Thursday, March 31, 2011

„ბერტონე“ თავის კონცეპტუალურ ავტომობილებს ჰყიდის

Bertone Concepts for Sale at Villa d'Este

31 მარტი

მალე საავტომობილო რარიტეტის მოყვარულებს სანუკვარი ავტომობილების შეძენის საშუალება მიეცემათ - ვილა დ’ესტეს საავტომობილო ელეგანტურობის კონკურსის პარალელურად, რომელიც 21 მაისს გაიმართება, ჩატარდება აუქციონი, რომელზეც იტალიური სადიზაინერო ატელიე „კაროცერია ბერტონე“ თავის კონცეპტუალურ ავტომობილებს გამოიტანს.

აუქციონს ამ საქმეზე სპეციალიზებული „RM ოქშენზი“ ჩაატარებს. ავტომობილები, რომლებაც აუქციონზე გამოიტანენ, პირველად იყიდება. ანუ, ისინი მხოლოდ „ბერტონეს“ ფარეხს ამშვენებდნენ. ამიტომ, აუქციონის ორგანიზატორები და ატელიეს ხელმძღვანელობა მედოვნებს, რომ ყველა ავტომობილი, საწყის ფასზე გაცილებით ძვირად გაიყიდება.

„ეს ავტომობილები „ბერტონეს“ შემოქმედების ისტორიის განუყოფელი ნაწილია და მათი შეძენის შემთხვევაში, მყიდველი საავტომობილო ისტორიის გამორჩეულ ექსპონატებს დაეუფლება. ესეც რომ არა, ჩვენს აუქციონზე გამოვიტანთ იმ ექვს ავტომობილს, რომლებიც კერძო მფლობელის ხელში ადრე არასდროს ყოფილა. ისინი სააქციონო ბაზრის დებიუტანტებია და ვფიქრობთ, ავტოკოლექციონერებს ეს ფაქტიც მოხიბლავს“, - ამბობს „RM იუროპის“ მმართველი დირექტორი მაქს ჯირარდო.

აუქციონზე შემდეგ ავტომობილებს გამოიტანენ:

1967 წლის ლამბორგინი მარცალის პროტოტიპი, სერიული ნომრით 1001. ამ ავტომობილით, მონაკოს პრინცმა რენიემ და პრინცესა გრეისმა 1967 წლის მონაკოს დიდ პრიზის აღლუმზე გაინავარდეს. ფასი 1 000 000 – 1 800 000 ევრო;

1970 წლის ლანჩა სტრატოს HF ძერო, სერიული ნომრით C/1160CPL, ფასი 1 000 000 – 1 800 000 ევრო;

1963 წლის შევროლე ტესტუდო, სერიული ნომრით 20927w207657, ფასი 500 000 – 800 000 ევრო;

1974 წლის ლამბორგინი ბრავო, სერიული ნომრით NS46 01, ფასი 150 000 – 220 000 ევრო;

1980 წლის ლამბორგინი ათონი, სერიული ნომრით S155/01, ფასი 150 000 – 220 000 ევრო;

1978 წლის ლანჩა სიბილო, სერიული ნომრით S 12201, ფასი 60 000 – 100 000 ევრო.

Wednesday, March 30, 2011

„ჰიუნდაიმ“ გაყიდული მანქანების დაბრუნების პროგრამა დაასრულა

Hyundai vehicle return program ending

30 მარტი

„ჰიუნდაიმ“ გადაწყვიტა, რომ შეაჩეროს პროგრამა, რომელიც გაყიდული ავტომობილების უკან დაბრუნებას ითვალისწინებდა იმ შემთხვევაში, თუ მყიდველი მოულოდნელად შემოსავლის წყაროს კარგავდა და გადახდისუუნარო ხდებოდა. ეს პროგრამა კორეულმა კომპანიამ 2009 წლის იანვარში დაიწყო და გლობალურ ფინანსურ კრიზისს და მის შედეგებს დაუკავშირა.

გამოცემა „ინსაიდ ლაინის“ მიერ გავრცელებული ინფორმაციით, ამ პროგრამით მხოლოდ 350-მა ადამიანმა ისარგებლა. მათ „ჰიუნდაის“ დავალიანების დაფარვის პირობებით ისარგებლეს. მაგრამ სამუშაო ადგილები მატულობს, ეკონომიკური მდგომარეობა ნორმალურ კალაპოტს უბრუნდება და „ჰიუნდაიმაც“ ჩათვალა, რომ პროგრამამ თავისი საჭიროება ამოწურა და ის საჭირო აღარაა.

სხვათა შორის, ეკონომიკური კრიზისის პერიოდში, კორეული კომპანიის ამერიკულმა შტომ შარშან 538 228 ავტომობილი გაჰყიდა (წინა წელს 435 064) და ამერიკის ბაზარზე, თავისი წილი 3.0 პროცენტიდან 4.6 პროცენტამდე გაზარდა. და მიუხდავად იმისა, რომ ავტომობილების დაბრუნების პროგრამას აჩერებს, „ჰიუნდაი“ იმედოვნებს, რომ გაყიდვების ზრდა გაგრძელდება და ამაში მას ხელს სხვა პროგრამები შეუწყობს, რომლებიც კვლავაც ძალაშია.

ამ პროგრამებს შორისაა 10-წლიანი (ან 160 000 კილომეტრზე გათვლილი) გარანტია და ხუთწლიანი საგზაო მომსახურების გეგმა.

„ბეემვემ“ თავისი „ზვიგენი“ - მე-6 სერიის კუპე განაახლა

BMW 6 Series Coupe

30 მარტი

ჟენევის საავტომობილო შოუ შესანიშნავი ადგილია იმისათვის, რომ ავტომწარმოებლებმა საზოგადოებას თავიანთი სიახლეები უჩვენონ. მათი უმეტესობა სწორედ ასე იქცევა და მათ შორისაა „ბეემვეც“, თუმცა ბავარიულმა კომპანიამ ჟენევაში ყველაფერი როდი გვიჩვენა, რაც მომზადებული ჰქონდა. ერთი სიახლე შანჰაის შოუსთვისაც შემოინახა, რომელიც აპრილში გაიმართება. ეს სიახლე კი მე-6 სერიის კუპეს განახლებული ვერსიაა.

სხვათა შორის, ამ ავტომობილის კონცეპტუალური ვერსია ბავარიელებმა შარშან, პარიზის ავტო შოუზე გვიჩვენეს, ახლახანს კი, დეტროიტის ავტო შოუზე, მისი ღია ვარიანტიც წარადგინეს. უნდა ითქვას, რომ ამ ავტომობილის გარეგნობა, კომპანიის ახალი მთავარი დიზაინერის, ჰოლანდიელი ადრიან ფან ჰოოიდონკის ხელმძღვანელობით შემუშავდა, ვინც ორი წლის წინ, ამ პოსტზე კრის ბენგლი შეცვალა.

მე-6 სერიის ახალი კუპეს გაბარიტებია: სიგრძე 4 894 მილიმეტრი, სიგანე 1 894 მმ, სიმაღლე 1 369 მმ და ბაზა 2 855 მილიმეტრი. ამგვარად, ის წინამორბედთან შედარებით, 75 მმ-ით გრძელი, 39 მმ-ით განიერი და 5 მმ-ით დაბალია. ბაზა კი ასევე 75 მმ-ით დაგრძელდა. თითქმის არ შეცვლილა საბარგულის მოცულობა, რაც 460 ლიტრია.

ავტომობილს განსაკუთრებით აგრესიულ გარეგნობას, მისი წინა ნაწილი აძლევს. ასე განსაჯეთ, მას ჟურნალისტებმა ზვიგენიც კი უწოდეს, რაც იმის გათვალისწინებით, რომ მე-6 სერიის კუპე სპორტული მანქანაა, კომპლიმენტია. ბავარიელების განცხადებით, შასი მტკიცე ფოლადისგანაა დამზადებული, რისი წყალობითაც, წინამორბედთან შედარებით, გრეხვაზე მისი მედეგობა 53%-ით არის გაზრდილი. გარდა ამისა, ძარის ზოგიერთი ელემენტი - კაპოტი და ორივე კარი, ალუმინისგანაა დამზადებული, წინა ფრთები პლასტიკატისაა, ძარის ძირითადი ნაწილი კი - შუშის ბოჭკოს კომპოზიტისაა. სამწუხაროდ, „ბეემვეს“ ძარის წონის მონაცემები არ გამოუქვეყნებია.

ინტერიერში ყურადღებას იქცევს „ბეემვესთვის“ დამახასიათებელი თავისებურება - ცენტრალური კონსოლი მძღოლის მხარეს არის მიქცეული. ამასთან, წინა ორ სავარძელს, მასიური გვირაბი აშორებს, რისი წყალობითაც, ორივე ადგილი ერთგვარ კოკპიტს მოგვაგონებს. ავტომობილის სიმაღლის შემცირების მიუხედავად, მწარმოებელი ირწმუნება, რომ სალონში, მასში მსხდომთა თავებისთვის ადგილი გაზრდილია.
მყიდველს მე-6 სერიის ახალი კუპეს, ჯერ მხოლოდ ორი ძრავით შესთავაზებენ. ესენია 6-ცილინდრიანი (ცილინდრები ერთ რიგშია განლაგებული) 3.0-ლიტრიანი ტურბოძრავი (ავტომობლის ინდექსი 640i) და 4.4-ლიტრიანი ტურბო V8 (650i). ორივე ძრავს წყვილი ტურბოკომპრესორი ემსახურება. ძრავთან დაკავშირებულია 8-საფეხურიანი რობოტიზებული გადაცემათა კოლოფი, რომლის საფეხურების შეცვლაც საჭის რგოლის უკან მოთავსებული ბერკეტებით ხდება. გადამუშავებულ მაბრუნ მომენტს, ტრანსმისია უკანა წამყვან ბორბლებს აწვდის.

