Saturday, April 30, 2011

„რენო კაპტურს“ მწვანე შუქი აუნთეს

Renault Captur to Get Production Versions

30 აპრილი

ჟენევის საავტომობილო შოუს ერთ-ერთი გამორჩეული ექსპონატი, „რენოს“ უგქოობის კონცეპტუალური მოდელი „კაპტური“ იყო, რომელმაც სპეციალისტების გარდა, დამთვალიერებლებიც მოხიბლა. გამოფენაზე ბევრმა ჩათვალა, რომ ეს ფრანგული კომპანიის მორიგი გასართობი იქნებოდა. თუმცა მალე გაირკვა, რომ ასე არ იქნება - ეს ავტომობილი კონვეიერზე დადგება და თანაც, მის ბაზაზე ერთბაშად ორ მოდელს გამოუშვებენ.

ბრიტანულ გამოცემა „ავტოქარის“ ინფორმაციით, ამ ორიდან პირველი იქნება პატარა ხუთკარიანი ქროსოვერი, რომელიც ზომით „ნისან ჯუკზე“ დიდი არ უნდა იყოს. უფრო მეტიც, პლატფორმასაც მისგან გაიზიარებს. მეორე ავტომობილი სამკარიანი იქნება, ოდნავ განსხვავებული გარეგნობით. „ავტოქარმა“ ეს მეორე „რეინჯ როვერ ევოკს“ შეადარა. ოღონდ, ფრანგული ავტომობილი ბრიტანულზე პატარა იქნება.

მეორე აცტომობილს კუპეს ტიპის ქროსოვერის ძარა უნდა ჰქონდეს და ის ამ კლასის პიონერი გახდება (თუ მანამდე მსგავსი პატარა ქროსოვერი სხვამ, ვთქვათ, იმავე მინიმ არ გამოუშვა). მოკლედ, სამკარიანი სპორტული ქროსოვერით, „რენო“ პრემიუმ სუპერმინი სეგმენტში შეაბიჯებს, სადაც მას ძლიერი კონკურენტები დახვდება „სიტროენ DS3-ის“ და „მინი კუპერის“ სახით.

„ავტოქარის“ ინფორმაციით, ხუთკარიანი ქროსოვერი ბაზარზე ორ წელიწადში უნდა გამოჩნდეს, მალე კი მას სამკარიანი კუპე-ქროსოვერიც მიჰყვება. ჯერჯერობით უცნობია, კონკრეტულად რომელი ძრავებით აღიჭურვება ეს ორი ავტომობილი, თუმცა სავარაუდოდ, „რენო“ ამისათვის მის ხელთ არსებულ მცირელიტრაჟიან ძრავებს გამოიყენებს. და, რა თქმა უნდა, ვიცით-რა, თუ რა ენთუზიაზმით ცდილობს ფრანგული კომპანია თავის საწარმოო პროგრამაში ელექტრომობილების დამკვიდრებას, არც ის უნდა გაგვიკვირდეს, თუ მყიდველს ელექტროძრავით აღჭურვილ ქროსოვერებსაც შესთავაზებს.

დაკიდევ, „ავტოქარი“ ასევე გვატყოვინებს, რომ ფრანკფურტის საავტომობილო შოუსთვის, „რენო“ კიდევ ერთ სიახლეს ამზადებს. ეს ავტომობილი იქნება თემაზე „უორკ“ და ის წარმოგვიდგენს ფურგონ „კანგუს“ შემდეგი ტაობის გარეგნობას. სავარაუდოდ, ის „კაპტურის“ (თემა იქსპლორ) დიზაინის ელემენტებს მიიღებს.

„ფოლკსვაგენი“ ჩინეთში იაფფასიან ბრენდს ქმნის

Volkswagen Intends to Introduce a Low Cost Brand for China

30 აპრილი

„ფოლკსვაგენი“ ჩინური ბაზრის ლიდერია. ახლახანს გერმანულმა ჯგუფმა, ცისქვეშეთში თსვისი ესპანური ბრენდი სეატი წარადგინა, თუმცა ამით დაკმაყოფილებას არ აპირებს და იქვე კიდევ ერთი, სრულიად ახალი და რაც მთავარია, ჩინური ბრენდის დაფუძნებას განიხილავს.

„ამჟამად, ჩვენს პარტნიორ „ფირსტ აუტო უორკსთან“ (FAW) ერთად, ახალი ადგილობრივი ბრენდის მიზანშეწონილობას განვიხილავთ. ამ ბრენდით, ადგილობრივი ბაზრის იაფფასიანი ავტომობილების სეგმენტში ვიმუშავებთ“, - ამბობს „ფოლკსვაგენის“ ჩინური ფრთის გაყიდვებისა და მარკეტინგის აღმასრულებელი ვიცე პრეზიდენტი სოჰ ვეიმინი.

გერმანულმა გიგანტმა ჩინური იაფფასიანი ბრენდის შექმნაზე მას შემდეგ დაიწყო ფიქრი, რაც რამდენიმე კონკურენტმა ასეთი ნაბიჯი გადადგა. მათ შორის არიან „ჯენერალ მოტორსი“, „ჰონდა“ და „ნისანი“. სხვათა შორის, ჩინეთის მთავრობა ყველაფერს ცდილობს იმისათვის, რომ უცხოურ კომპანიებს, ადგილობრივებთან ერთობლივი კომპანიების შექმნა აიძულოს, რაც ჩინელ ავტომწარმოებლებს გამოცდილების შეძენის და ახალი ტექნოლოგიების ათვისების საშუალებას მისცემს.

სოჰი ამბობს, რომ ჩინური ავტობაზრის დაახლოებით 20 პროცენტი სწორედ დაბალფასიანი ავტომობილებისაა და დიდი შეცდომა იქნება, რომ „ფოლკსვაგენს“ ასეთ დიდ სეგმენტში საკუთარი ინტერესი არ ჰქონდეს. თუმცა, იმაშიც დარწმუნებულია, რომ სანამ შესაბამის გადაწყვეტილებას მიიღებენ, გერმანული ჯგუფის ხელმძღვანელებმა ეს საკითხი დაწვრილებით უნდა შეისწავლონ.

დაამატებს თუ არა ახალ ბრენდს, „ფოლკსვაგენს“ მაინც გადაწყვეტილი აქვს, რომ 2018 წელს ჩინეთში მისი წარმოების მოცულობა 4 მილიონამდე გაიზარდოს, რაც წარმოების ახლანდელ მოცულობაზე თითქმის ორჯერ მეტია. დღეისათვის ვოლფსბურგელებს ჩინეთში 7 ქარხანა აქვთ და კიდევ ორს აშენებენ. ამასთან, შვიდივე მოქმედ ქარხანაში, წარმოების გაზრდას აპირებენ. რაც შეეხება ახალ ქარხნებს, მათი წლიური წარმადობა თავიდან 300 000 ავტომობილი იქნება, თუმცა საჭიროების შემთხვევაში, მათში წარმოების გაორმაგებაც შესაძლებელი იქნება.

შარშან „ფოლკსვაგენის“ ექვსმა ბრენდმა ჩინეთში 1.9 მილიონი ავტომობილი გაჰყიდა, რაც წინა წლის მაჩვენებელზე 37 პროცენტით მეტია. სოჰი ვარაუდობს, რომ წელს გაყიდვები 2 მილიონს გასცდება.

„ჰიუნდაის“ კვარტალური მოგება 46 პროცენტით გაიზარდა

Hyundai quarterly profit rises 46% on pricier models

30 აპრილი

ჩინეთში, ევროპასა და ამერიკაში გაყიდვების ზრდის კვალობაზე, „ჰიუნდაიმ“ პირველი კვარტლის მოგება გაზარდა. ყველაზე მეტად კი, მოგების ესოდენ სოლიდური ზრდა იმ ფაქტორმა განაპირობა, რომ კორეულ ბაზარზე, სულ უფრო მეტი ძვირი ავტომობილი იყიდება.

წლის პირველ კვარტალში, შემოსავალმა 1.88 ტრილიონ ვონს (1.75 მილიარდ დოლარს) მიაღწია. „ჰიუნდაის“ მიერ გამოქვეყნებულ განცხადებაში მითითებულია, რომ შარშანდელ პირველ კვარტალში, მოგება 1.28 ტრილიონი ვონი იყო. ამავე პერიოდში, გაყიდული ავტომობილების რაოდენობა 9 პროცენტით გაიზარდა, გაყიდვიდან მიღებულმა თანხამ კი 21 პროცენტით, 18.24 ტრილიონ ვონამდე მოიმატა.

საოპერაციო მოგებამ, რომელიც გაყიდვებიდან მიღებული თანხისგან საწარმოო, სამარკეტინგო და ადმინისტრაციული ხარჯების გამოკლებით მიიღება, 46 პროცენტით მოიმატა და 1.83 ტრილიონ ვონს მიაღწია. კორეული კომპანია ვარაუდობს, რომ იაპონური კომპანიების კრიზისის ფონზე, გაყიდვების ზრდა წელსაც გაიზრდება.

„ბაზარზე ახალი მოდელების გამოტანის და ხარისხის გაუმჯობესების წყალობით, „ჰიუნდაი გაყიდვებს მუდმივად ზრდის და მოსალოდნელია, რომ ეს ტრენდი კიდევ ორი-სამი წელი გაგრძელდება. და რა თქმა უნდა, ეს კომპანიის აქციების ღირებულებაზეც აისახება“, - ამბობს ანალიტიკურ კომპანია „KDB ასეტ მენეჯმენტის“ სპეციალისტი ლიმ ძეონ სეოკი.

იანვრიდან მარტის ჩათვლით, „ჰიუნდაიმ“ 921 ათასზე მეტი ავტომობილი გაჰყიდა, რაც წინა წლის ანალოგიური პერიოდის მაჩვენებელზე 9 პროცენტით მეტია. განსაკუთრებით მოიმატა (14 პროცენტით) იმ ავტომობილების გაყიდვებმა, რომლებიც კორეის ფარგლებს გარეთაა აწყობილი. ყველაზე მეტი პოპულარობით კი უახლესი „ელანტრა“ და ბიზნეს კლასის სედანი „სონატა“ სარგებლობს.

