Monday, August 31, 2009

შესაძლოა, ”ტოიოტასთან” ”ბეემვემაც” ითანამშრომლოს

BMW To Team Up With ToyotaFor Isetta?

31 აგვისტო

თანამედროვე ავტოინდუსტრია წარმოების დივერსიფიკაციასა და კოოპერაციას ეყრდნობა - თითქმის ყველა დიდი ავტომწარმოებელი თავის პროდუქციას მთელს მსოფლიოში, დიდი და საშუალო ზომის ბაზრის მქონე რეგიონებში აწარმოებს. მაგალითად, ”ჯენერალ მოტორსს” ამერიკის გარდა, ფესვები მექსიკაში, კანადაში, ევროპასა და ავსტრალიაში აქვს გადგმული და ახლა ინტენსიურად ჩინეთშიც მკვიდრდება. იაპონური კომპანიებიც თავიანთ ავტომობილებს აზიაში, ევროპასა და აშშ-ში აწარმოებენ, ”ფოლკსვაგენიც” ყველგანაა მოდებული.

კოოპერაცია კი კონკურენტ კომპანიებს ერთმანეთთან ათანამშრომლებს - ახალი მოდელების შემუშავებისას, ასე ისინი მნიშვნელოვანი სახსრების დაზოგვას ახერხებენ. გარდა ამისა, კოოპერაცია ზოგიერთ კომპანიას ისეთ სეგმენტებში შეღწევის საშუალებას აძლევს, რომლებშიც ადრე მათ ვერ ნახავდით.

ასეთი თანამშრომლობის უამრავი მაგალითი არსებობს, რომელთაგან ყველაზე სენსაციურის შესახებ, ჩვენ სულ ორი თვის წინ გაუწყეთ - ”ასტონ მარტინს” ჯუჯა ავტომობილის წარმოება აქვს გადაწყვეტილი და ამ მიზნის განსახორციელებლად, ”ტოიოტას” შეუამხანაგდა, რომელიც მას ჯუჯა ჰეჩბეკ iQ-ს (სურათზე) ტექნოლოგიას უზიარებს.

ამ ამბის შემდეგ, სულაც აღარაა გასაკვირი ინფორმაცია, რომელიც დღეს ამერიკულ საავტომობილო ინტერნეტ გამოცემებმა გაავრცელეს - ”ტოიოტასთან” მსგავს თანამშრომლობას ”ბეემვეც” აპირებს, რომელსაც საქალაქო სუბკომპაქტური ავტომობილის წარმოება და მისთვის ბრენდ ”ის(ზ)ეტას” გაცოცხლება აქვს გადაწყვეტილი.

ჯერჯერობით, ეს ინფორმაცია არც ”ბეემვეს” დაუდასტურებია და არც ”ტოიოტას”. მაგრამ რამდენიმე გარემოება მიანიშნებს, რომ ისინი დაახლოებას აპირებენ. ორივე კომპანია პატარა ავტომობილების სეგმენტში გააქტიურებას აპირებს (ტოიოტა ამ სეგმენტში დიდი ხნის წინ გაშინაურდა) და ორივესთვის ყველაზე მნიშვნელოვანი ამერიკული ბაზარია, სადაც ახლა სწორედ პატარა ავტომობილებისადმი ინტერესის ზრდა შეინიშნება.

თუ ”ბეემვე” და ”ტოიოტა” თანამშრომლობას მართლაც დაიწყებენ, მათი ერთობლივი გარჯის პირველი შედეგი შეიძლება 2012, ან 2013 წელს ვიხილოთ. უფრო ადრე კი ბავარიელები ბაზარზე ”მინის” მარკით კუპესა და როდსტერს გამოუშვებენ. რა თქმა უნდა, ეს მხოლოდ იმ შემთხვევაში მოხდება, თუ ფრანკფურტის წლევანდელ ავტოშოუზე, დამთვალიერებელთაგან დადებით გამოხმაურებას მიიღებენ.

მერე კი ნუ გაიკვირვებთ, თუ ”ტოიოტა” ამ ორი ავტომობილის ბაზაზე, თავის სამოდელო გამას გააფართოებს...

”ფოლკსვაგენმა” შეიძლება ”პორშეს” ”პანამერა” და ”კაიენი” აღარ გამოუშვას

VW To Kill Porsche Panamera, Cayenne

31 აგვისტო

პორშე პანამერა

............................................

”ფოლკსვაგენთან” ”პორშეს” გაერთიანებას, ამ უკანასკნელის მხრიდან, ბევრი მოწინააღმდეგე ჰყავდა და ისევ ჰყავს. უპირველესად, მათ არ სურთ, რომ მათმა კომპანიამ დამოუკიდებლობა დაკარგოს და ისეთი გიგანტის მიერ შეკრულ კონგლომერატში ჩაიკარგოს, როგორიც ”ფოლკსვაგენია”.

მალე კი შესაძლოა, გაერთიანების მოწინააღმდეგეთა რაოდენობა მალე გაიზარდოს. ინგლისურ ჟურნალ ”ქარ-ის” მიერ გავრცელებული ინფორმაციით, ვოლფსბურგულ გიგანტს გადაწყვეტილი აქვს, რომ ”პორშე” სათავეებს დაუბრუნოს და კვლავ ჭეშმარიტად სპორტული ავტომობილების მწარმოებლის (საპატიო) სტატუსი დაუბრუნოს. ამისათვის კი ორი განსხვავებული, არასპორტული მოდელის - სედან ”პანამერას” და უგზოობის ”კაიენის” წარმოების შეწყვეტა არის გადაწყვეტილი.

რა თქმა უნდა, ეს დაუყოვნებლივ არ მოხდება. იმავე ”ქარ-ის” ცნობით, ამ ორი ავტომობილის წარმოება მხოლოდ მას შემდეგ შეწყდება, რაც მიმდინარე მოდელების საწარმოო ციკლი სრულად ამოიწურება. ამას კი დაახლოებით 7 წელი მაინც დასჭირდება. სწორედ ამდენია ორივე ავტომობილის არქიტექტურის სიცოცხლის ხანგრძლივობა.

პორშე კაიენი

.............................................

არგუმენტი შემდგომშია: ”ფოლკსვაგენი” და მის ჯგუფში შემავალი კომპანიები არაერთ სედანსა და უგზოობის მოდელს აწარმოებენ და არაა იმის საჭიროება, რომ იმავე ტიპის ავტომობილების შესამუშავებლად, ”პორშემ” ასეულობით მილიონი დოლარი ხარჯოს. მაგრამ ისიც ფაქტია, რომ ამავე ლოგიკის მიხედვით, ”აუდისთვის” ზედმეტია სპორტული ავტომობილების წარმოება. მაგალითად, ისეთების, როგორებიცაა TT და R8, ასევე უახლესი ”S5 სპორტბეკი”.

იმავე მოსაზრებით, ”ფოლკსვაგენმა” საკუთარი უგზოობის მოდელების წარმოება უნდა შეაჩეროს, თავისთვის კი მხოლოდ პატარა ჰეჩბეკები და ”კრაისლერისგან” ადრე ნაყიდი მინივენი ”რუტანი” დაიტივოს. და საერთოდ, ვოლფსბურგელებს რისთვის სჭირდებათ ”შკოდა” და ”სეატი”, ეს კომპანიები ხომ ”ფოლკსვაგენის” რებრენდირებულ მოდელებს აწარმოებენ? რაღაც მიზეზი ”ბენტლისა” და ”ლამბორგინისთვისაც” მოიძებნება. და თუ ოდესმე ”ფოლკსვაგენი” ”პორშეს” მფლობელი აღარ იქნება, ამ უკანსკნლს, უაღრესად კონკურენტულ ბაზარზე დამოუკიდებლად არსებობა ძალიან გაუჭირდება.

თუმცა, ვოლფსბურგელებს შტუტგარტული კომპანიის სხვა მიმართულებით წაყვანა სურთ. მაგალითად, პრაქტიკულად გადაწყვეტილია ყველაზე პატარა ”პორშეს” წარმოების დაწყება, რომელიც ”ფოლკსვაგენის” კონცეპტუალური ”ბლიუსპორტის” ბაზაზე აიგება. ასევე იგეგმება ლეგენდარულ მოდელ 356-ის გაცოცხლება. ეს ”პორშეს” ისტორიაში პირველი ავტომობილია. და რა თქმა უნდა, ვოლფსბურგში სერიოზულად დაფიქრდნენ ლე მანის სერიის რბოლებში მოასპარეზე პროტოტიპ ”RS სპაიდერის” ბაზაზე სუპერავტომობილის შექმნაზე.

მოკლედ, არაა გამორიცხული, რომ მალე ”პორშე” ისევ თავის ჩვეულ კალაპოტში ჩადგეს. ამგვარად, კომპანია სპორტული ავტომობილების მწარმოებლის საპარიო სტატუსს გაუფრთხილდება...

Sunday, August 30, 2009

”ბეემვეს” კონცეპცია ”ვიჟნ ეფიციენტდაინემიქსი”

BMW Vision EfficientDynamics

30 აგვისტო





ფრანკფურტის წლევანდელი საავტომობილო შოუ ყველაზე ”მწვანე” იქნება მსოფლიოს უდიდეს საავტომობილო გამოფენებს შორის. მისი ერთ-ერთი გამორჩეული ვარსკვლავი კი აუცილებლად გახდება ”ბეემვეს” კონცეპტუალური ავტომობილი უცნური სახელწოდებით ”ვიჟნ ეფიციენტდაინემიქს”, რაც შეიძლება ითარგმნოს, როგორც ”ეფექტური დინამიკის ხედვა”.

ამ ავტომობილმა პრესაში აჟიოტაჟი მასზე პირველი ინფორმაციის გავრცელებისთანავე გამოიწვია. ზოგის მოლოდინით, ის უნდა ყოფილიყო კუპეს ტიპის ავტომობილი, ზოგი ოთხკარიან სედანს (ან კუპეს) ელოდა, შიგადაშიგ კი იყო ლაპარაკი ჰიბრიდზე, რომლის შიდაწვის ძრავსაც სამი ცილინდრი უნდა ჰქონოდა. თავად ბავარიელები კი აცხადებდნენ, რომ ამ კონცეპციით ისინი ყველას უჩვენებდნენ, რომ ეკონომიურობის მკვეთრად გაუმჯობესება მხოლოდ კარგად დამუშავებული აეროდინამიკითაც შეიძლება.

