Saturday, July 24, 2010

”სიტროენი” სამ კონცეპტ ქარს კონვეიერზე დააყენებს

Citroen to Produce Survolt, GTbyCitroen, Metropolis

19 ივლისი

სიტროენ სარვოლტი
........................................

”სიტროენმა” თავის სამ კონცეპტუალურ მოდელს, რომელთა გარეგნობის მიხედვით, დარწმუნებით შეიძლებოდა იმის თქმა, რომ კონვეიერზე მათ არასდროს დააყეენბდნენ, მწვანე შუქი აუნთო. ეს კი იმას ნიშნავს, ”სიტროენ სარვოლტის”, ”სიტროენ GT-ს” და ”სიტროენ მეტროპოლისის” შეძენა მალე შესაძლებელი იქნება. თანაც, სამივე კონცეპტის სერიულ ვერსიას ამძრავ ძალას გარემოსადმი მეგობრული ძრავები მიანიჭებენ.

თუ ”სარვოლტი” და GT აშკარად სპორტული ავტომობილებია, ”მეტროპოლისს” მდიდრული სედანის გარეგნობა აქვს. ამასთან, მათ აღჭურვილობაც განსხვავებული ექნებათ. სხვათა შორის, ”სარვოლტმა” ახლახანს მონაწილეობა მიიღო საჩვენებელ რბოლა ”ლე მანს კლასიკში”.

სიტროენ მეტროპოლისი
........................................

ეს ავტომობილი მოკრძალებული გაბარიტებით გამოირჩევა. ის ფოლადის მილებისგან შეკრულ მზიდ ჩარჩოს ეყრდნობა, ძარის პანელები კი კარბონის კომპოზიტისგანაა დამზადებული. მისი ზომებია: სიგრძე 3.85, სიგანე 1.87 და სიმაღლე 1.2 მეტრი. ავტომობილი1150 კილოგრამს იწონის.

”სიტროენ სარვოლტი” ორი ელექტროძრავითაა აღჭურვილი, რომელთა ჯამური სიმძლავრეც 300 ცხენის ძალას აღწევს. მათი მეშვეობით, სპორტული ელექტრომობილის მაქსიმალური სიჩქარე 260 კმ/სთ-ს აღწევს, ადგილიდან 100 კმ/სთ სიჩქარის ასკრეფად კი 5 წამზე ოდნავ მეტი ჰყოფნის. ლითიუმ-იონური აკუმულატორების ტევადობა საკმარისია იმსიათვის, რომ ”სარვოლტმა” 200 კილომეტრის გავლა შესძლოს.

სიტროენ GT

........................................

ეს კონცეპტუალური ავტომობილი ფრანგულმა კომპანიამ ჟენევის წლევანდელ საავტომობილო შოუზე გვიჩვენა, თუმცა მაშინ ითქვა, რომ მისი წარმოება არ იგეგმებოდა. ახლა კი მისი შეზღუდული ტირაჟით წარმოება გადაწყდა. შესაბამისად, მისი ფასიც ყველასათვის ხელმისაწვდომი არ იქნება. დაახლოებით იგივე მონაცემები აქვს GT-ს, რომლის წარმოება ჯერ კიდევ შარშან გადაწყდა, თუმცა სხვადასხვა მიზეზის გამო, მისი ტექნოლოგიური დამუშავების პროცესი გაჭიანურდა.

”მეტროპოლისის” კონცეპციის დებიუტი ასევე წელს, ოღონდ შანჰაის ავტო შოუზე შედგა. თავისი ზომებით, ეს სედანი წარმომადგენლობით კლასს განეკუთვნება. მისი სიგრძე 5.3, სიგანე 2.0 და სიმაღლე 1.4 მეტრია. ის აღჭურვილია ჰიბრიდული დანადგარით, რომლის სიმძლავრეც 460 ცხენის ძალას, მაქსიმალური მაბრუნი მომენტი კი 430 ნიუტონმეტრს აღწევს. ფრანგული კომპანიის მონაცემებით, დაბალი სიჩქარით მოძრაობისას, ”მეტროპოლისი” მხოლოდ ელექტროძრავების მეშვეობით გადაადგილდება.

ძრავთან 7-საფეხურიანი გადაცემათა კოლოფია შეწყვილებული, რომელიც ძრავის მაბრუნ მომენტს გადაბმულობის ორდისკოიანი ქუროს მეშვეობით ღებულობს. ტრანსმისია სრულამძრავიანია, ყველა ბორბალს კი შასისთან აქტიური საკიდარი ”ჰიდრაქტივი” აკავშირებს.

Thursday, July 22, 2010

”პეჟო” კონცეპტუალურ BB1-ს გამოუშვებს

Peugeot BB1 to Make It into Production

21 ივლისი

სკუტერია, თუ ავტომობილი? - ბევრი ახლაც დაობს, თუ რა უწოდოს კონცეპტუალურ მოდელს, სახელად BB1, რომელიც ”პეჟომ” ”ფრანკფურტის” შარშანდელ საავტომობილო გამოფენაზე წარმოადგინა. თუმცა, ამას რა მნიშვნლობა აქვს - გამოცემა ”უოთქარ?-ის” ინფორმაციით, ფრანგულ კომპანიას BB1-ის წარმოება აქვს გადაწყვეტილი. ჟურნალთან საუბრისას, ”პეჟოს” საინჟინრო შტაბის შეფმა ჟილ ვიდალმა განაცხადა, რომ BB1-ის გაყიდვები 2012, ან 2013 წელს დაიწყება.

ყველაზე საინტერესო ისაა, რომ ”ლომებმა” გადაწყვიტეს, რომ სერიულ მოდელს კონცეპტუალური ავტომობილის გარეგნობა შეუნარჩუნონ. ამის საფუძველი კი ”პეჟოს” ხელმძღვანელობას ფრანკფურტში მიღებულმა დადებითმა გამოხმაურებებმა მისცა. სამაგიეროდ, ჯერაც არ გარკვეულა მთავარი საკითხი - რა დაარქვან BB1-ის სერიულ ვერსიას და ავტომობილების კლასს მიაკუთვნონ ის, თუ სკუტერებისას.

ფრანკფურტში ნაჩვენები კონცეპცია ელექტრომობილია, რომელსაც ოთხი მგზავრის გადაყვანა შეუძლია. BB1-ს ორი ელექტროძრავი ემსახურება, რომლებიც უკანა ბორბლებთანაა მოთავსებული. ეს ბორბლები ”პეჟოსა” და ”მიშლენის” სპეციალისტებმა ერთობლივად შეიმუშავეს. თითოეული ძრავის მაქსიმალური სიმძლავრე სულ რაღაც 20 ცხენის ძალაა და მათი მეშვეობით, BB1-ს 0-30 კმ/სთ-მდე აჩქარება 2.8 წამში შეუძლია, 30-დან 60 კმ/სთ-მდე სიჩქარეს კი 4 წამში კრეფს.

ძრავებს ელექტროენერგიით ლითიუმ-იონური აკუმულატორების ბლოკი ამარაგებს, რომელთა ტევადობაც საკმარისია იმისათვის, რომ ავტომობილმა შეუჩერებლად 120 კილომეტრის გავლა შესძლოს. დამატებითი ენერგიის გამომუშავება მზის პანელებით ხდება, რომლებიც კომპანია ”ოუშენ ვიტალ-ის” მიერაა დამზადებული. ეს ენერგია საკმარისია იმისათვის, რომ მანქანის სხვადასხვა ელექტრულმა მოწყობილობამ გამართულად იმუშაოს.

ავტომობილის სიგრძე სულ რაღაც 2.5 მეტრია და ის მხოლოდ 600 კილოგრამს იწონის. სხვა მონაცემები მის შესახებ ჯერჯერობით უცნობია.

”ბეემვე მეგასიტი” პირველად ლონდონის ოლიმპიადაზე გამოჩნდება

BMW Megacity, on Display at the 2012 London Olympics

21 ივლისი

ინტერნეტით გავრცელდა ინფორმაცია იმის შესახებ, რომ ”ბეემვე” თავისი სრულიად ახალი ავტომობილის, მიკროლიტრაჟიანი საქალაქო ”მეგასიტის” პრეზენტაციას, მისი წარმოების დაწყებამდე ერთი წლით ადრე, ლონდონის 2012 წლის ოლიმპიადაზე ჩაატარებს.

გამოცემა ”უოთქარ?-ის” ინფორმაციით, გერმანულმა კომპანიამ ეს გადაწყვეტილება იმის გამო მიიღო, რომ ის ლონდონური ოლიმპიადის ოფიციალური პარტნიორია და სრულიად ახალი ავტომობილის რეკლამირებისა და პოპულარიზაციისათვის იმაზე უკეთესი ადგილი სად იქნება, თუ არა ისეთ მასობრივ ღონისძიებაზე, როგორიც ოლიმპიური თამაშებია.

