Wednesday, March 31, 2010

ყველაზე მძლავრი ”ფოკუსი”

Ford Focus RS500

31 მარტი

”ფორდმა” თავისი პოპულარული ჰეჩბეკის, ”ფოკუსის” უმძლავრესი ვერსია - RS500-ის მონაცემები და ფოტოები გაავრცელა. ოღონდ, სანამ ეს მოხდებოდა, ამ ავტომობილის შესახებ ინფორმაციამ ინტერნეტში გაჟონა. სწორედ ამის შემდეგ გადაწყვიტა ამერიკულმა კომპანიამ მედიისთვის ამ ავტომობილის წარდგენა.

ავტომობილი აღჭურვილია 5-ცილინდრიანი 2.5-ლიტრიანი ძრავით, რომელიც ტურბოკომპრესორის მეშვეობით, 345 ცხენის ძალას და 460 ნიუტონმეტრს იძლევა. ამ ამ აგრეგატის წყალობით, ავტომობილის მაქსიმალური სიჩქარე 265 კმ/სთ-ს აღწევს, ადგილიდან 100 კმ/სთ სიჩქარის აკრეფა კი მას 5.6 წამში შეუძლია.

ძრავის სიმძლავრის გაზრდა შესაძლებელი გახდა შეშვების და გამომშვები სისტემების მოდერნიზაციით. გარდა ამისა, გაიზარდა ტურბინის საშუალედო გამაგრილებლის სიმძლავრე და შეიცვალა ძრავის მართვის ელექტრონული სისტემის პროგრამა. სამაგიეროდ, არ შეცვლილა ჩაბერვის წნევა.

”ფორდის” ხელმძღვანელთა განცხადებით, ავტომობილმა ტესტები გერმანულ ავტოდრომ ნურბურგრინგის ჩრდილოეთ მარყუჟზე გაიარა. ტესტების პროცესში, 20-კილომეტრიანი ტრასა დაახლოებით 8 წუთში გაიარა, რაც ამ ტიპის ავტომობილისთვის კარგი შედეგია. გარდა ამისა, ერთ-ერთი სატესტო სესიის დროს, მან შეუჩერებლად 500 წრის გავლა შეძლო.

”ფოკუს RS500” მხოლოდ შავი მქრქალი ფერით შეიღებება და ის 19-დუიმიან ბორბლებზე დგას, რომელზეც 235/35 R19 ზომის საბურავებია ჩაცმული, რომლებიც კარგად ახერხებენ მძლავრი ძრავის მიერ გამომუშავებული ჭარბი ცხენის ძალების მოთვინიერებას.

ამერიკული კომპანია აცხადებს, რომ სულ 500 ცალი ”ფოკუს RS500-ის” დამზადებას აპირებს. ამ ავტომობილის შეძენა მხოლოდ ევროპის 20 ქვეყანაში იქნება შესაძლებელი. ამასთან, ყველა მათგანს თავისი ინდივიდუალური ნომერი ექნება. ჯერჯერობით, უცნობია მისი ფასი. ”ფორდი” უმძლავრესი ”ფოკუსის” პრეზენტაციას 9 აპრილს, ლაიპციგის მოტორ შოუზე ჩაატარებს.

Monday, March 29, 2010

”ჰოგარი” - პიკაპი პეჟოსგან

Peugeot Hoggar Unveiled

29 მარტი

ფრანგულმა საავტომობილო კომპანია ”პეჟომ”, სამხრეთ ამერიკის ბაზრისთვის დაამზადა პიკაპი სახელწოდებით ”ჰოგარ”, რომელიც ”ლომების” ძველი მოდელის, ”პეჟო 206-ის” ბაზაზეა დამზადებული და არა 207-ისა, რომელიც ევროპაში იყიდება.

”ჰოგარი” არის მოდელ 206-ის ბაზაზე შექმნილი მეხუთე ავტომობილი, რომელსაც ფრანგული კომპანია სამხრეთ ამერიკაში ჰყიდის. წინა ოთხია სედანი, ჰეჩბეკი, უნივერსალი SW და ამ უკანასკნელის ვერსია ”SW ესკაპადი”.

”პეჟოს” სამხრეთ ამერიკული დივიზიონის მიერ გამოქვეყნებულ რელიზში წერია, რომ ”ჰოგარის” საბარგულის მოცულობა 1151 ლიტრია, მისი ტვირთამწეობა კი 742 კილოგრამს აღწევს. კომპანიის მარკეტოლოგთა ვარაუდით, ამ მონაცემების წყალობით, ”ჰოგარი” სამხრეთ ამერიკის ბაზარზე მალე პოპულარული გახდება.

ცნობისათვის, სახელი ”ჰოგარი” ავტომობილმა ამავე სახელწოდების მქონე უგზოობის ექსტრემალური კონცეპტუალური მოდელისგან მიიღო. თვითონ სიტყვა ჰოგარი კი თურმე თავის თავში სამ რამეს - გამძლეობას, ძალას და მოქმედებას აერთიანებს, ყველა იმ თვისებას, რომლებიც პიკაპის კლასის ავტომობილებისთვისაა დამახასიათებელი.

”ჩვენი პიკაპი არის მაცდუნებელი, დინამიური და ბრგე ავტომობილი, რომელმაც მეტწილად მამაკაცი მყიდველი, თავისი მრავალფეროვანი და განსხვავებული, ასევე განსაკუთრებული სტილით უნდა მიიზიდოს. ამ ავტომობილით, ”პეჟოს” პიკაპების კლასში ცდუნებისა და ემოციის ელემენტი შემოაქვს”, - ნათქვამია ”პეჟოს” მიერ გამოქვეყნებულ პრეს რელიზში.

”პეჟო” თავის პიკაპს ქალაქ რიო დე ჟანეირუს (ბრაზილია) პორტუ რეალის ქარხანაში გამოუშვებს. ფრანგული კომპანია იმედოვნებს, რომ ამ ავტომობილის დახმარებით, ბრაზილიის სწრაფად მზარდ ბაზარზე, პიკაპების სეგმენტში 10-პროცენტიან ულუფას მოიპოვებს. ბრაზილიაში ”ჰოგარის” ოფიციალური პრეზენტაცია 15 მაისს ჩატარდება. პრეზენტაციაზე წარმოდგენილი იქნება ავტომობილები, რომლებიც თხევად გაზზე მუშაობს. ავტომობილის შესახებ დაწვრილებითი ინფორმაციაც პრეზენტაციაზევე გამოცხადდება.

ჩინური ”ჯილი” ”ფორდისგან” ”ვოლვოს” შეიძენს

Geely agrees to buy Volvo from Ford for $1.8 billion

29 მარტი

ლი შუფუ (მარცხნივ) და ლუის ბუტი (მარჯვნივ) ხელმოწერის ცერემონიის შემდეგ

..........................................

უდიდესმა ჩინურმა კერძო საავტომობილო კომპანია ”ჯეძიან ჯილიმ” და ”ფორდ მოტორმა” ხელშეკრულება გააფორმეს, რომლის ძალითაც, ”ჯილი” შვედურ კომპანია ”ვოლვოს” შეიძენს და ამის სანაცვლოდ, ამერიკულ კომპანიას 1.8 მილიარდ ევროს გადაუხდის. ეს უდიდესი გარიგებაა, როგორიც კი ოდესმე ჩინურ კომპანიებს უცხოური კომპანიის შესაძენად გაუფორმებიათ.

ამგვარად, ჩინეთმა რეალურად გადადგა ის ნაბიჯი, რომლითაც ის მსოფლიო ავტო ინდუსტრიის მოთამაშე ხდება. ამ გარიგებით კი დასრულდა ორწლიანი პერიოდი, რომლის განმავლობაშიც, ”ჯილი” და ”ფორდი” შვედური კომპანიის თაობაზე, მოლაპარაკებებს აწარმოებდნენ.

კონტრაქტს ხელი ლი შუფუმ (მარცხნივ, მჯდომარე) და ლუის ბუტმა (მარჯვნივ, მჯდომარე) მოაწერეს

.........................................

”ფორდმა” კი დაასრულა ოდესღაც მის პრემიერ ჯგუფში შემავალი კომპანიების გაყიდვა. შეგახსენებთ, რომ ამ ჯგუფში, ”ვოლვოს” გარდა, ინგლისური კომპანიები - ”ასტონ მარტინი”, ”იაგუარი” და ”ლენდ როვერი” შედიოდა. მათგან პირველი კუვეიტურ-ამერიკულ-ბრიტანულმა საინვესტიციო ჯგუფმა შეიძინა, დანარჩენი ორი კი - ინდურმა ავტოკომპანია ”ტატა მოტორმა”.

”დღევანდელი დღე განსაკუთრებულია ”ჯილის” ისტორიაში”, - რეპორტიორებთან საუბრისას განაცხადა ”ჯილის” დირექტორთა საბჭოს თავმჯდომარე ლი შუფუმ და დასძინა, რომ ”ვოლვო ქარზი” დამოუკიდებელ კომპანიად დარჩება და მას უცვლელად შეუნარჩუნდება მმართველი საბჭო, რომლის შტაბ-ბინა ისევ შვედეთში დარჩება.

არადა, ჯერ კიდევ ორი წლის წინ, როდესაც ორ კომპანიას შორის მოლაპარაკებები დაიწყო, ”ჯილი” ძალიან პატარა კომპანია იყო. მისი წარმოება ”ვოლვოს” წლიური წარმოების მხოლოდ 16 პროცენტს შეადგენდა, შტატით კი ”ვოლვოს” თანამშრომელთა რაოდენობის ნახევარს არ აღემატებოდა.

