Sunday, February 28, 2010

”სუბარუს” ჰიბრიდი ჟენევაში

Subaru at Geneva

28 თებერვალი

სხვა ავტომწარმოებლების მსგავსად, გარემოზე მზრუნველობას იაპონური ”სუბარუც” იჩენს, რომელიც ჟენევაში რამდენიმე ეკოლოგიურ ინოვაციას გამოფენს, მისი მთავარი ექსპონატები კი კონცეპტუალური ”ჰიბრიდ ტურერი” და ელექტრული საქალაქო ავტომობილი იქნება.

”ჰიბრიდ ტურერი” მსოფლიოში პირველი ჰიბრიდული ავტომობილია, რომლის ჰიბრიდულ სისტემაშიც ოპოზიტური ძრავი, ეგრეთ წოდებული ”ბოქსერი” მუშაობს. ესაა 2.0-ლიტრიანი ტურბომოტორი, რომელთან ერთადაც, ორი ელექტროძრავიც მუშაობს. მათგან ერთი - 10-კილოვატიანი წინა ღერძს ემსახურება, უკანა კი, რომლის სიმძლავრეც 20 კილოვატია - უკანებს. ჰიბრიდული სისტემა, ”სუბარუს” ავტომატურ ტრანსმისია ”ლაინეატრონიკთანაა” დაკავშირებული.

ძნელი მისახვედრი არ უნდა იყოს, რომ ელექტროძრავებს მხოლოდ სტარტზე და დაბალი სიჩქარით მოძრაობისას უწევთ მუშაობა. ეს კი ავტომობილის საცობებში მოძრაობისას იქნება გამოსადეგი. და თუ საჭიროა მ აღალი სიმძლავრის განვითარება, საქმეში შიდაწვის ძრავი ჩაერთვება.

თავისი ჰიბრიდული დანადგარის გარდა, ”ჰიბრიდ ტურერი” გარეგნობითაც გამოირჩევა. ჯერ ერთი, ის ”სუბარუს” სხვა მოდელებს არ ჰგავს. მეორეც, მას ეგრეთ წოდებული ”თოლიას ფრთების” ტიპის კარებები აქვს, რომლებსაც საყრდენები სახურავზე აქვთ და ქვევიდან ზევით იღება. მათი მეშვეობით, ავტომობილის სალონში მოხვედრა მნიშვნელოვნად გაადვილებულია.

ელექტრომობილს ”სტელა EV” ჰქვია და ის პლაგ-ინ სისტემითაა აღჭურვილი. მასშიც ელექტროძრავს ლითიუმ-იონური აკუმულატორების ბლოკი კვებავს, რომელში დაგროვილი ენერგიაც საკმარისია იმისათვის, რომ ავტომობილმა შეუჩერებლად 90 კილომეტრის გავლა შესძლოს. ავტომობილს აქვს აკუმულატორების სწრაფად დამუხტვის სისტემა, რომლის მეშვეობითაც, 15 წუთში აკუმულატორები ენერგიის მარაგის 80 პროცენტს ივსებენ. ისე კი, საყოფაცხოვრეპო ქსელით სარგებლობის შემთხვევაში, სკუმულატორების სრულად დამუხტვისთვის 5 საათია საჭირო.

”ფოლკსვაგენი” დივიზიონ ”ელექტრიკ მოტორსს” აყალიბებს

VW Creates Electric Motors Manufacturing Division

28 თებერვალი

”ჯენერალ მოტორსის” მსგავსად, ”ფოლკსვაგენიც” სპეციალურ დივიზიონ ”ელექტრიკ მოტორსს” აყალიბებს, რომელსაც მხოლოდ ელექტრომობილების და მათთვის საჭირო ძალური დანადგარების შემუშავება დაევალება. გერმანული ავტოგიგანტი მსოფლიო ლიდერობას აპირებს და ახალ დივიზიონს, ამ მიზნის მიღწევაში ჯერ მხოლოდ მოკრძალებული როლი ექნება. თუმცა, დროთა განმავლობაში, ვოლფსბურგული საავტომობილო ჯგუფის საქმიანობაში, მას ერთ-ერთი მთავარი როლი მიენიჭება.

იმის გამო, რომ ”ფოლკსვაგენის” ჯგუფში რამდენიმე კომპანია შედის, ახალი დივიზიონის მიერ შემუშავებულ ძრავებზე დიდი მოთხოვნილება იქნება, რაც მის კონკურენტულ ფასს წარმოქმნის. ამას კი ახალი ტექნოლოგიების ათვისებისას, დიდი მნიშვნელობა ექნება. რა თქმა უნდა, ამავე დივიზიონის მიერ შემუშავებულ აგრეგატებს ნათესავი ”აუდის” მსგავსი შტო - ”ე-ტრონი” გამოიყენებს, რომელიც სპეციალურად, ელექტრომობილების წარმოებისთვისაა შექმნილი და რომელიც ამ ინდექსით მოდელების მთელ გამას გამოუშვებს.

ელექტრონული ძრავების წარმოება, ”ფოლკსვაგენის” ზალცინგერის (გერმანია) ქარხანას დაევალება. პირველი ავტომობილი, რომელიც ამ ქარხანაში წარმოებულ ელექტროძრავებს გამოიყენებს, არის მინიავტომობილი E-UP, რომელიც მომავალი ”ლუპოს” ელექტრული ვერსია გახდება და რომლის სერიული წარმოებაც 2013 წელს დაიწყება.

ამ ავტომობილის კონცეპტუალური ვერსია ვოლფსბურგელებმა პირველად ფრანკფურტის შარშანდელ მოტორ შოუზე გვაჩვენეს. მისი სიგრძე 3.19 მეტრი, სიგანე 1.64 მეტრი, სიმაღლე 1.47 მეტრი, ბაზა კი 2.19 მეტრია. მასში 80 -ცხენისძალიან ელექტროძრავს ენერგიით ლითიუმ-იონური აკუმულატორების ბლოკი კვებავს. მწარმოებლის განცხადებით, E-UP ადგილიდან 100 კმ/სთ სიჩქარემდე აჩქარებას 11.3 წამში შეძლებს, 50 კმ/სთ-მდე აჩქარებისთვის კი 3.5 წამია საკმარისი.

ცნობისათვის, ერთი თვის წინ, ”ჯენერალ მოტორსმა” გამოაცხადა, რომ ახალ საქმეში, რომლის მიზანიც ავტომობილებისათვის გამოსადეგი ელექტრული ძრავების წარმოებაა, 246 მილიონი დოლარის ინვესტიციას ჩადებს. ეს ინვესტიცია კი ბალტიმორის სატრანსმისიო ქარხნის მოდერნიზებას ითვალისწინებს, რომელიც ელექტროძრავების წარმოებას 2013 წელს დაიწყებს.

Saturday, February 27, 2010

”ისპანო სუიზა” ბრუნდება

Hispano Suiza's Return

27 თებერვალი

შესაძლოა, ეს სახელი დღეს ბევრს არაფერს გეუბნებათ, მაგრამ იყო დრო, როდესაც მისი მატარებელი ავტომობილები, ”ბუგატიზე” არანაკლები პოპულარობით სარგებლობდა. დღეს ”ისპანო სუიზას” შესახებ მხოლოდ ავტო ”გურმანებმა” და ავტო კოლექციონერებმა თუ იციან. მაგრამ შორს არაა ის დრო, როდესაც ამ ლეგენდარულ სახელს ბევრი გაიგებს და ეს ჟენევის საავტომობილო შოუზე მოხდება.

შოუს დამთვალიერებელი იხილავს ”ისპანო სუიზას” სახელის მქონე კონცეპტუალურ ავტომობილს, რომელიც რეალურად, ”აუდი R8 V10-ს” რესტაილინგური ვარიანტია და რა თქმა უნდა, მისივე პლატფორმას და აგრეგატებს იყენებს. ოღონდ, ეს აგრეგატები მნიშვნელოვნად მოდერნიზებულია.

ძრავს მექანიკური დამჭირხნი ემსახურება. ამ და სხვა მოდიფიკაციების წყალობით, მისმა სიმძლავრემ 750 ცხენის ძალას მიაღწია. ჯერჯერობით, ამ ავტომობილის შესახებ, მხოლოდ ტექნიკური მონაცემია ცნობილი. სამაგიეროდ, ესპანურ-ფრანგული ფირმა გვამცნობს, რომ ამ ძრავის მეშვეობით, ავტომობილი, რომლის სახელიც კი, ჯერჯერობით უცნობია, ადგილიდან 100 კმ/სთ სიჩქარეს 3.4 წამში ავითარებს, მისი მაქსიმალური სიჩქარე კი 330 კმ/სთ-ს აღწევს.

