Friday, July 31, 2009

მანქანა ”სიტროენის” ტანით და ”ფერარის” გულით

Citroen-Ferrari

31 ივლისი


თუ გინახავთ ისეთი ქროსოვერი, ან მინივენი, რომელიც ”სიტროენის” ლეგენდარულ ფურგონ 2CV-ს ბაზაზეა დამზადებული, მის კაპოტქვეშ კი ”ფერარის” მძლავრი ძრავი მუშაობს? 35 წლის ნიკოლო ლამბერტის და 51 წლის მილკო დალა კოსტას, როცა ისინი ძველ ”ფერარი 335 ბერლინეტას” ყიდულობდნენ, ასეთი გიჟური იდეა ჯერ არ ამოძრავებდათ. მერე კი გადაწყვიტეს, ავტოსამყარო გაეკვირვებინათ და საქმესაც შეუდგნენ.

იტალიელ ენთუზიასტებს რალის საკუთარი გუნდი ”ნიმიკ-ი” ჰყავთ და რბოლებზე ხშირი მოგზაურობის გამო, თავიანთ მომავალ შედევრზე მუშაობის შეწყვეტა უწევდათ, რის გამოც, საქმეს ხუთი წელი მოანდომეს. დღეს კი რიგიანად არც იციან, რა უყონ ავტომობილს, რომელიც გარეგნულად ”სიტროენ 2CV-ს” ჰგავს და 290 კმ/სთ სიჩქარეს ავითარებს.

ბარემ იმასაც გეტყვით, რომ ავტომობილი, რომელსაც სახელიც არ აქვს, ადგილიდან 100 კმ/სთ-ს აკრეფას ხუთ წამზე ნაკლებში ახერხებს, ამაში კი მას ”ფერარის” V8 ძრავი ეხმარება, რომლის მაქსიმალური სიმძლავრეც 400 ცხენის ძალაა. ეს აგრეგატი ავტომობილის ბაზაში, ორად-ორი სავარძლის უკანაა მოთავსებული და მის მიერ გამომუშავებულ მაბრუნ მომენტს (ფერარისვე ტრანსმისიის გავლით) უკანა წამყვან ბორბლებს აწვდის.

წარმოიდგინეთ, რა მოუვიდოდა სიფრიფანა შასის, რომელიც სულ რაღაც 12-ცხენისძალიან ძრავზეა გათვლილი. რა თქმა უნდა, მან გაძლიერება მოითხოვა და იტალიელმა ენთუზიასტებმაც ეს მოთხოვნა შეასრულეს. პირველ რიგში, მათ მზიდი ჩარჩო გააძლიერეს, შემდეგ ის გააფართოვეს და ბაზაც დაუგრძელეს.

უცვლელი დარჩა 2CV-ს რადიატორის საფირმო ჰაერამღები, კაპოტი და წინა საქარე მინა. სამაგიეროდ, ორივე კარის უკან, ზორბა ლაყუჩები გამოჩნდა, რომლებიც ძრავის სეგმენტს ”სასუნთქი” გრილი ჰაერით ამარაგებენ.

”ამ მანქანის შექმნას ამდენი დრო მოვანდომეთ და ამჟამად არც ვიცით, რა ვუყოთ. ჯერჯერობით, სიამოვნებას იმით ვღებულობთ, რომ ყველგან ყურადღების ცენტრში ვექცევით. მაგრამ თუ გამოჩნდება ისეთი ვინმე, ვინც საინტერესო ფასს შემოგვთავაზებს, შეიძლება მივყიდოთ კიდეც”, - ამბობს ლამბერტი და დასძენს:

”როცა ”ფერარის” ყიდვა გადავწყვიტეთ, წარმოდგენაც არ გვქონდა, რაში უნდა გამოგვეყენებინა. მაგრამ, ჩვენი გიჟური აზრების გამო, დარწმუნებული ვიყავით, რომ ადრე თუ გვიან, საინტერესო იდეა მოგვაკითხავდა. მერე კი სადღაც 2CV ვნახეთ და მილკომ, ვინც ”სიტროენის” კოლექციონერია, მითხრა, რომ ეს ორი ავტომობილი შეგვეწყვილებინა. ჩვენც მაშინვე შევუდექით საქმეს”...

”ბეემვე” ფრანკფურტის ოკუპაციას ამზადბს

BMW at Frankfurt Auto Show

31 ივლისი

ფრანკფურტის ავტო შოუს დაწყებამდე რამდენიმე კვირა რჩება, ”ბეემვეს” კი უკვე მზად აქვს იქ გამოსაფენი ექსპონატები. თანაც, წელს პირველად მოხდება, რომ ბავარიული კომპანია თავისი სამივე ბრენდის - ”ბეემვეს”, ”მინის” და ”როლს როისის”, ავტომობილებს ერთ დარბაზში მოუყრის თავს.

საკუთრივ ბავარიელთა პავილონში შესაძლებელი იქნება ორი ჰიბრიდული ავტომობილის - ტექნოლოგია ”ექტივჰიბრიდის” მიხედვით შექმნილი მე-7 სერიის სედანისა და სპორტულ ქროსოვერ X6-ის (სურათზე), ასევე მე-5 სერიის GT-სა და X1-ის საწარმოო ვერსიების ხილვა.

და, რაც მთავარია, ბავარიული კომპანია, ფრანკფურტის ავტო შოუს დამთვალიერებლებს პირველად უჩვენებს ეკოლოგიური (მწვანე) სპორტული ავტომობილის კონცეპტუალურ ვერსიას. თუ ზემოთ ჩამოთვლილი ავტომობილების შესახებ, მთელს მსოფლიოში ყველამ უკვე ყველაფერი იცის - მათ შესახებ ბევრი დაიწერა, ”მწვანე სპორტული კონცეპციის” შესახებ ავტოსპორტულმა სამყარომ ორიოდ დღის წინ შეიტყო და ფრანკფურტში მის გამოჩენას ყველა მოუთმენლად დაელოდება.

”მინი” წელს დაარსებიდან 50 წლის იუბილეს აღნიშნავს და ბუნებრივია, ფრანკფურტში, მის სტენდზე, მთავარი თემა სწორედ ეს იქნება. ამასთან დაკავშირებით, ინგლისური კომპანიის სტენდზე დამთვალიერებელს ”მინის” სპეც ვერსიები - ”მინი 50 ქემდენი” და ”მინი 50 მეიფაიერი” დახვდებიან.

დაბოლოს, ”როლს როისი”. ამ კომპანიის სამოდელო გამაში მალე მეორე ავტომობილი - ”გოუსტი” გამოჩნდბა და მისი პირველად ხილვა სწორედ ფრანკფურტში იქნება შესაძლებელი. მას კი მხარს ”ფანტომი” და მის ბაზაზე დამზადებული მოდიფიკაციები (გრძელბაზიანი ფანტომი, კაბრიოლეტი დროპჰედ კუპე და ფანტომ კუპე) დაუმშვენებენ.

”ფიესტა კუპე”, თუ ახალი ”პუმა”?

Ford Puma

31 ივლისი

ახალი ”ფორდ ფიესტა” მეტად წარმატებული ავტომობილია, თითქმის ყველა ბაზარზე, სადაც კი იყიდება, ბესტსელერთა სიაშია და ბუნებრივია, ამერიკული კომპანია ამ წარმატების გამოყენებას ცდილობს - მის ბაზაზე განსხვავებული ძარებით სხვა ავტომობილების გამოშვებასაც აპირებს.

მათ შორის, პირველი ორკარიანი კუპე იქნება, რომელიც ავტომოყვარულებს ერთ დროს მეტად პოპულარულ მინი კუპე ”პუმას” გაახსენებს. ამ პატარა სპორტული ავტომობილის წარმოება 2001 წელს შეწყდა, რის შემდეგაც, მისი თაყვანისმცემლები მოუთმენლად ელიან ბაზარზე ახალი ”პუმას” გამოჩენას.

ჯერ არავინ იცის, ახალი ”ფიესტას” ბაზაზე დამზადებულ კუპეს ”პუმას” დაარქმევენ, თუ ”ფიესტა კუპეს”. ჯერჯერობით, ამ ავტომობილზე მხოლოდ ვარაუდების დონეზე თუ შეიძლება ლაპარაკი, რადგან ”ცისფერი ოვალი” მის შესახებ მცირე ინფორმაციასაც არ ავრცელებს. ვარაუდებით კი იმის თქმა შეიძლება, რომ ”ფიესტა კუპე” იმავე ძრავებს მიიღებს, რომლებიც ჰეჩბეკზე გამოიყენება.

საბაზო ვერსია 1.4-ლიტრიანი ბენზინის ძრავით აღიჭურვება, რომლის მაქსიმალური სიმძლავრეც 95 ცხენის ძალას აღწევს. ძრავების გამაში ასევე 1.6-ლიტრიანი ბენზინის (118 ცხენის ძალით) და 1.4 და 1.6-ლიტრიანი TDCi დიზელის აგრეგატები შევა. ტოპ ვერსია კი ბენზინის 1.6-ლიტრიან ძრავს მიიღებს, რომლის სიმძლავრეც 178 ცხენის ძალას აღწევს. ეა აგრეგატი ახლა შემუშავების სტადიაშია და მას ალბათ C-MAX-სა და შემდეგი თაობის ”ფოკუსზეც” გამოიყენებენ.

ინტერიერშიც, ჰეჩბეკ და კუპე ”ფიესტას” ბევრი არაფერი განასხვავებს. უბრალოდ, სპორტულ ავტომობილს შესაფერისი წინა სავარძლები და საჭის რგოლი ექნება. კუპეს სალონშიც ოთხი სავარძელი მოთავსდება, მაგრამ უკანა სავარძლებზე მხოლოდ მომცრო ტანის მოზრდილები, ან ბავშვები თუ დაეტევიან.

”ფიატს” ”ბერტონე” სანიშო ავტომობილებისთვის სჭირდება

Fiat-Bertone

31 ივლისი

ბერტონეს ბოლო კონცეპტუალური ავტომობილი - მანტიდი

......................................................................

