Wednesday, June 17, 2009

გუნდები ფედერაციას კომპრომისისკენ მოუწოდებენ

Formula 1

17 ივნისი

ფორმულა ერთის გუნდების ასოციაციის (FOTA) წევრებმა საერთაშორისო საავტომობილო ფედერაციას (FIA) წერილობითი მიმართვა გაუგზავნეს. ისინი იმედოვნებენ, რომ მათსა და ფედერაციას შორის განხეთქილება მოლაპარაკების გზით გადაიჭრება და ამგვარად, სპორტის ეს სახეობა დამღუპველ გახლეჩას გადაურჩება.

”დადგა იმის დრო, რომ წინა პლანზე სპორტის ინტერესები გადმოვიტანოთ და ორმხრივი კომპრომისის გზით, დებატები შეთანხმებით დავასრულოთ”, - ნათქვამია წერილობით მიმართვაში, რომლის ასლებიც, ფედერაციის პრეზიდენტ მაქს მოსლისა და ფორმულა ერთის კომერციულ უფლებათა მფლობელ ბერნი ეკლსტოუნსაც დაეგზავნა.

”ვიმედოვნებთ, თქვენ ამ წერილს გუნდების მხრიდან შემხვედრი მიმართულებით გადადგმულ ნაბიჯად აღიქვამთ, იმ გუნდებისა, რომლებსაც 2012 წლის ჩათვლით, მსოფლიო ჩემპიონატზე გამოსვლის სურვილი ოფიციალურად გამოთქმული აქვთ. კიდევ ერთხელ ვადასტურებთ-რა თქვენდამი პატივისცემას, გვჯერა, რომ გაითვალისწინებთ ჩვენს ინტერესებს, რითაც თავიდან ავიცილებთ ფორმულა 1-დან რამდენიმე გუნდის გასვლას. დროა, არსებული პრობლემები საზრიანად და სწრაფად გადავწყვიტოთ.

განსჯის შემდეგ, იმ დასკვნამდე მივედით, რომ კარგი იქნება, თუ ორმხრივ შეთანხმებას, რესურსების შეზღუდვის FOTA-ს მიერ შემუშავებული სქემის საფუძველზე მივაღწევთ, რომელსაც რამდენიმე დამატებით მექანიზმსაც დავურთავთ. ჩვენ შერჩეული გვყავს ავტორიტეტული კომპანია, რომელიც საკონტროლო მეთოდიკის შემუშავებაში დაგვეხმარება და ამ მეთოდებს ყველა გუნდი გამოიყენებს.

ეს მეთოდიკა და გუნდების ყოველწლიური აუდიტი ფედერაციისთვის აბსოლუტურად ხელმისაწვდომი იქნება. ეს სისტემა ობიეუქტურ კონტროლს ექვემდებარება და ამდენად, საქმით დაინტერესებული ყველა მხარისთვის მისაღებად მიგვაჩნია”, - ნათქვამია გუნდების წერილში.

ერთ-ერთი გუნდის ინკოგნიტო წევრი აცხადებს, რომ გუნდების მხრიდან, ეს წერილი ფედერაციასთან ერთად, ორმხრივ კომპრომისზე წასვლის ბოლო შანსია, რომლის იქითაც, მათ ალტერნატიული ჩემპიონატის ორგანიზების მტი აღარაფერი რჩებათ.

შეგახსენებთ, რომ გუნდებისთვის მიუღებელია ფედერაციის მიერ რეგლამენტში შეტანილი ის პუნქტი, რომელიც ბიუჯეტებს 40 მილიონგირვანქიანი ჭერით ზღუდავს. სხვათა შორის, ფედერაციამ ერთი კომპრომისი უკვე გასწია - ის თანახმაა, ყველასათვის ერთნაირი რეგლამენტი შემოიღოს და იმ გუნდებს, რომლებიც ჭერში ვერ ჩაეტევიან, დამატებითი ტექნიკური შეზღუდვები არ დაუწესოს. სამაგიეროდ, ამ კომპრომისის შემდეგ, ყველა გუნდი ვალდებულია, რომ გარკვეული (მნიშვნელოვანი) გამონაკლისების გათვალისინებით, ბიუჯეტის ჭერში ჩაეტიოს.