”მეგასიტის” შემუშავება მაღალი ტემპით მიმდინარეობს

........................................

ავტომობილს, რომელიც დღეს ”მეგასიტის” სახელითაა ცნობილი, ”ბეემვეს” ლაიპციგური ქარხანა გამოუშვებს. ტავიდან ლაპარაკი იყო იმაზე, რომ მისთვის ბავარიელები სუბ-ბრენდის შექმნას აპირებდნენ, თუმცა არაა გამორიცხული, რომ ეს ავტომობილი ან საკუთრივ ”ბეემვეს”, ან ”მინის” მარკით გამოუშვან.

”მეგასიტი” შემუშავების პროცესშია. მისი ერთ-ერთი მთავარი ნაწილი - სინქრონული ელექტროძრავი ბავარიელებმა პირველად თავიანთ კონცეპტუალურ ავტომობილ ”აქტივE-ზე” გამოიყენეს. ეს აგრეგატი 170 ცხენის ძალას და მაქსიმუმ 250 ნიუტონმეტრ მაბრუნ მომენტს გამოიმუშავებს. მისი წყალობით, ავტომობილის მაქსიმალური სიჩქარე 144 კმ/სთ-ს მიაღწევს, მისი სვლის სიშორე კი 200 კილომეტრი იქნება.

”მეგასიტიზე” აკუმულატორების ბლოკები ავტომობილის ძირზე მოთავსდება, რისი წყალობითაც, ავტომობილს სიმძიმის ცენტრი ჩვეულებრივზე დაბლა ექნება. ელექტროძრავი კი ავტომობილის უკან განლაგდება და ის, ერთსაფეხურიანი ტრანსმისიის გავლით, მაბრუნ ძალას უკან წამყვან ბორბლებს გადასცემს. მნიშვნელოვანია ის ფაქტიც, რომ ავტომობილის შასი ალუმინისგან, მისი ძარის კომპონენტები კი კარბონის კომპოზიტისგან დამზადდება. ამ კომპონენტებს ბავარიელები აშშ-ში, პარტნიორ კომპანია ”SGL ავტომოტივთან” ერთად აწარმოებენ.

”შკოდა” იაფფასიან მცირელიტრაჟიან ავტომობილს გამოუშვებს

Skoda Joyster Gets the Green Light

21 ივლისი

ცოტა ხნის წინ, ცნობილი გახდა, რომ ”ფოლკსვაგენი” თავის კონცეპტუალურ მცირელიტრაჟიან მოდელ Up!-ის ბაზაზე ჰეჩბეკ ”ლუპოს” აღადგენს. ამ უნფორმაციის გავრცელებიდან რამდენიმე დღეში კი ”შკოდამ”, რომელიც გერმანული კომპანიის ჯგუფში შედის, გამოაცხადა, რომ მალე დაიწყებს მცირელიტრაჟიანი ავტომობილის წარმოებას, რომელიც მის ავტომობილებს შორის ყველაზე იაფი ეღირება.

ბუნებრივია, ”შკოდას” ავტომობილიც Up!-ის ბაზაზე დამზადდება. თუმცა ჩეხურ კომპანიას შესაბამისი კონცეპტუალური მოდელი, სახელად ”ჯოისტერი”, Up!-ზე ადრე, 2006 წელს ჰქონდა წარმოდგენილი. ახალი ავტომობილის მსოფლიო პრემიერა 2012 წლის პირველ ნახევარშია მოსალოდნელი. ის 9 000 ევროზე იაფი ეღირება და ისევე როგორც ”ფოლკსვაგენ ლუპო”, კონკურენციას ”პეჟო 107-ს” და ”ტოიოტა აიგოს” გაუწევს.

”შკოდა ჯოისტერის” შესახებ, ჯერჯერობით ცნობილია მხოლოდ ის, რომ ძრავი მის წინა ნაწილში განთავსდება. ამ ეტაპზე გადაწყვეტილი არაა, რომელი ძრავებით აღიჭურვება ახალი ავტომობილი. სავარაუდოდ, ეს იქნება ბენზინის სამცილინდრიანი ძრავი 1.0 ლიტრი მუშა მოცულობით და ასევე სამცილინდრიანი, ოღონდ 1.2-ლიტრიანი დიზელი. იგივე ძრავებით ალბათ ”ლუპოც” აღიჭურვება.

სავარაუდოდ, ახალი ავტომობილი ეკონომიურიც იქნება და გარემოსადმი მეგობრულიც - მისი დიზელისძრავიანი ვერსია ყოველი კილომეტრის გავლისას, ატმოსფეროს მხოლოდ 80 გრამი ნახშირორჟანგით დააბინძურებს, ბენზინისძრავიანის შესაბამისი მაჩვენებელი კი 100 გრ/კმ იქნება.

ცნობისათვის, ”შკოდას” გარდა, Up!-ის ბაზაზე ამავე კლასის ავტომობილს, გერმანული კომპანიის ჯგუფში შემავალი კიდევ ერთი კომპანია - ესპანური ”სეატი” აპირებს. ”ჯოისტერს” ალბათ ”შკოდას” ალოვაკური საწარმო გამოუშვებს, რომელიც ქვეყნის დედაქალაქ ბრატისლავაში მდებარეობს.

ცნობილია, რომ ”ფოლკსვაგენი” ”ლუპოს” ელექტრონულ ვერსიასაც გამოუშვებს. მაგრამ ჯერჯერობით გადაწყვეტილი არაა, იმავე ელექტრომობილის წარმოებას ”შკოდა” და ”სეატიც” თუ აითვისებენ.

Wednesday, July 21, 2010

”სივრცულად ეფექტური ავტომობილი” - მომავალი ”იზეტა”?

iSetta Based SEV Concept Vehicle

20 ივლისი

იმას, რაც ფოტოზე ჩანს, ავტომობილს ძნელად თუ უწოდებ, მაგრამ მისი ავტორი, ჰოლანდიელი საავტომობილო ინჟინერი და დიზაინრეი რალფ პანჰუიზენი სხვაგვარად ფიქრობს და თავის მორიგ კონცეპტუალურ ქმნილებას ”სივრცულად ეფექტურ ავტომობილს” (SEV) უწოდებს. და მაინც, ეს უფრო გარდამავალი რამაა ავტომობილსა და სამბორბლიან მოტოციკლს შორის, რომელიც 130-180 კილომეტრს, ერთი გალონი საწვავით გადის, ან სულაც, მამოძრავებელ ძალას ელექტროძრავებისგან ღებულობს.

პროექტის ავტორი ამბობს, რომ 100-დან 1-მა მყიდველმა მაინც რომ ამ ავტომობილის შეძენა გადაწყვიტოს, ამით ათასობით ახალი სამუშაო ადგილი შეიქმნება. თუმცა, ის არაფერს ამბობს იმაზე, რომ ამდენივე სამუშაო ადგილის შეკვეცა იმ მწარმოებლებს მოუწევთ, რომლებსაც მისი ავტომობილი მყიდველს წაართმევს.

ეგ კიდევ არაფერი, პანჰუიზენი თავის ქმნილებას ”მსოფლიოს საუკეთესოს” უწოდებს, თუმცა რა არის, ეს ”მსოფლიოში საუკეთესო”, ამას თავად არ განმარტავს. მის მანქანას წინა ნაწილი ავტომობილის მსგავსი - ორბორბლიანი აქვს, უკან კი მხოლოდ ერთი ბორბალია და ამ ნაწილით ის დიდი ზომის მოტოციკლს მოგაგონებთ. ამ კონცეპტუალური სატრანსპორტო საშუალების დასამზადებლად შესაძლებელია როგორც სამბორბლიანი, ასევე მისაბმელიანი მოტოციკლის პლატფორმის გამოყენება.

რატომ ვახსენთ ”იზეტა”? ბევრმა ალბათ არ იცის, რომ თავის დროზე, იტალიაში შექმნილმა ჯუჯა ”იზეტამ” დიდი როლი ითამაშა კრიზისიდან ”ბეემვეს” გამოყვანაში. ბავარიული კომპანია აჯამად კრიზისისგან შორსაა, თუმცა ცნობილია, რომ მისი კონსტრუქტორები სუბკომპაქტური ავტომობილის შექმნაზე მუშაობენ. ჰოდა, პანჰუიზენმაც თავისი ხედვა გვიჩვენა იმისა, თუ როგორი შეიძლება იყოს თანამედროვეობის ”იზეტა”.

