სეზონი ჰამილტონის პოულით დაიწყო

Hamilton on pole for Australian Grand Prix

17 მარტი

ჰამილტონს გროჟანი ულოცავს

ახლა უკვე თამამად შეიძლება იმის თქმა, რომ სეზონის დასაწყისს საუკეთესოდ მომზადებული შეხვდა „მაკლარენი“, რომლის მრბოლებმაც, ავსტრალიის დიდი პრიზის სასტარტო მოწინავე პოზიციები დაისაკუთრეს. კარგ ფორმაში არიან „რედ ბული“ და „მერსედესი“, თუმცა ისიც უნდა აღინიშნოს, რომ ავსტრიულ გუნდს რეგრესი ეტყობა.

სამაგიეროდ, სასიამოვნოდ გაგვაკვირვა „ლოტუსმა“, რომლის რომენ გროჟანმაც, კვალიფიკაციაზე „მაკლარენის“ გარდა, ყველა დანარჩენს აჯობა. მართალია, მისმა თანაგუნდელმა კიმი რაიკონენმა კვალიფიკაციის პირველი ეტაპიც ვერ გაიარა, მაგრამ ეს მეტნაკლებად მოსალოდნელი იყო - მის მანქანაზე საჭის მექანიზმი ჭირვეულობს. სხვა მხრივ, ფინელი პილოტი ბოლიდით კმაყოფილია. სხვათა შორის, გროჟანი მელბურნში პირველად ასპარეზობს. სულ კი ავსტრალიის დიდი პრიზი მის კარიერაში, ფ1-ის მერვე რბოლა იქნება...

ჰამილტონმა პირველ
სესიაზე ბალახებშიც გაინავარდა

რაც შეეხება „ფერარის“, მოწინავე ათეულში მისი ვერცერთი მრბოლი ვერ მოხვდა. ძნელი სათქმელია, რას შეძლებდა ფერნანდო ალონსო, მეორე სესიის მიწურულს შეცდომა რომ არ დაეშვა, მაგრამ ათეულში რომც შესულიყო, ამას მხოლოდ მის ოსტატობას თუ მივაწერდით... მოკლედ, წინა სეზონებში თავიანთ წარუმტაებლობებს, მარანელოელები სულ ტყუილად აბრალებდნენ მანქანის შექმნისას არჩეულ კონსერვატიულ მიდგომას.

ალონსომ ასე დაასრულა
კვალიფიკაცია

კიდევ ერთი საინტერესო ფაქტი: წინა რიგში „რედ ბულის“ ვერცერთი პილოტი ვერ დადგება, ასეთი შემთხვევა კი 2010 წლის იტალიის დიდი პრიზის შემდეგ პირველად მოხდება. რა ტქმა უნდა, ტიტულის მაძიებელთა სიიდან სებასტიან ფეტელის და მარკ უებერის ამოშლა ნაადრევია, თუმცა ისიც ფაქტია, რომ „წითელი ხარები“ სეზონის უკეთეს დასაწყისს ისურვებდნენ.

რაიკონენი
გაწბილებულია

„მგონი, მე და ჯენსონი პირველად დავდგებით წინა რიგში. მოკლედ, სეზონს ფანტასტიურად ვიწყებთ. როგორც ჩანს, ძალიან ძნელი და დაძაბული ჩემპიონატი გვექნება. მთავარი კი ისაა, რომ მას ასე კარგად ვიწყებთ“, - განაცხადა ჰამილტონმა, ვინც ალბერტ პარკზე რბოლა 2008 წელს პოულიდან მოიგო და ის სეზონი ტიტულის მოგებით დაასრულა. საინტერესოა ისიც, რომ „მაკლარენის“ პილოტებმა ბოლოს სასტარტო მოწინავე რიგი 2009 წლის ევროპის დდ პრიზზე დაიკავეს. მაშინ ჰამილტონის თანაგუნდელი ჰეიკი კოვალაინენი იყო.

მალდონადომაც გაგვაკვირვა 

გროჟანის გარდა, სიურპრიზი ვენესუელელმა პასტორ მალდონადომაც შემოგვთავაზა, რომელმაც სტარტის მეოთხე რიგიდან აღების უფლება მოიპოვა. როგორც ჩანს, „უილიამსის“ მანქანებს „რენოს“ ძრავებზე გადასვლამ არგო. მართალია, ბრუნო სენამ კვალიფიკაციის მესამე ეტაპს ვერ მიაღწია, მაგრამ საქმეს ისეთი პირი უჩანს, რომ „უილიამსი“ მაჩანჩალათა რიგებს დატოვებს...

დაბოლოს, პოულ პოზიციასთან 107-პროცენტიანი ზღვარი ვერ გადალახეს „ისპანიას“ პილოტებმა, რის გამოც, მათ სტარტზე არ დაუშვებენ.

კვალიფიკაცია

1. ლუის ჰამილტონი (ბრიტანეთი, მაკლარენი)             1:24.922

2. ჯენსონ ბატონი (ბრიტანეთი, მაკლარენი)                  1:25.074

3. რომენ გროჟანი (საფრანგეთი, ლოტუსი)                    1:25.302

4. მიხაელ შუმახერი (გერმანია, მერსედესი)                  1:25.336

5. მარკ უებერი (ავსტრალია, რედ ბული)                       1:25.651

6. სებასტიან ფეტელი (გერმანია, რედ ბული)               1:25.668

7. ნიკო როსბერგი (გერმანია, მერსედესი)                      1:25.686

8. პასტორ მალდონადო (ვენესუელა, უილიამსი)        1:25.908

9. ნიკო ჰულკენბერგი (გერმანია, ფორს ინდია)            1:26.451

10. დანიელ რიკიარდო (ავსტრალია, ტორო როსო)     დროის გარეშე

- - - - - - - - - -

11. ჟან-ერიკ ვერნი (საფრანგეთი, ტორო როსო)            1:26.429

12. ფერნანდო ალონსო (ესპანეთი, ფერარი)                  1:26.494

13. კამუი კობაიაში (იაპონია, ზაუბერი)                         1:26.590

14. ბრუნო სენა (ბრაზილია, უილიამსი)                         1:26.663

15. პოლ დი რესტა, ბრიტანეთი, ფორს ინდია)             1:27.086

16. ფელიპე მასა (ბტაზილია, ფერარი)                            1:27.497

17. სერხიო პერესი (მექსიკა, ზაუბერი)                           დროის გარეშე

- - - - - - - - - -

18. კიმი რაიკონენი (ფინეთი, ლოტუსი)                         1:27.758

19. ჰეიკი კოვალაინენი (ფინეთი, კატერჰემი)               1:28.679

20. ვიტალი პეტროვი (რუსეთი,კატერჰემი)                  1:29.018

21. ტიმო გლოკი (გერმანია, მარუსია)                             1:30.923

22. შარლ პიკი (საფრანგეთი, მარუსია)                           1:31.670

კვ. პედრო დე ლა როსა (ესპანეთი, ისპანია)                 1:33.495

კვ. ნარაინ კართიკეიანი (ინდოეთი, ისპანია)               1:33.643

შენიშვნა: კვ. - კვალიფიკაცია ვერ გაიარა