Monday, May 31, 2010

”იაგუარი” სამოდელო გამას გააფართოებს

Jaguar Land Rover

31 მაისი

კარლ-პეტერ ფორსტერი
...............................................................

ინდური საავტომობილო კომპანია ”ტატა მოტორსი” თავისი ორი ბრიტანული ბრენდის - ”იაგუარის” და ”ლენდ როვერის” ჩინეთის და სხვა სწრაფად განვითარებადი ქვეყნების ბაზრებზე ექსპანსიას და ჩინეთში ამ ორი მარკის ავტომობილების წარმოებას გეგმავს. თავიდან, ორივე ბრენდით, წლიურად სულ 40 000 ავტომობილის წარმოება იგეგმება, თუმცა მოთხოვნის ზრდის პარალელურად, წარმოების მოცულობაც გაიზრდება. მათი მთავარი კონკურენტი კი გერმანული კომპანიები - ”მერსედეს-ბენცი” და ”ბეემვე” იქნება.

”ტატა მოტორსის” მთავარი აღმასრულებელი კარლ-პეტერ ფორსტერი ამბობს, რომ ”ლენდ როვერი” და ”იაგუარი” მარტო ჩინეთში კი არა, მთელი მსოფლიო მასშტაბით აპირებს ზრდას.

”ჩინეთი სწრაფად მზარდი ბაზარია, ჩვენ კი გვინდა, რომ ჩვენი გაყიდვები მთელს მსოფლიოში გაიზარდოს. ჩვენ ჩინეთში, ევროპაში, ჩრდილოეთ და სამხრეთ ამერიკასა და აფრიკაში ვაპირებთ ჩვენი ბიზნესის გააქტიურებას, რადგან მიგვაჩნია, რომ ამისთვის საჭირო რესურსი გაგვაჩნია”, - სააგენტო ბლუმბერგთან საუბრისას განაცხადა ფორსტერმა.

იაგუარ XK180
..........................................

მანვე ორივე ბრენდის სამომავლო გეგმებიც ზოგადად მიმოიხილა. კერძოდ, ფორსტერმა, ვინც ცოტა ხნის წინ, ”ჯენერალ მოტორსის” ევროპული შტოს პრეზიდენტი და ”ოპელის” სამეთვალყურეო საბჭოს თავმჯდომარე იყო, განაცხადა, რომ მალე ”ლენდ როვერის” გამას ახალი კომპაქტური მოდელი - LRX დაემატება, რომელსაც, კომპანიის ისტორიაში პირველს, წამყვანი წინა ბორბლები ექნება.

გაცილებით მეტი სიახლე ”იაგუარის” გამაში იგეგმება. ფორსტერის თქმით, უკვე მწვანე შუქი აუნთეს თითქმის მივიწყებულ პროექტს, რომელიც როდსტერ F-ტაიპის გამოშვებას ითვალისწინებს. ”იაგუარი” იმედოვნებს, რომ ამ ავტომობილით კონკურენციას ”პორშე ბოქსსტერს” გაუწევს. პირველად ”იაგუარში” ამ როდსტერის წარმოებაზე ჯერ კიდევ 1998 წელს განაცხადეს, როდესაც საზოგადოებამ კონცეპტუალური ”იაგუარ XK180” იხილა.

იაგუარ RD6

..........................................

მაგრამ მალე ეს პროექტი თაროზე შემოდეს, რის მიზეზადაც ფინანსური კრიზისი და საკონვეიეროდ მისი მომზადებისთვის სახსრების უქონლობა გამოცხადდა. ახლა კი, ”ტატა მოტორსმა” პირობა დადო, რომ ხუთი წლის განმავლობაში, ”იაგუარის” განვითარებისთვის წლიურად თითო მილიარდი გირვანქა სტერლინგის ინვესტირებას აპირებს და ბუნებრივია, ინგლისურ კომპანიასაც ხელ-ფეხი გაეხსნება.

შემდეგი სიახლე კომპაქტური X-ტაიპი გახდება. ამ ავტომობილის მთავარი დანიშნულება, ”იაგუარის” წარმოების მოცულობის მნიშვნელოვნად გაზრდა იქნება. ბლუმბერგის მიერ მოპოვებული ინფორმაციით, ახალი X-ტაიპი გარეგნულად კონცეპტუალურ R-D6-ს დაემსგავსება, რომლის დებიუტიც ასევე საკმაოდ შორეულ წარსულში - ფრანკფურტის 2003 წლის მოტორ შოუზე შედგა. თავის დროზე, ამ ავტომობილს კონკურენცია მე-3 სერიის ”ბეემვესთვის” და ”აუდი A4-თვის” უნდა გაეწია, მისი მეშვეობით კი ”იაგუარი” თანდათან გლობალური ბრენდი უნდა გამხდარიყო.

გარდა ამისა, ფორსტერი ადასტურებს იმ ინფორმაციასაც, რომლის მიხედვითაც, ”იაგუარი” სპორტულ სედან XF-ს ბაზაზე, უნივერსალის წარმოებასაც აპირებს. მისი თქმით, XF იმდენად პოპულარულია, რომ მის ბაზაზე სხვადასხვა ძარიანი მოდელების წარმოება გამართლებულია. უნივერსალის გარდა, XF-ს ბაზაზე ასევე კუპეც დამზადდება.

ფორსტერი ასევე ადასტურებს, რომ ”იაგუარ ლენდ როვერი” მალე თავის ერთ-ერთ ბრიტანულ ქარხანას დახურავს. ალბიონზე დღეისათვის ამ ჯგუფის ორი ხარხანა მუშაობს - უესტ მიდლენდსისა და კესტლ ბრომვიჩის. მათ შორის არჩევანს ჯგუფის ხელმძღვანელობა მალე გააკეთებს. ფორსტერის თქმით, უმჯობესია ერთი დიდი ქარხნის შენახვა, ვიდრე ორისა, რომლებიც ნაწილობრივ იქნება დატვირთული.

სამაგიეროდ, მალე გაიხსნება ჩინური ქარხანა, რომელიც თავიდან ”ლენდ როვერის” მოდელებს - ”დეფენდერს”, ”დისქავერის” და ”ფრილენდერს” გამოუშვებს. ”ტატა მოტორსის” შეფი აცხადებს, რომ ჩინეთში ქარხნის ამოქმედება სულაც არ ნიშნავს იმას, რომ ”ლენდ როვერს” თავისი წარმოების ალბიონის მიღმა გატანა სურს. უბრალოდ, ეს ჩინეთის ბაზარზე პოზიციების გასამყარებლად კეთდება.

”ფიატი” ხუთ საბაზო პლატფორმას დაიტოვებს

Fiat's radical platform plan

30 მაისი

ახალი ფიატ უნო

................................................

”ფიატი” თავის საწარმოო პროგრამაში პლატფორმების მკვეთრად შემცირებას გეგმავს. ამ გეგმის მიხედვით, მომავალში იტალიურ კონცერნს მხოლოდ ხუთი უნივერსალური პლატფორმა ექნება, რომლებზეც საკუთარი ავტომობილების გარდა, თავის ჯგუფში შემავალი ყველა ბრენდის (მათ შორის, ამერიკული კრაისლერისაც) ავტომობილებსაც დააფუძნებს.

ტურინელების განმარტებით, მაღალტექნოლოგიური, მოქნილი არქიტექტურების გამოყენებით, შესაძლებელი იქნება წარმოების დანახარჯების მნიშვნელოვნად შემცირება და ახალი მოდელების შემუშავების დროის შემცირება. ეს ნიშნავს, რომ მოდელების შეცვლა-განახლება გაცილებით სწრაფად განხორციელდება, რაც მათზე მოთხოვნას და მათს კონკურენტუნარიანობას გაზრდის.

ახალი კმპაქტური პლატფორმა

..........................................

ეს გეგმა განსაკუთრებით მომგებიანი ”კრაისლერისთვის” გახდება, რომელსაც სასწრაფოდ ესაჭიროება არსებული მოდელების განახლება და თავისი გამის ახალი ავტომობილებით შევსება. ამას კი ამერიკელები გაცილებით ნაკლები დანახარჯით გააკეთებენ, რაც მათი მდგომარეობის მოკლე ხანში გაუმჯობესებას შეუწყობს ხელს.

”ფიატმა” გამოაქვეყნა მონაცემები, რომელთა მიხედვითაც, 2006 წელს კომპანიამ 32 მოდელი 19 პლატფორმაზე (არქიტექტურაზე) აწარმოა. წელს მოდელების რაოდენობა 38-მდე გაიზრდება და მათთვის მხოლოდ 11 პლატფორმას გამოიყენებენ, სამი წლის შემდეგ კი მოდელების რაოდენობა იგივე დარჩება, პლატფორმების რიცხვი კი ხუთამდე შემცირდება. ”ფიატი” იმედოვნებს, რომ ამ რეფორმის შედეგად, მის ჯგუფში შემავალი ყველა ბრენდის წარმოების ჯამური მოცულობა ოთხჯერ გაიზრდება.

ხუთი ახალი პლატფორმიდან, ყველაზე მნიშვნელოვანი და მასობრივი სამი გახდება. ესენია მინი, მცირე და კომპაქტური პლატფორმები. მათზე იტალიური საავტომობილო ჯგუფის მიერ წარმოებული ავტომობილების დაახლოებით 70 პროცენტი მოვა. ამ პლატფორმებზე ააგებენ არამარტო იტალიური ბრენდების (ფიატი, ალფა რომეო და ლანჩა), არამედ ”კრაისლერის” ავტომობილებსაც.

