Sunday, February 27, 2011

„ჰიუნდაი i20-მა“ ხუთი ვარსკვლავი მიიღო

Hyundai ix20 awarded maximum 5-star Euro NCAP rating

27 თებერვალი


ორგანიზაცია Euro NCAP-მა (იუროპიენ ნიუ ქარ ესესმენტ პროგრამ - ევროპის ახალი მანქანების შეფასების პროგრამა) ქრეშ-ტესტების მორიგი სერია ჩაატარა, რომლის შემდეგაც, უსაფრთხოებაზე ხუთი ვარსკვლავი მიანიჭა „ჰიუნდაის“ B სეგმენტის მიკროვენ (MPV - მალტი პურპოუს ვიიქლ, ანუ მრავალმხრივი დანიშნულების მანქანა) ix20-ს.

ამგვარად, „ჰიუნდაიix20“ თავისი სეგმენტის იმ უიშვიათეს მოდელთაგანია, რომლის უსაფრთხოების დონეც ხუთი ვარსკვლავით (უმაღლესი შეფასებაა) შეფასდა. ამასთან, ეს კორეული კომპანიის მეოთხე ავტომობილია, რომელმაც ევროპის უმკაცრესი სტანდარტებით, უმაღლესი შეფასება მიიღო. მანამდე ხუთი ვარსკვლავით სუპერმინი ჰეჩბეკი i20, კომპაქტური ჰეჩბეკი i30 და C სეგმენტის (კომპაქტური) უგზოობის ix35 შეფასდა.

ტესტების დროს, „ჰიუნდაი i20“ ხანგრძლივი დაკვირვების ქვეშ იმყოფებოდა. მცირეასაკოვანი მგზავრების დაცვის კატეგორიაში, ავტომობილმა 85-პროცენტიანი შეფასება დაიმსახურა. ზრდასრულთა და ფეხით მოსიარულეთა დაცვის კატგორიებში, ავტომობილმა შედაბამისად, 89 და 64-პროცენტიანი შეფასება მიიღო.

უსაფრთხოების დამხმარე სისტემები 71 პროცენტით შეფასდა ავტომობილის ელექტრონული სტაბილურობის პროგრამისა (ESP) და უსაფრთხოების ღვედების შეკვრის აუცილებლობის შეხსენების სისტემების მუშაობა. დაბოლოს, i20-მა მაქსიმალური შეფასება მიიღო გვერდითა შეჯახებისა და უკნიდან შეჯახებისას, სალონში მყოფთა კისრების დაცვის კატეგორიაში.

„i20-ის ხუთვარსკვლავიანი შეფასება კიდევ ერთხელ ცხადყოფს, რომ „ჰიუნდაი“ თავისი მომხმარებლების უსაფრთხოებაზე ზრუნვას დიდ ყურადღებას უთმობს. დაუმატეთ ამას მრავალფეროვანი სტანდარტული აღჭურვილობა, ძრავების ფართო არჩევანი და მომსახურების „ხუთწლიანი სამმაგი ზრუნვის“ საგარანტიო პროგრამა და დარწმუნდებით, რომ i20 ღირებული შენაძენია“, - ამბობს „ჰიუნდაი მოტორ იუროპის“ უფროსი ვიცე პრეზიდენტი ალან რაშფორტი.

ცნობისათვის, ევროპის ბაზარზე ეს პატარა ავტომობილი შარშან, ნოემბერში გამოჩნდა და მას შემდეგ, სულ რაღაც სამ თვეში, კორეულმა კომპანიამ მასზე დაახლოებით 32 000 შეკვეთა მიიღო.

Saturday, February 26, 2011

„ვოლვოს“ იკონური კუპე P1800 50 წლისაა

Volvo's Iconic P1800 Turns 50 This Year

26 თებერვალი

ირვ გორდონი თავის ლეგენდარულ ვოლვო P1800-თან
..............................

ამ ავტომობილმა სახელი ტელესერიალ „წმინდანის“ მეშვეობით გაითქვა, ფილმისა, რომელშიც მას სახელოვანი როჯერ მურის გმირი მართავდა. ამბობენ, მსახიობს „ვოლვოს“ სპორტული ავტომობილი იმდენად მოეწონა, რომ ერთი თვითონაც იყიდაო.

„ვოლვო P1800-ის“ პრემიერა ბრიუსელის 1960 წლის ავტო შოუზე შედგა, ერთი წლის შემდეგ კი მისი წარმოებაც დაიწყო. 12 წლის განმავლობაში, შვედურმა კომპანიამ დაახლოებით 46 000 ცალი P1800 და მისი რამდენიმე ვერსია გამოუშვა.

სხვათა შორის, „წმინდანის“ პროდიუსერებს თავიდან ფილმში „იაგუარის“ ლეგენდარული E-ტაიპის გადაღების სურვილი ჰქონიათ, მაგრამ ინგლისურმა კომპანიამ ისინი გაწბილებულები დატოვა - მისი ხელმძღვანელობის განცხადებით, ფილმში გამოჩენით, E-ტაიპი უფრო პოპულარული მაინც ვეღარ გახდებოდა. „ვოლვომ“ კი შანსი ხელიდან არ გაუშვა და ფილმის პროდიუსერებს თანხმობით უპასუხა.

ამ ავტომობილმა სახელი უფრო თავისი ერთ-ერთი მფლობელის, ამერიკელი ირვ გორდონის (ფოტოზე თავის P1800-თან) წყალობით გაითქვა. ამ კაცს ის 45 წელია ემსახურება და ამ დროის განმავლობაში, მათ ერთად 4.5 მილიონი კილომეტრი აქვთ გავლილი. თანაც ისე, რომ ძრავი, ტრანსმისია და ღერძები ერთხელაც არ შეუცვლიათ (!).

ამ შესანიშნავი ავტომობილის იუბილეს აღსანიშნავად, „ვოლვო“ მონაწილეობას მიიღებს ქალაქ ესენის (გერმანია) შოუ „ტექნოკლასიკაში“, სადაც თავის პავილიონში P1800-ის ექვს სპეც ვერსიას წარადგენს. ესენია X1 - პირველი პროტოტიპი, სულ პირველი P1800, რომელიც ბრიტანეთშია გამოშვებული, რალისთვის მომზადებული P1800S, რომელიც 1863 წელს შეიქმნა, კაბრიოლეტი „1800S ვოლვოვილი“, რომელიც აშშ-ში 1966 წელს დამზადდა, ასევე 1971 წლის 1800E და იმავე წლის 1800ES.

დი მონტეძემოლო მარკიონეზე ძვირად ფასობს

Ferrari CEO Made Twice as Much as Fiat Group CEO Sergio Marchionne

26 თებერვალი

დი მონტეძემოლო (მარცხნივ) და მარკიონე

..............................

ცნობილი ამბავია, რომ ავტოინდუსტრიის მაღალი თანამდებობის აღმასრულებლები ზღაპრულ ჰონორარებს იღებენ და ამ მხრივ, არც „ფიატ-ის“ ხელმძღვანელები არიან გამონაკლისნი, თუმცა ამ შემთხვევაში ერთი მცირე შეუსაბამობა არსებობს. კერძოდ ის, რომ იტალიური საავტომობილო ჯგუფის მთავარ აღმასრულებელ სერჯო მარკიონეს გაცილებით ნაკლები ანაზღაურება აქვს, ვიდრე ჯგუფის გამორჩეული წევრის - „ფერარის“ შეფ ლუკა დი მონტეძემოლოს.

თავად განსაჯეთ, მიუხედავად იმისა, რომ „ფერარიმ“ ფორმულა 1-ის მსოფლიო ჩემპიონის ტიტული ხელიდან ბოლო რბოლაში გაუშვა და ისიც ხელმძღვანლობის ტაქტიკური შეცდომის წყალობით, „ფიატ-მა“ დი მონტეძემოლოს მაინც 8.7 მილიონი ევრო (დაახლოებით 12 მილიონი დოლარი) გადაუხადა. და ეს მაშინ, როდესაც მარკიონეს ჰონორარებმა საერთო ჯამში, 3.5 მილიონი ევრო შეადგინა.

თავისი ჯამაგირის დიდი წილი, კერძოდ კი 7.549 მილიონი ევრო, დი მონტეძემოლომ „ფერარის“ ხელმძღვანელობისთვის დაიმსახურა. დანარჩენი თანხა მან იმისთვის მიიღო, რომ გასული წლის დასაწყისში, „ფიატ-ს“ ედგა სათავეში. საერთოდ, ეს პოსტი მას 2004 წლიდან ეკავა. რაც შეეხება მარკიონეს შემოსავალს, 3.05 მილიონი ევრო მას „ფიატ-ის“ მართვისთვის ერგო, დანარჩენი თანხა კი ტურინული კონცერნის შვეიცარული ბიზნესის წარმართვისთვის გადაუხადეს.