დღესვე, ფედერაციამ გამოაქვეყნა განცხადება, რომლითაც გუნდებისგან 2010 წლის სეზონისთვის უპირობო განაცხადებს მოითხოვს. ამასთან, მოსლი აცხადებს, რომ გუნდებთან ყოველგვარი მოლაპარაკებისთვის მზადაა. თავის საპასუხო წერილში მოსლი ამბობს, რომ თანხმობის ახალი ხელშეკრულების ორ დღეში გაფორმება ვერ მოხერხდება. ამიტომ, მისი აზრით, კარგი იქნება, თუ საშუალედოს სახით, 1998 წელს გაფორმებულ ხელშეკრულებას გამოიყენებენ.

1998 წელს გაფორმებულ ხელშეკრულებას ათი წელი ვეყრდნობოდით და ვერ ვხედავ მიზეზს, რის გამოც მისი ცოტა ხნით გაგრძელება მიუღებელია. კარგი იქნება, თუ მას რამდენიმე კვირით გავაგრძელებთ და ამ დროს ახალი შეთანხმების მისაღწევად გამოვიყნებთ”, - დასძენს მოსლი.

ის ასევე მოითხოვს, რომ გუნდები დროებით ბიუჯეტების 40 მილიონგირვანქიან ჭერს დათანხმდნენ, შემდეგ კი მათ ამ წესში შესწორების შეტანის საშუალება მიეცემათ.

თითქმის გადაწყვეტილია:”ვოლვოს” ჩინური ”ჯილი” ყიდულობს

Geely Buys Volvo

17 ივნისი

რამდენიმეთვიანი გაურკვევლობის შემდეგ, ”ვოლვოს” მომავალს ნათელი ეფინება - ინტერნეტში დღეს გავრცელებული ინფორმაციით, შვედურ კომპანიას, რომელიც მთელს მსოფლიოში ყველაზე უსაფრთხო ავტომობილებითაა ცნობილი, ჩინური ”ჯილი” იყიდის. ჩინური საავტომობილო ინტერნეტ გამოცემა auto.sohu იტყობინება, რომ ”ვოლვოს” გაყიდვის თაობაზე, ”ფორდსა” და ”ჯილის” შორის წინასწარი შეთანხმება უკვე მიღწეულია.

ამ ეტაპზე, შეთანხმების დეტალები არ ქვეყნდება. თუმცა ჩინელმა ჟურნალისტებმა გაარკვიეს, რომ ”ჯილი” წარმოებას ჩინეთში, პროვინცია გუანდონის ქალაქ დონგუანში გადაიტანს. პირველი ავტომობილი კი, რომელსაც ჩინური ”ვოლვო” გამოუშვებს, უგზოობის XC90 იქნება.

ცნობისათვის, ”ჯილი” 1986 წელს შეიქმნა, როგორც მაცივრების და სამაცივრო მოწყობილობათა მწარმოებელი. მოგვიანებით, მან დეკორაციული მასალების, 1992 წელს კი მოტოციკლების ნაწილების წარმოებასაც მიჰყო ხელი. ორი წლის შემდეგ კომპანიამ მოტოციკლების წარმოება დაიწყო და ორ წელიწადში 200 000 ცალი ორბორბლიანი მანქანა გამოუშვა. ”ჯილიმ” ავტომობილების წარმოება 1998 წელს დაიწყო, ხუთი წლის შემდეგ კი ექსპორტზე პირველი ავტომობილები გაიტანა. 2004 წელს კომპანია ღია სააქციო საზოგადოებად გარდაიქმნა და ჩინეთის ისტორიაში, პირველი დამოუკიდებელი ავტომწარმოებელი გახდა.

სანამ გარიგება საბოლოოდ გაფორმდებოდეს, ”ჯილის” ”ფორდისთვის” შვედური კომპანიის სამომავლო გეგმის წარდგენა მოუწევს. რაც შეეხება გარიგების ფინანსურ მხარეს, ისიც ჯერ დაუდგენელია. თუმცა იმის გათვალისწინებით, რომ ჩინური კომპანია დონგუანის ხელმძღვანელობის მხარდაჭერით სარგებლობს, შეიძლება იმის ვარაუდი, რომ გარიგება ფინანსურად უზრუნველყოფილი იქნება.

