ბუგატი ტაიპ 46S რაინბოლდტ უნდ კრისტი

Bugatti Type 46S Reinboldt & Christie Cabriolet

12 აპრილი

ეტორე ბუგატიმ თავისი ყველაზე დიდი ოცნება - შეექმნა ულტრა ლუქსის კლასის ავტომობილი, პირველად 1929 წელს აისრულა, როდესაც მოდელი ”ტაიპ 41 როიალი” დაამზადა. მაგრამ ეს ავტომობილი უზარმაზარი, 8-ცილინდრიანი (ერთ რიგში განლაგებული ვილინდრებით) 12-ლიტრიანი ძრავით იყო აღჭურვილი, რომლის მუშა მოცულობაც ოთხჯერ და მეტად აღემატებოდა კომპანიის ძრავების გამაში ყველაზე დიდი აგრეგატისას.

დიდი ძრავი სერიოზულ პრობლემას ქმნიდა, როდესაც კაპოტქვეშ მისი განლაგების დრო დგებოდა. ამიტომ, ეტორემ სასწრაფოდ შეიმუშავა უფრო ზომიერი და არანაკლებ მდიდრული ავტომობილი - ”ტაიპ 46”, რომელიც რეალურად, გიგანტური ”როიალის” დაპატარავებული ვერსია იყო, რის გამოც, მას ხშირად ”პეტიტ როიალს” (პატარა როიალს) უწოდებდნენ.

ისევე როგორც ”როიალი”, ”ტაიპ 46-იც” 8-ცილინდრიანი აგრეგატით აღიჭურვა, ოღონდ მისი მუშა მოცულობა ”მხოლოდ” 5.3 ლიტრი იყო. მართალია, ისეთივე კონსტრუქცია ჰქონდა, როგორიც წარმატებულ სარბოლ ”ტაიპ 35-ის” ძრავს, მაგრამ ეს აგრეგატი მაინც მოკრძალებული სიმძლავრით გამოირჩეოდა - მისი მაქსიმუმი სულ რაღაც 140 ცხენის ძალას შეადგენდა. სამაგიეროდ, დგუშის დიდი სვლის წყალობით, დაბალ ბრუნთა რიცხვებზევე შეეძლო მაღალი მაბრუნი მომენტის განვითარება. ძრავს ერთადერთი გამანაწილებელი ლილვი ჰქონდა, რომელიც თითო ცილინდრში სამ-სამ სარქველს ემსახურებოდა. ამ სამიდან ორი შემშვები იყო, ერთი კი - გამომშვები.

”ტაიპ 46-ის” შასიც ”ბუგატის” სტილში იყო შესრულებული. მზიდი სისტემა ფოლადისგან იყო შეკრული, საკიდარის ძირითადი დრეკადი ელემენტის მოვალეობას კი ფოლადის დრეკადი ღერძები ასრულებდნენ. გარდა ამისა, წინა საკიდარში რხევების ჩაქრობას ნახევრად ელიპტიკური, უკან კი მეოთხედელიპტიკური რესორები ემსახურებოდა.

”ბუგატიმ” კონსერვატიზმი სამუხრუჭე სისტემასთან დაკავშირებითაც შეინარჩუნა. კერძოდ, დოლური მუხრუჭების მართვა ისევ კაბელების მეშვეობით ხორციელდებოდა. ეს იმ დროს, როდესაც ფრანგული კომპანიის თითქმის ყველა კონკურენტი უკვე ჰიდრავლიკურ სისტემებს იყენებდა. ამასთან, წინა მუხრუჭებს ერთი ცუდი თვისება ჰქონდა - დრეკადი ღერძის გრეხვის დროს, მუხრუჭი თავისით მოქმედებდა, რაც მძღოლს ბევრ პრობლემას უქმნიდა. ამის აღმოსაფხვრელად, ინჟინრებმა სპეციალური სისტმა შეიმუშავეს, რომელიც თვითდამუხრუჭებას ხელს უშლიდა.

ისევე როგორც ”როიალი”, ”ტაიპ 46-იც” სამსაფეხურიანი კოლოფით აღიჭურვა, რომელთანაც უშუალოდ იყო დაკავშირებული დიფერენციალი. ვერავინ იტყვის, რამ აიძულა ”ბუგატის” ინჟინრები, რომ მათ ასეთი უჩვეულო კონსტრუქცია გამოეყენებინათ, რომლის მსგავსიც სხვა არცერთი კომპანიის არცერთ ავტომობილზე არ გვხვდებოდა. თუმცა, ისიც ფაქტია, რომ ეტორე ბუგატის იდეა ფიქსი იყო, რომ ის და მისი მანქანები სხვებისგან გამორჩეულები უნდა ყოფილიყვნენ.

”ბუგატიმ” თავისი ახალი ლუქსის კლასის ავტომობილი 1929 წლის პარიზისა და ლონდონის საავტომობილო შოუებზე გამოფინა. ”ტაიპ 46”, თავისი 3.5-მეტრიანი ბაზით, აშკარად არ იყო პატარა ავტომობილი, თუმცა გაბარიტებით, ”როიალთან” ახლოსაც ვერ მიდიოდა. სამაგიეროდ, ”როიალისგან” განსხვავებით, პირველივე ჩვენების შემდეგ, პოპულარული გახდა - ”ბუგატიმ” მასზე არაერთი შეკვეთა მიიღო. ოღონდ, ამ შეკვეთებს ”ბუგატი” მხოლოდ ნაწილობრივ აკმაყოფილებდა - ფრანგული კომპანია მხოლოდ სრულად დაკომპლექტებულ შასის აწარმოებდა. დანარჩენ საქმეს კი ”ბუგატის” პარტნიორი (ქოუჩბილდერ) კომპანიები ასრულებდნენ, რომლებიც ძარების წარმოებაზე იყვნენ სპეციალიზებულნი. ძარების მხრივ კი არჩევანი დიდი იყო - მყიდველს შეეძლო შეეკვეთა სედანი, კუპე, კაბრიოლეტი და სხვა ტიპის, იმ დროს გავრცელებული ძარები.

სხვათა შორის, ეტორე ბუგატის შვილი ჟანი სწორედ დიზაინის საქმეში გაიწაფა და არაერთი საინტერესო პროექტითაც გამოიჩინა თავი. ის თავისი მამის ავტომობილებისთვის მეტწილად სპორტული სტილის აეროდინამიკურ (ნოჩბეკებს და ჰანჩბეკებს) ძარებს ამზადებდა. თუმცა, ”ბუგატის” არასპორტული ავტომობილების უმეტესობა მაინც კონსერვატიული, ტრადიციული დიზაინით გამოირჩეოდა.

