პლანეტის ყველაზე სწრაფი უსინათლო

Fastest Blind Man on Earth

10 ოქტომბერი

თუ გაგიგიათ ოდესმე, რომ უსინათლო ადამიანი ავტომობილს მართავდეს? ალბათ არა. მითუმეტეს, ძნელი წარმოსადგენია, რომ უსინათლოებს სიჩქარის რეკორდიც კი ჰქონდეთ. აქვთ და მერე როგორი!

დურბანვილელმა (სამხრეთ აფრიკა) ჰაინ წაგნერმა უსინათლოთათვის პლანეტის ახალი რეკორდი დაამყარა - 322.5 კმ/სთ განავითარა. თავისი რეკორდისთვის ვაგნერმა ”მერსედეს-ბენც SL 65 ბლექ სერის” გამოიყენა. რეკორდის დამყარებაში კი მას ნავიგატორი რეი უეიკფილდი დაეხმარა.

რეკორდის დასამყარებლად, წყვილმა აპინგტონის საერთაშორისო აეროპორტის ასაფრენი ზოლი გამოიყენა. მას შემდეგ, რაც მაქსიმალურ სიჩქარეს მიაღწია, ვაგნერმა ის მცირე ხნით შეინარჩუნა და სარეკორდო სიჩქარით 1 000 მეტრი გაიარა.

რეკორდი რომ დაამყარა, ვაგნერს შიშზე ჰკითხეს, რაზეც მან მოკლედ მოჭრა: გიჟი უნდა იყო, რომ არ შეგეშინდესო! მოკლედ, მან თავის ყოფასაც სძლია, შიშსაც და სამაგიეროდ, გინესის რეკორდების წიგნში შევა.

მაგრამ ამით დაკმაყოფილებას ის არ აპირებს. თავგადასავლების დაუოკებელი მაძიებლის გეგმაში კიდევ უფრო თავზეხელაღებული და სახიფათო მისია შედის: ის სამგზავრო ბოინგით ლონდონიდან იოჰანესბურგამდე გადაფრენას აპირებს. რა თქმა უნდა, ამჯერადაც ნავიგატორი დაეხმარება. რაც ყველაზე საინტერესოა, ფრენისას მას მგზავრებიც ეყოლება.

სურათზე: ჰაინ ვაგნერი (მარცხნივ) და მისი ნავიგატორი რეი უეიკფილდი

”ჰამერი” ჩინელებმა იყიდეს

GM signs Hummer sale deal with Sichuan Tengzhong

10 ოქტომბერი

”ჯენერალ მოტორსმა” უგზოობის ავტომობილების მწარმოებელი ლეგენდარული კომპანია ”ჰამერი” ჩინურ კონგლომერატ ”სიჩუან ტენჟონ ჰევი ინდასტრიალ მეშინერის” მიჰყიდა. მართალია, მხარეებს გარიგების ფინანსური მხარე არ გაუმჟღავნებიათ, მაგრამ ინტერნეტით გავრცელებული ცნობა გვაუწყებს, რომ ჩინურ მხარეს ეს გარიგება 150 მილიონი დოლარი დაუჯდა.

ამგვარად, ამერიკული ავტომწარმოებელი აგრძელებს იმ კომპანიების ტავიდან მოშორებას, რომლებიც ბოლო 20 წლის განმავლობაში შეიძინა. რამდენიმე დღის წინ, ”გენერლებს” ”სატურნის” გაყიდვა ჩაუფლავდათ. ამ მარკის შეძენას ”პენსკე აუტომოტივი” აპირებდა, მაგრამ გარიგების დადებამდე ერთი დღით ადრე, როჯერ პენსკემ ”სატურნის” ყიდვა გადაიფიქრა. ჰოდა, ახლა ”გენერლებს” ისღა დარჩენიათ, რომ ოცი წლის წინ შექმნილი მარკა გააუქმონ.

”ტენჟონი” მთავარი მონაწილეა იმ კონსორციუმისა, რომელიც ”ჰამერს” ყიდულობს. მძიმე მანქანათმშენებლობის ჩინური გიგანტი ”ჰამერის” 80 პროცენტს მიიღებს. დანარჩენი 20 რპოცენტი კი ჩინელ ბიზნესმენ სუალან დუოჟის ხელში გადავა, რომლის ბიზნესიც ჩინური ქიმიური გიგანტი ”ლუმენა” შედის.

გარიგების მიუხედავად, ”ჰამერის” პრესმდივანი ნიკ რიჩარდსი აცხადებს, რომ გაყიდვის პროცესის დასრულებამდე, გარიგებამ ამერიკული და ჩინური მარეგულირებლებისგან ვიზა უნდა აიღოს.

გარიგების შესაბამისად, ”ტენჟონი” ”ჰამერის” ბიზნესს, მის სავაჭრო ნიშანს და ფრენჩაიზულ გარიგებებს ყიდულობს. ”ჯენერალ მოტორსთან” შეთანხმების გარიგების მომენტში, ”ჰამერს” 158 ფრენჩაიზული კონტრაქტი აქვს. ჩინური კომპანიის ხელში გადავა ”ჰამერის” საწარმოები და სერვის ცენტრები. ამასთან, გარდამავალ პერიოდში, ჩინელების ხელში გადასული ”ჰამერი” მაკომპლექტებლების გარკვეულ ნაწილს ”ჯენერალ მოტორსისგან” მიიღებს.

მხარეებს შორის მიღწეული შეთანხმებით, ”ჯენერალ მოტორსის” ორი ამერიკული ქარხანა 2011 წლამდე გააგრძელებს H3-ის და H3T-ის, ასევე სამხედრო ”ჰამერის” და H2-ის წარმოებას. ”ჰამერის” მთავარი აღმასრულებელი ჯეიმს ტეილორი, ვინც ადრე ”კადილაკის” შეფი იყო, თავის თანამდებობაზე დარჩება.

სამოქალაქო ავტომობილების წარმოება ”ჰამერმა” 1992 წელს დაიწყო. თავიდან წლიური გაყიდვები 1 000-ს ძლივს აღწევდა. მაგრამ შემდეგ კომპანია ”ჯენერალ მოტორსმა” შეიძინ, რომლის ხელშიც, გაყიდვების პიკმა 2006 წელს 71 524-ს მიაღწია.

