Saturday, October 31, 2009

”ნისან ლიფ-ი” მექსიკო სიტისთვის

Nissan Leaf for Mexico City

31 ოქტომბერი

”ნისანმა” და მექსიკო სიტის ხელმძღვანელობამ გააფორმეს ხელშეკრულება, რომლის მიხედვითაც, იაპონური კომპანია და მისი ფრანგული პარტნიორი ”რენო” ვალდებულებას ღებულობენ, მექსიკის დედაქალაქი გარემოსადმი მეგობრული ავტომობილებით მოამარაგონ. ასეთი კი მალე გახდება ელექტრომობილი ”ნისან ლიფი”, რომელიც მექსიკო სიტის ქუჩებში 2011 წელს გამოჩნდება.

გლობალურ ბაზარზე ამ ელექტრომობილის წარდგენას იაპონური კომპანია 2012 წელს აპირებს, თუმცა აშშ-ისა და იაპონიის ბაზრებისთვის, შეზღუდული რაოდენობით მის გამოშვებას უფრო ადრე გეგმავს. ახლა კი ამ ორ ბაზარს მექსიკაც დაემატა.

”მექსიკო სიტიში ”ნისანი” დიდი პოპულარობით სარგებლობს და იქ ელექტრომობილების გაყიდვა ამ პოპულარობის გაგრძელება იქნება. ამ ქალაქის ხელმძღვანელებთან საქმიანი ურთიერთობის განმტკიცებით, ჩვენ კიდევ ერთხელ დავამტკიცებთ, რომ მექსიკურ ბაზარს ჩვენი ალიანსისთვის დიდი მნიშვნელობა ენიჭება”, - ამბობს ”ნისან მექსიკანას” პრეზიდენტი ხოსე მუნიოსი.

”ნისან ლიფი” ლითიუმ-იონური აკუმულატორებით აღიჭურვება, რომელთა ტევადობაც 90 კილოვატს მიაღწევს. მისი ელექტროძრავის სიმძლავრე 80 კილოვატს, მაქსიმალური მაბრუნი მომენტი კი 280 ნიუტონმეტრს მიაღწევს. სრულად დამუხტული აკუმულატორებით, ელექტრომობილის სვლის მარაგი 160 კილომეტრს მიაღწევს, რაც შესანიშნავი მაჩვენებელია. ნაწილობრივ, მის მიღწევაში ავტომობილს მუხრუჭების ენერგიის რეგენერაციის სისტემაც ეხმარება.

”ნისანი” აშშ-ში ”ლიფზე” შეკვეთების მიღებას მერმის დაიწყებს. იაპონური კომპანიის განცხადებით, ჩრდილოეთ ამერიკაში ამ ელექტრომობილზე უკვე 22 000 წინასწარი შეკვეთაა მიღებული. არადა, ჯერ სამი თვეც არაა გასული ამ ავტომობილის პრეზენტაციიიდან, რომელიც აგვისტოში ჩატარდა.

Friday, October 30, 2009

”ფორდ ფიესტა ეკონეტიკი” - 2.9 ლიტრი 100 კილომეტრზე

Ford Fiesta ECOnetic

30 ოქტომბერი

”ფორდ ფიესტა” ძალიან პოპულარული ავტომობილია. მას განსაკუთრებით ევროპაში აფასებენ, სადაც ყველაზე მეტად ისინი ყიდულობენ, ვინც სახელმწიფო შეღავათებით სარგებლობს. ამ სუბკომპაქტური ავტომობილის პოპულარობას, მის გარეგნობასთან ერთად, ეკონომიურობაც განაპირობებს.

ახლახანს, ”ცისფერმა ოვალმა” ამ ავტომობილის ახალი, კიდევ უფრო ეკონომიური ვერსია შექმნა, რომელიც სერია ”ეკონოტეკის” ძრავითაა აღჭურვილი და მწარმოებლის მონაცემებით, 100 კილომეტრის გასავლელად, 2.9 ლიტრი ბენზინი ჰყოფნის. ეს შედეგი ამერიკული კომპანიის ჯგუფმა ”გლოუბლ გრინ ჩელინჯის” ეტაპზე მიაღწია.

პარალელურად, ”ფორდმა” გამოაქვეყნა პირველი ათი თვის გაყიდვების მონაცემები, რომლებშიც აღნიშნულია, რომ წელს უკვე ნახევარ მილიონზე მეტი ”ფიესტაა” გაყიდული. აქედან თითქმის 450 ათასი ევროპაში გაიყიდა, დანარჩენი კი - აზიასა და წყნარი ოკეანის რეგიონში.

”ახალი ”ფიესტა” თვალწარმტაცი, ინოვაციური, არაჩვეულებრივად მართვადი და დინამიური ავტომობილია. ამ თვისებებით კი ის მთელი მსოფლიოს ავტომოყვარულებს ხიბლავს და ამბობს ”ფორდის” გლობალური მარკეტინგის შეფი ჯიმ ფარლი.

აღსანიშნავია, რომ ესოდენ კარგ შედეგს ”ფორდმა” იმის მიუხედავად მიაღწია, რომ ”ფიესტას” ჯერაც არ ჰყიდის აშშ-ის ბაზარზე. ამ ავტომობილის ამერიკული დებიუტი ლოს ანჯელესის საავტომობილო შოუზეა მოსალოდნელი, რომელიც ამ წლის ბოლოს გაიმართება. თუმცა გაყიდვები მხოლოდ ზაფხულში დაიწყება. და მაინც, სპეციალური სარეკლამო კამპანიის წყალობით, ”ფორდმა” თავის ახალ ”ფიესტაზე” უკვე თითქმის 50 000 ცალი წინასწარი შეკვეთა შეაგროვა.

Thursday, October 29, 2009

ბრიტანული ელექტრომობილი ევროპის დაპყრობას აპირებს

Axon Plug-In Hybrid Electric Vehicle

29 ოქტომბერი

ბრიტანეთში ახალი საავტომობილო კომპანია გამოჩნდა - მილტონ კეინსში, მეცნიერების ფესტივალზე, კომპანია ”აქსონ ოტომოტივმა” თავისი პლაგ-ინ ჰიბრიდული ელექტრომობილი წარმოადგინა, რომლის გაყიდვების დაწყებასაც ორ წელიწადში აპირებს.

ჯერჯერობით, ეს პირველი ბრიტანული კომპანიაა, რომელიც პლაგ-ინ ჰიბრიდული ელექტრომობილების წარმოებას გეგმავს. თუ იმ ფაქტს გავითვალისწინებთ, რომ მას ფინანსურად ქვეყნის მთავრობის სპეციალური სტრუქტურა, კერძოდ კი ”ტექნოლოგიების სტრატეგიის საბჭო” ეხმარება, შეიძლება ვივარაუდოთ, რომ მილტონ კეინსში ნაჩვენები ავტომობილი მალე გამოჩნდება ალბიონის გზებზე.

ავტომობილის მთავარო მამოძრავებელი ელექტროძრავია. ქალაქში სწორედ მისი მეშვეობით გადაადგილდება. შორეული მოგზაურობის დროს, ელექტროძრავს შიდაწვის ძრავი ეხმარება, რომელიც ბენზინის გარდა, საწვავად ბიოეთანოლსაც იყენებს.

კომპანიაში აცხადებენ, რომ მათი ავტომობილის კიდევ ერთი დადებითი თვისება სიმსუბუქეა. ამის მიღწევაში კი მათ ნახშირბადოვანი ბოჭკოს კომპოზიტის გამოყენება დაეხმარა. ასეთი კომპოზიტები ფართოდ გამოიყენება სპორტული ავტომობილების წარმოებისას და მისი მთავარი ღირსება ისაა, რომ მსუბუქია და ხისტი. კომპოზიტებისგან დამზადებული მზიდი სტრუქტურა კარგი ენერგოშთანმთქმელია და ის კარგად იცავს სალონში (სპორტული ავტომობილის კოკპიტში) მყოფთ.

”აქსონის” სალონი ორ ზრდასრულ ადამიანზეა გათვლილი და მას საკმაოდ ბევრი ბარგის გადატანაც შეუძლია. სიიაფისა და ეკოლოგიურობისთვის გაღებული ხარკია ის, რომ სალონი მსუბუქი მრეწველობის ნარჩენებითაა გაწყობილი. კერძოდ, შალითები ჯინსის შარვლების წარმოებისას დარჩენილი ნაჭრითაა დამზადებული, ინტერიერის ზოგიერთი დეტალი კი კარბონის კომპოზიტის ნარჩენებისგან კეთდება.

”ჩვენი ძირითადი მიზანი ის იყო, რომ მსუბუქი, აეროდინამიკური ავტომობილი შეგვექმნა, რამაც გამონაბოლქვის შემცირების საშუალება მოგვცა. რამდენადაც ავტომობილი პლაგ-ინ ჰიბრიდული სისტემითაა აღჭურვილი, მაქსიმალური გარბენის მხრივ პრობლემა არ გვაქვს. მაგრამ ელექტროენერგიის მოხმარების თანდათან შემცირებას მაინც ვაპირებთ. იმავდროულად, ეს ეს ავტომობილის გაძვირების და აკუმულატორების რიცხვის ზრდის ხარჯზე არ მოხდება”, - ამბობს ”აქსონის” მმართველი დირექტორი სტივ კუზინსი.

მისივე თქმით, შერეული ციკლით (როგორც ელექტროძრავით, ასევე შიდაწვის ძრავითაც) მოძრაობისას, ”აქსონის” ავტომობილი კოველ კილომეტრზე ატმოსფეროში მხოლოდ 50 გრამ CO2-ს გამოჰყოფს.

პირველი პლაგ-ინ ელექტრული ”აქსონი” ბრიტანეთის გზებზე 2011 წელს გამოჩნდება, მისი სერიული წარმოება კი ერთი წლის შემდეგ დაიწყება. წარმოებისთვის კომპანია მცირე საწარმოებს გამოიყენებს, რომლებიც ბრიტანეთის გარდა, ესპანეთში, საფრანგეთში, ირლანდიაში, დანიასა და ჰოლანდიაშიც განლაგდება.