”ჯილის” შტაბ-ბინა ჰანჯოუში

............................................................

წელს ეს მეორე დიდი გარიგებაა, რომელიც საავტომობილო სამყაროში დაიდო. წლის დასაწყისში, ჰოლანდიურმა ”სპაიკერმა” ”ჯენერალ მოტორსისგან” შვედური საავტომობილო კომპანია ”სააბი” გამოისყიდა. თანაც, იმ შემთხვევაშიც, მყიდველი კომპანია ნაყიდზე მცირე ზომისაა.

ჩინური კომპანიის განცხადებით, მან შეძლო იმ ფინანსური სახსრების მოზიდვა, რომლითაც ”ვოლვოს” გამოსყიდვას და ამ კომპანიის განვითარებისთვის საჭირო სამუშაოების ჩატარებას, კერძოდ, საწარმოო პროგრამის გაფართოებას და განახლებას შეძლებს. ამასთან, ”ჯილი” ელის, რომ დამატებით სახსრებს ევროპის საინვესტიციო ბანკისგანაც მიიზიდავს.

გარიგება, რომლის საფუძველზეც, ”ჯილის” მეტწილად ნაღდი ფულის გადახდა მოუწევს, ითვალისწინებს, რომ ჩინური კომპანიის ხელში, ”ვოლვოს” უძრავი ქონების გარდა, მისი ინტელექტუალური საკუთრებაც გადავა. გარდა ამისა, ”ფორდი” და ”ვოლვო” თანამშრომლობასაც გააგრძელებენ, რაც ამ ორი კომპანიის საერთო მომარაგებას, კვლევებსა და განვითარებას, ასევე საერთო ტექნოლოგიების შემუშავებას ითვალისწინებს.

კითხვაზე, დარჩება თუ არა ”ვოლვოს” ძირითადი საწარმოები ევროპაში, ლი შიფუმ უპასუხა, რომ მნიშვნელოვანია, შვედური კომპანიის ქარხნები იმ არეში მდებარეობდეს, სადაც მაკომპლექტებლებით მისი მომმარაგებელი საწარმოების დიდი ნაწილია განლაგებული. ასეთი არე კი ძველი კონტინენტია. ყოველ შემთხვევაში, ახლო მომავალში ასეც იქნება. ცნობისათვის, ამჟამად ”ვოლვოს” ორი ძირითადი ამწყობი საწარმო გააჩნია, რომლებიც გიოტენბურგში (შვედეთი) და ბელგიაში მდებარეობს.

სხვათა შორის, ”ფორდის” და ”ჯილის” გარიგებას თავიდან დიდ წინააღმდეგობას უწევდა ”ვოლვოს” პროფკავშირული გაერთიანება, მაგრამ ხანგრძლივ მოლაპარაკებათა შედეგად, ეს წინააღმდეგობა გადალახულ იქნა და დღეს პროფკავშირი თანახმაა, რომ შვედური კომპანია ჩინური ჰოლდინგის წევრი გახდეს.

გარიგება ოფიციალურადაა გაფორმებული, ”ვოლვოს” შესყიდვის პროცესს ”ჯილი” წლის მესამე მეოთხედში დაასრულებს. ”ფორდი” კი მთლიანად თავისი ძირითადი ბრენდების (ფორდი, მერკური, ლინკოლნი) განვითარებაზე იზრუნებს.

ცნობისათვის, ”ფორდმა” ”ვოლვო” 1999 წელს შეიძინა და მასში 6.5 მილიარდი დოლარი გადაიხადა. შარშანწინ, ამერიკულმა კომპანიამ გამოაცხადა, რომ თავისი შვედური შტოს გაყიდვას აპირებს. კონკურსში მაშინვე ჩაება ”ჯილი”, რომელმაც შერჩევის პროცესი წარმატებით გაიარა, თუმცა ”ფორდთან” მთავარი მოლაპარაკება მაინც ძალიან გაუჭიანურდა, რისი მთავარი მიზეზიც ის იყო, რომ ეკონომიკური კრიზისის პერიოდში, ”ჯილის” გარიგების ფინანსური მხარდამჭერების მოძებნა დაუგვიანდა. მართალია, ”ფორდს” ”ვოლვოს” გაყიდვა თითქმის სამნახევარჯერ იაფად უწევს, ვიდრე მისი შეძენა დაუჯდა, მაგრამ ამერიკული კომპანიის მთავარი ფინანსური მოხელე ლუის ბუტი აცხადებს, რომ მხარეებს შორის მიღწეული გარიგების ფინანსური მხარე ”სრულიად სამართლიანია”.

შარშან ჩინეთში 13.6 მილიონი ავტომობილი გაიყიდა და ამ მაჩვენებლით, მზისქვეშეთის ქვეყანამ, მსოფლიოს უდიდესი საავტომობილო ბაზრის სტატუსი ამერიკას ჩამოართვა. მართალია, ჩინური ავტომწსრმოებლებიც სწრაფი ტემპით ვითარდებიან, მაგრამ მათ ჯერ არ გააჩნიათ ის ტექნოლოგიები, რომლებიც განვითარებული ქვეყნების ბაზრებზე შეღწევის საშუალებას მისცემს. ”ჯილის” მიერ ”ვოლვოს” შეძენა კი ამ ნაკლის გამოსწორების მეორე სერიოზული ნაბიჯია. პირველად კი შეიძლება ჩაითვალოს ”შანჰაი ავტომოტივის” მიერ ბრიტანული ”როვერის” შეძენა. თუმცა, ფინანსური მოცულობის მხრივ, ის ნაკლებად მასშტაბური გამოსყიდვა იყო.

გარდა იმისა, რომ ”ვოლვოს” ქარხნებს ევროპაში დატოვებს, ”ჯილი” ასევე გეგმავს ”ვოლვოს” ახალი ქარხნის ჩინეთში აშენებას, სადაც წლიურად 300 000 ავტომობილის წარმოება იქნება შესაძლებელი. ანუ, ამ ქარხნის ამუშავების შემდეგ, შვედური მარკით ჩინეთში იმდენივე ავტომობილის წარმოება იქნება შესაძლებელი, რამდენსაც ”ვოლვო” დღეს ევროპაში აწარმოებს.

სხვათა შორის, ”ვოლვოს” შეძენაში ”ჯილის” ჩინეთის მთავრობა ეხმარება, რომელმაც ცოტა ხნის წინ, უარი განაცხადა, ფინანსურად უზრუნველეყო ჩინური მანქანათმშენებელი კომპანია ”ტენჯონის” მიერ ”ჯენერალ მოტორსისგან” მარკა ”ჰამერის” გამოსყიდვაზე.

ლი შიფუ აცხადებს, რომ მალე, ჩინური ბაზარი ”ვოლვოსთვის” მეორე საშინაო ბაზარი გახდება. ამასთან, შვედური კომპანია გახდება ლიდერი იმ პრემიუმ სეგმენტის ავტომობილების მწარმოებელთა შორის, რომლებიც თავიანთ ავტომობილებს ჩინეთში ჰყიდიან. ეს კი ”ვოლვოს” საუკეთესო მომავალს უქადის.

პარალელურად, ჩინეთის მთავრობა არ მალავს, რომ სურს, სამთავრობო აპარატების თანამშრომლების მომსახურე ავტომობილებს ადგილობრივი კომპანიები აწარმოებდნენ. ეს სურვილი კი, რომელიც ალბათ მალე განხორციელდება, ”ვოლვოს” გასაღების დიდ ბაზარს ჰპირდება. ცნობისათვის, დღეისათვის, ჩინეთის სამთავრობო სტრუქტურების მაღალმოხელეები ძირითადად ”ფოლკსვაგენის” და ”აუდის” ავტომობილებით სარგებლობენ.

დაბოლოს, ”ჯილიმ” შარშან მხოლოდ 330 000 ავტომობილი გაჰყიდა, დაახლოებით იმდენივე, რამდენიც ”ვოლვომ”. თუმცა, ჩინური კომპანია იმედოვნებს, რომ 2015 წელს მის მიერ წარმოებული ავტომობილების გაყიდვები 2 მილიონს მიაღწევს.

Saturday, March 27, 2010

მუხლუხებიანი ”ჰამერი” ”გაიგერ ქარზისგან”

H2 Bomber

27 მარტი

გერმანულმა სატუნინგო კომპანია ”გაიგერ ქარზმა” ”ჰამერ H2-ის” ბაზაზე მეტად უჩვეულო ავტომობილი დაამზადა, რომელიც ბორბლების ნაცვლად, ოთხი ინდივიდუალური მუხლუხით გადაადგილდება. ავტომობილს სახელად ”ბომბერი” დაარქვეს.

ატელიეს მიერ გამოქვეყნებულ რელიზში წერია, რომ ავტომობილი შეიძლება ჩვეულებრივი, 305/60 ზომის საბურავებითაც აღიჭურვოს. მუხლუხებს მისთვის კომპანია ”მატეკსი” ამზადებს. ისინი საკმაოდ ადვილად იხსნება და ქალაქში მოძრაობისას, ავტომობილი ჩვეულებრივ ბორბლებზე დგება.

