Thursday, July 23, 2009

”ოპელის” გაყიდვა ჭიანურდება

Opel

23 ივლისი

ცოტა ხნის წინ, ”ჯენერალ მოტორსი” აცხადებდა, რომ ”ოპელის” მყიდველს ამ თვის ბოლომდე აარჩევდა, მაგრამ საქმეს ისეთი პირი უჩანს, რომ მყიდველის შერჩევის პროცესი გაჭიანურდება. ყოველ შემთხვევაში, გუშინ ცნობილი გახდა, რომ გერმანული კომპანიის ყიდვის მსურველთა შორის, ”ჯენრალ მოტორსსა” და გერმანიის მთავრობას, შორის შეთანხმება ჯერჯერობით არ ხერხდება.

სამაგიეროდ, როგორც ჩანს, მარათონს ერთი მოთამაშე მინც გამოაკლდა - როიტერის მიერ გუშინ გავრცელებული ინფორმაციით, ”გენერლები” მოლაპარაკებას ”ოპელის” შეძენის ორ მსურველთან - კანადურ ”მაგნა ინტერნეიშნლთან” და ბელგიურ საინვესტიციო ჯგუფ ”RHJ ინტერნეიშნლთან” აგრძელებენ. ჩინური ”ბეიძინ აუტოზე” ცნობაში არაფერია ნათქვამი, რაც იმის ნიშანია, რომ ის თამაშგარეშეა დარჩენილი.

მყიდველის არჩევის გაჭიანურების მიზეზი ისაა, რომ ამერიკული კომპანია უპირატესობას ბელგიურ ფონდს ანიჭებს, რომელიც როგორც ჩანს, თანახმაა ”ჯენერალ მოტორსის” მთავარ პირობაზე - მასვე მიჰყიდოს ”ოპელის” აქციები, როდესაც გერმანული კომპანია კრიზისს თავს დააღწევს და მომგებიან საქმიანობაზე გადავა.

სამაგიეროდ, ”მაგნას” და მის რუს პარტნიორ ”სბერბანკს” გერმანიის მთავრობა და მისი კანცლერი ანგელა მერკელი ემხრობა (როგორ გახშირდა გერმანიის მთავრობების მაღალჩინოსანთა და რუსულ გიგანტ კომპანიებს შორის სიმპათიები და რა გადამდები ყოფილა შრიოდერის მაგალითი). სხვათა შორის, ”მაგნამ” თავისი განაცხადის პირობა ოდნავ შეცვალა იმ პუნქტში, რომელიც ”ოპელის” აქციების პაკეტების გადანაწილებას ეხება. კერძოდ, ახალი განაცხადი ისევ ითვალისწინებს, რომ ”მაგნასა” და ”სბერბანკს” ”ოპელის” 55 პროცენტი ერგებათ, ”ჯენერალ მოტორსს” 35 პროცენტი დარჩება, 10 პროცენტს კი ”ოპელის” თანამშრომელთა პროფკავშირული გაერთიანება მიიღებს. აქ სიახლე ისაა, რომ ”მაგნა” და ”სბერბანკი” მათ კუთვნილ 55 პროცენტს თანაბრად გადაინაწილებენ, რის შემდეგაც მათ 27.5-27.5 პროცენტი ერგებათ. ადრინდელი განაცხადით კი საავტომობილ მაკომპლექტებლების კანადური გიგანტი თავისთვის ”ოპელის” 20 პროცენტს იტოვებდა, თავის რუს პარტნიორს კი, რომელიც გარიგების ფინანსურ უზრუნველყოფას კისრულობს, 35 პროცენტს აძლევდა. ამგვარად, ”ჯენერალ მოტორსი” და ”სბერბანკი” თანაბარი მოწილეები ხდებოდნენ, რაც ამერიკულ კომპანიას ძალაინ არ მოსწონდა.