”ჯილი” ასევე აცხადებს, რომ ”ვოლვოს” კრიზისიდან გამოსაყვანად და მომგებიან ბიზნესზე გადასაყვანად, ამ კომპანიაში 10 მილიარდდოლარიან ინვესტიციას გეგმავს.

წლის საუკეთესო ახალი ძრავი

Best New Engine of the Year

17 ივნისი

მეთერთმეტედ ჩატარებულმა კონკურსმა, რომელიც წლის საუკეთესო ძრავებს ავლენს, ამ წლის გამარჯვებულად ”პორშეს” უახლესი 3.8-ლიტრიანი (ერთმანეთის საპირისპიროდ, ოპოზიტურად განლაგებული 6 ცილინდრით) ძრავი დაასახელა, რომელიც მოდელ ”911 კარერა S-ზე” გამოიყენება.

წინამორბედთან შედარებით, ამ აგრეგატის (სურათზე) მაქსიმალური სიმძლავრე 380 ცხენის ძალამდე (30-ით) არის გაზრდილი. მისი მეშვეობით, წლევანდელი სამოდელო წლის ”911 კარერა S-ის” მაქსიმალური სიჩქარე 300 კმ/სთ-მდე გაიზარდა, რაც ამ მოდელის ისორიაში პირველად მოხდა.

თუმცა, კონკურსის ჟიურის (რომელსაც ძრავებზე სპეციალიზებული ბრიტანული ჟურნალი ”ენჯაინ ტექნოლოჯი ინტერნეიშნლი” ადგენს) ამ ძრავისთვის სასარგებლო გადაწყვეტილება მხოლოდ სიმძლავრის ზრდის გამო არ მიუღია. შემფასებლების მოწონება ასევე ცუფენჰაუზენელთა აგრეგატის ეკონომიურობამ და მოქნილობამ განაპირობა.

კერძოდ, სიმძლავრის არცთუ უმნიშვნლო ზრდის პარალლურად, გაუმჯობესდა მისი ეკონომიურობა. ამაში კი მას გადაცემათა ახალი კოლოფი PDK ეხმარება. ავტომობილი 100 კილომეტრის გასავლელად, საშუალოდ 10.2 ლიტრ ბენზინს მოიხმარს. საერთო ჯამში, წინამორბედთან შედარებით, ახალი ძრავი 8.5%-ით მძლავრი და 13%-ით ეკონომიურია.

წლის საუკეთესო ავტომობილის გარდა, კონკურსმა სხვა ნომინაციების გამარჯვებულებიც დაასახელა. წლის საუკეთესო სპორტულ ძრავად ”მერსედეს-ბენცის” 6.2-ლიტრიანი V8 გამოცხადდა, რომელსაც ”სამქიმიანების” პარტნიორი კომპანია AMG-ს სპეციალისტები ხელით აწყობენ. წლის საუკეთესო მწვანე ძრავი ”ფოლკსვაგენის” 1.4-ლიტრიანი TSI ”ტვინჩერჯერი” გახდა. კიდევ ერთ ნომინაციაში გაიმარჯვა ”მერსედეს-ბენცის” 6.2-ლიტრიანმა V8-მ - ის საუკეთესოდ 4.0 ლიტრზე დიდმოცულობიან კლასში სცნეს.



”კიამ” ”პიკანტო” განაახლა

KIA Picanto

17 ივნისი

სულ ორი წელი გავიდა, რაც ”კიამ” თავის ყველაზე პატარა ავტომობილ ”პიკანტოს” რესტაილინგი ჩაუტარა, მაგრამ როგორც ჩანს, ამან მისი ხელმძღვანელობა არ დააკმაყოფილა. და აი, კორეულმა კომპანიამ ამ ავტომობილს მორიგი მოდიფიკაცია ჩაუტარა, რისი შედეგიც პირველად კორეულ საზოგადოებას გააცნო.

ახალ ”პიკანტოს” წინამორბედისგან ინტერიერსა და ექსტერიერში შეცვლილი ზოგიერთი დეტალი, ასევე ორი (კორეული ბაზრისთვის) ახალი ძრავი განასხვავებს. ამიერიდან, ”პიკანტოს” გარეგნობა მისი აღჭურვილობის შესაბამისად გაფორმდება. საბაზო ვერსიის გარდა, მყიდველს დიზაინის ორ - სპორტულ და სპეციალურ ვერსიებს შესთავაზებენ.