გარდა ამისა, ინტერნეტით გავრცელდა ინფორმაცია იმის შესახებ, რომ ”ისპანო სუიზა” თავისი ავტომობილის ჰიბრიდული აგრეგატით აღჭურვასაც გეგმავს, რომლის მეშვეობითაც, მნიშვნელოვნად გაიზრდება ძრავების ჯამური სიმძლავრე. ზოგიერთი მონაცემით, ჰიბრიდული დანადგარი ავტომობილს დამატებით 150 ცხენის ძალას მისცემს. გარდა ამისა, შესაძლებელი იქნება მხოლოდ ელექტროძრავის ხარჯზე გადაადგილება.

ჯერჯერობით, სულ ესაა, უფრო მეტს კი ჟენევის ავტო შოუს დღეებში შევიტყობთ.

Thursday, February 25, 2010

”ლოტუსმა” კუპე ”ევორას” ჰიბრიდული ვერსია შექმნა

Lotus Evora 414E Hybrid

25 თებერვალი

ჟენევის საავტომობილო გამოფენაზე არაერთი ჰიბრიდული და ელექტრული ავტომობილის ნახვა შეიძლება და ერთ-ერთი მათგანი, ინგლისურ კომპანია ”ლოტუსის” მიერ კუპე ”ევორას” ბაზაზე შექმნილი ჰიბრიდი, ”ევორა 414E ჰიბრიდ” იქნება. დასახელებაში რიცხვი 414 ავტომობილის ჰიბრიდული დანადგარის ჯამური სიმძლავრის (ცხენის ძალებში) აღმნიშვნელია.

ჰიბრიდულ ”ევორას” ამძრავ ძალას ორი ელექტროძრავი ანიჭებს, რომლებიც უკანაა მოთავსებული და თითოეული თითო უკანა ბორბალს ემსახურება. შესაბამისად, მათი სიმძლავრე 207 ცხენის ძალაა. ძრავების მიერ გამომუშავებულ მაბრუნ მომენტს ერთსაფეხურიანი ტრანსმისია გადაამუშავებს, რომელიც საჭიროების შემთხვევაში, ძალას წამყვან ბორბლებს შორის ანაწილებს. გარდა ამისა, ტრანსმისიას აქვს სპეციალური სპორტული რეჟიმი, რომლის მეშვეობითაც, ის 7-საფეხურიანი კოლოფის მუშაობის იმიტირებას ახდენს.

ელექტროძრავები ენერგიას ლითიუმ-იონური აკუმულატორების ბლოკისგან ღებულობენ, რომელსაც, თავის მხრივ, განმუხტვის შემთხვევაში, 1.2-ლიტრიანი ბენზინის ძრავი და მასთან დაკავშირებული გენერატორი კვებავენ. გარდა ამისა, აკუმულატორები ენერგიას საყოფაცხოვრებო ქსელიდანაც ივსებენ.

ადგილიდან 100 კმ/სთ სიჩქარის ასაკრეფად, ”ევორა 414E ჰიბრიდს” 4 წამი ჰყოფნის, შიდაწვის ძრავისა და მასთან დაკავშირებული გენერატორის ჩაურთავად კი მისი სვლის სიშორე 56 კილომეტრს აღწევს.

საინტერესოა კიდევ ერთი ფაქტი - ელექტრომობილები უხმაურობით გამოირჩევიან, მაგრამ სპორტული ავტომობილის მოყვარულებს, მძლავრი ძრავების ხმაც იზიდავს... ამიტომ, ”ლოტუსის” ინჟინრებმა” შეიმუშავეს აკუსტიკური სისტემა, რომელსაც მრავალცილინდრიანი ძრავის ხმის გამოცემა შეუძლია, ეს ხმა კი როგორც სალონში, ასევე გარეთაც ისმის. ინგლისურ კომპანიაში ვარაუდობენ, რომ ასეთ სისტემას თავიანთ ყველა ჰიბრიდულ და ელექტრულ ავტომობილზე გამოიყენებენ.

ჯერჯერობით ცნობილი არაა, თუ როდის გამოჩნდება ჰიბრიდული ”ევორა” ბაზარზე.

”ჰიუნდაიმ” ჟენევისთვის ჰიბრიდული კონცეპცია მოამზადა

Hyundai i-Flow Diesel-Hybrid Concept at Geneva

25 თებერვალი

კომპანია ”ჰიუნდაიმ” კონცეპტუალურ მოდელ i-Flow-ს ფოტოები და მის შესახებ მწირი ინფორმაცია გამოაქვეყნა. კორეული კომპანიის ახალ კორპორატიულ სტილში შესრულებული ამ საშუალო ზომის ბიზნეს კლასის სედანის მსოფლიო პრემიერა, ჟენევის ავტო შოუზე იგეგმება

i-Flow მეტად დახვეწილი აეროდინამიკით გამოირჩევა. აეროდინამიკურ მილში გატარებული მრავალი საათის წყალობით, ამ ავტომობილზე, შემხვედრი ჰაერის ნაკადის წინააღმდეგობის კოეფიციენტი მხოლოდ 0.25-ია. ეს გარემოება კონცეპტუალური მოდელის ეკონომიურობასაც აუმჯობესებს.

კონცეპტუალური ავტომობილის ჰიბრიდულ სისტემაში გაერთიანებულია 1.7-ლიტრიანი დიზელის ძრავი, რომელსაც ორსაფეხურიანი ტურბოკომპრესორი ემსახურება და ელექტროძრავი, რომელიც ენერგიით ლითიუმ-იონური აკუმულატორებისგან იკვებება.

”ჰიუნდაი” არც შიდაწვის და არც ელექტროძრავის ტექნიკურ მონაცემებს არ აქვეყნებს. სამაგიეროდ, მის მიერ გამოცემულ რელიზში წერია, რომ კონცეპტუალურ ავტომობილს, 100 კილომეტრის გასავლელად 3.0 ლიტრი საწვავი ჰყოფნის, ყოველი კილომეტრის გავლისას კი, ის ატმოსფეროში მხოლოდ 85 გრამ ნახშირირჟანგს გამოჰყოფს.

ჟენევაში ”ჰიუნდაის” კიდევ ერთი ექსპონატი იქნება პოპულარულ ჰეჩბეკ i30-ის მოდიფიცირებული ვარიანტი, რომელიც ამ ეტაპზე, i30U-ს სახელითაა ცნობილი. ამ ავტომობილის შესახებ, კორეული კომპანია ჯერჯერობით არანაირ ინფორმაციას არ ავრცელებს.

კონცეპტუალური i-Flow-ს ბაზაზე შექმნილი სერიული ავტომობილის გაყიდვას, ”ჰიუნდაი” ევროპაში 2012 წელს დაიწყებს.

”ჰამერის” გაყიდვა ჩაიშალა

”ჯენერალ მოტორსი” მის გაუქმებას აპირებს

Hummer sale collapses; GM will wind down the brand

25 თებერვალი

ჩინურმა კომპანია ”სიჩუან ტენჯონმა” ვერ შეძლო ”ჰამერის” ყიდვა, რის შემდეგაც, ”ჯენერალ მოტორსს” ისღა დარჩენია, კიდევ ერთი თავისი ბრენდი საიქიოს გაისტუმროს. თუმცა, ”ჰამერის” დახურვის შემდეგაც, ამერიკული კომპანია გააგრძელებს ამ ავტომობილის მფლობელთათვის სერვისის შეთავაზებას და სათადარიგო ნაწილების მიწოდებას.

”ჰამერი” მეოთხე ბრენდია, რომელსაც ჯერაც კრიზისში მყოფი ”გენერლები” თავიდან იშორებენ. მათ შარშან ”სატურნს” და ”პონტიაკს” გამოუტანეს დახურვის განაჩენი, წელს კი, შვედური ”სააბი”, სუპერ ავტომობილების მწარმოებელ პატარა ჰოლანდიურ კომპანია ”სპაიკერს” მიჰყიდეს. და ახლა ”ჰამერის” ჯერიც დადგა.

თუმცა, გამორიცხული არც ისაა, რომ ამერიკულმა კომპანიამ ”ჰამერის” ყიდვის მსურველთაგან განაცხადების მიღება გააგრძელოს, როგორც ეს ”სააბთან” მიმართებაში გააკეთა. შეგახსენებთ, რომ ”ჯენერალ მოტორსმა” შვედურ კომპანია ”კიონიგსეგს” ”სააბის” მიყიდვაზე უარი განუცხადა, რის შემდეგაც, ამ უკანასკნელის დახურვაზე ფიქრი დაიწყო, მაგრამ შემდეგ ”სპაიკერის” განაცხადი მიიღო და ჰოლანდიურ კომპანიას ”სააბი” გადაუფორმა.