ლოტუსი” ”ევორას” პლატფორმას სხვა კომპანიებს შესთავაზებს

Lotus Offering Evora Platform To Other Carmakers

29 ოქტომბერი

ჯერ ეს ინფორმაცია ოფიციალურად დადასტურებული არაა, მაგრამ ინტერნეტში გავრცელდა ცნობა იმის შესახებ, რომ მალე ”ლოტუსი” თავის ახალ მოდელ ”ევორას” პლატფორმას სხვა კომპანიებსაც შესთავაზებს.
ბოლო წლებია, ”ლოტუსი” თავისი მოდელების პლატფორმებს (ელიზი და ექსიჯი) სხვა კომპანიებს სთავაზობს და ეს ბიზნესი საკმაოდ წარმატებულია. ამერიკულმა კომპანია ”ტესლამ” თავისი პოპულარული ელექტრომობილი სწორედ ”ლოტუს ელიზის” პლატფორმაზე დაამზადა და ამით მოგებას ნახულობს - მზამზარეულ და თანაც, სრულყოფილ პლატფორმას იაფად იყენებს.

”ლოტუსი” ინგლისური კომპანიაა და დღეს მალაიზიურ ავტომწარმოებელ ”პროტონის” ჯგუფში შედის, რომელიც შესაძლოა, მალე გერმანულ გიგანტ ”ფოლკსვაგენს” შეუერთდეს. ამასთან, მერმის ”ლოტუსის” სახელი კვლავ დაუბრუნდება ფორმულა 1-ს.

”ევორას” პლატფორმა უნივერსალურია. ის ადვილად ექვემდებარება მოდიფიცირებას და ამიტომ, მის ბაზაზე, სხვადასხვა კლასის, მათ შორის, ჰიბრიდული და ელექტრული ავტომობილების დამზადებაა შესაძლებელი.

ცნობისათვის, 2010 სამოდელო წლის ”ლოტუს ევორა” ”ტოიოტას” წარმოების V6 ძრავითაა აღჭურვილი, რომელიც მაქსიმუმ 276 ცხენის ძალას იძლევა. ამ ავტომობილის ჩასაჯდომი ფორმულა 2+2-ია (ცოტა მოძველებული ფორმულა კია). ანუ, მასში 2 სრულფასოვანი და ორიც ფსევდო ადგილია.

ავტომობილი გრან ტურიზმოს (GT) კლასს მიეკუთვნება, თუმცა მის პლატფორმაზე (მცირე მოდიფიკაციის შემდეგ) ჩვეულებრივი სედანის და ჰეჩბეკის დამყნობაც შესაძლებელია. ”ევორას” პლატფორმას ”ლოტუსში” ”მრავალმხრივი არქიტექტურის ურიკას” (ვერსეტაილ ვიჰაიქლ არქიტექჩა) უწოდებენ. პლატფორმა მოდულებისგან შედგება, რომლებიც ცალ-ცალკე მოდიფიცირებას ექვემდებარება. ამასთან, ისინი ადვილი დასამზადებელია და მცირე რაოდენობით წარმოების შემთხვევაშიც კი, ძალიან იაფი ჯდება. პლატფორმის სიიაფეს, მისი წარმოებისას, შედარებით იაფფასიანი მასალების გამოყენებაც უწყობს ხელს.

სხვათა შორის, ეს პლატფორმა მისწრებაა იმ პატარა კომპანიებისთვის, რომლებიც ინდივიდუალური დიზაინის, მცირე რაოდენობით ავტომობილებს შეკვეთებით აწარმოებენ. ამავე მიზნით, ამერიკაში ფართოდ გამოიყენება პოპულარული ”შევროლე კორვეტის” პლატფორმა, რომლის ყიდვაც (სრულიად უხმარის), თუ გაგიმართლათ, ინტერნეტში 10 000 დოლარადაც კი შეიძლება.

Monday, October 26, 2009

მშვიდობით, ”ლენდ როვერ დეფენდერ”

Good Bye, Land Rover Defender

26 ოქტომბერი

უგზოობის ავტომობილების სამყაროს მალე მისი ერთ-ერთი პირველი და გამორჩეული წევრი გამოაკლდება - 2013 წელს ”ლენდ როვერი” თავისი პირველი მოდელის, ლეგენდარული ”დეფენდერის” წარმოებას შეაჩერებს. ინგლისური კომპანიის განმარტებით, ამის მიზეზი ისაა, რომ მსოფლიო საზოგადოებრიობა ავტომობილებს გამონაბოლქვზე სულ უფრო მკაცრ და ძნელად მისაღწევ სტანდარტებს უწესებს.

ამჟამად ”დეფენდერი” მხოლოდ ამერიკაში იყიდება და ისიც მნიშვნელოვნად მოდიფიცირებული სახით და თანაც, ძალიან ძვირი ღირს. მაგრამ ეს საქმეს ვერ შველის, რადგან წარმოების მოცულობა ოპტიმალურ ზღვარს ვერ აღწევს.

თანამედროვე სახით, ”ლენდ როვერი” ”დეფენდერს” უკვე 25 წელია, აწარმოებს. ამ დროის განმავლობაში, კომპანიამ ამ პოპულარული მოდელის რამდენიმე სპეც ვერსია გამოუშვა, თუმცა საბაზო მოდელისგან მათ მხოლოდ მინიმალური ცვლილებები ასხვავებდა.

გამოცემა ”პისტონჰედსი” წერს, რომ სახელი ”დეფენდერი” სამუდამოდ მაინც არ გაქრება ”ლენდ როვერის” საწარმოო პროგრამიდან. ძველ მოდელს ახალი შეცვლის. ჯერჯერობით უცნობია, თუ როდის დაიწყება ახალი ”დეფენდერის” წარმოება. სავარაუდოდ, ინგლისური კომპანია შემცვლელის კონცეპტუალურ ვერსიას ორი წლის განმავლობაში წარმოადგენს. რა თქმა უნდა, ამჟამად კონცეპციის შესახებ რაიმეს თქმა შეუძლებელია, თუმცა ”პისტონჰედსი” წერს, რომ ის ალბათ ”რეინჯ როვერ სპორტის”, ან LR4-ის პლატფორმაზე იქნება ბაზირებული.

ახლანდელი ”დეფენდერი” ბაზარზე 1990 წელს გამოჩნდა, როგორც პირველი სერიის ”დეფენდერის” ევოლუციური ვერსია. ეს არის ერთ-ერთი ყველაზე ნაკლებად განვითარებადი მოდელი საავტომობილო მრეწველობის ისტორიაში და ამ სურათს სხვადასხვა სპეციალური ვერსიები ვერ ცვლის.

ავტომობილი თავისი სპარტანული გარეგნობით გამოირჩევა, რითაც დანახვისთანავე გვაგრძნობინებს, რომ ის უგზოობის პირობებისთვისაა შექმნილი. ამ თვისების გამო, მას დამფასებლები ჰყავს როგორც სამხედროებში (ბრიტანეთის არმიაში), არამედ სამოქალაქო პირებშიც. მაგრამ მოსალოდნელია, რომ ახალი დეფენდერი უფრო ასფალტიანი გზებისთვის მისადაგებული იქნება.

ბოლო მოდიფიკაცია, რომელიც ”დეფენდერის” ბაზაზე ”ლენდ როვერმა” გამოუშვა, გამოცემა ”ფაია ენდ აის-ია”, რომელიც კომანიამ საზოგადოებას ივნისში შესთავაზა. ჯერჯერობით უცნობია, წარმოების შეწყვეტამდე, იგეგმება თუ არა სხვა სპეც ვერსიების წარმოება.

Friday, October 23, 2009

”სუბარუ” ჰიბრიდულ ავტომობილს გამოუშვებს

Subaru Hybrid Tourer Concept

23 ოქტომბერი

ტოკიოში გახსნილ საავტომობილო შოუზე, კორპორაცია ”ფუძი ჰევი ინდასტრიზის” (რომელშიც გაერთიანებულია სუბარუ) პრეზიდენტმა იკიო მორიმ განაცხადა, რომ სამი წლის შემდეგ ”სუბარუს” სამოდელო გამას ჰიბრიდული ავტომობილი შეემატება.

ჯერჯერობით დაზუსტებული არაა, მაგრამ ”სუბარუს” პირველი ჰიბრიდული ავტომობილი ალბათ კომპაქტური ზომისა იქნება. მისთვის ჰიბრიდული აგრეგატის მომზადებაში, მონაწილეობას ”ტოიოტა” მიიღებს, რომელსაც ”სუბარუს” აქციების 16.5-პროცენტიანი პაკეტი ეკუთვნის.
აღსანიშნავია, რომ პირველი ჰიბრიდული ავტომობილის (სუბარუ ჰიბრიდ ტურერი) კონცეპტუალური ვერსია ”სუბარუმ” პირველად ოთხი წლის წინ წარმოადგინა. ის ავტომობილი მოდელ ”ლეგასის” პლატფორმაზე აიგო და ორლიტრიანი ოპოზიტური ძრავით იყო აღჭურვილი, რომელსაც ორი ტურბოკომპრესორი ემსახურებოდა. ამ ძრავსა და ტრანსმისიას შორის კი მოთავსებული იყო 10-კილოვატიანი ელექტროძრავი, რომელიც მხოლოდ მოძრაობის დასაწყისსა და აქტიური აჩქარებისას გამოიყენებოდა.

ჰიბრიდული დანადგარის ჯამური სიმძლავრე 260 ცხენის ძალას, მაქსიმალური მაბრუნი მომენტი კი 350 ნიუტონმეტრს შეადგენდა. ამჯერად კი, ტოკიოს გამოფენაზე, ”სუბარუს” სტენდზე დიდგაბარიტიანი, ოთხადგილიანი ჰიბრიდული ჰეჩბეკი დგას, რომელსაც ეგრეთ წოდებული ”თოლიას ფრთის” ტიპის კარებები აქვს.

ამ ავტომობილის ჰიბრიდული დანადგარის მთავარი აგრეგატი 20.0-ლიტრიანი ოპოზიტური ძრავია, რომელიც ავტომობილის წინა ნაწილშია მოთავსებული. მის გარდა, ჰიბრიდულ დანადგარში ასევე ორი ელექტროძრავიც შედის. მათგან უფრო სუსტი - 10-კილოვატიანი (13.5 ცხ.ძ), ავტომობილის წინა ნაწილში მდებარეობს, უკანა, 20-კილოვატიანი (27 ცხ.ძ) კი - უკან. ტრანსმისია კი უსაფეხურო ვარიატორია.

”სუბარუ” ჯერჯერობით არ აზუსტებს, აპირებს თუ არა ამ კონცეპტუაური ავტომობილის ბაზაზე სერიული მოდელის წარმოებას.

