Sunday, October 31, 2010

„ჩერიოტ როუდსტერი“ – „ბეემვეს“ კონცეპტუალური ანტიკური მეომარი

BMW Chariot Roadster Concept

31 ოქტომბერი

ვინ იტყვის, რა კავშირი შეიძლება არსებობდეს გერმანულ საავტომობილო კომპანიასა და ანტიკური ხანის ბერძენ მეომრებს შორის? რა თქმა უნდა, არანაირი, მაგრამ ისინი ირიბად უნგრელმა დიზაინერმა მატე ბართამ დააკავშირა. მან შეიმუშავა კონცეპტუალური ავტომობილი სახელად „ჩერიოტ როუდსტერ“, რომელიც, როგორც თავად ამბობს, ანტიკური საომარი ეტლის შთაგონებით შექმნა.

ვენი, ვიდი, ვიცი - კეისრის ეს გამოთქმა ნიშნავს: მიველ, ვნახე, დავამარცხე. ბართას შემთხვევაში, ამ გამოთქმის შემდეგნაირად ფორმულირება შეიძლება: ვნახე, შევქმენი და... გაგრძელება ალბათ არ იქნება. მაგრამ ფაქტია, რომ უნგრელ დიზაინერს თავისი კონცეპციის შემუშავების იდეა მას შემდეგ მოუვიდა, რაც ანტიკურ საომარ ეტლებს ათვალიერებდა.

ბართას თქმით, მისი კონცეპტუალურ ავტომობილის დიზაინში ბევრი ისეთი ელემენტია, რომლებიც ბერძენ ანტიკურ მეომარს, მის ეკიპირებას და საბრძოლო შეიარაღებას გაგახსენებთ. მართლაც, დააკვირდით: უკანა ბორბალი და მისი ფრთა ხომ საბრძოლო ორბორბლიანი ეტლის გვერდხედს ჰგავს. წინა ფრთა კი, რომელიც „თავის“ ბორბალს მთლიანად ფარავს და ავტომობილს თითქმის მთელ სიგრძეზე გაუყვება, უზარმაზარ ფარს, ან ცხენის დამცავ ჯავშანს მოგვაგონებს. თვითონ მეეტლე-მეომარი და მისი შუბი, ან მშვილდი არ ჩანს, მაგრამ ამას რა მნიშვნელობა აქვს. მთავარია, რომ ავტომობილის სილუეტში საბრძოლო ეტლის სილუეტი გამოირჩევა.

როგორც ბართა განმარტავს, თუ მის ავტომობილს ახლოდან დაათვალიერებთ, ანტიკურ ბერძენ მეომართან უფრო მეტ მსგავსებას შენიშნავთ. შესაძლოა, შეედავოთ, მაგრამ ფაქტია, რომ მისი კონცეპტუალური ავტომობილი ძალიან ეფექტურია. თუმცა, ისიც ფაქტია, რომ მის „საბრძოლო ეტლს“ ვერ უპოვნით „ბეემვესთვის“ დამახასიათებელი სარადიატორე ბადის მსგავს ფორმებს.

რა თქმა უნდა, მსგავსი ავტომობილის დამზადება ბავარიელებს ფიქრადაც არ მოუვათ. ბართა არც იმას ამბობს, თუ რითაა მისი ავტომობილი აღჭურვილი. სავარაუდოდ, ის არჩევანს ეკოლოგიურად სუფთა ძალურ დანადგარზე შეაჩერებდა. თუმცა, ეს არც გაუკეთებია. უბრალოდ, მან საკუთარი მხოლოდ დიზაინერული ოსტატობა გვიჩვენა.

მაგრამ ვინ იცის, შესაძლოა, ერთჯერად პროექტებზე სპეციალიზებულმა რომელიმე პატარა ფირმამ ამ კონცეპციის თუნდაც რეალურ მოდელში განხორციელება, ან თუნდაც ერთეულების წარმოება გადაწყვიტოს...

„რალის მებრძოლის“ პრემიერა ლას ვეგასში გაიმართება

Production Rally Fighter to Debut at SEMA 2010

31 ოქტომბერი

ამერიკულმა კომპანია „ლოკალ მოტორსმა“ ლას ვეგასის სპეციალური ეკიპირების ასოციაციის შარშანდელ გამოფენაზე (SEMA) სპორტული კონცეპტუალური ავტომობილი, სახელად „რალი ფაითერი“ (რალის მებრძოლი) წარმოადგინა. ამ ავტომობილმა იმდენად დიდი დაინტერესება გამოიწვია, რომ კომპანიამ მისი რეალური ვერსიის შექმნა გადაწყვიტა მისი ოთხი ეგზემპლარი ისევ ლას ვეგასის შოუსთვის მოამზადა.

მისი სახელიც გვეუბნება - ავტომობილი რალის რბოლებისთვისაა შექმნილი. მისი მზიდი ელემენტი ფოლადის მილებისგან შეკრული მოცულობითი ჩარჩოა, რომელზეც სპეციალური, უგზოობის საკიდარია დამაგრებული. საკიდარს დიდი სვლის მქონე (50 სანტიმეტრი) და იმავდროულად, საკმაოდ ხისტი დრეკადი სისტემა აქვს. რა თქმა უნდა, ავტომობილი მძლავრი სამუხრუჭე სისტემითაა აღჭურვილი.

„რალის მებრძოლის“ სიგრძე 4.800 მეტრი, სიგანე 2.057 მეტრი, სიმაღლე 1.759 მეტრი, ბორბლებს შორის ბაზა 2.921 მეტრი, წინა და უკანა ბორბლების კვალი კი 1.765 მეტრია. ამ ავტომობილის ძარის ბევრი ელემენტი - წინა და უკანა ნაწილები, ზღურბლი და სახურავი, კარბონის კომპოზიტისგანაა დამზადებული. გარდა ამისა, ძარა ვინილის აფსკითაა დაფარული, რაც საღებავის საჭიროებას გამორიცხავს და ასე, ავტომობილი წონაში 5 კილოგრამს იგებს. სულ კი, „რალი ფაითერის“ წონა 1451 კილოგრამია.

ახლა ყველაზე საინტერესოს შესახებაც: „რალის მებრძოლი“ 6.2-ლიტრიანი V8 ძრავითაა აღჭურვილი, რომელიც 430 ცხენის ძალას და 574 ნიუტონმეტრ მომენტს იძლევა. ძრავთან ავტომატური (საფეხურების რაოდენობა დაზუსტებული არაა) კოლოფია დაკავშირებული, რომელიც გადამუშავებულ მაბრუნ მომენტს უკანა (რატომღაც, არა ყველას) წამყვან ბორბლებს აწვდის.

კომპანია აცხადებს, რომ ნებისმიერ მყიდველს შეუძლია, „რალი ფაითერის“ ძარა და შასი თავისი სურვილის შესაბამისად შეცვალოს და ავტომობილი ასე შეუკვეთოს. უფრო მეტიც, ნებისმიერ მყიდველს, „ლოკალ მოტორსის“ პარტნიორობის შესაძლებლობა აქვს. ეს იმ შემთხვევაში მოხდება, თუ ის თავის მიერ კონსტრუქციაში შეტანილ ცვლილებებს სხვა მყიდველსაც შესთავაზებს. რა თქმა უნდა, ამ შემთხვევაში, მოგების ნაწილსაც მიიღებს.

ჯერჯერობით, „რალი ფაითერის“ ზუსტი ფასი არ გამოცხადებულა. სავარაუდოდ, ეს მონსტრი 50 000 დოლარზე მეტი ეღირება. ამასთან, სულ 99 დოლარის დეპოზიტია საკმარისი იმისათვის, კომპანიამ მასზე შეკვეთა მიიღოს და თქვენთვის ავტომობილის მომზადებას შეუდგეს.

Saturday, October 30, 2010

”ასტონ მარტინი” უგზოობის ”ლაგონდას” მაინც გამოუშვებს

Aston Martin CEO Gives Green Light to Lagonda

30 ოქტომბერი

ეს უკვე კურიოზს ჰგავს - ”ასტონ მარტინმა” საბოლოოდ გადაწყვიტა, რომ უგზოობის კონცეპტუალურ მოდელ ”ლაგონდას”, რომელიც ჯერ კიდევ ორი თვის წინ, დასავიწყებლად გაიმეტა, მწვანე შუქი აუნთო. ამის შესახებ თავად კომპანიის შეფმა ულრიხ ბეცმა განაცხადა და დასძინა, რომ ავტომობილი ”მერსედეს ბენცის” უგზოობის მოდელ GL-ის ბაზაზე შეიქმნება.

პარიზის საავტომობილო შოუზე გავრცელდა დაუდასტურებელი ინფორმაცია იმის შესახებ, რომ ”ასტონ მარტინის” საწარმოო პროგრამაში შემდეგი ახალი ავტომობილი, ოთხკარიან კუპე ”რეპიდის” ბაზაზე შექმნილი სედანი იქნებოდა. ბეცს არ უარუყვია, რომ მისი კომპანია სედანის წარმოებას აპირებს. ამასთან დასძინა რომ სუპერ ავტომობილი ”ვან-77” მხოლოდ 22 ცალი დამზადდება და არა 77 ცალი, როგორც ადრე იგეგმებოდა.

შარშან, ჟენევის საავტომობილო შოუზე, ინგლისურმა კომპანიამ ყველა გააოცა, როდესაც უგზოობის ”ლაგონდას” საბურველი ახადა. მნახველთა უმეტესობა, მათ შორის ჟურნალისტებიც, ნანახით გაწბილებულები დარჩნენ. ბევრმა ისიც თქვა, ამ მახინჯი მანქანის გამოშვებით, ”ასტონი” თავის ავტორიტეტს შებღალავსო. ამგვარმა ლაპარაკმა ის შედეგი გამოიღო, რომ ”ასტონ მარტინის” თანამფლობელმა დევიდ რიჩარდსმა პროექტ ”ლაგონდას” შეჩერების გადაწყვეტილება მიიღო.

მაგრამ შემდეგ კომპანიის მარკეტოლოგებმა კვლევა ჩაატარეს, რომელმაც გამოავლინა, რომ მახინჯი ”ლაგონდაც” კი, ძალიან პოპულარული იქნება ისეთი ქვეყნების ბაზრებზე, როგორებიცაა ჩინეთი, რუსეთი და ახლო აღმოსავლეთის ქვეყნები. და, რიჩარდსის გადაწყვეტილების შეცვლაც სწორედ მარკეტოლოგების ვერდიქტმა განაპირობა.

რაც შეეხება ”მერსედესთან” პარტნიორობას, გასაკვირი არც ამაშია რამე. ჯერ ერთი, ”ასტონ მარტინი” და გერმანული კომპანია პარტნიორები არიან. მეორეც, კონცეპტუალური ”ლაგონდა” სწორედ ”მერსედეს GL-ის” ბაზაზე დამზადდა. თუმცა, ბეცი აცხადებს, რომ შტუტგარტელებთან პარტნიორობის მიუხედავად, უგზოობის მოდელის ნაწილების და კომპონენტების უმეტესობას თავად ”ასტონი” დაამზადებს, რათა თავისი ავტომობილების უნიკალურობა შეინარჩუნოს.

