Sunday, January 31, 2010

”ვენტურისა” და ”მიშლენის” ერთობლივი კონცეპცია - ”ვოლაჟი”

Venturi Volage Concept

31 იანვარი

სპორტული ავტომობილების მწარმოებელმა მონეგასკურმა მცირე კომპანია ”ვენტურიმ” და ფრანგულმა ”მიშლენმა” ერთობლივად შეიმუშავეს ელექტრომობილი, რომლის პრემიერაც ორი წლის წინ, პარიზის საავტომობილი შოუზე შედგა, წელს კი ის დეტროიტის ჩრდილოამერიკულ საერთაშორისო საავტომობილო შოუზეც გამოფინეს.

გარდა იმისა, რომ ავტომობილს ბიძგს ელექტრომოტორი აძლევს, ის იმითაცაა საინტერესო, რომ ”მიშლენის” სპეციალისტების მიერ შემუშავებული ”აქტიური ბორბლის” საკიდარის სისტემითაა აღჭურვილი. ამასთან, თითოეულ ბორბალს 2-2 ძრავი ემსახურება, რომელთაგან ერთის დანიშნულება ბორბლის დატრიალებაა, მეორისა კი - საკიდარის და მუხრუჭების სისტემაში მუშაობა.

ავტომობილი, რომლის ტანიც მთლიანად კარბონის ბოჭკოს კომპოზიტისგანაა დამზადებული, სულ რვა ელექტროძრავითაა აღჭურვილი, რომლებიც ელექტროენერგიას ლითიუმ-იონური აკუმულატორების ბლოკისგან ღებულობენ. თითოეული ელექტროძრავი 55 კილოვატ სიმძლავრეს და 232 ნიუტონმეტრ მომენტს გამოიმუშავებს.

მათი მეშვეობით, 1 075-კილოგრამიან ავტომობილს ადგილიდან 100 კმ/სთ სიჩქარის ასაკრეფად, 5 წამზე ნაკლები ჰყოფნის. აკუმულატორებში დაგროვილი ენერგია კი საკმარისია იმისათვის, რომ ”ვოლაჟმა” 320 კილომეტრი გაიაროს.

საინტერესოა ”ვოლაჟის” ინტერიერიც. მასში ხელსაწყო-მაჩვენებლების ადგილზე სენსორული მონიტორი (თაჩ სქრინ) მდებარეობს, რომლის მეშვეობითაც, მძღოლს ავტომობილის თავისი სურვილის შესაბამისად მომართვა შეუძლია. მაგალითად, შესაძლებელია ავტმობილის ისეთ რეჟიმზე გადართვა, როდესაც მისი ელექტრონული ტვინი ენერგიას ეკონომიურად დახარჯავს და ამგვარად, ავტომობილი უფრო მეტი კილომეტრის გავლას შეძლებს. ასევე შესაძლებელია ძრავების მაქსიმალური დატვირთვით გამოყენება, სისწრაფის გაზრდა, ან მაქსიმალური კომფორტის შეკვეთა.

”ვოლაჟის” მთავარ დიზაინერ საშა ლაკიჩის თქმით, იმ ფაქტმა, რომ ძრავებმა და საკიდარმა ბორბლებში და მათ სიახლოვეს გადაინაცვლა, კაპოტქვეშა და ჩვეულებრივი საკიდარების სივრცე გამოთავისუფლდა, რისი წყალობითაც, შესაძლებელი გახდა, დაცარიელებული სივრცეების აეროდინამიკური მოთხოვნების შესაბამისად გამოყენება.

”წარმოქმნილი სიცარიელეები ”ვოლაჟის” სტილის ნაწილია. აეროდინამიკა კი ამ სპორტული ავტომობილის სტილს განსაზღვრავს. ადვილი და სასიამოვნო წარმოსადგენია, თუ როგორ უვლის გარს ქარი ავტომობილის ძარას”, - ამბობს ლაკიჩი.

”ვენტურის” განცხადებით, ”ვოლაჟის” წარმოება 2012 წელს დაიწყება. ისევე როგორც კომპანიის პირველ მოდელ ”ფეტიშს”, ”ვოლაჟსაც” ხელით, შეზღუდული რაოდენობით დაამზადებენ.

Saturday, January 30, 2010

”პინინფარინა” ”ალფა რომეოსთვის” კონცეპტუალურ მოდელს დაამზადებს

Pininfarina Spider Concept to Shine at Geneva

30 იანვარი

იტალიურმა სადიზაინერო ატელიე ”პინინფარინამ” გამოაქვეყნა პირველი ესკიზი კონცეპტუალური როდსტერისა, რომელსაც საკუთარი 80 წლის და ”ალფა რომეოს” დაარსებიდან 100 წლის იუბილესთან დაკავშირებით ამზადებს. ჟურნალ ”აუტოუიკის” ინფორმაციით, ამ ავტომობილის მსოფლიო პრემიერა ჟენევის წლევანდელ ავტო შოუზე გაიმართება.

ამავე ჟურნალის ცნობით, ეს კონცეპტუალური ავტომობილი შეგვიქმნის წარმოდგენას იმისას, თუ როგორი იქნება ”ალფა რომეოს” შემდეგი თაობის სედან 159-ის ღია ვერსია. არსებული მონაცემებით, ამ სედანის წარმოება, სავარაუდოდ წელს დაიწყება. როდსტერის გარდა, ჟენევაში ”ალფა რომეო” ასევე წარადგენს 159-ის კიდევ ორ ვერსიას - სედანისა და კუპეს ძარით, რომლებსაც, შესაბამისად, ”ჯუჯარო” და ”ბერტონე” მოამზადებენ.

მომდევნო თაობის 159 ”კრაისლერის” პლატფორმაზე დამზადდება და მას სახელს შეუცვლიან. ჯერჯერობით დაზუსტებული არაა, თუ რა ეწოდება ახალ სედანს. სავარაუდოდ, მას სახელად მილანური კომპანიის ერთ-ერთი კლასიკური მოდელის სახელს - ”ჯულიას” უწოდებენ. ამ სახელით ”ალფა რომეო” ავტომობილებს 1962-1978 წლებში აწარმოებდა.

”ალფა რომეოს” საწარმოო პროგრამაში სედანი 159 ხუთი წლის წინ გამოჩნდა, 2008 წელს კი მას მოდერნიზაცია ჩაუტარდა. მოდერნიზაციის დროს, დაკიდების სისტემაში, მუხრუჭებში და ბორბლებში შედარებით მსუბუქი მასალების გამოყენების შედეგად, ავტომობილის წონა 45 კილოგრამით შემცირდა.

კონცეპტუალური ავტომობილის შესახებ დეტალები ჟენევურ გამოფენამდე ცოტა ხნით ადრე გამოქვეყნდება.

ცნობისათვის, ”პინინფარინამ” შარშან თავისი აქციების 50.7 გაყიდა, რათა ბანკებისადმი დაგროვილი დავალიანებები დაეფარა. პარალელურად, ატელიე თავისი სამი ქარხნიდან ერთ-ერთს, რომელიც ტურინის გარეუბან გრულიასკოში მდებარეობს, იტალიელ ბიზნესმენ ჯანმარიო როსინიოლოს მიაქირავებს, რომელიც იქ ”დე ტომაზოს” სახელით, ავტომობილების წარმოებას დაიწყებს.

”პეჟო 408” - მსოფლიო პრემიერა პეკინში

Peugeot 408 Officially Unleashed in Beijing

30 იანვარი

პეკინის მოტორ შოუზე, ფრანგულმა კომპანია ”პეჟომ” ახალი სედანი 408 DF (DF დონ ფენს, პეჟოს ჩინელ პარტნიორს აღნიშნავს, რომელთან ერთადაც, ის ჩინეთში ავტომობილებს აწარმოებს) წარადგინა, რომელიც ჩინური ბაზრისთვისაა განკუთვნილი. ახალი ავტომობილი ჰეჩბეკ 308-ს პლატფორმაზეა დამზადებული, თუმცა მასზე გრძელი ბაზა გააჩნია, რისი წყალბითაც, სალონის უკანა ნაწილში, კომფორტი მნიშვნელოვნადაა გაუმჯობესებული.

ტესტირების პროცესში, ეს ავტომობილი პაპარაცებმა რამდენჯერმე დააფიქსირეს და მაშინ ის ევროპული ”პეჟო 508” ეგონათ, რომელმაც ფრანგული კომპანიის სამოდელო გამაში, 2011 წელს ერთდროულად ორი სედანი - 407 და 607 უნდა შეცვალოს.

ცნობისათვის, აღნიშვნა 408-ში 4 ავტომობილის სიგრძის (4.68) მანიშნებელია, 0 კომპანიის მიერ დაპატენტებული შუალედური აღნიშვნაა, 8 კი მოდელის თაობას ნიშნავს. ამგვარად, 408 DF ”პეჟოს” მერვე თაობის პირველი მოდელია, რომელსაც კომპანია ჩინეთის ბაზარზე შეიტანს.

ახალი ავტომობილისთვის მხოლოდ ორი ძრავია განკუთვნილი - 1.6-ლიტრიანი 16V (16-სარქველიანი), რომელიც 110 ცხენის ძალას (5 750 ბრ/წთ-ზე) და 147 ნიუტონმეტრს (4 000 ბრ/წთ-ზე) ავითარებს და 2.0-ლიტრიანი, იმავე კონფიგურაციის, რომელიც 147 ცხენის ძალას და 200 ნიუტონმეტრს ავითარებს.

ავტომობილის უსაფრთხოების სისტემებში შედის 6 პნევმობალიში (2 წინა, 2 გვერდითა და 2 ფარდა), 5-წერტილოვანი უსაფრთხოების ღვედები და გამაფრთხილებელი ხმოვანი და ვიზუალური სიგნალები. აღსანიშნავია, რომ პრემიერამდე, ავტომობილმა 1 000 000 სატესტო კილომეტრი გაიარა.

408 DF-ის შემუშავების პროცესში, ფრანგ სპეციალისტებთან ერთად, ”დონ ფენის” მათი ჩინელი კოლეგებიც მონაწილეობდნენ. ავტომობილს ამ ორი კომპანიის ზიარი, უჰანის ქარხანა გამოუშვებს. დაგეგმილია წლიურად 100 000 ცალი 408 DF-ის წარმოება.

უკვე ხუთი წელია, რაც ”პეჟო” ჩინურ ბაზარზე ავტომობილებს ჰყიდის და ამ პერიოდში, მისმა მანქანებმა დიდი პოპულარობა მოიპოვეს. შარშან ცისქვეშეთში 410 000 ”პეჟო” გაიყიდა, რაც წინა წლის მაჩვენებელზე 44 პროცენტით მეტია.

”სუზუკი” ჟენევაში ”კიზაშის” ევროპულ ვერსიას გამოფენს

European Suzuki Kizashi Sedan to Bow at Geneva Motor Show

30 იანვარი

ჟენევის ავტო შოუზე, რომელიც მარტის პირველ რიცხვებში დაიწყება, იაპონური კომპანია ”სუზუკი” თავისი ახალი სედანის, ”კიზაშის” ევროპულ ვერსიას გამოფენს. ინგლისურ ჟურნალ ”ავტოქარის” ცნობით, სედანი, რომელიც უკვე იყიდება ამერიკულ ბაზარზე, ჟენევის შოუს დასრულებისთანავე გამოჩნდება კომპანიის შვეიცარიულ სადილერო პუნქტებში, დროთა განმავლობაში კი მისი გაყიდვა სხვა ევროპულ ქვეყნებშიც დაიწყება.

