Friday, April 30, 2010

მოტოკომბინეზონი უსაფრთხოების ბალიშებით

Alpinestars' airbag riding suit

30 აპრილი

ამერიკულმა კომპანია ”ალპინსტარზმა”, რომელიც სპორტული ავტო და მოტოეკიპირების წარმოებაზეა სპეციალიზებული, დაამზადა მოტოსპორტული კომბინეზონი ”ტექ ეარ რეის”, რომელშიც უსაფრთხოების ბალიშებია ჩამონტაჟებული და მოტოციკლისტებს ავარიის დროს მძიმე ტრავმებისგან იცავს. უსაფრთხოების ბალიშების გარდა, კომბინეზონს ჩაკერებული აქვს სპეციალური მოწყობილობა, რომელიც სამაშველო სამსახურებს ინციდენტის ზუსტ კოორდინატებს აწვდის.

უსაფრთხოების სისტემა სამართავი მოდულის, შვიდი სენსორის, ორი ტუმბოსა და მცირე აკუმულატორებისგან შედგება, რომლებიც მთელი ამ სისტემის მუშაობას უზრუნველყოფს. სენსორები მოტოციკლისტის მოძრაობას აკონტროლებენ, ტომბობი კი საჭიროების შემთხვევაში, ბალიშებს აზოტით ტუმბავენ. ჩამონათვალი საკმაოდ დიდია, თუმცა მთლიანობაში უსაფრთხოების მთელი სისტემა მხოლოდ ნახევარ კილოგრამს იწონის.

”ალპინსტარზის” მიერ გამოქვეყნებულ რელიზში აღნიშნულია, რომ უსაფრთხოების სისტემის ტვინისთვის შემუშავდა მუშაობის სპეციალური ალგორითმული სისტემა, რომელიც ბალიშებს თვითნებურად დაბერვის საშუალებას არ აძლევს. რაც მთავარია, ის ავარიის გარდუვალობას 8 მილიწამით ადრე ხვდება.

კომბინიზონის შესაქმნელად მუშაობისას, ”ალპინსტარზის” სპეციალისტებმა ბევრი საგზაო შემთხვევა შეისწავლეს და დაადგინეს, რომ ავარიების შედეგად, მოტოციკლისტებს ყველაზე ხშირად ხელები და მხრები უზიანდებათ. ამიტომ, მათ პიტვრლ რიგში, სწორედ სხეულის ამ ნაწილების დაცვაზე იზრუნეს. მაგრამ კომპანიის წარმომადგენლები ირწმუნებიან, რომ ბალიშების რაოდენობის გაზრდა პრობლემას არ წარმოადგენს და რომ მთელი სხეულის თანაბრად დაცვაც შესაძლებელია.

კომბინეზონის უსაფრთხოების ბალიშები ავარიაზე 50 მილიწამში რეგულირებს. ამასთან, ისინი მაქსიმალურ წნევის 5 წამის განმავლობაში ინარჩუნებენ. ბალიშების სრული ჩაფუშვა კი გაბერვიდან 20 წამის შემდეგ ხდება. სხვათა შორის, სპეციალური სერვისის გარეშე, უსაფრთხოების სისტემა ორ ავარიაზე მუშაობს. პირველი ავარიის შემდეგ, სისტემას დამუხტვა სჭირდება, მეორის შემდეგ კი შესაცვლელი ხდება.

”ალპინსტარზი” თავისი კომბინეზონების გაყიდვას ამერიკაში მერმისს ზაფხულში დაიწყებს. მისი სავარაუდო ღირებულება კი 2 500 დოლარი იქნება.

”ჰიუნდაის” ზედიზედ მეორე მსოფლიო პრემიერა

World Premiere of the All-New Hyundai Elantra/Avante

30 აპრილი

ბუსანში მიმდინარე საავტომობილო შოუზე, სამხრეთკორეულმა ავტოგიგანტმა ”ჰიუნდაიმ” თავისი ყველაზე პოპულარული მოდელის, ”ელანტრას” (კორეაში ამ ავტომობილს ”ავანტეს” სახელით იცნობენ) მეხუთე თაობის მსოფლიო პრემიერა ჩაატარა. ამ სახელით, კომპაქტური ავტომობილის წარმოება ”ჰიუნდაიმ” 1990 წელს დაიწყო და მას შემდეგ, მთელს მსოფლიოში 6 მილიონზე მეტი ”ელანტრა” გაჰყიდა.

ახალი ”ელანტრა” ძირეულადაა შეცვლილი, მისი დიზაინი კი ”ჰიუნდაის” ახალ კორპორატიულ სტილშია შესრულებული, რომელიც უკვე ახალ ”სონატასა” და ”აქცენტზე” (ერთი კვირით ადრე, პეკინის ავტო შოუზე) ვიხილეთ. და უნდა ითქვას, რომ ეს ახალი სტილი ყველაზე მეტად სწორედ ”ელანტრას” მოუხდა. კორეული კომპანიის განმარტებით, ახალ ”ელანტრას” ”თხიერი სკულპტურა” გამოარჩევს, რაც საუკეთესოდ მიესადაგა ოთხკარიანი კუპეს სტილს და რთული ფორმის, დიდრონ ფარებს.

გამოფენაზე სალონის ყველა შუშა გაუმჭვირვალე იყო - ”ჰიუნდაი” ჯერ მზად არაა იმისათვის, რომ ახალი ავტომობილის ინტერიერი გვიჩვენოს. თუმცა, გამოქვეყნებულ პრეს რელიზში აღნიშნულია, რომ ”ახალი ”ელანტრას” სალონში ისეთ რამეებს ვნახავთ, რაც ამავე კლასის სხვა კომპაქტურ ავტომობილებში ჯერ არავის გამოუყენებია”. გავრცელებული ინფორმაციით, სალონის სიახლეებს შორის იქნება უკანა სავარძლების გამათბობლები და ცენტრალურ პანელზე მოთავსებული ფერადი საინფორმაციო მონიტორი, რომელზეც უამრავი ინფორმაციის გამოტანა იქნება შესაძლებელი.

ბუსანში წარმოდგენილი ”ელანტრა” აღჭურვილია სერია ”გამა GDI-ს” (GDI - გაზოლინ დირექტ ინჯექშნ - ბენზინის უშუალო შეფრქვევა) 1.6-ლიტრიანი ძრავით, რომელიც მაქსიმუმ 140 ცხენის ძალასა და 167 ნიუტონმეტრს გამოიმუშავებს. ძრავთან შეწყვილებულია 6-საფეხურიანი ავტომატური კოლოფი. ”ჰიუნდაის რელიზში მითითებულია, რომ კორეაში ეს პირველი შემთხვევა იქნება, როდესაც კომპაქტურ ავტომობილზე, GDI ტექნოლოგიის ძრავს 6-საფეხურიანი ავტომატს შეუწყვილდება. იმავე რელიზის მიხედვით, ეს ტანდემი ავტომობილს, მის ყველაზე ეკონომიურ კონკურენტებზე 10 პროცენტით ეკონომიურს ხდის.

”ახალი ”ავანტე” (ელანტრა) კიდევ ერთხელ წარმოაჩენს ”ჰიუნდაის” ამბიციას, რომ კომპაქტურ კლასში საუკეთესო სტილისა და დინამიკის მქონე ავტომობილებს აწარმოებდეს. დარწმუნებული ვართ, რომ ამ ავტომობილით, მთელი მსოფლიოს მასშტაბით, კომპაქტურ კლასში ახალ სტანდარტს დავამკვიდრებთ”, - პრეზენტაციის დროს განაცხადა ”ჰიუნდაის” გლობალური ბიზნესის დივიზიონის პრეზიდენტმა და მთავარმა აღმასრულებელმა სტივ იანგმა.

კორეაში ახალი ავტომობილი ”ავანტეს” სახელით გაიყიდება, ევროპაში კი სახელად შესაძლოა ისევ ”ელანტრა” დაუტოვონ. თუმცა, გამორიცხული არაა, რომ სახელი ინდექს i-თ შეუცვალონ. ოღონდ, ინდექსს რა რიცხვი მოჰყვება (35, ან 40), ეს ჯერ უცნობია. კორეაში ახალი ”ავანტეს” გაყიდვას ”ჰიუნდაი” ზაფხულის შემდეგ დაიწყებს, ევროპასა და სხვა ბაზრებზე ის მოგვიანებით გამოჩნდება. საქართველოს ბაზარს კი ალბათ მომავალი წლის დასაწყისში ეწვევა.

Thursday, April 29, 2010

”კრაისლერმა” ”სებრინგს” სახელს გამოუცვლის

Nassau will be Chrysler's replacement for Sebring

29 აპრილი

კრაისლერ 200C
.............................................

სააგენტო დეტროიტ ფრი ნიუსის ცნობით, ამ წლის ბოლოს, ”კრაისლერი” საშუალო ზომის სედანს, უკვე ძალიან დაძველებულსა და მობეზრებულ ”სებრინგს” ახალი მოდელით ჩაანაცვლებს და მას სახელსაც შეუცვლის. ახალი ავტომობილის სავარაუდო სახელი კი ”ნასაუ” გახდება.

პირველად სახელი ”ნასაუ” ამერიკულმა კომპანიამ სამი წლის წინ, დეტროიტის საავტომობილო შოუზე ნაჩვენები კონცეპტუალური მოდელისთვის გამოიყენა, რომელსაც ეგრეთ წოდებული ”შუტინგ ბრეიკ” ტიპის ძარა ჰქონდა, რომელიც ევროპული კლასიფიკაციით ჰეჩბეკის ტიპის ძარას ჰგავს. ეს სახელი ”კრაისლერმა” სპეციალურად, კონცეპტუალური მოდელისთვის დაარეგისტრირა და ანალიტიკოსების ინფორმაციით, ამჟამადაც მას ეკუთვნის. ა,იტომ, სრულიად ლოგიკურია, რომ ამერიკული კომპანია სწორედ მას გამოიყენებს.

კრაისლერ ნასაუ

..........................................

მართალია, ახალი ავტომობილი სახელს სამი წლის წინანდელი პროტოტიპისგან მიიღებს, თუმცა ამ ორ ავტომობილს საერთო არაფერი ექნება. სამაგიეროდ, გარეგნულად ის კომპანიის კიდევ ერთ კონცეპტუალურ ავტომობილს, დეტროიტში შარშან ნაჩვენებ 200С-ს დაემსგავსება.