მუხლუხების ზედაპირი რეზინისგანაა დამზადებული, გზის ზდაპირთან თითოეულის შეხების ფართობი 150×40 სანტიმეტრზეა. მათი წყალობით, ავტომობილი ყოველგვარი პრობლემის გარეშე გაივლის როგორც ღრმა თოვლში, ასევე ჭაობიან ადგილებში, ქვიშასა და ხრეშიან გზებზე.

”გაიგერ ქარზში” ფიქრობენ, რომ ”ჰამერ H2-ის” მუხლუხებიანი ვერსია მისწრება იქნება ფერმერების, სამაშველო სამსახურების, გეოლოგების, მეტყევეებისა და მოგზაური ექსტრემალებისთვის. სხვათა შორის, ”ბომბერის” ძრავს ბუნებრივ გაზზე მუშაობაც შეუძლია. ის ასევე შეიძლება აღიჭურვოს სანავიგაციო სისტემით, ჭაღით და გამჭვირვალე სახურავით. ჯერჯერობით, ატელიე თავისი უცნაური ქმნილების ფასს არ აქვეყნებს.

Thursday, March 25, 2010

”ჯენერალ მოტორსის” კონცეპცია EN-V - ავტომობილი, თუ...

GM EN-V Concept Unveiled. Not a Car, but a... What?

25 მარტი

ამ ფოტოებზე რომ ვირტუალურ მანქანების მსგავს წარმონაქმნებს ხედავთ, მათ დიდი გაჭირვებით თუ ვუწოდებთ ავტომობილს. თუმცა, ”ჯენერალ მოტორსის” განსაზღვრებით, ეს მომავლის სატრანსპორტო საშუალებებია, რომლებითაც, არცთუ უახლოეს მომავალში, საშინლად გადატვირთული მეგაპოლისების გზებზე, იაფად და კომფორტულად გადაადგილება იქნება შესაძლებელი.

ამერიკული კომპანია უკვე ორი წელია ცდილობს, რომ შეიცვალოს იმიჯი და ეკონომიური და ეკოლოგიურად სუფთა ავტომობილების მწარმოებლის სახელი დაიმკვიდროს. მალე ”გენერლები” გაზრდილი სვლის მქონე ჰიბრიდული ”შევროლე ვოლტის” წარმოებას დაიწყებენ და თავიანთ სამოდელო გამაში ნელნელა ელექტრომობილების რაოდენობასაც გაზრდიან. უფრო შორეულ მომავალში კი მათ თავიანთი პარკის მთლიანად ელექტრომობილებით შეცვლა აქვთ განზრახული.

რაც შეეხება კონცეპცია EN-V-ს, ის ამერიკულმა კომპანიამ ჩინურ ”შანჰაი ავტომოტივ ინდასტრი კორპორეიშნთან” (SAIC) ერთად შეიმუშავა და მისი პრეზენტაციაც შანჰაიში, მსოფლიოს ერთ-ერთ უდიდეს მეგაპოლისში ჩაატარა. შანჰაიზე არჩევანი ტყუილად არ შეჩერებულა: 2030 წელს, როდესაც ჩვენი პლანეტის მოსახლეობის რაოდენობა 8 მილიარდს მიაღწევს, მათი დაახლოებით 60 პროცენტი ქალაქებში იქნება დასახლებული, ყველაზე დიდი მეგაპოლისები კი იმ დროისთვის ჩინეთში იქნება (ცნობისათვის, დღეს შანჰაისა და მის შემოგარენში, 20 მილიონზე მეტი ადამიანი ცხოვრობს).

შესაბამისად, გაიზრდება მოთხოვნილება პატარა, ეკონომიურ, ეფექტურსა და იაფფასიან სატრანსპორტო საშუალებებზე, რომლებიც ქალაქის გადატვირთულ გზებზე გადასაადგილებლად უფრო მოსახერხებელი იქნება, ვიდრე ჩვეულებრივი ავტომობილები.

კონცეპტუალური მოდელის სახელწოდება EN-V არის აბრევიატურა განსაზღვრებისა ”ელექტრიკ ნიტუორკედ-ვიჰაიქლ” (ანუ ელექტრონული ქსელური მანქანა). ეს არის ევოლუციური გაგრძელება პროექტისა P.U.M.A. (პერსონალ ურბან მობილიტი ექსესიბილიტი, ანუ პერსონალური საქალაქო გადაადგილება და ხელმისაწვდომობა), რომელიც ”ჯენერალ მოტორსმა” შარშან, კომპანია ”სეგვეისთან” ერთად წარმოადგინა.

რამდენადაც კონცეპცია ჩინელ პარტნიორთან ერთად მომზადდა და პრესპექტივაში, ის პირველ რიგში, ჩინური ბაზრისთვისაა განკუთვნილი, მოდელებსაც ჩინური სახელები - ”ძიაო” (სიამაყე), ”მიაო” (მაგია) და ”სიაო” (ღიმილი) უწოდეს. სამივე მოდელის დიზაინი ”ჯენერალ მოტორსის” სხვადასხვა შტომ დაამზადა. მაგალითად, ”სიაოს” გარეგნობა ამერიკული კომპანიის ავსტრალიური შტოს, ”ჰოლდენის” სპეციალისტებმა შეიმუშავეს. ”ძიაო” ”ჯენერალ მოტორსის” ევროპული შტოს ნახელავია, ”მიაო” კი ”ჯენერალ მოტორსის” მოწინავე დიზაინის სტუდიამ შეიმუშავა, რომელიც კალიფორნიაში მდებარეობს.

ოზ დიზაინერთა ნახელავი ზღვის და ოკეანის თემას ეხმაურება, რაზეც ”სიაოს” ზღვისფერი და ფანჯარა-ილუმინატორები მიგვანიშნებს. ევროპელებმა ”ძიაოს” დიზაინის შთაგონების წყაროდ აღმოსავლური თეატრალური ნიღბები და ჩინური ჩქაროსნული მატარებლების ფორმები გამოიყენეს. რაც შეეხება კალიფორნიელებს, მათ აქცენტი თანამედროვე ტექნოლოგიებზე გააკეთეს და ”მიაო” თხევადკრისტალური გასანათებელი საშუალებებით აღჭურვეს.

EN-V-ის პროექტით შექმნილი მოდელები ორბორბლიანია და რა თქმა უნდა, ისინი ”სეგვეის” თვითმავალ ეტლებს მოგვაგონებს. მსგავსება რეალურია - მათში სწორედ ”სეგვეის” სტაბილიზაციის ის ტექნოლოგია გამოიყენება, რომელიც სატრანსპორტო საშუალებას წონასწორობის შენარჩუნებაში ეხმარება. თითოეულ ბორბალს მამოძრავებელ ძალას ინდივიდუალური ელექტროძრავი ანიჭებს. EN-V-ის მოდელებში ორი დასაჯდომი და მცირე ბარგის დასადები ადგილია. მოდელების გაბარიტები ჩვეულებრივი ავტომობილისაზე მხოლოდ მესამედს შეადგენს და თანაც, მათ ადგილზევე მობრუნება შეუძლიათ. ამგვარად, გადატვირთულ ქუჩებში მათი მანევრულობა მისწრება იქნება.

ძრავები გამოიყენება როგორც აჩქარებისთვის, ასევე დამუხრუჭებისთვისაც. ისინი ენერგიით ლითიუმ-იონური აკუმულატორებისგან იკვებებიან. თავის მხრივ, აკუმულატორები საყოფაცხოვრებო ელექტროქსელიდან იმუხტება. სრულად დამუხტული აკუმულატორებით, EN-V-ის მოდელებს 40 კილომეტრის გავლა შეუძლიათ.

ახლა იმაზე, თუ რატომ შედის პროექტის სახელწოდებაში სიტყვა ქსელური. საქმე ისაა, რომ სამივე მოდელი კავშირის უმავთულო და სანავიგაციო სისტემებითაა აღჭურვილი, რომელთა მეშვეობითაც, მათ დამოუკიდებლად ორიენტირება მძღოლისგან დამოუკიდებლად გადაადგილება შეუძლიათ და რაც არანაკლებ მნიშვნელოვანია, ისინი ერთმანეთთანაც დაამყარებენ კავშირს. რა თქმა უნდა, უსაფრთხოება უმაღლეს დონეზე იქნება ორგანიზებული, რაშიც მოდელებს ურთიერთკომუნიკაცია დაეხმარება.

EN-V-ის მოდელები კარბონის კომპოზიტის, ლექსანისა და აკრილების გამოყენებით დამზადდება. მათი სიგრძე 1.5 მეტრი, წონა კი 500 კილოგრამზე ნაკლები იქნება. რაც შეეხება მაქსიმალურ სიჩქარეს, ის მხოლოდ 40 კმ/სთ-ია, რაც ამ ტიპის სატრანსპორტო საშუალებისთვის საკმაოდ მისაღებია.

”მომავალში, ისეთ დიდ ქალაქებში, როგორიც შანჰაია, გადაადგილება ძალიან გართულდება და ამ სიტუაციაში, საუკეთესო გამოსავალი EN-V გახდება. ეს პროექტი იმის მიმანიშნებელია, რომ ჩვენ ამ ეტაპზევე გვაქვს იმის ცოდნა და გამოცდილება, რომ შევქმნათ სატრანსპორტო საშუალებები, რომლებიც მეგაპოლისების მცხოვრებლებს უკეთეს ქალაქებში, უკეთესად ცხოვრების საშუალებას მისცემს”, - ამბობს ”ჯენერალ მოტორსის” კვლევებისა და განვითარების განყოფილების ვიცე პრეზიდენტი ალან ტაუბი.

