Thursday, September 30, 2010

სუპერ ელექტრომობილი საკუთარი იუბილესთვის

Jaguar C-X75 Concept

30 სექტემბერი

ინგლისურ დიდ კატას, რომელიც საავტომობილო სამყაროში ”იაგუარის” სახელითაა ცნობილი, დაარსებიდან 75 წელი შეუსრულდა და ამ თარიღთან დაკავშირებით, პარიზის შოუსთვის, გაზრდილი სვლის სიშორის მქონე ელექტრონული კონცეპტუალური სუპერ ავტომობილი მოამზადა, რომელსაც იუბილესთან დაკავშირებით, C-X75 უწოდა.

ავტომობილი ოთხი ელექტროძრავითაა აღჭურვილი, რომელთა ჯამური სიმძლავრე 780 ცხენის ძალას, მაბრუნი მომენტი კი 1600 ნიუტონმეტრს აღწევს. ელექტროძრავები ბორბლებშია მოთავსებული და მათვე ამოძრავებენ. გარდა ამისა, ავტომობილის შუაში გაზზე მომუშავე ორი ტურბინა განლაგდა, რომლებიც მათთან დაკავშირებული გენერატორების დახმარებით, ელექტროენერგიას გამოიმუშავებენ. თითოეული ტურბინის სიმძლავრე 180 ცხენის ძალაა.

მარტო ლითიუმ-იონურ აკუმულატორებში დაგროვილი ელექტროენერგია საკმარისია იმისათვის, რომ ელექტრომობილმა დაახლოებით 100 კილომეტრი გაიაროს. მაგრამ როდესაც ტურბინები ამუშავდება, ავტომობილის სვლის სიშორე 900 კილომეტრამდე იზრდება. რაც არანაკლებ მნიშვნელოვანია, ტურბინების მუშაობის დროს, ყოველი კილომეტრის გავლისას, C-X75 ატმოსფეროს მხოლოდ 28 გრამი ნახშირორჟანგით აბინძურებს.

ოთხი მძლავრი ელექტროძრავის დახმარებით, საიუბილეო სუპერ ელექტრომობილი, რომელიც 1350 კილოგრამს იწონის, ადგილიდან 100 კმ/სთ-მდე აჩქარებას 3.4 წამში ასწრებს, 80-დან 145 კმ/სთ-მდე მას 2.3 წამი ჰყოფნის. მაქსიმალური სიჩქარე კი 330 კმ/სთ-ს აღწევს.

ძრავის გარდა, ამ ავტომობილის აეროდინამიკური პაკეტიც ყურადღებას იმსახურებს. ჯერ ერთი, ძარა ალუმინისგანაა შესრულებული. მეორეც, აეროდინამიკური წინააღმდეგობის კოეფიციენტი საკმაოდ ცოტა - 0.32-ია. რაც მთავარია, ავტომობილის ძირზე განლაგებულია ეგრეთ წოდებული ვენტურის მილი, რომელიც მის ქვეშ გაუხშოებულ არეს წარმოქმნის და ასე მიიღება გრაუნდ ეფექტი. ეს კი ბორბლებზე დინამიკურ დატვირთვას ზრდის. აეროდინამიკური დანიშნულებით, ასევე გამოიყენება გამობოლქვილი გაზის ჭავლი.

და კიდევ ერთი საინტერესო ფაქტი: ”იაგუარის” განცხადებით, კონცეპტუალური C-X75-ის მიხედვით შეიძლება იმაზე მსჯელობაც, თუ როგორი გარეგნობა ექნება ამ კომპანიის ახალ ავტომობილებს.

”ლამბორგინი” მეექვსე ელემენტის მომთვინიერებელი გახდა

Lamborghini Sesto Elemento Concept, the Carbon Surprise

30 სექტემბერი

ყველაფერი უფრო მარტივადაა, ვიდრე ერთი შეხედვით ჩანს. ”ლამბორგინიმ” თავის კონცეპტუალურ სუპერ ავტომობილს, ”სესტო ელემენტო”, ანუ მეექვსე ელემენტი უწოდა და არა ”ჯოტა”, როგორც ნავარაუდები იყო. ავტომობილის შასი და ძარა, თითქმის მთლიანად ნახშირბადის კომპოზიტისგანაა დამზადებული. მეექვსე ელემენტიც ნახშირბადია, რომელსაც ქიმიური ელემენტების ტაბულაში მეექვსე ადგილი უკავია. თავისი სახელის აღსანიშნავად, კონცეპტუალური ავტომობილი შავ, ნახშირბადის ფერადაა შეღებილი. და, იტალიურმა კომპანიამ, ეს ნახშირბადოვანი საოცრება პარიზის საავტომობილო შოუზე გამოფინა.

ეს ავტომობილი არამხოლოდ იმითაა გამორჩეული, რომ მასში ფართოდაა გამოყენებული ნახშირბადის კომპოზიტი. მის შესაქმნელად, სანტ’აგატა ბოლონეზელებმა ახალი ტექნოლოგიური ციკლი გამოიყენეს, რომლის შემუშავებაშიც მონაწილეობა ვაშინგტონის უნივერსიტეტის და აეროკოსმოსურ კომპანია ”ბოინგის” სპეციალისტებმაც მიიღეს.

დაკიდევ, ავტომობილის პრემიერამდე ერთი თვის განმავლობაში, მისადმი მედიის ინტერესის გაღვივების მიზნით, ”ხარებმა” ინტერნეტით 6 ფოტო ტიზერი გამოაქვეყნეს, რომლითაც ნაწილ-ნაწილ გვიჩვენეს თავიანთი ”მეექვსე ელემენტის” სხვადასხვა დეტალები.

გარეგნულად, ”მეექვსე ელემენტი” სტელსის ტიპის თვითმფრინავს ჰგავს. საქარე მინა და ფსევდო კაპოტი თითქმის ერთ სიბრტყეშია მოთავსებული, რაც ”ლამბოს” ტრადიციული სტილია და ჰაერის მინიმალურ წინააღმდეგობას წარმოქმნის. ეს ფსევდო კაპოტი თითქმის მთლიანად ფარავს რადიატორის ბადეს, მის ქვეშ კი დიდი ზომის სპოილერია, რომელიც ჰაერს რადიატორისკენ და ფრთებისკენ მიმართავს.

ამავე სტილშია შესრულებული უკანა სპოილერი და მის ქვემოთ დიფუზორი, რომლებიც ასევე ჰაერის ნაკადის სწორად მიმართვას ემსახურებიან. იგივე დანიშნულებას ასრულებს უკანა ანტი ფრთა, რომლის საყრდენებთანაც ნამწვი აირების თითო გამოსაბოლქვია. ყურადღებას იმსახურებს კაპოტიც, რომელსაც იმდენივე სავენტილაციო ნახვრეტი აქვს, რამდენი ცილინდრიც V10 ძრავს. ამ ნახვრეტების წინ კი წყვილი ჰაერის ამღებია, რომელთა დანიშნულებაც ძრავისთვის ჰაერის ”შეგროვებაა”.

სიმარტივით გამოირჩევა ”სესტო ელემენტოს” ინტერიერი, რომელიც მინიმალისტურ სტილშია შესრულებული. მინიმალისტურში იმიტომ, რომ აქ ვერ ნახავთ მაჩვენებლების და დამხმარე მოწყობილობათა დაფას. საჭის რგოლის უკან ერთადერთ მრავალფუნქციურ მონიტორს წააწყდებით, რომელიც ყველაფერში დაგეხმარებათ. მოკლედ, საეჭვოა, რომ ამ სახით, ინტერიერმა ”სესტო ელემენტოს” საწარმოო ვერსიამდეც მიაღწიოს.

ალბათ საინტერესო იქნება, თუ გეტყვით, რომ კარბონმა ამ ავტომობილში ისეთ დეტალებშიც კი შეაღწია, როგორებიცაა კარდანის ლილვი, გამოსაბოლქვი მილები და საკიდარის წევები. ლაპარაკი აღარაა იმაზე, რომ მონოკოკური შასიც მთლიანად კარბონის კომპოზიტისგან დამზადდა. გამოსაბოლქვ მილებში კი კარბონის ბოჭკო შუშის ბოჭკოთია არმირებული და როგორც ”ლამბორგინი” ირწმუნება, ეს დეტალები 900 გრადუს ტემპერატურასაც კი უძლებს.

კარბონის ფართოდ გამოყენების შედეგი ისაა, რომ ”სესტო ელემენტო” სულ რაღაც 999 კილოგრამს იწონის. თუ გავითვალისწინებთ იმასაც, რომ 5.2-ლიტრიანი V10 ძრავი 570 ცხენის ძალას იძლევა (მისი მაბრუნი მომენტი ოთხ წამყვან ბორბალს შორის თანაბრად ნაწილდება), გამოვა, რომ ავტომობილის ყოველ 1.75 კილოგრამზე თითო ცხენის ძალა მოდის. ამ ფარდობის წყალობით, მას ადგილიდან 100 კმ/სთ სიჩქარის აკრეფა 2.5 წამში შეუძლია, მაქსიმალური სიჩქარე კი 354 კმ/სთ-ს მიაღწევს.

პარიზულ გამოფენაზე, ”ლამბოს” წარმომადგენლებს არაფერი უთქვამთ იმის შესახებ, აპირებენ, თუ არა ”სესტო ლემენტოს” წარმოებას. სამაგიეროდ, კომპანიის შეფი შტეფან ვინკლმანი აცხადებს, რომ ამ კონცეპციისთვის შემუშავებულ ტექნოლოგიებს, მომავალში სხვა მოდელების წარმოების დროსაც გამოიყენებენ.