ამ ავტომობილის დიზაინმა დეტროიტში სპეციალისტებიც და დამთვალიერებლებიც მოხიბლა. თავისი გაბარიტებით ის ახლოსაა ”ბეემვეს” მე-5 სერიის სედანთან. წამყვანი ბორბლებიც მასაც უკანა აქვს. კონცეპტუალური ავტომობილი ჰიბრიდული სისტემით იყო აღჭურვილი, რომლის ჯამური სიმძლავრეც 268 ცხენის ძალას აღწევდა.

”სებრინგის” შემცვლელის წარმოებაში ფართოდ გამოიყენებენ ”ფიატის” ტექნოლოგიებს. კერძოდ, იტალიური იქნება ავტომობილის პლატფორმა, რომელსაც ”ალფა რომეოს” დიდი ზომის სედანისგან აიღებენ. მყიდველს ორი ტიპის, 4 და 6-ცილინდრიანი ბენზინის ძრავებით აღჭურვილ ავტომობილს შესთავაზებენ. ამასთან, ძრავების გამას შემდგომში დიზელის აგრეგატებიც დაემატება.

”სებრინგის” შემცვლელი, ”კრაისლერის” მარკით მხოლოდ აშშ-ში გაიყიდება. ანალოგიურ ავტომობილს ევროპელი მყიდველი ”ლანჩას” მარკით მიიღებს და შესაბამისად, ის იტალიური კომპანიის (რომელიც ფიატ-ის ჯგუფში შედის) კორპორატიული სტილის შესაბამის დიზაინს მიიღებს.

სავარაუდოდ, ახალი ავტომობილი ”კრაისლერის” დილერთა შოურუმებში მერმისს გამოჩნდება.

Wednesday, April 28, 2010

”ლოტუსმა” მომავლის ზემსუბუქი ავტომობილები შექმნა

Lotus puts Toyota's Venza on a Strict Diet

28 აპრილი

სპორტული ავტომობილების მწარმოებელ ინგლისურ კომპანია ”ლოტუსის” ინჟინირინგულმა შტომ საინტერესო ექსპერიმენტები ჩაატარა, რომლის მიზანი იყო იმის დამტკიცება, რომ ავტომობილის წონის და მასთან ერთად, საწვავის ხარჯის მნიშვნელოვნად შემცირება დიდი ხარჯების გარეშეც სრულიად შესაძლებელია.

ექსპერიმენტი ”ტოიოტას” ქროსოვერ ”ვენცაზე”, ორ ნაწილად ჩატარდა. პირველი ნაწილი ითვალისწინებდა ისეთი ავტომობილის შექმნას, რომლის წარმოების დაწყებაც 2017 წელს იქნებოდა შესაძლებელი, მეორის მიხედვით კი იგივე ავტომობილის 2020 წლის ვარიანტი უნდა დამზადებულიყო. მხედველობაში იქნა მიღებული ისიც, რომ შესაბამის პერიოდებში, შესაძლებელი გახდება ისეთი ტექნოლოგიების შემუშავება, რომლებიც ექსპერიმენტების დროს გამოყენებული მასალების მასობრივ წარმოებაში დანერგვას უზრუნველყოფს.

პირველი ექსპერიმენტის დროს აწყობილი ქროსოვერი, სტანდარტულ ”ვენცასთან” შედარებით, 21 პროცენტით მსუბუქი გამოვიდა, მეორე შემთხვევაში კი ავტომობილის წონა 37 პროცენტით შემცირდა. აშშ-ის ენერგეტიკის ინსტიტუტის სპეციალისტების გათვლებით, წონის ასეთი შემცირებით, ავტომობილის ეკონომიურობის 20 პროცენტზე მეტით გაუმჯობესება შეიძლება.

შემსუბუქების სამუშაოები შემდეგი თანმიმდევრობით ჩატარდა. მანქანა მთლიანად დაიშალა და შედგა მისი ყველა ნაწილის და კომპონენტის სრული სია. შემდეგ, ინჟინრებმა განსაზღვრეს, რამდენად შესაძლებელი იყო თითოეულის წონის შემცირება ისე, რომ ამით მათი გამძლეობა არ გაუარესებულიყო. ბევრ ნაწილსა და კომპონენტზე კი საერთოდ უარი ითქვა. ამგვარად, მათი რიცხვი, 400-დან 211-მდე შემცირდა.

შემდეგ დადგა მათი მასალების შერჩევის დრო. თუ იაპონური კომპანია, ”ვენცას” ძარის და შასის წარმოებისას, ძირითადად ჩვეულებრივ ფოლადს იყენებს, ”ლოტუსის” ინჟინრებმა აქცენტი ალუმინზე, ალუმინისა და მაგნიუმის შენადნობზე, კომპოზიტებსა და სხვა მსუბუქ მასალებზე გააკეთეს.

მაგალითად, 2020 წლის ვარიანტის ძარის 37 პროცენტი ალუმინისგან დამზადდა, 30 პროცენტი მაგნიუმის შენადნობისგან, 21 პროცენტი კომპოზიტისგან, 7 პროცენტი კი - მტკიცე ფოლადისგან. დარჩენილ 5 პროცენტზე ”ლოტუსი” არაფერს ამბობს, სავარაუდოდ, ეს ჩვეულებრივი ფოლადის წილია.

”ლოტუსის” ინჟინრებმა ბამპერების დასამზადებლად ალუმინი გამოიყენეს, შემაერთებელი დეტალები პლასტიკისგან და მაგნიუმის შენადნობისგან დაამზადეს. მსუბუქი მასალები გამოიყენეს შასის ელემენტების დასამზადებლადაც, რის შედეგადაც, შასის წონა 43 პროცენტით შემცირდა.

შემსუბუქების სამუშაოები სალონსაც შეეხო. აქ მექანიკური დეტალები ელექტრონიკით შეიცვალა. კერძოდ, გადაცემათა კოლოფის საფეხურების შემცვლელი ბერკეტისა და ხელის მუხრუჭის ნაცვლად, სენსორულ მონიტორზე არსებული შესაბამისი ღილაკები გამოიყენება. სავარძლები სპეციალური მტკიცე ქაფისგან, მათი სამაგრები კი ფოლადის ნაცვლად, პლასტიკატისგან დამზადდა. ამგვარად, სავარძლების წონა თითქმის განახევრდა.

ამ საინტერესო ექსპერიმენტით, ”ლოტუსის” ინჟინრებმა” დაამტკიცეს რომ ჩვეულებრივი, შიდაწვისძრავიანი ავტომობილებიც კი, წონის შემცირების ხარჯზე, უფრო ეკონომიურები და გარემოსადმი მეგობრულები შეიძლება გახდეს. თანაც, ამ დროს გამოყენებული ტექნოლოგიები ავტომობილს მხოლოდ სამი პროცენტით აძვირებს.

Tuesday, April 27, 2010

”ჰიუნდაი აქცენტის” ჩინური დებიუტი

Hyundai Accent

26 აპრილი

იმ დროს, როდესაც ეკონომიკურმა კრიზისმა თითქმის მთელს მსოფლიოში ავტომობილების გაყიდვების მკვეთრი შემცირება გამოიწვია, ჩინური ავტობაზარი ასევე მკვეთრად ზრდას განაგრძობდა. უფრო მეტიც, ცისქვეშეთის საავტომობილო ბაზარი მსოფლიოში უდიდესი გახდა და ეს საპატიო წოდება აშშ-ს, ავტოინდუსტრიის აქამდე უცვლელ ლიდერს ჩამოართვა.

სწორედ ჩინური ბაზარი აღმოჩნდა ის ჯადოსნური ადგილი, რომელმაც ბევრი დიდი ავტომწარმოებელი კრახისგან იხსნა. ბევრი კომპანიისთვის, მაგალითად ”ფოლკსვაგენისთვის”, მსოფლიოს ყველაზე ხალხმრავალი ქვეყანა ნომერ პირველ ბაზრად იქცა. ჩინეთში სწორედ ვოლფსბურგელები არიან გაყიდვებში ლიდერები, მეორე და მესამე ადგილები კი შესაბამისად, ”ჰიუნდაის” და ”ჯენერალ მოტორსს” უკავიათ.

უნდა ითქვას, რომ ”ჰიუნდაის” გაყიდვებზე, ჩინური ბაზრის მსგავსად, ეკონომიკური კრიზისი თითქმის არ ასახულა. პირიქით, კორეელებმა კიდევ უფრო გაზარდეს მსოფლიო ბაზარზე თავიანთი წილი და შორს არაა ის დრო, როდესაც მათ მოწინავე ოთხეულში ვიხილავთ.

ბუნებრივია, როდესაც მწარმოებლისთვის რომელიმე ქვეყანა ნომერ პირველი ბაზარია, ის ცდილობს, რომ თავისი ახალი პროდუქცია პირველად სწორედ ამ ბაზარზე წარადგინოს. ამიტომ, გასაკვირი არაა, რომ პეკინში დაწყებულ საავტომობილო გამოფენაზე, არაერთმა უცხოურმა კომპანიამ თავისი სიახლეები გამოფინა, ისეთი სიახლეები, რომლებზეც მანამდე არავის არაფერი სმენოდა.

სწორედ ჩინეთი გახდა ის ადგილი, სადაც ”ჰიუნდაიმ” თავისი პოპულარული ავტომობილის - კომპაქტურ სედან ”ვერნას” (ჩვენში ის აქცენტის სახელითაა ცნობილი) განახლებული ვერსიის მსოფლიო პრემიერა მოაწყო. ამ ავტომობილის მოკრძალებული გაბარიტებისა და მისი სალონის ასკეტურობის მიხედვით შეიძლება ვივარაუდოთ, რომ მას დაბალი ფასი ექნება და ამის წყალობით, ცისქვეშეთში მალე მოიხვეჭს პოპულარობას და კორეული კომპანიის გაყიდვებს მნიშვნელოვნად გაზრდის.