რადიატორის ბადის ახლებური (ქროსოვერ ”სოულის” სტილში) გაფორმება, ახალი ბამპერი, რომლის ქვეშაც შეცვლილი ფორმის ჰაერის ამღებია მოთავსებული, ნისლსაწინააღმდეგო მაშუქები და ზღურბლზე გადაკრული ახალი დეკორატიული პანელები - სულ ეს არის, რაც ახალ ”პიკანტოს” ორი წლის წინანდელისგან გარეგნულად განასხვავებს.

სალონში ოდნავ შეიცვალა ცენტრალური კონსოლის მოყვანილობა და საჭის რგოლი, ხელსაწყო-მაჩვენებლების ფორთოხლისფერი შუქი კი წითლით შეიცვალა. მაჩვენებლების პანელზე გამოჩნდა წარწერა ”ეკო”, რომელიც იმ შემთხვევაში ინთება, თუ ავტომობილი ეკონომიური რეჟიმით გადაადგილდება. ამგვარად, ის მძღოლს საწვავის ხარჯის შემცირებაში ეხმარება.

კორეაში ახალი ”პიკანტოსთვის” მხოლოდ ორი ერთლიტრიანი ძრავია განკუთვნილი. პირველი სტანდარტულ ბენზინზე მუშაობს და მისი მაქსიმალური სიმძლავრე 72 ცხენის ძალაა, რაც წინამორბედის მაქსიმუმზე 8 ცხენის ძალით მეტია. მეორე კი საწვავად ბუნებრივ აირს იყენებს. მისი მაქსიმალური სიმძლავრე კი მხოლოდ 67 ცხენის ძალაა. თუმცა, ესეც წინა ვერსიის სიმძლავრეზე სამით მეტია. სავარაუდოდ, ბუნებრივ აირზე მომუშავე ”პიკანტო” მხოლოდ კორეულ ბაზარზე გაიყიდება, პირველი კი მალე ევროპასა და სხვა ბაზრებზეც გამოჩნდება. კონკრეტულად როდის, ეს მოგვიანებით დაზუსტდება.

სურათზე: ”პიკანტოს” კორეაში ”მორნინგის” სახელით იცნობენ.

პირველი დეტალები ”აუდი A5 სპორტბეკის” შესახებ

Audi A5 Sportback

17 ივნისი

”აუდი” აგრძელებს თავისი სამოდელო რიგის გაფართოებას და მისთვის ახალი სეგმენტების ათვისებას. ამ ეტაპზე, გერმანული კომპანია სამ ახალ ავტომობილს - პრემიუმ ჰეჩბეკ A1-ს, ოთხკარიან კუპე A7-ს და კუპე A5-ზე ბაზირებულ ”სპორტბეკს” ამზადებს, რომლებსაც მის ბიზნეს გეგმაში გადამწყვეტი მნიშვნელობა ენიჭება. ცნობისათვის, ეს ბიზნეს გეგმა ითვალისწინებს, რომ 2015 წელს კომპანიამ 1.5 მილიონი ავტომობილი უნდა გამოუშვას, რითაც ის უკან ჩამოიტოვებს პრემიუმ სეგმენტის ახლანდელ ლიდერებს - ”ბეემვესა” და ”მერსედეს-ბენცს”.

დღეს ”აუდიმ” ინტერნეტით ”A5 სპორტბეკის” შესახებ პირველი, მწირი ინფორმაცია გამოაქვეყნა. ამ ავტომობილის საწარმოო ვერსიის მსოფლიო პრემიერა სექტემბერში, ფრანკფურტის ავტო შოუზე იგეგმება, ევროპის ძირითად ბაზრებზე მისი საბაზო ღირებულება (2.0-ლიტრიანი ტურბოდიზელით აღჭურვილი მოდელისა) კი 36 050 ევრო იქნება. თუმცა ”აუდი” აცხადებს, რომ მოგვიანებით, უფრო იაფფასიან ვერსიასაც გამოუშვებს.

