ლონდნური საავტომობილო აუქციონის ვარსკვლავები

31 აგვისტო

ლამბორგინი მიურა SV ჯოტა

..............................

ლეგენდარული ავტომობილების მოყვარულებისა და დამფასებლებისთვის, 27 ოქტომბერი განსაკუთრებული დღე იქნება - ამ დღეს, ლონდონში გაიმართება საავტომობილო რარიტეტების აუქციონი, რომელზეც რამდენიმე ლეგენდარული ავტომობილის შეძენა იქნება შესაძლებელი. რა თქმა უნდა, სასურველი ავტოს საკუთარ ფარეხში დაყენებას მხოლოდ ისინი შეძლებენ, ვისაც ამისათვის მილიონები არ ენანება.

გასაყიდ ავტომობილებს შორისაა ”ლამბორგინი მიურა SV ჯოტა”. ცნობისათვის, ასეთი ავტომობილი იტალიურმა კომპანიამ სულ ხუთი ცალი დაამზადა. ის ”ლამბორგინის” ტესტ პილოტ ბობ უოლესის მიერ მოდიფიცირებულ ვერსია ”მიურა პრივატას” სპეციალურად მიეძღვნა. ეა ძალიან იშვიათი ავტომობილია ანტიკვარული მანქანების ბაზარზე და ამდენად, ძალიან ძვირიც.

ამ ავტომობილს სპეციალური რესტავრაცია, ამ საქმის სპეციალისტმა გარი ბობილეფმა ჩაუტარა. როგორც ავტომობილის პატრონი ამბობს, რესტავრაცია ძვირი არ დაჯდა, რადგან მისი ”მიურა” ისედაც შესანიშნავ მდგომარეობაში იყო. ასეა თუ ისე, აუქციონის ორგანიზატორები იმედოვნებენ, რომ ”ლამბორგინი მიურა SV ჯოტა” 1.25-1.7 მილიონ დოლარად გაიყიდება.

ასტონ მარტინ DB5

..............................

კიდევ უფრო ძვირად უნდა გაიყიდოს აუქციონის მორიგი ექსპონატი - ”ასტონ მარტინ DB5”, რომელიც კინოსამყაროში ბონდმობილის სახელითაა ცნობილი (ის ჯეიმს ბონდის ორ ფილმში - ”გოლდფინგერსა” და ”თანდერბოლშია” გადაღებული). ეს მანქანა ოდესღაც ფილადელფიელ ბიზნესმენ ჯერი ლის სულ რაღაც 12 000 დოლარად, უშუალოდ ”ასტონ მარტინისგან” შეუძენია, რომლის ფაბრიკაშიც, კინოსა და ავტოსამყაროს ვარსკვლავს მტვერი ედებოდა.

ლი აღიარებს, რომ თავისი ”ბონდმობილის” საჭეს არასდროს მისჯდომია, თუმცა ის ყოველთვის მოვლილი და გაკრიალებული იდგა პატრონის ფარეხში. ასე გასულა 40 წელი. მერე კი ბონდის პარტნიორი ლის ერთ-ერთ ნაცნობს აღმოუჩენია და უთქვამს, რომ შესაძლოა, ეს ავტომობილი დღეს მილიონები ღირდეს. ასე მიაღწია ლონდონის აუქციონამდე შონ კონერის ოთხბორბალა პარტნიორმა.

სხვათა შორის, ეს ავტომობილი აღჭურვილია ყველა იმ საოცრებით, რომლებიც მოუხელთებელ სუპერ აგენტს, მისი საქმიანობის დროს ეხმარებოდა. თანაც, ყველა მოწყობილობა დღესაც მწყობრშია და თუ ბონდს დასჭირდა, მათს გამოყენებას შეძლებს.

საინტერესოა, რომ ბონდის ფილმებისთვის სულ ორი ”ასტონ მარტინ DB5” გამოიყენეს, მაგრამ მეორე ეგზემპლარის ბედი დიდი ხანია, უცნობია. ის ფლორიდელ ბიზნესმენ ენტონი პულიეზეს ეკუთვნოდა, მაგრამ ამ მანქანის შესახებ, 1997 წლის შემდეგ, არაფერია ცნობილი. ამ კაცს მეორე ”ბონდმობილი” 1986 წელს, 275 000 დოლარად შეუძენია და პატარა ქალაქ ბოკა რატონის აეროპორტის ერთ-ერთ კერძო ანგარში დაუყენებია, საიდანაც 11 წლის შემდეგ, გაურკვეველ ვითარებაში დაიკარგა.

ლონდონური აუქციონის ორგანიზატორები იმედოვნებენ, რომ შემორჩენილი ბონდმობილი დაახლოებით 5 მილიონ დოლარად გაიყიდება.

ელექტრომობილების სიჩქარის რეკორდი სტუდენტებმა დაამყარეს

Buckeye Bullet Sets EV Speed World Record

31 აგვისტო

ავტოინდუსტრიის ისტორიის დასაწყისში, ელექტრომობილები ტრანსპორტის ერთ-ერთ ყველაზე პერსპექტიულ საშუალებად იყო მიჩნეული, თუმცა საჭირო ტექნოლოგიების განუვითარებლობამ, ასეთ მანქანებს საუკუნეზე მეტი ხნის განმავლობაში ჩაუკეტა ბაზრის კარი.

მაგრამ ვითარება იცვლება - გვინდა თუ არა, უნდა შევეგუოთ იმ აზრს, რომ არცთუ შორეულ მომავალში, ჩვენი ავტომობილი უხმაურო იქნება და მას მამოძრავებელ ძალას ელექტროძრავი მიანიჭებს. სამაგიეროდ, ის დაახლოებით იმდენივე ელექტროენერგიას მოიხმარს, რამდენსაც ჩვეულებრივი საყოფაცხოვრებო მაცივარი.

თქმა ადვილია, მაგრამ თანამედროვე ავტომოყვარულის გონება ასეთ რადიკალურ ცვლილებას ადვილად ვერ შეეგუება. მყიდველი თუ დარწმუნებული არ იქნა, რომ ელექტრომობილი ისეთივე დინამიური და მძლავრი შეიძლება იყოს, როგორებიც თანამედროვე შიდაწვისძრავიანი ავტომობილებია, მათკენ არც გაიხედავს. მოკლედ, ელექტრომობილებს შესაბამისი პროპაგანდა ესაჭიროებათ და ამ მხრივ, რა უნდა ყურადღების მიქცევის იმაზე უკეთესი საშუალება, ვიდრე სიჩქარის მსოფლიო რეკორდის დამყარებაა.

რეკორდების დამყარებაზე კი ამერიკაში, სხვადასხვა უნივერსიტეტები და მათი სტუდენტები ზრუნავენ. ისინი მიზნის მისაღწევად, ნამდვილ მონსტრებს ქმნიან, ისეთებს, რომლებზეც უფრო ხმელეთზე მქროლავ რაკეტას იტყვი და არა ავტომობილს. თუმცა მთავარი ისაა, რომ ეს ავტომობილი-რაკეტები ფენომენურ სიჩქარეს ავითარებენ და მსოფლიო მედიის (მათთან ერთად კი მომავალი მყიდველისაც) ყურადღებასაც იქცევენ. ჰოდა, რა გასაკვირია, რომ ასეთი უნივერსიტეტების საქმიანობას დიდი საავტომობილო კომპანიები აფინანსებენ.

ერთ-ერთი ასეთია შტატ ოჰაიოს უნივერსიტეტი, რომლის სტუდენტების მიერ შექმნილმა სარეკორდო ელექტრომობილმაც (სტრიმლაინერის კლასის), სახელად ”ბაქაიდ ბულეტ”, ბონვილის გამშრალი ტბის ფსკერზე, წარმოუდგენელი სიჩქარე - 495 კმ/სთ განავითარა. ეს კი 100 კმ/სთ-ით მეტია მსოფლიოს მანამდელ რეკორდზე, რომელიც ჯერ კიდევ წინა საუკუნის მიწურულს (1999 წელს), ინვალიდმა პილოტმა პეტ რამერფილდმა თავისი ”უაით კაითნინგით” დაამყარა.

ოჰაიოელი სტუდენტების ელექტრომობილის სიჩქარის რეკორდი ჯერ ოფიციალური არაა, რადგან გარბენის შესრულებისას, სიჩქარეს მხოლოდ ტრასაზე დამონტაჟებული სენსორები ზომავდა. რეკორდის ოფიციალურად დამტკიცებისთვის კი საერთაშორისო საავტომობილო ფედერაციის ოფიციალური დამკვირვებელია საჭირო. თუმცა, მთავარი ისაა, რომ სტუდენტებს ეს მიღწევა თავად რამერფილდმა მიულოცა, რომელმაც აღიარა, რომ მისი რეკორდი გაუმჯობესებულია.

