Thursday, June 25, 2009

მოსლი ჭირვეულობს

Formula 1

26 ივნისი

ერთი დღე არ გასულა მას შემდეგ, რაც FIA-ს პრეზიდენტმა მაქს მოსლიმ (სურათზე პრესის გარემოცვაში) ფორმულა ერთის გუნდებთან კამათში დათმობა ამჯობინა და აი, გუშინ ღამით განაცხადა, რომ FOTA-ს და მის წევრ გუნდებს პრესა შეგნებულად შეჰყავთ შეცდომაში, რის გამოც, ის თავისი სამომავლო გეგმების გადახედვას აპირებს.

ჯერ კიდევ ოთხშაბათს, მოსლიმ და ფორმულა ერთის გუნდების ასოციაციამ (FOTA) ყველა საკითხზე მოილაპარაკეს და თითქოს, გუნდების მხრიდან ალტერნატიული ჩემპიონატის ორგანიზების მუქარაც გაქარწყლდა, მაგრამ გუშინ მოსლი მეტად გაღიზიანებული გამოეხმაურა გუნდების მიერ მის მიმართ გამოთქმულ კომენტარებს.

ინგლისურ ჟურნალ ”აუტოსპორტის” ცნობით, მოსლიმ FOTA-ს პრეზიდენტ ლუკა დი მონტეძემოლოს წერილი გაუგზავნა, რომელშიც მისგან და მისი პარტნიორებისგან საჯაროდ მობოდიშებას მოითხოვს. წინააღმდეგ შემთხვევაში, თავისი გადაწყვეტილების გადათქმით და ფედერაციის პოსტზე დარჩენით დაიმუქრა.

”რამდენადაც თქვენ და FOTA შეგნებულად ცდილობთ პრესის შეცდომაში შეყვანას, ამიერიდან მე ჩემი სამომავლო გეგმების რამდენიმე ვარიანტს განვიხილავ. სხვა თუ არაფერი, ოქტომბრამდე ჩემს პოსტზე ვრჩები და მთელს უფლებამოსილებას ვინარჩუნებ. პრეზიდენტის არჩევნების შემდეგ კი, მომავალი ხელმძღვანელის ბედს ავტოკლუბები გაარკვევენ და არა თქვენ და FOTA. გუშინ პარიზში, ჩვენ თანხმობას მივაღწიეთ, რათა წერტილი დაგვესვა იმ სიძნელეებისთვის, რომლებსაც ფორმულა 1 წააწყდა. ამ თანხმობის მნიშვნელოვანი ნაწილი იყო ის, რომ ორივე მხარეს პრესისთვის პოზიტიური ინფორმაცია უნდა მიეწოდებინა.

ამიტომ, უკიდურესად გაოცებული დავრჩი, როვა გავიგე, რომ FOTA-მ პრესას აცნობა, თითქოს, ბატონმა ბოერიმ (FIA-ს სენატის და მონაკოს ავტოკლუბის პრეზიდენტი) ფედერაციის ხელმძღვანელობაც ჩაიბარა. ეს კი სიმართლეს აბსოლუტურად არ შეესაბამება. ისიც ტყუილია, რომ თითქოს, პოსტის დატოვება მაიძულეს და რომ ახალი არჩევნების შემდეგ, ფედერაციაში არანაირი როლი აღარ მექნება. მაგრამ ეს სრული ნონსენსია.

უფრო მეტიც, თქვენ პრესას განუცხადეთ, რომ მე დიქტატორი ვიყავი. ეს ბრალდება მოტორსპორტის მსოფლიო საბჭოს 26-ვე წევრს შეურაცხყოფს, რომლებიც 80-იანი წლებიდან ფ1-ის ყველა წესის განხილვასა და მიღებაში მონაწილეობდნენ. აღარაფერს ვამბობ ფედერაციის წევრი 122 ქვეყნის წარმომადგენლებზე, რომლებიც დემოკრატიულად უჭერდნენ მხარს ყველაფერს, რასაც მე და მოტორსპორტის საბჭო ვაკეთებდით.

თუ თქვენ გსურთ, რომ ჩვენს შორის მიღწეულ შეთანხმებებს ძალაში დარჩენის მინიმალური შანსი მაინც დაუტოვოთ, თქვენც და FOTA-მაც დაუყოვნებლივ უნდა შეცვალოთ თქვენი ქცევა. უნდა უარყოთ მცდარი გამონათქვამები და მომავალშიც თავი შეიკავოთ მსგავსი განცხადებებისგან”!