”A5 სპორტბეკს” ხუთი კარი აქვს და წესით, ის ჰეჩბეკად უნდა მოიხსენიებოდეს, მაგრამ წაგრძელებული სალონი, ძლიერ დაქანებული უკანა სეყრდენი, გრძელი ბაზა (2.810 მეტრი) და სედან A4-ზე 36 მილიმეტრით დაბალი სახურავი, მას კუპეს სილუეტს ანიჭებს. ამ ორი ტიპის ძარას კი სახელი ”სპორტბეკი” აერთიანებს.

ახალი ავტომობილი მყიდველს ძრავების ფართო არჩევანით ელის. აგრეგატების გამაში ორი ბენზინზე მომუშავეა, სამი კი საწვავად დეზელს იყენებს. ბენზინის აგრეგატებია: 2.0-ლიტრიანი TFSI და 3.2-ლიტრიანი V6. პირველის მონაცემებია: 211 ცხენის ძალა და 350 ნიუტონმეტრი, მეორისა კი - 265 ცხენის ძალა (მაქსიმალური მაბრუნი მომენტი არ ქვეყნდება). ორივე ძრავი აღჭურვილია ”აუდის” უახლესი სისტემით ”ვალვშიფტ”, რომლის წყალობითაც, შემცირებულია მათი აპეტიტი, მაქსიმალური სიმძლავრე და მაბრუნი მომენტი კი გაზრდილია.

დიზელის სამივე აგრეგატიც წარმოების დაწყებისთანავე ხელმისაწვდომი იქნება. ესენია: 2.0-ლიტრიანი TDI 170 ცხენის ძალით და 350 ნიუტონმეტრით, 2.7-ლიტრიანი TDI 190 ცხენის ძალით და 400 ნიუტონმეტრით და 3.0-ლიტრიანი V6 TDI, 240 ცხენის ძალითა და 500 ნიუტონმეტრი მაქსიმალური მაბრუნი მომენტით. ყველა ვერსია სრულამძრავიანი ტრანსმისიით, 6-საფეხურიანი მექანიკური კოლოფით (ან 7-საფეხურიანი ნახევრად ავტომატურით) და სისტემა სტარტ/სტოპით აღიჭურვება.

ახალი ავტომობილის საბაზო აღჭურვილობაში შევა სისტემა ”სტაბილურობის ელექტრონული პროგრამა” (ESP), რომელსაც წინა ღერძის დიფერენციალის ელექტრონული დამბლოკველი აქვს. გარდა ამისა, ”A5 სპორტბეკი” აღიჭურვება ”მართვის დინამიკური სისტემით”, რომელიც სამ განსხვავებულ რეჟიმში მუშაობს. ეს სისტემა აქსელერატორის მგრძნობიარობას, გადაცემათა კოლოფის (ნახევრად ავტომატურის შემთხვევაში) და საჭის მექანიზმის მუშაობას, კონკრეტული რეჟიმის შესაბამისად აკონტროლებს.

ამ ავტომობილის შესახებ, უფრო დაწვრილებით ინფორმაციას ”აუდი” ფრანკფურტის შოუს დაწყებამდე გამოაქვეყნებს.

სურათზე: დაახლოებით ასეთი იქნება ”აუდი A5 სპორტბეკი”.



ბრიტანული ჯუჯა წყალბადზე მომუშავე გულით

Riversimple

17 ივნისი

თუ გაგიგიათ ბრიტანული ავტოკომპანია ”რივერსიმპლი”? რა თქმა უნდა, არა. დღეს კი ეს პატარა ფირმა ცნობილი გახდა. ყოველ შემთხვევაში მათთვის, ვინც ამ დღეებში ლონდონის სამუზეუმო კომპლექს ”სომერსეტ ჰაუსს” ეწვია, ანდა ამ კომპანიის ქმნილებასთან დაკავშირებული სტატიები ბრიტანულ გამოცემებში წაიკითხა.

ეს ქმნილება კი ჯუჯა, ორადგილიანი ავტომობილია, რომელიც ჯერ მხოლოდ ერთ ეგზემპლარად არსებობს და რაც მთავარია, საწვავად (არაპირდაპირი მნიშვნელობით) წყალბადს იყენებს.