3.0-ლიტრიანი ძრავი 320 ცხენის ძალას (5 800 ბრ/წთ-ზე) და 450 ნიუტონმეტრს გამოიმუშავებს. ამასთან, მაქსიმალურ მომენტს 1 300-4 500 ბრ/წთ დიაპაზონში ინარჩუნებს. ამ აგრეგატის დახმარებით, ავტომობილი ადგილიდან ასამდე აჩქარებას 5.4 წამში ასწრებს, მისი მაქსიმალური სიჩქარე კი ხელოვნურადაა შეზღუდული 250 კმ/სთ ნიშნულით. 100 კილომეტრის გასავლელად, 640i-ს 7.7 ლიტრი საწვავი სჭირდება, ყოველი კილომეტრის გავლისას კი ის ატმოსფეროს 179 გრამი ნახშირორჟანგით აბინძურებს.

რა თქმა უნდა, უფრო მძლავრია 650i-ის V8 ძრავი. ის 407 ცხენის ძალას და 600 ნიუტონმეტრს იძლევა. ამასთან, მაქსიმალური სიმძლავრე 5 500-6 400 ბრ/წთ დაპაზონში მიიღწევა, მაქსიმალური მომენტი კი - 1 750-4 500 ბრ/წთ დიაპაზონში. სტანდარტული აჩქარებისთვის (0-100 კმ/სთ) ამ ვერსიას 4.9 წამი ჰყოფნის, მაქსიმალური სიჩქარე კი ამ შემთხვევაშიც 250 კმ/სთ-ია. სამაგიეროდ, 100 კილომეტრზე ხარჯი 10.4 ლიტრამდეა გაზრდილი, გამონაბოლქვში ნახშირორჟანგის შემცველობა კი 243 გრ/კმ-ია. სხვათა შორის ამაზე ოდნავ უფრო ტემპერამენტიანია 650i-ის ამერიკული მოდიფიკაცია.

მე-6 სერიის ახალი კუპეს გაყიდვებს „ბეემვე“ შემოდგომაზე დაიწყებს.

Tuesday, March 29, 2011

„ბეემვე“ წლიურად 30 000 ცალ i3-ს გამოუშვებს

BMW to Sell 30,000 i3 Units Per Year

29 მარტი

i3 ტესტირების პროცესში

..............................

დიდი ხანი არ გასულა მას შემდეგ, რაც „ბეემვემ“ თავის ახალ სუბბრენდ i-ს პრეზენტაცია ზარ-ზეიმით ჩაატარა. მაგრამ ამან კიდევ უფრო მეტი კითხვა წარმოშვა, ვიდრე ადრე არსებობდა. გერმანულმა კომპანიამ ის კი გვამცნო, რომ ამ ახალი ბრენდით პირველ რიგში, მოდელ i3-ს გამოუშვებს.

ეს იქნება პროექტ „მეგასიტის“ პირველი რეალური შედეგი, თუმცა რა კონკრეტული გეგმები უკავშირდება ამ ავტომობილს, ჯერ უცნობია. ბავარიული კომპანიის ზოგი წქარმომადგენელი აცხადებს, რომ i-ს ბრენდით წარმოებული ავტომობილები პირველ ხანებში ლიზინგის წესით გაიყიდება. ყოველ შემთხვევაში, ასე იქნება პირველ სატესტო ავტომობილებთან მიმართებაში.

თუმცა, უკვე გაჟონა ინფორმაციამ იმის შესახებაც, რომ ბავარიელებმა i3-ის გაყიდვების კონკრეტული მოცულობა დაისახეს მიზნად. კერძოდ, გლობალურ საინტერნეტო გამოცემა „ავტონიუსის“ ჟურნალისტთან საუბრისას, „ბეემვეს“გაყიდვების და მარკეტინგის დეპარტამენტის შეფმა იან რობერტსონმა განაცხადა, რომ უკვე გადაწყვეტილია i3-ის მასობრივი წარმოება.

ამ ელექტრომობილის მსოფლიო პრემიერა 2013 წელს იგეგმება. ჯერ ამ ავტომობილის ფასი დაზუსტებული არაა, თუმცა ცნობილია, რომ გერმანული კომპანია წლიურად 30 000 ცალ i3-ის გამოშვებას აპირებს. ამ ავტომობილში იმ ტექნოლოგიებს გამოიყენებენ, რომლებსაც ბავარიული გიგანტი ამჟამად სატესტო ელექტრომობილებზე, მათ შორის, „აქტივE-სა“ და ელექტრულ „მინიზე“ ცდის.

„აქტივE“, რომელიც 1-ლი სერიის მოდელზეა ბაზირებული, ბავარიელებმა ახლახანს, ჟენევის გამოფენაზე გვიჩვენეს და იქვე განაცხადეს, რომ სერიული წარმოების დაწყებამდე, ამ ავტომობილზე ბევრი რამ შეიძლება შეიცვალოს. არსებული ავტომობილი კი ერთი ელექტროძრავითაა აღჭურვილი, რომელიც 170 ცხენის ძალას და 250 ნიუტონმეტრს იძლევა (შესაძლოა, i3-ის შემთხვევაში, სიმძლავრე 150 ცხ.ძ-მდე შემცირდეს). აკუმულატორების ტევადობა საკმარისია იმისათვის, რომ ერთი სრული დამუხტვით, ავტომობილმა 160 კილომეტრის გავლა შეძლოს. სავარაუდოდ, i3-ის შემთხვევაში, ეს მახასიათებელიც გაუმჯობესდება.

მართალია, რობერტსონი i3-ის სავარაუდო ფასს ვერ ასახელებს, თუმცა ინტერნეტით გავრცელდა ინფორმაცია იმის შესახებ, რომ ეს ავტომობილი დაახლოებით 40 000 ევრო ეღირება.

„ტოიოტა“ ჰიბრიდულ ტექნოლოგიას ჩინელებს მიჰყიდის

Toyota rumored in talks on selling Prius III hybrid technology to China’s FAW

29 მარტი

ჩინურ გამოცემა „ჩაინა ქარ ტაიმსის“ მიერ გავრცელებული ინფორმაციით, „ტოიოტამ“ თავის პოპულარულ ჰიბრიდულ მოდელ „პრიუსის“ მესამე თაობის ტექნოლოგიები ჩინურ საავტომობილო კომპანია FAW-ს მიჰყიდა.

ეს ინფორმაცია ჩინურ გამოცემას „ტოიოტას“ ინკოგნიტო თანამშრომელმა მიაწოდა, რომელმაც ვინაობის გამხელა არ ისურვა. ამავე წყაროს ინფორმაციით, ჯერჯერობით მხარეები არ აპირებენ თავიანთი გარიგების შესახებ საჯაროდ გამოცხადებას. ამასთან, ისინი ახალი ჰიბრიდული ავტომობილების ჩინეთში წარმოების შესაძლებლობას განიხილავენ.

„ტოიოტას“ ჩინეთში „პრიუსის“ წარმოება ჯერ კიდევ შარშან უნდა დაეწყო, თუმცა სხვადასხვა მიზეზის გამო, ეს არ მოხერხდა. ჯერ წარმოების გასული წლის დასაწყისში იყო დაგეგმილი. შემდეგ დებიუტი წლის მეორენახევარში გადაიტანეს, ბოლოს კი პარტნიორმა კომპანიებმა „პრიუსის“ ჩინეთში წარმოებისგან საერთოდ შეიკავეს თავი. ამის მიზეზი კი ის გარემოება გახდა, რომ მთავრობის მიერ ეკოლოგიურდ სუფთა ავტომობილებისთვის დაწესებული შეღავათები, ასეთ ავტომობილებზე არ ვრცელდება.

იმავე „ჩაინა ქარ ტაიმსის“ ინფორმაციით, ჩინეთში პირველი ორი თაობის „პრიუსები“ პოპულარობით ვერ სარგებლობდა. ამის ძირითადი მიზეზი კი მათი სიძვირე იყო. „პრიუსის“ B სეგმენტის ტოპ მოდელების ფასს შეესაბამებოდა, ასეთები ცისქვეშეთში პოპულარულობით ვერ სარგებლობს. თანაც, რამდენადაც სახელმწიფოს „პრიუსზე“ შეღავათები დაწესებული არ აქვს, ფასი უცვლელი რჩება.

ეს იმ დროს, როდესაც კიდევ ერთი იაპონური კომპანია - „ნისანი“ მალე ჩინეთში თავის ელექტრომობილ „ლიფს“ შეიტანს. იგივეს აპირებს „ჯენერალ მოტორსი“, რომელიც თავის ჩინელ პარტნიორ SAIC-თან (შანჰაი ავტომოტივ ინდასტრი) ერთად, მალე ელექტრომობილ „შევროლე საილის“ წარმოებას დაიწყებს. ამგვარად, „ტოიოტას“ ჩინეთში თავისი ახლანდელი ჰიბრიდული ტექნოლოგიები აღარ სჭირდება და ამიტომ, ისინი FAW-ს მიჰყიდა, თავად კი ახალ ტექნოლოგიებს შეიმუშავებს, რომელთა წყალობითაც, მისი ჰიბრიდები გაიაფდება. სწორედ ამ ავტომობილებს გამოუშვებენ პარტნიორები ჩინეთში.