აღსანიშნავია, რომ მოსლის FOTA-სთვის ეს წერილი გუშინ, ბოლონიის სხდომამდე გაუგზავნია და იმედოვნებდა, რომ ამ სხდომის შემდეგ, სასურველ პასუხს მოისმენდა, მაგრამ მსგავსი არაფერი მომხდარა...

ფორმულა 1 უფრო სანახაობრივი გახდება

Formula 1

26 ივნისი

საერთაშორისო საავტომობილო ფედერაციის (FIA) პრეზიდენტ მაქს მოსლისთან მოგებული ბრძოლის შემდეგ, ფორმულა 1-ის გუნდების ასოციაციამ (FOTA) გამოაცხადა, რომ დაუყოვნებლივ შეუდგება იმაზე ზრუნვას, რომ ფორმულა ერთის სამომავლო სახე ჩამოაყალიბოს. რაც იმას ნიშნავს, რომ რბოლები უფრო საინტერესო საყურებელი უნდა გახდეს და მაყურებლისთვისაც და ახალი გუნდებისთვისაც უფრო ხელმისაწვდომი უნდა იყოს.

”რენოს” შეფ ფლავიო ბრიატორეს ფ1-ის კომერციულ ბოს ბერნი ეკლსტოუნთან მჭიდრო თანამშრომლობა დაევალა, რომლის უპირველესი მიზანიც, თანხმობის ახალი ხელშეკრულების მომზადებაა. უფრო შორეულ მომავალში კი ასოციაცია კომერციულ უფლებათა უფრო მეტ წილს მოითხოვს.

ბოლონიაში (იტალია) გამართულ სპეციალურ პრესკონფერენციაზე, ”ფერარის” შეფმა ლუკა დი მონტეძემოლომ შემდეგი განაცხადა: ”ჩვენ თავიდანვე ვამბობდით, რომ პრიორიტეტების გარკვევა გვსურდა. დღეს მინდა, FIA-ს მსოფლიო მოტორ სპორტის საბჭოს მადლობა გადავუხადო იმისათვის, რომ ფ1-ის ინტერესებისადმი ძალიან კონსტრუქციული მიდგომა გამოავლინა. წელს მოქმედი წესები სამერმისოდაც ძალაში დარჩება და ეს მეტად მნიშვნელოვანი მომენტია, რადგან ამით, 2012 წლამდე გარანტირებულ სტაბილურობას მივაღწიეთ. ესე იგი, ზედმეტი ხარჯების გაღებაც არ მოგვიწევს.

სპორტს იმავე პრინციპებით ვუხელმძღვანელებთ, როგორც წინა წლებში, როცა ახალი რეგლამენტის შედგენით ფორმულა 1-ის კომისია იყო დაკავებული და ის შესაბამის პროცედურებს ეყრდნობოდა. გუნდები და ავტოკონცერნები ხარჯების შესამცირებლად კვლავაც იმუშავებენ, როგორც ეს წინა წლებში იყო ძრავებთან და გადაცემათა კოლოფებთან დაკავშირებით. ფლავიო ბრიატორე კი ბერნი ეკლსტოუნთან ერთად იმუშავებს, რათა გაუმჯობესდეს რბოლების სანახაობრივი მხარე და მაყურებელს ჩვენი სპორტისადმი მეტი ინტერესი გაუჩნდეს”.

”მაკლარენის” შეფ მარტინ უიტმარშის თქმით, ფორმულა ერთმა უნდა გაითვალისწინოს მაყურებელთა სურვილები: ”ალბათ იცით, რომ FOTA-მ ჩაატარა გამოკითხვა, რომლის მიზანიც იმის გაგება იყო, თუ რა სურთ მაყურებლებს. გამოკითხვის შედეგების შეჯამების შემდეგ, FIA-ს რეკომენდაციები წარვუდგინეთ. სამწუხაროდ, ისინი არ მიიღეს და ახლა, ამ რეკომენდაციებზე დაყრდნობით, ახალი მიდგომის შემუშავება მოგვიწევს. ჩვენ ვალდებულნი ვართ, მოვუსმინოთ იმ აუდიტორიას, რომლის განწყობაზეც სპორტის კეთილდღეობაა დამოკიდებული”.