რა თქმა უნდა, „ფერარის“ მართვა გაცილებით იოლია, ვიდრე „ფიატ-ის“ უზარმაზარი ჯგუფისა. თანაც, მარკიონე უკვე „კრაისლერსაც“ ხელმძღვანელობს. რაც შეეხება კონცერნის დანარჩენ აღმასრულებლებს, მესამე ყველაზე დიდი ანაზღაურება „ფიატ-ის“ აღმასრულებელ ჯონ ელკანს ჰქონდა. ანიელების ოჯახის შთამომავალმა სულ 589 000 ევრო მიიღო. დანარჩენი აღმასრულებლების ჯამაგირი კი ამათთან მოსატანიც არაა - ისინი 65-95 ათას ევროს ღებულობენ.

„ვოლვო“ 11 მილიარდი დოლარის ინვესტირებას გეგმავს

Volvo Planning to Invest $11 Billion in Five Years

26 თებერვალი

პეკინში ჩატარებულ პრესკონფერენციაზე, ჩინელთა ხელში გადასულმა შვედურმა კომპანია „ვოლვო ქარზმა“ თავისი ახალი სამოქმედო გეგმა გამოაქვეყნა, რომლის შესაბამისადაც, მომდევნო ხუთი წლის განმავლობაში, 11 მილიარდი დოლარის ინვესტირებას გეგმავს. ამ გეგმის შესაბამისად, კომპანია ჩინეთის ქალაქ ჩენდუში ახალ ქარხანას ააშენებს. ამასთან, ჯერაც განიხილება ჩინეთის ჩრდილო აღმოსავლეთის ქალაქ დაქინში მეორე ქარხნის მშენებლობის საჭიროება.

„ჩვენ მიგვაჩნია, რომ „ვოლვო ქარ კორპორეიშნისთვის“, ჩინეთი მეორე საშინაო ბაზარია. აქ დამკვიდრებას ჩვენთვის სასიცოცხლო მნიშვნელობა აქვს და ბუნებრივია, ჩვენს გეგმებში ჩინეთს პრიორიტეტული ადგილი უკავია“, - პრესკონფერენციაზე განაცხადა „ვოლვო ქარ კორპორეიშნის“ პრეზიდენტმა და მთავარმა აღმასრულებელმა სტეფან ჯეკობიმ.

სტეფან ჯეკობი

..............................

ჩინეთი უკვე მსოფლიოს უდიდესი საავტომობილო ბაზარი და მსოფლიოს მეორე უდიდესი ეკონომიკაა. ბუნებრივია, ყველა ავტომწარმოებელი იქ დამკვიდრებას და იქაური ბაზრის რაც შეიძლება დიდი წილის მოპოვებას ცდილობს. „ვოლვოს“ შემთხვევაში, ცისქვეშეთში გააქტიურება მით უფრო მოსალოდნელი იყო, რომ მისი ახალი მფლობელი ჩინური კომპანია „ჯილია“, რომლის დირექტორთა საბჭოს თავმჯდომარე ლი შიფუც, ასევე ესწრებოდა „ვოლვოს“ პეკინურ პრესკონფერენციას. შიფუ იმედოვნებს, რომ ათ წელიწადში „ვოლვოს“ გაყიდვები 800 000-მდე გაიზრდება. და, რა თქმა უნდა, ამ მიზნის მიღწევაში, ჩინეთმა დიდი როლი უნდა შეასრულოს.

ჯეკობის იმედი აქვს, რომ ჩინური ქარხნის მიერ გამოშვებული ავტომობილების ყველაზე დიდი მუშტარი სახელმწიფო დაწესებულებები იქნება. და, რა თქმა უნდა, ჩინეთში წარმოებული ავტომობილები ექსპორტზეც უნდა გავიდეს. ამაში კი „ვოლვოს უსაფრთხო, უმაღლესი კლასის ავტომობილების მწარმოებლის რეპუტაცია, ძლიერ გამოადგება.

ლი შიფუ

..............................

ჯეკობი აცხადებს, რომ ჩინეთში ექსპანსიის გადაწყვეტილება უარყოფითად არ იმოქმედებს „ვოლვოს“ რეპუტაციაზე და შვედური კომპანია კვლავაც შეძლებს ევროპასა და სხვა რეგიონების ბაზრებზე პოზიციების შენარჩუნებას, მომავალში კი გაყიდვების გაზრდასაც.

ჩენდუს ქარხანაში მხოლოდ „ვოლვოს“ ავტომობილებს გამოუშვებენ. მისი წლიური წარმადობა 100 000 ავტომობილი იქნება. ქარხანა მწყობრში 2013 წელს უნდა ჩადგეს. პარარელურად, სრული დატვირთვით მუშაობას გააგრძელებს შვედეთსა და ბელგიაში მოქმედი ქარხნები.

შვედურმა კომპანიამ, რომელიც „ჯილიმ“ შარშან „ფორდისგან“ გამოისყიდა, ასევე გამოაცხადა, რომ მისი ჩინური მთავარი ოფისი და კვლევისა და პროდუქციის განვითარების, ასევე შესყიდვების დიზაინის ცენტრი, შანჰაიში განლაგდება. ამასთან, „ვოლვო ქარ ჩაინა“ და „ვოლვოს“ შვედური კვლევისა და განვითარების ცენტრი, ელექტრომობილებისა და ჰიბრიდული ავტომობილების შექმნაზე ერთობლივად იმუშავებენ.

„ვოლვომ“ შარშან ჩინეთში 30 500-ზე მეტი ავტომობილი გაჰყიდა. შვედური კომპანია იმედოვნებს, რომ ხუთ წელიწადში გაყიდვებს 200 000-მდე გაზრდის. ამისათვის კი, ქვეყანაში მისი სადილერო ქსელი უნდა გაორმაგდეს. თუ დღეს ცისქვეშეთში შვედური კომპანიის ავტომობილებს 106 დილერი ჰყიდის, მალე მათი რიცხვი 200-ს ასცდება. რაც შეეხება გლობალურ ბაზარს, შარშან „ვოლვომ“ მთელს მსოფლიოში 373 525 ავტომობილი გაჰყიდა, რაც წინა წლის მაჩვენებელზე 11.2 პროცენტით მეტია.

Thursday, February 24, 2011

„ფორდმა“ უკვე მილიონზე მეტი „ფიესტა“ გამოუშვა

Over One Million Ford Fiestas Have Been Produced

24 თებერვალი

28 თვეა გასული მას შემდეგ, რაც „ფორდმა“ სუბკომპაქტურ ჰეჩბეკ „ფიესტას“ წარმოება დაიწყო და მთელს მსოფლიოში მიმოფანტულმა მისმა ქარხნებმა, B სეგმენტის ეს ავტომობილი უკვე მილიონზე მეტი გამოუშვეს.

უფრო მეტიც, ბოლო ორი წლის განმავლობაში, „ფიესტა“ ევროპული ბაზრის B სეგმენტის უცვლელი ლიდერი და „ფორდის“ საწარმოო პროგრამაში ყველაზე გაყიდვადი ავტომობილია. მისი დებიუტის დღიდან, მთელს მსოფლიოში სულ 1 140 000 „ფიესტაა“ გაყიდული.

„ფორდმა“ ჰეჩბეკ „ფიესტას“ წარმოება 1976 წელს დაიწყო და მას შემდეგ, 14 მილიონზე მეტი გამოუშვა. ევროპაში ამ სუბკომპაქტურ ავტომობილს ორი - კიოლნისა (გერმანია) და ვალენსიას (ესპანეთი) ქარხანა აწარმოებს. გარდა ამისა, მას ასევე ნანძინში (ჩინეთი), რაიონგში (ტაილანდი) და კუაუტიტლანში (მექსიკა) აწარმოებენ. ამასთან, „ფიესტა“ 100-ზე მეტ ქვეყანაში (მათ შორის, საქართველოშიც) იყიდება.

„მკაფიოდ გამოძერწილი“, „მოძრავი მუსკულატურა“ და „ხმოვანი ათლეტიზმი“ - ამ ეპითეტებით ამკობს „ფიესტას“ დიზაინის ფილოსოფიას „ფორდის“ აღმასრულებელი დირექტორი მარტინ სმითი, ვინც კომპანიის დიზაინის განყოფილებას განაგებს. ამ ავტომობილის გარეგნობა სრულად შეესაბამება ცისფერი ოვალის ახალ კორპორატიულ სტილს, რომლის მთავარი ამოსაცნობი ნიშანი მისი რადიატორის ბადეა, რომელსაც ტრაპეციის ფორმა აქვს. ამასთან, გაზრდილია „ფორდის“ ოვალური ემბლემაც.

რაც შეეხება ახალ კორპორატიულ სტილს, ის „კინტიკური დიზაინის“ სახელითაა ცნობილი და პირველად კონცეპტუალურ „ვერვზე“ გამოიყენეს, რომელიც შემდგომში „ფიესტად“ მოგვევლინა. ეს სტილი მარტო ექსტერიერის კი არა, ინტერიერის ფორმებსაც განსაზღვრავს.

