Wednesday, September 30, 2009

”ფერარი P4/5 კომპეტიციონე” - გლიკენჰაუსი რბოლებმა გაიტაცა

Ferrari P4/5 Competizione In The Works?

30 სექტემბერი

მანქანა, რომლის სურათსაც აქ ხედავთ, რეალურად არ არსებობს. უფრო სწორედ, არსებობს, მაგრამ ამ ფერებში არა. ავტომოყვარულებს უთუოდ ემახსოვრებათ, რომ ოთხი წლის წინ, ამერიკელი კინოპროდიუსერისა და საფონდო ბირჟის მაგნატ ჯეიმს გლიკენჰაუსის შეკვეთით, იტალიურმა ატელიე ”პინინფარინამ”, ლეგენდარული ”ფერარი ენცოს” ბაზაზე, P4/5 შექმნა, რომელიც დღემდე, მთელს მსოფლიოში, ერთადერთი ეგზემპლარის სახით არსებობს.

გლიკენჰაუსის შეკვეთის მიზანი სწორედ ის იყო, რომ მის პატრონს ექსკლუზიური, მხოლოდ მისთვის შექმნილი სუპერ ავტომობილი ჰყოლოდა.

მაგრამ დღეს გლიკენჰაუსს ამ შესანიშნავი ავტომობილისთვის ახალი მისია დაუსახავს და თუ ჩანაფიქრი განახორციელა, მალე გამძლეობის რბოლებში (როგორიცაა კე მანის 24-საათიანი რბოლა), მისი გვარის მატარებელი გუნდი, სწორედ P4/5-ს ბაზაზე შექმნილი ”P4/5 კომპეტიციონეთი” იასპარეზებს.

და მაინც, ამ სურათზე მხოლოდ ფოტო ტისერია, რომელიც ცნობილ ჰოლანდიელ დიზაინერ მიშელ ვან დენ ბრინკს ეკუთვნის, რომელიც სერიული და მცირესერიული ავტომობილების ბაზაზე, ექსკლუზიური მოდელების შემუშავებაშია გაწაფული.

ვან დენ ბრინკის მიერ შექმნილი ტისერი რეალურად, მხოლოდ ფერშეცვლილი P4/5-ის. ის კეგენდარულ გუნდ ”ნორთ ამერიკენ რეისინგ ტიმის” (NART) ფერებშია გამოწყობილი. ეს გუნდი ცნობილია, როგორც აშშ-ის გამძლეობის რბოლებში ”ფერარის” ავტომობილების მომხმარებელი. NART-ი ჩრდილოამერიკულ რბოლებში 1958-1982 წლებში, მხოლოდ ”ფერარის” ავტომობილებით მონაწილეობდა.

როგორი გაგრძელება ექნება გლიკენჰაუსის ახალ იდეას, ჯერ არავინ იცის. თუმცა, თუ გავითვალისწინებთ, რომ ამ კაცს ყველაფერი გამოსდის, შეიძლება ვივარაუდოთ, რომ მალე, მისი სარბოლი გუნდის ავტომობილები სებრინგის, კაგუნა სეკას, დეიტონას, ან თუნდაც სარტეს ტრასებზე გამოჩნდება.

”იაგუარი” ხუთკარიან კუპეს ამზადებს

Jaguar Planning Five-Door Coupe

30 სექტემბერი

ხუთკარიანი კუპეებით გატაცების საქმეში, ”ბეემვეს” და ”აუდის” მიმბაძველი უკვე გამოუჩნდათ და როგორც ჩანს, ეს ახალი საავტომობილო კლასი მალე ძალიან პოპულარული გახდება.

ინტერნეტით გავრცელდა ინფორმაცია, რომლის თანახმადაც, სპორტული ჰეჩბეკის შესაქმნელად ”იაგუარი” მუშაობს. ინგლისური კომპანიის ახალი ავტომობილი ექვსი წლის წინანდელ კონცეპტუალურ RD6-ის (სურათზე) ბაზაზე მუშავდება და ის ამ ეტაპზე, შიდასაქარხნო კოდური სახელწოდებით - RD7 არის ცნობილი.

RD6 საინტერესო კონცეპცია იყო. ჯერ ერთი, მას არ ჰქონდა შუა საყრდენი, ერთ მხარეს მოთავსებული კარები კი სხვადასხვა მხარეს იღებოდა (ეგრეთ წოდებული თვითმკვლელი კარები - როგორც როლს როის ფანტომზე). და რაც მთავარია, უკანა ნაწილის დიზაინით, ის ახლანდელ ”ვოლვო C30-ს” ჰგავდა (ვოლვომ ამ ავტომობილის გამოშვება სამი წლის წინ დაიწყო). შეგახსენებთ, რომ არცთუ დიდი ხნის წინ, ორივე კომპანია ”ფორდის” ჯგუფში შედიოდა. მაგრამ დღეს ”იაგუარი” უკვე გაყიდულია, ”ვოლვოს” კი დირბორნელები ალბათ წლის ბოლომდე შეელევიან.

ჯერჯერობით ამაზე ზუსტი ინფორმაცია არ არსებობს, მაგრამ მოსალოდნელია, რომ RD6-ის ”იაგუარი” თავისი უახლესი სედანის - XF-ს დამოკლებულ ვარიანტს გამოიყენებს. სამაგიეროდ, ახალ ავტომობილზე XF-ის ყველა აგრეგატი გადმოინაცვლებს.

მართალია, RD7 შემუშავების სტადიაშია, მაგრამ მასზე ადრე ”იაგუარი” XE-ს გამოუშვებს, რომელლის გაყიდვების დაწყებაც 2013 წლიდან იგეგმება. ეს ავტომობილი კონცეპტუალურ როდსტერ F-ტაიპის ბაზაზე აიგება და ის როგორც კუპეს, ასევე როდსტერის (კონცეპტუალური ავტომობილი როდსტერი იყო) ძარით დამზადდება.

სავარაუდოდ, ”იაგუარი” RD7-ს წარმოებას 2014 წელს დაიწყებს.

Tuesday, September 29, 2009

”რენოს” ოთხი ელექტრონული ”მუშკეტერი”

Renault in Frankfurt

29 სექტემბერი

რენოს ელექტრომობილები
...................................................
ფრანკფურტში ახლახანს დასრულებულ საავტომობილო შოუზე ელექტრომობილებით ვერავის გააკვირვებდი - ყველა დიდი კომპანია ავტოინდუსტრიაში მოსალოდნელი დიდი შემობრუნებისთვის ემზადება. ამ მზადების მთავარი მიზანი კი ენერგიის ალტერნატიულ წყაროზე მომუშავე ავტომობილების წარმოების ათვისებაა.
რენო ტვიზი Z.E.
...................................................
ელექტრომობილებისწარმოებისთვის მზადების საქმეში ერთ-ერთი მოწინავე ”რენო” და მისი იაპონელი პარტნიორი ”ნისანია”, რომლებიც საერთაშორისო პროექტ ”ბეტერ პლეისის” ფარგლებში, ერთდროულად, რამდენიმე ელექტრომობილის პროექტს ამუშავებენ. და აი, ფრანკფურტში ფრანგულმა კომპანიამ ოთხი ასეთი ავტომობილის პროტოტიპი წარმოადგინა, ავტომობილებისა, რომელთა სერიული წარმოების დაწყებაც 2011 წლიდან იგეგმება.
რენო ზოე Z.E.
................................................

ამ ოთხეულში ყველანაირი ზომისა და გემოვნების შესაფერის ავტომობილს ნახავთ. მათ შორის ყველაზე პატარა ორადგილიანია, სახელად ”ტვიზი Z.E.”, მეორეა სუბკომპაქტური ფსევდოკუპე ”ზოე Z.E.”. დანარჩენი ორი კი სერიული ავტომობილების - ფურგონ ”კანგუსა” და სედან ”ფლუენსის” პლატფორმაზეა ბაზირებული.

”ტვიზი Z.E.” კიდევ უფრო მოკლეა (2.30 მეტრი), ვიდრე ”პეჟოს” კონცეპტუალური BB1, რომლის პირველად ნახვა ასევე ფრანკფურტში იყო შესაძლებელი, მისი სიგანე კი მეტრზე ოდნავ მეტია (1.13 მეტრი). ავტომობილი ორადგილიანია და მასში მგზავრის სავარძელი მძღოლის სავარძლის უკანაა მოთავსებული. მწარმოებლის მიერ მოწოდებული ინფორმაციით, ამ ჯუჯას მხოლოდ 60 ლიტრი მოცულობის ნვირთის გადატანა შეუძლია.