”კიზაშის” ევროპული ვარიანტი ბენზინზე მომუშავე ოთხცილინდრიანი ძრავით აღიჭურვება, რომლის მუშა მოცულობაც 2.4 ლიტრია. ძრავს 6-საფეხურიანი მექანიკური კოლოფი, ან უსაფეხურო ვარიატორი უწყვილდება. პირველი ვერსიით, ძრავის სიმძლავრე 185 ცხენის ძალას აღწევს, მეორე ვერსიით კი - 178 ცხენის ძალას.

მოგვიანებით, იაპონური კომპანია ევროპელ მყიდველს 3.2-ლიტრიანი ძრავით და ჰიბრიდული დანადგარით აღჭურვილ ”კიზაშისაც” შესთავაზებს. ოღონდ, ჯერ დაზუსტებული არაა, თუ კონკრეტულად როდის მოხდება ეს.

”სუზუკი” მყიდველს სრულამძრავიანი ტრანსმისიით აღჭურვილ ”კიზაშისაც” შესთავაზებს. ეს სისტემა უნივერსალურია. კერძოდ, ჩვეულებრივ, ის წინაამძრავიან რეჟიმში იმუშავებს, სპეციალურ ღილაკზე დაჭერის შემდეგ კი ტრანსმისია მაბრუნ მომენტს ოთხივე ბორბალს გაუნაწილებს. ამასთან, საგზაო პირობების შესაბამისად, უკანა ბორბლებს საერთო მომენტის 50 პროცენტამდე გადაეცემა.

ევროპაში ”სუზუკი კიზაში” კონკურენციას გაუწევს ”ფორდ მონდეოს”, ”სიტროენ C5-ს”, ”ტოიოტა ავენსისს”, ”ფოლკსვაგენ პასატს” და ”ოპელ ინსინიას”. ახალი სედანის ევროპული ვერსიის ფასი მოგვიანებით გამოცხადდება.

”სააბი” ჰოლანდიურმა ”სპაიკერმა” შეიძინა

Tiny Spyker snaps up Saab

30 იანვარი

”სპაიკერის” მთავარი აღმასრულებელი ვიქტორ მიულერი (მარცხნივ) და ”სააბის მთავარი აღმასრულებელი იან-აკე იონსონი

.........................................................................

პატარა ჰოლანდიურმა საავტომობილო კომპანია ”სპაიკერმა”, რომელიც სპორტული, ექსკლუზიური ავტომობილების წარმოებითაა ცნობილი, ”ჯენერალ მოტორსისგან” შვედური ”სააბის” შეძენაზე თანხმობა მიიღო. არადა, ამ გარიგებამდე რამდენიმე დღით ადრე, პრესაში გაჩნდა ვარაუდი იმის შესახებ, რომ ამერიკული კომპანია თავისი შვედური შტოს დახურვას აპირებდა.

”სპაიკერი” ძველი კომპანიაა, თუმცა ის 1920 წელს დაიხურა და 2000 წელს განაახლა მუშაობა. ”სააბის” შეძენაში მას 74 მილიონი დოლარის გადახდა მოუწევს. გარდა ამისა, შვედური კომპანიის აქციებსაც შეიძენს, რაშიც 326 მილიონს გადაიხდის. გარიგების კიდევ ერთი პირობა ისაა, რომ ევროპის საინვესტიციო ბანკი, ”სააბს” კრედიტის სახით, 400 მილიონ ევროს გამოუყოფს, ამ კრედიტის გარანტი კი შვედეთის მთავრობა იქნება.

”ჯენერალ მოტორსმა” 1989 წელს, ”სააბის” აქციების ნახევარში 600 მილიონი დოლარი გადაიხადა. ამერიკული კომპანიის განცხადებით, ”სპაიკერისთვის” ”სააბის” მიყიდვის კონტრაქტი თებერვლის შუა რიცხვებში გაფორმდება. ამიტომ, შვედური კომპანიის დახურვის პროცესი ამ კონტრაქტის გაფორმებამდე შეჩერდა. და თუ ”სპაიკერი” ვერ შეძლებს დაპირებული თანხის გადახდას, მაშინ ”სააბს” დახურვა არ ასცდება.

მართალია, ”ჯენერალ მოტორსი” ”სააბის” გაყიდვაში გაცილებით ნაკლებ თანხას მიიღებს, ვიდრე თავად აქვს გადახდილი, მაგრამ ”სპაიკერთან” მიღწეული შეთანხმება, ამერიკული კომპანიისთვის მაინც წარმატებულად შეიძლება ჩაითვალოს, რადგან ამ ერთი წლის განმავლობაში, მან თავისი რამდენიმე შტოს გაყიდვა ვერ შეძლო.

შარშან ”გენერლებს” თავიანთი ამერიკული შტოს, კომპანია ”სატურნის” დახურვამ მოუწია. ეს კი მას შემდეგ მოხდა, რაც ავტოსადილერო გიგანტმა ”პენსკე აუტომოტივმა” ”სატურნის” ყიდვა გადაიფიქრა. ჯერჯერობით ისევ გაურკვეველია ”ჰამერის” ბედი. ამ კომპანიის შეძენა ჩინელებს სურთ, თუმცა საბოლოო ხელშეკრულების გაფორმება რამდენჯერმე გადაიდო. ”ჯენერალ მოტორსმა” გადაიფიქრა თავისი ევროპული შტოს - ”ოპელის” (და მასთან ერთად, ვოქსჰოლისაც) გაყიდვა.

რაც ”სააბი” შეიძინა, ”ჯენერალ მოტორსს” მისგან ზარალის მეტი არაფერი მიუღია. არადა, შვედური კომპანია წარმოებაში ინოვაციურ ტექნოლოგიებს იყენებს და მისი ავტომობილებიც ყოველთვის მაღალი ხარისხით, თუმცაღა, შედარებით მაღალი ფასითაც გამოირჩევა. ”სააბის” შესაძლო დახურვის ერთადერთი მოტივი ის იყო, რომ ამერიკულ კომპანიას არ სურდა, მოწინავე ტექნოლოგიები კონკურენტი მწარმოებლების ხელში აღმოჩენილიყო.

”სპაიკერის” მთავარი აღმასრულებელი ვიქტორ მიულერი, ვინც ჰოლანდიური კომპანია ათი წლის წინ აღადგინა, აცხადებს, რომ ნორმალურ სიტუაციაში, ”სააბს”
”სპაიკერი” თავად უნდა შეეძინა. ის გარიგებამდე 5 დღის განმავლობაში, ”ჯენერალ მოტორსთან” ინტენსიურ მოლაპარაკებას აწარმოებდა და როგორც თავად განაცხადა, აღნიშნულ პერიოდში, 15 საათზე მეტი არ სძინებია.

”ნორმალურ ეკონომიკურ გარემოში, ”სააბი” ალბათ თავად იყიდდა ”სპაიკერს”. ეს შესანიშნავი ბრენდია და ვფიქრობ, მისი კრახი, უხეირო მმართველობის ყველაზე გამორჩეული ნიმუშია ავტოინდუსტრიის ისტორიაში. ბოლო 20 წლის განმავლობაში, სწორი მმართველობის შემთხვევაში, ”სააბს” თავისუფლად შეეძლო, შვედური ”აუდი” გამხდარიყო. მას მართავდა ხალხი, რომლებსაც ვერაფრით გაეგოთ ამ ბრენდის არსი და კომპანიას მუდმივად საივესტიციო შიმშილში ამყოფებდნენ, რის გამოც, მან განვითარება ვერ შეძლო”, - ამბობს ანალიტიკურ კომპანია ”IHS გლოუბლ ინსაითის” ანალიტიკოსი ტიმ ურკუჰარტი.

თავის მხრივ, ”ჯენერალ მოტორსმაც” აღიარა, რომ ”სააბის” მართვისას ბევრი შეცდომა იყო დაშვებული, რამაც შვედური კომპანია ლამის კრახამდე მიიყვანა. ამერიკული კომპანიის ვიცე აღმასრულებელი ბობ ლუცი ამბობს, რომ უკეთესი ინვესტიციების და სწორი საწარმოო სტრატეგიის შემთხვევაში, ”სააბი” გაცილბით უფრო განვითარებული კომპანია იქნებოდა.

”სპაიკერი” პატარა ფირმაა, რომელშიც სულ 100 ადამიანია დასაქმებული. ჰოლანდიური კომპანია წლიურად მხოლოდ 43 სუპერ ავტომობილს ამზადებს, რომლებიც ხელით შრომით მზადდება. მისი საბაზრო ღირებულება 85 მილიონ დოლარს შეადგენს. შედარებისთვის, ”სააბში” დასაქმებულთა რაოდენობა 3 400-ს აღწევს.

ამ ორ კომპანიას ერთი საერთო აქვს - ისინი წაგებაზე მუშაობენ. ”სააბმა” შარშან 21 000-ზე ნაკლები ავტომობილი გამოუშვა, რაც წინა წლის მაჩვენებელზე 77 პროცენტით ნაკლებია. შარშანვე, შვედურმა კომპანიამ 400 მილიონი ევრო იზარალა. შარშან, ”ჯენერალ მოტორსმა” ”სააბის” მოძველებული ტექნოლოგიები და ორი მოძველებული მოდელის საწარმოო ხაზები ჩინურ BAIC-ს მიჰყიდა, თუმცა ამის მიუხედავად, ”სპაიკერის” სურვილი, შეეძინა შვედური კომპანია, ოდნავაც არ განელებულა.

Friday, January 29, 2010

ატელიე EDAG-ი ჟენევისთვის ახალ ”მსუბუქ ავტომობილს” ამზადებს

EDAG To Introduce Updated Light Car at Geneva

29 იანვარი

შარშან,ჟენევის საავტომობილო შოუზე, გერმანულმა საინჟინრო ფირმა EDAG-მა, რომელიც მთელს მსოფლიოში თავისი კონცეპტუალური მოდელებითაა ცნობილი, კონცეპტუალური მოდელი ”ლაით ქარ” (მსუბუქი ავტომობილი) წარმოადგინა, რითაც სპეციალისტების დიდი ყურადღება გამოიწვია.

კონცეპცია იმით იყო საყურადღებო, რომ მასში, ელექტროძრავი და ლითიუმ-იონური აკუმულატორების ბლოკი, ავტომობილის ძირზე იყო მოთავსებული. ფირმის პრეს რელიზში ეწერა, რომ ამ ძალური დანადგარებით, ერთჯერადი დამუხტვით, ავტომობილს 150 კილომეტრის გავლა შეეძლო.

კონცეპციაში ისიც საინტერესო იყო, რომ მისი სტრუქტურის 100 პროცენტი ბაზალტის ბოჭკოს კომპოზიტისგან იყო დამზადებული, რომელიც სრულ გადამუშავებას ექვემდებარება. ეს მასალა ალუმინზე მსუბუქი, კარბონის კომპოზიტზე გაცილებით იაფია და რაც მთავარია, იმავე თვისებებით ხასიათდება, როგორებიც ავტოინდუსტრიაში ამჟამად ფართოდ გამოყენებად მასალებს აქვს.