მაგრამ საწვავის ფასის უკიდურესმა ზრდამ კომპანია ძლიერ დააზარალა. შედეგად, წელს სექტემბრის ჩათვლით, ”ჰამერს” მხოლოდ 8 193 ავტომობილი ჰქონდა გაყიდული. ”ჯენერალ მოტორსი” იმედოვნებდა, რომ ”ჰამერს” 500 მილიონ დოლარად გაჰყიდდა, მაგრამ საბოლოოდ, 150 მილიონსაც დაყაბულდა.

”ბეემვე” სუბკომპაქტური ავტომობილის გამოშვებას აპირებს

BMW UKL1 to Surface 2013?

9 ოქტომბერი

ორი წლის წინ, ინტერნეტით გავრცელდა ინფორმაცია იმის შესახებ, რომ ”ბეემვე” მეტოქე ”აუდისთვის” კონკურენციის გასაძლიერებლად, სუბკომპაქტური, ეგრეთ წოდებული ნულოვანი სერიის ავტომობილის გამოშვების პერსპექტივას განიხილავდა. მაშინ გამოითქმებოდა ვარაუდი, რომ ასეთი ავტომობილები ბავარიული კომპანიის დილერთა შოურუმებში 2010 წლიდან გამოჩნდებოდა.

დღეს მსგავსი ინფორმაცია ინტერნეტში ისევ გამოჩნდა. ოღონდ თარიღმა გადაიწია - ახალი ვერსიით, ბავარიული სუბკომპაქტი ბაზარზე 2013 წელს გამოჩნდება. ამ ავტომობილით კი, ”ბეემვე” კონკურენციას ”აუდი A1-ს” და A-კლასის ”მერსედესს” გაუწევს.

ახალ ავტომობილს ნულოვან კლასად აღარ მოიხსენიებენ. მას პირობითად (უფრო სოლიდური) UKL1 უწოდეს, რაც ქვეკომპაქტკლასს (უნტერ კომპაკტკლასსე). გავრცელებული ინფორმაციით, მისი შემუშავება უკვე დაწყებულია და როცა ბაზარზე გამოვა, ის ბავარიული კომპანიის სამოდელო გამაში, მინისა და პირველი სრიის ”ბეემვეს” შორის დაიკავებს ადგილს.

ახალი ავტომობილი ”მინის” მოდერნიზებულ პლატფორმაზე დაემყნობა. UKL1 სამი ტიპის ძარით დამზადდება. ესენია სამ და ხუთკარიანი ჰეჩბეკები და ორადგილიანი როდსტერი. ინგლისურ ჟურნალ ”ქარ მეგზინის” ვერსიით, ახალი ავტომობილი ”ბეემვეს” უახლესი, სამ და ოთხცილინდრიან ძრავებს მიიღებს.

სხვათა შორის, ეს ინფორმაცია დროში საეჭვოდ დაემთხვა ახლახანს გავრცელებულ ცნობას იმის შესახებ, რომ ”ბეემვე” ინგლისური ”მინის” გერმანიაში წარმოებასაც გეგმავს. ამის მიზეზად ის გარემოება სახელდება, რომ ”მინის” ოქსფორდული ქარხნის სიმძლავრე, ამ ავტომობილზე მზარდ მოთხოვნილების დაკმაყოფილებას ვეღარ ახერხებს. მაგრამ როგორც ჩანს, ბავარიელებს გერმანულ საწარმოში ”მინის” ბაზაზე შექმნილი სუბკომპაქტის წარმოება აქვთ განზრახული. თუმცა აქ მოყოლილ არცერთ ინფორმაციას ”ბეემვე” ჯერჯერობით არ ადასტურებს.

”ვოლვო” S60-ის წარმოებას მერმის დაიწყებს

Volvo S60

8 ოქტომბერი

მიუხედავად იმისა, რომ ”ვოლვოს” მომავალი პატრონის ვინაობა ჯერაც არ გარკვეულა, შვედურ კომპანიაში საწარმოო პროგრამის განახლებაზე ზრუნვა არ წყდება. თავის ახალ სედან S60-ის მსოფლიო პრემიერას ”ვოლვო”, რომელიც დღეს ”ფორდის” ჯგუფში შედის, მერმის, პარიზის საავტომობილო შოუზე გეგმავს, მის წარმოებას ოდნავ მოგვიანებით დაიწყებს.

ჯერჯერობით, შვედური კომპანია თავისი სიახლის შესახებ ინფორმაციას არ ავრცელებს, თუმცა ინტერნეტით ვრცელდება ინფორმაცია იმის შესახებ, რომ გარეგნულად ის ამავე სახელწოდების კონცეპტუალური მოდელის მსგავსი იქნება. კონვეიერამდე მას მხოლოდ ქრომირებული დეტალები და კონცეპტუალური მოდელებისთვის დამახასიათებელ ელემენტები არ გაჰყვება.

კონცეპტუალური S60-ის პირველი ჩვენება დეტროიტის წლევანდელ ავტოშოუზე შედგა. ეს ავტომობილი აღჭურვილი იყო ოთხცილინდრიანი, 1.6-ლიტრიანი ტურბოძრავით, რომელიც სისტემა GTDi-ითაა (გაზოლინ ტურბოჩეირჯდ დირექტ ინჯექშნ - ბენზინის ტურბოდამჭირხნიანი, უშუალო შეფრქვევით) აღჭურვილი და 180 ცხენის ძალას გამოიმუშავებს.

”ვოლვოს” ძრავების განყოფილების ვიცე პრეზიდენტი დერეკ კრაბი ამბობს, რომ სისტემა GTDi საუკეთესო საშუალებაა საწვავისა და ატმოსფეროში CO2-ის გამონაბოლქვის შესამცირებლად. მის გარდა, ამ ავტომობილზე კიდევ არაერთი სისტემა გამოიყენება, რომლებიც ავტომობილის ეკონომიურობასა და ეკოლოგიურობას აუმჯობესებს.

”ვოლვოს” განმარტებით, ახალი S60 კონკურენციას ბაზრის ისეთ ლიდერებს გაუწევს, როგორებიცაა ”ბეემვეს” მე-3 სერიის სედანი, ”აუდი A4” და C კლასის ”მერსედესი”.