რა შეიძლება ითქვას ”ვერნას” გარეგნობაზე. ჯერ ერთი, ”ჰიუნდაის” დიზაინერების მთავარი ამოცანა, კომპანიის კორპორატიული სტილის დაცვა იყო, რაც მათ მეტნაკლებად გამოუვიდათ. თუმცა, იმავდროულად, ამ ავტომობილის ბევრი დეტალი მისი კონკურენტების ფორმებს მოგვაგონებს. პირდაპირ უნდა ითქვას, ძნელია გაიხსენო სხვა ავტომობილი, რომელიც მისი მწარმოებლის სტილის შენარჩუნების გარდა, სხვა კომპანიების (ტოიოტას, ფორდისა და პეჟოს) დიზაინის ელემენტებსაც იმეორებდეს. განსაკუთრებით თვალში საცემია რადიატორის ქვედა ჰაერის ამღების, ”ფორდ ფიესტას” ანალოგიურ ელემენტთან ძლიერი მსგავსება. თუმცა, ყოველივეს მიუხედავად, ახალ ”ვერნას” თამამად შეიძლება ვუწოდოთ დაპატარავებული ”სონატა”, რადგან ის ყველაზე მეტად სწორედ თავის უფროს ”ნათესავს” ჰგავს.

თანამედროვე ტენდენციის შესაბამისად, ახალი ავტომობილი წინამორბედთან შედარებით, გაბარიტებში გაზრდილია. მისი სიგრძე 4340 მილიმეტრია (წინამორბედზე 60 მილიმეტრით გრძელი), სიგანე 1700 მმ (გაიზარდა მხოლოდ 5 მილიმეტრით), სიმაღლე კი - 1460 მილიმეტრი (წინამორბედზე10 მილიმეტრით დაბალი). რა თქმა უნდა, გაზრდილია (70 მილიმეტრით) ბორბლებს შორის ბაზაც, რომლის სიგრძეც 2570 მილიმეტრია. საერთო ჯამში, ავტომობილმა უფრო დინამიური სახე მიიღო, რასაც ხელს სახურავის მშვილდისებრი მოყვანილობა უწყობს.

მწარმოებელი გვარწმუნებს, რომ ახალი ”ვერნასთვის” სრულიად ახალი პლატფორმა გამოიყენა. თუმცა, მას საკიდარი თითქმის უცვლელად დაუტოვა. მანქანის წინა მხარე მაკფერსონის საყრდენებზე დგას, უკნიდან კი ბორბლებს გრძივი ბერკეტებით უკავშირდება. მნიშვნელოვნადაა გაზრდილი ძარის სიხისტე, რაც მისი წარმოებისას მტკიცე ფოლადის გამოყენებამ განაპირობა.

ახალი ”ვერნასთვის” ჯერჯერობით მხოლოდ ორი ძრავია გათვალისწინებული. საბაზო კომპლექტაციაში შედის ბენზინის 1.4-ლიტრიანი აგრეგატი, რომელიც მაქსიმუმ 107 ცხენის ძალას და 135 ნიუტონმეტრს ავითარებს. ამ ძრავს, მყიდველის სურვილის შესაბაჯმისად, შეიძლება შეუწყვილდეს ან 5-საფეხურიანი მექანიკური, ან 4-საფეხურიანი ავტომატური კოლოფი. ამ ძრავით და მექანიკური კოლოფით აღჭურვილ ”ვერნას” 100 კილომეტრის გასავლელად (შერეული ციკლით) 5.7 ლიტრი ბენზინი ჰყოფნის, ავტომატური კოლოფის შემთხვევაში კი ხარჯი 6.2 ლიტრამდე იზრდება.

მეორე ძრავიც საწვავად ბენზინს იყენებს. მისი მუშა მოცულობა 1.6 ლიტრია, მაქსიმალური სიმძლავრე 123 ცხენის ძალა, მაქსიმალური მაბრუნი მომენტი კი - 155 ნიუტონმეტრი. ამ ძრავისთვის კი მხოლოდ 4-საფეხურიანი ავტომატური კოლოფია გათვალისწინებული. ორივე ძრავი გაზგამანაწილებელი მექანიზმის ფაზების ცვალებადი სისტემითაა აღჭურვილი, რაც ეკონომიურობას აუმჯობესებს.

რა თქმა უნდა, ახალი ”ვერნას” გაყიდვები პირველ რიგში, ჩინეთში დაიწყება (წლის მეორე ნახევარში). ავტომობილის წარმოებას, კორეული კომპანიის პეკინური ქარხანა ივლისში შეუდგება. მოგვიანებით, ამ ავტომობილს ”ჰიუნდაი” მსოფლიოს ყველა ბაზარზე, მათ შორის, ამერიკასა და ევროპაშიც გაიტანს.

”ვერნა” ქართულ ბაზარზეც გაიყიდება. სავარაუდოდ, ჩვენთან ის ”აქცენტის” სახელით შემოვა და მისი გაყიდვები ალბათ ამ წლის ბოლოს დაიწყება. მისი ფასიც მოგვიანებით დადგინდება.

Monday, April 26, 2010

”ბენტლი” გაყიდვების ზრდის მოლოდინშია

Bentley CEO says luxury buyers are spending again

26 აპრილი

სულ რაღაც სამი წლის წინ, ”ბენტლის” საქმეები შესანიშნავად მიდიოდა - კომპანიამ გაყიდვების პიკს მიაღწია და ისე ჩანდა, რომ მომავალი კიდევ უფრო წარმატებული უნდა ყოფილიყო. მაგრამ მსოფლიო ეკონომიკურმა კრიზისმა ყველაფერი თავდაყირა დააყენა და ლუქსის კლასის ავტომობილების პოტენციურ მყიდველების დიდ ნაწილს მომჭირნეობისკენ უბიძგა.

მაგრამ კრიზისმა ჩაიარა და გამოკეთება ბაზრის ლუქს სეგმენტსაც დაეტყო. ამის კვალობაზე, ”ბენტლის” მარკეტოლოგები ვარაუდობენ, რომ წელს მათი კომპანია დაახლოებით 5 000 ავტომობილის გაყიდვას შესძლებს. ეს კი იმის ნახევარია, რაც 2007 წელს გაიყიდა.

”ბენტლის” მთავარი აღმასრულებელი ფრანც-იოზეფ პაეფგენი ამბობს, რომ მალე მისი კომპანია გაყიდვებს 8-9 ათასამდე გაზრდის. მისი თქმით, ლუქს კლასის ავტომობილების სეგმენტში გაყიდვების ზრდა იმის შედეგია, რომ მდიდრები ფულს უკვე გაცილებით თამამად ხარჯავენ, ვიდრე თუნდაც შარშან. ეს კი კარგის ნიშანია.

პაეფგენს ოპტიმიზმის საფუძველს ასევე ჩინური ბაზრის ძალიან სწრაფი ზრდა აძლევს. ”ჩინეთში ეკონომიკა აფეთქებასავით ვითარდება. ეს უდიდესი ბაზარია, რომელიც ძალიან სწრაფად იზრდება. სტაბილურია ახლო აღმოსავლეთის ბაზარიც, რასაც ვერ ვიტყვით ამერიკულ ბაზარზე”, - ამბობს პაეფგენი.

სამი წლის წინ, ”ბენტლის” გაყიდვების ზრდა მისი ძირითადი მოდელის, ”კონტინენტალის” პოპულარობამ განაპირობა. ეს მოდელი კუპეს, სედანისა და კაბრიოლეტის ძარით, შედარებით იაფი ღირს და ახლოსაა იმ საფასო სეგმენტთან, რომელშიც ”მერსედეს-ბენცი”, ”ბეემვე”, ”აუდი” და ”მაზერატი” ფიგურირებენ. ეს გაცილებით დიდი სეგმენტია, ვიდრე ის, რომელშიც ”როლს როისის” მოღვაწეობს.

სამი წლის წინ, ”ბენტლიმ” მთელს მსოფლიოში 10 014 ავტომობილი გაყიდა, რაც ინგლისური კომპანიის ისტორიაში სარეკორდო მაჩვენებელია. აქედან 3 990 ავტომობილი მარტო აშშ-ში გაიყიდა. სამაგიეროდ, იქვე შარშან ”ბენტლის” ავტომობილების შეძენა მხოლოდ 1 367-მა ადამიანმა ისურვა. ეს კი წინა წლის შესაბამისი მონაცემის თითქმის ნახევარია. ყოველივეს შედეგი კი ისაა, რომ ”ბენტლიმ” შარშან 262 მილიონი დოლარი იზარალა. ეს მაშინ, როდესაც წინა წელს მოგებამ მხოლოდ 13.5 მილიონი შეადგინა.

დღეს კი კომპანია ეკონომიკური აღმავლობის დასაწყისს მოძველებული მოდელებით ხვდება. ეს კი იმას ნიშნავს, რომ თუ ეკონომიკის აღმავლობა პროგნოზირებული სწრაფი ტემპით განვითარდა, ”ბენტლის” გაყიდვების ზრდის მაჩვენებელი შედარებით ნელი იქნება.

კიდევ ერთი მიზეზი, რის გამოც ინგლისური კომპანია ეკონომიკის ზრდის ტემპს ფეხს ვერ აუბამს ისაა, რომ მან შარშან კუპე ”კონტინენტალ GT-ს” (სურათზე) წარმოება შეაჩერა. ამ მოდელის (ეს პირველი ავტომობილია, რაც ბენტლიმ მას შემდეგ გამოუშვა, რაც ფოლკსვაგენის ჯგუფში შევიდა) შემცვლელი კი ბაზარზე მხოლოდ მერმისს გამოჩნდება.

”პორშემ” ჰიბრიდულ ”918 სპაიდერზე” 900-ზე მეტი შეკვეთა მიიღო

More Than 900 Buyers Express Interest in Porsche's 918 Spyder Hybrid

26 აპრილი

ჟენევის საავტომობილო გამოფენაზე, ”პორშემ” საზოგადოებას თავისი მორიგი კონცეპტუალური შედევრი - ”918 სპაიდერი” უჩვენა, რომელიც ჰიბრიდული სისტემითაა აღჭურვილი. გამოფენაზე ამ ავტომობილმა სპეციალისტების და დამთვალიერებელთა მოწონება დაიმსახურა, თუმცა კომპანიამ გამოაცხადა, რომ მის წარმოებას მხოლოდ იმ შემთხვევაში გადაწყვეტდა, თუ მასზე ათასზე მეტ შეკვეთას მიიღებდა.

და აი, როგორც ჩანს, ”918 სპაიდერს” მალე მწვანე შუქს აუნთებენ - პეკინის ავტო შოუზე, ”პორშეს” განვითარების შტოს შეფმა ვოლფგანგ დურჰაიმერმა განაცხადა, რომ მის კომპანიას, ჰიბრიდულ სუპერქარზე უკვე 900-ზე მეტი შეკვეთა აქვს მიღებული.