”ჰონდა” ეკოლოგიურად სუფთა სუპერ ავტომობილს გამოუშვებს

Honda would consider 'green' sports car

23 ოქტომბერი

ეკონომიკური კრიზისის მიუხედავად, იაპონური ”ჰონდა” მაინც განიხილავს სპორტული ავტომობილის გამოშვების პერსპექტივას. ოღონდ, კომპანიის მთავარ აღმასრულებელ ტაკანობუ იტოს განცხადებით, ეს იქნება გარემოსადმი მეგობრული ავტომობილი და მისი შემუშავება მაშინვე დაიწყება, როგორც კი მწარმოებელი ამისათვის აუცილებელ ფულად სახსრებს გამოძებნის.

”ჩვენ გვჭირდება ავტომობილი, რომელშიც ჩვენი კომპანიის ყველა ტექნოლოგიურ სიახლეს და მიღწევას გამოვიყენებთ. მის გამოშვებაზე ზრუნვას კი მაშინ დავიწყებთ, როდესაც ამისათვის საჭირო ფულად სახსრებს გამოვძებნით. ეს ავტომობილი, ჩვენი ტექნოლოგიური პროგრესის სიმბოლო უნდა გახდეს”, - ტოკიოს საავტომობილო შოუს გახსნისას განაცხადა იტომ.

ცნობისათვის, ”ტოიოტა” მალე დაიწყებს უახლესი სუპერ ავტომობილის - ”ლექსუს LFA-ს” წარმოებას. ამ ავტომობილის კაპოტქვეშ მოთავსებულია 4.8-ლიტრიანი V10 ძრავი, რომლის მეშვეობითაც, მისი მაქსიმალური სიჩქარე 325 კმ/სთ-ს აღწევს. ამ ავტომობილს მხოლოდ 500 ცალს დაამზადებენ და თითოეული მათგანი 375 000 დოლარად გაიყიდება.

ამ კლასის ავტომობილს, სახელად NSX, ”ჰონდა” 1990-იან წლებში აწარმოებდა და ის მეტად პოპულარული იყო ჩრდილოეთ ამერიკის ბაზარზე. დღეს ეს ნიშა ”ჰონდას” აუთვისებელი აქვს. სხვათა შორის, NSX-ის შემუშავებას სწორედ იტო ხელმძღვანელობდა და ახლა, როცა მთელი კომპანიის სათავეში იმყოფება, ის ცარიელი ნიშის შევსებას აპირებს.

ასეთი ავტომობილის შემუშავების გადაწყვეტილება ”ჰონდამ” კრიზისამდე მიიღო (აკურას მარკით - სურათზე), მაგრამ ფინანსური პრობლემების გამო, პროექტი დროებით შეჩერდა. ახლა კი ამ პროექტს ძირეული გადაკეთება ელის, რადგან გადაწყდა, რომ ავტომობილი ეკოლოგიურად სუფთა უნდა იყოს და იმავდროულად, ისეთივე დინამიკური შესაძლებლობები ჰქონდეს, როგორიც შიდაწვისძრავიან სუპერ ავტომობილებს აქვთ.

”მაზდას” ახალი ძრავები

Mazda

23 ოქტომბერი

ტოკიოს საავტომობილო შოუზე ”მაზდას” რამდენიმე ახალი ტექნოლოგია აქვს გამოფენილი, ბენზინზე მომუშავე ძრავი SKY-G საწვავის პირდაპირი შეფრქვევით, SKY-D დიზელის ”სუფთა” აგრეგატი და მაღალეფექტური ტრანსმისია SKY-დრაივ. ამათ გარდა, იაპონური კომპანიის სტენდზე ასევე გამოფენილია კომპაქტური კონცეპტუალური მოდელი ”კიორა”, რომელიც უახლესი ტექნოლოგიების გამოყენებით, 100 კილომეტრის გასავლელად სულ რაღაც 3.1 ლიტრ საწვავს მოიხმარს.

”მაზდას” განცხადებით, ბენზინის ახალი ძრავი SKY-G, ამავე კომპანიის 2.0-ლიტრიან აგრეგატთან შედარებით, თითქმის 15 პროცენტით ეკონომიურია. იაპონური კომპანიის განმარტებით, ასეთი ეკონომიურობა მიღწეულია იმით, რომ ძრავი საწვავის ახალი თაობის ფრქვევანებით და უზუსტესი გაზგამანაწილებელი სისტემითაა აღჭურვილი, რომელსაც ცვალებადი, კომპიუტერის მიერ რეგულირებადი, შეშვება-გამოშვების ფაზები აქვს. ასეთი ძრავის წყალობით, ამიერიდან ”მაზდა3” ისეთივე ეკონომიური გახდება, როგორიც მასზე პატარა ”მაზდა2-ია”.

დაახლოებით, იმავე ეფექტურობით გამოირჩევა დიზელის აგრეგატი SKY-D (არც ბენზინის და არც დიზელის ძრავების ლიტრაჟი არ გამოქვეყნებულა), რომელიც ”მაზდასივე” 2.2-ლიტრიან აგრეგატზე თითქმის 20 პროცენტით ეკონომიურია. SKY-D-ს მეშვეობით, ”მაზდა6-ს” ისეთივე მცირე აპეტიტი აქვს, როგორიც ”მაზდა2-ს”.

საწვავის ეკონომიურად ხარჯვაზეა მოწოდებული ტრანსმისია SKY-დრაივიც. მისი მეშვეობით, ავტომობილის ეკონომიურობა 5 პროცენტით უმჯობესდება. ”მაზდას” განცხადებით, ტრანსმისიის ეკონომიურობა მისმა სრულიად ახალმა, რაციონალურმა კონსტრუქციამ განაპირობა, რომლის წყალობითაც, მნიშვნელოვნადაა შემცირებული დეტალებს შორის ხახუნი. გადაბმის ქურიში კი, ფრიქციულ ელემენტებს შორის უქმე მოსრიალება მინიმიზებულია. ”მაზდა” ირწმუნება, რომ ეს ქურო ისევე ეფექტურია, როგორც ორდისკოიანი ქუროები.

Thursday, October 22, 2009

”ფიატი” ”ბერტონეს” ქარხანას აამუშავებს

Fiat Bertone

22 ოქტომბერი

”ფიატი” მის მიერ შეძენილი ატელიე ”ბერტონეს” კუთვნილი ტურინული ქარხნის ამოქმედებას გეგმავს. ამ ეტაპზე ცნობილია, რომ ეს ქარხანა, ”კრაისლერის” ორ მოდელს გამოუშვებს. თუმცა, იტალიური კომპანია ჯერ არ აზუსტებს ამ მოდელების სახელებს.

ის, რომ ”ბერტონეს” ქარხანა ”კრაისლერის” ორ მოდელს გამოუშვებს, პირველად ერთი თვის ”ფიატის” მთავარმა აღმასრულებელმა სერჯო მარკიონემ განაცხადა. თუმცა, მანვე ამ მოდელების დაკონკრეტებისგან თავი შეიკავა. მას არც ის დაუზუსტებია, თუ როდის დაიწყება მათი წარმოება.

გამოცემა ”აუტომოტივ ნიუს იუროპმა” მოიპოვა კონფიდენციალური ინფორმაცია იმის შესახებ, რომ ”ბერტონეს” ქარხანა, რომელიც ტურინის გარეუბან გრულიასკოში მდებარეობს, 2011 წლიდან ამოქმედდება. პირველი ავტომობილი, რომლის წარმოებაც იქ დაიწყება, ”კრაისლერ 300C-ს” (სურათზე) ევროპული ვერსია იქნება. ამ ავტომობილის ამერიკული დებიუტი იმავე წელს იგეგმება.

აქამდე 300C-ს ევროპულ ვერსიას, ”კრაისლერის” დაკვეთით, კანადურ-ავსტრიული ”მაგნა შტეირის” გრაცის (ავსტრია) ქარხანა უშვებს. იგივე ქარხანა ასევე ”კრაისლერის” ჯგუფში შემავალი ”ჯიპის” უგზოობის პოპულარულ მოდელ ”გრანდ ჩეროკისაც” აწარმოებს (ევროპისთვის). გრაცის ქარხანას ამ ავტომობილების წარმოებაზე კონტრაქტი მერმის უმთავრდება.

იტალიურ საავტომობილო პრესაში ასევე გამოითქვა ვარაუდი იმის შესახებ, რომ ”ფიატი” მოდელ 300C-ს პლატფორმას თავის ჯგუფში შემავალი იტალიური კომპანია ”ლანჩას” ფლაგმან ”თეზისის” ახალი ვერსიის საწარმოებლად გამოიყენებს. ცუდი გაყიდვების გამო, ამ ავტომობილის წარმოება წელს შეწყდა.

მეორე მოდელი, რომელსაც ”ბერტონეს” ქარხანა გამოუშვებს, ”ჯიპ გრანდ ჩეროკია”, რომელსაც დაშლილი სახით ჩაიტანენ იტალიაში და გრულიასკოში ააწყობენ.

Tuesday, October 20, 2009

”ვერმოტმა” როდსტერ ”ვერიტას RS III-ის” წარმოება დაიწყო

Veritas RS III Roadster

20 ოქტომბერი

პატარა გერმანულმა კომპანია ”ვერმოტმა” გამოაცხადა, რომ იწყებს სპორტულ ავტომობილ ”ვერიტას RS III-ის” წარმოებას, რომელიც მხოლოდ 30 ცალი დამზადდება. თითო ავტომობილს 15 ადამიანი აწყობს და ისინი საქმეს დაახლოებით 8 კვირას უნდებიან.

ავტომობილს საკმაოდ უცნაური ჩასაჯდომი ფორმულა აქვს - 1+1, ანუ ერთი ადგილი მძღოლისთვის და ერთიც, მგზავრისთვის. ოღონდ, თუ ეს მეორე ადგილი თავისუფალია, ის ძარის დამატებითი ელემენტით იფარება ისე, რომ გკუვი ზედაპირი შექმნას და ჰაერის ნაკადის შეშფოტებას არ შეუწყოს ხელი. აეროდინამიკის გასაუმჯობესებლად გაღებული ხარკია ასევე ისიც, რომ ავტომობილს საქარე მინა არ აქვს.