და ვინ იცის, იქნებ მისი კონცეპცია რომელიმე დიდმა, ან ამბიციური და ერთი შეხედვით, ავანტიურისტული ქმედებისადმი მიდრეკილმა რომელიმე ახალმა კომპანიამ შეიძინოს, რომელიც დიდ ბაზარზე დამკვიდრებას ახლა ცდილობს? გაიხსენეთ თუნდაც სახელოვან ბრიტანელ კონსტრუქტორ გორდნ მარის ჯუჯა T25, რომელსაც ის სხვა კომპანიებს სთავაზობს...

”რემბო ლამბო” ”ფოლკსვაგენ ტუარეგის” ბაზაზე დამზადდება

Rambo Lambo revived by the Touareg

20 ივლისი

სუპერ ავტომობილების ბაზარი თანდათან სულ უფრო მრავალფეროვანი ხდება, რისკენაც მწარმოებლებს ამ მცირე სეგმენტის გაჯერება, კონკურენტების რაოდენობის არნახული ზრდა უბიძგებს. ამის დასტურია თუნდაც ის ცნობა, რომ ”ლამბორგინის” უგზოობის ავტომობილების წარმოება აქვს განზრახული, რისთვისაც ბაზისად ”ფოლკსვაგენ ტუარეგის” პლატფორმას გამოიყენებს.

რა თქმა უნდა, უგზოობის სუპერ ავტომობილების წარმოებაში ”ლამბორგინი” პიონერი ვეღარ გახდება - ის რომ 1980-იან წლებში ასეთი რამდენიმე ავტომობილი დაამზადა, ახალი სეგმენტის გასახსნელად საკმარისი არ აღმოჩნდა, რადგან მაშინ მსოფლიო ავტოინდუსტრია ამისთვის მზად არ იყო და სუპერ ავტომობილების მწარმოებლებსაც ასეთ სიახლეებზე ფულის ხარჯვა არ სურდათ.

მაგრამ რამდენიმე წლის წინ ”პორშეს” მიერ მოდელ ”კაიენის” გამოშვებას, ადრე თუ გვიან, ვინმე უნდა გამოპასუხებოდა. ჰოდა, ამ მხრივ, პირველი ”ლამბორგინი” გახდება, რომელსაც, როგორც ”ფოლკსვაგენის” დიდი ოჯახის წევრს, უგზოობის ავტომობილების წარმობის დასაწყებად, ”ფოლკსვაგენ ტუარეგის” სახით, შესანიშნავი ბაზისი აქვს. შეგახსენბთ, რომ ”კაიენიც” სწორედ ”ტუარეგის” პლატფორმაზეა აგებული.

ცნობისათვის, უგზოობის მოდლ LM002-ს ”ლამბორგინი” 1986-1993 წლებში უშვებდა. ეს ავტომობილი განსაკუთრებული პოპულარობით არაბ შეიხებს შორის სარგებლობდა. ამასთან, რამდენიმე ქვეყნის არმიამ, იტალიურ კომპანიას მისი გასამხედროებული ვერსიაც შეუკვეთა.

”ლამბორგინი” აცხადებს, რომ უგზოობის ახალი ავტომობილის წარმოების დაწყება, LM002-ს პოპულარობამ გადააწყვეტინა. ამასთან, დიდი მნიშვნელობა აქვს იმ ფაქტს, რომ ახალი პლატფორმის შემუშავება საჭირო არ იქნება და ასე, სოლიდური თანხა დაიზოგება.

რა თქმა უნდა, ძნელი სათქმელია, როგორი იქნება ”ლამბოს” ახალი უგზოობის ავტომობილი და რა აღჭურვილობას მიიღებს ის. შეგახსენბთ, რომ LM002-ს კაპოტქვეშ 5.2-ლიტრიანი V12 ედგა. თუმცა, ახლანდელი საავტომობილო ტრენდიდან გამომდინარე, რომლის შესაბამისადაც, მწარმოებლები ცდილობენ, რომ მათმა ავტომობილებმა გარემო ნაკლებად დააბინძურონ, არაა გამორიცხული, რომ ახალი ”რემბო ლამბო” უფრო მოკრძალებული ძრავებითაც აღიჭურვოს. მითუმეტეს, რომ მალე იტალიური კომპანია V8 კონფიგურაციის ძრავების წარმოებას დაიწყებს...

Tuesday, July 20, 2010

”ფერარიმ” მოდელ ”458 იტალია” სპორტული ვერსია დაამზადა

Ferrari 458 Challenge Official Specs and Image

19 ივლისი

”ფერარიმ” საზოგადოებას თავის სუპერ ავტომობილ ”458 იტალიას” სარბოლი ვერსია - ”ჩელენჯი” წარუდგინა. ეს ავტომობილი მომავალი სეზონიდან, ”ფერარი ჩელენჯ ტროფეო პირელის” მონოსერიის რბოლებში მიიღებს მონაწილეობას, მისი პრეზენტაცია კი იტალიური კომპანიის მისი დილერების ტრადიციულ ყოველწლიურ შეხვედრაზე ჩატარდა.

გასპორტულებული ”იტალია” 30 მილიმეტრით დადაბლებულ საკიდარზე დგას. ამასთან, ზამბარებიც უფრო ხისტია, მათი რხევების ჩაქრობას კი უფრო მძლავრი ამორტიზატორები ემსახურება. ავტომობილის ეფექტურ, სარბოლ რეჟიმში დამუხრუჭებას კომპანია ”ბრემბოს” წარმოების კარბონის კომპოზიტ-კერამიკული დისკოები უზრუნველყოფს, ძრავთან კი 7-საფეხურიანი კოლოფია შეწყვილებული, რომელზეც საფეხურების გადაცემათა რიცხვებია შეცვლილი. ამის მიზანი კი ის იყო, რომ ძრავის დაბალ ბრუნთა რიცხვზე, მაქსიმალურად გამოეყენებინათ მისი მაბრუნი მომენტი.

განსაკუთრებული ყურადღება დაეთმო სტანდარტული 458 იტალიას” შემსუბუქებას. ამ მიზნით, ჯერ ერთი, ძარის ზოგიერთი ელემენტი შეთხელდა, შუშები კი პოლიკარბონმა შეცვალა. რა თქმა უნდა, სადაც შესაძლებელი იყო, შასის კონსტრუქციაში ლითონის ელემენტები კარბონის კომპოზიტისგან დამზადებულმა ნაწილებმა შეცვალა.

გასპორტულებულ ავტომობილზე ფორმულა 1-ის ტექნოლოგიებიც გამოიყენეს. მაგალითად, თრექშნ კონტროლი და ავტომობილის ორი ტიპის მომართვის კომპლექტი - სველი და მშრალი ტრასებისთვის. ყველა დამხმარე სისტემის მართვა და კონტროლი საჭის რგოლზე გადატანილი პულტიდან ხდება (როგორც ფორმულა 1-ში), ეს კი იმისთვის გაკეთდა, რომ პილოტს რბოლისას მზერის გზიდანა გადატან არ უხდეოდე.

დაბოლოს ძრავი. ის პრაქტიკულად იგივეა, რაც სტანდარტულ 458 იტალიაზე” იყო. ესაა 4.5-ლიტრიანი V8, რომელიც 570 ცხენის ძალას იძლევა. კომპანიის განცხადებით, ამ აგრეგატის და ზემოთ ჩამოთვლილი სიახლეების დახმარებით, სარბოლი ”იტალია” ფიორანოს ტრეკის ერთ წრეს წუთსა და 16.5 წამში გადის. ეს კი, ამ ავტომობილის წინამორბედ ” F430 ჩელენჯის” საუკეთესო შედეგზე თითქმის ორი წამით უკეთესი დროა.

Monday, July 19, 2010

”ფოლკსვაგენი” სახელ ”ლუპოს” აღადგენს

Volkswagen Up To Become New Lupo

19 ივლისი

”ფოლკსვაგენს” თავის ისტორიაში ყველაზე პატარა ავტომობილის სახელის, ”ლუპოს” აღდგენა აქვს გადაწყვეტილი და მას იმ ახალ ავტომობილს დაარქმევს, რომლის კონცეპტუალურ ვერსიებსაც (სახელად Up!) ბოლო წელიწადნახევრის განმავლობაში, სხვადასხვა საავტომობილო გამოფენებზე გვიჩვენებდა.

ბრიტანულ გამოცემა ”ავტოქარის” ინფორმაციით, ანალოგიურ ავტომობილს ვოლფსბურგელები თავიანთ ჯგუფში შემავალი სხვა ბრენდების - ”აუდის”, ”სეატის” და ”შკოდას” ემბლემებითაც გამოუშვებენ. ამგვარად, შეიქმნება მიკროლიტრაჟიანი ავტომობილების მთელი ოჯახი, რომელმაც ”ფოლკსვაგენის” ამბიციურ გეგმებში სოლიდური როლი უნდა შეასრულოს. ამ გეგმების მიხედვით კი, გერმანული კომპანია, რომელიც დღეისათვის უდიდესია ევროპაში და მსოფლიოს მოწინავე სამეულში შედის (წარმოების მოცულობის მხრივ), 2018 წელს მსოფლიოს უდიდესი ავტომწარმოებელი უნდა გახდეს.