”იმისათვის, რომ ამ ავტომობილის წარმოება გადავწყვიტოთ, მინიმუმ ათასი მყიდველი გვჭირდება. პირადად მე აბსოლუტურად დარწმუნებული ვარ, რომ მალე ”918 სპაიდერის” შეძენის რეალურ სურვილს ათასზე მეტი ადამიანი გამოთქვამს”, - სააგენტო ბლუმბერგთან საუბრისას განაცხადა დურჰაიმერმა.

უფრო ადრე, ”პორშეს” მთავარ აღმასრულებელს მიხაელ მახტს ნათქვამი აქვს, რომ მის კომპანიაში თითქმის ყველას სურს, რომ ”918 სპაიდერის” წარმოებას მწვანე შუქი აენთოს. ”ჟენევაში ამ ავტომობილზე წარმოუდგენლად კარგი რეაქცია მივიღეთ”, - განაცხადა მახტმა.

გარდა იმისა, რომ ძალიან მიმზიდველად გამოიყურება, ჰიბრიდული ავტომობილი შესანიშნავი ტექნიკურ-ეკონომიკური მახასიათებლებითაც გამოირჩევა. მის ჰიბრიდულ სისტემაში შედის 3.4-ლიტრიანი ატმოსფერული V8 (სიმძლავრე 500 ცხენის ძალა) და ორი ელექტროძრავი (მათი ჯამური სიმძლავრე 218 ცხენის ძალას აღწევს). ამ ელექტროძრავებიდან ერთი წინა ღერძს ემსახურება, მეორე კი - უკანას. შიდაწვის ძრავთან, ორმაგი ქუროთი დაკავშირებულია 7-საფეხურიანი ავტომატური კოლოფი.

”პორშეს” მონაცემებით, მარტო ელექტროძრავებით, ”918 სპაიდერს” დაახლოებით 25 კილომეტრის გავლა შეუძლია. ადგილიდან 100 კმ/სთ სიჩქარეს ის 3.2 წამში ავითარებს, მაქსიმალური სიჩქარე კი 320 კმ/სთ-ს აღწევს. და, ყველაზე მთავარი - 100 კილომეტრის გასავლელად, ავტომობილს 3 ლიტრი საწვავიც ჰყოფნის.

ჩინური ხელნაკეთი ავტომობილი 3 000 დოლარად

Lorry driver builds himself a Lamborghini

26 აპრილი

ამ სურათს შეხედეთ და თქვით, რა აქვს მასზე გამოსახულ ავტომობილს საერთო ”ლამბორგინისთან”? ალბათ მხოლოდ ის, რომ კარები იტალიური კომპანიის ავტომობილებისთვის დამახასიათებელ სტილში - ქვევიდან ზევით ეხსნება. მეტი არაფერი! თუმცა მისი შემქმნელი, 25 წლის ჩინელი ენთუზიასტი ჩენ ძინმიაო ამბობს, რომ თავის ”შედევრზე” მუშაობისას, შთაგონების წყარო სწორედ ”ლამბოს” ავტომობილებისგან მიიღო.

ავტომობილს სახელი არ აქვს. მის შესაქმნელად ძინმიაომ ერთი წელი იმუშავა და სულ რაღაც 3 000 დოლარი დახარჯა. ავტომობილის ავტორი ამბობს, რომ მთელი ცხოვრება ”ლამბორგინის” ავტომობილებზე იცნებობს. მათში კი დიზაინი და დინამიკური მონაცემები მოსწონს. ისე, მისი ”შედევრი” ვერც დახვეწილი გარეგნობით დაიკვეხნის და ვერც სიჩქარით. ოთხკუთხა ფორმებით გამორჩეული სუბკომპაქტური ყვითელი ავტომობილი სულ რაღაც 80 კმ/სთ სიჩქარეს ავითარებს.

ეგ არაფერი, ძინმიაოს ჯერ თავისი ავტომობილით სარგებლობის უფლება არ მიუღია. და თუ ვერც ვერასდროს მიიღებს, მაშინ მას სამუდამოდ მიუჩენს ადგილს საკუთარ ავტოფარეხში.

სხვათა შორის, ”ლამბორგინის” ტრფიალები საკუთარი ხელით ავტომობილებს მარტო ჩინეთში როდი ქმნიან. მაგალითად, ორი წლის წინ, ამერიკელმა კენ იმჰოფმა თავის მეზობლებს ”ლამბორგინის” ლეგენდარული მოდელის, ”კოუნტაჩის” ზუსტი ასლი უჩვენა, რომელსაც ის თურმე 17 წელი ქმნიდა...

”ძაგატომ” კერძო შეკვეთით მორიგი შედევრი დაამზადა

Zagato's One-Off Alfa Romeo TZ3 Corsa

26 აპრილი

ჩრდილოეთ იტალიაში, ტბა კომოს მახლობლად, ტრადიციული კონკურსი ”კონკორსო დ’ელეგანსა ვილა დ’ესტე” ჩატარდა, რომელზეც სადიზაინერო ატელიე ”ძაგატომ” თავისი მორიგი შედევრი - კერძო შეკვეთით დამზადებული ”TZ3 კორსა” წარადგინა. ეს ავტომობილი ”ალფა რომეოს” გერმანელ კოლექციონერ მარტინ კაპის შეკვეთით, ”ალფა რომეოსა” და ”ძაგატოს” თანამშრომლობის დაწყებიდან 90 წლის იუბილესთან დაკავშირებით დამზადდა.

სპორტული ავტომობილის სრული სახელწოდებაა ”ალფა რომეო ძაგატო TZ3 კორსა”. ის ორადგილიანია. ძრავი მის ბაზაშია მოთავსებული, წამყვანი კი უკანა ბორბლებია. მისი გაბარიტებია: სიგრძე 4.345 მეტრი, სიგანე 1.944 მეტრი, სიმაღლე 1.200 მეტრი და ბორბლებს შორის ბაზა - 2.500 მეტრი.

ამ ავტომობილის შასის უმეტესი ნაწილი და ძარა კარბონის კომპოზიტისა და ალუმინისგანაა დამზადებული, რითაც ინჟინრებმა წონის შემცირებას მიაღწიეს - ”TZ3 კორსა” სულ რაღაც 850 კილოგრამს იწონის. ის 18-დუიმიან ბორბლებზე დგას, რომლებიც ”პირელის” წარმოების საბურავებითაა შემოსილი.

”TZ3 კორსას” ბაზაში მოთავსებულია ბენზინის 4.2-ლიტრიანი V8 ძრავი, რომელიც 420 ცხენის ძალას გამოიმუშავებს. მასთან შეწყვილებულია 6-საფეხურიანი სეკვენტალური გადაცემათა კოლოფი. ამ ტანდემის მეშვეობით, ავტომობილს 100 კმ/სთ-მდე აჩქარება 3.5 წამში შეუძლია, მისი მაქსიმალური სიჩქარე კი 300 კმ/სთ-ზე მეტია.

”ფოლკსვაგენმა” ჰანოვერში ელექტრული ტაქსი წარმოადგინა

Volkswagen Presents All-Electric Taxi in Hannover

26 აპრილი

”მილანო ტაქსი” - ასე ჰქვია ელექტრომობილს, რომელიც ”ფოლკსვაგენმა” ჰანოვერის სამრეწველო ბაზრობაზე წარმოადგინა. ეს ავტომობილი კონცეპტუალური Up!-ის ბაზაზეა დამზადებული და ის სერიული მოდელის საცდელ პროტოტიპს წარმოადგენს. გერმანული კომპანიის ხელმძღვანელობის განცხადებით, ამ ავტომობილის წარმოება სამ წელიწადში დაიწყება.

”მილანო ტაქსის” გაბარიტებია: სიგრძე 3.73 მეტრი, სიგანე 1.66 მეტრი და სიმაღლე 1.60 მეტრი. სალონში, ძირიდან ჭერამდე სიმაღლე 0.994 მეტრია, წინა სავარძლის ზურგსა და უკანა სავარძელზე მჯდარი მგზავრის მუხლებს შორის მანძილი კი 0.120 მეტრს შეადგენს.

საინტერესოა, რომ სალონში, წინ მხოლოდ ერთი - მძღოლის სავარძელია. ეს კი, უკანა სავარძელზე მგზავრებისთვის მეტ სივრცეს ათავისუფლებს და დამატებით კომფორტს უზრუნველყოფს. წინა მგზავრის სავარძლის ადგილი, ბარგის დასადებადაც გამოიყენება. უკანა სავარძლებზე მოხვედრის გასაადვილებლად კი, მარჯვენა უკანა კარი ავტომობილის გასწვრივ, წინისკენ იღება.

მძღოლის სავარძლის გვერდზე მოთავსებულია 8-დუიმიანი მონიტორი, რომელზეც მგზავრებს ავტომობილის შესახებ ინფორმაციის მიღება შეუძლიათ. მაგალითად, ამ მონიტორის მეშვეობით შეიზლება იმის გაგება, თუ რამდენი ენერგიაა დარჩენილი აკუმულატორებში, რა მანძილის გავლა შეიძლება ამ ენერგიით. აქვე, სანავიგაციო სისტემის მეშვეობით, შეიძლება იმ გზის მდგომარეობის ნახვა, რომლითაც ავტომობილმა უნდა იმოძრაოს. ამავე მონიტორით ამინდის პროგნოზსაც შეიტყობთ და ავტომობილის კლიმატ კონტროლის სისტემასაც დაარეგულირებთ. აქვეა სპეციალური ტერმინალი, რომელიც მგზავრობის საფასურის საბანკო ბარათით გადახდის საშუალებას იძლევა.

დაბოლოს, ”მილანო ტაქსის” აღჭურვილობის შესახებ. მას მამოძრავებელ ძალას ანიჭებს ელექტროძრავი, რომლის სიმძლავრეც 85 კილოვატს აღწევს. მას ენერგიით ლითიუმ-იონური აკუმულატორების ბლოკი ამარაგებს, რომლებში დაგროვილი ენერგიაც საკმარისია იმისათვის, რომ ტაქსიმ გაუჩერებლად 300 კილომეტრი გაიაროს. აკუმულატორების 80 პროცენტით დამუხტვას ერთი საათი სჭირდება, სრული დამუხტვისთვის კი გაცილებით მეტი დროა (ჯერჯერობით ეს მონაცემი არ ქვეყნდება) საჭირო. ”მილანო ტაქსის” მაქსიმალური სიჩქარე 120 კმ/სთ-ს აღწევს.