საინტერესოა, რომ პირველ კვარტალში, 5 პროცენტით გამყარდა კორეული ვალუტა ვონი, რაც ამ ქვეყნის კომპანიის შედეგებზე უარყოფითად უნდა ასახულიყო, თუმცა ასე არ მოხდა და ამის მიზეზი ისაა, რომ „ჰიუნდაის“ უცხოეტში ბევრი საწარმო აქვს. მათგან ყველაზე მეტად კი ამერიკული საწარმოა დატვირთული, რომელიც „ტოიოტას“ პრობლემების ფონზე, სრული დატვირთვით მუშაობს. ეს კი იმ დროს ხდება, როცა აპრილში „ტოიოტამ“ იაპონიაში დაგეგმიულძე 300 000 ავტომობილით ნაკლები, იაპონიის გარეთ კი 100 000 ავტომობილით ნაკლები გამოუშვა.

„სუბარუ“ „იმპრეზას“ მისი სპორტული ვერსიებისგან განაცალკევებს

Subaru Separates the Impreza from WRX, STI Versions

30 აპრილი

„სუბარუმ“ გადაწყვიტა, რომ შემდეგი თაობის „იმპრეზა“, მისივე სარბოლი ვარიანტების - WRX-ის, WRX STI-სგან დააცალკევოს. ეს იმას ნიშნავს, რომ ეს ორი სპორტული ავტომობილი, სახელ „იმპრეზას“ აღარ მიიღებს. ეს ინფორმაცია, ინტერნეტ გამოცემა „ქარ ედვაიზს“, „იმპრეზას“ წარმოების შეფმა აკიჰიდე ტაკეუჩიმ გააცნო.

მისი თქმით, „იმპრეზას“ და მისი სპორტული ვერსიების განცალკევებას გარკვეული მიზეზები აქვს. მაგალითად, ახალი „იმპრეზა“ 2.0-ლიტრიანი ატმოსფერული ოთხცილინდრიანი ოპოზიტითაა აღჭურვილი, რომელიც ტურბოკომპრესორით არასდროს აღიჭურვება.

უფრო მთავარი კი ისაა, რომ „სუბარუს“ თავისი სპორტული მოდელების ახალი, დამოუკიდებელი გამის შექმნა სურს. იაპონური კომპანიის მარკეტოლოგები თვლიან, რომ უკეთესი იქნება, თუ „იმპრეზას“ შემთხვევაში, აქცენტი ეკონომიურობასა და ეკოლოგიურობაზე გაკეთდება, სპორტული მოდელების შემთხვევაში კი მთავარი მათი ტემპერამენტი იქნება. და შესაბამისად, ისინი უფრო დიდი, ტურბოკომპრესორიანი ძრავებით აღიჭურვება.

სტანდარტული „იმპრეზასგან“ განსხვავებით, მისი WRX და WRX STI ვერსიები 2.5-ლიტრიანი ოთხცილინდრიანი ოპოზიტური ტურბოძრავითაა აღჭურვილი, რომელიც 305 ცხენის ძალას გამოიმუშავებს. რა თქმა უნდა, ამ ძრავის ყოველ ცილინდრს 4-4 სარქველი აქვს. ოღონდ, ამ სარქველებს აქტიური მაკონტროლებელი სისტემა მართავს, რომელიც მათი გაღებისა და დახურვის ფაზებს, ძრავის მუშაობის რეჟიმის შესაბამისად არეგულირებს.

ტაკეუჩის თქმით, მართალია, ეს ძრავი მოძველებულია, მაგრამ ის კიდევ რამდენიმე წელი არ შეიცვლება. თუმცა, ისიც აღიარა, რომ კომპანიას მისი შემცვლელის შემუშავება უკვე დაწყებული აქვს. რაც შეეხება უახლეს ატმოსფერულ 2.0-ლიტრიან აგრეგატს, მისი შემუშავებისას, ინჟინერთა მთავარი ამოცანა, კარგი ეკონომიური და ეკოლოგიური მაჩვენებლების მიღწევა იყო.

ტაკეუჩიმ ისიც აღიარა, რომ იაპონური კომპანია „იმპრეზას“ ჰიბრიდული ვერსიის წარმოების შესაძლებლობასაც განიხილავს. მაგრამ ასეთი ავტომობილის წარმოების დაწყებამდე, WRX STI ბაზარზე დამოუკიდებელი მოდელის სახით გამოვა.

„ფერარი“ შვიდწლიან გარანტიას გთავაზობთ

Ferrari Warranty

30 აპრილი

სუპერ ავტომობილების მწარმოებელმა იტალიურმა კომპანია „ფერარიმ“, თავისი ახალი ავტომობილების მყიდველს, შვიდწლიანი საგარანტიო მომსახურება შესთავაზა. ლაპარაკია სამ მოდელზე - „კალიფორნიაზე“, „458 იტალიასა“ და FF-ზე, რომლებიც მყიდველებს 15 მარტის შემდეგ მიაწოდეს.

საგარანტიო პროგრამაში შესულია ყველა ის სტანდარტული სამუშაო, რომლებიც გეგმიური ტექმომსახურებითაა გათვალისწინებული. გარდა ამისა, ამავე პროგრამით, კომპანია ყველანაირ სითხეს - ძრავის ზეთს და მუხრუჭების სითხესაც უფასოდ ცვლის.

„ფერარის“ განცხადებით, მომსახურების გაფართოებული პროგრამა, წელიწადში ერთ უფასო მომსახურებას ითვალისწინებს. თუმცა, თუ ავტომობილი სერვისებს შორის 20 000 კილომეტრზე მეტს გაივლის, მას წელიწადში უფრო მეტჯერაც (ყოველ 20 000 კილომეტრზე ერთხელ) მოემსახურებიან. თანაც, ახალი პროგრამა ძალაში იმ შემთხვევაშიცაა, როცა ავტომობილს მფლობელი გამოეცვლება.

ცნობისათვის, დასახელებულ სამ მოდელს შორის, „ფერარიმ“ ბოლოს FF გამოუშვა, რომლის მსოფლიო პრემიერაც დეტროიტის საერთაშორისო ავტო შოუზე შედგა. ეს იტალიური კომპანიის ისტორიაში პირველი და ჯერჯერობით ერთადერთი სრულამძრავიანი ავტომობილია, რომლითაც მარანელოელებმა „612 სკალიეტი“ შეცვალეს.

„ფერარი FF“ 6.262-ლიტრიანი V12 ძრავითაა აღჭურვილი, რომელიც 660 ცხენის ძალას გამოიმუშავებს. ამ ძრავით, ავტომობილს ადგილიდან 100 კმ/სთ-ის აკრეფა 3.7 წამში შეუძლია, მისი მაქსიმალური სიჩქარე კი 335 კმ/სთ-ს აღწევს.

„სელერიტას პროტოტაიპი“ - 0.1 ლიტრი 100 კილომეტრზე

The Celeritas Prototype Achieves 2,200 MPG

30 აპრილი

სწორედ ამდენს წვავს ავტომობილის მსგავსი წარმონაქმნი, რომლითაც პურდუს უნივერსიტეტის (შტატი ინდიანა) სტუდენტთა გუნდმა, „შელის“ საერთაშორისო ეკომარათონში მიიღო მონაწილეობა. თანაც, ეს მაჩვენებელიც პირობითია, რადგან ავტომობილი შიდაწვის ძრავით არაა აღჭურვილი. საწვავის ხარჯი კი იმ ელექტროენერგიის ექვივალენტურია, რომელიც პროტოტიპის აკუმულატორებში გროვდება.

პურდუს უნივერსიტეტის მანქანას „სელერიტას პროტოტაიპი“ ჰქვია და ის მზის ელემენტებითაა დაფარული. რა თქმა უნდა, გადაადგილებისთვის საჭირო ენერგიის დიდ ნაწილს მზისგან ღებულობს. მის შემქმნელთა ჯგუფი იმედოვნებს, რომ „სელერიტასი“ საერთო სარგებლობის გზებზე მოძრაობისთვის აუცილებელ ლიცენზიას მიიღებს.

სხვათა შორის, „სელერიტასი“ მხოლოდ ეკომარათონში მონაწილეობისთვის არ შეუქმნიათ. უნივერსიტეტში თვლიან, რომ ასეთი ავტომობილით ჩვეულებრივ გზებზე ყოველდღიურად გადაადგილება შეიძლება. ამისათვის, მათ ავტომობილი ფარებით, გაბარიტული ფარებით და ციმციმებით, საბარგულით, მუხრუჭების ენერგიის რეგენერაციის სისტემით, უკანა ხედვის კამერებით და სრულფასოვანი სავარძლით აღჭურვეს. უფრო მეტიც, საკიდარიც ისეთია, რომ გზებზე არსებული მცირე ზომის დეფექტების არ ეშინია.

„სელერიტასი“ ხუთი საბორტო კომპიუტერითაა აღჭურვილი, რომლებიც მზისგან მიღებული ენერგიის სხვადასხვა სისტემისთვის გადანაწილებას აკონტროლებენ. მალე მათ კიდევ ერთი ფუნქცია დაემატება, რადგან ავტომობილი ჰაერის კონდიცირების სისტემითაც დაკომპლექტდება.

„ამ მანქანით, ჩვენ შევძელით იმის დემონსტრირება, რომ შესაძლებელია ისეთი ავტომობილის დამზადება, რომელიც ორგანული საწვავის გამოყენების გარეშე შეძლებს მოძრაობას. „სელერიტასის“ შესაქმნელად, ჩვენს გუნდს ათასობით საათი დასჭირდა და ნაჩვენებმა შედეგმა დაგვარწმუნა, რომ ეს შრომა ამად ღირდა“, - ამბობს ჯგუფის პრეზიდენტი ტედ პესინა.

ენთუზიასტთა ჯგუფს ერთი წელი დასჭირდა იმისათვის, რომ „სელერიტასის“ კონსტრუქცია შეემუშავებინა. კიდევ ერთი წელი დასჭირდათ მის ასაგებად. პროექტის განსახორციელებლად საჭირო თანხა სხვადასხვა კორპორაციებმა გაიღეს. სულ მასზე 90 000 დოლარი დაიხარჯა.

Friday, April 29, 2011

„ტოიოტას“ პირველობას „ჯენრალ მოტორსი“ და „ფოლკსვაგენი“ ეცილებიან

Toyota Chased by GM, Volkswagen, on the Sales Chart

29 აპრილი

ფინანსური კრიზისი, ავტომობილების გაწვევა, კიდევ გაწვევა და გაწვევა, მიწისძვრა, ცუნამი... სხვადასხვა მიზეზებით გამოწვეულმა კრიზისებმა და კატასტროფებმა, მსოფლიოს უდიდესი ავტომწარმოებელი კომპანია „ტოიოტა“ დააჩოქა. ამას კი, მისი კონკურენტები ისევე სწრაფად გრძნობენ, როგორც წყალში ზვიგენი სისხლს...