”ვოლვო” საწვავის ფიჭურ ელემენტებს შეიმუშავებს

Volvo C30 EV

30 ოქტომბერი

იმ კომპანიების რიცხვს, რომლებიც თავიანთი ელექტრომობილებისთვის, ენერგიის დამატებით წყაროდ ფიჭური ელემენტების გამოყენებას აპირებენ, მალე ”ვოლვოც” შეუერთდება. კომპანიამ, რომელიც ცოტა ხნის წინ, ”ფორდმა” ჩინელებს მიჰყიდა, ახლახანს შვედეთის ენერგეტიკის სამინისტროსთან ხელშეკრულება გააფორმა, რომლის მიხედვითაც, ეს უკანასკნელი ავტომწარმოებელს საწვავის ფიჭური ელემენტის შემუშავებაში დაეხმარება.

ასეთი ელემენტების შემუშავებას ”ვოლვო” 2012 წლისთვის დაასრულებს, რის შემდეგაც, ელექტრომობილ C30-ის ბაზაზე, ორი საცდელი პროტოტიპი დამზადდება და მათი საგზაო გამოცდები დაიწყება.

ახალ ძალურ დანადგარში, წყალბადის მისაღებად, ჩვეულებრივ ბენზინს გამოიყენებენ. თავისუფალი წყალბადი ფიჭური ელემენტების მთავარი ენერგომატარებელია. ამ ელემენტებში მიმდინარე ქიმიური რეაქციების დროს, წყალბადსა და ჟანგბადს შორის მიმდინარე პროცესებისას, წარმოიქმნება ელექტროდენი, რომელიც აკუმულატორებს დამუხტავს.

უნდა ითქვას, რომ წყალბადის მისაღებად ბენზინის გამოყენებას დადებითთან ერთად, უარყოფითი ეფექტიც აქვს. დადებითი ისაა, რომ საჭირო არ იქნება ავტომობილით თავისუფალი წყალბადის ტარება. უარყოფითი კი ისაა, რომ ბენზინისგან წყალბადის მიღების თანაპროდუქტი ნახშირჟანგია. სხვათა შორის, როდესაც ფიჭურ ელემენტებში თავისუფალ წყალბადს იყენებენ, ავტომობილი ნარჩენის სახით მხოლოდ სუფთა წყალს გამოჰყოფს. ბენზინის შემთხვევაში კი მას გამონაბოლქვიც ექნება. თუმცა, ”ვოლვოს” სპეციალისტები ირწმუნებიან, რომ ამ შემთხვევაში გამონაბოლქვი უმნიშვნელო იქნება.

ცნობისათვის, C30-ის ბაზაზე დამზადებული ელექტრომობილი ”ვოლვომ” შარშან გვიჩვენა. ამ მანქანას 111-ცხენისძალიანი ელექტროძრავი ამოძრავებს, რომლის დახმარებითაც, ადგილიდან 100 კმ/სთ-მდე აჩქარებას ის 10.5 წამს ანდომებს, მაქსიმალური სიჩქარე კი სულ რაღაც 130 კმ/სთ-ია. ამ ელექტრომობილის სვლის სიშორე 150 კილომეტრს აღწევს, ფიჭური ელემენტების წყალობით კი ეს მაჩვენებელი 400 კილომეტრამდე გაიზრდება.

”აბარტი” საკუთარ პლატფორმას შეიმუშავებს

Abarth

30 ოქტომბერი

იტალიური კომპანია ”აბარტი”, რომელიც ”ფიატის” ჯგუფში შედის, უარყოფს ხმებს იმის შესახებ, რომ თითქოს, საკუთარი სპორტული მოდელის საწარმოებლად, ავსტრიული KTM-ის ექსტრემალურ სპორტულ ავტომობილ X-ბოქსის პლატფორმის გამოყენებას აპირებს. უფრო მეტიც, როგორც ბლოგ ”ავტობლოგის” ესპანური ვერსია იუწყება, ”აბარტის” სპეციალისტები ახალ პლატფორმას თავადვე შეიმუშავებენ.

სხვათა შორის, ადრე იყო ლაპარაკი იმაზე, რომ ”აბარტი” თავისი პლატფორმის შემუშავების ნაცვლად, ”ლოტუსის” იმ პლატფორმის გამოყენებას გეგმავდა, რომელზეც ინგლისური კომპანიის პოპულარული მოდელი ”ელისია” ბაზირებული. მაგრამ იტალიურ კომპანიაში აღნიშნულ პლატფორმას, რომელსაც ”ლოტუსის” გარდა, კიდევ რამდენიმე კომპანია, მათ შორის, ელექტრომობილების მწარმოებელი ”ტესლა” იყენებს, მოძველებული უწოდეს.

ბარემ ამ გამონათქვამის ნამდვილი მიზეზი განვმარტოთ - ”ლოტუსმა” ”ელისის” პლატფორმა რამდენიმე წლის წინ კი შეიმუშავა, მაგრამ ის ახლაც არ შეიძლება მოძველებულად ჩაითვალოს და თამამად შეიძლება ითქვას, რომ აქტუალობას კიდევ რამდენიმე წელი შეინარჩუნებს. ”აბარტის” მიერ მისი დაწუნება კი იმ ფაქტს შეიძლება მიეწეროს, რომ ეს კომპანია ”ფიატის” იმ ოჯახის წევრია, რომელიც თავის ბრენდ ”ფერარით” ამაყობს. ამ უკანასკნელს კი ”ლოტუსი” წლების განმავლობაში, ფორმულა 1-შიც და საგზაო ავტომობილების სეგმენტშიც უწევდა კონკურენციას.

რაც შეეხება KTM-ის პლატფორმას, ”აბარტი” მისი გამოყენების შესაძლებლობას განიხილავდა. ესაა კარბონის კომპოზიტისგან დამზადებული მონოკოკი, რომელსაც ავსტრიული კომპანია თავის იტალიურ არშემდგარ პარტნიორს სრულად დაკომპლექტებულს სთავაზობდა. ამ პლატფორმაზე კი ”აბარტი” თავის მიერ შემუშავებულ სპორტულ ძარას (ტარგას ტიპისას), ძრავს და ტრანსმისიას, ასევე სალონს დაამაგრებდა.

”ავტობლოგი” არაფერს ამბობს ამ თითქმის შემდგარი გარიგების ჩაშლის მიზეზების შესახებ. მაგრამ ადვილი სავარაუდოა, რომ ”აბარტმა” თავი ავსტიული პლატფორმის სიძვირის გამო შეიკავა. სიძვირეს კი კარბონის კომპოზიტი განაპირობებს. ამასთან, ეს ავანგარდული მასალა, რომელსაც ფართოდ იყენებენ ფორმულა 1-ში, სერიულ წარმოებაში კარგად გამოცდილი არაა.

”ავტობლოგი” ბევრს არც ”აბარტის” საკუთარი პლატფორმის კონსტრუქციის შესახებ გვეუბნება. ცნობილია მხოლოდ ის, რომ მას წამყვანი უკანა ბორბლები ექნება და აღიჭურვება ”ფიატის” 1.4-ლიტრიანი ბენზინის ძრავით (სერია მულტიეარ), რომელიც 170 ცხენის ძალას იძლევა. ძრავს ორდისკოიანი ქურის დახმარებით, 5-საფეხურიანი რობოტიზებული კოლოფი შეუწყვილდება.

სავარაუდოდ, ”აბარტი” საკუთარი როდსტერის წარმოებას 2013 წელს დაიწყებს და მას დაახლოებით 30 000 ევროს ფასად გაჰყიდის.

”ფოლკსვაგენის” პროექტი მიმო - ძრავი შუაში და ადრენალინი

Volkswagen's new 'MiMo' sports car architecture

ბრიტანული გამოცემა ”ქარ” იუწყება, რომ საავტომობილო ჯგუფმა ”ფოლკსვაგენმა” მწვანე შუქი აუნთო პროექტ მიმო-ს, რომელიც სრულიად ახალი, შუაძრავიანი არქიტექტურის შემუშავებას ითვალისწინებს. მიმო-ც გერმანულად სწორედ ასე იშიფრება - მიტელმოტორ, ანუ შუაძრავიანი.

ის ფაქტი, რომ ვოლფსბურგელებმა ტიპიური სპორტული პლატფორმის შემუშავება გადაწყვიტეს, იმის მანიშნებელია, რომ მათ ”ფოლკსვაგენის”, ”პორშეს” და ”აუდის” მარკებით, ამ ტიპის სპორტული ავტომობილების წარმოება აქვთ გადაწყვეტილი. ამასთან, გამორიცხული არც ისაა, რომ მომავალში ამავე პლატფორმით ”შკოდამ” და ”სეატმაც” ისარგებლონ.

ახალი პლატფორმის შემუშავების საქმეში, წამყვანი როლი ”პორშეს” მიენიჭება, რომელიც სხვადასხვა მიზეზთა გამო, იურიდიულად ჯერაც არაა სრულად ინტეგრირებული ”ფოლკსვაგენის” ჯგუფში. შტუტგარტულ კომპანიას შუა და უკანაძრავიანი სპორტული ავტომობილების წარმოების დიდი გამოცდილება აქვს და ბუნებრივია, ვოლფსბურგში ამ გამოცდილების გამოყენება სურთ.

არცთუ დიდი ხნის წინ, ”პორშეს” შეფმა მათიას მიულერმა განაცხადა, რომ მისი კომპანია თავისი საწარმოო პროგრამის კიდევ უფრო გაფართოებას აპირებს. ჯერ ერთი, იგეგმება მომცრო ზომის უგზოობის მოდელის წარმოების დაწყება. გარდა ამისა, შემუშავების პროცესშია ახალი შუაძრავიანი ავტომობილი, რომელიც ”პორშეს” გამაში, მოდელ 911-სა და 918 სპაიდერს შორის არსებულ ნიშას დაიკავებს. კიდევ ერთი ავტომობილი, რომლის წარმოებასაც ”პორშე” გეგმავს, არის მცირე ზომის სპორტქარი, რომელიც ”ბოქსსტერზე” დაბალ საფეხურს დაიკავებს და შტუტგარტელთა ყველაზე იაფფასიანი ავტომობილი იქნება.

ყველა ამ ავტომობილისთვის განკუთვნილ პლატფორმას ”აუდიც” გამოიყენებს. ინგოლშტადტელების პირველი შუაძრავიანი მოდელის სახელი იქნება R5, რომელსაც დეტროიტში ნაჩვენები კონცეპტუალური E-ტრონის (სურათზე) მოტივებზე დაამზადებენ. ეს ავტომობილი ორ პოპულარულ სპორტულ მოდელს - TT-სა და R8-ს შორის არსებულ ნიშას შეავსებს. ”აუდის” პირველი შუამოტორიანი ავტომობილი ბაზარზე 2014 წელს გამოვა. პირველად კუპესძარიანი ვერსიის გაყიდვები დაიწყება, შემდეგ კი მას ღიაძარიანი მოდიფიკაციაც დაემატება.

”მაკლარენი” ჰიბრიდულ სუპერ ავტომობილსაც გამოუშვებს

McLaren Automotive plans petrol-electric hybrid supercars

30 ოქტომბერი

ინგლისური კომპანია ”მაკლარენ ავტომოტივი”, რომელიც თავის პირველ სუპერ მოდელ MP4-12C-ს გაყიდვებს მერმისს, გაზაფხულიდან დაიწყებს, თავისი სამოდელო გამის (რომელიც მალე სამამდე გაიზრდება) ყველა ავტომობილის ჰიბრიდული ვერსიის წარმოებასაც გეგმავს. ამის თაობაზე ინფორმაცია კი ბრიტანულმა გამოცემა ”ქარ-მა” გაავრცელა.