”ფიატი” გაფართოებას აგრძელებს. ცოტა ხნის წინ, იტალიურმა ავტოგიგანტმა ევროკავშირისგან ოფიციალურად მიიღო ამერიკული ”კრაისლერის” შესყიდვის უფლება. მართალია, ტურინელებს ”ოპელის” შეძენა არ გამოუვიდათ, მაგრამ მათი შეფი სერჯო მარკიონე იხტიბარს არ იტეხს და ახლა იტალიური დიზაინ-ატელიე ”ბერტონეს” შეძენასაც ცდილობს.

ერთი შეხედვით, ”ბერტონეს” ტურინული ქარხანა დიდი წარმადობით არ გამოირჩევა - სამცვლიანი მუშაობის შემთხვევაში, იქ წლიურად მხოლოდ 48 000 ავტომობილის წარმოებაა შესაძლებელი. მაგრამ მეორე მხრივ, ”ბერტონე” კონცეპტუალური და ეგრეთ წოდებული სანიშე (ასეთ ავტომობილებს მასობრივი მოდელების ბაზაზე, მაგალითად, საიუბილეო თარიღებთან დაკავშირებით, მცირე სერიებით აწარმოებენ) ავტომობილების წარმოებაზეა დახელოვნებული. სწორედ ესაა ”ბერტონეთი” ”ფიატის” დაინტერესების მიზეზი.

მარკიონეს სურს, რომ სანიშე ავტომობილების წყალობით, ”ფიატის” და მის ჯგუფში შემავალი კომპანიების (ალფა რომეო, ლანჩა და კრაისლერი, ასევე ფერარი) წარმოების მოცულობა მნიშვნელოვნდ გაზარდოს.

იტალიურ პრესაში გავრცელებული ინფორმაციით, თუ ”ბერტონეს” ”ფიატი” შეიძენს, მაშინ მისი ტურინული ქარხანა, მისი ახალი მფლობელისთვის ავტომობილების წარმოებას 2011 წელს შეუდგება.

ცნბისათვის, ”ბერტონეს” შეძენა ასევე იტალიელ ბიზნესმენ ჯანმარიო როსინიოლოს სურს, ვინც ტურინულ ქარხანაში წლიურად ლუქსის კლასის 10 000 ცალი სედანისა და უგზოობის ავტომობილის წარმოებას გეგმავს.

Thursday, July 30, 2009

”ვოლვო” წარმოებისთვის ახალ სედან S60-ს ამზადებს

Volvo S60

30 ივლისი

შვედური კომპანია ”ვოლვო”, რომელიც ჯერაც ”ფორდის” ჯგუფში შედის და რომელსაც მალე ალბათ ჩინური ”ჯილი” შეიძენს, წარმოებისთვის საშუალო ზომის სედან S60-ის მეორე თაობის მოდელს ამზადებს.

წინამორბედისგან განსხვავებით, ახალი ავტომობილი სრულიად განსხვავებულ სტილშია შესრულებული, როგორიც შვედურმა კომპანიამ პირველად დეტროიტის წლევანდელ ავტო შოუზე, კონცეპტუალური S60-ის სახით წარადგინა.

”ვოლვომ” სედან S60-ის წარმოება, ბელგიის ქალაქ გენტის ქარხანაში რვა წლის წინ დაიწყო და ამ პერიოდში 580 000 ცალი ავტომობილი გაჰყიდა. მაგრამ სამი კვირის წინ, S60-ის წარმოება დასრულდა. ამიტომ, ძველი ავტომობილის შემცვლელის გამოჩენას ბევრი ელოდა.

ჯერჯერობით უცნობია ახალი ავტომობილის ტექნიკური მახასიათებლები და მისი ჩამოყალიბებული გარეგნობა. თუმცა, მის ექსტერიერზე გარკვეული წარმოდგენის შექმნა კონცეპტუალური S60-ს მიხედვითაც შეიძლება. ერთი შეხედვით, ის ”იაგუარის” უახლეს C-XF-საც ჰგავს, თუმცა ამაში გასაკვირი არაფერია - სულ ცოტა ხნის წინ, ”იაგუარიც” ”ფორდის” ოჯახის წევრი იყო. თუმცა, ახალ ავტომობილს მხოლოდ მისთვის დამახასიათებელი გარეგნული ნიშნებიც აქვს და ეს პირველ რიგში, მისი რადიატორის ბადეს ეხება, რომელიც ”ვოლვოს” ტრადციულ სტილშია შესრულებული.

ინტერნეტით გავრცელებული ვარაუდით, S60-ის საბაზო ვერსია 1.6-ლიტრიანი ბენზინის ძრავით აღიჭურვება, რომელსაც საწვავი ნარევი პირდაპირ წვის კამერაში მიეწოდება და რომელსაც ტურბოკომპრესორი ემსახურება. დეტროიტში, კონცეპტუალური ავტომობილის პრეზენტაციაზე გამოცხადდა, რომ ეს მომცრო ”წისქვილი” მაქსიმუმ 180 ცხენის ძალას გამოიმუშავებს და 100 კილომეტზე მხოლოდ 5 ლიტრ ბენზინს მოიხმარს. ძრავთან ორდისკოიანი ქუროს მეშვეობით, 6-საფეხურიანი, ნახევრად ავტომატური კოლოფია დაკავშირებული, რომლიდანაც მაბრუნი მომენტი წინა წამყვან ბორბლებს გადაეცემა.

”ვოლვო S60-ის” სერიული ვერსიის პრემიერა ფრანკფურტის მოტორ შოუზეა მოსალოდნელი, მისი გაყიდვები კი მერმის დაიწყება.

”სუზუკი კიზაში” პრემიერისთვის ემზადება

Suzuki Kizashi

30 ივლისი

იაპონურმა კომპანია ”სუზუკიმ” ერთიდაიგივე სახელით სამი განსხვავებული კონცეპტუალური ავტომობილი წარმოადგინა. პირველივე ”კიზაშიმ” ავტოგამოფენების დამთვალიერებელთა დიდი დაინტერესება გამოიწვია, დროთა განმავლობაში კი მან ისეთი სახე მიიღო, როგორიც სერიულ ავტომობილს შეეფერება - ”კიზაში 3” სახელით, ნიუ იორკის ავტოშოუზე გამოჩნდა.

ინტერნეტში გავრცელებული ინფორმაციით, ”კიზაშის” პროტოტიპები უკვე გადის ამერიკის გზებზე ტესტირებას, ახლახანს კი ის პრესის წარმომადგენელებსაც კი უჩვენეს.

იაპონური კომპანიის განსაზღვრებით, ”კიზაში” სპორტული სტილის სედანია, რომელმაც კონკურენცია უნდა გაუწიოს გლობალური ბაზრის საშუალო ზომის ისეთ ბესტსელერებს, როგორებიცაა ”ტოიოტა ქამრი” და ”ჰონდა აკორდი”.

”კიზაში” ბაზირებულია პლატფორმაზე, რომლის სიგრძეც 4.650 მეტრია. ეს კი ”ქამრიზე” 0.165 მეტრით მოკლეა. სამაგიეროდ, ”სუზუკის” სედანს უფრო გრძელი ბაზა აქვს, რისი წყალობითაც, მისი სალონი უფრო ფართოა.

”კიზაშისთვის” გათვალისწინებულია ძრავების ფართო გამა, რომელშიც ბენზინის და დიზელის აგრეგატები შედის. ესენის 2.3 და 3.6-ლიტრიანი ბენზინის და 2.0-ლიტრიანი ტურბოდიზელი. სტანდარტული ტრანსმისია წინა წამყვანბორბლიანია, თუმცა მყიდველს ასევე სრულამძრავიანი ტრანსმისიით აღჭურვილ ”კიზაშისაც” შესთავაზებენ. დამატებითი ოპციის სახით, მყიდველს 6-საფეხურიან, ნახევრად ავტომატურ კოლოფს შესთავაზებენ, რომლის საფეხურებსაც საჭის რგოლზე განლაგებული ბერკეტები ცვლის.

”კიზაშის” წარმოებისთვის, ”სუზუკიმ” იაპონიაში ახალი ქარხან ააგო, რომელიც წარმოებას წელსვე დაიწყებს. ავტომობილის გაყიდვები იაპონიასა და ამერიკაში ერთდროულად, მომავალი წლის დასაწყისში დაიწყება. მოგვიანბით, ამავე ავტომობილის ბაზაზე, უნივერსალის და ჰეჩბეკისძარიანი ვერსიების წარმოებაც დაიწყება, ”კიზაში” კი ევროპასასც ეწვევა.

Wednesday, July 29, 2009

”ბეემვეს” სპორტული ”მწვანე” სიახლე

BMW Green Sports Car Concept

29 ივლისი

გუშინ, მას შემდეგ, რაც საზოგადოებას ფორმულა ერთის მსოფლიო ჩემპიონატის დატოვების შესახებ ამცნო, ”ბეემვემ” ასევე გამოაცხადა, რომ ფრანკფურტის მოტორ შოუსთვის ”მწვანე” სპორტული ავტომობილის კონცეპუალურ ვერსიას წარმოადგენს.

”თანმიმდევრულობა ავტოინდუსტრიაში სულ უფრო მნიშვნელოვანი ხდება, თანმიმდვრული განვითარების მოწმენი თქვენ ფრანკფურტის მოტორ შოუზე, ჩვენს პრეზენტაციაზე გახდებით, როცა სრულიად ახალი ტიპის კონცეპტუალურ ავტომობილს წარმოგიდგენთ. ჩვენი ხედვა ”ეფიციენტდაინემიქსი” გიჩვენებთ, თუ რამდენად ეფექტური შეიძლება იყოს სპორტული ავტომობილი. ის თქვენ გაჩვენებთ, რომ თანმიმდევრულობა ასევე აისახება როგორც დიზაინზე, ასევე გამოყენებული მასალების ხარისხზეც”, - მიუნხენში ჩატარებულ პრესკონფერენციაზე განაცხადა ”ბეემვეს” მმართველთა (დირექტორთა) საბჭოს წევრმა კლაუს დრეგერმა.

