„პორშე“ „ალფა რომეოს“ ოპოზიტურ ძრავს სთავაზობს

Porsche Has an Engine Ready for Alfa Romeo

15 მარტი

მართალია, „ფიატის“ მთავარმა აღმასრულებელმა სერჯო მარკიონემ „ფოლკსვაგენის“ დირექტორთა საბჭოს თავმჯდომარე ფერდინანდ პიხს ურჩია, „ალფა რომეოზე“ ხელის ფათურს გირჩევნია, კრახის პირას მისულ „სეატს“ მიხედეო, მაგრამ ამით, დიდი ფერდინანდ პორშეს შთამომავალს მილანური კომპანიის ხელში ჩაგდების წყურვილი მაინც ვერ დაუცხრო.

უფრო მეტიც, „ფოლკსვაგენი“ და მის ჯგუფში ახლახანს შესული „პორშე“ ხმამაღლა აცხადებენ, რომ მათს განკარგულებაში მალე იქნება სეულიად ახალი ოთხცილინდრიანი ძრავი, რომელსაც ცილინდრების ორი, ერთმანეთის მიმართ საპირისპიროდ განლაგებული რიგი (ოპოზიტური ძრავი) აქვს. ეს ძრავი კი, საკუთრივ „პორშეს“ გარდა, „ალფა რომეოსაც“ ძალიან გამოადგება. მითუმეტეს, მილანური კომპანია ერთ დროს ოპოზიტურ ძრავებს თავადაც აწარმოებდა და მათ თავის მოდელებზე - „ალფასუდსა“ და 33-ზე იყენებდა.

თავად „პორშე“ ახალ ძრავს თავისი პატარა მოდელისთვის გამოიყენებს, რომელიც შემუშავების სტადიაშია და რომლის შექმნაშიც, მას „ფოლკსვაგენი“ ეხმარება. იგივე ძრავს ვოლფსბურგული გიგანტიც გამოიყენებს როგორც საკუთარი, ასევე მის ჯგუფში შემავალი ბრენდების (შკოდა, აუდი, სეატი) მოდელებისთვის. თუ იტალიური კომპანია ამ აგრეგატით დაინტერესდა, „პორშე“ ამით მხოლოდ მოგებული დარჩება, რადგან ძრავების წარმოების გაზრდა მოუწევს, რაც მათს თვითღირებულებას შეამცირებს.

უნდა ითქვას, რომ „პორშეს“ ახალი ოპოზიტური ძრავი მისწრება იქნებოდა „ალფა რომეოს“ ახალი, კომპაქტური კუპესთვის (4C), რომლის კონცეპტუალური ვერსიის დებიუტიც ახლახანს, ჟენევის ავტო შოუზე შედგა. მაგრამ რამდენადაც, მარკიონე „ფოლკსვაგენისთვის“ მილანური ბრენდის მიყიდვას არ აპირებს, ამდენად, „ალფა4C-ზე“ (ფოტოზე) ოპოზიტის დაყენება ჯერჯერობით გამორიცხულია.

„ჩვენ მათ (ფოლკსვაგენს) კარი ცხვირწინ მივუზურეთ, მაგრამ ახლა ისინი ფანჯრიდან შემოსვლას ცდილობენ“, - ასე განმარტა გერმანული გიგანტის შეთავაზება „ფიატის“ ჯგუფის პრესმდივანმა. მართალია, პიხმა ჟენევაში დაიქადნა, რომ ხუთ წელიწადში, „ალფა რომეოს“ გაყიდვების მოცულობას გააოთხმაგებს, მაგრამ მარკიონესგან ისევ უარი (ხელები შორს ალფასგან) მიიღო. და მაინც, პიხი ამბობს: „ფოლკსვაგენს არსად ეჩქარება“...

„შკოდამ“ დაადასტურა, რომ ორ ახალ მოდელზე მუშაობს

Skoda Plans New Models

15 მარტი

ჟენევის საავტომობილო შოუს დასრულებისთანავე, „შკოდამ“ მისთვის ტრადიციული, ყოველწლიური მუშაობის შედეგები შეაჯამა, რასთან დაკავშირებიტაც გამართულ პრესონფერენციაზე გამოცხადდა, რომ ჩეხური კომპანია მალე თავის სამოდელო გამას ორი ახალი ავტომობილით შეავსებს.

ამგვარად, „შკოდა“ ტავის წვლილს შეიტანს „ფოლკსვაგენის“ მიზნის მიღწევაში, რომლის შესაბამისადაც, გერმანული კომპანია 2018 წელს მსოფლიო ლიდერობას გეგმავს. შეგახსენებთ, რომ ვლოფსბურგელთა დიდ საავტომობილო ოჯახში, საკუთრივ „ფოლკსვაგენის“ და „შკოდას“ გარდა, „აუდი“, „სეატი“, „ბენტლი“, „ლაბმორგინი“, „ბუგატი“ და (უკვე) „პორშეც“ შედის.

„შკოდამ“ გასული წელი გაყიდვების მნიშვნელოვანი ზრდით დაასრულა და ამ წლის პირველი ორი თვის შედეგებიტაც, გაყიდვები 20 პროცენტზე მეტით აქვს გაზრდილი. ჩეხურ კომპანიას, „ფოლკსვაგენის“ ჯგუფში შემავალ კომპანიებს შორის, გაყიდული ავტომობილების მოცულობის მიხედვით, მესამე ადგილი უკავია (ფოლკსვაგენის და აუდის შემდეგ).

„ფოლკსვაგენის“ მიერ განსაზღვრული სამოქმედო გეგმის შესაბამისად, გაყიდვების ზრდა, ახალი ბაზრების ათვისებით და ახალი მოდელების წარმოების დაწყებითაა მიღწევადი. ბუნებრივია, ამ გეგმას „შკოდაც“ მიჰყვება, რომელმაც ახლახანს დაადასტურა, რომ მერმისიდან ორი ახალი ავტომობილის წარმოებას დაიწყებს.

პირველი იქნება კომპაქტური სედანი, რომელმაც „შკოდას“ გამაში, სუბკომპაქტურ „ფაბიასა“ და D სეგმენტის „ოქტავიას“ შორის უნდა დაიკავოს ადგილი. ჯერჯერობით, ამ ავტომობილის შესახებ დეტალები დაფარულია, თუმცა მოსალოდნელია, რომ ჩეხური კომპანია მათ ფრანკფურტის ავტო შოუზე გამოაქვეყნებს.