ცნობისათვის, „ტოიოტას“ და FAW-ის პარტნიორობა 2002 წელს დაიწყო და მას შემდეგ, ჩინური კომპანია იაპონური ლიცენზიით „ლენდ კრუიზერს“ და წინა თაობის „პრიუსებს“ აწარმოებს.

Monday, March 28, 2011

„ასტონ მარტინმა“ შეიძლება „მაიბახის“ წარმოება დაიწყოს

Aston Martin Could Build Future Maybachs
28 მარტი

„ასტონ მარტინმა“ და „მერსედეს ბენცმა“ მიიღეს გადაწყვეტილება, რომლის შესაბამისადაც, ისინი ერთობლივას შეიმუშავებენ ინგლისური კომპანიისთვის სედან „ლაგონდას“ და გერმანულისთვის - ახალ „მაიბახს“. ამ ორმა კომპანიამ თანამშრომლობის შესახებ ჯერ კიდევ შარშან მოილაპარაკა, თუმცა მაშინ კონკრეტული გეგმები არ გამოქვეყნებულა.

ცნობილია, რომ უკვე 5 წელზე მეტია, რაც „ასტონ მარტინი“ ყველა თავისი მოდელისთვის ერთსადაიმავე პლატფორმას (VH) იყენებს, რომელიც „ფორდთან“ ერთად შეიმუშავა. მაგრამ დიდი ზომის სედანებისა და უგზოობის (ორივე ლაგონდასთვის) წარმოებისთვის, ეს პლატფორმა არ გამოდგება. ახალი პლატფორმის შესამუშავებლად კი, ინგლისურ კომპანიას სახსრები არ გააჩნია. ამის გამო, მან პარტნიორის ძიება დაიწყო.

სანამ შტუტგარტულ გიგანტს დაუკავშირდებოდა, „ასტონ მარტინმა“ „ბეემვესთან“ მოლაპარაკება სცადა, თუმცა ამას შედეგი არ მოჰყოლია. სწორედ ამის შემდეგ დაუკავშირდა სამქიმიანებს, რომლებსაც თავის მხრივ, „ასტონი“ საკუთარი პრობლემების მოსაგვარებლად დასჭირდათ. თუ „ასტონი“ ძველი მოდელის გაცოცხლებას ახლა აპირებს, შტუტგარტელების პრობლემას უკვე აღდგენილი „მაიბახი“ წარმოადგენს, რომელსაც დიდი ხანია, განახლება სჭირდება. მხარეები შეთანხმდნენ, რომ „ასტონ მარტინი“ თავისი ახალი პარტნიორის უკვე არსებული პლატფორმით ისარგებლებს და სამაგიეროდ, მას ახალი „მაიბახის“ შემუშავებაში დაეხმარება.

სხვათა შორის, „მაიბახის“ მაეკით, ბოლოს ახალი ავტომობილი 2002 წელს გამოვიდა. ის დიდი ხანია, შესაცვლელია და იმის გამო, რომ პრაქტიკულად, სახეშეცვლილი S-კლასის „მერსედესია“, მყიდველთა შორის კარგი მოთხოვნით არ სარგებლობს. ის იმდენად მცირე რაოდენობით იყიდება, რომ „დაიმლერს“ ამ მარკის კვლავ გაუქმებაც კი ჰქონდა გეგმებში, თუმცა საბოლოოდ მაინც გადაწყდა „მაიბახის“ შველა. ამის მთავარი მიზეზი კი ის გახდა, რომ ამ მარკის ავტომობილებზე მოთხოვნა ჩინეთში გაიზარდა.

იმისათვის, რომ წარმოების ხარჯი შემცირდეს, ახალი „მაიბახიც“ S-კლასის „მერსედესის“ პლატფორმაზე აიგება, თუმცა ძარას, ინტერიერს და სხვადასხვა მოწყობილობას მისთვის ინგლისურ კომპანიაში შეიმუშავებენ. უფრო მეტიც, მალე „მაიბახების“ წარმოებას „ასტონ მარტინის“ გეიდონის საწარმო შეუდგება. ინტერნეტში გავრცელებული ინფორმაციით, ბრიტანული კომპანიის ხელთ არსებული ტექნოლოგიების გამოყენების შემთხვევაში, „მაიბახის“ საწარმოო დანახარჯები დაახლოებით განახევრდება.

სამაგიეროდ, „ასტონ მარტინს“ იმავე S-კლასის „მერსედესის“ პლატფორმის გამოყენების საშუალება ექნება და ის მასზე „ლაგონდას“ მოდელებს დაამყნობს. პლატფორმასთან ერთად, ბრიტანელებისთვის ხელმისაწვდომი გერმანული ძრავები, ტრანსმისიები და უსაფრთხოების სისტემებიც გახდება. გარდა ამისა, „ასტონი“ ასევე შეძლებს „მერსედესის“ იმ პლატფორმის გამოყენებას, რომელზე სამქიმიანები თავიანთ უგზოობის მოდლებს აწარმოებენ.

„სანიონი“ „გოლფის“ კლასის კონცეპტუალურ მოდელს გვიჩვენებს

SsangYong KEV2

28 მარტი

სამხრეთკორეული საავტომობილო კომპანია „სანიონი“ თავისი სამოდელო გამის გაფართოებას აპირებს. ამის ნიშანია ის, რომ მან სეულის (სამხრეთ კორეა) საავტომობილო შოუსთვის, რომეოიც 1 აპრილს დაიწყება, „გოლფის“ კლასის კონცეპტუალური ავტომობილი მოამზადა. ეს კი იმის ნიშანია, რომ უგზოობის ავტომობილების წარმოებაზე სპეციალიზებული კომპანია თავისი საწარმოო პროგრამის გამრავალფეროვნებას იწყებს.

კონცეპტუალური ავტომობილი საზოგადებას აბრევიატურა KEV2-ით გაეცნობა. კორეულ საინტერნეტო გამოცემა „ბობედრიმი“ იტყობინება, ეს ავტომობილი მოდელ „კორანდოს“ პლატფორმაზეა აგებული. KEV2-ის გარდა, „სანიონი“ სეულის გამოფენის დამთვალიერებლებს, ასევე თავის განახლებულ ფლაგმანს, სედან „ჩეარმენს“ და „კორანდოს“ ელექტრულ ვერსიას უჩვენებს.

გამოფენის დაწყებამდე, ამ ორი ავტომობილის შესახებ, დეტალური ინფორმაცია არ ვრცელდება. თუმცა, „სანიონმა“ კონცეპტუალური ავტომობილის და მისი ინტერიერის ფოტო ტიზერები მაინც გაავრცელა. კორეული გამოცემა ვარაუდობს, რომ სედანი „ჩეარმენი“ ისევ „მერსედეს ბენცის“ წარმოების ექვს და რვაცილინდრიანი ძრავებით აღიჭურვება.

უნდა ითქვას, რომ KEV2 ელექტრომობილია და სავარაუდოდ, მომავალში „სანიონი“ თავის „გოლფის“ კლასის ავტომობილს, ელექტრული ძალური აგრეგატებითაც აღჭურვავს. ესეც რომ არა, კორეული კომპანია „კორანდოს“ ელექტრული ვერსიის წარმოებასაც აპირებს. ამდენად, კონცეპტუალური KEV2 ორმხრივად საინტერესო იქნება. ჯერ ერთი, მისი მეშვეობით, მომავალი ელექტრული „კორანდოს“ აღჭურვილობის გაცნობა მოხდება. მეორეც, მისი სახით, „სანიონის“ მომავალ ახალ ავტომობილის პროტოტიპს ვნახავთ.

წინასწარი მონაცემებით, ელექტრული „კორანდო“ 160-ცხენისძალიანი ელექტროძრავით აღიჭურვება, რომელსაც ენერგიით ლითიუმ-იონური ელემენტების ბლოკი მოამარაგებს. ამ ბლოკის ტევადობა საკმარისი იქნება იმისათვის, რომ ელექტრომობილმა ერთი სრული დამუხტვით, 170 კილომეტრზე მეტი გაიაროს. მისი მაქსიმალური სიჩქარე 150 კმ/სთ იქნება. აკუმულატორებს სრულად დამუხტვისთვის რვა საათი დასჭირდება.

სხვათა შორის, „სანიონი“ კიდევ ერთ ელექტრომობილს (სვლის გაზრდილი სიშორის, როგორიცაა შევროლე ვოლტი) ამზადებს, რომელიც „კორანდოზე“ პატარაც იქნება და უფრო სუსტი, 107-ცხენისძალიანი ელექტროძრავით აღიჭურვება. ამ ავტომობილის ძალურ სისტემაში ასევე შევა მცირელიტრაჟიანი შიდაწვის ძრავი, რომლის დანიშნულებაც, გენერატორთან ერთად, ელექტროენერგიის გამომუშავებაა. სამაგიეროდ, აკუმულატორების ტევადობა, ამ შემთხვევაში გაცილებით ნაკლები იქნება. იმდენად ნაკლები, რომ მათში დაგროვილი ენერგია, ავტომობილს მხოლოდ 60 კილომეტრს ფაატარებს. სამაგიეროდ, შიდაწვის აგრეგატის წყალობით, სვლის სიშორე 400 კილომეტრამდე გაიზრდება.