უცნობია, რა ტიპის გარიგებას სთავაზობს ამერიკულ კომპანიას ბელგიური ფონდი. სამაგიეროდ, ცნობილია, რომ ”ბეიძინ აუტო” ”ოპელის” 51 პროცენტის ყიდვას გეგმავს. ამასთან, გერმანიის მთავრობისგან, სესხის სახით, 3 მილიარდ ევროსაც ითხოვს (ფაქტობრივად, ”ოპელის” ამ სესხით ყიდვას აპირებს). ამ შემთხვევაში, ”გენერლებს” გერმანულ კომპანიაში 49-პროცენტიანი წილი რჩებათ.

”ნისანი” აკუმულატორებს უსადენოდ დამუხტავს

Nissan

23 ივლისი

კომპანია ”ნისანმა” შეიმუშავა ტექნოლოგია, რომელიც აკუმულატორების უსადენოდ დამუხტვის საშუალებას იძლევა. იაპონური კომპანია ამ სისტემის საკუთარ ელექტრომობილებზე გამოყენებას აპირებს. ბრიტანულ გაზეთ ”გარდიანის” ინფორმაციით, პირველი ავტომობილი, რომელზეც ახალ სისტემას გამოიყენებენ, ”ნისან ZEV-ია” (ზერო ემიშნ ვიჰაიქლ), რომელიც იაპონიისა და ამერიკის ბაზრებზე მერმისიდან გამოჩნდება, ევროპამდე კი 2012 წელს მიაღწევს.

”ნისანის” მიერ შემუშავებული ტექნოლოგია ელექტრომაგნიტური ინდუქციის გამოყენებაზეა დამყარებული. მსგავსი ტექნოლოგია საყოფაცხოვრებო ტექნიკაში (ელექტროსაპარსებსა და კბილის ელექტრულ ჯაგრისებში) უკვე გამოიყენება. ასეთი ტექნოლოგიის მეშვეობით, აკუმულატორი უსადენოდ იმუხტება. ახალი სისტემებით აღჭურვილი ავტომობილები სპეციალურ სადგომებზე, ღამის, ან დღის დროებითი პარკირებისას დაიმუხტება.

იმის გასაგებად, თუ რამდენად შეიძლება ასეთმა სისტემამ ელექტრომობილების მყიდველების დაინტერესება გამოიწვიოს, ”ნისანის” მარკეტოლოგებმა გამოკითხვა ჩაატარეს, რომელმაც აჩვენა, რომ ელექტრომობილების პოტენციურ მყიდველთა 61 პროცენტს აკუმულატორების ხშირად დამუხტვის პერსპექტივა აშინებს.

”ჩვენი ტექნოლოგიის მეშვეობით, თქვენი ელექტრომობილის აკუმულატორებს 80 პროცენტით 25 წუთში დამუხტავთ და ეს მანამ მოხდება, სანამ მაღაზიაში საყიდლებზე იქნებით, ან კაფეში ყავის დალევას და გაზეთის გადაკითხვას მოასწრებთ”, - ამბობს ”ნისანის” ევროპული შტოს სტრატეგიისა და დაგეგმარების განყოფილების მთავარი მენეჯერი ლარი ჰადადი. მას არ დაუზუსტებია, თუ ვინ უზრუნველყოფს იაპონიასა და ამერიკაში უსადენო დამმუხტავი პუნქტების ქსელის შექმნას. თუმცა, ამ საქმეს ალბათ ჰოლდინგი ”ბეტერ პლეისი” ითავებს, რომელიც ”რენოსთან” და ”ნისანთან” ერთად, მთელს მსოფლიოში ელექტრომობილების ინფრასტრუქტურის მოწყობას გეგმავს.

”ნისან ZEV” იაპონური კომპანიის პერველი ელექტრომობილია, რომელიც ფაქტობრივად, მზადაა წარმოებისთვის. ეს არის ჰეჩბეკ ”ნისან კუბის” ბაზაზე შექმნილი მანქანა, რომელსაც ერთი დამუხტვით 160 კილომეტრის გავლა შეუძლია. მისი მაქსიმალური სიჩქარე სულ რაღაც 145 კმ/სთ-ია, სამაგიეროდ, გარემოს გამონაბოლქვით პრაქტიკულად არ აბინძურებს.