Wednesday, September 29, 2010

”სესტო ელემენტო” - ”ლამბორგინის” ნახშირბადოვანი კონცეპცია

Lamborghini Sesto Elemento Concept, the Carbon Surprise

29 სექტემბერი

რა თქმა უნდა, ამ ავტომობილს საერთო არაფერი აქვს ჰოლივუდის ფილმ ”მეხუთე ელემენტთან” და არც უცხოპლანეტელებთან. იტალიური კომპანიის მარკეტოლოგებმა მარტივად გადაწყვიტეს - რამდენადაც ნახშირბადს ქიმიურ ელემენტთა ტაბულაში მე-6 ადგილი უკავია, ავტომობილსაც ამიტომ უწოდეს ”სესტო ელემენტო”, ანუ ”მეექვსე ელემენტი”.
და რა შუაშია ნახშირბადი? შუაში კი არა თავშია - ავტომობილის კონსტრუქცია თითქმის მთლიანად ნახშირბადის ბოჭკოს კომპოზიტისგანაა დამზადებული. ”ხარების” ამ მეექვსე ელემენტის დანიშნულება, პარიზის საავტომობილო შოუზე, ”ლამბორგინის” ტექნოლოგიური შესაძლებლობების დემონსტრაციაა. ეს კი იმისთვისაა საჭირო, რომ სანტ’ა აგატელები თავიანთი მომავალი სუპერ ავტომობილების წარმოებისას, ნახშირბადის კომპოზიტის ფართოდ გამოყენებას აპირებენ და ამ ავტომობილით, თავიანთი მომავალი პროდუქტების პროპაგანდას ეწევიან.

”ლამბორგინიმ” ამ კონცეპტუალური ავტომობილის ფოტო ტიზერების გამოქვეყნება, პარიზული შოუს დაწყებამდე ერთი თვით ადრე დაიწყო. ტიზერებში ხაზგასმით ჩანდა ნახშირბადის კომპოზიტით დამზადებული დეტალები. თუმცა, ფოტო ტიზერების კომენტირებისას, დასავლური საავტომობილო გამოცემები გამოთქვამდნენ ვარაუდს, რომ იტალიურ კომპანიას პარიზისთვის თავისი უახლესი სუპერ ავტომობილი, სახელად ”ჯოტა” ჰქონდა მომზადებული და ტიზერებით მისადმი ინტერესს წინასწარ აღვივებდა.

ფრანგული ვებგვერდი ”ბლოგ აუტომობილ” გვაუწყებს, რომ კარბონის ფართოდ გამოყენების წყალობით, ”სესტო ელემენტო” სულ რაღაც 999 კილოგრამს იწონის. მის ბაზაში კი ის მძლავრი V10 აგრეგატია ჩადგმული, რომელიც მოდელ ”სუპერლეგარას” ემსახურება. იმავე გამოცების ცნობით, ამ ძრავის მეშვეობით, ავტომობილი ადგილიდან 100 კმ/სთ სიჩქარის აკრეფას 2.5 წამში შეძლებს, მისი მაქსიმალური სიჩქარე კი 354 კმ/სთ იქნება.

დაბოლოს, ამ ინფორმაციის წყარო ჯერ მხოლოდ ზემოთ ნახსენები ფრანგული საიტია. ასე რომ, მის ოფიციალურ დადასტურებას ახლა ”ლამბორგინისგან უნდა ველოდოთ. ცდა კი დიდხანს არ მოგვიწევს - ყველაფერი ამ დღეებში, პარიზის ავტო შოუს დაწყებისთანავე გაირკვევა...

Tuesday, September 28, 2010

”პორშეს” ახალ უგზოობის მოდელს ”კახუნს” დაარქმევენ

New Porsche SUV could be called Cajun

28 სექტემბერი

”აუდი Q5” შესაძლოა ”პორშე კახუნის” დონორი გახდეს
..............................
”პორშე” თავისი სამოდელო გამის გაფართოებას აგრძელებს. დიდი ზომის უგზოობის ”კაიენისა” და ოთხკარიან კუპე ”პანამერას” წარმოების დაწყების შემდეგ, ჯერი უგზოობის კომპაქტურ ავტომობილზე დგება, რომელსაც, ”ფოლკსვაგენის” მთავარ აღმასრულებელ მარტინ ვინტერკორნის თქმით, ალბათ ”კახუნს” უწოდებენ.

”პორშე” შარშანდელს შემდეგ ”ფოლკსვაგენის” დიდი ოჯახის წევრია, რაც ორივე კომპანიას ერთმანეთის პლატფორმების ფართოდ გამოყენების საშუალებას აძლევს. თუმცა, ისიც უნდა ითქვას, რომ მოდელი ”კაიენი” ამ ორი კომპანიის მჭიდრო თანამშრომლობის კლასიკური შედეგია - ”კაიენს”, ”ფოლკსვაგენ ტუარეგსა” და ”აუდი Q7-ს” საერთო პლატფორმა აქვთ. სხვათა შორის, ”კაიენი” ის ავტომობილია, რომელმაც ”პორშეს” უზარმაზარი მოგება მოუტანა და ამ მოგების წყალობით, ის გაცილებით დიდი ზომის ”ფოლკსვაგენის” მიერთებას ლამობდა, თუმცა საბოლოოდ პირიქით კი მოხდა.

”კაიენის” ისტორიაც ჩვეულებრივი ესკიზით დაიწყო...
..............................

ვინტერკორნის გეგმით, ”პორშეს” გაყიდვების მოცუობამ მალე 150 000 ავტომობილს უნდა მიაღწიოს. ამისათვის კი, უგზოობის კომპაქტური მოდელის გარდა, მის გეგმაში პატარა სპორტული ავტომობილის გამოშვებაც შედის. გერმანულ გამოცემა ”დერ შპიგელთან” საუბრისას, ვინტერკორნმა განაცხადა, რომ ”კახუნის” გაყიდვები 2014 წელს დაიწყება.

ახალი ავტომობილის შესახებ ჯერ ინფორმაცია არ ვრცელდება. მოსალოდნელია, რომ ის ”აუდი Q5-ის” მოდერნიზებულ პლატფორმაზე აიგება და ძრავებსაც ”ოთხი რგოლისგან” ისესხებს. რა თქმა უნდა, ძრავებსაც და ტრანსმისიასაც მოდერნიზაცია ჩაუტარდება.

”კახუნის” და კომპაქტური სპორტული მოდელის გარდა, ”პორშეს” სუპერ ავტომობილის გამოშვებაც გადაწყვეტილი აქვს, რომელიც შარშანდელ კონცეპტუალურ ”პორშე 918 სპაიდერის” მოტივებზე შეიქმნება და რომელსაც ალბათ ჰიბრიდული ამძრავი აგრეგატები ექნება.

Sunday, September 26, 2010

”ასტონ მარტინი” ლე მანისთვის ემზადება

Aston Martin Preparing LMP1 Race Car for 2011 Le Mans

26 სექტემბერი

”ასტონ მარტინი” იმ იშვიათ კომპანიათაგანია, რომლის ეკიპაჟსაც ლე მანის ლეგენდარული 24-საათიანი რბოლა აქვს მოგებული და იცის ამ გამარჯვების ფასი. მაგრამ ინგლისურ კომპანიას თავის ისტორიაში, სარტეს ტრასაზე ერთადერთი ტრიუმფი (1959 წელს) უწერია. ახლახანს კი, დიდი ტურიზმის კლასში, კიდევ ერთხელ დაიკავა ლე მანის კვარცხლბეკის უმაღლესი საფეხური.

მაგრამ კლასში გამარჯვება ვერანაირად ვერ შეედრება აბსოლუტურ გამარჯვებას. ჰოდა, ინგლისურმა კომპანიამაც, სპორტული პროტოტიპის დამზადეა გადაწყვიტა, რომლითაც მომავალ სეზონში, ”აუდი” და ”პეჟოს” დიზელისძრავიან მონსტრებს შეეცილება.

კომპანიის ინჟინრებმა ახალ სარბოლ ავტომობილზე მუშაობა სუფთა ფურცლიდან დაიწყეს. ის ღიაძარიანი სარბოლი პროტოტიპი იქნება და მონოკოკურ შასის დაეყრდნობა. უკვე ცნობილია ისიც, რომ მის ბაზაში ბენზინზე მომუშავე შიდაწვის ძრავს ჩადგამენ, რომელსაც ”ასტონ მარტინი” სპეციალურად, ამ სარბოლი მანქანისთვის შექმნის.

”ბოლო წლებში, ლე მანზე ბენზინის ძრავის მქონე მანქანებით, დიზელისძრავიანებთან გამკლავება პრაქტიკულად შეუძლებელია. მაგრამ მომავალ სეზონში, რეგლამენტი დიზელის ძრავებისთვის გარკვეულ შეზღუდვებს აწესებს. ამიტომ, ჩვენ იმედი გვაქვს, რომ სპეციალურად ლე მანისთვის შექმნილი შასითა და ძრავით, გამარჯვებისთვის ბრძოლას შევძლებთ”, - ამბობს კომპანიის მთავარი აღმასრულებელი დევიდ რიჩარდსი.