მალე კი, რეკორდისთვის ოფიციალური სტატუსის მისანიჭევლად, ოჰაიოელები გარბენს ოფიციალური დამკვირვებლების წინაშე შეასრულებენ. ამისათვის კი საჭიროა, რომ საპირისპირო მიმართულებით შესრულდეს ორი გარბენი, რომელთა სტარტს შორისაც ერთ საათზე მეტი არ გავა. სტუდენტების თქმით, ერთ-ერთი საცდელიგარბენისას, მათმა რეკორდსმენმა 514 კმ/სთ-იც კი განავითარა, მაგრამ ეს შედეგი ოფიციალურად არ დაფიქსირებულა.

”ბაქაი ბულეტი” 600-კილოვატიანი ლითიუმ-იონური აკუმულატორების ბლოკითაა აღჭურვილი, რომელიც სტუდენტებს კომპანია ”A123 სისტემზმა” მიაწოდა. ბლოკში სულ 1600 ხალი ელემენტია თავმოყრილი, დაახლოებით ისეთები, როგორებსაც ლეპტოპებში იყენებენ. რა სიმძლავრის ძრავი ამოძრავებს რეკორდსმენს, ამაზე ინფორმაცია არ გამოქვეყნებულა.

”მაზდა” სტილს იცვლის

Mazda uses Shinari concept to show brand's future design language

30 აგვისტო

იაპონურმა კომპანია ”მაზდამ” ახალი კონცეპტუალური მოდელი - ”შინარი” მოამზადა, რომელიც გვიჩვენებს, თუ რა მიმართულებით განვითარდება ”მაზდას” ავტომობილების მომავალი კორპორატიული სტილი.

კონცეპტუალური ავტომობილის გარეგნობაზე ერთდროულად, ”მაზდას” გერმანული, ამერიკული და იაპონური სადიზაინერო სტუდიები მუშაობდნენ. ერთობლივად შემუშავებულ სტილს იაპონური სიტყვა ”კოდო” უწოდეს, რაც მათს ენაზე მოძრაობის სულისკვეთებას ნიშნავს.

”მაზდას” სადიზაინერო განყოფილების ხელმძღვანელ იკუდა მაედას განცხადებით, მისი კომპანიის ავტომობილების დიზაინი, უახლოეს მომავალში, სწორედ ამ ახალ სტილში შესრულდება. თუმცა მას არ დაუზუსტებია, თუ ახალი სტილის დამკვიდრება სერიულ ავტომობილებზე როდის დაიწყება.

ამ ეტაპზე, იაპონური კომპანიის დიზაინერები კონცეპტუალური ავტომობილის ინტერიერსაც ამუშავებენ, ”მაზდა” იმედოვნებს, რომ ინტერიერის გასაწყობად გამოყენებული მასალების ხარისხისა და სალონის გაფორმების დონით, მალე ეს კომპანია ისეთ ავტორიტეტებს გაუტოლდება, როგორებიცაა ”ბეემვე” და ”აუდი”.

სხვათა შორის, უკვე რამდენიმე წელია, ”მაზდა” ყოველ შემდგომ დიდ საავტომობილო გამოფენას ახალი კონცეპტუალური ავტომობილით ხვდება. კორპორატიული სტილის განმსაზღვრელი წინა კონცეპტქარი კი იყო ”ნაგარე”, რომლის პრემიერა 2006 წელს შედგა და რომელმაც ”მაზდას” ყველა მოდელის სტილი განსაზღვრა. მაგრამ შემდეგ კომპანია მისმა მთავარმა დიზაინრმა ლოურენს ფან დენ აკერმა დატოვა და ”მაზდამაც” ახალი სტილის შესაქმნელად მუშაობა მაშინვე დაიწყო. ფან დენ აკერი მაედამ შეცვალა, რომელიც ადრე ”მაზდა2-ის” და ”მაზდა RX-8-ის” სტილის შემუშავებაში მონაწილეობდა.

”ჰიუნდაი” სამ ახალ მომცრო მანქანას გამოუშვებს

Three New Hyundai Small Cars Coming

30 აგვისტო

მალე ”ჰიუნდაი” თავისი სამოდელო გამის კიდევ ერთხელ გადახალისებას დაიწყებს და საწარმოო პროგრამასაც გააფართოებს. ინტერნეტ გამოცემა ”ინსაიდლაინის” ინფორმაციით, უახლოეს 12 თვეში, კორეული კომპანია სამ ახალ პატარა ავტომობილს გამოუშვებს.

პირველი იქნება მოდელ ”აქცენტის” ამერიკული ვარიანტი, რომლის კონცეპტუალური ვერსიაც (RB) ”ჰიუნდაიმ” ახლახანს, მოსკოვის საავტომობილო შოუზე წარადგინა. ეს ავტომობილი კომპანიის შოურუმებში მერმის, ზაფხულში გამოჩნდება.

”აქცენტის” ამერიკული ვერსიისთვის სულ ორი ძრავი იქნება გათვალისწინებული. ერთია 1.4-ლიტრიანი, რომელიც 109 ცხენის ძალას იძლევა, მეორეს მუშა მოცულობა კი 1.6 ლიტრია და ის 122 ცხენის ძალას გამოიმუშავებს. ორივესთან შესაწყვილებლად განკუთვნილია 5-საფეხურიანი მექანიკური, ან 4-საფეხურიანი ავტომატური გადაცემათა კოლოფი.

მეორე ავტომობილი სპორტულია - ხელმისაწვდომი კუპე ”ველოსტერი”. მას წამყვანი წინა ბორბლები ექნება, პირველად მისი სერიული ვერსია კი დეტროიტის საავტომობილო შოუზე დაგვენახება. ამ ავტომობილისთვის ერთი, 1.6-ლიტრიანი ძრავია გათვალისწინებული, რომლის მაქსიმალური სიმძლავრეც 140 ცხენის ძალას აღწევს. კუპე ”ველოსტერის” გაყიდვები მერმისს, წლის ბოლოს დაიწყება.

დანოლოს, მესამე ახალი ავტომობილი განახლებული ”ელანტრა” იქნება, რომლის პრემიერაც ლოს ანჯელესის ავტო შოუზე ჩატარდება. ამ ავტომობილის გაყიდვები წელსვე უნდა დაიწყოს. ის კომფორტის უჩვეულოდ ბევრი საშუალებით იქნება გამდიდრებული. რაც მთავარია, მის კაპოტქვეშ მოთავსდება კორეული კომპანიის სერია ”თეტა II-ის” ოთხცილინდრიანი 2.0-ლიტრიანი ძრავი, რომელიც, როგორც მწარმოებელი ამბობს, გაუმჯობესებული ეკონომიკურ-ეკოლოგიური მახასიათებლებით გამოირჩევა.

”დონტო P1” - არგენტინული სუპერ სათამაშო

Donto P1 Track Car In the Works

28 აგვისტო

ბოლო წლებში, ავტოინდუსტრიაში პოპულარული ხდება ბიზნესის შედარებით ახალი სეგმენტი, რომელიც მყიდველს ისეთ სპორტულ ავტომობილებს სთავაზობს, როგორებსაც ადრე მხოლოდ სარბოლ ტრასებზე თუ წარმოვიდგენდით. ასეთი ავტომობილებია KTM-ის X-ბოუ და ”არიელის” ”ატომი”. მალე კი, არგენტინიდან, მათს რიგებს კიდევ ერთი სწრაფი სათამაშო შეუერთდება.

ესაა პატარა კომპანია ”დონტოს” მიერ ჯერ მხოლოდ კონცეპტუალური პროექტის სახით შემუშავებული P1, რომელიც არგენტინულ ინტერნეტ გამოცემა ”ავტობლოგის” ინფორმაციით, სატესტო პროტოტიპის სახით უკვე არსებობს და საგზაო გამოცდებსაც გადის.