რა თქმა უნდა, კონცეპციაში დიზაინის მხრივაც სხვა ბევრი სიახლეც იყო. მაგალითად, გარემო პირობების შესაბამისად, ავტომატურად რეგულირებადი განათების სისტემა და ინტერიერი, რომელშიც მაჩვენებლების დაფა, მძღოლის პარამეტრების შესაბამისად, იოლად რეგულირდება.

და აი, ჟენევის წლევანდელი შოუსთვის, გერმანული ატელიე იმავე კონცეპციის გაგრძელებას, უფრო სწორედ კი უნივერსალურ პლატფორმას ამზადებს. ეს იქნება ერთგვარი ნახევარფაბრიკატი, რომელშიც არაერთი ინოვაციის გამოყენება იგეგმება. რაც მთავარია, პლატფორმა მსუბუქი მასალებისგან მზადდება და ის კომპაქტური და საშუალო ზომის ავტომობილების ასაგებად იქნება გამოსადეგი. თავად პლატფორმა 1 200 კილოგრამს იწონის და ის იმავე ძალური დანადგარითაა აღჭურვილი, როგორიც EDAG-მა შარშანდელ კონცეპციაზე გამოიყენა.

კომპანიის განცხადებით, ახალი პლატფორმის წარმოებისთვის, შედარებით მცირე საინვესტიციო პაკეტიც საკმარისი იქნება. თუმცა, ამ პაკეტის მოცულობა ჯერ დაზუსტებული არაა. სამაგიეროდ, ცნობილია, რომ ამ კონცეპციის შემუშავებისას, ატელიე ერთდროულად რვა პარტნიორის მხარდაჭერით სარგებლობდა.

EDAG-ის განცხადებით, ახალი კონცეპცია ”მსუბუქი ავტომობილი” პატარა კომპანიებისთვის მისწრება იქნება, რადგან მცირე კაპიტალდაბანდებით, ამ პლატფორმაზე მცირესერიული წარმოების აწყობა არავითარ პრობლემას არ წარმოადგენს. და რაც მთავარია, საბოლოო პროდუქტიც არ იქნება ძვირი.

ამერიკელებმა ელექტრომობილებისთვის უნივერსალური პლატფორმა დაამზადეს

Trexa

29 იანვარი

ამერიკულმა კომპანია ”ტრექსამ”, ელექტრომობილებისთვის მოდულური უნივერსალური პლატფორმა შეიმუშავა, რომელსაც ნებისმიერ მსურველს მიჰყიდის, ვისაც საკუთარი ავტომობილის შექმნა სწადია. ელექტროძრავის გარდა, პლატფორმა აკუმულატორების ბლოკითა და მართვის ელექტრონიკითაა აღჭურვილი.

პლატფორმის მზიდი ელემენტის შესაქმნელად, ”ტრექსას” სპეციალისტებმა ფოლადის, ალუმინისა და კარბონის ბოჭკოებით არმირებული თერმოპლასტი გამოიყენეს. მყიდველს სამი სხვადასხვა ბაზის (1625, 2032 და 2438 მმ) მქონე პლატფორმებს შესთავაზებენ.

პლატფორმა ორი ელექტროძრავითაა აღჭურვილი, რომლებიც ენერგიას ლითიუმ-იონური აკუმულატორების ბლოკისგან ღებულობენ. მათში შენახული ენერგია საკმარისია იმისათვის, რომ ამ პლატფორმის ბაზაზე დამზადებულმა ელექტრომობილმა, დაახლოებით 170 კილომეტრის გავლა შესძლოს.

ამასთან, ”ტრექსას” პლატფორმის ბაზაზე შექმნილი ავტომობილი, ადგილიდან 100 კმ/სთ სიჩქარის აკრეფას დაახლოებით 8 წამში შესძლებს, მისი მაქსიმალური სიჩქარე კი 160 კმ/სთ-ს მიაღწევს. აკუმულატორების დამუხტვა საყოფაცხოვრებო ელექტროქსელიდანაა შესაძლებელი. 240-ვოლტიანი ქსელიდან დამუხტვისას, აკუმულატორების მარაგი სრულად 4 საათში ივსება.

სხვათა შორის, ”ტრექსა” იმითაცაა ცნობილი, რომ მისმა სპეციალისტებმა, ჰიბრიდული ”ტოიოტა პრიუსისთვის”, ლითიუმ-იონური აკუმულატორების ბლოკი შექმნა, რომლითაც იაპონურ კომპანიას ნაკლებად ეფექტური, ნიკელ-მეტალოჰიდრიდული აკუმულატორები უნდა შეეცვალა. ეს ბლოკიც საყოფაცხოვრებო ქსელიდან იმუხტება და რაც მთავარია, მისი მეშვეობით, მნიშვნელოვნად გაუმჯობესდება ”პრიუსის” დინამიკური მახასიათებლები. კერძოდ, ასეთი ბლოკით აღჭურვილი ჰიბრიდის სიჩქარე, მხოლოდ ელექტროძრავით გადაადგილებისას, 88 კმ/სთ-მდე გაიზრდება, მისი სვლის სიშორე კი 50 კილომეტრს მიაღწევს. თუმცა, ისიც აღსანიშნავია, რომ ლითიუმ-იონური აკუმულატორები ავტომობილის ფასსაც გაზრდის, რაც ამ სისტემის მასობრივ წარმოებაში გამოყენების ალბათობას ამცირებს.

ჯერჯერობით უცნობია, როდის დაიწყებს ”ტრექსა” თავისი უნივერსალური პლატფორმის წარმოებას და რა ეღირება ის.

ასეთი იქნება პეჟო 209?

Peugeot 209

29 იანვარი

”პეჟო” წელს დაარსებიდან 200 წლის იუბილეს აღნიშნავს და ამასთან დაკავშირებით, ჟენევის საავტომობილო გამოფენისთვის, კონცეპტუალურ მოდელ SR1-ს ამზადებს, რომლის გარეგნობაშიც, ფრანგული კომპანიის ხელმძღვანელთა განცხადებით, ”ლომების” ახალი კორპორატიული სტილის შტრიხების დანახვა შეიძლება.

ამ განცხადების გამოქვეყნებიდან რამდენიმე დღეში კი ინტერნეტში გაჩნდა კომპიუტერული ფოტოები იმ ავტომობილისა, რომელიც სავარაუდოდ, სუბკომპაქტურ ჰეჩბეკ 208-ს შეცვლის და ბაზარზე მალე 209-ს სახელით წარსდგება.

რა თქმა უნდა, ამ ეტაპზე ამ ავტომობილის შესახებ არც ტექნიკური მონაცემები არსებობს და არც სხვა დეტალები. ზუსტად არც ისაა ცნობილი, თუ როდის აპირებს მის პრემიერას ფრანგული კომპანია. სამაგიეროდ, ახლავე შეიძლება ვარაუდი, რომ 209-ს გარეგნობაში SR1-ს დიზაინის ბევრ ელემენტს ვიხილავთ.

”პეჟოს” ხელმძღვანელობა არ მალავს, რომ თავის სვტომობილებში სასწრაფოდ აპირებს ახალი სტილის ელემენტების დანერგვას, რათა ძირეულად შეიცვალოს ძველი კორპორატიული სტილი, რომელიც უარყოფითად აისახება კომპანიის გაყიდვებზე.

ამ კომპიუტერულ სურათზე კარგად ჩანს, თუ რომელი ელემენტები გადაინაცვლებს სერიულ ავტომობილებზე კონცეპტუალური SR1-დან. პირველ რიგში, ესაა რადიატორის ბადე, წინა ფარები და წინა ბამპერში ჩაყოლებული ორი სამკუთხა ჰაერამღები. ახალი სტილი ავტომობილის უკანა ნაწილშიც შესამჩნევია - ესაა უკანა დიდრონი შუშა და ასევე დიდი ზომის ფარები.

მთლიანობაში, ორკარიანი ავტომობილი უფრო სპორტულად გამოიტურება, ვიდრე მისი წინამორბედი. ეს სპორტულობა სხვა მოდელებზეც შესამჩნევი იქნება და ალბათ, ინტერიერსაც შეეხება.

”პეჟო 209” პოპულარული 207-ის ტრადიციების გამგრძელებელი უნდა გახდეს და ეს ტრადიცია, პირველ რიგში, ახალი ავტომობილის პოპულარობაზე უნდა აისახოს. კომპანიაში იმედოვნებენ, რომ ახალი სტილის დამკვიდრება დადებითად აისახება გაყიდვებზე.

მოსალოდნელია, რომ ”პეჟო 209-ს” პირველად პარიზის წლევანდელ ავტო შოუზე, ან მერმის, ჟენევაში ვიხილავთ.

Thursday, January 28, 2010

”კარლსონი” საკუთარ ავტომობილებს გამოუშვებს

Carlsson to Launch C25 Model

28 იანვარი

გერმანული კომპანია ”კარლსონი” აქამდე სხვა კომპანიების მიერ გამოშვებული ავტომობილების ტიუნინგით იყო დაკავებული, თუმცა ცოტა ხნის წინ, მისმა ხელმძღვანელობამ გერმანიის ავტოტრანსპორტის ფეგერალური სამსახურიდან, საკუთარი ავტომობილების წარმოების ლიცენზია აიღო და გამოაცხადა, რომ ჟენევის საავტომობილო შოუზე, პირველ საკუთარ კონცეპტუალურ მოდელს, ”კარლსონ C25-ს” გვიჩვენებს.

ეს ავტომობილი ”მერსედეს-ბენცის” SL 600-ის ბაზაზე იქმნება და ის სუპერ გრან ტურიზმოს კლასს შეესაბამება. მისი V12 ორტურბოიანი ძრავი 753 ცხენის ძალას და 1 320 ნიუტონმეტრს გამოიმუშავებს, თუმცა მაქსიმალური მომენტი 1 150 ნიუტონმეტრითაა შეზღუდული. ამ აგრეგატის დახმარებით, ავტომობილი ადგილიდან 100 კმ/სთ სიჩქარის აკრეფას 3.7 წამში შეძლებს, მისი მაქსიმალური სიჩქარე კი 352 კმ/სთ-ს მიაღწევს.

კომპანიის მთავარი აღმასრულებელი მარკუს შუსტერი აცხადებს, რომ ”კარლსონი” ავტომობილებს მხოლოდ შეკვეთებით დაამზადებს. ამასთან წლევანდელი საწარმოო პროგრამა მთლიანად გაწერილია. ანუ, იმ ავტომობილებზე, რომელთა წარმოებაც წელს იგეგმება, შეკვეთები უკვე მიღებულია.

”მსოფლიოში საკმაოზე მეტი კომპანიაა, რომლებიც მყიდველს ისეთ ავტომობილებს სთავაზობენ, რომელთა გამოყენებაც, საერთო სარგებლობის გზებზეც შეიძლება და რბოლებშიც. თუმცა, კონკურენციის მიუხედავად, ასეთი ავტომობილების წარმოება ჩვენც გადავწყვიტეთ”, - ამბობს შუსტერი. მისი თქმით, ავტომობილი უსაფრთხოების თანამედროვე სისტემებით აღიჭურვება და თავის მგზავრებს უმაღლესი დონის კომფორტითაც უზრუნველყოფს.