ცნობისათვის, ”ჯენერალ მოტორსმა” ჯერ კიდევ დიდი კრიზისის დაწყებამდე, 2008 წელს გამოაცხადა, რომ ”ჰამერს” ჰყიდდა. შარშან ამერიკულმა გიგანტმა ”სიჩუან ტენჯონის” განაცხადი მიიღო და საქმეს ისეთი პირი უჩანდა, რომ გარიგება შესდგებოდა. სხვათა შორის ”სიჩუან ტენჯონი” მძიმე ინდუსტრიული გიგანტია, მაგრამ ავტომობილების წარმოების გამოცდილება არ გააჩნია. ესეც რომ არა, ჩინეთის მთავრობამ, მას ”ჰამერის” შეძენის უფლება არ მისცა.

რაც შეეხება ”ჰამერს”, ამ კომპანიის გაყიდვები შარშან 67 პროცენტით შემცირდა, ასეთი კლება კი ამერიკის ბაზარზე არცერთ სხვა კომპანიას არ ჰქონია. ამის მიზეზი, საწვავზე ფასების მატების გარდა, ის გარემოებაცაა, რომ მყიდველი იმ მარკის ავტომობილების ყიდვას ერიდებოდა, რომლის მომავალიც გაურკვეველი იყო.

ერთ დროს პოპულარული უგზოობის ავტომობილების მწარმოებელი ბრენდი ”ჯენერალ მოტორსმა” 1999 წელს, ამერიკული ”AM ჯენერალისგან” შეიძინა, რომელმაც ამის შემდეგაც, პენტაგონისთვის სამხედრო მანქანების (ჰამვი) წარმოება გააგრძელა.

”ჰამერმა” სამოქალაქო ავტომობილების წარმოება უფრო ადრე, 1992 წელს დაიწყო. სანამ ”გენერლები” ამ ბრენდს დაეუფლებოდნენ, ”AM ჯენერალი” წლიურად მხოლოდ 800-1 000 ”ჰამერის” გაყიდვას ახერხებდა. 2006 წელს კი, მარტო ამერიკის ბაზარზე, 71 524 ცალი ”ჰამერი” გაიყიდა, რაც გაყიდვების პიკი იყო. მაგრამ შარშან, ამ კომპანიამ, რომელსაც ამერიკაში 153 დილერი ჰყავს, მხოლოდ 9 046 ავტომობილის გაყიდვა შესძლო.

Wednesday, February 24, 2010

”მერსედეს ბენცი” თავის ახალ სტილს ჟენევაში გვაჩვენებს

Mercedes-Benz F800 Style

24 თებერვალი

”მერსედეს ბენცი” თავისი კორპორატიული სტილის შეცვლას აპირებს და ამის პირველ ნიშანს, ჟენევის საავტომობილო შოუზე, კონცეპტუალური ”F800 სტაილის” სახით ვნახავთ. ამ ავტომობილით, შტუტგარტელები თავიანთი ახალი დიზაინის შემუშავებას იწყებენ, რომელსაც სავარაუდოდ (ამ ვარაუდის საბაბს ის ფაქტი იძლევა, რომ ბევრი პარამეტრით, ეს კონცეპცია ოთხკარიან კუპე CLS-ს მოგვაგონებს), პირველად ლუქსის კლასის ავტომობილებზე გამოიყენებს.

”F800 სტაილი” სრულიად ახალ, უკანა წამყვანბორბლიან პლატფორმაზეა აგებული, რომელიც მალე შეცვლის იმ ძვირადღირებულ არქიტექტურას, რომელსაც ”მერსედესი” ამჟამად იყენებს. ძველ პლატფორმას ორმაგი, სენდვიჩის ტიპის ძირი აქვს, რაც მის სიხისტეს განაპირობებს. ახალი პლატფორმა უნივერსალური იქნება და კუპე CLS-ის გარდა, მას A და B კლასის შემდგომი თაობის ავტომობილებისთვისაც, ასევე უგზოობის ახალი კომპაქტური მოდელისთვისაც გამოიყენებენ.

კონცეპტუალური ავტომობილის გაბარიტებია: სიგრძე 4.738, სიგანე 1.938, სიმაღლე 1.445 და ბაზა 2.924 მეტრი. საბარგულის მოცულობა კი 440 ლიტრს აღწევს. ”სამქიმიანების” მიერ გამოქვეყნებულ რელიზში აღნიშნულია, რომ ”F800 სტაილის” და მეორე თაობის CLS-ის ზომები იდენტური იქნება.

კონცეპტუალური ავტომობილისთვის, შტუტგარტელებმა ორი ძრავი მოამზადეს. მათგან ერთი ჰიბრიდულია. მასში 300-ცხენისძალიან V6 ბენზინის ძრავთან, 109-ცხენისძალიანი ელექტროძრავია შეწყვილებული, რომელსაც ენერგიით ლითიუმ-იონური აკუმულატორების ბლოკი კვებავს. თავის მხრივ, ეს აკუმულატორები საყოფაცხოვრებო შტეპსელიდან იმუხტება.

”მერსედეს ბენცის” მონაცემებით, ჰიბრიდული სისტემით აღჭურვილი ”F800 სტაილი” ადგილიდან 100 კმ/სთ სიჩქარეს 4.8 წამში აკრეფს, მისი მაქსიმალური სიჩქარე კი 250 კმ/სთ იქნება. თუ ავტომობილი მარტო ელექტროძრავით ივლის, მაშინ მისი მაქსიმალური სიჩქარე 120 კმ/სთ, სვლის სიშორე კი 29 კილომეტრი იქნება.

მეორე აგრეგატი ელექტროძრავია, მისთვის აუცილებელ ენერგიას კი წყალბადის ფიჭური ელემენტები გამოიმუშავებს. ელექტროძრავის სიმძლავრე 136 ცხენის ძალაა, რომელიც ენერგიას ლითიუმ-იონური აკუმულატორების ბლოკიგან ღებულობს, ეს კი ფიჭური ელემენტებისგან იკვებება. ფიჭური ელემენტების დანადგარი ავტომობილის წინ მდებარეობს და მათში ელექტროენერგიის გამომუშავება, წყალბადსა და ჟანგბადს შორის ქიმიური რეაქციის შედეგად წარმოიქმნება. ფიჭური ელემენტების გარდა ენერგიის გამომუშავება კინეტიკური ენერგიის რეკუპერაციის სისტემის მეშვეობითაც ხდება, რომელიც დამუხრუჭების შედეგად წარმოქმნილ ენეგიას ითვისებს.

კონცეპტუალური ავტომობილი აღჭურვილია სისტემა ”ტრეფიკ ჯემ ესისტენტით”, რომელსაც 40 კმ/სთ სიჩქარემდე, საჭის მექანიზმის, მუხრუჭების და აქსელერატორის სრულად კონტროლის უნარი აქვს. ავტომობილის უსაფრთხოებას ემსახურება სისტემა ”პრე-სეიფ”, რომელიც ავარიულ სისტემას დამოუკიდებლად აფიქსირებს და მის თავიდან არიდებასაც თავადვე უზრუნველყოფს.

ჟურნალ ”ავტოქართან” საუბრისას, ”მერსედეს ბენცის” დიზაინის განყოფილების შეფმა გორდონ ვაგენერმა განაცხადა, რომ მეორე თაობის კუპე CLS სწორედ ”F800 სტაილის” სტილში შესრულდება და მის გაყიდვას შტუტგარტელები მერმის დაიწყებენ. ამასთან, კონცეპტუალური ავტომობილის წინა ნაწილის დიზაინს მალე ”სამქიმიანების” სხვა მოდელებზეც ვიხილავთ.

”აუდი A1” ჟენევამდე გაგვეცნო

Audi A1

24 თებერვალი

”აუდიმ” თავის ახალ კომპაქტურ ჰეჩბეკ A1-ის ფოტოები და მის შესახებ ინფორმაცია გაავრცელა. ავტომობილს, რომელიც იმავე პლატფორმაზეა აგებული, რომელზეც ”ფოლკსვაგენ პოლო” და ”შკოდა ფაბია”, პირველად საზოგადოება ჟენევის საავტომობილო შოუზე იხილავს.

”აუდი A1” თავის მთავარ კონკურენტ ”მინიზე” 30 სანტიმეტრით გრძელია. მისი სიგრძე 3.95 მეტრი, სიგანე 1.74 მეტრი, სიმაღლე 1.42 მეტრი, ბაზა კი 2.47 მეტრია (შედარებისთვის, ”მინის” ბაზა ოდნავ მოკლე, 2.468 მეტრია). საბარგულის მოცულობა 267 ლიტრს აღწევს და თუ უკანა სავარძლებს დავკეცავთ, ეს მაჩვენებელი 920 ლიტრამდე იზრდება.

