”პეჟოს” კონცეპტუალური ვარსკვლავები პარიზში

12 ოქტომბერი

”პეჟო HR1” - ფრანგული ლომების პატარა ქროსოვერის კონცეპცია

”პეჟო” არ აპირებს თანამედროვე ავტოინდუსტრიის ტენდენციისგან ჩამორჩენას და მალე თავის სამოდელო გამას პატარა ქროსოვერით შეავსებს, რომლის კონცეპტუალური ვერსიაც პარიზის საავტომობილო გამოფენაზე წარადგინა.

ფრანგულმა კომპანიამ ამ კონცეპტუალურ ავტომობილს საქალაქო ქროსოვერი უწოდა. რაც მთავარია, მასში შეხამებულია ახვადასხბა კატეგორიის ავტომობილების - ქალაქის ავტომობილის, კუპეს, უგზოობის მოდელის თვისებები. და ის შექმნილია ახალგაზრდა ავტომოყვარულებისთვის, რომლებიც აქტიურ ცხოვრებას მისდევენ

HR1 მართლა ძალიან პატარა ავტომობილია. მსიი სიგრძე მხოლოდ 3.670 მეტრია, რაც ”ფორდის” ჰეჩბეკ ”ფიესტაზე” 0.300 მეტრით მოკლეა. მცირეა საბარგულის მოცულობა, რაც მხოლოდ 180 ლიტრს შეადგენს. შედარებისთვის, HR1-ის სავარაუდო კონკურენტ ”ნისან ჯუკის” სიგრძე 4.140 მეტრია, საბარგულის მოცულობა კი - 250 ლიტრი.

გარეგნულად, ავტომობილი ”პეჟოს” ახალ კორპორატიულ სტილშია შესრულებული, რომელიც ”ლომებმა” პირველად ორი წლის წინ, ასევე კონცეპტუალურ სპორტულ SR1-ზე გვიჩვენეს. ავტომობილს კარი უჩვეულოდ ეღება. ის წინა ჰორიზონტალურ ლილვურ საყრდენზეა დაკიდებული, რომელზეც უკნიდან წინ გადახრით იხსნება.

ცალკე აღნიშვნას იმსახურებს კონცეპტუალური ქროსოვერის ინტერიერი, რომელიც ფუტურისტულ (ეგრეთ წოდებულ მომავლის) სტილშია შესრულებული. წინა ორი სავარძელი ერთგვარი ტიხრით იყოფა და კოკპიტის მსგავსი სივრცე წარმოიქმნება. კოკპიტის შთაბეჭდილებას კი სპორტული ყაიდის სავარძლებიც აძლიერებს. სალონში ყველაფერი ტყავითაა გაწყობილი. მაჩვენებლების დაფა მინიმალისტურია, საჭის რგოლს კი მცირე რადიუსი აქვს, თუმცა ძალიან სქელიცაა. მულტიმედიურ, სანავიგაციო და კლიმატის სისტემები უახლესი ელექტრონიკით იმართება, რომელიც მძღოლის ხელის მოძრაობას სცნობს და ამ მოძრაობის შესაბამისად ასრულებს მითითებებს.

ავტომობილი აღჭურვილია ჰიბრიდული ძალური დანადგარით ”ჰიბრიდ4-ით”, რომლის ჯამური სიმძლავრეც 151 ცხენის ძალას შეადგენს. მასში შედის 113-ცხნისძალიანი ბენზინის ძრავი, რომლის მუშა მოცულობაც 1.2 ლიტრია და რომელიც წინა ბორბლებს ამოძრავებს. მასთან უნისონში მუშაობს 38-ცხნისძალიანი ელექტრული ძრავი, რომელიც თავის მაბრუნ მომენტს უკანა ბორბლებს გადასცემს. ამგვარად, ავტომობილს ყველა ბორბალი წამყვანი აქვს. შიდაწვის ძრავს ემსახურება 6-საფეხურიანი რობოტიზებული კოლოფი, რომლის საფეხურებიც საჭის რგოლის უკან მოთავსებული ნიჩბებით იცვლება. ”პეჟოს” ინფორმაციით, ჰიბრიდული აგრეგატი 100 კილომეტრის გასავლელად მხოლოდ 3.5 ლიტრ ბენზინს მოიხმარს, ყოველი კილომეტრის გავლისას კი ატმოსფეროში მხოლოდ 80 გრამ ნახშირორჟანგს გამოჰყოფს.

ლომების ექსტრემალი - პეჟო EX1

ფრანგული კომპანია წელს დაარსებიდან 200 წლის იუბილეს აღნიშნავს და ბუნებრივია, ამ თარიღთან დაკავშირებით, თავის გამოჩენას ეცდებოდა. ასეც მოხდა - ჯერ კიდევ პარიზული გამოფენის დაწყებამდე გახდა ცნობილი, რომ საიუბილეოდ ”ლომებს” უჩვეულო ფორმის ელექტრომობილი აქვთ მომზადბული, რომელსაც სახელად EX1 უწოდეს. ზოგიერთი განსაზღვრებით, ეს აბრევიატურა ელექტრულ ექსტრემალს უნდა ნიშნავდეს და რახან პირველი ნომერია, ლომებისგან მომავალში ამ სერიის გაგრძელებასაც უნდა ველოდოთ.