”პორშემ” ვედეკინგი 50 მილიონის საფასურად დაითხოვა

Wendelin Wiedeking

23 ივლისი

პორშემ ვედეკინგი დაითხოვა...

...მახტი კი დანიშნა

.......................................................................................

”პორშეს” ჰოლდინგის სამეთვალყურეო საბჭომ, კომპანიის მთავარი აღმასრულებლის პოსტი ვენდელინ ვედეკინგს დაატოვებინა, ვინც ”ფოლკსვაგენთან” გაერთიანების სასტიკი წინააღმდეგი იყო. მის ადგილს დირექტორთა საბჭოს მიხაელ მახტი დაიკავებს, ვინც აქამდე წარმოების სფეროს კურირებდა. ვედეკინგთან ერთად, პოსტი კომპანიის ფინანსურ დირექტორ ჰოლგერ ჰერტერსაც დაატოვებინეს. კონტრაქტის ნაადრევად შეწყვეტის გამო, კომპენსაციის სახით, ვედეკინგი 50 მილიონ ევროს, ჰერტერი კი 12.5 მილიონ ევროს მიიღებს.

ამიერიდან, ”ფოლკსვაგენს” ”პორშეს” შეძენაში ხელს ვეღარავინ შეუშლის. არადა, სულ ცოტა ხნის წინ, თავად ”პორშე” ცდილობდა ვოლფსბურგული გიგანტის საკონტროლო პაკეტის დაუფლებას. 2005 წლიდან მოყოლებული, ცუფენჰაუზენელებმა (ცუფენჰაუზენი შტუტგარტის გარეუბანია) ევროპის უდიდესი კონცერნის აქციების 51 პროცენტის დაუფლება შეძლეს და კიდევ 20 პროცენტის შესყიდვის უფლებაც მოიპოვეს.

მაგრამ პარალელურად, ”პორშეს” ვალები უგროვდებოდა, რამაც დღეისათვის 9 მილიარდ ევროს მიაღწია. მათ დასაფარად, კომპანიის ხელმძღვანელობა უცხოელი ინვესტორის ძებნას შეუდგა. ასეთად ყატარის სახელმწიფო საინვესტიციო ფონდი შეირჩა, თუმცა საბოლოოდ, ვოლფგანგ პორშესა და ფერდინანდ პიხის დიდი მცდელობით, ვედეკინგმა თავისი ვერ გაიტანა და უზარმაზარი კომპენსაციის სანაცვლოდ, პოსტის დატოვებას დათანხმდა.

ამგვარად, გზა გაეხსნა ”ფოლკსვაგენის” მიერ ”პორშეს” შეძენის პროცესს. ამისათვის ვოლფსბურგელები 4 მილიარდი ევროს ინვესტირებას გეგმავენ. პარალელურად, ”პორშე” მალე ”ფოლკსვაგენის” დიდი ოჯახის წევრი გახდება, რომელშიც დღეისათვის გაერთიანებულები არიან: ”ფოლკსვაგენი”, ”აუდი”, ”შკოდა”, ”სეატი”, ”ლამბორგინი”, ”ბუგატი”, ”ბენტლი”, ”მან-ი” და ”სკანია” (ეს ორი სატვირთოების მწარმოებელია).

”სუზუკი სელერიო” თბილისში

Suzuki Celerio

23 ივლისი

იაპონურ კომპანია ”სუზუკი მოტორ კორპორეიშნის” ქართველმა დილერმა, კომპანია ”სენა ავტო სერვისმა” საქართველოში თავისი პარტნიორის უახლესი მოდელი, მინი ავტომობილი ”სელერიო” შემოიყვანა, რომლის გაყიდვებიც გლობალურ ბაზარზე ”სუზუკის” ახალი დაწყებული აქვს.

