„S-ქროსი“ – „სუძუკი“ ევროპაში აქტიურდება

Suzuki sallies forth with new C-segment crossover with fishy S-Cross Concept

6 ოქტომბერი

„სუძუკი“ ევროპულ ბაზარზე გააქტიურებას იწყებს. ძველ კონტინენტზე მომავალი წლიდან რამდენიმე ახალ მოდელს გამოიტანს, რომელთაგან პირველი C-სეგმენტის ქროსოვერი იქნება. ამ ავტომობილის კონცეპტუალური ვერსია, სახელად „S-ქროსი“ კი ჯერ პარიზის მოტორ შოუზე წარადგინა.

„ახალი ქროსოვერი პირველია იმ ახალ ავტომობილებს შორის, რომლებსაც მალე ევროპელებს შევთავაზებთ. ბაზარზე ახალი პროდუქციის წარდგენა კი 2013 წელს დაიწყება“, - ნათქვამია იაპონური კომპანიის მიერ პარიზის გამოფენაზე გავრცელებულ რელიზში.

„S-ქროსი“ კომპაქტური ქროსოვერია, რომელიც კომპანიისვე ინფორმაციით, „სვიფტის“, SX4-ის და „კიზაშის“ მართვადობას, გამავლობას და ტექნიკურ მახასიათებლებს გააერთიანებს. ასევე, ის სრულამძრავიანი ტრანსმისიითაც აღიჭურვება. ოღონდ, ჯერ არაფერი თქმულა იმაზე, თუ რომელი აგრეგატებით აღიჭურვება.

კონცეპტუალური ქროსოვერის გაბარიტებია: სიგრძე 4310 მილიმეტრი, სიგანე 1840 მილიმეტრი, სიმაღლე 1600 მილიმეტრი და ბორბლებს შორის ბაზა 2600 მილიმეტრი. ანუ ის „სუძუკი SX4-ის“ სრულამძრავიან ვერსიაზე 160 მილიმეტრით გრძელი, 85 მილიმეტრით განიერი და 20 მილიმეტრით დაბალია. თუმცა, სიმაღლეში სხვაობა, SX4-ის სახურავზე ბარგის სამაგრების არსებობის შედეგია.

იაპონური კომპანიის მიერ გავრცელებული რელიზის მიხედვით, კონცეპტუალური ავტომობილი კარგი აეროდინამიკური მახასიათებლებით გამოირჩევა. ამ მხრივ, ეფექტური გამოდგა უკნისკენ დაქანებული სახურავი, რომელმაც ძარის გარსშემოდენილობა გააუმჯობესა. დაკიდევ, “S-ქროსის“ გარეგნობაში ყურადღებას მისი ფერიც იქცევს. იაპონურმა კომპანიამ ის სპეციალურად ამ კონცეპტისთვის შეიმუშავა და მას „კრისტალურად მწვანე მეტალიკი“ უწოდა.

პარიზში „სუძუკის“ არ გამოუცხადებია, აპირებს თუ არა “S-ქროსით“ უფრო პატარა SX4-ის ჩანაცვლებას. ისიც უცნობია, თუ რა აგრეგატებით აღუჭირვება ახალი ავტომობილი. თუმცა, იაპონური კომპანია გვპირდება, რომ „S-ქროსს“ თავის კლასში ერთ-ერთი ყველაზე სუფთა გამონაბოლქვიანი ავტომობილი გახდება.