1931 წელს, ”ტაიპ 46-ის” ძარების გამას სპორტული ვერსია დაემატა, რომელსაც ამის აღსანიშნავად, სახელწოდებაში ასო S მიუწერეს. ძარის გარდა, სტანდარტული ვერსიისგან ამ მოდელს ისიც განასხვავებდა, რომ მის ძრავს მექანიკური დამჭირხნი ემსახურებოდა. კომპანია ”ზენიტის” კარბურეტორებისა და ”რუტსის” დამჭირხნის დახმარებით, ძრავის სიმძლავრე 20 ცხენის ძალით გაიზარდა. ეს არ გამოდგა სიმძლავრის საკმარისი ზრდა იმისათვის, რომ მყიდველს მასში ზედმეტი თანხა გადაეხადა. ამიტომ, ”ტაიპ 46 S-ზე” კომპანიამ მხოლოდ 20 შეკვეთა მიიღო.

”ტაიპ 46 S-ის” პარალელურად, მალე ”ბუგატიმ” ახალი ლუქს მოდელის, ”ტაიპ 50-ის” წარმოებაც დაიწყო. ესეც პრაქტიკულად იმავე შასიზე იყო ბაზირებული, რომელსაც კომპანია ”როიალისა” და ”ტაიპ 46-ის” წარმოებისას იყენებდა. სამაგიეროდ, ძრავი მნიშვნელოვნად შეიცვალა. ამჯერად, კაპოტქვეშ განალაგეს რვაცილინდრიანი ძრავი, რომლსაც ორი გამანაწილებელი ლილვი ჰქონდა. მისი მუშა მოცულობა 5.0 ლიტრამდე შემცირდა, თუმცა მექანიკური დამჭირხნის დახმარებით, ის 200 ცხენის ძალას იძლეოდა.

”ტაიპ 46-ის” და ”ტაიპ 50-ის” წარმოება 1936 წლამდე გაგრძელდა, მერე კი კომპანიამ ისინი სრულიად ახალი ავტომობილით - ”ტაიპ 57-ით” შეცვალა. მართალია, ეს უკანასკნელი ”ბუგატის” უშუალო კონკურენტ ”დელაჟის” ანალოგიურ მოდელზე თითქმის ორჯერ ძვირი ღირდა, თუმცა ”ბუგატიმ” მაინც 400 ცალი ”პეტიტ როიალის” გაყიდვა შეძლო.

სამწუხაროდ, დღეს ეტორე ბუგატის საყვარელი მოდელის სულ რამდენიმე ეგზემპლარიღაა შემორჩენილი, რომლებიც მეტწილად კერძო კოლექციონერების ფარეხებში დგანან.

”ჰამერის” შეძენა ამერიკულ კომპანიას სურს

Hummer

12 აპრილი

მას შემდეგ, რაც ჩინურ ინდუსტრიულ გიგანტ ”სიჩუან ტენჯონს” ”ჰამერის” მიყიდვაზე უარი უთხრა, ”ჯენერალ მოტორსმა” უგზოობის ავტომობილების ამ მარკის ლიკვიდაციაზე დაიწყო ზრუნვა. თუმცა, არაა გამორიცხული, რომ ბოლო მომენტში მაინც გადაიფიქროს და ”ჰამერს” ახალი პატრონი შეურჩიოს. ეს კი იმ შემთხვევაში მოხდება, თუ რეალური მყიდველი გამოჩნდება.

”ჰამერის” შეძენა დღესაც რამდენიმე კომპანიას სურს, რომელთა შორისაცაა ამერიკული ”რეიზერ ტექნოლოჯიზი”. ამ კომპანიას ”გენერლებისთვის” ”ჰამერის” შეძენის საკითხზე უკვე ორჯერ მიუმართავს, მაგრამ ორივე შემთხვევაში უარი მიიღო. პირველ შემთხვევაში, ეს იმის გამო მოხდა, რომ ”ჯენერალ მოტორსი” მოლაპარაკებას ”სიჩუან ტენჯონთან” აწარმოებდა. მაგრამ ეს მოლაპარაკება ჩიხში შევიდა, რადგან ჩინეთის კანონმდებლებმა ჩინური კომპანიისგან ”ჰამერის” შეძენის პერსპექტივა არ მოიქონეს.

ჩინელებთან მოლაპარაკების ჩაშლის შემდეგ, ”რეიზერ ტექნოლოჯიზმა” ”ჯენერალ მოტორსს” კიდევ ერთხელ მიმართა. მისი ხელმძღვანელობა მზად იყო, ”ჰამერში” იმაზე მეტი თანხა გადაეხადა, ვიდრე ჩინური კომპანია იხდიდა (სიჩუან ტენჯონი ჰამერს 150 მილიონ დოლარად ყიდულობდა).

”რეიზერ ტექნოლოჯიზი” შტატ იუტაშია ბაზირებული და მისი საქმიანობის ძირითადი სფერო ენერგიის ეკოლოგიურად სუფთა წყაროების (უფრო კონკრეტულად, გეოთერმული წყლების გამოყენება) ათვისებაა. კომპანიის ხელმძღვანელობა ირწმუნება, რომ ”ჰამერის” შეძენის შემთხვევაში, მას ”მწვანე” ბრენდად გადააქცევს, რაშიც მას საკუთარ ბიზნესში დაგროვილი გამოცდილება დაეხმარება.

სხვათა შორის, ”რეიზერ ტექნოლოჯიზმა” შარშან ჰიბრიდული ”ჰამერ H3-ის” პროტოტიპი დაამზადა, რომელიც ერთ-ერთმა პირველმა შტატ კალიფორნიის გუბერნატორმა არნოლდ შვარცენეგერმა გამოსცადა (სურათზე).

”დაიმლერმა” და ”რენო-ნისანმა” ალიანსი ჩამოაყალიბეს

Renault-Nissan, Daimler announce alliance

12 აპრილი

7 აპრილს, ტოკიოში, ”დაიმლერმა” ერთის მხრივ და ”რენოსა” და ”ნისანის” ალიანსმა მეორეს მხრივ, ახალი გლობალური ალიანსი ჩამოაყალიბეს. გაფორმებული ხელშეკრულების მიხედვით, ისინი ერთმანეთს თავიანთ აქციებს გაუცვლიან და რაც მთავარია, კომპაქტური და კომერციული ავტომობილების, ასევე მომავლის ძრავების შემუშავებაზე ითანამშრომლებენ.

შეთანხმების მიხედვით, ”დაიმლერი” ”რენოსა” და ”ნისანის” აქციების 3.1-3.1 პროცენტს დაეუფლება, თავის მხრივ კი თითოეულს თავისი ავტომწარმოებელი შტოს აქციების 1.55 პროცენტს გადასცემს. სქციების პროპორციულად გადანაწილების საკითხი იყო ბოლო წინაღობა, რომლის გადალახვის შემდეგაც, სამმა ავტომწარმოებელმა ახალი ალიანსის ჩამოყალიბება შეძლო.

ალიანსის შექმნა თავიდანვე იყო ”რენოსა” და ”ნისანის” მთავარი აღმასრულებლის, კარლოს გონის იდეა, რომელიც ამ გხით, საწარმოო ხარჯების შემცირებას და ამ გზით, ბიზნესის რენტაბელობის გაუმჯობესებას ესწრაფვის. ამ ეტაპზე, ალიანსის მთავარი მიზანი ახალი ტექნოლოგიების შემუშავებაა, რომელიც სამივეს გამონაბოლქვზე ახალი, მეტად გამკაცრებული სტანდარტების დაკმაყოფილებას შეაძლებინებს.