მწარმოებელი ირწმუნება, რომ ”ვერიტას RS III” შესანიშნავი დინამიკური თვისებებით გამოირჩევა. ”მექანიკური, თუ ავტომატური ტრანსმისიით, სარბოლი, თუ საგზაო ვერსია, დამხმარე სისტემების გარეშე, თუ ბლოკირების საწინააღმდეგო სისტემით - ”ვერიტას RS III” ისეთსავე სიამოვნებას მოგანიჭებთ, როგორსაც სარბოლი ავტომობილი”, - ნათქვამია ”ვერმოტის” რელიზში.

”ვერიტას RS III-ის” მზიდი ელემენტი ფოლადის მილებისგან შეკრული სივრცული ჩარჩოსა და კარბონის კომპოზიტის კომბინაციას (ეგრეთ წოდებული მონოკოკური სისტემა) წარმოადგენს და დიდი სიხისტით გამოირჩევა. მონოკოკის უკანა ტორსზე ხისტადაა დამაგრებული (როგორც სარბოლ ავტომობილებში) ”ბეემვეს” წარმოების 5.0-ლიტრიანი V10 აგრეგატი, რომელიც 507 ცხენის ძალას (7 750 ბრ/წთ-ზე) და 520 ნიუტონმეტრს (6 100 ბრ/წთ-ზე) გამოიმუშავებს. მისი მეშვეობით, 1 080-კილოგრამიანი ”ვერიტას RS III” მაქსიმუმ 347 კმ/სთ-ს ავითარებს, ადგილიდან 100 კმ/სთ-ის ასაკრეფად კი 3.2 წამი სჭირდება.

სტანდარტულ კომპლექტაციაში, ძრავს 7-საფეხურიანი ავტომატური კოლოფი უწყვილდება, მყიდველის სურვილის შემთხვევაში კი შესაძლებელია ამ კოლოფის 6-საფეხურიანით შეცვლა. ავტომობილი ასევე აღჭურვილია კომპანია ”ოლინსის” წარმოების საკიდარით, ”რეკაროს” სპორტული ყაიდის სავარძლებით და ”დანლოპის” წარმოების საბურავებით, რომელთა ზომებია: 325/25 უკან და 255/30 წინ.

დაბოლოს, ”ვერმოტი” ირწმუნება, რომ ”ვერიტას RS III-ზე” 8 შეკვეთა უკვე მიღებული აქვს. მყიდველები მონაკოდან, ბრიტანეთიდან და ავსტრალიიდან არიან. უკვე დაწყებულია სამი ავტომობილის აწყობა. თითოეულის საბაზო ღირებულება 345 000 ევროა.

Sunday, October 18, 2009

უფრო მეტი, ვიდრე უბრალოდ ელექტრომობილი

Audi R4

18 ოქტომბერი

”აუდის” კონცეპტუალურმა ელექტრომობილმა e-ტრონმა ფრანკფურტის საავტომობილო გამოფენაზე სპეციალისტების და დამთვალიერებელთა დიდი ინტერესი გამოიწვია, რის პასუხადაც, შოუს დასრულებისთანავე, გერმანულმა კომპანიამ გამოაცხადა, რომ ამ რლრქტრომობილის სერიულ წარმოებას აპირებს.

გავიდა კიდევ ორი კვირა და ინტერნეტით გავრცელდა ინფორმაცია, რომ იმავე კონცეპტუალური მოდელის ბაზაზე, ინგოლშტადტელები კომპაქტურ კუპესა და როდსტერსაც გამოუშვებენ, რომელიც მათს სამოდელო გამაში, TT-სა და R8-ს შორის დაიკავებს ადგილს, მისი სახელი კი R4 იქნება.

ახალი ავტომობილის შესახებ, ჯერჯერობით ცნობილია მხოლოდ ის, რომ მისთვის ახალი პლატფორმა შეიქმნება, რომელსაც ასევე ”პორშე” თავისი მომდევნო თაობის ”ბოქსსტერისა” და ”კაიმანისთვისაც” გამოიყენებს. R4 იქნება როგორც ელექტრომობილი, ასევე ის შიდაწვის ძრავითაც აღიჭურვება. საერთოდ, ”აუდის” გეგმა ითვალისწინებს, რომ მომავალში, მისი ყველა ავტომობილის ბაზაზე ელექტრომობილებიც დამზადდება.

ელექტრული R4 ოთხი ელექტროძრავით აღიჭურვება - თითო ძრავი თითო ბორბალს მოემსახურება. მათი ჯამური სიმძლავრე 300 ცხენის ძალას მიაღწევს. ისინი ენერგიას ლითიუმ-იონური აკუმულატორებისგან მიიღებენ, რომლებიც ავტომობილის ცენტრალურ სეგმენტში განთავსდება. აკუმულატორების ბლოკის წონა 470 კილოგრამს მიაღწევს, ავტომობილისა კი - 1.5 ტონას.

ელექტრული R4-ის ნულიდან 100 კმ/სთ-მდე აჩქარებას დაახლოებით 4.8 წამი დასჭირდება, მისი მაქსიმალური სიჩქარე კი 220 კმ/სთ-ით შეიზღუდება. დაკიდევ, სრულად დამუხტული აკუმულატორების მეშვეობით, ავტომობილი 240 კილომეტრის გავლას შესძლებს.

R4-ის შიდაწვისძრავანი ვარიანტები იმავე აგრეგატებს მიიღებს, რომლებსაც ინგოლშტადტელები ”აუდი TT-ზე” იყენებენ. მათ შორისაა 2.5-ლიტრიანი, ხუთცილინდრიანი მოტორი, რომელიც 340 ცხენის ძალას გამოიმუშავებს და მოდიფიკაცია RS-ზე გამოიყენება.

Saturday, October 17, 2009

”ნისანის” ”მიწაზე მონარნარე” ტოკიოში დებიუტისთვის ემზადება

Nissan Prepares Land Glider Concept for Tokyo

16 ოქტომბერი

რამდენიმე დღის წინ, ”ბეემვეს” უჩვეულო კონცეპტუალური ავტომობილი ”სიმპლ-ი” გაგაცანით, რომელიც რეალურად, მოტოციკლისა და ავტომობილის ერთგვარ სინთეზს წარმოადგეს. იმ ავტომობილს ბავარიული კომპანიის სამუზეუმო ექსპონატობა უწერია.
მსგავს კონცეპტუალურ ავტომობილს, იაპონური ”ნისანი” მალე ტოკიოს ავტო შოუზე წარმოადგენს. ავტომობილს, ეფრო საწორედ ელექტრომობილს, ”ლენდ გლაიდერი” (მიწაზე მონარნარე, მოლივლივე) უწოდეს. ”სიმპლ-ის” მსგავსად, ისიც მოხვევისას გვერდზე იხრება, მასში კი მძღოლი და მგზავრი ეგრეთ წოდებული ტანდემური განლაგებით სხდებიან. ესე იგი, მგზავრის სავარძელი მძღოლის სავარძლის უკანაა მოთავსებული.
”ლენდ გლაიდერს” მოსახვევში 17 გრადუსით დახრა შეუძლია და თუ კომპანიის ოფიციალურ პრეს რელიზს დავუჯერებთ (რატომ არ უნდა დავუჯეროთ), დახრის სისტემის მეშვეობით, ელექტრომობილს მკვეთრი მოსახვევების მაღალი სიჩქარით გავლაც კი შეუძლია.
რაღაცით ”ლენდ გლაიდერი” თვითმფრინავსაც, უფრო სწორედ, სამხედრო თვითმფრინავის იმ სეგმენტს ჰგავს, სადაც პილოტის კაბინა მდებარეობს - ელექტრომობილის სალონი თვითმფრინავის სანთელს ჰგავს. სავარძლების ტანდემური განლაგებაც სამხედრო თვითმფრინავთან მსგავსების მანიშნებელია. დაბოლოს, საჭე - საჭის რგოლის ნაცვლად, ”მონარნარე” შტურვალით იმართება.

ამ შტურვალით მძღოლი მოხვევის მიმართულებას და სიმკვეთრეს არეგულირებს, ავტომობილის დახრის კუთხეს კი ელექტრონიკა განსაზღვრავს. მრავალი გადამწოდისგან მიღებულ ინფორმაციას კომპიუტერი გადაამუშავებს, რომელიც ელექტრომობილის მოძრაობის სიჩქარეს, საჭის მოხვევის კუთხეს, ვერტიკალური ღერძის მიმართ მოძრაობის კუთხურ სიჩქარეს ითვალისწინებს და ამ მონაცემების მიხედვით, დახრის ყველაზე ოპტიმალურ კუთხეს თავად არჩევს.

დაბოლოს, ”ლენდ გლაიდერი” ორი ელექტროძრავითაა აღჭურვილი (ავტომობილის უკანაა განლაგებული), რომლებსაც ენერგიით ლითიუმ-იონური აკუმულატორების ბლოკი ამარაგებს. თავის მხრივ, ამათი დამუხტვა უკონტაქტო მოწყობილობით ხდება.

”ნისანი” აღიარებს, რომ ”ლენდ გლაიდერის” სერიული წარმოება არ იგეგმება. სამაგიეროდ, მასში გამოყნებული ტექნოლოგიებიდან ზოგიერთი მალე მასობრივ წარმოებაში დაინერგება.

Friday, October 16, 2009

კონცეპტუალური ”მაკლარენ LM5” - F1-ის შთამომავალი

McLaren LM5 Concept

16 ოქტომბერი

”მაკლარენის” უახლეს სუპერ ავტომობილ MP4-12C-ს საავტომობილო სამყარო განსხვავებული განწყობით შეხვდა. ზოგი უოკინგელებისგან უკეთეს დიზაინს ელოდა, ზოგისთვის ამ ავტომობილის გარეგნობა დამაკმაყოფილებელია. ზოგი კი თვლის, რომ ის შესანიშნავი დიზაინით გამოირჩევა. მხოლოდ დრო გვიჩვენებს, დაბერების პარალელურად, შეინარჩუნებს თუ არა MP4-12C-ს დიზაინი დღევანდელ ელეგანტურობას.

მანამდე კი ინგლისური კომპანია ერთ მოდელზე შეჩერებას არ აპირებს და თავის მომავალ კლიენტს კიდევ ორ ახალ ავტომობილს უმზადებს. რამდენად კარგი დიზაინი ექნებათ მათ, ძნელი სათქმელია. კომპანიის მთავარი დიზაინერი ფრენკ სტივენსონი გვარწმუნებს, რომ დროს MP4-12C-ც გაუძლებს და მომდევნო ორი ავტომობილიც.