ინფორმაციის საფუძველი ის ფაქტი გახდა, რომ ”მაკლარენმა” ინტენსიურად დაიწყო იმ სპეციალისტების დაქირავება, რომლებსაც ჰიბრიდული ძალური დანადგარების შექმნის გამოცდილება აქვთ. ”ქარ-ის” ცნობით, ახალ პერსონალს ”მაკლარენისთვის” ყველა იმ ელექტრონული კომპონენტის შექმნა მოუწევთ, რომლებიც ჰიბრიდული აგრეგატებისთვისაა საჭირო.

ჯერჯერობით, ”მაკლარენის” ჰიბრიდულ მოდელზე არანაირი ინფორმაცია არ ვრცელდება. სამაგიეროდ ცნობილია, რომ კომპანია მალე თავის საწარმოო პროგრამას კიდევ ორ ავტომობილს დაუმატებს. მათგან ერთი ლეგენდარულ სუპერ ავტომობილ F1-ის შთამომავალი იქნება, მეორე კი - შედარებით იაფფასიანი სპორტული მოდელი, რომელმაც კონკურენცია ”პორშე კაიმანსა” და ”ნისან 370Z-ს” უნდა გაუწიოს.

რაც შეეხება MP4-12C-ს, მისი კონცეპტუალური ვერსიის პირველი ჩვენება შარშან, ზაფხულში შედგა, სერიული ავტომობილი კი მსოფლიო საზოგადოებამ პირველად ჟენევის წლევანდელ ავტო შოუზე იხილა. ეს ავტომობილი 3.8-ლიტრიანი V8 აგრეგატითაა აღჭურვილი, რომელიც 600 ცხენის ძალას გამოიმუშავებს. ძრავთან ორდისკოიანი ქუროს მეშვეობით, 7-საფეხურიანი რობოტიზებული კოლოფია დაკავშირებული. ამ ტანდემის დახმარებით, MP4-12C-ს ადგილიდან 100 კმ/სთ სიჩქარის 3.4 წამში აკრეფა შეუძლია, მისი მაქსიმალური სიჩქარე კი 325 კმ/სთ-ს აღწევს.

რაც შეეხება F1-ის შთამომავალს, მასაც ძრავი (გაცილებით ძლიერი) ბაზაში ექნება განლაგებული. მონოკოკი კი მთლიანად კარბონის კომპოზიტისგან დამზადდება. ”მაკლარენის” აცხადებს, რომ ამ ავტომობილზე არაერთ ისეთ ტექნოლოგიურ სიახლეს გამოიყენებს, რომელთა წყალობითაც, მას თავისუფლად შეიძლება რევოლუციური ეწოდოს. მისი დებიუტი ორი წლის შემდეგაა დაგეგმილი.

”მაკლარენი” მხოლოდ 1000 ცალი MP4-12C-ს წარმოებას გეგმავს, რომელთაგან ყველაზე მეტი - 400-500 ცალი ავტომობილი ევროპის ბაზარზე გაიყიდება, 300-400 ცალს ჩრდილოამერიკული ბაზარი მიიღებს, დანარჩენი მსოფლიოს კლიენტურისთვის კი მხოლოდ 100-200 ცალი რჩება. დიდ ბრიტანეთში MP4-12C-ს ფასი 175 000 გირვანქა სტერლინგია.

Friday, October 29, 2010

რედ ბულ X1” - განხორციელებული ოცნება

”რედ ბულმა” ახალი, ოღონდ ვირტუალური სიჩქარის მონსტრი შექმნა

Red Bull X1 is the Fastest Car in Gran Turismo 5

29 ოქტომბერი

ფორმულა 1-ის ერთ-ერთმა საუკეთესო გუნდმა ”რედ ბულ რეისინგმა” რომ ვირტუალურ პროტოტიპ X1-ის რეალური ვერსია რომ დაამზადოს, ეს მსოფლიოში უსწრაფესი ავტომობილი იქნება. ყოველ შემთხვევაში, გუნდის გერანელმა პილოტმა (რეალურმა) სებასტიან ფეტელმა ამ მანქანით, ვირტუალურ ნურბურგრინგზე სიჩქარის ახალი რეკორდი დაამყარა.

სამწუხაროს, ასეთი ავტომობილი რეალურად არ არსებობს, თუმცა ეს არ ნიშნავს რომ მისი დამზადება შეუძლებელია. სამაგიეროდ, სანამ ”რედ ბულ რეისინგი” რეალური ეგზემპლარის დამზადებას მოიფიქრებს, X1 ”სონი პლეისტეიშნის” ახალი ვიდეოთამაშის, ”გრან ტურიზმო 5-ის” ნამდვილი სუპერ ვარსკვლავი გახდება, როცა იაპონური კომპანია ამ თამაშის გაყიდვას დაიწყებს.

ედრიან ნიუი და კაძუნორი იამაუჩი (მარჯვნივ)

..............................

ალბათ გაინტერესებთ, ასეთი რა მონსტრი შექმნეს ”რედ ბულის” ტექნიკურმა დირექტორმა ედრიან ნიუიმ და ”სონის” ვირტუალური სამყაროს ჯადოქრებმა:

გაბარიტები - სიგრძე 4.75 მეტრი, სიგანე 2.18 მეტრი, სიმაღლე 0.98 მეტრი, ბორბლებს შორის ბაზა 2.90 მეტრი, წინა ბორბლების კვალი 1.85 მეტრი, უკანა ბორბლების კვალი 1.78 მეტრი. ავტომობილის მშრალი წონა 545 კილოგრამია, სრული წონა კი - 615 კილოგრამი. წონაზე ”რედ ბულის” პრეს რელიზში წერია, რომ ამდენივე იქნებოდა მისი ავსტრალიელი პილოტის, მარკ უებერის წონა, მან რომ მოსახვევი 300 კმ/სთ სიჩქარით გაიაროს. ეს კი ნიშნავს, რომ ამ დროს, მასზე მოქმედი გადატვირთვა 8.25G-ს მიაღწევს. ეს კი ის მაჩვენებელია, რომელსაც სამხედრო თვითმფრინავები აღწევენ...

სებასტიან ფეტელი ”პოლიფონი დიჯიტალის” სპეციალისტებთან კონსულტაციისას

..............................

ავტომობილი მამოძრავებელ ძალას 3.0-ლიტრიანი, ორტურბოკომპრესორიანი V6 ძრავისგან ღებულობს, რომელიც (რა თქმა უნდა, თეორიულად) 1483 ცხენის ძალას იძლევა. ეს 283 ცხენით მეტია, ვიდრე მსოფლიოს უსწრაფეს ავტომობილ ”ბუგატი ვეირონ სუპერ სპორტს” ემსახურება. მაბრუნი მომენტი 714.1 ნიუტონმეტრი (12 000 ბრ/წთ-ზე), ძრავის ბრუნთა რიცხვი კი - 15 000 ბრუნია წუთში.

ღმერთმა იცის, ამ აგრეგატით, X1-ის მაქსიმალური სიჩქარე რამდენს მიაღწევს. ფორმულა 1-ის ჩაკეტილ ტრასებზე ვირტუალური ტესტების დროს კი ფეტელი ადვილად აღწევდა 450 კმ/სთ-ის ნიშნულს! ეგ კიდევ არაფერი, ავტომობილს ფენმენური აჩქარება აქვს: ადგილიდან 100 კმ/სთ-ის ასაკრეფად მას 1.4 წამი ჰყოფნის. ასეთი აჩქარება ფ1-ის მანქანებსაც არ აქვს. ადგილიდან 195 კმ/სთ-მდე X1-ს 2.8 წამი ჰყოფნის, ადგილიდან 320 კმ/სთ-მდე კი - 6.1 წამი.

თამაში ”გრან ტურიზმო 5” ”სონის მიერაა შექმნილი, X1-ის დამზადება კი იაპონურმა კომპანიამ ”რედ ბულ რეისინგს”, კერძოდ კი მისი აეროდინამიკის ექსპერტ ედრიან ნიუისა და სამგანზომილებიანი პროგრამების შემუშავების საქმეში სპეციალიზებულ კომპანია ”პოლიფონი დიჯიტალს” მიანდო. რა თქმა უნდა, X1-ის შემუშავებასა და სრულყოფაში მონაწილეობა ფეტელმაც მიიღო.

”პოლიფონი დიჯიტალს” ნიუის გამოცდილება ავტომობილის კონსტრუქციის და აეროდინამიკის შემუშავებისას ესაჭიროებოდა. დაისვა მარტივი კითხვა: ”თუ მოინდომებ მსოფლიოში უსწრაფესი ავტომობილის შექმნა, ისეთის, რომელიც არცერთ რეგლამენტს არ დაექვემდებარება, როგორი გარეგნობა უნდა ჰქონდეს მას, როგორი იქნება მისი დინამიკა და რამდენად მარტივი იქნება მისი მართვა?” ”პოლიფონი დიჯიტალმა” მარტივი პასუხი გასცა - ”ეს იქნება X1 პროტოტიპი”!

მარტივი ახლა ითქმის, თორემ ვირტუალური ზესწრაფი ავტომობილის შექმნას ნიუი ისეთივე სერიოზულობით და მონდომებით მოოეკიდა, როგორც ფორმულა 1-ის ბოლიდების შექმნას ეკიდება ხოლმე. რა თქმა უნდა, ის ამ პროექტში მხოლოდ ტექნიკური მრჩეველის როლს თამაშობდა, თუმცა ისეთ ბავშვურ ენთუზიაზმს ავლენდა, რომ მუშაობის პროცესში ყველას აოცებდა.

ნიუიმ X1-ის კონსტრუქციაში ისეთი აეროდინამიკური საშუალებები გამოიყენა, როგორებიც თანამედროვე ფორმულა 1-ში აკრძალულია. ესაა გრაუნდ ეფექტი, რომელიც ავტომობილის ქვედა ნაწილში გაუხშოებული არეალის შექმნას ითვალისწინებს. ასეთი გრაუნდ ეფექტი ირველად გენიალურმა კოლინ ჩეპმენმა გამოიყენა თავის ”ლოტუსზე”. მაგრამ ფ1-ში ის მალე აიკრძალა, რადგან გარკვეულ პირობებში, პილოტს დიდ საფრთხეს უქმნიდა. ყოველივეს წყალობით, X1 ბევრ მოსახვევს, სადაც ფ1-ის მანქანებს სიჩქარის დაგდება უწევთ, სრული გაზით გადის. ამ დროს კი პილოტი ადამიანის ორგანიზმისთვის თითქმის ზღვრულ გადატვირთვებს განიცდის.

სწორ მონაკვეთებზე აეროდინამიკური წინააღმდეგობის შესამცირებლად და ამის წყალობით, მანქანის სიჩქარის გასაზრდელად, ნიუიმ კოკპიტი დახურა. ასევე აეროდინამიკურ გარსებში მოაქცია ოთხივე ბორბალი. რა თქმა უნდა, ავტომობილის აეროდინამიკურობის გაუმჯობესებას ემსახურება წინა და უკანა ფრთები, ასევე უკანა დიფუზორი.