„ფიესტასთვის“ ძრავების ფართო გამაა გათვალისწინებული, რომელთაგან ოთხი ბენზინზე მუშაობს (სერია დურატეკი) და თითოეულს 16 სარქველი აქვს. კიდევ ორი ძრავი დიზელისაა (დურატორკ TDCi). ყველა ძრავი ეკონომიურობითაც გამოირჩევა და ისინი ატმოსფეროს მცირე რაოდენობით ნახშირორჟანგით აბინძურებენ.

Tuesday, February 22, 2011

„ჯუჯაროს“ ორი კონცეპცია „ფოლკსვაგენისთვის“

Italdesign Giugiaro's Geneva-Bound Volkswagen Concept Cars

22 თებერვალი

ჯუჯაროს კუპე

..............................

იტალიურმა დიზაინ სტუდია „იტალდიზაინ ჯუჯარომ“, რომელიც „ფოლკსვაგენის“ ჯგუფში ერთი წლის წინ შევიდა, ჟენევის ავტო შოუსთვის, გერმანული კომპანიის ბრენდით, ორი კონცეპტუალური ავტომობილი მოამზადა. მათგან ერთი კომპაქტური კუპეა, მეორე კი - ჰეჩბეკი.

ამ ორი ავტომობილის შესახებ, ინფორმაცია ჯერჯერობით არ ვრცელდება. ამ ეტაპზე ცნობილია მხოლოდ ის, რომ ისინი ელექტროძრავებითაა აღჭურვილი. სამაგიეროდ, მათი ესკიზების ფოტოები, საინტერნეტო გამოცემა „ავტობლოგის“ ესპანურმა ვერსიამ მოიპოვა და გამოაქვეყნა.

ჯუჯაროს ჰეჩბეკი

..............................

საერთო ჯამში, „ფოლკსვაგენს“ ჟენევურ გამოფენაზე შვიდი კონცეპტუალური ავტომობილი ექნება, რომლებსაც დამთვალიერებელი „სეატის“, „შკოდას“, „აუდის“ და საკუთრივ „ფოლკსვაგენის“ ბრენდებით იხილავს. ამ შვიდეულიდან, ბოლოს ჩეხური კომპანიის კონცეპტუალური ავტომობილის პრემიერა გადაწყდა, ავტომობილისა, რომლის სახითაც, „შკოდას“ ახალი კორპორატიული სტილის ნახვა შეიძლება.

უფრო მეტიც, „ფოლკსვაგენის“ მთავარი დიზაინერი ვალტერ დე სილვა გვპირდება, რომ შვიდივე ავტომობილში შესაბამისი კომპანიების ახალი სტილია ასახული. ოღონდ, ჯერ ცნობილი არაა, ამ შვიდეულში შედის თუ არა „ჯუჯაროს“ კონცეპტუალური ავტომობილები.

ცნობისათვის, მომავალი ოთხი წლის განმავლობაში, „ფოლკსვაგენს“ წარმოების მოცულობის გასაზრდელად და ახალი ავტომობილების გამოსაშვებად, 52 მილიარდი ევროს ინვესტირება აქვს დაგეგმილი. ყოველივე კი ვოლფსბურგულ გიგანტს, იმ გეგმის განხორციელებაში უნდა დაეხმაროს, რომლის შესაბამისადაც, 2018 წელს ის მსოფლიო ავტოინდუსტრიის ლიდერი გახდს.

„ლამბორგინიმ“ „ავენტადორი“ ნახევრად აწყობილი გვიჩვენა

Lamborghini Unveils Aventador... V12 Rolling Chassis

22 თებერვალი

ჯერ მანქანის სილუეტი, შემდეგ ძრავი, კოლოფი, საკიდარი, მზიდი კაპსულა და ახლა აწყობილი შასი ძარის გარეშე - ასე ნაწილ-ნაწილ გვაცნობს „ლამბორგინი“ თავის ახალ ფლაგმანს, სახელად „ავენტადორს“, რომელიც უკვე ძალიან მალე, მოდელ „მურსიელაგოს“ შეცვლის. ამჯერად იტალიური კომპანია მხოლოდ ახალი ფოტოს გამოქვეყნებას დასჯერდა. ამ ავტომობილის შესახებ, დანრჩენი თითქმის ყველაფერი უკვე ცნობილია.

ლერძოდ ის, რომ მისი ძარისა და შასის წარმოებისას, „ლამბო“ უხვად გამოიყენებს კარბონის კომპოზიტს. შესაბამისი ტექნოლოგია, სანტ’აგატა ბოლონზელებმა „ბოინგის“ სპეციალისტებთან ერთად შეიმუშავეს. სხვათა შორის, იმავე ტექნოლოგიით, თავიანთ ავტომობილებს უკვე დიდი ხანია, ფორმულა 1-ის გუნდებიც აწარმოებენ.

კარბონის კომპოზიტის უპირატესობა ფოლადის და ალუმინის ანალოგებთან სიმსუბუქე და გრეხვაზე გაცილებით მეტი მედეგობაა. სწორედ კარბონის წყალობაა ის, რომ „ავენტადორის“ მონოკოკი მხოლოდ 147.5 კილოგრამს იწონის, ძარა კი (საღებავის გარეშე) – 229.5 კიოლოგრამს. რაც შეეხება მთლიანად ავტომობილის წონას, 1575 კილოგრამი მონსტრისთვის, რომელსაც ბაზაში V12 ძრავი უდგას, არც ისე ბევრია. ღერძებს შორის წონა 43/57-ზე ნაწილდბა (უფრო მეტად უკანა ბორბლებია დატვირთული), რაც შეეხება წონისა და სიმძლავრის ფარდობას, ის ყოველ კილოგრამზე 2.25 ცხენის ძალაა.

ძრავი 6.5-ლიტრიანია და ის „ლამბომ“ სუფთა ფურცლიდან შექმნა (რისთვისაც სამი წელი დასჭირდა). აგრეგატი 700 ცხენის ძალას იძლევა, მასთან კი 7-საფეხურიანი რობოტიზებული კოლოფია შეწყვილებული. იტალიური კომპანიის მირ გავრცელებული ინფორმაციით, ამ ტანდემის დახმარებით, „ავენტადორი“ ადგილიდან 100 კმ/სთ-მდე აჩქარებას 2.9 წამში ასწრებს, მისი მაქსიმალური სიჩქარე კი 350 კმ/სთ-ია.

გარდა ამისა, ავტომობილი სრულამძრავიანი ტრანსმისიით აღიჭურვება. მის შენლებას კი ასევე კარბონის კომპოზიტისგან დამზადებული დისკები და ექვსცილინდრიანი სუპორტები უზრუნველყოფს.

„ლამბორგინი ავენტადორის“ მსოფლიო პრემიერა ჟენევის ავტო შოუზე გაიმართება.

„პორშე“ უგზოობის „კაიუნს“ ალბათ ლაიპციგში გამოუშვებს

VW to Expand Leipzig Plant for Porsche Cajun Production

22 თებერვალი

„პორშეს“ აქამდე გერმანიის საზღვრებს გარეთ, ავტომობილი არ გამოუშვია. კომპანია იზრდება და მადაზეც მოდის. თუ შარშან 97 000 ავტომობილი გაჰყიდა, ხუთი წლის შემდგ, 150 000 ცალის გაყიდვას აპირებს, 2018 წლის გეგმა კი 200 000 ავტომობილის გაყიდვას ითვალისწინებს. რა თქმა უნდა, გაყიდვების ზრდა სამოდელო გამის გაფართოებას მოითხოვს და გერმანული კომპანია სწორედ ამას აპირებს.

პირველი ახალი ავტომობილი, რომელიც მალე „პორშეს“ საწარმოო პროგრამაში გამოჩნდება, უგზოობის კომპაქტური „კაიუნია“. ის „აუდის“ უგზოობის Q5-ის პლატფორმაზე უნდა აიგოს. თუმცა სად გამოუშვებენ მას, ეს შტუტგარტელებს ჯერ არ გადაუწყვეტიათ.

ამ ეტაპზე, სამი ვარიანტი განიხილება. არაა გამორიცხული, რომ „კაიუნი“ გახდეს „პორშეს“ პირველი ავტომობილი, რომელსაც უცხოეთში გამოუშვებენ. ამ შემთხვევაში, ამერიკისა და ჩინეთის ვარიანტები განიხილება. ამერიკისა იმიტომ, რომ იქ „აუდი“ თავის Q5-ს უშვებს. ჩინეთისა იმიტომ, რომ ეს მსოფლიოს უდიდესი ბაზარია და სავარაუდოდ, ახალ ავტომობილს ყველაზე მეტი მუშტარიც იქ ეყოლება.