სანამ ეს ორი ბაზარზე გამოჩნდებოდეს, მათ შესაძლო გარეგნობაზე ბევრი დიზაინერი მუშაობს, რომლებიც საინტერესო პროექტებს ამუშავებენ. ერთ-ერთი მათგანია ქოვენთრის უნივერსიტეტის სატრანსპორტო დიზაინის ფაკულტეტის კურსდამთავრებული მეტ უილიამსი, რომელმაც გამოსაშვებ პროექტად სწორედ ”მაკლარენის” სახელის მატარებელი კონცეპტუალური შუაძრავიანი LM5 შექმნა.

პროექტის ავტორის თქმით, მან შთაგონება ლეგენდარული ”მაკლარენ F1-გან” მიიღო, რომელიც ახლაც კი პოპულარულია სუპერავტომობილების ფანებს შორის. შესაბამისად, LM5 რანგით MP4-12C-ზე მაღლა დგას და ისევე როგორც მისი წინაპარი, ისიც ”ბეემვეს” წარმოების V10 აგრეგატით უნდა აღიჭურვოს (რა თქმა უნდა, რეალობაში ეს გამორიცხულია, რადგან ”მაკლარენს” პარტნიორული ურთიერთობა ”მერსედეს-ბენცთან” აკავშირებს).

”მაკლარენ F1-გან” მიღებული შთაგონება პირველ რიგში, იმაში გამოიხატება, რომ LM5-იც სამადგილიანი მანქანაა, რომელშიც მძღოლს ცენტრალური ადგილი უკავია, ორი მგზავრი იქ მის ორივე მხარეს, ოდნავ უკან თავსდება. უპირველესად, ასეთი შეთანწყობა ავტომობილის წონის იდეალურად განაწილებას უწყობს ხელს.

LM5 აგრესიული, გარსშემოდენილი ფორმით გამოირჩევა და ფორთოხლისფრადაა შეღებილი, როგორც წმინდა სისხლის ”მაკლარენს” შეეფერება.

რა თქმა უნდა, ”მაკლარენი” ვიღაც გუშინდელი სტუდენტის გამოსაშვები პროექტის მიხედვით ავტომობილს არ დაამზადებს, თუმცა გამორიცხული არაა, რომ მეტ უილიამსმა თავისი ნამუშევრით ინგლისური კომპანიის ხელმძღვანელთა ყურადღება მიიქციოს და სახელვან კომპანიაში მუშაობა დაიწყოს. არც ისაა გამორიცხული, რომ რომელიმე პატარა კომპანიამ მისი პროიექტის მიხედვით ავტომობილების მცირესერიული წარმოება დაიწყოს...

Thursday, October 15, 2009

”სუზუშო საპპეის- V” ტოკიოში დებიუტისთვის ემზადება

Suzusho Supasse-V

15 ოქტომბერი

მთელს მსოფლიოში უამრავი პატარა ფირმაა, რომლებიც ”ლოტუსის” ლეგენდარულ მოდელ ”სევენის” რეპლიკებს აწარმოებენ. ასეთთა შორის არის იაპონური ”სუზუშოც”, რომელიც ადგილობრივი ბაზრისთვის სწორედ ”შვიდის” მიხედვით შექმნილ მოდელ ”საპპეის-C” კიტ-კომპლექტებს აწარმოებს.
პატარა ფირმისთვის კიტ-ქარების ბიზნესი საკმაოდ მომგებიანია. იმდენად, რომ მისმა ხელმძღვანელობამ ახალი მოდელის წარმოების ათვისება გადაწყვიტა. ”სუზუშომ” უკვე მოამზადა კიდეც ასეთი მოდელის (მისი სახელია საპპეის-V) პროტოტიპი, რომელსაც პირველად საზოგადოებას ტოკიოს საავტომობილო შოუზე უჩვენებს.
ავტომობილი კომპაქტურია, ორადგილიანი, მასში ძრავი კი ბაზაშია მოთავსებული და ამ შეთანწყობით, ის შეიძლება ”ფერარის” და ”ლამბორგინის” გვერდითაც კი მოვიხსენიოთ. თუმცა ”საპპეის-V-ს” სუპერ ავტომობილობამდე ბევრი უკლია და გაბარიტებითაც უფრო ახლოს ”ლოტუს ელისთანაა”, რომელიც სუპერ ავტომობილი არაა, მაგრამ ტემპერამენტით და მანევრულობით, ამ ელიტური კასტის ბევრ მონსტრს მისცემს ფორას.
”სუზუშის” ინჟინრებმა ძრავი ”მაზდასგან” აიღეს. ესაა ოთხცილინდრიანი 2.3-ლიტრიანი ტურბოძრავი, რომელიც 272 ცხენის ძალას გამოიმუშავებს.

ავტომობილი მხოლოდ 850 კილოგრამს იწონის, რაც იმას ნიშნავს, რომ მის ყოველ ცხენის ძალას მხოლოდ 3.1 კილოგრამი აქვს სათრევი, რაც თითქმის სუპერ ავტომობილების შესაფერისი მონაცემია. მართალია, მწარმოებელი თავისი შედევრის დინამიკურ მონაცემებს ჯერ არ ავრცელებს, მაგრამ ჭონისა და სიმძლავრის ფარდბის მიხედვით, ადვილად შეიძლება ვივარაუდოთ, რომ ამ მხრივ, ”საპპეის-V” ევროპული მონსტრების დონეზე იქნება (მაქსიმალური სიჩქარის გაუთვალისწინებლად).

სავარაუდოდ, ”საპპეის-V” იაპონურ ბაზარზე მერმის გამოჩნდება. არც ისაა გამორიცხული, რომ ”სუზუშომ” ეს ავტომობილი უცხოურ ბაზრებზეც გაიტანოს.

”ოპელ ინსინია” ამერიკაში ”ბიუიკ რეგალის” სახელით გაიყიდება

Buick Regal

15 ოქტომბერი

”ჯენერალ მოტორსმა” ოფიციალურად გამოაცხადა, რომ მის ახალ, საშუალო ზომის სპორტულ სედანს ”რეგალი” ერქმევა. მართალია, ამერიკულ კომპანიას არც ამ ავტომობილის ფოტოები და ტექნიკური სპეციფიკაციები გამოუქვეყნებია, მაგრამ სარწმუნო ვარაუდით, ამერიკული ”რეგალი” ჩინეთის ბაზარზე პოპულარული ”ბიუიკ რეგალის” იდენტური იქნება.

თავის მხრივ, ”ბიუიკ რეგალი” ევროპაში პოპულარული ”ოპელ ინსინიას” ანალოგია. მათ შორის ძალიან მცირე ვიზუალური განსხვავებაა, ტექნიკურად კი ისინი აბსოლუტურად იდენტურია. ”ბიუიკ GMC-ს” მთავარ მენეჯერ სიუზენ დოჩერტის თქმით, ”ბიუიკის” ტრანსფორმაცია მაშინ დაიწყო, როდესაც ბაზარზე ლუქსის კლასის ქროსოვერი ”ბიუიკ ენკლავი” გამოვიდა. ამას მოჰყვა პრემიუმ სედანი ”ლაქროსი”, რომელიც ასევე ”ოპელ ინსინიას” პლატფორმაზეა აგებული. ახლა კი ამ დუეტს ”რეგალიც” შეუერთდება.

მართალია, უკვე ექვსი წელია, რაც სახელ ”რეგალით” ავტომობილები არ იყიდება, მაგრამ ეს სახელი ახლაც პოპულარულია და მისი გამოყენება, მარკეტინგულად გამართლებული იქნება.

სხვათა შორის, სანამ ”ოპელს” გაჰყიდდა, ”ჯენერალ მოტორსი” ამერიკაში ”ინსინიას” გაყიდვას ”სატურნის” სახელით აპირებდა. მაგრამ მართვადი გაკოტრების რეჟიმში გადასვლის შემდეგ, ”სატურნის” გაყიდვა, ან გაუქმება გადაწყდა. მას შემდეგ კი, რაც ”პენსკე აუტომოტივმა” ”სატურნის” შეძენაზე უარი განაცხადა, ”გენერლებმა” ეს მარკა მოკლეს და მის ნაცვლად, ამერიკაში გასაყიდ ”ინსინიას” სახელად ”რეგალი” შეურჩიეს.

ჯერჯერობით, ”ჯენერალ მოტორსი” არ აზუსტებს, თუ როდის დაიწყებს ამერიკაში ”რეგალის” გაყიდვებს. სავარაუდოდ, ეს მერმის, წლის მიწურულს მოხდება.

”სიტროენი” რალისთვის ახალ მანქანას ქმნის

Citroen Readying DS3 R3 Rally Car

15 ოქტომბერი

ფრანგულმა კომპანია ”სიტროენმა”, თავის უახლეს ჰეჩბეკ DS3-ის ბაზაზე შექმნილი სპორტული ავტომობილის გამოცდა დაიწყო, რომლითაც მისი საქარხნო გუნდი რალის სხვადასხვა ჩემპიონატებში გამოვა.

დაგეგმილია, რომ თავიდან, რალისთვის განკუთვნილი ავტომობილი ჯგუფ R3-ის, ან ჯგუფ R3T-ის მოთხოვნების შესაბამისად შეიქმნება. ამ ჯგუფებში დაიშვება ავტომობილები, რომლებსაც მხოლოდ ერთი წამყვანი ღერძი და 1.6-ლიტრიანი ტურბოძრავი აქვთ. ამ ჯგუფებში ამჟამად ”ფორდ ფიესტა” და ”რენო კლიო” დომინირებენ.

მოგვიანებით, კერძოდ კი 2011 წელს, ახალი ჰეჩბეკის ბაზაზე, კლას ”სუპერ 1600 პლუსის” მოთხოვნების შესაბამისი ავტომობილი მომზადდება. სავარაუდოდ, სწორედ 2011 წლიდან, მსოფლიო ჩემპიონატში მხოლოდ კლას ”სუპერ 1600 პლუსის” მანქანებით ასპარეზობა იქნება შესაძლებელი.

ამ კლასის ავტომობილებს უნიფიცირებული სრულამძრავიანი ტრანსმისია ექნება, რომელსაც ძრავთან სეკვენტალური გადაცემათა კოლოფი დააკავშირებს. ტრანსმისიაში სამი მექანიკური დიფერენციალის გამოყენება იქნება შესაძლებელი. ახლა მოქმედ კლას ”სუპერ 2000-გან” განსხვავებით, ”სუპერ 1600 პლუსის” რეგლამენტი, 1.6-ლიტრიანი ტურბოძრავის გამოყენების უფლებას იძლევა.