დაბოლოს, X1-ის სრულყოფაში დიდი წვლილი ფეტელს მიუძღვის, რომელმაც მისი პირველი ტესტისთვის სუძუკას ვირტუალური ტრეკი გამოიყენა და პირველივე წრეზე, თითქმის 20 წამით გააუმჯობესა ის სარეკორდო შედეგი, რომელიც მასვე ფორმულა 1-ის რბოლებში ეკუთვნის.

”დღეისათვის, მსოფლიოში არსებული ყოველი სარბოლი სერია გარკვეულ რეგლამენტს ექვემდებარება. ჩვენ კი ისეთი სარბოლი მანქანა შევქმენით, რომელიც არანაირ რეგლამენტს არ ემორჩილება. რა თქმა უნდა, ეს არ არის ნამდვილი მანქანა, ეს მხოლოდ ოცნებაა, მაგრამ დარწმუნებული ვარ, მომავალში მოტორსპორტი ჩვენგან მაგალითებს მიიღებს”, - ამბობს ”პოლიფონი ”დიჯიტალის” პრეზიდენტი კაძუნორი იამაუჩი.

”ჩვენი პროფესიის ადამიანებს ყოველთვის აინტერესებთ, თუ სად გადის ავტომოვილის შესაძლებლობების ზღვარი. რა იქნება, თუ არანაირ რეგლამენტს არ დავემორჩილებით. შემიძლია ვთქვა, რომ ”პლეისტეიშნ3-ის” და ”გრან ტურიზმო 5-ის” წყალობით, ამ ზღვარს მივაღწიეთ და მას იმ მილიონობით ადამიანს გავუზიარებთ, რომლებიც ამ თამაშს ეზიარებიან. სწორედ ესაა ის გამოწვევა, რომელმაც ”რედ ბულ რეისინგი” ”პოლიფონი დიჯიტალთან” დააკავშირა. ჩვენი თანამშრომლობის შედეგი კი უსწრაფესი X1-ია”, - ამბობს ნიუი.

დაკიდევ, მთავარის შესახებ: ”სონი პლეისტეიშნი” ვიდეოთამაშ ”გრან პრი 5-ის” გაყიდვებს 2 ნოემბერს იწყებს. ”რედ ბულ X1-ის” გარდა, თამაშში ასევე შეტანილია 1000-ზე მეტი სარბოლი ავტომობილის (როგორც საგზაო სუპერ ქარების, ასევე ნასქარ-ის, რალის მსოფლიო ჩემპიონატსა და ბევრ სარბოლ სერიაში მონაწილე ავტომობილების) მონაცემები.

Wednesday, October 27, 2010

”ბეემვემ” შეიძლება დიდი გადაჯგუფება ჩაატაროს

BMW 1-Series To Be Rebadged 2-Series For Next-Gen Model?

27 ოქტომბერი

დიდი ხანია, ”ბეემვემ” დაადასტურა, რომ ახალი, წინა წამყვანბორბლიანი მოდელის შექმნა დაწყებული აქვს, ავტომობილისა, რომელმაც კომპანიის საწარმოო პროგრამაში, ახლანდელი 1-ლი სერიის მოდელზე დაბალი საფეხური უნდა დაიკავოს და კონკურენცია ”აუდი A1-ს” და ”მერსედესის” შემდეგი თაობის A-კლასს გაუწიოს. მაგრამ ბავარიულ კომპანიას მოულოდნელი პრობლემა შეექმნა - თუ თავისი ავტომობილებისთვის სახელების დარქმევის ახლანდელ ტრადიციას გააგრძელებს, ახალ ავტომობილს 0-სერია უნდა უწოდოს. მაგრამ ეს გამორიცხულია.

თუმცა არსებობს გაცილებით უკეთესი გამოსავალი. კერძოდ, ახლანდელი 1-ლი სერიის შემდეგი თაობის მოდელს მე-2 სერია ეწოდოს, რითაც სრულიად ახალი მოდელისთვის სახელი გამოთავისუფლდება და მას პირველ სერიას დაარქმევენ. ჯერჯერობით ეს მხოლოდ ვარაუდია, თუმცა არსებობს მნიშვნელოვანი ფაქტორები, რომლებიც მოვლენათა ამგვარი განვითარების ვარაუდის საფუძველს იძლევა.

ახლახანს, ბავარიულმა კომპანიამ, აშშ-ში სავაჭრო ნიშნები - 228, 230 და 235 გაიფორმა. ამ რიცხვებს პირველ ციფრად 2-ის ნაცვლად 1 რომ დავუწეროთ, ახლანდელი 1-ლი სერიის ძრავების შესაბამის გამას მივიღებთ. ირიბად ეს იმის მანიშნებელია, რომ ამერიკაში ახლანდელ პირველ სერიას, მე-2 სერიად გადაკეთება ელის. ამ ვარაუდს ის ფაქტორიც ამყარებს, რომ იმავე ამერიკაში, ”ბეემვემ” აღნიშვნა M2 დააპატენტა. ამ ინფორმაციას კი ისეთი ავტორიტეტული გამოცემა ავრცელებს, როგორიც ”ქარ ენდ დრაივერია”.

ამავე გამოცემის ვარაუდით, ბავარიელები ამ ცვლილებებს მერმისსვე განახორციელებენ, როცა მნიშვნელოვანი მოდერნიზაცია ჩაუტარდება ახლანდელი 1-ლი სერიის კუპესა და კაბრიოლეტს. სავარაუდოდ, ბავარიელები მათ მე-2 სერიის სახელით გაგვაცნობენ.

სხვათა შორის, ცოტა ხნის წინ, ”ბეემვემ” და ”პეჟო-სიტროენმა” ხელშეკრულება გააფორმეს, რომლის მიხედვითაც, ისინი ახალ ჰიბრიდულ სისტემას ერთობლივად შეიმუშავებენ. ეს სისტემა სწორედ წინა ამძრავიანი ავტომობილებისთვის იქნება განკუთვნილი და მას ბავარიელები ახალი მოდელისთვის გამოიყენებენ.

”ლამბორგინი” ლათინური ამერიკიდან მეორე თაობის ”მიურას” გამოუშვებს

Lamborghini Latinoamérica SA to Build Miura II

27 ოქტომბერი

ეს ნამდვილად არ ვიცოდი - თურმე ქვეყნად ორი ”ლამბორგინი” არსებობს, ერთი იტალიურია, ის ლეგენდარული კომპანია, რომლის ავტომობილებზეც ყველა ოცნებობს და რომელიც დღეს გერმანული ”ფოლკსვაგენის” დიდი ოჯახის წევრია, მეორე კი მექსიკიდანაა, რომელსაც ქვეყნად ბევრი არავინ იცნობს, მაგრამ ისეთი სუპერავტომობილების წარმოებას გეგმავს, თვით სანტ’აგატა ბოლონეზელებიც კი გაკვირვებულები დარჩებიან.

თანაც, ამ ლათინურამერიკული ”ლამბორგინის” მოდელს, რომლის წარმოების დაწყებასაც ის უახლოეს მომავალში აპირებს, არც მეტი, არც ნაკლები, სახელად ”მიურა II-ს” არქმევენ, სახელს, რომელმაც თავის დროზე, იტალიურ ბრენდს სახელი გაუთქვა და ის თითქმის ისეთივე პოპულარული გახადა, როგორიც ”ფერარია”. გარდა ამისა, ”ლამბორგინი ლატინოამერიკა” (კომპანიის სრული სახელწოდებაა აუტომოვილეს ლამბორგინი ლატინოამერიკა SA) კიდევ ორ კონცეპტუალურ მოდელს - ”კოუტლს” და ”ალარს” ამზადებს.

თავის დროზე, მექსიკურმა კომპანიამ, ნამდვილი ”ლამბორგინის” ლეგენდარულ მოდელ ”დიაბლოს” და მისი მოდიფიკაციების წარმოების უფლება მოიპოვა. ეს იმ პერიოდში მოხდა, როდესაც იტალიურ კომპანიას პატრონი ძალიან ხშირად ეცვლებოდა.

ერთხელ ის ნაკლებად ცნობილ ინდონეზიურ კომპანია ”მეგატექს” ჩაუვარდა ხელში, მაგრამ ამათ საქმის განსავითარებლად ფული არ ეყოთ და ამიტომ, გარიგება დადეს მექსიკელ ბიზნესმენ ხორხე ანტონიო ფერნანდეს გარსიასთან და მის პარტნიორ ხოან ფერჩისთან. გარიგების ძალით, მექსიკელებს სახელ ”ლამბორგინის” გამოყენების უფლება გადაეცათ. კომპანიას სახელად ”აუტომოვილეს ლამბორგინი ლატინოამერიკა” შეარქვეს და მას მოდელ ”დიაბლოს” წარმოების უფლებაც მიენიჭა. გარდა ამისა, მექსიკურ ”ლამბოს” საკუთარი კონცეპციების შექმნის უფლებაც ჰქონდა.

რაც შეეხება მოდელ ”მიურას”, მან ”ლამბორგინი” სუპერ კომპანიად აქცია. როგორც ამბობენ, ამ ავტომობილით, იტალიურმა კომპანიამ დროს გაუსწრო და ისეთ კომპანიებსაც გაუჩინა შურის გრძნობა, როგორებიც ”ფერარი” და ”მაზერატია”. ”მიურა” აგრესიული გარეგნობით გამოირჩეოდა და მისი სახელიც შესაბამისი იყო - მიურა ესპანური კორიდის ხარების ჯიშის სახელია. ”მიურა” იყო მსოფლიოში ერთ-ერთი პირველი ავტომობილი, რომელმაც სუპერ ავტომობილების კლასს დაუდო სათავე. მას ძრავი ბაზაში ჰქონდა განლაგებული, სალონში კი მხოლოდ ორი ადგილი იყო.

შემდეგ ”ლამბორგინი” გერმანულ ”ფოლკსვაგენს” ჩაუვარდა ხელში, რომელმაც მექსიკური კომპანიისგან ადრე დადებული კონტრაქტის გაუქმება მოითხოვა. დავა სასამართლოში გაგრძელდა და ის ჯერაც არ დასრულებულა. თუმცა, ამის მიუხედავად, მექსიკის მთავრობამ ”ლამბორგინი ლატინოამერიკას”, ახალი ფაბრიკის ასაშენებლად, შეღავათიანი კრედიტი გამოუყო.

ახალი ”მიურას” შესახებ ჯერ ბევრი არაფერია ცნობილი. მექსიკურმა ”ლამბომ” მისი ჯერ მხოლოდ ესკიზები გაავრცელა. ამასთან, ცნობილია ისიც, რომ კომპანია უგზოობის სრულამძრავიანი მოდელის წარმოებასაც გეგმავს, რომელსაც სახელად ”გრეიტ ბულს” (დიდ ხარს) დაარქმევენ.

Tuesday, October 26, 2010

”ბეემვე” ჯერ არარსებული ”პორშე კახუნის” კონკურენტს გამოუშვებს

BMW poised to add X4 to lineup in 2014

26 ოქტომბერი

”ბეემვე” თავისი საწარმოო პროგრამის კიდევ უფრო გაფართოებას გეგმავს. კომპანიის ხელმძღვანელობა, 2014 წლიდან სპორტულ ქროსოვერ X4-ის წარმოების დაწყების მიზანშეწონილობას განიხილავს. გამოცემა ”აუტოუიკის” ინფორმაციით, თუ საკითხი დადებითად გადაწყდა, ახალი ავტომობილით, ბავარიელები კონკურენციას ”პორშე კახუნს” გაუწევენ, რომლის წარმოების გადაწყვეტილებაც შტუტგარტელებმა ახლახანს მიიღეს.