„ბეემვემ“ შანჰაისთვის განახლებული მე-6 სერიის კუპე მოამზადა

BMW to unveil revamped 6-series coupe in Shanghai

28 მარტი

გერმანულმა კომპანიამ ამ ავტომობილის კონცეპტუალური ვერსია საავტომობილო სამყაროს პირველად შარშან, პარიზის ავტო შოუზე უჩვენა. რა თქმა უნდა, მას შემდეგ მოსალოდნელი იყო, რომ სერიულ ვერსიასაც მალე ვნახავდით. და აი, შანჰაის საავტომობილო შოუს დამთვალიერებელს, პირველად მიეცემა ამ შესანიშნავ ავტომობილთან გაცნობის საშუალება. თუმცა, ბავარიელებმა მის შესახებ ინფორმაცია და ფოტოები ინტერნეტით უკვე გაავრცელეს.
წინამორბედთან შედარებით, მე-6 სერიის განახლებული კუპე ზომებში გაზრდილია. 75 მილიმეტრით არის გაზრდილი სიგრძე და ბორბლებს შორის ბაზა, სიგანეში მტება მხოლოდ 39 მილიმეტრია. სამაგიეროდ, სიმაღლე 5 მილიმეტრითაა შემცირებული. საბარგულის მოცულობა თითქმის არ შეცვლილა და ის 460 ლიტრს შეადგენს.

გაყიდვების დასაწყისში, განახლებულ კუპეს მყიდველს ორი ძრავით შესთავაზებენ. ერთის 3.0-ლიტრიანი ექვსცილინდრიანი (ერთ რიგში განლაგებული ცილინდრებით) ტურბოძრავი, რომელიც 320 ცხენის ძალას და 450 ნიუტონმეტრს იძლევა. ამ ძრავით აღჭურვილ ავტომობილს, რომლის ინდქსიცაა 640i, ადგილიდან ასამდე აჩქარება 5.4 წამში შეუძლია.

მეორე ძრავია 4.4-ლიტრიანი ტურბოკომპრესორიანი V8, რომელიც 407 ცხენის ძალას და 600 ნიუტინმეტრს გამოიმუშავებს. შესაბამისად, ამის (650i) დინამიკა ოდნავ უკეთესია - ნულიდან 100 კმ/სთ-მდე აჩქარებას 4.9 წამი ჰყოფნის. ორივე შემთხვევაში, მაქსიმალური სიჩქარე 250 კმ/სთ-ის ნიშნულზეა შეზღუდული.

ამ ეტაპზე, ბავარიელები ასევე ამზადებენ კუპე M6-ს, რომელიც 5.0-ლიტრიანი V10 ძრავით აღიჭურვება. ოღონდ, ამ ვერსიის და შესაბამისად, ძრავის მონაცემები ჯერჯერობით უცნობია. თუმცა „ბეემვემ“ გაგვანდო, რომ ასეთი ავტომობილის გაყიდვებს მერმისს დაიწყებს.

რაც შეეხება ფასებს, საბაზო კუპე 640i გერმანიაში 74 700 ევრო ეღირება, 9 000 ევროთი ნაკლები, ვიდრე მის ბაზაზევე შექმნილი კაბრიოლეტი. გარდა ამისა, მწარმოებელი ამ კუპეს დზელის ძრავით აღჭურვასაც აპირებს. შემდეგ კი ამავე ავტომობილის ბაზაზე, ოთხკარიანი კუპეც დამზადდება, რომელიც ევროპული ბაზრისთვის იქნება განკუთვნილი.

მას შემდეგ, რაც მე-6 სერიის განახლებული კუპეს პრემიერა შანჰაის გამოფენაზე ჩატარდება, ამ ავტომობილს პირველ რიგში, „ბეემვეს“ ევროპელი და ამერიკელი დილერები მიიღებენ. ამ ავტომობილით, ბავარიელები კონკურენიაც „იაგუარის“ კუპე XK-ს და „მერსედეს ბენცის“ ანალოგიური E-კლასის კუპეს გაუწევენ.
წარღვნა იაპონიაში





Sunday, March 27, 2011

შვედური სუპერქარი 1 115 ცხენის ძალით

Koenigsegg Agera R

27 მარტი

ჟენევის საავტომობილო შოუზე უხვად ნახავდით სპორტულ სუპერ ავტომობილებს, რომელთა შორისაც, ერთ-ერთი გამორჩეული, შვედურ კომპანია „კიონიგსეგის“ „აგერა R“ იყო. ეს ავტომობილი ჟენევაშივე შარშან ნაჩვენები „აგერას“ გაუმჯობესებული ვერსიაა.

მის ბაზაში მოთავსებულია 5.0-ლიტრიანი წყვილ ტურბოიანი V8 ძრავი, რომელიც არც მეტი, არც ნაკლები, 1 115 ცხენის ძალას და 1 200 ნიუტონმეტრს იძლევა. ეს კი გაცილებით მეტია სტანდარტული „აგერას“ მონაცემებზე. თანაც, „აგერა R“ საწვავად E85-ს მოიხმარს, რომელშიც რიცხვი საწვავში ეთანოლის პროცენტულ შემცველობას ნიშნავს. სხვათა შორის, 98 ოქტანობის ბენზინზე მუშაობისას, ამ ძრავის მაქსიმალური სიმძლავრე „მხოლოდ“ 1050 ცხენის ძალაა.

მაქსიმალურ მომენტს ძრავი 4100 ბრ/წთ-ზე ავითარებს, თუმცა მუხლა ლილვის 2700-6170 ბრ/წთ დიაპაზონში, მომენტი 1000 ნიუტონმეტრზე დაბლა არ ჩამოდის. ძრავს აქვს ეგრეთ წოდებული მშრალი კარტერი, კარბონის კომპოზიტისგან დამზადებული შემშვები სისტემა და გამოსაბოლქვი კოლექტორი, რომელიც ნიკელის შენადნობ ინკონელისგან არის დამზადებული.

ძრავთან ორდისკოიანი ქურის მეშვეობით, 7-საფეხურიანი რობოტიზებული გადაცემათა კოლოფია შეწყვილებული, რომელსაც წინამორბედისგან განსხვავებული კონსტრუქცია აქვს. კერძოდ, მასში ერთი შემავალი ლილვია, რაც „კიონიგსეგის“ განცხადებით, გადაცემის საფეხურების გაცილებით სწრაფად შეცვლის საშუალებას იძლევა.

„აგერა R-ის“ გაბარიტებია: სიგრძე 4293 მილიმეტრი, სიგანე 1996 მილიმეტრი, სიმაღლე 1120 მილიმეტრი. შასის და ძარის წარმოებისას უხვადაა გამოყენებული კევლარისა და კარბონის კომპოზიტები, რისი წყალობითაც, ავტომობილი მხოლოდ 1435 კილოგრამს იწონის. ეს კი ნიშნავს, რომ წონისა და სიმძლავრის ფარდობა 1.19-ია, რაც შესანიშნავი მაჩვენებელია. ჰო მართლა, კარბონის მონოკოკი მხოლოდ 70 კილოგრამს იწონის, გრეხვაზე მისი მედეგობა კი გრადუსზე 65 000 ნიუტონმეტრია. წინა და უკანა ღერძებს შორის წონა 45:55 პროპორციითაა გადანაწილებული.

რაც შეეხება დინამიკურ მახასიათებლებს: ადგილიდან 100 კმ/სთ-ის ასაკრეფად „აგერა R-ს“ 2.9 წამი ჰყოფნის, 0-200 კმ/სთ-მდე ასაჩქარებლად კი 7.5 წამი სჭირდება. კომპანია არ აქვეყნებს მაქსიმალურ სიჩქარეს, თუმცა ცნობილია, რომ საბურავები 420 კმ/სთ-ზეა გათვლილი. დაკიდევ, შერეული ციკლით მოძრაობისას, 100 კილომეტრის გასავლელად, „აგერა R-ს“ 14.7 ლიტრი საწვავი სჭირდება, მაგისტრალზე კი 12.5 ლიტრიც ჰყოფნის.

ჯერჯერობით არც „აგერა R-ს“ ფასი გამოცხადეულა. სავარაუდოდ, ეს ზემძლავრი ავტომობილი მინიმუმ 1.5 მილიონი ევრო ეღირება.

Saturday, March 26, 2011

„გუმპერტ ტორნანტე“ - გერმანულ იტალიური პარტნიორობის ნაყოფი

Gumpert Tornante 700 HP Supercar

26 მარტი

მცირე გერმანულმა კომპანია „გუმპერტმა“, რომელიც თავის სუპერქარ „აპოლოთია“ ცნობილი, ძარების მწარმოებელ იტალიურ კომპანია „ტურინგ სუპერლეგერასთან“ ერთად, კიდევ უფრო დახვეწილი ავტომობილი შექმნა, სახელად „ტორნანტე“ და ის პირველად ჟენევის ავტო შოუზე წარადგინა.

„გუმპერტ ტორნანტე“ ფოლადის მილებისგან შეკრულ ჩარჩოზეა აწყობილი და მას ძრავი ბორბლებს შორის, ბაზაში აქვს ჩადგმული. ჩარჩოზე კარბონის კომპოზიტისგან დამზადებული ძარის პანელებია დამაგრებული. ავტომობილის სიგრძე 4475 მილიმეტრი, სიგანე 1971 მილიმეტრი, სიმაღლე 1215 მილიმეტრი და ბორბლებს შორის ბაზა კი 2700 მილიმეტრია და ის 1400 კილოგრამამდე იწონის.

