Wednesday, June 30, 2010

”ტოიოტას” ევროპის ყველაზე მწვანეს წოდება სურს

Toyota wants to become Europe’s greenest automaker

30 ივნისი

”ტოიოტა მოტორ იუროპის” ხელმძღვანელობა იმედოვნებს, რომ ბრიტანეთში წარმოებული ჰიბრიდული ”აურისის” წყალობით, ის ძველი კონტინენტის ყველაზე მწვანე ავტომწარმოებლის წოდებას ”ფიატს” ჩამოართმევს. ამის თაობაზე, ინტერნეტ გამოცემა ”ავტომოტივ ნიუსთან” საუბრისას განაცხადა იაპონური კომპანიის ევროპული შტოს ეკოლოგიურ საკითხთა დირექტორმა უილი ტომბოიმ.

ახლახანს, ”ტოიოტამ” თავის ბარნსტონის (ბრიტანეთი) ქარხანაში ჰიბრიდული ”აურისის” წარმოება დაიწყო, რომელსაც ბენზინ-ელექტრული სისტემა ამუშავებს. იაპონური კომპანია იმედოვნებს, რომ წელს დაახლოებით 14 000 ჰიბრიდული ”აურისის” გაყიდვას შესძლებს, შემდეგ კი ეს მაჩვენებელი გაორმაგდება.

”ტოიოტას” მარკეტოლოგების ვარაუდით, მალე ევროპაში გაყიდული ”აურისების” დაახლოებით მეოთხედი ჰიბრიდული იქნება. ცნობისათვის, ამჟამად ძველი კონტინენტის ბაზარზე, როგორც ბენზინის, ისე დიზელისძრავიანი ”აურისი” დიდი პოპულარობით სარგებლობს.

იაპონური კომპანიის მონაცემებით, ჰიბრიდული ”აურისი” ყოველ კილომეტრზე ატმოსფეროში მხოლოდ 89 გრამ ნახშირორჟანგს გამოჰყოფს. ამ მაჩვენებლით, ის ყველაზე სუფთა ავტომობილია ”ტოიოტას” სამოდელო გამაში. მისი კარგი გაყიდვების შემთხვევაში კი ეს კომპანია ევროპაში მართლაც დაეუფლება ”ყველაზე მწვანე” ავტომწარმოებლის საპატიო სტატუსს.

შარშანდელი მონაცემებით, ”ტოიოტამ” გამონაბოლქვში CO2-ის საშუალო შემცველობის მაჩვენებელი 144.9-დან 130.1 გრ/კმ-მდე შეამცირა. შედარებისთვის, ”ფიატის” შესაბამისი მაჩვენებელი 127.8 გრამია ყოველ კილომეტრზე. 2008 წელთან შედარებით, იტალიურმა კომპანიამ, მის მიერ გაყიდული ავტომობილების გამონბოლქვში ნახშირორჟანგის საშუალო შემცველობა ყოველ კილომეტრზე 5.9 გრამით შეამცირა და ზედიზედ მესამედ დაეუფლა ევროპის ”ყველაზე მწვანეს” სტატუსს.

”აურისი” იაპონური კომპანიის ევროპულ გამაში სულ მეორე ჰიბრიდული ავტომობილია. პირველი აქაც ”პრიუსი” იყო, თუმცა ის ევროპის გარეთ იწარმოება. ”აურისი” კი პირველი ჰიბრიდია, რომელსაც იაპონური კომპანია ევროპაშივე, აწარმოებს.

უფრო მეტიც, ”ტოიოტა” აცხადებს, რომ ”აურისი” პირველი სრულფასოვანი ჰიბრიდული ავტომობილია, რომელსაც ევროპაში აწარმოებენ. მაგრამ ამ მოსაზრებას არ თანხმება ”ფოლკსვაგენი”, რომელიც ირწმუნება, რომ პირველი სრულფასოვანი ჰიბრიდული ავტომობილი (ტუარეგი) ბრატისლავაში (სლოვაკეთი) მან გამოუშვა.

Tuesday, June 29, 2010

”ფერარი GTO” - ყველაზე მძლავრი და სწრაფი კვიცი მარანელოდან

Ferrari GTO

29 ივნისი

”ფერარის” ავტომობილები საოცნებოა ნებისმიერი ადამიანისთვის, ვისაც ავტომობილებისა ცოტა მაინც გაეგება რამე. ჯერ ერთი, მარანელოელთა კვიცები, ამ კომპანიის დაარსებიდან მოყოლებული, ერთ-ერთი ყველაზე სწრაფები და დახვეწილები არიან. მეორეც, მათ ავტორიტეტი ფორმულა 1-ში მოპოვებულმა გამარჯვებებმა მოუპოვეს. მაგრამ გადის დრო და ექსკლუზიური ავტომობილების მეტად შეზღუდულ ბაზარზე კონკურენცია სულ უფრო მკაცრი ხდება.

ჯერ ერთი, მარანელოელებს ”შინაური”, მეტად ძლიერი კონკურენტი ჰყავთ ”ლამბორგინის” სახით, რომელიც მათ ტოლს არაფერში უდებს. მეორეც, რამდენიმე დიდმა კომპანიამ უკვე დაიწყო ექსკლუზიური მოდელების წარმოება, რითაც ბაზრის ეს ისედაც მცირე სეგნმენტი კიდევ უფრო შეიკუმშა. მესამეც - ბაზარზე მალე გამოჩნდება ფორმულა 1-ში სკუდერიელების მთავარი ფავორიტის, ”მაკლარენის” ავტომობილები, რომლებსაც კვიცებისთვის უხისტესი კონკურენციის გაწევა შეუძლიათ. მოკლედ, ბევრი მიზეზია იმისათვის, რომ იტალიურმა კომპანიამ თავისი პოზიციების გამყარებაზე იზრუნოს. და ისიც ამაზე ზრუნავს...

ამის ერთ-ერთი დასტურია ისედაც ექსტრემალურ მოდელ 599-ის კიდევ უფრო მძლავრი და სწრაფი მოდიფიკაციის, GTO-ს გამოშვება, რომელიც, კომპანიის პრეზიდენტ ლუკა დი მონტეძემოლოს განცხადებით, ყველაზე მძლავრი და სწრაფი სერიული ავტომობილია მარანელოური კომპანიის ისტორიაში.

სხვათა შორის, სახელი GTO ”ფერარის” ისტორიაში ახალი არაა. ამ აბრევიატურის მქონე ავტომობილებს (250 GTO), კომპანია 60-იან წლებში უშვებდა. უფრო სწორედ მხოლოდ 39 ცალი გამოუშვა. 80-იან წლებში კი 277 ცალი 280 GTO დაამზადა. რაც შეეხება 599 GTO-ს, მის ყიდვას მხოლოდ 599 იღბლიანი შესძლებს. მოკლედ, GTO სერიის ავტომობილების წარმოების მოცულობა აშკარად გაიზარდა, თუმცა მისი შეძენის მსურველი მაინც გაცილებით ბევრია. ექსკლუზიური ავტომობილების ხელმიუწვდომლობა კი მათ და მთლიანად მარკასაც განსაკუთრებულ აურას უქმნის.

საბაზო ”ფერარი 599 GTB-ს” მარტო აბრევიატურა როდი შეეცვალა. ის გაბარიტებში ოდნავ გაიზარდა კიდეც. კერძოდ, სიგრძეში 44 მილიმეტრი (4710 მილიმეტრამდე) მოემატა. სამაგიეროდ, 10 მილიმეტრით (1326 მილიმეტრამდე) დადაბლდა. არ შეცვლილა ავტომობილის სიგანე და ბორბლებს შორის ბაზა. გამოიცვალა ავტომობილის აეროდინამიკური პაკეტი, რისი წყალობითაც, GTO-ს გზასთან ჩაჭიდების ძალა გაიზარდა, ეს კი დიდი სიჩქარით მოძრაობისას, ავტომობილის მდგრადობას განაპირობებს. აეროდინამიკის შეცვლის მიუხედავად, აეროდინამიკური წინააღმდეგობის კოეფიციენტი პრაქტიკულად უცვლელი დარჩა. გარეგნულ ცვლილებათაგან თვალშისაცემია ახალი წინა ბამპერი, უკანა დიფუზორი და საბარგულზე მოთავსებული სპოილერი. რა თქმა უნდა, მარანელოელთა ”საბრძოლო ცხენ” 599XX-თან შედარებით, GTO-ს გაცილებით ”მშვიდი” გარეგნობა აქვს, თუმცა ესეც საკმარისია იმისათვის, რომ მის შესაძლებლობებში ეჭვი არავინ შეიტანოს.

იმისათვის, რომ თავისი სერიული ავტომობილის ბაზაზე ”სამოქალაქო” მონსტრი შეექმნათ, ”ფერარის” ინჟინრებს ავტომობილის აგრეგატების გარდა, სხვა კვანძების შეცვლაც მოუხდათ. მოდერნიზაცია ჩაუტარდა ძრავს, ტრანსმისიას, გამოსაბოლქვ სისტემას და მუხრუჭებს. რაც არანაკლებ მნიშვნელოვანია, 599 GTB-სთან შედარებით, 599 GTO-მ წონაში 83 კილოგრამი მოიკლო. ეს კი იმის ხარჯზე მოხდა, რომ ავტომობილის კონსტრუქციაში უფრო ინტენსიურად გამოიყენეს ალუმინი და კომპოზიტები, ასევე შეამცირეს შუშების სისქე.