უნდა ითქვას, რომ ლე მანზე ტრიუმფის შემდეგ, ”ასტონ მარტინს” სპეციალურად რბოლებისთვის, მანქანები აღარ შეუქმნია. კარგა ხანს, ამ კომპანიას ისიც აკმაყოფილებდა, რომ სუპერაგენტ ჯეიმს ბონდს ფილმებში უწევდა პარტნიორობას. მაგრამ დრო შეიცვალა. ბონდმა რამდენჯერმე სხვა მანქანით ნავარდი არჩია, ”ასტონი” კი წარმოების გაფართოებას აპირებს და ბუნებრივია, რეკლამის დამატებითი რესურსი ესაჭიროება. ასეთად კი, რბოლების დიდმა მოყვარულმა რიჩარდსმა (თავადაც ყოფილმა მრბოლმა) თავისი კომპანიის ლე მანზე გაყვანა გადაწყვიტა (რა თქმა უნდა, არა ერთპიროვნულად).

პროტოტიპისთვის განკუთვნილი ძრავი უკვე დამზადებულია და ის კომპანიის მთავარ ტექნიკურ ცენტრში, რომელიც ბანბერიში (ინგლისი) მდებარეობს, სასტენდო ტესტებს უკვე გადის. მანქანის ტესტების დაწყება კი მომავალი წლის დასაწყისში იგეგმება.

Saturday, September 25, 2010

”რენო კანგუ ექსპრეს Z.E.” - პირველი ელექტროვენი მსოფლიოში

Renault Reveals All-Electric 2011 Kangoo Z.E. Van

25 სექტემბერი

გერმანიის ქალაქ ჰანოვერში, კომერციული ავტომობილების შოუზე, ”რენომ” წარმოებისთვის მომზადებული ელექტროვენი - ”კანგუ ექსპრეს Z.E.” წარადგინა. ეს პირველი მერცხალია იმ ელექტრომობილებს შორის, რომლებსაც ფრანგული კომპანია მალე გამოუშვებს ბაზარზე.

ელექტრომობილი ლითიუმ-იონური აკუმულატორების ბლოკითაა აღჭურვილი, რომლის ტევადობაც საათში 22 კილოვატია. ეს კი საკმარისია იმისათვის, რომ ”კანგუ ექსპრეს Z.E.-მ” ერთი სრული დამუხტვით 160 კილომეტრი გაიაროს. საყოფაცხოვრებო ქსელიდან აკუმულატორების სრული დამუხტვისთვის კი 6-8 საათია საჭირო. რაც შეეხება ელექტროძრავს, მისი სიმძლავრე სულ რაღაც 60 ცხენის ძალაა, თუმცა 226 ნიუტონმეტრ მაბრუნ მომენტსაც გამოიმუშავებს. ელექტრომობილის მაქსიმალური სიჩქარე შეზღუდულია (ენერგიის დაზოგვის მიზნით) და ის 130 კმ/სთ-ს შეადგენს.

ევროპაში ”რენო კანგუ ექსპრეს Z.E.” (აბრევიატურა Z.E. ზრო ემიშნს, ანუ ნულოვან გამონაბოლქვს ნიშნავს) 20 000 ევრო ეღირება. ამას გამოაკლდება ელექტრომობილებისთვის განკუთვნილი სუბსიდია, რომელიც 5 000 ევროს შეადგენს და გამოდის, რომ ფასი მხოლოდ 15 000 ევრო იქნება. სხვათა შორის, ეს შეღავათი არ იმოქმედებს ბრიტანეთში, სადაც ის მსუბუქ კომერციულ ავტომობილადაა კლასიფიცირებული. მყიდველს შეუძლია ავტომობილი ლიზინგით შეიძინოს, თუმცა ამ შემთხვევაში რამდენად შეიცვლება (გაიზრდება) ფასი, ეს ჯერ უცნობია.

ელექტრომობილის ასეთ დაბალ ფასს ის ფაქტი განაპირობებს, რომ მასში აკუმულატორების ფასი არ შედის. ფრანგული კომპანიის განცხადებით, ელექტრომობილის მყიდველი აკუმულატორებს ლიზინგით მიიღებს და მათში თვეში 72 ევროს გადახდა მოუწევს. ლიზინგის პერიოდი 4 წელზეა გათვლილი. თან ამ პერიოდში, გასავლელი მანძილის ლიმიტი 14 490 კილომეტრია, რაც კომერციული ავტომობილისთვის საკმაოდ ცოტაა.

სამაგიეროდ, არნახულად იაფი ჯდება აკუმულატორების დამუხტვა. ელექტროენრგიაზე ფასის მიხედვით, აკუმულატორების სრული დამუხტვა, რაც ელექტრომობილს 160 კილომეტრს გაატარებს, 1-2 ევრო ეღირება.

”ვოლვო” რევოლუციურ აკუმულატორებზე მუშაობს

Volvo Working on Revolutionary Battery

25 სექტემბერი

საავტომობილო ინდუსტრიაში ახალი რევოლუცია მზადდება, მისი ავტორი კი, თუ რაიმე გაუთვალისწინებელი არ მოხდა, გაჩინურებული შვედური კომპანია ”ვოლვო” გახდება. რევოლუცია კი აკუმულატორებს შეეხება. თუ ”ვოლვომ” თავისი გამოგონების დანერგვა შეძლო, მალე აკუმულატორები ახლანდელ სახეს დაკარგავენ და... ავტომობილის ძარის ელემენტების სახით მოგვევლინებიან!

აკუმულატორი თანამედროვე ავტომობილების ერთ-ერთი მთავარი ელემენტი ხდება. სწორედ მისგან მიიღებენ ელექტრომობილები ენერგიას. მაგრამ თანამედროვე ლითიუმ-იონური აკუმულატორები სიძვირით გამოირჩევა და იმდენ ენერგიასაც ვერ ინახავენ, რამდენსაც ავტომწარმოებლები და რა თქმა უნდა, ელექტრომობილების მყიდველები ისურვებდნენ. ყველა ამ პრობლემის ერთი ხელის მოსმით მოგვარებას კი ”ვოლვო” გვპირდება.

პარიზის საავტომობილო შოუს გახსნამდე ერთი კვირით ადრე, ”ვოლვომ” გამოაცხადა, რომ მუშაობს ავტომობილის შესაქმნელად, რომელსაც ელექტრომობილების რადიკალურად შეცვლა შეუძლია. კვლევითი სამუშაოსა და საცდელი პროტოტიპი შექმნას, წინასწარი ვარაუდით, დაახლოებით სამი წელი მაინც დასჭირდება.

რაოდენ საოცარიც უნდა იყოს, ახალი ტიპის აკუმულატორის ფუნქციას ავტომობილის ძარის ელემენტები - კარებები, სახურავი და კაპოტი შეასრულებს. როგორ მოხდება ეს, შვედური კომპანია ამაზე დაწვრილებით არაფერს ამბობს. თუმცა, მთავარი ისაა, რომ ძარის აღნიშნული ელემენტები სამფენოვანი იქნება და ის იმ მასალებისგან დამზადდება, რომლებსაც ელექტროენეგიის დაგროვების უნარი შესწევს.

პროექტი თავიდან ლონდონის სამეფო სკოლის სპეციალისტებმა დაიწყეს. თანდათან კვლევაში 9 კომპანია და ინსტიტუტი ჩაება, მათ შორის კი საავტომობილო კომპანია მხოლოდ ერთი - ”ვოლვო” იყო. პანელის დასამზადებლად, მკვლევარები კარბონის ბოჭკოსა და პოლიმერულ ფისს იყენებენ. საბოლოო პროდუქტს, თანამედროვე აკუმულატორებთან შედარებით, მეტი ენერგიის დაგროვებაც შეუძლია და მისი დამუხტვაც გაცილებით სწრაფად ხდება.

ახალი მასალა მტკიცეცაა და დრეკადიც. მისი თვისებები, ავტომწარმოებლებს, ამ მასალის ფართოდ გამოყენების საშუალებას მისცემს. ამ მასალის (რომელსაც ჯერ სახელიც არ აქვს) კიდევ ერთი თვისება სიმსუბუქეა. უფრო კონკრეტულად, ის ფოლადზე დაახლოებით 15 პროცენტით მსუბუქიცაა...

Friday, September 24, 2010

”ნისანმა” ელექტრომობილ ”ლიფზე” 20 000-ზე მეტი შეკვეთა მიიღო

Nissan Tops 20,000 Reservations for the LEAF

24 სექტემბერი

იაპონური კომპანია ”ნისანი” მალე დაიწყებს მსოფლიოში პირველი სერიული ელექტრომობილის - ”ნისან ლიფის” წარმოებას, მისი გაყიდვების დაწყებამდე ნახევარი წლით ადრე კი მასზე შეკვეთების მიღება დაიწყო. კომპანია იმედოვნებდა, რომ დეკემბრამდე დაახლოებით 20 000 შეკვეთის მიღებას მოასწრებდა. მაგრამ პროგნოზი დაგეგმილზე სამი თვით ადრე შესრულდა.

მალე ”ნისანი” ამერიკაში, ”ნისან ლიფის” ძირითად ბაზარზე, ამ ელექტრომობილის სარეკლამო ტურს დაიწყებს, რომელიც შეერთებული შტატების 20-ზე მეტ ქალაქს მოივლის. ამ ქალაქებში კი იმ ადამიანებს, რომლებმაც ავტომობილზე წინასწარი შეკვეთები განათავსეს და დეპოზიტიც შეიტანეს, ”ლიფის” ტესტირების საშუალება მიეცემათ.

