Wednesday, July 22, 2009

”მერსედეს-ბენც SLS AMG” ”თოლიის ფრთით”

Mercedes Benz SLS AMG ‘Gullwing’

22 ივლისი


უკვე რამდენიმე თვეა, რაც ”მერსედეს-ბენცი” გერმანიის ნურბურგრინგის ტრასის ჩრდილოეთს მარყუჟზე ტესტირებას უტარებს თავის ახალ სუპერავტომობილ SLS AMG-ს, რომელმაც უკვე კარგა ხნის წინ მოძველებული SLR უნდა შეცვალოს. როგორც ავტომობილის სახელწოდებიდანაც ჩანს, მის შექმნაში მონაწილეობას შტუტგარტული კომპანიის შვილობილი, ტუნინგზე გაწაფული ატელიე AMG-ც აწარმოებს. უფრო სწორედ, საქმე მთლიანად ამ ფირმის სპეციალისტებისთვისაა მინდობილი.

ახალი ავტომობილის მსოფლიო პრემიერა სექტემბერში, ფრანკფურტის საავტომობილო შოუზე იგეგმება, თუმცა ”დაიმლერმა” მის შესახებ უკვე ბევრი ინფორმაცია გაავრცელა. მართალია, ავტომობილი ჯერაც გვარიანად შენიღბულ მდგომარეობაში გადის საგზაო გამოცდებს, თუმცა ცნობილია, რომ მას ეგრეთ წოდებული თოლიის ფრთის მსგავსი კარებები ექნება, როგორც 50-იანი წლების ლეგენდარულ ”SL გალვინგს” (გალვინგ სწორედ თოლიის ფრთას ნიშნავს) ჰქონდა.

სამაგიეროდ, სახელოვანი წინაპრისგან განსხვავებით, ახალი ავტომობილი ალუმინის პროფილებისგან დამზადებულ მოცულობით ჩარჩოს დაეყრდნომა. ალუმინის ფართოდ გამოყენებით, მწარმოებელმა ავტომობილის მასის შემცირებას (1 620 კგ-მდე) და გრეხვაზე შასის სიხისტის გაზრდას მიაღწია, რასაც სპორტული ავტომობილისთვის დიდი მნიშვნელობა აქვს. ამასთან, წინა და უკანა ღერძებს შორის წონა თითქმის იდეალურადაა განაწილებული - წინა ღერძზე წონის 48 პროცენტი მოდის, უკანაზე კი - 52.

SLS AMG-ს მამოძრავებელ ძალას AMG-ს სპეციალისტების მიერ დამუშავებული 6.2-ლიტრიანი V8 ძრავი ანიჭებს, რომელთანაც ორდისკოიანი გადაბმის ქუროს მეშვეობით, 7-საფეხურიანი სეკვენტალური კოლოფია დაკავშირებული. ტრანსმისია კი მაბრუნ მომენტს უკანა წამყვან ბორბლებს აწვდის.

ძრავის პიკური სიმძლავრე 571 ცხენის ძალას, მაბრუნი მომენტი კი 650 ნიუტონმეტრს აღწევს. მოდერნიზაციის დროს, ძრავს შეეცვალა საწვავი ნარევის შეშვების სისტემა, რომელიც ალუმინისა და მაგნიუმის შენადნობისგან დამზადდა, ასევე შეიცვალა გამომშვები სისტემა, ელექტრონულად მართვადი აქსელერატორის ფირფიტები და ძრავის შეზეთვის სისტემა, რომელსაც ეგრეთ წოდებული მშრალი კარტერი აქვს. ძრავი ავტომობილის წინ, ოღონდ, წინა ღერძის უკან განთავსდა, რითაც AMG-ს ინჟინრებმა წონის თანაბრად განაწილებას შეუწყვეს ხელი.

ყველაფრის შედეგი ისაა, რომ SLS AMG-ს 0-100-მდე აჩქარება 3.8 წამში შეუძლია, მისი მაქსიმალური სიჩქარე კი 315 კმ/სთ-ს აღწევს. სხვათა შორის, ასეთ დინამიკას ის ფაქტორიც განაპირობებს, რომ AMG-ს სპეციალისტების მიერ შექმნილი გადაცემათა კოლოფი, საფეხურების შეცვლაზე მინიმალურ დროს ხარჯავს, რითაც ბრუნვის რიცხვს უდანაკარგოდ ინარჩუნებს.

ელექტრონიკის დახმარებით, მძღოლს ავტომობილის მართვა ოთხ რეჟიმში შეუძლია. შესაძლებელია ავტომობილის როგორც კომფორტული, ასევე სპორტული, ექსტრემალურად სპორტული და სარბოლი რეჟიმებით მართვა. მათი არჩევისას, შესაბამისად ”განეწყობა” საკიდარიც, რომელიც ძირითადად ალუმინის დეტალებისგან შედგება. ესოდენ ტემპერამენტიანი ავტომობილის დამუხრუჭებას კი კარბონ-კერამიკული სამუხრუჭე სისტემა ემსახურება, რომლის დისკებიც 19-დუიმიან, ალუმინის შენადნობისგან დამზადებულ ბორბლებშია მოთავსებული.