რა თქმა უნდა, ყველაზე მნიშვნელოვანი საქმე ძრავის მოდერნიზაცია იყო. ის ისევ 6.0-ლიტრიანი V12-ია, რომელიც მაქსიმალურ სიმძლავრეს - 680 ცხენის ძალას, მუხლა ლილვის 8250 ბრ/წთ-ზე ავითარებს, მისი მაქსიმალური მაბრუნი მომენტი კი 620 ნიუტონმეტრს აღწევს. სანამ მოდერნიზაცია ჩაუტარდებოდა, იგივე ძრავი დაახლოებით 60 ცხენის ძალით სუსტი იყო. ძრავს მუხლა ლილვი, და შემშვები კოლექტორი შეეცვალა. თავიდან დაიწერა მისი ელექტრონული მართვის პროგრამა. ყველაფერი კი ისე გაკეთდა, რომ გაუმჯობესებული მახასიათებლების მქონე ავტომობილი თავისუფლად შეესაბამება ევრო5 სტანდარტებს.

ძრავთან შეწყვილებულია 6-საფეხურიანი რობოტიზებული გადაცემათა კოლოფი, რომელიც საფეხურებს 60 მილიწამში ცვლის. ამ ორი აგრეგატის ერთობლივი მუშაობით, ავტომობილს ადგილიდან 100 კმ/სთ-მდე ასაჩქარებლად სულ რაღაც, 3.35 წამი ჰყოფნის. შედარებისთვის, 599 GTB-ს იგივე აჩქარებისთვის 3.7 წამი სჭირდება. 599 GTO-ს მაქსიმალური სიჩქარე კი 335 კმ/სთ-ია, რაც 599 GTB-ს მაქსიმუმზე (328 კმ/სთ) ოდნავ მეტია.

სიჩქარე და აჩქარების მონაცემები ბევრით არ შეცვლილა, თუმცა სამუხრუჭე სისტემის მოდერნიზება მაინც გადაწყდა. მთავარი როლი კარბონის კომპოზიტისგან დამზადებულ სამუხრუჭე დისკებს დაეკისრა, რომელთა წყალობითაც, 100 კმ/სთ-დან სრულ გაჩერებამდე ავტომობილს 32.5 მეტრი ჰყოფნის. იმისთვის, რომ მუხრუჭებმა ინტენსიურად გამოყენებას გაუძლოს, ისინი ვენტილირებადია, რასაც სპეციალური ნადები უზრუნველყოფს. ეს ნადები გახურებულ ჰაერს ფანტავს და მისგან ტემპერატურის უკეთ ართმევას უზრუნველყოფს. მუხრუჭები 20-დუიმიან ბორბლებშია მოთავსებული, რომლებიც ”მიშლენის” წარმოების საბურავებითაა შემოსილი. ამასთან, წინა საბურავების ზომა 285/30, უკანისა კი - 315/35-ია.

რა თქმა უნდა, ცვლილება დაკიდების სისტემასაც შეეხო. პირველ რიგში, შეიცვალა დრეკადი ელემენტები - 599 GTO-ს უფრო ხისტი ზამბარები ემსახურება, რომელთა რხევების ჩაქრობასაც, შესაბამისად ხისტი და, რაც მთავარია, აქტიური ამორტიზატორები უზრუნველყოფს. უკანა საკიდარს განივი მდგრადობის ახალი სტაბილიზატორი დაუყენეს. მთელ საკიდართან ერთად, უნისონში მოქმედებს ტრექშნ კონტროლისა (F1-Trac) და დინმიკური სტაბილიზაციის (VDC) სისტემები.

ახალ ავტომობილს ტესტები ”ფერარის” ფიორანოს ტრეკზე ჩაუტარდა, სადაც მან ყველა წინა სერიული ავტომობილის მაჩვენებლები გააუმჯობესა და ამით საკუთარ სახელწოდებაში აბევიატურა GTO-ს გამოჩენა გაამართლა. სხვათა შორის, აქამდე ამ ტრასის რეკორდსმენი ”ფერარი ენცო” იყო, რომელმაც 2002 წელს ერთი წრე 1 წუთსა და 24.9 წამში განვლო. GTO-ს რეკორდული მაჩვენბელი კი 1 წუთი და 24 წამია.

დაბოლოს, ფასის შესახებ. თქმა არ უნდა, 599 GTO ყველასათვის ხელმისაწვდომი არაა - 320 000 ევროს თუნდაც ასეთ შესანიშნავ ავტომობილში ბევრი ვერ გადაიხდის. სამაგიეროდ, ”ფერარიმ” კიდევ ერთი ექსკლუზიური შედევრი შექმნა, რომელიც ლიდერის წოდების შენარჩუნებაში აუცილებლად დაეხმარება.

Monday, June 28, 2010

პატარა ”პორშე კაიენი” კონვეიერზე დადგება

Porsche Insider Confirms Baby Cayenne

28 ივნისი

დიდი ხანია, რაც საავტომობილო მედიაში ცირკულირებს ცნობა იმის შესახებ, რომ ”პორშე” უგზოობის კომპაქტური ავტომობილის გამოშვებას აპირებს. რამდენიმე დღის წინ კი ეს ინფორმაცია მართალია ინკოგნიტო, მაგრამ მაინც რეალურმა და სანდო წყარომ დაადასტურა, რომელიც გერმანულ კომპანიაში მუშაობს. ეს დადასტურება კი გერმანულმა გაზეთმა ”ჰანდელსბლატმა” მიიღო. გაზეთის წყაროს ინფორმაციით, ახალი ავტომობილი დიდი ხანია, შემუშავების სტადიაში იმყოფება.

ახალი ავტომობილი მეხუთე იქნება შტუტგარტული კომპანიის საწარმოო პროგრამაში, რომელშიც დღეისათვის 911 კუპე/კაბრიოლეტი, ”ბოქსსტერ/კაიმანი”, ”კაიენი” და ”პანამერა” შედის. ”პატარა კაიენის” გამოშვებით, ”პორშე” სავარაუდოდ შეძლებს ბაზრის პრემიუმ სეგმენტის უგზოობის კომპაქტური მოდელების კლასში ”მერსედესის” და ”ბეემვეს” დომინაციის შერბილებას.

ახალი ავტომობილისთვის ”პორშე” თავისი ნათესავი ”ფოლკსვაგენის” რომელიმე მოდელის (სავარაუდოდ ”აუდის” უგზოობის Q5-ის) პლატფორმას გამოიყენებს. შტუტგარტელები იმედოვნებენ, რომ უგზოობის კომპაქტური ავტომობილიც ისეთივე წარმატებული იქნება, როგორიც ”კაიენია”, რომელმაც მათ უზარმაზარი მოგება მოუტანა.

ბევრი თვლის, რომ უგზოობის ავტომობილები ”პორშეს” იმიჯს არ შეეფერება, თუმცა ისიც აშკარაა, რომ ეს სიახლეები კომპანიის და მისი აქციონერების კეთილდღეობას ემსახურება. სხვათა შორის, იგივე წუწუნი თვით კომპანიის ხელმძღვანელებს შორის მაშინაც ისმოდა, როდესაც კომპანიამ ჯერ ”კაიენის”, შემდეგ კი ”პანამერას” წარმოების გადაწყვეტილება მიიღო.

”ბეემვე” ნულოვან სერიაზე მუშაობს

BMW 0 Series in the Works

28 ივნისი

სუბკომპაქტური და ჯუჯა ავტომობილების წარმოება თანდათან პრემიუმ კლასის ავტომობილების მწარმოებლებისთვისაც სერიოზული ”გასართობი” ხდება. ჯერ იყო და ”დაიმლერმა” ”სმარტის” წარმოება დაიწყო, შემდეგ ამავე კლასის ავტომობილის წარმოების გეგმებზე ”აუდიმ” განაცხადა, ”ასტონ მარტინმა” კი ”ტოიოტას” IQ-ს წარმოების ლიცენზია მიიღო და მის ბაზაზე მალე ჯუჯა ”სიგნიტის” წარმოებას დაიწყება.

კონკურენტების უქმად შემყურე არც ”ბეემვეა”, რომელიც უკვე დიდი ხანია, პროექტ i-ზე მუშაობს, რომელიც საქალაქო მინიავტომობილ ”მეგასიტის” წარმოებას ითვალისწინებს. სულ ახლახანს, ბავარიელება გამოაცხადეს, რომ ამ ავტომობილსაც საკუთარი ბრენდით გამოუშვებენ. არადა, კარგა ხანს იყო ლაპარაკი იმაზე, რომ თავისი მინი ავტომობილებისთვის ბავარიელები ახალი ბრენდის შემუშავებას, ან სახელ ”იზეტას” აღდგენას აპირებდნენ.

ამ ავტომობილით, რომელიც ბაზარზე 2012 წელზე ადრე არ გამოჩნდება, ”ბეემვემ” კონკურენცია ”აუდის” A1-ს და ”მერსედეს ბენცის” A-კლასს უნდა გაუწიოს. ამ ეტაპზე ცნობილია, რომ 2012 წელს ბავარიელები ნულოვანი სერიის შექმნის განცხადებას გამოაქვეყნებენ და მათი პირველი სუბკომპაქტი სწორედ ამ სერიიდან იქნება.

სხვათა შორის, ამას წინათ, ბავარიული კომპანიის მარკეტოლოგებმა შექმნეს სარეკლამო ვიდეოკლიპი, რომელზეც მათი კომპანიის ჩინური საქმიანობაა ასახული. ამ კლიპის მე-19 წამზე, კადრში ჩნდება გამოსახულება, სადაც დიზაინერი ”ბეემვეს” სრულიად ახალი ავტომობილების ესკიზების ფონზე მუშაობს (სურათზე). ინტერნეტით გავრცელდა ინფორმაცია იმის შესახებ, რომ ამ ესკიზებზე სწორედ მომავალი ნულოვანი სერიის ავტომობილი ჩანს.