”კარლსონი” წლიურად მხოლოდ 25 ცალი C25-ის წარმოებას გეგმავს. მართალია, კომპანია თავისი სუპრ ავტომობილის ფასს არ აქვეყნებს, მაგრამ დასძენს, რომ წლიურად ერთსადაიმავე ქვეყანაში, ერთ ცალ C25-ზე მეტის გაყიდვას არ გეგმავს.

Wednesday, January 27, 2010

ჟანგიანი ”ბუგატი” 260 000 ევროდ გაიყიდა

25 იანვარი

პარიზში, ლონდონურმა სააუქციონო სახლ ”ბონჰემის” მიერ გამართულ აუქციონზე, ძველი და დაჟანგული ”ბუგატი ბრეშა ტაიპ-22”, რომელმაც 70 წელზე მეტი, შვეიცარიის ერთ-ერთი ტბის ფსკერზე გაატარა, სოლიდურ ფასად გაიყიდა. შარშან ეს ავტომობილი, რომელიც 1925 წელსაა გამოშვებული, ტბის ფსკერზე მყვინთავებმა აღმოაჩინეს. სააგენტო ბლუმბერგის ცნობით, დაჟანგულ მანქანაში მყიდველმა 260 500 ევრო გადაიხადა, რაც ავტომობილის სასტარტო სააუქციონო ფასზე 30 000 ევროთი მეტია.

ეს ავტომობილი მისმა მფლობელმა 1936 წელს მიატოვა. ეს მაშინ მოხდა, როდესაც მისი შვეიცარიაში გადაყვანა და იქ გაყიდვა სურდა. მაგრამ, საზღვრის გადაკვეთისას გაირკვა, საბაჟო გადასახადი იმდენად მაღალია, რომ ავტომობილის ღირებულებასაც გადაფარავდა.

მფლობელმა საბაჟოს გადახდა ვერ შეძლო და ”ბუგატი” საბაჟოზე მიატოვა. საბაჟო სამსახურს კი მიტოვებული საქონლის განადგურებას კანონი ავალდებულებდა. მებაჟეებმაც ”ბრძნული” გადაწყვეტილება მიიღეს და ავტომობილი, რომელიც დღეს ანტიკვარია, ტბაში გადაუძახეს. მას შემდეგ, ”ბუგატი ბრეშა ტაიპ-22-მა” ტბის ფსკერზე, ზედაპირიდან 53 მეტრის სიღრმეზე ”ბინადრობდა”.

”ბონჰემის” სპეციალისტები ირწმუნებიან, რომ ტბიდან ამოტანილი და ჟანგის მიერ შეჭმული ავტომობილის მხოლოდ 20 პროცენტი ექვემდებარება აღდგენას. რაც შეეხება ფულს, რომელიც აუქციონერებმა ამ ავტომობილში მიიღეს, ქველმოქმედებას მოხმარდება.

დაჟანგული ”ბუგატის” გარდა, აუქციონზე კიდევ დაახლოებით 90-მდე იშვიათი ავტომობილი იყო გამოტანილი, რომელთა საერთო ღირებულებამაც 15 მილიონი ევრო შეადგინა. თუმცა, მათგან მხოლოდ ნახევარი გაიყიდა. არგაყიდულთა შორისაა 1932 წელს გამოშვებული და სრულად აღდგენილი ”ალფა რომეო 8C-2300 მონცა”, რომლის სასტარო ფასიც 1.3 მილიონი ევრო იყო და ერთადგილიანი ”ტალბო დარაკ გრან პრი”, რომლის სასტარტო ფასი არც გამოცხადებულა.

Monday, January 25, 2010

”ფიატი” ”ალფას”, ”მაზერატის” და ”აბარტს” ერთ საბრენდო ჯგუფში გააერთიანებს

Fiat will merge Alfa, Maserati and Abarth into single brand group

25 იანვარი

”ფიატმა” ახალი საბრენდო სუბ ჯგუფი ჩამოაყალიბა, რომელშიც პრემიუმ და სპორტული ავტომობილების მწარმოებელი სამი კომპანია - ”ალფა რომეო”, ”მაზერატი” და ”აბარტი” გააერთიანა.

ჯგუფს ”მაზერატის” ახლანდელი მთავარი აღმასრულებელი ჰარალდ ვესტერი უხელმძღვანელებს, ვინც იმავდროულად, ”ფიატის” ჯგუფისა და ”ფიატის” საავტომობილო ჯგუფის მთავარი ტექნიკური მოხელის თანამდებობებზეც მუშაობს. ახალი დანიშვნის შემდეგაც, ის თავის ყველა პოსტს შეინარჩუნებს. ”ალფა რომეოს” ახლანდელი მთავარი აღმასრულებელი სერჯო კრავერო, ”ფიატის” ჯგუფის წარმოების დაგეგმარებისა და კონცეპციების განყოფილებას ჩაუდგება სათავეში.

”ფიატის” მთავარი აღმასრულებელი სერჯო მარკიონე ამბობს, რომ ამ სამი მარკის გაერთიანების შედეგად, ”ალფა რომეოს”, ”მაზერატისა” და ”აბარტის” წარმოების დონე კიდევ უფრო გაუმჯობესდება. მისი თქმით, ეს ლოგიკური ნაბიჯი იყო, რადგან სამივე მარკის პროგრამები სპორტული ავტომობილების წარმოებაზეა მომართული, მათი გაერთიანება კი ”სამივე მარკის პროდუქციის საერთო შტრიხებს გაუსვამს ხაზს და მათ სხვა ბრენდებისგან განსხვავებული სტრატეგიით აამოქმედებს”.

რესტრუქტურიზაცია განსაკუთრებით სასარგებლო ”ალფა რომეოსთვის” უნდა იყოს, რომელიც დღეისათვის მძიმე ფინანსურ მდგომარეობაშია. არსებული მონაცემებით, მილანური კომპანია, ბოლო ათწლეულის განმავლობაში, წლიურად, დაახლოებით 200-400 მილიონ ევროს ზარალობდა, რაც ”ფიატის” ჯგუფს მძიმე ტვირთად აწევს. სწორედ წამგებიანი ბიზნესია ის ძირითადი ფაქტორი, რომ ”ალფა რომეომ” მისთვის მეტად პერსპექტიულ, ამერიკულ ბაზარზე დაბრუნება რამდენჯერმე გადადო.

რაც შეეხება ვესტერს, ახალ ჯგუფის ხელმძღვანელის პოსტზე, მისი მთავარი დანიშნულება იქნება ”მაზერატისა” და ”ალფა რომეოს” საწარმოო პროგრამების უნიფიცირება და ორივე ბრენდის საერთო სტრატეგიული გეგმის შემუშავება. ტურინელთა მიზანი ისაა, რომ ორივე კომპანიის ავტომობილების წარმოებისას, მაქსიმალურად იქნას გამოყენებული ურთიერთშენაცვლებადი ნაწილები და აგრეგატები.

და მაინც, ვესტერის მთავარი მიზანი, ”ალფა რომეოს” მომავლის განსაზღვრაა. ამ მიმართულებით, ორი სავარაუდო სცენარი არსებობს:

პირველის მიხედვით, მას შემდეგ, რაც კომპანია ჟენევის საავტომობილო გამოფენაზე ჰეჩბეკ ”ჯულიეტას” წარადგენს და მოგვიანებით, მის გაყიდვებსაც დაიწყებს, ”ალფა რომეოს” დაფინანსება შეუწყდება. ეს კი იმას ნიშნავს, რომ მილანელები თავიანთ ფლაგმან ”ალფა 166-ს” აღარ შეცვლიან და ცოტა ხანში, მის წარმოებასაც შეწყვეტენ. ამგვარად, ბრენდის ორ მთავარ მოდელად ”ჯულიეტა” (რომელიც მოდელ 147-ს ცვლის) და ”მიტო” დარჩება. მილანელები ასევე 159-ის, კუპე ”ბრერას”, ”სპაიდერისა” და GT-ს წარმოებას გააგრძელებენ.

ამ სცენარის ბოლო, ”ალფა რომეოს” კარგს არაფერს უქადის და კომპანიას, რომელიც 1910 წელს დაარსდა და 1986 წელს ”ფიატის” ჯგუფში შევიდა, აღსასრულამდე მიაცილებს.

მეორე, უფრო პერსპექტიული სცენარით, ”ალფა რომეოს” D და E სეგმენტების მოდელებისთვის (შესაბამისად,159 და 166), ”ფიატი” ამერიკული ”კრაისლერის” შესაბამისი ავტომობილების პლატფორმებს გამოიყენებს. ამასთან, ამ ორივე ავტომობილს ამერიკული კომპანიის საწარმოები გამოუშვებენ.

ახალი ჯგუფის ხელმძღვანელობა ”ალფა რომეოს”, ”მაზერატის” და ”აბარტის” პერსპექტივებს შეისწავლის, რის შემდეგაც, ”ფიატი” ამ ჯგუფის სამოქმედო გეგმას, რომელიც 2010-2014წლებში იმოქმედებს, აპრილში გამოაქვეყნებს. სწორედ მაშინ გადაწყდება, თუ რა ბედი ელის ”ალფა რომეოს”.

ბოლო დეკადაში, ”ალფა რომეოს” გაყიდვები მნიშვნელოვნად შემცირდა, რაც მისი მოდელების გადაბერების შედეგია. პარალელურად, უსახსრობის და სხვა პრობლემათა გამო, ახალი მოდელების წარმოების დაწყებაც გვიანდება. თუმცა, შარშან მილანური კომპანიის გაყიდვები 8.1 პროცენტით, 110 545 ცალამდე გაიზარდა, რაც მეტწილად ბაზარზე ჰეჩბეკ ”მიტოს” გამოჩენის შედეგია. შედარებისთვის, 2000 წელს, ”ალფა რომეოს” გაყიდვების მოცულობამ 203 000 ავტომობილი შეადგინა.

ჰარალდ ვესტერი

..................................

ვესტერი 51 წლის გერმანელი ინჟინერია, რომელიც ”ფიატში” 2004 წელს, ავსტრიული კომპანია ”მაგნა შტეირიდან” გადავიდა. საავტომობილო ბიზნესში თავისი კარიერა მან 1991 წელს, ”ფოლკსვაგენში” დაიწყო, სადაც კონცეპტუალური მოდელების განყოფილების გენერალურ მენეჯერად დაინიშნა. მოგვიანებით, ის ”ფოლკსვაგენის” პრემიუმ ბრენდ ”აუდიში” გადაიყვანეს, სადაც მისი ხელმძღვანელობით, ალუმინისძარიანი მოდელი A2 შეიქმნა.

2000-2001 წლებში ვესტერმა ”ფიატის” ჯგუფში შემავალ ”ფერარიში” იმუშავა, სადაც პროდუქციის განვითარების დირექტორის თანამდებობა ეკავა. 2002 წელს კი ”მაგნა შტეირში” გადავიდა, რომელშიც საინჟინრო შტაბის პრეზიდენტისა და ტექნიკური მოხელის თანამდებობები შეითავსა.