ძრავი 4.2-ლიტრიანია და მას V8 კონფიგურაცია აქვს. მას წყვილი ტურბოკომპრესორი ემსახურება, რომელთა დახმარებითაც, მაქსიმალური სიმძლავრე 700 ცხენის ძალას, მაქსიმალური მაბრუნი მომენტი კი 900 ნიუტონმეტრს (4000 ბრ/წთ-ზე) აღწევს. ძრავთან 6-საფეხურიანი ნახევრად ავტომატური გადაცემათა კოლოფია დაკავშირებული, რომელიც საფეხურებს 40 მილიწამში ცვლის. „გუმპერტის“ მონაცემებით, ამ ტანდემის დახმარებით, ტორნანტე ადგილიდან 100 კმ/სთ-ის აკრეფას დაახლოებით 3 წამში ასწრებს, მისი მაქსიმალური სიჩქარე კი 300 კმ/სთ-ზე მეტია.

გარდა ამისა, ავტომობილი ასევე აღჭურვილია რეგულირებადი ამორტიზატორებით, ექვსცილინდრიანი სამუხრუჭე მექანიზმებით, რომლებშიც 378-მილიმეტრიანი სამუხრუჭე დისკოებია გამოყენებული, კომპანია „ტორსენის“ დიფერენციალით, ასევე 19 (წინ) და 20-დუიმიანი (უკან) ჭედური ბორბლებით, რომლებზეც კომპანია „მიშლენის“ წარმოების, სერია „პაილოტ სუპერ სპორტის“ საბურავებია ჩაცმული. წინა საბურავების ზომებია 265/35, უკანებისა კი - 345/30.

სავარაუდოდ, „გუმპერტ ტორნანტე“ 800 000 დოლარი ეღირება.

Friday, March 25, 2011

კომპაქტური ელექტრული ჰეჩბეკი 76 000 დოლარად

Volvo considering insanely high $2,100/month lease for C30 Electric

25 მარტი

მართალია, ეს ელექტრომობილია და თანაც, ძალიან უსაფრთხო, მაგრამ არ დაგავიწყდეთ, რომ „ნისანი“ თავის პირველ ელექტრომობილ „ლიფს“, რომელიც ევროპის წლის საუკეთესო ავტომობილად დაასახელეს, ამაზე თითქმის ორჯერ იაფად ჰყიდის. და თანაც, ყველა აღიარებს, რომ ეს ძალიან ძვირია.

შვედური კომპანია „ვოლვო“ მალე თავისი პირველი ელექტრომობილის, „ვოლვო C30 ელექტრიკსის“ გაყიდვას დაიწყებს. არა, გაყიდვას არა, მას ლიზინგით გასცემს. შვედური კომპანიის სპეციალური ავტომობილების განყოფილების პრეზიდენტი ლენარტ სტეგლანდი აცხადებს, რომ ამ ავტომობილის ლიზინგით შეძენის მსურველებს, სამი წლის განმავლობაში, თვეში 1 500 ევროს გადახდა მოუწევთ...

ახლანდელი კურსით, ეს დაახლოებით 2 100 დოლარია, ეს კი ნიშნავს, რომ მყიდველს სამ წელიწადში, ელექტრულ „ვოლვო C30-ში“ დაახლოებით 76 000 დოლარის გადახდა მოუწევს. რა თქმა უნდა, უსაშველოდ ძვირია, მაგრამ თურმე ამ შემთხვევაშიც, „ვოლვო“ წაგებაზე იმუავებს. თუმცა, სტეგლანდი ამბობს, რომ როდესაც ამ მანქანის მასობრივი წარმოება დაიწყება (2013 წელს), ფასი მნიშვნელოვნად შემცირდება.

იაპონიის ავტოინდუსტრიის აღდგენას თვეები დასჭირდება

Analysis: Japan auto recovery may take months

25 მარტი

იაპონიის მიწისძვრიდან ორი კვირა გავიდა. რა თქმა უნდა, სტიქიის რეგიონში, ყველა წარმოება გაჩერებულია. არ მუშაობს საავტომობილო ქარხნებიც. „ტოიოტა“, „ნისანი“, „ჰონდა“ და სხვა კომპანიები, პერიოდულად, რამდენიმე დღით ახანგრძლივებენ ხოლმე იძულებით უქმეობას, თუმცა აშკარაა, რომ ზოგიერთი ქარხნის ამოქმედება კიდევ რამდენიმე კვირის და იქნებ, თვის განმავლობაშიც არ მოხერხდება.

უფრო მეტიც, მაკომპლექტებელი ნაწილების მწარმოებელთა გაჩერების გამო, სხვა ქვეყნების ავტომწარმოებლებიც ზარალდებიან. ზოგ შემთხვევაში, მათ წარმოების შეზღუდვა და უარეს შემთხვევაში, გაჩერებაც კი უწევთ. ამიტო,, იაპონიის სტიქიურმა უბედურებამ, არამარტო იაპონური, არამედ მსოფლიო ავტოინდუსტრიაც კი აზარალა.

თანამედროვე ავტომობილი დაახლოებით 30 000 ნაწილისგან შედგება, რომელთა 70 პროცენტზე მეტს, კომპონენტების მწარმოებელი ასობით კომპანია აწარმოებს. ამასთან, წარმოების პროცესში, ერთი უმნიშვნელო ჭანჭიკის მიწოდების შეფერხებამ შეიძლება ქარხნის გაჩერებაც კი გამოიწვიოს. ამას კი ეგრეთ წოდებული „ზუსტად დროში“ (ჯასტ ინ ტაიმ) საწარმოო პროცესი იწვევს.

ეს პროცესი ქარხნების ტერიტორიაზე მინიმალური სასაწყობე სათავსების არსებობას ითვალისწინებს და საუკეთესოდ მუშაობს, როდესაც ცხოვრება ნორმალური რიტმით მიმდინარეობს. ქარხანა საჭირო მაკომპლექტებლებს ყოველდღიურად ღებულობს და თითქმის მაშინვე კონვეიერზე უშვებს. ამ პროცესის მეშვეობით (ის პირველად სწორედ იაპონელებმა დანერგეს) ასობით მილიონი დოლარის დაზოგვა ხერხდება. მაგრამ მიწოდებაში მცირე შეფერხებაც კი საკმარისია იმისათვის, რომ ამწყობმა ქარხანამ მუშაობა შეანელოს და შეწყვიტოს კიდეც.

იაპონიის სტიქიის რეგიონში, მაკომპლექტებლების მწარმოებელი დაახლოებით 500 ქარხანაა გაჩერებული. ამ ქარხნებში საავტომობილო ელექტრონიკას, პლასტმასის დეტალებს, სხვადასხვა ნაწილებს აწარმოებენ. ეს ქარხნები, გარდა იაპონური კომპანიებისა, უცხოურ კომპანიებსაც ამარაგებს.

დარგის სპეციალისტები ვარაუდობენ, რომ აღნიშნული საწარმოები ნორმალური რეჟიმით მუშაობის აღდგენას რამდენიმე თვე ვერ შეძლებენ. არადა, იაპონური ავტოინდუსტრია, რომლის წარმოების წლიური ფულადი მოცულობა დაახლოებით 700 მილიარდი დოლარია, მიწისძვრამდე როგორღაც ახერხებდა იმ კრიზისიდან თავის დაღწევას, რომელიც მსოფლიო ფინანსურმა კრიზისმა გამოიწვია.

სტიქიის რეგიონში (ქალაქი ნაკა, იბარაკის პრეფექტურა) მდებარეობს კომპანია „რენესას ელექტრონიკსის“ საწარმო, სადაც ავტომობილების მაკონტროლებელ სენსორებს და სხვადასხვა ელექტრონულ კვანძებს ამზადებენ. ეს საწარმო, მსოფლიო ავტოინდუსტრიის დაახლოებით მეხუთედს ამარაგებს.

კვლევითი კომპანია „IHS ავტომოტივი“ აცხადებს, რომ იაპონიის მიწისძვრის გამო, მსოფლიო საავტომობილო ინდუსტრია 30 პროცენტით დაეცემა. ოღონდ, ეს დაცემა იმ შემთხვევაშია მოსალოდნელი, თუ სტიქიის რეგიონში არსებული ქარხნები 6 კვირაში განაახლებენ მუშაობას. მათი უფრო დიდი ხნით გაჩერება, გლობალურ ავტოინდუსტრიას კიდევ უფრო დააზარალებს.

იაპონური საავტომობილო კომპანიების უცხოური საწარმოები მუშაობას აგრძელებენ, მაგრამ ისინი მაკომპლექტებელი ნაწილების დიდ ნაწილს იაპონიიდან ღებულობენ. როგორც ირკვევა, ამ ქარხნებს გარკვეული მარაგები გააჩნია და ისინი ცოტა ხანს მუშაობას გააგრძელებენ, თუმცა მათი გამოლევის შემდეგ, გაჩერება მოუწევთ.

დრო მიდის, იაპონური ქარხნები გაჩერებულია და როდემდე გაგრძელდება ასე, არავინ იცის. „ტოიოტა“, „ნისანი“ და „ჰონდა“ ლამის ყოველდღიურად აქვეყნებენ თავიანთ მოკლევადიან გეგმებს. მათს განცხადებებში კი მხოლოდ იმას ამოიკითხავთ, რომ ქარხნების უმოქმედობა კიდევ რამდენიმე დღე გაგრძელდება. ზუსტად რა ხნით, ამაზე ჯერ პასუხი არავის აქვს...