იმავე ინფორმაციის თანახმად, ახალი ავტომობილი დაახლოებით ”ფორდ ფიესტას” ზომის იქნება. რა თქმა უნდა, მას წინა წამყვანი ბორბლები უნდა ჰქონდეს. და ეს ”ბეემვესთვის” დიდი სიახლე იქნება, რომელიც კომპანიის მთავარმა აღმასრულებელმა ნორბერტ რაიტჰოფერმა უკვე დაადასტურა.

ნულოვანი სერიის მოდელი შეავსებს ნიშას ”მინისა” და 1-ლი სერიის მოდელს შორის და ის შემდგომი თაობის ”მინის” პლატფორმაზე აიგება. გავრცელებული ინფორმაციით, ნულოვანი სერიის მოდელები სამ და ხუთკარიანი ჰეჩბეკის ძარებით აღიჭურვება. რაც შეეხება ძრავებს, მასზე იმ აგრეგატებს გამოიყენებენ, რომლებიც პროექტ ”მეგასიტის” ფარგლებში მუშავდება. ეს იქნება როგორც ბენზინსა და დიზელზე, ასევე ელექტროენერგიაზე მომუშავე ძრავები.

გორდონ მარის ჯუჯა T.25 მზადაა

Gordon Murray T.25 City Car Makes Public Debut Today

28 ივნისი

ბრიტანულმა კომპანია „გორდონ მარი დიზაინმა“, რმელიც ფორმულა ერთის ყოფილ ინჟინერს, გორდონ მარის ეკუთვნის, სამადგილიან საქალაქო ჯუჯა ავტომობილ T25-ის პირველი ფოტოები და ტექნიკური მონაცემები გაავრცელა.

ავტომობილი მცირე გაბარიტებით გამოირჩევა. მისი სიგრძე 2.4 მეტრი, სიგანე 1.3 მეტრი, სიმაღლე კი 1.4 მეტრია. მის ბორბლებს შორის ბაზა კი თანამედროვე ჯუჯებზე - „სმარტ ფორთუსაზე“ და „ტოიოტა iQ-საზე“ მოკლეა. თუმცა T25-ის შემქმნელები ირწმუნებიან, რომ მათი ჯუჯას სალონი უფრო მოზრდილი და კომფორტულია. რაც მთავარია, მასში იოლად ეტევა მძღოლი და ორი მოზრდილი მგზავრი.

ავტომობილის წონა სულ რაღაც 575 კილოგრამია, მობრუნების რადიუსი კი სულ რაღაც, 6 მეტრია. გამართული სავარძლების შემთხვევაში, საბარგულის მოცულობა 160 ლიტრია, სავარძლების დაკეცვის შემდეგ კი 720 ლიტრამდე იზრდება. ეს კი კომპაქტური ჰეჩბეკების საბარგულის მოცულობაზე გაცილებით მეტია.

T25-ს წინაც და უკანაც დამოუკიდებელი საკიდარები აქვს, მოძრაობაში კი ის 51-ცხენისძალიან სამცილინდრიან ძრავს მოჰყავს, რომლის მუშა მოცულობაც 660 კუბური სანტიმეტრია. ეს პატარა აგრეგატი ავტომობილის უკანა ნაწილში მდებარეობს, მასთან ხუთსაფეხურიანი კოლოფია შეწყვილებული. კომპანია ”გორდონ მარი დიზაინის” მონაცემებით, ადგილიდან 100 კმ/სთ სიჩქარის ასაკრეფად ამ ჯუჯას 16.2 წამი ესაჭიროება, მაქსიმალური სიჩქარე კი 145 კმ/სთ-ს აღწევს. ამასთან, საწვავის საშუალო ხარჯი 100 კილომეტრზე 3.8 ლიტრია, ყოველი კილომეტრის გავლისას კი ძრავი ატმოსფეროში 86 გრამ СO2-ს გამოჰყოფს.

”მარი T25-ის” საბაზო კომპლექტაციაში შევა მუხრუჭების ბლოკირების საწინააღმდეგო სისტემა, ტრექშნ კონტროლი, სტაბილიზაციის სისტემა და უსაფრთხოების ბალიში. მოგვიანებით, გორდონ მარის კომპანია ამ ავტომობილის ბაზაზე ელექტრომობილსაც დაამზადებს, რომელიც აკუმულატორების ერთი სრული დამუხტვით 100 კილომეტრს გაივლის, აკუმულატორების სრული დამუხტვისთვის კი 4 საათი იქნება საკმარისი.

სავარაუდოდ, ამ ჯუჯას სერიული წარმოება უახლოეს ორ წელიწადში დაიწყება, მაგრამ გორდონ მარის კომპანია მის წარმოებას თავად არ აპირებს. ის მოლაპარაკებას სხვა კომპანიებთან აწარმოებს. უფრო მეტიც, გარანტირებულად შეიძლება იმის თქმა, რომ T25-ის ქარხანა ბრიტანეთში აშენდება.

”ბენტლი” ”პორშე პანამერას” კონკურენტს გამოუშვებს

Bentley considers Panamera rival

28 ივნისი

”ბენტლის” ხელმძღვანელობა სრულიად ახალი მოდელის, ხუთკარიანი სპორტული ჰეჩბეკის წარმოების შესაძლებლობას განიხილავს, მოდელისა, რომლითაც ”პორშეს” პოპულარულ ხუთკარიან ჰეჩბეკ ”პანამერას” გაუწევს კონკურენციას. რაც მთავარია, ახალი ავტომობილი შემდეგი თაობის კონტინენტალის ბაზაზე აიგება.

ბრიტანულ ჟურნალ ”ავტოქარის” ინფორმაციით, ამ ეტაპზე ”ბენტლის” ხელმძღვანელობა ახალი ავტომობილის წარმოების დაწყების მიზანშეწონილებას განიხილავს. შესასწავლია, იქნება თუ არა მოთხოვნილება ”კონტინენტალის” ბაზაზე დამზადებულ ახალ ავტომობილებზე. ჯერჯერობით, ”ბენტლი” მოდელ ”კონტინენტალს” კუპეს, კაბრიოლეტისა და სედანის ძარებით უშვებს. და თუ ძარების არჩევანის გაზრდა გადაწყდა, არჩევანი პირველ რიგში, ჰეჩბეკზე შეჩერდება.

”ავტოქარის” ინფორმაციით, ახალი ”კონტინენტალის” შემუშავება ”ბენტლის” უკვე დაწყებული აქვს. სავარაუდოდ, ამ ავტომობილს სრულიად ახლებური გარეგნობა ექნება. ის ”აუდი A8-ს” შასიზე დადგება და მისგანვე მიიღებს პნევმატურ საკიდარს და სამუხრუჭე სისტემას. ”ბენტლის” ინჟინრები კი იმაზე იზრუნებენ, რომ ავტომობილმა წონაში დაიკლოს. ამასთან, ეს არ გაკეთდება კომფორტის შემცირების ხარჯზე. ხელუხლებელი დარჩება სრულამძრავიანი საკიდარი და ის ელემენტები, რომლებიც ავტომობილის მანევრულობას და მართვადობას აუმჯობესებს.

ახალი ”ბენტლი კონტინენტალი” ბენზინის მოდერნიზებული W12 ძრავით აღიჭურვება, რომლის სიმძლავრეც 580 ცხენის ძალას მიაღწევს, მას კი 8-საფეხურიანი ავტომატური კოლოფი შეუწყვილდება. ავტომობილის ტოპ ვერსიებისთვის, ძრავის სიმძლავრე 650 ცხენის ძალამდე გაიზრდება. არაა გამორიცხული, რომ ახალი ”კონტინენტალი” უფრო სუსტი ძრავებით, ასევე V8 დიზელით და ჰიბრიდუი სისტემითაც აღიჭურვოს.

იმავე ”ავტოქარის” ინფორმაციით, ახალი ”კონტინენტალი” პირველად კუპეს ძარით გამოვა. სავარაუდოდ, ბაზარზე მისი გამოჩენა 2011 ან 2012 წელსაა მოსალოდნელი. შემდეგ დადგება ”ფლაინგ სპურის” ჯერი, მას კი კაბრიოლეტი და ტოპ ვერსია ”სპიდ” მოჰყვება.

”ყალყზე შემდგარი კვიცების” დიდი გეგმები

New Prancing Horses Rollout Plan

28 ივნისი

სუპერ ავტომობილების მწარმოებელი იტალიურ კომპანია ”ფერარის” დიდი სამომავლო გეგმები აქვს. ”კვიცებმა” უკვე გამოაქვეყნეს თავიანთი სამოდელო გამის განახლების პროგრამა. ამჯერად კი, გამოცემა ”მოტორ ტრენდთან” საუბრისას, კომპანიის აღმასრულებელმა დირექტორმა ამადეო ფელისამ განაცხადა, რომ თავისი სამომავლო გეგმების შესახებ, კომპანია განცხადებას ყოველწლიურად გააკეთებს.

დღეისათვის მარანელოელების საწარმოო პროგრამაში ოთხი ძირითადი მოდელი შედის. ამათგან ორი GT კლასს (გრან ტურიზმო) მიეკუთვნება - ესენია ”კალიფორნია” და ”612 სკალიეტი”. ორი კი ექსტრემალური მოდელია - 458 და 599. ყოველწლიურად, ამ მოდელებიდან ერთ-ერთი ან განახლდება, ან მთლიანად შეიცვლება. განახლების (რესტაილინგის) შემთხვევაში, ავტომობილის სახელწოდებაში გამოჩნდება ასო М, რაც მოდიფიცირებულს ნიშნავს.