”ფერარის” გუნდის შეფი სტეფანო დომენიკალი ამბობს, რომ FIA-სთან მოგებული ბრძოლის შემდეგ, ყველა მოქმედმა გუნდმა და მათმა პარტნიორებმა ჩემპიონატში გამოსვლის სურვილი გამოთქვეს. იმავდროულად, აუცილებელია ახალი გუნდების მიზიდვა. თუმცა, უნდა არსებობდეს იმის გარანტია, რომ ისინი რამდენიმე სეზონით დარჩებიან. ესე იგი, ფინანსურად საკმარისად უზრუნველყოფილნი იქნებიან.

”ახალბედებს მივესალმებით, მაგრამ უნდა დავრწმუნდეთ, რომ ისინი ამ მკაცრი ბიზნსისთვის მზად არიან. მომავალი სეზონის განაცხადში უკვე სამი ახალი გუნდი ფიგურირებს, მაგრამ სანამ ისინი საბოლოო თანხმობას მიიღებენ, თავიანთი სამომავლო გეგმები უნდა გაგვაცნონ - მომავალ სეზონში ბიუჯეტები არ შეიზღუდება, მათ კი ნაწილობრივ ამის იმედი ჰქონდათ. ჰოდა, ახლა უნდა გაირკვეს, რამდენად შეუძლიათ შეუზღუდავი ბიუჯეტების პირობებში ასპარეზობა”, - ამბობს დომენიკალი.

FOTA-ს ვიცე პრეზიდენტმა და ”ტოიოტა მოტორსპორტის” შეფმა ჯონ ჰაუეტმა კი განაცხადა, რომ ასოციაციაში ახალ გუნდებს სიხარულით მიიღებენ. ოღონდ, სანამ ეს მოხდებოდეს, აუცილებლად უნდა გაირკვეს მათი დამოკიდებულება ახალი რეგლამენტისადმი. ”ბრაუნ GP-ს” აღმასრულებელი დირექტორი ნიკ ფრაი კი არც უფრო მეტი გუნდის მიღებას გამორიცხავს. ოღონდ, ეს იმ შემთხვევაში მოხდება, თუ სამი ახალი გუნდიდან რომელიმე თავის განაცხადს უკან გაიხმობს.

სურათზე: FOTA-ს წევრი გუნდების ხელმძღვანელები მორიგ შეკრებაზე



შემდგომი თაობის 1-ლი სერიის ბეემვე ოთხ ახალ ძარას მიიღებს

25 ივნისი

კრიზისის მიუხედავად, ”ბეემვე” ჩრდილოეთ ამერიკაში გაყიდვების გაორმაგებას ცდილობს და ამ მიზნის მისაღწევად, ის თავისი კომპაქტური პლატფორმის განახლებას და მის ბაზაზე რამდენიმე ახალი ავტომობილის გამოშვებას გეგმავს. პარალელურად, ბავარიელები აშშ-ში თავიანთი ინგლისური მარკის, ”მინის” სადილერო ქსელის გაფართოებას იწყებენ.

დღეისათვის, კომპაქტურ პლატფორმაზე (1-ლი სერია) ”ბეემვე” ავტომობილებს ორი განსხვავებული - სამ და ხუთკარიანი ჰეჩბეკის ძარით აწარმოებს. ინგლისურ ჟურნალ ”აუტოქარის” ცნობით კი, შემდეგი თაობის პლატფორმაზე, რომელსაც შიდასაქარხნო ინდექსი F20 აქვს, კიდევ ოთხი განსხვავებული ძარის მქონე ავტომობილებს დაამზადებენ.

ახალ ვარიანტებში მოიაზრება კუპე და კაბრიოლეტი, უნივერსალის ტიპის GT (ალბათ 1-ლი სერიის GT) და ქროსოვერის მსგავსი ავტომობილი, რომელსაც ალბათ Y1-ს დაარქმევენ. ოდნავ მოგვიანებით, ბავარიელები როდსტერ Z2-ს და ამ ავტომობილის ბაზაზე პატარა კუპესაც გამოუშვებენ. ამ ბოლო ორი მოდელით, ”ბეემვე” კონკურენციას გაუწევს რამდენიმე ანალოგიური ტიპის ავტომობილს, რომლებსაც ”ფოლკსვაგენი”, ”პორშე” და ”აუდი”, ”ფოლკსვაგენის” კონცეპტუალური ”ბლიუსპორტის” ბაზაზე გამოუშვებენ. ჯერჯერობით არც ისაა გადაწყვეტილი, დამზადდება თუ არა კომპაქტურ პლატფორმაზე სედანისძარიანი ავტომობილი.