გუშინ კი ”ბეემვემ” ამ კონცეპციის შესახებ მწირი ინფორმაცია გამოაქვეყნა, რომლიდანაც ჩანს, რომ ოთხკარიანი ვარიანტის გარდა, დანარჩენი თითქმის ყველა მოლოდინი გამართლდა.

უპირველეს ყოვლისა, ფოტოებიდან ჩანს, რომ ”ვიჟნ ეფიციენტდაინემიქსი” სპორტული, ორკარიანი ავტომობილია, რომელსაც ორივე კარი ”ლამბორგინის” სტილში, ქვევიდან ზევით ეხსნება. მის სალონში ოთხი სავარძელია მოთავსებული. მათ შორის არსებული ტიხარი კი სარბოლი ბოლიდის კოკპიტის შთაბეჭდილებას ტოვებს.

პირველ რიგში უნდა ითქვას, რომ კონცეპტუალური ავტომობილი ძალიან დახვეწილი და ეფექტური აეროდინამიკით გამოირჩევა. ჯერ ერთი, მისი აეროდინამიკური წინააღმდეგობის კოეფიციენტი სულ რაღაც 0.22-ია. შედარებისთვის, სერიულ ავტომობილებში ეს მაჩვენებელი ყველაზე ხშირად 0.30-ის დონეზეა. გარდა ამისა, ავტომობილს გარსშემოდენილი ფორმა აქვს, რისი წყალობითაც, ჰაერის ნაკადი მისი ძარის არცერთ ნაწილს მკვეთრად არ სწყდება. თანაც, ეს ნკადიზი თითქმის ყოველთვის სასარგებლო სამუშაოსაც ასრულებს.

უაღრესად დახვეწილი აეროდინამიკის გარდა, ავტომობილი სიმსუბუქითაც გამოირჩევა, რასაც მასში უხვად გამოყენებული ალუმინი და მისი შენადნობები განაპირობებს. შასი, ძარა და საკიდარი - თითქმის მთლიანად ალუმინის შენადნობებისგანაა დამზადებული. შუშა კი პოლიკარბონტმა შეცვალა. სალონში კი კევლარის ნაწილები, პანელები და დეტალები სჭარბობს.

კონცეპციის მეორე მთავარი ღირსება მისი ძალური დანადგარი - პლაგ-ინ ჰიბრიდული აგრეგატია, რომელშიც უნისონში სამცილინდრიანი ტურბოდიზელი და ორი ელექტროძრავი მუშაობს. 1.5-ლიტრიანი შიდაწვის ძრავს საწვავი უშუალოდ წვის კამერაში მიეწოდება, მისი სიმძლავრე 163 ცხენის ძალაა. რაც შეეხება ელექტროძრავებს, თითოეული მათგანი ცალკე ღერძს ემსახურება. ამასთან, წინა ღერძისა უფრო მძლავრია. სამივე ძრავის ჯამური სიმძლავრე კი 356 ცხენის ძალას აღწევს.

სამივე ძრავს მუშაობა ცალ-ცალკეც შეუძლია და ერთდროულადაც. შესაბამისად, ავტომობილი შეიძლება იყოს წინა წამყვანბორბლიანი, უკანა წამყვანბორბლიანი და სრულამძრავიანი. ამასთან, სრულამძრავიანი სისტემა მხოლოდ ელექტროძრავებითაც მუშაობს. წინა ელექტროძრავი დამოუკიდებელი აგრეგატია, უკანა კი შიდაწვის ძრავთან ერთად, ჰიბრიდულ სისტემას ქმნის. ორივე ძრავს ელექტროენერგიით ლითიუმ-იონური აკუმულატორები ამარაგებს, მათთან კი ერთსაფეხურიანი კოლოფია დაკავშირებული. რაც შეეხება შიდაწვის ძრავს, მას 6-საფეხურიანი კოლოფი ორდისკოიანი ქუროს მეშვეობით უკავშირდება, მასში გადამუშავებულ მაბრუნ მომენტს კი უკანა ღერძი ღებულობს.

ბავარიელთა მონაცემებით, ”ვიჟნ ეფიციენტდაინემიქსი” იმდენად ტემპერამენტიანია, რომ სწრაფი მანქანების მოყვარულებს, ჰიბრიდული ავტომობილებისადმი დამცინავ დამოკიდებულებას საფუძვლიანად შეუცვლის. თავად განსაჯეთ: 0-100 კმ/სთ აჩქარება მას სულ რაღაც 4.8 წამში შეუძლია, 100 კილომეტრზე ერთი გალონი (დაახლოებით 3.78 ლიტრი) საწვავი ჰყოფნის, ყოველი კილომეტრის გავლისას (ორივე ტიპის აგრეგატის გამოყენებით) კი ატმოსფეროში მხოლოდ 99 გრამ ნახშირორჟანგს გამოჰყოფს. ერთი სრული გაწყობით (საწვავით და ელექტროენერგიით) ”ვიჟნ ეფიციენტდაინემიქსს” დაახლოებით 650 კილომეტრს გაგატარებთ, მხოლოდ ელექტროძრავებით კი მას დაახლოებით 50 კილომეტრის გავლა შეუძლია.

ამჯერად სულ ესაა, უფრო მეტს ამ საოცარი ავტომობილის შესახებ, ფრანკფურტში შევიტყობთ.

”სააბ 9-5” - გაცნობა პრემიერის წინ

Saab 9-5

30 აგვისტო



შვედურმა კომპანია ”სააბმა” სედან 9-5-ის ახალი თაობის მოდელის ფოტოები და მცირე ინფორმაცია გაავრცელა. ამ ავტომობილის მსოფლიო პრემიერა ორ კვირაში ფრანკფურტის საერთაშორისო საავტომობილო გამოფენაზე შედგება.

ახალი ”სააბ 9-5” ”ჯენერალ მოტორსის” გლობალურ პლატფორმა ”ეპსილონ II-ზეა” აგებული, რომელიც ამერიკული კომპანიის კიდევ ერთმა ევროპულმა ბრენდმა ”ოპელმა”, თავისი უახლესი სედან ”ინსინიას” ასაგებად გამოიყენა. ახალი ავტომობილის სიგრძე წინამორბედისასთან შედარებით, 17 სანტიმეტრით, ბაზა კი - 13 სანტიმეტრით, 2.84 მეტრამდე გაიზარდა.

ახალი ავტომობილი კონცეპტუალური ”აერო-X-ის” სტილშია შესრულებული, რომელთანაც მსგავსება განსაკუთრებით მის შემინულობასა და ინტერიერის გაფორმებაში იგრძნობა.

ავტომობილისთვის ორი ტიპის საკიდარია შემუშავებული, რომლებსაც მწარმოებელი ძრავის სიმძლავრის შესაბამისად გამოიყენებს. ორივე შემთხვევაში, საკიდარი ადაპტირებადია, მას და სრულამძრავიანი ტრანსმისიის უკანა დიფერენციალს კი ელექტრონიკა აკონტროლებს.

სრულამძრავიანი ტრანსმისიით 9-5-ის მხოლოდ ის ვარიანტებია აღჭურვილი, რომელთა კაპოტქვეშაც ტურბოძრავები (ბენზინის) თავსდება. ასეთი კი ორია - 2.0 და 2.8-ლიტრიანი, რომელთა მაქსიმალური სიმძლავრე შესაბამისად, 220 და 300 ცხენის ძალას აღწევს. ასევე ბენზინზე მუშაობს 1.6-ლიტრიანი ძრავი 180 ცხენის ძალით და 2.0-ლიტრიანი ”ბიოპაუერ”, რომელსაც ბიოეთანოლიან საწვავ Е85-ზე მუშაობაც შეუძლია. საწვავად დიზელს მხოლოდ ერთი ძრავი იყენებს, რომლის მუშა მოცულბა 2.0 ლიტრი, სიმძლავრე კი 160 ცხენის ძალაა. ყველა ძრავთან შესაწყვილებლად 6-საფეხურიანი მექანიკური და ავტომატური კოლოფებია განკუთვნილი.

ახალი 9-5-ის სალონში მოთავსებულია საპროექციო დისპლეი, რომელსაც წინა საქარე შუშაზე გამოაქვს ავტომობილის სიჩქარის, ძრავის ბრუნთა რიცხვის, გადაცემათა კოლოფში შერჩეული საფეხურის, კრუიზ კონტროლის და სხვა მონაცემები.

შვედური კომპანია 9-5-ის გაყიდვას მერმის დაიწყებს, ევროპელ დიზილერებთან ავტომობილის საბაზო ღირებულება კი 34,7 ათასი ევრო იქნება.

Friday, August 28, 2009

ფრანკფურტისთვის ”მერსედესი” წყალბადზე მომუშავე ავტომობილს ამზადებს

Mercedes B-Klasse F-Cell

28 აგვისტო

”მერსედეს-ბენცი” ფრანკფურტის საავტომობილო შოუზე წყალბადის ფიჭურ ელემენტებზე მომუშავე ელექტრომობილს წარადგენს, რომელიც B-კლასის ჰეჩბეკის ბაზაზეა დამზადებული და რომლის წარმოებაც წელსვე დაიწყება. ელექტრომობილი თავისი დინამიკური მახასიათებლებით ახლოსაა 2.0-ლიტრიანი შიდაწვის ძრავით აღჭურვილ, იმავე კლასის ჰეჩბეკთან. წყალბადზე მომუშავე ავტომობილის პირველი 200 ეგზემპლარი ევროპასა და აშშ-ში გაიყიდება.