პროექტმა სტარტი 18 თვის წინ აიღო. მის მიხედვით, იგეგმება ორადგილიანი ექსტრემალური ბოლიდის წარმოება, რომელსაც სახურავი მოსახსნელი ექნება. ავტომობილის მთავარი დიზაინერია ლუკას ლოპესი, რომელმაც თავისი ”მხეცი”, სარბოლი ავტომობილების ტექნოლოგიების გამოყენებით შეიმუშავა. მსუბუქი მასალების გამოყენების წყალობით, P1 (ეს აბრევიატურა ალბათ პირველ პროექტს ნიშნავს) ძალიან მსუბუქი (დაახლოებით 700 კილოგრამი) უნდა იყოს. ავტომობილის შასიზე კი ექტორ პერესი მუშაობდა, რომელმაც თავისი პროექტის შემუშავებისას, საერთაშორისო საავტომობილო ფედერაციის (FIA) წესები გაითვალისწინა.

ჯერჯერობით უცნობია, თუ რა აგრეგატი მიანიჭებს ამ არგენტინულ ”მხეცს” მამოძრავებელ ძალას. პროექტის ავტორები ამბობენ, რომ ისინი არჩევანს გერმანულ ძრავზე შეაჩერებენ. საცდელი პროტოტიპი კი ”ფოლკსვაგენის” 1.8-ლიტრიანი ტურბოძრავითაა აღჭურვილი, რომელიც მაქსიმუმ 180 ცხენის ძალას იძლევა.შესაბამისად, შეიძლება ვივარაუდოთ, რომ საბოლოო პროდუქტის ძრავის სიმძლავრეც ამაზე გაცილებით მეტი არ იქნება.

”დონტო” აცხადებს, რომ P1-ს შეზღუდული რაოდენობით გამოუშვებს, მისი ფასი კი 55 000 დოლარი იქნება. გარდა იმისა, რომ თავის პატრონს სარბოლ ტრასებზე დიდ სიამოვნებას მიანიჭებს, ეს ავტომობილი საერთო სარგებლობის გზებზე სარგებლობისთვისაც ვარგისი იქნება.

”გეპარდო” - აღორძინებული ”დე ტომაზოს” პირველი სუპერქარი

De Tomaso Ghepardo Concept

27 აგვისტო

შარშან იტალიელმა ბიზნესმენმა ჯან მარიო როსინიოლომ სუპერავტომობილების მწარმოებელი ოდესღაც ცნობილი იტალიური კომპანია ”დე ტომაზო” შეისყიდა, მაგრამ მას შემდეგ, ამ კომპანიის შესახებ, ჩამი-ჩუმი არ ისმის. თითქოს, ”დე ტომაზოს” აღორძინება ყველას დაავიწყდა, მაგრამ როგორც ირკვევა, არა - დანიელმა დიზაინერმა ფრედერიკ ტიილესენმა კონცეპტუალური მოდელი ”დე რომაზო გეპარდო” შექმნა, რომლის გარეგნობაც, მისივე თქმით, ლეგენდარულ მოდელ ”დე ტომაზო პანტერას” შთაგონებით შეიმუშავა.

დიზაინერის თქმით, ”გეპარდო” წარმოებისთვის მომზადებული კონცეპციაა, თუმცა როგორც ირკვევა, როსინიოლოს ”დე ტომაზოს” მისთვის ეს პროექტი არ შეუკვეთავს. ესე იგი, ეს თავისუფალი ნამუშევარია, თუმცა არაა გამორიცხული, რომ მისი წარმოება მაინც გადაწყდეს. და თუ ასე მოხდა, იტალიური კომპანია ”ასტონ მარტინ რეპიდის”, ”პორშე პანამერასა” და ”ფისკერ კარმას” კონკურენტთა სიაში ჩაეწერება.

კონცეპტუალური ავტომობილი ჯერ მხოლოდ 1:4 მასშტაბის მოდელის სახით არსებობს და შესაძლოა, ცოტა უხერხულად მოგვეჩვენოს მისი ზემოთ ჩამოთვლილი მოდლების კონკურენტად დასახელება, თუმცა მაინც უნდა ითქვას, რომ ”გეპარდო” მათსავით, ოთხკარიანი კუპეა. მისი რეალური გაბარიტები უნდა იყოს: სიგრძე 4820, სიგან 1970, სიმაღლე 1300 და ბაზა 2990 მილიმეტრი. ავტომობილის აეროდინამიკური წინააღმდეგობის კოეფიციენტი მხოლოდ 0.25 უნდა იყოს, მისი საბარგულის მოცულობა კი 500 ლიტრს მიაღწევს.

კონცეპციის ავტორს აგრეგატების დიდი არჩევანი აქვს შერჩეული. მისი თქმით, ავტომობილს საკმაო ადგილი აქვს იმისათვის, რომ მასში ”ფორდის” წარმოების, სერია ”ეკობუსტ-ის” წყვილტურბოიანი 3.5 V6 (465 ცხენის ძალით), ან ოთხი ელექტროძრავი მოთავსდეს, რომელთა ჯამური სიმძლავრეც დაახლოებით 440 ცხენის ძალა იქნება. მეორე შემთხვევაში, საჭირო ელექტროენერგიას ფიჭური ელემენტების ბლოკი გამოიმუშავებს, რომლის სამუშაო ტანი მეთანოლი იქნება და რომელიც ავტომობილის ძირზე განლაგდება.

”ჩემს მიერ შექმნილი ავტომობილი გარემოსადმი მეგობრული ტექნოლოგიებით აღიჭურვება. წარმოიდგინეთ სპორტული ავტომობილი, რომელიც იტალიური სუპერქარებივით ტემპერამენტიანი და თანამედროვე კომპაქტური ავტომობილებივით ეკონომიური იქნება. მასში თქვენ დაინახავთ გადაადგილების ინდივიდუალური საშუალების მომავალს”, - ამბობს პროექტის ავტორი.

ცნობისათვის, როსინიოლოს სულ სამი მოდელის - კუპეს, სედანისა და ქროსოვერის წარმოება აქვს განზრახული. წარმოების წლიური მოცულობა კი, თავიდან მხოლოდ 8 000 იქნება.

”ფოლკსვაგენი” ”ალფა რომეოს” შეძენითაა დაინტერესებული

Volkswagen Courting Alfa Romeo

24 აგვისტო

ცოტა ხნის წინ, ეს ისეთ ჭორად შეიძლებოდა ჩათვლილიყო, რომელსაც ყურადღებასაც კი არავინ მიაქცევდა. მაგრამ როგორც ჩანს, ინტერნეტით რამდენიმე თვის წინ გავრცელებულ ხმებს საფუძველი მაინც აქვს. მათ მიხედვით, ევროპის უდიდეს საავტომობილო ჯგუფ ”ფოლკსვაგენს”, იტალიური ”ალფა რომეოს” შესყიდვა სურს. თუმცა, იგივე წყარო გვამცნობს, რომ ამის სასტიკი წინააღმდეგია ”ფიატი”, რომლის ჯგუფშიც დღეისათვის მილანური კომპანია შედის.

როგორც ცნობილია, ”ფოლკსვაგენს” ამბიციური მიზანი აქვს - 2018 წლისთვის, გერმანულ გიგანტს მსოფლიო ლიდერობის ხელში ჩაგდება აქვს გადაწყვეტილი. ამ მიზნის მისაღწევად კი ძიერ გამოადგება თავისი ქოლგის ქვეშ ისეთი ცნობადი მარკის შეყვანა, როგორიც ”ალფა რომეოა”.

დარგის ანალიტიკოსები ვარაუდობენ, რომ მილანურ კომპანიას განვითარების უკეთესი შანსი სწორედ ”ფოლკსვაგენის” ხელში გადასვლის შემდეგ გაუჩნდება. ”ფიატთან” კი მას მომავალი არ აქვს. არადა, ტურინელებმა, კერძოდ კი მათმა შეფმა სერჯო მარკიონემ, ”ალფას” რესტრუქტურიზაციის და კრიზისიდან გამოყვანის გეგმა ახლახანს წარმოადგინა.

”ფიატის” და ”კრაისლერის” შეფის გეგმის მიხედვით, ”ალფა რომეოს” გაყიდვებმა მალე ნახევარ მილიონს უნდა მიაღწიოს. არადა, შარშან ამ კომპანიამ მხოლოდ 100 ათასზე ოდნავ მეტი ავტომობილის გაყიდვა შეძლო.

”შესაძლოა, ოდესმე ”ალფამ” მართლაც შეძლოს ნახევარი მილიონი ავტომობილის გაყიდვა, მაგრამ ეს მხოლოდ მას შემდეგ მოხდება, რაც ”ფოლკსვაგენის” ხელში გადავა”, - საინტერნეტო გამოცემა ”ავტონიუს იუროპთან” საუბრისას განაცხადა ”კრედიტ სუისის” საავტომობილო ბაზრის კვლევის განყოფილების შეფმა არნდტ ელინგჰორსტმა.