”ნისანმა” გამოაცხადა, რომ უკვე დაასრულა ”ლიფზე” შეკვეთების პირველი ფაზის მიღება, მეორე ფაზას კი მერმისამდე არ დაიწყებს. ახლა იაპონური კომპანიის მთავარი მიზანი ისაა, რომ მათ, ვინც ელექტრომობილი უკვე შეუკვეთა, უმაღლეს დონეზე მოემსახუროს.

”დღეს უკვე შეგვიძლია განვაცხადოთ, რომ 20 000-მა ადამიანმა ”ნისან ლიფი” და ნულოვანი გამონაბოლქვის მომავალი აირჩია. ახლა ჩვენი და დილერების ჯერია, რათა მყიდველს უმაღლესი დონის მომსახურება შევთავაზოთ და დავარწმუნოთ იმაში, რომ ელექტრომობილებით სარგებლობა მათთვის მოსახერხებელი იქნება. ელექტრომობილების მართვის გამოცდილების მისაღებად კი ყველას ვეპატიჟბით ჩვენს ამერიკულ ტურზე, რომელიც ამერიკის ქალაქებს მოივლის”, - განაცხადა ”ნისან ნორთ ამერიკას” გაყიდვების და მარკეტინგის უფროსმა ვიცე პრეზიდენტმა ბრაიან ქეროლაინმა.

”ნისან ლიფის” შემკვეთებისთვის მიწოდება დეკემბერში კალიფორნიაში დაიწყება. შემდეგ ორეგონელი, უოშინგტონელი, არიზონელი და ტენესელი შემკვეთებიც მიიღებენ. მომავალი წლიდან ტექსასისა და ჰავაის ჯერიც დადგება. ამ შტატების შემდეგ კი ამ ელექტრომობილს ”ნისანის” დილერები მთელს მსოფლიოში მიიღებენ.

Thursday, September 23, 2010

”ოპელი” ”კორსაზე” პატარა მიკროლიტრაჟიან ავტომობილს გამოუშვებს

Opel Vauxhall Announce New Small Car below the Corsa

23 სექტემბერი

აღმოსავლეთ გერმანიის ქალაქ აიზენახში მდებარე ქარხანაში, ”ოპელის” მთავარმა აღმასრულებელმა ნიკ რილიმ სპეციალური პრესკონფერენცია გამართა, რომელზეც თავისი კომპანიის სამომავლო გეგმებზე ისაუბრა. მთავარი, რაც მან გამოაცხადა, ის იყო, რომ ”ოპელი” 2013 წელს სრულიად ახალი პატარა ავტომობილის გამოშვებას დაიწყებს, რომელიც ჰეჩბეკ ”კორსაზე” მცირე ზომისა იქნება. რილის თქმით, ”ეს ახალი პროდუქტი, კომპანიის განვითარების მნიშვნელოვანი ელემენტი გახდება”.

სავარაუდოდ, ავტომობილი, რომელსაც ჯერ სახელიც არ აქვს, ბაზარზე კონკურენციას ”ფორდ კა-ს” (რომელიც ფიატ 500-ის პლატფორმაზეა ბაზირებული) და ”ფოლკსვაგენის” ”ლუპოს” (ამ ავტომობილის გამოშვება ვლფსბურგელებს ჯერ არ დაუწყიათ) გაუწევს. რილის თქმით, ეს ავტომობილი განკუთვნილი იქნება იმ მყიდველისთვის, ვისაც ”მცირე ზომის, ეკონომიური, ქალაქის პირობებში მეტად მანევრული მანქანა სჭირდება და კომფორტზე, დიზაინსა და ტექნოლოგიებზე კომპრომისის გაწევას არ აპირებს”. გარდა ამისა, ახალი მინი ავტომობილი გახდება ბაზისი ელექტრომობილისთვის, რომლის გამოშვებასაც ”ოპელი” ასევე აპირებს.

”ჯენერალ მოტორსის” ევროპული შტო ახალი ავტომობილის შემუშავებასა და წარმოებისთვის მომზადებისთვის 90 მილიონი ევროს ინვესტიციას გაიღებს. მინი ავტომობილს აიზენახის ქარხანა გამოუშვებს, რომელიც ”კორსას” წარმოებაზეა სპეციალიზებული. რილის თქმით, გადაწყვეტილება იმის შესახებ, რომ ახალ ავტომობილს აიზენახში გამოუშვებენ, ”ოპელის” სარაგოსას ქარხანასაც ახეირებს, რომელიც ასევე ”კორსას” აწარმოებს - ესპანურ ქარხანაში ”კორსას” წარმოება გაიზრდება.

რილი ამბობს, რომ ახალი მინი ავტომობილის წარმოებით, ”ოპელი” მისთვის უჩვეულო ახალ სეგმენტში შეაბიჯებს. თუმცა, ეს ერთადერთი სეგმენტი არაა, სადაც ის შეღწევას ეცდება. გერმანული კომპანია უგზოობის კომპაქტური მოდელის წარმოებასაც გეგმავს, გარდა ამისა, დაუბრუნდება სპორტული კუპეების სეგმენტს, რისთვისაც შესაძლოა, ორი მივიწყებული სახელი - ”მანტა” და ”კალიბრა” აღადგინოს.

აქამდე ”ოპელი” მინიავტომობილების სეგმენტში არ მუშაობდა. ამის მიზეზი კი ის იყო, რომ გერმანულ კომპანიას ხელი არ უნდა შეეშალა ”ჯენერალ მოტორსის” კიდევ ერთი მარკის - შევროლესთვის, რომელიც ევროპაში სწორედ მინიავტომობილ ”ავეოს” აწარმოებს.

მაგრამ ამერიკული კონგლომერატის რეორგანიზაციის შემდეგ, რილიმ მისი ხელმძღვანელობა დაარწმუნა იმაში, რომ ”ოპელისთვის” სასიცოცხლო მნიშვნელობა აქვს ასეთი ავტომობილების წარმოებას, რადგან ევროპელი მყიდველი სულ უფრო ხშირად აკეთებს არჩევანს მცირე, ეკონომიურ ავტომობილებზე.

სხვათა შორის, 2004 წელს, ჟენევის საავტომობილო შოუზე, ”ოპელმა” ჯუჯა კონცეპტუალური ავტომობილი ”ტრიქსი” (სურათზე) წარადგინა, მაგრამ ის მანქანა კონცეპციის დონეს ვერ გასცდა. მაშინ ”გენერლებმა” გადაწყვიტეს, რომ ევროპაში მათი ყველაზე იაფფასიანი ავტომობილი ”შევროლე სპარკი” (იგივე დეუ მატისი) ყოფილიყო.

მაგრამ მას შემდეგ, ბევრი რამ შეიცვალა, ”ოპელს” მეტი დამოუკიდებლობა მიანიჭეს და გარდა იმისა, რომ ეს კომპანია თანდათან ზრდის თავის საწარმოო პროგრამას, ევროპის გარეთ, მისთვის აქამდე უცნობ ბაზრებზე - ჩინეთში და სამხრეთ ამერიკაში გასვლასაც გეგმავს. მოკლედ, ”ოპელიც” მალე გლობალური ბრენდი გახდება, ასეთს კი სრულფასოვანი სამოდელო გამა უნდა ჰქონდეს...

Tuesday, September 21, 2010

ელექტრომობილი ელექტროციკლის წინააღმდეგ - გამარჯვებული გარემო დარჩება

Citroen Survolt Vs Agni Z2

21 სექტემბერი

ამ ფოტოებზე ელექტროძრავით აღჭურვილი ორი სარბოლი მანქანაა - ერთი, ოთხბორბლიანი რომაა, იმას ”სიტროენ სარვოლტი” ჰქვია. მეორე კი, ორბორბალა ”აგნი Z2”. ისინი ერთმანეთს შეაჯიბრეს და ვინ გაიმარჯვა? ამის თაობაზე, ამ საინტერესო პაექრობის ორგანიზატორი, ფრანგული კომპანია ”სიტროენი” არაფერს ამბობს.

სამაგიეროდ, ვინც ამ ინფორმაციას წაიკითხავს, ან შესაბამის ვიდეოს იხილავს (http://www.youtube.com/watch?v=HgoXticUgvU&feature=player_embedded), მას გონებაში სამუდამოდ აღებეჭდება, რომ ელექტრული აგრეგატით აღჭურვილ მანქანებსაც შეუძლიათ რბოლა. და, როგორც მათი პილოტები ამბობენ, ძალიან ტემპერამენტიანებიც არიან. ნუ, რა თქმა უნდა, არა იმდენად, როგორც ვთქვათ, ”ფერარის”, ან ”ლამბორგინის” კვიცები და ხარები, მაგრამ საკმაოდ ტემპერამენტიანები იმისათვის, რომ ობივატელს ელექტრომობილებზე წარმოდგენა შეუცვალონ და მისადმი დამოკიდებულება შეაცვლევინონ. ეს კი იმის საწინდარი იქნება, რომ როდესაც კომპანიები ეკოლოგიურად სუფთა მანქანების წარმოებას მასობრივად მიჰყოფენ ხელს, ბაზარი და შესაბამისად, მყიდველთა ძირითადი კონტინგენტი, ამისათვის მაქსიმალურად მომზადებული დახვდებათ.