2004 წელს მან ”ფიატში” გადაინაცვლა, სადაც ჯგუფის მთავარი ტექნიკური მოხელის პოსტი ჩააბარეს. 2008 წელს ის ”მაზერატის” მთავარი აღმასრულებელი გახდა, ხუთი თვის შემდეგ კი ამ თანამდებობას ”აბარტის” მთავარი აღმასრულებლობაც შეუთავსა.

”ჯენერალ მოტორსს” ჩინეთში ახალი ქარხანა სჭირდება

GM expects to need new China plant

25 იანვარი

”ჯენერალ მოტორსს” ჩინეთში მალე ახალი ქარხნის მშენებლობა მოუწევს, რისი მიზეზიც, მსოფლიოს უკვე უდიდეს საავტომობილო ბაზარზე, გაყიდვების დიდი ტემპით ზრდაა. თუმცა, ამერიკული კომპანიის ჩინური შტოს პრეზიდენტი კევინ უეილი დასძენს, რომ ქარხნის მშენებლობის დასრულება წელს ვერ მოესწრება.

შარშან ”გენერლებმა” ცისქვეშეთში 1.83 მილიონი ავტომობილი გაჰყიდეს, რაც წინა წლის მაჩვენებელზე 66.9 პროცენტით მეტია. აღსანიშნავია, რომ შარშან ჩინური საავტომობილო ბაზარი ”მხოლოდ” 46 პროცენტით გაიზარდა. ამერიკული კომპანიის მარკეტოლოგები ვარაუდობენ, რომ მათი პროდუქციის გაყიდვები ჩინურ ბაზარზე წელსაც გაგრძელდება.

”ჩვენ მოველით, რომ წელს ჩინეთში 2 მილიონზე მეტ ავტომობილს გავყიდით. ამჟამად საკმაო საწარმოო სიმძლავრეები გვაქვს იმისათვის, რომ მზარდი მოთხოვნა დავაკმაყოფილოთ, მაგრამ ისიც ფაქტია, რომ მალე, ახალი ქარხანა დაგვჭირდება. წინააღმდეგ შემთხვევაში, ჩვენს ავტომობილებზე გაზრდილი მოთხოვნის დაკმაყოფილებას ვეღარ შევძლებთ”, - შანჰაიში, ახალ ”ბიუიკ ექსცელ XT-ს” პრეზენტაციაზე, როიტერთან საუბრისას განაცხადა უეილმა და დასძინა, რომ ისურვებდა, რომ ახალი ქარხანა წელსვე ამოქმედებულიყო, თუმცა ეს ფიზიკურად შეუძლებელია.

”ჯენერალ მოტორსი” ჩინეთში, თავის იქაურ პარტნიორთან, ”SAIC მოტორ კორპორეიშნთან” ერთად, მსუბუქ ავტომობილებს, მინივენებს და პიკაპებს აწარმოებს, საავტომობილო ჯგუფ FAW-თან ერთად კი მსუბუქ კომერციულ ავტომობილებს უშვებს.

მსოფლიო საავტომობილო ბაზრისგან განსხვავებით, რომელიც სერიოზულ კრიზისს განიცდის, ჩინეთის ავტო ბაზარი ზრდის მაღალ ტემპს ინარჩუნებს, რასაც ქვეყნის მთავრობის ხელშემწყობი პოლიტიკა განაპირობებს. ხელის შეწყობა კი იმაში გამოიხატება, რომ დაწესებულია მნიშვნელოვანი საგადასახადო შეღავათები იმ მყიდველებისთვის, რომლებიც მცირე ზომის, ეკონომიურ ავტომობილებს ყიდულობენ. ამის შედეგი ისაა, რომ ჩინეთში ავტომობილების გაყიდვები ყოველთვიურად იზრდება.

ანალიტიკოსები ვარაუდობენ, რომ ჩინეთში ავტომობილების გაყიდვების ზრდა წელსაც შენარჩუნდება, ოღონდ, ზრდის ტემპი, სავარაუდოდ, 10 პროცენტამდე შემცირდება. ცისქვეშეთის ბაზრის ყველაზე დიდი მოთამაშე SAIC-ია, რომელიც წელს 3 მილიონი ავტომობილის გაყიდვას იმედოვნებს. შედარებისთვის, შარშან ამ კომპანიამ 2.72 მილიონი ავტომობილის რეალიზება შეძლო.

”ბიუიკ ექსცელ XT” მეორე ახალი ავტომობილია, რომელიც ”გენერლებმა” ჩინეთში ამ თვეში წარადგინეს. ეს ავტომობილი ჩინეთში 134 900-დან 185 900 იუანამდე (დაახლოებით 19 760-27 230 დოლარი) ეღირება. ამერიკული კომპანია აცხადებს, რომ 2014 წლამდე, ჩინურ ბაზარზე, 30 ახალ და განახლებულ ავტომობილს შეიტანს.

”ქანთრიმენი” - პირველი ქროსოვერი ”მინის” ისტორიაში

MINI Countryman

25 იანვარი

ათწლეულების განმავლობაში, ”მინი” მხოლოდ ერთი ტიპის, მეტად პოპულარული ჰეჩბეკების წარმოებით იყო განთქმული და სწორედ ეს ავტომობილი იყო ის მთავარი მიზეზი, რის გამოც, ახალი საუკუნის დასაწყისში, ის გერმანულმა ”ბეემვემ” შეიძინა. აქედან მოყოლებული, ”მინის” ახალი ცხოვრება დაიწყო.

რამდენიმე წელი, მის საწარმოო პროგრამაში მხოლოდ ჰეჩბეკ ”მინის” და მის ბაზაზე დამზადებულ მოდიფიკაციების წარმოება შედიოდა. თუმცა პარალელურად, გერმანული კომპანია თავისი ინგლისური შვილობილის განვითარებაზე ზრუნავდა. შარშან კი გამოქვეყნდა გეგმა, რომელიც ”მინის” სამოდელო გამის არნახულ გაფართოებას ითვალისწინებს.

ერთ-ერთი მოდელი, რომელსაც პოტენციური მყიდველი მოუთმენლად ელოდა და რომელსაც ”მინის” გაყიდვების მნიშვნელოვნად გაზრდა შეუძლია, საქალაქო ქროსოვერია, რომლის კონცეპტუალურ ვერსიებსაც ”ბეემვე” ბოლო წლებში დიდ საავტომობილო გამოფენებზე გვიჩვენებდა. და აი, 20 იანვარს კომპანიამ თავისი ახალი ავტომობილის, ქროსოვერ ”ქანთრიმენის” შესახებ პირველი ოფიციალური ინფორმაცია და ფოტოები გამოაქვეყნა.

უნდა ითქვას, რომ თავის დროზე, როდესაც ”პორშემ” თავის ისტორიაში პირველი ქროსოვერის, ”კაიენის” წარმოების გადაწყვეტილება მიიღო, ბევრი ამას კრიტიკით შეხვდა - ვინ წარმოიდგენდა, თუ მანამდე მხოლოდ სპორტული და სარბოლი ავტომობილების წარმოებით განთქმული კომპანია, მისთვის უჩვეულო სეგმენტში ფეხის მოკიდებას შეძლებდა. მაგრამ ”კაიენი”, რომელიც ”ფოლკსვაგენთან” მჭიდრო კოოპერაციის შედეგად შეიქმნა, შტუტგარტელებისთვის ერთგვარ ლოკომოტივად იქცა, რომელმაც მათ უზარმაზარი მოგება მოუტანა.

თუმცა, ”მინის” შემთხვევაში, ქროსოვერის წარმოებასთან დაკავშირებით, კრიტიკა არავის დასცდენია. პირიქით, ეჭვიც არავის ეპარება იმაში, რომ ”ქანთრიმენის” წარმოებით, კომპანიის ისტორიაში განვითარების ახალი ეტაპი დაიწყება და ეს ავტომობილი მას დიდ მოგებას მოუტანს. ამის მთავარი გარანტია კი ის გარემოებაა, რომ კომპაქტური ქროსოვერების ბაზარი მთელს მსოფლიოში მაღალი ტემპით იზრდება.

რა თქმა უნდა, კონცეპტუალური ”ქროსმენისგან” (ასე ეწოდებოდა ”ქანთრიმენის” კონცეპტუალურ ვერსიას), ”ქანთრიმენი” საკმაოდ განსხვავდება, თუმცა გაბარიტული ზომებით ისინი იდენტურები არიან. მთავარია, რომ ახალი ავტომობილი ”მინის” კორპორატიულ სტილშია შესრულებული და ჰეჩბეკისგან მას პირველ რიგში, გაზრდილი კლირენსი და დიზაინის ზოგიერთი ელემენტი განასხვავებს.

ძველისგან ახალი ავტომობილის მთავარი განმასხვავებელი მისი წინა ნაწილია სხვა ფორმის ფარებით და ამობერილი კაპოტით. ”ქანთრიმენს” უფრო დაბერილი საბორბლე თაღებითაც იცნობთ. სახურავი კი მას ძირითადისგან განსხვავებულ ფერში აქვს შეღებილი. დიზაინერებს თითქმის არ შეუცვლიათ ”მინის” უკანა ნაწილი.

ევროპაში ”მინი” მყიდველს ”ქანთრიმენს” ხუთი 1.6-ლიტრიანი ძრავით შესთავაზებს, რომელთაგან სამი ბენზინზე მუშაობს, ორი კი - დიზელზე. მათი სიმძლავრე 90-დან 184 ცხენის ძალამდეა. ამ აგრეგატების მიერ გამომუშავებულ მაბრუნ მომენტს კი 6-საფეხურიანი მექანიკური გადაცემათა კოლოფი გადაამუშავებს. ბენზინისძრავიანი ვერსიებისთვის ასევე შესაძლებელია 6-საფეხურიანი ავტომატური კოლოფის (სტეპტრონიკი) გამოყენება.

”ქანთრიმენის” ტოპ ვერსია აღიჭურვება 1.6-ლიტრიანი ოთხცილინდრიანი ტურბოძრავით, რომელსაც საწვავი პირდაპირ წვის კამერაში მიეწოდება და რომელზეც, საწვავი ნარევის განაწილებას ელექტრონიკა აკონტროლებს.

”ქანთრიმენის” საბაზო ვერსიები წინაწამყვანბორბლიანი ტრანსმისიითაა აღჭურველი, თუმცა ოპციის სახით, კომპანია მყიდველს სრულამძრავიან ტრანსმისიასაც (All4) შესთავაზებს, რომელშიც, წინა და უკანა ღერძებს შორის, მაბრუნ მომენტს ელექტროჰიდრავლიკური ქურო თანაბრად ანაწილებს. მაგრამ საჭიროების შემთხვევაში, მომენტის 100 პროცენტი მხოლოდ უკანა ღერძს მიეწოდება.