სხვათა შორის, ”პეჟოს” რატომღაც ეს ავტომობილი პარიზის ავტო რანდევუზე არ წარუდგენია. სამაგიეროდ, ის უფრო ფართო აუდიტორიის წინაშე დააყენა - ავტომობილი კომპანიის იმ შოურუმში დააყენეს, რომელიც ელისეის ბულვარზე მდებარეობს.

ავტომობილი უჩვეულო გარეგნობით გამოირჩევა და ეს არცაა გასაკვირი, რადგან მასში ”პეჟოს” ძველი კონცეპტუალური ავტომობილების დიზაინის ელემენტებია შერწყმული. თავისი აგებულებით, EX1 როგორღაც ”პეჟოს” სხვა კონცეპტუალურ მოდელებს - ”ასფალტს” და ”20კაპს” მოგვაგონებს. სტილი მას კონცეპტუალური SR1 -ის მსგავსი აქვს, მისი ალუმინის ძარის ზოგიერთ ელემენტზე კი შეიძლება თქვათ, რომ ასევე კონცეპტუალური RCZ-ის და BB1-ისგან გადმოიღო. მოკლედ, ძველი კონცეპციების ნამდვილი ნაჯვარია.

”პეჟოს” განცხადებით, EX1-ს წყლის წვეთის მსგავსი პროპორციები აქვს. საერთოდ, ითვლება, რომ წყლის წვეთს იდეალური აეროდინამიკური ფორმა აქვს და ”ლომებმაც” სცადეს, რომ თავიანთი კონცეპტუალური ავტომობილის მოყვანილობაც ასეთი ყოფილიყო. ამიტომ, თუ წინა ბორბლების კვალი ნორმალურია, მანქანის უკანა სექცია ორ, ახლოს განლაგებული უკანა ბორბლის ირგვლივაა აგებული. რა თქმა უნდა, უცნაურმა აღნაგობამ ახვა ტიპის საკიდარი მოითხოვა. თუ წინა ბორბლებზე რხევების ჩაქრობას ჩვეულებრივი, ორკაპა ჩანგლის ფორმის ”გიტარების” სტრუქტურა უზრუნველყოფს, უკან ორივე ბორბლის რხევებს ერთი, ცენტრალური ამორტიზატორი აქრობს.

მზიდი სტრუქტურა კი მონოკოკური სისტემაა და ის კარბონის კომპოზიტისგანაა დამზადებული. ეს კი ამ სტრუქტურის სიხისტესაც ზრდის და წონასაც ამცირებს. EX1-ს გაბარიტებია: სიგრძე 3.54 მეტრი, სიგანე 1.77 მეტრი, სიმაღლე 0.90 მეტრი. ამასთან, ავტომობილი სულ რაღაც, 750 კილოგრამს იწონის.

მთავარი კი ისაა, რომ EX1 არის ორადგილიანი ელექტრო როდსტერი, რომელიც დინამიკური ავტომობილების მოყვარულებს დაუვიწყარ შთაბეჭდილებებს პირდება.

ფრანგული კომპანიის განსაზღვრებით, ეს არის ”ოცნების ავტომობილი”, რომელიც ”ელექტრო ძრავების განმაცვიფრებელი შესაძლებლობებს” გვიჩვენებს. დაკიდევ, ”პეჟო” ირწმუნება, რომ EX1-ს ტესტების დროს, ადგილიდან აჩქარებაში რამდენიმე მსოფლიო რეკორდი აქვს დამყარებული, თუმცა კონკრეტული მონაცემები არ გამოუქვეყნებია.

ფაქტია, რომ EX1-ს ულტრა მსუბუქი მზიდი სტრუქტურა აქვს და მის ოთხივე ბორბალს, მაბრუნ ძალას ორი ელექტროძრავი აწვდის, რომელთა ჯამური სიმძლავრეც 340 ცხენის ძალას, მაბრუნი მომენტი კი 240 ნიუტონმეტრს აღწევს. ამასთან, თითოეული ძრავი თითო ღერძს ემსახურება და აქედან გამომდინარე, ავტომობილი სრულამძრავიანია. ელექტროძრავებს ენერგიით ლითიუმ-იონური აკუმულატორების ბლოკი ამარაგებს.

პეჟო 508

200 წლის იუბილეს აღსანიშნავად, ”პეჟოს” პარიზში მხოლოდ კონცეპტუალური ავტომობილები არ გამოუფენია. მისი სტენდის ერთ-ერთი ვარსლკვლავი, წინასერიული სედანი 508 იყო, რომელსაც მალე კომპანიის ბესტსელერობას უწინასწარმეტყველებენ. მასზე პატარა წინამორბედ 407-თან შედარებით, ის წონში შემცირებულია, ინტერიერი კი გაზრდილი აქვს.

ამ ავტომობილისთვის რვა ძრავია გათვალისწინებული, რომელთაგან ხუთი დიზელზე მუშაობს, სამი კი - ბენზინზე. ძრავებთან შესაწყვილებლად განკუთვნილია 5 და 6-საფეხურიანი მექანიკური და 6-საფეხურიანი ავტომატური კოლოფები. ამასთან, ფრანგული კომპანია გვპირდება, რომ მალე ამ ავტომობილს დიზელ-ელექტრული ჰიბრიდული ძალური დანადგარითაც (ასეთს ქროსოვერ 3008 ჰიბრიდ4-ზე იყენებს) აღჭურვავს.

ლომები ახალი ავტომობილის გაყიდვას გაზაფხულზე დაიწყებენ. 508 კონკურენციას პირველ რიგში, ”ფოლკსვაგენ პასატს” და ”კია ოპტიმას” გაუწევს.