ახალი ავტომობილი ოთხადგილიანი იქნება და მას ქროსოვერ X3-ის ბაზაზე ააგებენ. ამ ავტომობილისგან ის შასის და აგრეგატებს მიიღებს, თუმცა მისგან განსხვავებით, გაცილებით აგრესიული, დინამიური გარეგნობა ექნება, როგორც სპორტულ ავტომობილს შეეფერება. პროპორციებით X4 უფრო მაღალ საფეხურზე მდგარ X6-ს დაემსგავსება, თუმცა, როგორც ”ბეემვეს” წარმომადგენელმა ”აუტოუიკს” განუცხადა, X4-ის დიზაინი ”ბევრს გააკვირვებს”.

რა თქმა უნდა, ახალი ავტომობილი სრულამძრავიანი ტრანსმისიით აღიჭურვება. გარდა ამისა, მას მამოძრავებელ ძალას ოთხ და ექვსცილინდრიან ბენზინის და დიზელის ძრავებს მიიღებს, რომლებსაც ან 6-საფეხურიანი მექანიკური, ან 7-საფეხურიანი რობოტიზებული კოლოფით აღიჭურვება, რომელსაც გადაბმის ორმაგი ქურო ექნება, ან კიდევ 8-საფეხურიანი ავტომატით. გარდა ამისა, ბავარიელები X4-ის M-ვერსიის შექმნასაც გეგმავენ, რომელსაც ორი ტურბინით აღჭურვილი ექვსცილინდრიანი (ერთ რიგში განლაგებული ცილინდრებით) ძრავით და 7-საფეხურიანი რობოტიზებული ტრანსმისიით (DCT) აღჭურვავენ. ძრავსა და კოლოფს გადაბმულობის კი ორდსკოიანი ქურო დააკავშირებს.

ჟურნალ ”აუტოუიკის” წყაროს თქმით, ბავარიელებს X4-ის წარმოება იმ ფაქტმა გადააწყვეტინა, რომ ”ფოლკსვაგენმა” ”პორშე კაიენის” მომცრო ასლის წარმოების გადაწყვეტილების შესახებ გამოაცხადა. თუმცა, ესეც რომ არა, X6-ის პოპულარობა, ბავარიელებს სწორედ ამ ნაბიჯისკენ უბიძგებდა. უფრო მთავარი კი ისაა, რომ ”ბეემვეს” 2020 წლისთვის, თავისი გაყიდვების 2 მილიონამდე გაზრდა აქვს დაგეგმილი.

X4-ის წარმოების შესახებ გადაწყვეტილებას მალე ბავარიული კომპანიის შეფი ნორბერტ რაიტჰოფერი ფამოაცხადებს. თუ X4-ს წარმოებას მწვანე შუქს აუნთებენ, მას ”ბეემვეს” ამერიკული ქარხანა გამოუშვებს, რომელიც შტატ ჩრდილოეთ კაროლინას ქალაქ სპარტანბურგში მდებარეობს და რომელიც ახალი თაობის ქროსოვერ X3-ს აწარმოებს.

თბილისის ავტო შოუ - მწირი ექსპოზიციით და ძალიან ცოტა დამთვალიერებლით

26 ოქტომბერი

22-24 ოქტომბერს, თბილისის ექსპო ცენტრის მე-11 პავილიონმა თბილისის საერთაშორისო ავტო შოუს უმასპინძლა, რომელზეც საქართველოში მომუშავე ავტოდილერებმა მათ ხელთ არსებული ახალი ავტომობილები გამოფინეს.

სამწუხაროდ, შოუზე ავტომობილები მხოლოდ ორმა კომპანიამ - ”GT მოტორსმა” და ”იბერია ბიზნეს ჯგუფმა” გამოფინა. ამასთან, მულტიბრენდული ”იბერია” მხოლოდ ერთი მარკით - კორეული ”კიათი” იყო წარმოდგენილი, ”GT მოტორსმა” კი საზოგადოებას თავისი სამივე ბრენდის - ”ფორდის”, ”ლენდ როვერის” და ”სუძუკის” ავტომობილები უჩვენა.

დილერების გარდა, თავიანთი პარტნიორი კომპანიების პროდუქცია იმავე ”GT მოტორსმა”, ”იბერია ტექ ავტომოტივმა” (იბერია ბიზნეს ჯგუფში შედის) და ”თეგეტა მოტორსმა” გამოფინეს. მათ პავილიონებში ზეთებს, საბურავებს, სხვადასხვა მაკომპლექტებლებს, სათადარიგო ნაწილებსა და სპეცტექნიკას ნახავდით.

თბილისის ავტო შოუს მთავარი მოვლენა ის იყო, რომ ”სუძუკის” ავტომობილები ”GT მოტორსის” პავილიონში იდგა. როგორც ამ კომპანიის გაყიდვების მენეჯერმა დემურ აფციაურმა განაცხადა, 1 ოქტომბრიდან, იაპონური კომპანიის ოფიციალური ქართველი დილერი სწორედ ”GT მოტორსია”, რომელიც გაყიდული ავტომობილების სრულ საგარანტიო და გარანტიის შემდგომ მომსახურებას განახორციელებს.

ჯერჯერობით, ”სუძუჯის” ავტომობილების ყიდვა ”GT მოტორსის” იმავე შოურუმში იქნება შესაძლებელი, სადაც ”ფორდის” და ”ლენდ როვერის” ავტომობილები დგას. ახლო მომავალში კი იაპონური ბრენდის მოდელებისთვის სრულიად ახალი შოურუმი და მისი სრული ინფრასტრუქტურა ამოქმედდება.

დემურ აფციაურის თქმით, ”GT მოტორსი” მყიდველს, სპეციალურად ქართული ბაზრისთვის მომზადებულ ავტომობილებს, მათს საგარანტიო მომსახურებას და ორიგინალურ იაპონურ სათადარიგო ნაწილებს სთავაზობს. საგარანტიო პირობები 3-წლიან უფასო მომსახურებას გულისხმობს როგორც ძრავსა და ტრანსმისიაზე, არამედ სავალ ნაწილსა და ნებისმიერ კვანძზე, რომლებიც ავტომობილის გამართულობას უზრუნველყოფს. გარანტია იმ სათადარიგო ნაწილებსა და სერვისზეც ვრცელდება, რომლებსაც ”GT მოტორსი” თავის კლიენტურას სთავაზობს.

ამავე კომპანიის პავილიონში თავს იწონებდა ლეგენდარული ”ფორდ მუსტანგის” GT ვერსია, ასევე ლეგენდარული ”ლენდ როვერ დიფენდრი”, ”ფორდ კუგა”, რომელსაც ერთი მყიდველი იქვე გამოუჩნდა და ორი გრანდიოზული ”რეინჯ როვერი”. სამწუხაროდ, ვერ ვიხილეთ უახლესი ”ფორდ ფიესტა”, რომელზეც მთელს მსოფლიოში ისეთი დიდი მოთხოვნილებაა, რომ ”GT მოტორსი” მის ჩამოყვანას ნოემბერში შეძლებს. ასევე მოგვიანებით ჩამოიყვანენ უახლეს ”ფორდ ფოკუსსაც”.

რა შეიძლება ითქვას თბილისის ”საერთაშორისო” ავტო შოუზე? მან აშკარად ერთი დილერის დიდი შოურუმის შთაბეჭდილება დატოვა. სხვა დილერებს თავიანთი პროდუქციის გამოტანა რომც სდომოდათ, მათ გაცილებით პატარა პავილიონებში მოუწევდათ ფართობის დაქირავება. ეს კი, მათს ინტერესებში აშკარად არ შედიოდა. ესეც რომ არა, მათი უმეტესობა ამბობს, რომ გამოფენაზე ფართის დაქირავება მეტისმეტად ძვირი ჯდება.

მოკლედ, თუ თბილისის ავტო შოუს ორგანიზატორებს სურთ, რომ გამოფენა მომავალში მაინც წარმატებული გახდეს და ბევრი დამთვალიერებელი მიიზიდოს, მათ დამატებითი პავილიონების მოწყობა მოუწევთ. ამას კი სოლიდური ინვესტიცია დასჭირდება...

Monday, October 25, 2010

”შევროლე” ”ავეოს” ბაზაზე უგზოობის მოდელს გამოუშვებს

Chevrolet Working on Aveo-based Small SUV

24 ოქტომბერი

”ჯენერალ მოტორსის” ყველაზე მასობრივი ბრენდი ”შევროლე” თავის სუბკომპაქტურ ჰეჩბეკ ”ავეოს” ბაზაზე, უგზოობის მოდელის წარმოებას აპირებს. ამ ინფორმაციას ინგლისური გამოცემა ”ავტოქარი” ავრცელებს. ჟურნალის ცნობითვე, პროექტის განხორციელება დაწყებულია.

”შევროლეს” თავის კორეულ ტექნოლოგიურ ცენტრში, ახალი ავტომობილის შემუშავება უკვე დაწყებული აქვს. წინასწარი ვარაუდით, ახალი ავტომობილის მსოფლიო პრემიერა 2012 წელს უნდა ჩატარდეს.

”ავტოქარის” მიერ მოპოვებული ინფორმაციით, რომელიც ჟურნალმა ”გენერლების” კორეული შტოს დიზაინის დირექტორ ტაევონ კიმისგან მიიღო, უგზოობის ახალი ავტომობილისთვის, ”შევროლე” ჰეჩბეკ ”ავეოს” დაგრძელებულ პლატფორმას გამოიყენებს. ამასთამ მყიდველს არჩევანი ექნება - შეიძინოს სრულამძრავიანი მოდელი, თუ მხოლოდ წინა წამყვანბორბლიანი.

რაც შეეხება ავტომობილის გარეგონბას, ის ”შევროლეს” კორპორატიულ სტილში შესრულდება. სალონში კი ყველაფერი მაღალი ხარისხისა იქნება. უგზოობის პატარა ავტომობილში გამოიყენებენ ”შევროლეს” ეგრეთ წოდებულ ”ორმაგი კოკპიტის” დიზაინს, რომელიც პირველად კომპაქტურ სედან ”კრუზზე” გამოიყენეს.

ამასთან, ტაევონ კიმმა ”ავტოქარს” განუცხადა, რომ მომავალში, ანალოგიურ ავტომობილს ”ჯენერალ მოტორსის” გერმანული შტო ”ოპელიც” გამოუშვებს, თუმცა დასძინა, რომ ეს ორი ავტომობილი სხვადასხვა აუდიენციაზე იქნება გათვლილი. ორ ავტომობილს შორის განსხვავებაც უფრო მეტი იქნება, ვიდრე ”შევროლე კაპტივასა” და ”ოპელ ანტარას” შორისაა, რომლებსაც ძარის ზოგიერთი პანელიც კი ერთნაირი აქვთ.