მოდელები მაშინ განახლდება, როდესაც მათ ოთხი წელი შეუსრულდებათ. ცვლილებები საბაზო მოდელთან შედარებით, იქნება როგორც ვიზუალური, ასევე ტექნიკური. კიდევ ოთხი წლის შემდეგ კი მოდელი ახალი ავტომობილით შეიცვლება. პარალელურად, მარანელოელები თავიანთი ძირითადი მოდელების დამატებით ვერსიებს - ”სკუდერიასა” და ”სპაიდერს” გამოუშვებენ. დაკიდევ, ”ფერარი” დაიტოვებს თავისი პროგრამის ბრილიანტს - მოდელ ”ენცოს”, რომელსაც განახლება 10 წელიწადში ერთხელ მოუწევს.

ჩამოთვლილი ოთხეულიდან, პირველი ”612 სკალიეტი” შეიცვლება. მერმისს მას შეცვლის მისი მომდევნო თაობის ავტომობილი, რომელიც ახლანდელზე უფრო დიდი და მძლავრი იქნება. ამასთან, ის ორადგილიანი დარჩება. შემდეგ მოდელ 599-ის ჯერ დადგება, რომელსაც ასევე მთლიანად შეცვლა უწევს.

რაც შეეხება ჰიბრიდულ აგრეგატებს, ფელისა დარწმუნებულია, რომ ”ფერარის” ასეთი აგრეგატები არ სჭირდება, მაგრამ ის იმასაც აცნობიერებს, რომ ახალი ევროპული სტანდარტების შემოღების შემდეგ, საწვავის ეკონომიასა და გარემოს ნაკლებად დაბინძურებაზე ზრუნვა მის კომპანიასაც მოუწევს. მაგრამ, ჰიბრიდული მოდელები ”ფერარის” საწარმოო პროგრამაში ოდნავ მოგვიანებით გამოჩნდება. პირველი კი ასეთ სისტემას მოდელი 599 მოირგებს, რომლის ჰიბრიდული ვერსია ”HY-კერსიც” ჟენევის გამოფენაზე ვიხილეთ. სამომავლოდ, ”ფერარი” V6 და V8 ტურბოკომპრესორიანი ძრავების წარმოებასაც აპირებს.

გარდა ამისა, ”ფერარის” პრეზიდენტი ლუკა დი მონტეძემოლო პირობას იძლევა, რომ მისი კომპანია ორიდან ერთ წლამდე შეამცირებს კლიენტების მოლოდინის პერიოდებს. მისი თქმით, ხანგრძლივი მოლოდინი უარყოფითად აისახება კომპანიის იმიჯზე. ამასთან, ასეთი მოლოდინის გამო, მათ შეიძლება არჩევანი კონკურენტი კომპანიების ავტომობილებზე შეაჩერონ, რაც მარანელოელებისთვის არასასურველია.

და, რაც მთავარია, ”ფერარი” არ აპირებს თავისი წარმოების მოცულობის გაზრდას და ეს ექსკლუზიური ავტომობილების მწარმოებლის იმიჯის შესანარჩუნებლად ხდება. ამასთან, შეკვეთილი ავტომობილის მიწოდების ვადის შემცირება აწყობის ტემპის გაზრდის ხარჯზე მოხდება.

Saturday, June 26, 2010

”ლამბორგინი გალიარდო” – უკვე 10 000

Lamborghini Celebrates Production of 10,000th Gallardo

26 ივნისი

სანტ’აგატა ბოლონეზეში მდებარე ”ლამბორგინის” ქარხანაში ღირსშესანიშნავი მოვლენა მოხდა - მე-10 ათასე ”ლამბორგინი გალიარდო” დამზადდა. ამგვარად, სუპერ ავტომობილების მწარმოებელი იტალიური კომპანიის ისტორიაში, ეს მოდელი ყველაზე წარმატებული და მომგებიანი გახდა. მე-10 ათასე ”ლამბორგინი გალიარდო” ყვითელი ფერისაა და მას მალე მიიღებს თავისი ჩინელი პატრონი.

”იმ ავტომობილის გამოშვება, რომლის ნომერიც 10 000-ია, ჩვენი კომპანიის ისტორიაში განსაკუთრებული მოვლენაა. ”ლამბორგინი” ექსტრემალური, უკომპრომისო ავტომობილების იტალიური ბრენდია, ”გალიარდომ” კი ჩვენი ბიზნესის განვითარებაში დიდი როლი ითამაშა და ჩვენს მარკას კიდევ უფრო გაუთქვა სახელი. დღეისათვის ”ლამბორგინი” მსოფლიოს 45 ქვეყანაშია წარმოდგენილი, სადაც 120 დილერი გვყავს”, - განსაკუთრებული მოვლენისადმი მიძღვნილ ცერემონიაზე განაცხადა ”ლამბორგინის” შეფმა შტეფან ვინკელმანმა.

”გალიარდო” სრულამძრავიანი ავტომობილია და ის V10 ძრავითაა აღჭურვილი. იტალიურმა კომპანიამ ის ბაზარზე 2003 წელს გამოუშვა, მის ბაზაზე კი მოგვიანებით სხვადასხვა მოდიფიკაციის (სპაიდერის და სუპერლეგარას) წარმოებაც დაიწყო. 2007 წელს კომპანიამ ”გალიარდოს” გაუმჯობესებული ვერსია - ”გალიარდო LP 560-4” გამოუშვა, რომელსაც ოდნავ შეცვლილი სტილი და გაზრდილი სიმძლავრე აქვს. კუპეს მალე სპაიდერი მოჰყვა, შემდეგ კი ”ლამბომ” სპეციალური ვერსია ”გალიარდო LP 550-2 ვალენტინო ბალბონი” გამოუშვა.

ჟენევის წლევანდელ ავტო შოუზე, ”ხარებმა” ”გალიარდოს” კიდევ ერთი ვერსია, მნიშვნელოვნად შემსუბუქებული ”გალიარდო LP 570-4 სუპერლეგარა” გამოუშვეს.

”ფოლკსვაგენი” დაკარისთვის ”ტუარეგ 3-ს” ამზადებს

Spyshots: 2011 Race Touareg 3

26 ივნისი

თვენახევრის წინ, ”ფოლკსვაგენმა” გამოაცხადა, რომ კვლავ მიიღებს მონაწილეობას რალი-მარათონ დაკარის რბოლაში, თუმცა როგორც ჩანს, ეს გადაწყვეტილება ვოლფსბურგელებმა უფრო ადრე მიიღეს, რადგან მათ მანქანა ტესტებისთვის უკვე მზად ყავთ, მის მომზადებას კი თვენახევარი აშკარად არ ეყოფოდა.

ინტერნეტ საიტ ”ავტოევოლუშნის” ჟურნალისტმა სარბოლი მანქანის ფოტოები მაშინ გადაიღო, როდესაც გერმანული კომპანიის ინჟინრები მას პირველ გამოცდას უტარებდნენ. გამოცდა კი არა უდაბნოში ჩატარდა, სადაც მას ასპარეზობა მოუწევს, არამედ ალპებში.

ფოტოებიდან ჩანს, რომ ახალი სარბოლი ”ტუარეგი” გარეგნობით პრაქტიკულად არ შეცვლილა. სამაგიეროდ, ძარის შიგნით გერმანულ კომპანიას სიახლეები აუცილებლად ექნება. სხვა შემთხვევაში, ის ასეთ საქმეს არც შეეჭიდებოდა. ძრავი ძველია - ხუთცილინდრიანი 2.5-ლიტრიანი ტურბოდიზელი, რომელსაც სავარაუდოდ, სიმძლავრე და მაბრუნი მომენტი უცვლელი.

ეს კი ნიშნავს, რომ ძრავის სიმძლავრე 284 ცხენის ძალას, მაქსიმალური მაბრუნი მომენტი კი 600 ნიუტონმეტრი იქნება, რაც ამ ტიპის ავტომობილისთვის შესანიშნავი მაჩვენებლებია (განსაკუთრებით მაბრუნი მომენტი). ამაზე კი თუნდაც ის ფაქტი მეტყველებს, რომ ამ ავტომობილით გერმანულმა კომპანიამ წლევანდელ დაკარზე პირველი ორი ადგილი დაიკავა.

ძრავისგან განსხვავებით, შეიცვლება ავტომობილის საკიდარი. ეს ის კვანძია, რომლის გამძლეობასა და გამართულად მუშაობასაც დაკარის რბოლაზე განსაკუთრებული მნიშვნელობა ენიჭება. ასევე შეიცვლება ავტომობილის ელექტრონიკა. ამ ავტომობილის ოფიციალური პრეზენტაცია არ ჩატარდება. პირველად კი ის საზოგადოების წინაშე რბოლის სტარტზე წარსდგება.