უკვე ერთ წელიწადზე მეტია, გერმანული კომპანია „ფოლკსვაგენი“ არ მალავს, რომ მისი მიზანი, 2018 წლისთვის, მსოფლიო ლიდერობის ხელში ჩაგდებაა. ამ მიზნის მისაღწევად, ვოლფსბურგში თავდაუზოგავად მუშაობენ და მათს დიდ ჯგუფში შემავალ კომპანიებსაც სრული დატვირთვით ამუშავებენ.

პარალელურად, იაპონურ გიგანტს კვალში უდგას ამერიკული „ჯენერალ მოტორსი“, რომელიც ათწლეულების განმავლობაში, თავად იყო ლიდერი, მაგრამ სამიოდ წლის წინ, მოწინავე პოზიცია „ტოიოტას“ ჩააბარა. გენერლებმა შარშან მათს ისტორიაში უმძიმესი კრიზისი (სახელმწიფოს დახმარებით) დაძლიეს და იაპონელ მეტოქეს ლამის შარშანვე გაასწრეს. შარშან ეს ვერ შეძლეს, მაგრამ ახლავე თითქმის გარანტირებულად შეიძლება იმის თქმა, რომ წელს „ტოიოტას“ აუცილებლად ჩამოიტოვებენ.

მიწისძვრამ და ცუნამიმ იაპონური ავტოინდუსტრია (ქვეყნის ეკონომიკის ერთ-ერთი ყველაზე მნიშვნელოვანი დარგი) ძლიერ აზარალა - კატასტროფებიდან ერთი თვის განმავლობაში, გაყიდვების კლებამ 62 პროცენტი შეადგინა. იაპონურ ავტოკომპანიებს შორის კი ყველაზე მეტად, სწორედ „ტოიოტა“ დაზხარალდა. მართალია, მისმა იაპონურმა საწარმოებმა მუშაობა უკვე განაახლა, თუმცა სრული დატვირთვით ისინი მხოლოდ ნოემბერში ამოქმედდებიან.

ახლახანს „ტოიოტამ“ გამოაცხადა, რომ მისი იაპონური საწარმოები ნორმალურ რეჟიმში ივლისში ამუშავდებიან. შემდეგი ერთი თვის განმავლობაში, კომპანია თავის ამერიკულ საწარმოებსაც აამოქმედებს. მაგრამ სრულფასოვნად მუშაობას ისინი მხოლოდ ნოემბერში თუ შეძლებენ...
„ტიმ ლოტუსის“ შეფმა „კატერჰემი“ შეიძინა

Lotus F1 boss buys Caterham

29 აპრილი

ფორმულა 1-ის გუნდ „ტიმ ლოტუსის“ მალაიზიელმა შეფმა ტონი ფერნანდესმა განაცხადა, რომ სპორტული ავტომობილების მწარმოებელი პატარა ბრიტანული კომპანია „კატერჰემი“ შეიძინა. ამ გარიგების შესახებ, ოფიციალური ინფორმაცია დაკსფორდის აეროდრომზე გამოქვეყნდა. ბრიტანული გამოცემა „ავტოქარი“ იუწყება, რომ გაერთიანების აღსანიშნავად, „კატერჰემმა“ გამოაცხადა, რომ „ტიმ ლოტუსის“ ფერებში (მწვანე ყვითელი ზოლით) გაწყობილ 25 ცალ „შევენს“ გამოუშვებს.

ფერნანდესი ამბობს, რომ ამიერიდან, მისი გუნდის მეშვეობით, მარკა „კატერჰემს“ მთელს მსოფლიოში გაუწევს რეკლამას და შესაბამისად, ამ ფირმის ავტომობილებსაც მსოფლიოში უფრო ცნობადს გახდის. თუმცა, ორი კომპანიის თანამშრომლობის გეგმა ჯერ არ არსებობს და ის მხოლოდ ბრიტანეთის დიდი პრიზის დღეებში, ივლისში გამოცხადდება.

იმ დროისთვის, უკვე დასრულებული უნდა იყოს სასამართლო გარჩევა „ტიმ ლოტუსსა“ და „ლოტუს რენოს“ შორის, რომლის მიზანიც, ფ1-ში სახელ „ლოტუსის“ გამოყენების უფლების ერთ-ერთი მხარისათვის მიკუთვნებაა. ცნობისათვის, ფერნანდესმა შარშან სახელი „ლოტუსი“ ფ1-ში დააბრუნა. მაგრამ შემდეგ, მალაიზიურმა საავტომობილო კომპანია „პროტონმა“, რომელსაც სპორტული ავტომობილების მწარმოებელი „ლოტუს ჯგუფი“ ეკუთვნის, „რენოსთან“ ერთად, ამ უკანასკნელის გუნდისთვის სახელის შეცვლა და „ლოტუსის“ დარქმევა გადაწყვიტეს.

„მე ბრენდების შემქმნელი ვარ. ვიღებ სავაჭრო მარკას და სტრუქტურულად ვაყალიბებ. ჩვენ „კატერჰემის“ უბრალო რეფორმირებას არ ვაპირებთ. ჩვენი მიზანი ამ მარკის მიზანმიმართული და ხანგრძლივი განვითარებაა. კლასიკური მოდელი „სევენი“ კი, ამ მარკის მთავარ ნაწილად დარჩება“, - ამბობს ფერნანდესი, ვინც „კატერჰემის“ საწარმოო პროგრამის გამრავალფეროვნებას და ახალ ბაზრებზე გაყვანას გეგმავს.

„კატერჰემი“ 1973 წელს შეიქმნა. მაშინვე მან „სევენის“ (შვიდი) წარმოება დაიწყო, ავტომობილისა, რომელიც პირველად (1957 წელს) ბაზარზე „ლოტუსის“ ლეგენდარულმა დამაარსებელმა, კოლინ ჩეპმენმა გამოიყვანა (ლოტუს სევენ). დღეს „კატერჰემი“ მესამე თაობის „სევენს“ უშვებს, რომელიც ბაზარზე პირველად 1969 წელს გამოჩნდა.

გერმანიაში ლიტრი ბენზინი 9.99 ევროს ფასად გაიყიდა

German Gas Station Charges €9.99 for a Liter or $55 for a gallon of Gasoline!

29 აპრილი

აღდგომის შემდგომ ორშაბათს, გერმანიის ქალაქ შტუტგარტის მახლობლად მდებარე პატარა ქალაქ ფილდერშტადტის ერთ-ერთმა ბენზინით გასამართმა სადგურმა, ლიტრი საწვავი რეკორდულ ფასად გაჰყიდა. „ესოს“ ქსელის სადგურის მფლობელის მიზანი, როდესაც მარკა „სუპერის“ ბენზინს ფასად 9.99 ევრო მიაწერა, ის იყო, რომ მომხმარებლებისთვის საწვავის შეძენა გადაეფიქრებინა. თურმე სადგურს საწვავი გამოლევაზე ჰქონდა და ფასიც ამიტომ გაზარდა...

რა თქმა უნდა, ფასი თვალსაჩინო ადგილზე გამოაკრეს, თუმცა ამით საქმეს მაინც ვერ უშველეს - რამდენიმე ავტომფლობელმა საწვავი მაინც ჩაასხა, მერე კი ეს სანანებლად გაუხდა. აბა რა იქნებოდა, როცა ჯერი ფულის გადახდაზე მიდგა. ერთ-ერთ მათგანს 21 ლიტრში 209.98 ევროს გადახდა მოსთხოვეს. შემდრგ იგივე დღეში მანდილოსანი ჩავარდა, რომელმაც ავზი 20 ლიტრით შეავსო და შემდეგღა გაიგო, რომ ამის საფასური თითქმის 200 ევრო იყო.

აღშფოთებულმა მყიდველებმა პოლიციას გამოუძახეს და ბენზინის საფასურის გადახდაზეც უარს ამბობდნენ. მაგრამ პოლიციამ მათ ურჩია, რომ უკეთესი იქნებოდა, თუ „ესოს“ სადგურს უჩივლებდნენ. საბოლოოდ, ავტომფლობელებმა თანხა გადაიხადეს, თუმცა იმ იმედით, რომ მომდევნო დღეს, „ესოს“ ხელმძღვანელობასთან რაიმე კომპრომისს მიაღწევდნენ.

სხვათა შორის, აღდგომის შემდგომ ორშაბათს, იმის გამო, რომ შტუტგარტის შემოგარენის გზებზე საცობები იყო. თანც, სააღდგომოდ, ქალაქში ავზიანი მანქანების გადაადგილებაც შეზღუდული იყო. მესამეც, ნავთობკომპანიები ეთანოლნარევი ბენზინის (E10 – 10 პროცენტი ეთანლით) გაყიდვას იწყებენ და „სუპერ“ მარკის ბენზინის მიწოდება შეუფერხდათ. ყოველივეს გამო, ქალაქსა და მის შემოგარენში, „ესოს“ რამდენიმე სადგურში საწვავის დეფიციტი წარმოიქმნა...

„ძაგატო TZ3 სტრადალე“ – „დოჯ ვაიპერი“ „ალფა რომეოს“ ფორმაში

Zagato TZ3 Stradale: A Dodge Viper ACR Dressed as an Alfa Romeo

29 აპრილი

ამ ეტაპზე ძნელი სათქმელია, ახალი „დოჯ ვაიპერი“ კონსტრუქციულად, „ალფა რომეოს“ შესაბამის მოდელზე დაფუძნდება, თუ „ფიატ-ის“ და „კრაისლერის“ შეფი სერჯო მარკიონე პოპულარული მასკლ ქარის გასაცოცხლებლად სხვა გზას გამონახავს. სანამ ეს ავტომობილი ბაზარზე დაბრუნდება და სანამ მის შესახებ არაფერია ცნობილი, იტალიურმა სადიზაინერო ატელიე „ძაგატომ“ კონცეპტუალური ავტომობილი შექმნა სახელად „TZ3 სტრადალე“, რომელიც გარეგნულად „ალფა რომეოა“, აგებულება კი სარბოლი „დოჯ ვაიპერ ACR-ის“ აქვს.