კონცეპტუალურ Up!-ს ძრავი უკან ჰქონდა განლაგებული და თავიდან გადაწყვეტილი იყო, რომ სერიულ ავტომობილსაც იგივე შეთანწყობა ჰქონოდა, თუმცა შემუშავების პროცესში, ბევრმა საინჟინრო პრობლემამ იჩინა თავი, რის გამოც გადაწყდა, რომ ძრავი წინ გადმოეტანათ.

”ავტოქარის” ინფორმაციით, ახალი ”ლუპო”, გერმანული კომაპნიის ახლანდელ ყველაზე პატარა ავტომობილზე, სამკარიან ”პოლოზე” 0.525 მეტრით მოკლე, 0.054 მეტრით ვიწრო და 0.033 მეტრით მაღალი იქნება. ”ლუპოს” სავარაუდო გაბარიტებია: სიგრძე 3.445 მეტრი, სიგანე 1.628 მეტრი და სიმაღლე - 1.495 მეტრი.

მერმისს, ფრანკფურტის საავტომობილო შოუზე შედგება სამკარიანი ”ლუპოს” პრემიერა და ევროპულ ბაზარზე მისი გაყიდვებიც მაშინვე დაიწყება. ამ ავტომობილისთვის მხოლოდ ორი ძრავი იქნება გათვალისწინებული. ესენია ბენზინის 1.0-ლიტრიანი სამცილინდრიანი აგრეგატი, რომლის მაქსიმალური სიმძლავრეც 65 ცხენის ძალაა და ოთხცილინდრიანი დიზელი, რომლის მუშა მოცულობა 1.2 ლიტრი, მაქსიმალური სიმძლავრე კი 75 ცხენის ძალაა.

მოგვიანებით, ბაზარზე ხუთკარიანი ”ლუპოც” გამოჩნდება და პარალელურად, ძრავების გამასაც ერთი აგრეგატი დაემეტება. ეს იქნება 1.0-ლიტრიანი ტურბოძრავი, რომლის სიმძლავრეც 85 ცხენის ძალა იქნება. გარდა ამისა, ავტომობილს აუცილებლად ექნება ელექტრული ვერსია, რომლის კონცეპტუალური პროტოტიპებიც, მათ შორის, მილანისა და ბერლინის ტაქსის ფორმაში გამოწყობილები, ვოლფსბურგელებმა რამდენჯერმე გვიჩვენეს.

ახალი ”ფოლკსვაგენ ლუპო” კონკურენციას გაუწევს ევროპაში ისეთ პოპულარულ ავტომობილებს, როგორებიცაა ”სიტროენის” С1, ”პეჟოს” 107 და მათი იაპონელი ნათესავი ”ტოიოტა აიგო”. გერმანული ჯუჯა ”პოლოზე” იაფი ეღირება.

Monday, July 12, 2010

”მაკლარენის” ახალი სუპერ ქარი ორ წელიწადში გამოჩნდება

New McLaren F1 in 2012

12 ივლისი

ბრიტანული კომპანია ”მაკლარენ ავტომოტივი” თავის ლეგენდარულ სუპერ ავტომობილ F1-ის შთამომავალ ავტომობილს წარმოებისთვის ამზადებს და როგორც ბრიტანული გამოცემა ”ავტოქარი” გვატყობინებს, მას ექსკლუზიურ მყიდველს 2012 წელს შესთავაზებენ. ეს ავტომობილი, ბაზარზე დაგეგმილზე ორი წლით ადრე მოხვდება და ”მაკლარენის” საწარმოო გამაში ის მეორე მოდელი გახდება MP4-12C-ის შემდეგ.

”ავტოქარისვე” ინფორმაციით, ავტომობილს ძრავი ბაზაში ექნება განლაგებული, შასის კარბონის კომპოზიტისგან დაამზადებენ და ის ეგრეთ წოდებული მონოკოკური სისტემა იქნება. გარდა ამისა, მისი შემუშავებისას, არაერთ ტექნოლოგიურ და საკონსტრუქტორო გადაწყვეტას გამოიყენებენ, რომელთა წყალობითაც, ამ ავტომობილს თავისუფლად შეიძლება ”რევოლუციური” ეწოდოს.

ჯერჯერობით უცნბია, რა ძრავითა და გადაცემათა კოლოფით აღიჭურვება ახალი სუპერ ავტომობილი. თუმცა, სავარაუდოა, რომ მყიდველს ასევე შესთავაზებენ მის ეკოლოგიურ ვერსიას, რომელიც ატმოსფეროს მცირე რაოდენობით CO2-ით დააბინძურებს.

ბრიტანული კომპანიის შეფ რონ დენისს ნათქვამი აქვს, რომ ახალი სუპერ ავტომობილი, მისი კომპანიის საწარმოო პროგრამაში ყველაზე ძვირადღირებული იქნება. თუმცა, F1-ისგან განსხვავებით, რომელიც ”მაკლარენმა” სულ 107 ცალი გამოუშვა, ახალს გაცილებით მეტს დაამზადებენ. ზუსტად რამდენს, ეს ჯერ გადაწყვეტილი არაა.

ყველაზე ხელმისაწვდომი კი გახდება მესამე სპორტული ავტომობილი, რომლმაც, ”ავტოქარის” მონაცემებით, შეიძლება კონკურენცია ”ნისანის” 370Z-ს, ან ”პორშე კაიმანს” გაუწიოს. ამ ავტომობილის ფასის შესამცირებლად, მისი შასი და ძარის ელემენტები, შესაბამისად, ფოლადისა და ალუმუნისგან დამზადდება და არა კარბონის კომპოზიტისგან.

რაც შეეხება მოდელ MP4-12C-ს, ის 3.8-ლიტრიანი V8 ძრავითაა აღჭურვილი, რომელიც 600 ცხენის ძალას იძლევა. მასთან გადაბმის წყვილი ქუროთი, 7-საფეხურიანი რობოტიზებული კოლოფია დაკავშირებული. ამ აგრეგატების მეშვეობით, ავტომობილს 100 კმ/სთ სიჩქარის აკრეფა 3 წამზე ნაკლებში შეუძლია, 200 კმ/სთ-ს 10 წამს ანდომებს, მისი მაქსიმალური სიჩქარე კი 320 კმ/სთ-ს აღწევს.

”მაზერატი” იაფფასიან სედანს 2014 წელს გამოუშვებს

New Maserati Saloon Coming in 2014

12 ივლისი

”მაზერატის” პრემიუმ კლასის საშუალო ზომის სედანის გამოშვება აქვს გადაწყვეტილი, რომელიც თავისი ფასის მხრივ, გერმანულ ანალოგებს გაეჯიბრება, იტალიური კომპანიის საწარმოო პროგრამაში კი ”კავტროპორტეს” შემდეგი თაობის მოდელზე დაბლა დადგება.

სავარაუდოდ, ახალი ავტომობილი, რომელსაც ჯერ სახელიც არ აქვს, კონკურენციას ”აუდის” A7-ს, ”მერსედეს ბენცის” CLS-ს, ”იაგუარის” XF-ს, ”ბეემვეს” მე-5 სერიას და ”კადილაკის” CTS-ს გაუწევს კონკურენციას. ამასთან, ბაზარზე ავტომობილი 2014 წელს გამოჩნდეა.

ახალ სედანს მყიდვენს ორი ვერსიის სახით შესთავაზებენ. მათგან საბაზო ვერსიის ღირებულება დაახლოებით 68 000 დოლარი იქნება. ამ ფასით, ის კონკურენციას V8 ძრავებით აღჭურვილ ბიზნეს კლასის სედანებს გაუწევს. ტოპ ვერსიის ფასი კი საბაზოსაზე დაახლოებით 20 პროცენტით ძვირი იქნება და ის ამავე კლასის სპორტული ყაიდის გერმანული, ბრიტანული და ამერიკული ავტომობილების კონკურენტი გახდება.

რა თქმა უნდა, ახალი ავტომობილი შეინარჩუნებს ”მაზერატისთვის” დამახასიათებელ საუკეთესო თვისებებს, როგორებიცაა კარგი მართვადობა, განსაკუთრებული სტილი, პრემიუმ ინტერიერი და რა ტქმა უნდა, ბოხხმიანი ძრავები.