შემდგომი თაობის 1-ლი სერიის ავტომობილებისთვის ძრავების ფართო გამა იქნება გათვალისწინებული. დაგეგმილია 1.6-ლიტრიანი ოთხცილინდრიანი ძრავის 1.3-ლიტრიანი სამცილინდრიანი ტურბომოტორით შეცვლა. თუ ასე მოხდა, ევროპაში გასაყიდი მანქანებისთვის ბენზინის ხუთი ძრავი იქნება გათვალისწინებული. ესენია: 1.3-ლიტრიანი ტურბო 136 ცხენის ძალით (116i), 1.3-ლიტრიანი ტურბო 177 ცხენის ძალით (118i), 2.0-ლიტრიანი ტურბო 218 ცხენის ძალით (120i), 3.0-ლიტრიანი ექვსცილინდრიანი (ერთ რიგში განლაგებული ცილინდრებით) ატმოსფერული 272 ცხენის ძალით (130i) და 3.0-ლიტრიანი ტურბო ექვსცილინდრიანი (ერთ რიგში განლაგებული ცილინდრებით) 326 ცხენის ძალით (135i).

დიზელის ძრავების გამაში სულ სამი აგრეგატია. ესენია: 2.0-ლიტრიანი ტურბოდიზელი (118d) 150 ცხენის ძალით, 2.0-ლიტრიანი ტურბოდიზელი (120d) 184 ცხენის ძალით და 2.0-ლიტრიანი ტურბოდიზელი (123d) 211 ცხენის ძალით.

მომავალში, 1-ლი სერიის ავტომობილებს მოდერნიზაციას აუცილებლად ჩაუტარებს ბავარიელთა სპორტული M-დივიზიონი, რომლის მოდელებსაც ინდექსად ti მიეწერება. თუმცა, მათ შესახებ ამ ეტაპზე, არაფერია ცნობილი.

პარალელურად, ცნობილი გახდა, რომ 1-ლი სერიის ავტომობილებთან არანაირი შეხება არ ექნება ბავარიელთა ეკოლოგიურ პროექტ ”მეგასიტის”. ამ პროექტის მიზნებიდან გამომდინარე, მისი ეგიდით შემუშავებული ავტომობილები სრულიად განსხვავებულ პლატფორმებზე დამზადდება.

დაბოლოს, 1-ლი სერიის ავტომობილებიდან ბაზარზე პირველი ხუთკარიანი ჰეჩბეკი გამოჩნდება, რომლის გაყიდვებიც 2011 წელს უნდა დაიწყოს. მას მოჰყვება სამკარიანი ჰეჩბეკი, სტანდარტული კუპე და ასე შემდეგ.

სურათებზე: ინტერნეტში პირველი სერიის კონცეპციის კომპიუტერზე შესრულებული სურათები ”ბეემვეს” ბლოგ-საიტმა გაავრცელა



წლის საუკეთესო კონცეპტუალური ავტომობილები

25 ივნისი

კონცეპტუალური ავტომობილები კომპანიების მოქმედ სამოდელო გამას არ განასახიერებენ, მაგრამ მათ მიხედვით შეგვიძლია ვივარაუდოთ, თუ რა მიმართულება ექნება ამათუიმ კომპანიას მომავალი ხუთი-ათი წლის შემდეგ. ამდენად, ყოველთვის დიდ ინტერესს იწვევს ავტომწარმოებელთა მიერ დიდ ავტოგამოფენებზე წარმოდგენილი კონცეპტუალური ნამუშევრები.

აქედან გამომდინარე, საინტერესო ისიც უნდა იყოს, თუ კომპეტენტური სპეციალისტები რა შეფასებას აძლევენ ამ ნამუშევრებს. შესაბამისად, კონცეპციებთან დაკავშირებული კონკურსების შედეგებიც დიდ ინტერესს იწვევს.

ახლახანს, აშშ-ის სამხრეთ აღმოსავლეთის საავტომობილო მედიის ორგანიზაციამ (SEAMO) ჩაატარა ტრადიციული კონკურსი, რომლის შედეგადაც, შესაბამის კლასებში, წლის საუკეთესო კონცეპტუალურ ავტომობილებად ”კადილაკ კონვერჯი”, ”ფისკერ კარმა სანსეტი” და ”ფოლკსვაგენ ბლიუსპორტ როდსტერი” გამოცხადდა.