პრინციპში, „ძაგატო TZ3 სტრადალე“ სულაც არაა კონცეპტუალური. ის წარმოებისთვის მომზადებული ავტომობილია, თუმცა, ამას რომ ვამბობთ, სულაც არ იგულისხმება, რომ ატელიეს მისი სერიული წარმოება აქვს გადაწყვეტილი. პირიქით, ამ შესანიშნავ ავტომობილს თითზე ჩამოსათვლელი ადამიანები შეიძენენ. უფრო კონკრეტულად კი - 9.

„TZ3 სტრადალეს“ პლატფორმა და მექანიკური კვანძები სარბოლი „ვაიპერის“ აქვს. ეს მას პროპორციებზეც ეტყობა - ამერიკული სუპერ ავტომობილივით გრძელი კაპოტი და უკან დაწეული კაბინა აქვს. ამ გრძელი კაპოტის ქვეშ უზარმაზარი, 8.4-ლიტრიანი V10 ძრავი დგას, რომელიც 600 ცხენის ძალას გამოიმუშავებს. მასთან 6-საფეხურიანი მექანიკური კოლოფია შეწყვილებული. საკიდარი კი სარბოლია. სამაგიეროდ, ძარა მთლიანად „ძაგატოს“ შემოქმედბაა და ის „ალფა რომეოს“ კორპორატიულ სტილშია შესრულებული.

ეს მეორე ავტომობილია, რომელიც „ძაგატომ“ „ალფა რომეოს“ 100 წლის იუბილეს (1910-2010) მიუძღვნა. პირველი ასეთი ავტომობილია „ალფა რომეო 8C კომპეტიციონეს“ ბაზაზე დამზადბული „TZ3 კორსა“, რომელმაც შარშან ვილა დ’ესტეს ელეგანტურობის კონკურსი მოიგო.

სხვათა შორის, „TZ3 კორსა“ „ალფა რომეო ძაგატოს“ კოლექციონერ მარტინ კაპის შეკვეთით დამზადდა, „TZ3 სტრადალეს“ კი, როგორც უკვე ითქვა, ცხრა ცალს დაამზადებენ. მათგან პირველ სამ ეგზემპლარზე „ძაგატოს“ შეკვეთა უკვე მიღებული აქვს - პირველს „ალფა რომეოსა“ და „ძაგატოს“ ამერიკელი კოლექციონერი ერიკ კინგი მიიღებს. მეორე და მესამე ავტომობილები შესაბამისად, იაპონიასა და ევროპაში გაიყიდა.

რეპერმა „მაიბახ ექსელეროში“ 8 მილიონი დოლარი გადაიხადა

Rapper Birdman Buys $8M Maybach Exelero

29 აპრილი

ერთ-ერთი ყველაზე პოპულარული რეპერი და ხმის ჩამწერ კომპანია „ქეშ მანი რეკორდსის“ თანადამფუძნებელი ბირდმენი (ბრაიან უილიამსი) იმითაცაა ცნობილი, რომ რამდენიმე ძვირადღირებულ ავტომობილს ფლობს. მისი „მაიბახ ლანდოლე“ მილიონნახევარი დოლარი ღირს, წითელი „ბუგატი ვეირონი“ კი - 2 მილიონი. მაგრამ როგორც ჩანს, ეს საკმარისი არ იყო და ბირდმენმა თავის თავსაც აჯობა...

მისი ახალი სათამაშო, კონცეპტუალური „მაიბახ ექსელეროა“, რომელშიც რეპერმა 8 მილიონი დოლარი გადაიხარა. ეს ავტომობილი, რომელიც მხოლოდ ერთ ეგზემპლარად არსებობს, შავადაა შეღებილი, თუმცა ბირდმენი მას ალბათ მის საყვარელ ფერში - წითელში გამოაწყობს.

„ექსელერო“ ორკარიანი კუპეა, რომელსაც არც ელეგანტურობა აკლია და არც უმაღლესი კლასის ლიმუზინისთვის დამახასიათებელი კომფორტი. და, რაც ასევე მნიშვნელოვანია, ის მძლავრი ძრავითაა აღჭურვილი. სხვათა შორის, ეს კონცეპტუალური ავტომობილი, საბურავების მწარმოებელ გერმანულ კომპანია „ფულდას“ შეკვეთით დამზადდა. „ფულდას“ ის თავისი სპორტული საბურავების (315/25 ZR 23) სადემონსტრაციო ავტომობილი სჭირდებოდა და ასეთი „მაიბახის“ სპეციალისტებმა შეიმუშავეს. ეს საბურავები იმითაა გამორჩეული, რომ მათ 350 კმ/სთ-ზე მეტი სიჩქარისთვის აქვთ ლიცენზია.

„ექსელერო“ ზორბა ტანის ავტომობილია, თუმცა მის სალონში მხოლოდ ორი სავარძელია. ავტომობილი აღჭურვილია V12 წყვილ ტურბოკომპრესორიანი ძრავით, რომელიც 700 ცხენის ძალას (5 000 ბრ/წთ-ზე) და 1 020 ნიუტონმეტრს (2 500 ბრ/წთ-ზე) გამოიმუშავებს. მისი დახმარებით, ავტომობილი ადგილიდან 100 კმ/სთ-ის აკრეფას 4.4 წამში ასწრებს, მისი მაქსიმალური სიჩქარე კი 351 კმ/სთ-ია.

„ამ ავტომობილში, რომლის შეძენაც ძალიან მინდოდა, მათ 8 მილიონი მოითხოვეს და მეც ამ თანხის გადახდა მომიწევს“, - არცთუ დიდი ხნის წინ, ერთ-ერთი ინტერვიუსას განცხადა რეპერმა, რომელსაც „ფორბსის“ მონაცემებით, 100 მილიონ დოლარად შეფასებული ქონება აქვს. ამგვარად, პაფ დიდის, ჯეი-ზის და დოქტორ დრის შემდეგ, ის მეოთხე უმდიდრესი რეპერია.

Thursday, April 28, 2011

„სეატი“ „აუდი Q3-ის“ თავის ვერსიას გამოუშვებს

Seat Rumored to Start Production of Audi Q3-based SUV

28 აპრილი

როდესაც „აუდიმ“ გამოაცხადა, რომ თავის უახლეს უგზოობის მოდელ Q3-ს ესპანურ კომპანია „სეატის“ (ორივე კომპანია ფოლკსვაგენის ჯგუფში შედის) მარტორელის ქარხანაში გამოუშვებდა, ბევრი გაოცებული დარჩა. თუმცა, მალე გაოცების საფუძველიც გაორკვა - ამავე ქარხანაში, „სეატი“ თავის უგზოობის კომპაქტურ ავტომობილს გამოუშვებს, დაახლოებით ისეთს, როგორიც კონცეპტუალურ ქროსოვერ IBX-ის სახით, ჟენევის ავტო შოუზე გვიჩვენა.

ბრიტანულმა საავტომობილო გამოცემა „ვოთ ქარ-მა“ ესპანურ კომპანიაში მოიპოვა წყარო, რომელმაც ამცნო, რომ „სეატის“ ქროსოვერიც Q3-ის პლატფორმაზე აიგება. რა თქმა უნდა, მათ განსხვავეული დიზაინი ექნებათ. იმავე წყაროს საშუალებით, ასევე ცნობილი გახდა, რომ IBX-ის სერიულ ვერსიას „სეატი“ მერმისს გვიჩვენებს.

IBX მხოლოდ მეორე უგზოობის კონცეპტუალური ავტომობილია, რომელიც „სეატმა“ გვიჩვენა. ესპანურმა კომპანიამ პირველი ქროსოვერი, სახელად „ტრიბუ“, ფრანკფურტის შოუზე, 2007 წელს გამოფინა. მაშინ ყველა ელოდა, რომ „ტრიბუ“ კონვეიერამდე მიაღწევდა, თუმცა ეკონომიკური კრიზისის გამო, პროექტი შეჩერდა. მაგრამ გავიდა დრო და „სეატი“ თავის ისტორიაში პირველი ქროსოვერის წარმოების დაწყებას კიდევ უფრო მიუახლოვდა, რაშის მას ის ფაქტორი ეხმარება, რომ „ფოლკსვაგენის“ დიდი ოჯახის წევრია.

სერიული ავტომობილი IBX-ვით სამკარიანი არ იქნება და აღჭურვილობაშიც ტრადიციულ შიდაწვის ძრავებს მიიღებს და არა ელექტრულ აგრეგატს, რომელიც კონცეპტუალურ მოდელზე ეყენა. სხვათა შორის, IBX-ის ელექტრული აღჭურვილობა მხოლოდ საჩვენებელი იყო და მხოლოდ თანამედროვე ავტოინდუსტრიის „მწვანე“ ტრენდისთვის გაღებულ ერთგვარ ხარკს წარმოადგენდა. სხვანაირად ვერც ითქმის, რადგან აკუმულატორების ბლოკი მას მხოლოდ 45 კილომეტრის გავლის საშუალებას აძლევს.

სერიული ავტომობილი, ბენზინის (TSI) და დიზელის (TDI) აგრეგატებით აღიჭურვება და მას ოთხივე, ან მხოლოდ წინა წამყვანი ბორბლები ექნება. ძრავებსაც და ტრანსმისიასაც, ესპანური ავტომობილი, გერმანელი ნათესავისგან მიიღებს.

დაკიდევ, კონცეპტუალური IBX-ის გაბარიტებია: სიგრძე 4.26 მეტრი, სიგანე 1.80 მეტრი, სიმაღლე - 1.62 მეტრი. ყველა ამ პარამეტრით, ის ახლოსაა Q3-თან, თუმცა მასზე ოდნავ პატარაა.

Wednesday, April 27, 2011

„კადილაკს“ უმაღლეს ლიგაში დაბრუნება ჯერაც სურს

Cadillac still wants a big rear-drive sedan to battle the import flagships

27 აპრილი

თავისი არსებობის დასაწყისში, ამერიკულმა კომპანია „კადილაკმა“, რომელიც „ჯენერალ მოტორსის“ ლუქს ბრენდია, სახელი ძვირფასი ავტომობილების წარმოებით გაითქვა. მისი მარკით დამშვენებულ ავტომობილებს, ხშირად სახმელეთო იახტებადაც მოიხსენიებდნენ. მაგრამ შემდეგ, გენერლებმა მისი პროგრამა შეცვალეს და „კადილაკმაც“ უმაღლესი ლიგა დატოვა - უმაღლესი კლასის სედანების წარმოებას შეეშვა.
2003 წლის დტროიტის საავტომობილო შოუზე, „კადილაკმა“ კონცეპტუალური სუპერ სედანი „სიქსთინ“ (ფოტოზე) წარმოადგინა, რომლის შემდეგაც, ყველა იმაზე ალაპარაკდა, რომ ამ მარკას მალე ახალი ფლაგმანი გამოუჩნდებოდა. ეს ავტომობილი აღჭურვილი იყო 13.6-ლიტრიანი V16 აგრეგატით, რომელიც ორი V8 არქიტექტურის მქონე ძრავის მექანიკური შერწყმის გზით დამზადდა.
რა თქმა უნდა, ამ აგრეგატით ავტომობილს კონვეიერზე არავინ დააყენებდა. თუმცა „კადილაკისგან“ მაინც ყველა რაღაც განსაკუთრებულს, სახმელეთო იახტის მსგავს მორიგ შედევრს ელოდა, რომლიტაც ამერიკული კომპანია გერმანულ ლუქსებს საკადრის პასუხს გასცემდა. მაგრამ დაბრუნება არ შედგა.