ამგვარად, წელს ავტოსამყაროში სამი ახალი ალიანსი წარმოიქმნა. პირველი ორი ”ფიატმა” და ”კრაისლერმა”, ასევე ”ფოლკსვაგენმა” და ”სუზუკიმ” ჩამოაყალიბეს. და ამ ალიანსების შექმნის მთავარი მიზანიც საწარმოო დანახარჯების, ახალი ტექნოლოგიების და ავტომობილების შემუშავების ღირებულების შემცირებაა.

ცნობისათვის, ფრანგულმა ”რენომ” და იაპონურმა ”ნისანმა” ალიანსი 1999 წელს ჩამოაყალიბეს. ეს არის ერთ-ერთი ყველაზე მყარი ალიანსი სხვადასხვა ქვეყნების ავტომწარმოებელთა შორის. ”დაიმლერკრაისლერისგან” განსხვავებით, ”რენო-ნისანის” ალიანსი გამართულად მუშაობს და ორივე კომპანიისთვის დიდი ხეირი მოაქვს.

აღსანიშნავია, რომ ორი წლის წინ, ”რენო-ნისანს” ალიანსის ამერიკულ კომპანიასთან ჩამოყალიბება სურდა. მაშინ, ამერიკელ მილიარდერ კირკ კერკორიანის შუამდგომლობით, პარტნიორად ”ჯენერალ მოტორსი” შეირჩა, მაგრამ ხანგრძლივ მოლაპარაკებათა შემდეგ, მიზნის მიღწევა ვერ მოხერხდა. ”გენერლებმა” კრახისგან თავი მართვადი გაკოტრებით და სახელმწიფოსგან უზარმაზარი კრედიტის აღებით გადაირჩინეს, ”რენო-ნისანის” შეფმა გონმა კი ამერიკის ნაცვლად, ახალი პერტნიორი ძველ კონტინენტზე მოძებნა.

”კანონმდებლებისა და მომხმარებლების მხრიდან, მუდმივად ვგრძნობთ ახალი ტექნოლოგიების შემუშავების აუცილებლობას. ამიტომ, აუცილებელია მუდმივად სიახლეების, მოწინავე ტექნოლოგიების შემუშავება, რათა კონკურენტუნარიანობა შევინარჩუნოთ, ამ საქმეში კი დიდ კომპანიებს შორის თანამშრომლობას მხოლოდ სიკეთის მოტანა შეუძლია”, - ამბობს გონი.

”დაიმლერის” მთავარი აღმასრულებელი დიტერ ცეტშე ამბობს, რომ ამ ალიანსით, მისი კომპანია მხოლოდ მოგებული დარჩება: ”ჩვენი შესაძლებლობები ერთმანეთის მოთხოვნილებებს საუკეთესოდ მიესადაგება. ამ მომენტიდან, ჩვენ კომპაქტური ავტომობილების სეგმენტსა და გამონაბოლქვში CO2-ის შემცირების საქმეში, ჩვენი კონკურენტუნარიანობა მნიშვნელოვნად გავზარდეთ და ამას ხანგრძლივი ეფექტი ექნება”.

გონის თქმით, ”დაიმლერთან” მჭიდრო თანამშრომლობა მის ორივე კომპანიას უახლოესი ხუთი წლის განმავლობაში, მინიმუმ 2 მილიარდ ევროს დაუზოგავს. მომავალში კი ალიანსის ფინანსური ეფექტი კიდევ უფრო სოლიდურ თანხებს მიაღწევს. დაახლოებით იგივე ხეირის მოლოდინშია ცეტშეც.

ალიანსის შექმნასთან დაკავშირებულ პრეს კონფერენციაზე მან განაცხადა, რომ ამჯერად, ”დაიმლერი” დაზღვეულია იმისგან, რომ ”კრაისლერთან” განცდილი წარუმატებლობა კვლავ გამოსცადოს. ამასთან, ისიც დასძინა, რომ ამერიკულ კომპანიასთან ალიანსის ჩაშლის მთავარი მიზეზი ერთობლივი პროექტების არგანხორციელება გახდა. ამასთან, ”რენო-ნისანთან” აქციების მინორული პაკეტების გაცვლას მან სიმბოლური უწოდა.

”როდესაც ჩვენ ”კრაისლერთან” გავერთიანდით, მაშინ ერთობლივი პროექტების განხორციელებაზე ბევრი არ გვიფიქრია. ამიტომ, ეს სრულიად არაფრის მომტანი გაერთიანება გახდა და ამის გამო დაიშალა. ამჯერად კი სულ სხვა მიზნები გვამოძრავებს. უკვე რამდენიმე თვეა, რაც სპეციფიკურ პროექტებზე ერთობლივად ვმუშაობთ”, - ამბობს ცეტშე.

ერთ-ერთი პირველი პროექტი, რომელსაც ახალი ალიანსის წევრები ერთობლივად შეიმუშავებენ, შემდეგი თაობის ”სმარტ ფორ თუ” და ”რენო ტვინგოა”, რომლებიც ერთ პლატფორმაზე აიგება. ორივე ავტომობილის ბაზარზე გამოჩენა 2013 წელს არის მოსალოდნელი და დებიუტისთანავე, ორივე ელექტროძრავებით იქნება აღჭურვილი.

კომპაქტური ავტომობილების გარდა, ახალი ალიანსის წევრები მცირელიტრაჟიან, ბენზინის და დიზელის სამ და ოთხცილინდრიან ძრავებსაც შეიმუშავებენ. ამ ძრავებს ორივე კომპანია კომპაქტურ ავტომობილებში გამოიყენებს. პარალელურად, ”ნისანის” პრემიუმ ბრენდი ”ინფინიტი” ”მერსედეს ბენცის” ოთხ და ექვსცილინდრიან ბენზინის და დიზელის ძრავებს თავის მოდელებზე გამოიყენებს. გონის თქმით, ამ ძრავების დახმარებით, ”ინფინიტი” აშშ-ის, ჩინეთისა და განვითარებადი ქვეყნების ბაზრებზე მნიშვნელოვნად გაიმყარებს პოზიციებს.

თანამშრომლობა ასევე მსუბუქ კომერციულ ავტომობილებსაც შეეხება. ამ შემთხვევაში საბაზო გახდება ”რენოს” ვენი, რომლის ბაზაზეც, ”მერსედესი” საკუთარ ვენს 2012 წელს გამოუშვებს. ამავე ვენისთვის, გერმანული კომპანია ”რენო-ნისანისგან” დიზელის ძრავებსაც შეიძენს.

გონი და ცეტშე ამბობენ, რომ ალიანსის ჩამოყალიბება აქციების გაცვლის გარეშეც შეიძლებოდა, თუმცა პაკეტების გაცვლით, ისინი ერთმანეთს პარტნიორობის მოტივაციას გაუძლიერებენ. სწორედ ესაა იმის მიზეზი, რომ მათ აქციების უფრო მსხვილი პაკეტები არ გაცვალეს.

