”აუდი” ჰიბრიდულ Q5-ს 2011-ში გამოუშვებს

Audi Q5 Hybrid

13 ივნისი

თანამედროვე ავტოინდუსტრიის მთავარი თემა, გლობალური კრიზისის გარდა, ეკოლოგიური ავტომობილებიცაა. დღეს ამ ტრენდს თითქმის ყველა დიდი ავტომწარმოებელი მისდევს და ამ მხრივ, გამონაკლისი არც ”აუდია”, რომელმაც განსაკუთრებულ წარმატებებს დიზელის ძრავების წარმოებაში მიაღწია, ახლა კი ჰიბრიდულსა და ელექტრულ ტექნოლოგიებსაც ინტენსიურად ითვისებს.

ახლახანს, კომპანიამ გამოაცხადა, რომ ორი წლის შემდეგ ჰიბრიდული აგრეგატით აღჭურვილი უგზოობის კომპაქტური მოდელის, Q5-ს წარმოებას დაიწყება და მას პირველ რიგში, აშშ-ის ბაზარზე შეიტანს, სადაც ასეთ ავტომობილებზე ყველაზე დიდი მოთხოვნილებაა.

”აუდის” ჰიბრიდული აგრეგატი ბენზინის ძრავისა და ელექტროძრავის კომბინირებულად გამოყენებას ითვალისწინებს. რამდენადაც, Q5-ში A4 და A5 სედანების ბევრი ელემენტია გამოყენებული, შეიძლება ვივარაუდოთ, რომ Q5-ზე გამოყენებულ ჰიბრიდულ აგრეგატს მომავალში ეს ავტომობილებიც მიიღებენ.

ევროპული ბაზრისთვის, ”აუდი” აქცენტს დიზელის აგრეგატებზე აკეთებს, მაგრამ ამერიკისთვის იგივე სტრატგია არ გამოადგება. ამის მიზეზი კი ისაა, რომ ევროპაში საწვავი გაცილებით ძვირია და ბენზინსა და დიზელის საწვავზე ფასებიც მცირედ განსხვავდება. ამერიკაში კი დიზელისძრავიანი ავტომობილები ნაკლებად პოპულარულია.

სამაგიეროდ, ოკეანის გადაღმა ჰიბრიდული ავტომობილები უკვე ძალიან პოპულარულია. სმერიკული ბაზარი კი იმდენად დიდა, რომ მისი მოთხოვნილების დასაკმაყოფილებლად, ჰიბრიდული ავტომობილების წარმოება ”აუდის” უღირს.

ეკოლოგიაზე ზრუნვას გერმანული კომპანია სხვა კუთხითაც ავლენს. კერძოდ, ამ ეტაპზე, მისი ინჟინრების ერთ-ერთი მთავარი მიზანი, ავტომობილების წონის მაქსიმალურად შემცირებაა. ჰიბრიდული ტექნოლოგიების ათვისების შემდეგ კი ელექტრომობილების ჯერი დადგება.

”ბრაუნ GP” ძველ ბოლიდებს ჰყიდის

13 ივნისი

მიმდინარე სეზონში, ”ბრაუნ GP-ის” ბოლიდები ტრასებზე აბსოლუტური დომინანტები არიან, მაგრამ ამის მიუხედავად, გუნდი მაინც მომჭირნედ არსებობას განაგრძობს, რაც სპონსორების ნაკლებობის ბრალია. ჰოდა, ფინანსების ნაწილობრივ შევსების მიზნით, მისმა ხელმძღვანელობამ აუქციონზე გუნდის წინამორბედი ”ჰონდას” და ”ბრიტიშ ამერიკენ რეისინგის” 2001-2006 წლების რამდენიმე ბოლიდის გაყიდვა გადაწყვიტა.

”მოხარულნი ვართ, რომ ჩვენს ფანებსა და კოლექციონერებს სასურველი ბოლიდების შეძენის საშუალება მიეცემათ”, - ამბობს ”ბრაუნ GP-ის” მთავარი აღმასრულებელი ნიკ ფრაი.

აუქციონი 25 ივლისს ავტოდრომ ”სილვერსტოუნზე”, კლასიკური ისტორიული მანქანების ტრადიციული რბოლის დღეს გაიმართება, მისი ორგანიზატორი კი არის კომპანია ”ბონჰემს მოტორინგი”.

”ფორმულა ერთის გუნდებს წლების განმავლობაში, არაერთი გამოუსადეგარი სარბოლი ავტომობილი უგროვდებათ, რომლებიც დროდადრო აუქციონზე გამოაქვთ, ვფიქრობთ, ”ბრაუნ GP-მ” აუქციონისთვის კარგი დრო შეარჩია - წარმატებული გუნდის მანქანების შეძენას ბევრი მოინდომებს”, - ამბობს ”ბონჰემს მოტორინგის” საერთაშორისო საქმეთა მმართველი დირექტორი ჯეიმს ნაიტი.