სხვა ანალიტიკოსები იმაზე ფიქრობენ, თუ რა გზით შეიძლება შეუერთდეს ”ალფა რომეო” ”ფოლკსვაგენის” მრავალეროვნულ ოჯახს, რომელშიც ერთი იტალიური კომპანია - ”ლამბორგინი” უკვე ფიგურირებს. მაგალითად, საკვლევი ფირმა ”ბერნშტაინის” ცნობილი ანალიტიკოსი მაქს უორბარტონი ვარაუდობს, რომ ვოლფსბურგული გიგანტის ჯგუფში, ”ალფა რომეო” ესპანურ ”სეატს” ჩაანაცვლებს, რომელსაც ისტორიას ჩააბარებენ.

თუმცა, ყველა ვარაუდი ფუჭი იქნება, თუ ”ალფა რომეოს” გაყიდვას არ მოისურვებს ”ფიატი”. ეს კი ნაკლებად სავარაუდოა, რადგან ტურინული გიგანტის შეფ მარკიონეს მიაჩნია, რომ მალე დადგება ის დრო, როდესაც კონკურენციას მხოლოდ რამდენიმე მსხვილი კომპანია გაუძლებს. დანარჩენები კი ”ბრძოლის ველზე” დაეცემიან. ასე რომ, ”ალფას” ხელიდან გაშვება მარკიონეს სტრატეგიულ გეგმას ეწინააღმდეგება.

”ისარო GT-E” - კიდევ ერთი ელექტრული სუპერქარი

Izaro GT-E Electric Supercar

22 აგვისტო

ავტოინდუსტრიის ისტორია როგორც უნდა განვითარდეს, ამერიკულ კომპანია ”ტესლას” ამავე სახელწოდების როდსტერი პირველი სერიული ელექტრომობილი იქნება. თუმცა, ეს სულაც არ ნიშნავს იმას, რომ მას არც კონკურენტები ეყოლება ოდესმე. ის დრო, როდესაც ”ტესლა როდსტერი” ელექტრომობილების სეგმენტის ეული მოთამაშე იყო, მალე წარსულს ჩაბარდება.

ერთ-ერთი პირველი ავტომობილი კი, რომელიც ”ტესლას” კონკურენტთა სიაში ჩაეწერება, შეილება ესპანურ კომპანია ”ისარო მოტორსის” სუპერქარი გახდეს, რომლის შესახებამ მწარმოებელმა ინფორმაცია და ფოტოები ინტერნეტით გაავრცელა.

ავტომობილს ”ისარო GT-E” უწოდეს, ანუ, ”ისაროს” დიდი ტურიზმის ელექტრომობილი. სხვათა შორის, ”ისაროს” პირველი სუპერავტომობილი ”სპანო GTA” იყო. ასე რომ, ესპანური კომპანია უცხო ტერიტორიის ათვისებას არ აპირებს. მისი ელექტრომობილის სავარაუდო ფასი 55 000 ევროა, ეს კი ”ტესლა როდსტერის” ფასზე ცოტაა, რაც ესპანურ ელექტრომობილს კონკურენციაში გამოადგება.

ძალური დანადგარის შესაბამისად, ”ისარო GT-E” ორი ვარიანტის სახით დამზადდება. ერთია ჰიბრიდული ვერსია, რომლის ჰიბრიდული აგრეგატის ჯამური სიმძლავრე 416 ცხენის ძალა, სვლის სიშორე კი დაახლოებით 690 კილომეტრი იქნება. მეორე კი ელექტრული ვერსია იქნება, რომლის სამსახურშიც 495 ცხენის ძალა ჩადგება. სამაგიეროდ, აკუმულატორების ერთი სრული დამუხტვით, ის მხოლოდ 250 კილომეტრის გავლას შეძლებს.

ესპანურმა კომპანიამ თავისი სპორტული ელექტრომობილის შემუშავებისას, უხვად გამოიყენა მსუბუქი მასალები, როგორებიცაა ალუმინისა და მაგნიუმის შენადნობები, ასევე კარბონის კომპოზიტი. ამის შედეგი კი ისაა, რომ ”ისარო GT-E” მხოლოდ 1 000 კილოგრამს იწონის. მწარმოებელი ირწმუნება, რომ მისი ელექტროქარის მაქსიმალური სიჩქარე 280 კმ/სთ იქნება (შედარებისთვის, ტესლა როდსტერის მაქსიმალური სიჩქარე მხოლოდ 200 კმ/სთ-ია). ადგილიდან 100 კმ/სთ სიჩქარის აკრეფას კი ის სულ რაღაც 4 წამში მოასწრებს.

ესპანური კომპანია ამ ელექტრომობილს მხოლოდ შეკვეთებით დაამზადებს. ამასთან, ინტერიერი ყოველი შემკვეთის გემოვნების მიხედვით გაფორმდება. მასალად კი კარბონს, ხეს, ალკანტრას, ალუმინს, ან ტყავს გამოიყენებენ, ან მათს კომბინაციას.

ცხენის ძალების ნაცვლად კაცის ძალები

Imagine PS, the People Powered Car

22 აგვისტო

ასეთი მანქანის ამძრავი აგრეგატის სიმძლავრის ცხენის ძალებით შეფასება ნამდვილად არ ივარგებს, რადგან მას ძირითადად ადამიანის ძალა ამოძრავებს. ისე კი, მას ადამიანის ძალის მიერ გამომუშავებული ენერგიის დაგროვებაც შეუძლია და მაშინ კი ბატონო, ძრავის სიმძლავრე ცხენის ძალებით შევაფასოთ.

”ჰუმანქარ იმეჯინ PS” - ასე ჰქვია ამ უცნაურ ავტომობილს, რომელსაც ადამიანის ძალის მეშვეობით, 100 კმ/სთ სიჩქარის აკრეფა შეუძლია. ის შტატ ორეგონის უნივერსიტეტის პროფესორმა ჩარლზ გრინვუდმა რამდენიმე წლის წინ შექმნა, თუმცა ამ უცნაურ ავტომობილს აქამდე მყიდველი ვერაფრით მიუზიდავს. გრინვუდს ადამიანის ძალით მომუშავე ავტომობილის შექმნის იდეა თურმე 1969 წლიდან გასჩენია და ბოლოს და ბოლოს, მიზანსაც მიაღწია.

ამ უცნაური ავტომობილის პირველ ვარიანტს ძრავი არ აქვს. სამაგიეროდ, გააჩნია მექანიზმი, რომელიც ადამიანისგან მამოძრავებელ ძალას ნიჩბის სტილში, წინ და უკან მიწოლით ღებულობს, ეს ძალა კი, სანამ ბორბლებს მიაღწევს, მარტივ მექანიზმს გაივლის. მას საჭეც არ აქვს - ავტომობილი იქით უხვევს, საითაც მასში მჯდარი ერთი, ან ოთხივე მგზავრი გადაიხრება. მგზავრები წყვილ-წყვილად, ერთმანეთისადმი ზურგით სხედან.
რა თქმა უნდა, აუცილებელი არაა, რომ ყველამ ნიჩაბი მოუსვას”, თუმცა თუ ყველა გაირჯება, ავტომობილიც უფრო სწრაფად იმოძრავებს. თუ თუ არ გეჩქარებათ, მაშინ ჭარბი ენერგია (ჰუმანქარ-ის ახალ ვერსიაში) სპეციალურ აკუმულატორებში გროვდება და ამ ენერგიას ავტომობილი ძირითადად აღმართში მოიხმარს. გარდა ამისა, შესაძლებელია ელექტროენერგიის მზის პანელებში გამომუშავება. მოკლედ, ახალ ვერსიას თავისუფლად შეიძლება ჰიბრიდული (ბიონიკ-ელექტრონული) ეწოდოს.

გრინვუდი ამბობს, რომ თავისი ავტომობილით ორ კურდღელს იჭერს - ჯერ ერთი, თუ ასეთი ტრანსპორტი გავრცელდება, ეს გარემოს დიდ შვებას მისცემს. მეორეც, ადამიანები ზედმეტ ცხიმს მოიშორებენ, რადგან ნიჩბების მოსმა მათ დიდი რაოდენობით კალორიების დაწვის საშუალებას მისცემს, ეს კი, პირველ რიგში, მათი ჯანმრთელობისთვისაა კარგი.