ამგვარად, შტუტგარტული კომპანია, წყალბადის ფიჭური ელემენტებით (F-Cell) აღჭურვილი ელექტრომობილების სერიულად წარმოების მხრივ, პიონერი ხდება. ასეთ ავტომობილს ნულოვანი გამონაბოლქვი აქვს. ის აკუმულატორებში დაგროვილი ენერგიის მეშვეობით გადაადგილდება და როდესაც აკუმულატორები განიმუხტება, მათ შესავსებად საქმეში ფიჭური ელემენტები ერთვება, რომლის მთავარი მუშა ტანი აიროვანი წყალბადია. ეს წყალბადი, 700 ატმოსფერული წნევის ქვეშ, ატმოსფეროში არსებულ ჟანგბადს უერთდება და რეაქციის დროს, ელექტროდენს აღძრავს. ასეთი დანადგარის თანმდევი პროდუქტი კი მხოლოდ წყალია.

წყალბადზე მომუშავე B-კლასის ჰეჩბეკი აღჭურვილია ელექტროძრავით, რომელიც მაქსიმუმ 136 ცხენის ძალას და 290 ნიუტონმეტრს, ძრავის როტორის პირველივე ბრუნზე გამოიმუშავებს. ელექტროძრავს ლითიუმ-იონურ აკუმულატორებში დაგროვებული ელექტროენერგია ამუშავებს, რომლის წყალობითაც, ავტომობილის სვლის სიშორე 385 კილომეტრს აღწევს. აკუმულსტორების ღირსებათა შორის მისი ის თვისებაცაა, რომ ის დენს მინუს 25 გრადუსზეც (ცელსიუსით) კი ადვილად იძლევა.

სერიოზული პრობლემა, რომელიც წყალბადის ფიჭურ ელემენტებიან B-კლასის ჰეჩბეკის პოპულარიზაციას ხელს შეუშლის, ისაა, რომ მთელს მსოფლიოში, წყალბადით გასაწყობი სადგურები პრაქტიკულად არ არსებობს. ამ პრობლემის მოსაგვარებლად, ”დაიმლერის” ხელმძღვანელობა გერმანიის მთავრობასთან, ენერგეტიკულ და ნავთობკომპანიებთან მოლაპარაკებებს აწარმოებს, რომლებთან ერთადაც, ერთობლივი საწარმოების შექმნას და მათი მეშვეობით, წყალბადით გასაწყობი სადგურების ქსელის დაარსებას ცდილობს. ასეთი ქსელები კი, გერმანიის დიდი ქალაქების - ჰამბურგისა და შტუტგარტის გარდა, აშშ-ის კალიფორნიაშიც შეიქმნება.

გზა, რომელიც ელექტროენერგიას იძლევა

Solar Roadways

28 აგვისტო



სკოტ და ჯული ბრუსოუ
.................................................................................

ამერიკელი ელექტროინჟინრის, სკოტ ბრუსოუს და მისი მეუღლის, ფსიქოლოგ ჯული ბრუსოუს მიერ შემოშავებულმა პროექტმა, სახელწოდებით ”სოლარ როუდვეის”, აშშ-ის ტრანსპორტის დეპარტამენტის ყურადღება მიიქცია. დაინტერესება იმდენად სერიოზული გამოდგა, რომ დეპარტამენტმა პროექტის შესასწავლად 100 000 აშშ დოლარი გამოჰყო. ეს ფული, გზის მცირე ექსპერიმენტული მონაკვეთის შექმნას მოხმარდება.

პროექტის ავტორთა ჩანაფიქრით, ”სოლარ როუდვეი” მრავალფუნქციური გზების შექმნას ითვალისწინებს. ასეთ გზებზე, სავალი ზადაპირის ფენებში მზის ელემენტები მონტაჯდება. გარდა ამისა, გზის სტრუქტურაში შუქდიოდებისა და სამართავი ელექტრონიკის ინტეგრირებაა გათვალისწინებული. გზის ასეთი მრავალფუნქციური სეგმენტები განსაკუთრებით მისწრება გზაჯვარედინებსა და ავტოსადგომებზე იქნება, სადაც შუქნიშნებისთვის ელექტროენერგიაა საჭირო.

ასეთი გზები, გარდა იმისა, რომ ელექტროენერგიას გამოიმუშავებს, ღამით ავტომობილების მოძრაობას უფრო უსაფრთხოს გახდის. გზაზე შესაძლებელი იქნება გამაფრთხილებელი ნიშნების ანთება. ასევე, განათდება გამყოფი ზოლი, რომელიც, საჭიროების შემთხვევაში, გზის რომელიმე მხარეს გადაინაცვლებს.

”სოლარ როუდვეი” ასევე იმის საშუალებასაც იძლევა, რომ მასში გამათბობლები ჩამონტაჟდეს. მათი მეშვეობით, ზამთარში გზა არასდროს გაიყინება. გათბობისთვის საჭირო ენერგიას კი ის მასში ჩამონტჟებული ფოტოელემენტების მეშვეობით გამოიმუშავებს.

პროექტს მცირე ნაკლიც აქვს - იმ ადგილებში, სადაც გზა ხშირად მტვრიანდება, მას რეგულარული წმენდა დასჭირდება. პროექტის ავტორებს მიაჩნიათ, რომ ასეთი შემთხვევისთვის, მისწრება იქნება თვითგამწმენდიზი მასალების გამოყენება.

პროექტის ავტორები ვარაუდობენ, რომ 1.52 X 1.52 მ ზომის 5 მილიარდი ასეთი პანელი სრულიად საკმარისი იქნება იმისათვის, რომ აშშ-ის საავტომობილო გზების ზედაპირი სრულად დაიფაროს. თუ ეს გრანდიოზული იდეა განხორციელდა, მარტო გზების მეშვეობით, ამერიკელები იმაზე დაახლოებით სამჯერ მეტი ელექტროენერგიის გამომუშავებას შეძლებენ, ვიდრე დღესდღეობით მოიხმარენ. ამგვარად, ქვეყანა დიდწილად მოიხსნის იმპორტირებულ ნავთობზე დამოკიდებულებას.

მაგრამ პროექტს ერთი სერიოზული ნაკლი აქვს - თითო პანელი დაახლოებით 7 000 დოლარი ეღირება, რაც იმას ნიშნავს, რომ ამერიკის საავტომობილო გზების სრულად დასაფარად, 35 ტრილიონი დოლარი იქნება საჭირო. სამაგიეროდ, თითო პანელი მზიან ამინდში, დღის განმავლობაში დაახლოებით 7.6 კილოვატ ელექტროენერგიას გამოიმუშავებს.

სხვათა შორის, სკოტ ბრუსოუს ასეთი გზების შექმნის იდეა ჯერ კიდევ ბავშვობაში გასჩენია, იმ დროს, როდესაც მზის ენერგიის ინდუსტრიული ათვისება ჯერ დაწყებულიც არ იყო...

Thursday, August 27, 2009

”ნისანის” 1 900-ცხენისძალიანი დრეგსტერი

Nissan 350Z Dragster

27 აგვისტო

ბრიტანელმა ავტომრბოლმა ჯონ ბრედშოუმ, დრეგსტერების რბოლაში საასპარეზოდ, ”ნისან 350Z-ის” ბაზაზე ნამდვილი მონსტრი - დრეგსტერი ”პროჯექტ ზედ” შექმნა, რომლითაც FIA-ს დრეგსტერების ფინალურ ეტაპზე იასპარეზებს.

ავტომობილი ”ნისან 350Z-ისვე” 3.5-ლიტრიანი V6 ძრავითაა აღჭურვილი, რომელიც ბრედშოუმ 1 900 ცხენის ძალამდე გააძლიერა. რბოლაში, რომელსაც ბრიტანეთის სანტა პოს სარბოლი ტრეკი უმასპინძლებს, ”პროჯექტ ზედ-ი” იაპონური წარმოების ავტომობილის ბაზაზე დამზადებული ერთადერთი ბოლიდი იქნება.

ამ ავტომობილს (თუ შეიძლება, რომ მას ასე ეწოდოს), წარმოუდგენელი დინამიკური მაჩვენებლები აქვს. სტარტიდან 100 კმ/სთ-მდე აჩქარებისთვის მას სულ რაღაც 1.2 წამი ჰყოფნის, 0-270 კმ/სთ-მდე აჩქარებას 4.1 წამში ასწრებს, 6.6 წამი კი 346 კმ/სთ-ის ასაკრეფად სჭირდება.

”ამ მანქანას წარმოუდგენელი პოტენციალი აქვს. ამ ავტომობილით, მთელს მსოფლიოში უამრავი რეკორდის დამყარება შეიძლება და ეს ”ნისანის” ძრავის დამსახურებაა, რომელსაც ფორსირების ამოუწურავი რესურსი აქვს”, - ამბობს ბრედშოუ.

სანტა პოს რბოლისას, ტრეკზე საკუთარ საგამოფენო პავილიონს გახსნის ”ნისანი”, რომელიც ენთუზიასტ ინჟინერსა და მრბოლს ფინანსურად და ტექნოლოგიებით დაეხმარა. ”ნისანი” რბოლების დროს თავის ორ სპორტულ ავტომობილს - GT-R-სა და 370Z-ს გაუწევს რეკლამას.

”ვისმანის” ფრანკფურტული სიურპრიზი

Wiesmann in Frankfurt

27 აგვისტო

ფრანკფურტის საავტომობილო გამოფენის დამთვალირებლებს, ექსკლუზიური ავტომობილების მწარმოებელ ”ვისმანისგან” საინტერესო სიურპრიზი ელით. გარდა იმისა, რომ გერმანული კომპანია იქ თავის სიახლეს - როდსტერ MF5-ს წარადგენს, ”ვისმანს” დამთვალიერებელთა მისაზიდად ერთი საინტერესო ხრიკიც აქვს ჩაფიქრებული - კომპანიის თანამშრომლები საგამოფენო პავილიონში, შოუს მსვლელობისას, ათასობით დამთვალიერებლის თვალწინ, ავტომობილს ააწყობენ!