მინი გლობალური მოდულური არქიტექტურა

ეს ”ფიატის” საწარმოო პროგრამაში ყველაზე მცირე ზომის პლატფორმაა და მას ტურინელებისთვის ყველაზე დიდი მოგება მოაქვს. მასზეა დაფუძნებულია ტურინელთა ორი ბესტსელერი - ”ჩინკვეჩენტო” და ”პანდა”. წარმოების ჯამური მოცულობა 500 ათასს აღწევს. ამასთან, ამავე პლატფორმას ”ფორდი” თავის მოდელ ”კა-სთვის” იყენებს, რასაც ”ფიატისთვის” დამატებითი მოგება მოაქვს.

მალე ამავე პლატფორმაზე და ”ფიატ 500-ის” ბაზაზე, ავტომობილების წარმოებას ”კრაისლერიც” დაიწყებს. ჯგუფის ხელმძღვანელობა იმედოვნებს, რომ ამ პლატფორმაზე წარმოებული ავტომობილების რაოდენობა 2012 წელს 900 000-ს მიაღწევს, კიდევ ორი წლის შემდეგ კი 1.2 მილიონამდე გაიზრდება. აქედან ”კრაისლერზე” 200 ათასი ავტომობილი მოვა.

მცირე გლობალური მოდულური პლატფორმა

ამ არქიტექტურას ”ფიატი” კიდევ ერთი ბესტსელერისთვის - ”პანდასთვის” იყენებს. ახლო მომავალში, პლატფორმას მნიშვნელოვანი მოდერნიზაცია ჩაუტარდება, რათა მან აშშ-ში ქრეშ-ტესტების გავლა შეძლოს და იქაური მკაცრი მოთხოვნები დააკმაყოფილოს. ამასთან, ეს პლატფორმა მოქნილიც იქნება და მასზე იმ ავტომობილებსაც ააგებენ, რომლებიც სამხრეთ ამერიკაში გაიყიდება. ასეთი ავტომობილია, მაგალითად ახალი ”უნო”, რომლის პრეზენტაციაც ბრაზილიაში ახლახანს ჩატარდა.

წელს მცირე პლატფორმაზე სულ 500 000 ავტომობილს გამოუშვებენ, ორ წელიწადში, მათი რაოდენობა 800 000-მდე გაიზრდება, კიდევ ორი წლის შემდეგ კი 1.1 მილიონს მიაღწევს. აქედან დაახლოებით 150 000 ცალს ”კრაისლერის”, ან მის ჯგუფში შემავალი ”დოჯის” მარკით გამოუშვებენ.

კომპაქტური გლობალური მოდულური არქიტექტურა

ეს პლატფორმა უკვე შემუშავებულია და პირველი ავტომობილი, რომელზეც ის გამოიყენეს, უახლესი ”ალფა ჯულიეტაა”. ”ფიატის” შეფასებით, კომპაქტური პლატფორმა კონცერნისთვის ყველაზე მნიშვნელოვანია. ის იმ პლატფორმას შეცვლის, რომელზეც ამჟამად ”ფიატ ბრავოს”, ”ლანჩა დელტას” და ”ალფა 156-ის” ბაზაზე შექმნილ ”ალფა 147-ს” და ”ალფა GT0-ს” უშვებენ. ამავე პლატფორმას ”ალფა რომეოს” მოდელების - 159-ის, ”ბრერას” და ”სპაიდერის” წარმოებაშიც გამოიყენებენ.

ახალი კომპაქტური პლატფორმა ”ბრავოს” პლატფორმაზე გაცილებით უკეთესი, 147-საზე გაცილებით უსაფრთხო, ”კრაისლერის” ახლანდელ პლატფორმებზე გაცილებით მსუბუქი იქნება. ამასთან, იმის გამო, რომ ბევრ მოდელზე გამოიყენებენ, ის უფრო იაფიც ეღირება, რაც საბოლოო პროდუქტებსაც გააიაფებს და კონკურენტუნარიანს გახდის. ამ პლატფორმაზე ”ფიატი” 2014 წელს 1.4 მილიონი ავტომობილის წარმოებას აპირებს.

სხვათა შორის, ეს პლატფორმა ორი ძირითადი ზომისა იქნება. მას წამყვანი წინა ბორბლები ექნება, თუმცა ადვილად ”აითვისებს” სრულამძრავიან ტრანსმისიასაც.

Saturday, May 29, 2010

”მინი” კიდევ უფრო პატარა ავტომობილების გამოშვებას აპირებს

Mini starts city car project

29 მაისი

მას შემდეგ, რაც ”ბეემვეს” საკუთრება გახდა, ინგლისური კომპანია ”მინი” სულ უფრო აფართოებს სამოდელო გამას, რისი წყალობითაც, წარმოებას და გაყიდვებს ზრდის. თუმცა, როგორც ჩანს, მის ხელმძღვანელობას და ბავარიულ კომპანიას, ეს აღარ აკმაყოფილებს, რის გამოც, მინიავტომობილების მწარმოებელი ბრენდი თავისი საწარმოო პროგრამის გაფართოებას გეგმავს.

”მინის” ხელმძღვანელობა კიდევ უფრო პატარა ავტომობილის წარმოების მიზანშეწონილობას სწავლობს, ავტომობილისა, რომლითაც კონკურენცია ”დაიმლერის” ”სმარტს” უნდა გაუწიოს. ამასთან, ეს ”ბეემვეს პროექტ ”მეგასიტის” ფარგლებში მოხდება. და, რაოდენ გასაკვირიც უნდა იყოს, ჯუჯა ავტომობილის წარმოებისას, მაქსიმალურად გამოიყენებენ იმ მაკომპლექტებლებს, რომლებსაც ბავარიელები თავიანთი სხვა ავტომობილებისთვის იყენებენ.

არადა, ”მინის” ხელმძღვანელობა კარგა ხანს გულმოდგინედ ამტკიცებდა, რომ მის სამკარიან მოდელზე პატარა ზომის ავტომობილებს, მისი მწარმოებლისთვის მოგების მოტანა არ შეუძლია. და ახლაც, მთავარი დამაბრკოლებელი სწორედ ეს საკითხია. ”ერთადერთი კითხვა, რომელსაც საკუთარ თავს ვუსვამთ, ისაა, თუ რამდენად მომგებიანი შეიძლება იყოს ჩვენთვის მინიზე პატარა ავტომობილის წარმოება”, - ინგლისურ გამოცემა ”ავტოქართან” საუბრისას განაცხადა ”მინის” ინკოგნიტო წარმომადგენელმა.

მაგრამ მას შემდეგ, რაც ”ბეემვემ” სამცილინდრიანი ძრავის წარმოება გადაწყვიტა და სულ უფრო მეტ ყურადღებას უთმობს ეკონომიური ავტომობილების წარმოების პერსპექტივას, ”მინისთვის” ჯუჯა ავტომობილის წარმოების იდეა სულ უფრო მიმზიდველად და პერსპექტიულად გამოიყურება.

იმავე წყაროს ცნობით, ჯერჯერობით, გადაწყვეტილი არაფერია. ჯუჯა ავტომობილის პროექტი საწყის ეტაპზეა. სავარაუდოდ, დაახლოებით მომავალი წლის ფრანკფურტის საავტომობილო გამოფენისთვის, პირველი კონცეპტუალური მოდელის მომზადება მოესწრება.

ჯერ გადაწყვეტილი არაა, ავტომობილი ორადგილიანი იქნება, თუ ოთხიანი, ძრავი წინ განლაგდება, თუ უკან. სამაგიეროდ, უკვე ცნობილია, რომ მისი სიგრძე 3.050 მეტრზე მეტი არ უნდა იყოს. სწორედ ეს სიგრძე ჰქონდა პირველ ”მინის”, რომელიც ლეგენდარულმა ინჟინერმა ალექს ისიგონისმა დააპროექტა. ამგვარად, ჯუჯა ”მინი” ახლანდელ მოდელთან შედარებით, 0.700 მეტრით მოკლე და ”სმარტთან” შედარებით, 0.300 მეტრით გრძელი იქნება.

ინტერნეტით გავრცელებულ ერთ-ერთ ინფორმაციაში, ”მინის” ჯუჯა მოდელის სახელად ”მინორია” დასახელებული. თუმცა, ეს დაუდასტურებელი ინფორმაციაა. აქ მოყვანილ ფოტოზე გამოსახულია ”მინის” კონცეპტუალური მოდელი ”სპირიტუალი”, რომელიც ინგლისურმა კომპანიამ 1997 წელს, ”ბეემვეს” მიერ მისი შეძენიდან სამი წლის შემდეგ მოამზადა.

”მერსედესის” სახე როჯერ ფედერერი გახდა

Roger Federer Becomes Global Mercedes-Benz Ambassador

29 მაისი

”მერსედეს-ბენცმა” გამოაცხადა, რომ ჩოგბურთში დიდი სლემის ტურნირების 16-გზის ჩემპიონთან, შვეიცარელ როჯერ ფედერერთან, გლობალურ ბაზარზე პარტნიორობის კომპლექსური კონტრაქტი გააფორმა. მრავალწლიანი ხელშეკრულების მიხედვით, შტუტგარტული ავტო გიგანტი, თავის სარეკლამო რგოლებში ფედერერის იმიჯის გამოყენების უფლებას ღებულობს.