ავტომობილს, რომელიც ”რივერსიმპლმა” ”ჰორაიზონ ფუელ სელ ტექნოლოჯისთან” ერთად შექმნა, ჯერ სახელიც არ აქვს. ამ ეტაპზე მას ”ქალაქის პატარა ავტომობილად” მოიხსენიებენ. პროექტის ავტორები პრეს რელიზით გვამცნობენ, რომ მათი ქმნილება არის ”მსოფლიოში პირველი დაბალფასიანი პრაქტიკული ავტომობილი, რომელიც წყალბადზე მუშაობს”. ამ ორი კომპანიის გარდა, პროექტში, რომელიც უკვე სამი წელია, მუშავდება, ასევე ოქსფორდის და კრენფილდის უნივერსიტეტების სპეციალისტები მონაწილეობენ. პროექტს კი ბრიტანეთის მთავრობა და ”ფოლკსვაგენის” სამეთვალყურეო საბჭოს თავმჯდომარე, დიდი ფერდინანდ პორშეს შთამომავალი ფერდინანდ პიხი აფინანსებენ.

”რივერსიმპლის” ავტომობილს პრაქტიკულად ნულოვანი გამონაბოლქვი აქვს. მისი მამოძრავებელი ელექტრომოტორია, რომელიც ენერგიას წყალბადის ფიჭური ელემენტებისგან ივსებს. დამამზადებლების ინფორმაციით, ავტომობილი ერთი გალონი (3.7854 ლიტრი) საწვავით 360 მილს (576 კილომეტრს) გადის, რაც 100 კილომეტრზე 0.8 ლიტრის ტოლფასია.

ავტომობილში გამოყენებულია ”ჰორაიზონის” წარმოების ფიჭური ელემენტი, რომლის სიმძლავრე 6 კილოვატია. თავად ავტომობილი მსუბუქი კომპოზიტებისგანაა დამზადებული და სულ რაღაც 350 კილოგრამს იწონის. ერთი ავზის სრულად გაწყობით კი მისი სვლის სიშორე 384 კილომეტრს აღწევს. ”ქალაქის პატარა ავტომობილის” მაქსიმალური სიჩქარე სულ რაღაც 80 კმ/სთ-ია, ადგილიდან 48 კმ/სთ-ის აკრეფას კი ის 5.5 წამს ანდომებს.

”ჩვენი პარტნიორის მიზანი ფიჭური ელემენტების კომერციალიზაციაა, ჩვენ კი მათთან ერთად, წყალბადის ფიჭური ელემენტებით აღჭურვილი ავტომობილების წარმოებას ვგეგმავთ. ვიმედოვნბთ, რომ ამ პარტნიორობით მიზანს მივაღწევთ და ასეთი ავტომობილების სერიულად წარმოებას, მსოფლიოში პირველები დავიწყებთ”, - ამბობს ”რივერსიმპლის” დამაარსებელი უგო სპოუერსი (Hugo Spowers).

”რივერსიმპლი” და მისი პარტნიორები იმედოვნებენ, რომ 10 გამოსაცდელი პროტოტიპის ასაგებად აუცილებელი 10 მილიონი დოლარის მოზიდვას შეძლებენ. თუ შეფერხება არ იქნა, წყალბადზე მომუშავე ჯუჯას წარმოება უახლოეს ორ წელიწადში დაიწყება. ”რივერსიმპლი” აცხადებს, რომ ავტომობილის წარმოების შემთხვევაში, ის მას ლიზინგით, თვეში 315 დოლარის საფასურად გაჰყიდის.

სამომავლოდ ასევე იგეგმება ოთხადგილიანი საქალაქო ავტომობილის შექმნა, რომლის სვლის სიშორე 320 კილომეტრი, მაქსიმალური სიჩქარე კი 120 კმ/სთ იქნება.

მოსლი გუნდებს ადანაშაულებს

Formula 1

17 ივნისი

რაც დრო გადის, სულ უფრო მწვავდება ურთიერთობა საერთაშორისო საავტომობილო ფედერაციასა (FIA - ფედერასიონ ინტერნასიონალ აუტომობილ) და ფორმულა 1-ის გუნდების ასოციაციას (FOTA - ფორმულა ვან ტიმს ესოსიეიშნ) შორის, რომელიც სპორტის ამ პოპულარულ და მეტად შემოსავლიან სახეობას დიდი განხეთქილებით ემუქრება.