გერმანული ”ელექტრო-მგელი” სუპერავტომობილების კლასში

E-Wolf’s Electric Supercars

7 ოქტომბერი

ამ წლის განმავლობაში, თითქმის ყოველთვიურად, რომელიმე ავტომწარმოებელი საზოგადოებას ახალ სპორტულ ელექტრომობილს უჩვენებს. ელექტრომობილების წარმოება თანდათან ერთგვარ მოდად იქცა, თუმცა არც ისე ხშირია შემთხვევები, როდესაც პრეზენტაციაზე სრულფასოვანი კონცეპციის ხილვა შეიძლება.

მაგრამ იგივეს ვერ ვიტყვით პატარა გერმანულ ფირმა ”E-ვოლფზე”, რომელმაც წარმოებისთვის ორი სპორტული ელექტრომიბილი - როდსტერი და კუპე მოამზადა და არ მალავს, რომ ”ფერარისთან” კონკურენციას აპირებს.

ორივე ავტომობილი საქსონიის მსუბუქი ტექნოლოგიების ცენტრთან და დრეზდენის რექნიკური უნივერსიტეტის მსუბუქი სტრუქტურებისა და პოლიმერული ტექნოლოგიების თანამშრომლებთან თანამშრომლობით შეიქმნა. ამასთან, ”E-ვოლფმა” როდსტერი E-1 ფრანკფურტის საავტომობილო შოუზე გამოფინა, E-2-ის წარმოების დაწყებას კი ორ წელიწადში გეგმავს.

ორივე ავტომობილის ძირითადი ღირსება მათი სიმსუბუქეა. როდსტერი E-1 თითქმის 500 კილოგრამს იწონის, მაგრამ სერიოზული მინუსიც აქვს - ის მხოლოდ იმ ადამიანებს ”იტანს”, რომელთა წონაც 68 კილოგრამის ფარგლებშია.

ავტომობილი აღჭურვილია 150-ცხენისძალიანი ელექტროძრავით, რომლის მეშვეობითაც, e-1 0-დან 100 კმ/სთ-მდე აჩქარებას 5 წამზე ნაკლებში ასწრებს, მისი მაქსიმალური სიჩქარე კი 229 კმ/სთ-ს აღწევს. ლითიუმ-იონური აკუმულატორების ერთი დამუხტვით კი ავტომობილს 320 კილომეტრის გავლა შეუძლია.

ამ ერთადგილიანი როდსტერის შეკვეთები ”E-ვოლფს” უკვე დაწყებული აქვს და თითოეულს 150 000 ევროდ ჰყიდის.

რაც შეეხება e-2-ს, ამ ავტომობილის გამოშვება 2011 წლიდან იგეგმება. ის ოთხი ელექტროძრავით აღიჭურვება, რომლებიც თითო ბორბალს მოემსახურება. ოთხივე ძრავის ჯამური სიმძლავრე 544 ცხენის ძალა იქნება. ავტომობილის წონა კი 900 კილოგრამზე ოდნავ მეტი იქნება.

ჯერჯერობით, e-2 მხოლოდ კომპიუტერში არსებობს, თუმცა პროექტის ავტორები ახლავე ირწმუნებიან, რომ მათი მეორე შედევრის მაქსიმალური სიჩქარე 250 კმ/სთ-ს მიაღწევს. და რაც მთავარია, საწარმოო ვერსიას ზუსტად ისეთი გარეგნობა ექნება, როგორიც ამჟამად, კომპიუტერულ ესკიზებში აქვს.

”ტოიოტას” და ”სუბარუს” ერთობლივი შვილობილი

Toyota Reveals FT-86 Concept

7 ოქტომბერი

ერთი წელი გავიდა მას შემდეგ, რაც ინტერნეტით გავრცელდა ცნობა იმის შესახებ, რომ ”ტოიოტა” და ”სუბარუ” ერთობლივად აპირებდნენ სპორტული ავტომობილის შექმნას. მაშინ ბევრმა ეს ჭორადაც ჩათვალა, მაგრამ თურმე სიმართლე ყოფილა.

ორმა იაპონურმა კომპანიამ თავიანთი ერთობლივი პროდუქტის შესახებ პირველი ინფორმაცია გაავრცელეს. ავტომობილი, რომელსაც სახელად ”ტოიოტა FT-86” შეარქვეს, ”სუბარუ იმპრეზას” მოდიფიცირებულ ბაზაზეა შექმნილი. მისი პირველი ჩვენება ტოკიოს საავტომობილო შოუზე, ამ თვის ბოლოს გაიმართება.

”ტოიოტა FT-86” არის კუპეს ტიპის ავტომობილი, რომელსაც სალონში 2+2 ადგილი აქვს, გარეგნულად კი ამავე კლასის ”ლექსუს IS-F-ს” ჰგავს. მაგრამ ავტომობილის ყველაზე საინტერესო ნაწილი მისი ძრავია, რომელიც ”სუბარუსგანაა” ნასესხები და რა თქმა უნდა, ცილინდრების (სულ ოთხი აქვს - 2-2 თითო რიგში) ორი რიგის ოპოზიტური განლაგებით გამოირჩევა. ძრავის სამუშაო მოცულობა 2.0 ლიტრია, ოღონდ თუ ”სუბარუს” აგრეგატი ტურბოკომპრესორიანია, FT-86-ზე ის ”ატმოსფერულად” სუნთქავს.

ძრავთან დაკავშირებულია 6-საფეხურიანი მექანიკური გადაცემათა კოლოფი, რომლისმიერ გადამუშავებულ მაბრუნ მომენტსაც მხოლოდ უკანა, წამყვანი ბორბლები ღებულობს. შეგახსენებთ, რომ ”სუბარუ” თავის ავტომობილებზე ძირითადად სრულამძრავიან ტრანსმისიებს იყენებს.

”ტოიოტას” წარმომადგენლები განმარტავენ, რომ ოპოზიტური ძრავით, მათ სიმძიმის ცენტრის დაბლა დაწევა მოახერხეს. ტურბოს გარეშე კი ეს ძრავი იმის გამო გამოიყენეს, რომ ასე ის უფრო მსუბუქია და იაფიც ღირს. როგორც ორი იაპონური კომპანიის წარმომადგენლები ირწმუნებიან, FT-86 შესანიშნავი მართვადობითა და დინამიურობით გამოირჩევა. ოღონდ, ჯერ კონკრეტული მონაცემები არ ქვეყნდება.

