Tuesday, December 29, 2009

მარხილები სანტა კლაუსისთვის

29 დეკემბერი

Sleighs for Santa

ახალ წელს ყველა განსაკუთრებულად მომზადებული ხვდება - ნაძვის ხე, ტკბილეული, ზეიმები და საჩუქრები ის ატრიბუტიკაა, რომელთა გარეშეც ახალი წლის დადგომა წარმოუდგენელია. რა თქმა უნდა, ახალი წელი თოვლის ბაბუის, სანტა კლაუსის გარეშე არ არსებობს. ის ხომ ბავშვებს და არამხოლოდ ბავშვებს, საჩუქრებით ახარებს. თავად მისთვის საჩუქრის მირთმევაზე კი არავინ ზრუნავს.

უფრო სწორედ, ადრე არავინ ზრუნავდა. თუმცა ამ ნაკლის გამოსწორება შარშან ინგლისურმა საავტომობილო ჟურნალმა ”ქარ-მა” სცადა, რომელმაც საავტომობილო კომპანიებს სანტასთვის მისი ტრადიციული სატრანსპორტო საშუალების - მარხილის თანამედროვე ვარიანტების ესკიზების შედგენა სთხოვა და ამ თემაზე ერთგვარი საჟურნალო ფესტივალიც ჩაატარა.

და, თქვენ წარმოიდგინეთ, წამოწყება იმდენად საინტერესო გამოდგა, რომ ”ქარ-ის” რედაქციამ ის წელსაც გაიმეორა. ისევე როგორც შარშან, მასში მონაწილეობა კვლავ დიდი ავტომწარმოებლების დიზაინერებმა მიიღეს, იმ ხალხმა, რომლებიც მსოფლიოში ცნობილ ავტომობილებს აპროექტებენ. აბა, ხუმრობა ხომ არ არის - მათი ნამუშევარი პატარების საყვარელ ადამიანს უნდა მოეწონოს.

შარშანდელის მსგავსად, დიზაინერებმა კვლავ მეტად ორიგინალური ნამუშევრები წარმოადგინეს, რომლებშიც მათი კომპანიების საფირმო სტილების გავლენა აშკარად იგრძნობა. სხვანაირად არც შეიძლებოდა ყოფილიყო - მართალია, სანტას მარხილების ფესტივალი უბრალო გასართობი, სავარჯიშოა, მაგრამ საბოლოო პროდუქტი მაინც ამათუიმ მწარმოებლის სახე უნდა ყოფილიყო. და ასეცაა, ყველა ნამუშევარში, მათი შემქმნელი კომპანიების კორპორატიული სტილი შეინიშნება.

აი, ნახეთ ”ასტონ მარტინის” მარხილი. მანქანისგან განსხვავებით, მას ბორბლები არ აქვს, მაგრამ ის ხომ მარხილია. სამაგიეროდ, დახვეწილი აეროდინამიკით გამოირჩევა და სავარაუდოდ, მისთვის 320 კმ/სთ სიჩქარის აკრეფა პრობლემას არ უნდა წარმოადგენდეს.

”ქარ-ის” მიმომხილველებმა, ამ მარხილის უკანა ნაწილის სტილი პოპულარულ მოდელ ”ვენტიჯისას” და ”ასტონ მარტინის” ისტორიაში ყველაზე სწრაფი და ძვირადღირებული ”ვან-77-ისას” შეადარეს. რა თქმა უნდა, მსგავსება ძალიან შორეულია, მაგრამ ფაქტი ისაა, რომ გეიდონელთა მარხილი ძალიან ორიგინალური გამოვიდა.

ამ მარხილში ყველაზე საინტერესო მაინც მისი წინა ნაწილია. უფრო ზუსტად, ის ფრთების მსგავსი წარმონაქმნი, რომლებითაც მარხილმა უნდა ისრიალოს. ისინი აეროდინამიკური ელემენტების მოვალეობასაც შეასრულებენ. მათი მეშვეობით, შემხვედრი ჰაერის ნაკადმა სასურველი მიმართულება უნდა მიიღოს და დამშვიდებული ჭავლის სახით, მას გარს შემოუაროს.

მოკლედ, ლაპლანდიაში ასეთი მარხილი აუცილებლად მოეწონებათ...

თუ ”ასტონ მარტინმა” მომავლის მარხილი შექმნა, ”აუდის” დიზაინერებმა, ენცო როთფუსის ხელმძღვანელობით, უფრო პრაგმატული გზა აირჩიეს და სანტასთვის ისეთი მარხილი, უფრო ავტომობილი დახატეს, რომლის მსგავსიც მალე ”ოთხი რგოლის” შოურუმებში გამოჩნდება. ინგოლშტადტელებს ბევრი არც უფიქრიათ და მარხილის ნაცვლად, სანტას ჩვეულებრივი ავტომობილი შესთავაზეს. ესაა ამ კომპანიის სამოდელო გამის ყველაზე პატარა მოდელი A1.

სურათზე რომ ”აუდი A1-ს” ხედავთ, იმასაც შეამჩნევდით, რომ სანტას ის მოუსრიალდა. მაგრამ მანქანა თავისი მძღოლის ნებას მაინც ემორჩილება და ალბათ მალე გასწორდება. სავარაუდოდ, ეს ავტომობილი კვატრო (სრულამძრავიანი, მაბრუნი მომენტის 60:40-ზე განაწილებით) ტრანსმისიით უნდა იყოს აღჭურვილი. თუმცა აშკარაა, ტრადიციული მარხილი თოვლში უფრო უკეთ ივლიდა...

დააკვირდით, ჩვეულებრივი მარხილი სანტას ამ მანქანის თავზე შემოუდვია, ირემი კი წინა სავარძელზე, მის გვერდით მოკალათებულა. მან პენსია აშკარად დაიმსახურა და ამიერიდან, ბავშვებს სანტასთან ერთად გაახარებს.

იქნებ, სანტა ამ მანქანით რალის მსოფლიო ჩემპიონატის პირველ ეტაპზეც ვიხილოთ...

”იაგუარმა” კი სანტას მფრინავი მარხილი შესთავაზა. ალბათ, ამჯერად ბაზისად ძველი სამხედრო თვითმფრინავი გამოიყენეს - მის სტილში, ეს სატრანსპორტო მფრინავი საშუალებაც მოძრაობაში ტურბოხრახნს (პროპელერს) მოჰყავს. ამ ესკიზის ავტორი ხელოვნების სამეფო კოლეჯის კურსდამთავრებული, 25 წლის თომას სმიტია, რომელიც ”დიდი კატის” ავტომობილების ექსტერიერის დიზაინერია, კომპანიაში მუშაობა კი გასულ ზაფხულს დაიწყო.

ისე, მწარმოებლის კორპორატიული სტილი ყველაზე ნაკლებად ამ ნამუშევარში შეინიშნება, თუმცა ეს ალბათ იმიტომ, რომ ამ ეტაპზე, ”იაგუარი” ახალი სტილის ძიებაშია და ვინ იცის, ადრე თუ გვიან, ამ სავარჯიშოს დროს გამოყენებული ზოგიერთი იდეა, იქნებ მალე რეალური კონცეპტუალური ავტომობილების გარეგნობაშიც გამოჩნდეს...

”ლენდ როვერმა” კი, როგორც ამ კომპანიას შეეფერება, ისევ სრულამძრავიანი სატრანსპორტო საშუალება შექმნა. პროექტი ”ლენდ როვერის” პერსპექტიული დიზაინის განყოფილების შეფ ოლივერ ლე გრაისის ხელმძღვანელობით, ფლორიან დოუბმა შეიმუშავა.

”მარხილს” სიგარას ფორმა აქვს და ორადგილიანია. უკანა ადგილზე თავად სანტა მოთავსებულა, წინ კი ირემი ზის, რომელიც ”ლენდ როვერმაც” დამსახურებული პენსიით უზრუნველყო. პროექტის თანმდევი რელიზი გვამცნობს, რომ ავტომობილი ასევე აღჭურვილია საჩუქრის ადგილამდე მიტანის ლაზერული სისტემით - აქ აშკარად სამხედრო ტექნოლოგიაა გამოყენებულ. ოღონდ, ამჯერად საჩუქარს მიზნამდე საბრძოლო რაკეტა კი არა, საჩუქარი მიაქვს.

სხვა კონკურსანტებისგან განსხვავებით, ”ლენდ როვერმა” თავის პროექტს ტექნიკური სპეციფიკაციაც მოაყოლა. მასში აღნიშნულია, რომ მარხილს ცვალებადი სიმაღლის საკიდარი აქვს. ამგვარად, კომპანია თავის სისტემა ”ტერაინ რესპონსს” უკეთებს რეკლამას. ყველაზე საინტერესო კი მარხილის ძალური დანადგარია. ესაა დამუხტული ნაწილაკების ამაჩქარებელი. ეს აშკარად კოსმოსური ინდუსტრიის მომავლის აგრეგატია და ბუნებრივია, რომც არ გაგვაფრთხილონ, ისედაც მივხვდებით, რომ ასეთ აგრეგატს ”ლენდ როვერის” ავტომობილებზე არ უნდა ველოდოთ. ჯერჯერობით მაინც...

დაბოლოს ”ვოქსჰოლის” – ”ოპელის” ინგლისელი ნათესავის პროექტი. ეს ყველაზე მეტად ჰგავს მარხილს და იმავდროულად, ავტომობილის (უახლესი ასტრას და ამპერას) ძარასაც. კონცეპტუალური ”ამპერას” მსგავსად, მარხილიც ჰიბრიდულ სისტემა E-REV-ით (ელექტრომობილი სვლის გაზრდილი მარაგით) არის აღჭურვილი. ეს სისტემა იმით გამოირჩევა, რომ მასში ძირითად მამოძრავებელ მომენტს ელექტროძრავი გამოიმუშავებს და თუ სანტას ვოიაჟისას, აკუმულატორებში დაგროვილი ენერგია ამოიწურა, საქმეში შიდაწვის მცირელიტრაჟიანი ძრავი და მასთან დაკავშირებული ელექტროგენერატორი ჩაერთვება, რომლებიც აკუმულატორების ბლოკს დამუხტავენ. ამ ტექნოლოგიას ”ჯენერალ მოტორსი” პირველად ”შევროლე ვოლტზე” გამოიყენებს, შემდეგ კი ”ოპელ/ვოქსჰოლ ამპერას” ჯერიც დადგება...

Saturday, December 26, 2009

”ფერარი” ჟენევისთვის ჰიბრიდულ მოდელს ამზადებს

Ferrari Planning Mild Hybrid 599 For Geneva

260 დეკემბერი

იტალიურ გამოცემა ”კვატრორუტეს” მიერ გავრცელებული ინფორმაციით, ”ფერარი” ჟენევის ავტო შოუზე თავისი პოპულარული მოდელის, ”599 GTB ფიორანოს” ჰიბრიდულ ვერსიას გამოფენს. ჟურნალის ცნობით, ეს ავტომობილი ”სოფტ” ჰიბრიდი იქნება და ის აღჭურვაში კინეტიკური ენერგიის რეკუპერაციის სისტემას (KERS) მიიღებს, რომელსაც იტალიური კომპანია გასულ სეზონში ფორმულა 1-ის ბოლიდებზე იყენებდა.