მართალია, დრეგერს კონცეპტუალური ავტომობილის სპეციფიკურ დეტალებზე არ უსაუბრია, მაგრამ არსებობს მოსაზრება იმის შესახებ, რომ ის შეიძლება გახდეს წინამორბედი იმ ავტომობილისა, რომელიც ბაზარზე 2012 წელს უნდა გამოჩნდეს და რომელმაც კონკურენცია ”აუდი R8-ს” და ”პორშე 911-ს” უნდა გაუწიოს.

არსებული ვარაუდებით, ბავარიელთა ახალი ”მწვანე” სპორტული ავტომობილი ორადგილიანი, შუაძრავიანი კუპე იქნება, რომელიც ”ბეემვეს” მიერ შემუშავებული, ენერგიის დამზოგავი უახლესი ტექნოლოგიებით აღიჭურვება. ასეთებია მაგალითად, საწვავი ნარევის უშუალოდ წვის კამერაში შეფრქვევის სისტემა, მუხრუჭების ენერგიის რეგენერაციის სისტემა და სტოპ/სტარტ სისტემა, ასევე დახვეწილი აეროდინამიკური პაკეტი.

”ტოიოტა” მინიატურულ ელექტრომობილს ქმნის

Toyota FT-EV

29 ივლისი

”ტოიოტა” წარმოებისთვის ამზადებს მინი ელექტრომობილს, რომელიც მიკროლიტრაჟიანი iQ-ის ბაზაზე მომზადებული კონცეპტუალური FT-EV-ს მიხედვით აიგება. ჟურნალ ”აუტოქართან” საუბრისას, ”ტოიოტას” მთავარმა დიზაინერმა ჰიროკი ნაკაძიმამ განაცხადა, რომ ელექტრომობილი გარეგნულად სრულიად განსხვავებული იქნება iQ-სგან და ის საფუძვლიანად მოდერნიზებულ ინტერიერსაც მიიღებს (სხვათა შორის, iQ-ს სალონს ძალიან ცუდი გამოხმაურებები აქვს, რის გამოც, მისი ინტერიერიც ასევე მალე შეიცვლება).

მინი ელექტრომობილი ლითიუმ-იონური აკუმულატორებით აღიჭურვება, მის მოძრაობას კი ოთხივე ბორბალში ჩამონტაჟებული ელექტროძრავები უზრუნველყოფს. აკუმულატორების ბლოკის ერთი სრული დამუხტვა საკმარისი იქნება იმისათვის, რომ პატარა ელექტრომობილმა 150 კილომეტრი გაიაროს. საყოფაცხოვრებო ქსელიდან აკუმულატორების სრული დამუხტვისთვის კი 8 საათია საჭირო.

ცნობისათვის, ”ტოიოტა iQ ” პირველად ორი წლის წინ ფრანკფურტის მოტორ შოუზე გამოჩნდა, მისი საწარმოო ვერსიის პირველი ჩვენება კი შარშან, ჟენევაში ჩატარდა. რაც შეეხება კონცეპტუალურ FT-EV-ს, რომლის სვლის მარაგიც მხოლოდ 75 კილომეტრია, ის ”ტოიოტამ” პირველად დეტროიტის ავტო შოუზე წელს წარადგინა.

”შევროლე ეჯაილი” დებიუტისთვის ემზადება

Chevrolet Agile

29 ივლისი

”ჯენერალ მოტორსმა” თავისი სრულიად ახალი ჰეჩბეკის, ”შევროლე ეჯაილის” ესკიზები გამოაქვეყნა. ავტომობილი, რომლის წარმოებაც ამ წლის ბოლოს არგენტინაში დაიწყება, ბრაზილიაში, ”ჯენერალ მოტორსის” დიზაინ ცენტრ ”მერკოსურშია” შექმნილი.

ამერიკული კომპანიის დიზაინის დირექტორ კარლოს ბარბას თქმით, ”ეჯაილი” (ცოცხალი, მოძრავი, მარჯვე) ”მომთხოვნი კლიენტისთვის განკუთვნილი ჰეჩბეკია, რომელიც შესანიშნავი გარეგნობით, ფართო ინტერიერითა და მრავალმხრივობით გამოირჩევა და რომელსაც მოსახლეობის სრულიად განსხვავებული კატეგორიების დაკმაყოფილება შეუძლია”.

”ჯენერალ მოტორსის” განცხადბით, ”ეჯაილის” ინტერიერიც და ექსტერიერიც ”შევროლეს” ახალ სტილშია შესრულებული. მასში მძღოლის სავარძელი ჩვეულებრივზე ოდნავ მაღალ პოზიციაზეა განლაგებული, რითაც ქროსოვერის შთაბეჭდილება იქმნება.

”ეჯაილი” კომპანიის პლატფორმა ”გამა II-ზეა” ბაზირებული, რომელსაც წამყვანი წინა ბორბლები აქვს. ბორბლებს შორის ბაზა 2.48 მეტრს აღწევს, მასზე კი, წარმოების დასაწყისში, მხოლოდ ორი ბენზინის ძრავი დაიდგმება - 1.4-ლიტროანი 105 ცხენის ძალით და 1.8-ლიტრიანი 129 ცხენის ძალით.

ახალი ავტომობილის წარმოებისთვის არგენტინის ქალაქ როსარიოში მდებარე ქარხანაც ემზადება. ”ჯენერალ მოტორსის” არგენტინული შტოს დირექტორ მიგელ გარსიას თქმით, ქარხანაში უკვე დამონტაჟებულია რობოტები, რომელთა მომავალ ოპერატორებსაც სპეციალური კურსები უტარდებათ.

ჯერჯერობით, ამერიკული კომპანია ”ეჯაილის” შესახებ ამაზე მეტ ინფორმაციას არ ავრცელებს. ცნობილია მხოლოდ ის, რომ მისი გაყიდვები წლის ბოლოს სამხრეთ ამერიკაში დაიწყება. გავა თუ არა ის სხვა ბაზრებზე, ჯერჯერობით უცნობია.

მოკლედ...

29 ივლისი

***

”როლს როისში” მიაჩნიათ, რომ ინდოეთს ავტოინდუსტრიაში უზარმაზარი პოტენციალი გააჩნია და რომ, მალე ეს ქვეყანა მათთვის მთავარი ბაზარი გახდება. უფრო მეტიც, ”ეკონომიკ ტაიმსის” ინფორმაციით, ინგლისური კომპანია, რომელიც ”ბეემვეს” ჯგუფში შედის, მალე ბავარიული კომპანიის მიმწოდებელთა ქსელის გამოყენებას დაიწყებს, რითაც საკუთარი ავტომობილების თვითღირებულებას შეამცირებს.

”როლს როისის” მთავარი აღმასრულებელი ტომ პარვსი ამბობს, რომ მსოფლიო ეკონომიკური კრიზისის დროსაც კი, ინდური და ჩინური ავტობაზრები ზრდას განაგრძობენ და ეს ზრდა კრიზისის დასრულების შემდეგ უფრო შესამჩნევი გახდება.

მალე ”როლსი” ბაზარზე თავის ახალ ავტომობილ ”გოუსტს” გამოუშვებს, რომელიც გაყიდვების გასამმაგებას განაპირობებს. ”ჩვენი სეგმენტის თავისებურება ისაა, რომ მდიდრები კრიზისის დროსაც მდიდრებად რჩებიან. ისინი არც სამუშაოს კარგავენ და არც ხელფასს და ისევე აგრძელებენ ძვირფასი ავტომობილების ყიდვას, როგორც კრიზისამდე”, - ამბობს ”როლს როისის” გაყიდვების და მარკეტინგის დირექტორი გრემ გრივი.

შარშან ”როლს როისმა” 1 212 ავტომობილი გაჰყიდა და ეს ბოლო 18 წლის განმავლობაში საუკეთესო მაჩვენბელია.

***

”ფოლკსვაგენი” ”პორშეს” აქციების სრულად გამოსყიდვას ორ წელიწადში გეგმავს, მისი აქციების ნახევარს კი წელსვე შეიძენს. ამისთვის საჭირო თანხას ვოლფსბურგული გიგანტი საკუთარი კაპიტალის 4 მილირდი ევროთი გაზრდით მოიზიდავს. შესაბამისად, ამ თანხის მისაღებად, საფონდო ბირჟაზე დამატებით აქციებს გამოიტანს.

ექსპერთა შეფასებით, ”პორშეს” სრულად დაუფლება ”ფოლკსვაგენს” 8 მილიარდი ევრო დაუჯდება. ამჟამად ვოლფსბურგელთა ანგარიშზე 11 მილიარდი ევრო ირიცხება. თავის მხრივ, ”პორშეს” დავალიანებათა საერთო მოცულობა 10 მილიარდ ევროს აღწევს.

ამ დავალიანების ნაწილობრივ დასაფარად, ”პორშეც” ბირჟაზე დამატებითი აქციების გამოტანას აპირებს, რომელთა ღირებულება 5 მილიარდ ევროს აღწევს. ამასთან, შტუტგარტელები ”ფოლკსვაგენის” მათი კუთვნილი აქციების ნაწილის (კომპანიის აქციების 17 პროცენტის) ყატარელი ინვესტორებისთვის მიყიდვასაც აპირებენ.

”ფოლკსვაგენის” და ”პორშეს” გაერთიანებას ერთი კვირის წინ მხარი ორივე კომპანიის დირექტორთა საბჭოებმა დაუჭირეს. საბოლოო ხელშეკრულების გაფორმების შემდეგ, ”პორშე” ”ფოლკსვაგენის” ჯგუფში შემავალი მეცხრე კომპანია გახდება.

***

ჟურნალ ”აუტოქარის” ცნობით, ფრანკფურტის ავტო შოუზე იაპონური ”ლექსუსი” ახალი, კომპაქტური ავტომობილის პრემიერას გეგმავს, რომელიც გლობალური ბაზრისთვისაა განკუთვნილი.

”ლექსუსის” ახალი ავტომობილი, რომელსაც CS-ს უწოდებენ, ”ბეემვეს” 1-ლი სერიის, ”მერსედესის” A და B კლასის, ასევე ”აუდს” A3 და A1-ს გაუწევს კონკურენციას. არსებობს იმის ვარაუდიც, რომ ეს ავტომობილი მხოლოდ ჰიბრიდული აგრეგატებით აღიჭურვება.