აუქციონზე გასაყიდი ყველა ბოლიდი არასრულადაა დაკომპლექტებული. მათზე არ იქნება ძრავები და მოძრაობისთვის აუცილებელი სხვა ელემენტები. სამაგიეროდ, საკოლექციო გარაჟებისთვის ისინი იდეალური დანამატი იქნება. ბოლიდების საწყისი ფასები 7 000-22 000 გირვანქა სტერლინგის ფარგლებში მერყეობს.

ავტომობილების გარდა, აუქციონზე ასევე გაიყიდება 100-ზე მეტი ლოტი, რომლებშიც სარბოლი ბოლიდების ნახმარი ნაწილები და გუნდის სუვენირები შევა.

”ოპელის” გაყიდვა ჯერ არ დასრულებულა

Opel

13 ივნისი

”ოპელის” გაყიდვის საკითხი ჯერ საბოლოოდ გადაქყვეტილი არაა. ამაზე მოწმობს ის ფაქტი, რომ გერმანიის მთავრობამ ამ კომპანიის შეძენის მსურველებთან მოლაპარაკებები განაახლა. პარალელურად, გერმანიის ეკონომიკის მინისტრმა კარლ-თეოდორ ცუ გუტენბერგმა განაცხადა, რომ ამ ეტაპზე, კანადურ კომპანია ”მაგნა ინტერნეიშნლთან” მხოლოდ ურთიერთგაგების მემორანდუმია ხელმოწერილი, რაც იმას ნიშნავს, რომ რეალურად, ”ოპელი” ჯერ გაყიდული არაა.

მანვე აღნიშნა, რომ ამ ეტაპზე, ”ოპელის” შეძენის სხვა მსურველთაგან, მოლაპარაკება მხოლოდ ჩინურ ”ბეიძინ აუტომოტივ ინდასტრისთან” და იტალიურ ”ფიატთან” მიმდინარეობს. ამ ორის გარდა, ”ოპელის” შეძენის სურვილი კიდევ რამდენიმე კომპანიამ გამოთქვა, მაგრამ ცუ გუტენბერგი ამ ეტაპზე მათს შესახებ არაფერს ამბობს.

ექსპერტები მიიჩნევენ, რომ ”ოპელის” შეძენის სხვა მსურველებთან მოლაპარაკებით, გერმანიის მთავრობა ”მაგნაზე” ზეწოლას ახდენს, რისი მიზანიც ისაა, რომ კანადურმა კომპანიამ ”ოპელის” გერმანულ საწარმოებში შესამცირებელი სამუშაო ადგილების რაოდენობა შეკვეცოს.

წინასწარი შეთანხმების მიხედვით, ”,აგნას” და მის პარტნიორს, რუსულ ბანკ ”სბერბანკს” ”ოპელის” აქციების 55 პროცენტში 500 მილიონი ევრო აქვთ გადასახდელი. აქედან, მხოლოდ 100 მილიონი უნდა გადაიხადონ ნაღდი ანგარიშით, დანარჩენი თანხა კი გერმანულ კომპანიას უპროცენტო სესხის სახით გადაეცემა. თუმცა, ამის სანაცვლოდ, ”მაგნა” და ”სბერბანკი” ”ოპელის” ობლიგაციებს მიიღებენ.

რაც შეეხება შემცირებებს, მხარეებს შორის მიღწეული წინასწარი შეთანხმება ითვალისწინებდა, რომ ”მაგნა” ”ოპელში” მხოლოდ 10 000 სამუშაო ადგილს შეამცირებდა. მაგრამ დღეს კანადელები აცხადებნ, რომ შესამცირებელი 11 6000 ადგილია.

”ბუგატი ვეირონზე” სწრაფი პირველი თაობის ”გოლფი”

13 ივნისი

ვინ წარმოიდგენდა, რომ პირველი თაობის ”ფოლკსვაგენ გოლფით”, რომელიც მეორადი ავტომობილების ბაზარზე 50 გირვანქა სტერლინგადაა შეძენილი, სუპერავტომობილ ”ბუგატი ვეირონის” უკან მოტოვება იქნებოდა შესაძლებელი? მაგრამ, ხანდახან შეუძლებელიც შესაძლებელი ხდება ხოლმე.

ამჰერად, შეუძლებლის შემძლებლად 42 წლის ბრიტანელი ენდი უაიტი მოგვევლინა, ვისაც პატარა ქალაქ ნიუმარკეტში მანქანების საკუთარი სახელოსნო აქვს. მან 1979 წელს გამოშვებული ”გოლფი”, რომელიც 1.6-ლიტრიანი ძრავით იყო აღჭურვილი, 50 გირვანქა სტერლინგად შეიძინა და სარბოლ დრეგსტერად გადააკეთა, რაზეც დაახლოებით 60 000 სტერლინგი დახარჯა. ძველი ავტომობილის მოდერნიზაციის დროს, მან ძარა დამატებითი უსაფრთხოების კარკასით გააძლიერა, მთლიანად შეცვალა საკიდარი, სტანდარტული ძრავი კი 1.850-ლიტრიანი ტურბოაგრეგატით შეცვალა, რომლის სიმძლავრეც 700 ცხენის ძალას აღწევს.