თუმცა, ყველაზე დიდი შანსი მაინც იმისაა, რომ „კაიუნი“ ლაიპციგში (ეს ქარხანა პორშე კაიენსა და პორშე პანამერას უშვებს) აწარმოონ. ამაზე მიანიშნებს თუნდაც ის ფაქტორი, რომ „პორშემ“ გერმანიაში 1 000 ახალი თანამშრომელის აყვანის კამპანია წამოიწყო. სულ ახლახანს კი, „ფოლკსვაგენმა“, რომელიც შტუტგარტული კომპანიის აქციების 49.9 პროცენტს ფლობს, ლაიპციგის ქარხნის მოდერნიზაცია წამოიწყო, რისთვისაც 500 მილიონი ევროს დახარჯვას აპირებს.

„ფოლკსვაგენის“ წარმოების შეფი მიხაელ მახტი, ვინც ცოტა ხნის წინ, სწორედ „პორშეს“ ედგა სათავეში, განმარტავს, რომ ლაიპციგის ქარხნის მოდერნიზაცია იმის გამო დაიგეგმა, რომ კომპანიის სხვა ქარხნები ისედაც სრული დატვირთვით მუშაობს, ლაიპციგში კი წარმოების გაზრდის პერსპექტივა არსებობს. ესეც რომ არა, „ფოლკსვაგენში“ თვლიან, რომ „პორშეს“ ავტომობილებზე მოთხოვნა ისედაც გაიზრდება და ლაიპციგის ქარხნის განახლება მაინც საჭირო გახდება.

დრეისათვის უგზოობის სრულგაბარიტიანი „კაიენი“ „პორშეს“ გამაში ყველაზე გაყიდვადი ავტომობილია. მაგრამ მოსალოდნელია, რომ „კაიუნი“ მას ბესტსელერის წოდებას ჩამოართმევს. ეს ავტომობილი მეხუთე იქნება „პორშეს“ საწარმოო პროგრამაში. ის მეტწილად ახალგაზრდა მყიდველზე იქნება გათვლილი, რომელსაც „კაიენზე“ ხელი ნაკლებად მიუწვდება.

ქარხანას, რომელიც „კაიუნს“ გამოუშვებს, „ფოლკსვაგენის“ სამეთვალყურეო საბჭო 15 მარტს შეარჩევს. შეკრება სწორედ ამ საკითხს მიეძღვნება და მას შტუტგარტის მახლობლად მდებარე ქალაქი ვაიზახი უმასპინძლებს.

„ფორსპიიდ“ - „სმარტმა“ ქუდი მოიხადა

Geneva-Bound smart Forspeed Concept Revealed

22 თებერვალი

წლების განმავლობაში, „სმარტის“ მარკით, „დაიმლერი“ მხოლოდ ერთ ავტომობილს - ჯუჯა „ფორთუს“ უშვებს, ცოტა ხანს ოდნავ დიდ „ფორფორსაც“ აწარმოებდა, მაგრამ ეს მოდელი ბაზარს ვერ შეეთვისა და მალე კონვეიერიდანაც მოხსნეს. „ორისათვის“ კი გამძლე გამოდგა და მართალია, გერმანული კომპანიისთვის მოგება ვერ მოაქვს, მაგრამ მისი გაუქმება მაინც არასდროს დამდგარა დღის წესრიგში.

ჟენევის წლევანდელ ავტო შოუზე, შტუტგარტელები „სმარტის“ ელექტრულ, თანაც ღია ვერსიას გვიჩვენებენ, რომელიც აღჭურვილობის გარდა, იმითაცაა საინტერესო, რომ მასში ჯუჯების მწარმოებელი კომპანიის ახალი სტილია ასახული. ავტომობილს რატომღაც „ფორსპიიდ“ (სიჩქარისთვის განკუთვნილი) უწოდეს და ის კონცეპტუალური „როუდსტერის“ ერთგვარი გამოძახილია.

„ფორსპიდის“ გარეგნობის დამახასიათებელი თვისებებია რელიეფური საქარე შუშა, რომელსაც ჩარჩო არ აქვს, შუქდიოდური წინა და უკანა ფარები, რომლებიც მცირე რაოდენობით ელექტროენერგიას მოიხმარს და დამცავი რკალები, რომლებსაც სარბოლი ღიაბორბლიანი (ფორმულას ტიპის) ავტომობილების ანალოგიური ელემენტის მსგავსი მოყვანილობა აქვს. აშკარაა, რომ „დაიმლერს“ „სმარტი“ იმისთვის სჭირდება, რომ რეალური კონკურენცია გაუწიოს „ბეემვეს“ „მინის“ და „ფიატის“ პოპულარულ 500-ს.

რაც შეეხება ძალურ აღჭურვილობას, ორადგილიან ღია „სმარტს“ მამოძრავებელ ძალას ელექტროძრავი ანიჭებს, რომლის სიმძლავრეც სულ რაღაც, 41 ცხენის ძალაა. ძრავი ავტომობილის უკანა ნაწილში მდებარეობს. სალონში, ცენტრალურ კონსოლზე არის ღილაკი, რომელზე დაჭერის შემთხვევაშიც, ძრავი ძალიან მცირე ხნით, დამატებით 7 ცხენის ძალას იძლევა.

„ფორსპიდის“ მაქსიმალური სიჩქარე 120 კმ/სთ-ია. ადგილიდან 60 კმ/სთ სიჩქარის აკრეფა კი მას 5.5 წამში შეუძლია. ეს კი ჩვეულებრივ, შიდაწვისძრავიანი „სმარტ ფორთუს“ აჩქარებაზე თითქმის წამით უკეთესი მაჩვენებელია. ამასთან, „ფორსპიდის“ სვლის სიშორე 136 კილომეტრს შეადგენს, მისი აკუმულატორების ბლოკის 80 პროცენტით დამუხტვა კი 45 წუთში ესწრება.

მართალია, ამ ელექტრომობილის წარმოება არ იგეგმება, თუმცა ცნობილია, რომ „დაიმლერი“ „სმარტის“ სამოდელო გამის გაფართოებას აპირებს და პირველი ახალი ავტომობილი ალბათ როდსტერი იქნება. ასე რომ, „ფორსპიდის“ მსგავსი ავტომობილი მალე ალბათ ბაზარზეც გამოჩნდება.

ყველაზე პატარა „მინის“ სახელად „როკეტმენი“ შეურჩიეს

Rocketman Confirmed as Name of Future MINI City Car

22 თებერვალი

როგორც ჩანს, ჟენევურ ავტო გამოფენაზე, ყველაზე მრავალფეროვანი ექსპოზიცია „ბეემვეს“ და მის ჯგუფში შემავალ კომპანიებს ექნებათ. ბავარიული კომპანიის მთავარი სიახლე ახალი სუბ-ბრენდი და მისი გეგმები იქნება, ულტრა ლუქსის სეგმენტის „როლს როისი“ კონცეპტუალური ელექტრომობილით გაგვაოცებს, „მინი“ კი თავის გამაში ყველაზე პატარა, ასევე კონცეპტუალურ ავრომობილს გვიჩვენებს, რომელსაც „როკეტმენის“ სახელი შეურჩია.

ბევრი სხვა კომპანიისგან განსხვავებით, რომლებიც თავიანთ საგამოფენო ექსპონატებს პრემიერამდე კარგა ხნით ადრე გვაცნობენ, „მინი“ თავისი კონცეპციის შესახებ ინფორმაციას პრაქტიკულად არ ავრცელებს. ამ საქალაქო პატარა ავტომობილისადმი ინტერესის გასაღვივებლად, ინგლისურმა კომპანიამ მხოლოდ მისი სახელი გაგვაცნო. ასევე გამოაცხადა ისიც, რომ გაბარიტების მიხედვით, ახალი ავტომობილი პირველი, ლეგენდარული ალექს ისიგონისის მიერ შექმნილი „მინის“ რეინკარნაცია იქნება. მაგრამ რა ტქმა უნდა, ის თანამედროვე აგრეგატებით და სისტემებით აღიჭურვება.

„მინი“ თავისი ახალი ავტომობილის (რომლის წარმოებაც უკვე გადაწყვეტილია) ფოტოებსაც კი არ ავრცელებს. თუმცა გამოცემა „დი ეიჯმა“ გაავრცელა ინფორმაცია იმის შესახებ, რომ ახალი ავტომობილის სიგრძე დაახლოებით 3.4 მეტრი უნდა იყოს. ამასთან, სიმაღლით და სიგანით ის ახლოს იქნება „მინის“ თანამედროვე ავტომობილებთან. ავტომობილში ჩასაჯდმი ფორმულაა 3+1.

ყველაზე მთავარი ისაა, რომ „ბეემვე“ „მინის“ თავისი უახლესი ტექნოლოგიების გამოყენების საშუალებას აძლევს. კერძოდ, ახალი ავტომობილი ალუმინის შასის და კარბონის კომპოზიტის ძარას მიიღებს, რომლებიც ბავარიელებმა პროექტ „მეგასიტის“ (ახლა უკვე სუბ-ბრენდ i-ს) ფარგლებში შეიმუშავეს.