”ამ გზით, ჩვენ საშუალება გვექნება, გამოფენის დამთვალიერებლებს, მომავალ მყიდველსა და მედიას, ჩვენი საწარმოო შესაძლებლობები ვუჩვენოთ. ცოტა ხნით, ჩვენ წარმოებას დიულმენიდან ფრანკფურტში გადმოვიტანთ”, - სპეციალურად გამოქვეყნებულ პრეს რელიზში წერს ”ვისმანის” დამაარსებელი და მთავარი მენეჯერი ფრიდჰელმ ვისმანი.

საექსპერიმენტოდ კომპანიამ თავისი პოპულარული კუპე GT MF4 (სურათზე) შეარჩია, რომელიც 4.8-ლიტრიანი, 367-ცხენისძალიანი ძრავითაა აღჭურვილი. გამოფენის დროს, ავტომობილის აწყობაზე მხოლოდ ორი მექანიკოსი იმუშავებს. აწყობის პროცესს ტელეკამერებით გადაიღებენ და პირდაპირი ჩართვით, ციფრული ტელევიზიის არხებით, მთელს მსოფლიოში გადასცემენ.

თუმცა, ესოდენ უჩვეულო სანახაობის მიუხედავად, ”ვისმანის” პავილიონში მთავარი პერსონაჟი მაინც ახალი როდსტერი MF5 იქნება. ამ ავტომობილს, რომელიც ”ბეემვეს” V10 ძრავით (507 ცხენის ძალა და 520 ნიუტონმეტრი) აღიჭურვება, 0-100 კმ/სთ-მდე აჩქარება 3.9 წამში შეუძლია, მისი მაქსიმალური სიჩქარე კი 310 კმ/სთ-ს აღწევს.

”ვისმანი” მხოლოდ 55 ცალი MF5-ის წარმოებას გეგმავს, თითოეულს კი 189 500 ევროდ გაჰყიდის.

”აუდიმ” ემბლემა შეცვალა

Audi Reveals Updated Logo

27 აგვისტო


რას ფიქრობთ, ”აუდის” ემბლემას შესაცვლელი ჰქონდა რამე? ალბათ არა. მაგრამ გერმანულმა კომპანიამ თავისი ცნობილი ემბლემა - ერთმანეთზე გადაბმული ოთხი რგოლი მაინც გადაახალისა. ემბლემა ძველებურად ოთხი რგოლია. უბრალოდ, მათი დიზაინი ოდნავ შეიცვალა, ეს კი მხოლოდ იმის აღსანიშნავად გაკეთდა, რომ კომპანიას წელს დაარსებიდან ასი წელი შეუსრულდა.

ჩვენი ბლოგის მკითხველს ალბათ ეხსომება, ამ იუბილესთან დაკავშირებით, როგორი მონუმენტი აღმართეს გუდვუდის (ინგლისი) სიჩქარის ფესტივალზე. ჰოდა, ახლა ემბლემის უმნიშვნელო ცვლილება რაღა პრობლემა იქნებოდა.

ძველ და ახალ ემბლემებს შორის განსხვავება იმდენად მცირეა, რომ თუ ერთმანეთის სიახლოვეს არ დააწყობთ და კარგად არ დააკვირდებით, ისინი შეიძლება ერთნაირიც გეგონოთ. მაგრამ სხვაობა მაინც რეალურია. მაგალითად, თუ ძველ ლოგოზე რგოლების განივკვეთი ტოლფერდა სამკუთხედი იყო, ამიერიდან, მას მართკუთხა სამკუთხედის ფორმა ექნება - რგოლის ზედაპირი გარე რადიუსიდან შიდასკენაა წახრილი.

შეიცვალა წარწერაც. ძველ ემბლემაზე ის ლოგოს თითქმის მთელ სიგრძეზე გაუყვებოდა, ახალზე კი დაპატარავებულია და თანაც, ქვედა მარცხენა კუთხეშია მოკალათებული (ნეტავ რას ერჩოდნენ?). შეიცვალა წარწერის შრიფტიც.

შეგახსენებთ, რომ ოთხი რგოლი გერმანულ კომპანია ”აუტო უნიონის” ემბლემაა. ეს კომპანია გასული საუკუნის 1930-იანი წლების დასაწყისში შეიქმნა, როდესაც ამ სახელით ოთხი გერმანული კომპანია - ”აუდი” (პირველი რგოლი), DKW (მეორე რგოლი), ”ჰორხი” (მესამე რგოლი) და ”ვანდერერი” (მეოთხე რგოლი) გაერთიანდა. გადაბმული ოთხი რგოლი სწორედ ამ კომპანიების გაერთიანების სიმბოლოა.

სხვათა შორის, ამ რგოლების გამო, 1995 წელს საერთაშორისო ოლიმპიურმა კომიტეტმა ”აუდის” ვაჭრობის საერთაშორისო სასამართლოში უჩივლა, რადგან ჩათვალა, რომ გერმანულმა კომპანიამ თავისი ლოგო ოლიმპიური მოძრაობის წაბაძვით შეიმუშავა.

ისე, ერთი საუკუნეც რომ მოეცადათ, რა იქნებოდა? ასე იყო თუ ისე, ”აუდიმ” ემბლემა შეინარჩუნა...

Wednesday, August 26, 2009

ფრანკფურტამდე გაიცანით - სამკარიანი ”პოლო”

Volkswagen Polo

26 აგვისტო

ფრანკფურტის ავტოგამოფენაზე, ევროპის უდიდესი ავტომწარმოებლის, გერმანული ”ფოლკსვაგენის” პავილიონის ერთ-ერთი მთავარი პერსონაჟი ახალი ”პოლოს” სამკარიანი ვერსია იქნება, რომელის გაყიდვასაც ევროპელი დილერები შოუს დასრულებისთანავე დაიწყებენ. ფრანკფურტამდე კი, როგორც ეს ტრადიციად ჩამოყალიბდა, ფრანკფურტელებმა თავიანთი სიახლის შესახებ მცირე ინფორმაცია ინტერნეტით უკვე გაავრცელეს.

გაბარიტების მხრივ, სამკარიანი ”პოლო” ხუთკარიანისგან არ განსხვავდება. მისი ზომებია: სიგრძე 3970, და სიგანე 1682 მილიმეტრი. ეს კი, წინა (მეოთხე) თაობის ”პოლოს” სიგრძე/სიგანეზე შესაბამისად, 36 და 32 მილიმეტრით მეტია. ხუთკარიანი ”პოლოსგან” სამკარიანი ოდნავ დახრილი სახურავით (რითაც ის კუპეს სტილს მოგვაგონებს) და ოდნავ დიდი ზომის კარებებით გამოირჩევა.

სამკარიანი ”პოლოსთვის” შვიდი ძრავია განკუთვნილი. მათგან ოთხი ბენზინზე მუშაობს, სამი კი - დიზელის საწვავზე. ბენზინის აგრეგატების მუშა მოცულობა 1.2 და 1.4 ლიტრია. მათგან სამი ატმოსფერულია, ერთი კი - ტურბოკომპრესორიანი. პირველი სამის სიმძლავრე 60, 70 და 80 ცხენის ძალაა, 1.2-ლიტრიანი ტურბოსი კი - 105 ცხენის ძალა. რაც შეეხება დიზელის ძრავებს, მათი მაქსიმალური სიმძლავრე 75-დან 105 ცხენის ძალამდეა. გადაცემათა კოლოფები 6-საფეხურიანი მექანიკურებია, ტურბოძრავიანი ვერსია კი 7-საფეხურიან რობოტიზებულ DSG-ს მიიღებს, რომელსაც ორდისკოიანი გადაბმულობის ქურო მოემსახურება.

ჯერჯერობით უცნობია სამკარიანი ”პოლოს” დინამიკურ-ეკონომიკური მახასიათებლები. სამაგიეროდ, ვოლფსბურგელები გვამცნობენ, რომ თავიანთ ეკონომიურ ტექნლოგია ”ბლიუმოუშნს” სამკარიან ”პოლოზეც” დანერგავენ. ამ ტექნოლოგიით აღჭურვილი ხუთკარიანი ”პოლო” გერმანულმა კომპანიამ ჟენევის ავტო შოუზე წარმოადგინა. მის კაპოტქვეშ 1.2-ლიტრიანი დიზელის ძრავია განლაგებული. ავტომობილს ასევე ემსახურება სისტემა სტარტ-სტოპი, მისი ძარა კი ”მორთულია” აეროდინამიკური” ელემენტებით, რომელთა წყალობითაც, მნიშვნელოვნად მცირდება შემხვედრი ჰაერის წინააღმდეგობა. ”ფოლკსვაგენის” მონაცემებით, ამგვარად დაკომპლექტებული ”პოლო” 100 კილომეტრის გასავლელად, მხოლოდ 3.3 ლ საწვავს მოიხმარს.

უკვე ცნობილია, რომ ევროპაში სამკარიანი ”პოლოს” საწყისი ღირებულება 12 150 ევრო იქნება, ტოპ ვერსიის ფასი კი 15 900 ევროს მიაღწევს.

სიჩქარის რეკორდი ორთქლზე მომუშავე მანქანებისთვის

British Steam Car Challenge

26 აგვისტო



რამდენიმე არცთუ წარუმატებელი მცდელობის შემდეგ, ბრიტანელ ენთუზიასტთა გუნდმა, სახელად ”ბრიტიშ სტიმ ქარ ჩელინჯ”, როგორც იქნა, ორთქლის მანქანებისთვის სიჩქარის რეკორდი გააუმჯობესა, რომელიც ას წელზე მეტი ხნის განმავლობაში, მიუწვდომელი იყო.

ძველი რეკორდი - 205.44 კმ/სთ, 1906 წელს, ასევე ბრიტანელთა მიერ, ავტომობილ ”სტენლი სტიმერით” იყო დამყარებული. ”ბრიტიშ სტიმ ქარ ჩელინჯმა” ეს შედეგი ჯერ კიდევ აგვისტოს დასაწყისში გააუმჯობესა - 210.80 კმ/სთ დააფიქსირა, მაგრამ ის დრო ოფიციალურად არ დაფიქსირდა რადგან გარბენს საერთაშორისო საავტომობილო ფედერაციის (FIA) წარგზავნილები არ დასწრებიან.