”ჯენერალ მოტორსი” და SAIC-ი ”ძიაოს”, ”მიაოს” და ”სიაოს” ფართო საზოგადოებას პირველად მსოფლიო გამოფენა ექსპოზე წარმოადგენენ, რომელიც შანჰაიში 1 მაისს გაიხსნება და 31 ოქტომბრამდე გაგრძელდება.

”ბეემვე” მე-3 სერიის ჰეჩბეკსაც გამოუშვებს

BMW 3-Series

25 მარტი

”ბეემვე” უკვე მუშაობს მე-3 სერიის მოდელის განახლებაზე. ავტომობილი, რომლის შიდაკორპორატიული სახელწოდებაცაა F30, სედანის ძარით ბაზარზე პირველად 2012 წელს გამოჩნდება. მას უნივერსალის ძარიანი მოდელი, ჰეჩბეკი, კუპე და კაბრიოლეტი მოჰყვება. ამათგან, გამაში სრული სიახლე ჰეჩბეკი იქნება, რომლის გაყიდვებიც 2013 წლის მარტში უნდა დაიწყოს.

ეს იქნება მე-3 სერიის GT, რომელიც გარეგნულად მე-5 სერიის GT-ს დაემსგავსება. ოღონდ, მისგან განსხვავებით, მას ჩვეულებრივი, ”მთლიანი” უკანა კარი ექნება და არა ორსეგმენტიანი, როგორიც მე-5 სერიის GT-ს აქვს.

მე-3 სერიის ახალი მოდელი სრულიად ახალ პლატფორმაზე აიგება, რომელიც წინა საკიდარს შემდეგი თაობის პირველი სერიის მოდელისგან (F20) გაიზიარებს. ახალი სამიანი მე-5 სერიის ავტომობილის სტილში შესრულდება და წინა თაობის მოდელთან შედარებით, გაბარიტებში მოიმატებს. ამასთან, ჰეჩბეკი და უნივერსალი დაგრძელებულ პლატფორმაზე აიგება. ამით, მათს ინტერიერში, თავისუფალი სივრცე მოიმატებს.

ახალი მე-3 სერიის ავტომობილების ძრავების გამა ბენზინის ორი და დიზელის ამდენივე ახალი ძრავით შეივსება. ბენზინის აგრეგატების მოცულობა 1.6 და 2.0 ლიტრია და ისინი (შესაბამისად) 136 და 252 ცხენის ძალას გამოიმუშავებენ. რაც შეეხება დიზელის ძრავებს, მათი მუშა მოცულობაც 1.6 და 2.0 ლიტრია, სიმძლავრე კი, შესაბამისად, 150 და 245 ცხენის ძალა. ტოპ ვერსია აღიჭურვება 3.0-ლიტრიანი V6 ძრავით, რომელიც წყვილი ტურბოკომპრესორის დახმარებით, 450 ცხენის ძალას განავითარებს.

ამერიკულ გამოცემა ”ავტომობილის” მიერ მოპოვებული ინფორმაციით, ახალი მე-3 სერიის აეროდინამიკური წინააღმდეგობის კოეფიციენტი სულ რაღაც 0.24 იქნება, რაც შესანიშნავი მაჩვენებელია. ასეთი დაბალი კოეფიციენტის მიღწევა კი კაპოტქვეშა სივრცის, საბორბლე თაღების, სამუხრუჭე მექანიზმების, ასევე ავტომობილის ძირის აეროდინამიკის დახვეწით იქნება შესაძლებელი. როგორც კომპანიის წარმომადგენლები აცხადებენ, ავტომობილის აეროდინამიკურ მახასიათებლებს სწორედ ჩამოთვლილ არეებში ჰაერის ნაკადის სწორად განაწილება განაპირობებს. ამასთან, მანქანის საერთო აეროდინამიკური ეფექტურობა ძარის პროპორციასა და ფორმაზე მხოლოდ 40 პროცენტითაა დამოკიდებული.

დაბოლოს, ახალი მე-3 სერიის მოდელს წამყვანი ან მხოლოდ უკანა ბორბლები ექნება, ან ყველა, ძრავი კი კვლავ მის წინა ნაწილში მოთავსდება. ამასთან, მის ძრავებს 6-საფეხურიანი ავტომატური კოლოფი შეუწყვილდება.

”ბუგატი” სედანს 2013 წელს გამოუშვებს

New Bugatti saloon in 2013

25 მარტი

კომპანია ”ბუგატი” ოთხკარიან სედან ”16C გალიბიერის” წარმოების დაწყებას 2013 წელს აპირებს. მართალია, ამ საკითხზე ჯერ საბოლოო გადაწყვეტილება მიღებული არაა, მაგრამ ჟენევის მოტორ შოუზე ამ ავტომობილის პროტოტიპის ჩვენება იმის მანიშნებელია, რომ ”ფოლკსვაგენის” ჯგუფში შემავალ კომპანიას მის წარმოებასთან დაკავშირებით სერიოზული გეგმები აქვს.

ბრიტანულ ჟურნალ ”ავტოქარის” ინფორმაციით ”16C გალიბიერის” წარმოების საკითხი საბოლოოდ მას შემდეგ გადაწყდება, რაც ”ფოლკსვაგენი” ”ბუგატის” აქციების მსხვილ პაკეტს გაჰყიდის. გერმანულ კომპანიას ”ბუგატის” 65 მილიონი პრივილეგირებული აქციის გაყიდვა აქვს გადაწყვეტილი და იმედოვნებს, რომ მათში დაახლოებით 4 მილიარდ ევროს მიიღებს. ამ თანხის დიდი ნაწილი კი ”ბუგატის” საწარმოო პროგრამის გაფართოებას და ახალი მოდელების წარმოების დაწყებას მოხმარდება.

”ასე იქნება თუ ისე, ჩვენ ამ მოდელის წარმოებას დავიწყებთ. კონცერნ ”ფოლკსვაგენის” ჯგუფში, ”ბუგატი” ყველაზე პატარა კომპანიაა. კრიზისის პერიოდში კი, ამ მარკით ახალი მოდელების წარმოების დაწყება, პრიორიტეტული საკითხი არაა. თუმცა, მოსალოდნელია, რომ ამ ავტომობილის წარმოების დაწყებასთან დაკავშირებით, გადაწყვეტილებას ალბათ ზაფხულში მივიღებთ. ჯერჯერობით, მოვლენები ჩვენთვის სასურველი მიმართულებით ვითარდება. ჟენევაში მანქანა ბევრს მოეწონა, მისი წარმოების დაწყება კი დიდ თანხებთან დაკავშირებული არაა”, - ჟურნალთან საუბრისას განაცხადა ”ბუგატის” წარმომადგენელმა, ვინც ვინაობის გამხელა არ ისურვა.

მისივე თქმით, ”ბუგატი” მხოლოდ 300 ცალი ”16C გალიბიერის” წარმოებას აპირებს, როგორც ეს ”ვეირონის” შემთხვევაში იყო. რაც შეეხება მის ფასს, ”ავტოქარის” ინფორმაციით, სედანი დაახლოებით 1.5 მილიონი ევრო ეღირება.

ცნობისათვის, სრულამძრავიანი ”16C გალიბიერი” იმავე 8.0-ლიტრიანი W16 ძრავით აღიჭურვება, რომელიც ”ვეირონზე” გამოიყენება. ოღონდ, მისი სიმძლავრე 800 ცხენის ძალამდე შემცირდება. ამასთან, ოთხი ტურბოკომპრესორის ნაცვლად, ძრავს მექანიკური დამჭირხნები მოემსახურება. გავრცელებული ინფორმაციით, ძრავს 8-საფეხურიანი ავტომატური კოლოფი შეუწყვილდება. ამ ტანდემის მეშვეობით, ავტომობილის მაქსიმალური სიჩქარე 350 კმ/სთ-ს მიაღწევს.

”კრაისლერი” ”ფიატ 500-ის” ბაზაზე ელექტრომობილს გამოუშვებს

Fiat 500 to be Chrysler's electric debut

25 მარტი

”კრაისლერმა” გამოაცხადა, რომ ”ფიატის” პოპულარულ მოდელ 500-ის პლატფორმაზე ელექტრომობილს დაამზადებს და მის წარმოებას 2012 წელს დაიწყებს. ავტომობილი, რომელსაც ”ფიატ 500EV” დაერქმევა, ამერიკული და იტალიური კომპანიების პირველი ერთობლივი პროექტი გახდება მას შემდეგ, რაც მათ ალიანსი შექმნეს.

”ალიანსი ”ფიატთან” ”კრაისლერს” ახალ შესაძლებლობებს აძლევს. ჩვენთვის ხელმისაწვდომი ახალი პლატფორმები ხდება, ჩვენი თანამშრომლობის პირველი შედეგი კი ”ფიატ 500EV” იქნება. ”ფიატ 500-ს” მომცრო, მსუბუქი პლატფორმა აქვს, რომელიც საუკეთესოდ მიესადაგება ელექტრულ ტექნოლოგიებს”, - ამბობს ”კრაისლერის” ჯგუფის საინჟინრო ჯგუფის უფროსი ვიცე პრეზიდენტი სკოტ კუნსელმანი.