რაც ყველაზე საინტერესოა, ”ჰუმანქარმა” თავის უჩვეულო ჰიბრიდზე შეკვეთების მიღება უკვე დაიწყო. 15 500 დოლარად ღირებული ”იმეჯინ PS-ის” შეკვეთისთვის სულ რაღაც 50 დოლარი დეპოზიტის გადახდაც კი საკმარისია. მაგრამ, ეს სულაც არ ნიშნავს, რომ სასურველ ავტომობილს მიიღებთ. საქმე ისაა, რომ მისი წარმოების დასაწყებად, კომპანიას მინიმუმ 800 შეკვეთის მიღება სჭირდება. ამჟამად კი მხოლოდ 100 შეკვეთა აქვს მიღებული.

და მაინც, გრინვუდი ამბობს, რომ მას შემდეგმ რაც ”იმეჯინ PS-ის” წარმოებას დაიწყებს, დღის წესრიგში ამ ავტომობილის სედანისძარიანი ვერსიის შექმნის საკითხიც დადგება...

”ფიატ მიო” ბრაზილიური დებიუტის წინ

Fiat Mio Concept Previewed Ahead of Brazil Debut

19 აგვისტო

”ფიატმა” ბრაზილიური ბაზრისთვის მოამზადა ორადგილიანი ჯუჯა საქალაქო ავტომობილი, რომლის შექმნაშიც, ფართო საზოგადოება აქტიურად მონაწილეობდა. ავტომობილს სახელად ”ფიატ მიო” (ჩემი ფიატი) ეწოდა და მისი პრემიერა სან პაულუს საავტომობილო შოუზე, ოქტომბერში გაიმართება.

”ფიატის” ბრაზილიურმა შტომ ეს პროექტი შარშან დაიწყო და პრემიერამდე ორ თვეზე ცოტა მეტით ადრე, ჯერ კიდევ არ დაუსრულებია. უფრო მეტიც, დიზაინის გუნდს არაერთი დეტალი ჰქონდა დასასრულებელი და უამრავი იდეა დასამუშავებელი. თუმცა, ისინი ირწმუნებიან, რომ სან პაულუში ”მიოს” ხილვა შესაძლებელი იქნება.

ამ პროექტის დაწყებამდე, ”ფიატმა” სპეციალური ვებ-საიტი გახსნა, რომლის მეშვეობითაც, ენთუზიასტებს თავიანთი იდეების შეთავაზება შეეძლოთ. ამ არხით, იტალიურ კომპანიას, თავისი იდეა დაახლოებით 17 000-მა ადამიანმა მიაწოდა. ყველა მათგანი ოფიციალურად აღირიცხა და ავტორიც დაუფიქსირდა. რა თქმა უნდა, ეს იდეები ინჟინრულ დამუშავებასა და დახვეწას გადიოდა, თუმცა მათს მიმწოდებლებს თანაავტორობის უფლებაც ენიჭებათ.

ჯერჯერობით, ტურინელებს ”მიოს” შესახებ სხვა ინფორმაცია არ გაუვრცელებიათ. ცნობილია, რომ ავრომობილს მამოძრავებელ ძალას ელექტროძრავი მიანიჭებს. თუმცა, ჯერ უცნობია ამ ძრავის მახასიათებლები. რა თქმა უნდა, არც სხვა ტექნიკური და დინამიკური მონაცემები გავრცელებულა.

როგორც ჩანს, სან პაულუს გამოფენაზე ”ფიატ მიოს” მხოლოდ დიზაინის ხილვა იქნება შესაძლებელი. შოუს შემდეგ კი ტურინელები ”ფიატ დუ ბრაზილი” მასზე მუშაობას გააგრძელებს. ჯერჯერობით უცნობია, მიაღწევს თუ არა ეს ჯუჯა ავტომობილი კონვეიერამდე.

”კია” პარიზის შოუსთვის ელექტრულ კონცეპციას ამზადებს

Electric Kia POP Concept Teased Ahead of Paris Auto Show

18 აგვისტო

კორეული კომპანია ”კია”, პარიზის საავტომობილო შიუსთვის ჯუჯა ელექტრომობილ ”პოპ-ს” (სურათზე) ამზადებს, დებიუტამდე ექვსი კვირით ადრე კი ამ ავტომობილის ფოტო ტიზერები გამოაქვეყნა და თან შეგვპირდა, რომ მალე მის შესახებ, მცირე ინფორმაციასაც მოგვაწვდის.

ჯერჯერობით, ამ ელექტრომობილის შესახებ მხოლოდ ისაა ცნობილია, რომ ის სამადგილიანი იქნება. გარეგნულად, ”პოპ-ი” კონცეპტუალურ ”რეის” სტილშია შესრულებული, რომელიც კორეელებმა წლის დასაწყისში, ჩიკაგოს ავტო შოუზე გვიჩვენეს. ორივე ავტომობილს შუშის სახურავი და ერთნაირი ფარები აქვს.

გავრცელებული ფოტოების მიხედვით, ელექტრომობილის ინტერიერზეც შეიძლება საუბარი, თუმცა აშკარაა, რომ ასეთი სალონი სერიულ ავტომობილს (თუ პოპ-მა კონვეიერამდე ამ სახით მიაღწია) არ ექნება. სალონში ყველაზე საინტერესო სავარძლების განლაგებაა - ორი მათგანი წინაა მოთავსებული, მესამე კი - მათ უკან.

ფოტოების ანალიზის შედეგად, ინგლისურმა გამოცემა ”ავტოქარმა” დაასკვნა, რომ ”პოპ-ს” კარებები ქვევიდან ზევით, ეგრეთ წოდებული თოლიას ფრთის სტილში უნდა ეღებოდეს. ასეთი დასკვნის საფუძველს კი, გამოცების ექსპერტების აზრით, კარებების სახელურების განლაგება იძლევა.

რაც შეეხება პლაგ-ინ ჰიბრიდულ ”რეი-ს”, კორეულმა კომპანიამ ის პროგრამა ”ეკოდაინემიქსის” ფარგლებში შეიმუშავა და მალე ის ”კიას” ისტორიაში პირველი სერიული ჰიბრიდული ავტომობილი გახდება. ”კია რეის” ჰიბრიდულ სისტემაში შედის 1.4-ლიტრიანი ბენზინის ძრავი (რომლის სიმძლავრეც 153 ცხენის ძალაა) და 78-კილოვატიანი ელექტროძრავი. მხოლოდ ამ უკანასკნელის მეშვეობით გადაადგილებისას, ”რეი-ს” აკუმულატორების ერთჯერადი დამუხტვით, დაახლოებით 80 კილომეტრის გავლა შეუძლია.

ბაჰამელი სტუდენტის ”ჰიუნდაი” წყალზე მუშაობს

Young Bahamian Builds a Water Powered Car

18 აგვისტო

რა თქმა უნდა, მარტო წყალზე არა, მაგრამ ის ფაქტი, რომ ედინბურგის (შოტლანდია) უნივერსიტეტის სტუდენტმა დიდი ბაჰამებიდან, ჯეიმს ტაჩელმა და მისმა მეგობრებმა შექმნეს ”ჰიუნდაი ელანტრას” (1997 წელს გამოშვებულის) მოდიფიკაცია, რომელიც საწვავად ნაწილობრივ წყალს იყენებს და ამის წყალობით, დაახლოებით 30 პროცენტით ნაკლებ საწვავს მოიხმარს.

ტაჩელის მოწყობილობაში, წყალი ელექტროენერგიის მეშვეობით, ჟანგბადად და წყალბადად იშლება. ეს ორივე ნივთიერება, ბენზინთან ერთად, საწვავ ნარევს ქმნის და ძრავს წვის კამერაში მიეწოდება. ამის შედეგი ისაა, რომ საწვავი ნარევი ეფექტურად, ბოლომდე იწვის და ამის წყალობით, მცირდება როგორც საწვავის ხარჯი, ასევე გამონაბოლქვში მავნე მინარევების შემცველობა.

აველანიო მაკგიბონი (მარცხნივ) და ჯეიმს ტაჩელი თავიანთი შედევრის პრეზენტაციაზე

..............................

ტაჩელს თავისი ჩანაფიქრის განხორციელებაში, ბაჰამელი ინჟინერი და ბიზნესმენი აველანიო მაკგიბონი დაეხმარა, რომელსაც თავის დროზე, ”ჯენერალ მოტორზში”, ”ფორდში” და ”კრაისლერში” უმუშავია, დღეს კი დიდი ბაჰამების მთავარ ქალაქ ფრიპორტში საკუთარი კომპანია ”მაკგიბონს ავტო” აქვს, რომელიც ძველი მანქანების აღდგენაზეა სპეციალიზებული.