მეორე ავტომობილის კონცეპტუალური ვერსიის პრემიერა ჟენევის ავტო შოუზე გაიმართა, სადაც ის „ვიჟნD-ს“ სახელით წარსდგა. ესაა ეგრეთ წოდებული საქალაქო სუბკომპაქტური ავტომობილი, რომელმაც პირველ რიგში, ახალგაზრდა თაობის მყიდველი უნდა მიიზიდოს. გავრცელებული ინფორმაციით, ეს „ფოლკსვაგენის“ კონცეპტუალურ მოდელ Up!-ის ჩეხური ვერსია იქნება და ის გერმანული კომპანიის წარმოების მცირელიტრაჟიანი ძრავებით აღიჭურვება, მომავალში კი ბაზარზე მისი ელექტრული ვერსიაც გამოვა. ეს ძრავებია 1.2-ლიტრიანი დიზელი, რომელიც 75 ცხენის ძალას იძლევა, მეორე ძრავი ბენზინზე მუშაობს და ისიც 1.2-ლიტრიანია, ოღონდ 86 ცხენის ძალას იძლევა. რაც შეეხება ელექტროძრავს, მისი სავარაუდო სიმძლავრე 82 ცხენის ძალა იქნება.

„ალფა რომეო 4C“ - პატარა შუაძრავიანი სუპერ ავტომობილი

Alfa Romeo 4C Coupe Concept with Mid-Mounted 1.75-Liter Turbo Engine and RWD

14 მარტი

ჟენევის საავტომობილო გამოფენას არაერთი ახალი სუპერ ავტომობილი ამშვენებდა, თუმცა მათ ფონზეც, ერთ-ერთი გამორჩეული ექსპონატი „ალფა რომეოს“ კომპაქტური და ხელმისაწვდომი „სუპერ ავტომობილი“, კონცეპტუალური 4C იყო.

მომცრო ზომები რომ არა, ამ ავტომობილს მართლა შეიძლება სუპერ ავტომობილი უწოდო, რადგან სწორედ ამ კლასის სპორტსმენების სტილშია შესრულებული: ორადგილიანი სალონი, ბაზაში მოთავსებული ძრავი, რომელიც მაბრუნ მომენტს უკანა ბორბლებს აწვდის. და, რა თქმა უნდა, აგრესიული - ყველაფერი ეს სწორედ სუპერების კლასს შეეფერება.

მილანური კომპანიის სიტყვებით რომ ვთქვათ, „4C ბრენდის ფასეულობებს სრულად გამოხატავს. ესაა იტალიური სტილი, ტემპერამენტი და დახვეწილი ტექნიკური აღჭურვილობა, რომელიც მოწოდებულია იმისათვის, რომ უსაფრთხოება და მართვით სიამოვნების მიღება უზრუნველყოს“.

სახელიდანაც ჩანს, რომ ეს ავტომობილი წარმატებულ კუპე „8C კომპეტიციონეს“ მომცრო ვერსიაა - ისინი გარეგნობითაც ძლიერ ჰგვანან ერთმანეთს. კონცეპტუალური „ალფა რომეო 4C-ს“ სიგრძე 4.00 მეტრი, ბაზა კი 2.4 მეტრია. კომპაქტური გაბარიტების მიუხედავად, ის სუპერ ავტომობილის შთაბეჭდილებას ტოვებს, როგორც, მაგალითად „ლოტუს ელისი“.

„ალფას“ ორი კუპე ერთმანეთს მარტო გარეგნობით როდი ჰგავს. „ალფა რომეო 4C-ზე“ ზოგიერთი ის ტექნოლოგია და მასალებია გამოყენებული, რომლებიც „8C კომპეტიციონემ“ თავის მხრივ, „ფერარისგან“ მიიღო. ესაა უკანა წამყვანი ბორბლების სისტემა, კარბონის კომპოზიტი და ალუმინის დეტალები. სამაგიეროდ, მის კაპოტქვეშ V8 ძრავის ჩადგმაზე არავის უფიქრია.
ამ პატარა სუპერს მბიძგველ ძალას, მისთვის შესაფერისი ზომის აგრეგატი - ბენზინის ოთხცილინდრიანი 1.75-ლიტრიანი ტურბოძრავი ანიჭებს, რომელიც „ჯულიეტა კვადრიფოლიო ვერდესგანაა“ ნასესხები. ეს აგრეგატი 200 ცხენის ძალას იძლევა, მასთან კი წყვილდისკოიანი ქუროს მეშვეობით, უახლეს ავტომატურ ტრანსმისიაა (ალფა TCT) დაკავშირებული.

შესაძლოა, 200 ცხენის ძალა გეცოტაოთ, მაგრამ თუ გაითვალისწინებთ, რომ „ალფა რომეო 4C“ მხოლოდ 850 კილოგრამს იწონის, სიმძლავრესაც „ფასი მოემატება“. უფრო კონკრეტულად კი, მისი წონისა და სიმძლავრის ფარდობა დაახლოებით 4-ის როლია, რაც შესანიშნავი მაჩვენებელია. სიმსუბუქე იმან განაპირობა, რომ ავტომობილის ტანი მთლიანად კარბონის კომპოზიტისგანაა დამზადებული. მისი შეჯახების და ძრავის საყრდენი სტრუქტურები კი ალუმინის შენადნობისგანაა აწყობილი.

მცირე წონა „ალფა რომეო 4C-ის“ შეანიშნავ დინამიკურ მახასიათებლებს განაპირობებს: მაქსიმალური სიჩქარე 250 კმ/სთ-ია, ადგილიდან ასამდე აჩქარებას კი 5 წამზე ნაკლები ჰყოფნის.

ევროპელი დილერების შოურუმებში, „ალფა რომეო 4C“ მერმისს გამოჩნდება.

ევროპა „ტატა ნანოს“ ნაცვლად „ტატა პიქსელს“ მიიღებს

Tata’s plans for Euro market

14 მარტი

ორ წელიწადზე მეტია, ინდური კომპანია „ტატა“ მსოფლიოში ყველაზე იაფფასიან ავტომობილს - მინი ჰეჩბეკ „ნანოს“ უშვებს. ამავე პერიოდის განმავლობაში, პერიოდულად ჩნდება ცნობები იმის შესახებ, რომ „ტატა“ „ნანოს“ ევროპის ბაზრისთვისაც ამზადებს, რომელიც მის ინდურ ვერსიაზე ძვირი ეღირება.

მაგრამ ჟენევის ავტო გამოფენაზე, ინდურმა კომპანიამ სულ სხვა კონცეპტუალური ავტომობილი წარმოადგინა, სახელად „პიქსელი“, გამოფენის შემდეგ კი, ბრიტანულმა გამოცემა „ავტოქარმა“ გაავრცელა ინფორმაცია იმის შესახებ, რომ „ნანოს“ ნაცვლად, ევროპელებს „ტატა“ სწორედ „პიქსელს“, ან მის ბაზაზე შექმნილ სხვა ავტომობილს შესთავაზებს.

„პიქსელი“ სამკარიანი ჰეჩბეკია, რომელიც „ნანოზე“ 25 სანტიმეტრით მოკლეა. მისი სიგრძე სამ მეტრზე მეტი არ იქნება, წონა კი მაქსიმუმ 750 კილოგრამი უნდა იყოს. ინდური კომპანიის მფლობელი და შეფი რატან ტატა ამბობს, რომ სამკარიან ჰეჩბეკს მალე მის ხუთკარიან ვერსიასაც მოაყოლებს. მართალია, „პიქსელის“ საფუძვლად „ნანოს“ პლატფორმას გამოიყენებენ, თუმცა მას მოდერნიზაცია ჩაუტარდება, რათა ავტომობილის მართვადობა გაუმჯობესდეს და ის ნაკლებად ხმაურიანი იყოს.