”აუდი A1-სთვის” ბენზინსა და დიზელზე მომუშავე რამდენიმე ტურბოძრავია განკუთვნილი, თუმცა თავიდან გერმანული კომპანია მყიდველს ბენზინისა და დიზელის ორ-ორ ძრავს შესთავაზებს. საბაზო კი იქნება 1.2-ლიტრიანი ტურბოძრავი, რომლის სიმძლავრე 86 ცხენის ძალა, მაბრუნი მომენტი კი 160 ნიუტონმეტრია. 5-საფეხურიან მექანიკურ კოლოფთან ერთად, ამ აგრეგატით, ავტომობილი ადგილიდან 100 კმ/სთ სიჩქარის აკრეფას 12.1 წამში ასწრებს, მისი მაქსიმალური სიჩქარე კი 179 კმ/სთ-ია.

უფრო მძლავრია 1.4-ლიტრიანი TFSI, რომლის მაქსიმალური სიმძლავრე 122 ცხენის ძალას, მაქსიმალური მაბრუნი მომენტი კი 200 ნიუტონმეტრს აღწევს. ამ ძრავს უწყვილდება ან 6-საფეხურიანი მექანიკური კოლოფი (100 კმ/სთ-მდე აჩქარება 9.2 წმ), ან 7-საფეხურიანი სეკვენტალური S-ტრონიკი, რომლითაც ადგილიდან 100 კმ/სთ სიჩქარე 9.1 წამში მიიღწევა.

დიზელის ორივე ძრავი 1.6-ლიტრიანია და მათ ფორსირების სხვადასხვა ხარისხი აქვთ. ერთის სიმძლავრე 90 ცხენის ძალა, მაბრუნი მომენტი კი 230 ნიუტონმეტრია, მეორისა კი - 105 ცხ.ძ და 250 ნმ. პირველ აგრეგატს 5-საფეხურიანი კოლოფი უკავშირდება და ამ ტანდემის მეშვეობით, A1 ადგილიდან 100 კმ/სთ სიჩქარეს 12.2 წამში აღწევს, სამაგიეროდ, ყოველ 100 კილომეტრზე მხოლოდ 3.8 ლიტრ საწვავს მოიხმარს. მეორეს შემთხვევაში, სტანდარტულ აჩქარებას ის 10.8 წამს ანდმებს, ხარჯი კი 3.9 ლიტრია.

ჯერჯერობით, ”აუდი” თავის ახალ ჰეჩბეკზე სრულამძრავიანი ტრანსმისიის გამოყენებას არ აპირებს. სამაგიეროდ, A1 სტაბილიზაციის სისტემითაა აღჭუვილი. ამასთან მყიდველს ოპციის სახით, უამრავ აქსესუარს და ავტომობილის ინდივიდუალიზაციის საშუალებებს შესთავაზებენ.

ელექტრომობილ ”ნისან ლიფს” კონკურენტული ფასი ექნება

Nissan says all-electric Leaf will compete on price

22 თებერვალი

”ნისან მოტორის” მთავარი აღმასრულებელი კარლოს გონი (სურათზე) აცხადებს, რომ მისი კომპანიის ელექტრომობილ ”ნისან ლიფს”, ანალოგიური კლასის ავტომობილების დონის ფასი ექნება და ამის მიუხედავად, მისი მეშვეობით, მოგებასაც მიიღებს.

”ნისან ლიფი” ხუთადგილიანი ჰეჩბეკია და მას ამძრავად ელექტრომოტორი ემსახურება. იაპონური კომპანიის განცხადებით, ავტომობილი აკუმულატორების სრულად დამუხტვის შემთხვევაში, მინიმუმ 160 კილომეტრის გავლას შეძლებს, მისი ფასი კი, შესაბამისი კლასის ავტომობილების ფასზე დაახლოებით 1-2 პროცენტით მეტი იქნება.

”ჯერჯერობით, ამ მანქანის ფასზე ლაპარაკი ნაადრევია, მაგრამ სიურპრიზები არ იქნება. ვიცით, რომ ბაზარზე ყველაზე მეტი მნიშვნელობა ფასს აქვს და ყველაფერს ვიზამთ იმისათვის, რომ ”ლიფის” შეძენა დიდ ხარჯებთან არ იყოს დაკავშირებული”, - ამბობს გონი, ვისაც ამ ელექტრომობილის სავარაუდო ფასი არ დაუსახელებია, მაგრამ განაცხადა, რომ მისი გაყიდვები აშშ-ში, იაპონიასა და ევროპაში ერთდროულად, ამ წლის ბოლოს დაიწყება.

”ნისანი” თავის მომავალს ელექტრომობილებს უკავშირებს და მისი მარკეტოლოგები ირწმუნებიან, რომ 2020 წელს, მსოფლიოს ბაზარზე გაყიდული ავტომობილების დაახლოებით 10 პროცენტი ელექტრომობილი იქნება. ამის გამო, იმისათვის, რომ ბაზრის ახალ სეგმენტზე ახლავე მოიკიდოს ფეხი და მის განვითარებასაც ხელი შეუწყოს, ”ნისანმა” ახლავე დაიჭირა თადარიგი და სხვადასხვა სახელმწიფოებთან და საკომუნიკაციო სფეროში მომუშავე კომპანიებთან, მრავალწლიანი პარტნიორობის ხელშეკრულებების გაფორმება დაიწყო.

პირველ რიგში, ამ კონტრაქტების მიზანი, ელექტრომობილებისთვის აუცილებელი ინფრასტრუქტურების მოწყობაა. ამისათვის შეიქმნება ავტომობილების დასამუხტი სადგურების ქსელი, სადაც ელექტრომობილების მფლობელებს, თავიანთი მანქანების ენერგიით გაწყობის, ან განმუხტული აკუმულატორების დამუხტულით სწრაფად შეცვლის საშუალება ექნებათ.

”ნისან ლიფისთვის” აკუმულატორების ბლოკებს იაპონური კომპანია NEC-ი დაამზადებს. წინასწარი მონაცემებით, ამ აკუმულატორების დამუხტვა, ჩვეულებრივი, 220-ვოლტიანი ელექტროქსელიდან იქნება შესაძლებელი. ამ ელექტრომობილის წარმოებას, ”ნისანი” ამერიკაში, შტატ ტენესიში აპირებს. ამისათვის, იაპონურმა კომპანიამ, აშშ-ის ენერგიის დეპარტამენტისგან, შეღავათიანი სესხის სახით, 1.6 მილიარდი დოლარი მიიღო. თუმცა, ამ ელექტრომობილის პირველი გასაყიდი ეგზემპლარები, ამერიკაში იაონიიდან შევა.

აღსანიშნავია, რომ ”ნისანმა” პრაქტიკულად უარი თქვა ჰიბრიდული ავტომობილების წარმოებაზე, რასაც ბევრი შიდაწვისძრავიანი ავტომობილებიდან, ელექტრომობილების წარმოებაზე გადასვლის შუალედურ საფეხურად მიიჩნევს. ამის მიზეზი ისაა, რომ ელექტრომობილების წარმოებას ახალი, მეტად ძვირადღირებული ტექნოლოგიების ათვისება სჭირდება, რაც საბოლოო პროდუქტს აძვირებს. ჰიბრიდული ტექნოლოგია კი შედარებით იაფი ჯდება და ავტომობილებსაც შედარებით მისაღები ფასი აქვს.

ჰიბრიდების ბაზარზე, დღეისათვის გამოკვეთილი ლიდერი იაპონური ”ტოიოტაა”, რომელიც მეტად პოპულარული ”პრიუსის” საბაზრო წარმატებებს არ სჯერდება და ამავე სახელით, ახალი ჰიბრიდების მთელი ”ოჯახის” წარმოებას გეგმავს. ამასთან, აცხადებს, რომ მალე თავის სამოდელო გამაში არსებული ყველა ავტომობილის ჰიბრიდულ ვერსიებსაც გამოუშვებს.

ოდნავ განსხვავებული გზა აქვს არჩეული ”ჯენერალ მოტორსს”, რომელიც აქცენტს ეგრეთ წოდებული გაზრდილი სვლის მქონე პლაგ-ინ ჰიბრიდების წარმოებაზე აკეთებს. ეს იგივე ელექტრომობილებია, რომლებსაც მარტო ელექტროძრავით, შედარებით მოკლე მანძილის გავლა შეუძლიათ, მაგრამ აკუმულატორების განმუხტვის შემდეგ, საქმეში მცირელიტრაჟიანი შიდაწვის ძრავისა და მასთან დაკავშირებული გენერატორის ტანდემი ერთვება, რომლის მიერ გამომუშავებული ელექტროენერგიაც ელექტროძრავს (ან ელექტროძრავებს) მიეწოდება. ასეთი ტექნოლოგიით იქნება აღჭურვილი ”გენერლების” ორი ახალი ავტომობილი - ”შევროლე ვოლტი” და ”ოპელ ამპერა”.

გონი, რომელიც იმავდროულად, ”ნისანის” მფლობელი ფრანგული კომპანია ”რენოს” მთავარი აღმასრულებელიცაა, აცხადებს, რომ ელექტრომობილების წარმოების ხარჯების შემცირება შესაძლებელი იქნება იმ შემთხვევაში, თუ ორივე კომპანია, ერთიდაიგივე ტექნოლოგიით, მინიმუმ რვა ავტომობილის წარმოებას დაიწყებს.