Friday, June 25, 2010

”მერსედეს ბენცს” სუპერქარი SLS AMG ელექტროდიეტაზე გადაჰყავს

Mercedes-Benz SLS AMG E-Cell Prototype

25 ივნისი

საახლოებით ერთი წლის წინ, როდესაც საზოგადოებას თავისი ახალი სუპერავტომობილი SLS AMG, იგივე ”გოლუინგი” (თოლიას ფრთა) გააცნო, ”მერსედეს ბენცმა” გამოაცხადა, რომ ამ ავტომობილის ბაზაზე ელექტრომობილის წარმოებასაც გეგმავდა. გავიდა ერთი წელი და შტუტგარტულმა კომპანიამ სიტყვის შესრულების პირველი ეტაპი - ელექტრომობილის პირველი პროტოტიპი, ”SLS AMG E-სელ” გვიჩვენა.
”სამქიმიანების” ინჟინრებმა SLS AMG-ს ბენზინის 6.3-ლიტრიანი V8 ძრავი (რომელიც 571 ცხენის ძალას ავითარებს) მოხსნეს და მის ნაცვლად, ავტომობილი ოთხი ელექტროძრავით აღჭურვეს, რომლებიც უშუალოდ ბორბლების სიახლოვეს განალაგეს. შტუტგარტელების განცხადებით, მათ შეეძლოთ ელექტროძრავების ბორბლებში მოთავსება, თუმცა ასე დაურესორებელი წონა გაიზრდებოდა, რაც ავტომობილის დინამიკურ მახასიათებლებზე უარყოფითად იმოქმედებდა. ასეა თუ ისე, ავტომობილი სრულამძრავიანია.
ოთხივე ძრავის ჯამური სიმძლავრე 526 ცხენის ძალას შეადგენს, მისი მაქსიმალური მაბრუნი მომენტი 880 ნიუტონმეტრია. რაც ყველაზე საინტერესო და მნიშვნელოვანია, მაქსიმალურ მომენტს ძრავები სტარტიდანვე ავითარებენ, რისი წყალობითაც, ავტომობილს ბრწყინვალე დინამიკური მახასიათებლები ექნება. დაკიდევ, თითო ღერძს თავისი სატრანსმისიო კვანძი ემსახურება. ”მერსედეს ბენცი” ვარაუდობს, რომ ამ ავლა-დიდებით, ავტომობილი ადგილიდან 100 კმ/სთ სიჩქარის აკრეფას დაახლოებით 4 წამში მოასწრებს, რაც ელექტრომობილისთვის შესანიშნავი მახასიათებელია.
ძრავებს ელექტროენერგიით 400-ვოლტიანი ლითიუმ იონური აკუმულატორების ბლოკი ამარაგებს. აკუმულატორების დატენვა მუხრუჭებიდან გამომუშავებული ენერგიითაც შეიძლება. აკუმულატორების ნაწილი ავტომობილის წინ, ძრავის ადგილზე, ნაწილი სავარძლების უკან და ნაწილიც ცენტრალური გვირაბის შიგნით თავსდება. კომპანიის ინჟინერთა განცხადებით, ასე მათ ავტომობილის სიმძიმის ცენტრის დაბლა დაწევა და წონის ოპტიმალურად განაწილება შესძლეს, რაც დადებითად იმოქმედებს ავტომობილის მანევრულობასა და სწრაფი მოსახვევების გავლისას, მის მდგრადობაზე.

სუპერ ავტომობილიდან ელექტრომობილის მისაღებად, ”მერსედესისა” და მისი შვილობილი AMG-ს ინჟინრებს საბაზო ავტომობილის კონსტრუქციაში მნიშვნელოვანი ცვლილებების შეტანა დასჭირდათ. მთლიანად შეიცვალა წინა საკიდარი, რათა ელექტროძრავებისთვის ადგილი გამოთავისუფლებულიყო. კარბონის კომპოზიტისგან დამზადდა სამუხრუჭე დისკები.

თითქმის არ შეცვლილა ავტომობილის შიდა და გარე დიზაინი. ეგაა, ის მყვირალა ყვითელ ფერში (AMG ლუმილექტრიკ მაგნო) ფერში გამოეწყო. ტრადიციული გადაცემათა კოლოფის საფეხურების შემცვლელი სელექტორი სულ სამმა კლავიშმა შეცვალა, რომლებიც ვტომობილის წინ და უკან გადაადგილების ბრძანებას იძლევა, ან ის პარკირების რეჟიმში გადაჰყავს. ცენტრალურ კონსოლზე კი დიდი სენსორული მონიტორი გამოჩნდა, რომლის მეშვეობითაც შესაძლებელია კლიმატკონტროლის, სანავიგაციო და მულტიმედიური სისტემების მართვა. რაც მთავარია, მასზე გამოისახება ავტომობილის ყველა ძირითადი აგრეგატის და კვანძის მუშაობის რეჟიმები და აკუმულატორებში დარჩენილი ენერგიის მოცულობაც.

”მერსედეს ბენცი” ჯერ არ აზუსტებს, თუ როდის აპირებს ელექტრომობილ ”SLS AMG E-სელ-ის” წარმოების დაწყებას. სავარაუდოდ, ის ბაზარზე შეზღუდული რაოდენობით, 2013 წელს გამოჩნდება.

”ფოკუსის” სპეცვერსიები ლე მანის ”ფორდისეული” ტრიუმფატორების სახელზე

Ford Announces Five Focus RS Le Mans Classics Specials

25 ივნისი

იმ ავტომობილებს, რომლებმაც ”ფორდს” ლე მანის 24-საათიან რბოლებში გაუთქვეს სახელი, ამერიკულმა კომპანიამ თავის პოპულარულ ჰეჩბეკ ”ფოკუსის” სპორტულ მოდელ RS-ის ხუთი სპეციალური ვერსია მიუძღვნა, რომლებიც ლეგენდარული რბოლის ტრიუმფატორების ფერებშივე გამოაწყო.

დირბორნული კომპანია მალე შეწყვეტს მოდელ ”ფოკუს RS-ის” წარმოებას და ლე მანის სერიის სპეც ვერსიების (ფორდ ფოკუს RS ლე მანს ედიშნ) შექმნაც სწორედ ამას დაუკავშირა. ”ფორდის” ლეგენდარულმა ავტომობილმა GT 40-მა და მისმა მოდიფიკაციებმა 1960-70-იან წლებში ლე მანის რბოლებზე ხუთი გამარჯვება მოიპოვეს.

”ცისფერ ოვალს” პირველი დიდი გამარჯვება GT 40-ის მეორე მოდიფიკაციამ 1966 წელს მოაპოვებინა. მის საპატივცემულოდ, სპეციალური ”ფოკუსი” თეთრი ზოლებით გაწყობილ შავად გაფორმდა. შემდეგ სეზონში ლე მანი GT 40-ის მეოთხე მოდიფიკაციამ მოიგო, რომლის ფერიც წითელი იყო და მას თეთრი ზოლები ჰქონდა. იმავე სეზონში, წარმატებული გამოდგა მეორე მოდიფიკაციის B ვერსია, რომელიც ლურჯ და თეთრ ფერებში იყო გამოწყობილი. ცისფერისა და ფორთოხლისფერის შეხამებით გაფორმდა ის ”ფოკუსი”, რომელიც ლე მანის 1968 და 1969 წლების გამარჯვებულ GT40-ს მიეძღვნა. დაბოლოს, ”ფორდ კაპრი RS 2600” ის მანქანაა, რომელმაც 1972 ტურიზმის კლასის მსოფლიო ჩემპიონატი მოიგო. ამ მანქანის შესაბამისი ”ფოკუს RS-ი” თეთრადაა შეღებილი და მას ლურჯ-წითელი ზოლების კომბინაცია ამშვენებს.

ხუთივე ავტომობილს ინდივიდუალური ინტერიერი აქვს. მათში ”რეკაროს” წარმოების სპორტული სავარძლები მოთავსდა. სალონები ტყავითაა გაწყობილი. მათს გასაფორმებლად კი ის ფერებია გამოყენებული, რომლებითაც ძარაა შეღებილი.

”ცისფერი ოვალის” განცხადებით, ხუთივე ავტომობილი სარბოლ ფესტივალ ”ლე მანს კლასიკში” მიიღებს მონაწილეობას, რომელიც ივლისში ჩატარდება. მათ სამართავად კი ”ფორდი” სპეციალურად მიიწვევს საპატიო სტუმრებს. ფესტივალის დასრულების შემდეგ კი ხუთივე ავტომობილს გასაყიდად გამოიტანენ.

”აუდი” A8-ს და A1-ის წარმოებას ზრდის

Audi increasing production to meet A8, A1 demand

25 ივნისი

”ფოლკსვაგენის” ჯგუფში შემავალი კომპანია ”აუდი”, რომელიც პრემიუმ კლასის ავტომობილების წარმოებაზეა სპეციალიზებული, სედან A8-ს და კომპა ქტურ ჰეჩბეკ A1-ზე მოთხოვნას ვერ აუდის, რის გამოც, მათი წარმოების მოცულობის გაზრდა უწევს. ამისათვის კი, კომპანიის მთავარი ფინანსისტის, აქსელ შტროტბეკის თქმით, ქალაქ ნეკარსულმის ქარხანა შაბათსაც იმუშავებს.

ამ ორი, სხვადასხვა ზომის ავტომობილიდან, განსაკუთრებული პოპულარობით ლუქსის კლასის A8 სარგებლობს. რაც შეეხება A1-ს, პირვანდელი გეგმით, ის წლიურად 100 000 ცალი უნდა დამზადებულიყო, თუმცა ბაზრის რეალური მოთხოვნა ამაზე გაცილებით მეტია.

ცნობისათვის, ”აუდის” მიზანია, რომ 2015 წელს ეს კომპანია პრემიუმ სეგმენტის მსოფლიო ლიდერი უნდა გახდეს. დღეისათვის ამ სეგმენტის ლიდერი ”ბეემვეა”, მეორეზე კი ”მერსედეს ბენცია”. რაც შეეხება ”აუდის”, ამ კომპანიამ ორი წლის წინ, მილიონზე მეტი ავტომობილი გაჰყიდა, თუმცა შარშან გაყიდვები 5.4 პროცენტით, 949 729-მდე შეუმცირდა. წელს კი, დიდი შანსია იმისა, რომ ინგოლშტაფტელები მილიონიან ზღვარს ისევ გადალახავენ.