რაც შეეხება „პიქსელის“ აღჭურვილობას, სავარაუდოდ, ის ისეთივე იქნება, როგორიც ჟენევაში ნაჩვენებ კონცეპტუალურ მოდელს აქვს. კერძოდ: ეს ავტომობილი აღჭურვილია სამცილინდრიანი, 1.2-ლიტრიანი ძრავით, რომელიც 60 ცხენის ძალას ავითარებს. ძრავთან შეწყვილებულია ვარიატორი და სისტემა სტოპ-სტარტი, ავტომობილი კი შემცირებული წინაღობის მქონე საბურავებზე დგას.

ინდური კომპანიის მიერ გავრცელებულ რელიზში წერია, რომ ამ აგრეგატებით აღჭურვილი „პიქსელი“, შერეული ციკლით გადაადგილებისას, 100 კილომეტრს 3.4 ლიტრი საწვავით გადის, ყოველ კილომტრზე კი ატმოსფეროი მხოლოდ 89 გრამ ნახშირორჟანგს გამოჰყოფს. ეს კი ევრო6 სტანდარტს, რომელიც ჯერ არ ამოქმედებულა, სრულად შეესაბამება.

კონცეპტუალური პიქსელი ასევე აღჭურვილია სისტემით, რომელიც მოსახვევში უკანა ბორბლებს ერთმანეთის საპირისპიროდ აბრუნებს. კერძოდ, შეზღუდულ სივრცეში მოხვევისას, ან პარკირებისას, გარე ბორბალი მოძრაობის მიმართულებით ბრუნავს, შიდა კი - საპირისპირო მიმართულებით. ამის წყალობით, ავტომობილის მოხვევის რადიუსი სულ რაღაც, 2.6 მეტრია. თუმცა, დიდი ალბათობით შეიძლება იმის ვარაუდი, რომ ამგვარ სისტემას სერიულ ავტომობილზე არ დააყენებენ, რადგან ის მის გაძვირებას და დამძიმებას გამოიწვევს.

„ტატა“ ევროპის ბაზარზე თავისი ახალი ავტომობილის შეტანას მერმისს აპირებს. რაც შეეხება „ნანოს“, ინდური კომპანია მას თვეში 9 000-ს აწარმოებს და იმედოვნებს, რომ წლიურ წარმოებას მალე 200 000-მდე აიყვანს. არც ისაა გამორიცხული, რომ „პიქსელის“ პარალელურად, ძველი კონტინენტის ბაზარზე, ცოტა მოგვიანებით „ნანოს“ მოდიფიზირებული და გაძვირებული ვერსიაც გამოჩნდეს.

„მაგნა შტეირის“ ჟენევური კონცეპცია - „მილა აეროლაითი“

Geneva 2011: Magna MILA Aerolight Concept

13 მარტი

კანადურ-ავსტრიული „მაგნა შტეირი“ ერთ-ერთი საავტომობილო კომპანიაა მათ შორის, რომლებიც საკუთარ ავტომობილებს არ აწარმოებენ და სხვების შეკვეთებით მუშაობენ. პარალელურად კი, საკუთარ პროექტებსაც ქმნიან, რომლებსაც ასევე სხვა კომპანიებს სთავაზობენ.

ცოტა ხნის წინ, „მაგნას“ და მის რუს პარტნიორებს, გასაჭირში მყოფი „ჯენერალ მოტორსისგან“ გერმანული „ოპელის“ გამოსყიდვა ნებავდათ, მაგრამ ამერიკულმა კომპანიამ არ დაუშვა, რომ მისი მოწინავე ტექნოლოგიები რუსებს ჩავარდნოდათ ხელში. და „მაგნამაც“ თავისი ძველი საქმიანობა გააგრძელა.

ერთ-ერთი პირველი პროექტი, რომელიც კანადურ-ავსტრიულმა გიგანტმა შექმნა, არის კონცეპტუალური კომპაქტური ჰეჩბეკი „მილა აეროლაითი“, ავტომობილი, რომლითაც მისი ავტორი თავისი შესაძლებლობების დემონსტრირებას ცდილობს. ეს არის მსუბუქი, ეკონომიური და ეკოლოგიურად სუფთა ავტომობილი. მისთვის ამ თვისებების მინიჭებაში, „მაგნას“ ინჟინრებს თანამედროვე, მსუბუქი და მტკიცე მასალების გამოყენება დაეხმარა.

ყოველივეს შედეგი კი ისაა, რომ კონცეპტუალური ავტომობილი მხოლოდ 700 კილოგრამს იწონის. ამასთან, ის საწვავად ბუნებრივ აირს მოიხმარს, რაც გამონაბოლქვში მავნე აირების მცირე შემცველობას განაპირობებს. ავტომობილის მზიდი ელემენტი ფოლადის სტრუქტურას წარმოადგენს, რომელიც პოლიმერული და სხვადასხვა ტიპის ბოჭკოთი (მათ შორის, კარბონის და კევლარის) არმირებული მასალებითაა გამაგრებული. ამის წყალობით, სიმსუბუქის გარდა, სტრუქტურა გრეხვითი დატვირთვებისადმი გაზრდილი მედგობიტაც გამოირჩევა.

„მილა აეროლაითი“ ორცილინდრიანი ძრავითაა აღჭურვილი, რომელიც საწვავად შეკუმშულ ბუნებრივ აირს იყენებს (სახელი აეროლაით ავტომობილის სიმსუბუქესა და იმ ფაქტზე მიგვანიშნრბს, რომ ის აირზე მუშაობს). კონცეპციის ავტორი ამ აგრეგატის მახასიათებლებს არ აქვეყნებს, თუმცა გვამცნობს, რომ საწვავი აირის შესანახად გამოყენებულია 55-ლიტრიანი მაღალი წნევის ავზი, რომელიც მხოლოდ 8 კილოგრამს იწონის. მისი ტევადობა კი საკმარისია იმსიათვის, რომ ავტომობილმა დაახლოებით 400 კილომეტრის გავლა შეძლოს. ამასთან, ძრავისა და საწვავის ეს კომბინაცია სუფთა გამონაბოლქვითაც გამოირჩევა - ყოველი კილომეტრის გავლისას, ატმოსფერო მხოლოდ 55 გრამი ნახშირორჟანგით ბინძურდება.

სხვათა შორის, სახელწოდება „მილა“ (მაგნას ინოვაციური მსუბუქი ავტომობილი) „მაგნამ“ პირველად ორი წლის წინ, კონცეპტუალური ელექტრომობილისთვის გამოიყენა.