”ჩვენ ამ ტექნოლოგიებს უკვე ვფლობთ და ახლა პირველი რიგის ამოცანა ისაა, რომ ის რაც შეიძლება მეტი ავტომობილის წარმოებისთვის გამოვიყენოთ. სწორედ ამიტომაა, რომ ”ნისანისა” და ”რენოსთვის” ახალ სიმძლავრეებს ვაშენებთ, რომელთა წლიური წარმადობა 500 000 ავტომობილი და ამდენივე აკუმულატორების ბლოკი იქნება. ამ საწარმოებს კი შეერთებულ შტატებში, ევროპასა და იაპონიაში ავაგებთ. საერთო ჯამში, მათში ”ნისანისა” და ”რენოს” ოთხ-ოთხ მოდელს გამოვუშვებთ”, - ამბობს გონი.

და მაინც, მთავარი ხერხი, რომლითაც ელექტრომობილების ფასის დაწევა იქნება შესაძლებელი, ძვირადღირებული აკუმულატორების ლიზინგია. ამ პრინციპით, ”ნისანის” ელექტრომობილების მყიდველი, ავტომობილს შეიძენს, აკუმულატორებს კი ლიზინგით მიიღებს და მის ფასს, აკუმულატორების დამუხტვისას გადასახდელ ფასთან ერთად, თანდათან დაფარავს.

გონი ირწმუნება, რომ ელექტრომობილების წარმოება, ”ნისანისთვის” მომგებიანი ბიზნესი იქნება. ასე რომ არ იყოს, მისი ორივე კომპანია, ამ წამოწყებაზე უარს იტყოდა. შედარებისთვის, ”ჯენერალ მოტორსში” აღიარებენ, რომ ”შევროლე ვოლტის” წარმოების პირველ ხანებში, ეს საქმე წამგებიანი იქნება, თუმცა ეს სიტუაცია, ტექნოლოგიების განვითარებასთან ერთად შეიცვლება და ეს პლაგ-ინ ჰიბრიდი მოგების მოტანას დაიწყებს.

Sunday, February 21, 2010

”პეჟო” ”ხუთიანს” ჟენევაში გაგვაცნობს

5 by Peugeot to Be Unveiled at Geneva

20 თებერვალი

ეკონომიკური კრიზისი დასასრულს უახლოვდება და ეს ტენდენცია საავტომობილო ბაზარზეც იგრძნობა. ჰოდა, ავტომწარმოებლები ცდილობენ, ეკონომიკურად მომძლავრებულ ავტომოყვარულებს ახალი ავტომობილები შეაგებონ და ამით მოთაფლონ ავტომობილის საყიდლად მომზადებულები. პარალელურად კი, ისინი ისეთ კონცეპციებს ქმნიან, რომლებითაც მათი მომავალი პროდუქტის ახლავე გაცნობა შეიძლება.

საავტომობილო ბაზრის გამოცოცხლების მაუწყებელი პირველი მერცხალი ჟენევის საავტომობილო შოუ გახდება, რომელზეც არნახულად ბევრი ექსპონატის ხილვა იქნება შესაძლებელი. ჩვენ უკვე არაერთი ახალი და კონცეპტუალური ავტომობილის გაცნობა მოვასწარით, რომლებსაც მსოფლიო პირველად სწორედ ჟენევაში იხილავს. ერთ-ერთი ასეთი კი იქნება ”პეჟოს” ახალი კონცეპტუალური მოდელი, რომელსაც ”ლომებმა” ”ხუთიანი პეჟოსგან” უწოდეს.

ეს არის ჰიბრიდული ავტომობილი, რომელშიც, ძალური დანადგარის გარდა, საინტერესო მისი დიზაინიცაა. ეს მანქანა კონცეპტუალური SR1-ის მოდიფიცირებული, უფრო დახვეწილი ვერსიაა, რომელიც ახლოს დგას საწარმოო ვარიანტთან და ნუ გაგიკვირდებათ, თუ მოდელ 509-ს, რომელმაც ერთბაშად ორი მოდელი, 407 და 607 უნდა შეცვალოს, სწორედ ასეთი გარეგნობა ექნება.

”ხუთიანი პეჟოსგან” აღჭურვილია ჰიბრიდული სისტემით, რომლის მთავარი აგრეგატიც Hdi სერიის 2.0-ლიტრიანი დიზელია. ამ ძრავის სიმძლავრე 163 ცხენის ძალაა და ის ავტომობილის წინაა განლაგებული. მასთან კი 37-ცხენისძალიანი ელექტროძრავია შეწყვილებული, რომელიც უკანაა მოთავსებული.

ამ ავტომობილს მხოლოდ ელექტროძრავით მცირე მანძილზე გადაადგილება შეუძლია. სამაგიეროდ, როდესაც ორივე ძრავი მუშაობს, ის სრულამძრავიანი ხდება. ჯერჯერობით ”ლომები” მის დინამიკურ მახასიათებლებზე არაფერს ამბობენ. სამაგიეროდ, გვპირდებიან, რომ ”ხუთიანს” 100 კილომეტრის გასავლელად, 3 ლიტრი საწვავი ეყოფა, ყოველი კილომეტრის გავლისას კი ის ატმოსფეროს მხოლოდ 99 გრამი ნახშირორჟანგით დააბინძურებს. და როცა მხოლოდ ელექტროძრავით ივლის, გამონაბოლქვი საერთოდ არ ექნება.

”ნისანმა” ახალი ”პატრული” გაგვაცნო

Nissan Patrol Video Released

20 თებერვალი

”ნისანმა” აბუ დაბიში თავისი პოპულარული უგზოობის მოდელის, ”პატრულის” ახალი თაობის პრეზენტაცია ჩაატარა, რომლის დროსაც, იაპონური კომპანიის დიზაინის განყოფილების შეფმა ტაიძი ტოიოტამ განაცხადა, რომ ახალი ავტომობილის დიზაინი კონცეპტუალურ მოდელ ”ტერანავტის” სტილშია შესრულებული.

წინამორბედთან შედარებით, ახალ ”პატრულს” ნაკლებად უხეში გარეგნობა აქვს. დიზაინის გარდა, მასში ძირითადი ძრავიც და გადაცემათა კოლოფიც ახალია. შეიცვალა პლატფორმაც, რის გამოც, უკანა სავარძლების მგზავრების ფეხებისთვის განკუთვნილი სივრცის სიგრძე 10 სანტიმეტრით გაიზარდა. ასევე გაზრდილია სავარძლების მესამე რიგის სივრცეც.

ახალი ”პატრული” ბენზინის 5.6-ლიტრიანი V8 ძრავითაა აღჭურვილი (წინა ”პატრული” 4.8-ლიტრიანი V8 ძრავით გამოდიოდა), რომელსაც საწვავი უშუალოდ წვის კამერაში მიეწოდება. ამ აგრეგატის მაქსიმალური სიმძლავრე 400 ცხენის ძალა, მაქსიმალური მაბრუნი მომენტი კი 550 ნიუტონმეტრია. მასთან 7-საფეხურიანი ავტომატური კოლოფია შეწყვილებული.

ახალი პატრულის” ოთხივე ბორბალი შასის დამოუკიდებელი საკიდარის მეშვეობით უკავშირდება, მოდერნიზაცია ჩაუტარდა სამუხრუჭე სისტემას - ავტომობილის ეფექტურ შენელებას ოთხცილინდრიანი დამჭერები უზრუნველყოფს. ის ასევე აღჭურვილია აღმართზე ასვლისა და დაშვების, ასევე HBMC სისტემით, რომელიც მოსახვევების გავლისას, ძარის გადახრას ამცირებს.

წინამორბედთან შედარებით, უფრო მდიდრულადაა გაწყობილი ახალი ”პატრულის” სალონი. ამასთან, სურვილის შემთხვევაში, მყიდველს შეუძლია შეუკვეთოს მულტიმედიური სისტემა, რომელიც მეორე რიგის მგზავრებს 7-დუიმიანი მონიტორების დახმარებით გაართობს.

ჯერჯერობით ცნობილი არაა ახალი ”ნისან პატრულის” ფასი. სამაგიეროდ, უკვე ვიცით, რომ იაპონური კომპანია მის გაყიდვას ამ წლის ბოლოს დაიწყებს.

Saturday, February 20, 2010

”სიტროენმა” DS3-ის სპორტული ვარიანტი შექმნა

Citroen DS3 Racing Official Info and Pictures

20 თებერვალი

ისევე როგორც სხვა კომპანიებმა, ”სიტროენმაც” თავისი ახალი ავტომობილის შესახებ, პირველი ინფორმაცია და ფოტოები ჟენევური გამოფენის დაწყებამდე გამოაქვეყნა. ეს არის ჰეჩბეკ DS3-ის ბაზაზე შექმნილი სპორტული მოდელი, რომელსაც სახელში ”რეისინგი” დაემატა. როგორც ფრანგული კომპანიის მიერ გამოქვეყნებულ პრეს რელიზშია მითითებული, ”DS3 რეისინგი” მხოლოდ 1 000 ცალი დამზადდება.