ამერიკულ ჟურნალ ”მოტორ ტრენდის” ინფორმაციით, ახალი ავტომობილი შემუშავების პირველ სტადიაზე იმყოფება. მართალია, დღეისათვის ”მაზერატი” ავტომობილებს ძალიან მცირე რაოდენობით აწარმოებს, თუმცა კომპანიას ამ სიტუაციის რადიკალურად შეცვლა სურს. კერძოდ, ”გვირგვინოსნების” შეფი ჰაროლდ ვესტერი იმედოვნებს, რომ მისი კომპანია მალე პრემიუმ სეგმენტის მსოფლიო ბაზრის 10 პრიცენტიან წილს დაიკავებს, რაც ფენომენური შედეგი იქნება.

Sunday, July 11, 2010

”ფოლკსვაგენი” როდსტერ ”ბლიუსპორტს” გამოუშვებს

Volkswagen BlueSport Roadster Approved for Production

11 ივლისი

ბრიტანულმა გამოცემა ”ავტოექსპრესმა” მოიპოვა ინფორმაცია, რომლის შესაბამისადაც, ”ფოლკსვაგენს” დეტროიტის საავტომობილო შოუზე ნაჩვენებ კონცეპტუალურ მოდელ ”ბლიუსპორტ როდსტერის” სერიული წარმოება აქვს გადაწყვეტილი. თუმცა, იმავე წყაროს ცნობით, ეს ავტომობილი კონვეიერზე 2013 წელზე ადრე არ დადგება. მისი ფასი კი სავარაუდოდ, 30 000 დოლარიდან დაიწყება.

ჯურნალის ინფორმაციით, ავტომობილს ძრავი შუაში ექნება მოთავსებული, რისი წყალობითაც, მისი წონა უფრო თანაბრად გადანაწილდება ღერძებს შორის. ამასთან, გამოთავისუფლდება ადგილები ავტომობილის წინა და უკანა ნაწილებში. ავტომობილის წონის შესამცირებლად, მისი შასის დასამზადებლად, ”ფოლკსვაგენი” ალუმინის გამოყენებას აპირებს. ამით კი გაუმჯობესდება ავტომობილის დინამიკური მახასიათებლები, საწვავის ხარჯი და გამონაბოლქვი კი - შემცირდება. წინასწარი მონაცემებით, ავტომობილის წონა სულ რაღაც, 1 200 კილოგრამი იქნება.

საბაზო შესრულებით, როდსტერს მამოძრავებელ ძალას 2.0-ლიტრიანი დიზელის ძრავი მიანიჭებს. გარდა ამისა, მყიდველს 1.4-ლიტრიანი TFSI და 2.0-ლიტრიანი ტურბოძრავით აღჭურვილი მოდელების შეძენის საშუალებაც ექნება. ამ ძრავებს, ”ბლიუსპორტი” გერმანული კომპანიის ორი პოპულარული მოდელის - ”გოლფის” და ”პოლოს” GTI ვერსიებისგან მიიღებს. ყველა ძრავთან შესაწყვილებლად განკუთვნილია 6-საფეხურიანი მექანიკური გადაცემათა კოლოფი, თუმცა შეკვეთით ასევე შესაძლებელი იქნება DSG ტრანსმისიის დაყენება.

გარდა ამისა, 2.0-ლიტრიანი დიზელი აღჭურვილი ვარიანტი გარემოსადმი მეგობრულ ისეთ სისტემებს მიიღებს, როგორებიცაა მუხრუჭების ენერგიის რეგენერაციისა და სტოპ-სტარტის სისტემები. მათი დახმარებით, ავტომობილი 100 კილომეტრის გასავლელად, სულ რაღაც, 5.2 ლიტრ საწვავს იმყოფინებს.

Saturday, July 3, 2010

საჩუქრები ”შევროლე ვოლტის” პირველი მყიდველებისთვის

Free Home Charging Stations for 4,400 Chevrolet Volts

3 ივლისი

”ჯენერალ მოტორსი” თავის ელექტრულ ჰიბრიდ ”შევროლე ვოლტის” პირველ 4 400 მყიდველს დასამუხტ მოწყობილობებს უფასოდ გადასცემს და დაუმონტაჟებს. ასეთი შეთავაზება კი შესაძლებელი გახდა მას შემდგ, რაც აშშ-ის ენერგიის დეპარტამენტმა ამერიკული აღორძინებისა და რეინვესტირების აქტი გამოსცა, რომელიც ტრანსპორტის ელექტრიფიკაციის ინიციატივის ფარგლებში მოხდა.

ამ პროექტებით, ენერგიის დეპარტამენტი შემდეგ მიზნებს ისახავს: ელექტრომობილების დასამუხტი მოწყობილობები მასობრივად გავრცელდეს როგორც საზოგადოებრივი თავშეყრის ადგილებში, ასევე სამსახურებსა და სახლებშიც. ამგვარად, შესაძლებელი გახდება ელექტრომობილების, როგორც იოლად მოსახმარი სატრანსპორტო საშუალებების პოპულარიზაცია და ეკოლოგიისადმი მეგობრული მანქანებიც სწრაფად მოიპოვებს პოპულარობას. მეორე მიზანი კი ელექტრომობილების მოხმარების ასპექტების შესწავლაა, რათა შესაძლებელი იყოს მათ დასამუხტ მოწყობილობათა კონსტრუქციების ოპტიმიზაცია-დახვეწა.

”ბევრი მყიდველი სახლში ”ვოლტის” 120-ვოლტიანი შტეპსელიდან დამუხტვას შეძლებს, რასაც რამდენიმე საათი დასჭირდება. ეს ხალხი სამსახურში ისე ივლის, რომ მხოლოდ აკუმულატორებში დაგროვილ ენერგიას გამოიყენებს. იმ მყიდველებისთვის კი, რომლებსაც სწრაფად დამმუხტავი, 240-ვოლტიანი სისტემის დაყენება ენდომება, ენერგიის დეპარტამენტი ალბათ 1000-2000 დოლარის შეღავათს დააწესებს”, - ამბობს პროგრამა ”შევროლე ვოლტის” წარმოებისა და მარკეტინგის საქმეების დირექტორი ტონი დისეილი.

ამერიკული კომპანია ”შევროლე ვოლტს” მყიდველს დასამუხტ საშუალებებთან ერთად შესთავაზებს. საბაზო კომპლექტაციაში შევა 120-ვოლტიანი სისტემა, თუმცა მსურველებს უფრო სწრაფად დამმუხტავი, 240-ვოლტიანი სისტემის შეძენის საშუალებაც ექნებათ. ამასთან, იმ მყიდველებს, რომლებიც პროგრამით გათვალისწინებულ ქალაქებში არ ცხოვრობენ, მაგრამ მაინც მოისურვებენ ამ ავტომობილის შეძენას, 240-ვოლტიან სისტემას უფასოდ მისცემენ.

ცნობისათვის, ოფიციალური მონაცემების მიხედვით, მარტო აკუმულატორებში დაგროვილი ენერგიით ”შევროლე ვოლტი” მხოლოდ 65 კილომეტრის გავლას შესძლებს, რის შემდეგაც, საქმეში ბენზინის კომპაქტური ძრავი და მასთან დაკავშირებული გენერატორი ჩაერთვებიან, რომლებიც ელექტროძრავებისთვის აუცილებელ ენერგიას გზაშივე გამოიმუშავებენ. ამგვარად, ავტომობილის სვლის სიშორე 560 კილომეტრს მიაღწევს.

”ტესლა” სამოდელო გამას გააფართოებს

Tesla Motors

3 ივლისი

ელონ მუსკი
..............................

ელექტრომობილების მწარმოებელმა ამერიკულმა (კალიფორნიულმა) კომპანია ”ტესლა მოტორსმა” გამოაცხადა, რომ თავისი სამოდელო გამის მნიშვნელოვნად გაფართოებას აპირებს და პლატფორმაზე, რომელსაც ამჟამად მხოლოდ ერთი მოდელისთვის (როდსტერ S) იყენებს მალე სედანის, კომერციული ფურგონის და ქროსოვერის, ან უგზოობის ავტომობილებს გამოუშვებს. რა თქმა უნდა, ყველა მათგანი ელექტრომობილი იქნება.

ამის თაობაზე კომპანიის მთავარმა აღმასრულებელმა და უმსხვილესმა აქციონერმა, ელონ მუსკმა, უოლ სტრიტზე, თავისი კომპანიის აქციების ბირჟაზე გამოტანის ცერემონიაზე განცხადა. ცერემონია ”ტესლა მოტორსის” საქმიანობის რეკლამირებას ემსახურებოდა, რათა აქციონირების პროცესი წარმატებული ყოფილიყო.

”ტესლას” უნივერსალური პლატფორმა
..............................

მუსკის თქმით, უნივერსალურ პლატფორმაზე, აკუმულატორების ბლოკები ძირზე განთავსდება (როგორც ”ნისანის” ელექტრომობილ ”ლიფზე”), რისი წყალობითაც, პლატფორმა კომპაქტურიც გამოვა და მისი წონაც ბორბლებს შორის უკეთ განაწილდება, რაც ავტომობილ(ებ)ის უკეთეს მდგრადობას განაპირობებს.