„მერსედეს ბენცმა“ A კლასის ჰეჩბეკის კონცეპციის ესკიზი გამოაქვეყნა

Mercedes Benz A-Klasse Concept First Pic

12 მარტი

შარშან „მერსედეს ბენცმა“ გამოაცხადა, რომ მისი ორი ნაკლებად პოპულარული მოდელი - A და B კლასის ჰეჩბეკები, მალე მისი მომავალი საწარმოო პროგრამის ძირითადი შემადგენელი ნაწილები გახდება. ამ ორი ავტომობილით, სამქიმიანები თავიანთი ბრენდთ ახალგაზრდა მყიდველის მიზიდვას აპირებენ.

გერმანული კომპანია ახალი A კლასის ჰეჩბეკის კონცეპციის პრემიერას შანჰაის ავტო შოუზე აპირებს, მანამდე კი ამ ავტომობილის ფოტო ტიზერების გავრცელება და ასე მისადმი ყურადღების მიქცევა დაიწყო. პირველი ტიზერი ახალი ავტომობილის ესკიზია, რომლითაც მასზე გარკვეული შთაბეჭდილების მიღება შეიძლება.

ამ ესკიზის მიხედვით შეიძლება ითქვას, რომ ახალი A კლასს წინმორბედთან შედარებით, ახალგაზრდა მყიდველისთვის მისაღები, აგრესიული გარეგნობა აქვს. ეს ესკიზი რაღაცით კონცეპტუალურ F800-საც მოგვაგონებს, რომლის პრემიერაც ჟენევის შარშანდელ ავტო შოუზე შედგა და რომელიც ფაქტობრივად, სამქიმიანების ახალი სტილის მაჩვენებელი პირველი მერცხალია.

ამ ეტაპზე უცნობია, რა აგრეგატებით აღიჭურვება ახალი ავტომობილი. არაა გამორიცხული, რომ გამოფენაზე ის ჰიბრიდული აგრეგატით, ან სულაც ელექტრომობილად წარსდგეს. რა ტქმა უნდა, მისი სერიული ვერსია შიდაწვის ძრავებით აღიჭურვება, თუმცა შტუტგარტელები არ მალავენ, რომ A და B კლასის ჰეჩბეკებს წყალბადის ფიჭურ ელემენტებზე მომუშავე ელექტროაგრეგატებიტაც აღჭურვავენ.

შესაბამისი აგრეგატები ამერიკაში უკვე გადის ტესტირებას. ისინი B კლასის სამ ავტომობილზეა დამონტაჟებული, ეს ავტომობილები კი აშშ-ის გარშემო მოგზაურობენ. ამ გარბენს ტესტების გარდა, სარეკლამო დანიშნულებაც აქვს. რაც შეეხება შიდაწვის ძრავებს, მათ შორის აღარ იქნება 1.5-ლიტრიანი და მეტი მუშა მოცულობის მქონე აგრეგატები. მათ უფრო მცირე, კომპაქტური და რა თქმა უნდა, ეკონომიური ძრავებით შეცვლიან, რომლებსაც „მერსედეს ბენცი“ „რენო-ნისანის“ ალიანსთან კოოპერაციით შექმნის.

როგორც ჩანს, ეს ესკიზი ერთადერთი ტიზერი არ იქნება. შანჰაის შოუმდე, შტუტგარტელები თავიანთი სიახლის შესახებ, ინფორმაციის მორიგ დოზებს გამოაქვეყნებენ და მათ ჩვენი მკითხველიც აუცილებლად შეიტყობს...

„ფორდის“ შეფს „ფიატ 500-ის“ ამერიკული წარმატების არ სჯერა

Ford CEO Alan Mulally Believes Fiat 500 Won’t Succeed in the USA

12 მარტი

მალე „ფიატი“ თავის პოპულარულ რეტრო ჰეჩბეკ 500-ს ამერიკაში შეიტანს და ასე დაბრუნდება ატლანტიკის მეორე მხარეს. ავტო სამყაროს ბევრი ანალიტიკოსი ამ ავტომობილს შტატებში დიდ წარმატებას უწინასწარმეტყველებს. თუმცა არიან ისეთებიც, ვინც საწინააღმდეგოს ფიქრობს და მათ შორის, ერთ-ერთი გამორჩეულია „ფორდის“ მთავარი აღმასრულებელი ალან მიულალი (ზედა ფოტოზე).

იტალიურ ჟურნალ „პანორამასთან“ საუბრისას, მიულალიმ განაცხადა: „არა მგონია, ამერიკაში „ფიესტაზე“ პატარა ავტომობილებისთვის დიდი ბაზარი იყოს. მათ, ვინც ასეთი ავტომობილების შემოტანა სცადეს, არაფერი გამოუვიდათ“. მიულალის არ დაუზუსტებია, ვინ იგულისხმა „მათში“, თუმცა აშკარაა, რომ ეს „დაიმლერის“ ჯუჯა ავტომობილების მწარმოებელი „სმარტია“, რომელმაც 2008 წელს 24 624 ავტომობილი გაჰყიდა, თუმცა შარშან გაყიდვები 5 927-მდე შეუმცირდა.

რამდნიმე დღის წინ, „კრაისლერის“ მექსიკურმა ქარხანამ, რომელიც ქალაქ ტოლუკაში მდებარეობს, „ფიატ 500-ის“ წარმოება დაიწყო. ამ ქარხნის მოდერნიზაციისთვის, „კრაისლერმა“ და „ფიატმა“ 550 მილიონი დოლარის ინვესტიცია გაიღეს. ამ თანხის ნაწილი მათ მექსიკის მთავრობისგან სესხად აიღეს.

„კრაისლერის“ და „ფიატის“ მთავარმა აღმასრულებელმა სერჯო მარკიონემ განაცხადა, რომ ტოლუკას ქარხანა წლიურად 120 000 „ფიატ 500-ს“ გამოუშვებს და ეს ავტომობილები, მექსიკის გარდა, აშშ-ში, კანადასა და სამხრეთ ამერიკაში, ასევე ჩინეთში გაიყიდბა. სხვათა შორის, ტოლუკას ქარხანა ასევე უშვებს საშუალო ზომის ქროსოვერ „დოჯ ჯურნის“, ასევე მის ტყუპისცალ „ფიატ ფრიმონტს“, რომელთაგან პირველი ამერიკაში იყიდება, მეორეს კი მალე შეიტანენ ევროპის ბაზარზე.

„ფოლკსვაგენი“ ახალ კომპაქტვენს გამოუშვებს

VW to Build New Microbus Using Bulli Concept

12 მარტი

უკვე რამდენიმე თვეა, საავტომობილო გამოცემებში გამოითქმება ვარაუდები იმის შესახებ, რომ „ფოლკსვაგენი“ მიკროვენის წარმოებას აპირებს. ჟენევის საავტომობილო შოუზე კი, კონცეპტუალური „ბულის“ სახით, ამის დასტური (თუნდაც არაპირდაპირი) გამოჩნდა.