უნდა ითქვას, რომ ”მერსედეს-ბენცსა” და ფედერერს შორის საქმიანი ურთიერთობა დღეს არ იწყება. შვეიცარელი სუპერ ჩოგბურთელი ”სამქიმიანებს” რეკლამას ჩინურ ბაზარზე, რომელიც უკვე მსოფლიოს უდიდესი ბაზარი გახდა, 2008 წლიდან უწევს, ამიერიდან კი მათი პარტნიორობა მსოფლიოს მასშტაბისა იქნება.

გერმანული ავტო გიგანტისთვის, ეს ჩოგბურთში გადადგმული პირველი ნაბიჯები არაა. სპორტის ერთ-ერთ ყველაზე პოპულარულ სახეობაში შტუტგარტელები 16 წელია, რაც მოღვაწეობენ. კომპანია რიგ პოპულარულ ტურნირს აფინანსებს, მათ შორის, არის მასტერსის სერიის დიდი ხნის პარტნიორი. ამ სეზონიდან კი ის აშშ-ის ღია პირველობის სპონსორიც ხდება. ჩოგბურთელების დონეზე, მრავალი წლის განმავლობაში, ”მერსედესის” პარტნიორი ლეგენდარული გერმანელი ბორის ბეკერი იყო.

”მოხარულნი ვართ, რომ სპორტში ”მერსედეს-ბენცის” გლობალური მასშტაბის სახეების დიდ ოჯახს ამიერიდან როჯერ ფედერერიც შეემატა. ეჭვი არაა, ის ყველა დროის ერთ-ერთი საუკეთესო ჩოგბურთელია და მსოფლიოს დონეზე, უამრავი თაყვანისმცემელი ჰყავს. ამიერიდან, როჯერთან ერთად, არაერთ წამოწყებაში მივიღებთ მონაწილეობას. მას საუკეთესო წარსული აქვს, მაგრამ გაცილებით მეტის მიღწევა შეუძლია”, - განაცხადა ”მერსედეს-ბენცის” აშშ-ის შტოს მარკეტინგის საქმეების ვიცე პრეზიდენტმა სტივენ ქენონმა.

Friday, May 28, 2010

”ჯენერალ მოტორსი” როტორულ ძრავიან ”ვოლტს” ცდის

Second-Generation Chevrolet Volt Could Use Rotary Engine

28 მაისი

”ჯენერალ მოტორსს” გაზრდილი სვლის ჰიბრიდული ავტომობილი ”შევროლე ვოლტი” ჯერ კონვეიერზე არ დაუყენებია, თუმცა მისი მეორე თაობის მოდელის შემუშავება უკვე დაწყებული აქვს. ამ ეტაპზე, ამ ავტომობილის წარმოების ხარჯების შემცირების და აქედან გამომდინარე, მისი გასაყიდი ფასის შემცირების საშუალებები განიხილება.

ერთ-ერთ ასეთ საშუალებად, 100-ცხენიძალიანი ოთხტაქტიანი ძრავის ნაცვლად, სხვა ტიპის აგრეგატის გამოყენების შესაძლებლობა მოიაზრება. ამერიკული კომპანიის ინჟინირინგის და ახალი ტექნოლოგიების განყოფილების შეფი კარლ სტრეიკი აცხადებს, რომ ერთ-ერთ ასეთ ვარიანტად ვანკელის როტორული ძრავი განიხილება. უფრო მეტიც, უკვე შექმნილია მეორე თაობის ”ვოლტის” პროტოტიპი, რომლის ჰიბრიდულ სისტემაშიც სწორედ როტორული აგრეგატი შედის.

”ამ ეტაპზე, ახლანდელი ძრავის როტორულით შეცვლის შესაძლებლობას განვიხილავთ. თუმცა, არაა გამორიცხული, რომ დამხმარე ძრავის მოვალეობა ბენზინის ორცილინდრიანმა აგრეგატმა შეასრულოს, რომლის სიმძლავრეც მხოლოდ 15-18 კილოვატი იქნება. მე უკვე ვატარე როტორულ ძრავიანი ”ვოლტი” და მინდა ვთქვა, რომ ასეთი აგრეგატი ძალიან მცირე რაოდენობით საწვავს მოიხმარს. ამასთან, მას კიდევ ერთი კარგი თვისება აქვს - ძალიან კომპაქტურია”, - ამბობს სტრეიკი.

ის არც დიზელის ძრავის ვარიანტს გამორიცხავს და ამბობს, რომ მართალია, ასეთი აგრეგატები ბენზინისაზე ძვირია, მაგრამ სამაგიეროდ, გაცილებით ნაკლებ საწვავსაც მოიხმარს და საბოლოო ჯამში, მისი ექსპლუატაციაც უფრო იაფი ჯდება.

ახალი შიდაწვის ძრავის შერჩევის გარდა, ”ჯენერალ მოტორსში” აკუმულატორების ღირებულების შემცირების გზებსაც ეძებენ. ახლანდელი აკუმულატორები ყველაზე მეტად აძვირებს ჰიბრიდულსა და ელექტრულ ავტომობილებს. დღეისათვის, ”შევროლე ვოლტის” აკუმულატორების ბლოკის ღირებულება 10 000 დოლარს შეადგენს. მწეარმოებლები იმედოვნებენ, რომ მეორე თაობის ”ვოლტისთვის”, აკუმულატორების ღირებულება განახევრდება.

”ჯენერალ მოტორსი” ჰიბრიდული ”შევროლე ვოლტის” წარმოების დაწყებას ამ წლის ბოლოს აპირებს. ავტომობილს მამოძრავებელ ძალას 150-ცხენისძალიანი ელექტროძრავი ანიჭებს, რომელსაც ელექტროენერგიით ლითიუმ-იონური აკუმულატორების ბლოკი ამარაგებს. საჭიროების შემთხვევაში კი (როცა აკუმულატორები განმუხტულია) საქმეში 1.4-ლიტრიანი ბენზინის ძრავისა და გენერატორის ტანდემი ერთვება, რომელიც აკუმულატორებს ავტომობილის მოძრაობის დროს მუხტავს. ისე კი, მათი დამუხტვა ჩვეულებრივი შტეპსელიდან შეიძლება. შიდაწვის ძრავისა და გენერატორის დაუხმარებლად, ”ვოლტის” სვლის სიშორე 64 კილომეტრია.

”პეჟო” და ”სიტროენი” იაფფასიან ავტომობილს გამოუშვებენ

PSA Peugeot Citroen

28 მაისი

ფრანგულმა საავტომობილო ჯგუფმა ”PSA პეჟო სიტროენმა” დაადასტურა ინფორმაცია იმის შესახებ, რომ დაგეგმილი აქვს ისეთი იაფფასიანი ავტომობილის წარმოება, რომელიც განვითარებადი ეკონომიკის მქონე ქვეყნებში გაიყიდება. გამოქვეყნებულ რელიზში აღნიშნულია, რომ ასეთი ავტომობილი კონკურენციას ამ სეგმენტის პიონერ ”რენო ლოგანს” გაუწევს, მას კი ესპანეთის ქალაქ ვიგოში მოქმედი ქარხანა გამოუშვებს.

ჯერჯერობით, ახალი ავტომობილის შესახებ თითქმის არანაირი ინფორმაცია არ ვრცელდება. ცნობილია მხოლოდ ის, რომ მას ”პეჟოსა” და ”სიტროენის” ბრენდებით გამოუშვებენ. უფრო მეტიც, ფრანგულ გამოცემა ”ლეს ექოსის” ინფორმაციით, ”პეჟოს” მოდელს ამ ეტაპზე, კომპანიაში M3-ს უწოდებენ, ”სიტროენისას” კი - М4-ს. ახალი ავტომობილი ”პეჟო 308-ს” სტილში შესრულდება და ”პეჟო 207-ის” ფასში გაიყიდება.

ვიგოს ქარხნის მოდერნიზაციისთვის, ”PSA პეჟო სიტროენს” 1 მილიარდი ევროს ინვესტირება აქვს განზრახული. სავარაუდოდ, ქარხნის დღიური წარმადობა 900 ავტომობილი იქნება, წლიურად კი იქ დაახლოებით 200 000 ავტომობლს გამოუშვებენ.

ასანიშნავია, რომ ვიგოს ქარხანა ”PSA პეჟო სიტროენის” ქარხნებს შორის უდიდესია. შარშან იქ თითქმის 385 000 ავტომობილი გამოუშვეს, რომელთა შორისაც ორივე მარკის რამდენიმე მოდელი იყო. ახალი, იაფფასიანი ავტომობილის წარმოება სავარაუდდ 2012 ან 2013 წელს დაიწყება. გასაღების მთავარი ბაზრები კი ახლო აღმოსავლეთი და აფრიკა იქნება, თუმცა მოგვიანებით ის ჩინურ და ბრაზილიურ ბაზრებზეც გამოჩნდება.