მუსკმა ისიც თქვა, რომ სედანი როდსტერთან შედარებით, ძალური დანადგარების შეცვლილ სისტემას მიიღებს. კერძოდ, აკუმულატორების გაგრილება ჰაერით კი არა, თხევადი მასით მოხდება, რაც გაგრილების სისტემას უფრო ეფექტურს გახდის. ეს სედანის ღირებულებას გაზრდის, მაგრამ სამაგიეროდ, გაუმჯობესდება გამძლეობა და ენერგოეფექტურობა.

”ტესლას” ელექტრული სედანი და როდსტერი

..............................

რაც შეეხება ”ტესლა მოტორსის” აქციონირების პროცესს. ის წარმოუდგენლად წარმატებული გამოდგა. მის შედეგად, ”ტესლა მოტორსმა” 226 მილიონი დოლარი მიიღო. სულ დაახლოებით 13.3 მილიონი აქცია გაიყიდა, რომელთა საშუალო ფასმაც 17 დოლარი შეადგინა. არადა, ექსპერტთა ვარაუდით, თითო აქციის საშუალო ფასი მაქსიმუმ 14-16 დოლარი უნდა ყოფილიყო. მუსკის თქმით, ამ ტანხას ”ტესლა მოტორსი” საწარმოს დაქირავებასა და მომავალი შესყიდვებისათვის გამოიყენებს.

სხვათა შორის, მუსკმა, ვინც ასევე სისტემა ”პეი პალის” ერთ-ერთი მფლობელია, თავადაც აქტიური მონაწილეობა მიიღო ”ტესლა მოტორსის” აქცინირებაში, რისთვისაც 70 მილიონი დოლარის ინვესტიცია გაიღო. ამ ფულით მან აქციების ფასის სწრაფ ზრდას შეუწყო ხელი - აქციების მოზრდილი პაკეტების შეძენით, ის მათზე მოთხოვნას და შესაბამისად, ფასსაც ზრდიდა.

არადა, ”ტესლას” ასეთი წარმატება მოულოდნელი იყო, რადგან კომპანიას იმ შვიდი წლის განმავლობაში, რაც არსებობს, ჯერ მოგებაზე არ უმუშავია. უფრო მეტიც, ამ დროის განმავლობაში, სულ 230.5 მილიონი დოლარი იზარალა. ეს კი მის აქციონირებას სარისკოდ ხდიდა. სამაგიეროდ, ახლახანს, ”ტესლა მოტორსმა” გარიგება დადო ”ტოიოტასთან”, რომლის ძალითაც, თავისი ელექტრომობილების საწარმოებლად, იაპონური კომპანიის კუთვნილ კალიფორნიულ ქარხანა NUMMI-ს გამოიყენებს. უფრო მეტიც, ამ საწარმოსთვის ”ტოიოტა” 50 მილიონი დოლარის ინვესტიციასაც გაიღებს. სამაგიეროდ, მისთვის ”ტესლას” ელექტრომობილების ტექნოლოგიები ხელმისაწვდომი გახდება.

”ტოიოტა” ჰიბრიდულ სპორტულ ავტომობილებს გამოუშვებს

Toyota Prepares Hybrid Supra, MR2

3 ივლისი

ინტერნეტით გავრცელდა ინფორმაცია იმის შესახებ, რომ ”ტოიოტა” მალე აღადგენს თავის ორ სპორტულ მოდელს - ”სუპრას” და MR2-ს, რომლებსაც უკვე რამდენიმე წელია, აღარ აწარმოებს. ამასთან, ბრიტანულ ჟურნალ ”ავტოქარის” ინფორმაციით, იაპონური კომპანია ორივე ავტომობილს ჰიბრიდული აგრეგატებით აღჭურვავს.

ამავე ჟურნალის მიერ გავრცელებული ინფორმაციით, ”ტოიოტა MR2” ბაზარზე 2013 წელს გამოჩნდება. ეს ავტომობილი აღიჭურვება ჰიბრიდული სისტემით, რომელშიც ელექტროძრავს ბენზინის 1.5-ლიტრიანი აგრეგატი შეუწყვილდება. არადა, ამ ავტომობილისთვის იაპონურ კომპანიას თავიდან ბენზინის V6 ძრავის გამოყენება ჰქონდა გადაწყვეტილი, მაგრამ ბაზარზე ”ჰონდას” CR-Z-ის გამოჩენის შემდეგ, რომელიც უმალ გახდა პოპულარული, გადაწყდა, რომ MR2 ჰიბრიდული აგრეგატით დაბრუნებულიყო.

სხვათა შორის, MR2-ის წარმოების განახლების მთავარი მოთავე იყო ”ტოიოტას” ავტომობილების მთავარი გამომცდელი ჰირომუ ნარუსე, ვინც რამდენიმე დღის წინ, გერმანიის ავტოდრომ ნურბურგრინგის მახლობლად, სუპერ ავტომობილ ”ლექსუს LFA-ს” ახალი მოდიფიკაციის ტესტირებისას დაიღუპა.

რაც შეეხება ”ტოიოტა სუპრას”, ის კონცეპტუალურ მოდელ”ტოიოტა FT-HS-ის” (სურათზე) სტილში შესრულდება. ეს კონცეპცია პირველად საზოგადოების წინაშე სამი წლის წინ გამოჩნდა და კარგი გამოხმაურებები მიიღო. ”ავტოქარი” გვატყობინებს, რომ ”სუპრას” შემუშავება კუპე FT-86-ს ბაზაზე სერიული მოდელის შექმნის პარალელურად ხდება. ამ ავტომობილით კი იაპონური კომპანია პოპულარულ ჰეჩბეკ AE86-ს შეცვლის.

მოსალოდნელია, რომ ახალ ”სუპრაზე” ჰიბრიდული სისტემა წინ განლაგდება, წამყვანი კი უკანა ბორბლები იქნება. ჰიბრიდულ სისტემაში კი ბენზინის 3.5-ლიტრიანი V6 ძრავი და ელექტროძრავები შევა. მისი ჯამური სიმძლავრე კი 400 ცხენის ძალას მიაღწევს.

Friday, July 2, 2010

”ტესლა როდსტერ 2.5 - ოფიციალური დებიუტი

Tesla Roadster 2.5 Official Pictures and Info

2 ივლისი

კალიფორნიულ კომპანია ”ტესლას”, რომელიც ელექტრომობილების წარმოებაზეა სპეციალიზებული, ძალიან წარმატებული პერიოდი აქვს - კომპანიამ ახლახანს გამოუშვა თავისი აქციები და პირველსავე დღეს, მათი გაყიდვით, 226 მილიონი დოლარი მიიღო, უკვე მეორე დღეს კი აქციების ფასი 40.5 პროცენტით გაიზარდა.

ამ დღეებშივე, გუდვუდის (ბრიტანეთი) სიჩქარის ფესტივალზე, კომპანიის ერთადერთი მოდელის, ელექტრომობილ ”როდსტერ 2.5-ის” განახლებული ვერსიის დებიუტი შედგა. ამასთან, გუდვუდშივე, ”ტესლას” ხელმძღვანელობამ გამოაცხადა, რომ ელექტრული სედანი ”მოდელ S” უკვე შემუშავებულია და ის ახლა სრულყოფის ფაზაში იმყოფება.

განახლებულ ”როდსტერს” სიახლეები ვიზუალურადაც ეტყობა და ისინი ძარის შიგნითაცაა და ავტომობილის ტექნოლოგიურ მხარეს ეხება. კერძოდ, ახალია წინა ბამპერი, რომელსაც გვერდებზე ორი სავენტილაციო ჰაერის ამღები ”ლაყუჩი” აქვს. შეიცვალა ბამპერის ქვეშ მოთავსებული ფალსრადიატორის ბადის ფორმა. შეცვლილია უკანა ბამპერიც, რომელთანც დაკავშირებულია უკანა დიფუზორი.

სიახლეებია სალონშიც. კერძოდ, შეიცვალა სავარძლები, რომლებიც მწარმოებლის ინფორმაციით, წინებზე გაცილებით კომფორტულია, თუმცა ესეც სპორტული სტილისაა. ამიერიდან სალონის გასაწყობად ახალი, ძვირფასი მასალები გამოიყენება, მყიდველის სურვილის შემთხვევაში კი სალონში უკანა ხედვის კამერასაც დააყენებენ. ცენტრალურ კონსოლზე შვიდდუიმიანი მონიტორი დააყენეს, რომელზეც სანავიგაციო სისტემის პარამეტრების გამოტანაა შესაძლებელი.