ყველა დროის ყველაზე სწრაფი ”ფერარი”

Ferrari 599 GTO

11 აპრილი

სუპერ ავტომობილების მწარმოებელმა იტალიურმა კომპანია ”ფერარიმ” ინტერნეტით თავისი ახალი მოდელის, 599 GTO-ს (გრან ტურიზმო ომოლოგატას) შესახებ ინფორმაცია და ფოტოები გაავრცელა. ამ ინფორმაციაში ხაზგასმულია, რომ ეს არის მარანელოელთა ისტორიაში ყველაზე სწრაფი საგზაო ავტომობილი.

”ფერარი” ამ ავტომობილს შეზღუდული ტირაჟით, 599 ცალს დაამზადებს. მის მსოფლიო პრემიერას კი მსოფლიოში ყველაზე სწრაფად მზარდსა და უდიდეს ავტობაზარზე - ჩინეთში, პეკინის მოტორ შოუს დროს ჩაატარებს.

”ფერარი 599 GTO” 6.0-ლიტრიანი V12 ძრავითაა აღჭურვილი, რომელიც დაახლოებით 670 ცხენის ძალას (8 250 ბრ/წთ-ზე) და 620 ნიუტონმეტრს (6 500 ბრ/წთ-ზე) იძლევა. ეს აგრეგატი აქამდე ”ფერარი 599 GTB ფიორანოზე” გამოიყენებოდა. ძრავთან შეწყვილებულია 6-საფეხურიანი ნახევრად ავტომატური კოლოფი, რომელიც გადაცემების 60 მილიწამში გადართვას უზრუნველყოფს.

ავტომობილი 1605 კილოგრამს იწონის, რაც მისი წინამორბედის წონაზე 85 კილოგრამით ნაკლებია. წონისა და სიმძლავრის ფარდობა კი, თითოეულ ცხენის ძალაზე 2.23 კილოგრამს შეადგენს. ავტომობილს 100 კილომეტრის გასავლელად 17.5 ლიტრი ბენზინი სჭირდება, ყოველი კილომეტრის გავლისას კი ის ატმოსფეროს 411 გრამი CO2-ით აბინძურებს.

”ფერარის” მონაცემებით, 599 GTO-ს ადგილიდან 100 კმ/სთ სიჩქარის ასაკრეფად 3.35 წამი ჰყოფნის, მისი მაქსიმალური სიჩქარე კი 335 კმ/სთ-ია. რელიზში ასევე მითითებულია, რომ ეს ავტომობილი ფიორანოს სარბოლი ტრეკის ერთ წრეს წუთსა და 24 წამში გადის, რაც 2.5 წამით ნაკლებია იმ დროზე, რაც იმავე წრის გასავლელად, ”599 GTB ფიორანოს” სჭირდება.

გაუმჯობესებული აგრეგატების გარდა, ყველაზე სწრაფი ”ფერარი” ასევე აღჭურვილია აეროდინამიკური ელემენტებით, რომელთა მსგავსებიც პირველად მარანელოელებმა სატრეკო მოდელ ”ფერარი 599XX-ზე” გამოიყენეს. მაგალითად, ესაა წინა და უკანა ბამპერების ქვეშ მოთავსებული ჰაერის ამღებები და ”სასუნთქები” (უკანას შემთხვევაში), კაპოტში ამოჭრილი დამატებითი სავენტილაციო ღრიჭოები, უზარმაზარი უკანა დიფუზორი და ახალი უკანა სპოილერი. რელიზში ნათქვამია, რომ ამ ელემენტების წყალობით, 200 კმ/სთ სიჩქარეზე, ავტომობილის დინამიკური დატვირთვა დაახლოებით 144 კილოგრამით იზრდება.

ახალი ავტომობილი ასევე აღჭურვილია მოდერნიზებული სამუხრუჭე სისტემით, რომლის წინ 398-მილიმეტრიანი, უკან კი 360-მილიმეტრიანი დისკოებია განლაგებული. ავტომობილი 20-დუიმიან ბორბლებზე დგას, რომლებიც 285/30 (წინ) და 315/35 (უკან) საბურავებითაა შემოსილი.

ერთადერთი ინფორმაცია, რომლის შესახებაც მარანელოელები ჯერჯერობით სდუმან, 599 GTO-ს ფასია. სამაგიეროდ, დასავლური ავტორიტეტული გამოცემები ვარაუდობენ, რომ ავტომობილის საბაზო ღირებულება 267 136 ევრო იქნება.

”შევროლე” ინდი 500-ის პეისკარს სერიულად გამოუშვებს

Chevrolet Camaro Indianapolis 500 Pace Car Replica Limited Edition

11 აპრილი

”შევროლემ” გამოაცხადა, რომ ინდიანაპოლისის 500 მილიანი რბოლის პეისკარობისთვის მომზადებული ”შევროლე კამაროს” ბაზაზე, ამავე ავტომობილის რეპლიკას სერიულადაც გამოუშვებს. აღნიშნული ავტომობილი ინდი 500-ს წელს მოემსახურება, მისი რეპლიკა კი მხოლოდ 200 ცალი დამზადდება და თითოეული სტანდარტულ ”კამაროზე” თითქმის ორჯერ მეტი - 41 950 დოლარი ეღირება.

”ჩვენი მიზანი საკოლექციო ავტომობილის შექმნა იყო იმ ავტომოყვარულებისთვის, რომლებიც ”შევროლე კამაროს” და ინდი 500-ის თაყვანისმცემლები არიან”, - ამბობს ”შევროლეს” ამერიკული შტოს სამარკეტინგო განყოფილების ვიცე პრეზიდენტი ჯიმ კემპბელი.

ეს სულ მეოთხე შემთხვევაა, როდესაც ”შევროლე” ”კამაროს” ბაზაზე შექმნილ ინდი 500-ის პეისკარს სერიულადაც გამოუშვებს. ამასთან, ”ჯენერალ მოტორსის” ყველაზე მასობრივმა ბრენდმა უკანასკნელად ეს 1993 წელს გააკეთა. სხვათა შორის, ”შევროლე კამაროს” ინდიანაპოლისური რბოლის პეისკარობის როლი ხუთჯერ აქვს შესრულებული (ბოლოს შარშან), პირველად კი ეს 1967 წელს მოხდა.

პეისკარი ”კამარო 2SS-ის” კომპლექტაცია RS -ზეა ბაზირებული. ის აღჭურვილია 6.2-ლიტრიანი V8 ძრავით, რომელიც 400 ცხენის ძალას იძლევა. ძრავის მიერ გამომუშავებულ მაბრუნ მომენტს 6-საფეხურიანი ავტომატური კოლოფი გადაამუშავებს. პეისკარის რეპლიკა აღჭურვილია 20-დუიმიანი ბორბლებით. გარდა ამისა, ავტომობილს რამდენიმე ადგილზე (ორივე კარზე, წინა ფრთებსა და სავარძლების საკისრეებზე) ინდი 500-ის ლოგოები აქვს დატანილი.