უაიტი ამბობს, რომ მის მიერ მოდიფიცირებული ”გოლფის” მაქსიმალური სიჩქარე 290 კმ/სთ-ს აღწევს, თუმცა 250 კმ/სთ-ზე ზემოთ, მისი მართვა პრაქტიკულად შეუძლებელია. თავისი მონსტრით უაიტმა უკვე მოასწრო ნორთჰემპტონშირში დრეგსტერების რბოლის მოგება. თანაც, მისმა ავტომობილმა ბრწყინვალე ტემპერამენტი გამოავლინა - 100 კმ/სთ-მდე აჩქარება მან 2.36 წამში მოასწრო. ეს კი წამის მეათედით ნაკლებია ”ბუგატი ვეირონის” სიჩქარეზე.

ყველაფერი კარგი, მაგრამ უაიტი მიღწეულით დაკმაყოფილებას არ აპირებს. მას თავისი ავტომობილის კიდევ ერთხელ მოდიფიცირება აქვს გადაწყვეტილი, რის შემდეგაც, მისმა ”გოლფმა” 402-მეტრიანი დისტანცია 9 წამში უნდა გაიაროს. ამასთან, ენთუზიასტი ირწმუნება, რომ ამ ავტომობილით საერთო სარგებლობის გზებზე უსაფრთხოდ გადაადგილებაც შესაძლებელი იქნება. ”დაბალი სიჩქარით მოძრაობისას, ეს ჩვეულებრივი ავტომობილია, მაგრამ როცა ის ტრასაზე გამომყავს, ნამდვილ მონსტრად გადაიქცევა ხოლმე”, - ამბობს უაიტი (სურათზე თავის შედევრთან ერთად).

”პეჟო 308 RC Z” ტესტირებას გადის

Peugeot 308 RC Z

13 ივნისი

ინტერნეტ გამოცემა Carscoop.blogspot.com გვატყობინებს, რომ ფრანგული კომპანია ”პეჟო” უკვე შეუდგა თავისი ახალი სპორტული კუპეს, 308 RC Z-ს საგზაო ტესტირებას. ამ ავტომობილის კონცეპტუალური ვერსია პირველად ორი წლის წინ, ფრანკფურტის ავტო შოუზე გამოჩნდა და გამოფენის დამთვალიერებელთა მოწონება დაიმსახურა. თუმცა, მისი წარმოების დაწყება მაინც გაჭიანურდა.

Carscoop-ის მიერ გამოქვეყნებული ფოტოებიდან, რომელიც კამუფლირბული ავტომობილის ტესტირების დროსაა გადაღებული, კარგად ჩანს, რომ გარეგნულად, კონცეპტუალური ვერსიისგან ის თითქმის არ განსხვავდება.

წინასწარი მონაცემებით, ჰეჩბეკ 308-ს მოდერნიზებულ პლატფორმაზეა ბაზირებული, რომელსაც წამყვანი წინა ბორბლები აქვს. კუპეს ჩასაჯდომი ფორმულაა 2+2, თუმცა რეალურად, მასში მხოლოდ ორი სრულფასოვანი ადგილია. საბაზო ჰეჩბეკთან შედარებით, კუპეს ბორბლების გაგანიერებული კვალი აქვს. ასევე შეცვლილია (უფრო გასპორტულებულია) საჭის მექანიზმი.

რაც შეეხება აგრეგატებს, ამ ეტაპზე ცნობილია, რომ კუპეს ტოპ ვერსია 4-ცილინდრიანი 1.6-ლიტრიანი ტურბოძრავით აღიჭურვება, რომელსაც მყიდველს ფორსირების ორი დონით მიაწვდიან. შესაბამისად, ძრავის სიმძლავრე 150, ან 163 ცხენის ძალა იქნება. ძრავს თავიდან მხოლოდ მეანიკური კოლოფი შეუწყვილდება, თუმცა მოგვიანებით, მყიდველს ავტომატურ კოლოფსაც შესთავაზებენ.

ახალი კუპეს მსოფლიო პრემიერა სექტემბერში, ფრანკფურტის ავტო შოუზე გაიმართება, მაშინვე გამოცხადდება ახალი ავტომობილის სახელი. ავტომობილის გაყიდვები კი მერმის, მაისში დაიწყება. ავტომობილის სავარაუდო ფასი კი 20 ათას ევროზე მეტი იქნება.