საინტერესოა, რომ ”ქანთრიმენის” სტანდარტულ აღჭურვილობაში შევა ენერეგიის რეკუპერაციის სისტემა, რომელიც დამუხრუჭების დროს გამოყოფილ ენერგიას აგროვებს და აკუმულატორებს აწვდის. ასევე სტანდარტულ ეკიპირებაში შედის ძრავის გათიშვისა და გაშვების სისტემა და ინდიკატორი, რომელიც მძღოლს კარნახობს, ეკონომიური მართვის დროს, გადაცემის რომელ საფეხურზე გადართვაა ყველაზე ოპტიმალური.

”ქანთრიმენის” სალონი, ”მინის” სხვა მოდელების სალონებისგან პრაქტიკულად არ განსხვავდება. ის იგივე მასალებითაა გაწყობილი. იგივეა ხელსაწყო-მაჩვენებლების დაფაც. თუმცა, უნდა აღინიშნოს, რომ ინტერიერის მოცულობა საგრძნობლადაა გაზრდილი. ერთადერთი სერიოზული ცვლილება უკანა სავარძელს შეეხო, რომელიც სტანდარტული შესრულებით ორადგილიანია, თუმცა ზედმეტი საფასურის გადაუხდელად, მყიდველს სამადგილიანის შეკვეთის საშუალება ექნება. ორივე შემთხვევაში, უკანა სავარძლები იკეცება, რითაც საბარგულის მოცულობა 350-დან 1170 ლიტრამდე იზრდება.

ოპციის სახით, ”მინი” თავის კლიენტებს შესთავაზებს: პანორამულ სახურავს, ადაპტირებად წინა ფარებს, სპორტულ, 10 მილიმეტრით დადაბლებულ საკიდარს და ბორბლების ფართო არჩევანს, რომელთა ზომებიც 16-დან 19 დუიმამდე იქნება.

”მინი” თავისი ახალი ავტომობილის პრემიერას მარტში, ჟენევის საავტომობილო შოუზე ჩაატარებს, მის გაყიდვებს კი შემოდგომაზე დაიწყებს. რაც შეეხება ფასს, ის გაყიდვების დაწყებამდე ცოტა ხნით ადრე გამოცხადდება. ახლავე შეიძლება იმის ვარაუდი, რომ პრემიუმ სეგმენტის სუბკომპაქტური ქროსოვერი (არადა, მისი სახელი პირდაპირი მნიშვნელობით, სოფლელს ნიშნავს), ისევე როგორც ”მინის” სხვა პროდუქცია, საკმაოდ ძვირი ეღირება. თუმცა, თუ გავითვალისწინებთ, რომ ინგლისური მარკის სხვა ავტომობილები, სიძვირის მიუხედავად, მყიდველთა შორის პოპულარობით სარგებლობს, ძნელი მისახვედრი არ იქნება, რომ ”ქანთრიმენს” კარგი მომავალი აქვს.

Wednesday, January 20, 2010

”შევროლე ვოლტი” 30 000 დოლარზე ნაკლები ეღირება

Chevy Volt to Be Priced Under $30 000

21 იანვარი

ჯერ კიდევ მაშინ, როდესაც ”ჯენერალ მოტორსმა” ჰიბრიდულ ”შევროლე ვოლტთან” დაკავშირებით პირველი ინფორმაცია გამოაქვეყნა, პოტენციური მყიდველი ყველაზე ხშირად ერთ კითხვას სვამდა - რა ეღირება ეს ავტომობილი, რამდენს ხარჯავს ამერიკული კომპანია წარმოებაში მის დასანერგად და რამდენად მომგებიანი იქნება ეს პროექტი.

კარგა ხანს, ”გენერლები” აცხადებდნენ, რომ ”ვოლტის” ფასი 40 000 დოლარის ფარგლებში იქნებოდა, რამაც კიდევ უფრო მეტი კითხვა წარმოშვა, რომელთაგან მთავარი მის კონკურენტუნარიანობას ეხებოდა - თანამედროვე ჰიბრიდული ბაზრის ლიდერი ”ტოიოტა პრიუსი” ამაზე თითქმის ორჯერ ნაკლებად იყიდება.

და აი, დეტროიტის ავტო შოუს დღეებში, ”ჯენერალ მოტორსის” მთავარმა აღმასრულებელმა ედ უაითექრმა გამოაცხადა, რომ ”შევროლე ვოლტის” ფასი დოლარზე ნაკლები იქნება, რაც მწარმოებელს მისი სარგებლით გაყიდვის საშუალებას მისცემს. რაც არანაკლებ მნიშვნელოვანია, ეს ფასი პოტენციურ მყიდველსაც არ დააფრთხობს.

რა თქმა უნდა, ავტომობილის ფასი მეტწილად იმაზეა დამოკიდებული, თუ რა ტექნოლოგიები გამოიყენება მისი წარმოებისას. უაითექრის ამ განცხადების შემდეგაც, აღნიშნული ზღვარი საბოლოო არაა და არაა გამორიცხული, რომ ეგრეთ წოდებული, სვლის გაზრდილი სიშორის მქონე ავტომობილი, მისი წარმოების მომენტისთვის, კიდევ უფრო გაიაფდეს. ეს კი იმაზე იქნება დამოკიდებული, თუ რა დამატებით შეღავათებს შესთავაზებს დეტროიტული გიგანტი თავისი პროდუქციის მყიდველს.

ჰიბრიდული ავტომობილების მაღალ ფასს, პირველ რიგში მათში გამოყენებული აკუმულატორების სიძვირე განაპირობებს, მაგრამ თუ ”გენერლები” ავტომობილის ფასში აკუმულატორების ღირებულებას არ გაითვალისწინებენ და ამ აკუმულატორებს მყიდველს ლიზინგით შესთავაზებენ, სიტუაცია რადიკალურად შეიცვლება. მეორე მხრივ, ასეთ ვარიანტს მინუსიც აქვს - მოსაწყობი იქნება სპეციალური სერვის ცენტრები, სადაც დამუხტვის ნაცვლად, აკუმულატორებს დამუხტულებით შეცვლიან. ოღონდ, ეს ავტომობილების საექსპლუატაციო ღირებულებას გაზრდის, რადგან ენერგიის ღირებულებას ლიზინგის შესატანიც დაემატება. და მაინც, ამის მიუხედავად, ”ვოლტის” ექსპლუატაცია და ენერგომომარაგება, ჩვეულებრივი შიდაწვისძრავიანისაზე იაფი დაჯდება.

იყო ლაპარაკი იმაზეც, რომ ”შევროლე ვოლტის” წარმოება ”ჯენერალ მოტორსს” წაგების მეტს არაფერს მოუტანდა. ამერიკულ კომპანიაში იმ ვარიანტსაც განიხილავდნენ, რომ ”ვოლტისთვის” შემუშავებული ტექნოლოგიები უფრო ძვირადღირებული ავტომობილების წარმოებისთვის გამოეყენებინათ, რომლებიც ”კადილაკის” ბრენდით გაიყიდებოდა.

მაგრამ უაითექრი შეუვალია და დაბეჯითებით აცხადებს: ”ჩვენ საქმეში ფულის წასაგებად არ ვართ. უკვე საკმარისი სამუშაო გავწიეთ იმისათვის, რომ ეს პროექტი წარმატებული იყოს. ამ ავტომობილს 30 000-ზე იაფად გავყიდით და სარგებელსაც მივიღებთ”.

”შევროლე ვოლტის” გაყიდვა წელს დაიწყება და პირველად ეს ავტომობილი კალიფორნიის ბაზარზე გამოჩნდება. ამჟამად, ”ჯენერალ მოტორსი” რამდენიმე კალიფორნიულ კომპანიასთან აწარმოებს მოლაპარაკებას, რისი მიზანიც ამ შტატში ”ვოლტის” ექსპლუატაციითვის საჭირო ინფრასტრუქტურის შემუშავებაა.

”აშკარაა, რომ კალიფორნია ”ვოლტისთვის” მთავარი ბაზარია. ჯერ ერთი, ამ შტატში, ამერიკაში ყველაზე დიდი საავტომობილო ბაზარია. მეორეც, კალიფორნიაში ახალ, გარემოსადმი მეგობრული ტექნოლოგიების დანერგვას ყველაზე მეტად უწყობენ ხელს და ჩვენთვის ყველაზე ხელსაყრელი, ”ვოლტის” სწორედ ამ ბაზარზე დამკვიდრებაა”, - ამბობს ”ჯენერალ მოტორსის” პრეზიდენტი ბრენტ დევარი.

”შევროლე ვოლტი” ლითიუმ-იონური აკუმულატორებითაა აღჭურვილი, რომელთა დახმარებითაც, ავტომობილს მხოლოდ ელექტროძრავით, 65 კილომეტრის გავლა შეუძლია. და თუ შიდაწვის ძრავს და მასთან დაკავშირებულ გენერატორსაც ავამოქმედებთ, სვლის სიშორე თითქმის ათჯერ გაიზრდება.

”ფოლკსვაგენი” აშშ-ში 800 000 ავტომობილის გაყიდვას გეგმავს

20 იანვარი

ოღონდ, ამ მიზნის მიღწევა 2018 წლისთვის იქნება შესაძლებელი. დეტროიტის ჩრდილოამერიკულ საერთაშორისო საავტომობილო შოუზე გამოსვლისას, გერმანული კომპანიის ამერიკული შტოს შეფმა სტეფან ჯეკობიმ განაცხადა, რომ ”ფოლკსვაგენი” ამერიკელ მყიდველთან ახლებური ურთიერთობის დამყარებას აპირებს.

შარშან ”ფოლკსვაგენმა”, თავის ლუქსის კლასის ბრენდ ”აუდის” ჩათვლით, ამერიკაში 297 537 ავტომობილი გაჰყიდა, რაც წინა წლის მაჩვენებელზე (313 581) დაახლოებით 5 პროცენტით ნაკლებია. ეს იმ დროს, როდესაც აშშ-ის ბაზარზე გაყიდული ავტომობილების რაოდენობა, 21 პროცენტით გაიზარდა.

ჯეკობის თქმით, მისი კომპანიის გაყიდვების ზრდა, ამერიკის ბაზარზე ახალი მოდელების შეტანამ უნდა განაპირობოს. ამათგან პირველი ახალი, საშუალო ზომის სედანი (სურათზე) იქნება, რომელიც სპეციალურად ამერიკის ბაზრისთვის, იქაური მყიდველის გემოვნების შესაბამისადაა შექმნილი. ამ ავტომობილის პრემიერა დეტროიტის ავტო შოუზე გაიმართა, სადაც კომპანიამ გამოაცხადა, რომ მისი წარმოება ჩატანოგაში (შტატი ტენესი)დაიწყება. აღნიშნული ქარხნის მშენებლობა ამ წლის ბოლოს დასრულდება და ის პირველ ავტომობილებს მერმისიდან გამოუშვებს. თუმცა, მისი გაყიდვები იმავე წლის ბოლომდე არ დაიწყება.

ჯეკობის განცხადებით, მისი კომპანია ამჟამად ქარხნის პერსინალის აყვანითაა დაკავებული, რომელთა რაოდენობაც 2 000-ს მიაღწევს. ჩატანოგას ქარხნის ნომინალური საწარმოო სიმძლავრე წლიურად 150 000 ცალი ავტომობილია, რომელთაგან 25 000-35 000 ცალი, კანადისა და მექსიკის ბაზრებზე გაიყიდება.