”ტოიოტა” ამ ახალი ავტომობილის გაყიდვების დაწყებას 2011 წლიდან გეგმავს. შესაძლოა, წარმოების დაწყებამდე, ამ ავტომობილის გარეგნობასა და აღჭურვილობაშიც რაღაც შეიცვალოს. თუმცა იაპონური კომპანიები პირობას დებენ, რომ წონის რადიკალურად გაზრდას არ დაუშვებენ.

მოსალოდნელია, რომ ”ტოიოტა FT-86-ის” ღირებულება 25 000 დოლარის ფარგლებში იქნება.

”ასტონ მარტინი” წარმოებას ამრავალფეროვნებს

Aston Martin

6 ოქტომბერი

ვან-77

..............................

ავტოინდუსტრიის ისტორიაში ერთ-ერთი ყველაზე მძიმე კრიზისის მიუხედავად, ინგლისური კომპანია ”ასტონ მარტინი” მაინც ბიზნესის გაფართოებაზე ზრუნავ და ამისათვი თავისი სამოდელო გამის სამი ახალი ავტომობილით შევსება აქვს გადაწყვეტილი. გარდა ამისა, არსებულ მოდელებსაც მნიშვნელოვან გადახალისებას უპირებს.

ამ სამეულიდან ”ასტონ მარტინისთვის” ყველაზე არატრადიციული, მისი თაყვანისმცემლებისთვის კი ყველაზე მოულოდნელია ჯუჯა ”სიგნიტი”, რომლის გაყიდვების დაწყებაც მერმისიდანაა მოსალოდნელი. ჩვენი ბლოგის მკითხველს ეს ავტომობილი 7 ივლისის გამოშვებაში გავაცანით. ის ”ტოიოტა iQ-ს” ბაზაზე იქმნება და მისი მთავარი დანიშნულება ისაა, რომ ”ასტონ მარტინის” მიერ წარმოებული ავტომობილების გამონაბოლქვში ნახშირორჟანგის შემცველობის საშუალო მაჩვენებელი შემცირდეს. ამგვარად, ინგლისური კომპანია შეძლებს, მიუახლოვდეს გამონაბოლქვზე ევროკავშირის ახალ, უმკაცრეს სტანდარტებს, რომლებიც ძალაში 2012 წელს შევა.

სიგნიტი

....................................

წინასწარი მონაცემებით, ”სიგნიტი” მხოლოდ ევროპაში გაიყიდება და მის შეძენას მხოლოდ ისინი შეძლებენ, ვინც ”ასტონ მარტინის” სხვა მოდელებს შეიძენენ. რა თქმა უნდა, ინგლისური კომპანია iQ-ს ძირეულად შეცვლის. შეიცვლება როგორც ავტომობილის ინტერიერი, ისე გარეგნობაც. მოსალოდნელია, რომ ”ასტონ მარტინის” სამოსში გამოწყობილი iQ-ს საწყისი ფასი 32 000 დოლარი, იაპონურ ავტომობილზე დაახლოებით ორჯერ მეტი იქნება.

რეპიდი

..............................

გარდა ამისა, ”ასტონ მარტინი” მალე დაიწყებს სუპერ ავტომობილ ”ვან-77-ის” წარმოებას. სახელში რიცხვი იმის მანიშნებელია, რომ კომპანია სულ 77 ცალი ამ ავტომობილის გამოშვებას აპიებს და მისი მყიდველი 77 რჩეულთაგან ერთ-ერთი იქნება.

ავტომობილის ექსკლუზიურობას მისი მონაცემები სრულად შეესაბამება. ის აღჭურვილია 7.3-ლიტრიანი V12 ძრავით, რომელიც 740 ცხენის ძალას ავითარებს. მყიდველს საშუალება ექნება, თავისი გემოვნების და სურვილების შესაბამისად შეუკვეთოს ინტერიერის თითქმის ყველა ელემენტი. სამაგიეროდ, შენაძენი მას 2 მილიონი დოლარი დაუჯდება.

მესამე მოდელია ოთხკარიანი კუპე (ან კუპეს სტილის სედანი, ან ფასტბეკი) ”რეპიდი”, რომლის მსოფლიო პრემიერა ახლახანს, ფრანკფურტის საავტომობილო შოუზე შედგა და რომლის გაყიდვებიც მერმის დაიწყება. ჯერჯერობით, ამ ავტომობილის ფასი არ დაზუსტებულა, თუმცა მოსალოდნელია, რომ ის 200 000 დოლარის ფარგლებში იქნება.

რაც შეეხება არსებული მოდელების განახლებას, კომპანია მერმის ლიმიტირებული ”ვანტიჯის” გამოშვებას გეგმავს, რომელიც ახალი V12 ძრავით აღიჭურვება. ჯერჯერობით არ იგეგმება ორი მოდელის - DB9-ს და DBS-ის განახლება, ან მოდიფიცირება.

დაბოლოს, მერმის, ჟენევის ავტო შოუზე მოსალოდნელია ”ასტონ მარტინის” მიერ თავისი ცნობილი ბრენდის, ”ლაგონდას” გაცოცხლება. ამ მარკით კი პირვლ რიგში, ქროსოვერის წარმოება იგეგმება. ოღონდ, არა ისეთის, რომელიც კომპანიამ ჟენევაში წელს წარადგინა და საშინელი გამოხმაურება მიიღო.

”ტოიოტას” კიდევ ერთი ელექტრომობილი

Toyota FT-EV II

6 ოქტომბერი

ტოკიოს ავტო შოუსთვის იაპონურმა კომპანია ”ტოიოტამ” თავისი მორიგი ელექტრომობილი - მიკროავტომობილ iQ-ს ბაზაზე დამზადებული ”ტოიოტა FT-EV II” (ფიუჩა ტოიოტა ელექტრიკ ვიჰაიქლ II) მოამზადა. მართალია, ავტომობილი ულტრამცირე გაბარიტებით (სიგრძე 2.73, სიგანე 1.68, სიმაღლე 1.49 მეტრი) გამოირჩევა, მაგრამ მასში მაინც ადგილი ოთხი ადამიანისთვისაა.
ავტომობილის მამოძრავებელ მაბრუნ მომენტს ელექტროძრავი გამოიმუშავებს, რომელიც ენერგიით ლითიუმ-იონური აკუმულატორების ბლოკისგან მარაგდება. მათში დაგროვილი ენერგია კი საკმარისია იმისათვის, რომ ჯუჯა ავტომობილმა 90 კილომეტრი გაიაროს, მისი მაქსიმალური სიჩქარე კი 100 კმ/სთ-ს აღწევს.