ეს სისტემა, რომელიც ელექტროძრავისა და ლითიუმ-იონური აკუმულატორების ბლოკისგან შედგება, ავტომობილის უკანა ნაწილში განლაგდება. აკუმულატორების ბლოკი ენერგიით დამუხრუჭებისას იმუხტება და შემდეგ ამ ენერგიას ელექტროძრავს აწვდის.

ჰიბრიდულ დანადგარს ავტომობილი სიმძლავრის მცირე ხნით გაზრდისთვის გამოიყენებს (როგორც ფ1-ში). გარდა ამისა, ამ დანადგარსვე შეუთავსდება სისტემა სტოპ-სტარტის დანიშნულებაც. სისტემა შუქნიშნებზე ძრავს გამორთავს და მაშინვე ჩართავს, როგორც კი მძღოლის აქსელერატორის სატერფულს დააწვება.

”კვატრორუტეს” ინფორმაციით, კერს-ის გამოყენებით, ავტომობილის ეკონომიურობა მნიშვნელოვნად, 35 რპოცენტით გაუმჯობესდება. კერძოდ, 100 კილომეტრის გასავლელად, ”599 GTB ფიორანოს” 27-ის ნაცვლად, 17 ლიტრი საწვავი ეყოფა. ამასთან, მნიშვნელოვნად შემცირდება გამონაბოლქვში ნახშირორჟანგის შემცველობა. ცნობისათვის, ეს ავტომობილი 6.0-ლიტრიანი V12 ძრავითაა აღჭურვილი, რომელიც 620 ცხენის ძალას ავითარებს.

სხვათა შორის, ცოტა ხნის წინ, ”ფერარიმ” ჰიბრიდული სრულამძრავიანი ტრანსმისია დააპატენტა, რომელშიც თითო ღერძს თითო ელექტროძრავი ემსახურება. თუმცა, ამა სისტემის წარმოებაში დანერგვა უახლოეს წლებში არ იგეგმება.

ყველაზე სწრაფი ”ასტონ მარტინი”

Aston Martin One-77 Breaks the 200MPH Mark

23 დეკემბერი

”ასტონ მარტინის” ისტორიაში ყველაზე სწრაფი ავტომობილის სტატუსი სუპერ ავტომობილმა ”ასტონ მარტინ ვან-77-მა” დაისაკუთრა. ეს კი მას შემდეგ მოხდა, რაც ამ ავტომობილის ტესტირებისას, მაქსიმალური სჩქარე 355 კმ/სთ დაფიქსირდა. არადა, ამ ავტომობილის მონაცემებში, რომლებიც ადრე ინგლისურმა კომპანიამ გამოაქვეყნა, წერია, რომ მისი მაქსიმალური სიჩქარე 321 კმ/სთ-ის.

ინგლისურ გამოცემა ”ავტოქარის” ინფორმაციით, ავტომობილის ტესტები ქარიან ამინდში ჩატარდა და კომპანიაში ვარაუდობენ, რომ უფრო ხელსაყრელ პირობებში, სიჩქარე უფრო მეტიც იქნებოდა.

ამ ავტომობილის მსოფლიო პრემიერა წელს, ჟენევის ავტო შოუზე ჩატარდა. ვან-77-ს უკანა წამყვანი ბორბლები აქვს, მისი შასი კარბონის კომპოზიტისგანაა დამზადებული. ძრავის სექციაში განლაგებულია 7.3-ლიტრიანი V12, რომლის სიმძლავრეც 700 ცხენის ძალას შეადგენს. მის მიერ გამომუშავებულ მაბრუნ მომენტს 6-საფეხურიანი სეკვენტალური გადაცემათა კოლოფი გადაამუშავებს. ამ ტანდემის მეშვეობით, ავტომობილს 100 კმ/სთ სიჩქარის აკრეფა 3.5 წამში შეუძლია, მის მაქსიმალურ სიჩქარეზე კი უკვე ითქვა.

”ასტონ მარტინი” მხოლოდ 77 ცალ ვან-77-ს დაამზადებს. სხვათა შორის, ინგლისურ კომპანიას მთელ ამ ტირაჟზე წინასწარი შეკვეთები უკვე მიღებული აქვს. არადა, წინასწარი შენატანის ოდენობა 200 000 გირვანქა სტერლინგს შეადგენს. სრულად კი ავტომობილი 1.2 მილიონი გირვანქა სტერლინგი (დაახლოებით 1.9 მილიონი დოლარი) ღირს.

პირველი ვან-77 ვიღაც ავსტრალიელს შეუძენია, რომელსაც საბაჟო გადასახადისა და სხვა მოსაკრებლების დამატების შემდეგ, ავტომობილი 3.8 მილიონი დოლარი უჯდება.

”ასტონ მარტინი” ვან-77-ზე მიღებული შეკვეთების შესრულებას 2010 წლის ზაფხულიდან დაიწყებს.

Wednesday, December 23, 2009

”კადილაკი” დეტროიტში ახალ კონცეპტუალურ მოდელს გამოფენს

Cadillac CTS-V Coupe Concept Confirmed for Detroit

23 დეკემბერი

”ჯენერალ მოტორსის” ლუქსის კლასის ავტომობილების მწარმოებელმა ბრენდმა ”კადილაკმა” დეტროიტის ავტო შოუსთვის, რომელიც სტარტს 12 იანვარს აიღებს, ახალი კონცეპტუალური ავტომობილი მოამზადა, რომლის ფოტო ტისერი და პრეს რელიზი წინასწარ გამოაქვეყნა.

რა თქმა უნდა, ამ ავტომობილის შესახებ დეტალურ ინფორმაციას ”გენერლები” დეტროიტში პრეზენტაციისთვის ინახავენ. თუმცა, ინტერნეტით ზოგიერთმა საავტომობილო გამოცემამ უკვე გამოთქვა ვარაუდი იმის შესახებ, რომ ის ”კადილაკის” ფლაგმანის, სედან DTS-ის შემცვლელის პროტოტიპია. ამასთან, ახალ ავტომობილს სახელად XTS-ს დაარქმევენ, მისი წარმოება კი 2011 წელს დაიწყება.

ახალი კონცეპტუალური მოდელის გარდა, ”კადილაკი” დეტროიტის შოუს დამთვალიერებლებს ასევე წარუდგენს სედან CTS-ის ბაზაზე დამზადებულ კუპეს, რომლის პრეზენტაციაც კომპანიამ ერთი თვის წინ ჩაატარა. ეს ავტომობილი ”კადილაკის” ამერიკელი დილერების შოურუმებში გაზაფხულზე გამოჩნდება.

კუპე 3.6-ლიტრიანი V6 ძრავითაა აღჭურვილი, რომელიც 304 ცხენის ძალას ავითარებს, მასთან კი 6-საფეხურიანი მექანიკური კოლოფია შეწყვილებული. ამ ტანდემით, ქალაქგარეთ მოძრაობისას, ავტომობილი 100 კილომეტრზე მხოლოდ 8.7ლიტრ საწვავს მოიხმარს.

კუპე თავის ნათესავ სედანზე 51 მილიმეტრით მოკლე და ამდენივეთი დაბალია. მისი სტანდარტული ვერსია უკანა წამყვანბორბლიანი ტრანსმისიით აღიჭურვება, მყიდველს კი სურვილის შემთხვევაში, სრულამძრავიანი ტრანსმისიის მოთხოვნის საშუალებაც ექნბა. კუპეს საკიდარი ორ - ჩვეულებრივსა და ზაფხულის რეჟიმში მუშაობა შეუძლია.

კუპე CTS-ის ფასი, სავარაუდოდ, დეტროიტში გამოცხადდება.

Tuesday, December 22, 2009

რუსთავში ახალი ავტობაზრობა გაიხსნა

20 დეკემბერი

19 დეკემბერს, რუსთავში, სარბოლი ავტოდრომის მახლობლად, ახალი, კეთილმოწყობილი საავტომობილო ბაზრობა გაიხსნა, სადაც, მეორადი ავტომობილების ბაზარმა დიღმის ავტობაზრობიდან გადაინაცვლა.

ბაზრობას 25 ჰექტარი ფართობი უკავია და ის თითქმის მთლიანად ბეტონის სტრუქტურითაა დაფარული. ახალი ბაზრობა რუსთავის შესასვლელთან მდებარეობს და მასთან ორი ფართე, ასევე ბეტონისსაფარიანი გზა მიგიყვანთ. მის ტერიტორიაზე ტუალეტები და სწრაფი კვების ობიექტები მუშაობს, სადაც მაქსიმალურადაა დაცული ჰიგიენური პირობები.

ყველაზე მთავარი კი ისაა, რომ ბაზრობის ხელმძღვანელობა ავტომობილების მყიდველსაც და გამყიდველსაც მაქსიმალურ კომფორტს სთავაზობს. ბაზრობაზე მუშაობს ”ტაოპრივატბანკის” ფილიალი, სადაც ნებისმიერ დროსაა შესაძლებელი ავტომობილის შესაძენად კრედიტის გამოტანა. აქვეა საბაჟო სამსახური, სადაც ავტომობილის შემომყვანი მოკლე ვადაში შეძლებს ავტომობილის განბაჟებას. ბაზრობა პოლიციის მომსახურების რუსთავის ცენტრის გვერდზე მდებარეობს, რაც მყიდველს, მის მიერ შეძენილი ავტომობილის წუთებში გადაფორმების და ნომრების აღების საშუალებას მისცემს.

რუსთავის ბაზრობა ძალიან მოსახერხებელი იქნება მეზობელი აზერბაიჯანისა და სომხეთის მოქალაქეებისთვისაც, რომლებიც მეორადი ავტომობილების ქართულ ბაზარზე მუშაობენ და განაპირობებენ იმ ფაქტს, რომ საქართველოდან პროდუქციის ექსპორტში ერთ-ერთი მოწინავე პოზიცია ავტომობილების რეექსპორტს უკავია.

აზერბაიჯანელი და სომეხი ავტო-კომერსანტები ბაზრობის გახსნის ცერემონიასაც მრავლად დაესწრნენ და მართალია, ისინი ჩიოდნენ, რომ ავტომობილების ფასი გაზრდილია, მაგრამ დროთა განმავლობაში, ამ ფაქტორს თვითონ ბაზარი დაარეგულირებს და ისინიც ჩვეულ რეჟიმში გააგრძელებენ ავტომობილების გაყვანას.

ახალი ბაზრობა ”ტაოპრივატბანკის” ინვესტირებით აშენდა და ის 25 მილიონი დოლარი დაჯდა. გახსნის ცერემონიალზე, ქვემო ქართლის გუბერნატორმა დავით კირკიტაძემ განაცხადა, რომ ახალ ბაზრობას რუსთავისა და მთლიანად რეგიონის განვითარებისთვის დიდი მნიშვნელობა ექნება - შეიქმნება ახალი სამუშაო ადგილები და დაიხვეწება ინფრასტრუქტურა, რაც ქვემო ქართლში ახალი ინვესტიციების მოზიდვის საფუძველი გახდება.