Tuesday, October 13, 2009

”აუდი” A1-ის ბაზაზე კაბრიოლეტს და ქროსოვერსაც გამოუშვებს
Audi A1
13 ოქტომბერი

ინგლისურ გამოცემა ”ქარ-ის” ცნობით, გერმანული კომპანია ”აუდი” თავისი ჯერაც არგამოსული კომპაქტური A1-ის ბაზაზე სხვადასხვა ტიპის ძარიანი ავტომობილების წარმოებას გეგმავს. კერძოდ, ინგოლშტადტელები მათთვის სრულიად ახალი ავტომობილის სამოდელო გამას თანდათანობით უნივერსალით, კაბრიოლეტით და ქროსოვერითაც კი შეავსებენ.
მოდელი A1 ”ბეემვეს” პოპულარულ ინგლისურ მარკა ”მინის” კონკურენტად მოიაზრება. ახალი ავტომობილი პირველად მერმის, წლის მეორე ნახევარში, სავარაუდოდ, პარიზის საავტომობილო შოუზე, სამკარიანი ჰეჩბეკის სახით გამოჩნდება.
”ჩვენ A1-ს პირველ რიგში, სამკარიან ჰეჩბეკად გამოვუშვებთ, რომელსაც მყიდველს ძრავების ფართო არჩევანით შევთავაზებთ . რა იქნება შემდგომ? რაც A3-ის შემთხვევაში იყო. დაახლოებით იგივე გზას A1-იც გაივლის”, - ჟურნალთან საუბარისას აცხადებს გერმანული კომპანიის მარკეტინგისა და გაყიდვების შეფი პეტერ შვარცენბაერი, რომლის ვარაუდითაც, ახალი ავტომობილის საორიენტაციო საბაზო ღირებულება 15 000 ევრო იქნება.
ცნობისათვის, A1-ის კონკურენტი ”მინის” გამა დღეისათვის მოიცავს სამკარიან ჰეჩბეკს და უნივერსალ ”კლუბმენს”. მალე კი ამ მცირე ოჯახს კომპაქტური ქროსოვერი, კუპე და როდსტერი შეავსებს.
”ბეემვეს” უჩვეულო, სამბორბლიანი კონცეპცია
BMW’s Three-Wheeler Simple Concept
13 ოქტომბერიდაარქვით ამას დამთხვევა, ან რაც გენებოთ, მაგრამ ფაქტია, რომ ბოლო კვირის განმავლობაში, სხვადასხვა ავტომწარმოებლებმა საზოგადოებას უჩვენა კონცეპტუალური ავტომობილი, რომელსაც ბევრი საერთო აქვს მოტოციკლებთან.პირველი ამგვარი კონცეპცია ”ნისანმა” წარმოადგინა ოთხბორბლიანი ”ლენდ გლაიდერ პროტოტაიპის” სახით, რომელსაც მოგვიანებით, ტოკიოს საავტომობილო შოუზეც წარადგენს. დღეს კი მსგავსი ქმნილება ”ბეემვემაც” გვიჩვენა. მისი შედევრის სახელი ერთი შეხედვით, მარტივია და ასეც ჰქვია - ”სიმპლ”, მაგრამ რეალურად, ეს აბრევიატურაა შემდეგისა: SIMPLE - სასტეინეიბლ ენდ ინოვეიტივ მობაილიტი პროდაქტ ფორ ლოუ ენერჯი კონსამპშნ, ანუ გადაადგილების გაწონასწორებული და ინოვაციური საშუალება, ენერგიის მცირე მოხმარებით.ბავარიული კომპანიის ინჟინრებმა ეს უცნაური კონცეპტუალური მოძრავი საშუალება ჯერ კიდევ 2005 წელს შექმნეს, მაგრამ ადრე არსად და არავისთვის უჩვენებიათ. მალე კი ”სიმპლი” ”ბეემვეს” მიუნხენურ მუზეუმში დაიდებს ბინას.
”სიმპლი” სამბორბლიანი და ორადგილიანი ავტომოტოციკლია, რომლის სიგანეც სულ რაღაც 1.10 მეტრს, წონა კი 450 კილოგრამს აღწევს. სალონში სავარძლები ერთმანეთის უკანაა განთავსებული, როგორც ”ფოლკსვაგენის” ულტრაეკონომიურ L1-ზე, რომელიც ვოლფსბურგულმა გიგანტმა ფრანკფურტის საავტომობილო შოუზე წარადგინა. მცირე ზომის მიუხედავად, ბავარიელები ირწმუნებიან, რომ ”სიმპლში” ისევე თავისუფლად მოთავსდებით, როგორც მე-5 სერიის ”ბეემვეში”. სამაგიეროდ, ავტომობილის აეროდინამიკური წინააღმდეგობის კოეფიციენტი სულ რაღაც 0.18-ია!მართალია, ”სიმპლ-ი” სამ ბორბალზე დგას, მაგრამ გარედან ის ავტომობილის მსგავსი ძარითაა დაფარული, რომელიც მასში მსხდომთ არამარტო ავარიებისას, არამედ წვიმისა და ქარისგანაც დაიცავს. იმავდროულად, ის ისევე იმართება, როგორც მოტოციკლი. საჭეც კი მოტოციკლის მსგავსი აქვს, მძღოლს კი მოსახვევებში, მდგრადობის შესანარჩუნებლად, მოხვევის მხარეს წაწოლა უწევს.
”სიმპლის” მოძრაობას ჰიბრიდული სისტემა უზრუნველყოფს, რომელშიც ბენზინის 48-ცხენისძალიანი ძრავი და ელექტროძრავი შედის, რომელთა მეშვეობითაც, ავტომობილი 100 კმ/სთ-მდე აჩქარებას დაახლოებით 10 წამს უნდება, მისი მაქსიმალური სიჩქარე კი 200 კმ/სთ-ს აღწევს.
”სიმპლის” საწვავის საშუალო ხარჯი 100 კილომეტრზე სულ რაღაც 2 ლიტრია, ყოველი კილომეტრის გავლისას კი ის ატმოსფეროში 50 მილიგრამ CO2-ს გამოჰყოფს.
მაგრამ ”სიმპლში” ყველაზე საინტერესო სტაბილიზაციის ჰიდრავლიკური სისტემაა, რომელიც მას წაქცევის საშუალებას არ აძლევს. ეს სისტემა მხოლოდ მაშინ ამოქმედდება, როდესაც მაგალითად, ავტომობილი ძალიან დაბალი სიჩქარით მოძრაობს და ამ დროს, არასტაბილური ხდება და მძღოლს მუდმივად მის დაბალანსებაზე უწევს გარჯა...

”კრაისლერი” და ”ლანჩა” ერთმანეთს პლატფორმებს გაუზიარებენ

Chrysler & Lancia To Share Products

13 ოქტომბერი

ბოლო წლებში, იტალიური ავტომწარმოებელი ”ლანჩა”, რომელიც ”ფიატის” იმპრიასაა შეფარებული, პრობლემებს განიცდის. მართალია, ტურინელები თავიანთი ბიზნესის გამოცოცხლებას ცდილობენ, მაგრამ ამ მიმართულებით რეალური ნაბიჯები ჯერ არ გადადგმულა. თუმცა, ”ფიატისა” და ”კრაისლერის” ერთ ალიანსში გაერთიანების შემდეგ, ახალი პერსპექტივები გამოისახა, რომელიც პირველ რიგში, ”ლანჩას” სამოდელო გამის ავტომობილებისთვის ”კრაისლერის” პლატფორმების გამოყენებას ითვალისწინებს.

ახლახანს, ”კრაისლერის” ხელმძღვანელად ”ლანჩას” ყოფილი მთავარი აღმასრულებელი ოლივიე ფრანსუა დაინიშნა, რაც იმის მანიშნებელია, რომ ეს ორი კომპანია სულ მალე ძალიან დაუახლოვდება ერთმანეთს. ინტერნეტით გავრცელებული ინფორმაციით, მათი დაახლოება პირდაპირ უნდა გავიგოთ, როგორც მათი მოდელების დაახლოება. ამაში მარტო ის კი არ იგულისხმება, რომ იტალიური და ამერიკული კომპანიები ზიარ პლატფორმებზე დაამზადებენ თავიანთ ავტომობილებს, არამედ ისიც, რომ ისინი ერთსადაიმავე მაკომპლექტებლებს და აგრეგატებსაც გამოიყენებენ და ერთმანეთს ტექნოლოგიებსაც გაუზიარებენ.

მოსალოდნელია, რომ მალე ”კრაისლერ 300-ის” ბაზაზე, ”ლანჩა” საკუთარი სედანის გამოშვებას დაიწყებს, რომლითაც საკუთარ ”თეზისს” შეცვლის. სამაგიეროდ, ამერიკული კომპანიისთვის იტალიელი პარტნიურის სუბკომპაქტური ჰეჩბეკი ”იპსილონი” გახდება ხელმისაწვდომი და მას ”კრაისლერი” ევროპაში გაჰყიდის.

ამგვარი ინტენსიური დაახლოებით, ტურინული კომპანია ორი კურდღლის დაჭერას ცდილობს. ჯერ ერთი, ნორმალურ ფუნქციონირებას დაუბრუნდება ”ლანჩა”. მეორეც, ”კრაისლერი” ძველ კონტინენტზე უფრო გააქტიურდება. მომავალში კი სხვა ბაზრებზეც შეაღწევს.

საინტერესოა, რომ ”ფიატი” ”ლანჩას” ჯერ მხოლოდ ევროპის ბაზარზე დატოვებს. ამ უკანასკნელის პოპულარული ჰეჩბეკი ”დელტა” კი აშშ-ის ბაზარზე ”კრაისლერის” მარკით გაიყიდება.

Sunday, October 11, 2009

”ფერარიზე” სწრაფი ”აუდი TT RS”

AVUS Performance

11 ოქტომბერი

გერმანულმა სატუნინგო კომპანია ”აფუს პერფორმენსმა” პოპულარულ კუპე ”აუდი TT RS-თვის” შეიმუშავა სატუნინგო პაკეტი, რომლის გამოყენების შემდეგაც, ამ ავტომობილის დინამიკური მახასიათებლები იმდენად უმჯოვესდება, რომ ის ”ფერარის” მოდელებს - F430-სა და ”612 სკალიეტისაც” კი სჯობნის, რომლებიც მოძრაობაში შესაბამისად, 490 და 540 ცხენისძალიან V8 ძრავებს მოჰყავს.