მეორე ცდაზე გუნდმა სარეკორდო გარბენისთვის, აშშ-ის ედვარდსის სამხედრო საჰაერო ძალების ბაზა (მოხავე, შტატი კალიფორნია) აირჩია და იქ FIA-ს წარმომადგენლებიც მიიწვია. საერთაშორისო ფედერაციის წესების შესაბამისად, რეკორდის ოფიციალურად დასაფიქსირებლად, აუცილებელი იყო, რომ ერთი საათის განმავლობაში, ავტომობილს სწორი მონაკვეთი ორი მიმართულებით თითოჯერ გაევლო.

ავტომობილი ორთქლის 12 ქვაბითაა აღჭურვილი, რომლებშიც, გაზის წვის შედეგად წარმოქმნილი ორთქლი, ტურბინის ფრთებს ბგერისაზე თითქმის ორჯერ მეტი სიჩქარით მიეწოდება. ორთქლის დანადგარის ჯამური სიმძლავრე 360 ცხენის ძალას აღწევს.

მაქსიმალური სიჩქარის ასაკრეფად სარეკორდო ავტომობილს დაახლოებით 4 კილომეტრი კილომეტრი სჭირდება. დაახლოებით ამდენივეა საჭირო გასაჩერებლად. რეკორდის დასაფიქსირებლად კი, მაქსიმალური სიჩქარით მოძრაობისთვის, მას დაახლოებით ორი კილომეტრის გავლა უწევდა. საერთო ჯამში, სარეკორდო ავტომობილმა ეს დისტანცია (დაახლოებით 10.4 კმ) სულ რვაჯერ გაიარა.

პირველი რეკორდული გარბენისას, სიჩქარე 217.7 კმ/სთ-ის დონეზე დაფიქსირდა, 50-წუთიანი მომზადების შემდეგ, ის უკანა გზაზე გამოუშვეს და ამჯერად, 241.7 კმ/სთ-ს მიაღწია. ერთ-ერთი გარბენის დროს, ორთქლის ავტომობილმა 243 კმ/სთ-ზე მეტიც კი განვითარა. ორი გარბენის შეჯამებით, ორთქლის მანქანებისთვის სიჩქარის ახალ რეკორდად 225 კმ/სთ გამოცხადდა. სავარაუდოდ, ამ შედეგს FIA მალე ოფიციალურად დაადასტურებს.

ჰო მართლა, რეკორდული გარბენების დროს, ავტომობილს, რომლის აგებასაც ”ბრიტიშ სტიმ ქარ ჩელინჯის” ინჟინრებმა თითქმის ათი წელი მოანდომეს, ბრიტანული წარმოშობის კანადელ-ამერიკელი ბიზნესმენი და ავტომრბოლი ჩარლზ ბარნეტი მართავდა, რომელმაც პროექტის დაფინანსებაშიც მიიღო მონაწილეობა.

”მინის” საიუბილეო კონცეპტუალური ”კუპე”

Mini Coupe Concept

26 აგვისტო



ინგლისური კომპანია ”მინი”, რომელიც ”ბეემვეს” ჯგუფში შედის, დაარსებიდან 50 წლის იუბილეს აღნიშნავს და ამასთან დაკავშირებით, თავის პოტენციურ მყიდველს შესანიშნავი საჩუქარი მოუმზადა კონცეპტუალური ”კუპეს” სახით. დღეს ”მინიმ” ამ ავტომობილის ფოტოები და მწირი ინფორმაცია გაავრცელა, მის მსოფლიო პრემიერას კი ფრანკფურტის ავტო შოუზე გეგმავს.

როგორც კომპანიაში ამბობენ, დიზაინერ გერდ ჰილდებრანდს, ”მინი კუპესგარეგნობა თავისი თინეიჯერი შვილის შთაგონებით შეუმუშავებია. თურმე ნუ იტყვით და მის შვილს ბეისბოლის კეპი შებრუნებული ეხურა და ეს რომ დაინახა, ჰილდებრანდმა უცებ წარმოიდგინა, თუ როგორი უნდა ყოფილიყო ”მინის” სპორტული ავტომობილი.

მინი კუპე” სტანდარტულ სამკარიან ჰეჩბეკ ”მინი კუპერის” ბაზაზეა შექმნილი. ოღონდ მისგან უფრო დაბალი (136 მილიმეტრით) და დახრილი სახურავით გამოირჩევა, რომელსაც უკნიდან უჩვეულო ფორმის საყრდენი ”იჭერს”. ოდნავ შეცვლილია წინა და უკანა ბამპერების მოყვანილობაც. სახურავი სხვა მხრივაცაა საინტერესო - ის ალუმინისგანაა დამზადებული. იმის ხარჯზე, რომ სახურავი მსუბუქია და უფრო დაბალიც, ავტომობილის სიმძიმის ცენტრმა დაბლა დაიწია. ამით კი ავტომობილის შემხვედრი წინააღმდეგობა მცირდება. დაბლა დაწეული სიმძიმის ცენტრი კი ავტომობილის მართვადობის გაუმჯობესებას განაპირობებს.

ორადგილიანი კუპე ”მინი კუპერ S-ის” აგრეგატებითაა აღჭურვილი. კაპოტქვეშ 1.6-ლიტრიანი ტურბოძრავი განლაგდა, რომელიც 211 ცხენის ძალასა და 280 ნიუტონმეტრს გამოიმუშავებს. ეს აგრეგატი ასევე გამოიყენება ”მინის” ”ჯონ კუპერ უორკსის” სერიის სპორტულ ავტომობილებზე. მაბრუნი მომენტი კი წინა წამყვან ბორბლებს მიეწოდება.

იმის ხარჯზე, რომ სალონში არ არის უკანა სავარძლები, სახურავი კი ალუმინისაა, ასევე გამოყენებებულია მსუბუქი მასალები, ავტომობილის წონა 100 კილოგრამით შემცირდა, რაც მის დინამიკურ მონაცემებს ასევე აუმჯობესებს. ჯერჯერობით არ გამოქვეყნებულა ეს მონაცემები, თუმცა ძნელი მისახვედრი არ უნდა იყოს, რომ მსუბუქ ორკარიან კუპეს ჰეჩბეკზე უკეთესი ტემპერამენტი ექნება.

კუპეს გარდა, ფრანკფურტში ”მინიმ” შეიძლება როდსტერიც წარმოადგინოს, რომელზეც ინფორმაცია შოუს დაწყებამდე ცოტა ხნით ადრე გამოქვეყნდება.

”მინი” ამ კონცეპტუალურ ავტომობილს ფრანკფურტის შოუს დამთვალიერებელთა და პრესის გამოხმაურებათა შესასწავლად გამოიყენებს. დადებითი გამოხმაურების შემთხვევაში, ავტომობილი კონვეიერზე აუცილებლად დადგება. მანამდე კი ”მინის” საწარმოო პროგრამას კიდევ ერთი ახალი ავტომობილი - ქროსოვერი შეემატება, რომლის საწარმოო ვერსიასაც ასევე ფრანკფურტში ვიხილავთ.

Tuesday, August 25, 2009

”მაზერატის” ფრანკფურტული სიახლე - ღია ”გრანკაბრიო”

Maserati GranCabrio

25 აგვისტო


სუპერავტომობილების მწარმოებელ იტალიურ კომპანია ”მაზერატის”, რომელიც ”ფიატის” ჯგუფშია გაერთიანებული, ფრანკფურტული ავტორანდევუსთვის ელეგანტური სიახლე - კუპე ”გრანტურიზმოს” ღია ვერსია, სახელად ”გრანკაბრიო” აქვს მომზადებული, იქ ჩვენებამდე კი მის შესახებ მწირი ინფორმაცია და ფოტოები გაავრცელა.

იმის გამო, რომ ავტომობილს სახურავი და შესაბამისად, მისი საყრდენებიც არ აქვს, მის ძარას გამაგრება დასჭირდა, ამას კი ავტომობილის წონის მატება მოჰყვა - თუ კუპე 1880 კილოგრამს იწონის, კაბრიოლეტის შესაბამისი მაჩვენებელი ორ ტონას აღწევს. ამას კი აუცილებლად მოჰყვება ”გრანკაბრიოს” დინამიკური მაჩვენებლების გაუარესება (გრანტურიზმოსთან შედარებით). ჯერჯერობით უცნობია, თუ რა დრო სჭირდება ახალ ავტომობილს 0-დან 100 კმ/სთ-მდე ასაჩქარებლად, ან რამდენია მისი მაქსიმალური სიჩქარე, თუმცა კუპეს მონაცემების მიხედვით შეიძლება ვარაუდი, რომ სტანდარტულ აჩქარებას ის 5.5 წამს მოანდომებს, (კუპე ამას 4.9 წამში ახერხებს), მისი მაქსიმალური სიჩქარე კი 290 კმ/სთ იქნება (კუპეს სიჩქარის ჭერი 295 კმ/სთ-ია).

”გრანკაბრიოს” კაპოტქვეშა სივრცეში მოთავსდება 4.7-ლიტრიანი V8 ძრავი, რომლის მაქსიმალური სიმძლავრეც 440 ცხენის ძალაა მასთან კი 6-საფეხურიანი სეკვენტალური კოლოფია (MC-შიფტ) შეწყვილებული, რომელიც საფეხურების სულ რაღაც 100 მილიწამში შეცვლას უზრუნველყოფს.

”მაზერატი” ევროპულ ბაზარზე ”გრანკაბრიოს” გაყიდვას მერმის დაიწყებს. კომპანია თავისი სიახლის ფასს ჯერ არ აქვეყნებს, ინგლისურ ჟურნალ ”აუტოქარის” ვარაუდით კი კაბრიოლეტი კუპეზე (საბაზო ღირებულება 121 000 ევრო) დაახლოებით 15 პროცენტით ძვირი ეღირება.