”ლამბორგინი” სუპერ ავტომობილ ”მურსიელაგოს” შემცვლელს ამზადებს

Lamborghini Murcielago

10 აპრილი

ინგლისურმა ჟურნალმა ”ავტო ექსპრესმა” მოიპოვა მსტოვრული ფოტოები ”ლამბორგინის” ახალი ავტომობილისა, რომელმაც მალე სუპერ ავტომობილი ”მურსიელაგო” უნდა შეცვალოს. ფოტოები გადაღებულია ავტომობილის ევროპაში ტესტირების დროს. ის კამუფლირებული კია, თუმცა კონტურებში აშკარად შეინიშნება, რომ ეს სწორედ ”მურსიელაგოს” მომავალი შემცვლელი უნდა იყოს.

პარალელურად, ფოტოების მიხედვით შესაძლებელია ვარაუდი იმისა, რომ ახალი ავტომობილი წინამორბედზე გრძელიც იქნება და განიერიც. ამასთან, მისი კარის უკანა კიდესთან და უკანა საყრდენის გასწვრივ, უზარმაზარი ჰაერის ამღები ”ლაყუჩები” მოთავსდება. მათ დანიშნულებაში არამარტო რადიატორების მომსახურება და ძრავისთვის საჭირო ჰაერის თავმოყრაა, არამედ ავტომობილის უკანა ნაწილში ჰაერის ნაკადის მოძრაობის ”მოწესრიგებაც”, რამაც ავტომობილის გარსშემოდენილობა და აეროდინამიკური მახასიათებლები უნდა გააუმჯობესოს.

”ავტო ექსპრესის” ინფორმაციით, ახალი ავტომობილის ინტერიერი სუპერ ავტომობილ ”რევენტონის” სტილში შესრულდება. განათების სისტემები შუქდიოდური ელემენტებით აღიჭურვება. მის აეროდინამიკურ თვისებებს კი აქტიური სისტემა გააუმჯობესებს, რომელიც მაგალითად, უკანა, ავტომატურად რეგულირებად ფრთას უცვლის პოზიციებს. სხვათა შორის, დამუხრუჭების დროს, ამ ფრთას საჰაერო მუხრუჭის როლის შესრულებაც (როგორც თვითმფრინავებშია) შეუძლია.

ინგლისური ჟურნალი ვარაუდობს, რომ ”ლამბორგინი” თავის ახალი ფლაგმანისთვის შასის მზიდ ელემენტს კარბონის კომპოზიტისგან დაამზადებს. შასიზევე დამაგრდება ძარის ელემენტები, რომლებსაც ასევე კარბონისგან დაამზადებენ. კომპოზიციური მასალების წყალობით, ახალი ავტომობილი ”მურსიელაგოზე” 165 კილოგრამით მსუბუქი იქნება.

გარდა ამისა, მოსალოდნელია, რომ ”მურსიელაგოს” შემცვლელსაც სრულამძრავიანი ტრანსმისია ექნება. მამოძრავებელ ძალას კი მას 7.0-ლიტრიანი V12 ძრავი მიანიჭებს, რომლის მაქსიმალური სიმძლავრე 700 ცხენის ძალა, მაქსიმალური მაბრუნი მომენტი კი 700 ნიუტონმეტრი იქნება. ძრავს 7-საფეხურიანი ნახევრად ავტომატური კოლოფი შეუწყვილდება.

სისტემა ”ლონჩ კონტროლის” დახმარებით, ავტომობილი 100 კმ/სთ სიჩქარის აკრეფას დაახლოებით სამ წამში მოასწრებს, მისი მაქსიმალური სიჩქარე კი 355 კმ/სთ იქნება. ეგ კიდევ არაფერი, იტალიური კომპანიის ინჟინრები იმაზეც ზრუნავენ, რომ ახალ ავტომობილს წინამორბედზე მოკრძალებული აპეტიტიც ჰქონდეს. ინგლისური ჟურნალის მონაცემებით, ახალ სუპერ ავტომობილს 100 კილომეტრის გასავლელად, 12.3 ლიტრი ბენზინი ეყოფა, ყოველი კილომეტრის გავლისას კი ის ატმოსფეროში მაინც ძალიან ბევრ - 425 გრამ ნახშირორჟანგს გამოჰყოფს.

ახალი ავტომობილის მსოფლიო პრემიერა სექტემბერში, პარიზის საავტომობილო შოუზე გაიმართება.

”ბეემვეს” დიდი გამარჯვების აღსანიშნავი კონცეპცია

BMW 328 Mille Miglia Concept Coupe

10 აპრილი

ძველი და ახალი ბეემვე 328

................................

70 წელი გავიდა მას შემდეგ, რაც ”ბეემვემ” ლეგენდარული რბოლა ”მილე მილია” (ათასი მილი) მოიგო. ბავარიელებს დიდი გამარჯვება კუპე ”ბეემვე 328 კამმ კუპემ” მოაპოვებინა. იუბილის სღსანიშნავად, გერმანულმა კომპანიამ კონცეპტუალური ავტომობილი ”ბეემვე 328 მილე მილია კონცეპტ კუპე” მოამზადა, რომელსაც იტალიურ სადიზაინერო კონკურს ”დ’ელეგანცა ვილა დ’ესტეზე” წარადგენს.

კონკურსზე, რომელიც 23-25 აპრილს გაიმართება, კონცეპტუალური მოდელის გარდა, გამარჯვების მომპოვებელი ავტომობილიც წარსდგება. ამ ავტომობილის აღდგენას, ბავარიული გიგანტის შეკვეთით, ამ საქმის სპეციალისტებმა რამდენიმე წელი მოანდომეს.

უნდა ითქვას, რომ მეორე მსოფლიო ომს სულ ხუთი ცალი ”ბეემვე 328 კამმ კუპე” გადაურჩა. ”ბეემვემ” ამ ავტომობილის აღდგენა 15 წლის წინ დაიწყო. ამისათვის, გამოიყენეს საარქივო მასალები და კოლექციონერთა ხელთ არსებული ავტომობილები. იმ ნაწილების დასამზადებლად, რომელთა შოვნაც ვერ მოხერხდა, კომპიუტერული მოდელირების პროცესი გამოიყენეს.

”ამ ავტომობილის აღსადგენად, ჩვენ უამრავი დრო დაგვჭირდა. რესტავრაციის პროცესში, არაერთი ტექნიკური სირთულის დაძლევა მოგვიხდა. რიგ შემთხვევებში, სადავო საკითხებს კონსილიუმი კენჭისყრით წყვეტდა, რამდენჯერმე კი კვლევითი სამუშაოს ჩატარებაც კი გახდა საჭირო. სამაგიეროდ, დარწმუნებული ვარ, როდესაც ამ ავტომობილს იხილავთ, მიხვდებით, რომ მის აღდგენაზე ნამდვილი პროფესიონალები მუშაობდნენ, რომლებმაც თავიანთ საქმეში მთელი ნიჭი და მონდომება ჩააქსოვეს”, - ამბობს ”ბეემვეს” კლასიკური ავტომობილების განყოფილების დირექტორი კარლ ბაუმერი.