რენო კანგუ Z.E.
................................................
ავტომობილი 20-ცხენისძალიანი (მისი მაქსიმალური მაბრუნი მომენტი 70 ნიუტონმეტრია) ელექტროძრავითაა აღჭურვილი, რომელსაც ენერგიით ლითიუმ-იონური აკუმულატორების ბლოკი კვებავს. მათი ტევადობა კი საკმარისია იმისათვის, რომ ავანგარდული გარეგნობის მქონე ”ტვიზიმ” გაუჩერებლად 100 კილომეტრი განვლოს. ავტომობილის მაქსიმალური სიჩქარე 75 კმ/სთ-ია. საყოფაცხოვრებო ელექტროქსელიდან აკუმულატორების სრული დამუხტვისთვის კი დაახლოებით სამსაათნახევარია საჭირო.

რენო ფლუენს Z.E.

.................................................

დანარჩენი სამი ელექტრომობილი ერთი და იგივე აგრეგატითაა აღჭურვილი. ესაა 95-ცხენისძალიანი (და 226-ნიუტონმეტრიანი) ელექტროძრავი, რომელიც ელექტროენერგიას ასევე ლითიუმ-იონური აკუმულატორების ბლოკისგან (უფრო დიდი ტევადობის, ვიდრე ”ნვიზისაა”) ღებულობს. ამ ბლოკის ტევადობა კი საკმარისია იმისათვის, რომ ”ზოე-მ”, ”კანგუმ” და ”ფლუენსმა” 160 კილომეტრი განვლონ. აკუმულატორების სრული დამუხტვისთვის კი 4-8 საათია საჭირო.

რაც მთავარია, ყველა ავტომობილი, აკუმულატორების სწრაფად შეცვლის სისტემითაა აღჭურვილი, რომელიც ბლოკის სულ რაღაც სამ წუთში შეცვლის საშუალებას იძლევა. ეს სისტემა პროექტ ”ბეტერ პლეისის” ფარგლებში შემუშავდა და მისი მთავარი მიზანი ისაა, რომ ელექტრომობილების ღირებულება მნიშვნელოვნად შემცირდეს - ავტომობილების ღირებულებაში ძვირადღირებული აკუმულატორების ფასი აღარ შევა. სამაგიეროდ, ამ ფასს ენერგიის შევსების, უფრო სწორედ კი, დასამუხტ სადგურებზე განმუხტულის ნაცვლად დამუხტული აკუმულატორების დაყენებისას, ენერგიის საფასურის აღებისას გაითვალისწინებენ.

Saturday, September 26, 2009

”პეჟო BB1” – ”ფრანგული ლომების” კონცეპტუალური კვადროციკლი

Peugeot BB1 Concept

25 სექტემბერი

ფრანგულმა კომპანიამ ფრანკფურტის ავტო შოუს დამთვალიერებლებს საკმაოდ ორიგინალური, უცნაური და ძალიან საინტერესო კონცეპტუალური ნამუშევარი - BB1 წარუდგინა. ერთი შეხედვით, ეს ავტომობილია, მაგრამ სალონში თუ შეიხედავთ, კვადროციკლი გაგახსენდებათ, რადგან იქ დაახლოებით ისეთსავე (უფრო მოსახერხებელსა და დახვეწილს) საჭეს დაინახავთ, როგორიც კვადროციკლებზე გინახავთ. ისე, ეს მოწყობილობა რაღაცით თვითმფრინავის საჭესაც ჰგავს.

თუმცა, BB1 ავტომობილია, კვადროციკლი, თუ არამფრენი თვითმფრინავის მსგავსი მუტანტი, ეს მეორეხარისხოვანია. მთავარი კი ისაა, რომ ის გარემოსადმი მეგობრული პატარა მხეცია (პეჟოს ემბლემა ხომ უნდა გაამართლოს?), რომელიც მოძრაობაში ელექტროძრავს მოჰყავს.

ოღონდ, სანამ ამ ბოკვერის ტექნიკურ შესაძლებლობებზე მოგიყვებით, ორიოდე სიტყვით მის გაბარიტებსა და შეთანწყობაზე შევჩერდებით. ავტომობილის სიგრძე სულ რაღაც 2.5 მეტრია. სალონში ბარგის გადასატანად მოკრძალებული ადგილია (160 ლიტრი), მაგრამ თუ ოთხიდან სამ სავარძელს (უფრო დასაჯდომ ადგილს, რადგან მათზე სავარძელს უნამუსო მატყუარაც ვერ იტყვის) დაკეცავთ, მაშინ ბარგისთვის გამოთავისუფლებული ადგილის მოცულობა 855 ლიტრს მიაღწევს. ეს კი ზოგი უნივერსალისთვისაც კარგი მაჩვენებელი იქნებოდა.
სალონში დასაჯდომები ტანდემებადაა განლაგებული - უკანა მარცხენა მგზავრის სკამი მძღოლისასთანაა შეწყვილებული, უკანა მარჯვენასი კი, შესაბამისად, წინა მგზავრის სკამთან. ისეთი შთაბეჭდილება იქმნება, თითქოს BB1-ს შესაქმნელად, ინჟინრებმა ორი ბაიკი შეაწყვილეს. მძღოლის განკარგულებაში კი მხოლოდ საჭეა, რომელზეც მართვის ყველა საშუალებაა განლაგებული, მათ შორის ისინიც, რომლებიც ჩვეულებრივ ავტომობილებში სატერფულების სახით გვხვდება.

ახლა ძრავზეც ვილაპარაკოთ: ავტომობილი, რომელიც 600 კილოგრამს იწონის, მოძრაობაში ორ პატარა ელექტროძრავს მოჰყავს, რომელთა სიმძლავრეც სულ რაღაც 7.5-7.5 კილოვატია (10-10 ცხენის ძალა). შესაბამისად, ამ ავტო-კვადროციკლ-მობილს ძალიან მოკრძალებული დინამიკური მაჩვენებლები აქვს - ადგილიდან 30 კმ/სთ-ს აკრეფას 2.8 წამს ანდომებს, 30-დან 60 კმ/სთ-მდე კი 4.0 წამი სჭირდება.

ელექტროძრავებს ენერგიით ლითიუმ-იონური კომპაქტური აკუმულატორების ბლოკი ამარაგებს, რომელთა ტევადობაც საკმარისია იმისათვის, რომ ”პეჟო BB1-მა” შეუჩერებლად 120 კილომეტრი გაგატაროთ. ქალაქში მოძრაობისას, ეს საკმარისზე გაცილებით მეტია, ქალაქგარეთ მოძრაობისთვის კი ეს ჯუჯა ნაკლებად მიმზიდველად მოჩანს.

აკუმულატორებში დაგროვილი ენერგია უფრო მცირე სვლის მარაგისთვის იქნებოდა საკმარისი, რომ არა მზის ელემენტები, რომლებიც ავტომობილის სახურავზეა დამონტაჟებული. ამ ელემენტების მიერ გამომუშავებული ენერგია, რომელიც ძირითადად ავტომობილის დამხმარე ელექტრომოწყობილობათა კვებისთვის გამოიყენება, სრულად დამუხტულ აკუმულატორებში დაგროვილი ენერგიის დაახლოებით 16 პროცენტს შეადგენს.

აპირებს თუ არა ”პეჟო” ამ ავტომობილსი სერიულ წარმოებას, ამის შესახებ ფრანკფურტში არაფერი თქმულა. სავარაუდოდ, BB1 კონცეპტუალურ ეგზემპლარად დარჩება, თუმცა მასში გამოყენებულ ტექნოლოგიებს მალე ალბათ სხვა სერიულ ავტომობილებში შევხვდებით.

Wednesday, September 23, 2009

ფრანკფურტის ავტო შოუ

მელკუს RS2000

Melkus RS2000

23 სექტემბერი

პეტერ მელკუსი და მისი შედევრი

ფრანკფურტში მიმდინარე საავტომობილო გამოფენაზე, რამდენიმე ძველი პოპულარული ავტომობილის გაცოცხლებული ვარიანტის ხილვა შეიძლება, რომელთაგან ორი გერმანულია - ”ტრაბანტი”, რომელიც უკვე გაგაცანით და ”მელკუსი”. ორივე ავტომობილს ადრე გერმანიის დემოკრატიულ რესპუბლიკაში (გდრ-ში) უშვებდნენ და თუ პირველი მასობრივად იწარმოებოდა, მეორეს შესახებ შეიძლება ბევრმა არც არაფერი იცოდეს.