იაპონია დანგრეულიც გვაოცებს

Japanese repair quake-ravaged road in just six days

25 მარტი

იაპონია რომ 9-ბალიანმა მიწისძვრამ შეარყია და მერე 10-მეტრიანმა ცუნამიმ მიწასთან გაასწორა, ბევრს დაებადა კითხვა - რა დრო დასჭირდება ქვეყანას იმისათვის, რომ სტიქიით გაპარტახებულ პრეფექტურებში ნორმალური ცხოვრების რეჟიმი დააბრუნოს.

ამომავალი მზის ქვეყანას ელექტროენერგიის რამდენიმე სერიოზული წყარო მოაკლდა, იგრძნობა წყლის და საკვების დეფიციტი, დასაბინავებელია ხალხი, გაჩერებულია ქარხნები. მოკლედ, სტიქიის რეგიონში ცხოვრება თითქოს პარალიზებულია, თუმცა როგორც ამ ფოტოებიდან ჩანს, არც ასეა საქმე.

ბევრი თვლიდა, რომ ქვეყანას ერთი წელი მაინც დასჭირდება იმისათვის, რომ დაზარალებული რეგიონი ცხოვრების ნორმალურ რიტმს დაუბრუნოს. ნახეთ ეს გზა - ის ნაკას პრეფექტურის დიდი კანტოს მაგისტრალის 150-მეტრიანი მონაკვეთია. მიწისძვრამ ის დახეთქა და გააპარტახა. მეორე ფოტოზე კი იგივე გზაა, ოღონდ მიწისძვრიდან 12 დღის შემდეგ და მას ნგრევის ნიშანწყალიც არ ეტყობა!

კომპანია NEXCO გზების მშნებლობასა და რემონტზეა სპეციალიზებული. მან გზის შეკეთება მიწისძვრიდან 6 დღის შემდეგ, 17 მარტს დაიწყო და სულ რაღაც 6 დღეში, საქმეს მორჩა!

მართლა საოცარია...

Thursday, March 24, 2011

„პაგანი ჰუაირა“ - სამხრეთამერიკული ქარის ქალღმრთი იტალიური მარკით

Pagani Huayra Live from the Geneva Motor Show

24 მარტი

ათ წელზე მეტი გავიდა მას შემდეგ, რაც ჰორაციო პაგანიმ, თავისი გვარის მატარებელი კომპანიის მარკით, სუპერ ავტომობილი, სახელად „ძონდა“ პირველად გვიჩვენა. ეს 1999 წელს მოხდა. „ძონდა“ გერმანულ სატუნინგო კომპანია AMG-ს წარმოების 7.0-ლიტრიანი V12 ძრავით იყო აღჭურვილი. „ძონდა“ მშვენიერი და იმავდროულად, აგრესიული გარეგნობით, ასევე შესაშური ტემპერამენტით გამოირჩეოდა. მაგრამ ამ წლების განმავლობაში, ის მეტისმეტად მოძველდა და შესაცვლელი გახდა.

რა თქმა უნდა, ჰორაციო ძონდამ ამაზე იზრუნა და შემცვლელი, უცნაური სახელით „ჰუაირა“, ჟენევის ავტო შოუზე გაგვაცნო. უნდა ითქვას, რომ ავტომობილს სახელი შესაფერისი აქვს - „ჰუაირა“ სამხრეთამერიკული ქარის ქალღმერთის სახელია. და ავტომობილიც ამ სახელს სრულად შეეფერება. თუმცა, ჟენევაში ბევრს არ მოეწონა მისი უცნაური გარეგნობა, ძლიერ დაწეული ცხვირით და უჩვეულო, სამრგოლიანი უკანა ფარებით. ამასთან, ისიც ფაქტია, რომ „პაგანი“ ტრადიციას აგრძელებს - მისი მეორე სუპერ ავტომობილიც აგრესიული გარეგნობით გამოირჩევა.

თუმცა, რა მნიშვნელობა აქვს, როგორ გამოიყურება ავტომობილი, როცა იცი, რომ ის თანამედროვე ტექნოლოგიების გამოყენებითაა შექმნილი. კერძოდ, ავტომობილის მთავარი მზიდი ელემენტი, კარბონის კომპოზიტისა და ტიტანის გამოყენებითაა დამზადებული. ამასთან, ძარის წინ და უკან, აქტური აეროდინამიკური ელემენტებია განლაგებული. „ჰუაირას“ გაბარიტებია: სიგრძე 4605 მილიმეტრი, სიგანე 2036 მილიმეტრი, სიმაღლე 1169 მილიმეტრი, ბაზა 2795 მილიმეტრი. ავტომობილის მშრალი წონა 1350 კილოგრამია და ის წინა და უკანა ღერძებს შორის, 44:56 პროპორციითაა განაწილებული.
რაც შეეხება ძრავს, ის ისევ AMG-ს (რომელიც ამჯერად მერსედეს ბენცს ეკუთვნის) წარმოებისაა, თუმცა მისი მუშა მოცულობა „მხოლოდ“ 6.0 ლიტრია. ძრავს (V12) წყვილი ტურბოკომპრესორი ემსახურება, რომელთა მეშვეობითაც, 700 ცხენის ძალას (ვერსია სპორტის შემთხვევაში, სიმძლავრე 730 ცხ.ძ-ა) და 1000 ნიუტონმეტრს გამოიმუშავებს. ძრავთან კომპანია XTRAC-ის წარმოების 7-საფეხურიანი სეკვენტალური კოლოფია დაკავშირებული.

ამ აგრეგატების დახმარებით, „ჰუაირა“ ადგილიდან ასამდე აჩქარებას 3.3 წამში ასწრებს, მისი მაქსიმალური სიჩქარე კი 370 კმ/სთ-ია. ჰორაციო პაგანის განცხადებით, ამ ავტომობილის სერტიფიცირება ჯერ არ დასრულებულა და ამ პროცესის გავლის შემდეგ, მისი კომპანია უფრო ზუსტა დინამიკურ მონაცემებს გამოაქვეყნებს.

ასევე, ჯერჯერობით დაუზუსტებელია „ჰუაირას“ ფასიც. სავარაუდოდ, ის მილიონი ევრო ეღირება. თავიდან დაგეგმილი იყო, რომ წლიური წარმოება მხოლოდ 20 ავტომობილით შემოფარგლულიყო, თუმცა კომპანიის განცხადებით, სამხრეთამერიკული ქარის ქალღმერთის სეხნია უკვე 60-მა მყიდველმა შეუკვეთა. ჟენევაში ჰორაციო პაგანიმ ასევე განაცხადა, რომ მისი კომპანია უფრო იაფფასიანი სუპერ ავტომობილის წარმოების შესაძლებლობასაცგანიხილავს. ამის მიზეზი კი ისაა, რომ „პაგანი“ ამ მოთხოვნით უამრავ წერილს ღებულობს.

„ჰიუნდაის“ ავტომობილების საიმედობა თანდათან უმჯობესდება

24 მარტი

კომპანია „ჯეი დი პაუერ ენდ ესოშიეიტმა“ გამოაქვეყნა ტრადიციული სამარკეტინგო კვლევის შედეგები, რომლებიც ამათუიმ კომპანიის მიერ წარმოებული ავტომობილების საიმედოობის გასაშუალებულ (ეგრეთ წოდებული PP100 - პრობლემს პერ 100 ვიიქლს, ანუ პრობლემები ყოველ 100 ავტომობილზე) ხარისხიანობას გამოხატავს. კვლევის შედეგად დგინდება, თუ რამდენი პრობლემა მოდის კონკრეტული კომპანიის მიერ წარმოებულ ყოველ 100 ავტომობილზე.

გამოკვლევამ აჩვენა, რომ ამერიკაში 2008 წელს გაყიდული ავტომობილების PP100-ის საშუალო მაჩვენებელი 151-მდე შემცირდა (რაც ნაკლებია PP100-ის რიცხვი, მით უფრო საიმედო და გამძლე ავტომობილებს აწარმოებს კომპანია). შედარებისთვის, 2009 წლის საშუალო PP100 170 დეფექტი იყო. 2009 და 2011 წლებს შორის, საშუალო კოეფიციენტის გაუმჯობესებამ 6 პროცენტი შეადგინა. არადა, ბოლო ათწლეულის განმავლობაში, გაუმჯობესება 8-პროცენტიანი იყო. თუმცა, ასეთი დაბალი კოეფიციენტი, „ჯეი დი პაუერ ენდ ესოშიეიტის“ გამოკითხვისას პირველად დაფიქსირდა.

151-ზე უკეთესი მაჩვენებელი აღმოაჩნდა „ჰიუნდაის“, რომლის მიერ წარმოებული ავტომობილების საიმედობის საშუალო მაჩვენებელი 132 აღმოჩნდა. კორეულმა კომპანიამ უკან მოიტოვა „ჰონდა“, „ფორდი“, „ინფინიტი“ და „ბეემვეც“ კი. პირველი ადგილი კი „ფორდის“ პრემიუმ პრენდ „ლინკოლნს“ ერგო, რომლის 100 ავტომობილსაც საშუალოდ მხოლოდ 101 პრობლემა გამოუვლინდა. მასზე 8 ერთეულით უარესი მაჩვენებელი აქვს მეორეზე გასულ „ლექსუსს“ (ტოიოტას პრემიუმ ბრენდი). შემდეგ კი „იაგუარი“ და „პორშე“ მოდის (შესაბამისად, 112 და 114 ერთეულით).

აღსანიშნავია, რომ ავტომობილების საიმედობის კვლევას, თავად ავტომობილების წარმოებლები დიდ ყურადღებას უთმობენ. ამ კვლევის შედეგები, მათ უკეთესი ავტომობილების წარმებაში ეხმარება. კარგი შედეგები კი პირდაპირ განსაზღვრავს მყიდველის ლოიალობას და ავტომობილის ფასეულობის შენარჩუნებას.

