ავტო პანორამა

დეტროიტის ავტო შოუ

”ფოლკსვაგენმა” კომპაქტური კუპე წარმოადგინა

12 იანვარი

შარშან ”ფოლკსვაგენმა” საზოგადოებას არაერთი სიახლე უჩვენა, რომელთაგან ზოგი მაშინვე დადგა კონვეიერზე, ზოგს კი წარმოების პერსპექტივა აქვს. თუმცა, ვოლფსბურგელთა აქტივობა ამით არ მცირდება. უფრო მეტიც, არსებობს მოსაზრება, რომ წელს გერმანული გიგანტი კიდევ უფრო მეტ სიახლეს გვიჩვენებს.

ამ სიახლეთაგან კი პირველი მერცხალი ახალი კომპაქტური კუპეა, რომლის ხილვაც ამ დღეებში დეტროიტის ავტო შოუს დამთვალიერებლებს შეუძლიათ. არსებობს იმის ვარაუდი, რომ ამ ავტომობილის წარმოების დაწყების შემდეგ, მას ”ჯეტა კუპეს” დაარქმევენ. ამ ვარაუდის საფუძველს ის ფაქტი იძლევა, რომ ავტომობილი კომპაქტურ სედან ”ჯეტას” ბაზაზეა აგებული.

დეტროიტში გამოფენილი კომპაქტური კუპეს სიგრძე 4.54 მეტრი, სიგანე 1.78 მეტრი, სიმაღლე კი 1.41 მეტრია. რაც მთავარია, ის ჰიბრიდული ძალური დანადგარითაა აღჭურვილი - კაპოტქვეშ განლაგებულია TSI სერიის 1.4-ლიტრიანი ტურბოძრავი, რომელიც 150 ცხენის ძალას იძლევა. მასთან უნისონში მუშაობს 27-ცხენისძალიანი ელექტროძრავი, რომელსაც ენერგიით ლითიუმ-იონური აკუმულატორების ბლოკი კვებავს. შიდაწვის ძრავთან 7-საფეხურიანი გადაცემათა კოლოფია (DSG) დაკავშირებული.

”ფოლკსვაგენი” აცხადებს, რომ კომპაქტურ კუპეს მარტო ელექტროძრავითაც შეუძლია გადაადგილება, თუმცა ამ რეჟიმში მოძრაობისას, სვლის სიშორე არ კონკრეტდება. არც ისაა ცნობილი, თუ რა დროს სჭირდება აკუმულატორების სრულად დამუხტვას.

სამაგიეროდ, პრეს რელიზში მითითებულია, რომ 100 კილომეტრის გასავლელად, კომპაქტური კუპე მხოლოდ 4.2 ლიტრ ბენზინს მოიხმარს, ყოველი კილომეტრის გავლისას კი ის ატმოსფეროს მხოლოდ 98 გრამი ნახშირორჟანგით აბინძურებს. და ეს იმ დროს, როდესაც ავტომობილი საკმაოდ ტემპერამენტიანია - ადგილიდან 100 კმ/სთ სიჩქარეს ის 8.1 წამში კრეფს, მისი მაქსიმალური სიჩქარე კი 227 კმ/სთ-ს აღწევს.

”ფოლკსვაგენის” სამოდელო გამაში, ახალი კომპაქტური კუპე ”სიროკოსა” და CC-ს შორის ნიშას შეავსებს. მოსალოდნელია, რომ თავიდან ის მხოლოდ აშშ-ის ბაზარზე გაიყიდება, თუმცა მოგვიანებით, ის ევროპისა და სხვა რეგიონების ბაზრებზეც გამოჩნდება.