სალონში არსებული ოთხი ადგილი ვახსენეთ, მაგრამ სრულფასოვანი მხოლოდ ორია - წინები. უკანებზე კი ზრდასრული ადამიანი გაჭირვებით თუ მოთავსდება. მაგრამ ამაზე გაცილებით საინტერესო ელექტრომობილის მართვის უცნაური საშუალებაა - საჭის ტრადიციულ რგოლს სალონში ვერ ნახავთ, მის ადგილას კი ჯოისტიკი დაგხვდებათ, რომელიც მძღოლის ბრძანებებს ელექტროსადენების დახმარებით შეასრულებს.

ჯერჯერობით დაუდასტურებელი ინფორმაციით, ”ტოიოტა” ამ ჯუჯა ელექტრომობილის სერიულ წარმოებას გეგმავს. და თუ ასეც მოხდა, ”ტოიოტა FT-EV II-ს” მსგავსი ელექტრომობილი ბაზარზე 2012 წელს გამოჩნდება.

”აუდი” ელექტრომობილ e-ტრონს გამოუშვებს

Audi Confirms E-Tron For Production

6 ოქტომბერი

”აუდიმ” ოფიციალურად დაადასტურა, რომ ფრანკფურტში გამოფენილი კონცეპტუალური e-ტრონის ბაზაზე, სერიული ელექტრომობილის წარმოებას გეგმავს.

შეგახსენებთ, რომ e-ტრონი სპორტულ მოდელ R8-ს ბაზაზეა დამზადებული და ის ოთხი ელექტროძრავითაა აღჭურვილი, რომლებიც თითო ბორბალს ემსახურება. ძრავების ჯამური სიმძლავრე 313 ცხენის ძალას აღწევს, მათ კი ელექტროენერგიით ლითიუმ-იონური აკუმულატორების ბლოკი ამარაგებს.

აკუმულატორების დამუხტვა პლაგ-ინ სისტემით, საყოფაცხოვრებო ქსელიდან ხდება. მათი სრული დამუხტვისთვის კი 6-8 საათია საჭირო. აკუმულატორებში დაგროვილი ენერგია საკმარისია იმისათვის, რომ ავტომობილმა შეჩერებლად დაახლოებით 250 კილომეტრის გავლა შესძლოს.

”აუდის” მონაცემებით, ფრანკფურტში წარმოდგენილ სრულფასოვან ავტომობილს ადგილიდან 100 კმ/სთ სიჩქარის აკრეფა 4. წამში შეუძლია, 60-დან 120 კმ/სთ-მდე 4.1 წამი სჭირდება, მისი მაქსიმალური სიჩქარე კი 200 კმ/სთ-ს სღწევს.

თუმცა ჯერჯერობით უცნობია, სერიული ავტომობილიც იმავე აგრეგატებით აღიჭურვება, თუ მისთვის გერმანული კომპანია უფრო კომპრომისულ ვარიანტს აირჩევს. კომპრომისულში იგულისხმება ის, რომ ლექტროძრავების და აკუმულატორების რაოდენობის შემცირება, ავტომობილის ფასსაც დასწევს, რაც მის კონკურენტუნარტიანობაზე დადებითად აისახება.

უახლოეს ორ წელიწადში, ”აუდი” e-ტრონის ბაზაზე საცდელ პროტოტიპებს დაამზადებს, 2012 წელს კი ამ ავტომობილის სერიულ წარმოებასაც დაიწყებს. გარდა ამისა, გერმანულ კომპანია თავისი სამოდელო გამის სხვა ავტომობილების ბაზაზეც აპირებს ელექტრომობილების წარმოებას. მათ შორის, ერთ-ერთი პირველი, რომელიც ბაზარზე გამოჩნდება, საქალაქო სუბკომპაქტური ავტომობილი იქნება, რომელიც ”ფოლკსვაგენის” კონცეპტუალურ ”უპ!-ის” ბაზაზე დამზადდება.

”ნისანი” ელექტრომობილ ”ლიფზე” შეკვეთების მიღებას დაიწყებს

Nissan Leaf

4 ოქტომბერი

”ნისანმა” გამოაცხადა, რომ მომავალი წლის გაზაფხულიდან, თავის კომპაქტურ ელექტრომობილ ”ლიფზე” ამერიკაში შეკვეთების მიღებას დაიწყება, ავტომობილის მიწოდებას კი იმავე წლის მეორე ნახევარში შეუდგება.

პლაგ-ინ სისტემით აღჭურვილი, ნულოვანი გამონაბოლქვის მქონე ამ ავტომობილის ოფიციალური პრეზენტაცია ორი თვის წინ ჩატარდა და კომპანიის მონაცემებით, მისით დაინტერესება, მარტო ჩრდილოეთ ამერიკაში, დაახლოებით 22 000 ადამიანზე მეტმა გამოხატა.

ამასთან, ამ ადამიანების დაახლოებით 70 პროცენტი იმ შტატებში ცხოვრობს და მოღვაწეობს, სადაც ”ნისანი” თავის ”ლიფს” პირველ რიგში შეიტანს. მათგან თითქმის ნახევარმა კი განაცხადა, რომ ამ ელექტრომობილის შეძენა, რაც შეიძლება მალე სურთ, დანარჩენმა 45-მა პროცენტმა კი განაცხადა, რომ ელექტრომობილის (ნებისმიერი მარკის) შეძენას უახლოეს ორ წელიწადში აპირებს.

ჩრდილოეთ, ცენტრალურ და სამხრეთ ამერიკაში ”ნისანის” ოპერაციების ხელმძღვანელი კარლოს ტავარესი ამბობს, რომ კომპანიის მიზანია, სანამ ”ლიფის” მიწოდებას დაიწყებს, ამ ავტომობილზე 20 000 შეკვეთის მიღება მაინც მოასწროს.

იაპონური კომპანიის განცხადებით, ”ნისან ლიფს” პირველ რიგში, ამერიკელი მყიდველი მიიღებს. ეს ნოემბერში მოხდება. ამერიკელთაგან კი ამ ავტომობილს კალიფორნიელი შემკვეთები მიიღებენ. სწორედ კალიფორნიაში აიღებს სტარტს საპრომოუშენო ტური, რომლის მიზანიც იმ ბაზრების მოვლაა და იქაური მყიდველებისთვის ”ლიფის” გაცნობაა, სადაც ეს ელექტრომობილი უნდა გაიყიდოს.