ისევე როგორც მის წინამორბედს, განახლებულ სპორტულ ელექტრომობილსაც მყიდველს ორ ვერსიად (როდსტერ და როდსტერ სპორტ) შესთავაზებენ. ორივე შემთხვევაში, ავტომობილი 288-ცხენისძალიანი ელექტროძრავითაა აღჭურვილი< თუმცა ”სპორტის” ვარიანტში მას უფრო მეტი მაბრუნი მომენტი აქვს. ასეთი ვერსია ადგილიდან 100 კმ/სთ სიჩქარეს 3.7 წამში ავითარებს, რაც საბაზო ”როდსტერის” აჩქარებაზე 0.2 წამით ნაკლებია. დაბოლოს, ორივე ვერსიის შემთხვევაში, მაქსიმალური სიჩქარე 200 კმ/სთ-ია.

ელექტროძრავი ლითიუმ-იონური აკუმულატორების ბლოკისგან იკვებება, რომლის 240-ვოლტიანი შტეპსელიდან სრულად დამუხტვასაც 3.5 საათი სჭირდბა. ელექტრომობილის სვლის სიშორე კი 390 კილომეტრია.

”ტესლას” მიერ გუდვუდში გამოქვეყნებული ინფორმაციით, მის მიერ 1200 ელექტრომობილს მსოფლიოს 20-ზე მეტ ქვეყანში უკვე გამოუჩნდა მყიდველი.

”მერსედეს ბენცმა” კუპე CL კლასი განაახლა

Mercedes-Benz CL-Class Facelift

2 ივლისი

”მერსედეს ბენცმა” თავისი პოპულარული კუპეს, CL კლასის განახლებული ვერსიის პირველი ფოტოები და მის შესახებ მწირი ინფორმაცია ინტერნეტით გაავრცელა. შტუტგარტული კომპანიის ახალი წესის შესაბამისად, განახლებული ავტომობილის სახელი S-კლასის კუპე უნდა ყოფილიყო, თუმცა ამჯერად ეს წესი დაირღვა და მას ამ ავტომობილზე ახალი თაობის მოდელის გამოშვების შემდეგ გამოიყენებენ.

წინამორბედისგან განახლებულ ავტომობილს გარეგნულად რამდენიმე ელემენტი განასხვავებს. მაგალითად, რადიატორის ბადე, მთავარი ფარები, რომლებსაც შუქდიოდების სექციები აქვს და ოდნავ შეცვლილი წინა ბამპერი, რომლის ქვედა ნაქილშიც ასევე შუქდიოდური ნისლსაწინააღმდეგო ფარებია ჩასმული. უკანა ნაწილში უკანა ფარები, საბარგულის სახურავი და გამოსაბოლქვი მილები შეიცვალა. ამ უკანასკნელს ამიერიდან ოთხკუთხა ფორმა ექნება.

CL კლასის განახლებული კუპე აღჭურვილია ბენზინის ახალი 4.7-ლიტრიანი წყვილ ტურბოკომპრესორიანი V8 ძრავით (ბლიუდირექტ), რომელთანაც მოდერნიზებული 7-საფეხურიანი ავტომატური კოლოფია შეწყვილებული. ტრანსმისიასთან უნისონში მოქმედებს სისტემა სტოპ-სტარტი და მუხრუჭების კინეტიკური ენერგიის რეკუპერაციის სისტემა.

ძრავის მაქსიმალური სიმძლავრე 429 ცხენის ძალაა, რაც 12 პროცენტით მეტია წინამორბედი აგრეგატის (5.5-ლიტრიანი V8) მაქსიმუმზე. ამასთან, წინა ძრავი, რომლის სიმძლავრეც 382 ცხენის ძალაა, 10-15 პროცენტით მეტ საწვავსაც მოიხმარს და ატმოსფეროში დაახლოებით 23 პროცენტით მეტ CO2-ს გამოჰყოფს. ახალი აგრეგატით, CL500/CL550 (მეორე ვერსია ამერიკული ბაზრისთვისაა) 4მატიკი 100 კმ/სთ სიჩქარეს 4.9 წამში კრეფს, რაც წინა მოდელის ანალოგიურ მაჩვენებელზე 0.5 წამით ნაკლებია.

მომავალში, CL კლასის კუპე ასევე აღიჭურვება 5.5-ლიტრიან V12 ორ ტურბოიან ძრავს (ვერსია CL600), რომლის მაქსიმალური სიმძლავრეც 510 ცხენის ძალაა. ამ აგრეგატით, ლუქსის კლასის კუპეს 100 კმ/სთ სიჩქარის ასაკრეფად 4.5 წამი ეყოფა. ორივე ძრავის შემთხვევაში, ავტომობილის მაქსიმალური სიჩქარე ხელოვნურად იქნება შეზღუდული 250 კმ/სთ-ით.

იმ მყიდველებისთვის, რომლებსაც მეტი ცხენის ძალა და კომფორტი უნდათ, მოგვიანებით, შტუტგარტელების პარტნიორი და მათსავე მფლობელობაში მყოფი კომპანია AMG ორ ახალ - CL63 AMG და CL65 AMG მოდელებს დაამზადებს.

CL კლასის განახლებული კუპეს მსოფლიო პრემიერა პარიზის საავტომობილო გამოფენაზე ჩატარდება, რის შემდეგაც შტუტგარტელები მასზე შეკვეთების მიღებას დაიწყებენ.

დაახლოებით იქნება ”ბეემვე მეგასიტი”

BMW Megacity: first official pics

2 ივლისი

ბრიტანულმა ჟურნალმა ”ავროქარმა” გამოაქვეყნა ”ბეემვეს” საქალაქო ელექტრომობილის ფოტოები და მის შესახებ მცირე ინფორმაცია. ჟურნალის ცნობით, ავტომობილს, რომლის პირობითი სახელწოდებაა ”მეგა სიტი ვიჰაიქლ”, ანუ MCV, 4 დასაჯდომი ადგილი ექნება, მისი გაყიდვები კი 2013 წელს დაიწყება.

მიუხედავად იმისა, რომ ახლახანს ბავარიულმა კომპანიამ გამოაცხადა, პროექტ ”მეგასიტის” მიხედვით შექმნილ ავტომობილს საკუთარი ბრენდით გავყიდიო, ”ავტოქარი” ირწმუნება, რომ ამ ელექტრომობილისთვის გერმანული კომპანია სუბ ბრენდს შექმნის.

”ავტოქარის” ინფორმაციით, მცირეგაბარიტიანი ელექტრომობილი 100-კილოვატიანი (ეს დაახლოებით 134 ცხენის ძალაა) ელექტროძრავით აღიჭურვება, რომლის მიერ გამომუშავებულ მაბრუნ მომენტსაც უკანა წამყვანი ბორბლები მიიღებს. ამასთან, შემდგომში შეიძლება ბავარიელებმა ”მეგასიტის” ბაზაზე, გაზრდილი სვლის სიშორის მქონე ჰიბრიდიც გამოუშვან, რომელშიც კომპაქტური შიდაწვის ძრავისა და გენერატორის ტანდემი, აკუმულატორების დასამუხტად იმუშავებს.

”მეგასიტის” ძარა კარბონის კომპოზიციური მასალისგან დამზადდება. ძარას ისეთივე სიხისტე ექნება, როგორც ფოლადისას ექნებოდა. სამაგიროდ, ის ალუმინის ანალოგიურ სტრუქტურაზე დაახლოებით 50 პროცენტით მსუბუქი იქნება. ”ბეემვეში” ”მეგასიტის” ძარის არქიტექტურას რევოლუციურს უწოდებენ.

ბავარიელები თვლიან, რომ პრემიუმ სეგმენტში მომავალში წარმატებას ის კომპანიები მიაღწევენ, რომლებიც თავიანთი ავტომობილების წარმოებისას, ულტრათანამედროვე ტექნოლოგიებს გამოიყენებენ. ასეთი ტექნოლოგიები კი მეტალზე გაცილებით ეფექტურიც იქნება, ეკონომიურიც და გარემოსადმი მეგობრულიც.

”მეგასიტისთვის” კარბონის ნაწილების საწარმოებლად, ”ბეემვემ” ამ საქმეზე სპეციალიზებულ კომპანია SGL-სთან ერთად, ერთობლივი საწარმო ჩამოაყალიბა. კიდევ ერთი ერთობლივი პროექტით, ბავარიელები ”ბოშთან” და ”სამსუნგთან” ერთად, ლითიუმ-იონურ აკუმულატორებს გამოუშვებენ.

ცნობისათვის, სხვა კომპანიებთან ”ბეემვეს” კოოპერაცია ამით არ შემოიფარგლება - გერმანული კომპანია მალე პარტნიორულ ურთიერთობას ჩინურ ”ბრილიანს ავტომოტივთან” დაიწყებს, რისი მიზანიც, კიდევ ერთი ელექტრომობილის შემუშავებაა.

