აირტონ სენას ფ1-ის პირველი მანქანა აუქციონზე გაიყიდება

Ayrton Senna's First F1 Racecar from 1984 Hits the Auction Block

22 მარტი

სარბოლი ავტომობილი, სახელად „ტოულმენ TG184-2“, რომლითაც ლეგენდარულმა აირტონ სენამ, 1984 წელს ფორმულა ერთში პირველი სეზონი გაატარა, მალე აუქციონზე გაიყიდება. აუქციონს, სახელწოდებით „სპრინგ სეილ“, 16 მაისს, სააუქციონო სახლი „სილვერსტოუნ უქშენზის“ მასპინძლობით ჩატარდება.

ამ ავტომობილით, აირტონ სენამ 1984 წელს მონაკოს დიდ პრიზზე, კოკისპირულ წვიმაში, მეორე ადგილი დაიკავა. მოგვიანებით, ბრიტანულ ეტაპზე კვარცხლბეკის მესამე საფეხური დაიკავა, კანადაში კი მე-7 ადგილს დასჯერდა. ეს კი საკმარისი აღმოჩნდა იმისათვის, რომ მომავალი სეზონისთვის ის „ლოტუსში“ მიეწვიათ.

ბოლო 16 წლის განმავლობაში, ეს ავტომობილი კერძო კოლექციაში იმყოფებოდა. უფრო ადრე ვინ იყო მისი მფლობელი, ამაზე „სილვერსტოუნ უქშენზის“ რელიზი არაფერს გვატყობინებს. სამაგიეროდ გვატყოვინებს, რომ ავტომობილი სრულადაა აღდგენილი და მუშა მდგომარეობაში იმყოფება.

ჯერჯერობით უცნობია მისი სასტარტო ფასი. სააუქციონო სახლი არც იმ თანხას ასახელებს, რომლის მიღებასაც ბოლიდის გაყიდვით იმედოვნებს. თუმცა, თუ გავითვალისწინებთ, რომ იმავე „სილვერსტოუნ ოქშენზს“ არცთუ დიდი ხნის წინ, სენას ჩაფხუტი და სარბოლი კომბინეზონი შესაბამისად, 74 750 და 35 650 გირვანქა სტერლინგად აქვს გაყიდული, ადვილი სავარაუდოა, რომ სარბოლ ავტომობილში დიდი ფულის მიღებას იმედოვნებს.