ჩვენი ბლოგის მუდმივი მკითხველი ”ნისან ლიფს” აგვისტოს პრეზენტაციიდან იცნობს. მათ კი, ვისაც მის შესახებ არაფერი სმენია, ვეტყვით, რომ მსოფლიოს პირველი მასობრივი ელექტრომობილი ”ნისანის” პოპულარულ ჰეჩბეკ ”ტიიდას” ზომისაა, თუმცა სრულიად ახალ პლატფორმაზეა ბაზირებული. ელექტრომობილი აღჭურვილია 107-ცხენისძალიანი ელექტროძრავით, რომელიც ელექტროენერგიას ლითიუმ-იონური აკუმულატორების ბლოკისგან ღებულობს. პლაგ-ინ სისტემის მეშვეობით, ეს აკუმულატორები ენერგიას საყოფაცხოვრებო შტეპსელიდან ივსებენ, მათი ტევადობა კი საკმარისია იმისათვის, რომ ”ლიფმა” შეუჩერებლად 160 კილომეტრი გაგატაროთ.

თავიდან, ამერიკაში გასაყიდ ”ლიფს” ”ნისანი” იაპონიაში აწარმოებს, მაგრამ მოსალოდნელია, რომ 2012 წლიდან, ამ ავტომობილის წარმოებას ”ნისანის” ამერიკული ქარხანაც აითვისებს, რომელიც შტატ ტენესის ქალაქ სმირნაში მდებარეობს.

ამ ქარხნის მოდერნიზაციისთვის იაპონურ კომპანიას 2 მილიარდი დოლარის ინვესტიცია აქვს გათვალისწინებული. ამუშავების შემდეგ კი (2012 წლიდან) იქ წლიურად 150 000 ცალი ”ლიფის” და 200 000 ცალი ლითიუმ-იონური აკუმულატორის ბლოკის წარმოება იქნება შესაძლებელი.

”მაკლარენმა” დაშლილი MP4-12C გვაჩვენა

McLaren MP4-12C

3 ოქტომბერი

როდესაც ავტომწარმოებლები ახალ მოდელს ამზადებენ, ეს გასაიდუმლოებულ ვითარებაში ხდება. მაგრამ ახალი ავტომობილის შესახებ თუნდაც მწირი ინფორმაცია კიდევ უფრო მიუწვდომელია, თუ საქმე სუპერ ავტომობილს ეხება, ისეთს, როგორიც ”მაკლარენის” უახლესი MP4-12C არის.
მზიდი ელემენტი

.....................................................

მაგრამ როგორც კი ავტომობილი ბაზარზე გამოჩნდება, რა თქმა უნდა, მისი დამალვა, კონკურენტების გარდა, აღარავის აწყობს. შესაბამისად, პოტენციური მყიდველის მისაზიდად, თავისი სიახლის რეკლამირებისთვის, მწარმოებელი ხშირად იმაზე მეტ ინფორმაციასაც კი ავრცელებს, ვიდრე საჭიროა.
უკანა საკიდარი

..................................................

სწორედ ასე მოიქცა ”მაკლარენი”, რომელმაც თავისი MP4-12C, რომ იტყვიან, ძვლებამდე გააშიშვლა და მის შესახებ დაწვრილებითი ინფორმაცია, სპეციალურად შექმნილ საიტზე გამოაქვეყნა. ასე განსაჯეთ, საიტზე ის ფოტოც მოხვდა, რომელზეც ავტომობილი დაშლილი სახითაა აღბეჭდილი. ძარის გარდა, მასზე ყველა მსხვილი და მეტნაკლებად საპასუხისმგებლო დეტალი და კვანძია გამოსახული. ამ ფოტოზე ცალკე ნახავთ ძრავს, გადაცემათა კოლოფს და ტრანსმისიის სხვა ნაწილებს, საკიდარს დაშლილი სახით, მუხრუჭებს, საჭის მექანიზმს, რადიატორებს და სხვას.

ძრავი

................................................

ეს საიტი საინტერესოა იმ ადამისნებისთვის, რომლებსაც ჯიბე ამ შესანიშნავი ავტომობილის საშუალებას აძლევს, არამედ მათთვისაც, ვისაც საავტომობილო საინჟინრო საქმე აინტერესებს.

”ჩვენთვის ძალიან მნიშვნელოვანია, ”მაკლარენ აუტმოტივის” მანქანების პოტენციურ მყიდველს ზოგადი წარმოდგენა შევუქმნათ იმაზე, თუ მისთვის რის მიყიდვას ვაპირებთ. მათ საკუთარი თვალით უნდა ნახონ ის, რასაც ჩვენ სარეკლამო რგოლებით ვთავაზობთ. ასე უფრო დარწმუნდებიან იმაში, რომ MP4-12C დინამიურობისა და ეფექტურობის ჱვალსაზრისით, სპორტული ავტომობილების ბაზარზე ახალ სტანდარტებს აწესებს. ეს ავტომობილი შოურუმებში 2011 წელს გამოჩნდება, მანამდე კი მას პოტენციური მყიდველი სწორედ ამ სატის მეშვეობით გაიცნობს”, - ამბობს ”მაკლარენ აუტომოტივის” მარკეტინგის განყოფილების შეფი ლაიან დეილი.

მათთვის, ვისაც ამ საიტით MP4-12C-ის უფრო ახლოს გაცნობა სურთ, გაიცანით:

http://www.mclarenautomotive.com/uk/default.aspx#/p11/explode

”ბუგატი” ”გალიბიერ 16C-ს” გამოუშვებს

Bugatti Galibier 16C

3 ოქტომბერი

”ბუგატის” კონცეპტუალურ სედან ”გალიბიერ 16C-ს” მსოფლიო პრემიერა ფრანკფურტის საავტომობილო გამოფენაზე შედგა, მაგრამ იქ კომპანიას არაფერი უთქვამს იმის შესახებ, აპირებს თუ არა ამ ავტომობილის წარმოებას. მაგრამ ავტო შოუს დასრულებიდან რამდენიმე დღეში გავრცელდა ხმები იმის შესახებ, რომ ფრანკფურტში მიღებული კარგი გამოხმაურების გამო, ამ ბრწყინვალე ავტომობილს მალე მწვანე შუქს აუნთებენ.