”ფიატ 500-ის” ბაზაზე შექმნილი პირველი ელექტრომობილის პროტოტიპი ”კრაისლერმა” და ”ფიატმა” დეტროიტის წლევანდელ ავტო შოუზე წარადგინეს, თუმცა მაშინ არაფერი თქმულა იმაზე, თუ როდის გამოჩნდებოდა მისი სერიული ვარიანტი ბაზარზე. ამ ეტაპზე ცნობილია, რომ ელექტრომობილი ლითიუმ-იონური აკუმულატორების ბლოკით აღიჭურვება, რომლის ერთი სრული დამუხტვაც 100 კილომეტრის გასავლელად იქნება საკმარისი.

წარმოების დასაწყისში, ”ფიატ 500EV” მხოლოდ ამერიკული ბაზრისთვის იქნება განკუთვნილი. რა თქმა უნდა, ჯერ მისი სავარაუდო ფასიც კი არ ქვეყნდება, თუმცა ამერიკული კომპანია აცხადებს, რომ ელექტრომობილის ღირებულება, შესაბამის კლასში კონკურენტუნარიანი იქნება. ინტერნეტში გავრცელებული ვარაუდით, მისი ფასი ამერიკაში 30 000 დოლარის ფარგლებში იქნება.

ელექტრომობილის გარდა, ალიანსი მისი შესაფერისი ინფრასტრუქტურის განვითარებაზე ზრუნვასაც იწყებს. ის აკუმულატორების სწრაფად დასამუხტი სადგურების ქსელის შექმნას ითვალისწინებს. თუმცა, ჯერჯერობით, ამ პროექტის შესახებ კონკრეტული ინფორმაცია არ ვრცელდება.

Wednesday, March 24, 2010

მეორე თაობის ახალ ”ხოჭოს” ნოემბერში ვიხილავთ

Gen 2 VW New Beetle May Arrive in November

24 მარტი

ბრიტანულმა ჟურნალმა ”ავტოქარმა” გაავრცელა ინფორმაცია, რომელიც ყველაზე მეტად, ავტოინდუსტრიის ისტორიაში ერთ-ერთი ყველაზე პოპულარული ავტომობილის, ”ფოლკსვაგენ ბიტლის” თაყვანისმცემლებს გაახარებს - ნოემბერში, ლოს ანჯელესის ავტო შოუზე, გაიმართება ”ფოლკსვაგენის” ”ახალი ხოჭოს” მეორე თაობის მოდელის პრეზენტაცია.

”ავტოქარისვე” ცნობით, ახალ ავტომობილს ყველაფერი - ძარა, ძრავები და გადაცემათა კოლოფიც ახალი ექნება. ჟურნალის წყაროს ინფორმაციით, ახალი ”ახალი ხოჭო” ბენზინსა და დიზელზე მომუშავე სამ-სამ ძრავს მიიღებს.

ბენზინის ძრავებია: 1.2-ლიტრიანი 105 ცხენის ძალით, 1.4-ლიტრიანი 160 ცხენის ძალით და 2.0-ლიტრიანი 210 ცხენის ძალით. დიზელის ძრავებია 1.6-ლიტრიანი 105 ცხენის ძალით, 2.0-ლიტრიანი 140 ცხენის ძალით და ამერიკის ბაზრისთვის - 2.5-ლიტრიანი 170 ცხენის ძალით.

რაც მთავარია, ახალი ”ახალი ხოჭო” წინამორბედზე გრძელიც იქნება და განიერიც. გავრცელებული ინფორმაციით, ”ფოლკსვაგენი” მას ”ბეემვეს” ”მინისთან” საკონკურენციოდ ამზადებს. იგივე წყარო გვამცნობს, რომ გარეგნულად ის ძლიერ დაემგვანება კონცეპტუალურ ”რაგსტერს”, რომელიც ვოლფსბურგელებმა დეტროიტის 2005 წლის გამოფენაზე გვიჩვენეს. თუმცა, ალბათ მასზე ნაკლებად აგრესიული დიზაინი ექნება.

”ფორდის” შეფმა შარშან 18 მილიონი დოლარი გამოიმუშავა

Ford's Mulally earns $18M

24 მარტი

ალან მიულალი (მარცხნივ) და ბილ ფორდი

..........................................

”ფორდის” მთავარმა აღმასრულებელმა და პრეზიდენტმა ალან მიულალიმ გასული წლის განმავლობაში 18 მილიონი დოლარი მიიღო, რაც წინა წლის ანაზღაურებაზე მილიონით მეტია. და ეს იმის მიუხედავად მოხდა, რომ მას ხელფასი 30 პროცენტით (2-დან 1.4 მილიონ დოლარამდე) შეუმცირდა. ამასთან, მიულალიმ ბონუსების მიღებაზეც უარი განაცხადა. შემოსავლის ზრდა მიულალის ხელთ არსებული (ფორდის) აქციების პაკეტის ფასის ზრდის ხარჯზე მოხდა. მათი წყალობით, მან დაახლოებით 16 მილიონი დოლარი მოიგო.

”ფორდ მოტორის” დირექტორთა საბჭოს თავმჯდომარე ბილ ფორდმა, ვინც ამერიკული კომპანიის დამაარსებელ ჰენრი ფორდის შთამომავალია, კვლავ (მეხუთედ) ხელფასზე უარი თქვა, თუმცა ამის მიუხედავად, მისმა შემოსავალმა მაინც 16.8 მილიონი დოლარი შეადგინა.

შედარებისთვის, ”ჯენერალ მოტორსის” მთავარი აღმასრულებლის მოვალეობის შემსრულებელ ედუარდ უაიტეკრის შარშანდელმა შემოსავალმა ”სულ რაღაც” 9 მილიონი დოლარი შეადგინა.

ცნობისათვის, ”ფორდს” აშშ-ის მთავრობისთვის ორი წლის წინ მიცემული ჰქონდა პირობა, რომ მის ხელთ არსებულ ხუთივე ბიზნეს კლასის თვითმფრინავს გაყიჰდდა, მაგრამ აქამდე ვერცერთის გაყიდვა ვერ მოახერხა. თუმცა, კომპანიის ხელმძღვანელობა ირწმუნება, რომ თვითმფრინავებს არ იყენებს.

”ჩვენ ანგარი დავხურეთ და თვითმფრინავები გასაყიდად გამოვიტანეთ, მაგრამ ვერცერთის გაყიდვა ვერ შევძელით, რადგან ჯერჯერობით, ამისთვის შესაფერისი დრო არ დამდგარა - კრიზისმა კერძო თვითმფრინავების ბაზარი ძლიერ დაასუსტა”, - ნათქვამია კომპანიის განცხადებაში.

ამ ეტაპზე, ”ფორდის” ხელმძღვანელობა ორი ნაქირავები ბიზნეს კლასის თვითმფრინავით სარგებლობს, უფრო დაბალი რანგის მენეჯერები კი კომერციული ავიარეისებით დაფრინავენ.

”მაკლარენი” შეკვეთებს ვერ აუდის

McLaren MP4-12C Gets 1,600 Orders

24 მარტი

”მაკლარენ ავტომოტივს” ჯერ თავისი სუპერ ავტომობილის, ”მაკლარენ MP4-12C-ს” წარმოება არ დაუწყია, მაგრამ მასზე უკვე 1600-ზე მეტი შეკვეთა მიიღო, რაც ამ ავტომობილის წარმოების მთლიან მოცულობაზე 1.6-ჯერ მეტია. ჯერჯერობით უცნობია, ინგლისური კომპანია რა გზით შეძლებს ასეთი მოთხოვნის დაკმაყოფილებას - გაზრდის წარმოებას, თუ მანქანის შეძენის მსურველთა შორის ლატარეას გაათამაშებს.

”მაკლარენ MP4-12C-ს” პრეზენტაციაზე, კომპანიამ გამოაცხადა, რომ მის მიერ წარმოებული ავტომობილების 25 პროცენტი ბრიტანეთში გაიყიდება, ამდენივეს შეძენის საშუალება ამერიკელებს მიეცემათ, დანარჩენი 50 პროცენტი კი დანარჩენ მსოფლიოზე, უმეტესად ევროპაზე გადანაწილდება.

”მაკლარენ MP4-12C” აღჭურვილია ”მაკლარენისვე” წარმოების 3.8-ლიტრიანი V8 ძრავით, რომელიც წყვილი ტურბოკომპრესორის დახმარებით, 600 ცხენის ძალას იძლევა. ძრავთან ორდისკოიანი ქუროთი 7-საფეხურიანი კოლოფია დაკავშირებული. ამ ტანდემის მეშვეობით, ავტომობილს 320 კმ/სთ-მდე აჩქარება შეუძლია, 100 კმ/სთ სიჩქარეს კი ის 3 წამზე ნაკლებში ასწრებს.

სანამ ახალ ფაბრიკას ააშენებს, ”მაკლარენი” MP4-12C-ს წარმოებას წელსვე, თავისივე ტექნოლოგიურ ცენტრში დაიწყებს. ავტომობილის გაყიდვები, 19 ქვეყანაში მოქმედი 35 დილერის მეშვეობით განხორციელდება. აღჭურვილობის შესაბამისად, MP4-12C-ს შეძენის მსურველებს, მასში 140-195 ათასი ევროს გადახდა მოუწევთ.