ცნობისათვის, ”შევროლემ” მომდევნო თაობის ”ავეო” (სურათზე) საზოგადოებას პირველად ახლახანს, პარიზის საავტომობილო შოუზე წარუდგინა. ამ ავტომობილისთვის სულ ექვსი ძრავია გათვალისწინებული, რომელთაგან ოთხი ბენზინზე მუშაობს, ორი კი - დიზელზე. ბენზინის აგრეგატების მოცულობა 1.2, 1.4 და 1.6 ლიტრია. პირველი ორი ვერსიის სახით იწარმოება და მათი სიმძლავრე 70 და 86 ცხენის ძალაა, 1.4-ლიტრიანი 100 ცხენის ძალას გამოიმუშავებს, 1.6-ლიტრიანის სიმძლავრე კი 115 ცხენის ძალაა. რაც შეეხება დიზელს, მისი მოცულობა 1.3 ლიტრია და ისიც ორ ვერსიად იწარმოება, რომელთაგან ერთი 75 ცხენის ძალას გამოიმუშავებს, მეორე კი - 95 ცხენის ძალას.

Sunday, October 24, 2010

”ოპელი” შეტევას აგრძელებს - ”ინსიგნია” დიზელით და ოთხი წამყვანი ბორბლით

Opel Insignia Sports Tourer

24 ოქტომბერი

”ოპელ ინსიგნია” წარმატებული ავტომობილია - გამოჩენისთანავე, ევროპის 2009 წლის საუკეთესო ავტომობილის წოდება მოიპოვა, რასაც კიდევ 39 ჯილდო მოჰყვა. ბაზრის გამოკვლევამ და მყიდველთა აზრის შესწავლამ, ამ წარმატების მიზეზი დაადგინა: დახვეწილი, ელეგანტური დიზაინი და განსაკუთრებული ტექნოლოგიები, რომლებსაც მომხმარებელი აფასებს და, რა თქმა უნდა, მისაღები ფასი...

”ოპელს” ამ ავტომობილის სხვადასხვა ვერსიაზე (სედანი, ჰეჩბეკი და სპორტული უნივერსალი) უკვე 230 000 შეკვეთა აქვს მიღებული. ”ინსიგნია” კი საშუალო კლასის სეგმენტში, ევროპის 11 ქვეყნის ბაზრის ბესტსელერი, ან მეორე საუკეთესოდ გაყიდვადი ავტომობილია.

მაგრამ კონკურენტებს არ ძინავთ და ყურადღების ოდნავ მოდუნებაც საკმარისია, რომ სასტარტო წარმატებისგან არაფერი დარჩეს. კონკურენტებთან ბრძოლის საუკეთესო საშუალება კი სამოდელო გამის გამრავალფეროვნებაა. და ”ოპელიც” სწორედ ამ გზას ადგას - გერმანულმა კომპანიამ, თავის ისტორიაში პირველად, გამოუშვა ავტომობილი, რომელსაც ერთდროულად დიზელის ძრავიც ამოძრავებს და ყველა ბორბალიც წამყვანი აქვს. თანაც, სრულამძრავიანი სისტემა ადაპტირებადია. ანუ, საწვავის ეკონომიის მიზნით, როდესაც მანქანა სწორ გზაზე მოძრაობს, წამყვანის ფუნქცია მხოლოდ წინა ბორბლებს რჩება. ასე ძრავის მიერ გამომუშავებული მაბრუნი მომენტის დიდი ნაწილი ბორბლების გზაზე ხახუნს არ მიაქვს და საწვავიც უფრო ეკონომიურად იხარჯება.

სხვათა შორის, ”ადაპტივ 4X4” სისტემა ყველაზე დაფასებულია ”ინსიგნიას: მყიდველთა შორის. კომპანიის მარკეტოლოგებმა დაადგინეს, რომ ევროპაში ამ ავტომობილის იმ მყიდველთა 45 პროცენტი, რომლებმაც არჩევანი ბენზინის 2.0-ლიტრიანი ტურბოძრავით აღჭურვილ მოდელზე შეაჩერეს, დამატებით ”ადაპტივ 4X4” სისტემაც შეუკვეთეს. სოლიდური მოთხოვნის გამო, ”ოპელმა” გადაწყვიტა, რომ ეს სისტემა იმ ვერსიებზეც სტანდარტულ ეკიპირებაში შეიტანოს, რომლებიც 2.0-ლიტრიანი ტურბო დიზელითაა (160 ცხ.ძ) აღჭურვილი. ამგვარად, ორივე ვერსია ამიერიდან უფრო ტემპერამენტიანი გახდა და იმავდროულად, არც საწვავის ეკონომიურობა გაუარესებულა. გარდა ამისა, ”ადაპტივ 4X4” სისტემა, ბენზინის 2.8-ლიტრიანი V6 ტურბოძრავით (260 ცხენის ძალა) აღჭურვილი და OPC მოდლებისთვისაც სტანდარტულია.

”ადაპტივ 4X4” სისტემისა და ”ფლექსრეიდ” შასის წყალობით, უნივერსალი ”ინსიგნიაც” ისეთივე დინამიური და კომფორტულია, როგორც მისი სედანისძარიანი ვერსია. ამაში კი ქართველი ჟურნალისტებიც მაშინ დავრწმუნდით, როდესაც ოქტომბრის შუა რიცხვებში, ”ოპელმა” ამ სისტემებით აღჭურვილი უნივერსალების ტესტირების საშუალება მოგვცა.

დანსაკუთრებულ აღნიშვნას სრულამძრავიანი ადაპტირებადი სისტემა იმსახურებს, რომელიც მოძრაობის პირობების შესაბამისად ანაწილებს მაბრუნ მომენტს ბორბლებს შორის და ავტომატურად ირჩევს იმ რეჟიმს, რომელიც ამათუიმ პირობებში ყველაზე ოპტიმალურია. ბორბლების გზასთან ჩაჭიდების ავტომატურად რეგულირების წყალობით, ”ინსიგნია” კიდევ უფრო დინამიკური გახდა და უკეთ იყენებს თავისი ძრავების შესაძლებლობებს.

”ინსიგნიას” ახალ სრულამძრავიან სისტემას აკონტროლებს ელექტრონიკა, რომელიც შესაბამისი ინფორმაციის მიღებიდან 80 მილიწამში ასწრებს ტრანსმისიის იმგვარად მომართვას, რომ ბორბლები მაბრუნი მომენტის იმ დოზით დატვირთოს, რაც კონკრეტულ მომენტში ყველაზე ოპტიმალური იქნება. ღერძებმა მომენტის ნულიდან 100 პროცენტამდე შეიძლება მიიღონ. ამასთან, უკანა ღერძზე, მომენტი ბორბლებს შორის საჭიროების შემთხვევაში ნაწილდება. ელექტრონული სისტემა, მართვისთვის საჭირო ინფორმაციას, მუდმივად ღებულობს სამი მოდულისგან. ესენია მანქანის ტანის კონტროლის მოდული (BCM - ბოდი კონტროლ მოდულ), ძრავის კონტროლის კვანძისგან (ECU – ენჯაინ კონტროლ იუნიტ) და სისტემა ESP-გან. სწორედ მათგან მიღებული ინფორმაციის ანალიზის შემდეგ ხდება მომენტის გადანაწილება.

გარდა ამისა, ”ადაპტივ 4X4” სისტემის სტანდარტულ ეკიპირებაში შედის ელექტრონულად კონტროლირებადი შეზღუდული მოცურების დიფერენციალი (eLSD - ელექტრონიკალი კონტროლდ ლიმიტედ სლიპ დიფერენშლ). ეს სისტემა უკანა ბორბლებს შორის მომენტის ოპტიმალურად განაწილებას უზრუნველყოფს. მისი წყალობით, მეტ მომენტს ის ბორბალი ღებულობს, რომელსაც გზასთან უკეთესი ჩაჭიდება აქვს. მისი წყალობით, მანქანა შეიძლება ერთადერთი უკანა ბორბლით იმ შემთხვევაშიც გადაადგილდეს, თუ დანარჩენი სამის ფზასთან ჩაჭიდება ნულოვანია!

ღერძებს შორის მომენტის გადანაწილება წინა დიფერენციალში მოთავსებულ ჰიდრავლიკურ გადაბმის მრავალდისკოიან ქურო ”ჰალდექსის” მეშვეობით ხორციელდება. ამ სისტემას უკანა, ან წინა ღერძის სრულად დატვირთვა, ან განტვირთვა შეუძლია. უკანა დიფერენციალში, მრავალდისკოიანი ქურო, უკანა ბორბლებს შორის მომენტს საჭიროების შესაბამისად ანაწილებს.

ზემოთ დასახელებული მოდულები ინფორმაციით იმ სენსორებისგან მარაგდება, რომლებიც აჩქარებას, მოხვევის კუთხეს, ბორბლების ბრუნვის სიხშირეს, გაზის პედალის პოზიციას, ძრავის მიერ გამომუშავებულ მომენტს და ბრუნთა რიცხვს აკონტროლებენ. მიღებული ინფორმაცია გადამუშავდება და შესაბამის სისტემებს გადაეცემა.

”ადაპტივ 4X4” სისტემა მძღოლს რთულ პირობებში მართვის დროს დიდ დახმარებას უწევს. მაგალითად, ხშირია შემთხვევები, როდესაც დაღმართში მოძრაობისას, მძღოლი გაზიდან ფეხს მხოლოდ მას შემდეგ იღებს, რაც გრძნობს, რომ მანქანა საჭეს ძნელად ემორჩილება. ”ინსიგნიას” ადაპტირებადი სისტემა კი, სენსორების დახმარებით, დროულად დააფიქსირებს შექმნილ სიტუაციას და მაბრუნ მომენტს ბორბლებს შორის, საჭიროების მიხედვით გადაანაწილებს. ამგვარად, მძღოლს აღარ უჭირს მანქანის კონტროლი. საერთო ჯამში, როგორც ”ოპელი” ამბობს, სრულამძრავიანი ადაპტირებადი სისტემის წყალობით, სისტემა ESP (ელექტრიკ სტაბილიტი კონტროლ) მეტწილად გამოუყენებელი რჩება და ის საქმეში მხოლოდ უკიდურესად რთულ სიტუაციებში ერთვება. გერმანული კომპანიის განსაზღვრებით, ESP-ს მხოლოდ მფარველი ანგელოზის როლიღა ეკისრება.

”ბენტლი” ოთხკარიან კუპეს გამოუშვებს

Bentley Four-Door Coupe in the Works

24 ოქტომბერი

ოთხკარიანი კუპეების სეგმენტი, რომელიც რამდენიმე წლის წინ, ”მერსედეს ბენცმა” გახსნა, სულ უფრო პოპულარული ხდება. მორიგი კომპანია, რომელიც ამ სეგმენტში შეღწევას აპირებს, ”ბენტლია”. ინგლისურ გამოცემა ”ავტო ექსპრესთან” საუბრისას, ”ბენტლის” შეფმა ფრანც-იოზეფ პაეფგენმა განაცხადა, რომ მის კომპანიას ოთხკარიან კუპეზე მუშაობა უკვე დაწყებული აქვს. მისივე თქმით, ეს ავტომობილი ინგლისური კომპანიის გამაში, ”კონტინენტალსა” და ”მულსანს” შორის ნიშას შეავსებს.

”ავტო ექსპრესის” ინფორმაციით, ახალი ”ბენტლი”, რომელსაც ჯერ სახელიც არ აქვს და რომელიც შემუშავების საწყის ეტაპზეა, ბაზარზე კონკურენციას ”პორშე პანამერას”, შემდეგი თაობის ”მაზერატი კვატროპორტესა” და ”ასტონ მარტინ რეპიდს” გაუწევს. მომავალში, თუ ”ლამბორგინი” ოთხკარიან კუპეს გამოუშვებს, ისიც ”ბენტლის” შესაბამისი ავტომობილის კონკურენტი გახდება. აქ ისიც უნდა ითქვას, რომ ”ბენტლიც” და ”ლამბორგინიც” ”ფოლკსვაგენის” ჯგუფში შედის.