ჟენევაშივე, გერმანული კომპანიის კვლევისა და განვითარების შეფმა ულრიხ ჰაკენბერგმა დაადასტურა, რომ მისი კომპანია მზადაა, ექვსადგილიანი მრავალმხრივი დანიშნულების ავტომობილი გამოუშვას, რომელსაც მოდულარულ პლატფორმა MDS-ს გამოიყენებს.

ეს პლატფორმა უნივერსალურია და მისი რამდენიმე კლასის ავტომობილისთვის გამოყენებაა შესაძლებელი. „ფოლკსვაგენი“ მას თავისი რამდენიმე ახალი ავტომობილის საფუძვლად გამოიყენებს, რომელთა შორისაც, პირველი ახალი „აუდი A3“ იქნება. ამ პლატფორმის ძირითადი თვისება ისაა, რომ დიდი დანახარჯების გარეშე, მისი გაბარიტები და ძირითადი პარამეტრები ადვილად იცვლება და ამის წყალობით, სხვადასხვა ზომის და კლასის ავტომობილებისთვის მისი გამოყენება არანაირ სირთულეს არ წარმოადგენს. ასე კი უზარმაზარი თანხები დაიზოგება.

ბრიტანულ გამოცემა „ავტოქარის“ ინფორმაციით, ახალ მიკრობუსს ჩატანუგას (შტატი ტენესი) ქარხანაში არ გამოუშვებენ. ამ ქარხნის დანიშნულება კვლავაც მხოლოდ საშუალო ზომის სედან „პასატის“ წარმოება იქნება. ყველაზე რეალურია, რომ მიკროვენის საწარმოებლად, ვოლფსბურგელებმა თავიანთი პუებლას (მექსიკა) ქარხანა გამოიყენონ, რომელიც ახალ „ხოჭოს“ უშვებს.

კონცეპტუალური მიკროვენი „ბული“, რომლის მსოფლიო პრემიერასაც ჟენევის საავტომობილო შოუმ უმასპინძლა, ელექტრომობილია. ის ელექტროძრავითაა აღჭურვილი, რომელიც 85 კილოვატს იძლევა. ენერგიით მას ლითიუმ-იონური აკუმულატორების ბლოკი კვებას, რომლის ტევადობაც 40 კილოვატსაათია. გერმანული კომპანიის მონაცემებით, ეს ენერგია საკმარისია იმისათვის, რომ ავტომობილმა ერთი სრული დამუხტვით დაახლოებით 300 კილომეტრი გაიაროს. ამასთან, სპეციალური მოწყობილობის დახმარებით, აკუმულატორის სრული დამუხტვა ერთ საათში ესწრება.

ჰაკენბერგს არ დაუკონკრეტებია, თუ როდის დაიწყება ახალი მიკროვენის წარმოება და რა ერქმევა მას. შესაძლოა, ამ ავტომობილს კონცეპტუალურის სახელი შეუნარჩუნდეს, ან „კამპერი“ დაერქვას, როგორც ეს ცოტა ხნის წინ, „ფოლკსვაგენის“ მთავარმა დიზაინერმა კლაუს ბიშოფმა განაცხადა. სხვათა შორის, ამ სახელით, ვოლფსბურგელები თავიანთი პოპულარული „მიკრობუსის“ ტურისტულ ვერსიას უშვებდნენ.

„ბრიგს ავტომოტივის“ საგზაო ფორმულა

2011 BAC Mono Track Car Presented

11 მარტი

ბრიტანულმა კომპანია „ბრიგს ავტომოტივ კომპანიმ“ უჩვეულო სპორტული ავტომობილი, სახელად „მონო“ შექმნა. ამ მანქანის უჩვეულობა ისაა, რომ ის ერთადგილიანია, თუმცაღა საერთო სარგებლობის გზებზე მოძრაობის ლიცენზია აქვს და რაც მთავარია, იმ ტექნოლოგიების გამოყენებითაა დამზადებული, რომლებსაც სარბოლი ავტომობილების მწარმოებლები ფართოდ იყენებენ.

რა თქმა უნდა, ერთადერთი ადგილი ავტომობილის ცენტრალურ ნაწილშია მოთავსებული. „მონო“ დახვეწილი გარეგნობით არ გამოირჩევა. უფრო მეტიც, ის უშნოა, მაგრამ სამაგიეროდ, მისმა შემქმნელებმა დიდი ყურადღება დაუთმეს თავიანთი ქმნილების აეროდინამიკურ მახასიათებლებს.

„ბრიგს ავტომოტივმა“ ავტომობილი მონოკოკურ მზიდ სისტემაზე დააფუძნა. ის ფოლადის კარკასს წარმოადგენს, რომელიც კარბონის კომპოზიტითაა არმირებული. ამ ორი მასალის შეხამებით, სტრუქტურა მეტად მტკიცე გამოვიდა და ის უსაფრთხოების კაპსულის მოვალეობასაც ასრულებს. გარდა ამისა, პასიური უსაფრთხოების მოთხოვნების დასაკმაყოფილებლად, შასის აქვს გადაყირავების შემთხვევაში დამცავი სტრუქტურა, რომელიც ფოლადისგანაა დამზადებული. მასზე ასევე დამაგრებულია გვერდითა და წინიდან შეჯახებისას დამცავი სტრუქტურები.

„მონო“ აღჭურვილია ოთხცილინდრიანი 2.3-ლიტრიანი ბენზინის ძრავით, რომელიც „ბრიგს ავტომოტივმა“ სპორტული (მათ შორის, ფ1-ის) ძრავების წეარმოებაზე სპეციალიზებული „კოსუორტისგან“ მიიღო. აგრეტაგი 280 ცხენის ძალას ავითარებს, როცა ბრუნთა რიცხვი 7 700 ბრ/წთ-ია. მაქსიმალური მაბრუნი მომენტი - 280 ნიუტონმეტრი კი 6 000 ბრ/წთ-ზე მიიღწევა.

ძრავთან შეწყვილებულია კომპანია „ჰიულენდის“ წარმოების, ფორმულა 3-ის სპეციფიკაციის 6-საფეხურიანი სეკვენტალური გადაცემათა კოლოფი. „ბრიგს ავტომოტივის“ ინფორმაციით, ამ ტანდემის მეშვეობით, „მონოს“ ადგილიდან ასის აკრეფა დაახლოებით 2.8 წამში შეუძლია, მისი მაქსიმალური სიჩქარე კი 270 კმ/სთ-ს აღწევს.

საკიდარიც სპორტული ყაიდისაა. მასში რხევების ჩაქრობას კომპანია „ზაქს რეისინგის“ წარმოების დრეკადი ელემენტები უზრუნველყოფს. საკიდარს ბორბლის რხევები ბერკეტით გადაეცემა. მუხრუჭები კომპანია „AP რეისინგის“ წარმოებისაა. სამუხრუჭე გაგრილებადი დისკოების დამეტრი 295 მილიმეტრია. ავტომობილი კომპანია „O.Z. რეისინგის“ 17-დუიმიან ბორბლებზე დგას, მათზე კი კომპანია „კუმიოს“ საბურავებია ჩაცმული.