დაკიდევ, ავტომობილი „ბეემვეს“ უახლესი, სამცილინდრიანი ტურბოდიზელით აღიჭურვება, რომელიც ავტომობილს 100 კილომეტრს სულ რაღაც 3 ლიტრი საწვავით გაატარებს (თანაც ქალაქში). ამასთან, ყოველი კილომეტრის გავლისას, ატმოსფეროს მხოლოდ 78.4 გრამი ნახშირორჟანგით აბინძურებს.

„შკოდა“ ჟენევაში ახალ ლოგოს და „ჯოისტერს“ გვიჩვენებს

Skoda to Present New Logo, Joyster in Geneva

22 თებერვალი

შკოდა ჯოისტერი
..............................

„ფოლკსვაგენის“ დიდ ოჯახში შემავალი ჩეხური კომპანია „შკოდა“ ჟენევის საავტომობილო გამოფენაზე ორ სიახლეს წარმოადგენს. მათგან ერთია სკომპაქტური ჰეჩბეკი „ჯოისტერი“, მეორე კი - კომპანიის ახალი ლოგო, რომელტან ერთადაც, „შკოდა“ ახალი ცხოვრების დაწყებას აპირებს.

სწორედ ამ ახალი ცხოვრების დაწყების მანიშნებელია განახლებული ლოგო, რომელზეც წარწერა - „შკოდა აუტო“ ამოღებულია, კომპანიის ემბლემა კი - ისარზე მიბმული დროშა, უფრო დიდ ადგილს დაიკავებს. თუ ადრე ემბლემის ფონი ვერცხლისფერი იყო, თავად ემბლემა კი - მწვანე, ამიერიდან დიზაინის ეს ორი ელემენტი ფერებს გაცვლის. ამასთან, ლოგოს აღარ ექნება შაბი სარტყელი, მას ლურჯი, უფრო თხელი სარტყელი შეცვლის. „შკოდას“ ავტომობილებზე ახალი ლოგო პირველად 2012 წელს გამოჩნდება.

ჟენევაში „შკოდას“ პავილიონში, ჩეხური კომპანიის უკლებლივ ყველა მოდელის ხილვა იქნება შესაძლებელი. მათ შორის ყველაზე მთავარ ადგილს კი „ჰოისტერი“ დაიკავებს, რომელიც „ფოლკსვაგენ გოლფის“ პლატფორმაზეა აგებული, მის კაპოტქვეშ კი სპორტული „შიროკოსგან“ ნასესხები ძრავები განლაგდება.

„ჯოისტერისთვის“ ორი ძრავი და მათი ორ-ორი მოდიფიკაციაა გათვალისწინებული. ორივე აგრეგატი დიზელზე მუშაობს. მათგან ერთია 1.4-ლიტრიანი ტურბოდიზელი, რომლის ერთი ვერსიაც 121 ცხენის ძალას, მეორე კი 158 ცხენის ძალას ავითარებს. მეორე აგრეგატის მუშა მოცულობა 2.0 ლიტრია და მას ტურბოკომპრესორი არ ემსახურება. მისი ორი ვერსიის სიმძლავრე 138 და 168 ცხენის ძალაა. ყველა ძრავთან შესაწყვილებლად, 6-საფეხურიანი მექანიკური, 7-საფეხურიანი ავტომატური კოლოფია განკუთვნილი.

„ჯოისტერის“ საბაზო ვერსიის ფასი ევროპაში 19 000 ევრო იქნება. მოგვიანებით კი „შკოდა“ მის მძლავრ ვერსია VRS-საც გამოუშვებს. „ჯოისტერის“ გარდა, ჟენევაში ჩეხური კომპანია ასევე ჰეჩბეკ „ფაბიას“ სპორტულ ვერსია „მონტე კარლოსაც“ წარადგენს.

Monday, February 21, 2011

პირველად ჟენევაში - ელექტრული „როლს როისი“

Rolls-Royce 102EX, Electric Phantom for Geneva

21 თებერვალი

„ბეემვემ“ ელექტრომობილების წარმოებას სერიოზულად მოჰკიდა ხელი - გერმანულმა კომპანიამ ეკოლოგიურად სუფთა ავტომობილების მწარმოებელი ქვე-ბრენდიც კი შექმნა. ბუნებრივია, ახალ ტენდნციას მის ჯგუფში შემავალი კომპანიებიც აყოლებენ ფეხს და მათ შორისაა „როლს როისიც“, რომელმაც ჟენევის ავტო შოუსთვის, ელექტრული „ფანტომი“ – 102 EX მოამზადა.

ინგლისური მარკის მთავარი აღმასრულებელი ტორსტენ მიულერ-ოტვოსი ამბობს, რომ ჟენევისთვის მომზადებული ელექტრომობილი, ეგრეთ წოდებული ტესტ პლატფორმაა იმისათვის, რომ შესაძლებელი გახდეს საზოგადოების აზრის შესწავლა. ამასთან, თუ ბაზარი ამისათვის მზად იქნება, კონცეპტუალური ელექტრომობილის ბაზაზე, „როლსის“ სხვა მოდელების ელექტრიფიკაციაც განხორციელდება.

ნებისმიერ შემთხვევაში, 102 EX ულტრა ლუქსის სეგმენტის პირველი სრულიად ელექტრული ავტომობილია. ჯერჯერობით მისი აღჭურვილობის და ტექნიკური მონაცემების შესახებ, არანაირი ინფორმაცია არ ვრცელდება. ყველაფერ ამას მწარმოებელი გამოფენისთვის ინახავს.

მიულერ-ოტვოსის თქმით, „როლს როისი“ 102 EX-ის სერიულ წარმოებას არ აპირებს. სამაგიეროდ, ამ ავტომობილს ჟენევის შემდეგ, მსოფლიო ტურნე ელის - მას ყველა იმ ქვეყანას მოატარებენ, სადაც „როლს როისის“ ავტომობილები იყიდება. ამ ტურნეს დროს, კომანიის მარკეტოლოგები პოტენციური კლიენტების აზრს შეისწავლიან და მიღებული ინფორმაციის ანალიზის შემდეგ გადაწყვეტენ, „როლს როისისთვის“ აქვს თუ არა აზრი ელექტრომობილების წარმოების დაწყებას.

გარდა ამისა, ბრიტანულმა კომპანიამ სპეციალური ვებ-გვერდი შექმნა, რომელიც 102 EX-ის მსოფლიო ტურნეს გააშუქებს. მასზევე მოათავსებენ ამ ავტომობილზე ავტომოყვარულების და პოტენცური კლიენტების შთაბეჭდილებებს. ტურნეს ბოლოს კი „როლს როისის“ და „ბეემვეს“ ხელმძღვანელობა გადაწყვეტს, აქვს თუ არა აზრი ეკოლოგიურად სუფთა „როლსების“ წარმოებას.

„ნისანი“ ელექტრულ „ლიფზე“ შეკვეთებს ვერ აუდის

Nissan Swamped, Leaf Production at Full Throttle

21 თებერვალი

„ნისან ლიფი“ პირველი მასობრივი ელექტრომობილია მსოფლიო ბაზარზე და მიუხედავად იმისა, რომ ევროპაში წლის საუკეთესო ავტომობილის ტიტულს დაეუფლა, მაინც სპეციალისტთა არაერთგვაროვან შეფასებას იმსახურებს. თუმცა მთავარი ისაა, რომ ყველაზე მეტს, ამჟამად სწორედ ამ ავტომობილზე ლაპარაკობენ.

სულ ახლახანს, ინტერნეტით გავრცელდა ინფორმაცია იმის შესახებ, რომ ამ ელექტრომობილზე წინასწარი შეკვეთების დაახლოებით 40 პროცენტი გაუქმებულია. მაგრამ მალე ამას მოჰყვა ინფორმაცია იმის შესახებ, რომ იაპონური კომპანია „ლიფზე“ შეკვეთებს ვერ აუდის.

გამოცემა „ავტონიუსის“ მიერ გავრცელებული ინფორმაციით, „ნისანს“ ელექტრომობილზე უკვე 27 000 შეკვეთა აქვს მიღებული. შესანიშნავია, იტყვიან ანალიტიკოსები და მარკეტოლოგები. საშინელებაა, იტყვიან მყიდველები. და ორივე მხარე მართალი იქნება. პირველები იმის გამო, რომ ბუმი კომპანიისათვის მოგების მომტანია. მეორენი იმიტომ, რომ 31 მარტამდე მხოლოდ 10 000 შეკვეთის დაკმაყოფილება თუ მოხერხდება.

როგორც ჩანს, მოვლენათა ამგვარი განვითარებისთვის, „ნისანი“ მზად არ იყო, რადგან იაპონურმა კომპანიამ „ლიფზე“ შეკვეთების მიღება შეაჩერა. და გამოაცხადა, რომ ამ პროცესს მხოლოდ მას შემდგ გააგრძელებს, რაც პირველი ლოტით მიღებული შეკვეთების „გარკვეულ რაოდენობას“ დააკმაყოფილებს. რამდენია ეს „გარკვეული რაოდენობა“ და როდის მოხერხდება მათი დაკმაყოფილება, თვითონ „ნისანშიც“ ჯერ არ იციან...