ეს კომპანია თავის დროზე ცნობილმა ავტომრბოლმა და ავტოინჟინერმა ჰაინც მელკუსმა1959 წელს ჩამოაყალიბა (წარმოგიდგენიათ, კომუნისტების დროს). კომპანიამ 1986 წლამდე იარსება და ამ ხნის განმავლობაში, საგზაო სპორტული ავტომობილების (RS1000) გარდა, სხვადასხვა კლასის სარბოლ ტექნიკასაც უშვებდა. კომპანიის დამაარსებელი RS1000-ის შემცვლელის შექმნაზეც ოცნებობდა, მაგრამ თავად ამ ოცნების განხორციელებას ვერ მოესწრო.

2006 წელს, მისმა შვილმა პეტერ მელკუსმა სახელოვანი მამის საპატივცემულოდ, კომპანია აღადგინა და RS2000-ის შექმნაზე დაიწყო მუშაობა. უსახსრობის გამო, ახალი ავტომობილის შემუშავების პროცესი სამი წელი გაიწელა. და აი, ფრანკფურტში ისიც გამოჩნდა.

კომპანიის შეფი ამას ხმამაღლა არ აღიარებს, მაგრამ RS2000-ს მიზანში ”მერსედეს-ბენცის” უახლესი SLS AMG ჰყავს ამოღებული, რომლის მსოფლიო პრემიერაც ასევე ფრანკფურტში შედგა. ამასთან, თავის ”მეტოქეს” ეგრეთ წოდებული ”თოლიის ფრთებითაც” (კარებებით, რომლებიც ზევით იღება) ჰგავს. თავისი ავტომობილის ექსკლუზიურობისთვის ხაზის გასასმელად კი პეტერმა წარმოების ტირაჟი ძლიერ შეზღუდა - წელიწადში ის მხოლოდ 25 ცალი RS2000-ის წარმოებას გეგმავს, თითოეულ ავტომობილს კი ფასად 107 000 ევრო დაადო.

რას სთავაზობს მყიდველს სანაცვლოდ? ორადგილიან ავტომობილს, რომელიც ”ლოტუს ელისის” პლატფორმაზეა დამზადებული და რომელიც 1.8-ლიტრიანი 16-სარქველიანი, 4-ცილინდრიანი ძრავითაა აღჭურვილი. ეს ძრავი სულ რაღაც 270 ცხენის ძალას გამოიმუშავებს, თუმცა ესეც საკმარისია იმისათვის, რომ 950-კილოგრამიანი ავტომობილი ადგილიდან 100 კმ/სთ-მდე 4.9 წამში გაქანდეს. ამასთან, RS2000-ის მაქსიმალური სიჩქარე 250 კმ/სთ-ს აღწევს.

მართალია, შასი ”ლოტუსისგანაა” აღებული, მაგრამ მისი საკიდარი პეტერ მელკუსის ჭკუის ნაყოფია. მისი ელემენტები კი ალუმინის შენადნობებისგანაა დამზადებული. ავტომობილს კარბონის კომპოზიტისგან შექმნილი მონკოოკური არქიტექტურა გააჩნია, რაც მის სიხისტეს მნიშვნელოვნად აუმჯობესებს. კარბონისგანვეა დამზადებული მისი დამცავი სტრუქტურა, რომელმაც სალონში მყოფნი ავარიების დროს უნდა დაიცვას.

ჰო, მართლა, RS2000-ის დიზაინი სებასტიან ვოლფრამის მიერაა შემუშავებული, რომელმაც შთაგონების წყაროდ ჰაინც მელკუსის RS1000 გამოიყენა. დაბოლოს სალონი. ის მთლიანად მყიდველის სურვილების შესაბამისად გაეწყობა და მის სტანდარტულ აღჭურვაში ლუქსის კლასის ავტომობილებისთვის დამახასიათებელი ბევრი დეტალია გათვალისწინებული.

Tuesday, September 22, 2009

ფრანკფურტის ავტო შოუ

”ოპელი” ფრანკფურტში

Opel Astra, Ampera

22 სექტემბერი

ოპელ ამპერა
ოპელ ასტრა

”ოპელის” გაყოფის საგა პრაქტიკულად დასრულებულია. თუ რაიმე განსაკუთრებული არ მოხდა, ის მალე კანადური ”მაგნა ინტერნეიშნლისა” და რუსული ”სბერბანკის” საკუთრებაში გადავა. მიუხედავად იმისა, რომ ”ჯენერალ მოტორსს” გერმანულ კომპანიაში ამ ორივეზე (ცალ-ცალკე აღებულზე) მეტი წილი რჩება (35 პროცენტი 25-25-ის წინააღმდეგ), მაინც შეიძლება ითქვას, რომ ”ოპელს” ამიერიდან რუსულ-კანადური ალიანსი გააკონტროლებს, რომელიც თავისუფლად შეიძლება ჩაითვალოს მარტო რუსულად, რადგან რუსებს ”მაგნაშიც” სოლიდური წილი ეკუთვნით.

მოკლედ, ამ გაუგებარი კუთვნილების (რამდენადაც მისი ქარხნების უმეტესობა გერმანიაში მდებარეობს, ისევ გერმანული ვუწოდოთ) კომპანიამ ფრანკფურტის ავტო გამოფენაზე ორი ავტომობილი წარადგინა - ბესტსელერ ჰეჩბეკ ”ასტრას” ახალი მოდელი და ჯერაც კონცეპტუალური ჰიბრიდული ”ამპერა”, რომელიც ფაქტობრივად, ”შევროლე ვოლტის” გერმანული გადამღერებაა.

მწარმოებლის განცხადებით, ახალი ”ასტრა” ყველაზე აგრესიული გარეგნობით გამოირჩევა, როგორიც კი ოდესმე ყოფილა, მისი დიზაინი უფრო დიდი ზომის ”ინსინიასგან” მიღებული შთაგონებითაა შემუშავებული. ”ინსინიას” მსგავსად, ახალი ”ასტრას” გარეგნოობაშიც ბევრგან შეხვდებით ბუმერანგის მოყვანილობის ელემენტებს. ეს კი თანდათან ”ოპელის” მეორე საფირმო ნიშანი, კორპორატიული სტილი ხდება.

ახალ ასტრაზე ბევრი ტექნოლოგიური სიახლეა გამოყენებული. ბევრი მათგანი ”ოპელმა” ჯერ კიდევ ”ინსინიასთვის” შეიმუშავა, ახლა კი მათ ”ასტრაზეც” გადმოინაცვლეს. და მაინც, გერმანული კომპანია გვპირდება, რომ ”ასტრა” თავის მთავარ მეტოქეზე - ”ფოლკსვაგენ გოლფზე” იაფი ეღირება. ვნახოთ, ამას მაშინ გავიგებთ, როდესაც მისი გაყიდვები თბილისშიც (სავარაუდოდ, ეს იანვრის მე-2-3 კვირაში მოხდება) დაიწყება.

ახალი ”ასტრასთვის” ძრავების ფართო არჩევანია გათვალისწინებული. ამ მხრივ, სიახლეა 1.4 და 1.6-ლიტრიანი ბენზინის ტურბოძრავები. ჰეჩბეკის საბაზო ვერსია კი ბენზინის 1.4-ლიტრიანი ატმოსფერული ძრავითაა აღჭურვილი, რომელიც მსგავსი ლიტრაჟის ახლანდელ ძრავზე დაახლოებით 8 პროცენტით უფრო ეკონომიურია. ძრავების გამაში ასევე დიზელის რამდენიმე (1.3, 1.7 და 2.0-ლიტრიანი), ასევე ”ეკოფლექს” კონფიგურაციის ძრავი შედის.

რაც შეეხება ამპერას, ის ამჟამად ინტენსიური ტესტირების ფაზაში იმყოფება და ფრანკფურტში ”გზად შეიარა”. ვისაც ამ ავტომობილის შესახებ ჩვენთან ინფორმაცია ჯერ არ წაუკითხავს, ვეტყვით, რომ მართალია, ეს ავტომობილი ჰიბრიდების კლასს განეკუთვნება, მაგრამ მისი ძირითად მამოძრავებელი მაინც ელექტროძრავია, რომელსაც ლითიუმ-იონური აკუმულატორებში დაგროვებული ელექტროენერგიით 50 კილომეტრის გავლა შეუძლია, მაგრამ მას შემდეგ, რაც საქმეში შიდაწვისძრავი და მასთან დაკავშირებული გენერატორი ჩაერთვება, სვლის სიშორე 500 კილომეტრს აღწევს.

”ამპერას” ელექტროძრავი 150 ცხენის ძალასა და 370 ნიუტონმეტრს გამოიმუშავებს და მისი მეშვეობით, ავტომობილის მაქსიმალური სიჩქარე 161 კმ/სთ-ს აღწევს, ადგილიდან 100 კმ/სთ სიჩქარის აკრეფა კი მას 9 წამში შეუძლია.