Tuesday, March 23, 2010

”ვოლვო S60” - კონსერვატიზმის ნაცვლად, ზომიერი სითამამე
21 მარტირამდენიმე წელია, რაც ”ვოლვო” ფინანსურ პრობლემებს განიცდის. შვედურმა კომპანიამ სამოდელო გამა არნახულად გააფართოვა, მაგრამ ამით მისი ბიზნესი ვერა და ვერ გაჯანსაღდა. საქმე იქამდეც კი მივიდა, რომ ამერიკულმა ”ფორდმა”, რომლის ჯგუფშიც შვედური კომპანია შედის, მისი გაყიდვა განიზრახა. წელიწადზე მეტია, რაც ”ვოლვოს” სავარაუდო მყიდველად ყველა ჩინურ ”ჯილის” მოიაზრებს, მაგრამ მხარეებს შორის შეთანხმება აქამდე ვერ მოხერხდა. და სანამ ის ჯერაც ამერიკულ გიგანტს ეკუთვნის, საწარმოო პროგრამა ერთ ადგილს ვერ დატკეპნის და ამის დასტურია მეორე თაობის სედანი S60, რომლის მსოფლიო პრემიერაც ჟენევის საავტომობილო გამოფენაზე გაიმართა.
პირველი S60 ბაზარზე 2001 წელს გამოჩნდა. მისი დიზაინი, ისევე როგორც უფრო მაღალი კლასის S80-ისა, პეტერ ჰორბურიმ შექმნა და უნდა ითქვას, რომ ამ ავტომობილის გარეგნობა დიდხანს არ დაძველებულა. მაგრამ ყველაფერს თავისი დრო აქვს და S60-ის განახლების ჯერიც დადგა.
ახალი სედანის კონცეპტუალური ვერსია ”ვოლვომ” შარშან წარმოადგინა და მართალია, ის კონსერვატიული გარეგნობით გამოირჩეოდა, მაინც სპეციალისტთა მოწონება დაიმსახურა. რამდენადაც სერიული ავტომობილის ფოტოები და ტექნიკური მონაცემები ჟენევის გამოფენამდე კარგა ხნით ადრე გამოქვეყნდა, გამოფენაზე ახალ S60-ს დიდი ყურადღება აღარ მიუქცევია. თუმცა ეს სულაც არ ნიშნავს, რომ ბაზარზე მას არავინ ელის.
პირველი თაობის S60-ის კონსერვატიული, მონუმენტური სტილი ახალმა, უფრო თამამმა და საინტერესო დიზაინმა შეცვალა, რომლითაც ავტომობილმა, ხნიერი მყიდველის გარდა, საშუალო ასაკის ავტომოყვარულიც უნდა მიიზიდოს. სხვათა შორის, სერიული სედანის გარეგნობა თითქმის არ განსხვავდება შარშანდელი კონცეპციისგან, რაც საკმაოდ იშვიათად ხდება ხოლმე. როგორც წესი, სანამ კონვეიერამდე მიაღწევდეს, კონცეპტუალური მოდელი სრულყოფის ბოლო ფაზას გადის, რომლის დროსაც მის ძარას ყველა ”ზედმეტი” დეტალისგან ათავისუფლებენ და ხშირად ისეც ხდება, რომ სერიული ავტომობილი გამოფენებზე ნაჩვენები კონცეპტუალური მოდელის აჩრდილადღა გვევლინება. მაგრამ S60-ის შემთხვევაში ასე არ მოხდა.
რამდენადაც ავტომობილის წინა ნაწილი ავანგარდული ფორმებით გამოირჩევა, იმდენად უღიმღამოა მისი უკანა ნაწილი. თუმცა უშნოაო, ნამდვილად ვერ იტყვი. აქ საყურადღებო მხოლოდ ისაა, რომ საბარგული ძალიან მოკლეა და ამის გამო, ჰეჩბეკის ტიპის ძარის შთაბეჭდილებას გვიქმნის. თუმცა, რა თქმა უნდა, ასე არაა - ძარა სედანის ტიპისაა.
სალონი საკმაოდ მდიდრულადაა გაწყობილი, როგორც ეს გერმანულ პრემიუმ ბრენდებთან კონკურენტობის პრეტენზიის მქონე ავტომობილს უნდა ჰქონდეს. თუმცა, შვედებმა არც უბრალოება დაივიწყეს და სალონის ზედმეტად გადატვირთვისგან თავი შეიკავეს. ცენტრალურ პანელზე მოთავსებული მრავალფუნქციური მონიტორიც მომცრო ზომისაა და თითქოს ფოსოში მეტისმეტად ღრმადაა ჩაძირული. დაკიდევ, გადაცემათა კოლოფის საფეხურების გადამრთველი ბერკეტი, ცენტრალურ კონსოლთან ძალიან ახლოს მიდის, რამაც მართვის დროს, მძღოლს შესაძლოა, გარკვეული პრობლემები შეუქმნას.
სამაგიეროდ, ”ვოლვოს” კოზირი ყოველთვის იყო და იქნება უსაფრთხოების უმაღლესი დონე, რითაც შვედური კომპანია საფუძვლიანად ამაყობს. ამ მხრივ, გამონაკლისი არც მეორე თაობის S60 იქნება, რომელიც სრულიად ახალი, ფეხით მოსიარულეთა კონტროლის სისტემით (პედესტრიან დეტექშნ) აღჭურვეს. ეს სისტემა, სპეციალური რადარისა და ვიდეოკამერის დახმარებით ადგენს, ხომ არ არის მოსალოდნელი ფეხით მოსიარულესთან შეჯახება. სისტემა ჯერ სიგნალს იძლევა და თუ ამაზე რეაგირება ვერ დააფიქსირა, მაშინ დამოუკიდებლად იწყებს მოქმედებას თუ საჭირო გახდა, მანქანასაც თავად გააჩერებს. კომპანიის მიერ გავრცელებულ რელიზში მითითებულია, რომ ამ სისტემის მეშვეობით, შეჯახების თავიდან აცილება შესაძლებელია, როდესაც ავტომობილის სიჩქარე 35 კმ/სთ-ზე ნაკლებია. და თუ სიჩქარე ამაზე მეტია, მაშინ სისტემა ყველაფერს იღონებს იმისათვის, რომ ფეხით მოსიარულე მინიმალურად დაზარალდეს. ტესტებზე დადგინდა, რომ ამ სისტემის მეშვეობით, ფატალური შემთხვევების რისკი დაახლოებით 20 პროცენტით მოიკლებს.
ახალი S60-სთვის ოთხი ძრავია გათვალისწინებული, რომელთაგან ორი ბენზინზე მუშაობს, ორი კი - დიზელზე. საბაზო ბენზინის 2.0-ლიტრიანი GTDi აგრეგატია. მას ტურბოდამჭირხნი ემსახურება და საწვავი უშუალოდ წვის კამერაში მიეწოდება. ამ ძრავის სიმძლავრე 203 ცხენის ძალას აღწევს, მაბრუნი მომენტის მაქსიმუმი კი 300 ნიუტონმეტრია. ამ ძრავით, ავტომობილს 100 კმ/სთ-მდე აჩქარება 7.7 წამში შეუძლია. ბენზინის მეორე ძრავია 3.0-ლიტრიანი T6 (ცილინდრების ერთ რიგში განლაგებით), რომლის სიმძლავრე 304 ცხენის ძალა, მაბრუნი მომენტი კი 440 ნიუტონმეტრია. ამ ძრავით, S60 100 კმ/სთ სიჩქარის აკრეფას 6.5 წამში ასწრებს, მისი მაქსიმალური სიჩქარე კი 250 კმ/სთ-ს აღწევს. ამასთან, მისით აღჭურვილი ავტომობილი 100 კილომეტრზე მხოლოდ 10.2 ლიტრ ბენზინს მოიხმარს, ეს კი ამავე ძრავის წინა მოდიფიკაციის ხარჯზე დაახლოებით 10 პროცენტით ნაკლებია.
რა შეეხება დიზელის ძრავებს. მათგან უფრო სუსტია 2.0-ლიტრიანი D3, რომელიც მხოლოდ 160 ცხენის ძალას და 400 ნიუტონმეტრს ავითარებს. მასზე გაცილებით მძლავრია 2.4-ლიტრიანი D5, რომლის მაქსიმალური სიმძლავრე 205 ცხენის ძალა, მაქსიმალური მაბრუნი მომენტი კი 420 ნიუტონმეტრია.
შვედური კომპანია აცხადებს, რომ მერმისს ძრავების გამას კიდევ ოთხი აგრეგატი დაემატება, რომელთაგან სამი ბენზინისაა, ერთი კი - დიზელის. მათი სიმძლავრე 115-დან 240 ცხენის ძალამდე იქნება. ამ ძრავებს შორის, ყველაზე ეკონომიური დიზელისაა, რომლით აღჭურვილი S60-იც 100 კილომეტრს 4.3 ლიტრი საწვავით გაივლის.
ახალი S60-სთვის ორი ტიპის საკიდარია გათვალისწინებული. მათგან ერთი უფრო ხისტია და ის შედარებით დინამიურიცაა. ასეთ ვერსიას ძირითადად ევროპელ მყიდველს შესთავაზებენ, შედარებით კომფორტული კი ამერიკული ბაზრისთვისაა განკუთვნილი. თუმცა, ოკეანის გაღმელებს სპორტული ვერსიის შეძენის საშუალებაც ექნებათ.
ახალი S60 კონკურენციას ”ბეემვეს” მე-3 სერიას, ”აუდის” A4-ს და ”მერსედესის” C-კლასის მოდელებს გაუწევს. მისი გაყიდვების დაწყება ზაფხულიდანაა მოსალოდნელი და მისი ფასიც გაყიდვების დაწყებამდე გამოცხადდება.