პაკეტი ძრავის და მისი გამოსაბოლქვი სისტემის მოდერნიზაციას ითვალისწინებს, რის შედეგადაც, თუ ”აფუსის” მიერ გამოქვეყნებულ რელიზს დავუჯერებთ, ”აუდი TT RS” ადგილიდან 100 კმ/სთ-ს აკრეფას 3.8 წამში ასწრებს, რაც სტანდარტული მოდელის აჩქარებაზე დაახლოებით 0.8 წამით ნაკლებია.

”აფუსის” მიერ შემუშავებუკ მოდერნიზაციის პაკეტში შედის ახალი ტურბოკომპრესორის და სპორტული გამოსაბოლქვი სისტემის დაყენება, ასევე ძრავის მართვის ელექტრონული ბლოკის სპორტულად დაპროგრამება. ამის შედეგი ისაა, რომ 2.5-ლიტრიანი ხუთცილინდრიანი აგრეგატის სიმძლავრე 340-დან 460 ცხენის ძალამდე, მაქსიმალური მაბრუნი მომენტი კი 450-დან 639 ნიუტონმეტრამდე გაიზარდა. ავტომობილის მაქსიმალურმა სიჩქარემ კი 312 კმ/სთ-ს (280-დან) მიაღწია.

ძრავის სრულყოფის გარდა, ”აფუსი” მყიდველს საკიდარის განახლებასაც სთავაზობს, რომელიც ახალი, რეგულირებადი ამორტიზატორებითაა აღჭურვილი. მოდერნიზებული ”აუდი TT RS” 20-დუიმიან ბორბლებზე დგას, რომლებიც ”ჰენკუკის” წარმოების (255/30/20 ზომის) ”S1 ევო” საბურავებითაა შემოსილი. გარეგნულად კი ავტომობილს მისი საბაზო ვერსიისგან ფერიც გამოარჩევს - ”აფუსის” მოდელი შავი მქრქალი ფერითაა შეღებილი.

დაბოლოს ფასები: ავტომობილის გადაღებვა 1 999, ახალი ბორბლების (საბურავებითურთ) დაყენება კი 6 400 ევრო ჯდება. თუმცა ”აფუსი” ჯერ არ აცხადებს მთავარს - თუ რა დაუჯდება შემკვეთს ძრავის მოდერნიზება.

”ჯენერალ მოტორსი” ახალ ”ასტრას” უფრო სწრაფად აწარმოებს

GM to Build 2010 Opel Astra Faster

11 ოქტომბერი

”ჯენერალ მოტორსმა” ახალი ”ასტრას” წარმოებაში სრულიად ახალი ტექნოლოგია დანერგა, რომლის მეშვეობითაც, თითო ავტომობილის აწყობა ჩვეულებრივზე 6 საათით ადრე ხდება. ”ვოქსჰოლის” (ოპელის ბრიტანული ანალოგია) ელესმერ პორტის (ბრიტანეთი) ქარხანაში ადრე თითო ”ასტრას” წარმოებისთვის 21 საათი იყო საჭირო, ახლა კი ეს საქმე 15 საათში ესწრება.

”ვოქსჰოლის” საწარმოო პროცესის მენეჯერი ლინდსი უიკენსი ამბობს, რომ ახალი ”ასტრას” შემუშავებისას, მისი წსრმოების ტექნოლოგია იმგვარად დაიგეგმა, რომ აწყობის დრო მნიშვნელოვნად შემცირებულიყო. ამის მთავარი შედეგი კი საწარმოო ხარჯების და წარმოებული პროდუქციის თვითღირებულების შემცირებაა.

ახა;ი ”ასტრას” გაყიდვები ევროპაში მალე დაიწყება. მისთვის ”გენერლებმა” რამდენიმე ახალი ძრავი შეიმუშავეს, რომელთა შორისაცაა 1.4 და 1.6-ლიტრიანი ბენზინის ტურბოძრავები. ყველაზე იაფფასიანი ”ასტრა” კი 1.4-ლიტრიანი ატმოსფერული ძრავითაა აღჭურვილი, რომელიც დაახლოებით 8 პროცენტით უფრო ეკონომიურია თავის იმ ანალოგზე (წინამორბედზე), რომელიც ახლანდელ ”ასტრებზე” დგას.

ბენზინის ძრავების გარდა, ”ასტრას” მყიდველს დიზელის აგრეგატების ფართო არჩევანსაც შესთავაზებენ. ესენია 1.3, 1.7 და 2.0-ლიტრიანი ტურბოდიზელები, რომელთა სიმძლავრეც 95-დან 160 ცხენის ძალამდე დიაპაზონშია. მერმის ავტომობილი ასევე სერია ”ეკოფლექსის” ეკონომიურ ძრავსაც მიიღებს.

Saturday, October 10, 2009

პლანეტის ყველაზე სწრაფი უსინათლო

Fastest Blind Man on Earth

10 ოქტომბერი

თუ გაგიგიათ ოდესმე, რომ უსინათლო ადამიანი ავტომობილს მართავდეს? ალბათ არა. მითუმეტეს, ძნელი წარმოსადგენია, რომ უსინათლოებს სიჩქარის რეკორდიც კი ჰქონდეთ. აქვთ და მერე როგორი!

დურბანვილელმა (სამხრეთ აფრიკა) ჰაინ წაგნერმა უსინათლოთათვის პლანეტის ახალი რეკორდი დაამყარა - 322.5 კმ/სთ განავითარა. თავისი რეკორდისთვის ვაგნერმა ”მერსედეს-ბენც SL 65 ბლექ სერის” გამოიყენა. რეკორდის დამყარებაში კი მას ნავიგატორი რეი უეიკფილდი დაეხმარა.

რეკორდის დასამყარებლად, წყვილმა აპინგტონის საერთაშორისო აეროპორტის ასაფრენი ზოლი გამოიყენა. მას შემდეგ, რაც მაქსიმალურ სიჩქარეს მიაღწია, ვაგნერმა ის მცირე ხნით შეინარჩუნა და სარეკორდო სიჩქარით 1 000 მეტრი გაიარა.

რეკორდი რომ დაამყარა, ვაგნერს შიშზე ჰკითხეს, რაზეც მან მოკლედ მოჭრა: გიჟი უნდა იყო, რომ არ შეგეშინდესო! მოკლედ, მან თავის ყოფასაც სძლია, შიშსაც და სამაგიეროდ, გინესის რეკორდების წიგნში შევა.

მაგრამ ამით დაკმაყოფილებას ის არ აპირებს. თავგადასავლების დაუოკებელი მაძიებლის გეგმაში კიდევ უფრო თავზეხელაღებული და სახიფათო მისია შედის: ის სამგზავრო ბოინგით ლონდონიდან იოჰანესბურგამდე გადაფრენას აპირებს. რა თქმა უნდა, ამჯერადაც ნავიგატორი დაეხმარება. რაც ყველაზე საინტერესოა, ფრენისას მას მგზავრებიც ეყოლება.

სურათზე: ჰაინ ვაგნერი (მარცხნივ) და მისი ნავიგატორი რეი უეიკფილდი

Friday, October 9, 2009

”ჰამერი” ჩინელებმა იყიდეს

GM signs Hummer sale deal with Sichuan Tengzhong

10 ოქტომბერი

”ჯენერალ მოტორსმა” უგზოობის ავტომობილების მწარმოებელი ლეგენდარული კომპანია ”ჰამერი” ჩინურ კონგლომერატ ”სიჩუან ტენჟონ ჰევი ინდასტრიალ მეშინერის” მიჰყიდა. მართალია, მხარეებს გარიგების ფინანსური მხარე არ გაუმჟღავნებიათ, მაგრამ ინტერნეტით გავრცელებული ცნობა გვაუწყებს, რომ ჩინურ მხარეს ეს გარიგება 150 მილიონი დოლარი დაუჯდა.

ამგვარად, ამერიკული ავტომწარმოებელი აგრძელებს იმ კომპანიების ტავიდან მოშორებას, რომლებიც ბოლო 20 წლის განმავლობაში შეიძინა. რამდენიმე დღის წინ, ”გენერლებს” ”სატურნის” გაყიდვა ჩაუფლავდათ. ამ მარკის შეძენას ”პენსკე აუტომოტივი” აპირებდა, მაგრამ გარიგების დადებამდე ერთი დღით ადრე, როჯერ პენსკემ ”სატურნის” ყიდვა გადაიფიქრა. ჰოდა, ახლა ”გენერლებს” ისღა დარჩენიათ, რომ ოცი წლის წინ შექმნილი მარკა გააუქმონ.

”ტენჟონი” მთავარი მონაწილეა იმ კონსორციუმისა, რომელიც ”ჰამერს” ყიდულობს. მძიმე მანქანათმშენებლობის ჩინური გიგანტი ”ჰამერის” 80 პროცენტს მიიღებს. დანარჩენი 20 რპოცენტი კი ჩინელ ბიზნესმენ სუალან დუოჟის ხელში გადავა, რომლის ბიზნესიც ჩინური ქიმიური გიგანტი ”ლუმენა” შედის.

გარიგების მიუხედავად, ”ჰამერის” პრესმდივანი ნიკ რიჩარდსი აცხადებს, რომ გაყიდვის პროცესის დასრულებამდე, გარიგებამ ამერიკული და ჩინური მარეგულირებლებისგან ვიზა უნდა აიღოს.

გარიგების შესაბამისად, ”ტენჟონი” ”ჰამერის” ბიზნესს, მის სავაჭრო ნიშანს და ფრენჩაიზულ გარიგებებს ყიდულობს. ”ჯენერალ მოტორსთან” შეთანხმების გარიგების მომენტში, ”ჰამერს” 158 ფრენჩაიზული კონტრაქტი აქვს. ჩინური კომპანიის ხელში გადავა ”ჰამერის” საწარმოები და სერვის ცენტრები. ამასთან, გარდამავალ პერიოდში, ჩინელების ხელში გადასული ”ჰამერი” მაკომპლექტებლების გარკვეულ ნაწილს ”ჯენერალ მოტორსისგან” მიიღებს.