სტანდარტული ჰეჩბეკისგან ”DS3 რეისინგი” უფრო აგრესიული გარეგნობით გამოირჩევა, რასაც მას კარბონის კომპოზიტისგან დამზადებული აეროდინამიკური ელემენტები ანიჭებს. ამასთან, ავტომობილის სახურავი, სარკეები, 18-დუიმიანი ბორბლები და რადიატორის არშიები ფორთოხლისფრად არის შეღებილი.

ავტომობილის კაპოტის ქვეშ მოთავსებულია ბენზინის 1.6-ლიტრიანი ტურბოძრავი, რომლის მაქსიმალური სიმძლავრეც, 150-დან 200 ცხენის ძალამდეა გაზრდილი. სიმძლავრის ზრდა, პირველ რიგში, ძრავის ელექტრონული ბლოკის პროგრამის შეცვლამ გამოიწვია. მოდერნიზაცია ჩაუტარდა ტურბოკომპრესორს, შეიცვალა შემშვები კოლექტორი. შედეგად, სიმძლავრის გარდა, მაბრუნი მომენტი 240-დან 275 ნიუტონმეტრამდე გაიზარდა და მისი მაქსიმუმი, მუხლა ლილვის 2 500-4 000 ბრ/წთ-ზე მიიღწევა.

სტანდარტულ ჰეჩბეკთან შედარებით, ”DS3 რეისინგი” 15 მილიმეტრით დადაბლდა, მისი ბორბლების კვალი კი 30 მილიმეტრით გაგანიერდა. შეიცვალა წინა და უკანა ამორტიზატორები, რომლებიც სტანდარტულზე ხისტია. წინა ბორბლების დამუხრუჭებას 4-ცილინდრიანი სისტემა ემსახურება, სტაბილიზაციის სისტემა კი საჭიროების შემთხვევაში, სრულად ითიშება.

სალონში ახალ, სპორტულ სავარძლებს ნახავთ, რომლებსაც მძლავრი გვერდითა მისაყრდნობები აქვს, სავარძლების ცენტრში კი, საკისრეების ქვევით, ”სიტროენ რეისინგია” ამოქარგული. სალონში მრავლად ნახავთ კარბონის კომპოზიტისგან დამზადებულ დეტალებს, რაც ასევე ავტომობილის სპორტულობას უსვამს ხაზს.

”სიტროენი” ”DS3 რეისინგის” გაყიდვას წლის მეორე ნახევრიდან დაიწყებს.

”ფოლკსვაგენის” კიდევ ერთი ქროსოვერი

Volkswagen Shows CrossPolo

20 თებერვალი

”ფოლკსვაგენმა” თავისი ახალი ავტომობილის, ჰეჩბეკ ”პოლოს” ბაზაზე შექმნილ ქროსოვერ ”ქროსპოლოს” ფოტოები გამოაქვეყნა და გამოაცხადა, რომ ამ ავტომობილის მსოფლიო პრემიერას ჟენევის საავტომობილო შოუზე გამართავს.

”ქროსპოლო” მხოლოდ ხუთკარიანი ძარით დამზადდება. 15 მილიმეტრით გაზრდილი კლირენსის გარდა, მას ”პოლოსგან” ბამპერზე, ზღურბლსა და და საბორბლე თაღებზე გადაკრული შავი პლასტიკატი, ასევე სახურავის გასწვრივ არსებული საბარგო რეილინგი გამოარჩევს.

ავტომობილი მისთვის საკმაოდ დიდ, 17-დუიმიან ბორბლებზე დგას, რომლებზე ჩაცმული საბურავის ზომაც 214/40-ეა. სალონში კი ყურადღებას ახალი სავარძლები იქცევს, რომლებსაც ჩვეულებრივთან შედარებით, უფრო დიდი ზომის გვერდითა მისაყრდნობები აქვს, სავარძლებზე კი ავტომობილის სახელია ამოქარგული.

ქროსოვერისთვის გათვალისწინებულია 1.2-ლიტრიანი ატმოსფერული და ტურბოძრავები, რომელთა მაქსიმალური სიმძლავრეც 70 და 105 ცხენის ძალაა. მესამე ძრავია 1.4-ლიტრიანი დიზელი, რომლის სიმძლავრეც 85 ცხენის ძალაა. მალე ამ აგრეგატების სიას სამი დიზელიც დაემატება, რომელთა სიმძლავრეც 75, 90 და 105 ცხენის ძალაა.

მოსალოდნელია, რომ ”ქროსპოლო” თავის ჰეჩბეკისძარიან ნათესავზე დაახლოებით 3 000 ევროთი ძვირი ეღირება. მისი საბაზო ვერსიის ღირებულება 15 500 ევრო იქნება.

”ქროსპოლოს” გარდა, ვოლფსბურგელები ჟენევაში ”პოლოს” სპორტულ ვერსია GTI-საც გვიჩვენებენ. ეს ავტომობილი 1.4-ლიტრიანი ბენზინის ძრავითაა აღჭურვილი, რომელსაც ერთდროულად, მექანიკური და ტურბოდამჭირხნი ემსახურება. მათი მეშვეობით, აგრეგატის მაქსიმალური სიმძლავრე 180 ცხენის ძალას აღწევს. ამ აგრეგატს DSG სერიის 7-საფეხურიანი რობოტიზებული კოლოფი ემსახურება.

”შკოდა” ”რენო ლოგანის” კონკურენტს ამზადებს

More details emerge about Skoda's Logan fighter

20 თებერვალი

ჩეხური კომპანია ”შკოდა”, რომელიც ”ფოლკსვაგენის” ჯგუფში შედის, წარმოებისთვის დაბალფასიან საოჯახო სედანს ამზადებს, რომლითაც ”რენოს” პოპულარული ”ლოგანისთვის” (სურათზე) კონკურენციის გაწევას იმედოვნებს. ”შკოდას” პროფკავშირის შეფმა იაროსლავ პოვსიკმა განაცხადა, რომ ახალი ავტომობილის სახელად ჯერჯერობით ”ენტრია” შერჩეული, თუმცა არ დაუზუსტებია, ეს სახელი დარჩება, თუ შეიცვლება.

ჩეხური გაზეთი ”მლადა ფრონტა დნეშ ჩეხ” იუწყება, რომ ახალი ავტომობილის ფასი შესაძლოა, 260 000 კრონი (დაახლოებით $13 650) იყოს, რაც სუბკომპაქტური ”ფაბიას” ფასზე მეტი და კომპაქტურ სედან ”ოქტავიას” ფასზე ნაკლებია. იმავე გაზეთის ცნობით, ეს ავტომობილი დაბალი შემოსავლების მქონე მყიდველზე იქნება გათვლილი, რომლებსაც სუბკომპაქტურზე დიდი ზომის ავტომობილის შეძენა სურთ.

თავად ”შკოდას” ხელმძღვანელობა ამ თემაზე კომენტარისგან ჯერჯერობით თავს იკავებს. თუმცა, სამი თვის წინ, ”შკოდას” მთავარმა აღმასრულებელმა რაინჰარდ იუნგმა გერმანულ გამოცემა ”აუტომობილვოხესთან” საუბრისას განაცხადა, რომ ამ ავტომობილის წარმოება 2-3 წელიწადში დაიწყება.

მას შემდეგ, რაც ვოლფსბურგული გიგანტის ქოლგას შეეფარა, ”შკოდამ” ევროპული დონის ავტომობილების წარმოება დაიწყო და შესაბამისად, მისი პროდუქციაც გაძვირდა, მაგრამ დღეს კომპანია წარმოების გაზრდას მაინც დაბალფასიანი ავტომობილების ხარჯზე ცდილობს და ამ მიმართულებით პირველი ნაბიჯი სწორედ ახალი სედანი გახდება.

ეს ავტომობილი ბევრ კომპონენტს ”ფაბიასა” და ”ოქტავიასგან” მიიღებს, რაც მისი ფასის შემცირებას განაპირობებს. თუმცა, ამის მიუხედავადაც, მაინც ”ლოგანზე” ძვირი ეღირება. ფრანგული კომპანიის ავტომობილის საბაზო ღირებულება 7 300 ევროა.

”შკოდამ” შარშან მთელს მსოფლიოში 684 226 ავტომობილი გაჰყიდა, რაშიც მას დასავლური ქვეყნების ბაზრებზე მოქმედი შეღავათები და ჩინეთში ექსპანსია დაეხმარა. წელს კი, იმის გამო, რომ შეღავათების სისტემა გაუქმდა, ჩეხურმა კომპანიამ ”ფაბიას” წარმოების მოცულობა შეამცირა.