Thursday, May 27, 2010

ახალზელანდიური სუპერ ავტომობილი 600 ცხენის ძალით

New Zealand's Hulme CanAm Supercar Opens for Orders

27 მაისი

სუპერ ავტომობილების მწარმოებელმა ახალზელანდიურმა ფირმა ”ჰალმ სუპერქარზმა” გამოაცხადა, რომ მალე დაიწყებს თავისი ერთადერთი მოდელის, ”კანამის” წარმოებას, რასთან დაკავშირებითაც, ამ ავტომობილზე შეკვეთების მიღების დაწყება გამოაცხადა. ამასთან, კიდევ ერთხელ ითქვა, რომ სულ 200 ცალი ”კანამის” წარმოებაა გათვალისწინებული.

”ჰალმ კან ამი”, რომელსაც ძრავი ბაზაში აქვს განლაგებული, კარბონის კომპოზიტისგან დამზადებულ შასიზე დგას. შასის გარდა, ძარაც კარბონისაა. რაც შეეხება ძრავს, ესაა ”ჯენერალ მოტორსის” წარმოების 7.0-ლიტრიანი V8, რომლის სიმძლავრეც 600 ცხენის ძალას, მაქსიმალური მაბრუნი მომენტი კი 600 ნიუტონმეტრს აღწევს.

ძრავთან შეწყვილებულია 6-საფეხურიანი მექანიკური კოლოფი, თუმცა მყიდველს ოპციის სახით, ამდენივე საფეხურიან სეკვენტალურ კოლოფსაც შესთავაზებენ, რომლის გადამრთველი ნიჩბებიც, ისევე როგორც ფ1-ის ბოლიდებზე, საჭის რგოლის უკან მოთავსდება. ავტომობილის წონა სულ რაღაც 980 კილოგრამია. რა თქმა უნდა, მას შესანიშნავი დინამიკური მახასიათებლები უნდა ჰქონდეს, თუმცა ეს ინფორმაცია რატომღაც არ გავრცელებულა.

ღია ავტომობილს, მძლავრი ძრავის შესაფერისი, ”AP რეისინგის” წარმოების მუხრუჭები აქვს, რომელთა დისკოების დიამეტრიც 362 მილიმეტრია. ”ჰალმ კანამს” წინ 19-დუიმიანი, უკან კი 20-დუიმიანი ბორბლები უყენია, რომლებზეც ”პირელის” წარმოების საბურავებია (Pზერო როსო) ჩაცმული.

”ჰალმ სუპერქარზმა” ასევე გამოაცხადა, რომ მისი სუპერ ავტომობილის შეძენის მსურველებს, დეპოზიტის სახით, 10 000 გირვანქა სტერლინგის გადახდა მოუწევთ. ამ საფასურად, მათ წინასერიული პროტოტიპის ხილვის და მისი ტესტირების საშუალება მიეცემათ. სასურველი ავტომობილი კი მათს ჯიბეს 295 000 გირვანქა სტერლინგით შეამსუბუქებს.

სხვათა შორის, ახალზელანდიური კომპანია, რომელიც ფორმულა ერთის ახალზელანდიელი ჩემპიონის, დენის ჰალმის სახელს ატარებს, თავიდან ”ბეემვეს” წარმოების ძრავის გამოყენებას აპირებდა. მაგრამ გარდა იმისა, რომ ეს ძრავი ”მოხლოდ” 550 ცხენის ძალას ავითარებს, ის დაახლოებით 100 კილოგრამით მძიმეცაა და უფრო ძვირიც.

Wednesday, May 26, 2010

”ფერარი 458 იტალია” რბოლებისთვის ემზადება

Ferrari 458 Italia

26 მაისი

ინტერნტით გავრცელდა სპორტულად მომართული ”ფერარი 458 იტალიას” ფოტოები, რომლებიც იტალიის ქალაქ ვალელუნგას სარბოლი ტრასის ბოქსშია გადაღებული. გავრცელებული ინფორმაციით, ეს ავტომობილი არის სარბოლი ”458 იტალიას” პროტოტიპი, რომელსაც სავარაუდოდ, სახელში ”ჩელინჯი” დაემატება. ცნობისათვის, ”ჩელინჯი” ერქვა ”458 იტალიას” წინამორბედის, ”ფერარი F430-ის” სარბოლ ვერსიასაც.

ფოროს მიხედვით შეიძლება ითქვას, რომ ”458 იტალია ჩელინჯის” გვერდითა ფანჯრები პლასტიკატისგან დამზადდება, სალონში პილოტს უსაფრთხოების კარკასი დაიცავს, რომელიც ფოლადის მილებისგანაა შეკრული, რა თქმა უნდა, სარბოლი ყაიდისა იქნება სავარძელი და საჭის რგოლი, ბორბლებს თითო ცენტრალური საკეტი აქვთ, მათში კი სტანდარტულზე მძლავრი სამუხრუჭე დისკებია მოთავსებული.

ფოტოზე გამოსახულ ავტომობილზე არ ჩანს, მაგრამ ”458 იტალიას” სარბოლი ვერსია სპორტულ აეროდინამიკურ პაკეტს მიიღებს, რომლებიც მის აეროდინამიკურ დატვირთვას და მასთან ერთად, მაღალ სიჩქარეზე, გზის საფართან ბორბლების ჩაჭიდებას გაზრდიან. შეცვლილი საკიდარის წყალობით, ავტომობილი დადაბლდება, მოდერნიზაცია ჩაუტარდება გამოსაბოლქვ სისტემას. სამაგიეროდ, ჯერჯერობით უცნობია, ძრავი ხელშეუხებლად დარჩება, თუ მას ფორსირებას ჩაუტარებენ.

შეგახსენებთ, რომ ”ფერარიმ” პირველად საზოგადოებას ”458 იტალია” შარშან წარუდგინა. ეს ავტომობილი 4.5-ლიტრიანი V8 ძრავითაა აღჭურვილი, რომელიც 570 ცხენის ძალას ავითარებს. მის მიერ გამომუშავებულ მაბრუნ მომენტს, ორდისკოიანი ქუროს გავლით, 7-საფეხურიანი ნახევრად ავტომატური კოლოფი ღებულობს. ადგილიდან 100 კმ/სთ სიჩქარის ასაკრეფად, ”ფერარი 458 იტალიას” 3.4 წამი სჭირდბა, მისი მაქსიმალური სიჩქარე კი 320 კმ/სთ-ს აღწევს.

”ტოიოტა” ჰიბრიდ ”პრიუსს” შვიდადგილიან ვერსიას ამზადებს

Toyota Prius Compact Minivan Named 'Alpha'

26 მაისი

შესაძლოა, გარეგნობით ”პრიუს ალფა” კონცეპტუალურ ”ჰიბრიდ X-ს” დაემსგავსოს

..........................................

ავტოინდუსტრიის მსოფლიო ლიდერი, იაპონური ”ტოიოტა” წარმოებისთვის ახალ ჰიბრიდულ ავტომობილს ამზადებს, რომელიც პოპულარულ ჰიბრიდ ”პრიუსის” 300 მილიმეტრით დაგრძელებულ პლატფორმას დაეყრდნობა.

ამერიკულ გამოცემა ”მოტორ ტრენდის” ინფორმაციით, ახალი ავტომობილი შვიდადგილიანი მინივენი იქნება და მისი მსოფლიო პრემიერა მერმისს ჟენევის მოტორ შოუზე გაიმართება. არადა, იმავე ინფორმაციის მიხედვით, ეს ავტომობილი, ჯერ მხოლოდ იაპონური ბაზრისთვის იქნება განკუთვნილი.

მინივენი ”პრიუსის” ჰიბრიდული აგრეგატით აღიჭურვება, რომელშიც ბენზინის 1.8-ლიტრიანი ძრავი (98 ცხენის ძალით) და ელექტროძრავი (81 ცხენის ძალით) შედის. ამ უკანასკნელს, ენერგიით ლითიუმ-იონური აკუმულატორების ბლოკი მოამარაგებს. სხვათა შორის, ამ ტიპის აკუმულატორებს ”ტოიოტა” თავისი ჰიბრიდებისთვის პირველად გამოიყენებს.

ჯერჯერობით, მინივენის შესახებ, რომელსაც სახელად ”პრიუს ალფას” დაარქმევენ, დაწვრილებითი ტექნიკური ინფორმაცია არ ვრცელდება. სავარაუდოდ, ის ჰეჩბეკ ”პრიუსზე” ნელი და ხარჯიანი იქნება, რასაც ავტომობილის მომატებული წონ განაპირობებს. ცნობისათვის, კომბინირებული ციკლით მოძრაობისას, ჰეჩბეკი პრიუსი 100 კილომეტრს 3.9 ლიტრი ბენზინით გადის.

”შკოდა” სახელ ”ფელიციას” დააბრუნებს

Skoda Felicia

26 მაისი

”ფოლკსვაგენის” ჯგუფში შემავალი ჩეხური კომპანია ”შკოდა” სრულიად ახალი, ბიუჯეტური სედანის შექმნაზე მუშაობს, რომლითაც მოძველებულ ”ოქტავია ტურს” შეცვლის. სავარაუდოდ, ახალ ავტომობილს ”ფელიციას” დაარქმევენ, სახელს, რომელიც ადრე ”შკოდასავე” კომპაქტურ ჰეჩბეკს ერქვა და რომლის წარმოებაც 2001 წელს შეწყდა.

ფრანგულ გამოცემა ”ლ’აუტომობილის” მიერ გავრცელებული ინფორმაციით, სედანი ”ფელიცია” ჩეხური კომპანიის სამოდელო გამაში ყველაზე იაფფასიანი ავტომობილი გახდება. მისი საბაზო ღირებულება კი 12 000 ევრო იქნება.