Thursday, July 1, 2010

”დელტაუინგის” ინდიქარის კონცეპცია

DeltaWing IndyCar Concept

1 ივლისი

”დელტაუინგი” ინდიანაეპოლისური კომპანიაა და სარბოლი ტექნიკის დამზადებასა და სრულყოფაზეა სპეციალიზებული. აქამდე ამ კომპანიის შესახებ ალბათ ავტოსპორტის მხოლოდ ამერიკელმა ფანებმა თუ იცოდნენ, მაგრამ მალე შესაძლოა ის ინდიქარის გუნდებისთვის ბოლიდების ერთპიროვნული მიმწოდებელი გახდეს. ყოველ შემთხვევაში, ”დელტაუინგის” ხელმძღვანელობას ამის დიდი სურვილი აქვს, რაც იმაში გამოიხატა, რომ კომპანიამ ჩიკაგოს ავტო შოუზე ინდიქარის მომავლის კონცეპტუალური მოდელი წარადგინა.
ანალოგიური კონცეპტუალური მოდელები კიდევ სამმა კომპანიამ - ამერიკულმა ”სუიფტმა”, იტალიურმა ”დალარამ” და ბრიტანულმა ”ლოლამაც” შეიმუშავეს, თუმცა ”დელტაუინგის” ავტომობილი სხვებთან შედარებით რევოლუციური იყო. თავად განსაჯეთ, გარდა იმისა, რომ უჩვეულო ფორმებით გამოირჩევა, ავტომობილს უნიკალური მახასიათებლებიც აქვს. კერძოდ, როგორც კონცეპციის ავტორები ირწმუნებიან, მათი ბოლოდი, მიუხედავად იმისა, რომ ახლანდელებზე ორჯერ ნაკლები სიმძლავრის ძრავი ექნება, ოვალურ ტრეკებზე მაინც საშუალო 350 კმ/სთ სიჩქარით ივლის. და, რაც არანაკლებ მნიშვნელოვანია, ორჯერ ნაკლებ საწვავსაც მოიხმარს.

”დღეს თქვენ ხედავთ, თუ როგორი შეიძლება იყოს მომავლის სარბოლი ავტომობილები. ამ რადიკალურ პროტოტიპს ღიაბორბლიანი მანქანების რბოლების თვისობრივად ახალ დონეზე აყვანა შეუძლია, როგორც ინჟინრული, ასევე სანახაობრივი თვალსაზრისითაც”, - ამბობს ”დელტაუინგის” მთავარი აღმასრულებელი დენ პარტელი და დასძენს, რომ თანამედროვე ავოინდუსტრიის ტრენდი, რომელიც მწარმოებლების ეკოლოგიისადმი ზრუნვით გამოიხატება, ავტოსპორტშიც, კერძოდ კი ინდიქარშიც უნდა აისახოს. ამიტომ, მისმა კომპანიამ, როდესაც კონცეპტუალურ სარბოლ ავტომობილზე მუშაობდა, ყველაზე თანამედროვე ტექნოლოგიები გამოიყენა.

კონცეპტუალური ავტომობილი ჩვეულებრივზე მსუბუქია და შემხვედრი ჰაერისადმი შემცირებული წინააღმდეგობის კოეფიციენტი აქვს. სხვათა შორის, სპეციალურად ამ კონცეპციისთვის, საბურავების მწარმოებელმა ამერიკულმა კომპანია ”ფაირსტოუნმა” საბურავები (სერია ფაირჰოკი) მოამზადა. ამ საბურავებს ”დელტაუინგის” სარბოლი მანქანის შესაფერისი მახასიათებლები აქვს.

კონცეპტუალურ ავტომობილს დიზაინის არაერთი საინტერესო ელემენტი აქვს:

1. მაგალითად ავიღოთ მისი წინა ”ღერძი”, რომელიც უჩვეულოდ ვიწროა. სამაგიეროდ, შემხვედრ ჰაერს მცირე წინააღმდეგობას უწევს, მსუბუქია და რაც არანაკლებ მნიშვნელოვანია, თითქმის დახურული ბორბლებითაც ნაკლებად აშფოთებს ჰაერის შემხვედრ ნაკადს.

2. დიზაინის მეორე თავისებურება ისაა, რომ ავტომობილს წაწვეტებული და მეტად გარსშემოდენილი, ერთგვარი დელტასებრი ფორმა აქვს. ეს კი აეროდინამიკურ დატვირთვას ზრდის და მიუხედავად იმისა, რომ მისი ცხვირი მეტისმეტად ვიწროა, საერთო ჯამში, მის ქვეშ წარმოქმნილი გრაუნდ ეფექტის წყალობით, მანქანას შესაშური მდგრადობა ექნება. ეს კი წრის გავლის საშუალო სიჩქარეს გაზრდის. თანაც, არც უკან მომავალი მანქანისთვის შეიქმნება აეროდინამიკური წინააღმდეგობა, რაც რბოლის დროს გასწრებათა რიცხვს გაზრდის და რბოლის სანახაობრივ მხარეს გააუმჯობესებს.

3. როგორც წესი, ინდიქარის ბოლიდებს ტრეკზე რბოლისას ძალიან თხელი უკანა ფრთები აქვთ, ეს კი იმისათვის, რომ სწორზე წინააღმდეგობა არ გაიზარდოს. ოვალებზე რბოლისას, ამ მანქანებისთვის უფრო მნიშვნელოვანი ფრთის ტორსული სტაბილიზატორებია, რომლებიც მდგრადობას უზრუნველყოფენ.

”დელტაუინგის” მანქანას უკანა ფრთა საერთოდ არ აქვს, მის მოვალეობას კი მისი უკანა ნაწილის ერთგვარი ”კაბა” ასრულებს. სტაბილიზატორი კი ერთი დარჩა და ისიც უზარმაზარი - თვითმფრინავის ტიპისა და ის დახრილი ვირაჟების გავლისას, ავტომობილის უკეთეს მდგრადობას უზრუნველყოფს.

”დელტაუინგი” ირწმუნება, რომ მისი პროექტით შექმნილი მანქანა, რომლის პროტოტიპიც მალე დამზადდება, ინდქარის ახლანდელ მანქანებზე ორჯერ მსუბუქიც უნდა იყოს და მას დაახლოებით ორჯერ ნაკლები აეროდინამიკური წინააღმდეგობაც ექნება. ამგვარად, ის გაცილებით ნაკლებ სიმძლავრეს მოითხოვს იმისათვის, რომ ბოლიდის საშუალო სიჩქარე 350 კმ/სთ იყოს. ამასთან, თითქმის განახევრდება საწვავის მოხმარება.

დენ პარტელი ამბობს, რომ მისი კომპანიის კონცეპციის მიერ შექმნილი პროტოტიპი მზად აგვისტოში უნდა იყოს, შემდგ კი, ინდიქარის სერიის ორგანიზატორ ინდი რეისინგ ლიგთან ერთად, მისი ტესტირება და სრულყოფის პროცესი დაიწყება. და თუ ტესტირების პროცესი წარმატებული იქნა, დიდი შანსია იმისა, რომ 2012 წლიდან, ინდიქარის სერიის რბოლებში სწორედ ასეთი მანქანებით იასპარეზონ.

”დელტაუინგის” კონცეპტუალური სარბოლი ავტომობილი ამერიკელ ინჟინერ ბენ ბოულბის ეკუთვნის, რომელმაც მისი შემუშავება სუფთა ფურცლიდან შარშან დაიწყო ჩიპ განასის საჯინიბოს ოფისში. მისი პროექტის მიხედვით, პირველი პროტოტიპი 2.0-ლიტრიანი 4-ცილინდრიანი ტურბოძრავით აღიჭურვება. ჯერჯერობით უცნობია ამ აგრეგატის სიმძლავრე. სამაგიეროდ, კომპიუტერული მოდელირებს წყალობით დადგინდა, რომ ავტომობილს 300 ცხენის ძალაც ეყოფა იმისათვის, რომ მისმა საშუალო სიჩქარემ ტრეკზე 350 კმ/სთ-ს მიაღწიოს. ამასთან, არნახულად დიდი იქნება მისი სამუშაო რესურსიც - დაახლოებით 6 400 კილომეტრი, რაც ინდიქარის თანამედროვე ძრავების შესაბამის მაჩვენებელზე დაახლოებით ორჯერ მეტია.

პარტელის თქმით, ასეთი, სრულად დაკომპლექტებული ავტომობილის ღირებულება დაახლოებით 600 000 დოლარი იქნება, რაც მისი კომპანიის კონცეპციის კიდევ ერთი დიდი პლიუსია.