”ლექსუს CS” იმ 2.4-ლიტრიან, 4-ცილინდრიან ბენზინის ძრავზე ბაზიებულ ჰიბრიდულ აგრეგატს მიიღებს, რომელიც ”ლექსუს HS 250h-ზე” გამოიყენება, თუმცა ეს ორი ავტომობილი სხვადასხვა პლატფორმაზეა ბაზირებული.

”ლექსუს CS” ამერიკაში ალბათ არ გაიყიდება, ევროპულ ბაზარზე კი ის მერმის გამოჩნდება.

”ბეემვეს” გზა ფორმულა 1-ში

BMW to quit F1

29 ივლისი

”ბეემვეს” გადაწყვეტილებამ, დატოვოს დიდი პრიზების არენა, ფორმულა 1 შეძრა. მსოფლიო ჩემპიონატი ოდენ ოთხი ავტომწარმოებლის (ფერარი, მერსედესი, რენო და ტოიოტა) ამარა დარჩა და ეკონომიკური კრიზისის გამო, გამორიცხული არაა, რომ მათგან რომელიმემ თავისი ფ1-ის პროგრამის შეჩერება გადაწყვიტოს.

თუმცა, ნებისმიერ შემთხვევაში, ფორმულა 1 გუნდების გარეშე მაინც არ დარჩება - ახალი სეზონიდან მის რიგებს სამი ახალი საჯინიბო შეავსებს, ”ბეემვეს” ადგილს კი ალბათ რომელიმე სხვა გუნდი (სავარაუდოდ, ზაუბერი) დაიკავებს, რომელიც ბავარიული კომპანიისგან ამ გუნდს ბოლომდე გამოისყიდის.

ბავარიული კომპანიის ხელმძღვანელობამ ეს გადაწყვეტილება გუშინ მიიღო, რამდენიმე დღით ადრე, ვიდრე ფორმულა 1-ის გუნდები და საერთაშორისო საავტომობილო ფედეაცია თანხმობის ახალ ხელშეკრულებას გააფორმებდნენ. ამ ხელშეკრულების შესაბამისად, ავტომწარმოებლები ფ1-ში 2012 წლამდე დარჩენის ვალდებულებას იღებენ.

ამგვარად, ”ბეემვე” ფ1-ს ტიტულის გარეშე დატოვებს. 2005 წლის შემდეგ, რაც შვეიცარიული ”ზაუბერი” გამოისყიდა, ბავარიული გუნდი ჩემპიონის ტიტულის მოპოვებასთან ყველაზე ახლოს შარშან იდგა, როცა შუა სეზონში პოლონელი რობერტ კუბიცა მოწინავეთა შორის იმყოფებოდა. მანვე კანადაში გუნდს ერთადერთი გამარჯვება მოუპოვა. სამაგიეროდ, ამ სეზონში ჩატარებულ 10 ეტაპზე, გუნდს ჯერ მხოლოდ 8 ქულა აქვს აღებული.

”ბეემვე” თავის ძრავებს სხვა გუნდებს არ აწვდის და კომპანიის დირექტორთა საბჭოს წევრ კლაუს დრეგერის განცხადებით, ამას არც მომავალში გააკეთებს. მისი თქმით, კომპანია ამ ეტაპზე თავისი გუნდის მომავლის რამდენიმე ვარიანტს ამზადებს და მათგან საუკეთესოს აირჩევს, რის შესახებაც, გუნდის თანამშრომლებს მოგვიანებით ეცნობებათ. არაა გამორიცხული, რომ ბავარიელებმა აწ უკვე შვეიცარული გუნდის ტექნოლოგიური მხარდაჭერა გააგრძელონ.

”ბეემვეს” მოკლე ისტორია ფ1-ში

1982 წელს ”ბეემვე” გუნდ ”ბრებჰემისთვის” ძრავების მიმწოდებელი გახდა. პირველ რბოლაში, რომელიც სამხრეთ აფრიკაში ჩატარდა, ბრაზილიელმა ნელსონ პიკემ სტარტი წინა რიგიდან აიღო, მაგრამ ფინიშს ვერ მიაღწია.

1983 წელს პიკემ ”ბეემვეს” ძრავით პირველი გამარჯვება მოიპოვა, იმავე სეზონში კი ჩემპიონი გახდა.

1987 წელს, ტურბო ერას დასრულებისთანავე, ”ბეემვემ” ფორმულა 1 დატოვა.

2000 წელს ბავარიული კომპანია დიდი პრიზების ცირკს ისევ ძრავების მიმწოდებლის სტატუსით დაუბრუნდა. ამჯერად მისი პარტნიორი ყოფილი ჩემპიონი ”უილიამსი” გახდა, რომელთან ერთადაც, 2001 წელს პირველი გამარჯვება იზეიმა, მომდევნო ორ სეზონში გუნდი ვიცე ჩემპიონი გახდა. 2002 წელს, პირად ჩათვლაში, კოლუმბიელმა ხუან პაბლო მონტოიამ მესამე ადგილი დაიკავა, ერთი წლის შემდეგ კი ვიცე ჩემპიონი გახდა. პარტნიორობის 6 სეზონის განმავლობაში, ”ულიამსმა” და ”ბეემვემ” 10 გამარჯვება და 17 პოული მოიპოვეს.

2005 წელს ბავარიულმა კომპანიამ შვეიცარული გუნდი ”ზაუბერი” შეიძინა და მის ბაზაზე საკუთარი საჯინიბო ჩამოაყალიბა, რომელმაც მსოფლიო ჩემპიონატში მონაწილეობა მომდევნო სეზონიდან დაიწყო. შარშან ”ბეემვე ზაუბერის” მანქანით, რობერტ კუბიცამ კანადის დიდ პრიზზე გამარჯვება მოიპოვა.

2007 წელს, მას შემდეგ, რაც ”მაკლარენი” დისკვალიფიკაციით დაისაჯა, ”ბეემვე ზაუბერმა” კონსტრუქტრთა პირველობა მეორე ადგილზე დაასრულა.

ამ სეზონში ჩატარებულ 10 რბოლაში, ”ბეემვე ზაუბერმა” მხოლოდ 8 ქულა დააგროვა და 10 გუნდს შორის მე-8 ადგილზე იმყოფება.

”ბეემვე” ფორმულა 1-ს ტოვებს

BMW to quit F1

29 ივლისი

დღეს დილით, ”ბეემვემ” სპეციალური პრესკონფერენცია მოიწვია, რომელზეც გამოცხადდა, რომ ფორმულა ერთის მიმდინარე სეზონის დასრულების შემდეგ, ბავარიული კომპანია მსოფლიო ჩემპიონატს დატოვებს. ამ ნაბიჯის ერთ-ერთი მთავარი მიზეზი, მიმდინარე ჩემპიონატში ბავარიულ-შვეიცარული გუნდის არადამაკმაყოფილებელი გამოსვლა გახდა.

”ბეემვეს” მთავარი აღმასრულებლის, ნორბერტ რაიტჰოფერის თქმით, ეს გადაწყვეტილება პირველ რიგში, იმ გარემოებამ გამოიწვია, რომ კომპანიამ განვითარების განვითარების ახალი სტრატეგია აირჩია. ”რა თქმა უნდა, ეს ჩვენთვის ძალიან ძნელად მისაღები გადაწყვეტილება იყო. მაგრამ ჩვენ ამ ნაბიჯის გადადგმა მოგვიწევს, რადგან კომპანია სტრატეგიულ რეორგანიზაციას ატარებს და ეს სტრატეგია ფორმულა 1-ის დატოვებას ითვალისწინებს”, - პრესკონფერენციაზე განაცხადა რაიტჰოფერმა.

კომპანიის ხელმძღვანელის თქმით, ამიერიდან, ”ბეემვეს” მთავარი ამოცანა მდგრადი განვითარების უზრუნველყოფა და ეკოლოგიაზე ორიენტირებული ტექნოლოგიების დანერგვაა. ”ჩვენ გვინდა, რომ ამ სფეროში ლიდერებეად დავრჩეთ. ამიტომ, მუდმივად ყველა ჩვენი პროექტისა და ინიციატივის გადაფასებას ვახდნეთ. ამ პროცესში კი მთავარი კრიტერიუმი, მათი ეკონომიკური სარგებლიანობაა. სწორედ ამ ფაქტორების გამო, ფორმულა 1 ჩვენთვის ამ ამოცანების შესრულების ინსტრუმენტად ვეღარ გამოდგება”, - დასძენს რაიტჰოფერი, ვინც გაწეული სამუშაოსთვის, მადლობა გადაუხადა გუნდის ხლმძღვანელ მარიო თაისენსა და გუნდის ყველა წევრს.

თავის მხრივ, თაისენმა განცხადა, რომ კარგად ესმის კომპანიის მოტივები: ”რა თქმა უნდა, მიუნხენსა და ჰინვილში მომუშავე მთელ პერსონალს მუშაობის გაგრძელება და იმის დამტკიცება სურს, რომ ამ სეზონის ჩავარდნა შემთხვევითობა იყო, მას კი სამი წარმატებული სეზონი უძღოდა, რომელთა განმავლობაშიც გუნდი აღმავლობას განიცდიდა. მე კარგად მესმის, რომ ასეთი გადაწყვეტილება კომპანიის კორპორატიული ინტერესებიდან გამომდინარეობს. ჩვენ კი დარჩენილ რბოლებზეც ისე ვიმუშავებთ, როგორც აქამდე ვმუშაობდით. ჩვენ მებრძოლ სულისკვეთებას გამოვავლენთ და ფორმულა 1-თან განშორების წინ, კარგი შედეგებისთვის ვიბრძოლებთ”, - განაცხადა თაისენმა,

”ბეემვეს” დირექტორთა საბჭოს წევრი კლაუს დრეგერი ამბობს, რომ ფორმულა ერთში გატარებული 10 წელი კომპანიისთვია ძალიან პროდუქტიული იყო და მან იჟინრების პროფესიულ განვითარებაზე დადებითად იმოქმედა. ”ავტორბოლების მადლიერები ვართ, რადგან სპორტის წყალობით, კომპანიამ არაერთი ტექნიკური ინოვაცია შეიმუშავა, რომლებსაც სერიული ავტომობილების წარმოებისას ვიყენებთ”, - ამბობს დრეგერი.