მხარეებს შორის მიღწეული შეთანხმებით, ”ჯენერალ მოტორსის” ორი ამერიკული ქარხანა 2011 წლამდე გააგრძელებს H3-ის და H3T-ის, ასევე სამხედრო ”ჰამერის” და H2-ის წარმოებას. ”ჰამერის” მთავარი აღმასრულებელი ჯეიმს ტეილორი, ვინც ადრე ”კადილაკის” შეფი იყო, თავის თანამდებობაზე დარჩება.

სამოქალაქო ავტომობილების წარმოება ”ჰამერმა” 1992 წელს დაიწყო. თავიდან წლიური გაყიდვები 1 000-ს ძლივს აღწევდა. მაგრამ შემდეგ კომპანია ”ჯენერალ მოტორსმა” შეიძინ, რომლის ხელშიც, გაყიდვების პიკმა 2006 წელს 71 524-ს მიაღწია.

მაგრამ საწვავის ფასის უკიდურესმა ზრდამ კომპანია ძლიერ დააზარალა. შედეგად, წელს სექტემბრის ჩათვლით, ”ჰამერს” მხოლოდ 8 193 ავტომობილი ჰქონდა გაყიდული. ”ჯენერალ მოტორსი” იმედოვნებდა, რომ ”ჰამერს” 500 მილიონ დოლარად გაჰყიდდა, მაგრამ საბოლოოდ, 150 მილიონსაც დაყაბულდა.

”ბეემვე” სუბკომპაქტური ავტომობილის გამოშვებას აპირებს

BMW UKL1 to Surface 2013?

9 ოქტომბერი

ორი წლის წინ, ინტერნეტით გავრცელდა ინფორმაცია იმის შესახებ, რომ ”ბეემვე” მეტოქე ”აუდისთვის” კონკურენციის გასაძლიერებლად, სუბკომპაქტური, ეგრეთ წოდებული ნულოვანი სერიის ავტომობილის გამოშვების პერსპექტივას განიხილავდა. მაშინ გამოითქმებოდა ვარაუდი, რომ ასეთი ავტომობილები ბავარიული კომპანიის დილერთა შოურუმებში 2010 წლიდან გამოჩნდებოდა.

დღეს მსგავსი ინფორმაცია ინტერნეტში ისევ გამოჩნდა. ოღონდ თარიღმა გადაიწია - ახალი ვერსიით, ბავარიული სუბკომპაქტი ბაზარზე 2013 წელს გამოჩნდება. ამ ავტომობილით კი, ”ბეემვე” კონკურენციას ”აუდი A1-ს” და A-კლასის ”მერსედესს” გაუწევს.

ახალ ავტომობილს ნულოვან კლასად აღარ მოიხსენიებენ. მას პირობითად (უფრო სოლიდური) UKL1 უწოდეს, რაც ქვეკომპაქტკლასს (უნტერ კომპაკტკლასსე). გავრცელებული ინფორმაციით, მისი შემუშავება უკვე დაწყებულია და როცა ბაზარზე გამოვა, ის ბავარიული კომპანიის სამოდელო გამაში, მინისა და პირველი სრიის ”ბეემვეს” შორის დაიკავებს ადგილს.

ახალი ავტომობილი ”მინის” მოდერნიზებულ პლატფორმაზე დაემყნობა. UKL1 სამი ტიპის ძარით დამზადდება. ესენია სამ და ხუთკარიანი ჰეჩბეკები და ორადგილიანი როდსტერი. ინგლისურ ჟურნალ ”ქარ მეგზინის” ვერსიით, ახალი ავტომობილი ”ბეემვეს” უახლესი, სამ და ოთხცილინდრიან ძრავებს მიიღებს.

სხვათა შორის, ეს ინფორმაცია დროში საეჭვოდ დაემთხვა ახლახანს გავრცელებულ ცნობას იმის შესახებ, რომ ”ბეემვე” ინგლისური ”მინის” გერმანიაში წარმოებასაც გეგმავს. ამის მიზეზად ის გარემოება სახელდება, რომ ”მინის” ოქსფორდული ქარხნის სიმძლავრე, ამ ავტომობილზე მზარდ მოთხოვნილების დაკმაყოფილებას ვეღარ ახერხებს. მაგრამ როგორც ჩანს, ბავარიელებს გერმანულ საწარმოში ”მინის” ბაზაზე შექმნილი სუბკომპაქტის წარმოება აქვთ განზრახული. თუმცა აქ მოყოლილ არცერთ ინფორმაციას ”ბეემვე” ჯერჯერობით არ ადასტურებს.

Thursday, October 8, 2009

”ვოლვო” S60-ის წარმოებას მერმის დაიწყებს

Volvo S60

8 ოქტომბერი

მიუხედავად იმისა, რომ ”ვოლვოს” მომავალი პატრონის ვინაობა ჯერაც არ გარკვეულა, შვედურ კომპანიაში საწარმოო პროგრამის განახლებაზე ზრუნვა არ წყდება. თავის ახალ სედან S60-ის მსოფლიო პრემიერას ”ვოლვო”, რომელიც დღეს ”ფორდის” ჯგუფში შედის, მერმის, პარიზის საავტომობილო შოუზე გეგმავს, მის წარმოებას ოდნავ მოგვიანებით დაიწყებს.

ჯერჯერობით, შვედური კომპანია თავისი სიახლის შესახებ ინფორმაციას არ ავრცელებს, თუმცა ინტერნეტით ვრცელდება ინფორმაცია იმის შესახებ, რომ გარეგნულად ის ამავე სახელწოდების კონცეპტუალური მოდელის მსგავსი იქნება. კონვეიერამდე მას მხოლოდ ქრომირებული დეტალები და კონცეპტუალური მოდელებისთვის დამახასიათებელ ელემენტები არ გაჰყვება.

კონცეპტუალური S60-ის პირველი ჩვენება დეტროიტის წლევანდელ ავტოშოუზე შედგა. ეს ავტომობილი აღჭურვილი იყო ოთხცილინდრიანი, 1.6-ლიტრიანი ტურბოძრავით, რომელიც სისტემა GTDi-ითაა (გაზოლინ ტურბოჩეირჯდ დირექტ ინჯექშნ - ბენზინის ტურბოდამჭირხნიანი, უშუალო შეფრქვევით) აღჭურვილი და 180 ცხენის ძალას გამოიმუშავებს.

”ვოლვოს” ძრავების განყოფილების ვიცე პრეზიდენტი დერეკ კრაბი ამბობს, რომ სისტემა GTDi საუკეთესო საშუალებაა საწვავისა და ატმოსფეროში CO2-ის გამონაბოლქვის შესამცირებლად. მის გარდა, ამ ავტომობილზე კიდევ არაერთი სისტემა გამოიყენება, რომლებიც ავტომობილის ეკონომიურობასა და ეკოლოგიურობას აუმჯობესებს.

”ვოლვოს” განმარტებით, ახალი S60 კონკურენციას ბაზრის ისეთ ლიდერებს გაუწევს, როგორებიცაა ”ბეემვეს” მე-3 სერიის სედანი, ”აუდი A4” და C კლასის ”მერსედესი”.

Wednesday, October 7, 2009

გერმანული ”ელექტრო-მგელი” სუპერავტომობილების კლასში

E-Wolf’s Electric Supercars

7 ოქტომბერი

ამ წლის განმავლობაში, თითქმის ყოველთვიურად, რომელიმე ავტომწარმოებელი საზოგადოებას ახალ სპორტულ ელექტრომობილს უჩვენებს. ელექტრომობილების წარმოება თანდათან ერთგვარ მოდად იქცა, თუმცა არც ისე ხშირია შემთხვევები, როდესაც პრეზენტაციაზე სრულფასოვანი კონცეპციის ხილვა შეიძლება.
მაგრამ იგივეს ვერ ვიტყვით პატარა გერმანულ ფირმა ”E-ვოლფზე”, რომელმაც წარმოებისთვის ორი სპორტული ელექტრომიბილი - როდსტერი და კუპე მოამზადა და არ მალავს, რომ ”ფერარისთან” კონკურენციას აპირებს.

ორივე ავტომობილი საქსონიის მსუბუქი ტექნოლოგიების ცენტრთან და დრეზდენის რექნიკური უნივერსიტეტის მსუბუქი სტრუქტურებისა და პოლიმერული ტექნოლოგიების თანამშრომლებთან თანამშრომლობით შეიქმნა. ამასთან, ”E-ვოლფმა” როდსტერი E-1 ფრანკფურტის საავტომობილო შოუზე გამოფინა, E-2-ის წარმოების დაწყებას კი ორ წელიწადში გეგმავს.

ორივე ავტომობილის ძირითადი ღირსება მათი სიმსუბუქეა. როდსტერი E-1 თითქმის 500 კილოგრამს იწონის, მაგრამ სერიოზული მინუსიც აქვს - ის მხოლოდ იმ ადამიანებს ”იტანს”, რომელთა წონაც 68 კილოგრამის ფარგლებშია.

ავტომობილი აღჭურვილია 150-ცხენისძალიანი ელექტროძრავით, რომლის მეშვეობითაც, e-1 0-დან 100 კმ/სთ-მდე აჩქარებას 5 წამზე ნაკლებში ასწრებს, მისი მაქსიმალური სიჩქარე კი 229 კმ/სთ-ს აღწევს. ლითიუმ-იონური აკუმულატორების ერთი დამუხტვით კი ავტომობილს 320 კილომეტრის გავლა შეუძლია.

ამ ერთადგილიანი როდსტერის შეკვეთები ”E-ვოლფს” უკვე დაწყებული აქვს და თითოეულს 150 000 ევროდ ჰყიდის.

რაც შეეხება e-2-ს, ამ ავტომობილის გამოშვება 2011 წლიდან იგეგმება. ის ოთხი ელექტროძრავით აღიჭურვება, რომლებიც თითო ბორბალს მოემსახურება. ოთხივე ძრავის ჯამური სიმძლავრე 544 ცხენის ძალა იქნება. ავტომობილის წონა კი 900 კილოგრამზე ოდნავ მეტი იქნება.

ჯერჯერობით, e-2 მხოლოდ კომპიუტერში არსებობს, თუმცა პროექტის ავტორები ახლავე ირწმუნებიან, რომ მათი მეორე შედევრის მაქსიმალური სიჩქარე 250 კმ/სთ-ს მიაღწევს. და რაც მთავარია, საწარმოო ვერსიას ზუსტად ისეთი გარეგნობა ექნება, როგორიც ამჟამად, კომპიუტერულ ესკიზებში აქვს.