”ოპელის” ფრანკფურტული სიახლეები

Opel at Frankfurt

25 აგვისტო

ფრანკფურტის ავტოგამოფენაზე ”ოპელს” ორი მნიშვნელოვანი ექსპონატი ექნება - ახალი ”ასტრა” და ჰიბრიდული ელექტრომობილი ”ამპერა”. ორივე ავტომობილის მთავარი თვისება ეკონომიურობა და გამონაბოლქვში მცირე რაოდენობით CO2-ის შემცველობაა.

”ასტრა” (სურათზე წითელია) წარმოებისთვის გამზადებული ავტომობილია - გერმანული კომპანია მის გაყიდვებს წელსვე დაიწყებს, ”ამპერა” (თეთრი) კი კონცეპტუალური მოდელია, რომელიც ევროპის ბაზარზე ალბათ ორი წლის შემდეგ გამოჩნდება.

ახალი ”ასტრა” ძრავების განახლებული გამით გამოირჩევა, რომელშიც 8 ეკონომიური აგრეგატი შედის. მათი მაქსიმალური სიმძლავრე 95-დან 180 ცხენის ძალამდეა, მათთან კი მექანიკური კოლოფები შეწყვილდება. კომპანიის მიერ გავრცელებული ინფორმაციით, ახალი ”ასტრა” წინა მოდელთან შედარებით, 12 პროცენტით ეკონომიური იქნება და რაც მთავარია, გარემოსაც ნაკლები ნახშირორჟანგით დააბინძურებს.

უფრო სუსტი ძრავებისთვის (1.3-ლიტრიანი ტურბოდიზელი და 1.4 და 1.6-ლიტრიანი ბენზინის ატმოსფერული ძრავები) 5-საფეხურიანი მექანიკური კოლოფებია განკუთვნილი, უფრო მძლავრებს კი 6-საფეხურიანი მექანიკური კოლოფები მოემსახურება.

”ჩვენი მიზანია, მყიდველს უფრო სრულყოფილი ”ასტრა” შევთავაზოთ, რომელიც უფრო ეკონომიური ძრავებითაა აღჭურვილი და რომელსაც ხელმისაწვდომი ფასი აქვს. არადა, შეგვეძლო, რომ აქცენტი ეფექტურ, ძვირადღირებულსა და მცირეგამონაბოლქვიან ძრავებზე შეგვეჩერებინა. ჩვენი მყიდველი მიიღებს ეკონომიურ ავტომობილს, რომელიც იმავდროულად, სასიამოვნო სამართავიცაა”, - ამბობს ”ოპელის” სამეთვალყურეო საბჭოს თავმჯდომარე კარლ-პეტერ ფორსტერი.

”ასტრა” საინტერესოა იმდნდ, რამდნდაც მალე მას ასეულობით ათასი ევროპელი შეიძენს. რაც შეეხება უფრო შორეული მომავლის ავტომობილს - ”ამპერას”, მისი მამოძრავებელი ელექტროძრავია, შიდაწვის ძრავი კი მეორეხარისხოვან როლს ასრულებს - მასთან დაკავშირებული გენერატორი ელექტროძრავისთვის საჭირო ელექტროენერგიას გამოიმუშავებს.

ლითიუმ-იონური აკუმულატორების ბლოკში დაგროვილი ელექტროენრგია მხოლოდ 60 კილომეტრის გასავლელადაა საკმარისი. მაგრამ როცა საქმეში შიდაწვისძრავი და გენერატორი ერთვებიან, ”ამპერას” სვლის სიშორე 500 კილომეტრამდე იზრდება. დაკიდევ, ”ამპერას” აკუმულატორების დამუხტვა საყოფაცხოვრებო ელექტროქსელიდანაც შესაძლებელია.

ამჯერად სულ ეს არის, უფრო ახლოს კი ეს ავტომობილები ფრანკფურტში გაგვეცნობიან...

”ჰიუნდაის” ახალი ”ტუსანი”

Hyundai Tucson ix

25 აგვისტო

კორეულმა კომპანია ”ჰიუნდაიმ” გუშინ თავისი პოპულარული უგზოობის მოდელის, ”ტუსანის” მეორე თაობის ავტომობილს საიდუმლოების საბურველი ჩამოხადა. მართალია, ახალი ავტომობილის მსოფლიო პრემიერა ფრანკფურტის ავტო გამოფენაზე იგეგმება, მაგრამ ბოლო წლების ტრადიციის შესაბამისად, კორეელებმაც თავიანთი სიახლის შესახებ მწირი ინფორმაცია წინდაწინ გამოაქვეყნეს.

”ჰიუნდაის” ხელმძღვანელობის მიერ გამოქვეყნებულ განცხადებაში ნათქვამია, რომ ახალი ”ტუსან ix” (ამ სახელით ის კორეულ და ალბათ ამერიკულ ბაზრებზე გაიყიდება, ევროპაში კი სახელი შეეცვლება და ix35-ად გაგვეცნობა) უგზოობის კომპაქტური ავტომობილების ბაზარზე ახალ ტრენდს ჩამოაყალიბებს, რომლის გაყოლასაც ახლო მომავალში ყველა კონკურენტი ეცდება.

ახალი ”ტუსანი” 2.0-ლიტრიანი დიზელის და ასეთივე ლიტრაჟის ბენზინის ძრავებითაა აღჭურვილი. პირველის მაქსიმალური სიმძლავრე 184, მეორისა კი 166 ცხენის ძალაა. ორივე აგრეგატის შემთხვევაში, მათ მიერ გამომუშავებულ მაბრუნ მომენტს ახალი, 6-საფეხურიანი ავტომატური გადაცემათა კოლოფი გადაამუშავებს. დიზელისძრავიანი ვერსია როგორც სრულამძრავიანი, ასევე მხოლოდ წინა წამყვანბორბლიანი ტრანსმისიებით აღიჭურვება, ბენზინისძრავიანისთვის კი მხოლოდ წინა წამყვანბორბლიანი ტრანსმისიაა განკუთვნილი.

ახალი ”ტუსანი” აღიჭურვება დამხმარე სისტემებით, როგორებიცაა ”დინამიურობის კონტროლი”, დაღმართზე მოძრაობის კონტროლი. აღმართზე ასვლისას დამხმარე სისტემა, საგანგებო გაჩერების სიგნალი, სტაბილიზაციის სრულიად ახალი სისტემა, რომელიც ავტომობილს გადაბრუნებისგან იცავს და სხვა.

კორეაში ახალი ”ტუსანი” უკვე იყიდება. დიზელისძრავიანი მოდელების ფასი იქ 21 მილიონი ვონიდან (16 840 დოლარი) 27 მილიონ ვონამდე (21 650 დოლარი) მერყეობს. ამაზე იაფი კი ბენზინისძრავიანი ვერსიები ღირს - 19 მილიონი ვონიდან (15 240 დოლარი) 24 მილიონ ვონამდე (19 250 დოლარი). ჯერჯერობით უცნობია, თუ რა ეღირება ახალი ”ტუსანი” ევროპაში, სადაც მისი გაყიდვები მერმის, წლის დასაწყისშივე აიღებს სტარტს.

”ჰიუნდაი” კორეაში წელს მხოლოდ 16 000 ცალი ახალი ”ტუსანის” გაყიდვას გეგმავს. მას შემდეგ კი, რაც ავტომობილს მსოფლიოს ყველა ბაზარზე (სადაც ჰიუნდაი ფიგურირებს) შეიტანენ, წლიურად დაახლოებით 300 000 ცალი ”ტუსანი” გაიყიდება.

Monday, August 24, 2009

”ტესლა” ხელმისაწვდომ ელექტრომობილებსაც გამოუშვებს

Tesla to Make Low-Price EV

24 აგვისტო

კალიფორნიული კომპანია ”ტესლა” იმითაა ცნობილი, რომ მსოფლიოში ერთ-ერთმა პირველმა დაიწყო (მცირესერიული) ელექტრომობილის წარმოება და პირველია, ვინც ელექტრულ სპორტულ ავტომობილს (როდსტერს) აწარმოებს. მაგრამ კომპანიის გეგმებში ამით დაკმაყოფილება არ შედის - ”ტესლას” გადაწყვეტილი აქვს, სრულფასოვანი ავტომწარმოებელი გახდეს და ამისათვის, თავისი საწარმოო პროგრამის თანდათან გაფართოებას გეგმავს.

”ტესლა როდსტერის” ფასი 100 000 დოლარია, მალე კომპანია ელექტროსედანის წარმოებასაც დაიწყებს, რომელსაც მყიდველს 57 500 დოლარად შესთავაზებს. უფრო შორეულ მომავალში კი ისეთი ელექტრომობილის წარმოებაც იგეგმება, რომლის შეძენაც 30 000 დოლარად იქნება შესაძლებელი.

”ტესლა” იმედოვნებს, რომ ამ გეგმების განხორციელებაში სახელმწიფო დაეხმარება, რომლისგანაც მცირეპროცენტიანი სესხის სახით, 465 მილიონი დოლარის მიღებას ცდილობს. ამ თანხის დიდი ნაწილი მოდელ S-ის (სურათზე) წარმოების ორგანიზებას უნდა მოხმარდეს. ეს სედანისძარიანი ავტომობილი, რომელსაც კომპანია სავარაუდოდ, 2011 წელს გამოუშვებს, ექვს ადამიანზე იქნება გათვლილი. მისი სვლის მარაგი თითქმის 260-დან 480 კილომეტრამდე იქნება, 0-100 აჩქარებას კი ის 6 წამზე ნაკლებში შესძლებს.

თუ ამ სედანს ამერიკული ბაზარი (ტესლა ჯერჯერობით მხოლოდ ამერიკულ ბაზარზე ოპერირებს) კარგად მიიღებს, კომპანიის შემდეგი ნაბიჯი იაფფასიანი ავტომობილი იქნება, რომელსაც მყიდველს 2016 წელზე ადრე ვერ შესთავაზებენ.

ცნობისათვის, როდსტერის წარმოების წლიური მოცულობა სულ რაღაც 1 000 ცალია, კომპანია წლიურად მხოლოდ 20 000 ცალი მოდელ S-ის წარმოებას აპირებს და თუ კონვეიერზე დაბალფასიან მოდელსაც დააყენებს, მისი წარმოების წლიური მოცულობა 100 000-ს მიაღწევს.