ჰიბრიდული ”ფისკერ კარმა” ამერიკულ ტურნეში მიემგზავრება

Fisker Karma’s US tour

26 აპრილი

ამერიკული კომპანია ”ფისკერი” ბაზრისთვის თავის ჰიბრიდულ ოთხკარიან კუპე (ან სპორტულ სედან) ”კარმას” ამზადებს და მისთვის ამერიკის და კანადის ქალაქებსა და შტატებში პრომო ტურნეს აწყობს. ტურნე 10 კვირა გაგრძელდება და ის 26 შტატსა და 42 ქალაქს მოივლის.

პრომო ტურის მთავარი დანიშნულებაა წარმოებისთვის უკვე მომზადებული ჰიბრიდული ავტომობილის პოტენციური მყიდველისთვის გაცნობა. გარდა ამისა, მას იმ ადამიანებს უჩვენებენ, რომლებმაც ”კარმას” შეძენაზე წინასწარი განაცხადი გააკეთეს და დეპოზიტის სახით, 5 000 დოლარიც გადაიხადეს.

”ფისკერის” მიერ გავრცელებული ინფორმაციით, კომპანიას ასეთი 1 600 განაცხადი უკვე მიღებული აქვს. ამ ადამიანებს მალე მიეცემათ კონკრეტული შეკვეთების პროცედურის დაწყების საშუალება. ისინი შეარჩევენ ავტომობილის კომპლექტაციას და იმ მასალებს, რომლებითაც სალონი გაფორმდება.

ჰიბრიდული ტექნოლოგიების განვითარებისა და ბაზარზე ”კარმას” გამოშვებისთვის, ”ფისკერმა” აშშ-ის მთავრობისგან, შეღავათიანი სესხის სახით, 528 მილიონი დოლარი მიიღო. ამ თანხის დიდი ნაწილი სრულიად ახალი ჰიბრიდული მოდელის, შედარებით ხელმისაწვდომი ”ფისკერ ნინას” შემუშავებას და წარმოებისთვის მომზადებას მოხმარდება. ”ფისკერი” წლიურად 100 000 ცალი ”ნინას” წარმოებას გეგმავს. თითოეული ავრომობილის ფასი კი 45 000 დოლარი უნდა იყოს.

რაც შეეხება ”კარმას”, ამერიკაში მისი ღირებულება 80-დან 100 000 დოლარის ფარგლებში იქნება. ეს ავტომობილი ჰიბრიდულ დანადგარ Q-დრაივითაა აღჭურვილი, რომელშიც, შიდაწვის ძრავთან ერთად, ორი ელექტროძრავიც შედის. ელექტროძრავების ჯამური სიმძლავრე 403 ცხენის ძალას აღწევს, 2.0-ლიტრიანი ტურბოძრავისა კი (მას ოთხი ცილინდრი აქვს) – 260 ცხენის ძალას. ამ უკანასკნელის დანიშნულება მხოლოდ ისაა, რომ მასთან დაკავშირებული გენერატორი ამუშაოს, რომელიც ავტომობილის მოძრაობისას, ელექტროძრავების მკვებავ ლითიუმ-იონურ აკუმულატორებს დამუხტავს. აკუმულატორების ტევადობა საკმარისია იმისათვის, რომ ”კარმამ” 80 კილომეტრი გაიაროს, გენერატორის დახმარებით კი მისი სვლის სიშორე 480 კილომეტრამდე იზრდება.

”ფისკერი” თავის შემკვეთებს ”კარმას” პირველ ეგზემპლარებს მერმისს წლის პირველ კვარტალში მიაწვდის.

”ბეემვე” პირველ ელექტრომობილს 2013 წელს გამოუშვებს

BMW to Launch All-Electric Megacity Vehicle in 2013

26 აპრილი

სააგენტო დოუ ჯონსთან საუბრისას, ”ბეემვეს” მთავარმა აღმასრულებელმა ნორბერტ რაიტჰოფერმა განაცხადა, რომ მისი კომპანია თავის პირველ ელექტრომობილს, რომელიც ამჟამად ”მეგასიტის” სახელითაა ცნობილი, 2013 წელს გამოუშვებს. ამასთან, ეს ავტომობილი სრულიად ახალი მარკით გაიყიდება, რომლის სახელსაც ბავარიელები ჯერჯერობით საიდუმლოდ ინახავენ.

რაიტჰოფერი ამბობს, რომ ”მეგასიტი” თავის კლასში სრულიად ახალ სტანდარტებს დაუდებს სათავეს, რომლებიც მისი კონკურენტებისთვის სამაგალითო იქნება. მისი მთავარი თვისება კი სიმსუბუქე გახდება. ელექტრომობილის კონსტრუქციაში მრავლად გამოიყენებენ მსუბუქ მასალებს, როგორიცაა ნახშირბადოვანი კომპოზიტი.

კომპოზიტური დეტალების წარმოებაში, ”ბეემვეს” პარტნიორობას გერმანული კომპანია ”SGL Group კარბონი” გაუწევს. მალე ისინი ერთობლივ საწარმოებს აშს-სა და გერმანიაში ააგებენ.

ბავარიელებს პარტნიორები ეყოლებათ ლითიუმ-იონური აკუმულატორების წარმოებაშიც - ”ბეემვეს” ელექტრომობილებისთვის, აკუმულატორების ბლოკებს ”ბოშთან” და ”სამსუნგთან” ერთად შექმნილი ერთობლივი საწარმო გამოუშვებს.

პარალელურად, ”ბეემვე” სრულიად ახალ ელექტრომობილს თავის ჩინელ პარტნიორთან, ”ბრილიანს ავტომოტივთან” ერთადაც შექმნის და ეს ავტომობილი, უპირველესად ჩინური ბაზრისთვის იქნება განკუთვნილი

ცნობისათვის, ელექტრომობილი ”მეგასიტი” პროექტ ”პროჯექტ i-ს” ფარგლებში მუშავდება. ამ პროექტს დასაბამი შარშან დაედო და ის ახალი ბრენდით, ეკოლოგიურად სუფთა სატრანსპორტო საშუალებათა შემუშავებას და ბაზარზე დამკვიდრებას ითვალისწინებს.

”ნისანი” ელექტრომობილ ”ლიფზე” შეკვეთებს ვერ აუდის

Nissan takes reservations for 6,635 Leafs in 3 days

26 აპრილი

სამ დღეში მას შემდეგ, რაც თავის პირველ ელექტრომობილ ”ლიფზე” შეკვეთების მიღება დაიწყო, ”ნისანის” ჩრდილოამერიკულ შტოს, მასზე ინტერნეტით 6 635 მოთხოვნა შეუვიდა. და ეს მაშინ, როდესაც ეს ავტომობილი ამერიკელ დილერთა შოურუმებში მხოლოდ დეკემბერში გამოჩნდება.
იაპონურმა კომპანიამ თავისი ამერიკული შტოს საიტზე შეკვეთების მიღება 20 აპრილს დაიწყო. მყიდველს საშუალება აქვს, ამ საიტზე განაცხადი შეიტანოს და ის სიმბოლური გადასახადით - 99 დოლარით გაამყაროს. კომპანიის პრესმდივანმა კეტრინ ზახარიმ განაცხადა, რომ სამ დღეში შემკვეთტა რაოდენობამ 6 635-ს მიაღწია. მისივე თქმით, შეკვეთების ინტერნეტით მიღება ოთხი კვირა გაგრძელდება. ”ნისანის” ხელმძღვანელობა იმედოვნებს, რომ სანამ ”ლიფს” დილერები მიიღებენ, მასზე 25 000 შეკვეთის მიღება მოესწრება.
მალე ”ნისანი” ქალაქ სმირნაში (შტატი ტენესი) ახალი ქარხნის მშენებლობას დაიწყებს, რაშიც 1.8 მილიარდი დოლარის ინვესტიციას გაიღებს. ეს თანხა, მშენებლობის გარდა, ქარხნის აღჭურვასაც მოხმარდება. მისი საწარმოო სიმძლავრე კი წლიურად 150 000 ცალი ელექტრომობილი ”ლიფი” და აკუმულატორების 200 000 ბლოკი იქნება.
”ნისან ლიფის” ამერიკული ვერსიის ღირებულება 32 780 დოლარია. მაგრამ ელექტრომობილი 7 500-დოლარიანი საგადასახადო შეღავათით ისარგებლებს, რისი წყალობითაც, მისი ღირებულება 25 280 დოლარამდე შემცირდება. ეს კი თითქმის ჰიბრიდული ”ტოიოტა პრიუსისა” და ”ჰონდა ინსაითის” ფასის ტოლფასია. თუმცა, ამ ფასში ტრანსპორტირების ხარჯები არ შედის.

”ნისანი” თავისი ელექტრომობილების შეძენის მსურველებს ერთ აუცილებელ პირობას უყენებს - ”ლიფის” შეძენა შესაძლებელია მხოლოდ იმ შემთხვევაში, თუ მყიდველს შინ აკუმულატორების დამმუხტავი საშუალება ექნება დამონტაჟებული. კომპანიაში ვარაუდობენ, რომ ყველა შემკვეთი, რომელმაც საიტზე წინასწარი თანხა უკვე შეიტანა, სასურველი ავტომობილის მიღებამდე, სახლში დამმუხტავ მოწყობილობას აუცილებლად დაამონტაჟებს. ”ნისანისვე” ინფორმაციით, თითოეული ასეთი მოწყობილობა, დამონტაჟების ხარჯთან ერთად, 2 200 დოლარი დაჯდება.

გარდა ამისა, ყველა შემკვეთი გაივლის ტესტირებას, რომლის დროსაც, ”ნისანის” სპეციალისტები შეაფასებენ, რამდენად შეესაბამება მყიდველის მართვის მანერა ელექტრომობილის შესაბამის კრიტერიუმებს. არაა გამორიცხული, რომ კომპანიამ ზოგიერთი მყიდველი დაიწუნოს. ამ შემთხვევაში, ასეთ შემკვეთებს, ასევე იმათ, ვისაც სახლში აკუმულატორების დამმუხტავი დამონტაჟებული არ ექნება, წინასწარ გადახდილი თანხა დაუბრუნდებათ.