ყველანაირ კონცეპტუალურ ავტომობილებს შორის, საუკეთესოდ ვოლფსბურგული ავტომობილი დასახელდა, რომელსაც ჟიურიმ ეფექტურობა, მოხდენილი გარეგნობა და აღჭურვილობა მოუწონა.

წინასაწარმოო მოდელებს შორის საუკეთესოს წოდება ”ფისკერის” სუპერავტომობილს ერგო. ჟიურის თავმჯდომარე მაიკლ ბეტანკურმა, განსაკუთრებით სახელოვან დიზაინერ ჰენრიკ ფისკერის ბოლო შედევრის ესთეტიკურობა, უზადო სტილი დააფასა. ასეთი დონის დიზაინერის კომპანიას სწორედ ასეთი მშვენიერი ავტომობილები შეეფერებაო - განაცხადა ჟიურის უფროსმა.

რაც შეეხება ”კადილაკ კონვერჯს”, ის სპეციალურ კონცეპტუალურ მოდელებს შორის აღიარეს. ჟიურის განსაკუთრებით ამ ავტომობილის აღჭურვილობა მოეწონა, რომელიც მას ნათესავი ”შევროლე ვოლტისგან” აქვს ნასესხები, თუმცა მასზე მეტი სვლის მარაგი გააჩნია.

SEAMO მთელს მსოფლიოში ნაჩვენებ კონცეპტუალურ მოდელებს შორის საუკეთესოებს უკვე რვა წელია ირჩევს და მისი აღიარება ყველა ავტომწარმოებლისთვის პრესტიჟი და დამატებითი რეკლამაა.

ჩინურ SAIC-ს ”ინსინიას” პლატფორმის შეძენა სურს

25 ივნისი

ჩინური საავტომობილო გიგანტი ”შანხაი ოტომოტივ ინდასტრი კორპორეიშნი” (SAIC) მოლაპარაკებას აწარმოებს ”ჯენერალ მოტორსთან”, რისი მიზანიც ”ბიუიკ რეგალის”, იგივე ”ოპელ ინსინიას” (სურათზე) პლატფორმის შეძენა და მის ბაზაზე საკუთარი ავტომობილების წარმოებაა.

საინტერნეტო გამოცემა ”აუტო ჩენელის” ინფორმაციით, ჩინური კომპანია ”ინსინიას” პლატფორმის თავის პოპულარული მოდელ ”როევე 750-ს” გასაახლებლად გამოყენებას აპირებს. ამ საკითხთან დაკავშირებით, SAIC-ი მოლაპარაკებას ამერიკული კომპანიის აზიისა და წყნარი ოკეანის რეგიონის გაყიდვების დეპარტამენტის პრეზიდენტ ჯოზეფ ლიუსთან აწარმოებს.

იმავე გამოცემის ინფორმაციით, ცოტა ხნის წინ, SAIC-ი ”ჯენერალ მოტორსისგან” მისი ევროპული ბრენდის, ”ოპელის” გამოსყიდვასაც ცდილობს. მართალია, ამ ეტაპზე, ამერიკელებმა და გერმანიის მთავრობამ, არჩევანი კანადურ ”მაგნაზე” შეაჩერეს, მაგრამ საბოლოო გადაწყვეტილება ჯერ მიღებული არაა და გამორიცხული არაა, რომ ”ოპელისთვის” სხვა მყიდველი შეირჩეს.

აღსანიშნავია, რომ 2009 წლისთვის ჩინურ კომპანიას საკმაოდ ამბიციური მაზანი აქვს - 1.8 მილიონი ავტომობილის გაყიდვას გეგმავს. მაგრამ როგორც ჩანს, ხელმოცარული დარჩება, რადგან წლის პირველი კვარტალი უზარმაზარი ზარალით (რიცხვი არ ზუსტდება) დაასრულა. SAIC-სთვის ყველაზე დიდი ზარალი კორეულ კომპანია ”სან იონგს” მოაქვს, რომელიც მის ჯგუფში შედის.