სპორტული ”ვეირონისგან” განსხვავებით, ”გალიბიერი” სიჩქარის დემონი არაა და მასში აქცენტი სიმდიდრესა და კომფორტზეა გაკეთებული. ერთი შეხედვით, ამის დასტურად, ტყავითა და ძვირფასი ხის მასალებით გაწყობილი სალონი გამოდგება, სადაც მხოლოდ ოთხი სავარძელი დაგხვდებათ.

ძრავი იგივეა, რაც ”ვეირონზე” – 8.0-ლიტრიანი W16, რომელსაც ოთხი ტურბოკომპრესორის ნაცვლად, ორი მექანიკური დამჭირხნი ემსახურება. ეგ კიდევ არაფერი, კომპანიის იჟინრებმა ამ აგრეგატის ტემპერამენტი ხელოვნურად შეზღუდეს და თუ ”ვეირონზე” ძრავს 1 000 ცხენის ძალა აქვს, ”გალიბიერზე” 800 ცხენის ძალითაც კმაყოფილდება. გადაბმულობის ორდისკოიანი ქუროს მეშვეობით, ძრავს 8-საფეხურიანი ავტომატური კოლოფი უკავშირდება.

”გალიბიერის” ცისფერსისხლისნობას ის ფაქტიც უსვამს ხაზს, რომ ავტომობილი ორ ფერში - სარკესავით გაპრიალებული ალუმინისა და კარბონის შავ ფერებშია გამოწყობილი. სავარაუდოდ, წარმოების დაწყების შემდეგაც, ორფეროვანი მოტივი დარჩება, თუმცა ფერთა შეხამებას ალბათ მყიდველი თავისი გემოვნებით შეარჩევს.

დაბოლოს. რა დროს ამაზე ლაპარაკია, მაგრამ მოსალოდნელია, რომ ”ბუგატი” გალიბიერის ფასი დაახლოებით 1.45 მილიონი დოლარი იქნება. სავარაუდოდ, ამ ავტომობილის წარმოება მერმის დაიწყება.

”ფოლკსვაგენი” უკვე მეშვიდე თაობის ”გოლფს” ამზადებს

Volkswagen Golf MkVII

3 ოქტომბერი

მეშვიდე თაობის ”გოლფი” საგზაო ტესტებს გადის

..............................................................................................

ჯერ მხოლოდ ერთი წელია, რაც ”ფოლკსვაგენმა” მეექვსე თაობის ”გოლფის” გაყიდვა დაიწყო, წარმოებისთვის კი უკვე ამზადებს ახალ, მეშვიდე ”გოლფს”, რომელიც სავარაუდოდ, ბაზარზე 2012 წელს გამოჩნდება.

ახალი ავტომობილის პლატფორმა უკვე გადის საგზაო ტესტებს, მისი ძარის დიზაინი კი ჯერაც შემუშავების სტადიაშია. რა თქმა უნდა, მასზე მუშაობა გასაიდუმლოებულ ვითარებაში მიმდინარეობს, მაგრამ ზოგიერთმა ნიუანსმა პრესაში მაინც გაჟონა და ამაში დამნაშავენი ვოლფსბურგული კომპანიის ის თანამშრომლები არიან, რომლებმაც კონცეპტუალური L1-ის პრომო კლიპი ჩაწერეს.

კადრი L1-ის პრომო კლიპიდან

................................................................

საქმე ისაა, რომ კლიპის ერთ კადრში, უკანა პლანზე მეშვიდე ”გოლფის” დიზაინის შემუშავების პროცესი მოხვდა. ავტომობილის თიხის სკულპტურა უკვე დასრულებულია და კადრში ჩანს, თუ როგორ მუშაობენ დიზაინერები ავტომობილის ძარის ცალკეულ ელემენტებზე.

რა თქმა უნდა, ყოველივე ”ფოლკსვაგენის” ხელმძღვანელობამაც შენიშნა და ის კადრები, რომლებზეც ახალ ”გოლფზე” მუშაობის პროცესია ასახული, კლიპიდან ამოიღეს, მაგრამ უკვე გვიანი იყო, რადგან გერმანულ ჟურნალ ”აუტო მოტორ უნდ შპორტის” სპეციალისტებმა ეს მომენტი ცალკეულ კადრებად ამოიღეს და, რა თქმა უნდა, გაავრცელეს.

ტესტირების პროცესში გადაღებული ფოტოების და კლიპიდან ”მოპარული” კადრის მიხედვით შეიძლება ითქვას, რომ ახალი ”გოლფი” იმ სტილში სრულდება, რომელიც ვოლფსბურგელებმა უკვე გამოიყენეს ახალ ”სიროკოსა” და ”პოლოზე”. ესე იგი, ავტომობილს წინ წამოწეული ცხვირი და წინა თაობის მოდელთან შედარებით დაწვრილებული წინა ფარები ექნება.

მაგრამ იბადება კითხვა - რისი ბრალია, რომ მწარმოებელმა თავისი პოპულარული ავტომობილის მე-6 თაობის მოდელს ასეთი ხანმოკლე არსებობა არგუნა? მიზეზი ძალიან მარტივია - მეექვსე ”გოლფი” მეხუთის ბაზაზეა შექმნილი და ფაქტობრივად, მისი მოდიფიცირებული ვარიანტია. შეიძლება ითქვას, რომ განახლებული მეხუთე ”გოლფია”.

კონცერნის ვოლფსბურგული შტაბბინიდან გავრცელებული კონფიდენციური ინფორმაციით, მეექვსე ”გოლფის” წარმოება 2011 წლის დეკემბერში შეწყდება. სულ ამ ავტომობილს 1.6 მილიონ ცალს დაამზადებენ. შედარებისთვის, მეხუთე ”გოლფი”, რომლის წარმოებაც 2003 წელს დაიწყო, 2.3 მილიონი ცალი გაიყიდა, რაც ამ მოდელისთვის ასევე საშუალო მაჩვენებელია.

რაც შეეხება მეშვიდე ”გოლფს”, ის სრულიად ახალ პლატფორმას და გაცილებით ეფექტურსა და ეკონომიურ ძრავების გამას მიიღებს და ვოლფსბურგელთა ვარაუდით, ბაზარზე თავის პოზიციებს დაიბრუნებს. სწორედ ამიტომაა, რომ მეექვსე ”გოლფს” ასეთი ხანმოკლე ციკლი ერგო.