ბრიტანული გამოცემის ვარაუდით, ”ბენტლის” ოთხკარიანი კუპე ”აუდი” შესაბამისი კლასის ”A7 სპორტბეკის”, ან ახალი A6-იუს პლატფორმაზე აიგება. მის კონსტრუქციაში უხვად გამოიყენებენ ალუმინსა და კარბონის კომპოზიტს, რისი წყალობითაც, ავტომობილის წონას 1700 კილოგრამის ფარგლებში ”დაიჭერენ”. შედარებისთვის, ”ბენტლი ფლაინგ სპერი” 2475 კილოგრამს, ”ბენტლი მულსანი” კი 2585 კილოგრამს იწონის.

კაპოტის ქვეშ მოთავსდება ”აუდივე” 4.0-ლიტრიანი ტურბო V8, რომლის შემუშავებაშიც მონაწილეობას ”აუდის” სპეციალისტებიც ღებულობენ. იგივე ძრავი მოგვიანებით ”ბენტლი კონტინენტალზეც” გამოჩნდება. ძრავს 8-საფეხურიანი ავტომატური გადაცემათა კოლოფი შეუწყვილდება, რომელიც სრულამძრავიანი სისტემის გავლით, მაბრუნ მომენტს ოთხივე წამყვან ბორბალს მიაწვდის.

”ბენტლი” ჯერ არ აზუსტებს, თუ როდის დაიწყებს ოთხკარიანი კუპეს წარმოებას. ინგლისური კომპანია იმედოვნებს, რომ მისი წყალობით, შესამჩნევად გაზრდის გაყიდვებს. მთუმეტეს, რომ ავტომობილი თავის ძირითად კონკურენტ ”ასტონ მარტინ რეპიდზე” თითქმის ორჯერ იაფი - 135 000 დოლარი ეღირება.

Saturday, October 23, 2010

”მინი” პლიაჟის მოდელს გამოუშვებს

MINI Beachcomber Concept Headed for Production

23 ოქტომბერი

წელს, დეტროიტის საავტომობილო შიუზე, ”ბეემვეს” ინგლისურმა ბრენდმა ”მინიმ” საპლიაჟო სასეირნო კონცეპტუალური მოდელი ”ბიჩკომბერი” წარადგინა, რომელსაც თითქოს, კონცეპტუალურ მოდელადვე დარჩენა ელოდა. მაგრამ ინგლისური ჟურნალი ”ავტოქარი” გვატყობინებს, რომ ”მინი” ამ მოდელის სერიული ვერსიის მომზადებაზე მუშაობს.

უფრო მეტიც, ჟურნალის მიერ მოპოვებული ინფორმაციით, ბრიტანული კომპანიის მიუნხენურ დიზაინ ცენტრში საწარმოო ვერსიის ორი ვარიანტი მოამზადეს. მათგან ერთი გარეგნულად ძლიერ ჰგავს დეტროიტში ნაჩვენებ კონცეპტუალურ ავტომობილს და მას სახელად ”მოუკი” შეარქვეს. მეორე კი პატარა სამკარიანი ქროსოვერია, რომლის სახელადაც ”ქენიონ კუპე” აარჩიეს.

ცნობისათვის, 1960-იან წლებში, ”მინი” აწარმოებდა ავტომობილს სახელად ”მოუკ” და ახალი ავტომობილი, თუ ის კონვეიერზე დადგა, შეიძლება ძველი ”მოუკის” შთამომავლად ჩაითვალოს. ახალი ”მოუკი” ბაზირებულია ქროსოვერ ”ქანთრიმენის” პლატფორმაზე, რომელსაც მალე ასევე ახალ ”კლუბმენზეც” გამოიყენებენ. მისი მთავარი დამახასიათებელი ისაა, რომ ავტომობილს არ აქვს შუა საყრდენი სტრუქტურა. სამაგიეროდ, კონცეპტუალური ვერსიისგან განსხვავებით, სერიულ ავტომობილს ოთხივე კარი და ჰეჩბეკის ტიპის უკანა ნაწილი ექნება.

რაც შეეხება ”ქენიონ კუპეს”, ”ბეემვეს” კუპე-ქროსოვერ X6-ის მსგავსად, მას უკანა მხარეს დახრილი სახურავი ექნება. სხვათა შორის, სწორედ ამ უკანასკნელის პოპულარობამ განაპირობა ის, რომ ”მინის” ახალი მოდელის ერთ-ერთ ვერსიას ეგრეთ წოდებული სპორტული ქროსოვერის გარეგნობა აქვს. რაც შეეხება ახალი ავტომობილის აღჭურვილობას, ის პრაქტიკულად იგივე იქნება, რაც ”ქანთრიმენზეა”. ამასთან, საპლიაჟო ”მინი” სრულამძრავიან ტრანსმისიასაც მიიღებს.

”ავტოქარის” ინფორმაციით, ამჟამად ”მინის” დიზაინერები ორივე მოდელის გარეგნობის დახვეწაზე მუშაობენ. რაც შეეხება იმას, თუ მათგან რომელზე შეჩერდება არჩევანი, ეს საკითხი დეტროიტის მომავალი წლის ავტო შოუს შემდეგ გადაწყდება.

”ფოლკსვაგენის” ახალი მიზანი - 10 მილიონი ავტომობილის გაყიდვა 2015 წელს

VW said to bring forward 10M sales target to 2015

23 ოქტომბერი

”ფოლკსვაგენმა” შეცვალა თავისი მთავარი მიზანი, რომელიც 2018 წელს 10 მილიონი ავტომობილის გაყიდვას გულისხმობდა. ახლა გერმანული საავტომობილო გიგანტი უფრო ამბიციურ მიზანს ისახავს - ამ ზღვარს ადრე დაგეგმილზე სამი წლით ადრე უნდა მიაღწიოს. უფრო ადრე, კერძოდ კი 2012 წელს, ვოლფსბურგელებს 8 მილიონი ავტომობილის გაყიდვა აქვთ დაგეგმილი.

ეს ინფორმაცია სააგენტო ბლუმბერგს ”ფოლკსვაგენის” ინკოგნიტო წარმომადგენელმა მიაწოდა, ვინც უცნობად დარჩენა იმის გამო არჩია, რომ ეს ინფორმაცია საზოგადოებისთვის განკუთვნილი არაა და მან მათს შესახებ საბუთებიდან შეიტყო.

ანალიტიკოსები ვარაუდობენ, რომ ”ფოლკსვაგენის” არაოფიციალური მიზნებიც კი მიღწევადია. ოღონდ, ამისათვის აუცილებელი პირობა ისაა, რომ გლობალური ეკონომიკა განვითარებას არ შეწყვეტს. მთავარი კი ისაა, რომ ჩინეთში გაყიდვების ბუმი გაგრძელდეს. ჯერჯერობით ასეც არის:

მიმდინარე წლის პირველ ცხრა თვეში, ”ფოლკსვაგენმა” ჩინეთში გაყიდვები 39 პროცენტით გაზარდა. ეგ კიდევ არაფერი, ვოლფსბურგელები ცისქვეშეთში კიდევ ორ ქარხანას ააგებენ. მათი გეგმაა, რომ უახლოეს ოთხ წელიწადში, კომპანიის გაყიდვები ჩინეთში 3 მილიონამდე გაიზარდოს. ამისათვის კი ისინი იქ 6 მილიარდის ინვესტიციას განახორციელებენ.

გარდა ამისა, გერმანული ავტო გიგანტი ჩრდილოეთ ამერიკაშიც აქტიურობს, სადაც შტატ ტენესის ქალაქ ჩატანოგაში ახალ ქარხანას ააშენებს. ეს ქარხანა, პუებლას ქარხანასთან ერთად, აშშ-ის ბაზრის მთავარი მიმწოდებელი გახდება. დაკიდევ, გაიზრდება რუსული ქარხნის წარმოების მოცულობაც, რომელში წარმოებულ პროდუქციასაც, რუსეთის გარდა, დსთ-ის ქვეყნებშიც გაიტანენ.

შარშან, ”ფოლკსვაგენის” ჯგუფმა, რომელშიც ვოლფსბურგული ბრენდის გარდა, გერმანული ”აუდი”, ესპანური ”სეატი”, ჩეხური ”შკოდა” და კიდევ რამდენიმე მაღალი კლასის ავტომობილების მწარმოებელი ბრენდი შედის, მთელს მსოფლიოში 6.29 მილიონი ავტომობილი გაჰყიდა, რაც წინა წლის შესაბამის მაჩვენებელზე 1.1 პროცენტით მეტია. და ეს გერმანული კომპანიისთვის რეკორდული მაჩვენებელია. ”ფოლკსვაგენი” წელს ამ რეკორდის კიდევ უფრო გაუმჯობესებას აპირებს, რაშიც მას ბაზარზე გამოტანილი 70 ახალი და განახლებული მოდელი შეუწყობს.

სხვათა შორის, რამდენიმე დღის წინ, ”ფოლკსვაგენის” წარმომადგენელმა მიხაელ ბრენდელმა განაცხადა, რომ მისი კომპანიის მიზანი 2018 წელს 10 მილიონი ავტომობილის გაყიდვაა, თუმცა არც ის გამორიცხა, რომ ვოლფსბურგელებმა ამ მიზანს უფრო ადრეც მიაღწიონ.

ჩვენ კი გაგახსენებთ, რომ გერმანული კომპანიის სამეთვალყურეო საბჭოს თავმჯდომარე ფერდინანდ პიხს ”ალფა რომეოს” შეძენა აქვს გადაწყვეტილი და ამის გაკეთებას დაახლოებით ორი წლის შემდეგ იმედოვნებს. და თუ ეს შეძლო, მაშინ სამ წელიწადში, მილანურ კომპანიას წარმოების მოცულობის საგრძნობლად გასაზრდელად საკმარისი დრო ექნება...

Friday, October 22, 2010

”ნისანმა” ელექტრომობილ ”ლიფის” წარმოება დაიწყო

Nissan Leaf EV Enters Production at Oppama, Japan

21 ოქტომბერი

22 ოქტომბერი ღირსშესანიშნავი დღეა საავტომობილო ინდუსტრიის ისტორიაში - იაპონურმა კომპანია ”ნისანმა”, თავის ოპამას (იაპონია) ქარხანაში, სრულიად ელექტრული ავტომობილის, ”ლიფის” წარმოება დაიწყო. პირველ ავტომობილებს კომპანიის იაპონელი დილერები მიიღებენ, დეკემბერში ეს ავტომობილი აშშ-ში გამოჩნდება, ევროპას კი იანვარში მიაღწევს.

”ოპამას ქარხანა ”ლიფის” მთავარი გამომშვები იქნება. აქ დაგროვილ გამოცდილებას და ყველანაირ სიახლეს კი ჩვენ მომავალში სხვა ქარხნებშიც გამოვიყენებთ, სადაც ელექტრომობილების წარმოებას გადავწყვეტთ”, - ელექტრომობილის წარმოებისადმი მიძღვნილ საზეიმო ცერემონიაზე განაცხადა ოპამას ქარხნის აღმასრულებელმა ვიცე პრეზიდენტმა ჰიდეტოში იმაძუმ.