Sunday, March 21, 2010

”ალფა რომეო დუეტტოტანტა” ”პინინფარინასგან”

Pininfarina Alfa Romeo 2ettottanta

21 მარტი

ჟენევაში ”პინინფარინამ” ერთდროულად ორი იუბილე აღნიშნა. ერთი თავისი დაარსებიდან 80 წელს ეძღვნება, მეორე კი - ”ალფა რომეოს” დაარსებიდან 100 წელს. ორივე თარიღთან დაკავშირებით კი ერთი კონცეპტუალური ნამუშევარი - ორადგილიანი როდსტერი ”დუეტტოტანტა” წარმოადგინა.

სახელი ”დუეტტოტანტა” ორი სიტყვისგან შედგება - დუეტ წყვილს ნიშნავს, ტოტანტა კი - 80-ს. როგორც კონცეპციის ავტორებმა განაცხადეს, ამ სადა დიზაინში ერთმანეთთან იტალიური ატელიეს ტრადიციები და ნოვატორული მიმართულებაა შერწყმული. ის 1966 წლის კონცეპტუალური ”დუეტოს” მოტივებზეა შექმნილი.

”დუეტტოტანტას” ზომებია: სიგრძე 4213 მმ, სიგანე 1797 მმ და სიმაღლე - 1280 მილიმეტრი. ამგვარად, ის ყველა პარამეტრით, როდსტერ ”ალფა რომეო სპაიდერზე” კომპაქტურია. ის საკმაოდ სადა და იმავდროულად, დახვეწილი გარეგნობით გამოირჩევა, რომელშიც რეტროსთან თანამედროვე სტილია შეხამებული, რასაც ხაზს წინა და უკანა წვრილი შუქდიოდური ფარები, ასევე უკანა დიფუზორი უსვამს. რეტრო სტილზე მიგვანიშნებს უსაფრთხოების რკალების უკან არსებული ”კუზები”, რომლებიც აეროდინამიკური ელემენტების მოვალეობას ასრულებენ.

სალონიც სისადავითა და ასკეტურობით გამოირჩევა. რეტრო სტილშია შესრულებული საჭის რგოლი, რომლის უკანაც ძირითადი მაჩვენებლებია მოთავსებული. აქ ვერ ნახავთ მრავალფუნქციურ მონიტორს და სხვადასხვა დამხმარე და მულტიმედიური სისტემების სამართავ პულტებს. სალონში ყველაფერი - სავარძლები და დიდი ზომის პანელები ტყავითაა გაწყობილი, რაც მას უბრალოებას არ უკარგავს.

კაპოტის ქვეშ, გრძივად მოთავსებულია 1.75-ლიტრიანი ტურბოძრავი, რომლის სიმძლავრეც არ გამოცხადებულა. ისიც უცნობია, თუ რამდენი საფეხური აქვს გადაცემათა კოლოფს, რომელსაც ორდისკოიანი ქური ემსახურება. მართალია, ძრავი საკმაოდ მცირელიტრაჟიანია, მაგრამ მანქანის საფირმო ბორბლებზე ჩაცმული დაბალპროფილიანი საბურავების (დანლოპის წარმოების) მიხედვით შეიძლება ვივარაუდოთ, რომ ძრავს ”დუეტტოტანტას” გარეგნობის შესაფერისი ტექნიკური მონაცემები უნდა ჰქონდეს.

”ჯუჯაროს”, ”ლოტუსის” და ”პროტონის” სამი საერთო კონცეპცია

Italdesign Giugiaro EMAS

21 მარტი

ემას ქანთრი

იტალიურმა ატელიე ”იტალდიზაინ ჯუჯარომ” ჟენევაში თავისი კონცეპტუალური ტრიო წარადგინა სახელად ”ემას” (მალაიზიურად ეს სიტყვა ოქროს ნიშნავს), რომელიც ინგლისურ ”ლოტუსთან” და მალაიზიურ ”პროტონთან” (ლოტუსი პროტონის ჯგუფში შედის) ერთად შეიქმნა.

ემას კომფორტი

სამი ავტომობილიდან, ორი ხუთკარიანია, ერთი კი - სამიანი. მათგან ”ემას კომფორტი” ხუთკარიანი ჰეჩბეკია, ”ემას ქანთრი” - ქროსოვერი, ”ემას3 სიტი” კი - სამკარიანი ჰეჩბეკი. ამასთან, თუ პირველი ორის სალონში ოთხი სავარძელი დაგხვდებათ, სამკარიანის ჩასაჯდომი ფორმულა 3+1-ია, რაც იმას ნიშნავს, რომ მას მხოლოდ სამი სრულფასოვანი ადგილი აქვს, რომლებზეც ზრდასრული ადამიანი მოთავსდება, მესამე ადგილი კი ბავშვისთვისაა.

”ემას კომფორტი” და ”ემას ქანთრი” ერთსადაიმავე პლატფორმაზეა ბაზირებული, რომელიც ”ჯუჯარომ” დამოუკიდებლად შეიმუშავა. მათი სიგრძე 3550 მილიმეტრი, ბაზა კი 2590 მილიმეტრია. ასეთი დიდი ბაზის წყალობით, როგორც პრეს რელიზში წერია, მათ სალონში ოთხი კომფორტული სავარძელი მოთავსდა, რომლებიც ბიზნეს კლასის მოთხოვნებს შეესაბამება. უფრო მეტიც, ”კომფორტის” საბარგულის მოცულობა 320 ლიტრი, ”ქანთრისა” კი 390 ლიტრია. და თუ უკანა სავარძლებს დავკეცავთ, საბარგულის მოცულობა 780 ლიტრამდე იზრდება.

ემას3 სიტი

”ემა3 სიტის” პლატფორმა კი პირველი ორის პლატფორმის დამოკლებული ვერსიაა. ამ ავტომობილის სიგრძე 2985 მილიმეტრი, ბაზა კი 2000 მილიმეტრია. ამ ზომებით, ის პრაქტიკულად ”ტოიოტას” ჯუჯა iQ-ს ტოლია. ჰოდა, გასაკვირი აღარ უნდა იყოს, რომ მისი სალონის უკანა ნაწილში მხოლოდ ერთი სრულფასოვანი სავარძელი მოთავსდა (მძღოლის უკან).

სამაგიეროდ, ტექნიკური აღჭურვილობა სამივე ავტომობილს ერთნაირი აქვს. ისინი მამოძრავებელ ძალას 61-ცხენისძალიანი (მაბრუნი მომენტი 240 ნმ) ელექტროძრავისგან ღებულობენ, რომელიც ელექტროენერგიით ლითიუმ-იონური აკუმულატორების ბლოკისგან იკვებება. თავის მხრივ, აკუმულატორებს ”ლოტუსის” წარმოების 1.2-ლიტრიანი შიდაწვის ძრავისა გენერატორის ტანდემი მუხტავს. ამ ძრავის სიმძლავრე სულ რაღაც 52 ცხენის ძალაა. სამაგიეროდ, მას მუშაობა ბენზინზე, ეთანოლსა და მეთანოლზე შეუძლია.

”ჯუჯაროს” მონაცემებით, სამივე ავტომობილს ადგილიდან 100 კმ/სთ-მდე აჩქარება 14 წამში შეუძლია, მათი მაქსიმალური სიჩქარე 170 კმ/სთ-ს აღწევს, სვლის სიშორე კი 50 კილომეტრია.

”სოფია” I.DE.A.-სგან

I.DE.A. Sofia

21 მარტი

იტალიური სადიზაინერო კომპანიები და ატელიეები ყოველთვის გამოირჩევიან დახვეწილი გარეგნობის მქონე სერიული და კონცეპტუალური ავტომობილებით, რომლებსაც პირველ რიგში, ლამაზ ქალს ან საბრძოლოდ მომზადებულ გლადიატორს თუ შეადარებ. ნებისმიერ შემთხვევაში, აპენინური ავტომობილები თვალს თავიანთი მომნუსხველი დიზაინით იზიდავენ.

ამ მხრივ, გამონაკლისი არც ტურინული სადიზაინერო ინსტიტუტი I.DE.A.-ა, რომელიც უკვე ოთხი წელია, ჟენევურ საავტომობილო გამოფენებს არ ტოვებს. და რატომღაც, თავის ავტომობილებს ქალის სახელს არქმევს. ამ მხრივ, გამონაკლისი არც ჟენევის წლევანდელი რანდევუ ყოფილა, რომელზეც I.DE.A.-მ თავისი მორიგი კონცეპტუალური ავტომობილი წარმოადგინა ქალის სახელით ”სოფია”.

ქალის სახელი რა გასაკვირია, როდესაც ამ შესანიშნავი კონცეპციის ავტორებს პრეს რელიზში ეწერათ, რომ ”სოფიას” დიზაინი ქალის ფორმების შთაგონებით შეიქმნა. თანაც, ის ასევე ელეგანტურ, ”გლამურულ” (ეს სიტყვაც ატელიეს პრეს რელიზიდანაა) შინდისფერში გამოაწყვეს.