და აი, ინტერნტით კვლავ გავრცელდა ინფორმაცია იმის შესახებ, რომ „კადილაკს“ უმაღლეს ლიგაში დაბრუნება ჯერაც არ გადაუფიქრებია. ლაპარაკია იმაზეც, რომ ახალი ფლაგმანისთვის სპეციალური პლატფორმა (ომეგა) დამზადდება, რომელსაც მომავალში დააგრძელებენ და მის ბაზაზე სუპერ ლუქსის კლასის ავტომობილსაც დაამზადებენ, რომელიც კონკურენციას „როლს როისს“, „ბენტლის“, „მაიბახსა“ და „ბუგატის“ (რომლის სუპერ სედანიც ჯერ არ გამოსულა) გაუწევს.

„ვოლვო“ ლუქსის კლასისთვის მზად არაა

Volvo backtracks on flagship sedan plans

27 აპრილი

მიუხედავად იმისა, რომ დღეს ავტოინდუსტრიაში ყველაზე მეტად პატარა, ეკონომიური ავტომობილები ფასობს, ბაზარზე არც ლუქსის კლასის ავტომობილების გაყიდვების კლება შეინიშნება. პირიქით, ბაზრის ეს სეგმენტიც სწრაფი ტემპით იზრდება, რაც ავტომწარმოებლებს მასზე ფეხის მოკიდებისკენ, ხან კი პირველი ნაბიჯის გადადგმისკენ უბიძგებს.

რა თქმა უნდა, ლუქსის სეგმენტში გერმანული კომპანიები ლიდერობენ. „მერსედეს ბენცის“ S-კლასზე, „ბეემვეს“ მე-7 სერიასა და „აუდის“ A8-ზე მოთხოვნები სტაბილურად მატულობს. პოპულარულია „ლექსუსის“ LS-იც. გაცილებით ნაკლები იყიდება „იაგუარის“ XJ, „მაზერატი კვატროპორტე“, „ჰიუნდაი ეკუსი“ და „ფოლკსვაგენ ფაეტონი“. უმაღლეს ეშელონებში დაბრუნებას ცდლობს „კადილაკი“.

წლების განმავლობაში, ბევრი მოელოდა, რომ ლუსქურ სედანს „ვოლვოც“ გამოუშვებდა. თუმცა, კარგა ხანს, შვედურ კომპანიას ამისთვის არ ეცალა - კრიზისს ებრძოდა. ახლა კი, ჩინური „ჯილის“ ხელში გადავიდა და თითქოს, გამოცოცხლების დრო დადგა. ამაზე თითქოს შანჰაის ავტო შოუზე გამოფენილი კონცეპტუალური ექსპონატი, სახელად „იუნივერსი“ (ფოტოზე) მიუთითებდა. თუმცა, როგორც ირკვევა, უმაღლეს ლიგაში „ვოლვოს“ გამოჩენა ჯერ მოსალოდნელი არაა.

შანჰაიში „ვოლვოს“ მთავარმა აღმასრულებელმა სტეფან ჯეკობიმ განაცხადა, რომ მისი კომპანიისთვის, ამ ეტაპზე უფრო პრიორიტეტული, ახლანდელ სამოდელო გამაზე კონცენტრირებაა და არა ახალი, ძვირადღირებული პროგრამის წამოწყება, რომელიც შესაძლოა, წარმატებული არც იყოს.

და რა მიზნით გამოიტანს შანჰაიში კონცეპტუალური „იუნივერსი“? არაა გამორიცხული, რომ ეს შვედური კომპანიის ახალი კორპორატიული სტილის პირველი მერცხალი იყოს...

Tuesday, April 26, 2011

როლს როისმა ჩინელებს დაგრძელებული გოსტი უჩვენა

Rolls-Royce Ghost gets on the Procrustean Bed: LWB Model Revealed in Shanghai

26 აპრილი

შანჰაის საავტომობილო შოუზე შედგა „როლს როისის „პატარა“ მოდელ გოსტის გრძელბაზიანი ვერსიის პრემიერა, ავტომობილისა, რომელზეც ინგლისური კომპანია ჩინეთის ბაზარზე დიდ იმედებს ამყარებს. მის წარმოებას როლსი წელსვე დაიწყებს და მას საბაზო გოსტზე დაახლოებით 20 პროცენტით ძვირად გაჰყიდის. სხვათა შორის, როლს როისის ისტორიაში, ეს პირველი ავტომობილია, რომლის პრემიერაც აზიაში ჩატარდა.

მწარმოებლის განცხადებით, ესაა ავტომობილი, რომელიც „იმ მყიდველისთვისაა განკუთვნილი, რომელსაც ფართე და კომფორტული ავტომობილი სჭირდება, თუმცა არც საბაზო გოსტის დინამიზმის უნიკალური ბალანსი და ზომიერება ეთმობა“. ამ ავტომობილს წელს შეზღუდული რაოდენობით დაამზადებენ, მერმისიდან კი მისი წარმოება სრული ტემპით დაიწყება.

გრძელბაზიანი ვერსიის ბორბლებს შორის ბაზა 170 მილიმეტრით დაგრძელდა, რისი წყალობითაც, უკანა სავარძლებზე მჯდარ მგზავრთა ფეხებისთვის ადგილი მნიშვნელოვნადაა გაზრდილი. გარდა ამისა, ავტომობილს პანორამული გამჭვირვალე სახურავიც აქვს. საერთო ჯამში, გრძელიგოსტის სიგრძემ 5.40 მეტრს მიაღწია და ამგვარად, ის მოკლებაზიანი ფანტომისას დაუახლოვდა. ვიზუალურად, დაგრძელება უფრო დიდი ზომის უკანა კარებს დაეტყო.

კაპოტქვეშ ისევ 6.6-ლიტრიანი V12 ტურბოძრავია განლაგებული, რომელიც სტანდარტულ გოსტზე და რომელიც 570 ცხენის ძალას და 780 ნიუტონმეტრს იძლევა. ამასთან, მაბრუნი მომენტის მაქსიმუმს, ეს აგრეგატი მუხლა ლილვის სულ რაღაც, 1 500 ბრ/წთ-ზე ავითარებს. როლს როისის მონაცემებით, დაგრძელებულ გოსტს ადგილიდან 100 კმ/სთ-ის აკრეფა 5 წამში შეუძლია.

გრძელბაზიანი გოსტი საზრიან საკიდარზე დგას, რომელიც ოთხივე ბორბალს დამოუკიდებლად აკონტროლებს და მუდმივად ახერხებს მართვადობასა და კომფორტს შორის ბალანსის დაცვას. საკიდარის ელექტრონულ სისტემას მრავალი სენსორი ემსახურება, რომლებიც საგზაო პირობებს, გადაადგილების სიჩქარეს და სხვა პარამეტრებს აკონტროლებენ.

ეს ავტომობილი, პირველ რიგში, აღმოსავლეთ აზიის ქვეყნებისთვისაა განკუთვნილი, სადაც გრძელბაზიან ავტომობილებზე დიდი მოთხოვნაა. განსაკუთრებული აქცენტი კი ჩინეთზე კეთდება, რომელიც უკვე მსოფლიოს უდიდესი საავტომობილო ბაზარია და სადაც თითქმის ყველა დიდ ავტოკომპანიას უფრო მეტი ავტომობილი ეყიდება, ვიდრე შინაურ ბაზარზე. ჩინეთში დაგრძელებული გოსტი 5.118 მილიონი იუანი „ეღირება, რაც 548 000 ევროსა და 784 000 დოლარის ტოლფასია.

„მაკლარენი“ მომავალში ელექტრულ ავტომობილსაც გამოუშვებს

McLaren Plans Battery-Based Model for the Future

26 აპრილი

„მაკლარენს“ თავის უახლეს სუპერ ავტომობილ MP4-12C-ს მიწოდება ჯერ არ დაუწყია, თუმცა აცხადებს, რომ ყოველწლიურად, ბაზარზე თითო ახალ ავტომობილს გამოუშვებს. უფრო მეტიც, იგეგმება ისეთი ავტომობილის გამოშვებაც, რომელიც მთლიანად, ან ნაწილობრივ, აკუმულატორებში დაგროვილი ენერგიით იმუშავებს.

ამ ნაბიჯისკენ კი ინგლისურ კომპანიას საწვავის ეკონომიის და გამონაბოლქვის ახალი, გამკაცრებული სტანდარტები უბიძგებს, რომელთა მოთხოვნითაც, ავტომწარმოებელს ევალება, რომ მის მიერ წარმოებული ავტომობილების გასაშუალებული მონაცემები ამ სტანდარტებს შეესაბამებოდეს.

„მაკლარენის“ მმართველ დირექტორ ენტონი შერიფის განცხადეით, მისი კომპანია მომავალშიც მხოლოდ ორადგილიან სუპერ ავტომობილებს გამოუშვებს და მათი წარმოებისას, უხვად გამოიყენებს ფორმულა ერთში შემუშავებულ ტექნოლოგიებს. ამ ტექნოლოგიათაგან ერთ-ერთი გამორჩეული, კარბონის კომპოზიტისგან შასის ცალკეული ელემენტების და მთლიანად, მონოკოკური შასის წარმოებაა, რაშიც უოკინგელებს უკვე 30-წლიანი გამოცდილება დაუგროვდათ.

შერიფის თქმით, MP4-12C-ს ისეთი ტემპერამენტი აქვს, რომ აჩქარებისას, „სახეზე კანს გაგაძრობთ“. ასეთი შედარება გასაკვირი არ იქნება, თუ გავითვალისწინებთ, რომ ავტომობლი აღჭურვილია საკუთარი წარმოების 3.8-ლიტრიანი V8, წყვილტურბოიანი ძრავით, რომელიც 600 ცხენის ძალას იძლევა.