Tuesday, July 28, 2009

ახალი ”ბუგატის” პრემიერა გადაიდო

Bugatti Bordeaux

28 ივლისი

ამ დღეებში ერთი აჟიოტაჟი იყო ატეხილი ”ბუგატის” უახლესი მოდელის შესახებ, რომელსაც ინტერნეტში უკვე ”ბორდოს” სახელით მოიხსენიებენ. გლობალურ ქსელში ამ ავტომობილის ტისერებიც კი გავრცელდა, რომელზეც ავტომობილის უკანა ნაწილია გამოსახული. ფოტოები კი მოსაწვევიდანაა, რომლითაც ”ფოლკსვაგენის” ჯგუფში შემავალი ფრანგული კომპანია, თავისი ახალი ავტომობილის პრეზენტაციაზე საპატიო სტუმრებს ეპატიჟება. ტისერს თან სხლდა ვარაუდი იმის შესახებ, რომ პრემიერა ფრანკფურტის მოტორ შოუს დროს იგეგმებოდა.

მაგრამ როგორც ირკვევა, უახლოეს მომავალში ”ბუგატი” თავის ახალ სუპერავტომობილს დახურულ პრეზენტაციაზე, მხოლოდ პლანეტის უმდიდრეს ადამიანებს უჩვენებს. პრეზენტაციაზევე მოხდება პოტენციური მყიდველების გამოხმაურების გაანალიზება, რის შემდეგაც, ავტომობილს ფართო საზოგადოებასაც წარუდგენენ.

გამოცემა ”ავტოექსპრესის” ინფორმაციით, ახალი ოთხადგილიანი სუპერ ავტომობილის სახელი ”ბორდოა”. ის ოთხტურბოკომპრესორიანი 8.0-ლიტრიანი W16 მონსტრით აღიჭურვება, რომელიც ავტომობილის წინა ნაწილში განლაგდება (ვეირონს ძრავი ბაზაში აქვს). ამასთან ძრავის სიმძლავრე იმდენივე იქნება, რამდენიც ”ვეირონისაა” – 1 001 ცხენის ძალა და 1 250 ნიუტონმეტრი (ეს უკვე ბუგატის ავტომობილების საფირმო მახასიათებელი ხდება). ამგვარად, ”ბუგატი ”ბორდო” მსოფლიოში ყველაზე სწრაფი ოთხადგილიანი ავტომობილი გახდება.

”შევროლე ვოლტი” – 0-100 კმ/სთ აჩქარება 8.5 წამში

Chevrolet Volt

28 ივლისი

”ჯენერალ მოტორსს” თავისი ჰიბრიდული მოდელი ”შევროლე ვოლტი” ბაზარზე ჯერ არ გამოუყვანია, მაგრამ ამ ავტომობილის შესახებ პრესაში იმდენი იწერება, რომ პოპულარობით ის ბევრ სერიულ მოდელს მისცემს ფორას. და მაინც, ”ვოლტის” (გენერლები ამ ავტომობილს ელექტრომობილად მოიხსენიებენ) შესაძლებლობათა შესახებ, ბევრი არაფერია ცნობილი.

და აი, ”ჯენერალ მოტორსის” გლობალური პროგრამების მართვის განყოფილების ვიცე პრეზიდენტი იონ ლაუკნერი ამბობს, რომ ”ვოლტს” ადგილიდან 100 კმ/სთ სიჩქარის აკრეფა დაახლოებით 9 წამში შეუძლია. აჩქარება იმაზეა დამოკიდებული, თუ ავტომობილში რამდენი ადამიანი ზის და რა მოცულობის ბარგი დევს.

”0-100 კმ/სთ-მდე აჩქარებას 8.5-9 წამი სჭირდება, ეს კი იმაზეა დამოკიდებული, თუ ავტომობილში რამდენი ადამიანი ზის, რა წონის ტვირთი დევს და ასე შემდეგ. ”ვოლტს” კიდევ ერთი კარგი თვისება აქვს - ელექტროძრავები მაქსიმალურ მომენტს წუთში ერთი ბრუნის დროსაც კი ავითარებენ, ამის წყალობით კი, ”ვოლტი” ისევე სწრაფად იძვრის ადგილიდან, როგორც 250-ცხენისძალიანი V6 ძრავით აღჭურვილი სპორტული ავტომობილი. მას ადგილიდან რეზინის ღრჭიალით დაძვრაც კი შეუძლია - ეს მანქანას მე თვითონაც გავაკეთებინე”, - ამბობს ლაუკნერი.

”შევროლე ვოლტს” უკვე საგზაო გამოცდები უტარდება, მაგრამ მისი გავიდვების დაწყების თარიღი ჯერ დათქმულიც არ არის. ამის მიზეზი კი ისაა, რომ ”ჯენერალ მოტორსს” ჯერ მისი შემუშავება არ დაუსრულებია. ლაუკნერის თქმით, ახლა მისი კომპანიის მთავარი საზრუნვი ავტომობილის ფასის მაქსიმალურად შემცირებაა. ამ მიმართულებით, მუშაობა აკუმულატირებსა და ზოგიერთ ელექტრულ კომპონენტზე მიმდინარეობს.

”ჩვენ ახლავე შეგვიძლია ”ვოლტის” წარმოების დაწყება, მაგრამ ამ ეტაპზე, მისი თვითღირებულების შესამცირებლად ვმუშაობთ. კონკრეტულად კი, ეს აკუმულატორებს, ელექტროძრავს და ელექტრონულ სისტემებს ეხება. პარალელურად კი ელექტრომობილებისთვის საჭირო ტექნოლოგიებიც იხვეწება და ვიმედოვნებთ, რომ ”ვოლტის” გამოშვებამდე, მათი ფასები ჩვენთვის სასურველ დონეზე ჩამოვა”, - დასძენს ლაუკნერი.

ბოლო ინფორმაციით, ”ჯენერალ მოტორსს” ”შევროლე ვოლტის” ევროპაში გაყიდვაც აქვს დაგეგმილი. პირვანდელი გეგმა ამას არ ითვალისწინებდა - ძველი კონტინენტისთვის ”ვოლტის” ბაზაზე დამზადებული ”ოპელ ამპერას” წარმოება იგეგმებოდა. თუმცა ამ ავტომობილს ბაზარზე გამოსვლა ცოტა დაუგვიანდება, თანც ”გენერლები” მალე ”ოპელს” გაყიდვას უპირებენ. ასე რომ, ევროპულ ბაზარზე მათს ინტერესებს ”ვოლტი” დაიცავს.

გაიცანით: ”ფერარი 458 იტალია”

Ferrari 458 Italia

28 ივლისი




დღეს ავტოსამყაროს მთავარი მოვლენა ”ფერარის” სრულიად ახალი მოდელის, პოპულარულ F430-ის შემცვლელის, ორადგილიანი ”458 იტალიას” ინტერნეტ პრემიერაა. მწარმოებელი გვაუწყებს, რომ ”458 იტალიას” სახით, ”ფერარიმ” მისთვისაც კი არნახული პროგრესი განიცადა ტექნოლოგიის სფეროში, ავტომობილი უმაღლეს დონეზეა შესრულებული და განსაკუთრებით, გამონაბოლქვში შემცირებული ნახშირორჟანგის შემცველობით გამოირჩევა.

”458 იტალიაზე” ბაზაში დგას 4.5-ლიტრიანი V8 ძრავი, რომელსაც საწვავი უშუალოდ წვის კამერაში მიეწოდება. მისი მაქსიმალური სიმძლავრე 570 ცხენის ძალა, მაბრუნი მომენტი კი 540 ნიუტონმეტრია. აგრეგატი მაქსიმალურ სიმძლავრეს მუხლა ლილვის 9 000 ბრ/წთ-ზე იძლევა, მაქსიმალურუ მაბრუნი მომენტი კი 6 000 ბრ/წთ-ზე გამომუშავდება. მაქსიმალური მომენტის 80 პროცენტს ძრავი 3 250 ბრ/წთ-ზე აღწევს. საერთო ჯამში, ძრავის ლიტრული სიმძლავრე ლიტრზე 127 ცხენის ძალაა, რაც სამოქალაქო (არასარბოლ) ავტოინდუსტრიაში რეკორდული მაჩვენებელია.

ძრავთან ორდისკოიანი ქუროს მეშვეობით, 7-საფეხურიანი ნახევრად ავტომატური კოლოფია დაკავშირებული. მისი მეშვეობით, ავტომობილის მაქსიმალური სიჩქარე 325 კმ/სთ-ს აღწევს, ადგილიდან 100 კმ/სთ-მდე აჩქარება კი უფრო სწრაფად შეუძლია, ვიდრე ავტომობილის სრულ სახელს იტყვით, ანუ 3.4 წამში. ამ მახასიათებლებზე არანაკლებ მნიშვნელოვანი შემდეგი მონაცემებია: ავტომობილი 100 კილომეტრს 13.7 ლიტრი ბენზინით გადის, ყოველი კილომეტრის გავლისას კი ატმოსფეროში 320 გრამ ნახშირორჟანგს გამოჰყოფს.

ახალი ”ფერარის” გარეგნობა იტალიურ ატელიე ”პინინფარინას” სპეციალისტთა ნახელავია. კომპანიის განსაზღვრებით, ეს არის ახალი სიტყვა ”ფერარის” დიზაინის ისტორიაში. მასში შეხამებულია სტილი, კრეატიულობა, ჟინი და მაღალტექნოლოგიურობა. მაგრამ როგორც ყოველთვის, ”ფერარის” ავტომობილის გარეგნობა მარტო თვალს როდი იზიდავს. ის ფუნქციურიცაა. მაგალითად, ”458 იტალიას” მეტად დახვეწილი აეროდინამიკა აქვს - 200 კმ/სთ სიჩქარეზე, მისი ტანი 140-კილოგრამიან დინამიკურ დატვირთვას უზრუნველყოფს. ნაწილობრივ, ასეთ მახასიათებელს რადიატორის ჰაერამღებებთან მოთავსებული დრეკადი ფრთოვანები (ფორმულა 1-დან გადმოღებული ტექნოლოგია) უზრუნველყოფს, რომლებიც დიდ სიჩქარეზე იღუნებიან და რადიატორების ჰაერამღებების განივკვეთის ფართობს ამცირებენ. ასე კი ჰაერის შემხვედრი ნაკადის წინააღმდეგობას ამცირებენ.