მოქიშპე მხარეების მორიგი შეხვედრა უშედეგოდ დასრულდა, რის შემდეფაც, ფედერაციამ სპეციალური პრეს-რელიზი გამოაქვეყნა, რასაც გუნდების პასუხი ჯერ არ მოჰყოლია. თავის რელიზში, ფედერაცია და პირადად მისი პრეზიდენტი მაქს მოსლი (სურათზე), საქარხნო გუნდებს ბრალს სდებს იმაში, რომ ისინი ფაქტობრივად, მსოფლიო ჩემპიონატის კომერციულ უფლებათა ხელში ჩაგდებას ცდილობენ. ფედერაცია თვლის, რომ სწორედ ამითაა გამოწვეული მოდავე მხარეებს შორის მოლაპარაკების ჩაშლა, რასაც ორშაბათს ჰქონდა ადგილი.

ორშაბათის შეხვედრაზე გუნდების და ფედერაციის ფინანსური აღმასრულებლები შეიკრიბნენ, მაგრამ მალე გამოვლინდა, რომ გუნდების წარმომადგენლებს რაიმე გადაწყვეტილების დამოუკიდებლად მიღების უფლება არ ჰქონდათ, რის გამოც, შეხვედრის გაგრძელებამ აზრი დაკარგა.

”ფედერაცია და ფორმულა ერთის ადმინისტრაცია (FOM - ფორმულა ვან მენეჯმენტ)ათწლეულების განმავლობაში ხვეწდნენ მსოფლიო ჩემპიონატის ახლანდელ სტრუქტურას, რამაც ავტოსპორტის ისტორიაში ყველაზე წარმატებული და მომგებიანი ჩემპიონატი შეგვაქმნევინა. დღეს კი გუნდები ამ პირველობის კომერციული უფლების ხელში ჩაგდებას ცდილობენ. ფედერაციას ამის გაგება არ შეუძლია”, - ნათქვამია რელიზში.

”ჩვენ არაერთხელ ვცადეთ ხარჯების შემცირება, მაგრამ ამ მიზნით ტექნიკური რეგლამენტის არაერთი გამკაცრება უშედეგო აღმოჩნდა, რამაც იმ დასკვნამდე მიგვიყვანა, რომ საქმეს მხოლოდ გუნდების ბიუჯეტების შეზღუდვით თუ ეშველება. ეს ერთადერთი გამოსავალია. ასე ხდება ავტოინდუსტრიაში - შეზღუდული დაფინანსების პირობებში, ინჟინრები ახალი იდეების განხორციელებას და ტექნოლოგიების შემუშავებას მაინც ახერხებენ. ტექნიკური სიახლეების გარეშე, ფორმულა 1-ს მომავალი არ აქვს, მაგრამ თუ წესებით ბიუჯეტს არ შევზღუდავთ, ჩემპიონატს გუნდები თანდათან დატოვებენ, რაც ასევე კრახამდე მიგვიყვანს. ამიტომ, ჩვენ ისევ დაჟინებით მოვითხოვთ წესებში იმ პუნქტის შემოღებას, რომელიც ხარჯებს შეზღუდავს”.

უფრო ადრე, მოსლი აცხადებდა, რომ გუნდებს ახალი რეგლამენტის განხილვაში მონაწილეობის უფლება იმ შემთხვევაში ექნებოდათ, თუ ისინი მომავალი სეზონისთვის განაცხადებს დროულად წარადგენდნენ. გუნდებმა ეს მოთხოვნა შეასრულეს, ახლა კი ფედერაციის ჯერია...

”ბეიბი პორშე” ”ფოლკსვაგენ ბლიუ სპორტის” ბაზაზე შეიქმნება

”პორშე 914-ს” ევროპის გზებზე ნახვა დღესაც შეიძლება

..................................................................................

