ავტო პანორამა

კომპაქტური ”ლენდ როვერი” საგზაო გამოცდებს გადის

Land Rover LRX

19 მაისი

საერთო სარგებლობის ტრასებზე გამოსაცდელად გამოყვანილი ავტომობილების ფოტოს გადაღებაში დახელოვნებულმა ბრიტანელმა პაპარაცებმა ტესტების დროს, ”ლენდ როვერის” ახალი კამუფლირებული ქროსოვერის პროტოტიპი გამოიჭირეს, რომლის გაყიდვებიც მალე უნდა დაიწყოს.

ეს არის ”ლენდ როვერის” კონცეპტუალურ მოდელ LRX-ის ბაზაზე შექმნილი ავტომობილი, რომელიც ამ კომპანიის ისტორიაში პირველი წინა წამყვანბორბლიანი ავტომობილი გახდება. მართალია, საცდელი ავტომობილი სხვადასხვა ფერადაა აჭრელებული, თუმცა მაინც აშკარად ჩანს, რომ ის კონცეპტუალური LRX-სგან გარეგნობით თითქმის არ განსხვავდება.

მართალია, ამ ავტომობილის საბაზო ვერსიას წამყვანი წინა ბორბლები ექნება, თუმცა კომპანია მყიდველს მის სრულამძრავიან ვარიანტსაც შესთავაზებს. ძრავების გამაში კი მთავარი 2.2-ლიტრიანი დიზელი იქნება, რომელიც 180 ცხენის ძალას ავითარებს. სხვათა შორის, ამ ძრავს ინგლისური კომპანია ფრანგული ”PSA პეჟო სიტროენისგან” მიიღებს. ამასთან, ნებისმიერი ძრავის შემთხვევაში, ავტომობილის საბაზო კომპლექტაციაში სისტემა სტოპ-სტარტიც შევა.

მართალია, საცდელი ავტომობილი ძლიერ ჰგავს კონცეპტუალურ LRX-ს, მაგრამ მის სერიულ ვარიანტს ეს სახელი არ შერჩება. ახალი ავტომობილის მსოფლიო პრემიერა პარიზის ავტო შოუზე ჩატარდება, კომპანიის შოურუმებში კი ის ამ წლის ბოლოს გამოჩნდება.

ახალი ქროსოვერის წინა ამძრავიანი ვერსიის საბაზო ღირებულება 34 700 ევრო, სრულამძრავიანისა კი 40 500 ევრო იქნება.