შერიფს კარგად ესმის, რომ მისი კომპანიის ავტომობილების ეკონომიურობისა და გამონაბოლქვის ახალი სტანდარტების ჩარჩოში მოქცევა ძალიან ძნელი იქნება. თუმცა დასძენს, რომ ისეთი მცირე ზომის კომპანიები, როგორიც „მაკლარენია“, ამ მხრივ, მცირე შეღავათებით ისარგებლებენ. და მაინც, ინგლისური კომპანია უკვე მუშაობს იმაზე, რომ მისმა ავტომობილებმა გარემო ნაკლებად დააბინძუროს.

ავტომობილების ეკონომიურობის გასაუმჯობესებლად საუკეთესო გზა, ავტომობილების წონის შემცირება და ტურბოკომპრესორიანი ძრავების შემუშავება-დახვეწაა. პარალელურად, აუცილებელი იქნება ჰიბრიდული და ელექტრული ტექნოლოგიების დანერგვა.

„ახალ კანონს არ აღვიქვამთ, როგორც საშიშროებას. ის ჩვენთვის უფრო გამოწვევაა, რომელსაც სიამოვნებით მივიღებთ და ენთუზიაზმით მოვეკიდებით“, - დასძენს შერიფი.

ელექტრომობილებმა შეჯახებაზე გამოცდები ჩააბარეს

Chevrolet Volt and Nissan Leaf Score Top Ratings in IIHS Crash Test

26 აპრილი

აშშ-ის ავტომაგისტრალებზე უსაფრთხოების სადაზღვევო ინსტიტუტმა (IIHS), ორ ელექტრომობილს - „ნისან ლიფს“ და „შევროლე ვოლტს“ შეჯახებაზე ტესტები (ქრეშ ტესტები) ჩაუტარა, რომლის შედეგადაც, ორივე ავტომობილმა, წინიდან, გვერდიდან და უკნიდან შეჯახებისას, ასევე გადაყირავებისას, დაცულობის საუკეთესო უნარი გამოავლინა.
ყველანაირი ტესტის დროს, ორივე ავტომობილმა მაქსიმალური შეფასება - 4 ქულა დაიმსახურა. ამასთან, ორივე ავტომობილის საბაზო კომპლექტაციაში შედის სტაბილიზაციის სისტემა, რაც უმაღლესი შეფასებისთვის აუცილებელი პირობაა. ტესტებმა ასევე გამოავლინა, რომ ორივე ავტომობილი უსაფრთხოების სისტემებით იმავე დონეზეა აღჭურვილი, როგორც ჩვეულებრივი, შიდაწვისძრავიანი ავტომობილები.
„ამ ორ ავტომობილის ბორბლებს განსხვავებული აგრეგატები ამოძრავებს, თუმცა „ვოლტისა“ და „ლიფის“ უსაფრთხოება იმავე დონეზეა, რომელზეც ჩვეულებრივ ავტომობილებზე, რომლებიც ჩვენგან უმაღლეს შეფასებებს იმსახურებს“, - ამბობს ინსტიტუტის უფროსი ადმინისტრატორი ჯოი ნოლენი.
„შევროლე ვოლტი“ სუფთა ელექტრომობილი არაა და მას პლაგ-ინ ჰიბრიდების კლასს მიაკუთვნებენ, რადგან ამ ავტომობილს, ელექტროძრავის გარდა, შიდაწვის ძრავიც ემსახურება. ოღონდ, წამყვანი მაინც ელექტროძრავია, შიდაწვისა კი ელექტროენერგიის გამომუშავებას ემსახურება. მისგან განსხვავებით, სუფთა ელექტრომობილია „ნისან ლიფი“, რომელიც მხოლოდ ლითიუმ-იონურ აკუმულატორებში დაგროვილი ენერგიით გადაადგილდება. და თუ „ლიფის“ სვლის სიშორე მართვის სტილზეა დამოკიდებული, „ვოლტს“ ერთი სრული გაწყობით (სავსე ავზით და სრულად დამუხტული აკუმულატორებით) დაახლოებით 1 600 კილომეტრის გავლა შეუძლია.
ნოლენი ხაზს უსვამს, რომ ელექტრომობილებსაც და ჰიბრიდებსაც უსაფრთხოებაზე შემოწმება ზუსტად იმავე მეთოდოლოგიით უტარდებათ, როგორითაც ჩვეულებრივ ავტომობილებს. მთავარი ისაა, რომ სტანდარტით დადგენილი სიჩქარით შეჯახებისას, სალონში მყოფთა უსაფრთხოება დაცული იყოს. უსაფრთხოების ღვედებმა და აირბალიშებმა ადამიანები სალონში არსებულ საგნებთან ძლიერი შეჯახებისგან უნდა დაიცვას.

პირისპირ შეჯახების ტესტი მანქანის 65 კმ/სთ სიჩქარით მოძრაობისას ტარდება. გვერდითა შეჯახების ტესტის სიჩქარე 50 კმ/სთ-ია. ამასთან, გამოსაცდელ მანქანას პიკაპი, ან უგზოობის მძიმე მოდელი ეჯახება. უკნიდან დაჯახების ტესტისას, გაჩერებულ საცდელ ავტომობილს, სპეციალური მოძრავი ბლოკი, 32 კმ/სთ სიჩქარით ეჯახება. გადაყირავებაზე ტესტიც სპეციალური ბლოკით ტარდება, რომელიც საცდელ ეგზემპლარზე რამდენჯერმე მეტს იწონის და მას სახურავზე გარკვეული წნევით აწვება...

ელექტრომობილი პაიკს პიკს შეუტევს

Unmodified Nissan Leaf entered in Pikes Peak Hill Climb

26 აპრილი

ელექტრომობილი „ნისან ლიფი“, რომელმაც ევროპისა და მსოფლიოს წლის საუკეთესო ავტომობილის წოდებები მიიღო, ლეგენდარულ ამერიკულ რბოლაში - პაიკს პიკზე ასვლაში მიიღებს მონაწილეობას. ოღონდ, სამთო რბოლის მონაწილეთაგან განსხვავებით, ის ყოველგვარი მოდიფიკაციის გარეშე დადგება სტარტზე.

როგორც წესი, პაიკს პიკის მონაწილე მანქანები რადიკალურადაა ხოლმე შეცვლილი. იმდენად, რომ საბაზო ვერსიასთან საერთო პრაქტიკულად არაფერი აქვთ ხოლმე. თუმცა, ეს იმისათვის კეთდება, რომ რბოლისას მაქსიმალურად უკეთესი შედეგი დააფიქსირონ. „ნისან ლიფის“ შემთხვევაში კი, მთავარი მიღწევა, უმძიმეს რბოლაში მონაწილეობა იქნება.

პაიკს პიკზე ელექტრომობილის საჭეს მსგავს რბოლებში გამოცდილი პილოტი, ჩად ჰორდი მიუჯდება, რომელიც ამერიკაში მეტად პოპულარულ სერია TORC-ში (პიკაპის კლასის ავტომობილებით ქროსი) მონაწილეობს.

ცნობისათვის, ელექტრომობილი „ნისან ლიფი“ 109-ცხენისძალიანი ელექტროძრავითაა აღჭურვილი, რომელიც ენერგიას ლითიუმ-იონური ელემენტების ბლოკისგან ღებულობს. მათი ტევადობა საკმარისია იმისათვის, რომ ავტომობილმა ერთი სრული დამუხტვით, 160 კილომეტრი გაიაროს, მისი მაქსიმალური სიჩქარე კი 145 კმ/სთ-ია.

სხვათა შორის, „ნისან ლიფი“ ერთადერთი ელექტრომობილი არაა, რომელსაც პაიკს პიკის ურთულესი აღმართი აუვლია. ელექტრული ძრავით აღჭურვილი ავტომობილები ამ რბოლაში ბოლო წლებში მუდმივად ასპარეზობენ. შარშან ბაგის ტიპის 268-ცხენისძალიანი ელექტროპროტოტიპით, იაპონელმა უკიო ჰანავამ 20-კილომეტრიანი დისტანცია 13 წუთსა და 17.575 წამში გაიარა. ეს კი წინა წლის მაჩვენებელზე დაახლოებით 93 წამით, ელექტრომობილების წინა რეკორდზე კი (რომელიც 2003 წელს ჯერი ანსერმა დაამყარა) 65 წამით უკეთესი შედეგია.

პაიკს პიკის რბოლა მეორე უძველესია ამერიკაში (მასზე ძველი მხოლოდ ინდი 500-ია). ის პირველად 1916 წელს ჩატარდა. რბოლის დისტანცია 19.99 კილომეტრია, სტარტსა და ფინიშს შორის სიმაღლეთა სხვაობა 1 423 მეტრს აღწევს. სულ კი 156 მოსახვევია გასავლელი.

ბოლო წლებში, პაიკს პიკზე ბადალი არ ჰყავს იაპონელ ნობუჰირო ტაძიმას, ვინც რბოლას სულ სხვადასხვა მარკის ავტომობილებით იგებს. შარშან მან ეს „სუძუკის“ წარმოების პროტოტიპით შეძლო და დისტანცია 10 წუთსა და 11.490 წამში გაიარა. მეორე შედეგი, საკუთარი ფორმულით მოასპარეზე პოლ დალენბახს ჰქონდა, მესამეზე კი „ჰიუნდაის“ პროტოტიპით მოასპარეზე რის მილენი გავიდა.

Monday, April 25, 2011

სახალხო „ფოლკსვაგენ ხოჭო“ სპორტული გახდა

2012 Volkswagen Beetle: All-New Bug Grows up

25 აპრილი

ამ მანქანაზე სახალხოს თქმა მას შემდეგ აღარ შეიძლება, რაც გერმანულმა კომპანიამ მისი მეორე თაობის ვერსია გამოუშვა. ვოლფსბურგელებს პირველად 60 წელი დასჭირდათ იმისათვის, რომ „ახალი ხოჭო“ გამოეშვათ. ახლა კი ის 13 წელიწადში შეცვალეს (სხვათა შორის, თუ პირველი ხოჭო 21.5 მილიონი ცალი გაიყიდა, მეორეს მილიონზე ოდნავ მეტი მყიდველი გამოუჩნდა). რა თქმა უნდა, თანამედროვე ავტომობილების სიცოცხლის ხანგრძლივობა ამაზე გაცილებით მცირეა და ამ ავტომობილის შემცვლელსაც, ავტოსამყარო უკვე რამდენიმე წელია, ელის.