”პატარა პორშეს” ბედი ჯერ გაურკვეველია

Porsche 914

17 ივნისი

მიუხადევად იმისა, რომ ფინანსური რესურსების სერიოზულ ნაკლებობას განიცდის, ”პორშე” მაინც აპირებს მასზე გაცილებით დიდი ”ფოლკსვაგენის” გაკონტროლებას და არც სამოდელო გამის გამრავალფეროვნების გეგმებს ცვლის. პირველი ახალი ავტომობილი, რომელსაც ანალიტიკოსები ცუფენჰაუზენელებისგან ელიან, (შედარებით) აიფფასიანი სპორტული მოდელია, რომლის სავარაუდო ფასიც 30 000 ევროზე ოდნავ მაღალი უნდა იყოს.

იგივე კლასის ავტომობილს, რომელიც ”პორშე 914-ის” სახელით იყო ცნობილი, გერმანული კომპანია 1960-1970 წლებში უშვებდა. ამ ავტომობილის სამოდელო გამაში შესაძლო დაბრუნების შესახებ ხმები მას შემდეგ გაჩნდა, რაც ”ფოკსვაგენმა” დეტროიტის ავტო შოუზე კონცეპტუალური როდსტერი ”ბლიუ სპორტი” წარადგინა. მაშინ არსებობდა მყარი საფუძველი იმის სავარაუდოდ, რომ ამ შუაძრავიანი ავტომობილის ბაზაზე, პატარა სპორტულ ავტომობილებს ეს ორი გერმანული კომპანია წარმოებისთვის ერთად მოამზადებდა და ორივე თავისი მარკით გამოუშვებდა. მითუმეტეს, რომ მათ მსგავსი კოოპერაციის მდიდარი გამოცდილება აქვთ.

მართალია, თავის დროზე ”პორშე 914” საავტომობილო ინდუსტრიის შედევრად არ ითვლებოდა, მაგრამ ამ ავტომობილის არაერთი ეგზემპლარი კარგადაა შემონახული და ხანდახან მათი ევროპულ გზებზე ხილვაც კი შეიძლება. ჰოდა, თუ ისერა ავტომობილი ასეთი პოპულარული იყო, რატომ არ უნდა გამოუშვან მისი შემცვლელი ახლა, როცა ”პორშეს” ულტრათანამედროვე ტექნოლოგიებზე მიუწვდება ხელი და თანაც, ისეთი ძლიერი პარტნიორი ჰყავს, როგორიც ”ფოლკსვაგენია”?

რაც გინდათ, ივარაუდეთ, მაგრამ გერმანულ გამოცემა ”აუტომობილვოხესთან” საუბრისას, ”პორშეს” წარმოების მენეჯერმა მიხაელ მახტმა განაცხადა, რომ ამ ეტაპზე, მისი კომპანია ახალი ავტომობილის წარმოების ათვისებას არ გეგმავს, რადგან მისი საწარმოები ახლანდელი მოდელების წარმოებასაც ვერ აუდიან. მაგრამ თუ გადაწყდა, რომ კომპანიის საწარმოო სიმძლავრეებს მეხუთე ხაზი დაემატება, მაშინ პირველი სიახლე სწორედ ”ბეიბი პორშე” გახდება, რომლის მსგავს ავტომობილებს, ”ფოლკსვაგენის” გარდა, მის ჯგუფში შემავალი ”სეატი” და ”აუდიც” გამოუშვებენ.

თუ მისი წარმოება გადაწყდა, ”პატარა პორშე” შესაფერისად მცირე ლიტრაჟის, ”ფოლკსვაგენის” ძრავებს მიიღებს. მათგან ერთია 1.4-ლიტრიანი ტურბო, ან მექანიკურდამჭირხნიანი TSI, რომლის სიმძლავრე 170 ცხენის ძალაა, მეორე კი ოთხცილინდრიანი დიზელი, რომლის სიმძლავრეც (125 ცხენის ძალა) ”პორშესთვის” ნაკლებად შესაფერისად მოსჩანს. როდსტერის ტოპ ვერსია კი 211-ცხენისძალიანი ტურბომოტორით აღიჭურვება, რომელიც ”ფოლკსვაგენ გოლფ GTI-დანაა” ცნობილი.

სხვათა შორის, ”ფოლკსვაგენი” თავის კონცეპტუალურ როდსტერ ”ბლიუ სპორტს” წარმოებისთვის უკვე ამზადებს და გვპირდება, რომ მის წარმოებას ორ წელიწადში დაიწყებს...