შეჯიბრის ორგანიზატორებმა ორივე ელექტრული მანქანის პილოტებად ქალები მიიწვიეს. ”სიტროენის” საჭეს ლეგენდარული ბელგიელი ჯეკი იქსის (ფორმულა 1-ის ყოფილი პილოტი და ლე მანის და დაკარის არაერთგზის ტრიუმფატორი) ქალიშვილი ვანინა იქსი მიუჯდა, ვინც თავადაც მამის კვალს გაჰყვა და ლე მანის სერიასა და ტურიზმის კლასის ჩემპიონატებში ასპარეზობს (რა თქმა უნდა, სახელოვან მამას ვერ შეედრება), ელექტროციკლის უნაგირი კი ჯენი ტინმუთს ჩააბარეს, რომელიც ალბიონზე უსწრაფეს ქალად ითვლება.

ალბათ მიხვდით, შეჯიბრი საჩვენებელი იყო და მისი დანიშნულება გამარჯვებულის გამოვლენა არ ყოფილა. ფინიშის შემდეგ კი მისი მონაწილენი აღტაცებას ვერ მალავდნენ.

”ფანტასტიური შეგრძნება მქონდა. სხვა თუ არაფერი, ამ ტიპის პირველ ელექტრულ დუელში მივიღე მონაწილეობა. მანქანები ხმაურის გარეშე მოძრაობდნენ და ეს ჩვენთვის განსაკუთრებული გამოწვევა იყო. საერთოდ, როდესაც ტრასაზე ხარ, მეტოქის ადგილმდებარეობას მისი მანქანის ხმის მიხედვით ხვდები. მაგრამ ელექტრული მანქანები ხომ უხმაუროა. მოკლედ, დიდი სიამოვნება მივიღე და მიხარია, რომ ასეთ უნიკალურ შეჯიბრში მივიღე მონაწილეობა”, - განაცხადა ვანინა იქსმა.

მოტოციკლისა რა გითხრათ, მაგრამ ”სიტროენ სარვოლტს” უნიკალური (სარბოლი ავტომობილის შესაფერისი) აგებულება აქვს. მისი შასი ფოლადის მილებისგანაა შეკრული, ძარა კი კარბონის კომპოზიტის ნაწარმია. მსუბუქი მასალების უხვად გამოყენების წყალობით, ელექტრომობილი მხოლოდ 1.15 ტონას იწონის, რაც მის შესანიშნავ დინამიურობას განაპირობებს.

მის მოძრაობას ორი ელექტროძრავი უზრუნველყოფს, რომელთა ჯამური სიმძლავრეც 300 ცხენის ძალას (5 000 ბრ/წთ-ზე) აღწევს. მათი მეშვეობით, ”სარვოლტს” მაქსიმუმ 260 კმ/სთ სიჩქარის აკრეფა შეუძლია, ადგილიდან 100 კმ/სთ-მდე ასაჩქარებლად კი მას 5 წამზე ნაკლები ჰყოფნის.

რა თქმა უნდა, გაცილებით მსუბუქია ელექტრომოტოციკლი, რომელიც მხოლოდ 220 კილოგრამს იწონის. სამაგიეროდ, მას უფრო სუსტი, 65-ცხენისძალიანი ელექტროძრავი ემსახურება. და მაინც, მისი აჩქარება გაცილებით უკეთესია - 0-100 კმ/სთ-მდე მხოლოდ 3.5 წამში. სამაგიეროდ, მისი მაქსიმალური სიჩქარე მხოლოდ 210 კმ/სთ-ია.

Monday, September 20, 2010

”პეჟო” ჰეჩბეკ 206-ის ევროპაში წარმოებას 2013 წელს შეწყვეტს

Peugeot 206 European Production to End by 2013

20 სექტემბერი

მიუხედავად იმისა, რომ ფრანგული კომპანია ”პეჟო” მოდელ 207-ის წარმოებას 2006 წელს შეუდგა, კონვეიერიდან ჯერაც არ მოუხსნია მისი წინამორბედი 206, რომელიც ევროპულ ბაზარზე პირველად 1998 წელს გამოჩნდა და აქამდე კარგი გაყიდვებით გამოირჩევა. თანამედროვე ავტოინდუსტრიაში ავტომობილის ასეთი ხანდაზმულობა დიდი იშვიათობაა. ძნელია იმის გახსენება, თუ ბოლო ორ ათწლეულში, ბაზარზე უცვლელად 13 წელი რომელმა სხვა ავტომობილმა გაძლო.

უფრო მეტიც, სამი წლის შემდეგ, ევროპაში მისი წარმოება მხოლოდ იმ მარტივი მიზეზის გამო შეწყდება, რომ ის ვეღარ დააკმაყოფილებს ევროკავშირის რიგ კანონებს. ამასთან, ევროპაში კონვეიერიდან კი მოიხსნება, მაგრამ 206-ის სხვადასხვა მოდიფიკაციის წარმოება ჩინეთში, ირანსა და სამხრეთ ამერიკაში კვლავაც გაგრძელდება.

ჰეჩბეკ 206-ის წარმოება ”პეჟომ” 1998 წელს დაიწყო და მაშინვე ამ სუბკომპაქტურმა ავტომობილმა დიდი პოპულარობა მოიპოვა. ჯერ ერთი, ის ლეგენდარული 205-ის შთამომავალი იყო. მეორეც, მყიდველს საკმაოდ ხელმისაწვდომ ფასში მიეწოდებოდა. დებიუტისთანავე, 206 ფრანგული კომპანიის ბესტსელერი გახდა. ”ლომებმა” რვა წლის განმავლობაში, 5 მილიონზე მეტი 206 გაყიდეს. შემდეგ კი ბაზარზე მისი შემცვლელი 207 გამოჩნდა, თუმცა ”პეჟოს” ძველი მოდელის წარმოების გაგრძელებაზე ბევრი არც უფიქრია.

თავიდან 206 მხოლოდ ჰეჩბეკის ძარით იყიდებოდა. 2001 წელს კი პლატფორმაზე ორი სხვა ძარაც დადგეს. ბაზარზე ჯერ უნივერსალი 206 SW გამოჩნდა, შემდგ კი - კუპე-კაბრიოლეტი 206 CC. ამ უკანასკნელს მეტალის დასაკეცი სახურავი ჰქონდა, რამაც მისი პოპულარობა განაპირობა. გავიდა კიდვ ოტხი წელი და ”ლომებმა” ბაზარზე ოთხკარიანი სედანისძარიანი 206 გამოიტანეს. თუმცა, ისიც სათქმელია, რომ ეს უკანასკნელი მხოლოდ ზოგიერთი განვითარებადი ქვეყნის ბაზარზე (მათ შორის, საქართველოშიც) იყიდება.

”სიტროენის” და ”ლაკოსტის” ერთობლივი კონცეპცია

Citroen Lacoste Concept Unveiled Before Paris Debut

20 სექტემბერი

სერიულ სიახლეებთან ერთად, ”სიტროენმა” პარიზული საავტომობილო რანდევუსთვის ერთი კონცეპტუალური მოდელიც შეიმუშავა, რომლის შექმნაში მონაწილეობა სპორტული ეკიპირების მწარმოებელი კომპანია ”ლაკოსტის” სპეციალისტებმაც მიიღეს. ავტომობილს მისი შემქმნელების სახელი ჰქვია - ”სიტროენ ლაკოსტი”.
ეს მხიარული კონცეპტუალური ავტომობილი თავისი უცნაური გარეგნობით გამოირჩევა. აშკარაა, რომ შემქმნელებმა ის გართობის და სპორტული სტილის მოყვარული ახალგაზრდა ადამიანებისთვის შექმნეს. მაგრამ, სპორტული ამ შემთხვევაში ავტომობილის სპორტულობას სულაც არ ნიშნავს.
”სიტროენ ლაკოტს” ისეთივე მომცრო გაბარიტები აქვს, როგორიც ფრანგული საავტომობილო კომპანიის ყველაზე პატარა ავტომობილს - ჰეჩბეკ C1-ს. მისი სიგრძე სულ რაღაც 3.450 მეტრია, სიგანე 1.800 მეტრი, სიმაღლე კი 1.520 მეტრი. სამაგიეროდ, შედარებით გრძელი ბაზა (2.300 მეტრი) აქვს. სხვათა შორის, C1 კონცეპტ ”ლაკოსტზე” მოკლეცაა, ვიწროც და დაბალიც. სერიულ ჯუჯას მხოლოდ ბაზა აქვს უფრო გრძელი (სულ რაღაც, 40 მილიმეტრით).
რაც შეეხება ძარას, ძნელია, ის რომელიმე არსებულ კლასს შეადარო. ჩვეულებრივი ღია ავტომობილებისგან ჰანსხვავებით, მისი მგზავრების თავებს ხიფათისგან გრძივი რკალი იცავს. ჩვეულებრივ, ღია ავტომობილებში ამ დანიშნულებას განივი რკალი ასრულებს ხოლმე. დაცვითი ფუნქციების გარდა, რკალს სხვა დანიშნულებაც აქვს. კერძოდ, მასზე მოთავსებულია სახელურები, რომლებსაც მგზავრები ავტომობილში ჩაჯდომისას დაეყრდნობიან. გარდა ამისა, რკალში ჩამალულია გასაშლელი სახურავი, რომელიც მოყვითალო ფერისაა და თან გამჭვირვალე. ასე რომ, თუ მოულოდნელად გაწვიმდა, სეირნობისას მსწრაფლ გადახურვაც შეიძლება და თან ისე, რომ თავი მაინც ღია მანქანაში იგრძნო.
თუმცა, წვიმისგან და ქარისგან სრულად დაცული მაინც ვერ იქნებით, რადგან ”სიტროენ ლაკოსტს” არ გააჩნია კარები. და თუ მძღოლისა და წინა მგზავრისთვის ჩაჯდომის გასაადვილებლად, ძარას სპეციალური ჭრილი აქვს, უკანა მგზავრები მასში მხოლოდ ჩახტომას თუ შეძლებენ. რას იზამთ, ესეც სპორტული სტილია. გარდა ამისა, ავტომობილს არ გააჩნია საბარგული.

