პეტერ ზაუბერი გამარჯვებას არ გამორიცხავს

Peter Sauber not ruling out a victory during 2012 Formula 1 season

14 ივნისი

პერესი და ზაუბერი (პერესის უკან)
მექსიკელის მესამე ადგილს ზეიმობენ

პეტერ ზაუბერი არ გამორიცხავს, რომ შესაძლოა, მისმა გუნდმა ამ სეზონში გამარჯვება მოიპოვოს. ასეთი ვარაუდის საბაბს კი კანადაში სერხიო პერესის გამოსვლა აძლევს - მექსიკელმა რბოლა მე-15 პოზიციიდან დაიწყო და მესამეზე, გამარჯვებულ ლუის ჰამილტონთან რამდენიმეწამიანი ჩამორჩენით დაასრულა. რაც მთავარია, მონრეალის რბოლაში გამოჩნდა, რომ შესაბამის პირობებში რბოლისას, კარგად მომართულ C31-ს გამარჯვებისთვის ბრძოლა შეუძლია.

ოეტერ ზაუბერი თვლის, რომ მისი გუნდის მანქანა გაცილებით უკეთესია, ვიდრე წინა რბოლებში ჩანდა. ის დარწმუნებულია, რომ სეზონის განმავლობაში, მის პილოტებს კიდევ არაერთხელ ვიხილავთ კვარცხლბეკზე და არც გამარჯვება უნდა გამოვრიცხოთ.

„თუ ჩვენი გუნდი შეძლებს თავისი პოტენციალის სრულად გამოყენებას, დიდი მიღწევა შესაძლებელია. სეზონის პირველ შვიდ ეტაპზე გამოჩნდა, რომ C31 ნებისმიერი ტიპის ტრასაზე სწრაფია“, - ამბობს ზაუბერი და კითხვაზე, გამარჯვების შესაძლებლობის შესახებ, პასუხობს: „სეზონის დაწყებამდე ვერც წარმოვიდგენდი, რომ ამ კითხვას ვინმე დამისვამდა. მაგრამ ახლა, როცა პირველ შვიდ რბოლას შვიდ განსხვავებული გამარჯვებული ჰყავს, ბევრი რამ შესაძლებლად მოჩანს. მალაიზიაში გამარჯვებასთან ძალიან ახლოს ვიყავით. სეზონის განმავლობაში კვარცხლბეკზე ჩვენი ისევ ხილვა სრულიად რეალურია. რა თქმა უნდა, ბევრი რამ იმაზეა დამოკიდებული, რომ ჩვენმა მრბოლებმა სტარტი ხელსაყრელი პოზიციიდან აიღონ ხოლმე“.

შეზღუდული ფინანსური შესაძლებლობების გამო, „ზაუბერი“ ადრე ვერასდროს ახერხებდა ტოპ გუნდების ტოლსწორად მანქანის მომზადებას. მაგრამ ამ სეზონში სიტუაცია რადიკალურად შეიცვალა, რაც რამდენიმე ფაქტორმა განაპირობა. და შვეიცარიული საჯინიბოც ლიდერებში გაერია.

„რა თქმა უნდა, ოთხ დიდ გუნდს, კერძო გუნდებთან შედარებით, სრულიად განსხვავებული ფინანსური შესაძლებლობები აქვს. მაგრამ ამის გამო ყურების ჩამოყრას არ ვაპირებთ. ჩვენი დადებითი მხარე ეფექტურობაა. ახალმა პაკეტმა, რომელიც პირველად ბარსელონაში გამოვიყენეთ, ჩვენი შესაძლებლობები გამოავლინა. მთავარიკი ისაა, რომ C31-მა თავისი პოტენციალი დაგვანახა. და ჩვენ ვიცით, რომ მისი შემდგომი დახვეწა კარგ შედეგებს მოგვცემს“, - დასძენს ზაუბერი.