მიმდინარე წელს, ”აუდი” 12 ახალ და განახლებულ მოდელს გამოუშვებს, მათ შორის, კუპე A7-ს. შტროტბეკის თქმით, ეს საკმარისი იქნება იმისათვის, რომ კომპანიის გაყიდვები ერთნიშნა პროცენტულ მაჩვენებელზე გაცილებით სწრაფი ტემპით გაიზარდოს.

მიუხედავად იმისა, რომ გლობალური ეკონომიკური კრიზისის ეფექტი ავტოინდუსტრიას ჯერაც ეტყობა, ”აუდი” მაინც ზრდას ახერხებს, რაც იმის შედეგია, რომ ეს კომპანია აქტიურად მოქმედებს სწრაფად მზარდ ჩინურ ბაზარზე.

”აუდის” წარმატებებზე ბოლო ორი წელი ის ფაქტიც ვერ ახდენდა გავლენას, რომ ჩინეთი ორი წლის განმავლობაში არაფერს აკეთებდა იუანის გასამყარებლად. ამის მიზეზი კი ისაა, რომ გერმანულ კომპანიას ცისქვეშეთში ერთობლივი საწარმოები აქვს და იქიდან მაკომპლექტებლების იმპორტი იაფი უჯდება. და მართალია, ჩინეთის ხელისუფლება იუანის გამყარებაზე ზრუნვას აპირებს, შტროტბეკი ამბობს, რომ ეს მისი კომპანიის ბიზნესზე დიდ გავლენას არ იქონიებს.

”ბეემვეს” მე-5 სერიაზე რიგები დაუდგა

BMW says revamped 5-series model sold out, forcing buyers to wait months
24 ივნისი

”ბეემვემ” გამოაცხადა, რომ მე-5 სერიის სედანების მარაგი სრულად ამოწურა, რის გამოც, ამ ავტომობილის ყიდვის მსურველებს, ამიერიდან სამი-ოთხი თვე რიგში ყოფნა მოუწევთ.

გერმანული კომპანიის გაყიდვების განყოფილების შეფი იან რობერტსონი ამბობს, რომ ”ბეემვეს”, ”მინისა” და ”როლს როისის” მეორე კვარტლის გაყიდვების ტემპი ისეთია, რომ ამ მხრივ, 14-პროცენტიანი ზრდა დაფიქსირდება. მისი თქმით, ბაზრების უმეტესობა სწორედ ასეთი ოპტიმისტური პროგნოზის გაკეთების საშუალებას იძლევა.

ამასთან, რობერტსონი დასძენს, რომ კონკურენტი ”მერსედეს-ბენცისა” და ”აუდისგან” განსხვავებით, ”ბეემვეს” მთავარი მიზანი მოგების გაზრდაა და არა გაყიდვების მოცულობის და ბაზარზე წილის გაზრდა. ამ მიზნის მისაღწევად, ბავარიული კომპანია ცდილობს, რომ მის სხვადასხვა კლასის მოდელებს, ბევრი საზიარო მაკომპლექტებელი ნაწილი ჰქონდეს.

მაგალითად, მე-5 სერიის ახალი სედანი 70 პროცენტით იმ ნაწილებითაა დაკომპლექტებული, რომლებიც მე-7 სერიის სედანზეც გამოიყენება. არადა, მათს ფასებს შორის დიდი განსხვავებაა: თუ მე-5 სერიის საბაზო ღირებულება (ამერიკაში) 44 550 დოლარია, მე-7 სერიის საბაზო ღირებულება 70 150 დოლარს შეადგენს.

რობერტსონი ამბობს, რომ მოგების ზრდის პარალელურად, მისი კომპანია გაყიდვების მოცულობის ზრდასაც გეგმავს, თუმცა ეს მხოლოდ ერთნიშნა პროცენტული მაჩვენებლით იგეგმება. ცნობისათვის, შარშან ”ბეემვემ” 1.29 მილიონი ავტომობილი გაჰყიდა, რაც 2004 წლის გაყიდვების პიკის შემდეგ, უდაბლესი მაჩვენებელია. წლევანდელი მაისის მიხედვით კი, გაყიდვების წლიური მაჩვენებელი 1.30 მილიონი გამოდის. ამასთან, მიმდინარე წლის პირველ ხუთ თვეში გერმანულმა კომპანიამ უკვე 552 864 ავტომობილის გაყიდვა მოასწრო, რაც შარშანდელ მაჩვენებელზე დაახლოებით 13 პროცენტით მეტია.

Tuesday, June 22, 2010

”ოპელმა” ახალი უნივერსალი ”ასტრა” გაგვაცნო

Opel Astra Sports Tourer

22 ივნისი

ისე მოხდა, რომ სანამ ”ოპელი” ბაზარზე თავისი ყველაზე პოპულარულ მოდელ ”ასტრას” მორიგი თაობის ჰეჩბეკს გამოუშვებდა, ყველა გერმანული კომპანიის მომავალზე ლაპარაკობდა და არა იმაზე, თუ რა სიახლეებს უმზადებდა ის თავის მყიდველს. ”ასტრა” ბაზარზე მაინც გამოჩნდა და როგორც მოსალოდნელი იყო, კვლავაც ძალიან პოპულარულია.
თუმცა, ”ოპელის” მომავალი კვლავაც ბუნდოვანია. თუ შარშან ”ჯენერალ მოტორსი” მის გაყიდვას აპირებდა და ტენდერი ჰქონდა გამოცხადებული, რომელშიც თითქოს რუსულ-კანადური ალიანსი იმარჯვებდა, ამჯერად, საქმე ”ოპელისთვის” (რომელიც გენერლებმა თავისთვის დაიტოვეს და ამით რატომღაც გერმანიის მთავრობა გააღიზიანეს) შეღავათიანი სესხის გამოყოფას ეხება. იმ სესხისა, რომელმაც მის ხელმძღვანელობას მეტად საჭირო რესტრუქტურიზაცია უნდა ჩაატარებინოს და კომპანია მომგებიან საქმიანობაზე გადააყვანინოს.

მაგრამ პრობლემების მიუხედავად, ”ოპელი” მუშაობას აგრძელებს და ბაზარზე მორიგი სიახლე - ”ასტრას” ბაზაზე შექმნილი უნივერსალი ”ასტრა სპორტს ტურერი” გამოაქვს, რომელმაც კომპანიის გაყიდვების სტაბილურად მაღალ დონეზე შენარჩუნება უნდა უზრუნველყოს. სხვათა შორის, ”ოპელს” ერთგვარ ტრადიციად ჩამოუყალიბდა, რომ ჰეჩბეკ ”ასტრას” მორიგი თაობის მოდელის წარმოების დაწყების შემდეგ, მისი უნივერსალისძარიანი ვერსიის ჯერიც დგება, მას კი სპორტული ჰეჩბეკი, სედანი და ფურგონი მოსდევს.

ავტომობილის პირველივე დანახვისთანავე შეიძლება ითქვას, რომ ის თავის კლასში საუკეთესოა და თავისუფლად შეუძლია, უნივერსალებს პოპულარობა მოუპოვოს. ჯერ ერთი, ის ისე გამოიყურება, როგორც პრემიუმ კლასის უნივერსალი - სოლიდურია და კომფორტული ავტომობილის შთაბეჭდილებასაც ტოვებს. მეორეც, ის აშკარად ჰგავს უფრო მაღალი კლასის ”ოპელ ინსინია ტურერს”, რომელმაც ”ოპელს” პრემიუმ სეგმენტისიკენ გზა უნდა გაუკაფოს. სხვათა შორის, ”ასტრას” უნივერსალი უფრო ელეგანტურად გამოიყურება, ვიდრე ”ინსინიასი”, რაც ალბათ უფრო იმის ბრალია, რომ ასეთი დიზაინი მომცრო ზომის ავტომობილს უფრო უხდება.

სხვათა შორის, ადრე უნივერსალებისთვის დახვეწილი დიზაინი მთავარ კრიტერიუმად არ ითვლებოდა. სამაგიეროდ, მათი შეფასებისას, ერთ-ერთი ყველაზე მთავარი ფაქტორი ავტომობილის ტევადობა იყო. მაგრამ რამდენადაც ტევადობის მხრივ, კონკურენტებს თითქმის ერთნაირი პარამეტრები აქვთ, ამდენად, დიზაინი მაინც შეფასების მნიშვნელოვანი ფაქტორი ხდება. ამ მხრივ კი ”ასტრა სპორტს ტურერი” ქებას იმსახურებს.

მოკლედ: ახალი ”ასტრა სპორტს ტურერის” ბორბლებს შორის ბაზა იგივეა, რაც ჰეჩბეკისა - 2.685 მეტრი (წინა თაობის ”ასტრას” შემთხვევაში, უნივერსალისა და ჰეჩბეკის ბაზებს შორის სხვაობა შესამჩნევი იყო). სამაგიეროდ, მასში ისეთი მსხვილგაბარიტიანი ტვირთის ჩადება შეიძლება, რომლის სიგრძეც 1.835 მეტრს აღწევს. ეს კი ”ასტრას” წინა უნივერსალის შესაბამის მაჩვენებელზე 28 მილიმეტრით მეტია. ავტომობილის საბარგო განყოფილების მოცულობა 500 ლიტრია, მაგრამ თუ უკანა სავარძლები დაიკეცება, ის 1550 ლიტრამდე იზრდება. სხვათა შორის, დაახლოებით იგივე მაჩვენებლები აქვს მთავარ კონკურენტ ”ფოლკსვაგენ გოლფ ვარიანტს”.

”ოპელი” უნივერსალ ”ასტრას” მყიდველს რვა ძრავს სთავაზობს. ყველაზე სუსტი აგრეგატების გარდა, ყველა მათგანთან 6-საფეხურიანი გადაცემათა კოლოფია შეწყვილებული. გარდა ამისა, ოპციის სახით შესაძლებელია ავტომატური კოლოფის (აქტივ სელექტ) შეკვეთა.