რა თქმა უნდა, ბაზრობიდან შესული გადასახადები მნიშვნელოვნად წაადგება როგორც ქვემო ქართლის და რუსთავის, ასევე ქვეყნის ბიუჯეტსაც. კირკიტაძის თქმით, რუსთავის ახალი ავტობაზრობა, ერთ-ერთი უდიდესია ყოფილ საბჭოეთში და აღმოსავლეთ ევროპის რეგიონში.

ბაზრობის უკრაინელმა დირექტორმა ევგენი უსტინოვმა განაცხადა, რომ ბაზრობაზევე მალე აშენდება ავტომობილების მომსახურების და სერვისის ცენტრები, ასევე ავტო სამრეცხაო და სასტუმრო, რომელიც განსაკუთრებით მიმზიდველი მეზობელი ქვეყნებიდან ჩამოსული კომერსანტებისთვის გახდება.

ბატონმა კირკიტაძემ ასევე განაცხადა, რომ მალე, კერძოდ კი გაზაფხულზე, ძველი ავტოდრომის ადგილზე, ბაზრობის გვერდზე, ახალი, ევროპული სტანდარტის შესაფერისი ავტოდრომის მშენებლობა დაიწყება, რომელიც სავარაუდოდ, მწყობრში სამ წელიწადში ჩადგება. ამ ავტოდრომზე ჩატარდება როგორც ადგილობრივი, საერთაშორისო მნიშვნელობის რბოლები. ამ ეტაპზე კი მისი პროექტი დამუშავების პროცესშია...

Sunday, December 20, 2009

ტრევის პასტრანა ახალ წელს სარეკორდო ნახტომს შეასრულებს

Travis Pastrana

20 დეკემბერი

ტრევის პასტრანა
..........................................
ახალი წლის ღამეს, ლონგ ბიჩის (აშშ, კალიფორნია) ათიათასობით მცხოვრები და ქალაქის სტუმრები საინტერესო და მეტად სახიფათო სანახაობის მოწმენი გახდებიან: ტრიუკების სახელგანთქმული ოსტატი, თავგადასავლების მაძიებელი და რალიში აშშ-ის ოთხგზის ჩემპიონი ტრევის პასტრანა წარმოუდგენელ ტრიუკს შეასრულებს და გინესის რეკორდების წიგნში მოხვედრას ეცდება.

პასტრანა ვარჯიშისას

...............................................

ზუსტად იმ დროს, როდესაც საათი 12-ჯერ დარეკავს და ახალი წლის დადგომას გვამცნობს, პასტრანა, ვინც მომავალ სეზონში, რალის მსოფლიო ჩემპიონატზე ”სუბარუ იმპრეზათი” იასპარეზებს, ამ მანქანით წარმოუდგენელ ნახტომს შეასრულებს და ლონგ ბიჩის პორტშე სპეციალურად მოდრეიფე ბარჟაზე დაშვებას ეცდება.

პასტრანა ამერიკაში მეტად პოპულარული პიროვნებაა. დღეისათვის ის ერთადერთია მსოფლიოში, ვისაც ქროსის მოტოციკლით, ნახტომში ორმაგი უკანა ბრუნი აქვს შესრულებული. მას მოპოვებული აქვს X-თამაშების 9 მედალი და კლასიკურ რალიში აშშ-ის ბოლო ოთხი ჩემპიონატი აქვს მოგებული. მის მიღწევებს ამერიკაში არაერთი სდატელევიზიო გადაცემა მიეძღვნა. მერმის პასტრანა რალის მსოფლიო ჩემპიონატზე იასპარეზებს და იმედოვნებს, რომ ხელცარიელი არც ამჯერად დარჩება. თუმცა, მანამდე ძალიან სახიფათო ტრიუკს შეასრულებს და ამით, მთელ მსოფლიოს კიდევ ერთხელ გააკვირვებს.

ადგილი,სადაც პასტრანა ნახტომს შეასრულებს

............................................................................................

სარეკორდო ნახტომი ავსტრიულ კომპანია ”რედ ბულის” მიერაა ორგანიზებული და შოუს ”ახალი წელი - არანაირი საზღვარი” ეწოდება. მას ტელეკომპანია ”იესპიენი” მთელ ამერიკას და მსოფლიოს პირდაპირი ეთერით უჩვენებს.

”მოუთმენლად ველი, რომ ამ მოვლენის ნაწილი გავხდე. ავტომობილით წყლის თავზე ნახტომის შესრულება და მოტივტივე ბარჟაზე დაშვება სცილდება ყველაფრის საზღვარს, რაც კი ოდესმე შემისრულებია. პირდაპირ ეთერში შესრულებული ტრიუკი ყოველთვის ათმაგად საინტერესოა ფანებისთვისაც და შოუს მონაწილეებისთვისაც. ამ ნახტომის წარმატება ძალიან ბევრ ფაქტორზეა დამოკიდებული. ჩემს ცხოვრებაში ბევრი სახიფათო ტრიუკი შემისრულებია და ეს წუთები ყველაზე ამაღელვებელი და მნიშვნელოვანია”, - ამბობს პასტრანა.

”გვიხარია, რომ უკვე მესამე წელია, ”რედ ბულთან” ერთად, ასეთ საინტერესო შოუებს ვაშუქებთ. ჩვენი ტელეკომპანიის მიზანი, მაყურებლისთვის ცოცხალი, საინტერესო და ამაღელვებელი სანახაობების შეთავაზებაა. ეს კი განსაკუთრებული შოუ იქნება - არ მახსოვს სხვა მსგავსი შოუ, რომელსაც ამდენი ინტერესი გამოეწვიოს. ”ახალი წელი, არანაირი საზღვარი” ყველაზე გამორჩეული ექსტრემალური სანახაობა იქნება, რაც კი ოდესმე რომელიმე ტელევიზიას გადაუცია”, - ამბობს ”იესპიენის” ვიცე პრეზიდენტი ჯოან ლინჩი.

პასტრანა ნახტომს ლონგ ბიჩის ნავსადგურის მახლობლად, პაინ სტრიტის დამბიდან შეასრულებს, და ნავსადგურში მოდრეიფე ბარჟაზე დაშვებას ეცდება. წინასწარი გათვლებით, ნახტომის შემდეგ, პასტრანას ”სუბარუ იმპრეზა” 50 მეტრზე მაღლა უნდა აფრინდეს. ბარჟა კი მას დაახლოებით 200 მეტრის სიშორეზე დაელოდება.

მიმომხილველები პასტრანას ტრიუკს გოლფის თამაშს ადრიან, როდესაც გოლფმენი ცდილობს, ბურთი წყალს გადაატაროს. ოღონდ, ამ შემთხვევაში, პასტრანა უფრო გოლფის ბურთის როლში იქნება. გოლფის ბურთივით, ის რაც შეიძლება, მაღლა უნდა აფრინდეს, რაღა საჭირო მანძილზე იფრინოს და ბარჟაზე მშვიდობიანად დაეშვას. ამასთან, არც მეტისმეტი უნდა მოუვიდეს, რომ წყალში არ ჩავარდეს.

”იესპიენის” წინა ორ საახალწლო შოუში პასტრანასავით თავზეხელაღებული რობი მედისონი და რის მილენი მონაწილეობდნენ, რომლებმაც ნახტომები შესაბამისად, მოტოციკლით და ქროსის ავტომობილით შეასრულეს. თან, მილენმა თავისი საქროსო მანქანით ხტომისას, რამდენიმე გვერდითი ბრუნიც შეასრულა.

Friday, December 18, 2009

”ბეემვე” დეტროიტში ელექტრულ ერთიანს წარადგენს

BMW Reveals All-Electric 1-Series Coupe

18 დეკემბერი

დეტროიტის საავტომობილო შოუზე, რომელიც იანვარში გაიმართება, ”ბეემვე” თავისი 1-ლი სერიის კუპეს ბაზაზე შექმნილ კონცეპტუალურ ელექტრომობილს გამოფენს. ამ ავტომობილის შექმნისას, ბავარიელებმა ის ტექნოლოგიები გამოიყენეს, რომლებიც პირველად ”მინის” ელექტრულ ვერსიაზე გამოსცადეს. ოღონდ, ამჯერად ავტომობილს, ისევე როგორც მის საბაზო ვერსიას, წამყვანი უკანა ბორბლები აქვს.

ბავარიელთა ექსპონატის სახელია ”ბეემვე 1-ლი სერიის აქტივE”. მისი მთავარი აგრეგატი ელექტროძრავია, რომელიც 170 ცხენის ძალასა და 250 ნიუტონმეტრს ავითარებს. აგრეგატი ბორბლებს შორის ბაზაშია მოთავსებული და ის ლითიუმ-იონური აკუმულატორების ორი ბლოკისგან იკვებება. ამ ორი ბლოკიდან, ერთი იმ ადგილზეა მოთავსებული, რომელიც ჩვეულებრივ ავტომობილში საწვავის ავზს უკავია, მეორეს კი შიდაწვის ძრავის ადგილი უკავია.

აკუმულატორები საყოფაცხოვრებო ქსელიდან იკვებება და მათი სრული დამუხტვისთვის სულ 4.5 საათია საჭირო. მათში დაგროვილი ენერგიით, ელექტრომობილს 160 კილომეტრის გავლა შეუძლია, მისი ძრავის სიმძლავრე კი საკმარისია იმისათვის, რომ 1 800-კილოგრამიანმა ავტომობილმა ადგილიდან 100 კმ/სთ სიჩქარე 9 წამზე ნაკლებში აკრიფოს.

ავტომობილი აღჭურვილია გენერატორით, რომელსაც დამუხრუჭებისას გამოყოფილი ენერგიის დაგროვება შეუძლია. ეს კი მისი სვლის სიშორეს აუმჯობესებს. ძარა სპეციალური აეროდინამიკური პაკეტითაა აღჭურვილი, რაც ჰაერის წინააღმდეგობას ამცირებს. ენერგიის ეკონომიას შემცირებული წინააღმდეგობის მქონე საბურავებიც უწყობს ხელს.

სავარაუდოდ, ”ბეემვე” 1-ლი სერიის მოდელის ბაზაზე შექმნილი ელექტრომობილის მცირესერიულ წარმოებას მერმისვე შეუდგება და მათ სხვადასხვა კომპანიებს ლიზინგით გადასცემს. ჯერჯერობით უცნობია, როდისთვის იგეგმება ამ ელექტრომობილის კონვეიერზე დაყენება.

”ვოლვოს” ელექტრომობილის დებიუტი დეტროიტში შედგება

Electric Volvo C30 to Debut in Detroit

18 დეკემბერი

შვედური საავტომობილო კომპანია ”ვოლვო”, რომელიც დღე-დღეზე ჩინური ”ჯილის” ხელში გადავა, დეტროიტის საერთაშორისო საავტომობილო შოუზე თავის პირველ ელექტრომობილს გამოფენს, რომელიც ჰეჩბეკ C30-ის ბაზაზეა მომზადებული.

ელექტრომობილი 111-ცხენისძალიანი ელექტროძრავითაა აღჭურვილი, რომელსაც სრულად დამუხტული აკუმულატორების მეშვეობით, ავტომობილის მაქსიმუმ 130 კმ/სთ-მდე აჩქარება შეუძლია, ადგილიდან 100 კმ/სთ-მდე კი აჩქარებას 10.5 წამი სჭირდება. ლითიუმ-იონური აკუმულატორების ბლოკი, რომელიც 280 კილოგრამს იწონის, სრულად 8 საათში იმუხტება.