იდეაში, ”სოფია” ჰიბრიდული ავტომობილი უნდა ყოფილიყო, მაგრამ ჟენევაში ატელიემ მხოლოდ ძარა წარმოადგინა ყოველგვარი აღჭურვილობის გარეშე. პრეს რელიზში მითითებულია, რომ პერსპექტივაში, ”სოფია” იმდაგვარადაა გათვლილი, რომ ის შეიძლება აღიჭურვოს როგორც მხოლოდ V8 ძრავით, ასევე ამავე ძრავისა და ელექტროძრავის ჰიბრიდული კომბინაციით. წამყვანი კი შეიძლება იყოს როგორც წინა, ასევე უკანა ბორბლები.

სხვათა შორის, I.DE.A.-ს შარშანდელი კონცეპცია ”ერაც” მხოლოდ ძარა იყო ძრავის, ტრანსმისიის და სალონის გარეშე. როგორც ჩანს, ტურინულ ატელიეში თავიანთი ქმნილებების ტექნიკური მხარით ნაკლებად ინტერესდებიან, ან მათ ამის საშუალებას ფინანსების ნაკლებობა არ აძლევს.

შეძლებს თუ არა ”სოფია” I.DE.A.-სთვის მსხვილი კლიენტების მიზიდვას, რომლებსაც სურთ, რომ მათი სერიული ავტომობილები მასავიტ ელეგანტურად გამოიყურებოდნენ, ამას მომავალი გვიჩვენებს. ფაქტი ერთია, ამ პატარა სტუდია-ინსტიტუტს, რომელმაც ახალი ცხოვრება 2007 წელს დაიწყო, იტალიაშივე არაერთი ავტორიტეტული კონკურენტი ჰყავს, რომლებსაც ჟენევაში არანაკლებ თვალწარმტაცი კონცეპციები ჰქონდათ გამოფენილი.

”მაკლარენმა” ”მერსედესისგან” თავისივე აქციები გამოისყიდა

McLaren buys back Mercedes stake

21 მარტი

”მაკლარენმა” ”მერსედესისგან” თავისივე აქციების დიდი ნაწილი გამოისყიდა, რომლებიც გერმანული კომპანიის ხელში იყო. დღემდე, ”სამქიმიანებს” ინგლისური გუნდის აქციების 40 პროცენტი ეკუთვნოდათ, მაგრამ მათი ნაწილის გაყიდვა მას შემდეგ გადაწყდა, რაც მათ შარშანდელი ჩემპიონატის ტრიუმფატორი ”ბრაუნი” გამოისყიდეს.

რა თქმა უნდა, ამ გამოსყიდვამ წარმოშვა კითხვა, ხომ არ აპირებს ”მერსედესი” ”მაკლარენთან” პარტნიორული ურთიერთობის დასრულებას, რომელიც უკვე რამდენიმე წელია, გრძელდება. ამაზე შტუტგარტელების პასუხი უარყოფითია. თუმცა, კონტრაქტი, რომელიც 2011 წლის სეზონის ბოლოს ამოიწურება, გარკვეულწილად შეიცვლება. შესაძლოა, ეს ცვლილება იმაში აისახოს, რომ ამიერიდან, ”მაკლარენს” თავისი ფ1-ის გუნდისთვის, ”მერსედესის” ძრავების შესყიდვა დასჭირდეს.

”მაკლარენის” გუნდის შეფი მარტინ უიტმარში აცხადებს, რომ ”მერსედეს ბენცის” ხელში, მისი გუნდის აქციების 11 პროცენტი რჩება. მაგრამ ეს იმას ნიშნავს, რომ გერმანული კომპანია ინგლისური გუნდის უმსხვილესი აქციონერი აღარ იქნება.

ამჟამად, ”მაკლარენის” გუნდის აქციების 15-15 პროცენტი კომპანიის შეფ რონ დენისს და მის არაბ პარტნიორ მანსურ ოიეხს ეკუთვნით. 30 პროცენტი ბაჰრეინულ კომპანია ”მუმთალაქათის” ხელშია.

”მაკლარენის” ახალი ფაბრიკის გახსნის ცერემონიაზე, რომლის პარალელურადაც, კომპანიამ საზოგადოებას ასევე თავისი სუპერ ავტომობილი MP4-12C წარუდგინა, უიტმარშმა განაცხადა, რომ ამიერიდან, ”მაკლარენს” ყველა იმ ბიზნესში ვიხილავთ, სადაც ”ფერარი” ფიგურურებს. კონკურენცია სარბოლო ტრასებზე, ფ1-ის მიღმაც გაგრძელდება და პირველ რიგში, ეს GT (გრან ტურიზმო - დიდი ტურიზმი) კლასის რბოლებში მოხდება.

უიტმარშმა ”ფერარის” შეფ ლუკა დი მონტეძემოლოს ასე მიმართა: ”ამიერიდან, ჩვენ იმ რბოლებში ვიქნებით, სადაც თქვენც ხართ. სად აპირებთ გამოსვლას? რატომ არ უნდა გავაკეთოთ ჩვენ ეს ერთად?”

ეს მრავლისმთქმელი მიმართვაა, საიდანაც ერთი დასკვნის გაკეთება შეიძლება: თუ ”მაკლარენი” ”ფერარისთან” სრულფასოვან კონკურენციას აპირებს, ეს შეიძლება იმას ნიშნავდეს, რომ ფორმულა 1-ში საკუთარი კონსტრუქციის ძრავით უნდა იასპარეზოს. ”მერსედესთან” პარტნიორული ურთიერთობის თანდათან შეზღუდვა კი შესაძლოა იმის ნიშანი იყოს, რომ მალე ინგლისური გუნდი თავისი ბოლიდებისთვის თავად შექმნის ძრავებს.

ამ მხრივ მას გამოცდილება უკვე აქვს - MP4-12C-ის ძრავი სწორედ ”მაკლარენის” ინჟინრების ნახელავია...

Saturday, March 20, 2010

”შელბი სუპერქარზმა” ცნობილი დიზაინერი გადაიბირა

Jason Castriota

20 მარტი

ამერიკულმა კომპანია ”შელბი სუპერქარზმა” (SSC) იტალიური წარმოშობის ცნობილ ამერიკელ დიზაინერ ჯეისონ კასტრიოტასთან, რომელიც ადრე იტალიურ ატელიეებში, ”ბერტონესა” და ”პინინფარინაში” მუშაობდა, ერთწლიანი კონტრაქტი გააფორმა. კასტრიოტა პირადად ხელმძღვანელობდა ისეთი ავტომობილების შექმნას, როგორებიცაა ”ფერარი 599 GTB ფიორანო” და ”მაზერატი გრანტურიზმო”, ასევე კონცეპტუალური ”ფერარი P4/5” და ”მაზერატი ბირდქეიჯი”.

”კასტრიოტა ჩვენთან ერთი წლით დარჩება და ამ პერიოდში, ჩვენთვის ორი ავტომობილის დიზაინს შეიმუშავებს. ამ ავტომობილებს მისი ლოგოტიპი დაამშვენებს და მათ სახელიც მისივე ექნბათ. თქმა არ უნდა, რომ დღეისათვის, ჯეისონი მსოფლიოში სუპერ ავტომობილების საუკეთესო დიზაინერია და გვიხარია, რომ მან ჩვენთან მუშაობაზე თანხმობა განგვიცხადა”, - ამბობს ”შელბი სუპერქარზის” დამაარსებელი და მოდელ ”ალტიმეიტ აეროს” ავტორი ჯეროდ შელბი.

პირველ რიგში, კასტრიოტა მოდელ ”აეროს” ახალი ვერსიის დიზაინს შეიმუშავებს, შემდეგ კი ამ ავტომობილის მომცრო ვერსიას მიხედავს. რა თქმა უნდა, ამ ავტომობილების შესახებ, დეტალური ინფორმაცია ჯერჯერობით არ ვრცელდება. სამაგიეროდ, უკვე ცნობილია, რომ მათი ძარები მთლიანად კარბონის კომპოზიტისგან დამზადდება.

ამასთან, ჯეროდ შელბი აცხადებს, რომ ახალი ”აერო” მის წინმორბედზე დაახლოებით ორჯერ ძვირი - 800-900 ათასი აშშ დოლარი ეღირება, მეორე ავტომობილის მიახლოებითი ფასი კი 300 ათასი დოლარი იქნება. საერთო ჯამში, ”შელბი” 12 ცალი ”აეროსა” და 50 ცალი მეორე მოდელის წარმოებას გეგმავს.

შეგახსენებთ, რომ ავტომობილი ”SSC ალტიმეიტ აერო” 2007 წელს გინესის რეკორდების წიგნში შეიტანეს. ამის მიზეზი კი ის გარემოება გახდა, რომ ამ მანქანამ სერიული ავტომობილებისთვის სარეკორდო სიჩქარე - 411 კმ/სთ განავითარა. ”ალტიმეიტ აეროს” ამ მიღწევაში ბენზინზე მომუშავე V8 ძრავი დაეხმარა, რომლის მუშა მოცულობა 6.2 ლიტრია. წყვილი ტურბოკომპრესორის დახმარებით, ეს აგრეგატი 1183 ცხენის ძალას ავითარებს. ეს კი საკმარისია იმისათვის, რომ ავტომობილმა ადგილიდან 100 კმ/სთ სიჩქარე 2.8 წამში აკრიფოს.

სხვათა შორის, კომპანიის ინჟინერთა გათვლებით, ”SSC ალტიმეიტ აეროს” მაქსიმალური სიჩქარე 436 კმ/სთ-ია.