ფერარი ახალ მოდელებს ამზადებს

Ferrari

2 ოქტომბერი

”ფერარის” აღმასრულებელმა დირექტორმა ამედეო ფელისამ გამოაცხადა, რომ მისი კომპანია წარმოებისთვის ერთდროულად სამ ახალ სუპერ ავტომობილს ამზადებს, რომლებიც V12 არქიტექტურის ძრავებით იქნებიან აღჭურვილნი. ეს ერთგვარი პასუხია სუპერ ავტომობილების ბაზარზე ”მაკლარენის” გამოჩენისა, რომელმაც ახლახანს საზოგადოებას სრულიად ახალი მოდელი წარუდგინა და კიდევ ორს უახლოეს მომავალში პირდება.

მარანელოელები პირველ რიგში, მოდელ ”612 სკალიეტის” შეცვლას აპირებენ. ეს ავტომობილი ბაზარზე ხუთი წლის წინ გამოჩნდა, მის შემცვლელს კი იტალიური კომპანია 2012 წელს გამოუშვებს.

თითქმის იმავდროულად, მარანელოელები თავიანთი ახალი ფლაგმანური ავტომობილის გამოშვებასაც გეგმავენ და ეჭვიც არავის ეპარება, რომ 288 GTO-ს, F40-ს, F50-ს და ”ენცოს” ღირსეული შთამომავალი ეყოლებათ.

მართალია, ”ფერარის” ინჟინრები ინტენსიურად მუშაობენ ჰიბრიდული ტექნოლოგიის ათვისებაზე, მაგრამ ფელისა ამბობს, რომ ჰიბრიდული აგრეგატი მისი კომპანიის ავტომობილებზე უფრო გვიან გამოჩნდება, ვიდრე ”ენცოს” შემცვლელს პირველი კლიენტი მიიღებს. ცნობილია, რომ ახალი ”ენცო” (მას ალბათ სხვა სახელს შეურჩევენ, შესაძლოა, F60 დაარქვან) V12, ან V8 ტურბოძრავით აღიჭურვება. მოგვიანებით კი მასზე ჰიბრიდულ დანადგარსაც დააყენებენ.

მესამე მოდელი, რომელსაც შეცვლა ელის, არის ”599 GTB ფიორანო”, თუმცა მის ახალ ვერსიას დებიუტი წინა ორ მოდელთან შედარებით ცოტა დაუგვიანდება. ”ფიორანოს” წარმოება მარანელოში ორი წლის წინ დაიწყეს და მისი შეცვლა 2015 წელზე ადრე მოსალოდნელი არაა.

”ალფა 169-ს” წარმოების დაწყება გვიანდება

Alfa Romeo 169

2 ოქტომბერი

”ალფა რომეო” ბიზნეს კლასის სედან 169-ს წარმოების დაწყებას ამ წლის ბოლოდან აპირებდა, მაგრამ ეკონომიკურმა კრიზისმა იტალიურ კომპანიას გეგმები შეაცვლევინა. და დღეს ლაპარაკია იმაზე, რომ გვარიანად მოძველებული ”ალფა 166-ის” შემცველი მერმის, წლის ბოლოსღა თუ გამოჩნდება. უფრო მეტიც, ბოროტი ენები სისინებენ, რომ ”ალფა 169-ს” კიდევ სამი წელი ვარ ვიხილავთ.

ინტერნეტით უკვე გავრცელდა ფოტოები, რომლებზეც ”ალფა 169-ს” მსავარაუდი გარეგნობა ჩანს. ძნელი სათქმელია, ამ ფოტოებზე გამოსახულ ავტომობილს რა აქვს საერთო ახალ სედანთან, მაგრამ შეიძლება ითქვას, რომ ამ სახით, ის ძალიან პოპულარული გახდება.

ფოტოებიდან ჩანს, რომ ”ალფა რომეო” თავისი დიდი სედანის კორპორატიულ სტილს ცვლის. 169-ს წინა ნაწილში ისევ მილანური კომპანიისთვის დამახასიათებელი რადიატორის სტილიზებული ბადე დომინირებს, რომელსაც ამჯერად უფრო მომრგვალებული მოყვანილობა აქვს. რადიკალურადაა შეცვლილი ავტომობილის უკანა ნაწილის დიზაინი, რომელიც ერთდროულად ორი კონკურენტის - ”მერსედეს CLS-ის” და ”ფოლკსვაგენ პასატ CC-ს” შესაბამისი ნაწილის მოყვანილობასაა მიმსგავსებული. ჰო მართლა, 169-ს ფასტბეკის სტილში, მეხუთე კარიც აქვს, რის გამოც, ის შეიძლება სედანის ტიპს აღარ მივაკუთვნოთ და ოთხკარიანი კუპე ვუწოდოთ.

სედანი 169 ”ალფა რომეოს” პირველ რიგში, აშშ-ის ბაზარზე დასაბრუნებლად სჭირდება. მაგრამ შესაბამისი ახალი პლატფორმის არქონის გამო, წარმოებისთვის მისი მომზადება გვიანდება. სავარაუდოა, რომ ამ ავტომობილისთვის მილანელები ”ფიატის” მიერ წელს შეძენილი ”კრაისლერის” რომელიმე არსებულ პლატფორმას გამოიყენებენ. არც ისაა გამორიცხული, რომ ალიანსის წევრებმა ახალი პლატფორმა თავ-თავიანთი მოდელებისთვის ერთობლივად შეიმუშაონ. გარდა ამისა, ”ფიატი” და ”ალფა რომეო”, რომელიც ტურინული კონცერნის ჯგუფში შედის, ამერიკაში დასაბრუნებლად, პარტნიორი ”კრაისლერის” სადილერო ქსელს გამოიყენებენ.

მართალია, ”ალფა 169-ს” შესახებ ჯერ ოფიციალურად არნაირი დადასტურებული ინფორმაცია არ გავრცელებულა, თუმცა ვარაუდის დონეზე შეიძლება ითქვას, რომ მას წამყვანი უკანა ბორბლები ექნება და ძრავების ფართო გამას მიიღებს, რომელთა სიმძლავრე 170-დან 250 ცხენის ძალამდე იქნება. სავარაუდოდ, ავტომობილის ფასი 40 00 ევროს ფარგლებში იქნება.