დაბოლოს, „ბრიგს ავტომოტივის“ საგზაო ფორმულა „სულ რაღაც“ 66 625 გირვანქა სტერლინგი (დაახლოებით 106 900 დოლარი) ღირს.

იაპონიაში ცუნამიმ ავტოინდუსტრიაც ძლიერ აზარალა

Tsunami in Japan destroys fleet of cars ready for shipping

11 მარტი

იაპონია შავ დრეშია, ხალხი დაიღუპა, და ეს აუნაზღაურებელი დანაკლისია. თუმცა ჟურნალისტის თვალი (კამერა) ასეთ მძიმე წუთებშიც თავის საქმეს აკეთებს. 8.9-მაგნიტუდიანმა მიწისძვრამ მიწასთან გაასწორა ამომავალი მზის ქვეყნის უდიდეს კუნძულ ჰონშიუს აღმოსავლეთ სანაპიროს ქალაქები.

მიწისძვრა სანაპიროდან დაახლოებით 130 კილომეტრის დაშორებით მოხდა და მას რამდენიმე, შედარებით სუსტი ბიძგები მოჰყვა. მიწისძვრამ ათმეტრიანი ცუნამი წარმოქმნა, რომელმაც თავის გზაზე ყველაფერი წალეკა. იბარაკის პრეფექტურის ქალაქ ჰიტაჩინაკას სატვირთო ტერმინალში, წყალმა უცხოეთში გასაგზავნად გამზადებული ათასობით ავტომობილი წალეკა.

ამ ფოტოს გადამღებს არ დაუზუსტებია, თუ რომელი კომპანიის ავტომობილები იდგა ამ კონკრეტულ ტერმინალზე. სამაგიეროდ, გავრცელდა ინფორმაცია იმის შესახებ, რომ „ტოიოტამ“, „ჰონდამ“, „სუბარუმ“ და „ნისანმა“ ახლომდებარე რეგიონებში თავიანთი ქარხნები დახურეს. „ჰონდას“ კვლევით ცენტრში ჩამონგრეულმა კედელმა ერთი ადამიანის სიცოცხლე შეიწირა, დაახლოებით 30 კი დაშავდა.

იაპონიას ჩვენი თანაგრძნობა...

„ლამბორგინი“ მხოლოდ 4 000 ცალ „ავენტადორს“ გამოუშვებს

Lamborghini Might Only Make 4 000 Aventadors

10 მარტი

„ლამბორგინიმ“ თავის უახლეს ფლაგმან „ავენტადორის“ მსოფლიო პრემიერა ახლახანს, ჟენევის ავტო შოუზე გამართა და იქვე გამოაცხადა, რომ ეს ავტომობილი იმ რაოდენობით გაყიდა, რამდენიც წელს უნდა დაამზადოს. არადა, შეკვეთილი ავტომობილების მიწოდებას რამდენიმე თვეში იწყებს. ასე რომ, ამ ექსკლუზიურ ავტომობილზე, რომელიც 267 000 ევრო ღირს, უკვე რიგები დგას.

ამასთან, არის კიდევ ერთი ფაქტორი, რომელიც „ავენტადორს“ თავის წინამორბედ „მურსიელაგოზე“ გაცილებით ექსკლუზიურს ხდის. საქმე ისაა, რომ იტალიური კომპანია ამ ავტომობილს მხოლოდ 4 000 ცალს გამოუშვებს, ზუსტად იმდენს, რამდენიც „მურსიელაგო“ დაამზადა.

ბრიტანულ გამოცემა „ავტოქარის“ მიერ მოპოვებული ინფორმაციით, ახალი ავტომობილის წარმოების შეზღუდვას ტექნოლოგიური მიზეზი აქვს. კერძოდ ის, რომ კარბონის კომპოზიტისგან დამზადებული ყალიბები, მონოკოკის მხოლოდ 500 ცალი დეტალის დამზადების საშუალებას იძლევა. შემდეგ კი ისინი ახლებით უნდა შეიცვალოს. პროექტი და მასზე გაღებული ინვესტიცია კი ყალიბების მხოლოდ 8 ცალი კომპლექტის დამზადებას ითვალისწინებს. ეს კი მხოლოდ 4 000 ცალი მონოკოკის დასამზადებლადაა სამყოფი.

მონოკოკი არის ავტომობილის ძირითად მზიდი სისტემა, რომელიც სახურავსაც აერთიანებს. ის ერთი მთლიანი სტრუქტურაა, რისი წყალობითაც, გრეხვაზე მისი წინააღმდეგობა მნიშვნელოვნად იზრდება. ამასთან, სალონში მყოფთათვის, პასიური უსაფრთხოებაც უმჯობესდება. მონოკოკი სულ 147.5 კილოგრამს იწონის. თუ ამას ალუმინის შენადნობებისგან დამზადებულ წინა და უკანა სუბჩარჩოებსაც დავუმატებთ, მზიდი ელემენტის წონა 229.5 კილოგრამამდე იზრდება, მისი ტორსიონული მედეგობა კი, ყოველ გრადუსზე 35 000 ნიუტონმეტრს აღწევს.

სანტ’აგატა ბოლონეზური კომპანია პრეს რელიზით გვამცნობს, რომ ის პირველია, ვინც კარბონის კომპოზიტის ტექნოლოგია სერიულ წარმოებაში დანერგა. გარდა ამისა, „ავენტადორის“ წარმოებისთვის, „ლამბომ“ კიდევ არაერთი სიახლე დანერგა და დააპატენტა. მათ შორისაა სამგანზომილებიან პროგრამაში დაპროექტება, კომპიუტერული სიმულაცია, ტესტირება და წარმოებისთვის მომზადება.

„ჰიუნდაი ველოსტერმა“ კორეაში სტარტი აიღო

Hyundai Launches Veloster in Korea

10 მარტი

მათ, ვინც „ჰიუნდაის“ სპორტული „ველოსტერის“ ბაზარზე გამოჩენას მოუთმენლად ელოდა, ნანატრი დრო დაუდგათ - კორეულმა კომპანიამ, საკუტარ ქვეყანაში ამ ავტომობილის ოფიციალური პრეზენტაცია ჩაატარა, ავტომობილისა, რომლითაც ახალგაზრდა მყიდველის მიზიდვას ეცდება.

მაგრამ პრეზენტაციაზე, „ჰიუნდაიმ“ გამოაცხადა, რომ კორეის ბაზარზე, წელიწადში მხოლოდ 18 000 „ველოსტერს“ გაჰყიდის. ეს კი იმ საბაბით კეთდება, რომ „ველოსტერს“ პრემიუმ კლასის ავტომობილის იმიჯი ჩამოუყალიბდეს. მართალია, ამ ავტომობილის წარმოების ოცულობა შეიზღუდა, მაგრამ მას მაინც შედარებით დაბალი ფასი აქვს - კორეაში საბაზო ვერსია 19.4 მილიონი ვონი (დაახლოებით 17 000 დოლარი) ეღირება.