”ვოლვოს” განყოფილება ”სპეშლ ვიჰაიქლზის” შეფი ლენარდ სტეგლანდი ამბობს, რომ მისი კომპანიის მიერ შექმნილი ელექტრომობილი უსაფრთხოების ყველა ნორმას აკმაყოფილებს და იმავდროულად, საკმაოდ კარგი დინამიკური მახასიათებლებიც აქვს. მისი თქმით, ”ვოლვო” 50 ელექტრომობილს 2011 წელს დაამზადებს და მათ ხანგრძლივი მოგზაურობის დროს გამოცდის.

”რინსპიდი” საქალაქო ელექტრომობილს ამზადებს

Rinspeed UC? Concept to Debut in Geneva

18 დეკემბერი

შვეიცარული სადიზაინერო ატელიე ”რინსპიდი”, რომელიც ”პორშეს” ავტომობილების სრულყოფითა და ორიგინალური კონცეპტუალური ავტომობილების დამზადებითაა ცნობილი, ჟენევის საავტომობილო შოუსთვის მორიგ ექსპერიმენტულ ავტომობილს ამზადებს.

ავტომობილს, ისევე როგორც ელექტრომობილების უმეტესობას უცნაური სახელი აქვს - UC?. რას შეიძლება, ეს აბრევიატურა აღნიშნავდეს? ალბათ ”ურბან ქარს”, ანუ ქალაქის ავტომობილს. მაგრამ მაშინ კითხვის ნიშანი რაღა შუაშია. ან იქნებ, UC? ამერიკულ სტილში, ”იუ სი?”-ს, ანუ ”გინახავთ?” ნიშნავს. ასეა თუ ისე, ”რინსპიდი” ამ უცნაური აბრევიატურის შესახებ ჯერჯერობით არაფერს ამბობს. თავის დროზე ალბათ იტყვის.

UC? ისეთივე მოკლეა, როგორც მისი სახელი - სიგრძით სულ რაღაც 2.50 მეტრია. ესე იგი, ”სმარტზე” პატარაა. ელექტრომობილს ორი ადამიანის გადაყვანა შეუძლია, მისი სვლის სიშორე კი 120 კილომეტრს აღწევს. ვისაც ეს ეცოტავება და შორი მოგზაურობა სურს, ”რინსპიდი” სპეციალური სარკინიგზო ვაგონების გამოყენებას სთავაზობს, რომლებზე მგზავრობის დროსაც, UC? თავისი აკუმულატორების დამუხტვასაც შეძლებს.

შვეიცარული კომპანია არ გვიმხელს, თუ რა დროა საჭირო აკუმულატორების სრულად დასამუხტად. სამაგიეროდ, ცნობილია, რომ პარკირების მოედანზე, სადაც ენერგიის შევსებაცაა შესაძლებელი, ადგილის დაჯავშნა წინასწარ, ინტერნეტის მეშვეობით იქნება შესაძლებელი.

”რინსპიდის” შეფი ფრანკ რინდერკნეხტი ამბობს, რომ მის ”კომპანიას ერთგვარი საზოგადოების ჩამოყალიბება სურს, რომლისთვისაც მობილურბას სულ სხვა დატვირთვა ექნება”.

UC?-ს საჭის რგოლი არ აქვს, მისი მართვა კი მანქანის სალონში მდებარე ცენტრალურ გვირაბზე მოთავსებული ჯოისტიკით შეიძლება. ”რინსპიდის” განცხადებით, მისი ჯუჯა ელექტრომობილის მაქსიმალური სიჩქარე 110 კმ/სთ-ს მიაღწევს.

ატელიეს ხელმძღვანელობა აცხადებს, რომ ”რინსპიდის” სხვა კონცეპტუალური მოდელებისგან განსხვავებით, UC?-ს კონვეიერზე მოხვედრის სოლიდური შანსი ექნება. ამასთან, რინდერკნეხტის თქმით, ამ კონცეპციის მიხედვით ავტომობილების წარმოების უფლების ყიდვის საშუალება ნებისმიერ კომპანიას მიეცემა.

Thursday, December 17, 2009

”ასტონ მარტინმა” ”ბარტყის” კონცეპცია მოამზადა

Aston Martin Cygnet Concept Official Images

17 დეკემბერი

”ასტონ მარტინმა” თავისი მომავალი ჯუჯა ავტომობილის, ”სიგნიტის” (ბერტყის” კონცეპტუალური ვერსიის ოფიციალური ფოტოები და ტექნიკურო მონაცემები გაავრცელა. ავტომობილი, რომლის გაყიდვებიც მერმის უნდა დაიწყოს, ”ტოიოტას” ჯუჯა iQ-ს ბაზაზეა შექმნილი და მის სახეშეცვლილ და უფრო მდიდრულ ვერსიას წარმოადგენს.

ბრიტანული კომპანიის განცხადებით, მართალია, ”სიგნიტის” კონცეპტუალური ვერსია უკვე მზადაა, მაგრამ მისი ტესტირება და სრულყოფის პროცესი ჯერაც არ დასრულებულა. ამ ავტომობილის სერიული წარმოების დაწყება კი მომავალი წლის მიწურულიდან იგეგმება.

გარეგნულად, iQ-სგან ”სიგნიტს” წინა ნაწილის ასტონისეული გაფორმება განასხვავებს. ინგლისური ჯუჯას რადიატორის ბადე საფირმო სტილშია შესრულებული, მის ზემოთ კი, კაპოტზე, ”ასტონ მარტინის” ლოგო წამოსკუპებულა, რომელიც დანახვისთანავე, ამ ჯუჯა ავტომობილისადმი პატივისცემით განგაწყობთ. ყურადღებას ასევე იქცევს კაპოტზე დატანილი ”სასუნთქები”, რომლებიც ”ასტონ მარტინ V12 ვენტეჯის” ანალოგიურ ელემენტს მოგაგონებთ. ავტომობილი მისთვის უზარმაზარ, 16-დუიმიან ბორბლებზე დგას. სალონიც, ინგლისური მარკისთვის შესაფერისად - მდიდრულადაა გაწყობილი, რის ხაზგასმასაც გამოყენებული წითელი ტყავი წარმოადგენს.

რაც შეეხება ”სიგნიტის” ტექნიკას, ის მთლიანად იაპონური კომპანიის წარმოებისაა. პირველ რიგში, ესაა iQ-ს პლატფორმა და 1,33-ლიტრიანი ძრავი, რომელიც სულ რაღაც 98 ცხენის ძალას ავითარებს. სხვათა შორის, ”სიგნიტის” წარმოებისთვის, ”ასტონ მარტინი” iQ-ს დაშლილი სახით იაპონიიდან მიიღებს.

ინგლისურ კომპანიას განზრახული აქვს, რომ ”სიგნიტი” მხოლოდ მათ მიჰყიდოს, ვისაც უკვე სხვა ”ასტონი” აქვს ნაყიდი, ან ახლო მომავალში აპირებს მის შეძენას. შემდეგ კი ამ ჯიშიანი ჯუჯას ყიდვის საშუალება ნებისმიერ მსურველს მიეცემა. ბრიტანეთში ”სიგნიტის” ფასი დაახლოებით 20 000 გირვანქა სტერლინგი იქნება. სულ ”ასტონ მარტინი” წლიურად 1 000-2 000 ცალი ”ბარტყის” წარმებას გეგმავს.

”მინი” დეტროიტში კონცეპტუალურ ბაგი ”ბიჩკომბერს” გამოფენს

Mini Beachcomber Concept Heading For Detroit Autoshow

17 დეკემბერი

საავტომობილო სამყარო ”მინისგან” ქროსოვერს მოუთმენლად ელის. ამ ავტომობილის მსოფლიო პრემიერა მომავალ წელს, ჟენევის საავტომობილო გამოფენაზე იგეგმება. თუმცა, როგორი იქნება მომავალი სიახლე, ამაზე გარკვეულ წარმოდგენას ის კონცეპტუალური ავტომობილი შეგვიქმნის, რომელსაც ”ბეემვეს” ჯგუფში შემავალი ინგლისური მარკა დეტროიტის საერთაშორისო საავტომობილო შოუზე გამოფენს.

ავტომობილი, რომელსაც ”ბიჩკომბერი” უწოდეს, ბაგის სტილშია შესრულებული და ოთხ ადამიანზეა გათვლილი. ის ეგრეთ წოდებულ საპლაჟო უგზოობის ავტომობილების კლასს მიეკუთვნება. ჟანრის შესაბამისად, მას მთლიანად ეხსნება სახურავი და კარებები.

სალონში ყურადღებას ორი საინტერესო ელემენტი იქცევს. ერთია კომპასი, მეორე კი ხელოვნური ჰორიზონტი, რომელზეც რეალური ჰორიზონტის მიმართ, ავტომობილის გადაადგილების გადახრის კუთხე აისახება.

გარეგნულად, ”ბიჩკომბერი” 1960-იან წლებში პოპულარული ”მინი მოუკის” სტილშია შესრულებული. და, რა თქმა უნდა, ამ სტილთან, ”მინის” თანამედროვე ვიზუალია შეხამებული. გარდა ამისა, ავტომობილს გამოარჩევს დიდი ზომის ბორბლები, რომლებიც ღრმაპროტექტორიანი საბურავებითაა შემოსილი, მოხერხებული სავარძლები, რომლებსაც კარგად გამოკვეთილი გვერდითა საყრდენები აქვს და დიდრონი ფარები, რომლებსაც საკმაოდ რთული მოყვანილობა აქვს.

ჯერჯერობით, ”ბეემვე” თავს იკავებს ”მინის” დეტროიტული სიახლის ტექნიკური მახასიათებლების გამხელისგან და არც იმას გვამცნობს, აპირებს თუ არა ამ ორიგინალური ავრომობილის კონვეიერზე დაყენებას.

Sunday, December 13, 2009

”ფოლკსვაგენი” და ”სუზუკი” იაფფასიან ავტომობილს გამოუშვებენ

VW, Suzuki To Build Small Car For India

12 დეკემბერი

”ფოლკსვაგენსა” და ”სუზუკის” შორის ალიანსი საბოლოოდ იანვარში ჩამოყალიბდება, თუმცა პარტნიორებმა უკვე დაიწყეს მუშაობა ახალი, იაფფასიან ავტომობილზე, რომელიც პირველ რიგში, ინდოეთის ბაზრისთვის იქნება განკუთვნილი და რომელმაც ”სუზიკი/მარუტი ალტო” უნდა შეცვალოს.

გავრცელებული ინფორმაციით, ახალი ავტომობილის ღირებულება 200-250 ათასი ინდური რუპიის (დაახლოებით 4 300-5 400 დოლარი) ფარგლებში იქნება, რაც ოდნავ ნაკლებია ახლანდელი ”ალტოს” ღირებულებაზე (224-288 ათასი რუპია, ანუ 4 800-6 200 დოლარი).