სხვათა შორის, არანაკლებ ამბიციური გეგმები აქვს კიდევ ერთ კალიფორნიულ კომპანია ”ფისკერს”, რომელიც მალე ლუქსის კლასის პლაგ-ინ ჰიბრიდულ სედან ”კარმას” წარმოებას დაიწყებს. ”ფისკერს” გადაწყვეტილი აქვს ”კარმას” საოჯახო ვერსიის გამოშვება, უფრო შორეულ მომავალში კი დაბალფასიანი ელექტრომობილის წარმოებასაც გეგმავს.

ჩინური BYD-ი ამერიკისთვის ელექტრომობილებს გამოუშვებს

BYD e6

24 აგვისტო

ჩინური საავტომობილო კომპანია BYD-ი მერმის ელექტრომობილების წარმოებას დაიწყებს და პირველ რიგში, მათ აშშ-ის ბაზარზე შეიტანს. გამოცემა ”უოლ სტრიტ ჯორნელთან” საუბრისას, BYD-ის აღმასრულებელმა ვან ჩუანფუმ განაცხადა, რომ მისმა კომპანიამ ცოტა ხნის წინ, ჩინურ საფონდო ბირჟაზე საკუთარი აქციები გამოიტანა, რომელთა გაყიდვით მიღებულ ფულს, აშშ-ის ბაზარზე შესაღწევად გამოიყენებს.

ამ მიზნის განსახორციელებლად კი ხუთადგილიანი ელექტროქროსოვერი e6-ია შერჩეული. თავიდან ამერიკაში რამდენიმე ასეული ელექტრომობილის შეტანა იგეგმება, რომელთა მეშვეობითაც, ჩინური კომპანია ამ ავტომობილების მომხმარებელთა აზრს შეისწავლის. მიღებულ მონაცემებზე კი ბევრად იქნება დამოკიდებული, დაიწყებს თუ არა BYD-ი ამერიკისთვის ელექტრომობილების ფართო გამის წარმოებას. უარყოფითი ფონის შემთხვევაში, კომპანიას ამ ელექტრომობილის დახვეწა მოუწევს.

”დასაწყისისთვის, ჩვენი მომხმარებლები სახელმწიფო სააგენტოები და შესაძლოა, ცნობილი ადამიანები იქნებიან. ელექტრომობილების წარმოება ჩვენთვის ის გამოწვევაა, რომელსაც ბაზარზე ჩვენი კომპანიის დაწინაურება შეუძლია. ჩვენ ელექტრომობილებისთვის საჭირო ტექნოლოგიებს ვფლობთ და ვფიქრობთ, რომ მათი გამოყენებით, მსოფლიო ბაზარზე გასვლას შევძლებთ. ამას კი კომპანიის მომავლისთვის გადამწყვეტი მნიშვნელობა აქვს”, - ამბობს BYD-ის ექსპორტის დივიზიონის გენერალური მენეჯერი ჰენრი ლი.

BYD e6 სოლიდური გაბარიტების მქონე ავტომობილია, რომელშიც ხუთი ადამიანი თავისუფლად თავსდება. მისი სიგრძე 4.554 მეტრი, წონა კი 2020 კილოგრამია. ავტომობილის მოძრაობას ორი ელექტროძრავი უზრუნველყოფს, რომლებიც თითო ღერძს ემსახურებიან. მათი მეშვეობით, 0-100 კმ/სთ აჩქარებას e6 დაახლოებით 8 წამში ასწრებს, მისი მაქსიმალური სიჩქარე კი 160 კილომეტრია. მწარმოებელი ირწმუნება, რომ სრულად დამუხტული აკუმულატორებით, ავტომობილს 400 კილომეტრის გავლა შეუძლია. მათი სრულად დამუხტვისთვის კი 7-9 საათია საჭირო.

BYD e6 საკმაოდ ძვირი - 40 000 დოლარი ეღირება. ეს ჩინური მანქანისთვის, თუნდაც სოლიდური გაბარიტების მქონესთვის, ძალიან ძვირია. თუმცა თუ გავიხსენებთ, რომ ”მიცუბიშის” ჯუჯა ელექტრომობილი i-MiEV კიდვ უფრო ძვირი ღირს, მაშინ ამ თანხის გამეტებაც შეიძლება. სამაგიეროდ, მისი ექსპლუატაცია შიდაწვისძრავიან ავტომობილზე გაცილებით იაფი დაჯდება.

გაიცანით: სიტროენ DS3

Citroen DS3

24 აგვისტო


ფრანგული კომპანია ”სიტროენი” იმიჯს იცვლის და პრემიუმ კლასში გადასვლას ცდილობს. ამ კლასის ავტომობილებისთვის კი ინდექსი DS შემოიღო. პრემიუმ გამაში პირველი ავტომობილი DS3 იქნება, რომელმაც კონკურენცია ისეთ პოპულარულ ავტომობილს უნდა გაუწიოს, როგორიც ინგლისური ”მინია”.

”სიტროენ DS3-ის” მსოფლიო პრემიერა ფრანკფურტის საავტომობილო გამოფენაზე იგეგმება, თუმცა ”ორმაგმა შევრონმა” მისი ფოტოები და მწირი ინფორმაცია ინტერნეტით უკვე გაავრცელა.

ფოტოებიდან ჩანს, რომ DS3 პრაქტიკულად არ განსხვავდება კონცეპტუალური ”DS ინსაიდისგან”, რომელიც ”სიტროენმა” ჟენევის წლევანდელ ავტორანდევუზე წარმოადგინა. ამ ორ მანქანას შორის გარეგნული სხვაობა მხოლოდ იმაში გამოიხატება, რომ კონცეპტკარს გამოსაბოლქვი მილი ცენტრალურ ნაწილში ჰქონდა მოთავსებული, საწარმოო ვერსიაზე კი ის მარჯვნივაა.

ფრანგი მწარმოებელი თავის კლიენტს DS3-ს გაფორმების უამრავ ვარიანტს სთავაზობს. აქ აუცილებლად უნდა ითქვას, რომ ავტომობილს, რომელიც თავისი ძარით ჰეჩბეკების კლასს მიეკუთვნება, ძარის ძირითადი ნაწილი და სახურავი სხვადასხვა ფერის ექნება.

DS3 დაბერილი ფორმებით გამოირჩევა. პირველ რიგში, მას უზარმაზარი რადიატორი გამოარჩევს, რომელსაც ზედა მხარეს ”სიტროენის” ლოგო - ორმაგი შევრონი ამშვენებს, ემბლემის ძირზე კი ფსევდობამპერი მოთავსებულა, რომელიც უპირველესად, სანომრე ნიშნის დასამაგრებლად გამოიყენება და არა პასიური უსაფრთხოების საშუალებად.

ტრაპეციული ფორმის რადიატორის ორივე კუთხეში, საბორბლე თაღების თავზე, დიდრონი მაშუქი-თვალები ჩაუსვამთ, რომლებსაც ნისლიან ამინდში, ბორბლების წინ ამოჭრილ ფოსოებში ჩამჯდარი ნისლსაწინააღმდეგო ფარები დაეხმარება.

გვერდხედში, ორკარიანი ავტომობილი ძალიან ელეგანტურად გამოიყურება. ამ ხედში პირველ რიგში, ყურადღებას მძლავრი შუა საყრდენი იქცევს, რომელიც სალონის უსაფრთხოების უზრუნველყოფის გარდა, მისი ერთგვარი გამყოფის მოვალეობასაც ასრულებს. სახურავის უკან კი ოდნავ ამობზეკილი ანტიფრთა ჩანს, რომელსაც ჰაერის ნაკადის დარეგულირება ევალება.

ახალი ჰეჩბეკი პოპულარული ”სიტროენ С3-ის” მოდერნიზებულ პლატფორმაზეა აგებული. მისი სიგრძე-სიგანე 3.95 და 1.71 მეტრი, საბარგულის მოცულობა კი 285 ლიტრია. შედარებისთვის, DS3-ის კონკურენტებს - ”მინის” და ”ფიატ 500-ს” გაცილებით მცირე საბარგული აქვთ.

DS3-ისთვის ხუთი ძრავია გამოყოფილი. მათგან ორი 1.6-ლიტრიანი ტურბოდიზელია, რომლებიც ფორსირების სხვადასხვა დონით გამოირჩევიან და 90 და 110 ცხენის ძალას ავითარებენ. ბენზინის სამი ძრავის ლიტრაჟიც 1.6-ია და მათი სიმძლავრე 95, 120 და 150 ცხენის ძალაა. სიმძლავრის შესაბამისად, ძრავებს 5, ან 6-საფეხურიანი მექანიკური კოლოფები უწყვილდება. ფრანგული კომპანია ირწმუნება, რომ DS3-ის დიზელის აგრეგატები, ყოველი კილომეტრის გავლისას, ატმოსფეროში მხოლოდ 99 გრამ CO2-ს გამოჰყოფენ.

”სიტროენი” ჰეჩბეკ DS3-ის გაყიდვების დაწყებას მერმის, მარტში გეგმავს. ჯერჯერობით არ ცხადდება ამ ავტომობილის საბაზო ღირებულება. სამაგიეროდ ცნობილია, რომ მან კონკურენცია ”მინის”, ”ფიატ 500-ს” და ”ალფა რომეო მიტოს” უნდა გაუწიოს.

Sunday, August 23, 2009

”ოპელი” შეიძლება აღარ გაიყიდოს

Opel

23 აგვისტო

არაა გამორიცხული, რომ ”ჯენერალ მოტორსმა” თავისი ევროპული ბრენდის, ”ოპელის” გაყიდვა გადაიფიქროს და ის თავის მფლობელობაში დაიტოვოს. ასეთი ვარაუდი სააგენტო ბლუმბერგმა მას შემდეგ გამოთქვა, რაც ამერიკულმა კომპანიამ ”ოპელის” გაყიდვის მორიგი გადადების შესახებ გამოაცხადა.