გარდა იმისა, რომ მის შექმნაში (სიმბოლური) მონაწილეობა ავტომობილებთან არანაირი შეხების არმქონე ”ლაკოსტმა” მიიღო, ეს ავტომობილი ბევრი ორიგინალური დიზაინის დეტალითაც გამოირჩევა. ასეთია მაგალითად საჭის რბოლი, რომელიც ველოსიპედის ბორბალს მოგაგონებთ. თვითონ ”სიტროენ ლაკოსტიც” ხომ უცნაური ფორმებით გამოირჩევა. ეს ითქმის მის სავარძლებზე და ბორბლებზე. ასევე მაჩვენებლების დაფაზე, საქარე შუშასა და ბამპერებზე, ასევე წინა და უკანა ფარებზე. რაც მთავარია, ყველაფერი, მათ შორის, ფერების შეხამებაც, დახვეწილი გემოვნებითაა შესრულებული.

კონცეპციის ავტორები არაფერს ამბობენ მათი ქმნილების აგრეგატებზე და სხვა აღჭურვილობაზე. შესაძლოა, ეს ”საიდუმლო” პარიზში, პრეზენტაციის დროს გაიხსნას. თუმცა, ამას დიდი მნიშვნელობა მაინც არ აქვს, რადგან ძნელი წარმოსადგენია, ამ ავტომობილმა ოდესმე კონვეიერამდე მიაღწიოს...

”ბეემვეს” მე-6 სერიის კუპე პარიზული დებიუტისთვის ემზადება

BMW 6 Series Coupe Concept Released

20 სექტემბერი

პარიზის საავტომობილო გამოფენაზე, ”ბეემვეს” პავილიონის ერთ-ერი მთავარი პერსონაჟი, მე-6 სერიის კუპეს კონცეპტუალური ვერსია იქნება, რომლის შესახებაც, ბავარიელებმა მწირი ინფორმაცია და ფოტოები, პრემიერამდე ცოტა ხნით ადრე, ინტერნეტით გაავრცელეს.

ეს ავტომობილი, გერმანული კომპანიის მთავარ დიზაინერ ადრიან ფან ჰოოიდონკის ხელმძღვანელობით შეიქმნა და მასში ”ბეემვეს” ახალი კორპორატიული სტილის ელემენტები ჩანს. ამასთან, ის რაღაცით მე-5 სერიის ახალ სედანსაც ჰგავს. კუპეს გრძელი კაპოტი და საგრძნობლად უკან დაწეული სალონი გამოარჩევს, რაც მის სპორტულობას უსვამს ხაზს. კონცეპტუალურ მოდელზე ბავარიელებმა შუქდიოდებისგან დამზადებული მთავარი ფარები გამოიყენეს, რომელსაც ალბათ მე-6 სერიის ტოპ ვერსიებზე დააყენებენ.

რა თქმა უნდა, ახალ ავტომობილს წამყვანი უკანა ბორბლები აქვს, თუმცა დიდი შანსია იმისა, რომ ბავარიელებმა მყიდველს მისი სრულამძრავიანი ვერსიაც შესთავაზონ. ავტომობილი V8-ცილინდრიანი ტურბოდამჭირხნიანი აგრეგატით აღიჭურვება, რომლის მუშა მოცულობა 4.4 ლიტრი, მაქსიმალური სიმძლავრე 395 ცხენის ძალა, მაქსიმალური მაბრუნი მომენტი კი 609 ნიუტონმეტრი იქნება.

ინგლისურ ჟურნალ ”ავტოქარის” ვერსიით, ახალი მე-6 სერიის კუპეს გაბარიტებია: სიგრძე 4.820 მეტრი, სიგანე 1.855 მეტრი და სიმაღლე - 1.375 მეტრი. საბარგულის მოცულობა კი 450 ლიტრს აღწევს.

ავტომობილს მოდერნიზებული მულტიმედიური სისტემა აქვს, რომელზეც მის შესახებ ყველანაირი ინფორმაციის მიღება შეიძლება. გარდა ამისა, 10-დუიმიან მონიტორზე შესაძლებელია სანავიგაციო მონაცემების გამოტანა. დაკიდევ, სისტემას საქარე შუშაზე ყველაზე მნიშვნელოვან ინფორმაციის პროექცირება შეუძლია. ეს კი იმითაა საინტერესო, რომ მძღოლს მუდმივად, გზისგან თვალის მოუწყვეტლად შეეძლება საჭირო ინფორმაციის მიღება.

სავარაუდოდ, ბავარიელები ამ კუპეს საწარმოო ვერსიის პრემიერას მერმისს, ჟენევის ავტო შოუზე მოაწყობენ.

”ლოტუს ელიტი” – ”ასტონ მარტინის” მომავალი კონკურენტი

Paris Preview: 2014 Lotus Elite

20 სექტემბერი

პარიზის საავტომობილო შოუს გახსნამდე ორი კვირით ადრე და ამ ავტომობილის წარმოების დაწყებამდე სამნახევარი წლით ადრე, სპორტული ავტომობილების მწარმოებელმა ინგლისურმა კომპანია ”ლოტუსმა” თავისი ახალი ავტომობილის კონცეპტუალური ვერსიის შესახებ ინფორმაცია ინტერნეტით გაავრცელა.

პრეს რელიზში ნათქვამია, რომ ახალ ავტომობილს ”ელიტი” ეწოდება, რაც ირიბად იმის მიმანიშნებელია, რომ ”ლოტუსი” სუპერ ავტომობილების მწარმოებელთა ელიტარულ კასტას უბრუნდება. იქ კი, პირველ რიგში, კონკურენციას ”შინაური” ”ასტონ მარტინის” DB9-ს გაუწევს.

სხვათა შორის, სახელი ”ელიტი” ”ლოტუსისთვის” ახალი არაა. ინგლისურმა კომპანიამ ის ორჯერ - 50-იან და 70-იან წლებში გამოიყენა. ახლა კი, როდესაც საწარმოო პროგრამის გაფართოებაზე ზრუნავს, ეს სახელი ისევ გაიხსენა.

ახალ ”ელიტს” 2+2 ჩასაჯდომი ფორმულა აქვს, ანუ, მის სალონში ორი სრულფასოვანი სავარძელია და ორიც ისეთი, მასზე ბავშვიც ძლივს რომ მოთავსდება (ასეთი ჩასაჯდომი ფორმულა სპორტულ ავტომობილებში გავრცელებულია). კონცეპტუალური ავტომობილის სიგრძე 4.6 მეტრი, ჭონა კი 1680 კილოგრამია.

რაც მთავარია, ”ლოტუს ელიტი” ჰიბრიდული ძალური დანადგარით აღიჭურვება, რომელშიც მთავარი როლი ”ლექსუს LS 600h-სგან” აღებულ 5.0-ლიტრიან V8 ძრავს დაეკისრება. ეს ძრავი იაპონური ავტომობილის ანალოგისგან დამჭირხნით და მართვის სისტემით განსხვავდება. შიდაწვის ძრავის გარდა, ჰიბრიდულ სისტემაში ორი ელექტროძრავი და აკუმულატორების ბლოკიც გაერთიანდება.

აგრეგატის ჯამური სიმძლავრე 540 ცხენის ძალას მიაღწევს, მისი ტოპ ვერსიის სიმძლავრე კი 610 ცხენის ძალა იქნება. გარდა ამისა, ჰიბრიდულ სისტემაში კინეტიკური ენერგიის რეკუპერაციის სისტემაც (კერს-ი) შევა, რომელიც ”ლოტუსის” ინჟინრების მიერაა შემუშავებული. ეს სისტემა დამუხრუჭების დროს გამოყოფილ ენერგიას შეაგროვებს და მას აკუმულატორებში შეინახავს.

მართალია, ”ელიტის” საგზაო გამოცდები ჯერ არ დაწყებულა, თუმცა ”ლოტუსის” სპეციალისტები ვარაუდობენ, რომ ეს ავტომობილი ადგილიდან 100 კმ/სთ სიჩქარის აკრეფას დაახლოებით 3.5 წამში შეძლებს. ჯერჯერობით დაუზუსტებელია კონცეპტუალური ”ელიტის” მაქსიალური სიჩქარე. რაც შეეხება გამონაბოლქვში ნახშირორჟანგის შემცველობას, ის კილომეტრზე 215 გრამის ფარგლებში იქნება, რაც ასეთი ტემპერამენტიანი სპორტული ავტომობილისთვის ბევრი არაა.

ბრიტანეთის ბაზარზე, ჰიბრიდული აგრეგატით აღჭურვილი ”ლოტუს ელიტის” სავარაუდო ღირებულება 100 000 გირვანქა სტერლინგი იქნება, რაც კონკურენტი ”ასტონ მარტინ DB9-ს” ფასზე გაცილებით ცოტაა.