სხვათა შორის, ეს პირველი შემთხვევა არ იქნება, როცა ბავარიელები ელეგანტურობის კონკურსისთვის, თავიანთი ძველი ლეგენდარული ავტომობილის რეპლიკას ამზადებენ. ორი წლის წინ, მათ დაამზადეს კონცეპტუალური M1, რომელიც ამავე სახელწოდების მქონე სპორტული ავტომობილის შექმნიდან 30 წლის იუბილეს მიეძღვნა. ოღონდ, ის კონცეპტუალური ავტომობილი მხოლოდ მაკეტი იყო ყოველგვარი აღჭურვილობის გარეშე.

”სპაიკერი” უგზოობის ავტომობილს გამოუშვებს

Spyker D8 Peking-to-Paris

9 აპრილი

ჰოლანდიური კომპანია ”სპაიკერი”, რომელიც ახლახან შვედური ”სააბის” მფლობელი გახდა, წარმოებისთვის უგზოობის ავტომობილს ამზადებს, რომლის მსოფლიო პრემიერაც მერმისს, ჟენევის საავტომობილო გამოფენაზე იგეგმება.

”სპაიკერი” უგზოობის ”სპაიკერ D8 პეკინ-თუ-პარიზს” ჟენევის შარშანდელი შოუსთვის ამზადებდა, მაგრამ ეკონომიკური კრიზისისა ”ჯენერალ მოტორსთან” ”სააბის” თაობაზე დაწყებული მოლაპარაკებების გამო, პროექტი გაჭიანურდა. ახლა კი, როგორც ”სპაიკერის” ვიცე პრეზიდენტი ჰანს ფან რენესი ამბობს, პროექტზე მუშაობა განახლებულია.

ამ ავტომობილის შექმნის პროცესში, ”სპაიკერის” ინჟინრებთან ერთად, ინგლისური ”ლოტუსის” სპეციალისტებიც მუშაობენ. რა თქმა უნდა, ამ ეტაპზე, ახალი ავტომობილის შესახებ ინფორმაცია არ ვრცელდება. ჰოლანდიურ გამოცემა ”აუტოტელეგრააფთან” საუბრისას, ფან რენესმა მხოლოდ ის განაცხადა, რომ უგზოობის ავტომობილის საბაზო კომპლექტაციაში 24-დუიმიანი ბორბლები შევა. ამასთან, წინა და უკანა კარებები ერთმანეთის საპირისპირო მხარეს გაიხსნება, როგორც

2006 წელს ნაჩვენებ კონცეპტუალურ მოდელ ”სპაიკერ D12 პეკინ-თუ-პარიზს” ჰქონდა.

პროექტის პირვანდელი ვარიანტის მიხედვით, უგზოობის ავტომობილი უნდა აღჭურვილიყო ”ფოლკსვაგენის” წარმოების 6.0-ლიტრიანი W12 ძრავით, მაგრამ შემდეგ კომპანიის ხელმძღვანელობამ არჩევანი მექანიკური დამჭირხნით აღჭურვილ V8 აგრეგატზე შეაჩერა.

ინტერნეტით გავრცელებული დაუდასტურებელი ინფორმაციით, ესაა ”ჯენერალ მოტორსის” 6.2-ლიტრიანი ძრავი, რომელიც 556 ცხენის ძალას იძლევა. ამ აგრეგატს ამერიკული კომპანია ”კადილაკის” უნივერსალ CTS-V-ზე იყენებს. ოღონდ, სანამ თავიანთ უგზოობის მოდელზე გამოიყენებენ, ჰოლანდიური კომპანიის სპეციალისტები მის სიმძლავრეს 100-ზე მეტი ცხენის ძალით გაზრდიან.

გარდა ამისა, ”სპაიკერ D8 პეკინ-თუ-პარიზი” რეგულირებადი საკიდარით, ექვსცილინდრიანი მუხრუჭებით და კარბონ-კერამიკული კომპოზიტისგან დამზადებული სამუხრუჭე დისკებით აღიჭურვება, რომელთა დიამეტრი 400 მილიმეტრია.

”სპაიკერში” თვლიან, რომ მათი უგზოობის ავტომობილისთვის გასაღების საუკეთესო ბაზარი ახლო აღმოსავლეთი და ჩინეთია. ავტომობილის სავარაუდო ფასი კი 235 000 ევრო იქნება.

”ფოლკსვაგენ ამაროკი” - არქტიკული მგელი ვოლფსბურგელთა ბანაკში

VW Amarok

6 აპრილი

ეკონომიკური კრიზისის და საწვავზე ფასების განუხრელი ზრდის პირობებშიც კი, ამერიკაში ყველაზე პოპულარული პიკაპის კლასის ავტომობილებია. ამერიკულ პიკაპებს შორის კი ყველაზე გაყიდვადი ”ფორდის” F-სერიაა, რომლის ყველანაირ მოდიფიკაციასაც, წლიურად მილიონზე მეტი ადამიანი ყიდულობს.

ძნელია მიხვდე იმას, თუ რამ შეაყვარა ამერიკელებს პიკაპები. ალბათ, ეს დამოკიდებულება ჯერ კიდევ იმ დროიდან ჩამოყალიბდა, როდესაც ავტოინდუსტრია პირველ ნაბიჯებს დგამდა, ამერიკელ ფერმერებს კი ყველაზე მეტად ისეთი ავტომობილები სჭირდებოდათ, რომლითაც ბარგსაც გადაიტანდნენ და მეტნაკლებად კომფორტულადაც იმგზავრებდნენ.

ამერიკელებს მარტო ჩვეულებრივი პიკაპები როდი მოსწონთ. მაგალითად, 60-იან წლებში მეტად პოპულარული იყო კუპეს სტილის ძალიან გრძელი პიკაპები, რომელთა სიგრძე ლიმუზინებისას არაფრით ჩამოუვარდებოდა. რაღა 60-იანებში წავიდეთ და ატლანტიკის გადაღმა დღესაც ძალიან პოპულარულია ნასქარ-ის სერიის პიკაპების რბოლები. მოკლედ, პიკაპი ამერიკელებს სისხლში აქვთ და თუ ავტომწარმოებელს მათ ბაზარზე ფეხის მოკიდება სურს, მის სამოდელო გამაში ამ კლასის ავტომობილი აუცილებლად უნდა ფიგურირებდეს.

”ფოლკსვაგენი” იმ კომპანიათა რიცხვს განეკუთვნება, რომელსაც ახლო მომავალში ამერიკის ბაზარზე გაყიდვების მნიშვნელოვნად გაზრდა აქვს გადაწყვეტილი და ბუნებრივია, გერმანულმა კომპანიამ პიკაპის კლასსაც მიაქცია ყურადღება. ამის პირველი გამოვლინება კი მოდელი ”ამაროკია”, რომელიც, როგორც იტყვიან, სუფთა ფურცლიდანაა შექმნილი.