ჯერჯერობით, ახალი ავტომობილის შესახებ, არანაირი ინფორმაცია არ ვრცელდება. თუმცა სავარაუდოა, რომ ის ”ფოლკსვაგენის” იაფფასიანი სედანის ჩეხური ვერსია იქნება. ეს უკანასკნელი აღმოსავლეთ ევროპისა და განვითარებადი ქვეყნებისთვის სპეციალურად მუშავდება და მისი გაყიდვები მალე დაიწყება.

ვოლფსბურგული იაფფასიანი ავტომობილისთვის, რომელსაც სახელი ჯერ არ აქვს, მხოლოდ ერთი, ოთხცილინდრიანი 1.6-ლიტრიანი ძრავია განკუთვნილი, რომლის მაქსიმალური სიმძლავრეც 105 ცხენის ძალაა. მასთან წყვილში 5-საფეხურიანი მექანიკური, ან 6-საფეხურიანი ავტომატური კოლოფი იმუშავებს. სავარაუდოდ, ამავე აგრეგატებს ”შკოდას” ახალი სედანიც მიიღებს.

იაფფასიანი სედანის გარდა, ”შკოდა” თავის საწარმოო პროგრამას მალე კიდევ რამდენიმე ახალი ავტომობილით შეავსებს. მათ შორის იქნება კომპაქტვენი და ”გოლფის” კლასის ჰეჩბეკი, რომელიც ჩეხური კომპანიის გამაში, ორ პოპულარულ მოდელს - ”ფაბიასა” და ”ოქტავიას” შორის არსებულ ცარიელ ნიშას შეავსებს.

Tuesday, May 25, 2010

”ნისანმა” ელექტრომობილ ”ლიფის” ფასები გამოაქვეყნა

Nissan Leaf

25 მაისი

ეს ნამდვილი მოვლენაა - პირველად მსოფლიო ავტოინდუსტრიის ისტორიაში, ელექტრომობილის მასობრივად წარმოება იწყება. პიონერი კი ”ნისანია”, რომელმაც ახლახანს, თავის ელექტრომობილ ”ლიფის” ფასები და მისი გაყიდვების სტრატეგია გამოაქვეყნა.

დღეს მთელს მსოფლიოში, არაერთი პატარა თუ დიდი კომპანია აწარმოებს ელექტრომობილებს, მაგრამ წარმოების მოცულობა იმდენად მცირეა, რომ მათ გამო, ავტოინდუსტრიაში მომხდარ დიდ გარდატეხაზე ლაპარაკიც კი უხერხულია. ეს გარდატეხა კი რეალურად მაშინ დაიწყება, როდესაც ”ნისან ლიფი” იაპონური კომპანიის დილერთა შოურუმებში გამოჩნდება.

მოკლედ მსოფლიოს პირველი მასობრივი ელექტრომობილის შესახებ: ის ხუთკარიანი ჰეჩბეკია, რომელიც ევროპული კლასიფიკაციით C სეგმენტს, ეგრეთ წოდებულ ”გოლფ” კლასს შეესაბამება. პირველად ის შარშან, იოკოჰამაში გამოჩნდა და მაშინვე სპეციალისტების დიდი ყურადღება მიიქცია. განსაკუთრებით კი საინტერესო ის განცხადება იყო, რომლის შესაბამისადაც, ”ნისან ლიფი” დაახლოებით, თავისი კლასის შიდაწვისძრავიანი ავტომობილების ფასში გაიყიდებოდა.

”ნისან ლიფის” ელექტროძრავი 107 ცხენის ძალას და 280 ნიუტონმეტრს ავითარებს. ამასთან, მაქსიმალური მაბრუნი მომენტი მაშინვე მიიღწევა, როგორც კი ძრავი ამოქმედდება (ეს ელექტროძრავების თვისებაა). ამ ძრავის მეშვეობით, ”ლიფის” მაქსიმალური სიჩქარე 140 კმ/სთ-ს აღწევს, რაც საქალაქო ავტომობილისთვის სრულიად საკმარისია.

ელექტრომობილის ენერგიის წყარო ლითიუმ-იონური აკუმულატორების ბლოკია, რომელში დაგროვილი მუხტიც საკმარისია იმისათვის, რომ მანქანამ 160 კილომეტრი გაიაროს. ეს კი, იაპონური კომპანიის განცხადებით, სრულად დააკმაყოფილებს მსოფლიო ავტომფლობელთა 70 პროცენტზე მეტის ყოველდღიურ საჭიროებებს. აკუმულატორების სრული დამუხტვისთვის ”ნისან ლიფს” 8 საათი სჭირდება, მაგრამ სწრაფი დამუხტვის რეჟიმით, სულ ნახევარი საათია საკმარისი იმისათვის, რომ აკუმულატორები 80 პროცენტით დაიმუხტოს.

”ნისანმა” გამოაცხადა, რომ ევროპაში ელექტრომობილი ”ლიფი” პირველ რიგში, ოთხი ქვეყნის - ირლანდიის, ჰოლანდიის, პორტუგალიისა და ბრიტანეთის ბაზრებზე გაიყიდება. ამ ქვეყნებზე არჩევანი იმ მარტივი მიზეზის გამო შეჩერდა, რომ იქ ეკოლოგიურად სუფთა ავტომობილები მნიშვნელოვანი საგადასახადო შეღავათებით სარგებლობს. ეს კი ავტომობილის საბოლოო ფასზე დადებითად აისახება.

ევროპული ოთხი ქვეყნიდან, ”ნისან ლიფი” ყველაზე ძვირი ტიტების ქვეყანაში ეღირება. იქ მას დილერები 32 839 ევროდ დააფასებენ. სამაგიეროდ, ამ ქვეყნის მთავრობა ელექტრომობილის მყიდველს პირდება, რომ ”ნისან ლიფის” ექსპლუატაციის პირველი 5 წლის განმავლობაში, დაახლოებით 6 000 ევროს დაზოგვა იქნება შესაძლებელი. ელექტრომობილების მფლობელ ჰოლანდიელებს რეგისტრაციის გადასახადს არ გადაახდევინებენ და საგზაო გადასახადისგანაც გაათავისუფლებენ.

ირლანდიასა და პორტუგალიაშიც, ელექტრომობილებისთვის საგზაო გადასახადი უკვე გააუქმეს და ეკოლოგიურად სუფთა ავტომობილებს, ჯამში 5 000 ევროს გადასახადებისგანც ათავისუფლებენ. შედეგად, ამ ორ ქვეყნებში ”ნისან ლიფი” 29 955 ევრო ეღირება. ყველაზე იაფი კი ეს ელექრტომობილი ბრიტანეთში ეღირება, სადაც მყიდველს 27 471 ევროს (უფრო სწორედ, ამ ფასის შესაბამისი თანხა გირვანქა სტერლინგებში) გადახდა მოუწევს. აქვე უნდა ითქვას, რომ ალბიონზე ასეთი დაბალი ფასი ნაწილობრივ შესუსტებულმა გირვანქა სტერლინგმაც განაპირობა. აუცილებლად უნდა გავითვალისწინოთ ის ფაქტიც, რომ ოთხივე ჩამოთვლილ ქვეყანაში, ”ნისან ლიფის” ფასებში აკუმულატორების ღირებულებაც გათვალისწინებულია, მათი საექსპლუატაციო ვადა კი მინიმუმ 5 წელია.

ამ ქვეყნებში ”ნისან ლიფზე” წინასწარი შეკვეთების მიღებას ივლისში დაიწყებენ. პირველი შემკვეთები სასურველ ავტომობილს პორტუგალიასა და ჰოლანდიაში დეკემბრიდან მიიღებენ, ოდნავ მოვიანებით კი ელექტრომობილი ბრიტანულ კუნძულებსაც მიაღწევს.

ევროპამდე, ”ნისანმა” თავის ელექტრომობილზე შეკვეთების მიღება უკვე დაიწყო იაპონიასა და აშშ-ში. ამომავალი მზის ქვეყანაში, მისი საბაზო ღირებულება 40 640 დოლარია, თუმცა საგადასახადო შეღავათების გათვალისწინებით, ფასი 32 370 დოლარამდე ჩამოდის. შედარებისთვის, იაპონური ბაზრის ბესტსელერი, ჰიბრიდული ”ტოიოტა პრიუსი” იქ 22 200 დოლარად იყიდება.

ყველაზე დიდი შეღავათებით კი ”ლიფი” (ფოთოლი) ამერიკაში ისარგებლებს, სადაც მისი საბაზო ღირებულება 32 780 დოლარია. ამას აკლდება ქვეყნის მთავრობის მიერ, ეკოლოგიურად სუფთა ავტომობილებზე დაწესებული შეღავათები, რომლებიც ჯამში 7 500 დოლარს შეადგენს და გამოდის რომ, აშშ-ში ”ნისან ლიფის” 25 280 დოლარად შეძენა შეიძლება. უფრო მეტიც, ზოგიერთ შტატში, ამ ავტომობილის მყიდველი დამატებითი ბონუსებითაც ისარგებლებს.

სამაგიეროდ, ამერიკის ბაზარზე, ”ნისან ლიფის” შეძენის მსურველთათვის ერთი პირობა მოქმედებს - მათ უნდა შეიძინონ აკუმულატორების დასამუხტი სპეციალური მოწყობილობა, რომელიც აკუმულატორების საყოფაცხოვრებო ელექტროქსელიდან დამუხტვის საშუალებას იძლევა. ასეთი მოწყობილობის ფასი კი 2 200 დოლარია.