”458 იტალიას” სარბოლ ავტომობილებთან ნათესაობა მის ინტერიერშიც შეინიშნება, რომლის შემუშავებაშიც მონაწილეობა ფორმულა ერთში მსოფლიოს შვიდგზის ჩემპიონმა, მიხაელ შუმახერმა მიიღო (საერთოდ, შუმახერი ამ ავტომობილის შექმნის პროცესში პროექტის საწყისი ეტაპიდანვე მონაწილეობდა).

”458 იტალიას” შექმნისას ბლომადაა გამოყენებული ფ1-ის ტექნოლოგიები. განსაკუთრებით, ეს შასისა და ძარის მასალებს ეხება. შედეგად, ავტომობილი 1 380 კილოგრამს იწონის. წონის 42 პროცენტი წინა ღერძზე მოდის, დანარჩენი 58 პროცენტი კი - უკანა ღერძზე. ავტომობილის წინა საკიდარი ორკაპა ჩანგლისებრ გიტარებს ეყრდნობა, უკან კი მრავალბერკეტიანი სისტემაა გამოყენებული.

ახალი ”ფერარის” მსოფლიო პრემიერა ფრანკფურტის მოტორ შოუზე იგეგმება. მის შესახებ უფრო დაწვრილებითი ინფორმაცია სწორედ იქ გამოქვეყნდება. მისი გაყიდვები კი მერმის დაიწყება.

Monday, July 27, 2009

”მაზდა RX-8” ფრანკფურტისთვის ემზადება

Mazda RX-8

27 ივლისი

გერმანულ ჟურნალ ”აუტო მოტორ უნდ შპორტის” ინფორმაციით, იაპონური კომპანია ”მაზდა” ფრანკფურტის მოტორ შოუზე, კუპე RX-8-ის განახლებული ვერსიის პრემიერას გეგმავს. ავტომობილი ახალი აეროდინამიკური ელემენტებითაა შემკული, რომლებიც მის გარსშემოდენილობას აუმჯობესებს. ცვლილებებია ავტომობილის ინტერიერშიც.

წინა მოდელისგან ახალს წინა და უკანა სპოილერები, გამოსაბოლქვი მილების გაფართოებული დაბოლოება, შეცვლილი ფორმის უკანა სტოპ ფარები და ახალი, 19-დუიმიანი ბორბლები განასხვავებს. სალონში ახალია ხელსაწყო-მაჩვენებლების დაფა, სავარძლები კი სხვა მასალითაა გაწყობილი.

სამაგიეროდ, ახალი RX-8-ც ვანკელის ტიპის როტორული ძრავითაა აღჭურვილი, რომლის მუშა მოცულობაც სულ რაღაც 1.3 ლიტრია და საკმაოდ ბევრ - 231 ცხენის ძალას და 211 ნიუტონმეტრ მაბრუნ მომენტს გამოიმუშავებს. ძრავთან 6-საფეხურიანი მექანიკური კოლოფია შეწყვილებული. ამ ტანდმის მეშვეობით, ავტომობილი ადგილიდან 100 კმ/სთ სიჩქარეს 6.4 წამში აკრეფს, მისი მაქსიმალური სიჩქარე კი თითქმის 240 კმ/სთ-ია.

ფრანკფურტის შოუს დასრულებისთანავე, ახალი RX-8 ”მაზდას” ევროპელ დილერთა შოურუმებში გამოჩნდება. წინასწარი მონაცემებით, ავტომობილის საბაზო ვერსიის ღირებულება 38 000 ევრო იქნება.

ჰონკონგური პოლიცია ელექტრომობილებზე გადაჯდება

Hong Kong to Use EV Police Cars

27 ივლისი

იაპონია პირველი ქვეყანაა, სადაც ქალაქების პოლიცია საპატრულოდ ელექტრომობილებს იყენებს. მართალია, ტიპიური ელექტრომობილი შიდაწვისძრავიან ავტომობილს დინამიკური მახასიათებლებით გვარიანად ჩამორჩება, მაგრამ მასზე გაცილებით ეკონმიურია და უკეთესი სასტარტო სიჩქარეც აქვს (მაშინვე ავითარებს მაქსიმალურ მომენტს და არც გადაცემათა კოლოფი სჭირდება).

და აი, როგორც გაზეთი ”საუთ ჩაინა მორნინგ პოსტი” გვატყობინებს, მალე თავიანთ იაპონელ კოლეგებს ჰონკონგელი პოლიციელებიც მიბაძავენ. მათი არჩევანი კი ”მიცუბიშის” სუბკომპაქტურ iMiEV-ზე (სურათზე) შეჩერდა. ქალაქის ხელმძღვანლობამ უკვე დაიწყო ამ ელექტრმობილის სამკვირიანი გამოცდა, რომლის წარმატებულობის შემთხვევაშიც, ჰონ კონგში ”მიცუბიში iMiEV” პოლიციის ფორმაში გამოწყობილი გამოჩნედბა.

”ჩვენ უკვე ვიარეთ ამ ავტომობილით და ძალიან გაოცებულები დავრჩით მისი შესაძლებლობებით. დარწმუნებული ვარ, ეს ეექტრომობილები ბენზინზე მომუშავე ავტომობილებს ბევრი არაფრით ჩამოუვარდება”, - ინტერნეტ გამოცემა ”ჯასტ-აუტოსთან” საუბრისას განცხადა ქალაქის უფროსმა ინსპექტორმა ჯოი ლი ტუნ-ჩეუნმა.

”მიცუბიშისა” და ჰონ კონგის ხელისუფლებას შორის უკვე გაფორმებულია ურთიერთგაგების მემორანდუმი, რომლის შესაბამისადაც, იაპონურმა კომპანიამ ქალაქს 10 ცალი საცდელი ეკექტრომობილი გადასცა. სწორედ მათი მეშვეობით გაუსინჯეს გემო ელექტრომობილებს ჰონკონგელმა პოლიციელებმა, რომლებსაც მსგავს მანქანებზე გადაჯდომა მომავალი წლიდან მოუწევთ.

ქალაქის ხელისუფლების მიზანს, 500 ცალი საპატრულო მანქანის iMiEV-ით მთლიანდ ჩანაცვლება წარმოადგენს. ”მიცუბიშის” ელექტრომობილს აკუმულატორების ერთი სრული დამუხტვით, რასაც 8 საათი სჭირდება, 160 კილომეტრის გავლა შეუძლია, მისი მაქსიმალური სიჩქარე კი 130 კმ/სთ-ია, რაც ქალაქისთვის სრულიად საკმარისია.

”ლინკოლნი” მომცრო მოდელებსაც გამოუშვებს

Lincoln

27 ივლისი

მსოფლიო ეკონომიკური კრიზისი ბევრი ავტოკომპანიის პრინციპებს ცვლის. განსაკუთრებით ეს ამერიკულ დიდ სამეულს ეხება, რომლებსაც გაყიდვების კლებამ და საწვავის ფასების ზრდამ ის ასწავლა, რომ უარი უნდა თქვან დიდგაბარიტიანი ავტომობილბის წარმოებაზე და ყურადღება ეკონომიურსა და ეკოლოგიურ ავტომობილებზე გადაიტანონ.

ასეთი ახალი მიდგომა ”ფორდშიც” შეიმუშავეს. ამიერიდან, ”ცისფერი ოვალის” ლუქს ბრენდი ”ლინკოლნიც” თავისი ავტომობილების გაბარიტების შემცირებასა და ამ ავტომობილების მიერ მოხმარებული საწვავის ლიტრების დათვლას დაიწყებს. კომპანიაში უკვე განიხილება ”ფორდ ფოკუსის” ბაზაზე, ”ლინკოლნის” მარკით რამდენიმე ახალი ავტომობილის, მათ შორის, ჰეჩბეკისა და კომპაქტური ქროსოვერის წარმოების საკითხი.

იმ დროს, როდისაც ”ლინკოლნის” სამოდელო გამაში ორი ახალი კომპაქტური ავტომობილი გამოჩნდება, კომპანია შეწყვეტს უკანაწამყვანბორბლიან პლატფორმებზე ავტომობილების წარმოებას. თუმცა, ორი წლის შემდეგ ასეთი პლატფორმის გამოყენება მაინც იგეგმება. ეს მაშინ მოხდება, როდესაც ”ლინკოლნი” თავისი მარკით, ”ფორდ მუსტანგის” მსგავს ავტომობილს გამოუშვებს.

ინტერნეტ გამოცემა ”აუტომოტივ ნიუსის” ინფორმაციით, მართალია, ჯერ კომპაქტური, წინა წამყვანბორბლიანი ავტომობილების წარმოების გადაწყვეტილება მიღებული არაა, მაგრამ ”ლინკოლნის” სპეციალისტები (თავიანთ ფორდელ კოლეგებთან ერთად) მაინც მუშაობენ შემდგომი თაობის ”ფოკუსის” შექმნაზე.

ამის შედეგი კი ისაა, რომ ”ლინკოლნმა” დეტროიტის წლევანდელ ავტო შოუზე წარმოადგინა კომპაქტური კონცეპტუალური ავტომობილი სახელად ”კონსეპტ C” (სურათზე), რომელიც ”ეკობუსტ” სერიის 1.6-ლიტრიანი, 4-ცილინდრიანი ძრავით იყო აღჭურვილი. ინტერნეტ წყაროები იუწყებიან, რომ ეს ავტომობილი სერიული წარმოებისთვის ემზადება და ის ბაზარზე (როგორც ამერიკულ, ასევე ევროპულ და ალბათ, ჩინურზეც) 2012 წელს გამოჩნდება. იმავე პლატფორმაზე, ”ფორდი” თავისი პოპულარული ”კუგას” შემდგომი თაობის მოდელს, ასევე ახალ ”ფორდ ისკეიპსა” და ”მერკური მარინერსაც” გამოუშვებს.