ისე, თუ ზემოთ ნახსენები ინფორმაცია, რომლის თანახმადაც, წინასწარი შეკვეთების 40 პროცენტი გაუქმებულია, მართალია, „ნისანი“ უკმაყოფილო არც ამით უნდა იყოს. ეს გაუქმებები რომ არა, „ლიფზე“ შეკვეთებს რა დააკმაყოფილებდა - ამ ელექტრომობილის წარმოება ხომ, მიუხედავად იმისა, რომ ოპამას (იაპონია) ქარხანა სამ ცვლაში მუაობს, მაინც შეზღუდულია...

„ბეემვე i-მ“ სტარტი აიღო

გერმანული კომპანიისთვის ახალი ეპოქა იწყება

BMW Launches i

21 თებერვალი

21 თებერვალი ბავარიული კომპანიისთვის ისტორიული დღე გახდა - „ბეემვემ“ ოფიციალურად გაგვაცნო თავისი ახალი სუბ-ბრენდი, რომელსაც უბრალოდ, i უწოდა. ამ აბრევიატურით, ის მალე ელექტრომობილების და ჰიბრიდული ავტომობილების წარმოებას დაიწყებს. პრეზენტაციაზევე გამოცხადდა, რომ პირველი ორი ავტომობილი, რომლებიც ბაზარზე ამ მარკით გამოჩნდება, არის i3 და i8. პირველს აქამდ პროექტ „მეგასიტის“ სახელით ვიცნობდით, მეორე კი კონცეპტუალური „ვიჟნ ეფიშნტდაინემიქსის“ ბაზაზე დამზადდება.

„დღეს შეგვიძლია განვაცხადოთ, რომ „ბეემვე i“ პრემიუმ გადაადგილების მიმართულებით გადადგმული ახალი ნაბიჯია. ამ ახალი სუბ-ბრენდის დაფუძნებით, ჩვენ კიდევ ერთხელ ვამტკიცებთ, რომ პრემიუმ სეგმენტს მწარმოებლებს შორის, სიახლეების დანერგვაში ლიდერები ვართ“, - ამბობს „ბეემვეს“ დირექტორთა საბჭოს წევრი იან რობერტსონი, ვინც კომპანიის გაყიდვებსა და მარკეტინგს განაგებს.

„დღეს ჩვენს ინდუსტრიაში ახალი ერა იწყება, ინდივიდუალური გადაადგილების ახალი ერა. ეს კი არის „ბეემვე i“, ახალი ეპოქის პიონერი, დაბადებული ელექტრობა“, - დასძენს რობერტსონი.

ახალი სუბ-ბრენდის ჩამოყალიბებასთან ერთად, ბავარიულმა კომპანიამ ასევე ამერიკაში დააფუძნა ერთობლივი საწარმო სახელწოდებით „ბეემვე i ვენჩარზ“, რომელსაც შტაბ-ბინა ნიუ იორკში ექნება. ამ კომპანიის საწესდებო კაპიტალი 100 მილიონი დოლარია. მისი მთავარი დანიშნულება ისაა, რომ „ბეემვე i-ს“ ავტომობილების ექსპანსიას და უმაღლეს დონეზე მომსახურებას შეუწყოს ხელი.

ახალი მარკის პირველი ორი ავტომობილი ეგრეთ წოდებულ „ლაიფდრაივ“ არქიტექტურას დაეყრდნობა. არ არქიტექტურის საფუძველს წარმოადგენს ალუმინის შასი და ძარის კარკასი, რომელიც ნახშირბადის ბოჭკოთი არმირებული პოლიეთერული ფისის კომპოზიციური მასალითაა დამზადებული. თვითონ ძარაც ასეთივე კომპოზიტით დამზადდება. ეს მასალა ბავარიელებმა ამერიკელ პარტნიორთან, „SG კარბონთან“ ერთად შეიმუშავეს.

i3 კომპაქტური ჰეჩბეკია, რომელსაც აქამდე პროექტი „მეგასიტი“ ეწოდებოდა. მასში ჩასაჯდომი კონფიგურაციაა 2+2. ავტომობილი აღჭურვილია ელექტროძრავით, რომლის სიმძლავრეც 170 ცხენის ძალაა, მაქსიმალური მაბრუნი მომენტი კი - 250 ნიუტონმეტრი. ძრავი ენერგიას ლითიუმ-იონური აკუმულატორებისგან ღებულობს, რომლებსაც წყლით გაგრილების სისტემა ემსახურება. აკუმულატორებში დაგროვილი ენერგია, ავტომობილს მინიმუმ 160 კილომეტრს გაატარებს.

ამავე ავტომობილის ბაზაზე, უკვე მუშავდება მისი ჰიბრიდული ვერსია, რომლის სვლის სიშორის გასაზრდელადაც, კონსტრუქციას შიდაწვის ძრავისა და გენერატორის ტანდემი დაემატება. შიდაწვის ძრავი მცირელიტრაჟიანი იქნება და ის i-ს ჰიბრიდული ავტომობილებისთვის სპეციალურად მუშავდება.

რაც შეეხება i8-ს, მისი წინამორბედი - კონცეპტუალური „ვიჟნ ეფიშნტდაინემიქსი“ ბავარიელებმა პირველად 2009 წელს, ფრანკფურტის ავტო შოუზე გვიჩვენს, მისი წარმოების გადაწყვეტილება კი ახლახანს გაახმოვანეს. ავტომობილის დასახელებაში რიცხვი 8 მისი სპორტულობის მიმანიშნებელია. სახელით M8, „ბეემვე“ სპორტული სუპერ ავტომობილის წარმოებას გეგმავდა, თუმცა ეკონომიკური კრიზისის გამო, ამ განზრახვაზე ხელი აიღო.

მოდელი i8 ჰიბრიდული დანადგარით აღიჭურვება, რომელშიც ბენზინის სამცილინდრიანი 1.5-ლიტრიანი ძრავი და იგივე ელექტროძრავი შევა, რომელიც i3-ის აღწერისას ვახსენეთ. აქაც შიდაწვის ძრავს მხოლოდ ელექტროენერგიის გამომუშავების დანიშნულება აქვს. ბავარიელთა ინფორმაციით, i8-ს მაქსიმალური სიჩქარე 250 კმ/სთ იქნბა, ადგილიდან 100 კმ/სთ-მდე მის აჩქარებას კი 4.8 წამი ეყოფა.

უკვე ცნბილია ისიც, რომ ამ ორ ავტომობილს „ბეემვეს“ ლაიპციგის ქარხანა გამოუშვებს, რომლის მოდერნიზაციაზეც 400 მილიონი ევროა ინვესტირებული. ორივე ავტომობილის წარმოება 2013 წელს დაიწყება.

„ჰიუნდაი“ საბურავების წნევის საკონტროლო სისტემას ქმნის

Hyundai Develops New Tire Pressure Monitoring System

21 თებერვალი

„ჰიუნდაი“ და მისი შვილობილი კომპანია „მობის“, რომელიც საავტომობილო ნაწილების და კომპონენტების წარმოებაზეა სპეციალიზებული, საბურავებში წნევის მაკონტროლებელ სისტემას (TMPS - ტაიარ პრეშა მონიტორინგ სისტემ) ქმნიან, რომელსაც კორეული კომპანია თავის ავტომობილებზეც გამოიყენებს და კონკურენტებსაც მიჰყიდის.

მსგავს სისტემებს სხვა კომპანიებიც აწარმოებენ, თუმცა „მობისი“ გვპირდება, რომ მისი სისტემა ამჟამად არსებულ ყველა ანალოგზე უკეთესი და მსუბუქი იქნება. არადა, ეს პირველი შემთხვევაა, როდესაც სამხრეთკორეული კომპანია ასეთ მოწყობილობას გამოუშვებს.

„მობისის“ განცხადებით, მისი სისტემა ძალიან ადვილად გამოსაყენებელი იქნება, რადგან ის საბურავის სარქველზე დგება და ადვილად მისაწვდომია. ამასთან, ის კონკურენტების სისტემებზე დაახლოებით 10 პროცენტით მსუბუქია, რასაც ის ფაქტორი განაპირობებს, რომ მასში მცირე ზომის ელემენტია ჩადგმული. სიმსუბუქის გარდა, მცირე ელემენტის უპირატესობა ისიცაა, რომ ის დაახლოებით 30 პროცენტით ნაკლებ ენერგიას მოიხმარს. სიმსუბუქე კი იმიტაცაა მნიშვნელოვანი, რომ ბორბლის ბალანსს ოდნავ ცვლის და მის საპირწონედ ნაკლები ბალასტის გამოყენებაა საჭირო.

საბურავებში წნევის მაკონტროლებელ სისტემის წარმოების დაწყება დროულია, რადგან 2013 წელს ძალაში შევა ახალი მოთხოვნა, რომლის შესაბამისადაც, ყველა ავტომობილზე, რომელიც 3.5 ტონაზე ნაკლებს იწონის, მსგავსი სისტემების დაყენება სავალდებულო გახდება. ასე რომ, ჯერ ერთი, „ჰიუნდაის“ საკუთარი სისტემა ექნება. მეორეც, ამავე სისტემაზე მოთხოვნა სხვა კომპანიებისგანაც იარსებებს.