რვა ძრავიდან ოთხი დიზელისაა და ამდენივე - ბენზინის. დიზელის აგრეგატების მუშა მოცულობა 1.3-დან 2.0 ლიტრამდეა, მათი სიმძლავრე კი 95-160 ცხენის ძალის დიაპაზონშია. ყველა ძრავი აღჭურვილია მყარი ნაწილაკების მოსაცილებელი ფილტრით. ბენზინის აგრეგატების მუშა მოცულობა 1.4 და 1.6 ლიტრია და მათი სიმძლავრე 100-დან 180 ცხენის ძალამდე მერყეობს. მათგან ყველაზე თანამედროვეა 1.4-ლიტრიანი ტურბო ძრავი, რომელიც 1.8-ლიტრიან ატმოსფერულ აგრეგატს ცვლის. ამ აგრეგატებიდან ყველაზე ეკონომიური 2.0-ლიტრიანი ტურბოდიზელია, რომელიც, გარდა იმისა, რომ 160 ცხენის ძალას იძლევა, 100 კილომეტრსაც ყველაზე მცირე ხარჯით (5.1 ლიტრი) გადის, ყოველი კილომეტრის გავლისას კი ატმოსფეროში მხოლოდ 134 გრამ CO2-ს გამოჰყოფს.

ჯერჯერობით, ”ჯენერალ მოტორსი” არ გვიჩვენებს ”ასტრა სპორტს ტურერის” ინტერიერს. თუმცა დიდი ალბათობით შეიძლება იმის ვარაუდი, რომ მისი სალონი ძლიერ დაემსგავსება ჰეჩბეკისას. განსხვავება შეიძლება გაწყობის დონეში იყოს. ამასთან, ”ოპელი” აცხადებს, რომ უნივერსალის სალონში ბარგისთვის საერთო ჯამში, 75 ლიტრი სივრცეა გამოყოფილი, ეს კი მისი წინამორბედის შესაბამის მაჩვენებელთან შედარებით, 50 პროცენტით მეტია.

უკვე შეიძლება იმის თქმა, რომ ახალი უნივერსალის სალონში ”ოპელი” სავარძლების დაკეცვის ელექტრონულ სისტემა ”ფლექსფოლდს” გამოიყენებს. მათი ტრანსფორმაციისთვის ახლა უკვე საკმარისია ღილაკზე თითის ერთი დაჭერა და ელექტრონული სისტემა ყველაფერს თავისით გააკეთებს. წინასწარ შეკვეთილი ალგორითმის მიხედვით, ელექტრონიკა თავად განსაზღვრავს სავარძლების საზურგის დახრის კუთხეს და თუ შეუკვეთავთ, მათ სრულად დაკეცავს, რის შემდეგაც, მათ ადგილზე ბარგის დასადები დამატებითი ადგილი წარმოიქმნება. გარდა ამისა, ”ასტრა სპორტს ტურერი” აუცილებლად აღიჭურვება ველოსიპედების სპეციალური სამაგრი ”ფლექსფიქსით”, რომელიც თანამედროვე ”ოპელებისთვის” თითქმის განუყოფელ ატრიბუტად იქცა.

რა თქმა უნდა, ახალი უნივერსალი ბევრი რამითაა საინტერესო, თუმცა მისი მთავარი ღირსება ისაა, რომ ის ჰეჩბეკ ”ასტრას” ბაზაზეა აგებული. ამ ავტომობილზე კი, მისი გაყიდვების დაწყებიდან ნახევარ წელიწადში, ”ოპელს” უკვე 160 000 შეკვეთა აქვს მიღებული. რა თქმა უნდა, უნივერსალიც ასეთი პოპულარული ვერ იქნება, თუმცა მისი გაყიდვა რუსელსჰაიმერებისთვის პრობლემა ნამდვილად არ იქნება. სტატისტიკაც ამაზე მეტყველებს - ევროპაში გაყიდული ”ასტრების” მეოტხედი სწორედ უნივერსალია. სხვათა შორის, ამ ავტომობილს ”ბიუიკის” მარკით, მალე ამერიკელ და ჩინელ მყიდველსაც შესთავაზებენ.

დაბოლოს, ”ასტრა სპორტს ტურერის” მსოფლიო პრემიერა პარიზის ავტო შოუზე, ოქტომბრის დასაწყისში გაიმართება, რის შემდეგაც ის ”ოპელის” ევროპელი დილერების შოურუმებში გამოჩნდება. ჯერ გადაწყვეტილი არაა, თუმცა სავარაუდოდ, ”ასტრა სპორტს ტურერს” დეკემბერში ”ოპელის” ქართველი დილერის, შპს. ”აუტოჰაუზის” შოურუმშიც ვიხილავთ. მანამდე კი იქ ცოტა ხანში უახლეს კომპაქტურ მინივენ ”ოპელ მერივას” ელიან.

Monday, June 21, 2010

1 629 კილომეტრი ერთი სავსე ავზით

BMW 320d EfficientDynamics Completes 1,013 Mile-Long Journey

21 ივნისი

ავტომობილებზე მწერალმა ბრიტანელმა ჟურნალისტმა ტომ ფორდმა, როგორც თვითონ ამბობს, რეკორდული ვოიაჟით გამოიჩინა თავი - ბრიტანეთიდან მიუნხენში და შემდეგ უკანა გზაზე, თითქმის ბრიტანეთამდე, ”ბეემვე 320d ეფიციენტდაინემიქსით” ისე იმგზავრა, რომ ავტომობილის ერთი სავსე ავზი იმყოფინა.

თავისი დიზელისძრავიანი ”ბეემვეს” ავზი ფორდმა ლა მანშის გვირაბში შესვლის წინ აავსო, მიუნხენამდე იმგზავრა, შემდეგ კი უკან გამობრუნდა და საწვავი ლილში (საფრანგეთი) შეივსო. ავზის გავსებიდან ლილამდე, მან სულ 1 629 კილომეტრის გავლა მოახერხა.

ამ ვოიაჟის დროს, ფორდი არც კონდიციონერს იყენებდა და არც რადიოს, რათა საწვავი დაეზოგა. თუმცა, თავადვე აღნიშნა, რომ არ იყენებდა მართვის ისეთ ტექნიკას, რომელიც საწვავს დააზოგინებდა. ჟურნალისტი ყვება, რომ მიუნხენისკენ გზაზე, იყო მომენტები, როცა მონიტორი 100 კილომეტრზე მხოლოდ 3.7 ლიტრის ხარჯს უჩვენებდა. მთელი მოგზაურობის განმავლობაში კი, ყველაზე მეტი ხარჯი 100 კილომეტრზე 4.4 ლიტრი ჰქონდა. საბოლოო ჯამში, საბორტო კომპიუტერმა დააფიქსირა, რომ მოგზაურობის საშუალო სიჩქარე 95.4 კმ/სთ იყო, საწვავის საშუალო ხარჯი კი - 4.1 ლიტრი 100 კილომეტრზე.

”ვერ ვიტყვი, რომ ამ მანქანისგან განსაკუთრებულ ეკონომიურობას ველოდი. მაგრამ აღმოჩნდა, რომ მართალი არ ვიყავი. რა თქმა უნდა, ვცდილობდი, რომ საწვავი დამეზოგა, თუმცა ავტობანებზე მოძრაობისას, სიჩქარე აშკარად არ შეეფერებოდა ეკონომიურ მართვას. ჩემი შედეგის მიხედვით თუ ვიმსჯელებთ, საშუალო ბრიტანელ მძღოლს წელიწადის განმავლობაში, მანქანის ავზის მხოლოდ 12-ჯერ გავსებაც ეყოფა. და თუ საწვავის დაზოგვით თავს არ შეიწუხებთ, დარწმუნებული ვარ, ეს მანქანა ერთი ავსებული ავზით, 1300 კილომეტრს მაინც გაგატარებთ. შემიძლია ვთქვა, ”ბეემვე ეფიციენტდაინემიქსი” მართლა ძალიან ეკონომიური მანქანაა”, - განაცხადა ფორდმა.

ცნობისათვის, სედანი ”ბეემვე 320d ეფიციენტდაინემიქსი” აღჭურვილია 2.0-ლიტრიანი, ოთხცილინდრიანი ტურბოდიზელის ძრავით, რომელიც მაქსიმალურ სიმძლავრეს (163 ცხენის ძალას) 3 500-4 200 ბრ/წთ შუალედში გამოიმუშავებს, მაქსიმალურ მაბრუნ მომენტს (360 ნიუტონმეტრს) კი - 1 750-3 000 ბრ/წთ შუალედში.

ამ ძრავის მეშვეობით, ავტომობილი 100 კმ/სთ სიჩქარეს 8.2 წამში ავითარებს, მისი მაქსიმალური სიჩქარე კი 220 კმ/სთ-ია. სედანს 100 კილომეტრის გასავლელად 4.1 ლიტრი საწვავი ჰყოფნის, ყოველი კილომეტრის გავლისას კი ატმოსფეროში მხოლოდ 109 გრამ CO2-ს გამოჰყოფს.

ამ შესანიშნავი მახასიათებლების მიღწევაში, გერმანულ ავტომობილს საწვავის ხარჯის შესამცირებელი ისეთი ტექნოლოგიები ეხმარება, როგორებიცაა სტარტ-სტოპი, მუხრუჭების ენერგიის რეგენერაცია, საჭის ელექტროგამაძლიერებელი, გადაცემათა კოლოფში, ჩვეულებრივზე მეტად დაშორებული საფეხურები, დადაბლებული საკიდარი და ალუმინისგან დამზადებული აეროდინამიკური ბორბლები, რომლებიც ”მიშლენის” წარმოების, ენერგიის დამზოგავი საბურავებითაა აღჭურვილი.