”სელერიო” ხუთკარიანი მინი ჰეჩბეკია, რომელსაც ოთხი ზრდასრული ადამიანის გადაყვანა შეუძლია. ავტომობილი ფაქტობრივად, პოპულარული ”ალტოს” (რომელიც 30 წლის განმავლობაში, მთელს მსოფლიოში 10 მილიონზე მეტი გაიყიდა) განვითარებაა და იაპონური კომპანიის სამოდელო გამაში, ”ალტოსა” და ”სვიფტს” შორის უკავია ადგილი.

”ჩვენ ”სელერიოს” ადგილი ”ალტოსა” და ”სვიფტს” შორის მივუჩინეთ. თუ თქვენ ტიპიური მასობრივი ავტომობილი გნებავთ, ”ალტოს” გირჩევთ, თუ იმაზე მეტი თანხა გაქვთ, ვიდრე ”ალტოს” შესაძენად გჭირდებათ და სპორტული სტილის ავტომობილის შეძენა გსურთ, მაშინ ”სვიფტი” ინებეთ. მაგრამ თუ თქვენ კოლეჯის სტუდენტი, ან უბრალოდ, ახალგაზრდა ადამიანი ხართ, ვინც ოჯახი ახლახანს შექმნა, იცოდეთ, რომ ”სელერიო” სწორედ თქვენთვისაა”, - ასე აფასებს თავისი კომპანიის მინიავტომობილების სამეულს ”სუზუკის” ავტომობილების მარკეტინგის განყოფილების მთავარი მენეჯერის ასისტენტი არვი ფუგოსო.

”სელერიო” კომპაქტური გაბარიტებით გამოირჩევა. მისი სიგრძე 3 500 მმ, სიგანე 1 600 მმ და სიმაღლე 1 470 მილიმეტრია. მცირე გაბარიტების მიუხედავად, მისი სალონი საკმაო კომფორტულობით გამოირჩევა და მასში თავისუფლად თავსდება ოთხი ადამიანი (მძღოლიანად).

”სელერიო” სპეციალურად ევროპის ბაზრისთვისაა (მარკეტინგულ მოსაზრებათა გამო, ევროპაში ის ”ალტოს” სახელით იყიდება) შექმნილი და შესამამისად, ევრო5 სტანდარტის შესაბამისი, 1.0-ლიტრიანი სამცილინდრიანი (ყოველ ცილინდრზე 4 სარქველით) ბენზინის ძრავითაა აღჭურვილი, რომლის სიმძლავრეც 65 ცხენის ძალაა ძრავთან 4-საფეხურიანი ავტომატური გადაცემათა კოლოფია შეწყვილებული.

იმისათვის, რომ 955-კილოგრამიან ”სელერიოს” 100 კილომეტრი გაატაროს, ძრავს დაახლოებით 5 ლიტი ბენზინი ესაჭიროება, ყოველი კილომეტრის გავლისას კი ის სულ რაღაც 103 გრამ ნახშირორჟანგს გამოჰყოფს. ამ მაჩვენებლით, ჩვეულებრივი შიდაწვის ძრავებით აღჭურვილ ავტომობილებს შორის, ”სელერიო” ერთ-ერთი ყველაზე ”მწვანე” ავტომობილია.

მათთვის, ვინც ეჭვის თვალით უყურებს მინიავტომობილების უსაფრთხოების დონეს, ყურადღებას იმ ფაქტორზე გავამახვილებთ, რომ ”სელერიოში” ეს საკითხიც მაღალ დონეზეა გადაწყვეტილი. სტანდარტულ კომპლექტაციაში შედის უსაფრთხოების 2 ბალიში, კარებების გამაძლიერებელი ძელები, მუხრუჭების ბლოკირების საწინააღმდეგო სისტემა, ასევე მუხრუჭების დამხმარე სისტემა ბრეიკ ესისტ, ტრავმასაწინააღმდეგო სატერფული, სამწერტილოვანი წინა და უკანა უსაფრთხოების ღვედები.