მაგრამ ეს არაფერია იმ დიდ შეღავათთან, რასაც ელექტრომობილი თავის მფლობელს მისცემს - ”ნისან ლიფის” აკუმულატორების სრულად დამუხტვა ერთ კოლოფ სიგარეტზე იაფი დაჯდება(!).

”ნისანი” თავისი ელექტრომობილის წარმოებას ჯერ იაპონიაში დაიწყებს. იქ გამოშვებული ავტომობილები ზემოთ ჩამოთვლილ ქვეყნებში გაიყიდება. 2012 წელს მუშაობას ამერიკული ქარხანა დაიწყებს, რომელიც ამერიკის და მახლობელი რეგიონის ქვეყნების ბაზრებს დააკმაყოფილებს. 2013 წელს კი სანდერლენდის ქარხანა ამოქმედდება, რომლის მიერ წარმოებული ”ლიფიც” ევროპული ბაზრისთვის იქნება განკუთვნილი

აღსანიშნავია, რომ წარმოების პირველ წელს, იაპონურ კომპანიას შედარებით მოკრძალებული გეგმები აქვს - სულ რაღაც 6 000 ცალი ”ლიფის” გამოშვებას აპირებს. თუმცა, ამის ახსნა ადვილია. ჯერ ერთი, ავტომობილი თავისი კლასისთვის საკმაოდ ძვირი ღირს. მეორეც, ბაზარზე ის აბსოლუტური სიახლეა და აქედან გამომდინარეობს მესამე - ჯერჯერობით, ელექტრომობილების დასამუხტი სადგურების ქსელი არცერთ ქვეყანაში არაა შექმნილი. ასე რომ, თავიდან ”ლიფის” მფლობელებს საკუთარი, საშინაო დასამუხტი მოწყობილობის იმედზე ყოფნა მოუწევთ.

მოკლედ, გარკვეული დროა საჭირო იმისათვის, რომ ავტომოყვარულები ელექტრომობილებს შეეჩვიონ და შეჩვევის ეს რთული და ძვირადღირებული მისია პირველმა ”ნისანმა” ითავა. რა თქმა უნდა, მიმდევრების ელექტრომობილებს გაცილებით იოლი ცხოვრება ელით - მათ ”ლიფის” მიერ გატკეპნილ გზაზე მოუწევთ გავლა...

Monday, May 24, 2010

ახალი დეტალები ”ფერარი ენცოს” შესახებ

Next Ferrari Enzo: new details

24 მაისი

ძველი ”ფერარი ენცო”

..........................................

ინგლისურ ჟურნალ ”ავტოქართან” საუბრისას, ”ფერარის” გენერალურმა დირექტორმა ამედეო ფელისამ განაცხადა, რომ მისი კომპანია არ აპირებს ნახშირბადოვანი ბოჭკოს კომპოზიტების ფართოდ გამოყენებას მანამ, სანამ არ დაადგენს, ხანგრძლივი ექსპლუატაციისას ეს მასალა რამდენად გამძლეა.

”ჩვენ ამ მასალას ვიყენებთ და გამოვიყენებთ ისეთ ავტომობილებში, რომლებსაც ძალიან შეზღუდული რაოდენობით ვაწარმოებთ და რომლებიც ყოველდღიური გამოყენებისთვის არაა განკუთვნილი, ისეთებზე, როგორიც ახალი ”ენცო” იქნება”, - ჟურნალთან საუბრისას განაცხადა ფელისამ.

”ფერარი” კარბონის კომპოზიტებს დიდი ხანია იყენებს ისეთ მოდელებზე, როგორებიცაა F50 და ”ენცო”. თუმცა ფელისა ირწმუნება, რომ ეს მასალა ჯერ არაა ემდენად შესწავლილი, რომ ის სხვა, უფრო მრავალტირაჟიან მოდელებზეც ფართოდ გამოიყენონ.

”ფერარისგან” განსხვავებით, უფრო თამამად იქცევა ”მაკლარენი”, რომელმაც თავისი პირველი სერიული ავტომობილის, MP4-12C-ის მზიდი ელემენტი მთლიანად კარბონის კომპოზიტისგან დაამზადა. მალე კარბონს თავისი სუპერ ავტომობილების წარმოებაში ფართოდ დანერგავს ”მერსედეს-ბენცი”, ”ბეემვე” კი თავის კონცეპცია ”ეფიციენტდაინემიქსის” ერთ-ერთ მთავარ ელემენტად კარბონის ფართოდ გამოყენებას მიიჩნევს.

”ერთის თქმა შემიძლია - დღეს არავინ იცის, ავარიის დროს რა მოსდის მზიდ სტრუქტურას, რომელიც კარბონისგან არის დამზადებული. ვინ იცის, რა მდგომარეობაში ჩავარდება 20-30 წლის შემდეგ მანქანა, რომლის სტრუქტურაც კარბონისაა? ამ ეტაპზე, მხოლოდ თვითმფრინავების წარმოებაში აქვთ ამაზე წარმოდგენა, მაგრამ იქაც, ამ მასალის გამოყენება ძალიან შეზღუდულია. ჩვენი მანქანები კი რემონტს ადვილად ექვემდებარება, თუ ძლიერ არ დაზიანდება. ჩვენ კი არ გვინდა, რომ მათ ეს თვისება დაეკარგოთ”, - ამბობს ფელისა.

მანვე განაცხადა, რომ ახალი ”ფერარი ენცოს” წარმოება 2012 წელს დაიწყება. ავტომობილი კი ორტურბოკომპრესორიანი V8 ძრავით აღიჭურვება. კარგა ხანს იყო ლაპარაკი იმაზე, რომ ახალი ”ენცოსთვის” მარანელოელები წყვილტურბოიან V6 აგრეგატს ამზადებდნენ. თუმცა ფელისამ ექვსცილინდრიანი ძრავი მისი კომპანიის საწარმოო პროგრამაში კატეგორიულად გამორიცხა.

”ექვსცილინდრიანი ძრავი ჩვენს გეგმებში არ შედის და არც შევა მანამ, სანამ მას მომხმარებელი მოგვთხოვს. დღეს ბევრი ფიქრობს, რომ ძრავის და მანქანის შესაძლებლობანი მისი ცილინდრების რაოდენობაზეა დამოკიდებული. სწორედ ამიტომაა, რომ შემუშავების პროცესში გვაქვს ჰიბრიდული ტექნოლოგია, რომელსაც V8 და V10 ძრავებით აღჭურვილ ავტომობილებზე გამოვიყენებთ. უფრო მეტიც, ჩვენ ჰიბრიდული ტექნოლოგიებით, V12 ძრავების შენარჩუნებაც შეგვიძლია”, - ამბობს ფელისა.

ჯერჯერობით, არაფერია ცნობილი ახალი ”ენცოს” ტექნიკური მახასიათებლების შესახებ. სავარაუდოდ, იტალიური კომპანია სულ 500 ცალ სუპერ ავტომობილს (ისევე როგორც პირველი ”ენცოს” შემთხვევაში) გამოუშვებს, რომელთა ფასიც, 500 000 დოლარის ფარგლებში იქნება.

”პინინფარინას” საიუბილეო ქმნილება - ელექტრომობილი ”ნიდო”

Pininfarina Shows All-Electric Nido Mini

24 მაისი

ძარების წარმოებასა და საავტომობილო დიზაინზე სპეციალიზებულმა კომპანია ”პინინფარინამ”, სუბკომპაქტურ ელექტრომობილ ”ნიდოს” პრეზენტაცია ჩაატარა. ეს ავტომობილი ”პინინფარინას” დაარსებიდან 80 წლის იუბილესთან დაკავშირებით დამზადდა. მაგრამ მისი კონცეპტუალური ვერსიისგან განსხვავებით, რომელიც ”პინინფარინამ” 2004 წელს, პარიზის ავტო შოუზე გვიჩვენა, ახალი ”ნიდო” სერიული წარმოებისთვის მომზადებული ავტომობილია.
”ნიდოს” გაბარიტებია: სიგრძე 2.905 მეტრი, სიგანე 1.683 მეტრი, სიმაღლე 1.507 მეტრი და ბორბლების ბაზა 2.068 მეტრია. ამგვარად, ის ”სმარტზე” 0.215 მეტრით გრძელი, 0.123 მეტრით განიერი და 0.037 მეტრით დაბალია. საჩვენებელი ელექტრომობილი ფოლადის მილებისგან შეკრულ კარკასზეა აგებული, თუმცა კომპანიის განცხადებით, წარმოებისას ასეთ კარკასს ალუმინისა შეცვლის. სერიული ”ნიდოს” წონა 900 კილოგრამია.

”ნიდო” აღჭურვილია 40-ცხენისძალიანი ელექტროძრავით, რომელიც ავტომობილის უკანა ნაწილშია მოთავსებული. ძრავი ენერგიას ნიკელ-ქლორიდული აკუმულატორების (სერია ზებრა Z5) ბლოკისგან ღებულობს. მათი დახმარებით, ”ნიდოს” შეუჩერებლად 140 კილომეტრის გავლა შეუძლია.

