორე ადგილი, რადგან მესამეზე მყოფ გინიელ დე ვილიერსს ნახევარ საათს უგებს.

დიუნებში გაიჭედა წინა ეტაპის გამარჯვებული რობი გორდონიც, რომელმაც დიდი გაჭირვებით შეძლო რბოლაში დაბრუნება, თუმცა საერთო ჩათვლაში ერთი ადგილით მაინც ჩამოქვეითდა. პეტერანსელისგან განსხვავებით, ის რისკს არ ერიდებოდა, რადგან ახლა მისი მთავარი მიზანი ეტაპების მოგებაა.

„ძალიან მინდოდა, „მინის“ ეკიპაჟები დიდი უპირატესობით დამემარცხებინა, მაგრამ დიუნებმა ამის საშუალება არ მომცა. ერთ–ერთი დიუნის გავლის შემდეგ, ერთი ბორბალი ქვიშაში ჩაეფლო, რაზეც 40 წუთზე მეტი დავკარგე. ამასობაში კი სტეფანმაც გამასწრო. მეც რბოლას მალე დავუბრუნდი, მაგრამ შემდეგ მანქანა გადამიყირავდა და კიდევ ბევრი დრო დავკარგე. ყოველივეს მიუხედავად, მაინც კარგი რბოლა იყო. არადა, ერთ მომენტში, „მინის“ უახლოეს ეკიპაჟს ნახევარ საათს ვუგებდი“, – განაცხადა ამერიკელმა.

კლასიფიკაცია 13 ეტაპის შემდეგ

1. სტეფან პეტერანსელი (საფრანგეთი, მინი) 1:28:51

2. ნანი რომა (ესპანეთი, მინი) + 42:57

3. გინიელ დე ვილიერსი (სამხ. აფრიკა, ტოიოტა) + 1:15:09

4. ლეონიდ ნოვიცკი (რუსეთი, მინი) + 2:12:56

5. რობი გორდონი (აშშ, ჰამერი) + 2:20:05

6. ლუსიო ალვარესი (არგენტინა, ტოიოტა) + 4:07:03

7. კარლოს სოუსა (პორტუგალია, გრეიტ უოლი) + 4:32:00

8. რიკარდო ლეალ დუშ სანტუში (პორტუგალია, მინი) + 5:06:09

9. ბერნარდ ტენ ბრინკი (ჰოლანდია, მიცუბიში) + 5:11:41

10. კრჟიშტოფ ჰოლოვჩიკი (პოლონეთი, მინი) + 7:02:12

„აიბიემი“ სუპერტევად, ლითიუმ–აირის აკუმულატორებს ქმნის

2012-01-14T11:31:00.000-08:00

IBM developing air battery with 500-mile range

14 იანვარი

ელექტრომობილების ყველაზე დიდი ნაკლი სვლის მცირე სიშორეა. მართალია, ლითიუმ–იონური აკუმულატორები გაცილებით უკეთესია, ვიდრე აწ უკვე მივიწყებული ნიკელ–მეტალ ჰიდრიდული, მაგრამ ის მაინც არაა, რასაც ავტომწარმოებლები და მითუმეტეს, ავტომფლობელები ისურვებდნენ. ხშირ შემთხვევაში, მათი მაქსიმუმი 160 კილომეტრია და თანაც, ენერგიის მარაგის შევსებასაც ბევრი დრო უნდა. ესეც რომ არა, ასეთი ელემენტების ბლოკების წონა 300 კილოგრამზე მეტია ხოლმე, რაც მანქანას ამძიმებს.

მაგრამ მალე შეიძლება ყველაფერი უკეთესობისკენ შეიცვალოს. ყოველ შემთხვევაში, კომპანია „აიბიემი“ ამას გვპირდება. ტექნოლოგიურმა გიგანტმა ახალი ტიპის, ლითიუმ–აირის ელემენტები შეიმუშავა, რომელიც წინასწარი მონაცემებით, ლითიუმ–იონურ ელემენტებზე 1000–ჯერ მეტ ენერგიას იტევს. ამასთან, მათი ზომა ხუთჯერ ნაკლებია და მათი მუშაობის ვადა – ხუთჯერ მეტი.

მაშ, ავშენებულვართ! და რა აკავებს „აიბიემს“? რატომ ახლავე არ შეუდგება ახალი ელემენტების მასობრივ წარმოებას? საქმე ისაა, რომ ჯერჯერობით, ლითიუმ–აირის ელემენტებს ერთი სერიოზული ნაკლი მაინც აღმოაჩნდა – ხშირი დამუხტვა–განმუხტვა მის სტრუქტურას ანადგურებს.

მაგრამ „აიბიემის“ სპეციალისტები ახლა სწორედ ამ პრობლემის მოგვარებაზე მუშაობენ და როგორც ამერიკული კომპანია აცხადებს, ამ მიმართულებით წინსვლაც აქვს. აღმოჩენილია ელექტროლიტური ნივთიერება, რომლის გამოყენბის შემთხვევაშიც, ლითიუმ–აირის ელემენტი ხშირ დამუხტვა–განმუხტვას უძლებს.

მალე ამ ელექტროლიტის გამოცდა დაიწყება. ასეთი ელემენტებით აღჭურვილი სრულმასშტაბიანი პროტოტიპის გამოცდა 2013 წელს დაიწყება, ასეთი ელემენტების მასობრივი წარმოება კი რამდენიმე წელიწადში იქნება შესაძლებელი.