დღეისათვის ”სუზუკის” ინდურ ბაზარზე მყარი პოზიცია უკავია - იაპონური კომპანიის პროდუქციაზე ინდოეთში გაყიდული ავტომობილების თითქმის ნახევარი მოდის. მაგრამ მოსალოდნელია, რომ მის პოზიციებს მალე დაემუქრება ”ტატა”, რომლის იაფფასიანი ”ნანოც” იქ დიდი პოპულარობით სარგებლობს. ამას კი მისი დაბალი ფასი განაპირობებს - ეს ჯუჯა ავტომობილი 140 ათასი რუპია (დაახლოებით 2 880 დოლარი) ღირს.

”ფოლკსვაგენმა” და ”სუზუკიმ” ალიანსის შექმნის შესახებ 9 დეკემბერს გამოაცხადეს. მათ შორის მიღწეული გარიგების მიხედვით, გერმანული გიგანტი იაპონური კომპანიის აქციების 19.9 პროცენტს შეიძენს, რაც 2.52 მილიარდი დოლარი დაუჯდება. ”სუზუკი” კი ”ფოლკსვაგენის” აქციების 1.3 პროცენტს გამოისყიდის.

”ფოლკსვაგენი” არ მალავს, რომ იაპონურ კომპანიაში პირველ რიგში, პატარა და იაფფასიანი ავტომობილების წარმოების ტექნოლოგია აინტერესებს. თავის მხრივ, იაპონელები იმ ტექნოლოგიების ათვისებას ეცდებიან, რომლებსაც ვოლფსბურგელები ეკონომიური და ეკოლოგიურად სუფთა ძრავების წარმოებაში იყენებენ.

”მიცუბიში ლანსერი” დაკარს უბრუნდება

The Lancers are back

12 დეკემბერი

მიუხედავად იმისა, რომ დაკარის წლევანდელი რბოლის შემდეგ, მისმა არაერთგზის ტრიუმფატორმა, კომპანია ”მიცუბიშიმ” გამოაცხადა, რომ მომავალ რბოლაში საქარხნო გუნდით ასპარეზობას არ აპირებს, სტარტზე მაინც მისი ხუთი მანქანა - სპეციალურად დაკარისთვის მომზადებული ”ლანსერი” დადგება.

დაკარის წლევანდელ რბოლაში ”მიცუბიშიმ” ოთხი ეკიპაჟით იასპარეზა, მაგრამ აქედან მხოლოდ ერთმა შეძლო ფინიშამდე მიღწევა. საბოლოოდ, იაპონური კომპანიის გუნდმა მეშვიდე ადგილი დაიკავა. თუმცა, მომდევნო რბოლიდან საქარხნო გუნდის მოხსნის მიზეზი ეს წარუმატებლობა კი არა, ფინანსური კრიზისი გახდა.

ფრანგულმა სარბოლმა საჯინიბო ”JMB სტრადალემ”, რომლიც სხვადასხვა სარბოლ სერიებში მონაწილეობს, ”მიცუბიშისგან” დაკარისთვის მომზადებული ხუთი მანქანა და გუნდის სრული ეკიპირება გამოისყიდა და ლეგენდარულ რალი-რეიდში მონაწილეობისთვის ემზადება. ამ რთულ წამოწყებაში კი გუნდს იაპონური კომპანიის საქარხნო გუნდის ყოფილი მენეჯერი დომინიკ სერიე ეხმარება.

”JMB სტრადალეს” შეფ ნიკოლა მესლენს თავადაც არაერთხელ მიუღია მონაწილეობა დაკარის რეიდში. 2002 წელს მან რბოლა მე-10 ადგილზე დაასრულა. ის ამბობს, რომ დიდხანს სურდა საქარხნო გუნდისგან დაკარისთვის მომზადებული ”მიცუბიში პაჯეროს” ყიდვა, მაგრამ ამას ვერ ახერხებდა. მერე კი, როდესაც ამ წლის დასაწყისში გაიგო, რომ ”მიცუბიში” თავის სარბოლ მანქანებს ჰყიდდა, მაშინვე იაპონურ კომპანიას დაუკავშირდა და ჯერ მისგან სარბოლი მანქანები შეიძინა, შემდეგ კი მთელ გუნდსაც დაეპატრონა.

მესლენი თავისი გუნდის მანქანით ასპარეზობას თავადვე აპირებს. მანქანებს მოდერნიზაცია ჩაუტარდათ. კერძოდ, დიზელის აგრეგატები ბენზინისათი შეიცვალა. ეს კი იმისათვის გაკეთდა, რომ მესლენის თქმით, ბენზინის ძრავების სრულყოფა უფრო ადვილია და იაფიც ჯდება.

დაკარის რალი სტარტს ბუენოს აირესში, 1 იანვარს აიღებს, 16 იანვარს კი რბოლა იქვე დასრულდება, ოღონდ მანამდე სამხრეთ ამერიკის სამხრეთ ნაწილს მოივლის. არგენტინისა და ჩილეს მთებში, რალი რეიდის მონაწილეებს დაახლოებით 9 000 კილომეტრი ექნებათ გასავლელი.

ევროპაში უფრო მძლავრი და ძვირი ”ტატა ნანო” გაიყიდება

Tata Nano Europa

12 დეკემბერი

ჟენევის წლევანდელ საავტომობილო შოუზე ნაჩვენები, სპეციალურად ევროპული ბაზრისთვის შექმნილი ”ტატა ნანოს” გაყიდვები 2011 წლამდე არ დაიწყება, მაგრამ მის შესახებ ზოგიერთი ინფორმაცია უკვე ცნობილია. მაგალითად ის, რომ ინდური ჯუჯა უფრო მძლავრი და ეკონომიური ძრავით აღიჭურვება, ასევე მაღალ დონეზე ექნება უსაფრთხოება და კომფორტი. და, რა თქმა უნდა, მისი ფასიც გაიზრდება - თითქმის ორჯერ!

თუ ”ნანოს” ინდური ვერსია აღჭურვილია ორცილინდრიანი, 623 კუბ.სანტიმეტრიანი (0.623 ლიტრი) ძრავით, რომელიც 33 ცხენის ძალას ავითარებს, მისი ევროპული ვერსია სამცილინდრიან, 1.0-ლიტრიან აგრეგატს მიიღებს, რომლის სიმძლავრეც 61 ცხენის ძალა იქნება. ამ ძრავს ახალი, 5-საფეხურიანი მექანიკური გადაცემათა კოლოფი (ინდურ ნანოს 4-საფეხურიანი აქვს) შეუწყვილდება, რომელსაც დაშორებული საფეხურები ექნება, რითაც ძრავს საწვავის ეკონომიასა და გამონაბოლქვში СО2-ის შემცველობის შემცირებაში დაეხმარება.

”ნანოს” ევროპული ვერსია უსაფრთხოების ორი წინა ბალიშით და საჭის გამაძლიერებლით აღიჭურვება. გარდა ამისა, ავტომობილს ექნება ბლოკირების საწინააღმდეგო და ბორბლების ადგილზე მოსრიალების საწინააღმდეგო სისტემები. და, შესაძლოა, ის 14-დუიმიან ბორბლებზეც დადგეს, როგორც ეს ჟენევაში ნაჩვენები ”ნანოს” შემთხვევაში იყო.

ინდოეთში ”ტატა” მსოფლიოს უიაფეს ავტომობილს თითქმის 3 000 დოლარის ექვივალენტურ ფასში ჰყიდის, მაგრამ ევროპაში, შესაბამისად მოდიფიცირებული ავტომობილის მინიმალური ფასი 6 500 დოლარი იქნება. გაძვირების მიუხედავად, ის მაინც ძველ კონტინენტზე ყველაზე ხელმისაწვდომ ავრომობილზე - ”ჰიუნდაი i10-ზე” იაფი და ჯუჯა ”სმარტზე” ორჯერ იაფი იქნება.

Thursday, December 10, 2009

უგზოობის ”ლექსუსს” ოქროთი მოაპირკეთებენ

10 დეკემბერი

არაბეთის გაერთიანებულ საემიროებში ”ლექსუსის” დილერმა, კომპანია ”ალ-ფუტაიმ მოტორსმა”, დუბაის მე-10 საერთაშორისო საავტომობილო გამოფნის დამთვალიერებლებს საინტერესო სეირი მოუმზადა - მათ თვალწინ, ფრანგულ კომპანია ”გოლდ ემოსიონის” ოთხი სპეციალისტი, ”ლექსუს LX 570-ს” ოქროს 40 000 ფირფიტით დაფარავს. რა თქმა უნდა, ოქრო უმაღლესი სინჯის იქნება, ეს აქცია კი ”ტოიოტას” ლუქსის მწარმოებელი ბრენდის დაარსებიდან 20 წლის იუბილეს ეძღვნება.

”ალ-ფუტაიმ მოტორსის” გაყიდვების საქმეთა დირექტორი ჰიუ დიკერსონი ამბობს, რომ ემირატებში სულ უფრო იზრდება მოთხოვნა ავტომობილების უნიკალურ დიზაინერულ გადაწყვეტებზე და რომ ამ ტენდენციის უყურადღებოდ დატოვება დიდი ფულის განიავების ტოლფასი იქნებოდა. მისი აზრით, მოოქროვილ ”ლექსუსზე” დუბაიში სოლიდური მოთხოვნაა მოსალოდნელი.

დიკერსონის თქმით, ავტომობილის ძარის ოქროს ფენით დაფარვის შემდეგ, მისი ზედაპირი ლაქით დაიფარება, რის შემდეგაც, შესაძლებელი იქნება მისი საერთო სარგებლობის გზებზე გამოყენება. მოოქროვილძარიანი ”ლექსუს LX 570” გამოფენაზე მის დასრულებამდე დარჩება, მერე კი მისი ყიდვა იქნება შესაძლებელი. რაც შეეხება ფასს, ამის შესახებ დიკერსონი დუმილს ამჯობინებს.

სხვათა შორის, თავის დროზე, მოოქროვილი ”მაიბახით” თვით ერაყის ყოფილი დიქტატორი, სადამ ჰუსეინი სარგებლობდა. ოთხი წლის წინ კი, გერმანულმა საიუველირო კომპანია ”ვიზუალისმა” ”პორშეს” ცხრა ავტომობილის ზედაპირი მოჭედა ოქროთი.

”კია მოტორს ჯორჯიას” საახალწლო აქცია

10 დეკემბერი

”კია მოტორსის” დილერმა საქართველოში, ”კია მოტორს ჯორჯოამ”, თავის ერთ-ერთ ყველაზე პოპულარულ მოდელ ”სორენტოზე” საახალწლო აქცია გამოაცხადა.

კიას სალონში სორენტოს მყიდველებს სთავაზობენ ფასდაკლებას 3 000 დოლარამდე, 0%-იან განვადებას, 200 ლიტრ საწვავს საჩუქრად და 3 წლიან გარანტიას გარბენის შეუზღუდავად.

აღნიშნული მოდელი იწარმოება 2003 წლიდან, დღესდღეობით იგი კონკურენტ მოდელებთან შედარებით ყველაზე დაბალი ფასისა და ძლიერი ტექნიკური შესაძლებლობების წყალობით ერთ-ერთი ყველაზე გაყიდვადი მოდელია თავის კლასში.