Saturday, February 19, 2011

სუპერ ეკონომიური „ნისან მიკრა“

Nissan Launches Super Clean Micra DIG-S Turbo

19 თებერვალი

„ნისანმა“ თავის პოპულარულ სუბკომპაქტურ ჰეჩბეკ „მიკრას“ ახალი, სუპერ ეკონომიური ვერსია DIG-S (დირექტ ინჯექშნ გაზოლინ-სუპერჩერჯერ) შექმნა, რომელიც გარემოს ნახშირორჟანგით მინიმალურად აბინძურებს.

ავტომობილი ბენზინის სამცილინდრიანი 1.2-ლიტრიანი ძრავითაა აღჭურვილი, რომელსაც საწვავის უშუალოდ წვის კამერაში შეფრქვევის სისტემა და მექანიკური დამჭირხნი ემსახურება. გარდა ამისა, ავტომობილის ეკონომიურობის გაუმჯობესებას სისტემა სტოპ-სტარტიც უზრუნველყოფს.

ძრავი 98 ცხენის ძალას და 142 ნიუტონმეტრს გამოიმუშავებს და რაც მთავარია, ავტომობილის მიერ ყოველი კილომეტრის გავლისას, ატმოსფეროში მხოლოდ 95 გრამ CO2-ს გამოჰყოფს. ოღონდ, ეს მაჩვენებელი მაშინ მიიღწევა, როდესაც ძრავთან მექანიკური კოლოფია შეწყვილებული. ავტომატური კოლოფის შემთხვევაში კი გამონაბოლქვში ნახშირორჟანგის შემცველობა 115 გრამია.

ზემოთ ხსენებული სისტემების გარდა, ძრავის ეკონომიურობას ის გარემოებაც განაპირობებს, რომ ის ეგრეთ წოდებული მილერის ციკლით მუშაობს. ასეთი ძრავების თავისებურება ისაა, რომ შეშვების და გამოშვების ტაქტები სხვადასხვა ხანგრძლივობისაა. კერძოდ, შემშვები სარქველი ჩვეულებრივზე გვიან იხურება. ის შეკუმშვის ტაქტის დასაწყისშიც კი ღიად რჩება. სხვათა შორის, ფაზების ასეთ გადაფარვას ძრავების ფორსირებისას იყენებენ. 13:1-მდე გაიზარდა ძრავის კუმშვის ხარისხი, რამაც ასევე ძრავის ეფექტურობის გაუმჯობესება განაპირობა. საბოლოოდ, აგრეგატის მახასიათებლები 1.5-ლიტრიანი ოთხცილინდრიანი აგრეგატისას გაუთანაბრდა.

მექანიკურ კოლოფთან შეწყვილებული ასეთი ძრავით აღჭურვილი „მიკრას“ მაქსიმალური სიჩქარე 180 კმ/სთ-ია, 100 კილომეტრის გასავლელად კი, შერეული ციკლით მოძრაობისას, მას სულ რაღაც, 4.1 ლიტრი ბენზინი ჰყოფნის. „მიკრას“ ეკონომიურობა ოდნავ უარესდება, როცა ძრავი ავტომატურ კოლოფთან ერთად მუშაობს.

გარდა იმისა, რომ ტემპერატურული რეჟიმის შემსუბუქებით (მილერის ციკლის გამოყენების წყალობით), ხახუნის შემცირებითა (მოძრავი დეტალების რაოდენობის შემცირების წყალობით) და საწვავის შეფრქვევის სისტემის დახვეწით, ძრავის ეფექტურობა გაზარდეს, „ნისანის“ ინჟინრებმა „მიკრას“ ეკონომიურობის გაუმჯობესებას იმითაც მიაღწიეს, რომ სამცილინდრიანი ძრავი, ოთხცილინდრიანთან შედარებით, ნაკლებს იწონის. ასევე შეცვლილია ძრავის მართვის სისტემაც.

სუპერ ეკონომიური „ნისან მიკრას“ პრემიერა მარტში, ჟენევის ავტო შოუზე გაიმართება, მისი გაყიდვები კი ევროპის ბაზარზე ზაფხულში დაიწყება.

„კრაისლერთან“ ალიანსი „ფიატ-ისთვის“ მნიშვნელოვანია

Marchionne says Chrysler alliance is crucial

19 თებერვალი

ფიატ-ის მთავარი აღმასრულებელი სერჯო მარკიონე (ფოტოზე) აცხადებს, რომ „კრაისლერთან“ ალიანსს, იტალიური საავტომობილო ჯგუფისთვის დიდი მნიშვნელობა აქვს და დასძინა, რომ ტურინული კომპანია თავისი ბიზნესის იტალიაშივე განვითარებას აპირებს, რისთვისაც მილიარდობით დოლარის ინვესტირება იგეგმება.

„არამარტო ისაა სიმართლე, რომ „ფიატ-მა“ „კრაისლერი“ გადაარჩინა, არამედ ისიც, რომ „კრაისლერს“ ჩვენი ჯგუფის წარმატებული მომავლისთვის დიდი მნიშვნელობა ენიჭება. მათთან ერთად, ჩვენ საწარმოო პროგრამას ვამრავალფეროვნებთ და დიდი ერთობლივი გეგმები გვაქვს“, - ამბობს მარკიონე, ვინც იმავდროულად, ამერიკული კომპანიის მთავარი აღმასრულებელიცაა.

მარკიონემ ცოტა ხნის წინ განაცხადა, რომ „კრაისლერთან“ გაერთიანების შემდეგ, „ფიატ-ის“ შტაბ-ბინა შესაძლოა, ამერიკაში გადავიდეს, რამაც იტალიის მთავრობის დიდი უკმაყოფილება გამოიწვია. ამის გამო, მას სასწრაფოდ შეხვდა იტალიის პრემიერ მინისტრი სილვიო ბერლუსკონი, შემდეგ კი მარკიონე საპარლამენტო მოსმენაზეც დაიბარეს.

მარკიონემ, ვინც წარმოშობით იტალიელ-კანადელია, ბერლუსკონი დაარწმუნა იმაში, რომ „ფიატი“ საინვესტიციო პროგრამას, რომლის ფარგლებშიც, 27 მილიარდი დოლარის ინვესტირებას გეგმავს, მეტწილად იტალიაში განახორციელებს. მაგრამ საპარლამენტო მოსმენისას ისიც განაცხადა, რომ „კრაისლერთან“ გაერთიანების და ამ უკანასკნელის აქციონირების შემდეგ, ორი კომპანიის იტალიიდან მართვა პრობლემური გახდება.

„ჩვენ ვიმედოვნებთ, რომ მალე „კრაისლერის“ აქციებს ბირჟაზე გამოვიტანთ. ორი აქციონირებული კომპანიის სხვადასხვა შტაბ-ბინიდან მართვა კი პრობლემებს წარმოქმნის. თუმცა, ამასთან დაკავშირებით, ჯერ საბოლოო გადაწყვეტილება მიღებული არ გვაქვს“, - ამბობს მარკიონე.

„ფიატ-ს“, რომელიც იტალიის უდიდსი ინდუსტრიული ჯგუფია, „კრაისლერთან“ შერწყმა აქვს გადაწყვეტილი და ამ პროცესის დასრულებას, ორ-სდამ წელიწადში აპირებს. თუმცა, მანამდე ორივე კომპანიაში ძირეული რესტრუქტურიზაციის ჩატარება მოუწევს, რაც უზარმაზარ ხარჯებთან იქნება დაკავშირებული.

2009 წელს, მას შემდეგ, რაც „კრაისლერმა“ მართვადი გაკოტრების რეჟიმში გააგრძელა არსებობა, მისი აქციების 20 პროცენტი „ფიატ-მა“ გამოისყიდა. ამ წლის დასაწყისში კი იტალიურმა კომპანიამ „კრაისლერში“ თავისი წილი 25 პროცენტამდე გაზარდა.

მარკიონე ამბობს, რომ „ფიატ-ის“ იტალიაში დატოვება სურს, თუმცა ისიც დასძინა, რომ ამის გაკეთება გაუჭირდება, თუ პროფკავშირებისგან მხარდაჭერა არ ექნება: „ჩვენ არსად წასვლის სურვილია რ გვაქვს. „ფიატ-ი“ ამ ქვეყნის ნაწილია და იტალიის დატოვების სურვილი არ აქვს“.

საინვესტიციო გეგმა, სახელად „ფაბრიკა იტალია“, 20 მილიარდი ევროს ინვესტირებას ითვალისწინებს და ამ თანხის უმეტესი ნაწილი იტალიაში მოქმედ ხუთ ქარხანას მოხმარდება, რომლებიც ამჟამად წაგებაზე მუშაობს. რაც შეეხება პროფკავშირებს, მათ უკვე „ფიატ-ის“ ორ - მირაფიორის (ტურინის მახლობლად) და პომილიანოს (ნაპოლის მახლობლად) ქარხანასთან გააფორმეს ხელშეკრულებები.