მოლოდინი მას შემდეგ გაძლიერდა, რაც ექვსი წლის წინ, „ფოლკსვაგენმა“ კონცეპტუალური „რაგსტერი“ გვიჩვენა. ეს ავტომობილი აგრესიული, სპორტული გარეგნობით გამოირჩეოდა და მაშინ ბევრმა ივარაუდა, რომ შემდეგი „ხოჭო“ სწორედ სპორტული იქნებოდა. სხვათა შორის, მარკეტოლოგები ალბათ სამართლიანად მიიჩნევდნენ, რომ „ხოჭოს“ გასპორტულება უფრო გამოადგებოდა, ვიდრე სინაზე, რის გამოც, მას ხშირად „ქალების ავტომობილადაც“ მოიხსენიებენ. ამან კი ძლიერი სქესის ავტომოყვარულთა შორის, მას ღირსება შეულახა. შესაბამისად, „ახალი ხოჭო“ დიდი პოპულარობით ვერ სარგებლობდა.

და აი, შანჰაისა და ნიუ იორკის საავტომობილო შოუებზე, ასევე ქალაქ ბერლინში მოწყობილ სპეციალურ პრესკონფერენციაზე, გერმანულმა გიგანტმა კიდევ ერთი ახალი „ხოჭო“ წარმოადგინა, ამჯერად სერიული წარმოებისთვის გამზადებული. ოღონდ, მას სახელში სიტყვა „ახალი“ ჩამოაშორა. მიმომხილველთა მოლოდინი გამართლდა - ახალი ავტომობილი გარეგნულად გაცილებით სჯობს წინას. მას დაბალი სახურავი აქვს ყოველგვარი დაქანების გარეშე. ამის წყალობით, მის უკანა სავარძელზე მსხდომთა თავებისთვის, ადგილი საგრძნობლადაა გაზრდილი. სპორტულობასვე ხაზს უსვამს დაბერილი საბორბლე თაღები და მსხვილი უკანა საყრდენი. ასევე, ამ თაღებში ჩამჯდარი უზარმაზარი, 19-დუიმიანი ბორბლები.

მოკლედ და კონკრეტულად, ამ ავტომობილის გარეგნობის დახასიათება ასე შეიძლება: უფრო დიდი, ზრდასრული და უნისექსუალური. სწორედ რომ უნისექსუალური - „ფოლკსვაგენის“ მთავარ დიზაინერ ვალტერ და სილვას მთავარი მოთხოვნა გუნდისადმი, რომელიც ამ ავტომობილის სტილზე მუშაობდა, სწორედ ეს იყო. ახალი ავტომობილი მიმზიდველი უნდა ყოფილიყო ორივე სქესის მყიდველისთვის. ასე იქნება თუ არა, ამას მომავალი გვიჩვენებს, როდესაც სტატისტიკოსები გაყიდვებს ყველა რაკურსით განიხილავენ.

სადადაა გაწყობილი ინტერიერი, სადაც სპორტულობის კვალს პრაქტიკულად ვერ აღმოაჩენთ - ასეთად კარბონის კომპოზიტისგან დამზადებული ცალკეული უმნიშვნელო დეტალები არ გამოდგება. აქ ვეღარ ნახავთ უზარმაზარ წინა პანელს, რომელიც წინა მოდელზე მკვეთრად დახრილ საქარე შუშას ბოლომდე „მიჰყვებოდა“. უბრალო სავარძლები, საჭის სამწკირიანი რგოლი და „ფოლკსვაგენის“ და „აუდის“ მოდელებისგან მიღებული სხვადასხვა დეტალები და მაჩვენებლები - მთელი ეს მოკაზმულობა, მანქანის გარეგნობას არ შეეფერება. თუმცა, ეს აუცილებელი არცაა. მთავარია, რომ სალონში ყველაფერი ფუნქციურობასაა დაქვემდებარებული.

ავტომობილის გაბარიტებია: სიგრძე 4 278 მილიმეტრი, სიგანე 1 808 მილიმეტრი, სიმაღლე 1 486 მილიმეტრი და ბორბლებს შორის ბაზა - 2 537 მილიმეტრი. სიმაღლის გარდა, ყველა პარამეტრით, მესამე თაობის „ხოჭო“ წინამორბედზე დიდია (შესაბამისად,152 და 84 მილიმეტრიტ). ასევე გაზრდილია როგორც ბაზა, ასევე წინა და უკანა ბორბლების კვლების სიგანე, რისი წყალობითაც, ინტერიერის მოცულობაც გაიზარდა. 209-დან 310 ლიტრამდე არის გაზრდილი საბარგულის მოცულობა.

წინამორბედის დარად, ახალ ავტომობილზეც ძრავი წინაა განლაგებული და მას მოძრაობაში წინა ბორბლები მოჰყავს. რაც შეეხება ძრავებს, აქ არჩევანი დიდია. მყიდველს ბენზინის და დიზელის აგრეგატების ფართო არჩევანს შესთავაზებენ. ამასთან, შეთავაზებული აგრეგატების ტიპი, კონკრეტული ბაზრის მყიდველთა თავისებურებაზეა დამოკიდებული.

მაგალითად, ამერიკელ მყიდველს ბენზინის (TSI) და დიზელის (TDI) 2.0-ლიტრიან აგრეგატებს შესთავაზებენ. ამასთან, ორივეს ტურბოკომპრესორი ემსახურება. პირველი აგრეგატის სიმძლავრე 200 ცხენის ძალა, მეორისა კი 140 ცხენის ძალაა. სამაგიეროდ, დიზელს მაგისტრალზე მოძრაობისას, 6.0 ლიტრზე ნაკლები საწვავი ჰყოფნის, ქალაქში კი ხარჯი 7.0 ლიტრზე მეტია. გაცილებით უარესი ეკონომიურობით გამოირჩევა ბენზონის ძრავი. ორივე აგრეგატთან შესაწყვილებლად, 6-საფეხურიანი მექანიკური და ავტომატური კოლოფებია განკუთვნილი.

ყველაზე დიდლიტრაჟიანი, თუმცაღა საკმაოდ მოძველებულია 2.5-ლიტრიანი ხუთცილინდრიანი ატმოსფერული ძრავი, რომელიც მხოლოდ 170 ცხენის ძალას იძლევა და არც შესაშური ეკონომიურობით გამოირჩევა. ბენზინის აგრეგატებს შორის ასევე გვხვდება 1.2-ლიტრიანი TSI 105 ცხენის ძალით, 1.4-ლიტრიანი TSI 160 ცხენის ძალით და 2.0-ლიტრიანი TSI 200 ცხენის ძალით. დიზელის აგრეგატების გამაში კი ორლიტრიანის გარდა, ორი 1.6-ლიტრიანი აგრეგატიც შედის, რომელთა სიმძლავრეც 105 და 140 ცხენის ძალაა.

„ფოლკსვაგენის“ განცხადებით, ყველაზე ეკონომიურად საწვავს ის „ხოჭო“ მოიხმარს, რომელიც დიზელის 1.6-ლიტრიანი, 105-ცხენისძალიანი აგრეგატით, სისტემა სტოპ/სტარტით და კინეტიკური ენერგიის რეგენერაციის სისტემითაა აღჭურვილი. ასეთი „ხოჭო“ ას კილომეტრს (კომბინირებული რეჟიმით მოძრაობისას) 4.3 ლიტრი საწვავით გაივლის, ყოველ კილომეტრზე კი გარემოს მხოლოდ 112 გრამი ნახშირორჟანგით დააბინძურებს.

ევროპასა და ჩრდილოეთ ამერიკაში, მესამე თაობის „ხოჭოზე“ შეკვეთების მიღებას ვოლფსბურგელები ფრანკფურტის ავტო შოუს შემდეგ დაიწყებენ, თუმცა მათ მიწოდებას მომავალი წლიდან შეუდგებიან. ჯერჯერობით უცნობია ახალი ავტომობილის ღირებულება, თუმცა სავარაუდოდ, ის „ფოლკსვაგენ შიროკოზე“ 20-30 პროცენტით ძვირი ეღირება.

„შევროლე ვოლტი“ ერთი სავსე ავზით 1 600 კილომეტრს გადის

Chevrolet Volt Could Reach 1,000 Miles

25 აპრილი

„ჯენერალ მოტორსმა“ გამოაცხადა, რომ მის მიერ გამოშვებულ, სვლის გაზრდილი სიშორის მქონე პლაგ-ინ ჰიბრიდ „შევროლე ვოლტს“, აკუმულატორების ერთი სრული დამუხტვით და ერთი სავსე ავზით, 1 600 კილომეტრის გავლა შეუძლია. ამერიკულმა კომპანიამ, შინაურ ბაზარზე, გაყიდვების დაწყებიდან პირველ ოთხ თვეში, უკვე 1 210 „ვოლტი“ გაჰყიდა. გაყიდული ავტომობილების მიერ ნაჩვენები შედეგი კი მწარმოებლისთვისაც სიურპრიზი აღმოჩნდა.

„პირველი მყიდველების მაგალითზე შეიძლება ვთქვათ, რომ ავზის სრულად ავსებამდე, „ვოლტს“ 1 600 კილომეტრის გავლა შეუძლია. ამ ეტაპზე, მასზე მოთხოვნა ძალიან მაღალია. იმდენად მაღალი, რომ შეკვეთების დაკიმაყოფილებას ძლივს ვასწრებთ“, - ამბობს „შევროლე ვოლტის“ საავტომობილო ხაზის დირექტორი ტონი პოსავაცი.

მხოლოდ ელექტროძრავით გადაადგილებისას, „შევროლე ვოლტის“ სვლის სიშორე მხოლოდ 64 კილომეტრია, რასაც 16 კილოვატსაათი ტევადობის ლითიუმ-იონური ელემენტების ბლოკი უხრუნველყოფს. ძრავი 149 ცხენის ძალას და 370 ნიუტონმეტრს გამოიმუშავებს. ეს კი საკმარისია იმისათვის, რომ ავტომობილმა ადგილიდან 100 კმ/სთ სიჩქარე 9 წამში აკრიფოს, მისი მაქსიმალური სიჩქარე კი 160 კმ/სთ-ს აღწევს.