დაკიდევ, პირველ ხანებში, ”ნისანი” თავის ელექტრომობილს იმ ქალაქებში გაყიდის, სადაც ელექტრომობილების დამუხტვისთვის საჭირო ინფრასტრუქტურა არსებობს. სხვათა შორის, ამერიკის ზოგიერთმა ქალაქმა, რეგიონმა და შტატმა (სან დიეგო, ჰიუსტონი, ფინიწსი-ტუსანის კორიდორი, შტატი ტენესი და შტატი ორეგონი) უკვე დაიწყო შესაბამისი ინფრასტრუქტურის განვითარება.

”ფერარი 599XX-მა” ნურბურგრინგის რეკორდი გააუმჯობესა

Ferrari 599XX

26 აპრილი

ბრიტანულ გამოცემა ”ქარ-ის” ცნობით, ”ფერარი 599XX” გერმანულ ავტოდრომ ნურბურგრინგის ჩრდილოური მარყუჟის ახალი რეკორდსმენი გახდა სერიულ ავტომობილებს შორის. ამ მანქანამ ნორდშლაიფი (ჩრდილოური მარყუჟი) 6 წუთსა და 58.16 წამში გაიარა და თითქმის 13 წამით გააუმჯობესა წინა რეკორდი, რომელიც გერმანულ სუპერ ავტომობილ ”გუმპერტ აპოლოს” ეკუთვნდა.

ამაზე სწრაფად ნორდშლაიფ სარბოლი ავტომობილები გადიან, რომელთა შორისაც, საუკეთესო შედეგი დღეისათვის ბრიტანულ ”რადიკალ SR8-ს” ეკუთვნის, რომელსაც ერთი წრე 6 წუთსა და 48 წამში აქვს გავლილი. მართალია, ”ფერარი 599XX” სპეციალურად, ტრასის დღეებისთვის შექმნილი ავტომობილია და საერთო სარგებლობის გზებისთვის არაა შექმნილი, მაგრამ სარბოლთა კლასს არ განეკუთვნება. ”რადიკალი” კი სარბოლი ავტომობილის ბაზაზეა აგებული.

”ფერარი 599XX” პირველად შარშან, ჟენევის საავტომობილო შიუზე გამოჩნდა. ის კუპე ”599 GTB ფიორანოსგან” აღებული V12 ძრავითაა აღჭურვილი, რომლის სიმძლავრემაც, მოდიფიკაციის შემდეგ, 730 ცხენის ძალას მიაღწია. ძრავის ბრუნთა მაქსიმალური რიცხვი 9 000-ს აღწევს. დინამიკური მახასიათებლების გასაუმჯობესებლად, ”ფერარი 599XX” სისტემა ”ექტივფლოუთია” აღჭურვილი, რომელიც ავტომობილის აეროდინამიკურ მახასიათებლებს, მისი სიჩქარის შესაბამისად ცვლის და ამგვარად, გზასთან ოპტიმალურ ჩაჭიდებას უზრუნველყოფს. მაგალითად, 300 კმ/სთ სიჩქარეზე, აეროდინამიკური დატვირთვა 630 კილოგრამს აღწევს.

”ფერარი” ამ სატრეკო ავტომობილს მხოლოდ 29 ცალს დაამზადებს, თითოეულის ფასი კი 1.3 მილიონი ევრო იქნება.

”ფიატ 500-ის” ბაზაზე მინივენს დაამზადებენ

Fiat 500

26 აპრილი

დღიდან ბაზარზე მისი დაბრუნებისა, ”ფიატ 500” დიდი პოპულარობით სარგებლობს, საავტომობილო მედიამ მას წლის საუკეთესო ავტომობილის წოდებაც არგუნა. ბუნებრივია, ყოველივემ ტურინული კომპანიის მარკეტოლოგები ამ ავტომობილის ბაზაზე სხვა მოდელების წარმოების შესაძლებლობაზეც დააფიქრა.

ინტერნეტ გამოცემა ”ავტომოტივ ნიუსი” იუწყება, რომ თავიდან, ახალი ავტომობილი მხოლოდ ევროპული ბაზრისთვის იქნება განკუთვნილი. შემდეგ კი მას ამერიკაშიც შეიტანენ. ოღონდ, როდის მოხდება ეს, ჯერ დადგენილი არაა. სამაგიეროდ, გამოცემის სამი სხვადასხვა წყარო იუწყება, რომ ”ჩინკვეჩენტოს” ბაზაზე მინივენის წარმოება ”ფიატს” გადაწყვეტილი აქვს.

მინივენი რეალურად, ”ფიატ 500-ის” ოთხკარიანი ვერსია იქნება და მათ დიზაინში მცირე დეტალები განასხვავებს. შემუშავების პროცესში მყოფი ავტომობილის შიდაკორპორატიული კოდური სახელწოდება L0-ია. ის ”ჩინკვეჩენტოს” დაგრძელებულ პლატფორმას დაეფუძნება.

ახალ ავტომობილს კონცერნის ტურინული ქარხანა გამოუშვებს, ამერიკის ბაზრისთვის განკუთვნილ ვერსიას კი ”კრაისლერის” მექსიკურ ქარხანაში დაამზადებენ. სხვათა შორის, ეს ქარხანა ჩვეულებრივი 500-ის წარმოებასაც მალე დაიწყებს.

ამგვარად, მინივენი გახდება მეოთხე მოდელი, რომელსაც ”ფიატი” ამ პოპულარული ავტომობილის ბაზაზე გამოუშვებს. პირველი სამია: ჰეჩბეკი, კაბრიოლეტი და სპორტული ”აბარტი”.

ცოტა ხნის წინ, პრესაში გავრცელდა ინფორმაცია იმის შესახებაც, რომ ”ფიატი” 500-ის ბაზაზე მინი ქროსოვერის წარმოებასაც აპირებს. მაგრამ ჯერჯერობით, ეს ინფორმაცია არ დასტურდება.

აღსანიშნავია, რომ მალე ”კრაისლერი” ამერიკაში, ”ფიატის” მიერ წარმოებული ავტომობილის - სუბკომპაქტური სედანის თავისი ბრენდით გაყიდვას დაიწყებს. ამ ავტომობილს ”ფიატის” სერბული საწარმო გამოუშვებს. ეს ქარხანა ადრე სერბულ კომპანია ”ზასტავას” ეკუთვნოდა და რომლის აქციების 67 პროცენტიც ტურინელებმა შარშან გამოისყიდეს.

”ნისანი” ქალაქის ჯუჯას გამოუშვებს

Nissan Nuvu

26 აპრილი

იაპონური კომპანია ”ნისანი” მალე ბაზარზე ევროპაში პოპულარულ ჯუჯა ”ტოიოტა iQ-ს” კონკურენტს გამოუშვებს. ”ნისანისეული” ჯუჯა კონცეპტუალური ”ნუვუს” ბაზაზე შეიქმნება, რომელიც მან ორი წლის წინ, პარიზის საავრომობილო შოუზე წარადგინა.

ამ კონცეპტუალურ ავტომობილს ერთმოცულობიანი ძარა აქვს, თუმცა უფრო ჰეჩბეკს მოგვაგონებს. ზომით ის თითქმის iQ-ს ტოლია და მასავით, სალონში მხოლოდ სამი სავარძელი აქვს. ამასთან, წინა მგზავრის ადგილი საკმაოდ წინაა წაწეული.

არაა გამორიცხული, რომ ”ნისანის” ჯუჯას სპეციალური იაფფასიანი ვერსიაც ექნება, რომელიც პირველ რიგში, ინდური ბაზრისთვის იქნება განკუთვნილი. ამ ვერსიის ღირებულება 3 000 დოლარის ფარგლებში მოექცევა და ამგვარად, ის კონკურენციას გაუწევს ”ტატა ნანოს”, რომელიც დღეისათვის მსოფლიოს უიაფესი ავტომობილია. თუმცა, ვრცელდება ინფორმაცია, რომ ”ტატა ნანო” მალე გაძვირდება. ამგვარად, ”ნისანის” ჯუჯას სახით, მას მეტად სერიოზული კონკურენტი გამოუჩნდება.

”ნისანის” ჯუჯას ევროპული და ინდური ვერსიების გაყიდვები თითქმის ერთდროულად, 2012 წელს დაიწყება.

Friday, April 23, 2010

”შევროლე ვოლტი” მინივენის ფორმაში

Chevrolet Volt MPV5

23 აპრილი

”ჯენერალ მოტორსს” ჯერ თავისი ფართოდ რეკლამირებული ჰიბრიდული ”შევროლე ვოლტის” წარმოება არ დაუწყია, თუმცა მის პლატფორმაზე ახალი ავტომობილების შემუშავებას უკვე შეუდგა. ამ ახალთაგან პირველი კი არის - ”შევროლე ვოლტ MPV5”, რომელიც ერთდროულად კომპაქტვენიცაა და ქროსოვერიც და რომელიც შარშან, პარიზის საავტომობილო შოუზე ნაჩვენებ ”შევროლე ორლანდოს” ბაზაზეა შექმნილი.
”შევი ვოლტთან” შედარებით, ”ვოლტ MPV5-ზე” მსხვილგაბარიტიანია. მას 15 სანტიმეტრით გრძელი ბაზა აქვს. ამასთან, ”ვოლტზე” 18 სანტიმეტრით გრძელი, ამდენივეთი მაღალი და 7 სანტიმეტრით განიერია. კომპაქტვენ-ქროსოვერის საბარგულის მოცულობა 863 ლიტრია და თუ უკანა სავარძლებსაც დავკეცავთ, ის 1764 ლიტრამდე იზრდება.

”ვოლტ MPV5-ის” ჰიბრიდული დანადგარი თითქმის ისეთივეა, როგორიც ”ვოლტზე”. გაიზარდა მხოლოდ აკუმულატორების ტევადობა და გენერატორის სიმძლავრე. მარტო ელექტროძრავით ამ ავტომობილს 50 კილომეტრის გავლა შეუძლია. როცა აკუმულატორებში დაგროვილი ენერგია ამოიწურება, მაშინ საქმეში ბენზინის 1.4-ლიტრიანი ძრავი ერთვება, რომელიც გენერატორს ამუშავებს, ეს კი აკუმულატორებსაც მუხტავს და ენერგიით ელექტროძრავსაც ამარაგებს. შედეგად, ავტომობილის სვლის სიშორე 482 კილომეტრამდე იზრდება.

