ბარსელონას ტესტების პირველ დღეს ფეტელი უსწრაფესია

Sebastian Vettel quickest on first day of F1 testing at Barcelona

21 თებერვალი

ბარსელონაში წინასასესონო ტესტების მეორე ეტაპი დაიწყო, რომელზეც „მერსედესმა“ პირველად გამოიყვანა თავისი ახალი სარბოლი ავტომობილი. ერთადერთი გუნდი, რომელმაც ძველი მანქანით ივარჯიშა, „მარუსია“ იყო, რომელმაც საჭე პირველად მიანდო თავის ახალ პილოტს, ფრანგ შარლ პიკს.

ხერესის ტესტებისგან განსხვავებით, ბარსელონაში თავიდანვე ყველაზე სწრაფია მსოფლიოს ორგზის ჩემპიონი სებასტიან ფეტელი. გერმანელმა პირველივე სესიაზე აჩვენა საუკეთესო დრო და მეორეზე ეს შედეგი ოდნავ გააუმჯობესა. შესაბამისად, ცხრილის სათავეში წინ არც არავინ გაუშვია. მას სულ რაღაც 0.175 წამით ჩამორჩა ნიკო ჰულკენბერგი.

საინტერესოა, რომ პირველ სესიაზე ფეტელმა საუკეთესო დრო მედიუმ რეზინით დააფიქსირა, მეორე სესიის მიწურულს კი ეს დრო მყარი საბურავებით გააუმჯობესა. რაც შეეხება ჰულკენბერგს, ის პირველ სესიაზე კარგა ხანს უსწრაფესი იყო, მერე კი ფეტელმა აჯობა. სამაგიეროდ, „ფორს ინდიას“ პილოტი მეორე სესიაზე ჩემპიონის დროსთან წამზე ახლოსაც ვერ მივიდა.

ლუის ჰამილტონმა აქცენტი ხანგრძლივ გამოსვლებზე გააკეთა და საბურავების სხვადასხვა შემადგენლობაც სცადა. საბოლოოდ კი ფეტელის დროს 0.325 წამით ჩამორჩა (პირველი სესიის საუკეთესო შედეგით). მეოთხე პილოტი, რომელმაც წრე წუთსა და 24 წამზე ნაკლებში გაიარა, ავსტრალიელი დანიელ რიკიარდია, რომელიც მეოთხე შედეგს დასჯერდა.

ხანგრძლივი გამოსვლები ჰქონდა ფერნანდო ალონსოსაც, რომელმაც ერთხელ ზედიზედ 18 წრე გაიარა და საშუალოდ წრეს წუთსა და 26 წამში გადიოდა. საბოლოოდ კი ცხრილში მე-5 ადგილი დაიკავა და სულ რაღაც 0.05 წამით ჩამოიტოვა მიხაელ შუმახერი.

ხელმოცარული დარჩა „ლოტუსი“, რომელმაც ტრასაზე რომენ გროჟანი გამოუშვა, მაგრამ ფრანგმა მეორე შასის რაღაც უცნაურობა შენიშნა, რის გამოც, 7 წრის შემდეგ, გუნდმა ტესტები დაუყოვნებლივ შეწყვიტა. გუნდმა სასწრაფოდ გამოიხმო ინგლისიდან პირველი შასი და სავარაუდოდ, გროჟანი მეორე დრეს სწორედ ამ მანქანით ივარჯიშებს.

ბარსელონა. 1-ლი დღე

1. სებასტიან ფეტელი (გერმანია, რედ ბული)               1:23.265 (79 წრე)

2. ნიკო ჰულკენბერგი (გერმანია, ფორს ინდია)            1:23.440 (+0.175, 97 წრე)

3. ლუის ჰამილტონი (ბრიტანეთი, მაკლარენი)            1:23.590 (+0.325, 114 წრე)

4. დანიელ რიკიარდო (ავსტრალია, ტორო როსო)       1:23.618 (+0.353, 76 წრე)

5. ფერნანდო ალონსო (ესპანეთი, ფერარი)                    1:24.100 (+0.835, 75 წრე)

6. მიხაელ შუმახერი (გერმანია, მერსედესი)                  1:24.150 (+0.885, 51 წრე)

7. სერხიო პერესი (მექსიკა, ზაუბერი)                             1:24.219 (+0.954, 66 წრე)

8. ბრუნო სენა (ბრაზილია, უილიამსი)                           1:25.711 (+2.446, 97 წრე)

9. ჰეიკი კოვალაინენი (ფინეთი, კატერჰემი)                 1:26.035 (+2.770, 31 წრე)

10. რომენ გროჟანი (საფრანგეთი, ლოტუსი)                  1:26.809 (+3.544, 7 წრე)

11. შარლ პიკი (საფრანგეთი, მარუსია)                            1:28.026 (+4.761, 121 წრე)