Thursday, February 18, 2010

”ბერტონე პანდიონი” - კონცეპტი ”ალფა რომეოსთვის”

Bertone Alfa Romeo Pandion Concept

18 თებერვალი

იტალიურმა სადიზაინერო ატელიე ”ბერტონემ” თავისი ახალი კონცეპტუალური კუპეს ფოტოები გაავრცელა. ეს ავტომობილი ”ალფა რომეოს” შეკვეთითაა დამზადებული და მას სახელად ”პანდიონი” შეარქვეს. გავრცელებული ინფორმაციით, ამ ავტომობილის გარეგნობაში შეიძლება ”ალფა რომეოს” სედან 159-ის ორკარიანი ვერსიის მომავალი სახე.
იტალიურ საიტ ”უნიკა-სტრადას” მიერ გავრცელებული ინფორმაციით, ”პანდიონის” სიგრძე 4.82 მეტრია. ის მილანელთა სპორტულ მოდელ ”ალფა 8C კომპეტიციონეს” პლატფორმაზეა შექმნილი და აღჭურვილია მისივე 4.7-ლიტრიანი V8 ძრავით, რომელიც 450 ცხენის ძალას იძლევა.
”პანდიონში” ჩასაჯდომი ფორმულაა 2+2, რაც იმას ნიშნავს, რომ უკანა სავარძლები ზრდასრულებისთვის მეტად მოუხერხებელი უნდა იყოს. ავტომობილი ზუსტად 1000 კილოგრამს იწონის. ჯერჯერობით სულ ეს ინფორმაციაა, რაც ”ბერტონემ” ამ კონცეპტუალური მოდელის მსოფლიო პრემიერამდე გაიმეტა. პრემიერა კი მარტის დასაწყისში, ჟენევის საავტომობილო შოუზე გაიმართება.

სხვათა შორის, იმავე 159-ის თემაზე, ”ალფა რომეოს” დავალებით, კონცეპტუალური მოდელები კიდევ ორმა იტალიურმა ატელიემ - ”იტალდიზაინ ჯუჯარომ” და ”პინინფარინამ” მოამზადა და ისინიც თავიანთ ნამუშევრებს ჟენევაში გვაჩვენებენ. ოღონდ, ”ჯუჯაროს” ავტომობილს სედანის ძარა ექნება, ”პინინფარინასას” კი - როდსტერისა. თანაც, ეს უკანასკნელიც ”ალფა 8C კომპეტიციონეს” პლატფორმაზეა დამზადებული.

რაც შეეხება ”ალფა რომეო 159-ის” შემცვლელს, გავრცელებული ინფორმაციით, ის ”კრაისლერის” რომელიმე მოდელის პლატფორმაზე დამზადდება და ის ევროპულ ბაზარზე წელსვე გამოჩნდება.

”ოპეკმა” ახალი ჰიბრიდული კონცეპტუალური ავტომობილი გაგვაცნო

Opel Flextreme GT/E Concept to Debut in Geneva

18 თებერვალი

”ოპელმა” გამოაქვეყნა თავისი ახალი კონცეპტუალური ავტომობილის, ჰიბრიდული ”ფლექსტრიმ GT/E-ს” შესახებ პირველი ოფიციალური ინფორმაცია და ფოტოები გაავრცელა. გერმანულმა კომპანიამ გამოაცხადა, რომ ეს ავტომობილი გვიჩვენებს, თუ რა მიმართულება აქვს ”ოპელს” არჩეული ეკოლოგიისადმი მეგობრული ავტომობილების წარმოების საქმეში.
”ფლექსტრიმ GT/E-ს” სირგძე სედან ”ოპელ ინსინიასაზე” 7 სანტიმეტრით მოკლე (4.7 მეტრი), ბაზა კი 16.5 სანტიმეტრით (2.9) გრძელია. კონცეპტუალური ავტომობილის ძარა კარბონის, შუშის და პოლიკარბონატის კომპოზიტებისგან, მზიდი ელემენტის ზოგიერთი ნაწილი კი - ალუმინის მსუბუქი შენადნობებისგანაა დამზადებული, რისი წყალობითაც, ის შესაბამისი კლასის სხვა ავტომობილებზე დაახლოებით 40 პროცენტით მსუბუქი გამოვიდა.

”ოპელის” მიერ გამოქვეყნებულ პრეს რელიზში აღნიშნულია, რომ კონცეპტუალური ავტომობილის აეროდინამიკური წინააღმდეგობის კოეფიციენტი სულ რაღაც 0,22-ია, რაც შესანიშნავი მაჩვენებელია, რასაც ძარის სპეციალური, აქტიური ნაწილები განაპირობებს. მათი მეშვეობით, ჰაერის შემხვედრი ნაკადის წინააღმდეგობაც მცირდება და ის ძარას უფრო ეფექტურადაც უვლის გარს.

მაგალითად, როდესაც ავტომობილის სიჩქარე 50 კმ/სთ-ზე მაღლა ადის, უკანა ბორბლის უკანა ნაწილში არსებული ღრიჭოდან, გარეთ გამოდის ვერტიკალური ფირფიტა-სპოილერები, რომელთა სიგრძე სულ რაღაც 35 სანტიმეტრი კია, მაგრამ ისინი ჰაერის ნაკადს სწორ მიმართულებას აძლევენ.

”ფლექსტრიმ GT/E-ს” მთავარი მამოძრავებელი აგრეგატი 150-ცხენისძალიანი ელექტროძრავია, რომელსაც ენერგიით, ავტომობილის ძირსა და უკანა სავარძლების ძირზე მოთავსებული ლითიუმ-იონური აკუმულატორების ბლოკი კვებავს. მათში დაგროვილი ენერგია კი საკმარისია იმისათვის, რომ ავტომობილმა 60 კილომეტრის გავლა შესძლოს.

თუმცა, ამ ავტომობილისთვის, ეს სვლის სიშორე მაქსიმალური არაა. აკუმულატორების სრულად განმუხტვის შემდეგ, საქმეში ბენზინზე მომუშავე 1.4-ლიტრიანი ძრავი და მასთან დაკავშირებული გენერატორი ერთვება, რომელიც გამომუშავებულ ენერგიას აკუმულატორებს მოძრაობის დროს აწვდის. ამ ტანდემის მეშვეობით, სვლის სიშორე 500 კილომეტრამდე იზრდება.

”ოპელის” მონაცემებით, მის ახალ კონცეპტუალურ ავტომობილს ადგილიდან 100 კმ/სთ სიჩქარის აკრეფა 9 წამში შეუძლია, მისი მაქსიმალური სიჩქარე კი 200 კმ.სთ-ს აღწევს.

”ფლექსტრიმ GT/E-ს” მსოფლიო პრემიერა ჟენევის საავტომობილო შოუზე გაიმართება.

”ბენტლიმ” მსოფლიოში უსწრაფესი კაბრიოლეტი შექმნა

Bentley Continental Supersports Convertible Previewed

18 თებერვალი

ინგლისურმა კომპანია ”ბენტლიმ”, რომელიც გერმანული ”ფოლკსვაგენის” ჯგუფში შედის, წარმოებისთვის თავისი კუპეს, ”კონტინენტალ სუპერსპორტის” ღია ვარიანტი - ”კონტინენტალ სუპერსპორტს კონვერტაილი” მოამზადა, რომელიც, ”ბენტლის” ხელმძღვანელთა განცხადებით, მსოფლიოს უსწრაფესი კაბრიოლეტია.

ახალი ავტომობილი აღჭურვილია წყილტურბოკომპრესორიანი W12 ძრავით, რომელიც 6000 ბრ/წთ-ზე 630 ცხენის ძალას, 2000-4500 ბრ/წთ-ს დიაპაზონში კი 800 ნიუტონმეტრ მაბრუნ მომენტს ავითარებს. საინტერესოა, რომ ეს ძრავი მუშაობს როგორც სუფთა ბენზინზე, ასევე ბიოსაწვავ E85-ზეც, რომელშიც 85 პროცენტი ეთანოლია.

ძრავთან შეწყვილებულია რობოტიზებული გადაცემათა კოლოფი ZF 6HP26, რომელიც გადაცემის საფეხურებს, ჩვეულებრივ კოლოფებზე ორჯერ სწრაფად ცვლის. ავტომობილი სრულამძრავიანია.

მწარმოებლის მიერ გავრცელებული ინფორმაციით, ”კონტინენტალ სუპერსპორტს კონვერტაილს” ადგილიდან 100 კმ/სთ სიჩქარის აკრეფა 4.2 წამში შეუძლია, 160 კმ/სთ სიჩქარეს 9.5 წამში კრეფს, მისი მაქსიმალური სიჩქარე კი 325 კმ/სთ-ს აღწევს.