”ლიფის” გარდა, ოპამას ქარხანა ასევე გააგრძელებს ”ნისან ჯუკისა” და ”ნისან კუბის” წარმოებას. არადა, ქარხნის ნაწილი, ელექტრომობილების წარმოებისთვის გადაკეთდა. მოდერნიზაცია შეეხო იმ ხაზს, სადაც ჩვეულებრივი ავტომობილებისთვის საწვავის ავზებს ამზადებენ. შესაბამისად, ელექტრომობილზე ძრავებს და დენის გარდამქმნელებს იმ ხაზებზე დაამონტაჟებენ, რომლებზეც ადრე ჩვეულებრივ ავტომობილებზე შიდაწვის ძრავებს ამაგრებდნენ.

ელექტრომობილისთვის ლითიუმ-იონურ აკუმულატორებს ”ნისანისა” და კომპანია ”ნეკ-ის” ერთობლივი საწარმო დაამზადებს, რომელიც იაპონიის ქალაქ ძამაში მდებარეობს. აწყობილი აკუმულატორები ოპამაში იგზავნება. თითოეულ ”ლიფზე” 48 ცალი ასეთი აკუმულატორის ბლოკი მაგრდება.

”დღეს ჩვენ ახალ ისტორიას ვიწყებთ არამხოლოდ ”ნისანისა” და ”რენო-ნისანის” ალიანსისთვის, არამედ მსოფლიო ავტოინდუსტრიისთვისაც. მყიდველმა იცის, რაც უნდა - მას ხარისხიანი ხელმისაწვდომი ტრანსპორტი სჭირდება. ჩვენ მყიდველს სწორედ ასეთ ავტომობილებს მივაწვდით. მალე მომხმარებელი ავტომობილების შესახებ წარმოდგენას რადიკალურად შეიცვლის და მას ამაში ჩვენ დავეხმარებით”, - ამბობს ”ნისანის” პრეზიდენტი და მთავარი აღმასრულებელი კარლოს გონი.

ოპამას ქარხნის გარდა, ”ლიფის” წარმოებას 2012 წელს ”ნისანის” სმირნას (აშშ) ქარხანა, კიდევ ერთი წლის შემდეგ კი სანდერლენდის (ბრიტანეთი) ქარხანაც გამოუშვებს. პირველის წლიური საწარმოო მოცულობა 150 000 ავტომობილია, მეორისა კი - 50 000.

შტატებში ”ნისან ლიფის” ფასი 32 780 დოლარია, თუმცა სახელმწიფო შეღავათების წყალობით, ეს თანხა 25 280 დოლარამდ ჩამოვა. გარდა ამისა, შესაძლებელი იქნება ელექტრომობილის ლიზინგით დაქირავება და ამ შემთხვევაში, მყიდველს მასში თვეში 349 დოლარის გადახფა მოუწევს. შედარებისთვის, ტექნოლოგიურად უფრო მაღალ საფეხურზე მდგარი ”შევროლე ვოლტის” საწყისი ფასი 41 000 დოლარია და საგადასახადო შეღავათის შემდეგ, ეს ფასი 33 500 დოლარამდ მცირდება.

დაბოლოს, ”ნისან ლიფის” ტექნიკური აღჭურვილობის შესახებ. მამოძრავებელ ძალას მას 109-ცხენისძალიანი ელექტროძრავი ანიჭებს, რომელსაც ენერგიით ლითიუმ-იონური აკუმულატორების ბლოკი ამარაგებს. ამ აკუმულატორების მარაგი საკმარისია იმისათვის, რომ ავტომობილმა შეუჩერებლად 160 კილომეტრი გაიაროს. აკუმულატორების სრულად დამუხტვას 8 საათი სჭირდება, მისი მარაგის სწრაფად 80 პროცენტამდე დასამუხტად კი ნახევარი საათიც საკმარისია.

კონკურს ”წლის საუკეთესო მწვანე ავტომობილის” ფინალისტები

2011 Green Car of the Year Finalists Announced

21 ოქტომბერი

კონკურს ”წლის საუკეთესო მწვანე ავტომობილიზე”, ფინალისტები გამოცხადდნენ, რომლთაგან ყველაზე ეკოლოგიურის სახელის მფლობელი ლოს ანჯელესის საავტომობილო შოუზე, 18 ნოემბერს დასახელდება. ფინალში სულ ხუთი ავტომობილი გავიდა. მათგან ორი ელექტრომობილია - ”შევროლე ვოლტი” და ”ნისან ლიფი”, ორი ჰიბრიდია - ”ჰიუნდაი სონატა ჰიბრიდი” და ”ლინკოლნ MKZ ჰიბრიდი”, ასევე შიდაწვისძრავიანი ”ფორდ ფიესტა”.

ეს პირველი შემთხვევაა, როდესაც ნომინანტებს შორის ორი ელექტრომობილი მოხვდა. მართალია, ელექტრომობილები და ჰიბრიდები გაცილებით ეკონომიური აპეტიტით გამოირჩევიან, თუმცა სპეციალისტები ვარაუდობენ, რომ მათ სერიოზულ კონკურენციას გაუწევს ”ფორდ ფიესტა”, რომელიც 100 კილომეტრს 5.88 ლიტრი საწვავს მოიხმარს.

”ჩვენი კონკურსის ფინალში ამ ხუთი ავტომობილის მოხვედრა იმის ნათელი დასტურია, რომ საავტომობილო ინდუსტრია გარდამავალ ეტაპზეა. დიდი ხანი არ გასულა მას შემდეგ, რაც ელექტრომობილებს ალმაცერად უყურებდნენ, დღეს კი ბევრ ავტომწარმოებელს თავის საწარმოო პროგრამაში ელექტრომობილის შეტანა მთავარ მიზნად აქვს დასახული”, - ამბობს გამოცემა ”გრინ ქარ ჯორნელის” გამომცემელი რონ კოგანი.

მართალია, ”შევროლე ვოლტის” და ”ნისან ლიფის” გაყიდვები ჯერ არ დაწყებულა, მაგრამ კონკურსის პირობები მათ მონაწილეობის უფლებას აძლევს. კერძოდ, ამ პირობების მიხედვით, კონკურსში მონაწილეობისთვის ის ავტომობილები დაიშვება, რომელთა წარმოებაც საკონკურსო წლის (ამ შემთხვევაში, 2011 წლის) 1 იანვრამდე გამოვა ქარხნიდან. ცნობისათვის, ”ნისანმა” თავისი ელექტრომობილის წარმოება ახლახანს დაიწყო.

ცნობისათვის, წლევანდელი კონკურსის ჟიურიში საავტომობილო სამყაროს ისეთი ავტორიტეტები შეიყვანეს, როგორებიც არიან ”ღამის შოუს” წამყვანი და უნიკალური ავტომობილების კოლექციონერი ჯეი ლენო და ამერიკული აპორტული ავტომობილების გურუ ქეროლ შელბი.

Wednesday, October 20, 2010

პარიზში ელექტრომობილების გამქირავებელი ქსელი ამოქმედდება

20 ოქტომბერი

პარიზის ხელისუფლებას უახლოეს მომავალში ელექტრომობილების გაქირავების ქსელის ამოქმედება აქვს გადაწყვეტილი. უფრო მეტიც, ქალაქის მერმა ბერტრან დელანომ განაცხადა, რომ ასეთი ქსელი ელექტრომობილების გაქირავებას მერმისს, ივნისში დაიწყებს. მისივე თქმით, ასეთი ქსელი პარიზის მაცხოვრებლებს და სტუმრებს ბევრ სიკეთეს მოუტანს.
თავიდან ელექტრომობილების გაქირავება სატესტო რეჟიმში ამუშავდება, სექტემბრიდან კი ელექტრომობილების გაქირავება სრული მასშტაბით ამოქმედდება და შეკვეთების ყოველგვარი შეზღუდვის გარეშე შესრულებას შეუდგება. ელექტრომობილის დაქირავების მსურველს, შესაბამისი კომპანიის ანგარიშზე, ყოველთვიურად 15 ევროს გადახდა მოუწევს. ეს ერთგვარი წინასწარი შესატანი იქნება. გარდა ამისა, ელექტრომობილის ყოველი ნახევარი საათით გამოყენებისთვის, დამქირავებელს დამატებით 5 ევროს გადახდაც მოუწევს. დაკიდევ, კონტრაქტის გაფორმება შესაძლებელი იქნება როგორც ინტერნეტით, ასევე ქალაქის 700 ცალ ელექტროგასამართ სადგურზეც.
სხვათა შორის, პარიზში ველოსიპედების გაქირავების ქსელიც (ველიბ - ველოსიპედი თავისუფლად) მოქმედებს. ეს ბიზნესი წამგებიანი კია, მაგრამ ქალაქის ხელისუფლება მის გაუქმებას არ აპირებს. გარდა ამისა, პარიზში ჰიბრიდული და ჩვეულებრივი ავტომობილების გამქირავებელი პუნქტი ”აუტოლიბ-იც” მოქმედებს, რომელსაც ელექტრომობილების გაქირავებასაც ჩააბარებენ.

ინისათვის, რომ ელექტრომობილების დაქირავება მაქსიმალურად ბევრმა ადამიანმა ისურვოს, ქალაქის ხელისუფლება მათ პარკინგისთვის გარანტირებულ ადგილებს პიდება. ეს კი, მანქანებით გადატვირთულ ისეთ მეგაპოლისში, როგორიც პარიზია, უზარმაზარი შეღავათია. და, რაც ყველაზე მნიშვნელოვანია, ელექტრომობილით სარგებლობა საკუთარი ავტომობილის შენახვაზე გაცილებით იაფი დაჯდბა, რომ არაფერი ითქვას ტაქსით გადაადგილების სიძვირეზე.

გეგმის შესაბამისად, თავიდან პარიზის ქუჩებში 3 000 ცალი ელექტრომობილი გამოვა. ეს კი პარიზის ატმოსფეროს, ყოველწლიურად 20 000 ტონაზე მეტი ნახშირორჟანგისგან გაათავისუფლებს. რა თქმა უნდა, თუ პარიზის ხელისუფლების გეგმა გაამართლებს და ელექტრომობილების გაქირავებაც კომერციულად მომგებიანი იქნება, პარიზის მაგალითს მალე ბევრი მიმბაძველი გამოუჩნდება.

თუმცა, კრიტიკოსები ახლავე ლაპარაკობენ იმაზე, რომ ელექტრომობილების გაქირავება მომგებიანი ბიზნესი არ იქნება. მათი გათვლებით, პროექტი რენტაბელური რომ იყოს, 3 000 ელექტრომობილს დაახლოებით 220 000 დამქირავებელი უნდა გამოუჩნდეს. ეს კი ნიშნავს, რომ ყოველ ელექტრომობილზე 75 დამქირავებელი მოვა. ეს კი კრიტიკოსების აზრით, არარეალური შეფარდებაა, რადგან ჩვეულებრივი ავტომობილების გაქირავების ბიზნესში, ავტომობილისა და მისი დამქირავებლების ფარდობა საშუალოდ ათია. გარდა ამისა, არსებობს მოსაზრება, რომ გაქირავებისთვის შესაფერისი მონაცემების მქონე ელექტრომობილების საჭირო რაოდენობით შოვნა ჯერჯერობით არარეალურია...