Sunday, September 19, 2010

კომპანია ”ინრეკორმა” ახალი საავტომობილო მასალა შეიმუშავა

Inrekor Unveils New Car-Manufacturing Material

19 სექტემბერი

ბოლო 30 წელია, ავტომწარმოებლებს ორი მთავარი საზრუნავი აქვთ - ავტომობილების უსაფრთხოების უახლესი სისტემებით აღჭურვა და გამონაბოლქვზე არსებული მოთხოვნების შესრულება. ყოველივე ახალი სისტემებით ავტომობილების აღჭურვას მოითხოვს, რაც საბოლოო ჯამში, მათს დამძიმებას იწვევს. ამას კი შედეგად საწვავის ხარჯის ზრდა მოსდევს.
მაგრამ უახლოეს მომავალში, შესაძლოა, წონის ნამატის ერთდროულად შემცირება გახდეს შესაძლებელი. ამის საშუალებას კი ინგლისურ კომპანია ”ინრეკორის” გამოგონება იძლევა, რომელსაც ავტორებმა მარტივად, კომპანიის სახელივე უწოდეს. გამოგონება, ავტომობილის შასის კონსტრუქციაში სენდვიჩური ტიპის მასალის გამოყენებას ითვალისწინებს. სენდვიჩს კი ალუმინის ფურცლები და მათ შორის მოთავსებული მსუბუქი მასალა ქმნის. ეს მასალა პროპილენის ბაზაზე შექმნილი ქაფია (მისი სახელწოდებაა ARPRO).
ახალი მასალა ინრეკორი ძალიან მსუბუქი და თითქმის ისეთივე მტკიცეა, როგორიც ფოლადის კონსტრუქცია. სხვათა შორის, კარბონის კომპოზიტის სენდვიჩური კონსტრუქცია უკვე დიდი ხანია, ავიაინდუსტრიასა და ფორმულა 1-ის ავტომობილებში გამოიყენება და მან თავისი საიმედობა დიდი ხანია, საქმით დაამტკიცა. ამასთან, ინრეკორი კარბონის მასალაზე გაცილებით იაფიცაა და რაც არანაკლებ მნიშვნელოვანია, ის სრულად ექვემდებარება გადამუშავებას.

კომპანია ”ინრეკორი” აცხადებს, რომ მის მიერ შექმნილ ახალ მასალას, ავტომობილის წონის დაახლოებით 30 პროცენტით შემცირება შეუძლია. ეს კი ავტომობილის ეკონომიურობის გაუმჯობესებასაც გამოიწვევს და მას გარემოსადმი უფრო მეგობრულსაც გახდის.

რამდენადაც, ”ინრეკორის” მასალაში გამოიყენება ალუმინის ფურცლები, რომლებიც ტვიფვრით დამუშავებას ექვემდებარება, მასალა ინრეკორი მასობრივი წარმოებისთვისაც გამოსადეგია, რასაც ვერ ვიტყვით კარბონის კომპოზიტზე, რომელიც ვაკუუმურ დამუშავებასა და ფორმირებას მოითხოვს.

სხვათა შორის, ”ინრეკორმა” და კიდევ ერთმა ინგლისურმა კომპანია ”ჩესილ მოტორ კომპანიმ”, ახალი მასალით დაამზადეს ლეგენდარული ”პორშე 356 სპიდსტერის” კიტ კომპლექტი, რომელიც ჩვეულებრივი მასალებით შექმნილ ანალოგიურ ავტომობილზე დაახლოებით 15 პრიცენტით მსუბუქი გამოვიდა. გარდა ამისა, ”ინრეკორმა” ასევე შეიმუშავა ოთხადგილიანი ავტომობილის შასი, რომლის სავარაუდო წონაც, ფოლადის ელემენტების გამოყენების შემთხვევაში, დაახლოებით 300 კილოგრამი უნდა ყოფილიყო. მაგრამ ინრეკორით დამზადებული შასი მხოლოდ 160 კილოგრამს იწონის.

მათთვის, ვინც შეიძლება ამ მასალის უსაფრთხოებამ დააეჭვოს, კომპანია ”უორუიკ მენუფექტურინგმა” ჩაატარა გამოკვლევა, რომლის მიხედვითაც,, ინრეკორით შექმნილი ავტომობილები თავისუფლად მიიღებს ”ევრო NCAP-ის” ხუთ ვარსკვლავს. ესე იგი, ის სრულად შეესაბამება თანამედროვე, ძალიან მკაცრ ევროსტანდარტებს.

დაბოლოს, ”ინრეკორი” აცხადებს, რომ საკუთარ მასალას პირველ რიგში, თვითონვე გამოიყენებს. მაგრამ უფრო საინტერესო ისაა, რომ ინოვატორს უკვე გაფორმებული აქვს კონტრაქტი მსხვილ ავტომწარმოებელთან, რომლის სახელიც ჯერჯერობით არ მჟღავნდება.

მყიდველს უფრო ძვირი ”შევროლე ვოლტი” ურჩევნია

Chevrolet Volt Beats Nissan Leaf in autoevolution Poll

19 სექტემბერი

მსოფლიოს საავტომობილო ისტორიაში მალე ახალი თავი დაიწყება - ბაზარზე სერიული ელექტრომობილების გაყიდვები დაიწყება. პიონერები ”ნისანი” და ”ჯენერალ მოტორსი” იქნებიან. პირველი სრულფასოვან ელექტრომობილ ”ლიფის” გაყიდვებს დაიწყებს, მეორე კი გაზრდილი სვლის მქონე ელექტრულ ჰიბრიდ ”შევროლე ვოლტს” გამოუშვებს. სხვადასხვა მცირე კომპანია ელექტრომობილებს ახლაც უშვებს, მაგრამ მათ სათვალავში იმიტომ არ ვიღებთ, რომ ძალიან მცირე რაოდენობით ელექტრულ მანქანებს აწარმოებენ და ამდენად, ბაზარზე ამინდის შექმნა არ შეუძლიათ.

ამიტომ, ახლა მთელი ავტოსამყაროს ყურადღება სწორედ ”შევროლე ვოლტისკენ” და ”ნისან ლიფისკენაა” მიპყრობილი. ბუნებრივია, ბევრ საავტომობილო გამოცემას აქვს ცდუნება, რომ ეს ორი ელექტრომობილი ერთმანეთს შეადაროს. ასეთ გამოცემებს შორისაა ინტერნეტ ჟურნალი ”ავროივოლუშნ”, რომელმაც თავის მრავალრიცხოვან მკითხველს შორის, ჩაატარა გამოკითხვა, რომლის მიზანიც მარტივი იყო: მკითხველს თავისი ფავორიტი უნდა აერჩია.

ამ ორ ელექტრულ ავტომობილს შორის საკმაოდ დიდი განსხვავებაა. ”ნისან ლიფი” სრულფასოვანი ელექტრომობილია. ანუ, მას მხოლოდ ელექტროძრავი ამოძრავებს და ეს უკანასკნელი კი მხოლოდ აკუმულატორებში დაგროვილ ენერგიას იყენებს. მისი სვლის სიშორე 160 კილომეტრია. რაც მთავარია, პრაქტიკულად არ აქვს გამონაბოლქვი. ამ შემთხვევაში, მხედველობაში არ მიიღება ის, რომ ეს ელექტრომობილი შეიძლება თბოსადგურებში გამომუშავებულ ენერგიას იყენებდეს. ამგვარად, ირიბად მაინც აბინძურებს გარემოს.

გაცილებით მეტი სვლის სიშორე აქვს ”ვოლტს”. მართალია, მხოლოდ აკუმულატორებში დაგროვილი ენერგია მას მხოლოდ 64 კილომეტრის გასავლელად ჰყოფნის, მაგრამ როცა აკუმულატორები იცლება, საქმეში მცირელიტრაჟიანი შიდაწვის ძრავისა და ელექტროგენერატორის ტანდემი ერთვება, რომელიც ელექტროძრავს ენერგიით ამარაგებს. ამგვარად, ”ვოლტის” სვლის სიშორე 483 კილომეტრამდე იზრდება. სამაგიეროდ, მას გამონაბოლქვი (თუნდაც უმნიშვნელო) აქვს.

დაკიდევ, ამ ორ ავტომობილს ფასებიც ძლიერ განასხვავებს: ”ნისან ლიფი” ამერიკაში 25 280 დოლარად უნდა გაიყიდოს, რაც ოდნავ მეტია პოპულარულ ჰიბრიდულ (ეგრეთ წოდებულ ლაით ჰიბრიდ) ”ტოიოტა პრიუსის” ფასზე. რაც შეეხება ”შევროლე ვოლტს”, ის 33 500 დლარი ეღირება. ამდენად, მოსალოდნელი იყო, რომ იაპონური მანქანა პოტენციურ მყიდველს უფრო მეტად მოხიბლავდა.

მაგრამ ასე არ მოხდა. გამოკითხულთა დაახლოებით 53 პროცენტი ”შევროლე ვოლტს” მიემხრო, 46 პროცენტზე მეტმა კი ”ნისან ლიფისადმი” სიმპატია გამოხატა. ერთი შეხედვით, ეს გასაკვირი უნდა იყოს, მაგრამ სპეციალისტებმა გამოკითხვის შედეგებს შემდეგი ახსნა მოუძებნეს: მათი აზრით, მყიდველი ჯერ მზად არაა იმისათვის, რომ შედარებით მცირე სვლის მქონე ავტომობილებზე გადაჯდს, როგორებიც მათ მხოლოდ ქალაქში მოძრაობისას გამოადგებათ. სპეცალისტები თვლიან, რომ სრულფასოვანი ელექტრომობილები უფრო მეტ პოპულარობას მას შემდეგ მოიპოვებენ, რაც მათი სვლის სიშორე საგრძნობლად გაიზრდება.