აკუმულატორების დამუხტვა სახლის შტეპსელიდან შეიძლება. ამასთან, 240-ვოლტიანი შტეპსელიდან დამუხტვას 4 საათი სჭირდება, მაგრამ თუ ძაბვა ორჯერ ნაკლებია, მაშინ დრო 2.5-3-ჯერ იზრდება. როდესაც კომბინირებული რეჟიმით გადაადგილდება, ავტომობილი 90 კილომეტრს ერთი გალონი (3.785 ლიტრი) საწვავით გადის (შიდაწვის ძრავი ელექტროგენერატორს ამუშავებს), რაც 100 კილომეტრზე 3.9 ლიტრის ტოლფასია. მარტო ელექტროძრავით მოძრაობისას, ხარჯი (100 კმ-ზე) 2.5 ლიტრის ექვივალენტურია (იგულისხმება, რომ აკუმულატორებში დაგროვილი ელექტროენერგია თბოსადგურშია მიღებული). და თუ ელექტროძრავი შიდაწვის ძრავისა და გენერატორის მიერ გამომუშავებულ ენერგიას იყენებს, მაშინ საწვავის ხარჯი (100 კმ-ზე) 6.3 ლიტრს აღწევს.

ზემოთ მოყვანილი სვლის სიშორის - 1 600 კილომეტრის უმეტესი წილი შერეული რეჟიმით გადაადგილებაზე მოდის. ანუ, ამ დროს, „ვოლტი“ შეიძლება სხვა ეკოლოგიურად სუფთა ავტომობილებზე უკეთესი ეკონომიურობით და სუფთა გამონაბოლქვით არც კი გამოირჩეოდეს.

სამაგიეროდ, ის ძალიან ძვირია: მისი საბაზო ფასი 41 000 დოლარია, თუმცა ფედერალური შეღავათების გათვალისწინებით, „ვოლტის“ ფასი (ამერიკაში) 33 500 დოლარამდე ჩამოდის.

„რენო“ ელექტრულ „ზოის“ ბესტსელერად აქცევს

Renault Vows to Make Zoe a Best-Seller

25 აპრილი

ერთ-ერთი მთავარი მიზეზი, რაც ელექტრომობილების პოპულარიზაციას აფერხებს, მათი სიძვირეა. მალე „რენო“ ბაზარზე ოთხ ელექტრომობილს გამოიტანს და იმედოვნებს, რომ მათი მეშვეობით, ამ ტიპის ავტომობილებისადმი მყიდველთა დამოკიდბულებას რადიკალურად შეცვლის. უფრო მეტიც, ფრანგული კომპანიის მარკეტოლოგები დარწმუნებულნი არიან, რომ მათი სუბკომპაქტური ჰეჩბეკი „ზოი“ თავიდანვე პოპულარული გახდება.

ამ ოპტიმიზმის საფუძველს კი „ზოის“ დაბალი ფასია. ის ბაზარზე მერმისს გამოჩნდება და ევროპაში 15 000 ევროს ფარგლებში ეღირება. დაახლოებით იგივე ფასი უნდა ჰქონდეს დიზელის ძრავით აღჭურვილ შემდეგი თაობის „კლიოს“. შედარებისთვის, დღეისათვის ბაზარზე მხოლოდ ერთი სუფთა ელექტრომობილია - „ნისან ლიფი“ და ისიც 31 000 ევრო ღირს.

„ზოის“ სიგრძე 4.10 მეტრია. ის აღჭურვილია ელექტროძრავით, რომელიც 80 ცხენის ძალას და 222 ნიუტონმეტრს გამოიმუშავებს. მაქსიმალური სიჩქარე ხელოვნურადაა შეზღუდული 135 კმ/სთ ნიშნულზე, რაც იმის გამო გაკეთდა, რომ ასე ლითიუმ-იონურ აკუმულატორებში დაგროვილი ენერგია უფრო ეკონომიურად იხარჯება.

ერთი სრული დამუხტვა საკმარისია იმისათვის, რომ ავტომობილმა 160 კილომეტრი გაიაროს, ამისათვის საჭირო ელექტროენერგია კი სულ რაღაც, 2 ევრო დაჯდება (ევროპაში). ეს კი დაახლოებით ხუთჯერ ნაკლებია იმ თანხაზე, რაც იგივე მანძილის გასავლელად საჭირო საწვავის შესაძენად, დიზელისძრავიანი „კლიოს“ პატრონს დასჭირდება.

„რენოს“ განცხადებით, „ზოის“ აკუმულატორების დამუხტვის სამი ტიპი არსებობს: პირველია სტანდარტული, რომლის გამოყენების შემთხვევაშიც, დამუხტვას 6-8 საათი სჭირდება. სწრაფად დამმუხტავით, 10 წუთში აკუმულატორები იმდენად შეივსება, რომ „ზოიმ“ დაახლოებით 60 კილომეტრის გავლა შეძლოს. მესამე ტიპი აკუმულატორების სწრაფ შეცვლას ითვალისწინებს, რასაც დაახლოებით 3 წუთი დასჭირდება.

რა აძლევს ფრანგულ კომპანიას იმის საშუალებას, რომ ელექტრომობილი ასე იაფად გაჰყიდოს? პასუხი მარტივია - აკუმულატორების ლიზინგით გაცემა. ანუ, ავტომობილის ფასში, მისი აკუმულატორების ღირებულება გათვალისწინებული არაა. მათს საფასურს მყიდველი თანდათან, ელექტრომობილის ექსპლუატაციის პროცესში გადაიხდის. ლიზინგის ღირებულება არც ისე ბევრია - თვეში 70 ევრო.

ფრანგული კომპანიის ოპერაციების ხელმძღვანელი პატრიკ პელატა ამბობს, რომ პირველ ხანებში, წლიურად 150 000 „ზოის“ წარმოება იგეგმება. თუმცა წარმოების მოცულობა გაორმაგდება, თუ ბაზარი ამას მოითხოვს. პელატა იმედოვნებს, რომ ასეც იქნება, რადგან თუნდაც ლიზინგის ღირებულების გათვალისწინებით, ელექტრომობილის ექსპლუატაცია, შიდაწვისძრავიან ანალოგებთან შედარებით, გაცილებით იაფი დაჯდება.

ცუდია ის ფაქტი, რომ სვლის მოკრძალებული სიშორის გამო, „ზოი“ ქალაქგარეთ შორეული მგზავრობისთვის არ გამოდგება. თუმცა „რენო“ გვპირდება, რომ ამ ავტომობილის ისეთ ვერსიებსაც გამოუშვებს, რომლებსაც ეს მონაცემი გაზრდილი ექნება. შესაბამისად, ალბათ მისი აკუმულატორების ლიზინგის პირობები შეიცვლება (გაძვირდება).

Sunday, April 24, 2011

ელექრომობილებს მხოლოდ საწვავის სიძვირე გააპოპულარულებს

High Fuel Prices to Spark EV Sales Boom

24 აპრილი

მსოფლიოს წამყვანი ავტო მწარმოებლები ასეულობით მილიონ დოლარს ხარჯავენ ელექტრომობილების და მათი წარმოებისთვის საჭირო ტექნლოგიების შესამუშავებლად, შესაბამისი ინფრასტრუქტურის მოსაწყობად და ეკოლოგიურად სუფთა ავტომობილების პოპულარიზაციისთვის. დასავლეთის მაღალგანვითარებული ქვეყნები იმედოვნებენ, რომ ელექტრომობილები მათს ეკონომიკას ნავთობზე ნაკლებად დამოკიდებულს გახდის.

თუმცა, როგორც წამყვან საკონსულტაციო-ანალიტიკურ კომპანია „დელუას“ მიერ ჩატარებულმა გამოკვლევამ აჩვენა, რომ ამ ქვეყნებში მცხოვრებ პოტენციურ მყიდველთა უმეტესობას ნაკლებად აღელვებს პლანეტის ბედი და ისინი ელექტრომობილს მხოლოდ იმ შემთხვევაში შეიძენენ, თუ საწვავის ფასი მნიშვნელოვნად გაძვირდება.

ამ საკითხზე, კომპანიამ მთელ მსოფლიოში 12 000 ავტომფლობელის (აქედან 1 000 ამერიკელი იყო) აზრი შეისწავლა. ჩატარებული ანალიზის შედეგად გამოვლინდა, რომ ამერიკელ გამოკითხულთა 78 პროცენტი ელექტრომობილს მხოლოდ იმ შემთხვევაში შეიძენს, თუ გალონი (3.785 ლიტრი) ბენზინის ფასი 5 დოლარს მიაღწევს.

ელექტრომობილებისადმი ყველაზე მეტი ენთუზიაზმი, ავტომობილის ჩინელმა პოტენციურმა მყიდველებმა გამოავლინეს. ცისქვეშეთში გამოკითხულთა 93 პროცენტი მზადაა, ელექტრომობილი შეიძინოს. იგივეს ევროპელთა 69 პროცენტი და იაპონლთა 48 პროცენტი აპირებს. ამერიკელ გამოკითხულთა შორის კი მხოლოდ 12 პროცენტი არის მზად იმისათვის, რომ ყოველგვარი პირობის გარეშე გადაჯდეს ელექტრომობილზე.

„ბაზარზე ელექტრომობილების მასობრივი ადაპტაციისთვის აუცილებელია, რომ მათი ფასი, შესაბამისი კლასის შიდაწვისძრავიანი ავტომობილების ფასს დაუახლოვდეს. ყოველ შემთხვევაში, ამერიკელები მზად არ არიან იმისათვის, რომ ელექტრომობილების შესაძენად, ზედმეტი იხადონ. რა თქმა უნდა, სახელმწიფოს მხრიდან შეღავათებს დიდი მნიშვნელობა ენიჭება“, - ამბობს „დელუას“ ვიცე აღმასრულებელი კრეიგ ჯიფი.

იმავე გამოკვლევამ აჩვენა, რომ ელექტრომობილების პოტენციურ მყიდველთა უმეტესობას, პირველ რიგში, ამ ტიპის ავტომობილების სვლის მცირე სიშორე არ მოსწონთ. მათი აზრით, მისაღები იქნება, თუ ელექტრომობილები ერთი სრული დამუხტვით, 200-300 კილომეტრის გავლას შეძლებენ. ეს კი თითქმის ორჯერ მეტია ახლანდელი ელექტრომობილების შესაძლებლობებზე. ასევე მნიშვნლობა ენიჭება დამუხტვის დროის შემცირებას, რაც თანამედროვე ტექნოლოგიებით, საკმაოდ ძნელად მიღწევადია.