Sunday, June 20, 2010

”ფოლკსვაგენი” ”ლუპოს” წარმოებისთვის ემზადება

Volkswagen Lupo Previewed

20 ივნისი

”ფოლკსვაგენმა” ინტერნეტით სუბკომპაქტურ ჰეჩბეკ ”ლუპოს” ფოტოები და ტექნიკური მონაცემები გაავრცელა. ეს ავტომობილი, რომელიც კონცეპტუალურ მოდელ VW Up!-ის სახელით, ვოლფსბურგელებმა პირველად სამი წლის წინ გვაჩვენეს, ბაზარზე მერმისს გამოჩნდება და მისი საბაზო ვერსიის ფასი 8 500 ევროს ფარგლებში მოექცევა.

რა თქმა უნდა, პირველ რიგში, ”ლუპო” მცირე გაბარიტებით გამოირჩევა. მისი ორკარიანი ვერსიის სიგრძე სულ რაღაც 3.45 მეტრია. ასეთი პატარა ავტომობილების წარმოება ”ფოლკსვაგენის” სტრატეგიულ მიზანს წარმოადგენს. ჯერ ერთი, ”ლუპო” ძალიან ეკონომიური იქნება და გერმანული გიგანტის ავტომობილების საწვავის ხარჯის საშუალო მაჩვენებელსაც დაბლა დასწევს, რასაც გამონაბოლქვზე ახალი მკაცრი სტანდარტების შემოღების შემდეგ, დიდი მნიშვნელობა მიენიჭება. მეორეც, ასეთი პატარა ავტომობილების საბაზრო სეგმენტი მთელს მსოფლიოში სულ უფრო იზრდება. და მესამეც, ახალი ”ლუპოს” ბაზაზე, ვოლფსბურგელები ახალი ოჯახის შექმნას გეგმავენ, რის ხარჯზეც, მათი გაყიდვები მნიშვნელოვნად უნდა გაიზარდოს.

”ლუპო” პატარა ავტომობილი კია, მაგრამ მისთვის ”ფოლკსვაგენმა” რამდენიმე ძრავი მოამზადა. მათგან ყველაზე პატარაა 3-ცილინდრიანი აგრეგატი, რომლის მუშა მოცულობა 1.0 ლიტრია, სიმძლავრე კი - 60 ცხენის ძალა. მეორე ძრავიც 1.0-ლიტრიანია, თუმცა მას 4 ცილინდრი აქვს და 85 ცხენის ძალას იძლევა. მესამე ძრავი კი დიზელისა იქნება. ესაა 1.2-ლიტრიანი TDI, რომლის მაქსიმალური სიძლავრეც 75 ცხენის ძალას აღწევს.

ორკარიანის გარდა, ვოლფსბურგელები ოტხკარიანი ”ლუპოს” წარმოებასაც აპირებენ, რომელიც ოდნავ გრძელი იქნება. გერმანული კომპანია იმედოვნებს, რომ წლიურად დაახლოებით 600 000 ცალი ”ლუპოს” გაყიდვას შეძლებს.

გარდა ამისა, ”ფოლკსვაგენი” ამავე ავტომობილის ბაზაზე, ელექტრომობილის წარმოებასაც გეგმავს. სავარაუდოდ, ის ბაზარზე 2013 წელს გამოჩნდბა. ამ ელექტრომობილის კონცეპტუალური ვერსიის ხილვა შარშან, ფრანკფურტის საავტომობილო გამოფენაზე იყო შესაძლებელი. თუმცა, ვოილფსბურგში მიაჩნიათ, რომ ელექტრომობილი ”ლუპო”, თავისი მაღალი ღირებულების გამო, მაინც მხოლოდ სანიშო ავტომობილი იქნება და მისი მეშვეობით, გაყიდვების საერთო მოცულობის მნიშვნელოვანი ზრდა მოსალოდნელი არაა.

”დაიმლერი” და ჩინური BYD ელექტრომობილებზე ითანამშრომლებენ

Daimler CEO says EV JV with BYD will be key in China

20 ივნისი

”დაიმლერის” მთავარი აღმასრულებელი დიტერ ცეტშე და BYD-ის შეფი ვან ჩუანფუ პარტნიორული ხელშეკრულების გაფორმებისას
..........................................

მსოფლიოში პრემიუმ კლასის ავტომობილების მეორე უდიდესმა მწარმოებელმა, გერმანულმა ”დაიმლერმა” და ჩინურმა BYD-მა (ბილდ იორ დრიმს - შექმენი შენი ოცნება), რომელსაც ისეთი ძლიერი ფინანსური მხარდამჭერი ჰყავს, როგორიც ამერიკელი მილიარდერი უორენ ბაფეტია, მაისის ბოლოს ჩამოაყალიბეს ერთობლივი საწარმო, რომლის მიზანიც, ჩინური ბაზრისთვის ელექტრომობილების ერთობლივად წარმოებაა.

ერთობლივ საწარმოში მხარეებს 50-50 პროცენტი ეკუთვნით. ამასთან, მისთვის ჩინური კომპანია 600 მილიონი იუანის ($88 მილიონი) ინვესტიციას გაიღებს, დაიმლერი კი ტექნოლოგიურ მხარდაჭერას კისრულობს. აღსანიშნავია, რომ ამ გარიგებით, გერმანული კომპანია თავისი გერმანელი მეტოქის, ”ბეემვესთვის” კონკურენციის გაწევას ცდილობს.

BYD E6

..........................................

ბავარიელებმა უფრო ადრე, ჩინურ ჰოლდინგ ”ბრილიანს ჩაინა აუტომოტივთან” ერთად, ჩამოაყალიბეს ერთობლივი საწარმო, რომლის მიზანსაც ასევე ელექტრომობილების წარმოება წარმოადგენს. ამ ერთობლივი საწარმოს მთავარი მიზანიც ჩინური ბაზრის ელექტრომობილების მომარაგებაა. თუმცა, ის ასევე საქალაქო ელექტრომობილის სხვა ბაზრებისთვის წარმოებასაც ითვალისწინებს.

ამ პარტნიორულ ურთიერთობებს მით უფრო დიდი მნიშვნელობა ენიჭება მას შემდეგ, რაც ჩინეთის მთავრობამ ქვეყნის ხუთ ქალაქში დაიწყო პილოტური პროგრამა, რომლის მიზანსაც ჰიბრიდული და ელექტრული ავტომობილების პროპაგანდა-პოპულარიზაცია და რაც მთავარია, მათი გაყიდვების სოლიდური შეღავათებით წახალისება წარმოადგენს. მოსალოდნელია, რომ ცისქვეშეთის ქვეყნის გზებზე, მალე მსოფლიოში გაყიდული ელექტრომობილების მეოთხედი ივლის.

”ჩინეთი ყველანაირად ცდილობს, რომ ჰიბრიდული და ელექტრული ავტომობილების წარმოებაში მსოფლიო ლიდერი გახდეს. ასეთი სურვილი სხვა ქვეყნებსაც ექნებოდათ, მაგრამ მათი ბაზრები გაყიდვების მოცულობების მხრივ, ჩინეთს მცირე კონკურენციასაც ვერ გაუწევენ”, - ამბობს J.D. პაუერის ბანგკოკური განყოფილების ანალიტიკოსი ბენ აშერი.

BYD-მა, რომელიც ნაწილობრივ ბაფეტის საინვესტიციო კომპანია ”ბერკშირ ჰეტუეის” კუთვნილებაა, ბენზინ-ელექტრული პლაგ-ინ ჰიბრიდების წარმოება მსოფლიოში პირველმა, ორი წლის წინ დაიწყო. სხვათა შორის, BYD-მა შარშან გერმანულ ”ფოლკსვაგენთან” გააფორმა ხელშეკრულება, რომლის მიხედვითაც, ორ კომპანიას ჰიბრიდული და ელექტრული მოდელების წარმოების საქმეში, პარტნიორობის ვარიანტები უნდა შეესწავლა.

მალე BYD-ი ელექტრომობილ E6-ის მასობრივ წარმოებას დაიწყებს. მას კი პირველ რიგში, ჩინეთის და შემდეგ ამერიკის ბაზარზე გაიტანს. ეს წელს მოხდება, მერმისს კი კომპანია ამავე ავტომობილს ევროპელ მყიდველსაც შესთავაზებს. ქალაქ შენჯენში, სადაც BYD-ის მთავარი ოფისია ბაზირებული, მალე ტაქსის რანგში მუშაობას ცალი ელექტრომობილი E6 დაიწყებს. სხვათა შორის, 40 ცალ E6-ს შენჯენის ტაქსომოტორის ოპერატორი უკვე იყენებს. ოღონდ, ეს ავტომობილები ჩინურმა კომპანიამ სპეციალურად, სარეკლამო მიზნებისთვის, სერიული წარმოების დაწყებამდე დაამზადა.

BYD-თან პარტნიორობა ”დაიმლერს” თავისი ჯუჯას - ”სმარტის” ელექტრული ვერსიის მასობრივი წარმოების დასაწყებად სჭირდება. გერმანულმა კომპანიამ 1000 ცალი ელექტრული ”სმარტის” აწყობა უკვე დაიწყო და მათ ოკეანის გაღმა, ამერიკის ბაზრისთვის გაუშვებს. სხვათა შორის, ამ ”სმარტებისთვის” აკუმულატორებს ამერიკული კომპანია ”ტესლა” აწარმოებს, რომელიც თავადაც უშვებს ელექტრულ სპორტულ მოდელ ”როდსტერს”.