ოპელი ამ ავტომობილის წარმოების დაწყებას 2011 წელს გეგმავს.

Monday, September 21, 2009

ფრანკფურტის ავტო შოუ

”მერსედეს-ბენცი” ელექტრონულ SLS AMG-ს გამოუშვებს

Electric Mercedes-Benz SLS AMG

21 სექტემბერი

ფრანკფურტში მიმდინარე საავტომობილო შოუზე, ”მერსედეს-ბენცს” მთელი პავილიონი აქვს დაქირავებული, სადაც ეგრეთ წოდებული ”მწვანე ავტომობილები” დომინირებენ. თუმცა, ”სამქიმიანთა” ექსპოზიციის ყველაზე გამორჩეული ვარსკვლავი მაინც შიდაწვისძრავიანი სუპერავტომობილი SLS AMG-ა, რომელიც ყველაზე მეტ დამთვალიერებელს იზიდავს. მის გვერდით კი შტუტგარტელებმა იმავე სახელწოდების მქონე ელექტრომობილი გამოფინეს, რომელიც ელექტროძრავების მეშვეობით გადაადგილდება.

ელექტრომობილიც SLS AMG-ის პლატფორმაზეა ბაზირებული, ოღონდ 571-ცხენისძალიანი შიდაწვის ძრავის ნაცვლად, ოთხივე ბორბლის სიახლოვეს განლაგებული ოთხი ელექტროძრავი აქვს, რომელთა ჯამური სიმძლავრეც 525 ცხენის ძალას აღწევს, მათ მიერ გამომუშავებულ მაბრუნ მომენტს კი ცოტა უკლია 1 000 ნიუტონმეტრამდე.

ავტომობილს არ აქვს ჩვეულებრივი გადაცემათა კოლოფი. თითოეულ ღერძს თითო სატრანსმისიო კვანძი ემსახურება, რომლებიც ძრავების მიერ გამომუშავებულ მაბრუნ მომენტს საჭიროების შესაბამისად ანაწილებენ. ალბათ, არ გაგიკვირდებათ, თუ გეტყვით, რომ ელექტრული SLS AMG სრულამძრავიანი ავტომობილია.

”SLS AMG-ის ელექტრული ვარიანტით, ჩვენ სუპერ სპორტულ ავტომობილის კლასს ფაქტობრივად ახალ განსაზღვრებას მივანიჭებთ. ჩვენთვის ეს მხოლოდ ბაზრის მოთხოვნებისადმი პასუხი არაა. უბრალოდ, საქმეს ამჯერადაც ისე ვეკიდებით, როგორც ყოველთვის - ჩვენი პროდუქტი ჩვენსავე მარკის იმიჯს სრულად უნდა შეესაბამებოდეს”, - პრესკონფერენციაზე გამოაცხადა ”მერსედეს-AMG-ს” მთავარმა აღმასრულებელმა ფოლკერ მორნჰინვეგმა.

ელექტრომობილ SLS AMG-ს დინამიკური მონაცემები ახლოსაა შიდაწვისძრავიანისასთან. მაგალითად, 0-100 კმ/სთ-მდე ასაჩქარებლად, მას 4.0 წამი დასჭირდბა, სულ რაღაც 0.2 წამით მეტი, ვიდრე V8 ძრავით აღჭურვილს.

წონის განაწილების მხრივ, ელექტრომობილი გაცილებით უკეთესია, რადგან მასში აკუმულატორების ბლოკი (48 კილოვატსაათი ტევადობით) სატრანსმისიო გვირაბში თავსდება. რა თქმა უნდა, კაპოტისქვეშა სივრცეში ვეღარ ნახავთ უზარმაზარ ძრავს, რომლის ადგილზეც, სხვადასხვა ეკექტრონული მოწყობილობაა თავმოყრილი. მთავარი ისაა, რომ ავტომობილის პლატფორმას მცირე სტრუქტურული მოდიფიკაციაც კი არ დასჭირდა. ამასთან, ავტომობილს ძალიან დაბლა განლაგებული სიმძიმის ცენტრი აქვს, რაც მის მანევრულობას მნიშვნელოვნად გააუმჯობესებს.

მართალია, შტუტგარტულ კომპანიას არ გამოუქვეყნებია ელექტრომობილის ზოგიერთი ძირითად პარამეტრი, როგორებიცაა აკუმულატორების დამუხტვის დრო და ავტომობილის სვლის სიშორე, მაგრამ სამაგიეროდ, დაადასტურა, რომ მისი წარმოების დაწყება 2013 წელს იგეგმება.

ფრანკფურტის ავტო შოუ

გაცოცხლებული ”ტრაბანტი” ფრანკფურტში

Trabant

21 სექტემბერი

როგორც მოსალოდნელი იყო, მასშტაბური მოდლების მწარმოებელმა გერმანულმა კომპანია ”ჰერპამ” ფრანკფურტის საავტომობილო გამოფენაზე თავისი კონცეპტუალური ავტომობილი წარადგინა, რომელსაც აღმოსავლეთ გერმანიის ერთ-ერთი სიმბოლოს - ”ტრაბანტის” სახელი აქვს.

კონცეპტუალური ”ტრაბანტის” შექმნაზე, ”ჰერპას” გარდა, მისი პარტნიორის, საავტომობილო ძარების მწარმოებელი კომპანია ”ინდიკარის” სპეციალისტებიც მუშაობდნენ. ისინი ირწმუნებიან, რომ განახლებულ ”ტრაბანტს”, რომელსაც სახელად nT შეარქვეს (იქნებ, წარმოების დაწყებამდე შეუცვალონ), 2012 წელს გამოუშვებენ.

წინამორბედთან შედარებით, ახალი ”ტრაბი” გაბარიტებში გაზრდილია. მისი სიგრძე 3.95 მ, სიგანე 1.69 მ, სიმაღლე 1.5 მეტრი, ბაზა კი 2.45 მეტრია. ავტომობილი ხუთადგილიანია და ის მოძრაობაში 63-ცხენისძალიან ელექტროძრავს მოჰყავს, რომელიც ენერგიას ლითიუმ-იონური აკუმულატორების ბლოკისგან ღებულობს.

აკუმულატორების ტევადობა საკმარისია იმისათვის, რომ ერთი სრული დამუხტვით, მათ ”ტრაბი” 160 კილომეტრზე გაატარონ. ჩვეულებრივი საყოფაცხოვრებო (230-ვოლტიანი) ქსელიდან აკუმულატორების სრულად დასამუხტად, დაახლოებით რვა საათია საჭირო, მაგრამ თუ პლაგ-ინ სისტემას 380-ვოლტიან ქსელს მივუერთებთ, დამუხტვას ორი საათიც ეყოფა. გარდა ამისა, ავტომობილის სახურავზე მზის ელემენტებია დამონტაჟებული, რომლიდან მიღებული ელექტროენერგიაც ”ტრაბანტის” დამხმარე ელექტროხელსაწყოების კვებას ხმარდება. დაბოლოს, განახლებული ”ტრაბანტის” მაქსიმალური სიჩქარე სულ რაღაც 130 კმ/სთ-ია.

ცნობისათვის, ამ ავტომობილის პირველი მასშტაბური მოდელი (1:87 მასშტაბში) ”ჰერპამ” ფრანკფურტშივე, ორი წლის წინ წარადგინა. იქვე მიღებულ გამოხმაურებათა გამო კი მისი სერიულად წარმოება გადაწყდა.

სავარაუდოდ, ელექტრომობილი ”ტრაბანტ nT” ევროპულ ბაზარზე 10 000 ევრო ეღირება.

Friday, September 18, 2009

ფრანკფურტის ავტო შოუ

ასტონ მარტინ რეპიდი

Aston Martin Rapide

18 სექტემბერი

ჯეიმს ბონდი შეიძლება მალე ოთხკარიანი ”ასტონ მარტინის” საჭეს მიუჯდეს. ყოველ შემთხვევაში, ინგლისურმა კომპანიამ ასეთი ავტომობილი, სახელად ”რეპიდი”, რომელსაც ავტოსამყარო უკვე სამი წელია მოუთმენლად ელოდა, ფრანკფურტის საავტომობილო შოუზე, წარმოებისთვის გამზადებული სახით წარადგინა.

”რეპიდი”, რომელსაც ბევრი ”ასტონ მარტინის” პირველ ხუთკარიან ჰეჩბეკსაც კი უწოდებს (და ამით მას გარკვეულწილად ამცირებს), მთელს მსოფლიოში, ”ასტონ მარტინის” 125 სადილერო პუნქტში, მერმისიდან გაიყიდება. მოსალოდნელია, რომ თავისი ახალი სუპერავტომობილის ფასებს ინგლისური კომპანია ფრანკფურტის” შოუზევე, მის დასრულებამდე გამოაცხადებს.

