Tuesday, July 17, 2012

ესპანური ასპიტი „ბეემვეს“ V8 ძრავით

Aspid Teases BMW V8-Powered GT-21 Invictus Sports Car
17 ივლისი
სუპერ ავტომობილების მწარმოებელმა ესპანურმა კომპანია „ასპიდ ქარზმა“ გამოაქვეყნა პირველი ფოტო ტიზერები თავისი ახალი ავტომობილისა, რომელსაც სახელად „GT-21 ინვიქტუსი“ ეწოდა. ამ ავტომობილში ჩასაჯდომი ფორმულაა 2+2 და ის ამ კომპანიის პირველი ავტომობილის, ლეგენდარულ „ლოტუს 7-ის“ შთაგონებით შექმნილ „სუპერ სპორტსის“ (SS-ის) უფრო სრულყოფილი და დიდი ვარიანტია.

„ჩვენს მიერ ახლახანს შექმნილი „GT-21 ინვიქტუსი“, ჩვენი კომპანიის პირველი ავტომობილის, „სუპერ სპორტის“ ერთგვარი დამაგვირგვინებელია. თანაც, მასზე ზორბა და მძლავრია. ძალიან ძნელი იყო ამ ავტომობილის გარეგნობის შემუშავება, მაგრამ საბედნიეროდ, ჩვენს კომპანიას ახალგაზრდა დიზაინერთა კარგი გუნდი ჰყავს, რომელმაც ამოცანას შესანიშნავად გაართვა თავი“, - ამბობს ესპანური კომპანიის დამაარსებელი და მთავარი ინჟინერი იგნასიო ფერნანდეს როდრიგესი.
„GT-21 ინვიქტუსი“ მსუბუქ სივრცულ ჩარჩოზეა აგებული, რომლის შექმნის დროსაც გამოყენებულია საავიაციო ალუმინისა და ზემტკიცე მსუბუქი ფოლადის ფურცლები. ძარა კომპოზიტური მასალებისგანაა შექმნილი. საერთო ჯამში, ავტომობილი (ზეთისა და გამაგრილებელი სითხის, ასევე საწვავის გარეშე) მხოლოდ 990 კილოგრამს იწონის.
„GT-21 ინვიქტუსი“ „სუპერ სპორტზე“ 700 მილიმეტრით გრძელია. მისი სიგრძე 4447 მილიმეტრია, სიგანე 1883 მილიმეტრი, სიმაღლე კი - 1226 მილიმეტრი. ის აღჭურვილია „ბეემვეს“ წარმოების 4.4-ლიტრიანი V8 ტურბოძრავით, რომელიც 450 ცხენის ძალას გამოიმუშავებს. ორმაგი ქუროს დახმარებით, ძრავთან ფ1-ის ტიპის ტრანსმისიაა დაკავშირებული, რომლის საფეხურებიც, სააჭის რგოლის უკან მოთავსებული ბერკეტებით იცვლება. მის მიერ გადამუშავებული მამოძრავებელი ძალა, უკანა წამყვან ბორბლებს გადაეცემა. შედარებისთვის, „სუპერ სპორტის“ კაპოტქვეშ 2.0-ლიტრიანი ოთხცილინდრიანი ტურბოძრავი დგას, რომელიც 398 ცხენის ძალას იძლევა.
ესპანური კომპანიის განცხადებით, მის მეორე სუპერ ავტომობილს ადგილიდან 100 კმ/სთ სიჩქარის აკრეფა დაახლოებით სამ წამში შეუძლია, მისი მაქსიმალური სიჩქარე კი 300 კმ/სთ-ს აღწევს.
„ასპიდ ქარზი“ აცხადებს, რომ წლიურად მხოლოდ 250 ცალი „GT-21 ინვიქტუსის“ წარმოებას გეგმავს, მის ფასს კი მოგვიანებით, წარმოების დაწყების წინ გამოაცხადებს.


ასევე წაიკითხეთ

”აუდი A9” - ჰიბრიდული სპორტული სედანის კონცეპცია

No comments:

Post a Comment