პრეზენტაციაზე ასევე გამოცხადდა, რომ ევროპის ბაზარზე, „ჰიუნდაი ველოსტერი“ ზაფხულამდე გამოჩნდება. უფრო მოგვიანებით, ამ ავტომობილს ამერიკასა და სხვა მნიშვნელოვან ბაზრებზეც შეიტანენ. ამასთან, ამ ბაზრებზე „ველოსტერის“ ფასიც მოგვიანებით გამოქვეყნდება.

სამკარიან კომპაქტურ კუპე „ჰიუნდა ველოსტერის“ მსოფლიო პრემიერა დეტროიტის საერთაშორისო ავტო შოუზე ჩატარდა. ეს ავტომობილი, პირველ რიგში, თავისი სამი კარის უჩვეულო კონფიგურაციით გამოირჩევა. სამიდან ერთი მძღოლის მხარეს მდებარეობს, ორი კი - მის მოპირდაპირე მხარეს.

„ველოსტერს“ მამოძრავებელ ძალას 1.6-ლიტრიანი ოთხცილინდრიანი ძრავი ანიჭებს, რომელსაც საწვავი პირდაპირ წვის კამერაში მიეწოდება. მაბრუნ მომენტს კი ტრანსმისიას ორდისკოიანი ქუროს გავლით აწვდის. სხვათა შორის, „ველოსტერი“ კორეული კომპანიის პირველი ავტომობილია, რომელშიც ორდისკოიანი ქუროა გამოყენებული. ეს სერია გამაში ყველაზე პატარა ძრავია, რომელზეც ბენზინის უშუალოდ წვის კამერაში მიწოდების სისტემა გამოიყენეს.

„ჰიუნდაის“ ამერიკული ტექნიკური ცენტრის ძრავების განყოფილების დირექტორი ჯონ ჯურიგა ამბობს, რომ ამ სისტემის წყალობით, ძრავი მძლავრიც გამოვიდა, ეკონომიურიც და რაც ასევე მნიშვნელოვანია, ატმოსფეროსაც ნაკლებად აბინძურებს. კერძოდ: მისი სიმძლავრე 138 ცხენის ძალაა (6 300 ბრ/წთ-ზე), მაქსიმალური მაბრუნი მომენტი კი - 170 ნიუტონმეტრი (4850 ბრ/წთ-ზე). ამ აგრეგატის შესანიშნავი მონაცემები კიდევ ერთი სისტემის დამსახურებაა, რომელიც სარქველთა გახსნა-დახურვის ფაზებს მუდმივად, ბრუნთა რიცხვების შესაბამისად ცვლის. ამის შედეგია ისიც, რომ ერთი ლიტრი საწვავით, „ველოსტერს“ 15.3 კილომეტრის გავლა შეუძლია, მაგისტრალზე 100 კილომეტრის გასავლელად კი 5.7 ლიტრი ბენზინი ჰყოფნის.

„ბრენდ კეის“ მომხმარებელთა ლოიალურობის გამოკითხვას „ჰიუნდაი“ ლიდერობს

Hyundai tops Brand Keys customer loyalty survey

9 მარტი

ბოლო რამდენიმე წელია, „ჰიუნდაი“ სულ უფრო ვითარდება და მსოფლიო ფინანსური კრიზისის მიუხედავად, გაყიდვებსაც მუდმივად ზრდის. ორი წლის წინ, გაყიდვების მოცულობით, ის (კიასთან ერთად) მსოფლიოს მეხუთე უდიდესი ავტომწარმოებელი გახდა. ბაზარზე ახალი „სონატას“ და „ელანტრას“ გამოჩენა კი კორეული კომპანიის პოზიციებს კიდევ უფრო გაამყარებს.

ამ ეტაპზე, „ჰიუნდაი“ ახალი მომხმარებლების მიზიდვითაა დაკავებული, თუმცა პოზიციის გასამყარებლად, მომხმარებელთა ლოიალობასაც დიდი მნიშვნელობა ენიჭება. ეს კი იმას ნიშნავს, რომ კორეულმა კომპანიამ უნდა შეძლოს ახლანდელი მომხმარებლების შესარჩუნება, როდესაც ისინი ახალი ავტომობილის შეძენას გადაწყვეტენ.

როგორც ირკვევა, ამ ეტაპზე, „ჰიუნდაი“ მომხმარებელთა ლოიალობის მხრივაც, ავტობაზრის ლიდერია. ეს კი ამ საქმეზე სპეციალიზებულ ანალიტიკურ კომპანია „ბრენდ კეისის“ მიერ ჩატარებული გამოკითხვა ადასტურებს, რომლის შედეგების მიხედვითაც, კორეული კომპანიას ყველაზე ლოიალური მყიდველი ჰყავს.

„ბრენდ კეისის“ პრეზიდენტი რობერტ პასიკოფი ამბობს, რომ „ჰიუნდაი“ ყველაზე უკეთ ამართლებს მყიდველთა მოლოდინს და სწორედ ამის შედეგია ის, რომ მომხმარებელთა ლოიალობის ასპექტში, საავტომობილო ბაზრის ლიდერია.

„ბრენდ კეისის“ რეიტინგში, „ჰიუნდაის“ შემდეგ, ადგილები „ფორდს“, „ჰონდას“ და „ნისანს“, ასევე „ბეემვეს“ და „მერსედეს-ბენცს“.

„კიონიგსეგ აგერა R“ – ომანის მეფის ასრულებული ოცნება

New Koenigsegg Agera R gets 1 115 HP

8 მარტი

როდესაც ავტომობილი 910-ცხენისძალიანი ძრავითაა აღჭურვილი, ტიუნინგის სპეციალისტებისთვის ის ნაკლებად საინტერესოა - ძრავის მნიშვნელოვნად გაძლიერების პერსპექტივა მცირეა. მაგრამ როდესაც შეკვეთას ომანის მეფე იძლევა და რა თქმა უნდა, შეკვეთის შემსრულებელს უამრავ ნავთობდოლარს პირდება, შეუძლებელი რა უნდა იყოს...

სწორედ ასეა შვედურ კომპანია „კიონიგსეგის“ უახლესი „აგერას“ შემთხვევაში. ომანის მეფეს ეს მანქანა მოსწონებია, თუმცა მისი 910 ცხენის ძალა ეცოტავა... და სანამ ტიუნინგის სპეციალისტებს მიმართავდა, მისი ოცნების დაკმაყოფილება თავად მანქანის მწარმოებელმა იკისრა. საბოლოო პროდუქტი კი ჟენევის ავტო შოუზე წარადგინა.