”ეს ავტომობილი ”ასტონ მარტინის” სპორტული მოდელების გამის გვირგვინია, მანქანა, რომელიც ჩვენი მარკის დიდებულებას სრულად წარმოადგენს. ამიერიდან, ყველანაირი გემოვნების და სხვადასხვა დანიშნულების ავტომობილებს ვაწარმოებთ და ამით ვამაყობთ. ”რეპიდით” მთელ ოჯახს ერთად მგზავრობა შეუძლია. სალონში კი მათ ძალიან კომფორტული და სასიამოვნო გარემო დახვდებათ”, - ამბობს ”ასტონ მარტინის” მთავარი აღმასრულებელი ულრიხ ბეცი.

ავტომობილი ”ასტონ მარტინისთვის” ჩვეული, ძალიან დახვეწილი დიზაინით გამოირჩევა, რომელსაც ხაზგასმული სპორტული სტილი აქვს. მის სპორტულობას კი განსაკუთრებით მშვილდის მოყვანილობის სახურავი უსვამს ხაზს. გრძელი კაპოტი, მასიური სამივე (განსაკუთრებით შუა და უკანა) საყრდენი და რა თქმა უნდა, ”ასტონებისთვის” დამახასიათებელი მოყვანილობის რადიატორის ბადე - ეს ყველაფერი ინგლისური მარკის ავტომობილებისთვის დამახასიათებელი თვისებებია.

შიგნიდან ”რეპიდი” ისეთივე დიდებულია, როგორიც გარედან. სალონის გასაწყობად, ძირითადად თეთრი (უფრო თეთრი ქვიშისფერი) ძვირფასი ტყავითაა გაწყობილი, რასაც ცენტრალური კონსოლის ქვედა ნაწილის გასაფორმებლად გამოყენებული ირიდიუმის ფერის დეტალები და კონსოლისვე ზედა ნაწილში ძვირფასი ხის ფერის პანელები შესანიშნავად უხამდება. სალონში ყველაფერს (საჭის და სატერფულების გარდა) ელექტრონიკა მართავს. ცენტრალური გვირაბი (კარდანს ამხელა ნამდვილად არ სჭირდება) კი ერთმანეთის გვერდზე მდგარ სავარძლებს ისე აცალკევებს, მათში ჯდომისას, თავს სარბოლი ბოლიდის კოკპიტში წარმოიდგენ. ოღონდ, უკანა ორი სავარძლის მგზავრებს ამაში ის მონიტორები ”შეუშლის” ხელს, რომლებიც წინა სავარძლების უკანა ნაწილშია ჩამონტაჟებული და რომლებზეც სხვადასხვა გასართობი პროგრამის ხილვა შეიძლება.

ჩავიხედეთ კაპოტის ქვეშ. იქ 6.0-ლიტრიან V12 მონსტრს ვნახავთ, რომელიც 470 ცხენის ძალას (6 000 ბრ/წთ-ზე) და 600 ნიუტონმეტრს (5 000 ბრ/წთ-ზე) გამოიმუშავებს. ძრავთან კარდანის ლილვით დაკავშირებულია 6-საფეხურიანი კოლოფი (ტაჩტრონიკ 2), რომელშიც საფეხურებს ელექტრონული სისტემა ცვლის. ალბათ ადვილად მიხვდით, რომ რამდენადაც ძრავს კარდანით უკავშირდება, ესე იგი, კოლოფი უკანა ღერძთან უნდა იყოს განლაგებული. ეს მოსახერხებელია იმით, რომ ღერძებზე ავტომობილის წონა მაქსიმალურად თანაბრად განაწილდეს. ამ ტანდემის მეშვეობით, ავტომობილი ადგილიდან 100 კმ/სთ სიჩქარის აკრეფას 5.1 წამში ასწრებს, მისი მაქსიმალური სიჩქარე კი 303 კმ/სთ-ია.

ასეთი ტემპერამენტის ათვისებაში ავტომობილს იაპონური ”ბრიჯსტოუნის” მარკა ”პოტენცას” საბურავები ეხმარება, რომლებიც 20-დუიმიან ბორბლებზეა ჩაცმული. თავად საბურავებს კი შემდეგი ზომები აქვს: 245/40 R20 წინებს, 295/35 R20 - უკანებს. გარდა ამისა, ავტომობილი უამრავი დამხმარე სისტემითაცაა აღჭურვილი.

Thursday, September 17, 2009

ფრანკფურტის ავტო შოუ

e-ტრონი - ”აუდი” ელექტრონული სუპერავტომობილი

Audi e-tron

17 სექტემბერი

ფრანკფურტის საავტომობილო შოუზე, გერმანულმა კომპანია ”აუდიმ” თავის სუპერავომობილ R8-ს ბაზაზე დამზადებული კონცეპტუალური ელექტრონული სუპერავტომობილი e-ტრონი წარადგინა.

ეს ავტომობილი იმითაა გამორჩეული, რომ მას ყოველ ბორბალში ელექტროძრავი აქვს ჩამონტაჟებული, რომელთა ჯამური სიმძლავრეც 313 ცხენის ძალას, მაქსიმალური მაბრუნი მომენტი კი, როგორც ”აუდის” პრესრელიზი გვამცნობს (თუ შეცდომა არაა) 4 500 ნიუტონმეტრს (!!!) აღწევს.

ავტომობილი, რომელიც სრულამძრავიანად შეიძლება ჩაითვალოს, ლითიუმ-იონური აკუმულატორებითაა აღჭურვილი, რომლებში დაგროვილი ელექტროენერგიაც საკმარისია იმისათვის, რომ e-ტრონმა შეუფერხებლად 248 კილომეტრი გაიაროს.

გერმანული კომპანიის იმავე რელიზში მითითებულია, რომ ამ სპორტულ ელექტრომობილს ადგილიდან 100 კმ/სთ სიჩქარის აკრეფა 4.8 წამში შეუძლია, 60-დან 120 კმ/სთ-მდე ასაჩქარებლად კი 4.1 წამია საჭირო. იმის გამო, რომ სიჩქარის ზრდასთან ერთად, ძრავების მიერ მოხმარებული ელექტროენერგიის ხარჯი იზრდება, ავტომობილის მაქსიმალური სიჩქარე 200 კმ/სთ-ით შეიზღუდა (ელექტრომობილისთვის, თუნდაც მას სპორტული გარეგნობა ჰქონდეს, ესეც ძალიან კარგი მაჩვენებელია).

”აუდი e-ტრონი” ეგრეთ წოდებული პლაგ-ინ სისტემითაა აღჭურვილი, რაც იმას ნიშნავს, რომ ის ენერგიას საყოფაცხოვრებო ელექტროქსელიდან ივსებს. აკუმულატორების სრულად დასამუხტად, 6-8 საათია საჭირო. სხვათა შორის, ავტომობილის მოძრაობისას, აკუმულატორები შევსებას მუხრუჭების ენერგიის რეკუპერაციის სისტემისგან ღებულობენ. მსგავს სისტემას (კერს) ფორმულა ერთის ზოგიერთი გუნდიც იყენებს.

საინტერესოა e-ტრონის სამუხრუჭე სისტემაც, რომელიც ზორბა კრამიკული დისკოებითაა აღჭურვილი. ამასთან, წინა მუხრუჭები ჰიდრავლიკურია, უკანა კი ელექტრომექანიკური, ეგრეთ წოდებული მცურავი დამჭერები (სუპორტები) დგას, რომლებიც მოქმედებაში ელექტრულ სიგნალებს მოჰყავს. კომპანიის წარმომადგენელთა განცხადებით, ამგვარი სისტემა ხახუნზე ნარჩენი დანაკარგების შემცირებას უზრუნველყოფს. ამგვარ დანაკარგებს კი მაშინ აქვს ადგილი, როდესაც მძღოლი მუხრუჭის სატერფულიდან ფეხს იღებს.

”აუდ e-ტრონი” ასევე აღჭურვილია საკომუნიკაციო სისტემა ქარ-თუ-იქსით (Car-to-X), რომლის მეშვეობითაც, ამ სისტემით აღჭურვილ ავტომობილებს ერთმანეთთან ურთიერთობა შეუძლიათ, რაშიც მონაცემთა გაცვლა იგულისხმება. მაგალითად, ამ სისტემის მეშვეობით, ერთ ავტომობილს შეუძლია, მეორეს მის წინ არსებული სახიფათო სიტუაციის, ან საცობის შესახებ ამცნოს. გარდა ამისა, ამ სისტემას პარკირების ადგილზე თავისუფალი ადგილის მოძებნაც შეუძლია. სანავიგაციო სისტემის მეშვეობით, ეს სისტემა მოძრაობის ოპტიმალურ მარშრუტს ირჩევს და ამგვარად, საწვავის დაზოგვა შეუძლია.