ყველაზე ეკონომიური მე-3 სერიის ბეემვე

25 ივნისი

კომპანია ”ბეემვე” წარმოებისთვის მე-3 სერიის სედანის ახალ, ეკონომიურ ვერსიას ამზადებს, რომელიც დიზელის ძრავით აღიჭურვება. ბავარიელები აცხადებენ, რომ ეს ამ სერიის მოდელებს შორის, ეკოლოგიურად ყველაზე სუფთა და მოკრძალებული აპეტიტის მქონე ავტომობილი იქნება.

ახალი 316d დეფორსირებული 2.0-ლიტრიანი, ოთხცილინდრიანი დიზელის აგრეგატით აღიჭურვება, რომლის სიმძლავრეც 116 ცხენის ძალა, მაქსიმალური მაბრუნი მომენტი კი 260 ნიუტონმეტრი იქნება (1750 ბრ/წთ-ზე). ძრავს 6-საფეხურიანი მექანიკური გადაცემათა კოლოფი შეუწყვილდება.

რაც შეეხება ეკონომიურობას, ახალი 316d 100 კილომეტრს 4.5 ლიტრი საწვავით გაგატარებთ, ყოველი კილომეტრის გავლისას კი ის ატმოსფეროში მხოლოდ 118 გრამ ნახშირორჟანგს გამოჰყოფს. კომპანიის წარმომადგენლები ირწმუნებიან, რომ სავსე ავზით, ამ ავტომობილს 1290 კილომეტრის გავლა შეუძლია. სამაგიეროდ, მას ”ბეემვესთვის” საკმაოდ დუნე ტემპერამენტი აქვს - ადგილიდან 100 კმ/სთ-ის აკრეფას 10.9 წამს ანდომებს.

ეკონომიური ”ბეემვეს” მსოფლიო პრემიერა სექტემბერში, ფრანკფურტის საავტომობილო შოუზე იგეგმება, რის შემდეგაც მას ევროპელი დილერები მიიღებენ. ევროპაში 316d-ს საბაზო ღირებულება 38 000 დოლარის ექვივალენტური იქნება.

ალფა რომეო მილანო ნურბურგრინგზე ვარჯიშობს

25 ივნისი

მისი სავარჯიშო გერმანიის ავტოდრომ ”ნურბურგრინგზე” მიმდინარე საგზაო ტესტებია, რის შემდეგაც იტალიური კომპაქტური ავტომობილი, რომლსაც ადრე ავტომოყვარული ჰეჩბეკ 147-ს სახელით იცნობდა და განახლბის შემდეგ, 149 უნდა დარქმეოდა, ბაზარზეც გამოჩნდება. ”მილანო” იტალიურ კონცერნ ”ფიატის” გლობალურ პლატფორმა C-ევოზე აიგება, რომელსაც ახლო მომავალში, თავისი ახალი ავტომობილებისთვის ”კრაისლერიც” გამოიყენებს.

ახალი ავტომობილი ”ალფა რომეოს” ახალ კორპორატიულ სტილში შესრულდება, რომელიც უკვე გამოყენებულია ”8C კომპეტიციონესა” და ”მილანოზე”. ამ სტილში მთავარი დეტალი რადიატორის ალფასეული მოყვანილობაა, რომელმაც ჯვაროსანი რაინდის სამკუთხა ფარის ფორმა მიიღო. ბამპერი, როგორც ასეთი, ფაქტობრივად აღარ არსებობს. მთავარი ფარები ოვალური ფორმისაა. ასევე მომრგვალებული მოყვანილობა აქვს ავტომობილის სახურავს.

”მილანო” ძრავებსაც ”ფიატისგან” მიიღებს. ძირითადი აგრეგატებია 1.4 და 1.75-ლიტრიანი ტურბოძრავები, რომლებიც საწვავად ბენზინს მოიხმარენ და რომელთა სიმძლავრე, შესაბამისად, 120 და 200 ცხენის ძალაა. მყიდველს ასევე ტურბოდიზელიან ვერსიებსაც შესთავაზებენ. მოგვიანებით კი ”მილანოს” სპორტული ვერსიების (Ti და GTA) წარმოებაც დაიწყება, რომლებიც გაცილებით მძლავრ ძრავებს მიიღებენ.

არაა გამორიცხული, რომ ”მილანოს” წინასერიული პროტოტიპი ”ალფა რომეომ” ფრენკფურტის ავტო შოუზე წარმოადგინოს, მისი საწარმოო ვრსიის პრემიერა კი მერმის, ჟენევის გამოფენაზე გაიმართება. მერმისვე, წლის მეორე ნახევარში, მისი გაყიდვებიც დაიწყება.