”პინინფარინას” მონაცემებით, ”ნიდოს” პროტოტიპს ადგილიდან 60 კმ/სთ სიჩქარის აკრეფა 6.7 წამში შეუძლია, მისი მაქსიმალური სიჩქარე კი 120 კმ/სთ-ია. აკუმულატორების სრულად დასამუხტად, დაახლოებით 8 საათია საჭირო. ავტომობილს ენერგიის დაზოგვაში, ”პირელის” მიერ სპეციალურად შემუშავებული საბურავები დაეხმარება.

აღსანიშნავია, რომ ლითიუმ-იონურ აკუმულატორებთან შედარებით, ნიკელ-ქლორიდული აკუმულატორები მეტი ტევადობით და ექსპლუატაციის მეტი პერიოდით გამოირჩევიან. მათში გამოყენებული შენაერთების დიდი ნაწილი გარემოსადმი უვნებელია. ამასთან, აკუმულატორები გადამუშავებას სრულად ექვემდებარება. ასეთი აკუმულატორების მთავარი ნაკლი მათი სიძვირეა, რის გამოც, მათით აღჭურვილი ავტომობილის ექსპლუატაციის ხარჯები, შიდაწვისძრავიანისა შესაბამის მაჩვენებელს უტოლდება.

”პინინფარინას” ხელმძღვანელობა აცხადებს, რომ ”ნიდოს” მოდულური სტრუქტურა მის უნივერსალურობას განაპირობებს. ეს ნიშნავს, რომ მის ბაზაზე როგორც ჰიბრიდული, ასევე შიდაწვისძრავიანი ავტომობილის წარმოება (ნიდოს პირველი კონცეპტი შიდაწვისძრავიანი იყო) შეიძლება. გარდა ამისა, პერსპექტივაში, დიდი იქნება ძარების არჩევანი. ორადგილიანი ჰეჩბეკის გარდა, ”ნიდოს” ბაზაზე შეიძლება ოდნავ დიდი ჰეჩბეკის (ჩასაჯდომი ფორმულით 2+2), პიკაპის, მიკროვენისა და ფურგონის დამზადება.

ადრე გამოქვეყნებული განცხადების შესაბამისად, ელექტრომობილების წარმოების საქმეში, ”პინინფარინას” პარტნიორობას ფრანგული კომპანია ”ბოლორე” გაუწევს, რომელიც აკუმულატორების წარმოებაზეა სპეციალიზებული. ”ნიდოს” წარმოების დაწყების შემდეგ, ”პინინფარინა” მასზე დიდი ზომის, ოთხადგილიანი ელექტრომობილის გამოშვებასაც აპირებს, რომელსაც წამყვანი წინა ბორბლები ექნება.

მარკიონე კარლოს გონის წარმატების გამეორებას ცდილობს

(გაგრძელება, დასაწყისი 6 მაისი)

Marchionne faces tough challenge to match Ghosn's success

24 მაისი

სერჯო მარკიონე
..........................................

კარლოს გონმა რომ ”ნისანი” ჩაიბარა (1999 წელს), იაპონური კომპანია აღმავლობის გზაზე იყო, რასაც ვერ ვიტყვით იმ ”კრაისლერზე”, რომელიც ”ფიატს” და მასთან ერთად, სერჯო მარკიონეს ჩააბარეს. კრიზისმა საერთოდ მოსპო ამერიკული კომპანია. ხარჯების შეკვეცის საბაბით, ”კრაისლერის” ძველმა პატრონმა, საინვესტიციო ჯგუფმა ”ცერბერუსმა”, ახალი ავტომობილების შემუშავებისთვის გამოყოფილი ბიუჯეტიც კი შეკვეცა.

როცა მარკიონემ ამერიკული კომპანია ჩაიბარა (ერთი წლის წინ), ”კრაისლერის” ინჟინრები მცირე რაოდენობით მოდელების შემუშავებით იყვნენ განახლებული. ამასთან, სამოდელო გამაში საერთოდ ვერ ნახავდით მცირეგაბარიტიანსა და საწვავის ეკონომიური ხარჯის მქონე ავტომობილებს. ახლა კი, მალე ”კრაისლერის” დილერთა შოურუმებში, ”ფიატ 500”გამოჩნდება. თანდათან კი ამერიკული საავტომობილო ჯგუფის ორი ბრენდის (კრაისლერის და დოჯის) სამოდელო გამაში, ”ფიატის” ჯგუფში შემავალი კომპანიების (ფიატი, ალფა რომეო და ლანჩა) მცირეგაბარიტიანი ავტომობილების ბაზაზე შექმნილ ავტომობილებსაც ვიხილავთ.

მართალია, სათავეში გონის მისვლისას, ”ნისანმა” ზედიზედ მეოთხე წელი დაასრულა ზარალით, მაგრამ მის საწარმოო პროგრამაში რამდენიმე ახალი მოდელი გამოჩნდა. ამასთან, ”რენომ”, რომელმაც იაპონური კომპანიის 36.8 პროცენტი დაისაკუთრა, ”ნისანის” მოსასულიერებლად, 5.4 მილიარდი დოლარის ინვესტიცია გაიმეტა. მოკლედ, გონს წარმატების საფუძველი რეალურად შემზადებული დახვდა.

კარლოს გონი

.......

.......

.......

.......

.......

.......

გონის გამოწვევები

მაგრამ რა თქმა უნდა, პრობლემები გონსაც დახვდა. უპირველეს ყოვლისა, ეს კულტურული განსხვავება იყო. ის დასავლეთის ტიპის პირველი მენეჯერი გახდა, რომელიც სათავეში იაპონურ კომპანიას ჩაუდგა. იმისათვის, რომ ნაწილობრივ იაპონელად ეგრძნო თავი, გონმა სალაპარაკო იაპონურის შესწავლა დაიწყო, ”ნისანის” კაფეტერიაში იაპონურ საკვებს მიირთმევდა და იმავე ესკალატორით სარგებლობდა, რითაც ”ნისანის” რიგითი თანამშრომლები.

იაპონურის სწავლით, გონმა ”ნისანის” აღმასრულებლებს და რიგით თანამშრომლებს შორის სიმპათია და ნდობა დაიმსახურა. ამას განსაკუთრებული მნიშვნელობა იაპონური კომპანიის რესტრუქტურიზაციის პროცესში ჰქონდა. ”ხარჯების გამანადგურებელმა”, როგორც მას ფრანგულ პრესაში შეარქვეს, რესტრუქტურიზაციის დროს ხუთი საწარმო დახურა და 21 000 თანამშრომელი დაითხოვა, რაც ”ნისანის” მუშათა შტატის დაახლოებით 14 პროცენტს შეადგენდა. ასეთ რადიკალურ ნაბიჯებს კი ავტორიტეტული ხელმძღვანელი სჭირდებოდა.

ანალიტიკოსთა შეფასებები

დღეისათვის, ორი კომპანიის (რენოს და ფიატის) შეფასებისას, სააგენტო ბლუმბერგი შემდეგ მონაცემებს აქვეყნებს: 34 ანალიტიკოსიდან, 12 ”რენოს” აქციების შეძენას გვირჩევს, 9-ს აზრით, კარგი იქნება ამ კომპანიის აქციების შენარჩუნება, 5 კი ფიქრობს, რომ უკეთესი იქნება მათი გაყიდვა. დანარჩენები პროგნოზისგან თავს იკავებენ. ”ფიატის” შემთხვევაში, მისი ქციების ყიდვას 12 ანალიტიკოსი გვირჩევს, ამდენივეს აზრით, კარგი იქნება აქციების შენარჩუნება და მხოლოდ 10-ს მიაჩნია, რომ აუცილებელია ტურინული კონცერნის აქციების თავიდან მოშორება. აშკარაა, რომ ”ფიატთან” დაკავშირებით, ანალიტიკოსებს ამ ეტაპზე, უფრო ჩამოყალიბებული აზრი აქვთ.

”მორგან სტენლის” ყველაზე ავტორიტეტული ევროპელი ანალიტიკოსი საავტომობილო ინდუსტრიის დარგში, ედამ ჯონასი, ვინც იმავდროულად, ბლუმბერგის საუკეთესო ანალიტიკოსიცაა, ამბობს, რომ ”ფიატი” ამჟამად ზედმეტადაა შეფასებული. თუმცა დასძენს, რომ შესაძლოა, იტალიური კონცერნის ფასეულობას ”კრაისლერმა” დამატებითი წონა შესძინოს.

სამაგიეროდ, სხვა ავტორიტეტული სპეციალისტები ”ფიატის” აქციების გაყიდვის რეკომენდაციას იძლევიან. მათი აზრით, იტალიურ ავტო მწარმოებელს, გლობალურ ბაზარზე, მათ შორის ჩინეთში გავრცელების ნალები შანსი აქვს. თუმცა, არიან ისეთებიც, რომლებიც საპირისპიროში არიან დარწმუნებულნი.

მარკიონე - გარდაქმნების სპეციალისტი

მარკიონე იტალიის ქალაქ კიეტიში დაიბადა, 14 წლისა კი კანადაში გადასახლდა. ამჟამად ის კანადს და იტალიის მოქალაქეა. განათლებით ბუღალტერმა, ვექილმა და სასამართლო შუამავალმა, მარკიონემ თავისი კარიერა კანადაში დაიწყო, სადაც კომპანია ”დელუა ენდ ტაჩში” მუშაობდა. 1994 წელს ის ქიმიურ-ფარმაცევტულ ჯგუფ ”ალუსუის ლონცაში” დაგავიდა, სამი წლის შემდეგ კი ამ ჯგუფიდან ფარმაცევტული ბიზნესი გამოყო და ჯგუფი ”ლონცა” ჩამოაყალიბა. მარკიონეს გამჭრიახობის წყალობით, ამ ჯგუფის მოგება სამ წელიწადში გასამმაგდა.