Wednesday, March 23, 2011

„ოპელი“ B სეგმენტის ავტომობილს გამოუშვებს

Opel Allegra Coming to the B-Segment

24 მარტი

სულ რამდენიმე წლის წინ, ავტოინდუსტრიის ერთ-ერთი გამორჩეული ტრენდი, ავტომობილების გაბარიტების ზრდა იყო. მაგრამ საწვავის გაძვირებამ მას საპირისპირო მიმართულება მისცა და ახლა ყველა მწარმოებელი ცდილობს, რომ ბაზარზე ახალი, სუბკომპაქტური ავტომობილები გამოიყვანოს და მათი ეკონომიურობით მოხიბლოს მყიდველი, რომელიც ახალი ავტოს შეძენისას, პრიორიტეტს უკვე მის ეკონომიურობას ანიჭებს.

ამ ტენდენციას არც „ოპელი“ ჩამორჩება, რომელიც წარმოებისთვის ახალ, სუბკომპაქტურ ავტომობილს ამზადებს. ამ ავტომობილს სახელად „ალეგრა“ დაერქმევა და გერმანული კომპანიის სამოდელო გამაში, ის „აგილასა“ და „კორსას“ შორის არსებულ ნიშას შეავსებს.

შემუშავების პროცესში, ახალ პატარა ავტომობილს „ჯუნიორად“ მოიხსენიებენ. იყო ვარაუდი იმის შესახებ, რომ ამ ავტომობილით, რიუსელსჰაიმელები „აგილას“ შეცვლიდნენ, თუმცა ასე არ არის. პირიქით, „აგილა“ 2014 წელს შეცვლილი სახით გამოვა და კონკურენციას „ფორდ კა-ს“ გაუწევს.

ეს ინფორმაცია ბრიტანულ გამოცემა „ავტოექსპრესს“ „ოპელის“ ბრიტანული შტოს - „ვოქსოლის“ მმართველმა დრექტორმა დანკან ოლდრედმა გაუმხილა. ის ირწმუნება, რომ „ალეგრას“, „ოპელის“ ახლანდელი პატარა ავტომობილებისგან განსხვავებული გარეგნობა ექნება. ის უფრო „ასტრა GTC-ს“ დაემსგავსება. და ის „კორსას“ დამოკლებულ პლატფორმას დაეყრდნობა.

რა ტქმა უნდა, „ალეგრას“ მცირელიტრაჟიან, ეკონომიური ძრავებს გამოუყიფენ. მათ შორის იქნება ბენზინზე მომუშავე ერთლიტრიანი აგრეგატი, რომელიც საწვავის წვის კამერაში შეფრქვევის სისტემით აღიჭურვება. შერეული ციკლით გადაადგილებისას, ამ აგრეგატით აღჭურვილი „ალეგრა“ 100 კილომეტრს 3.5 ლიტრი საწვავით გაივლის, ყოველი კილომეტრის გავლისას კი ატმოსფეროს მხოლოდ 100 გრამი ნახშირორჟანგით დააბინძურებს.

ოლდრიდი ამბობს, რომ თავისი გარეგნობით, „ალეგრა“ კონკურენციას გაუწევს „მინის“, „სიტროენის“ DS3-ს და „ფიატის“ 500-ს. გარდა ამისა, „ოპელი“ მყიდველს სპეციალურ ინდივიდუალიზაციის პროგრამას შესთავაზებს, რომელიც შესაძლებელი იქნება ავტომობილის სტილის საკუთარი გემოვნების შესაბამისად შეცვლა.

„ალეგრას“ წარმოება, გერმანიის ქალაქ აიზენახის ქარხანაში, 2013 წელს დაიწყება. რაც შეეხება მის სავარაუდო ფასს, ის დაახლოებით 12 000 ევროს ფარგლებში იქნება. სხვათა შორის, ამ ავტომობილის შესახებ ოფიციალური მონაცემების გამოქვეყნებას თავად „ოპელიც“ გეგმავს.

„პორშემ“ ჰიბრიდული სუპერ ქარი 645 ათასად შეაფასა

Porsche 918 Spyder, Now Available for EUR645,000

22 მარტი

„პორშე“ თავისი პლაგ-ინ ჰიბრიდული სუპერ ავტომობილის, „918 სპაიდერის“ წარმოებას ორ წელიწადში დაიწყებს, მასზე შეკვეთების მიღებას კი უკვე შეუდგა და ფასიც გვაუწყა - ცუფენჰაუზენელების ისტორიაში პირველი ჰიბრიდი 645 000 ევრო (დაახლოებით 845 000 დოლარი) ეღირება. და ამ ფასში გადასახადები გათვალისწინებული არაა.

საინტერესოა კიდევ ერთი ფაქტი: მათ, ვინც გერმანულ კომპანიას „918 სპაიდერს“ შეუკვეთავს, მოდელ „911 ტურბო S სერის-ის“ სპეციალური ვერსიის შეძენის საშუალებაც ექნებათ. ამ ვერსიას „პორშე“ თავის გამორჩეულ კლიენტებს მიჰყიდის. „918 სპაიდერს“ „პორშეს“ ცუფენჰაუზენის (გერმანია) ქარხანა გამოუშვებს. წარმოება კი 2013 წლის 18 სექტემბერს დაიწყება. პირველი კლიენტები სასურველ ავტომობილს ნოემბერში მიიღებენ. გერმანული კომპანია აცხადებს, რომ ჰიბრიდულ სუპერ ავტომობილს შეზღუდული რაოდენობით, მხოლოდ 918 ცალს დაამზადებს.

ამ ავტომობილის კონცეპტუალური ვერსიის მსოფლიო პრემიერა შარშან, ჟენევის ავტო შოუზე შედგა. უნდა აღინიშნოს ისიც, რომ მისი საწარმოო ვერსია პრაქტიკულად არ შეიცვლება. მცირე ცვლილება ის იქნება, რომ ავტომოილს მოსახსნელ, ორნაწილიან მყარ სახურავს გაუკეთებენ. ამ სახურავის მოხსნა კი ხელით იქნება შესაძლებელი. მოსხნის შემდეგ, სახურავის პანელები წინა საბარგო სექციაში მოთავსდება. შესამჩნევია კიდევ ორი სიახლე - სერიულ ვერსიას გარე სარკეები დაემატება და სამაგიეროდ, გამოსაბოლქვი მილები, გვერდებიდან მათთვის ჩვეულ ადგილზე, უკანა ბამპერის ქვეშ გადაინაცვლებს.

„918 სპაიდერის“ საფუძველს კარბონის კომპოზიტით დამზადებული მონოკოკი წარმოადგენს, რომელთანაც ჰიბრიდული სისტემაა დაკავშირებული. ამ სისტემის მთავარი ნაწილია 4.0-ლიტრიანი V8 ტურბოძრავი, რომელიც 500 ცხენის ძალას იძლევა. მასთან უნისონში მუშაობს ორი ელექტროძრავი, რომელთაგან თითოეული წინა, ან უკანა ღერძს ემსახურება. მათი ჯამური სიმძლავრე კი 218 ცხენის ძალაა. შიდაწვის ძრავთან ორდისკოიანი ქუროთი 7-საფეხურიანი ტრანსმისიაა დაკავშირებული, რომელიც მბიძგველ ძალას უკანა ბორბლებს აწვდის.

ელექტრულ ძრავებს ენერგიით ლითიუმ-იონური ელემენტების ბლოკი ამარაგებს, რომელსაც გაგრილების თხევადი სისტემა ემსახურება. მისი დამუხტვა საყოფაცხოვრებო ქსელის შტეპსელიდანაა შესაძლებელი, მასში დაგროვილი ენერგია კი საკმარისია იმისათვის, რომ მხოლოდ ელექტრული წევით, ავტომობილმა 25 კილომეტრი გაიაროს. „პორშე“ აცხადებს, რომ აკუმულატორების დამუხტვის დრო, ამათუიმ ქვეყანაში არსებული ელექტროქსელის თავისებურებაზეა დამოკიდებული. გერმანიაში კი „918 სპაიდერის“ აკუმულატორების სრულ დამუხტვას სამი საათი დასჭირდება. ამასთან, სწრაფად დამმუხტავი მოწყობილობა ამ დროს მნიშვნელოვნად შეამცირებს.

„პორშეს“ მიერ გავრცელებული ინფორმაციით, „918 სპაიდერი“ საწვავის მეტად ეკონომიური ხარჯვით გამოირჩევა. კერძოდ, შერეული ციკლით მოძრაობისას, 100 კილომეტრის გასავლელად, მას 3.0 ლიტრი ბენზინი ჰყოფნის, ყოველ კილომეტრზე კი გარემოს მხოლოდ 70 გრამი ნახშირორჟანგით აბინძურებს. რამდენადაც საწვავის ხარჯსა და ეკოლოგიურობაზე ამერიკაში განსხვავებული სტანდარტები მოქმედებს, „პორშე“ თავის ამერიკელ მყიდველს პირდება, რომ შესაბამის „ამერიკულ“ ინფორმაციას წარმოების დაწყებამდე ცოტა ხნით ადრე გამოაქვეყნებს.