დი მონტეძემოლო გამარჯვებას ზეიმობს

Formula 1

25 ივნისი

მართალია, წელს ”ფერარის” თავი ვერაფრით გამოუჩენია, მაგრამ მისმა პრეზიდენტმა და ფორმულა ერთის გუნდების ასოციაციის (FOTA) თავმჯდომარე ლუკა დი მონტეძემოლომ ერთ დიდ გამარჯვებას მაინც მიაღწია - მან და ასოციაციიდან მისმა პარტნიორებმა, საერთაშორისო საავტომობილო ფედერაციის (FIA) პრეზიდენტ მაქს მოსლისთან დავაში გაიმარჯვეს და ის გზიდანაც სამუდამოდ ჩამოიშორეს.

დღეს, ფედერაციის მსოფლიო მოტორ სპორტის საბჭოს სხდომის შემდეგ, დი მონტეძემოლომ განაცხადა, რომ ოქტომბერში, როდესაც მოსლის პრეზიდენტობის ვადა ამოეწურება, ფორმულა 1 საბოლოოდ განთავისუფლდება დიქტატურული მმართველობისგან.

ფედერაციის მსოფლიო მოტორ სპორტის საბჭოზე, მოსლიმ ოფიციალურად დაადასტურა წინა დღით მის მიერვე ნათქვამი იმის შესახებ, რომ პრეზიდენტის პოსტზე კენჭისყრას აღარ აპირებს. უფრო მეტიც, ის ფორმულა ერთის საქმეებს დაუყოვნებლივ გადააბარებს მონაკოს საავტომობილო კლუბის პრეზიდენტ მიშელ ბოერის, ვინც იმავდროულად, ფედერაციის სენატის პრეზიდენტი და მსოფლიო მოტორ სპორტის საბჭოს ვიცე პრეზიდენტია.

”კმაყოფილები ვართ, რადგან ჩვენი ყველა მოთხოვნა შესრულებულია. არსებობს სამი ძირითადი მომენტი: ფორმულა 1-ს აღარ ემუქრება ფორმულა სამად გადაქცევა და ფორმულა ერთად დარჩება; აღარ იქნება დიქტატურა და სპორტს იმ კანონებით ვუხელმძღვანელებთ, რომელსაც ჩვენვე შევიმუშავებთ და არა იმით, რომელსაც ვინმე ზემოდან თავს მოგვახვევს; და, რაც არანაკლებ მნიშვნელოვანია, მოსლიმ გამოაცხადა, რომ პრეზიდენტის პოსტზე კენჭს აღარ იყრის. დღეიდან კი მას ფორმულა 1-თან შეხება აღარ ექნება. ბოლოსდაბოლოს, მივიღებთ წესებს, რომლებიც 2013 წლამდე აღარ შეიცვლება. მინდა, ჩვენს ყველა ქომაგს მადლობა გადავუხადო, რადგან მათი მხარდაჭერის გარეშე, ჩვენ მიზანს ვერ მივაღწევდით”, - იტალიურ პრესასთან საუბრისას განაცხადა დი მონტეძემოლომ (სურათზე).

”ფერარის” შეფი ამბობს, რომ მთელი ამ ისტორიიდან, მოსლიმ და ფორმულა 1-ის კომერციულ უფლებათა მფლობელმა ბერნი ეკლსტოუნმა სასარგებლო გაკვეთილი მიიღეს - ამიერიდან მათ ეცოდინებათ, რომ გუნდების ასოციაციასთან სერიოზული მიდგომაა საჭირო.

”ალბათ გაგიჩნდათ კითხვა, შეუძლია თუ არა მოსლის თავისი გადაწყვეტილების შეცვლა? შეუძლია, მაგრამ ამას არ იზამს. მთავარია, რომ გუნდებმა და ავტოკონცერნებმა ერთობა გამოავლინეს. არადა, სულ ცოტა ხნის წინ ეკლსტოუნი ამბობდა, რომ FOTA-ს მონაწილეთა სავიზიტოებს ძაღლებს აჭმევდა, მოსლი კი ირწმუნებოდა, რომ FOTA-ს შესახებ არაფერი სმენია. მაგრამ როგორც ჩანს, დღეს ორივე სხვანაირად ლაპარაკობს”, - დასძენს დი მონტეძემოლო.