მაკგიბონს შემუშავებული აქვს პროგრამა, რომლის მიზანიცაა იმ სტუდენტების ტექნიკური მხარდაჭერა, რომლებიც საზაფხულო არდადეგების დროს, საინჟინრო საქმიანობით არიან დაკავებულნი, რითაც თავიანთ გონებასაც ავარჯიშებენ და ინჟინრულ ჩვევა-გამოცდილებასაც იძენენ.

ტაჩელთან ერთობლივი მუშაობისას, გამოცდილმა ინჟინერმა ის მაკომპლექტებლები გამოიყენ, რომელთა შეძენაც ადგილობრივ მაღაზიებში იყო შესაძლებელი. ამგვარად, მან დაამტკიცა, რომ ავტომობილის ეკონომიური და ეკოლოგიური მონაცემების გასაუმჯობესებლად, სულაც არაა საჭირო ძვირადღირებული გამოკვლევების ჩატარება და ასეულობით მილიონი დოლარის დახარჯვა.

ტაჩელი კი მიღწეულით დაკმაყოფილებას არ აპირებს და იქადნის, რომ მისი შემდგომი მიზანი (მომდევნო არდადეგებზე), ისეთი ავტომობილის შექმნაა, რომელიც საწვავად მხოლოდ წყალს გამოიყენებს. მანამდე კი არანაკლებ საინტერესო საქმე ელის - პრაქტიკას ”რენოს” ფორმულა 1-ის გუნდის ფაბრიკაში მიიღებს.

”მორგანის” ახალი კუპეს დებიუტი პებლ ბიჩში

Morgan EvaGT Photos Released

16 აგვისტო

შტატ კალიფორნიას პებლ ბიჩში, ელეგანტურობის კონკურსზე, სადაც ავტომოყვარულები საზოგადოებას მათ მფლობელობაში არსებულ რარიტეტულ ავტომობილებს უჩვენებენ ხოლმე, ექსკლუზიური ავტომობილების მწარმოებელმა ბრიტანულმა კომპანია ”მორგანმა” თავისი უახლესი შედევრი - კუპე ”ევაGT” წარადგინა.

წინა, კონსერვატიული გარეგნობის მქონე მოდელებისგან განსხვავებით, ახალ ავტომობილს უფრო დახვეწილი გარეგნობაც აქვს და მისი წარმოებისთვის, კომპანიამ ახალი ტექნოლოგიებიც აითვისა. მაგალითად, შასი და ძარა ალუმინისგანაა დამზადებული და, რა თქმა უნდა, მათ ხელით აწყობენ.

”ევაGT-ს” სიგრძე 4.7 მეტრი, სიგანე 1.8 მეტრი, სიმაღლე კი 1.2 მეტრია, წონა კი 1250 კილოგრამს ღწევს. როგორც მის პრეზენტაციაზე ”მორგანის” შეფმა ჩარლზ მორგანმა განაცხადა, ეს მანქანა შეიძლება გამოიყენოთ როგორც საოჯახო, ყოველდღიური საჭიროებისთვის, ასევე როგორც ლუქსის კლასის დიდი ტურიზმის ავტომობილი.

”ევაGT-ს” კლასიკური შეთანწყობა აქვს. ანუ, ძრავი (რომელიც ”ბეემვეს” წარმოებისაა) წინაა მოთავსებული, მის მიერ გამომუშავებული მაბრუნი მომენტი კი უკანა ბორბლებს ატრიალებს. ექვსცილინდრიან ძრავს ორი ტურბოკომპრესორი ემსახურება, რომელთა დახმარებითაც, მაქსიმალური სიმძლავრე 306 ცხენის ძალას აღწევს. მას უწყვილდება 6-საფეხურიანი ავტომატი, ან მექანიკური კოლოფი.

ამ ტანდემის მეშვეობით, ”ევაGT-ს” ადგილიდან 100 კმ/სთ სიჩქარის ასაკრეფად 4.5 წამი ჰყოფნის, მისი მაქსიმალური სიჩქარე კი 272 კმ/სთ-ს აღწევს. ავტომობილს 100 კილომეტრის გასავლელად საშუალოდ 7 ლიტრი საწვავი სჭირდება, ყოველი კილომეტრის გავლისას კი ის ატმოსფეროში დაახლოებით 200 გრამ ნახშირორჟანგს გამოჰყოფს.

”ევაGT-ს” აღჭურვილობაში შედის: მუხრუჭების ბლოკირების საწინააღმდეგო სისტემა, სტაბილიზაციის სისტემა, ქსენონის მთავარი ფარები, სანავიგაციო სისტემა და რა თქმა უნდა, უსაფრთხოების ბალიშები. ჯერჯერობით არ გამოცხადებულა ახალი ავტომობილის საბაზო ღირებულება. თუმცა ჩარლზ მორგანის თქმით, ის მოდელ ”სუპერსპორტსზე” გაცილებით იაფი ეღირება. ამ უკანასკნელის ფასი კი ბრიტანეთში 109 000 გირვანქა სტერლინგიდან იწყება.

”მორგანი” სულ 100 ცალი ”ევაGT-ს” წარმოებას აპირებს, რომლებზეც შეკვეთის შემთხვევაში, მყიდველს წინასწარ მხოლოდ 5 000 გირვანქა სტერლინგის გადახდა მოუწევს. მართალია, ამ ავტომობილის წარმოება 2012 წელს დაიწყება, მაგრამ ”მორგანს” მასზე შეკვეთების მიღება უკვე დაწყებული აქვს.

ახალი ”ლანჩა სტრატოსი” პარიზული დებიუტისთვის ემზადება

New Stratos Official Details Released

16 აგვისტო

ავტომობილის წარმატებულობისთვის, დიდი მნიშვნელობა აქვს მის გარეგნობას. უფრო სწორედ კი მის დახვეწილ დიზაინს. მაგრამ ხშირად, ავტომობილის სიმახინჯე მისი პოპულარობისთვის ხელის შემშლელი სულაც არაა. ამის ნათელი მაგალითი კი 70-იანი წლების რალის მსოფლიო ჩემპიონატების სამი ტიტულის მომგები - ”ლანჩა სტრატოსია”, რომელსაც სამუდამოდ აქვს დაკავებული ადგილი ავტოინდუსტრიის დიდების დარბაზში.
იმ დროისთვის, ეს ავტომობილი შეიძლება არც ისე მახინჯად მოგჩვენებოდათ, მაგრამ როდესაც დღეს მის გაცოცხლებას ცდილობ და დიზაინს თითქმის არ ცვლი, ეს შეიძლება სარისკო ნაბიჯიც იყოს. თუმცა, ასე არ უფიქრიათ სახელოვან ატელიე ”პინინფარინას” და მის ახალგაზრდა დიზაინერ (იტალიური წარმოშობის ამერიკელ) ჯეისონ კასტრიოტას, რომელიც ახლა უკვე შვედური ”სააბის” დიზაინის განყოფილების შეფია.
პრინციპში, საფიქრალი არც არაფერი ჰქონდათ, რადგან გერმანელმა ბიზნესმენმა, საავტომობილო მაკომპლექტებლების მწარმოებელ კომპანია ”ბროზეს” მფლობელმა მიხაელ სტოშეკმა, კრიზისში მყოფ იტალიურ ატელიეს სწორედ ”სტრატოსის” გაცოცხლება შეუკვეთა. გაცოცხლებაში ის იგულისხმება, რომ ახალი ავტომობილი გარეგნობით სახელოვან წინაპარს უნდა დამსგავსებოდა, ოღონდ მას თანამედროვე დიზაინის ელემენტებიც უნდა ჰქონოდა და რა თქმა უნდა, მისი კონსტრუქციაც თანამედროვე უნდა ყოფილიყო.

კასტრიოტასეული ”სტრატოსი” პირველად ორი წლის წინ, საავტომობილო გამოფენებზე გამოჩნდა და მაშინ ბევრი ალაპარაკდა იმაზე, რომ ეს ავტომობილი ”პინინფარინას” იტალიურმა კომპანია ”ლანჩამ” შეუკვეთა. მაგრამ გავიდა ორი წელი და ახლაღა გაირკვა, რომ ”პინინფარინამ” ამ ავტომობილზე შეკვეთა გერმანიიდან მიიღო.