„კიონიგსეგ აგერა R“ 5.0-ლიტრიანი V8 აგრეგატითაა აღჭურვილი, რომელიც წყვილი ტურბოკომპრესორის დახმარებით, 1 115 ცხენის ძალას და 1 200 ნიუტონმეტრს იძლევა. ეს მონაცემები მაშინ მიიღწევა, როდესაც ავტომობილი საწვავად E85 ნარევს (ამ ნარევში 85 ეთანოლის შემცველობას აღნიშნავს) იყენებს. თუ საწვავი 95 ოქტანური რიცხვის ბენზინია, მაშინ სიმძლავრე 940 ცხენის ძალა, მაქსიმალური მაბრუნი მომენტი კი 1 100 ნიუტონმეტრია.

ძრავთან, ორდისკოიანი ქუროს მეშვეობით, 7-საფეხურიანი უახლესი, ნახევრად ავტომატური გადაცემათა კოლოფია შეწყვილებული. ამ სუპერ ტანდემის მეშვეობით, ადგილიდან ასამდე აჩქარება „აგერა R-ს“ 2.9 წამში შეუძლია, მისი მაქსიმალური სიჩქარე კი 375 კმ/სთ-ითაა შეზღუდული, თუმცა შვედური კომპანია ირწმუნება, რომ შეზღუდვის გარეშე, ავტომობილს 440 კმ/სთ-ის აკრეფაც შეუძლია.

შვედური მონსტრის მზიდი სისტემის ძირითადი ელემენტი კარბონის კომპოზიტისგან დამზადებული მონოკოკია, რომელიც სულ რაღაც, 70 კილოგრამს იწონის. მასშია ინტეგრირებული საწვავის ავზიც, რომელზეც უშუალოდ მაგრდება ძრავი. მსუბუქი მეტალებისა და კარბონის კომპოზიტის ფართოდ გამოყენების წყალობით, ავტომობილის მშრალი წონა მხოლოდ 1 330 კილოგრამია. აქედან სრულად დაკომპლექტებულ (მქნევარათი, გადაბმის ქუროთი, მშრალი კარტერით და ტურბოკომპლექტით) ძრავზე 197 კილოგრამი მოდის. ავტომობილის შესანიშნავი დინამიკური მახასიათებლების გარდა, სიმსუბუქე „აგერა R-ის“ ეკონომიურობასაც განაპირობებს. კერძოდ, 100 კილომეტრის გასავლელად, მას 14.7 ლიტრი საწვავი ჰყოფნის.

რაც შეეხება ინტერიერს, ერთი შეხედვით, მისი მთავარი თვისება უბრალოებაა, თუმცა სინამდვილეში პირიქითაა. ალუმინით, კარბონით და ძვირფასი ტყავით გაწყობილი დეტალები ექსკლუზიურ ატმოსფეროს ქმნის. ელექტრონული სისტემა ინფოტაინმენტი კი აუდიოსისტემის, სატელიტური ნავიგაციის და უკაბელო კავშირის ფუნქციებს მოიცავს და ასევე ეკრანზე მანქანის ტელემეტრიული მონაცემების გამოტანაც შეუძლია.

ასე რომ, „აგერა R-ს“ ნუღარ უწოდებთ სუპერქარს, ის ნამდვილი ჰიპერქარია.

„გუმპერტის“ 700-ცხენისძალიანი მაჩო

Geneva 2011: Gumpert Tornante by Touring

7 მარტი

ჟენევის საავტომობილო გამოფენაზე ბევრი სუპერ ავტომობილის ხილვა შეიძლება, მათ შორის ერთ-ერთი გამორჩეული კი პატარა გერმანულ კომპანია „გუმპერტის“ ახალი შედევრია, სახელად „ტორნანტე“, რაც იტალიურად მკვეთრ მოსახვევს ნიშნავს. ეს მეორე ავტომობილია, რომელიც „გუმპერტმა“ შეიმუშავა და ამ საქმეში მას იტალიური ატელიე „კაროცერია ტურინგ სუპერლეგერა“ დაეხმარა.

მოდელ „ტორნანტეს“ საფუძველს ფოლადის მილებისგან შეკრული შასი წარმოადგენს, რომელზეც კარბონის კომპოზიტისგან დამზადებული ძარის პანელებია დამაგრებული. სწორედ ძარა დაამზადა იტალიურმა ატელიემ, რომლის შესახებაც ადრე ბევრი არაფერი იყო ცნობილი.

„ტორნანტეს“ გაბარიტებია: 4.475 მეტრი, სიგანე 1.971 მეტრი, სიმაღლე 1.215 მეტრი, ბორბლებს შორის ბაზა - 2.700 მეტრი. ავტომობილის საბაზო ვერსიის წონა 1300 კილოგრამია, დამატებითი აღჭურვილობის დამატების შემთხვევაში კი ის დაახლოებით 100 კილოგრამით მძიმდება.

„გუმპერტის“ ახალი სუპერ ავტომობილი 4.2-ლიტრიანი V8 ძრავითაა აღჭურვილი, რომელსაც ორი ტურბოკომპრესორი ემსახურება. ძრავის სიმძლავრე 700 ცხენის ძალაა, მაქსიმალური მაბრუნი მომენტი კი 900 ნიუტონმეტრს (4 000 ბრ/წთ-ზე) აღწევს. ძრავთან 6-საფეხურიანი ნახევრად ავტომატური კოლოფია შეწყვილებული, რომელიც საჭის რგოლის უკან მოთავსებული ბერკეტებით, საფეხურებს 40 მილიწამში ცვლის. ამ ტანდემის დახმარებით, ავტომობილს ადგილიდან 100 კმ/სთ სიჩქარის აკრეფა 3 წამში შეუძლია, მისი მაქსიმალური სიჩქარე კი 300 კმ/სთ-ზე მეტია.

მართალია, „გუმპერტმა“ თავისი ახალი ავტომობილის ტექნიკური მახასიათებლები გამოაქვეყნა, მაგრამ ისიც განაცხადა, რო ისინი შეიძლება შეიცვალოს, რადგან „ტორნანტეს“ სრულყოფის პროცესი ჯერაც არ დასრულებულა. ამასთან, კომპანია გვპირდება, რომ ჟენევის შემდეგი გამოფენისთვის, „ტორნანტეს“ ეკოლოგიურად სუფთა ვერსიას მოამზადებს. ოღონდ, ეს ჰიბრიდი იქნება, თუ ელექტრომობილი, ამას ჯერაც არ აკონკრეტებს.

„ტორნანტე“ რეგულირებადი ამორტიზატორებით აღიჭურვება, მის შენელებას კი ექბსცილინდრიანი სამუხრუჭე მექანიზმები უზრუნველყოფს, რომლებიც 378-მილიმტრიან დისკოებზე ზის. ავტომობილის წინა ნაწილი 19-დუიმიან, უკანა კი 20-დუიმიან ბორბლებზე დგას, რომლებზეც „მიშლენის“ სერია „პაილოტ სუპერ სპორტის“ 265/35 და 345/30 საბურავებია ჩაცმული.

სავარაუდოდ, „გუმპერტი“ ამ ავტომობილის გაყიდვას მერმისს შეუდგება და მას დაახლოებით 800 000 დოლარად შეაფასებს.