გასული კვირის განმავლობაში, გერმანიის მთავრობის წევრებიც (მათ შორის, კანცლერი ანგელა მერკელიც) კი დარწმუნებულნი აცხადებდნენ, რომ ”ჯენერალ მოტორსი” ”ოპელის” მყიდველს კვირის ბოლოს აუცილებლად გამოაცხადებდა. იმავდროულად, ისინი მიანიშნებდნენ, რომ მყიდველი ავტო მაკომპლექტებლების მწარმოებელი კანადური გიგანტი ”მაგნა ინტერნეიშნლი” იქნებოდა.

მაგრამ ამერიკული კომპანია ისევ მიიჩნვს, რომ მისთვის ყველაზე ხელსაყრელი შეთავაზება ბელგიურმა საინვესტიციო ფონდმა ”RHJ ინტერნეიშნლმა” წარადგინა. მართალია, გერმანიის მთავრობის თავგამოდებული მცდელობით, ”მაგნამ” და მისმა რუსმა პარტნიორმა ”სბერბანკმა” რამდენჯერმე შეცვალეს თავიანთი განაცხად, მაგრამ ”გენერლებს” ეს არ აკმაყოფილებს. მათ კანადურ-რუსულ ვარიანტში ბევრი რამ არ მოსწონთ - ნოუ-ჰაუს და ტექნოლოგიების გადინებას უფრთხიან და სურთ, რომ როცა თავიანთ პრობლემებს მოაგვარებენ და თუ ”ოპელიც” კრიზისს დაძლევს (უფრო გერმანიის მთავრობის კრედიტებით), მისი აქციების გამოსყიდვის უფლებაც დარჩეთ.

გერმანელებს არ სურთ, რომ ”ოპელი” ისევ ოკეანის გაღმიდან იმართებოდეს. თუმცა ”მაგნაც” ხომ იმ კონტინენტიდანაა. მაგრამ აქ ისიც უნდა გავითვალისწინოთ, რომ კანადურ კომპანიას ფინანსურად მხარს ”სბერბანკი” უჭერს. უფრო სწორედ, ის ”ოპელის” გამოსყიდვას რუსული სახელმწიფო ბანკის ფულით აპირებს. ეს კი იმას ხომ არ ნიშნავს, რომ ”მაგნა” მხოლოდ შირმაა და რეალურად, ”ოპელს” რუსები (სეხელმწიფო) ყიდულობენ, რომლებსაც (პუტინს) ეროვნული ავტომრეწველობის აღორძინება (როდის ვარგოდა?) ოცნებად გადაქცევიათ და ამის გაკეთებას ”ოპელის” მეშვეობით (უფრო კონკრეტულად კი იმ ნოუ-ჰაუსა და ტექნოლოგიების მეშვეობით, რომლის სხვებისთვის გაზიარებაც ამერიკულ კომპანიას არ სურს) აპირებენ.

საინტერესოა, რა მოხდება იმ შემთხვევაში, თუ ”ჯენერალ მოტორსი” გერმანიის მთავრობის ზეწოლას ვერ გაუძლებს და ”ოპელს” კანადელებს (ამ შემთხვევაში რუსებს) მიჰყიდის? ერთიც ვნახოთ, კანცლერის პოსტის დატოვებიდან (შეიძლება ეს სექტემბრის არჩევნების შემდეგვე მოხდეს) მოკლე ხანში, მერკელი ”ოპელის” რომელიმე სოლიდურ პოსტზე დანიშნონ. ყველაფერი შეიძლება მოხდეს. მითუმეტეს მას შემდეგ, რაც მერკელის წინამორბედ გერჰარდ შრედერს ”გაზპრომის” პროექტ ”ჩრდილოეთის ნაკადის” ლობირება დაუფასდა - კანცლერის პოსტის დატოვებიდან რამდენიმე დღეში, ამ ერთობლივი საწარმოს დირექტორთა საბჭოში შეიყვანეს, როგორც ”ჩრდილოეთის ნაკადის” აქციონერთა კომიტეტის ხელმძღვანელი. სხვათა შორის, მერკელი გუშინ სასწრაფოდ დაკავშირებია თავის ამერიკელ კოლეგას, აშშ-ის სახელმწიფო მდივან ჰილარი კლინტონს და მისთვის საქმეში ჩარევა უთხოვია.

მოლაპარაკებისას, რომელსაც შაბათს ”ჯენერალ მოტორსის” წარმომადგენლებისა და გერმანიის მთავრობის გარდა, ”მაგნას” და ”სბერბანკის” ხელმძღვანელებიც ესწრებოდნენ, ამერიკულ მხარეს დაუსვამს კითხვა, ”ოპელი” გერმანიის მთავრობისგან რა ოდენობით კრედიტს მიიღებს, თუ მას ბელგიური ”RHJ ინტერნეიშნლი” შეიძენს, მაგრამ ამაზე მხოლოდ ერთი პასუხი არსებობს - გერმანიის მთავრობა მზადაა, ”ოპელს” 4.5 მილიარდი ევრო ასესხოს, თუ მას ”მაგნა” და ”სბერბანკი” იყიდიან.

ჯერჯერობით უცნობია, რა ნაბიჯს გადადგამს ამერიკული კომპანია. გავრცელებული ვარაუდით, მისი დრექტორთა საბჭო ამ თემაზე თათბირს სექტემბრის დასაწყისში გამართავს. ახლა უკვე სულ ინტენსიურად გაისმის ვარაუდი, რომ ”გენერლებს” ”ოპელის” გაკოტრება აქვთ გადაწყვეტილი. ოღონდ, სანამ ამ გადაწყვეტილებას მიიღებენ, მათ გერმანული კომპანიისგან იმის მყარი გარანტია სჭირდებათ, რომ არ მოხდება ტექნოლოგიების გადინება. გაკოტრების რეჟიმში კი ამერიკელები რუსელსჰაიმური კომპანიის რესტრუქტურირებას უფრო ადვილად შეძლებენ და ამის შემდეგ, მათს მფლობელობაში გამართული ბიზნესის მქონე კომპანია დარჩება.

Friday, August 21, 2009

”სეატი” მინიავტომობილს ამზადებს

Seat

21 აგვისტო

ესანური კომპანია ”სეატი” წარმოებისთვის სრულიად ახალ კომპაქტურ ავტომობილს ამზადებს, რომლის პრემიერაც მერმის, ჟენევის ავტო შოუზე იგეგმება. ფრანგულ გამოცემა ”ლ’აუტომობილის” მიერ გავრცელებული ინფორმაციით, ახალი ავტომობილი ”ფოლკსვაგენის” კონცეპტუალური Up!-ის (მომავალი ლუპო) სერიული ვერსიის სახეშეცვლილი ვერსია იქნება და ესპანური ავტომწარმოებლის საწარმოო პროგრამაში ის უკვე მივიწყებული ”აროსას” ადგილს დაიკავებს.

ფრანგული გამოცემა გვატყობინებს, რომ ახალი ავტომობილი ესპანური კომპანიის ახალ კორპორატიულ სტილში შესრულდება, რომელიც ”სეატმა” პირველად ”იბიცასა” და ”ექსეოზე” გამოიყენა. ახალი მინიავტომობილისთვის სამცილინდრიანი, 1.0 და 1.2-ლიტრიანი ბენზინის, ასევე 1.2-ლიტრიანი ტურბოდიზელია განკუთვნილი. ავტომობილის წონა სულ რაღაც 830 კილოგრამი იქნება, მისი ავზი კი 35 ლიტრ საწვავს დაიტევს.

ჯერჯერობით არ ქვეყნდება ახალი ავტომობილის ტექნიკურ-ეკონომიკური მახასიათებლები. ჟენევაში მხოლოდ მისი კონცეპტუალური ვერსიის პრემიერა ჩატარდება, ავტომობილის წარმოება კი 2011 წელს, ბრატისლავას ქარხანაში დაიწყება. ევროპაში ამ ავტომობილის სავარაუდო საბაზო ღირებულება 7 300 ევრო იქნება.

”პორშეს” შტაბ-ბინაში ჩხრეკა ჩატარდა

Porsche Offices Raided

21 აგვისტო

”პორშეს” ყოფილი მთავარი აღმასრულებელი ვენდელინ ვიდეკინგი (სურათზე) და ამავე კომპანიის ყოფილი ფინანსური დირექტორი ჰოლგერ ჰარტერი მაქინციებსა და კონფიდენციური ინფორმაციით მანიპულირებაში არიან ეჭვმიტანილნი.

ინტერნეტ გამოცემა ”აუტომოტივ ნიუსის” ინფორმაციით, გერმანიის ფინანსური საქმიანობის მაკონტროლებელმა ფედერალურმა სააგენტომ (BaFin) პროკურატურაში შეიტანა განაცხადება, რომლითაც კომპანიის დასახელებულ თანამშრომლებს ფასიანი ქაღალდებით მაქინაციებში ადანაშაულებს.

ხუთშაბათს შტუტგარტის პროკურატურამ ”პორშეს” შტაბ-ბინაში ჩხრეკა ჩაატარა და გარკვეული ფინანსური საბუთები ამოიღო. ჯერჯერობით, გამოძიების მხარე საქმის დეტალების შესახებ არაფერს ამბობს, თუმცა ”აუტომოტივ ნიუსის” წყარო იუწყება, რომ ჩხრეკა ასევე ვიდეკინგისა და ჰარტერის, ასევე სხვა ეჭვმიტანილების სახლებშიც ჩატარდა.

პროკურატურა კომპანიის კონფიდენციური ინფორმაციის საფონდო ბირჟაზე გაჟონვის შესაძლებლობას ამოწმებს. ამ ინფორმაციას შეიძლებოდა გავლენა მოეხდინა ”პორშესა” და ”ფოლკსვაგენის” აქციების ფასებზე.

”პორშე” აცხადებს, რომ პროკურატურის მიერ ჩატარებულ ჩხრეკას კომპანიის საქმიანობაზე არ უმოქმედია, რამდენადაც, გამოძიება მხოლოდ კისი ყოფილი ხელმძღვანელობის საქმიანობას იძიებს.