”აუდის” შემუშავებული აქვს ელექტრომობილების მასობრივი წარმოების გეგმა. ძნელი მისახვედრი არ უნდა იყოს, რომ გერმანული კომპანიის ელექტრომობილების გამაში აუცილებლად შევა ავტომობილი, რომელიც ფრანკფურტში ნაჩვენები კონცეპტუალური e-ტრონის ბაზაზე შეიქმნება. მის გარდა, ელექტრომობილების წარმოების პროგრამაში შევა როდსტერი, სრულგაბარიტიანი სედანი და კომპაქტური საქალაქო ავტომობილი, რომელიც ”ფოლკსვაგენ უპ!-ის” ბაზაზე შეიქმნება.

ფრანკფურტის ავტო შოუ

”რევოლტი” - ”სიტროენის” რეტროჰიბრიდული კონცეპცია

Citroen Revolte

17 სექტემბერი

ფრანგულმა კომპანია ”სიტროენმა” ფრანკფურტში მიმდინარე საავტომობილო შოუზე, საზოგადოებას თავისი ახალი ცონცეპტუალური ნამუშევარი - ჰიბრიდული აგრეგატით აღჭურვილი ”რევოლტი” წარუდგინა, რომელიც ამავე კომპანიის ერთ დროს პოპულარული მოდელს - 2CV-ს თანამედროვე ვერსიაა.

ავტომობილის ჰიბრიდული სისტემით აღჭურვა თანამედროვე საავტომობილო ბაზრის ტენდენციაა, რომელსაც ევროპაში გამონაბოლქვზე მოთხოვნების უკიდურესი გამკაცრება განსაზღვრავს. ”რევოლტის” ჰიბრიდი იმითაა საინტერესო, რომ ის საშუალებას იძლევა, ავტომობილმა როგორც ელექტროძრავის, ასევე შიდაწვის ძრავის მიერ გამომუშავებული მაბრუნი მომენტით ისარგებლოს.

”რევოლტს” ფოტოელემენტებით დაფარული სახურავი აქვს, რომელიც ავტომობილის ელექტრომოწყობილობათა მუშაობასაც უზრუნველყოფს (რა თქმა უნდა, დღისით) და პარალელურად, ენერგიას აკუმულატორებსაც აწვდის, რათა ისინი სრულად არ განიმუხტონ. ”სიტროენმა” გამოფენაზეც კი არ გამოაცხადა, ”რევოლტის” ჰიბრიდული აგრეგატის ტექნიკური მონაცემები, არც მისი სვლის სიშორე და დრო, რაც საჭიროა ლითიუმ-იონური აკუმულატორების სრულად, ან ნაწილობრივ დასამუხტად.

რაც შეეხება ”რევოლტის” გაბარიტებს, ამ მხრივ, ის ახლოსაა ჰეჩბეკ C2-თან. კონცეპტუალური მოდელის სიგრძე 3.68 მ, სიგანე 1.73 მ, სიმაღლე კი 1.35 მეტრია. გაბარიტების მსგავსების მიუხედავად, ”სიტროენმა” უარყო ხმები იმის შესახებ, რომ ”რევოლტი” C2-ის შემდგომი თაობის ავტომობილის კონცეპციაა. კომპანიამ ასევე განაცხადა, რომ ჯერჯერობით, 2CV-ს აღდგენაც არ იგეგმება, რადგან კომპანიის სამოდელო გამაში მისთვის ადგილი არ არსებობს.

”ჩვენ ”რევოლტი” მხოლოდ იმისთვის შევქმენით, რომ ფრანკფურტის გამოფენის დამთვალიერებლებზე, უპირველესად კი გერმანელებზე შთაბეჭდილება მოგვეხდინა. მართალია, წარმოების ბოლო წლებში 2CV გერმანიაში ძალიან პოპულარული იყო, მაგრამ ჯერჯერობით, C2-ის სხვა მანქანით შეცვლას არ ვგეგმავთ და შესაბამისად, ”რევოლტი” არ უნდა ჩაითვალოს მომავალი სერიული ავტომობილის წინამორბედად”, - ფრანკფურტში გამართულ პრესკონფერენციაზე განაცხადა ”სიტროენის” კონცეპტუალური ავომობილების შტოს შეფმა კარლო ბონცანიტომ.

ფრანკფურტშივე, ”სიტროენმა” ახალი თაობის ჰეჩბეკი С3 და სრულიად ახალი პრემიუმ კლასის ჰეჩბეკი DS3 წარადგინა, რომელმაც კონკურენცია ”მინის” და ”ალფა რომეო მი.ტო-ს” უნდა გაუწიოს.

Tuesday, September 15, 2009

ფრანკფურტის ავტო შოუ

”ფოლკსვაგენ E-უპ!” - 21-ე საუკუნის ხოჭოს ელექტრონული ვერსია

VW E-Up! Concept

15 სექტემბერი

კონცეპტუალური ელექტრომობილი ჟურნალისტებს ”ფოლკსვაგენის” მთავარმა აღმასრულებელმა მარტინ ვინტერკორნმა წარუდგინა
...................................................................................................

ფრანკფურტში ”ფოლკსვაგენმა” გარემოსადმი მზრუნველობა სხვა კუთხითაც გამოავლინა - გამოფენაზე კონცეპტუალური ”უპ!-ის” (მომავალი ლუპო) ბაზაზე შექმნილი კონცეპტუალურივე ელექტრომობილი წარადგინა.

თავი რომ დავანებოთ იმას, რომ ” E-უპ!-ის” გარეგნობა წინა მოდელთან შედარებით ძალიან დაიხვეწა და საწარმოო სტანდარტს მიუახლოვდა, მისი ეს ვერსია ვოლფსბურგელებმა არა უბრალოდ გარეგნობის საჩვენებლად გამოფინეს, არამედ უფრო იმისათვის, რომ ყველასათვის დაენახვებინათ - ელექტრომობილების წარმოებისთვის ისინიც მზად არიან და ამ საქმეს მაშინვე მოჰკიდებენ ხელს, როგორც კი მაღალეფექტური აკუმულატორები გაიაფდება.

რა თქმა უნდა, ”E-უპ!-ი” ძალიან მცირე გაბარიტებით გამოირჩევა. მისი ზომებია: სიგრძე 3.19 მ, სიგანე 1.64 მ, სიმაღლე 1.47 მ და ბაზა 2.19 მეტრი. ავტომობილს სალონში ჩასაჯდომი საკმაოდ უცნაური ფორმულა 3+1 აქვს, სადაც რიცხვი 1 იმას ნიშნავს, რომ მძღოლის სავარძელი ხუთიოდ სანტიმეტრით წინაა წაწეული. საერთო ჯამში ავტომობილი ”ფიატის” პოპულარულ რეტროჰეჩბეკ ”ჩინკვეჩენტოზე” პატარაა. ”E-უპ!-ის” საბარგულის მოცულობა სულ რაღაც 85 ლიტრია, მაგრამ თუ მძღოლის უკან სავარძელს დავკეცავთ, საბარგულის მოცულობა 180 ლიტრამდე იზრდება და თუ ორივეს დავკეცავთ, 320 ლიტრსაც კი აღწევს.

”უპ!-ის” ელექტრული ვერსიის სალონი სისადავით და მინიმალიზმით გამოირჩევა - ელექტროენერგია მინიმალურად უნდა დაიხარჯოს

............................................................................................

ავტომობილი აღჭურვილია საკმაოდ მძლავრი ელექტროძრავით, რომელიც ნომინალურ 53 ცხენის ძალას, მაქსიმუმ 80 ცხენის ძალას და 210 ნიუტონმეტრ მაბრუნ მომენტს გამოიმუშავებს. მისი მეშვეობით, კონცეპტუალურ ელექტრომობილს 0-100 კმ/სთ აჩქარება 11.3 წამში შეუძლია, ადგილიდან 50 კმ/სთ-ის ასაკრეფად 3.5 წამი ჰყოფნის, მისი მაქსიმალური სიჩქარე კი 135 კმ/სთ-ია.

ავტომობილის წონა 1 085 კილოგრამია. აქედან 240 კილოგრამი აკუმულატორების ბლოკზე მოდის, რომელთა ჯამური ტევადობა 18 კილოვატსაათია. მწარმოებელი გვამცნობს, რომ აკუმულატორების საყოფაცხოვრებო ქსელიდან (პლაგ ინ სისტემით) დასამუხტად ხუთი საათია საჭირო, სპეციალურ სადგურში კი, აკუმულატორების 80 პროცენტით შევსებას დაახლოებით ერთ საათი სჭირდება.