პარალელურად, ”ფოლკსვაგენი” თავის დილერებს ახალი მოდელების მისაღებად ამზადებს და მათი დახმარებით, სერვისის ახალი სისტემის ჩამოყალიბებასაც გეგმავს. ახალ მოდელთაგან, პირველი განახლებული ”ტუარეგი” იქნება, რომელიც ამერიკულ ბაზარზე ამ წლის ბოლოს გამოჩნდება. მას მოჰყვება განახლებული ”ჯეტა”, რომლის გაყიდვებიც მერმის უნდა დაიწყოს. მერმისვე, ამერიკაში განახლებული ”ხოჭოც” გამოჩნდება.

”ამერიკაში იმ ავტომობილებს გავყიდით, რომლებიც ამერიკელებს სურთ. ჩვენ იქ ძირითადად საშუალო კლასის ავტომობილების შეტანას ვაპირებთ” - ამბობს ჯეკობი. ამერიკელი მყიდველისთვის სასურველ ავტომობილებში, ის შესაბამისი სტილის, ფასისა და ღირებულების მოდელებს გულისხმობს.

ჯეკობი ამბობს, რომ ამერიკელ ავტომოყვარულთა შორის, ჯერაც დიდი პოპულარობით სარგებლობს ძველი ”ხოჭო” და მიკროავტობუსი, რომლის მფლობელებიც არაერთ კლუბში არიან გაერთიანებულნი და ერთმანეთს, თავიანთი ავტომობილების შესახებ, ყველანაირ ინფორმაციას უზიარებენ.

პარალელურად, ჯეკობი ამბობს, რომ მისი კომპანიის ამოცანაა, ამერიკელმა მყიდველმა, ”ფოლკსვაგენის” ავტომობილებზე ჩამოყალიბებული, არცთუ საუკეთესო შეხედულება შეცვალოს. ამ მხრივ, მთავარი კრიტერიუმები ავტომობილების ხარისხი და გამძლეობაა. და ამ მხრივაც, ვოლფსბურგელები წინ მიიწევენ - თუ 2008 წელს, ავტომფლობელთა გამოკითხვის საფუძველზე, სტატისტიკის ორგანიზაცია ”კონსამერ რეპორტსი”, ამერიკელებს ”ფოლკსვაგენის” მხოლოდ სამი მოდელის ყიდვას ურჩევდა, შარშან ეს მაჩვენებელი რვა მოდელამდე გაიზარდა. თუმცა, ჯეკობის ისიც გაცნობიერებული აქვს, რომ ერთჯერადი წარმატებით, მყიდველის შეხედულების შეცვლა შეუძლებელი იქნება და ამას მუდმივი ხასიათი უნდა მიეცეს.

დღეისათვის, ”ფოლკსვაგენს” აშშ-ში 580 დილერი ჰყავს, თუმცა ჯეკობი ამბობს, რომ მის კომპანიას კიდევ 40 დილერი სჭირდება. მალე ვოლფსბურგელები ამერიკაში ახალ სარეკლამო კამპანიას დაიწყებენ, რომლის პირველი სერიოზული აქციაც სუპერ ბოულის (ამერიკული ფეხბურთის ფინალური შეხვედრა) სპონსორობაა.

”ტოიოტა” ჰიბრიდების წარმოებას გააორმაგებს

20 იანვარი

ტოიოტა საი

..................................

”ტოიოტას” დაგეგმილი აქვს, რომ 2011 წლისთვის, იმ ჰიბრიდული ავტომობილების წარმოება გააორმაგოს, რომლებშიც ჰიბრიდულ სისტემაში ბენზინის შიდაწვის ძრავი და ელექტროძრავია გაერთიანებული. ჰიბრიდული ავტომობილების ბაზარი მთელს მსოფლიოში მუდმივად იზრდება და კომპანია იმედოვნებს, რომ მერმის მილიონ ცალ ასეთ ავტომობილს გამოუშვებს.

ახლახანს, ”ტოიოტამ” იაპონიაში თავისი ახალი ჰიბრიდომობილის, სედან ”საის” (ეს ლექსუს HS-ის ჰიბრიდული ვარიანტია) პრეზენტაცია ჩაატარა, რომელმაც მნიშვნლოვნად უნდა გაზარდოს ჰიბრიდების სეგმენტში მსოფლიოს ბაზარზე საკუთარი წილი. კომპანიაში თვლიან, რომ წლიურად მილიონი ჰიბრიდის წარმოება ადვილად მიღწევადი მიზანია, რის საფუძველსაც თუნდაც ის ფაქტი იძლევა, რომ იაპონიაში ყველაზე გაყიდვადი ავტომობილი ”ტოიოტა პრიუსია”. უფრო მეტიც, ეს ავტომობილი ძალიან პოპულარულია მსოფლიოს უდიდეს, ამერიკულ საავტომობილო ბაზარზეც.

სააგენტო ნიკეის ცნობით, იაპონიაში ჰიბრიდული ავტომობილების პოპულარობას ის ფაქტი განაპირობებს, რომ ამომავალი მზის ქვეყანაში, ჰიბრიდული ავტომობილების მყიდველებს, სახელმწიფო სოლიდური შეღავათებით უზრუნველყოფს და ამასთან, ასეთი ავტომობილების მწარმოებლები, მნიშვნელოვანი საგადასახადო შეღავათებითაც სარგებლობენ.

ტოიოტა პრიუსი

..........................................

ჯერჯერობით, ჰიბრიდულ ბაზარზე ”ტოიოტას” ბევრი კონკურენტი არ ჰყავს. ეს იმის ბრალია, რომ ამ კლასის ავტომობილების წარმოების დაწყება სხვა კომპანიებს დაუგვიანდათ. ამის მიზეზი ისაა, რომ ეს კომპანიები ჰიბრიდული ავტომობილების წარმოებას, კარგა ხანს უპერსპექტივო საქმედ მიიჩნევდნენ. ”ტოიოტამ” ამ ბიზნესის წამოწყება ყველაზე ადრე სცადა და ამით მოგებულიც დარჩა. ამ კომპანიის მაგალითმა კი სხვა კომპანიებიც დააინტერესა. ჰოდა, სწორედ 2010 წლიდანაა მოსალოდნელი ჰიბრიდული ბაზრის მნიშვნელოვანი გამოცოცხლება.

ამ მხრივ, სხვებს სიდიდით მეორე იაპონურმა კომპანია ”ჰონდმა” დაასწრო, რომელმაც შარშან ჰიბრიდული ”ინსაითის” წარმოება დაიწყო და ასე განსაჯეთ, ცოტა ხნით, ”პრიუსს” სეგმენტის ლიდერობაც კი ჩამოართვა. თუმცა, ამ უკანასკნელმა მალევე აღადგინა სტატუს ქვო, რაშიც ხელი იმ გარემოებამ შეუწყო, რომ ”ტოიოტამ” მესამე თაობის ”პრიუსის” წარმოების დაწყების შემდეგაც გააგრძელა მეორე თაობის მოდელის წარმოება. ეს ავტომობილი კი ფასით ადვილად უწევს კონკურენციას ”ინსაითს”.

ნიკეის ცნობით, უახლოეს წლებში, ”ტოიოტა” რამდენიმე ახალი ჰიბრიდული ავტომობილის წარმოებას დაიწყებს და მათი რეალიზაციის არეალსაც გააფართოებს. შესაბამისად, ასეთი ავტომობილებისთვის ახალი ქარხნების მშენებლობაც იგეგმება. მაგალითად, ევროპისთვის, წელს იაპონური კომპანია მოდელ ”აურისის” ჰიბრიდული ვერსიის წარმოებას გეგმავს. ამისთვის კი შერჩეულია ლონდონიდან ჩრდილოეთით, 200 კილომეტრში მდებარე ქალაქ დერბის ქარხანა.

ნიკეის ინფორმაციით, ”ტოიოტას” მიერ შარშან წარმოებული ჰიბრიდული ავტომობილების რაოდენობა 500 000-ს მიაღწევს (ზუსტი ინფორმაცია ჯერჯერობით არ ვრცელდება), რაც კომპანიის მთლიანი წარმოების დაახლოებით 8 პროცენტია.

დაკიდევ, ამჟამად, ”ტოიოტა” ჰიბრიდულ ავტომობილებს, იაპონიის გარდა, აშშ-ში, ჩინეთში, ტაილანდსა და ავსტრალიაში აწარმოებს.

”პეჟოს” საიუბილეო სახეცვლილება და სიახლეები

Peugeot's 200th anniversary heralds a huge year ahead

18 იანვარი

ფრანგულ კომპანია ”პეჟოს”, რომელიც ევროპის მეორე უდიდესი საავტომობილო კონგლომერატ ”PSA პეჟო სიტროენის” ნაწილია, წელს დაარსებიდან 200 წლის იუბილეს აღნიშნავს. ამ ღირსშესანიშნავ თარიღთან დაკავშირებით, ”ლომები” დიდ ღონისძიებებს გეგმავენ.

”დაიმლერის” შემდეგ, ”პეჟო” მსოფლიოს მეორე ყველაზე ხნიერი ავტომწარმოებელი, სიდიდით მეათე ავტოკომპანიაა და რაც მთავარია, მოტოციკლების, ველოსიპედების და სატვირთო ავტომობილების ჩათვლით, მსოფლიოში სატრანსპორტო საშუალებათა ყველაზე მრავალფეროვანი გამით გამოირჩევა.

იმასთან დაკავშირებით, რომ არსებობის მე-300 ასწლეულს იწყებს, კომპანიამ თავისი ემბლემის - ყალყზე შემდგარი ლომის ახლებური ვერსია შექმნა. ეს ლოგო ”პეჟოს” ნაწარმს 1858 წლიდან ამშვენებს, განახლებული ლოგოთი კი ახალ ცხოვრებას იწყებს განახლებული დევიზით, ”პეჟო მოუშნ ენდ ემოუშნ” (პეჟო - მოძრაობა და ემოცია).

დეტროიტის ჩრდილოამერიკულ საერთაშორისო საავტომობილო შოუზე (NAIAS - ნორთ ამერიკენ ინტერნეიშნლ აუტო შოუ), ფრანგულმა კომპანიამ თავისი ახალი კონცეპტუალური მოდელი - ჰიბრიდული სპორტქარი SR1 წარადგინა, რომელიც, პეჟოს” ხელმძღვანელთა განცხადებით, მისი ახალი კორპორატიული სტილის განვითარების პირველი ეტაპია.

”პეჟოს” მიზნად აქვს დასახული ამბიციური ამოცანა - 2015 წელს გახდეს მსოფლიოში სიდიდით მე-7 ავტომწარმოებელი. თანამედროვე ავტოინდუსტრიაში უაღრესად გამკაცრებული კონკურენციის პირობებში, სამი ადგილით წინ წაწევა ძალიან ამბიციური მიზანია და ფრანგული ლომები ამის მიღწევას საწარმოო პროგრამის გამრავალფეროვნებით და შესაბამისად, ბაზარზე ახალი პროდუქტების წამოწევით აპირებენ.