ჯერ დავიწყოთ იმით, თუ საიდან მოდის სახელი ”ამაროკი”. ეს სიტყვა ინუიტების ენაზე (ეს ტომი კანადაში, გრენლანდიასა და ალიასკაზე ცხოვრობს) მგელს ნიშნავს. უფრო მეტიც, მათი ლეგენდების მიხედვით, ამაროკი ბუნების მეფე და ყველაზე ძლიერი და მამაცი ცხოველია. გარდა ამისა, ამაროკს ლათინურად სულ სხვა განმარტება აქვს და სიტყვასიტყვით ნიშნავს - მას უყვარს ქვები. მნიშვნელობა არ აქვს, რომელ განმარტებას აირჩევთ, პიკაპის კლასის ავტომობილს ორივე შესანიშნავად მოერგება და შესაძლოა, ეს სახელი ბაზარზე მისი წარმატების პირველი ნაბიჯიც გახდეს.

ვოლფსბურგელებმა ”ამაროკი” საზოგადოებას შარშან, კონცეპტუალური მოდელის სახით წარუდგინეს და მაშინ ბევრმა ივარაუდა, რომ უგზოობის ახალ ”ტუარეგს” მსგავსი დიზაინი ექნებოდა. მაგრამ ასე არ მოხდა. სამაგიეროდ, კონცეპტუალურმა ავტომობილმა კონვეიერამდე თითქმის უცვლელად მიაღწია. ”ამაროკი” დახვეწილი და სადა დიზაინით გამოირჩევა და მის გარეგნობაში აშკარად იგრძნობა, რომ ეს ავტომობილი ”ფოლკსვაგენის” ოჯახის წევრია.

”ამაროკის” საბარგულის გაბარიტებია: სიგრძე 1555 მილიმეტრი, სიგანე - 1620 მმ. საბარგულის ფართი 2.52 კვადრატულ მეტრს, ტვირთამწეობა კი 1.15 ტონას აღწევს. გარდა ამისა, მისაბმელის მაქსიმალური დასაშვები წონა 2.8 ტონაა.

”ამაროკისთვის” ჯერჯერობით ორი ძრავია გათვალისწინებული. მათგან უფრო მძლავრია ორტურბოდამჭირხნიანი biTDI, რომლის მუშა მოცულობა 2.0 ლიტრი, მაქსიმალური სიმძლავრე 163 ცხენის ძალაა, მაქსიმალური მაბრუნი მომენტი კი - 400 ნიუტონმეტრი. ამ აგრეგატით აღჭურვილი ”ამაროკის” ის ვერსია, რომელსაც წამყვანი უკანა ბორბლები აქვს, 100 კილომეტრს 7.6 ლიტრი დიზელით გაივლის. მეორე ძრავი უფრო სუსტია - ის მხოლოდ 122 ცხენის ძალას და 340 ნიუტონმეტრს გამოიმუშავებს. სამაგიეროდ, მისი ხარჯიც ოდნავ მცირეა - 7.5 ლიტრი. ”ამაროკის” ორივე ვერსიის სვლის სიშორე 1000 კილომეტრს აღწევს.

ძრავთან დაკავშირებულია 6-საფეხურიანი მექანიკური გადაცემათა კოლოფი, რომელიც მის მიერ გადამუშავებულ მაბრუნ მომენტს ან სრულამძრავიან ტრანსმისიას აწვდის, ან უკანა წამყვან ბორბლებს. სრულამძრავიანი ტრანსმისიის შემთხვევაში, წინა ღერძის გათიშვაც შესაძლებელია, დიფერენციალს კი ბლოკირების ელექტრონული სისტემა ემსახურება. ამასთან მყიდველს ოპციის სახით, უკანა დიფერენციალის ბლოკირების მექანიკურ სისტემასაც შესთავაზებენ.

ავტომობილი მრავალფეროვანი კომპლექტაციით გამოირჩევა. მათგან საბაზო საკმაოდ ასკეტურია, ყველაზე მდიდრულს კი ქვესახელად ”ჰაილაინ” შეარქვეს. ის სალონის დეკორატიული ელემენტების მოქრომილი ზედაპირით, CD-პლეიერით, ნახევრად ავტომატური კლიმატ კონტროლით, მრავალფუნქციური მონიტორით, კრუიზ კონტროლით, სანისლე ფარებით, გაფართოებული საბორბლე თაღებით გამოირჩევა.

ღარიბი არც საბაზო კომპლექტაციაა. ევროპული ბაზრისთვის განკუთვნილი ”ამაროკის” საბაზო ვერსია აღჭურვილია უსაფრთხოების უზრუნველმყოფი პასიური და აქტიური სისტემებით. მათ შორისაა უსაფრთხოების ბალიშები, სამწერტილოვანი ღვედები (ყველა სავარძელზე), სტაბილიზაციის სისტემა, რომელსაც მისაბმელის სტაბილურობის ნაწილობრივ უზრუნველყოფაც შეუძლია. სპეციალურ ღილაკზე თითის დაჭერის შემთხვევაში, როცა ავტომობილის სიჩქარე 100 კმ/სთ-ზე მცირეა, ამოქმედდება რეჟიმი ”ოფ-როუდ”, რის პარალელურადაც, შესაბამის რეჟიმებში მუშაობას იწყებენ სტაბილიზაციის სისტემა, დიფერენციალების ელექტრონული ბლოკირების სისტემები, მოცურების საწინააღმდეგო სისტემა და ბლოკირების საწინააღმდეგო სისტემა. თუ ავტომობილის სიჩქარე 30 კმ/სთ-ზე მცირეა, მაშინ ”ოფ-როუდ” რეჟიმის ჩართვისას, მოქმედებას იწყებს აღმართსა და დაღმართში მოძრაობის გამაადვილებელი დამხმარე სისტემა.

რაოდენ გასაკვირიც უნდა იყოს, ”ფოლკსვაგენი” თავის პიკაპს პირველ რიგში, ევროპაში წარმოადგენს, სადაც პიკაპების კლასი დიდი პოპულარობით ვერ დაიკვეხნის. თუმცა, მომავალში ის სამხრეთ და ჩრდილოეთ ამერიკის, ჩინეთისა და ავსტრალიის ბაზრებზეც გამოჩნდება. თქმა არ უნდა, ვოლფსბურგელთა ჩრდილოამერიკული გეგმების შესრულებაში, ”ამაროკს” ერთ-ერთი მთავარი როლი მიენიჭება.

”ფიატი” ”პანდას” წარმოებას იტალიაში გადაიტანს

Fiat to invest 700M euros to build Panda in Italy

6 აპრილი

”ფიატმა” 700 მილიონი ევრო გამოყო იმისათვის, რომ ნეაპოლის მახლობლად მდებარე პომილიანოს გაჩერებული ქარხანა თავიდან აამუშაოს და იქ ევროპის ვყელაზე გაყიდვადი სუბკომპაქტური ავტომობილის, ”პანდას” მესამე თაობის მოდელის წარმოება დაიწყოს.