კონცეპტუალური ”ორლანდსგან” ”ვოლტ MPV5-ს” წინა ნაწილის სხვანაირი (ვოლტის მსგავსი) დიზაინი და სალონი განასხვავებს, რომელიც ასევე ”ვოლტის” სტილშია შესრულებული.

მაინც, რა სახელით გამოჩნდება ეს ავტომობილი ბაზარზე? გენერლები ამაზე ჯერჯერობით სდუმან. თუმცა, დიდია ალბათობა იმისა, რომ ისინი ”ვოლტის” ბაზაზე ცალკე სუბ-ბრენდს ქმნიან, როგორც ამას ”აუდი” ”e-ტრონთან” დაკავშირებით აკეთებს. თუ ასე მოხდა, მაშინ ”ვოლტ MPV5-ს” ეს სახელი შეუნარჩუნდება. მის შიდაწვისძრავიან ვერსიას კი ”ორლანდოს” სახელით გავიცნობთ.

”სიტროენ მეტროპოლისი” - კონცეპცია ჩინური დიზაინით

Citroen Reveals Chinese Designed Metropolis Concept

22 აპრილი

პეკინის საავტომობილო გამოფენაზე. ფრანგულმა კომპანია ”სიტროენმა” კონცეპტუალური ლიმუზინი ”მეტროპოლისი” წარადგინა, რომელიც ”PSA პეჟო-სიტროენის” საერთაშორისო ჯგუფის მიერ, შანჰაის დიზაინ-სტუდიაშია შექმნილი, რომლისთვისაც ეს პირველი ნამუშევარია.

”სიტროენ მეტროპოლისი” უფრო დიდია, ვიდრე ”მერსედეს-ბენცის” S-კლასის გრძელბაზიანი ვერსია. მისი სიგრძე 5.3 მეტრს აღწევს, სიგანეში კი (2.0 მეტრი) ”მაიბახ 62-ს” უტოლდება. მისი წარმოების დაწყების შემთხვევაში, ”სიტროენი” მისთვის ჯერაც უცხო ბაზარზე შეაბიჯებს.

”მეტროპოლისის” გარეგნობაში, კონცეპტუალურ მოდელ ”სიტროენ ჰიპნოსის” დიზაინთან მსგავსება შეინიშნება. მაგალითად, მათ ერთნაირი აქვთ კომპანიის ლოგო, რომელიც რადიატორის ზედა ნაწილშია მოთავსებული. მათ ასევე ერთნაირი აქვთ წინა ბამპერის კიდეებში განთავსებული ჰაერის ამღებები და უკანა ხედვის სარკეები. კონცეპტუალური ავტომობილი 21-დუიმიან, ორიგინალური დიზაინის მქონე ბორბლებზე დგას, რომლებიც 265/35 ზომის საბურავებითაა შემოსილი.

”მეტროპოლისი” აგებულია იმ პლატფორმის მოდიფიცირებულ ვერსიაზე, რომელსაც ”PSA პეჟო-სიტროენი” ორ მოდელზე - ”პეჟო 407-სა” და ”სიტროენ C6-ზე” იყენებს. ავტომობილი ჰიბრიდული ძალური დანადგარით და სრულამძრავიანი ტრანსმისიითაა აღჭურვილი, რომელშიც შედის გადაბმის ორდისკოიანი ქურო და 7-საფეხურიანი რობოტიზებული კოლოფი.

ჰიბრიდული დანადგარის ჯამური სიმძლავრე 460 ცხენის ძალაა, მაქსიმალური მაბრუნი მომენტი კი - 429 ნიუტონმეტრი. ჰიბრიდის მთავარი ნაწილია ბენზინის 2.0-ლიტრიანი V6 ძრავი, რომელთანაც შეწყვილებულია ელექტროძრავი. ამ უკანასკნელის ნომინალური სიმძლავრე 55 ცხენის ძალაა, თუმცა მცირე ხნით, მაქსიმუმმა შეიძლება 95 ცხენის ძალასაც კი მიაღწიოს.

კომპანიის განცხადებით, ”მეტროპოლისის” ჰიბრიდული დანადგარის მონაცემები, ბენზინზე მომუშავე 4.0-ლიტრიანი V8 ძრავისას შეესაბამება. სამაგიეროდ, ყოველი კილომეტრის გავლისას, ის ატმოსფეროს მხოლოდ 70 გრამი ნახშირორჟანგით აბინძურებს.

რა თქმა უნდა, ფრანგული კომპანია ჯერჯერობით არაფერს ამბობს იმაზე, აპირებს თუ არა ”მეტროპოლისის” ბაზაზე სერიული ავტომობილის შექმნას და წარმოებას. ინგლისური ჟურნალი ”ავტოქარი” კი აზუსტებს, რომ მისი წარმოების შემთხვევაში, ”მეტროპოლისი” ”ორმაგი შევრონის” სამოდელო გამაში ჯერ არარსებულ, უმაღლეს ნიშას დაიკავებს.

ცნობისათვის, დღეისათვის ”სიტროენისთვის” ჩინეთი მსოფლიოში მეორე უდიდესი ბაზარია. ამიტომ, გასაკვირი არ უნდა იყოს, რომ ასეთი მნიშვნელოვანი სიახლე პირველად სწორედ ჩინურ გამოფენაზე წარსდგა.

Thursday, April 22, 2010

გინესის რეკორდსმენი ”დაიჰაცუ”

Daihatsu Mira EV

22 აპრილი

ელექტრომობილმა ”მირა EV-მ”, რომელიც ელექტრომობილების იაპონური კლუბის (JEVC - ჯაპან ელექტრო ვიჰაიქლ კლაბ) წევრებმა ”დაიჰაცუ მირას” ბაზაზე დაამზადეს, სვლის სიშორის მსოფლიო რეკორდი დაამყარა. მიღწევა ასევე ოფიციალურად დააფიქსირა გინესის რეკორდების წიგნმა.

ავტომობილმა, რომელიც კომპანია ”სანიოს” წარმოების აკუმულატორებითაა აღჭურვილი, სვლის სიშორის რეკორდი ჯერ კიდევ ნოემბერში დაამყარა, როდესაც აკუმულატორების ერთი დამუხტვით, 555.6 კილომეტრი გაიარა. მაგრამ მაშინ მიღწევა ოფიციალურად არ დაფიქსირებულა, რადგან გარბენს დამკვირვებლები არ დასწრებიან.

”მირა EV” მოძრაობაში 14-კილოვატიან ელექტროძრავს მოჰყავს, რომელიც ენერგიას ”სანიოს” წარმოების 8 320 ცალი ლითიუმ-იონური აკუმულატორისგან ღებულობს. ისინი ავტომობილის ძირზეა განლაგებული. სვლის სიშორის გასაზრდელად, ავტომობილი მაქსიმალურად შეამსუბუქეს და ”ტოიოტას” წარმოების საბურავებით აღჭურვეს, რომელსაც რხევისადმი შემცირებული წინააღმდეგობა აქვს. ავტომობილის შესამსუბუქებლად, მისი უკანა შუშა პლექსიგლასით შეცვალეს და სალონიდან უკანა სავარძლები ამოიღეს.

აღსანიშნავია, რომ ელექტრომობილებისთვის პირველი მსოფლიო რეკორდი ჯერ კიდევ 1899 წელს დაფიქსირდა, როდესაც ელექტროძრავით აღჭურვილმა მანქანამ 106 კმ/სთ სიჩქარე განავითარა. 100 წლის შემდეგ მორიგი რეკორდი დამყარდა - ამერიკულმა ”უაით ლაითნინგმა” 394 კმ/სთ სიჩქარე აკრიფა. 2007 წელს კი, ჩვეულებრივი ელემენტებით აღჭურვილი ავტომობილის სიჩქარემ 120 კმ/სთ-ს მიაღწია.

”ფორდ სტარტი” – ”ფიატ 500-ს” ახალი მეტოქე გამოუჩნდა

Ford Start Concept

22 აპრილი

პეკინის საერთაშორისო საავტომობილო შოუზე, ”ფორდმა” კონცეპტუალური ავტომობილი ”სტარტი” წარმოადგინა. როგორც კომპანიის რელიზში სწერია, ეს ავტომობილი სპეციალურად შეიქმნა იმისათვის, რომ მასთან ერთად, ”ფორდს” ტავისი ახალი ძრავი, სერია ”ეკობუსტის” 1.0-ლიტრიანი სამცილინდრიანი ძრავი წარმოედგინა.
აღსანიშნავია, რომ ბოლო სამ წელიწადში, ეს ”ფორდის” მიერ შექმნილი პირველი კონცეპტუალური მოდელია. ამასთან, ამერიკულმა კომპანიამ თავისი კონცეპტუალური ნამუშევარი ჩინეთში პირველად გამოფინა. როგორც დირბორნელთა მთავარი დიზაინერი ჯეი მეისი ამბობს, ამ კონცეპციაზე მუშაობისას, ”ფორდის” სტრატეგიული კონცეპციების სტუდიის (რომელიც შტატ კალიფორნიის ქალაქ ირვინში მდებარეობს) სპეციალისტების მიზანი არ ყოფილა აეროდინამიკურად დახვეწილი ავტომობილის შექმნა. ”სტარტის” მთავარი დანიშნულება, თავისი გარეგნობით შოუს დამთვალიერებელთა ყურადღების მიქცევაა. სტენდთან მისული დამთვალიერებელი კი ამ კონცეპციის მთავარი დეტალის - 1.0-ლიტრიანი ძრავის შესახებ ინფორმაციასაც გაეცნობა.
ამ აგრეგატის ტექნიკური მონაცემები ჯერ არ ქვეყნდება. სამაგიეროდ ცნობილია, რომ 6-საფეხურიანი მექანიკური კოლოფი შეუწყვილდება. აგრეგატი წარმოებისთვის თითქმის მზადაა. ამასთან, მას ისეთივე მონაცემები უნდა ჰქონდეს, როგორიც 1.6-ლიტრიან ოთხცილინდრიან აგრეგატებს აქვს. ინტერნეტში გავრცელებული ინფორმაციით, ახალი აგრეგატის სიმძლავრე 89-108 ცხენის ძალა იქნება. რაც მთავარია, მის მიერ გამობოლქვილ აირში, ნახშირორჟანგის შემცველობა კილომეტრზე 100 გრამიც არ იქნება.