საინტერესოა ასევე SLS AMG-ს ზომები. მისი სიგრძე 4.65 მ, სიგანე 1.95 მ, სიმაღლე 1.25 მ და ბორბლებს შორის ბაზა კი 2.7 მეტრია.

დაბოლოს ავტომობილის ფასის შესახებ. ის ჯერ საბოლოოდ დადგენილი არაა, თუმცა მოსალოდნელია, რომ 300 000 დოლარის ფარგლებში იქნება. შტუტგარტელები იმედოვნებენ, რომ ასეთი სიძვირის მიუხედავად, წელიწადში 3 000-5 000 SLS AMG-ს გაყიდვას შესძლებენ, რომელმაც კონკურენცია ”ლამბორგინი გალიარდოსა” და ”ფერარის” უახლეს F450-ს უნდა გაუწიოს. ”მერსედეს-ბენცის” დილერთა შოურუმებში SLS AMG მერმის, წლის პირველ ნახევარში გამოჩნდება.

”როლს როისმა” ”გოუსტის” მონაცემები გამოაქვეყნა

Rolls-Royce Ghost

22 ივლისი

ჟენევის ავტო შოუზე, გოუსტი 200EX-ად გაგვაცნეს
.............................................................................................

გუშინ ”როლს როისმა” თავისი ახალი ავტომობილის, ”გოუსტის” მახასიათებლები გამოაქვეყნა. ავტომობილი, რომელსაც სახელის შერქმევამდე, ”ბეიბი როლსად” მოიხსენიებდნენ და რომლის მსოფლიო პრემიერაც სექტემბერში ფრანკფურტის საერთაშორისო მოტორ შოუზე გაიმართება, ინგლისური კომპანიის სამოდელო გამაში, ”ფანტომის” დაბლა დაიკავებს ადგილს.

გამოქვეყნებული პრეს რელიზით მწარმოებელი გვაუწყებს, რომ ავტომობილი 6.6-ლიტრიანი V12 ტურბოძრავითაა აღჭურვილი, რომელთანაც კომპანია ZF-ის მიერ შემუშავებული, 8-საფეხურიანი, ავტომატური გადაცემათა კოლოფია შეწყვილებული. ძრავის სიმძლავრე 570 ცხენის ძალას აღწევს, მისი მაქსიმალური მაბრუნი მომენტი კი - 780 ნიუტონმეტრი, მუხლა ლილვის 1 500 ბრ/წთ-ზე მიიღწევა. ამ აგრეგატების მეშვეობით, ადგილიდან 100 კმ/სთ-მდე აჩქარება ”გოუსტს” 4,9 წამში შეუძლია, მისი მაქსიმალური სიჩქარე კი 250 კმ/სთ-ითაა შეზღუდული.

ავტომობილი ”ბეემვე 760 Li-ს” დაგრძელებულ პლატფორმაზეა აგებული. მისი სიგრე 5399 მმ, ბაზა 3295 მმ, სიგანე 1948 მმ და სიმაღლე 1550 მილიმეტრია. ამგვარად, ის ”ფანტომთან” შედარებით პატარა კია, მაგრამ გაბარიტებით მაინც ლუქსის კლასის ყველა ავტომობილს აღემატება.

ავტომობილი ინტელექტუალური პნევმო საკიდარითაა აღჭურვილი, რომელიც ადაპტირებად ამორტიზატორებთან ერთად, ელექტრონიკით იმართება. კომპიუტერი საკიდარის მუშაობას ყოველ 2.5 მილიწამში აკონტროლებს და მის მახასიათებლებს, გარედან, ამორტიზატორებზე განლაგებული სენსორების მიერ მიწოდებული ინფორმაციის შესაბამისად ცვლის. საკიდარი იმდენად მგრძნობიარეა, რომ მას უკანა სავარძელზე, მგზავრის ერთიდან მეორე მხარეს გადასვლასაც კი აფიქსირებს და ამორტიზატორების მახასიათებლებს შესაბამისად ცვლის. გზის საფარისა და მოძრაობის სიჩქარის შესაბამისად, კომპიუტერის ბრძანებით, საკიდარს ავტომობილის კლირენსის 25 მილიმეტრით აწევა/დაწევა შეუძლია.

წლის დასაწყისში კომპანიამ გამოაცხადა, რომ ”გოუსტის” წყალობით, მისი გუდვუდის ქარხანის წარმოების გაორმაგებაა ნავარაუდები. ამასთან, ”როლს როისის” ამ ახალი ავტომობილით ოფიციალური დაინტერესება უკვე 10 000-ზე მეტ ადამიანს (პოტენციურ მყიდველს) გამოუთქვამს.

ევროპაში ”გოუსტის” გაყიდვები ამ წლის ბოლო დაიწყება. ძველ კონტინენტზე მისი ფასი 213 000 ევროა. ამერიკასა და სხვა რეგიონებში ამ ავტომობილის ყიდვა კი მერმისიდან იქნება შესაძლებელი და იქ მისი ფასი 250 000 დოლარია.