დაბოლოს, ”სუზუკი სელერიოს” ”სენა აუტოს” ბაგებისა და აღმაშენებლის ხეივანის მე-12 კილომეტრზე მდებარე სალონებში, 12 450 დოლარადაა შესაძლებელი.

”კორვეტი” იტალიური გარეგნობით

SV 9 Competizione

23 ივლისი

პატარა იტალიურმა კომპანია ”SV მოტორ კომპანიმ”, ამერიკულ სუპერავტომობილ ”შევროლე კორვეტის” ბაზაზე, ამ ავტომობილის თავისეული ვერსია დაამზადა, რომელსაც ”ალფა რომეოს” ელეგანტურ ”8C კომპეტიციონესთან” მსგავსების გამო, ”SV 9 კომპეტიციონე” ეწოდა.

კომპანიის დიზაინერებს სურდათ, რომ მათი ქმნილება ტიპიურ იტალიურ სტილში შეესრულებინათ. ავტომობილის ბაზისად ”შევროლე კორვეტის” შასი და ძრავი (თავისი კოლოფით) აიღეს, ძარა კი იტალიური კომპანიის სპეციალისტებმა შეიმუშავეს.

დიზაინზე მუშაობისას, ავტომობილის ტექნიკურ-დინამიკური მახასიათებლებიდან გამომდინარე, აქცენტი იმაზე გაკეთდა, რომ მას სპორტული, ზომიერად აგრესიული გარეგნობა ჰქონოდა. პარალელურად, დიდი ყურადღება მის აეროდინამიკურ მახასიათებლებსაც დაეთმო. კომპანიის განცხადებით, ”SV 9 კომპეტიციონეს” წინა ნაწილი ისეა დაპროექტებული, რომ მის მიერ განაწილებულმა ჰაერის ნაკადმა ავტომობილის ოპტიმალური დინამიკური დატვირთვა უზრუნველყოს.

”SV 9 კომპეტიციონეს” ძარის ელემენტების დიდი ნაწილი კარბონის კომპოზიტისა და სხვა მსუბუქი მასალებისგანაა დამზადებული, რისი წყალობითაც, ავტომობილი ”კორვეტზე” 60 კილოგრამით მსუბუქი გამოვიდა. ის 1 398 კილოგრამს იწონის და ეს წონა წინა და უკანა ღერძებს შორის თანაბრადაა (50/50) განაწილებული.

”SV მოტორსის” ცნობით, ავტომობილს 0-100 კმ/სთ აჩქარება 4 წამში შეუძლია, 400 მეტრს კი 12 წამში გადის. იტალიური ფირმის სპეციალისტებმა ძრავის შემშვები და გამომშვები სისტემები დაამუშავეს, რის შემდეგაც, მისი სიმძლავრე 450 ცხენის ძალა გახდა.

კარგი აჩქარების გარდა, ”SV 9 კომპეტიციონე” შესანიშნავი შენელებითაც გამოირჩევა. 100 კმ/სთ-იდან სრულ გაჩერებამდე, ის 33 მეტრს გადის და ამას 4 წამზე ნაკლებში ახერხებს.

”SV მოტორსი” სულ 1 000 ცალი ”SV 9 კომპეტიციონეს” წარმოებას გეგმავს, ავტომობილის ღირებულება კი 99 995 დოლარია.

”აუდი” ახალ ეკოლოგიურ მინიავტომობილს ამზადებს

Audi E1

23 ივლისი

მიუხედავად იმისა, რომ დღეისათვის, ნავთობის ფასი მეტნაკლებად სტაბილურია, საავტომობილო ინდუსტრიაში კარგად უწყიან, რომ როგორც კი ეკონომიკური კრიზისი დასრულბა, შავი ოქროს ფასიც ზევით ”გაიქცევა”, რის შედეგადაც, ავტობაზარზე კვლავ მოიმატებს მოთხოვნა ეკონომიურ ავტომობილებზე. ამისათვის კი მწარმობლები, მათ შორის, პრემიუმ კლასში მოღვაწენიც გამალბით ემზადებიან.