ახალი ავტომობილის ოფიციალური პრემიერა ჟენევის საავტომობილო შოეზე გაიმართება, მის გაყიდვას კი ”ბენტლი” შემოდგომიდან დაიწყებს.

Wednesday, February 17, 2010

”დოჯმა” ახალი კომპაქტური ჰეჩბეკის ესკიზები გამოაქვეყნა

New Dodge Compact Previewed

17 თებერვალი

ჩიკაგოს საავტომობილო გამოფენაზე, ამერიკულ კომპანია ”დოჯის” გენერალურმა დირექტორმა რალფ ჟილმა საზოგადოებას წარუდგინა B კლასის ჰეჩბეკის ესკიზი. ეს ავტომობილი, რომელსაც ჯერ სახელიც არ აქვს, ”ფიატის” და ”კრაისლერის” (დოჯი კრაისლერის ჯგუფში შედის) ერთობლივი მუშაობის პირველი პროდუქტი გახდება.

ესკიზიდან ჩანს, რომ ახალი ავტომობილი ”დოჯ კალიბერის” სტილშია შესრულებული, თუმცა ის უფრო კომპაქტური და სპორტული გარეგნობისაც იქნება. ჰეჩბეკის ბაზისად კი ”ფიატის” შესაბამისი მოდელის (პუნტოს) დაგრძელებულ პლატფორმას გამოიყენებენ, რომელიც, მასში ჭარბად გამოყენებული ალუმინის ხარჯზე, იტალიურ პლატფორმაზე მსუბუქი იქნება.

”დოჯის” ჰეჩბეკი აღიჭურვება ახალი ძრავებით, რომელსაც ”ფიატის” მიერ შემუშავებული გაზმაგამანიწებელი სისტემა ”მულტიეარი” მოემსახურება. ამ სისტემის მეშვეობით, ძრავი ეკონომიურიც იქნება და გარემოსაც ნაკლებად დააბინძურებს.

მოსალოდნელია, რომ ”დოჯის” ახალი ჰეჩბეკი ამერიკის ბაზარზე პირველად 2012 წელს გამოჩნდება. ამასთან, მისი ანალოგი ევროპაში ”ალფა რომეოს” და ”ფიატის” ლოგოებით, იტალიური კომპანიების კორპორატიულ სტილში შესრულებული ძარებით გაიყიდება.

”ლოტუსმა” ”ელიზი” განაახლა

Lotus Elise Facelift Presented

17 თებერვალი

გარდა იმისა, რომ ფორმულა 1-ს დაუბრუნდა, ”ლოტუსი” თავისი სამოდელო გამის გაფართოებაზეც ზრუნავს - კომპანიამ ახლახანს თავის ძირითად მოდელ ”ელიზს” მოდერნიზაცია ჩაუტარა და მის შესახებ ინფორმაცია ინტერნეტით გაავრცელა.

ახალ ”ელიხა” შეცვლილი აქვს წინა ნაწილი. გაიზარდა რადიატორის ფართობი, შეიცვალა წინა მუხრუჭების ჰაერის ამღებთა მოყვანილობა და წინა ფარების დიზაინი. მათში კი დღის სინათლის შუქდიოდები ჩამონტაჟდა. ავტომობილის უკანა ნაწილში შეიცვალა ბამპერი და ძრავის ხუფის ფორმა.

განახლებულ ავტომობილს საბაზო ძრავიც ახალი აქვს - ესაა ”ტოიოტას” წარმოების 1.6-ლიტრიანი აგრეგატი, რომელიც საწვავის შეშვების სისტემის (ვალვმატიკ) შეცვლილი კონსტრუქციით გამოირჩევა. ეს სისტემა გაზგამანაწილებელი მექანიზმის ფაზების შეცვლას აკონტროლებს. ამასთან, ის მუშაობის პროცესში ცვლის შემშვები სარქველების გახსნის სიგრძეს. ახალი ძრავის მაქსიმალური სიმძლავრე 136 ცხენის ძალას შეადგენს.

ძრავთან შეწყვილებულია 6-საფეხურიანი მექანიკური გადაცემათა კოლოფი, რომელშიც ყველა საფეხური ერთმანეთთანაა დაახლოებული. ამის მეშვეობით, ავტომობილი სწრაფად აჩქარებას ახერხებს და ის განსაკუთრებით მანევრული მოსახვევებიან გზაზეა. სხვათა შორის, მანევრულობა ყოველთვის იყო ”ლოტუს ელიზის” მთავარი თვისება.

ცნობისათვის, აქამდე ”ელიზის” საბაზო აგრეგატი ”ტოიოტასვე” წარმოების 1.8-ლიტრიანი ძრავი იყო, რომელიც 134 ცხენის ძალას ავითარებს. ამ ძრავთან კი 5-საფეხურიანი მექანიკური კოლოფი იყო შეწყვილებული. ახალი საბაზო აგრეგატი ატმოსფეროში ყოველ კილომეტრზე 155 გრამ ნახშირორჟანგს გამოჰყოფს, რაც ძველის ანალოგიურ მაჩვენებელზე 13 პროცენტით ნაკლებია.

ახალი ”ელიზის” ძრავების გამაში კიდევ ორი 1.8-ლიტრიანი ოთხცილინდრიანი აგრეგატი შედის, რომელთაგან ერთი, ნაკლებად ფორსირებული (R) 192 ცხენის ძალას გამოიმუშავებს, მეორე, რომელსაც მექანიკური დამჭირხნი ემსახურება - 217 ცხენის ძალას. ამასთან, მათ გამონაბოლქვში CO2-ის შემცველობა, შესაბამისად 196 და 199 გრამია კილომეტრზე.

”ლოტუსის” ბრიტანული დილერების შოურუმებში ახალი ”ელიზი” აპრილში გამოჩნდება და მისი ფასიც მაშინ გამოცხადდება.

Tuesday, February 16, 2010

”რინსპიდმა” ჟენევისთვის ელექტრონული კონცეპცია მოამზადა

Rinspeed UC? Concept

16 თებერვალი

შვეიცარულმა სადიზაინერო ატელიე ”რინსპიდმა” ჟენევის საავტომობილო გამოფენისთვის ელექტრონული კონცეპტუალური მოდელი მოამზადა უცნაური სახელით - UC?. ეს ატელიე ყოველთვის გამოირჩეოდა იმით, რომ ჟენევაში ყველას უცნაური კონცეპციებით აკვირვებდა.

მაგალითად ერთხელ მის სტენდზე ავტომობილი-ამფიბიას ნახვა შეიძლებოდა, ერთხელ უხილავი ავტომობილი შეაგება დამთვალიერებლებს, ერთხელაც - მფრინავი ავტომობილი. ჩამონათვალი ბევრია და ყველა მათგანს რაღაც ორიგინალური თვისება აქვს.

მაგრამ როგორც ჩანს, ”რინსპიდში” ჩათვალეს, რომ უცნაურობათა დრო დასრულდა და იმ დროს, როდესაც ავტოინდუსტრია მასობრივ ელექტრიფიკაციას იწყებს, უმჯობესი იქნება, თუ ისინიც ამ ტენდენციას ფეხს აუბამენ. შედეგად, იშვა საქალაქო ჯუჯა ელექტრომობილი ”რინსპიდ UC?”, რომელსაც, თუ მის შემქმნელებს დავუჯერებთ, სერიულად გამოუშვებენ.

ჯერჯერობით, ამ ჯუჯა ელექტრომობილის შესახებ დაწვრილებითი ინფორმაცია არ ვრცელდება. სამაგიეროდ, ცნობილია, რომ მისი მაქსიმალური სიჩქარე 105 კმ/სთ-ს მიაღწევს, აკუმულატორების ერთი სრულფასოვანი დამუხტვით კი 113 კილომეტრის გავლა იქნება შესაძლებელი.

სხვათა შორის, თავისი მომავალი სერიული ავტომობილის პოპულარიზაციისა და მომსახურების გასაადვილებლად, ”რინსპიდი” ელექტრომობილების სწრაფი დამუხტვის პორტატული სადგურის პროექტსაც დაამუშავებს. რაც შეეხება ”რინსპიდ UC?-ს”, ის საჭის რგოლისნაცვლად, ჯოისტიკით იმართება, რაც სტელიეს ინჟინრების თქმით, უკეთეს მართვადობას განაპირობებს.

”რინსპიდის” შეფმა ფრანკ რინდერკნეხტმა განაცხადა, რომ UC?-ს ყველა შანსი აქვს იმისა, რომ ლეგენდარული სახალხო ავტომობილის - ”ფოლკსვაგენის” ხოჭოს თანამედროვე ინტერპრეტაცია გახდეს. მანვე დასძინა, რომ მიმდინარეობს მოლაპარაკება დიდ ავტომწარმოებლებთან, რისი მიზანიც, ამ კონცეპტუალური ჯუჯას ბაზაზე სერიული ავტომობილის წარმოებაა.