ავტომობილი აწყობილია ინტეგრირებულ ჩარჩოზე, ასეთი კონსტრუქცია უფრო მძლავრი ტრანსმისიისა და აგრეგატების გამოყენების საშუალებას იძლევა, აგრეთვე იცავს მთლიანად ძარას და ცალკეულ მის კომპონენტებს რყევით გამოწვეული ნაადრევი ცვეთისგან.

ავტომობილი 4X4 არამუდმივი ტრანსმისით, ცენტრალური დიფერენციალის ბლოკირებითა და გამანაწილებელი კოლოფის დაბალი გადაცემით ადვილად გადალახავს დიაგონალურ დაკიდებას განსაკუთრებით რთულ ლანდშაფტებზე. საბურავებს შორის დიფერენციალს ცვლის მუხრუჭების გამანაწილებელი სისტემა, რომელიც საჭიროების შემთხვევაში ამუხრუჭებს კონკრეტულ საბურავს.

ჩამოთვლილი მახასიათებლების წყალობით, სორენტოს გაცილებით მეტი შესაძლებლობები აქვს, ვიდრე ე.წ ქალაქის ქროსოვერს.

ავტომობილს მიღებული აქვს უამრავი ჯილდო როგორც საუკეთესო „ოფროუდერს“ მომხმარებელთა კმაყოფილების მაღალი ინდექსის მაჩვენებლის წყალობით.

”აუდი” მხოლოდ 1 000 ელექტრომობილ e-ტრონს დაამზადებს

Audi e-tron limited to 1000 sales

10 დეკემბერი

ბრიტანულ საავტომობილო გამოცემა ”აუტოქარის” ცნობით, ”აუდის” ფრანკფურტში ნაჩვენებ კონცეპტუალურ ელექტრომობილ e-ტრონის მცირე ტირაჟით წარმოება აქვს გადაწყვეტილი. გერმანული კომპანიის ექსტერიერების დიზაინის განყოფილების შეფი აკიმ ბედსტაბნერი აცხადებს, რომ ელექტრომობილის გაყიდვები 2012 წელს დაიწყება და მისი ფასი კუპე R8-საზე მაღალი იქნება.

ბედსტაბნერის თქმით, მის კომპანიას არ გაუჭირდება 1 000 ცალი ძვირადღირებული ელექტრომობილის გაყიდვა. მითუმეტეს, რომ მთელ მსოფლიოში მას დაახლოებით 5 000 სადილერო ცენტრი გააჩნია. მაგრამ იმ შემთხვევაში, თუ ელექტრონულ სუპერ ავტომობილზე მოთხოვნა არ იქნა, ”აუდი” მის წარმოებას შეწყვეტს.

მაგრამ გერმანული კომპანიის მარკეტოლოგები იმედოვნებენ, რომ ასე არ მოხდება და არც იმას გამორიცხავენ, რომ მაღალი მოთხოვნის შემთხვევაში, e-ტრონის წარმოება 1 000 ცალის გამოშვების შემდეგაც გაგრძელდეს. მათი თქმით, ამ ავტომობილს მეტწილად ის ადამიანები შეიძენენ, რომლებსაც შიდაწვისძრავიანი სპორტული ავტომობილი უკვე შეძენილი აქვთ და თავიანთი პარკის ელექტრომობილით შევსება მოუნდებათ. ასეთები კი, რა თქმა უნდა, მდიდრები არიან.

ცნობისათვის, ფრანკფურტში ნაჩვენები კონცეპტუალური ”აუდი e-ტრონი” კუპე R8-ს ბაზაზეა აწყობილი. ის ოთხი ელექტროძრავითაა აღჭურვილი, რომლებიც მხოლოდ თითო, ”თავთავიანთ” ბორბალს ემსახურებიან. მათი ჯამური სიმძლავრე 313 ცხენის ძალაა. ძრავებს ელექტროენერგიით ლითიუმ-იონური აკუმულატორების ბლოკი ამარაგებს. მათში დაგროვილი ენერგია კი საკმარისია იმისათვის, რომ e-ტრონმა 248 კილომეტრის გავლა შესძლოს. საყოფაცხოვრებო ქსელიდან აკუმულატორების სრულად დასამუხტად დაახლოებით 8 საათია საჭირო.

”აუდი e-ტრონს” ადგილიდან 100 კმ/სთ სიჩქარის ასაკრეფად 4.8 წამი სჭირდება, მისი მაქსიმალური სიჩქარე კი 200 კმ/სთ-ია, რაც ელექტრომობილებისთვის საკმაოდ კარგი მაჩვენებელია. ყოველ შემთხვევაში, როგორც მწარმოებელი ირწმუნება, ექსტრემალური მართვის მოყვარულებს ეს ავტომობილი არ მოაწყენს.

უგზოობის ”ლექსუსს” ოქროთი მოაპირკეთებენ

10 დეკემბერი

არაბეთის გაერთიანებულ საემიროებში ”ლექსუსის” დილერმა, კომპანია ”ალ-ფუტაიმ მოტორსმა”, დუბაის მე-10 საერთაშორისო საავტომობილო გამოფნის დამთვალიერებლებს საინტერესო სეირი მოუმზადა - მათ თვალწინ, ფრანგულ კომპანია ”გოლდ ემოსიონის” ოთხი სპეციალისტი, ”ლექსუს LX 570-ს” ოქროს 40 000 ფირფიტით დაფარავს. რა თქმა უნდა, ოქრო უმაღლესი სინჯის იქნება, ეს აქცია კი ”ტოიოტას” ლუქსის მწარმოებელი ბრენდის დაარსებიდან 20 წლის იუბილეს ეძღვნება.

”ალ-ფუტაიმ მოტორსის” გაყიდვების საქმეთა დირექტორი ჰიუ დიკერსონი ამბობს, რომ ემირატებში სულ უფრო იზრდება მოთხოვნა ავტომობილების უნიკალურ დიზაინერულ გადაწყვეტებზე და რომ ამ ტენდენციის უყურადღებოდ დატოვება დიდი ფულის განიავების ტოლფასი იქნებოდა. მისი აზრით, მოოქროვილ ”ლექსუსზე” დუბაიში სოლიდური მოთხოვნაა მოსალოდნელი.

დიკერსონის თქმით, ავტომობილის ძარის ოქროს ფენით დაფარვის შემდეგ, მისი ზედაპირი ლაქით დაიფარება, რის შემდეგაც, შესაძლებელი იქნება მისი საერთო სარგებლობის გზებზე გამოყენება. მოოქროვილძარიანი ”ლექსუს LX 570” გამოფენაზე მის დასრულებამდე დარჩება, მერე კი მისი ყიდვა იქნება შესაძლებელი. რაც შეეხება ფასს, ამის შესახებ დიკერსონი დუმილს ამჯობინებს.

სხვათა შორის, თავის დროზე, მოოქროვილი ”მაიბახით” თვით ერაყის ყოფილი დიქტატორი, სადამ ჰუსეინი სარგებლობდა. ოთხი წლის წინ კი, გერმანულმა საიუველირო კომპანია ”ვიზუალისმა” ”პორშეს” ცხრა ავტომობილის ზედაპირი მოჭედა ოქროთი.

Wednesday, December 9, 2009

”ფოლკსვაგენის” კონცეპტუალური ”Up! ლაიტი”

Volkswagen Up! Lite Concept

10 დეკემბერი

ლოს ანჯელესის საავტომობილო შოუზე, ”ფოლკსვაგენმა” თავისი მორიგი ეკონომიური და ეკოლოგიურად სუფთა კონცეპტუალური ავტომობილი წარმოადგინა, რომელშიც ასევე ორი კონცეპტუალური მოდელის - Up!-ის და L1-ის თვისებებია შერწყმული და რომელსაც შოუს დამთვალიერებელი ”Up! ლაიტ-ის” სახელით გაეცნო.

მწარმოებლის განცხადებით, მისი კონცეპტუალური მოდელი, მსოფლიოში ყველაზე ეკონომიური ოთხადგილიანი ავტომობილია. გერმანული კომპანიის მიერ გავრცელებული რელიზი გვამცნობს, რომ ”Up! ლაიტს” 100 კილომეტრის გასავლელად 2.44 ლიტრი დიზელის საწვავი ჰყოფნის. და ეს მართლაც ფანტასტიური მაჩვენებელია.

ასეთი ეკონომიურობის მიღწევას კი ერთდროულად რამდენიმე ფაქტორი განაპირობებს. ჯერ ერთი, ავტომობილის ჰიბრიდული დანადგარის მთავარი აგრეგატი მეტად ეკონომიური და დაბალი ლიტრაჟის მქონე ტურბო-დიზელია, რომელთან უნისონშიც მცირე სიმძლავრის ელექტროძრავი და 7-საფეხურიანი გადაცემათა კოლოფი (DSG - დაირექტ შიფტ გეარბოქს) მუშაობს. ყველაფერთან ერთად, აგრეგატების ასეთი კომბინაციის წყალბით, ავტომობილი ყოველი კილომეტრის გავლისას, გარემოში მხოლოდ 65 გრამ CO2-ს გამოჰყოფს.

ტურბოდიზელის მუშა მოცულობა სულ რაღაც 0.8 ლიტრია და ის მხოლოდ 51 ცხენის ძალას გამოიმუშავებს. ელექტროძრავის სიმძლავრე კი მხოლოდ 10 კილოვატია. ორივე ამ აგრეგატის ჯამური სიმძლავრე კი 65 ცხენის ძალას აღწევს, რაც საკმარისია იმისათვის, რომ ავტომობილმა ადგილიდან 100 კმ/სთ სიჩქარე 12 წამში აკრიფოს. რაც შეეხება მაქსიმალურ სიჩქარეს, ის 160 კმ/სთ-ს აღწევს.

ეკონომიურობასვე განაპირობებს ავტომობილის სიმსუბუქე - ის მხოლოდ 650 კილოგრამს იწონის. ეს კი მიღწეულია თანამედროვე ტექნოლოგიების საშუალებით. კერძოდ, მზიდი სისტემა შეკრულია მტკიცე ფოლადისა და ალუმინის მასალებით, ძარა კი კარბონის კომპოზიტისგან მზადდება. ავტომობილის აეროდინამიკური წინააღმდეგობის კოეფიციენტი სულ რაღაც 0.237-ია. გარდა ამისა, ეკონომიურობას აუმჯობესებს ენერგიის დამზოგი ისეთი სისტემები, როგორებიცაა მუხრუჭების კინეტიკური ენერგიის რეგენერატორი და სტოპ-სტარტი.

ეს მეხუთე კონცეპტუალური ავტომობილია, რომლებიც ”ფოლკსვაგენმა” პროექტ Up!-ის ფარგლებში შეიმუშავა. პირველი მერცხალი იყო მოდელი Up!, რომელიც საზოგადოების წინაშე პირველად ფრანკფურტის 2007 წლის შოუზე წარსდგა. მას მოჰყვნენ: ”სპეის Up!” (ტოკიოში),”სპეის Up! ბლიუ” ლოს ანჯელესში და ელექტრული E-up! ფრანკფურტის წლევანდელ შოუზე.