მეცხრე თაობის „ჰონდა სივიკი“

Honda Civic Revealed, Gets More Efficient

19 თებერვალი

ჰონდამ თავისი ერთ-ერთი ყველაზე პოპულარული ავტომობილის, სივიკის მეცხრე თაობის მოდელის ფოტოები და ტექნიკური მონაცემები გამოაქვეყნა. ეს ავტომობილი ორი ძარით (სედანი და კუპე) და ხუთი ვერსიის სახით გაიყიდება. კომპანიის განცხადებით, ახალი სივიკის შემუშავებისას, ინჟინრებს მთავარი ყურადღება საწვავის ეკონომიურობაზე ჰქონდათ გადატანილი.

პირველი ვერსია ჩვეულებრივი ძრავებით აღჭურვილ სედანებს და კუპეებს მოიცავს. მეორე ეკონომიური ვერსია HF-ია, მესამე - სპორტული Si, მეოთხე ჰიბრიდული, მეხუთე კი გაზზე მომუშავე აგრეგატითაა აღჭურვილი. ამ ხუთიდან ყველაზე ეკონომიური HF და ჰიბრიდული ვერსიებია, რომელთა ხარჯიც 100 კილომეტრზე (ქალაქგარეთ მოძრაობისას) შესაბამისად, 5.7 და 5.2 ლიტრია.

სივიკ HF ბენზინის 1.8-ლიტრიანი ოთხცილინდრიანი i-VTEC ძრავითაა აღჭურვილი, რომელიც 140 ცხენის ძალას გამოიმუშავებს და რომელთანაც 5-საფეხურიანი ავტომატური გადაცემათა კოლოფია შეწყვილებული. სხვათა შორის, ეს ძრავი ახალი არაა და მას წინა თაობის სივიკზეც იყენებდნენ. გაზრდილი ეკონომიურობა კი იმის შედეგია, რომ ავტომობილი აეროდინამიკური ელემენტებით და სისტემა „ეკო ესისტით“ აღიჭურვა. სხვათა შორის, ამ სისტემას ჰონდა ადრე მხოლოდ ჰიბრიდულ მოდელებზე - CR-Z-სა და ინსაითზე იყენებდა. ყოველივეს შედეგად, წინა თაობის სივიკთან შედარებით, ახალი დაახლოებით 0.5 ლიტრით ნაკლებ ბენზინს მოიხმარს.

რაც შეეხება ჰიბრიდულ სივიკს, მის ძალურ დანადგარში, 1.5-ლიტრიანი ბენზინის აგრეგატი, პატარა ელექტროძრავი, უსაფეხურო ვარიატორი და ლითიუმ-იონური ელემენტების ბლოკი შედის. სხვათა შორის, ელექტროენერგიის დაგროვების საშუალებად, ჰონდა ასეთ აკუმულატორებს პირველად იყენებს.

სპორტული სივიკი კი 2.4-ლიტრიანი ძრავითაა აღჭურვილი, რომელიც 200 ცხენის ძალას გამოიმუშავებს. ამ აგრეგატმა 2.0-ლიტრიანი შეცვალა, რომლის მაქსიმალური სიმძლავრეც 197ცხენის ძალა იყო. ძრავის მიერ გამომუშავებულ მაბრუნ მომენტს (230 ნმ, რაც წინამორბედის ანალოგიურ მაჩვენებელზე დაახლოებით 22%-ით მეტია) 6-საფეხურიანი მექანიკური კოლოფი გადაამუშავებს და წინა წამყვან ბორბლებს აწვდის. სპორტული სივიკის დინამიკური მახასიათებლების გამოქვეყნებისგან, ჰონდა ჯერჯერობით თავს იკავებს.

„დღეისათვის ავტობაზარზე სივიკი ერთადერთი მოდელია, რომელიც მყიდველის ყველანაირ მოთხოვნას აკმაყოფილებს - არის ეკონომიური, სპორტული, ოპტიმალურად აღჭურვილი, ალტერნატიულ საწვავზე მომუშავეც და რაც მთავარია, დიდხანს ინარჩუნებს თავის ღირებულებას“, - ამბობს ჰონდას ამერიკული შტოს აღმასრულებელი ვიცე პრეზიდენტი ჯონ მენდელი.

მეცხრე თაობის სივიკის გაყიდვას ჰონდა პირველ რიგში ამერიკაში დაიწყებს, შემდეგ კი მას ევროპასა და სხვა ბაზრებზეც შეიტანს.

Friday, February 18, 2011

„ფორდმა“ კიოლნში ელექტრული ფურგონის ტესტირება დაიწყო

First Ford Transit Connect Electric charged for German field test

18 თებერვალი

საავტომობილო ბაზრის ელექტრომობილების სეგმენტში „ფორდმაც“ შეაბიჯა - ამერიკულმა კომპანიამ და გერმანიის ქალაქ კიოლნში მოქმედმა პროექტმა „E-მობილმა“, გერმანიის ჩრდილოეთ რაინ-ვესტფალიის მიწის ეკონომიკის სამინისტროს მხარდაჭერით, ელექტრომობილების ტესტირება დაიწყეს.

ამერიკულმა კომპანიამ ამ ტესტირებისთვის თავისი პირველი სერიული ელექტრომობილი - „ტრანზიტ კონექტ ელექტრიკი“ მოამზადა. სულ ტესტირების პროცესს ათი ასეთი ავტომობილი გაივლის. სხვათა შორის, კიოლნშივე უკვე რამდენიმე თვეა, ტესტირებას ათი ცალი საშუალო ზომის არასერიული კომერციული ელექტრული ფურგონი „ტრანზიტ BEV“ (BEV - ბატერი ელექტრიკ ვიიქლ, ანუ აკუმულატორიანი ელექტრული მანქანა) გადის.

პროექტში, „ფორდის“ გარდა, კიოლნის ხელისუფლება, ენერგომიმწოდებელი კომპანია „რაინენერჯი“ და დუისბურგ-ესენის უნივერსიტეტი მონაწილეობენ. პროექტის მიზანია, შეისწავლოს ქალაქის პირობებში ელექტრული ფურგონის ყოველდღიური ექსპლუატაციის თავისებურებანი.

ელექტრული „ფორდ ტრანზიტ კონექტი“ ჩვეულებრივი შიდაწვისძრავიანი ფურგონისთვის დამახასიათებელი დინამიკით, ტევადობით და ექსპლუატაციის სიმარტივით გამოირჩევა, რის გამოვ, ის შესანიშნავი არჩევანია, როდესაც საქმე ქალაქში მცირე ტვირთების გადაზიდვებს ეხება. ლითიუმ-იონური ელემენტევის ბლოკი ავტომობილის ძირზეა მოთავსებული, რისი წყალობითაც, მისი საბარგულის მოცულობა არ შემცირებულა.

ავტომობილი გერმანულ კომპანია „სიმენსის“ წარმოების ელექტროძრავითაა აღჭურვილი, რომელიც 78 ცხენის ძალას და 235 ნიუტონმეტრს იძლევა. მასთან ამერიკულ კომპანია „ბორგ უორნერის“ წარმოების ერთსაფეხურიანი ტრანსმისიაა დაკავშირბული, რომლის ერთადერთი საფეხურის გადაცემის რიცხციც 8.5:1-ზეა. აკუმულატოების ბლოკის ენერგოტევადობა 28 კილოვატსაათია. სეგმენტი, სადაც ელემენტების ბლოკია გამაგრებული, ავტომობილის ძარის სტრუქტურის სიხისტის გაზრდასაც უზრუნველყოფს. სამაგიეროდ, აკუმულატორების წონა დაახლოებით 453 კილოგრამია და ავტომობილის ტვირთამწეობაც ამდენივეთია შემცირებული.

240-ვოლტიანი შტეპსელიდან დამუხტვისას, „ფორდ ტრანზიტ კონექტის“ აკუმულატორები (რომლებსაც თხევადი გაგრილების სისტემა ემსახურება) სრულად 8 საათში ივსება, 120-ვოლტიანი შტეპსელის გამოყენების შემთხვევაში კი, დამუხტვის დრო 27 საათამდე იზრდება. სრულად შევსებული აკუმულატორებით, ელექტული სატვირთოს სვლის სიშორე 130 კილომეტრს აღწევს.

ტესტირების პროცესში, ელექტრულ ფურგონებს „რაინენერჯის“ მიერ მოწყობილი დასამუხტი სადგურები მოემსახურება. სხვათა შორის, ტესტირების დროს, ასეთი სადგურების ეფექტურობაც შემოწმდება. მთავარი კი ისაა, თუ რამდენად გამძლეა ელექტრომობილის ელექტრული სისტემები და დამუხტვა-განმუხტვის რამდენ ციკლს უძლებს აკუმულატორების ბლოკი.