აღსანიშნავია, რომ ავტომობილის სახურავზე მზის ელემენტებია ჩამონტაჟებული, რომელთა ფართობი 1.4 კვადრატულ მეტრს აღწევს. თუ მძღოლი მზისგან დამცავ წინაფრას გახსნის, რომლის მეორე მხარეზეც ასევე მზის ელემენტებია მოთავსებული, ამ ელემენტების ჯამური ფართობი 1.7 კვ. მეტრამდე იზრდება. მზის ელემენტებისგან ავტომობილის ელექტრონული სისტემები იკვებება და თუ მანქანა გაჩერებულია, მზისგან მიღებული ენერგია სალონის ვენტილაციასა და გაგრილებას ხმარდება.

”ფოლკსვაგენი” კონცეპცია ”უპ!-ს” ხშირად 21-ე საუკუნის ”ბიტლს” უწოდებს, რაც იმას ნიშნავს, რომ ამ პატარა პატარა ავტოს ”სახალხო ავტომობილობის” მისია აკისრია. ესე იგი, ის საკმაოდ იაფი უნდა იყოს. თუმცა, ძნელი წარმოსადგენია, რომ ლითიუმ-იონური აკუმულატორებით და მზის ელემენტებით აღჭურვილი ავტომობილი იაფი ღირდეს. და მაინც, ვოლფსბურგელები ირწმუნებიან, რომ ფრანკფურტში ნაჩვენები კონცეპციის ბაზაზე შექმნილი ელექტრომობილის წარმოებას 2013 წელს დაიწყებენ. მანამდე ორი წლით ადრე კი ბაზარს ლუპო (იგივე უპ!-ის სერიული ვერსია) ეწვევა.

ფრანკფურტის ავტო შოუ

”ფოლკსვაგენი” 1.5-ლიტრიანი ხარჯით

Volkswagen L1 Concept

15 სექტემბერი

”ფოლკსვაგენისგან” ამ ავტომობილს დიდხანს ელოდნენ და აი, ფრანკფურტში გახსნილ საავტომობილო შოუზე, გერმანულმა კომპანიამ მოლოდინი გაამართლა - გამოფენის დამთვალიერებლებს კონცეპტუალური L1 გააცნო რომელიც 100 კილომეტრზე საშუალოდ 1.38-1.49 ლიტრ (მუშაობის რეჟიმის შესაბამისად) დიზელის საწვავს მოიხმარს და ყოველი კილომეტრის გავლისას, ატმოსფეროში მხოლოდ 39 გრამ CO2-ს გამოყოფს.

ასეთი სუპერეკონომიურობა რამდენიმე ფაქტორმა განაპირობა. ესენია: სრულყოფილი აეროდინამიკა, მცირელიტრაჟიანი და ძალიან ეკონომიური ძრავი, ავტომობილის სიმსუბუქე და რხევაზე ნაკლები წინააღმდეგობის მქონე საბურავები.

ავტომობილი სულ რაღაც 380 კილოგრამს იწონის, აქედან ძარაზე 124 კილოგრამი მოდის. L1 ორცილინდრიანი, 0.8-ლიტრიანი TDI დიზელის ძრავითაა აღჭურვილი, რომელიც სამუშაო რეჟიმის მიხედვით, 27 ან 39 ცხენის ძალას (ორივე შემთხვევაში 4 000 ბრ/წთ-ზე) გამოიმუშავებს, მისი მაქსიმალური მაბრუნი მომენტი კი 100 ნიუტონმეტრია (1 900 ბრ/წთ-ზე). როგორც ”ფოლკსვაგენი” გვამცნობს, ეს ძრავი 1.6-ლიტრიანი TDI-ს ბაზაზეა შექმნილი და ფაქტობრივად, მის ნახევარს წარმოადგენს.

ძრავთან ორმაგი გადაბმის ქუროთი 7-საფეხურიანი ნახევრად ავტომტური კოლოფია (DSG) დაკავშირებული. ძრავსა და ტრანსმისიას შორის ასევე მცირე სიმძლავრის ელექტროძრავი მდებარეობს, რომელიც აჩქარების დროს, სიმძლავრეს ზრდის. დამუხრუჭების დროს კი ენერგიას აგროვებს და ლითიუმ-იონურ აკუმულატორს მუხტავს. საჭიროების შემთხვევაში კი, ამ ელექტროძრავით მცირე მანძილის გავლაც შეიძლება.

ავტომობილს ადგილიდან 100 კმ/სთ-ი აკრეფა 14,3 წამში შეუძლია, მისი მაქსიმალური სიჩქარე კი 160 კმ/სთ-ს აღწევს. ათლიტრიანი ავზი საკმარისია იმისათვის, რომ ”ფოლკსვაგენ L1-ით” 670 კილომეტრი გაიაროთ.

L1 ასევე აღჭურვილია ”პარტკ ესისტ” და სტარტ/სტოპ სისტემებით. ამათგან მეორე ავტომობილის ეკონომიურობის გაუმჯობესებას ემსახურება - შუქნიშანზე დგომისას ძრავს თიშავს, აქსელერატორზე დაჭერისას კი ძრავს ავტომატურად რთავს. ავტომობილი ”მიშლენის” წარმოების შემცირებული წინააღმდეგობის საბურავებზე დგას, რომელთა ზომებია: 95/60 R16 წინ და 115/70 R16 უკან.

გავრცელებული ინფორმაციით, ”ფოლკსვაგენი” L1-ის ბაზაზე, მსგავსი მონაცემების მქონე ავტომობილის წარმოებას 2013 წელს დაიწყებს.

Monday, September 14, 2009

გაიცანით - კონცეპტუალური ბუგატი გალიბიერი 16C

Bugatti Galibier 16C Concept

14 სექტემბერი

”ბუგატიმ” თავისი სრულიად ახალი ავტომობილი - სუპერსდანი წარმოადგინა, რომელსაც საავტომობილო სამყარო დიდხანს ელოდა. ცოტა ხნის წინ, მას ”ბორდოს” სახელით მოიხსენიებდნენ, დღეს კი ირკვევა, რომ მწარმოებელმა ავტომობილისთვის, რომლის კონცეპტუალური ვერსიის პრემიერაც კომპანიის დაარსებიდან ასი წლის იუბილეს მიეძღვნა, სახელი ”გალიბიერი” შეარჩია.
ზოგ (ავტორიტეტული გამოცემის) საიტზე ამ ავტომობილის სახელად ”გალაბიერი” სწერია, ზოგან (ასევე ავტორიტეტული გამოცემისაზე) კი - ”გალიბიერი”. სიმართლე გითხრათ, სანამ ფრანკფურტის შოუზე თავად კომპანია ამ ავტომობილის სახელს გვამცნობს, მირჩევნია, ის ”გალიბიერად” მოვიხსენიო - ეს სახელი საფრაგეთის სამხრეთში, ალპების მთიანეთში მდებარე მთა გალიბიერისთან და ამავე სახელწოდების უღელტეხილთან ასოცირდება, რომელიც ხშირად შეაქვთ ხოლმე ტურ დე ფრანსის ლეგენდარული ველომარათონის მარშრუტში. ”ბუგატის” ”გალიბიერსაც” ისეთივე ბუმბერაზი შესახედაობა აქვს და ჩვენც დღეს ის ”გალიბიერად” მოვიხსენიოთ.

”გალიბიერის” შესახებ მწირი ინფორმაცია ინტერნეტში მას შემდეგ გავრცელდა, რაც ”ბუგატიმ” თავისი სუპერსედანის პირველი ჩვენება დახურულ წვეულებაზე, სპეციალურად დაპატიჟებული სტუმრებისთვის მოაწყო. ამიტომ, ჯერჯერობით მისი მონაცემების შესახებ, ყველა მარჩიელობს.

მაგალითად, სავარაუდოა, რომ ავტომობილი იმავე 8.0-ლიტრიანი W16 ძრავითაა აღჭურვილი, რომელსაც ”ვეირონზეც” შეხვდებით. ოღონდ, თუ ამ უკანასკნელზე აგრეგატს ოთხი ტურბოკომპრესორი მსახურება (თითო ოთხ ცილინდრზე), სედანისთვის ძრავს ორი მექანიკური დამჭირხნი აკმარეს. ”გალიბიერის” ტექნიკური მონაცემები არ გამოქვეყნებულა, მაგრამ წვეულებაზე ”ბუგატის” ტექნიკურ დირექტორ ვოლფგანგ შრაიბერს უთქვამს - ეს მსოფლიოს უსწრაფესი, ყველაზე ტემპერამენტიანი და მძლავრი ოთხკარიანი სედანიაო.