”ფოლკსვაგენი” ”სუზუკის” მეხუთედს ყიდულობს

VW will buy 19.9% stake in Suzuki

10 დეკემბერი

ჰერმანულ საავტომობილო გიგანტ ”ფოლკსვაგენს” მტკიცედ აქვს გადაწყვეტილი მსოფლიოს უდიდესი ავტომწარმოებლის სტატუსის დაუფლება. ამ წლის პირველ 9 თვეში, ვოლფსბურგელებმა ყველაზე მეტი ავტომობილის გაყიდვა შეძლეს, მაგრამ ეს ჯერაც არ ნიშნავს, რომ სანუკვარი მიზანი მიღწეულია.

ამიტომ, თავის ჯგუფში შემავალი კომპანიების წარმოების ზრდის პარალელურად, სახალხო ავტომობილების მწარმოებლები, ამ ჯგუფის კიდევ უფრო გაფართოებას ეშურებიამ. ამ მხრივ, მათ პირველი ნაბიჯი ცოტა ხნის წინ გადადგეს, როდესაც მეზობელი ”პორშეს” აქციების 49.9 პროცენტი შეიძინეს და ამაში 3.9 მილიარდი ევრო გადაიხადეს.

ახლა კი იაპონური ”სუზუკის” ჯერიც დადგა. ოთხშაბათს, 9 დეკემბერს, ტოკიოში შედგა ”ფოლკსვაგენის” და ”სუზუკის” ხელმძღვანელთა, მარტინ ვინტერკორნის და ოსამუ სუზუკის შეხვედრა (სურათზე), რომლის შემდეგაც გამოცხადდა, რომ გერმანული კონცერნი იაპონური კომპანიის აქციების 19.9 პროცენტს შეიძენს და ეს მას 2.5 მილიარდი დოლარი დაუჯდება.

შარშან ”ფოლკსვაგენმა” გამოაცხადა, რომ 2018 წლამდე მსოფლიო ლიდერობის ხელში ჩაგდებას აპირებს, მაგრამ ახლა უკვე, ვინტერკორნიც არ მალავს, რომ ამ მიზნის მიღწევა გაცილებით ადრეა შესაძლებელი და მას ამის საწინააღმდეგო არაფერი აქვთ.

პრესკონფერენციაზე, რომელიც ორ ავტომწარმოებელს შორის მიღწეულ გარიგებას მიეძღვნა, ”სუზუკის” 80 წლის შეფმა ოსამუ სუზუკიმ, ვინც თავის კომპანიას 30 წელზე მეტია, ხელმძღვანელობს, განაცხადა, რომ აქციების გაყიდვა არ ნიშნავს იმას, რომ მისი კომპანია მთლიანად ”ფოლკსვაგენის” ხელში გადავა.

”არ მინდა, ვინმე შეცდომაში შევიდეს. ”სუზუკი” არ ხდება ”ფოლკსვაგენის” ოჯახის მე-12 წევრი. სულაც არ მაქვს იმის სურვილი, რომ სხვა ერის წარმომადგენლებმა მითხრან, რა უნდა გავაკეთო”, - განაცხადა სუზუკიმ და ამით მიანიშნა, რომ მისი კომპანია კვლავაც დამოუკიდებლად მუშაობას გააგრძელებს.

ძნელი მისახვედრი არ უნდა იყოს, თუ რა ამოძრავებდა ორივე კომპანიას, როდესაც ხელშეკრულებაზე აწერდა ხელს. ვოლფსბურგელებს მცირელიტრაჟიანი ავტომობილების ის გამოცდილება აინტერესებთ, რაც ”სუზუკის” გააჩნია. იაპონურ კომპანიას კი საკუთარი სამოდელო გამის გაფართოება აქვს გადაწყვეტილი და ამ საქმეში სასარგებლოდ შეუძლია თავისი ახალი პარტნიორის გამოცდილების გაზიარება.

გარიგება ასევე ითვალიწინებს იმას, რომ ”სუზუკი” ”ფოლკსვაგენის” ხმის უფლების მქონე აქციების 2.5 პროცენტს შეიძენს და მათში 1.13 მილიარდ დოლარს გადაიხდის. მთავარი კი ისაა, რომ ახალი, ერთობლივი პროექტების განხორციელებისას, პარტნიორები მილიარდობით დოლარის დაზოგვას შეძლებენ.

პარალელურად, ”ფოლკსვაგენი”, რომელიც ჩინეთის ბაზარზე უდიდესი ავტომწარმოებელია, ”სუზიკის” დახმარებით, ინდურ ბაზარზეც იმედოვნებს ფეხის მოკიდებას. ინდოეთის ბაზარი სწრაფი ტემპით ვითარდება და იქ ახლავე დამკვიდრებას ვოლფსბურგელებისთვის უზარმაზარი მოგების მოტანა შეუძლია.

”ჩვენთვის ”სუზუკისთან” თანამშრომლობა იმითაა მნიშვნელოვანი, რომ კომპაქტური ავტომობილების წარმოებას აზიის განვითარებად ბაზრებზე გავშლით. სამაგიეროდ, ”სუზუკი” ჩვენგან იმით იხეირებს, რომ მისთვის ხელმისაწვდომი იქნება გარემოსადმი მეგობრული ძრავების და ავტომობილების წარმოების ტექნოლოგიები, რომლებსაც ჩვენ ფლობთ”, - პრესკონფერენციაზე განაცხადა ვინტერკორნმა.

მართალია, ცხრა თვის მონაცემებით, ”ფოლკსვაგენს” მსოფლიოში ყველაზე მეტი ავტომობილი ჰქონდა გაყიდული, მაგრა ნახევარი წლის მონაცემებით, მას ”ტოიოტა” ასწრბდა. კერძოდ, გერმანულ გიგანტს პირველ 6 თვეში 3.265 მილიონი ავტომობილი ჰქონდა გაყიდული, ”ტოიოტას” კი - 3.564 მილიონი. მაგრამ თუ ვოლფსბურგელთა გაყიდვებს ”სუზუკის” მიერ გაყიდულ 1.15 მილიონსაც დავუმატებთ, მაშინ მათი შედეგი 4.415 მილიონამდე გაიზრდება. თუმცა, აქციების მეხუთედის ფლობა არ ნიშნავს, რომ იაპონური კომპანიის გაყიდვრბი სულ ”ფოლკსვაგენს” ჩაეთვალოს.

რონ დენისი: ავტობიზნესი ”მაკლარენისთვის” სარგებლიანია

Dennis: Car business good for McLaren

9 დეკემბერი

”მაკლარენის” შეფი რონ დენისი დარწმუნებულია, რომ მისი კომპანია მართებულად იქცევა, რომ საგზაო სპორტული ავტომობილების წარმოებას იწყებს და ”ფერარისთვის” კონკურენციის გაწევას ამ საქმეშიც აპირებს. და ეს მიუხედავად იმისა, რომ ამის გამო, ფორმულა 1-ში მისმა პარტნიორმა ”მერსედეს-ბენცმა” თავისი ყურადღება მეტოქე ”ბრაუნზე” გადაიტანა და მისი მფლობელი გახდა.

როგორც ცნობილია, ”მაკლარენი” უახლოეს მომავალში სამი სპორტული სუპერ ავტომობილის გამოშვებას გეგმავს, რომელთაგან პირველი ბაზარზე ”მაკლარენ MP4-12C” გამოჩნდება. არადა, წინა რამდენიმე წლის განმავლობაში, ”მაკლარენი” და ”მერსედეს-ბენცი” წარმატებულად თანამშრომლობდნენ არამხოლოდ ფორმულა 1-ში, არამედ ავტო ბიზნესშიც, სადაც მათ ერთობლივად შექმნეს ისეთი შესანიშნავი ავტომობილი, როგორიც სუპერ ავტომობილი SLR-ია.

მაგრამ ორი წლის წინ, თავისი სპორტული ავტომობილების პროგრამაში, შტუტგარტელებმა მთლიანად საკუთარი რესურსები ჩართეს და უოკინგელებს ამ საქმეში პარტნიორობაზე უარი უთხრეს, რამაც ალბათ დიდი როლი ითამაშა დენისის მიერ საბოლოო გადაწყვეტილების მიღებაში. ან იქნებ, პირიქით - როდესაც ”სამქიმიანებმა” დენისის ამბიციების შესახებ შეიტყვეს, სწორედ მაშინ გადაწყვიტეს ”მაკლარენთან” პარტნიორობის დამუხრუჭება...

ფაქტი კი ერთია: ”მერსედეს-ბენცმა” ახლახანს ფორმულა 1-ის ახალი ჩემპიონის, ”ბრაუნის” აქციების საკონტროლო პაკეტი შეიძინა და მომავალ სეზონში საკუთარი სახელით იასპარეზებს. თუმცაღა, ჯერჯერობით არც ”მაკლარენთან” პარტნიორობის მთლიანად შეჩერებას გეგმავს და მას ძრავებით კვლავაც მოამარაგებს. აქ იმის აღნიშვნაც ღირს, რომ მოდელი MP4-12C ”მაკლარენის” ინჟინერთა მიერაა შექმნილი, რაც იმი ნიშანია, რომ ინგლისური კომპანია უკვე ფლობს მაღალეფექტური ძრავების შექმნის და წარმოების შესაძლებლობებს.

დენისს მიაჩნია, რომ მისი კომპანიის გერმანელი პარტნიორის ”ბრაუნისკენ” გადახრა ”მაკლარენისთვისაც” და ”ბრაუნისთვისაც” სასარგებლო იქნება:

”ჩვენი კომპანია ვითარდება. ჩვენ ბევრი ძალიან კარგი და ძლიერი პარტნიორი გვყავდა. პირველ რიგში, მათში ”,ერსედეს-ბენცს” ვგულისხმობ. მათი სახით, ფენომენალურად ძლიერი პარტნიორი გვყავდა. იყო მომენტი, როდესაც ბევრი ფიქრი მიწევდა ამ ნაბიჯის გადადგმაზე. მთავარი ის იყო, თუ რა იქნებოდა ”მაკლარენისთვის” ყველაზე სასარგებლო. შეხედეთ ”ფერარის” მიღწევებს. თუ მათ ეს შეუძლიათ, რატომ უნდა ვიფიქროთ, რომ იგივეს ჩვენც ვერ შევძლებთ?

”დარწმუნებული ვარ, ”ბრაუნს” და ”მერსედეს-ბენცს” კარგი მომავალი აქვთ. ჩვენ ამ თანამშრომლობის საწინააღმდეგო არაფერი გვაქვს. ეს კარგი იქნება ფორმულა 1-თვის. ჩვენ აქ სწორედ იმისთვის ვართ, რომ ფ1 განვითარდეს. მე ბევრი ჩავარდნაც მქონია და წარმატებებიც. როგორც კომპანიის და გუნდის შეფს, საპასუხისმგებლო გადაწყვეტილებათა მიღება მიწევს და ვიცი, რომ ხანდახან ისეთი გადაწყვეტილებაც უნდა მივიღო, რაც ჩემთვის შეიძლება მიუღებელი იყოს. ხშირად ისეთი საკითხების გადაწყვეტაც მიწევს, რომლებიც ჩემს პასუხისმგებლობაში არ შედის. მაგრამ ასეთია შეფის ცხოვრება”, - ამბობს დენისი.