”ლინკოლნის” ახლანდელი მოდელებიდან, ყველაზე ცუდი პერსპექტივა სედან ”თაუნ ქარსა” და გიგანტურ ქროსოვერ ”ნავიგატორს” აქვთ. პირველის წარმოება 2011 წელს შეწყდება. ”ნავიგატორის” ბედი ჯერ გარკვეული არაა, თუმცა დიდი ალბათობით შეიძლება იმის ვარაუდი, რომ ისიც ”თაუნ ქარს” ბედს გაიზიარებს.

”პორშეს” შეფს 140 მილიონი ევროს აღება შეეძლო

Wendelin Wiedeking

27 ივლისი

იმისათვის, რომ ”პორშეს” მთავარ აღმასრულებელ ვენდელინ ვედეკინგს (სურათზე) მის მიერ დაკავებული თანამდებობა დაეტოვებინა, პორშესა და ფერდინანდ პიხის ოჯახებმა მას 50 მილიონო ევრო გადაუხადეს. რა თქმა უნდა, ეს უზარმაზარი თანხაა, მაგრამ საერთაშორისო მედიაში გავრცელდა ხმები იმის შესახებ, რომ ვედეკინგს გაცილებით მეტის, კერძოდ კი 140 მილიონის აღება შეეძლო.

როიტერთან საუბრისას, ვედეკინგის ვექილმა იობსტ-ჰუბერტუს ბაუერმა განაცხადა, რომ პორშესა და პიხის ოჯახები მზად იყვნენ, კონტრაქტის ადრეულად შეწყვეტის სანაცვლოდ, ვედეკინგისთვის 140 მილიონი ევრო შეეთავაზებინათ. აღნიშნული თანხა ”პორშეს” დირექტორთა საბჭოს თავმჯდომარე ვოლფგანგ პორშემ, მმართველმა კომიტეტმა და მისმა თავმჯდომარე ჰანს-მიხელ პიხმა დაამტკიცეს. უფრო მეტიც, კომპანიასთან გაფორმებული კონტრაქტით, რომელიც 2012 წელს მთავრდებოდა, ვედეკინგს ამაზე გაცილებით მეტის მოთხოვნაც შეეძლო.

”მიმდინარე ფისკალური წლის შედეგებიდან გამომდინარე, მას 170 დან 260 მილიონ ევრომდე შეიძლებოდა აეღო. მაგრამ თავს ამის უფლებას ვერ მისცემდა. მართალია კომპანიის მფლობელი ოჯახები მზად იყვნენ, მისთვის მეტი გადაეხადათ, მაგრამ ამას სამეთვალყურეო საბჭოში მყოფი პროფკავშირების წარმომადგენლები არ დაუშვებდნენ”, - ამბობს ბაუერი.

ცნობისათვის, ვედეკინგს გადაწყვეტილი აქვს, რომ მიღებული თანხის დიდი ნაწილი საქველმოქმედო მიზნებს მოახმაროს.

”ჯენერალ მოტორსს” ”ოპელის” გამოსყიდვის საშუალება მიეცემა

Opel

27 ივლისი

იმ შემთხვევაში, თუ ”ოპელს” ბელგიური საინვესტიციო კონსორციუმი ”RHJ ინტერნეიშნლი” შეიძენს, გერმანული კომპანიის რესტრუქტურიზაციის დასრულების შემდეგ, ”ჯენერალ მოტორსს” მისი უკან გამოსყიდვის საშუალება მიეცემა. როიტერთან საუბრისას, ”RHJ ინტერნეიშნლის” ხელმძღვანელობამ ამის მიზეზად ის გარემოება დაასახალა, რომ ”ოპელს” ”ჯენერალ მოტორსის” გარეშე არსებობა არ შეუძლია.

”მოდით, ვიყოთ პრაგმატულები - ეს კომპანია ”ჯენერალ მოტორსის” გარეშე ვერ იმუშავებს”, - გამოცემა ”ფრანკფურტერ ალგემაინე ზონტაგცაიტუნგთან” საუბრისას განაცხადა ბელგიური კერძო საინვესტიციო ჯგუფის მთავარმა აღმასრულებელმა ლეონჰარდ ფიშერმა.

ერთი კვირის წინ, ”ჯენერალ მოტორსმა” გამოაცხადა, რომ ”ოპელის” გაყიდვაზე მოლაპარაკებას ორ კომპანიასთან - კანადურ ”მაგნა ინტერნეიშნლთან” და ”RHJ ინტერნეიშნლთან” აგრძელებს, რითაც ირიბად მიანიშნა, რომ გერმანული კომპანიის ყიდვის მსურველთა რიგებს ჩინური ”შანჰაი აუტომოტივი” გამოეთიშა.

”ოპელის” გაყიდვის საქმეში ”ჯენერალ მოტორსის” უფროსმა მომლაპარაკებელმა ჯონ სმიტმა განაცხადა, რომ ”ოპელის” შეძენის მსურველი სამი კომპანიის მიერ წარდგენილი განაცხადების შესწავლის შემდეგ დადგინდა, რომ მოლაპარაკება ”მაგნა ინტერნეიშნლთან” და ”RHJ ინტერნეიშნლთან” გაგრძელდება.

”ჯენერალ მოტორსის” მთავარი პირობა სწორედ ისაა, რომ ”ოპელის” რესტრუქტურიზაციის დასრულების შემდეგ, მას გერმანული კომპანიის უკან გამოსყიდვის უფლება უნდა მიეცეს. ამ პირობას ბელგიური ინვესტორის განაცხადი აკმაყოფილებს, ”მაგნასი” კი - არა. მაგრამ სამაგიეროდ, ავტომაკომპლექტებლების კანადურ მწარმოებელს მხარს გერმანიის მთავრობა და მისი კანცლერი ანგელა მერკელი უჭერენ.

”ჯერაც ბევრი საკითხია გასარკვევი, მაგრამ ამ ეტაპზეც ნათელია, რომ ”მაგნას” განაცხადი გაცილებით საინტერესო და მისაღებია. ამ განაცხადის მიხედვით, ”ოპელს” დამოუკიდებლად არსებობის დიდი შანსი აქვს, რუსულ საავტომობილო სექტორთან სტრატეგიული თანამშრომლობა კი მას სოლიდურ პერსპექტივას უქმნის”, - რუსეთის პრეზიდენტ მედვედვთან ერთად გამართულ პრესკონფერენციაზე განაცხადა მერკელმა.

”დაიმლერი” უფრო დიდი ”სმარტის” გამოშვებას აპირებს

Smart Forfour

27 ივლისი

პერიოდულად, ინტერნეტით ვრცელდება ხოლმე ინფორმაცია იმის შესახებ, რომ ”მერსედეს-ბენცი” ”სმარტ ფორთუს” უფრო მოზრდილი ვარიანტის შემუშავებაზე მუშაობს, რომელშიც ”სმარტ ფორფოურის” მოტივებს გამოიყენებენ. დღეს კი გერმანული ინტერნეტ გამოცემა ”მენეჯერ მეგზინი” იუწყება, რომ ამ საქმეში სამქიმიანებმა პარტნიორიც გამონახეს.

საიტის მონაცემებით, შტუტგარტული კომპანია ამ საკითხზე მოლაპარაკებას ფრანგულ ”რენოსთან” აწარმოებს. თუ პარტნიორობა შედგა, მისი პროდუქტი იქნება ახალი ოთხადგილიანი ავტომობილი, რომელიც ”სმარტის” მარკით გაიყიდება. მოლაპარაკება ჯერ ადრეულ სტადიაზეა და ამიტომ, მისი დეტალები უცნობია.

მარტში ინგლისური გამოცემა ”ავტოექსპრესი” იტყობინებოდა, რომ ”მერსედეს-ბენცი” კონცეპტუალური ”სმარტ ფორთუ +2-ის” პროექტზე მუშაობს. საიტის მიერ გავრცელებული ინფორმაციით, ავტომობილი ”სმარტ ფორთუზე” უნდა იყოს ბაზირებული, თუმცა ამ მოდელისგან განსხვავებით, მასში ოთხი მგზავრის ადგილი იქნება. გარეგნულადაც, ეს ავტომობილი ”სმარტ ფორთუს” მსგავსი უნდა ყოფილიყო, ოღონდ მას ორი უკანა კარი დაემატებოდა. ამასთან, უცვლელი დარჩებოდა ძრავების გამაც. სამაგიეროდ, გაიზრდებოდა ბორბლებს შორის ბაზა, რაც სალონის მოცულობასაც გაზრდიდა. ”ავტოექსპრესის” ვერსიით, ასეთი ავტომობილი ბაზარზე 2012 წელს უნდა გამოჩენილიყო. მაგრამ მას შემდეგ, ეს ინფორმაცია აღარ დადასტურებულა.

პარალელურად, ”დაიმლერი” ადასტურებს, რომ უფრო ფართოსალონიანი ”სმარტის” წარმოების საკითხი განიხილება, მაგრამ ამაზე მეტი ოფიციალური ინფორმაცია არ გავრცელებულა.

”არსებული ავტომობილის ბაზის ცვლილებით, ჩვენ ახალი ავტომობილების შექმნას შევძლებთ, რომელთა ჩასაჯდომი ფორმულა 2+1, ან 2+2 იქნება”, - გამოცემა ”აუტომოტივ ნიუს იუროპთან” საუბრისას განაცხადა ”სმარტის” შეფმა ანდერს-სუნდტ იენსენმა.

Sunday, July 26, 2009

”სუბარუ” ”იმპრეზა WRX STI სპეც C-ს” წარმოებას იწყებს

Impreza WRX STI spec C

26 ივლისი

იაპონურმა კომპანია ”სუბარუმ” გამოაცხადა, რომ მალე შეუდგება თავისი პოპულარული ავტომობილის - ”იმპრეზა WRX STI-ის” გაუმჯობესებული ვერსიის, ”იმპრეზა WRX STI სპეც C-ს” გამოშვებას. კომპანიის ინფორმაციით, ეს საბაზო ავტომობილზე მსუბუქი და უფრო მძლავრი ვერსიაა.