მოკლედ, ახალი ”სტრატოსი” თანამედროვე ავტოინდუსტრიის ნამდვილი შედევრია. ამის თქმის საფუძველს კი მარტო ის ფაქტებიც იძლევა, რომ მისი შასის ძირითადი, მზიდი ელემენტი კარბონის კომპოზიტისგანაა დამზადებული და მის ბაზაში კი ”ფერარი F430 სკუდერიას” ძრავი აქვს მოთავსებული.

V8 ძრავის მუშა მოცულობა 4.3 ლიტრია, მისი მაქსიმალური სიმძლავრე კი 503 ცხენის ძალას აღწევს. მსუბუქი მასალების გამოყენების წყალობით, ახალი ”სტრატოსი” მხოლოდ 1 240 კილოგრამს იწონის, ესე იგი, ”სკუდერიაზე” 108 კილოგრამით მსუბუქია. ძრავის სიმძლავრის წონის ფარდობა საკმაოდ შთამბეჭდავია - 413 ცხ.ძ/ტონაზე.

”პინინფარინას” ამ ავტომობილის ტესტირება ჯერაც არ დაუსრულებია. სხვათა შორის, გამოცდებისთვის ატელიემ ფორმულა 1-ის ყოფილ პილოტს, პორტუგალიელ ტიაგუ მონტეირუს უხმო. ჯერჯერობით, ახალი ”სტრატოსის” დინამიკური მახასიათებლები არ გამოქვეყნებულა - მათ ”პინინფარინა” პარიზის საავტომობილო შოუსთვის ინახავს, სადაც ამ ავტომობილის მსოფლიო პრემიერა იგეგმება. თუმცა, ავტომობილის ინტერიერის პაპარაცულ ფოტოებზე ჩანს, რომ სპიდომეტრის დანაყოფის მაქსიმალური მაჩვენებელი 360 კმ/სთ-ია.

ინტერნეტით გავრცელდა ინფორმაცია იმის შესახებ, რომ როგორც ექსკლუზიურმა შემკვეთმა, სტოშეკმა ”პინინფარინას” მხოლოდ 20 ცალი ახალი ”ლანჩა სტრატოსის” დამზადების ნებართვა მისცა. ფოტოებზე ისიც ჩანს, რომ ავტომობილს ”ლანჩას” ლოგო ამშვენებს. თუმცა, ჯერჯერობით უცნობია, საბოლოოდაც ასე დარჩება, თუ არა. რამდენადაც ავტომობილს ”ფერარის” ძრავი აქვს, ეს უკანასკნელი კი, ისევე როგორც ”ლანჩა”, ”ფიატის” ჯგუფში შედის, შეიძლება იმის ვარაუდი, რომ პარიზში ამ ავტომობილს ”ლანჩა სტრატოსის” სახელით ვიხილავთ.

ელექტრომობილი ”დელასალი” მსოფლიო რეკორდს უმიზნებს

DeLaSalle EV Aims for World Record

12 აგვისტო

საავტომობილო სამყაროში ელექტრომობილების ბუმი იწყება და რა თქმა უნდა, ამ საქმეში დიდი მწარმოებლები ლიდერობენ. თუმცა, ისეთი პატარა კომპანიებიც სოკოებივით მრავლდებიან, რომლებიც ბიზნესის დაწყებას პირდაპირ ამ ძვირი ტექნოლოგიების ათვისებით ცდილობენ. და, ამ ახალ საქმეს არც უნივერსიტეტები აკლდებიან, რომლებიც ავტოკომპანიებს სხვადასხვა საინტერესო იდეას სთავაზობენ.

ასეთებს შორის არიან კანზას სიტის დელასალის უმაღლესი სკოლის სტუდენტები და მათი მასწავლებლები, რომლებმაც საბურავების მწარმოებელი იაპონურ კომპანია ”ბრიჯსტოუნის” ამერიკული შტოს ტექნიკური ცენტრის თანამშრომლებთან ერთად, ორიგინალური ელექტრომობილის პროექტი შეიმუშავეს.

პროექტი ინგლისურ კომპანია ”ლოლას” 2000 წლის ინდი ქარის სერიის სარბოლი ბოლიდის კონსტრუქციას დაეყრდნო. პროექტის ავტორებმა, ელექტრომობილის საფუძვლად აიღეს ბოლიდის შასი, რომელიც მათ მიერ შემუშავებული გამჭვირვალე ძარით შემოსეს.

სტუდენტების ჯგუფმა, რომელსაც სათავეში კლასის ინსტრუქტორი სტივ რიიზი ედგა, მანქანის ძალური დანადგარი და ძარის აეროდინამიკური პაკეტი შეიმუშავა. ორიგინალურ გადაწყვეტათა წყალობით, ავტომობილის წონა მინიმუმზე დაიყვანეს. რა თქმა უნდა, ავტომობილი ”ბრიჯსტოუნის” წარმოების ”ეკოპია EP100” საბურავებზე დააყენეს.

მას შემდეგ, რაც ელექტრომობილი ”ფეხზე დადგა”, ის ”ბრიჯსტოუნის” ტექსასურ საცდელ პოლიგონზე გაიყვანეს, სადაც სრულფასოვანი ტესტების რამდენიმე სერია ჩაუტარდა. როგორც ირკვევა, ამ საინტერესო პროექტის მთავარი მიზანი ავტომობილის ეკონომიურობის მსოფლიო რეკორდის დამყარება ყოფილა.

ტესტების მსვლელობისას, ელექტრომობილმა ეკონომიურობის შესაშური დონე გამოავლინა. მის მიერ მიღწეული ეკონომიურობის მაჩვენებელი, თითქმის 500 კილომეტრზე ერთი გალონი საწვავის (გალონი დაახლოებით 3.785 ლიტრია) ექვივალენტურია.

ტესტებზე ნაჩვენები შედეგების გამო, პროექტზე მომუშავე გუნდმა გადაწყვიტა, გინესის რეკორდების წიგნის გამომცემლებისთვის წერილი გაეგზავნა, რომლითაც მათ მიერ მიღწეული ეკონომიურობის მსოფლიოს ოფიციალურ რეკორდად დაფიქსირებას ითხოვს.

ცნობისათვის, ელექტრომობილების და სხვა ტიპის ეკოლოგიური ავტომობილების შემუშავებისთვის, განვითარებული ქვეყნების მთავრობები მწარმოებლებს სოლიდური შეღავათებით ახალისებენ. ჯერ ერთი, ხდება შესაბამისი პროექტების სახელმწიფოების მიერ თანადაფინანსება. მეორეც, საგადასახადო და სხვა ტიპის ფინანსური შეღავათებით სარგებლობენ ეკოლოგიური ავტომობილების მყიდველებიც. ყოველივეს კი შედეგად ელექტრომობილების წარმოების წახალისება და ამ ახალი ბიზნესის ხელშეწყობა მოჰყვება...

”ლოტუს ექსოს T125” - გასართობი ფორმულა

Lotus Exos T125 Breaks Cover

10 აგვისტო

სპორტული ავტომობილების მწარმოებელმა ინგლისურმა კომპანია ”ლოტუსმა”, რომელიც დღეისათვის მალაიზიური ”პროტონის” საკუთრებაა, საზოგადოებას სარბოლი ავტომობილი - ”ექსოს T125” წარუდგინა, რომელიც კერძო პირებზე კი გაიყიდება, თუმცა მხოლოდ სარბოლი ტრასებისთვისაა მისადაგებული.

თავისი აგებულებითაც და გარეგნობითაც, ”ექსოს T125” ფორმულა 1-ის სარბოლ ავტომობილს მოგაგონებთ. ეს არცაა გასაკვირი - ”ლოტუსს” ხომ ავტოსპორტის უმაღლეს კლასში ბევრი მიღწევა აქვს და თანაც, ამ სეზონში, ის დიდი პრიზების ცირკსაც დაუბრუნდა.

ავტომობილის შასი კარბონის კომპოზიტისგანაა დამზადებული, სამუხრუჭე სისტემის ფრიქციული ელემენტები კერამიკული მასალებისგან დამზადდა, გადაცემათა კოლოფიც ისეთივეა, როგორიც ფ1-ში, მისი სადეხურების გადამრთველი ნიჩბები კი საჭის რგოლის უკანაა მოთავსებული.