რაც შეეხება „918 სპაიდერის“ დინამიკურ მახასიათებლებს: ადგილიდან 100 კმ/სთ-ის ასაკრეფად მას 3.2 წამი ჰყოფნის, რაც ჰიბრიდულ ავტომობილებზე ფართო მასების მცდარ შეხედულებას, თითქოს ასეთი მანქანები ტემპერამენტით არ გამოირჩევიან, რადიკალურად შეცვლის. ამის დასტურად, ჰიბრიდული „პორშეს“ მაქსიმალური სიჩქარე 320 კმ/სთ-ია. მხოლოდ ელექტროძრავების ხარჯზე მოძრაობისას, მაქსიმალური სიჩქარე 150 კმ/სთ-ს აღწევს.

Tuesday, March 22, 2011

„ჰიუნდაი“ იაპონიას ეხმარება

Hyundai To Donate JPY100 Million to Quake-Striken Japan

22 მარტი

დღეს იაპონიას ყველა ეხმარება. ქვეყანა, რომელიც სულ ცოტა ხნის წინ, მსოფლიოს მეორე უდიდესი ეკონომიკა იყო, დღეს ჰუმანიტარული კატასტროფის ზღვარზე იმყოფება. ამიტომ, ამომავალი მზის ქვეყანას ახლა ისინიც ეხმარებიან, ვისაც ადრე თავად უწვდიდა ხელს. იაპონელებს ისინიც ეხმარებიან, რომლებიც ცოტა ხნის წინ მათი უშეღავათო კონკურენტები იყვნენ (და ასეთებადვე რჩებიან). მაგალითად, კორეული საავტომობილო კომპანია „ჰიუნდაი“...

„ჰიუნდაიმ“ იაპონიის დასახმარებლად 100 მილიონი იაპონური იენი (დაახლოებით 1.3 მილიონი დოლარი) გამოჰყო. ეს ფული, იაპონიის იმ მხარეს მოხმარდება, რომლებიც მიწისძვრამ და ცუნამიმ ყველაზე მეტად დააზარალა. ამ თანხას იაპონია კორეული წითელი ჯვრის ორგანიზაციის ხელით მიიღებს, რომელიც მას იაპონიის წითელ ჯვარს გადასცემს. ეს უკანასკნელი კი მიღებული დახმარებით, საკვებს, წყალს, მედიკამენტებს და სხვა აუცილებელ ნივთებს შეიძენს.

პარალელურად, „ჰიუნდაი მოტორის“ ჯგუფის თავმჯდომარე მონ-კუ ჩუნმა, თავისი კომპანიის იაპონელ ბიზნეს პარტნიორებს თანაგრძნობის წერილები დაუგზავნა. მანვე განაცხადა, რომ საჭიროების შესაბამისად, „ჰიუნდაი მოტორი“ იაპონიას შემდგომშიც დაეხმარება.

„როგორც ყოველთვის, „ჰიუნდაი“ ბუნებრივი კატაკლიზმებით დაზარალებულ რეგიონებს მთელს მსოფლიოში ეხმარება და ამით ყოველთვის უსვამს ხაზს იმ ფაქტს, რომ მსოფლიოს განუყოფელი ნაწილია. ჩვენმა კომპანიამ, თავის დროზე, დახმარება გაუწია ირანის 1999 წლის მიწისძვრით, 2004 წლის აზიის ცუნამით, 2007 წელს, საბერძნეთის ხანძრებით დაზარალებულებს, ასევე 2009 და 2010 წლებში, ჰაიტისა და ჩილეში მომხდარი მიწისძვრების დროს დაზარალებულებს“, - ნათქვამია კომპანიის განცხადებაში.

„ჰიუნდაის“ გარდა, იაპონიას ფულად დახმარებას ევროპული და ამერიკული კომპანიებიც უწევენ.

აღსანიშნავია, რომ დიდ იაპონურ საავტომობილო კომპანიებს, მიწისძვრით და ცუნამით დაზარალებულ რეგიონებში, თავიანთი ქარხნები გაჩერებული აქვთ. უფრო მეტიც, ამ კატასტროფის გამო, მაკომპლექტებლების მწარმოებელი არაერთი იაპონური კომპანიაა გაჩერებული, ეს კი, ამ კომპანიების პარტნიორი ამერიკული და ევროპული კომპანიების შეფერხებას იწვევს.

Monday, March 21, 2011

„ლამბორგინის“ ახალი ფლაგმანი - „ავენტადორLP 700-4“

Lamborghini Aventador LP 700-4

21 მარტი

„ლამბოს“ მორიგი ფლაგმანის გამოჩენას საავტომობილო სასმყარო დიდხანს ელოდა. არამარტო ისინი, ვისაც მისი შეძენის საშუალებას ჯიბე აძლევს, არამედ ისინიც, ვისაც ასეთ მანქანებზე მხოლოდ ოცნება თუ შეგვიძლია. მოლოდინს კი თავად მწარმოებლის მიერ პრემიერამდე კარგა ხნით ადრე დაწყებული სარეკლამო კამპანია აძლიერებდა, რომელიც „მურსიელაგოს“ შემცვლელის ნაწილ-ნაწილ გაცნობაში გამოიხატებოდა.

სახელი, ძრავი, საკიდარი, ტრანსმისია, მონოკოკი, აწყობილი შასი და ბოლოს მთლიანად ავტომობილი - იტალიურმა კომპანიამ ჟენევამდე ასე თანდათან გაგვაცნო თავისი ახალი სუპერი, რომელიც უახლესი ტექნოლოგიების გამოყენებითაა დამზადებული, ისეთებითაც კი, რომლებსაც ჯერჯერობით, „ლამბოს“ ყველაზე დიდი კონკურენტი „ფერარიც“ კი არ ფლობს.

ჟენევაში, როგორც იქნა, მისი ერთ-ერთი მთავარი ვარსკვლავი პირადად გაეცნო ჯერ მედიასა და საავტომობილო სამყაროს, შემდეგ კი ფართო საზოგადოებასაც. და, რა თქმა უნდა, ყველანაირი მოლოდინი გაამართლა - გარეგნობითაც „ლამბორგინის“ ტრადიციების ჭეშმარიტი გამგრძელებელია და რა თქმა უნდა, აღჭურვილობითაც. ბარემ უნდა ითქვას, გარეგნობით, ის როგორღაც სახმელეთო სტელსის შთაბეჭდილებასაც ტოვებს. მაგრამ თუ სტელსის სისტემის დანიშნულება ისაა, რომ სამხედრო თვითმფრინავები რადარებისთვის უხილავი გახადოს, „ავენტადორის“ გარეგნობის მიზანი საწინააღმდეგოა - მან რაც შეიძლება მეტი თვალი უნდა მიიზიდოს. ალბათ, ამ მოკლე დახასიათების შემდეგ, გარეგნობაზე მეტად გაჩერება აღარ ღირს - ისედაც ყველაფერი კარგად ჩანს...

რა იმალება ძარის ქვეშ? პირველ რიგში, კარბონის კომპოზიტით დამზადებული კოკპიტი და მასზე ასხმული საკიდარი და ძალური დანადგარები. კარბონის უხვად გამოყენების წყალობით, ავტომობილი საკმაოდ მსუბუქი გამოვიდა - „მხოლოდ“ 1575 კილოგრამს იწონის. წონის დიდი ნაწილიც 6.5-ლიტრიან V12 ძრავზე მოდის, რომელიც 700 ცხენის ძალას (8 200 ბრ/წთ-ზე) და 690 ნიუტონმეტრს (5 500 ბრ/წთ-ზე) გამოიმუშავებს. ამ მონაცემების ასათვისებლად, „ლამბომ“ კომპანია „გრაცანოს“ წარმოების 7-საფეხურიანი ავტომატური კოლოფი (ISR - ინდივიდუალური გადამრთველი ღეროები) შეარჩია.

კოლოფიდან მაბრუნი მომენტი ოთხივე წამყვან ბორბალს მიეწოდება. ამ სისტემაში, უკანა დიფერენციალი თვითბლოკირებადია, წინას კი სისტემა ESP (ელექტრონული სტაბილურობის პროგრამა) ემსახურება. ამ ტანდემის მეშვეობით, „ავენტადორი“ ადგილიდან 100 კმ/სთ სიჩქარის აკრეფას 2.9 წამში ასწრებს, მისი მაქსიმალური სიჩქარე კი 350 კმ/სთ-ია.

„ლამბორგინი“ თავისი ახალი ფლაგმანის მიერ საწვავის მოხმარებაზე კონკრეტულ მონაცემებს არ აქვეყნებს, თუმცა ირწმუნება, რომ ეს მონსტრი ისეთივე ბენზინყლაპია არაა, როგორც ერთი შეხედვით ჩანს. პირიქით, „მურსიელაგოსთან“ შედარებით, 20 პროცენტით ეკონომიურია. ამასთან, მასზე 8 პროცენტით მძლავრიცაა. და რაც მთავარია, ამას ყოველგვარი ჰიბრიდული ვირუსის (როგორც ჟენევაში მომუშავე ჟურნალისტები ამბობდნენ) გარეშე მიაღწია.

ისღა დაგვრჩენია, „ავენტადორის“ ფასი გაუწყოთ. ევროპაში მისი შეძენის მსურველებს 255 000 ევროს გადახდა მოუწევთ, ამერიკაში კი - 379 700 დოლარისა. რა თქმა უნდა, ყველა ვერ შესწვდება, თუმცა მთელს მსოფლიოში საკმარისზე მეტი ყოფილა მისი მუშტარი. „ლამბორგინის“ განცხადებით, ყველა ავტომობილი, რომლებსაც სანტ’აგატა ბოლონეზელები წელს გამოუშვებენ, უკვე გაყიდულია.