ახალი ავტომობილის შესაქმნელად, ”სუბარუს” ინჟინრებმა ავტოსპორტში დაგროვილი გამოცდილება გამოიყენეს. ძრავს დაემატა წყლის საშუალედო გამაგრილებელი (ინტერქულერი), რომლის მეშვეობითაც, შემშვებ სისტემას საწვავის ნარევი მუდმივი ტემპერატურით მიეწოდება. შეიცვალა ტურბინის ლილვის საყრდენი ბურთულოვანი საკისრები, რომელთა წყალობითაც, ლილვის ხახუნზე, ტურბინის მარგი ქმედების კოეფიციენტის უფრო მცირე ნაწილი იკარგება.

”სუბარუ” აცხადებს, რომ ამ ცვლილებათა შედეგად, 2.0-ლიტრიანი ძრავი, რომლის სიმძლავრე 304 ცხენის ძალა, მაბრუნი მომენტი კი 422 ნიუტონმეტრია, უფრო სწრაფად და ეფექტურად რეაგირებს აქსელერატორზე ფეხის დაწოლისას.

მოდერნიზებულ ავტომობილს უფრო მსუბუქი და რაც მთავარია, ხისტი შასი აქვს. ასევე შეცვლილია მისი წინა და უკანა საკიდარის მახასიათებლები, რის შედეგადაც, ავტომობილი იოლად ემორჩილება მძღოლის სურვილებს და საჭის გადაადგილებაზე მაშინაც კი ადვილად რეაგირებს, როდესაც ბორბლების გზის საფართან ჩაჭიდება ზღვარს აღწევს.

კონსტრუქციაში ალუმინისგან და კარბონის კომპოზიტისგან დამზადებული დეტალების, ასევე პლასტიკური შუშის მეშვეობით, ავტომობილის წონა მაქსიმალურადაა შემცირებული. სიახლეებს შორისაა ალუმინის ახალი, 19-დუიმიანი ბორბლები, მცირე ზომის სათადარიგო ბორბალი, რომელსაც ნაკლები ადგილიც უკავია და ნაკლებსაც იწონის, ”ბრემბოს” ოქროსფერი მუხრუჭები, რეკაროს სპორტული სავარძლები და სხვა.

”სუბარუ” სულ 900 ცალი ”იმპრეზა WRX STI სპეც C-ს” წარმოებას გეგმავს. პირველ რიგში, მათ იაპონელ მყიდველს შესთავაზებენ. ჯერჯერობით ცნობილი არაა, ეს ავტომობილი გაიყიდება თუ არა სხვა ქვეყნების ბაზრებზე.

”შკოდა” უგზოობის ”იეტის” ინდოეთშიც გამოუშვებს

Skoda Yeti

26 ივლისი

ბოლო ხანებში, ინდოეთის სახელი ავტოინდუსტრიის ახალ ამბებში რამდენჯერმე გაისმა. ჯერ იყო და, ”ტატამ” მსოფლიოში უიაფესი ავტომობილების მყიდველებისთვის მიწოდება დაიწყო, შემდეგ იაპონურმა ”ნისანმა” ამ ქვეყნიდან ევროპაში მინიჰეჩბეკ ”მიკრას” ექსპორტირების შესახებ განაცხადა. ახლა კი ფერხულს ჩეხური შკოდაც შეუერთდა, რომელიც მალე, ”ფოლკსვაგენის” აურანგაბადის ქარხანაში თავისი უახლესი ავტომობილის, უგზოობის ”იეტის” წარმოებას დაიწყებს.

ევროპაში ამ ავტომობილის გაყიდვები სექტემბერში, ფრანკფურტის მოტორ შოუს შემდეგ დაიწყება, ინდოეთში კი მისი პირველი ჩვენება იანვარში, ნიუ დელის საავტომობილო შოუზე გაიმართება.

”შკოდას” გაყიდვების და განვითარების განყოფილების შეფი აშუტოშ დიქსიტი ამბობს, რომ მისი კომპანია აურანგაბადის ქარხანას ”იეტის” სრულ კომპლექტებს მიაწვდის, იქ კი მათი მხოლოდ აწყობა მოხდება.

მართალია, ჯერჯერობით ”შკოდა” ინდურ ბაზარზე დიდი მოთამაშე არაა, მაგრამ ჩეხური კომპანია მსოფლიოს მეორე ყველაზე ხალხმრავალი ქვეყნის ბაზარზე დამკვიდრებას დიდ მინიშვნელობას ანიჭებს. წლის პირველ ნახევარში, ”ფოლკსვაგენის” ჯგუფში შემავალმა ჩეხურმა ბრენდმა ინდოეთში სულ 6 500 ავტომობილი გაჰყიდა და იმედოვნებს, რომ ეს მაჩვენებელი მალე მნიშვნელოვნად გაიზრდება.

დღეისათვის, აურანგაბადის ქარხანაში ”შკოდა” რამდენიმე მოდელს - ”ოქტავიას”, ”სუპერბსა” და ”ლაურას” (შკოდას გამაში სუპერბსა და ოქტავიას შორის დგას) აწარმოებს. კიდევ ერთ მოდელს - ჰეჩბეკ ”ფაბიას” კი ”ფოლკსვაგენის” ჩაკანის ქარხანა უშვებს. კომპანია მალე თავის სადილერო ქსელს, რომელშიც ამ ეტაპზე 61 დილერს ითვლის, 15 ერთეულით გაზრდის.

ინდოელი მყიდველისთვის განკუთვნილი ”იეტისთვის” სულ ხუთი ძრავია გათვალისწინებული. მათგან ორი ბენზინზე მუშაობს, სამი კი - დიზელზე. ყველაზე პატარას მუშა მოცულობა 1.2 ლიტრია. ძრავების სიმძლავრე კი 103-დან 167 ცხენის ძალამდეა. ყველაზე მძლავრია 2.0-ლიტრიანი TDI CR DPF, რომელიც 167 ცხენის ძალას გამოიმუშავებს და მისი მაბრუნი მომენტი ყველა ბორბალზე ნაწილდება.

Friday, July 24, 2009

”ასტონ მარტინი” ვან-77-ის გამოცდას იწყებს

Aston Martin One-77

24 ივლისი

”ასტონ მარტინი” გამალებით ემზადება თავისი ახალი სუპერავტომობილის, ვან-77-ის წარმოების დასაწყებად. მაგრამ სანამ მის საბოლოო ვერსიას შეიმუშავებდეს, სატესტო ავტომობილს დაამზადებს, რომელიც საგზაო გამოცდებს გერმანიაში, ნურბურგრინგის ავტოდრომზე გაივლის.

ინგლისურ გამოცემა ”აუტოქართან” საუბრისას, ”ასტონ მარტინის” პროექტ ვან-77-ის მენეჯერმა კრის პორიტმა განაცხადა, რომ ავტომობილის წარმოების დაწყება მერმის იგეგმება. მას სულ 77 ცალს დაამზადებენ, თითოეულის ღირებულება კი 2 მილიონ დოლარამდე იქნება.

უნდა ითქვას, რომ ნურბურგრინგს პაპარაცები ისედაც არ აკლია, მაგრამ ამ ინფორმაციის გავრცელების შემდეგ, მსტოვრული ფოტოების გადაღების მოყვარულები გერმანულ ავტოდრომზე დასახლდებიან, რათა ავტოინდუსტრიის ახალი საოცრების თუნდაც შენიღბული ეგზემპლარის გადაღება და საქმეში ხილვა შესძლონ. რა თქმა უნდა, მათთვის ისიც საინტერესოა, თუ რა დროში გაივლის ახალი ”ასტონ მარტინი” ლეგენდარული ტრასის ერთ წრეს, რომლის რეკორდისთვისაც, ბოლო ხანებში, ერთმანეთთან უშეღავათო პაექრობა ”შევროლე კორვეტ ZR1-სა” და ”ნისან GT-R-ს” აქვთ გაჩაღებული. საორიენტაციოდ, ორივე ავტომობილი ერთ წრეს დაახლოებით, 7 წუთსა და 26 წამში გადის.

ვან-77-ის სატესტო პროტოტიპი ”ასტონ მარტინის” წარმოების 6.0-ლიტრიანი V12 ძრავით აღიჭურვება, რომელსაც კომპანია DBS-ზე, DB9-სა და V12 ვენტიჯზე იყენებს. ოღონდ, პროტოტიპზე გამოყენებამდე, აგრეგატი საფუძვლიან ტუნინგს გაივლის. ძრავის სპეციალისტებმა დავალება მიიღეს, რომლის მიხედვითაც, მათ აგრეგატის წონა მაქსიმალურად უნდა შეამცირონ, სიმძლავრე და მაბრუნი მომენტი კი ზღვრამდე გაზარდონ. უფრო კონკრეტულად კი, სიმძლავრის ორიენტირი 700 ცხენის ძალაა, მასა კი 10 პროცენტით უნდა შემცირდეს.

სხვათა შორის, ძრავზე ”ასტონ მარტინის” გარდა, ინგლისური ფირმა ”კოსუორტის” სპეციალისტებიც მუშაობენ (ორივე კომპანია ერთ ჯგუფში შედის), რომლებიც პარალელურად, ფორმულა 1-ისთვის განკუთვნილ ძრავსაც ქმნიან. წინასწარი მონაცემებით, მათ ძრავის წონა 25 პროცენტით შეამცირეს. ეს იმ დროს, როცა აგრეგატის მუშა მოცულობა 7.3 ლიტრამდეა გაზრდილი.

ავტომობილის საპროექტო წონა 1 500 კილოგრამია. სავარაუდოდ, მისი მაქსიმალური სიჩქარე 320 კმ/სთ-ზე გაცილებით მეტი იქნება, ადგილიდან 100 კმ/სთ სიჩქარის აკრეფა კი მას 3.5 წამზე ნაკლებში უნდა შეეძლოს.