ინგლისური ჟურნალი ”აუტოქარი” (სხვათა შორის, მისი ვერსიითაც, ბუგატის სედანს გალიბიერ-ი ჰქვია) გვატყობინებს, რომ ძრავის სიმძლავრე 800 ცხენის ძალას აღწევს. ამავე ჟურნალის ინფორმაციით, ძრავთან მაბრუნი მომენტის გარდამქმნელი 8-საფეხურიანი ავტომატური კოლოფია დაკავშირებული.

ავტომობილი თავისი მონუმენტური გარეგნობით გამოირჩევა. სხვანაირად არც შეიძლებოდა ყოფილიყო - მან ხომ ”როლს როისის” გიგანტურ ”ფანტომს” უნდა გაუწიოს კონკურენცია. ”ვეირონის” დარად, ისიც ორ ფერშია გამოწყობილი, ოღონდ, ახალი ავტომობილისთვის კომპანიის დიზაინერებმა ფერების უფრო ელეგანტური შეხამება აირჩიეს - შავი სარკესავით გაპრიალებულ ალუმინთან. ძარის ის ელემენტები, რომლებიც ვერცხლისფრად ელავს, ალუმინისგანაა დამზადბეული, შავი კი კარბონის კომპოზიტია.

ავტომობილი შიგნითაც ისეთივე დიდებულია, როგორც გარედან. სალონში ყავისფერი დომინირებს. ღია ყავისფერი ტყავით თითქმის ყველაფერია გაწყობილი, ზოგან კი მას ხის პანელები ფარავს, რომელსაც ალუმინის ფურცლებისგან დამზადებული არშიები აქვს შემოვლებული. სალონის კიდევ ერთი დამახასიათებელი თვისება მისი სისადავე და, რა თქმა უნდა, მდიდრულობაა.

ჰო მართლა, შრაიბერმა განაცხადა, რომ ”გალიბიერ-ის” დიზაინერებმა შთაგონება ”ბუგატის” ლეგენდარული ”ტაიპ 57 ატლანტიკისგან” მიიღეს, რომელთან მსგავსების მთავარი ნიშანი ავტომობილის სიმეტრიის ღერძის გასწვრივ გამავალი ზოლია, რომელიც წინა და უკანა საქარე შუშაზეც გადადის.

”ბუგატი” აღიარებს, რომ 50 ცალი ”ვეირონი” ჯერაც გასაყიდი აქვს, მის ბაზაზე გამოშვებულ ”გრან სპორტზეც” ჯერ სუ რამდნიმე ათეული შეკვეთაა მიღებული. ამიტომ, ჯერ გადაწყვეტილი არ არის ”გალიბიერ-ის” ბედი. სავარაუდოდ, კომპანია შესაბამის გადაწყვეტილებას ფრანკფურტის შოუზე მიღებული გამოხმაურებების შემდეგ მიიღებს.

Sunday, September 13, 2009

”მერსედეს-ბენცის” პლაგ-ინ კონცეპცია ”ვიჟნ S500”

Mercedes-Benz Vision S500 Plug-In Hybrid Concept

13 სექტემბერი

ფრანკფურტის საავტომობილო შოუს დამთვალიერებელს, გარემოსადმი მეგობრული ავტომობილების ნამდვილი ბუმი ელით. ძნელად თუ მოიძებნება ავტომწარმოებელი, რომელიც გამოფენაზე პავილიონს დაიქირავებს და იქ ”მწვანე” ავტომობილს არ წარადგენს. რა თქმა უნდა, გარემოსადმი მზრუნველობის მარაქაში გერმანული კომპანიებიც არიან გარეულნი, რომლებიც არაერთ ჰიბრიდულსა და ელექტრონულ სიახლეს გვიმზადებენ. მათ შორის კი ერთ-ერთი ”მერსედეს-ბენცია”.

შტუტგარტულმა გამოფენისსთვის რამდენიმე ”მწვანე” კონცეპცია მოამზადა, რომელთაგან ერთ-ერთი გამორჩეული, S-კლასის სედანის ბაზაზე დამზადბული პლაგ-ინ ჰიბრიდული ”ვიჟნ S500-ია”. ამ ავტომობილში იგივე ჰიბრიდული ტექნოლოგიაა გამოყენებული, რაც ჰიბრიდულ S400-ში და ის ერთი გალონი (3.785 ლიტრით) საწვავით 117 კილომეტრს გადის.

ჰიბრიდულ აგრეგატში ბენზინის V6 და ელექტროძრავია გაერთიანებული. ამ უკანასკნელის ენერგიით მომარაგებაზე კი ლითიუმ-იონური აკუმულატორების ბლოკი ”ზრუნვს”. მხოლოდ ელექტროძრავით, ”ვიჟნ S500-ს” 30 კილომეტრის გავლა შეუძლია. მერე კი, როდესაც აკუმულატორები დაიცლება, საქმეში ავტომატურად ერთვება შიდაწვის ძრავი და ამის შემდეგ, ავტომობილი ჩვეულებრივი ჰიბრიდივით მუშაობს.

ამ ეტაპზე, სულ ეს არის, რისი თქმაც ”სამქიმიანების” ახალ ჰიბრიდულ ავტომობილზე შეიძლება. მისი მუშაობის პრინციპის შესახებ, უფრო დაწვრილებითი ინფორმაცია ფრანკფურტის შოუს დროს გამოქვეყნდება.

”ლოტუსმა” ჰიბრიდებისთვის შიდაწვის აგრეგატი შეიმუშავა

Lotus Range Extender Engine

13 სექტემბერი

ინგლისურმა კომპანია ”ლოტუსმა”, რომელიც მალაიზიური ”პროტონის” ჯგუფში შედის, სპეციალური, სამცილინდრიანი შიდაწვის აგრეგატი შეიმუშავა, რომლის დანიშნულებაც ჰიბრიდული ავტომობილების სვლის სიშორის გაზრდაა. ამ ძრავს, რომლის სახელწოდებაც ”რეინჯ ექსტენდერია”, ის საზოგადოებას პირველად ფრანკფურტის ავტო შოუზე წარუდგენს.

შიდაწვის ძრავის სამუშაო მოცულობა 1.2 ლიტრია, ის მხოლოდ 56 კილოგრამს იწონის და 47 ცხენის ძალას გამოიმუშავებს. მწარმოებლის განცხადებით, როდესაც ამ ძრავის ბრუნთა რიცხვი წუთში 1 500-ს აღწევს, მასთან დაკავშირებული გენერატორი 1500 კილოვატ ელექტროენერგიას იძლევა და თუ ბრუნთა რიცხვი 3 500-მდე იზრდება, გენერატორის მიერ გამომუშავებული სიმძლავრე 35 კილოვატს აღწევს.

”მსოფლიო იცვლება და მასთან ერთად, ჩვენც ვიცვლებით. ჩვენ მუდმივად ვმუშაობთ მასობრივი წარმოებისთვის გამოსადეგი ტექნოლოგიებზე. ძრავი ”რეინჯ ექსტენდერი” სწორედ ამის მაგალითია. ჩვენ მას სხვა კომპანიებს ჰიბრიდული აგრეგატებისთვის შევთავაზებთ. ჩვენი კონცეპტუალური ძრავი კომპაქტური, მსუბუქი და იაფია. ის ნათელი დემონსტრაციაა იმისა, რომ თავის პროექტებს ”ლოტუსი” მისთვის ჩვეული პროფესიონლიზმით ასრულებს”, - ამბობს ”ლოტუს ინჯინიარინგის” მმართველი დირექტორი პოლ ნიუსომი.

ძრავი უცნურია იმ კუთხით, რომ მას ცილინდრების ბლოკი, ამ ბლოკის თავი და გამოსაბოლქვი კოლექტორი ერთ მთლიან ბლოკად აქვს შესრულებული. მისი დანიშნულება კი მხოლოდ ისაა, რომ მასთან დაკავშირებული გენერატორის მეშვეობით, ავტომობილის მოძრაობის პროცესშივე უზრუნველყოს აკუმულატორების ელექტროენერგიით დამუხტვა.

”ლოტუსის” გარდა, პროექტზე ასევე მონაწილეობდნენ ”იაგუარის”, ”კაპაროს” და სხვა კომპანიების სპეციალისტები. მათი ერთობლივი გარჯის საბოლოო მიზანი კი მაღალი კლასის სედანის შექმნა, რომელსაც ბიძგს ჰიბრიდული აგრეგატი მისცემს.