Friday, September 17, 2010

ევროპის წლის საუკეთესო ავტომობილის ნომინანტები

2011 European Car of the Year Nominees Announced

17 სექტემბერი


ორგანიზაცია ”ევროპის წლის საუკეთესო ავტომობილმა” დაასახელა ძველი კონტინენტის 2011 წლის საუკეთესო ავტომობილის წოდებაზე წარდგენილი 41 ახალი ავტომობილის ნომინანტთა სია, რომლებიდანაც კომპეტენტური ჟიური ყველაზე გამორჩეულს აარჩევს.

2 ნოემბერს ჩატარდება წინასწარი გამოკითხვა, რის შემდეგაც კონკურსს 7 საუკეთესო ავტომობილი შემორჩება. მეორე გამოკითხვა კი გამარჯვებულს გამოავლენს. თუმცა ამ გამოკითხვის შედეგები მხოლოდ 29 ნოემბერს გამოქვეყნდება.

ჟიურიში ევროპის 23 ქვეყნის 59 საავტომობილო გამოცემის ჟურნალისტი შედის. სხვადასხვა ქვეყანას ჟიურიში განსხვავებული რაოდენობით წარმომადგენელი ჰყავს. მათი რაოდენობა ქვეყნის ზომასა და გამოცემების პოპულარობაზეა დამოკიდებული. ჟიურიში ყველაზე მეტი, 6-6 წარმომადგენელი საფრანგეთს, გერმანიას, იტალიას, ესპანეთსა და რა თქმა უნდა, ბრიტანეთს ჰყავთ.

ალფა რომეო ჯულიეტა

აუდი A1

აუდი A7

აუდი A8

ბეემვე მე-5 სერია

ბეემვე X3

შევროლე სპარკი

სიტროენ C3/DS3

სიტროენ C4

დაჩია დასტერი

ფიატ დობლო

ფორდ C-მაქსი/გრანდ C-მაქსი

ჰონდა CR-Z

ჰიუნდაი ix20

ჰიუნდაი ix35

იაგუარ XJ

ჯიპ გრანდ ჩეროკი

კია სპორტიჯი

კია ვენგა

ლექსუს CT200h

მაზდა5

მერსედეს ბენც CLS

მინი ქანთრიმენი

მიცუბიში ASX

მიცუბიში i-MiEV/პეჟო iOn/სიტროენ C-ზერო

ნისან ჯუკი

ნისან ლიფი

ნისან მიკრა

ოპელ მერივა

პეჟო RCZ

პორშე კაიენი

რენო ფლუენსი

რენო ლატიტუდი

რენო უინდი

სააბ 9-5

სუზუკი კიზაში

სუზუკი სუიფტი

ფოლკსვაგენ პასატი

ფოლკსვაგენ ტუარეგი

ფოლკსვაგენ შარანი/სეატ ალჰამბრა

ვოლვო S60/V60

Thursday, September 16, 2010

”მერსედესმა” A-კლასის ელექტრომობილ E-სელის წარმოება დაიწყო

Mercedes-Benz A-Klasse E-Cell Details and Photos

15 სექტემბერი

”მერსედეს ბენცი” თავისი ძირითადი მოდელების ბაზაზე, ელექტრომობილების გამოშვებას აგრძელებს. ”სმარტის”, B-კლასის და ”ვიტოს” შემდეგ, ამჯერად A-კლასის ჰეჩბეკის ჯერიც დადგა. ”A-კლას E-სელის” მსოფლიო პრემიერა პარიზის საავტომობილო შოუზე გაიმართება, მისი წარმოება კი გერმანულმა კომპანიამ ქალაქ რაშტატის ქარხანაში უკვე დაიწყო. პარიზულ პრემიერამდე ორი კვირით ადრე კი, ”მერსედესმა” თავისი ახალი ელექტრომობილის ფოტოები და ტექნიკური მონაცემები გაავრცელა.

ავტომობილი ლითიუმ-იონური აკუმულატორების ორი ბლოკითაა აღჭურვილი, რომელთა ჯამური ენერგოტევადობა 36 კილოვატია საათში. ეს ენერგია კი საკმარისია იმისათვის, რომ ავტომობილმა შეუჩერებლად 200 კილომეტრზე მეტი გაიაროს. E-სელს მამოძრავებელ ძალას მუდმივ დენზე მომუშავე სინქრონული ელექტროძრავი ანიჭებს, რომლის პიკური სიმძლავრე 95 ცხენის ძალას (70 კილოვატს) აღწევს, ნომინალური სიმძლავრე კი მხოლოდ 68 ცხენის ძალაა (50 კვტ). მაქსიმალური მაბრუნი მომენტი 290 ნიუტონმეტრია.

ამ აგრეგატის დახმარებით, ელექტრომობილი ადგილიდან 100 კმ/სთ სიჩქარის აკრეფას 5.5 წამში ასწრებს. მაქსიმალურ სიჩქარეს კი ელექტრონული სისტემა, 150 კმ/სთ ნიშნულით ზღუდავს.

სალონის ცენტრალურ ნაწილში მოთავსებულია მრავალფუნქციური მონიტორი, რომელზეც ავტომობილის სხვადასხვა ოპერატიული მონაცემის ნახვაა შესაძლებელი. პირველ რიგში, ესაა აკუმულატორებში დარჩენილი ენერგიის მარაგის დონე, მგზავრობის პარამეტრები - კერძოდ, მოძრაობის დრო და გავლილი მანძილი, საშუალო სიჩქარე და ენერგიის საშუალო მოხმარება, ასევე აკუმულატორებში დარჩენილი ენერგიის რაოდენობა.

ისევე, როგორც ”მერსედესის” სხვა ავტომობილებს, ამ ელექტრომობილსაც კომპლექტაციის რამდენიმე დონე აქვს. მათგან ყველაზე უკეთ დაკომპლექტებულია ”ავანგარდი”, რომლის პაკეტშიც შედის ბი-ქსენონის მთავარი ფარები, ავტომატურიპარკირების სისტემა ”ექტივ პარკ ესისტი” და ავტომატური კლიმატ კონტროლის სისტემა ”თერმოტრონიკი”.

რა თქმა უნდა, ავტომობილი უსაფრთხოების თანამედროვე სისტემებითაა აღჭურვილი, რომელთა შორისაცაა გვერდითა და უკანა შუშების უსაფრთხოების ბალიშები და ერგონომიული სავარძლები.

შტუტგარტელები მხოლოდ 500 ცალი E-სელის წარმოებას აპირებს. მათი გაყიდვისთვის კი ლიზინგის პრინციპს გამოიყენებენ. ამასთან, ელექტრომობილს წინასწარ შერჩეული მყიდველი მიიღებს. ავტომობილი მხოლოდ გერმანიის, საფრანგეთისა და ჰოლანდიის ბაზრებზე გაიყიდება.

Wednesday, September 8, 2010

”ლამბორგინი ჯოტა” პარიზული პრემიერის წინ

Lamborghini Jota Teaser Released

8 სექტემბერი

ცოტაც და საავტომობილო სამყაროს ცენტრი პარიზში გადაინაცვლებს, სადაც დდ საავტომობილო შოუ გაიმართება. ბევრი ავტომწარმოებელი ამ მოვლენისთვის არაერთ საინტერესო სიახლეს ამზადებს. და, რა თქმა უნდა, შოუს ბევრი ვარსკვლავი ეყოლება, რომელთა შორისაც, ერთ-ერთ ყველაზე გამორჩეულს ”ლამბორგინის” პავილიონში ნახავთ.

როგორც იტალიური კომპანია აცხადებს, ეს იქნება საუკეთესო ავტომობილი მის სახელოვან ისტორიაში. ავტომობილს სახელად ”ჯოტა” ერქმევა და ის ჯერაც ბევრისთვის სასურველ, თუმცა კონკურენტული გარემოსათვის მეტისმეტად დრომოჭმულ ”მურსიელაგოს” შეცვლის.

ჯერჯერობით, თავისი ახალი ავტომობილის შესახებ, ”ხარებს” ჯერ ტექნიკური ინფორმაცია არ გაუვრცელებიათ. ინტერნეტში გამოჩნდა მხოლოდ ახალი ავტომობილის ფოტო-ტიზერი (სურათზე), რომელიც პრაქტიკულად არაფრის მეტყველია. ინტერნეტშივე ახალი ”ლამბოს” შესახებ, ორის დონეზე, გარკვეული ინფორმაცია მაინც ცირკულირებს.

ამ ჭორების მიხედვით: ”ჯოტა” აღიჭურვება 6.0-ლიტრიანი V12 ძრავით, რომლის სავარაუდო მაქსიმალური სიმძლავრე 700-800 ცხენის ძალა იქნება. მაქსიმალური სიჩქარე 354 კმ/სთ-ს მიაღწევს, ადგილიდან 100 კმ/სთ-მდე აჩქარებას დაახლოებით 3 წამი დასჭირდება. რაც შეეხება საწვავის ხარჯს, ის 100 კილომეტრზე 10 ლიტრზე ნაკლები არ იქნება.

”ჯოტას” ტანი ალუმინისა და კარბონის კომპოზიტისგანაა დამზადებული. შედეგად, ავტომობილის წონ 1 396 კილოგრამს მიაღწევს. წონის და ძრავის სიმძლავრის ასეთი დაბალი ფარდობა კი ავტომობილის შესანიშნავ მაენვრულობას უზრუნველყოფს.

სავარაუდოდ, ”ლამბორგინი” ”ჯოტას” გაყიდვას მერმისს დაიწყებს.