მანვე გამორიცხა იმის შესაძლებლობა, რომ ის უახლოეს მომავალში შეიძლება ”მაკლარენის” ფ1-ის გუნდის შეფის თანამდებობაზეც დაბრუნდეს. ”არავითარ შემთხვევაში. ჩემი როლი ფ1-ში დასრულებულია. რა თქმა უნდა, ზოგიერთ რბოლას დავესწრები, რადგან მე ძალიან მიყვარს ეს სპორტი. ჩემი გონება ახლა კომპანიის ხელმძღვანელობაზეა მომართული, მაგრამ გული ისევ რბოლებში რჩება. მე რბოლებს დავესწრები, მაგრამ არა როგორც გუნდის წევრი, არამედ, როგორც უბრალო მაყურებელი. რაც უნდა იყოს, მე ”მაკლარენით” ვსულდგმულობ და ეს არასდროს შეიცვლება”.

”აუდი A8-ს” მაიამური დებიუტი

Audi A8

7 დეკემბერი

მაღალი კლასის ავტომობილების მუშტარს ”აუდიმ” თავისი ფლაგმანის, A8-ს ახალი (მესამე) თაობის სედანი მოუმზადა. ამ ავტომობილისთვის ინგოლშტადტელებს ძირითად ბაზრად ამერიკის შეერთებული შტატები ეგულებათ და რა გასაკვირია, რომ ახალი ავტომობილის პრეზენტაციაც შტატებში, მაიამიში, იმ ქალაქში ჩაატარეს, სადაც მუდამ ზაფხულია და რომელიც როგორც თაფლი ფუტკარს, ისე იზიდავს მდიდართ ამა ქვეყნისათა.

პირველ რიგში, უნდა ითქვას, რომ ახალ ავტომობილს გარეგნულად მისი წინამორბედისგან ბევრი არაფერი განასხვავებს. თვალში საცემია მხოლოდ უცნაური მოყვანილობის ფარები და უზარმაზარი რადიატორი, რომელიც აქამდეც დიდი იყო, მაგრამ ბამპერის მსგავსი წარმონაქმნი, რომელიც უფრო ნომრის დაფის მოვალეობას ასრულებდა, მას შუა ჰყოფდა და ამით ამცრობდა.

ახალი რადიატორი კი ამჯროსანი რაინდის უზარმაზარ ფარს მოგაგონებთ, რომლის აქეთ-იქითაც ამჯარში ჩამალული თვალები - ფარები ჩანს. ასე ავტომობილი უფრო აგრესიულ იერს ღებულობს, თუმცა ეს აგრესია მის ელეგანტურობას სულაც არ ამცირებს. თანაც, აგრესია მიგვანიშნებს, რომ კაპოტქვეშ ველური ცხენების მრავალრიცხოვანი რემა იმალება. თუმცა, სანამ ამ ცხენების რაოდენობას დავითვლიდეთ და მათ შესაძლებლობებსაც შევეხებოდეთ, ორი სიტყვა ავტომობილის გაბარიტებსა და ფარებზეც ვთქვათ.

ახალი A8 ”ფოლკსვაგენის” ჯგუფის D3 პლატფორმაზეა დაფუძნებული, რომელიც ალუმინისგანაა დამზადებული. ძარაც ალუმინისაა და როგორც მწარმოებელი გვამცნობს, წინამორბედზე 24 პროცენტით ხისტია. წინა მოდელთან შედარებით, ახალი სედანის სიგრძე 75 მილიმეტრით, სიგანე კი 55 მილიმეტრით (შესაბამისად, 5 137 და 1 929 მილიმეტრამდე) გაიზარდა. ამასთან, მისი სიმაღლე 16 მილიმეტრით შემცირდა.

რაც შეეხება ფარებს. მათში შუქდიოდური სისტემა გამოიყენება, რომლებიც ახლო შუქსა და ნისლსაწინააღმდეგო განათებას უზრუნველყოფენ. ქსენონის ძირითადი ფარები კი გარე განათებისადმი ადაპტირებადია. რაც მთავარია, მათი განათების მიმართულებას სანავიგაციო სისტემა მართავს. კერძოდ, ეს სისტემა აფიქსირებს მოსალოდნელი მისახვევის ადგილმდებარეობას და ფარების მიერ გამოყოფილი შუქის ჭავლის ნაწილს სწორედ იმ მოსახვევისკენ მიმართავს.

იმ ფოსოებში, რომლებიც სხვა მანქანებზე ნისლსაწინააღმდეგო ფარებს უკავია, ახალ A8-ს უამრავი გადამწოდი აქვს განლაგებული, რომლებიც ელექტრონული მართვის სხვადასხვა სისტემას ემსახურებიან. მაგალითად, ასეთებია რადიოლოკაციური გადამწოდები, რომლებიც ადაპტირებადი კრუიზ კონტროლის სისტემაში შედის და არჩეული დისტანციის შენარჩუნებასა და მოულოდნელად გაჩენილი წინააღმდეგობის წინ გაჩერებას, ან მაქსიმალურად შენელებას ემსახურება. უკანა ფარებიც შუქდიოდურია და გარდა იმისა, რომ ჩვეულებრივ ფარებზე გაცილებით ნაკლებ ენერგიას მოიხმარს, უფრო მკვეთრი შუქითაც გამოირჩევა.

ჯერჯერობით, ახალი A8-თვის მხოლოდ სამი ძრავია განკუთვნილი. ესენია ორი 4.2-ლიტრიანი V8, რომელთაგან ერთი ბენზინზე მუშაობს, მეორე კი - დიზელზე. პირველის სიმძლავრე 372 ცხენის ძალაა და მისი მეშვეობით, ავტომობილს 0-დან 100 კმ/სთ-მდე ასაჩქარებლად 5.7, მეორეს სიმძლავრე კი 350 ცხენის ძალაა, თუმცა მისი მეშვეობით, ავტომობილს აჩქარების უკეთესი ტემპერამენტი (5.5 წამი) აქვს. ყველაზე სუსტია 3.0-ლიტრიანი V6, რომლის მაქსიმალური სიმძლავრეც მხოლოდ 247 ცხენის ძალაა, მისი სტანდარტული აჩქარება კი 6.6 წამში ესწრება. უახლოეს მომავალში, შესაძლებელი იქნება V8-ზე V10 და W12 კონფიგურაციის დიდლიტრაჟიანი ძრავების დაყენება.

რაც შეეხება ტრანსმისიას, მისი მთავარი ნაწილი კომპანია ZF-ის წარმოების ახალი, 8-საფეხურიანი ავტომატია. წამყვანი ყველა ბორბალია (ცნობილი სისტემა კვატრო). წინა და უკანა ღერძებს შორის მაბრუნ მომენტს ”ტორსენის” დიფერენციალი ანაწილებს. განაწილების პროპორციაა 40:60-ზე უკანა ღერძის სასარგებლოდ.

ახალი A8-ს ინტერიერი წინამორბედზე ფართეცაა, კომფორტულიც და ნათელიც. საინტერესოა, რომ სალონის გასაწყობ მასალებს თავად ავტომობილის მყიდველი უკვეთავს. ასე რომ, ყველა ავტომობილის სალონი გარკვეულწილად, ინდივიდუალური იქნება. ინტერიერის გასაშუქებლად, ”აუდიმ” ახალი სისტემა გამოიყენა, რომელიც მძღოლის სურვილის შესაბამისად, შეიძლება იყოს მოწითალო, თეთრი ან მოყვითალო.

სტანდარტულ ვერსიაში, წინა სავარძლები 12 მიმართულებით რეგულირდება. შეკვეთის შემთხვევაში კი შესაძლებელია ისეთი სავარძლების დაყენება, რომლებიც 22 განსხვავებულ პოზიციას იკავებენ. შესაძლებელია ასევე სპორტული სავარძლების შეკვეთა.

ახალი A8 სისტემა კერს-ითაც (კინეტიკური ენერგიის რეკუპერაციის სისტემა) გამოირჩევა. ეს სისტემა კინეტიკურ ენერგიას ელექტროენერგიად გარდაქმნის (როგორც ფორმულა 1-ის ზოგიერთ მანქანაზე) და ამგვარად, აკუმულატორებში მუხტის შენარჩუნებას ემსახურება.

და, რა თქმა უნდა, ყურადღებას ამ შესანიშნავი ავტომობილის უსაფრთხოების სისტემებიც იმსახურებს. მაგალითად, მძღოლი დაიბნა და ვერ რეაგირებს მოულოდნელად გაჩენილ წინაღობაზე, რის გამოც, შეჯახება თითქოს გარდაუვალია. ამ დროს, საქმეში ელექტრონიკა ერევა, რომელიც წინა ბამპერის ქვეშ განლაგებული გადამწოდების მეშვეობით აფიქსირებს საფრთხეს და მანქანის მართვას თავის თავზე იღებს. პირველ რიგში, ავტომობილი 3.0 მ/წმ2 უარყოფითი აჩქარებით ნელდება. ამ დროს იხურება ფანჯრები, ლუქი, იჭიმება უსაფრთხოების ღვედები და სისტემა გამაფრთხილებელ ხმას გამოსცემს. მოკლედ, მანქანა შეჯახებისთვის ემზადება. შეჯახებამდე თითქმის ნახევარი წამით ადრე, მანქანა მაქსიმალურად ამუხრუჭებს. იმდენად, რომ შეჯახების მომენტში, მისი სიჩქარე 40 კმ/სთ-ზე მეტი არ უნდა იყოს. რა თქმა უნდა, ამ სიჩქარეზე მანქანა და მასში მსხდომნი გაცილებით ნაკლებად საზარალდებიან. ავტომობილი დაახლოებით ასევე მოქმედებს, როდესაც უკნიდან შეჯახების საშიშროება წარმოიქმნება.

ინტერირში არსებული სარკის გვერდებზე მოთავსებულია ვიდეოკამერები, რომლებიც 65 კმ/სთ სიჩქარეზე, პარალელურ რეჟიმში მოძრაობას ინტენსიურად აკონტროლებენ და თუ დაგეძინათ და მოხვევის ციმციმას ჩაურთავად, ავტომობილი ზოლს შეიცვლის, სისტემა საჭის რგოლზე ”გამოსაფხიზლებელ” ვიბრაციას ჩაგირთავთ და გაგაღვიძებთ. იგივე კამერები საგზაო ნიშნებსაც სკონტროლებენ და მათ შესახებ ინფორმაცია ცენტრალურ მონიტორზე გადააქვთ.

”აუდი” თავის ფლაგმანზე პირველად გამოიყენებს ღამით ხედვის სისტემას. ინფრაწითელი სხივების მეშვეობით, ღამით ეხილავი საგნების 300 მეტრის სიშორეზე გარჩევაა შესაძლებელი. სისტემა განსაჯუთრებით მკვეთრად ადამიანებსა და ცხოველებს გამოსახავს.

მესამე თაობის A8-ს გაყიდვებს 2010 წლის მარტში დაიწყებს. ავტომობილის საბაზო ვერსია 3.0-ლიტრიანი ძრავით 59 000 ევრო ეღირება, ბენზინის V8 ძრავით კი მისი სასტარტო ღირებულება 65 000 ევრო იქნება.