მაგალითად, ”ბეემვე” უკვ დიდი ხანია, რაც ელექტრომობილის შექმნაზე მუშაობს. კომპანიამ უკვე დაიწყო ”მინის” ბაზაზე დამზადებული ელექტრომობილის ტესტების ფართო პროგრამა, რომელშიც საზოგადოებაცაა ჩართული. პარალელურად, ბავარიელები სუბკომპაქტურ ავტომობილსაც ამზადებენ. ”მერსედეს-ბენცს” უკვე აქვს სუბკომპაქტური ”სმარტი”, რომლის ბაზაზეც უკვე ელექტრომობილის შექმნა და მას საერთო სარგებლობის გზებზე ცდის. და აი, ეკოლოგიური ავტომობილების წარმოების ფერხულში ”აუდიც” ერთვება, რომელიც წარმოებისთვის მინი ავტომობილს ამზადებს.

ინტერნეტში გავრცელებული ინფორმაციით, მინიავტომობილი ”ფოლკსვაგენის” კონცეპტუალურ მოდელ up!-ზე (სავარაუდოდ, ამ ავტომობილს, როდესაც ის კონვეიერამდე მიაღწევს, ლუპოს დაარქმევენ) იქნება ბაზირებული და ბაზარზე ის მეტოქეობას ისეთ პოპულარულ ავტომობილებს გაუწევს, როგორებიცაა ”ფორდ კა”, ”ტოიოტა iQ” და ”ფიატ 500”. სამოდელო გამაში ახალი, ეკოლოგიური ავტომობილის გამოჩენასთან ერთად, ”აუდი” თავისი ავტომობილების ახალ ინდექსს (E) შემოიღებს, რომლითაც არსებული მოდელების ეკოლოგიურ ვერსიებს აღნიშნავენ. ასეთ ინდექსს კი პირველ რიგში ახალი მინი ავტომობილი მიიღებს, რომელსაც საზოგადოება E1-ის სახელით გაიცნობს.

E1 ორცილინდრიანი ტურბოძრავით აღიჭურვება, რომლის მუშა მოცულობა მხოლოდ 600 კუბური იქნება. ჯერჯერობით უცნობია, ძრავი ბენზინზე იმუშავებს, თუ დიზელზე. სამაგიეროდ, კომპანიაში ძრავის გამონაბოლქვისა და ეკონომიურობის მაჩვენებლების ორიენტირები წინასწარ აქვთ არჩეული. ასე მაგალითად, აგრეგატმა ყოველი 100 კილომეტრის გავლისას, მხოლოდ 2.9 ლიტრი საწვავი უნდა მოიხმაროს, ყოველ კილომეტრზე კი ატმოსფეროში 100 გრამზე ნაკლები ნახშირორჟანგი უნდა გამოყოს. რა თქმა უნდა, განიხილება ავტომობილის ელექტროძრავით აღჭურვის ვარიანტიც, თუმცა მის შესახებ ჯერ სავარაუდო დეტალებიც უცნობია.

ასევე E1-ის სამცილინდრიანი, 1.2-ლიტრიანი ძრავით აღჭურვაც იგეგმება, რომელსაც ოდნავ უარესი ეკონომიური და ეკოლოგიური მაჩვენებლები ექნება. საერთო ჯამში, ”აუდის” სამოდელო გამაში E1 უფრო დაბალ ადგილს დაიკავებს, ვიდრე A1, რომელიც წარმოებისთვის პრაქტიკულად მზადაა.

სავარაუდოდ, ”აუდი E1” ბაზარზე 2011 წელს გამოჩნდება, ერთი წლით გვიან, ვიდრე ”ფოლკსვაგენ ლუპო”. ორივე ავტომობილის წარმოებისთვის კი უკვე შერჩეულია ქალაქ ბრატისლავაში (სლოვაკეთი) არსებული ქარხანა, რომელიც მოგვიანებით, იმავე up!-ის ბაზაზე, ”შკოდასა” და ”სეატის” მინიავტომობილებსაც გამოუშვებს.