მარკიონემ კომპანიების ეფექტურად გარდამქმნელის რეპუტაცია მჯერ კიდევ ”ფიატში” მისვლამდე დაიმკვიდრა. 2004 წელს კი ტუეინული კონცერნის მთავარი აღმასრულებელი გახდა. მანამდე ოთხი წლის განმავლობაში, ”ფიატი” წაგებაზე მუშაობდა. მარკიონეს პირველი დამსახურება ისაა, რომ მან ”ფიატი” ”ჯენერალ მოტორსს” დააშორა (უფრო სწორედ, ფიატთან დაშორება გენერლებმა ითხოვეს, რისთვისაც ორ მხარეს შორის არსებული კონტრაქტი უნდა დარღვეულიყო) და თან, ამისათვის ამერიკული გიგანტისგან, რომელსაც დიდი კრიზისის ნიშნები ჯერაც არ ეტყობოდა, 2 მილიარდი დოლარი მიიღო.

ამას მოჰყვა ბანკებთან გაფორმებული მეტად ხელსაყრელი კონტრაქტები, 19,000 თანამშრომლის დათხოვნა, ახალი მოდელების შემუშავების დროის 3 წლამდე (ოთხი წლიდან) შემცირება და ბაზარზე ახალი მოდელების გამოშვება. შედეგად, 2005 წელი ”ფიატმა” მოგებით დაასრულა (!).

ბევრი ანალიტიკოსი დღეს ამბობს, რომ მარკიონე ამჟამად ”კრაისლერის” ხარჯების შეკვეცის გზების ძებნითაა დაკავებული. თუმცა ისიც ფაქტია, რომ ეს საქმე ნაწილობრივ მანამ გაკეთდა, სანამ ის დეტროიტული კომპანიის შეფი გახდებოდა. ეს შარშან, იმ ექვს კვირაში მოხდა, როცა ”კრაისლერი” ხელოვნური გაკოტრების რეჟიმში იმყოფებოდა. ამ პერიოდს მარკიონე ამერიკული კომპანიის ”სარეცხ მანქანაში” გატარებას ადარებს. ”ჭუჭყის” სახით, კომპანიამ 8 ქარხანა მოიშორა (დახურა), გაყიდა, ან გააქირავა უძრავი ქონების ნაწილი და კონტრაქტი 789 ამერიკელ დილერთან შეწყვიტა. გარდა ამისა, აშშ-ის მთავრობისგან, შეღავათიანი სესხის სახით, რამდენიმე მილიარდი დოლარი მიიღო (ვალის დიდი ნაწილი უკვე დაფარულია).

ანალიტიკოსების აზრით, იმ ათი წლის განმავლობაში, რაც ”კრაისლერი” ჯერ ”დაიმლერის”, შემდეგ კი ”ცერბერუსის” ხელში იყო, მისი ინჟინრების ინოვაციურობა და კრეატიულობა დაჩლუნგდა, რადგან ამერიკული კომპანიის რეალური განვითარებით არავინ იყო დაინტერესებული. ახლა კი, მარკიონემ ამ თვისებათა გამოცოცხლება დაიწყო, რაც კიდევ ერთი ნიშანია იმისა, რომ ”ფიატს” ”კრაისლერთან” შორს მიმავალი მიზნები აკავშირებს და ეს ორივე კომპანიისთვის სასარგებლო იქნება.

ერთ-ერთი პირველი საქმე, რაც მარკიონემ ”კრაისლერის” სათავეში მისვლის შემდეგ გააკეთა, ის იყო, რომ 40-ზე მეტ მაღალი რანგის მენეჯერს საქმე გადაუნაწილე. სხვათა შორის, ”ფიატის” მთავარ აღმასრულებლად დანიშვნის შემდეგაც, ის ანალოგიურად მოიქცა. ის ამბობს, რომ ბიზნესში ისეთ ადამიანებს ენდობა, რომლებსაც შემდეგი ორი ფუნდამენტური თვისება გააჩნია: ხალხის გაძღოლა და სიახლეების დანერგვა.

რესტრუქტურიზაციის გარდა, მარკიონეს მთავარი საზრუნავი ორი კომპანიის საწარმოო პროგრამის გადახალისებაცაა. ამჟამად ის ”ჯიპის” პოპულარულ უგზოობის მოდელ ”გრანდ ჩეროკითაა” დაკავებული, რომელიც ამერიკულ ბაზარზე მალე გამოჩნდება. ის ამ მოდელს უყურებს, როგორც წუმპედან ”კრაისლერის” ამომყვანს და ავტომობილს, რომელსაც ამერიკული ჯგუფის კრიზისიდან გამოყვანაში მთავარი როლის შესრულება შეუძლია.

მაგრამ ანალიტიკოსები თვლიან, რომ ”გრანდ ჩეროკის” ”კრაისლერის” გაყიდვების ზრდის მცირე ხნით შენარჩუნება შეუძლია. უფრო სერიოზული წარმატებისთვის კი სამოდელო გამის გაფართოებაა საჭირო, რასაც გაცილებით მეტი დრო დასჭირდება. თუმცა მარკიონე ამისთვისაც მზადაა. ცოტა ხნის წინ, მან ”ფიატის” ჯგუფის რესტრუქტურიზაციის გეგმა შეიმუშავა, რომელიც ”კრაისლერის” და იტალიური კომპანიის ბრენდების მჭიდრო თანამშრომლობას ითვალისწინებს.

მოკლედ, რაც ორი საავტომობილო ჯგუფის შეფი გახდა, მარკიონე ჯვირაში 7 დღე მუშაობს და ტურინსა და დეტროიტს შორის მუდმივად გადაფრენაშია. სხვაგვარად არც შეიძლება - ორივე კომპანია ამ ეტაპზე გარდატეხის პროცესშია და ყურადღების ოდნავ მოდუნებასაც კი, შეიძლება უზარმაზარი ზარალი მოჰყვეს.

დაბოლოს, კითხვაზე, როგორ შეაფასებს გონს, მარკიონე ამბობს, რომ ”რენო-ნისანის” შეფი ”რკინის მუშტივითაა” და დასძენს: ”ის ჩემზე გაცილებით უკეთესი მმართველია”. ამას ამბობს, მაგრამ გულში ალბათ ფიქრობს, რომ მისი დროც დადგება...

Saturday, May 22, 2010

1936 წლის ”ბუგატი” 30 მილიონზე მეტად გაიყიდა

1936 Bugatti Type 57SC Atlantic Sells for $30M+

21 მაისი

ამიერიდან, კითხვაზე, რომელია მსოფლიოში ყველაზე ძვირადღირებული ავტომობილი, თამამად შეგიძლიათ უპასუხოთ - 1936 წლის ”ბუგატი ტაიპ 57SC ატლანტიკი”. კომპანია ”გუდინგ ენდ კომპანის” აუქციონზე, ერთ-ერთმა ამერიკულმა მუზეუმმა, ამ ავტომობილში 30 მილიონ დოლარზე მეტი გადაიხადა. მოდით და ეკონომიკურ კრიზისზე ილაპარაკეთ...

სიძვირის მიხედვით, უძვირფასეს ”ბუგატისთან” ყველაზე ახლოსაა 1957 წელს გამოშვებული ”ფერარი 250 ტესტა როსა”, რომელშიც შარშან 12.2 მილიონი დოლარი გადაიხადეს. შემდეგია 1931 წლის ”ბუგატი როიალე კელნერ კუპე”, რომელშიც 1987 წელს ინკოგნიტო კოლექციონერმა 8.7 მილიონი დოლარი გადაიხადა.

ეტორე ბუგატის ფაბრიკამ თავის დროზე, სულ ოთხი ცალი ”ტაიპ 57SC ატლანტიკი” დაამზადა. მათგან დღეს მხოლოდ ორია შემორჩენილი. ერთი ტანსაცმლის მწარმოებელ ამერიკელ მულტიმილიონერ რალფ ლორენს ეკუთვნის, მეორე კი ასევე მოდის ბიზნესის მულტიმილიონერს, აწგარდაცვლილი დოქტორ პიტერ უილიამსონის საკუთრება იყო, ახლა კი, სარეკორდო თანხად შტატ კალიფორნიის მულენის საავტომობილო მუზეუმმა შეიძინა. ეს ის ავტომობილია, რომელმაც 2003 წელს, პებლ ბიჩის ელეგანტურობის კონკურსზე გაიმარჯვა.

”ატლანტიკი” ფრანგული კომპანიის მიერ 1935 წლის პარიზის შოუზე ნაჩვენებ პროტოტიპ ”აეროლაით ელექტრონ კუპეს” ბაზაზე შეიქმნა. ის ეგზემპლარი, რომელიც სარეკორდო თანხად გაიყიდა, პირველია იმ ოთხეულიდან, რომლებიც ”ბუგატიმ” დაამზადა და ამიტომაც, განსაკუთრებით ფასეულია კოლექციონერთა შორის.