კონცეპტუალური ავტომობილი ფოლადისა და ალუმინისგან შეკრულ შასიზეა აგებული. ”სტარტის” ძარა გადამუშავებადი კომპოზიტისგანაა დამზადებული, რომელიც ფორმირების წინ იღებება. ამ მასალების გამოყენებით, ”ფორდის” ინჟინრებმა ავტომობილის წონის შემცირებას მიაღწიეს, რაც საბოლოო ჯამში, მის ეკონომიურობასა და ეკოლოგიურობაზე დადებითად აისახება.

”ფორდი” აცხადებს, რომ ”სტარტის” წარმოება არ იგეგმება. თუმცა, პრესაში უკვე გაჩნდა ვარაუდები, რომ ”სტარტის” სახით, ”ფორდმა” თავის პოპულარულ საქალაქო მოდელ ”კა-ს” ახალი ვერსია გვიჩვენა. სავარაუდოდ, თუ ბაზარზე გამოსვლა ეღირსა, ის კონკურენციას ”ფიატ 500-ს” გაუწევს.

”ბენტლიმ” ჩინელებისთვის სპეციალური მოდელები შექმნა

Two Bentley Continental Exclusively for China

22 აპრილი

ბრიტანულმა კომპანია ”ბენტლიმ”, ჩინური ბაზრისთვის სპეციალურად მოამზადა თავისი ორი მოდელის - ”კონტინენტალ GT-ს” და ”კონტინენტალ ფლაინგ სპურ სპიდის” მოდიფიკაციები, რომლებიც მხოლოდ ჩინურ ბაზარზე გაიყიდება. ორივე ავტომობილის პრემიერა ”ბენტლიმ” პეკინის საერთაშორისო საავტომობილო გამოფენას დაამთხვია.
კომპანიის მიერ გამოფენისთვის მომზადებულ რელიზში წერია, რომ ჩინეთის ბაზარი ”ბენტლისთვის” მესამე უმსხვილესია - შარშან იქ ამ კომპანიამ 421 ავტომობილის რეალიზება შეძლო. სწორედ ამის გამო გადაწყდა, რომ კომპანიის ორი ყველაზე პოპულარული ავტომობილის მოდიფიცირება ჩინური ბაზრის მოთხოვნების შესაბამისად ჩატარებულიყო.

ორივე ავტომობილი უმნიშვნელოდაა შეცვლილი და თანაც, ორივე შემთხვევაში, ცვლილება მხოლოდ კოსმეტიკურია. ამასთან, ორივე ავტომობილი ისევ იმ აგრეგატებითაა აღჭურვილი, რომლებითაც მათი საბაზო ვერსიები. ძრავი 6.0-ლიტრიანია, V12 კონფიგურაციით. ”კონტინენტალ GT-ს” შემთხვევაში, მისი სიმძლავრე 560 ცხენის ძალაა, ”კონტინენტალ ფლაინგ სპურ სპიდის” შემთხვევაში კი - 610 ცხენის ძალა. ორივე ავტომობილზე, ძრავთან 6-საფეხურიანი ავტომატური კოლოფია შეწყვილებული.

რაც შეეხება გარეგნულ ცვლილებებს, ”კონტინენტალ GT-ს” სახელწოდებაში დაემატება ”დიზაინ სერის ჩაინა”. ამ ავტომობილის სალონი ორი ფერის ტყავით და შავი, ”როიალ” ფერის ლაკით შეღებილი ხის დეტალებითაა გაწყობილი. სალონში, ცენტრალურ კონსოლზე, წინა ფრთებსა და ზღურბლებზე გამოჩნდება წარწერა ”დიზაინ სერის ჩაინა”.

უფრო მეტი ცვლილებაა ”კონტინენტალ ფლაინგ სპურ სპიდის” შემთხვევაში. ზემოთ ჩამოთვლილი სიახლეების გარდა, ეს ავტომობილი ასევე მიიღებს უფრო კომფორტულ საკიდარს და 20-დუიმიან ბორბლებს. შეცვლილია გამოსაბოლქვი სისტემა, რისი მიზანიც, ავტომობილის ხმაურის შემცირება იყო.

”ფიატი” რეორგანიზაციას იწყებს

Fiat Separates its Auto Operations from Truck and Tractor Divisions

22 აპრილი

მარცხნიდან: მარკიონე, დი მონტეძემოლო და ელკანი

.................................................................

”ფიატ S.p.A.-ს” მთავარმა აღმასრულებელმა სერჯო მარკიონემ გამოაქვეყნა იტალიური კომპანიის ხუთწლიანი სამოქმედო ფეფმა, რომლის მიხედვითაც, მისი საავტომობილო შტო სატვირთო ავტომობილებისა (ივეკო) და ტრაქტორების მწარმოებელ (ქეის ნიუ ჰოლანდი) შტოებს დაშორდება. ამ ორის საფუძველზე კი სრულიად ახალი კომპანია, სახელად ”ფიატ ინდასტრიალ S.p.A.”.

მარკიონემ ასევე გამოაცხადა, რომ ავტომობილების მწარმოებელი ბრენდები, როგორებიცაა ”ფიატი”, ”ალფა რომეო”, ”ლანჩა”, ”ფერარი” და ”მაზერატი”, ჰოლდინგ ”ფიატ S.p.A.-ს” შემადგენლობაში დარჩებიან. ამავე ჰოლდინგში დარჩება ძრავებისა და ტრანსმისიების მწარმოებელი შტო ”ფიატ პაუერტრაინ ტექნოლოჯიზი”.

მარკიონე დასძენს, რომ ზემოთ აღნიშნული კომპანიების დაშორების პროცესი ამ წლის ბოლომდე დასრულდება. მისი აზრით, ჰოლდინგში საავტომობილო ჯგუფის დატოვება ხელს შეუწყობს ”ფიატის” და ”კრაისლერის” ჯგუფის სწრაფ და მყარ ინტეგრაციას. პარალელურად, ტურინელები ამერიკულ კომპანიაში თავის წილს, მალე 20-დან 35 პროცენტამდე გაზრდიან.

”ფიატის” ხუთწლიანი გეგმის ძირითადი გეგმა ითვალისწინებს, რომ ”ფიატის” ჯგუფში შემავალმა საავტომობილო კომპანიებმა და ”კრაიელსრის” კომპანიებმა (კრაისლერი, დოჯი, ჯიპი) ერთად განახორციელონ შესყიდვები, საინჟინრო სამუშაოები, ერთმანეთს მაკომპლექტებლები გაუზიარონ და განვითარების ერთობლივი გეგმები დასახონ.

”ჩვენი გეგმა ითვალისწინებს, რომ 2010-დან 2014 წლამდე პერიოდში, ჩვენი კომპანია, ”კრაისლერთან” ერთად, რეალურად გახდეს გლობალური ბაზრის მოთამაშე. ”კრაისლერის” გარეშე, ”ფიატი” მთელი არსებობის განმავლობაში, დიდი ბაზრიდან გარიყული კომპანიის როლში ყოფნისთვის იქნებოდა განწირული”, - ”ფაინენშლ ტაიმსთან” საუბრისას განაცხადა მარკიონემ.

ორი კომპანიის შეფი დასძენს, რომ ”ფიატი” და ”კრაისლერი” ერთმანეთს ზოგიერთ მოდელს გაუცვლიან, შემდგომში კი, ახალ მოდელებს ერთობლივად შეიმუშავებენ. იტალიური კომპანია, ამერიკელი პარტნიორისგან უგზოობის მოდელებისა და მინივენების წარმოების გამოცდილებას გაიზიარებს, თავად კი მას კი მინი, სუბკომპაქტურ და კომპაქტურ პლატფორმებს შესთავაზებს. ამგვარად, ორივე კომპანიას, მათთვის ახალ სეგმენტებში შეღწევის რეალური საშუალება მიეცემა.

ამგვარი პარტნიორობა ყველაზე ინტენსიურად ”ლანჩასა” და ”კრაისლერს” შორის განხორციელდება. კერძოდ, იტალიური მარკის მართვას ”კრაისლერი” განახორციელებს. უფრო მეტიც, ”ლანჩას” უკლებლივ ყველა მოდელის შემუშავებაში, ”კრაისლერის” სპეციალისტები მიიღებენ მონაწილეობას და მათ ამერიკული კომპანია თავისი მარკითაც გამოუშვებს.

იმავდროულად, გამოცხადდა, რომ ”ფიატის” ჯგუფის აღმასრულებლის პოსტს დატოვებს ლუკა კორდერო დი მონტეძემოლო, ვინც ტურინული კონცერნის დირექტორთა საბჭოში დარჩება და პარალელურად, ”ფერარის” აღმასრულებელიც იქნება.

”ლუკა კორდერო დი მონტეძემოლომ ეს გადაწყვეტილება თავად მიიღო და ის იმ გარემოებით ახსნა, რომ შესრულებულია ყველა ის მიზანი, რომლებსაც მას აკისრებდნენ, როდესაც ამ თანამდებობაზე 2004 წელს დანიშნეს”, - ნათქვამია ”ფიატის” მიერ გამოქვეყნებულ რელიზში. ამ განცხადების გამოქვეყნებამდე, ინტერნეტით გავრცელდა ცნობები იმის შესახებ, რომ თითქოს, მონტეძემოლო არ ეთანხმება იმ ხუთწლიან გეგმას, რომელიც მარკიონემ შეიმუშავა და სწორედ ამის გამო გადაწყვიტა თანამდებობის დატოვება. სხვა ვერსიით, ის პოლიტიკაში წასვლას აპირებს.

მონტეძემოლოს ადგილს დაიკავებს ”ფიატის” ვიცე აღმასრულებელი ჯონ ელკანი, ვინც ტურინული კონცერნის ყოფილი აღმასრულებლის, ჯოვანი ანიელის შვილიშვილია. სიკვდიამდე ცოტა ხნით ადრე, ანიელის ნათქვამი აქვს, რომ ჯონი მომავალში ”ფიატის” აღმასრულებელი უნდა გახდეს. სხვათა შორის, ელკანი ანიელის ოჯახის მფლობელობაში არსებულ კომპანია ”ექსორ S.p.A.-ს” აღმასრულებელია, კომპანიისა, რომელიც ”ფიატის” აქციების 30 პროცენტს აკონტროლებს და მისი უმსხვილესი აქციონერია. თავის დროზე, სწორედ ელკანის დამსახურება იყო ის, რომ ადვოკატი მარკიონე ”ფიატის” მთავარი აღმასრულებელი გახდა.