რაც შეეხება ძრავს, ესაა ინგლისურ კომპანია ”კოსუორტის” 3.5-ლიტრიანი V8, რომელიც 650 ცხენის ძალას გამოიმუშავებს. ძრავის რეკომენდირებული მაქსიმალური ბრუნთა რიცხვი მხოლოდ 10 300-ია წუთში. პირველ რიგში, მცირე ბრუნთა რიცხვი ძრავის სამუშაო რესურსის გაზრდას უზრუნველყოფს, რომელიც 4 500 კილომეტრს შეადგენს. ”კოსუორტი” გარანტიას იძლევა, რომ ამ მანძილზე ძრავს რემონტი არ დასჭირდება. დაკიდევ, სრულად დაკომპლექტებული ავტომობილი მხოლოდ 650 კილოგრამს იწონის. ესე იგი, ავტომობილის ყოველ პირობით ტონაზე 1 000 ცხენის ძალა მოდის.

”ლოტუსი” მხოლოდ 25 ცალი ”ექსოს T125-ის” დამზადებას აპირებს. თითოეულის ღირებულება კი 1 000 000 ამერიკული დოლარი იქნება. რა თქმა უნდა, მყიდველს ”ლოტუსი” ამ ავტომობილის მართვის უფასო გაკვეთილებს პირდება (უფრო სწორედ, გაკვეთილების ფასი ავტომობილის ღირებულებაში შედის). ამასთან, ”ლოტუსი” ამ ავტომობილების მყიდველებს სპეციალურ სატრეკო დღეებს მოუწყობს, რომელთა დროსაც, მოყვარული მრბოლები თავიანთი ძვირადღირებული სათამაშოების მეშვეობით, ადრენალინის ჭარბ დოზებს მიიღებენ.

”ვოლვო” მე-7 სერიის ”ბეემვეს” კონკურენტს გამოუშვებს

Volvo plans 7-series rival

8 აგვისტო

დიდი ხანი არ გასულა მას შემდეგ, რაც ”ფორდმა” შვედური კომპანია ”ვოლვო” ჩინურ ”ჯილის” მიჰყიდა. და აი, ამ უკანასკნელის შეფი და იმავდროულად, ”ვოლვოს” დირექტორთა საბჭოს თავმჯდომარე ლი შოფუ, ვისაც ავტოინდუსტრიის სამყაროში ხშირად ჩინელ ჰენრი ფორდსაც უწოდებენ ხოლმე, აცხადებს, რომ ”ვოლვოს” უმთავრესი ამოცანა სამოდელო გამის გაფართოებაა.

პირველ რიგში, ”ვოლვო” თავისი ახალი ფლაგმანის გამოშვებას გეგმავს, რომლითაც კონკურენციას ”ბეემვეს” მე-7 სერიას, ”მერსედეს ბენცის” S-კლასს და ”აუდის” A8-ს გაუწევს. ცნობისათვის, დღეისათვის ”ვოლვოს” ფლაგმანი ბიზნეს კლასის S80-ია, რომლის წარმოებაც შვედურმა კომპანიამ 2006 წელს დაიწყო.

”ვოლვოს” ახალი მფლობელების მიზანი ისაა, რაც თავის დროზე, ”ფორდმა” არ გააკეთა - წარმოების მოცულობის გაზრდა და რა თქმა უნდა, მომგებიან საქმიანობაზე გადასვლა. სამოდელო გამის გაფართოების გარდა, ამ მიზნების მიღწევაში, ”ჯილის” ის ფაქტორიც უნდა დაეხმაროს, რომ მალე ”ვოლვო” ჩინეთში ახალ საწარმოს ააშენებს. ამ ქარხანაში აწყობილი ავტომობილები კი მხოლოდ ჩინურ ბაზარზე გაიყიდება.

ამასთან, შოფუ პირობას დებს, რომ ახალი საწარმოს ამუშავების შემდეგ, ძველი საწარმოები ძველებურად, სრული სიმძლავრით მუშაობას გააგრძელებენ. დაკიდევ, კომპანიის შტაბ-ბინაც და ტექნიკური ცენტრიც, შვედეთში დარჩება. ”ჯილის” გეგმის მიხედვით, ხუთ წელიწადში, ”ვოლვოს” წარმოების მოცულობა გაორმაგდება და 600 000-ს მიაღწევს. პარალელურად, ამავე პერიოდში, კომპანიის საქმიანობა მომგებიანი უნდა გახდეს.

ცნობისათვის, შვედური კომპანიის გამოსასყიდად, ”ჯილიმ” ამერიკულ ავტოგიგანტს 1.8 მილიარდი დოლარი გადაუხადა. ეს კი 4.6 მილიარდთ ნაკლებია იმ თანხაზე, რაც ”ფორდს” 1999 წელს ”ვოლვოს” შეძენა დაუჯდა.

სმიტების სპორტქარი ”ფოლკსვაგენ ჯეტას” ბაზაზე

Smyth Performance G3F: VW Jetta-Based Diesel Sports Car

3 აგვისტო

სპორტული მანქანა, რომელსაც სურათზე ხედავთ, სხვა არაფერია, თუ არა ”ფოლკსვაგენ ჯეტას” ძირეულად მოდიფიცირებული ვერსია. ოღონდ, მისი ძრავი წინ კი არა, ბაზაშია მოთავსებული და ავტომობილსაც წამყვანი უკანა ბორბლები აქვს. ისე კი, უფრო მართალი იქნებოდა, რომ გვეთქვა - ამ ავტომობილმა არსებობა დაიწყო, როგორც ”ფოლკსვაგენ ჯეტამ”, მაგრამ მას შემდეგ, რაც მას მარკ და დეივ სმიტების ხელი შეეხო, სულ სხვა ავტომობილად მოგვევლინა.
ჯერ დავიწყოთ იმით, რომ ორივე სმიტი კიტ ქარების (ასაწყობი ავტომობილების) მწარმოებელ კომპანია ”ფაქტორი ფაივ რეისინგის” დამაარსებლები არიან. ამასთან, დეივ სმიტი კომპანია ”სმიტ პერფორმენსის” მფლობელიცაა. ბუნებრივია, მათ მსგავსი პროექტების განხორციელების დიდი გამოცდილება აქვთ. ამ ენთუზიასტებმა რატომღაც გადაწყვიტეს, რომ მათი ჩანაფიქრის განსახორციელებლად, საუკეთესო ბაზისად მეოთხე თაობის ”ჯეტა” გამოდგებოდა, რომელსაც ვოლფსბურგული გიგანტი 1998-2005 წლებში უშვებდა.

იმ ავტომობილის მისაღებად, რომელიც მათ ჩაიფიქრეს, ”ჯეტაზე” რამდენიმე რადიკალური მოდიფიკაციის ჩატარება გახდა საჭირო. კერძოდ, მას მოჭრეს სახურავი და უკანა ნაწილი. წინა ნაწილს ძარის ელემენტები მოხსნეს ფოლადის ოთხკუთხა მილებისგან შეკრული ჩარჩო მიუერთეს. ძრავმა ახალი პლატფორმის შუა ნაწილში გადაინაცვლა. ახალ შასიზე კი შუშის ბოჭკოვანი ქსოვილის კომპოზიტისგან დამზადებული ძარა და ახალი საქარე მინა დაამაგრეს.

სხვათა შორის, ”ჯეტა” ერთადერთი ავტომობილი არაა, რომლის ნაწილებიც ახალი ავტომობილის შექმნისას სმიტებმა გამოიყენეს - მათმა სპორტულმა ავტომობილმა, წინა ფარები ”ტოიოტა სელიკასგან” მიიღო. ახალ ავტომობილს მისმა ავტორებმა ”სმიტ პერფორმენს G3F” უწოდეს. მისი მაქსიმალური სიჩქარე სულ რაღაც 225 კმ/სთ-ია, სამაგიეროდ, ქალაქგარეთ ტრასაზე 100 კილომეტრის გასავლელად, 4 ლიტრ ბენზინზე ნაკლები ჰყოფნის.

დაბოლოს, ”სმიტ პერფორმენს G3F-ს” ფასის შესახებ. იმისათვის, რომ ასეთი ავტომობილი შეიძინოთ, ავტომობილი კარგად უნდა იცოდეთ, რადგან სმიტები მხოლოდ ასაწყობ ავტომობილს ყიდიან, რომელიც შემდეგ თავად უნდა ააწყოთ. კიტ კომპლექტი 15 000 დოლარი ღირს, საიდანაც 10 000 დოლარი გადაკეთებული შასი და ძარა ღირს, დაახლოებით 5 000 დოლარი კი ნახმარი ”ჯეტას” შეძენა და მისი გადაკეთება დაჯდება.