დაკიდევ, ”პეჟომ” უკვე წამოიწყო ახალი აქცია, რომლის მიზანიც, მყიდველის მიზიდვაა. აქციას საკმაოდ უცნაური სახელი აქვს - ”მიუ ბაი პეჟო”.

მოკლე ისტორია

კომპანია ”პეჟოს” არსებობა 1810 წლიდან იღებს სათავეს, როდესაც ჟან-პიერ და ჟან-ფრედერიკ პეჟოებმა თავიანთი მამის წისქვილი სამჭედლოდ და ფოლადის სადნობ საწარმოდ გადააკეთეს. ასე დაიწყო პეჟოების ოჯახის ინდუსტრიული ერა. რას აღარ უშვებდა მათი კომპანია - ლითონის ნაკეთობებს, ხელსაწყოებს, სამუშაო იარაღებს, მარილის, ყავის და წიწაკის საფქვავებს, ველოსიპედებს, სკუტერებს, მოტოციკლებს და ავტომობილებს და კომერციულ მსუბუქ ავტომობილებს. ყველა ამ სფეროში, ”პეჟოს” ნაწარმი ხარისხით გამოირჩეოდა, მისი წარმოება ინოვაციური იყო, მის საწარმოებში კი მუშაობის რკინისებრი დისციპლინა იყო დამყარებული.

განახლებული ემბლემა

”პეჟოს” მსოფლიოში ერთ-ერთი ყველაზე ორიგინალური ლოგო აქვს - ყალყზე მდგარი ლომი. ის კომპანიის პროდუქციას 1858 წლიდან ამშვენებს, ავტომობილებზე კი ამ ემბლემას ყოველთვის დიზაინის ელემენტის როლი ეკისრა.

განახლებული ლოგო ”პეჟოს” დიზაინერების მიერაა შექმნილი. ლომის გამოსახულება უფრო გამარტივებული, ელეგანტური და დინამიურია. ლოგოს ნაწილი გაპრიალებულია, ნაწილი კი მქრქალია. ემბლემა ლურჯ ფონზე ზის. ეს ფერი კომპანიის დროშის ფერია. დროშის ფერიც ოდნავ გამუქდა. ემბლემის ქვეშ კომპანიის წარწერა მდებარეობს, რომელიც ასევე ლურჯადაა შესრულებული.

პირველი ავტომობილი, რომელიც ახალი ემბლემით შეიმკობა, სპორტული RCZ-ია, რომლის წარმოებაც წელს, მეორე კვარტალში დაიწყება.

მიუ ბაი პეჟო

”მიუ ბაი პეჟო” არის სერვისის მობილური სისტემა, რომელსაც ფრანგული კომპანია როგორც თავის, ასევე თავისი კონკურენტების პროდუქციის მყიდველს სთავაზობს. სერვისი ეხება როგორც ავტომობილებს, ასევე მსუბუქ კომერციულ მანქანებს, სკუტერებს, დელოსიპედებს და მოტოციკლებს.

სულერთია, გყავთ, თუ არა მანქანა, ხართ, თუ არა, ”პეჟოს” პროდუქტის მფლობელი და საერთოდ, აპირებთ, თუ არა ამ კომპანიის პროდუქციის შეძენას. ”მიუ ბაი პეჟო” ნებისმიერ შემთხვევაში მოგემსახურებათ. ამისათვის საჭიროა სპეციალური საკრედიტო ბარათის შეძენა, მასზე წინასწარ თანხის შეტანა, რის შემდეგაც, გეძლევათ ეგრეთ წოდებული მობილური ერთეულები და თქვენთვის სერვისის კარი გახსნილია. ამ მობილური ერთეულების გამოყენება შეიძლება სატრანსპორტო საშუალებათა დაქირავებასა და პროგრამის სხვა პარტნიორებისგან სხვადასხვა სერვისის შესაძენად.

განსაკუთრებით საინტერესოა პროგრამის პარტნიორების მომსახურებით სარგებლობა. ამ მხრივ, შესაძლებელია: თვითმფრინავის, ან მატარებლის ბილეთის შეძენა, სასტუმროს ნომრის დაქირავება, ან მსოფლიოს ნებისმიერ კუთხეში სამოგზაურო სერვისის ორგანიზება.

”მიუ ბაი პეჟომ” საფრანგეთის რამდენიმე დიდ ქალაქში უკვე გაიარა საცდელი შემოწმება და ახლა, ”პეჟო” მის დანერგვას იწყებს. პირველ რიგში, სერვისს საფრანგეთის მოქალაქეებს შესთავაზებენ. შემდეგ კი ის ევროპის ყველა ქვეყანას მოედება.

კონცეპტუალური SR1

დაბოლოს, ”პეჟოს” მთავარი სიახლე, რომელსაც ის ჟენევის საავტომობილო გამოფენისთვის ამზადებს - კონცეპტუალური SR1.

კომპანიის განცხადებით, ამ ავტომობილში, პირველ რიგში, მისი მომავალი კორპორატიული სტილის შტრიხების დანახვა შეიძლება. რა თქმა უნდა, ამ სპორტული მოდელის გარეგნობის მიხედვით, ძნელია იმის თქმა, რამდენიმე წლის შემდეგ, როგორი იქნება ”პეჟოს” ავტომობილები. თუმცა, იმას ახლავე მივხვდებით, რომ ”ფრანგული ლომების” ახლანდელი სტილისგან არაფერი დარჩება.

დღეს კომპანიაში დიზაინის საქმეს ”სიტროენიდან” გადმოყვანილი ჟილ ვიდალი უძღვება. მისი თქმით, ახალი კორპორატიული სტილის საკვანძო დეტალები, კომპანიის ახალ ავტომობილებზე, უახლოესი ორი წლის განმავლობაში, თანდათან გამოჩნდება. ასეთი ელემენტებია ვიქრო და უფრო განიერი მთავარი მაშუქები, რადიატორის ახალი ბადე (გადმობრუნებული ტრაპეცია), რომელიც ”ასტონ მარტინის” ანალოგიურ ელემენტს მოგვაგონებს, არადა, ინგლისური მარკის ავტომობილების რადიატორებს ნორმალური ტრაპეციის მოყვანილობა აქვთ.

კონცეპტუალური ავტომობილი ჰიბრიდული აგრეგატით აღიჭურვება, რომლის მთავარი ნაწილიც 1.6-ლიტრიანი ბენზინის ძრავია. ამის მაქსიმალური სიმძლავრე 218 ცხენის ძალას აღწევს. მასთან შეწყვილებულია 95-ცხენისძალიანი ელექტროძრავი, რომელსაც დამოუკიდებლადაც შეუძლია მუშაობა. და ბუნებრივია, ამ შემთხვევაში ავტომობილი გამონაბოლქვის გარეშე იმუშავებს. კომბინირებული ციკლით მუშაობისას კი ავტომობილი 4.9 ლიტრ ბენზინს მოიხმარს. ყოველი კილომეტრის გავლისას, ის გარემოს მხოლოდ 119 გრამი ნახშირორჟანგით დააბინძურებს.

ბარემ ისიც ვთქვათ, რომ ორივე ძრავის კომბინირებულად მუშაობისას, ავტომობილის მაქსიმალური სიმძლავრე 313 ცხენის ძალას აღწევს და ის სრულამძრავიანი ხდება (ელექტროძრავი უკანა ბორბლებს ემსახურება).

ინტერიერი იმითაა საინტერესო, რომ მასში მხოლოდ სამი ჩასაჯდომი ადგილია. მაჩვენებლების დაფა მძროლის მხარეს ”იხედება”, რითაც მას საჭირო მონაცემების წაკითხვას და მანიპულაციებსაც უადვილებს. არაა გამორიცხული, რომ კონცეპტქარის ინტერიერის დიზაინის ზოგიერთი ელემენტი მალე სერიულ ავტომობილებზეც ვიხილოთ.

Saturday, January 16, 2010

”ჰონდა CR-Z” - ორადგილიანი ჰიბრიდული ჰეჩბეკი

დეტროიტის ავტო შოუ

16 იანვარი

დეტროიტის ავტო შოუზე, ”ჰონდას” მთავარი ექსპონატია, ჰიბრიდული ორადგილიანი კუპე ჰეჩბეკი ”ჰონდა CR-Z”, რომელიც იმავე სახელით, ოღონდ კონცეპტუალური ვერსიის სახით, პირველად ტოკიოს 2007 წლის ავტო შოუზე გამოჩნდა.

გარეგნულად, ეს ორი ავტომობილი, ერთმანეთისგან პრაქტიკულად არ განსხვავდება. ამ მხრივ, გამონაკლისია წინა ბამპერი, რომელსაც შუაზე, რადიატორის განსხვავებული ბადე ჰყოფს. ამასთან, სერიულ ავტომობილს, კონცეპტუალურთან შედარებით, უფრო დიდი ზომის უკანა ფარები და ნაკლებად დაბერილი საბორბლე თაღები აქვს.

CR-Z ბაზირებულია ჰიბრიდულ მოდელ ”ინსაითის” 115 მილიმეტრით დამოკლებულ პლატფორმაზე. ის აღჭურვილია ოთხცილინდრიანი 1.5-ლიტრიანი ბენზინის ძრავით, რომელიც 122 ცხენის ძალას ავითარებს. ძრავთან შეწყვილებულია ან 6-საფეხურიანი მექანიკური კოლოფი, ან უსაფეხუო CVT ვარიატორი. ჰიბრიდულ სისტემაში ასევე შედის 10-კილოვატიანი ელექტროძრავი, რომელიც ენერგიას ნიკელ-მეტალჰიდრიდული აკუმულატორების ბლოკისგან ღებულობს.

კომპანიის მიერ გავრცელებული ინფორმაციით, ”ჰონდა CR-Z” ადგილიდან 100 კმ/სთ სიჩქარეს 9.7 წამში ავითარებს. მექსნიკური კოლოფით სღჭურვილი ავტომობილი, ტრასაზე 100 კილომეტრს 6.3-7.5 ლიტრი საწვავით გადის, ვარიატორიან ვერსიას კი 6.1-6.5 ლიტრიც ჰყოფნის.

ჰიბრიდული სისტემა სამ რეჯიმში - ნორმალურ, ეკონომიურ და სპორტულ რეჟიმებში მუშაობს. რეჟიმის შერჩევა მძრლოს სპეციალური კლავიშებით შეუძლია, რომლებიც ხელსაწყო-მაჩვენებლების დაფის მარცხენა მხარეს მდებარეობს.რეჟიმის შერჩევის შემდეგ, ელექტრონული სისტემა საჭის მექანიზმსაც შესაბამისად მომართავს. ასევე იცვლება აქსელერატორის მოქმედების რეჟიმი და კონდიციონერისა და ელექტროძრავის მუშაობის დროც. გარდა ამისა, ავტომობილი ასევე აღჭურვილია შიდაწვის ძრავისავტომატურად გათიშვისა და ჩართვის სისტემით, რაც ეკონომიურობას აუმჯობესებს.

”ჰონდა CR-Z” პირველ რიგში, ამერიკული ბაზრისთვისაა განკუთვნილი, სადაც მისი გაყიდვები ზაფხულში დაიწყება. საბაზო კომპლექტაციით, მისი სავაზო ღირებულება 20 000 დოლარზე ნაკლები იქნება.