დღეისათვის ”პანდას” ტურინული კონცერნის პოლონური ქარხანა (რომელიც ქალაქ ტიშიში მდებარეობს) აწარმოებს. პომილიანოს ქარხანა გაჩერებულია, მაგრამ ”ფიატს” მისი ამოქმედება პროფკავშირების ზეწოლის შედეგად უწევს. ქარხანა მესამე თაობის ”პანდას” წარმოებას მერმისს, წლის მეორე ნახევარში დაიწყებს. სრული დატვირთვით მუშაობის დროს, იქ წელიწადში დაახლოებით 270-280 ათასი ავტომობილის წარმოება იქნება შესაძლებელი.

დღეისათვის, ამ ქარხნის ნომინალური წარმადობა 240 000 ავტომობილია, მაგრამ შარშან იქ მხოლოდ 36 000 ავტომობილი დამზადდა. გაჩერებამდე, პომილიანოს ქარხანა ”ალფა რომეოს” მოდელებს - 159-ს, GT-ს და 147-ს უშვებდა, რომლებიც ძნელად იყიდებოდა.

პროფკავშირებთან დათმობის სანაცვლოდ, ”ფიატი” მათგან ითხოვს, რომ სამუშაო პირობების შეთანხმების დროს, გაერთიანებამ მეტი მოქნილობა გამოიჩინოს და რიგ დათმობებზე წავიდეს, რათა ქარხანამ რენტაბელობის შენარჩუნება შეძლოს. ავტომწარმოებელს სურს, რომ ქარხანაში ღამის ცვლამაც იმუშაოს, სამუშაო დღეების რაოდენობა კი ექვსამდე გაიზარდოს. გაჩერებამდე, ქარხანა კვირაში ხუთ დღეს მუშაობდა, მასში ცვლების რაოდენობა კი 10 (დღეში ორი) იყო. ”ფიატს” სურს, რომ ცვლების რაოდენობა 18-მდე გაიზარდოს. გარდა ამისა, ტურინელები ქარხანაში დასაქმებულთა 10 პროცენტით შემცირებასაც მოითხოვენ. გაჩერებამდე პომილიანოს ქარხანაში 5 200 ადამიანი მუშაობდა.

”ჯენერალ მოტორსი” წყალბადის კომპაქტურ ელემენტებს გამოუშვებს

GM targets smaller, lighter hydrogen fuel cell

3 აპრილი

”ჯენერალ მოტორსი” წყალბადის ახალ ფიჭურ ელემენტებს ცდის, რომელთა წარმოებასაც 2015 წელს დაიწყებს. ახალი ელემენტები თითქმის ორჯერ კომპაქტური და თითქმის 100 კილოგრამით მსუბუქია იმ ელემენტებზე, რომლებითაც კონცეპტუალური ”შევროლე ეკვინოქსია” აღჭურვილი. და კიდევ, მასში სამჯერ ნაკლები პლატინა გამოიყენება.

”ფიჭური ელემენტების კომპაქტურობა იმას ნიშნავს, რომ მათი გამოყენება ნებისმიერი ტიპის, კომპაქტურ ავტომობილებზეც კი იქნება შესაძლებელი”, - ინტერნეტ გამოცემა ”ავტომოტივ ნიუსთან” საუბრისას განაცხადა ”ჯენერალ მოტორსის” პრესმდივანმა ალან ადლერმა.

მას არაფერი უთქვამს იმაზე, თუ ახალი ფიჭური ელემენტებით რომელი მოდელების აღჭურვა იგეგმება. მისი ვარაუდით, ნაკლებად მოსალოდნელია, რომ ეს კომპაქტური ავტომობილები იქნება. თუმცა, სამომავლოდ არც ეს გამორიცხა. ”შევროლე ეკვინოქსი” ქროსოვერია და ”გენერლებმა” მასზე თავიანთი ფიჭური ტექნოლოგიების ტესტირება 2007 წელს დაიწყეს. ტესტირება ხორციელდება პროექტ ”დრაივვეის” ფარგლებში, რომლის მიზანსაც, მსგავსი სისტემების შესწავლის გარდა, მისი პოპულარიზაციაც წარმოადგენს.

”ჯენერალ მოტორსის” საწვავის ელემენტების განყოფილების შეფი ჩარლზ ფრიზი ამბობს, რომ ფიჭური ელემენტებით აღჭურვილი ”შევროლე ეკვინოქსის” ტესტირების პირველი ფაზა დასრულებულია. მისი შედეგების მიხედვით, მოხდება ავტომობილის სისტემების დახვეწა და მათი შემდგომი ტესტირება და ასე გაგრძელდება 2015 წლამდე, როდესაც სისტემა სერიულ სახეს მიიღებს.

მეორე ეტაპზე, ფიჭური ელემენტებით 119 ცალი ”შევროლე ეკვინოქსი” აღიჭურვება, რომლებსაც ”ჯენერალ მოტორსი” და აშშ-ის ენერგიის დეპარტამენტი ერთობლივად ჩაუტარებენ ტესტირებას და მათ საზოგადოებასაც გააცნობენ, რითაც ბაზარზე ამ ტიპის ავტომობილების წამოწევის პირველ ნაბიჯებს გადადგამენ.

”ბეემვე” ”კარბონ მოტორზს” დიზელის ძრავებს მიაწვდის

BMW will supply Carbon Motors with diesel engines

3 აპრილი

ამერიკული კომპანია ”კარბონ მოტორზი” ცნობილია იმით, რომ შეიმუშავა და წარმოებისთვის მოამზადა საპოლიციო ავტომობილი E7, რომელზეც უკვე 12 000 შეკვეთა აქვს მიღებული.

მარტის მიწურულს კი, კომპანიამ ხელშეკრულება გააფორმა ”ბეემვესთან”, რომლის ძალითაც, გერმანული კომპანია მისთვის დიზელის 240 000 ძრავის, ასევე გაგრილების და გამოსაბოლქვი სისტემების და 6-საფეხურიანი ავტომატური გადაცემათა კოლოფის მიწოდებას კისრულობს.

დიზელის ძრავი, რომელსაც ბავარიელები ”კარბონ მოტორსს” მიაწვდიან, 3.0-ლიტრიანია და მას ერთ რიგში განლაგებული 6 ცილინდრი აქვს. ძრავს ტურბოკომპრესორი ემსახურება, რომლის მეშვეობითაც, მისი სიმძლავრე 245 ცხენის ძალას, მაქსიმალური მაბრუნი მომენტი კი 540 ნიუტონმეტრს აღწევს.

ამერიკული კომპანიის მიერ გავრცელებული ინფორმაციით, საპოლიციო ავტომობილი, რომლის წონაც 1800 კილოგრამზე მეტია, ამ ძრავის მეშვეობით, ადგილიდან 100 კმ/სთ სიჩქარის აკრეფას 6.5 წამში მოასწრებს, ადგილიდან 400 მეტრს 14.5 წამში გაივლის, 400-მეტრიანი დისტანციის ფინიშზე კი მისი სიჩქარე 157 კმ/სთ-ს მიაღწევს. რაც შეეხება E7-­ის მაქსიმალურ სიჩქარეს, ის 240 კმ/სთ-ია.

”კარბონ მოტორზმა” საპოლიციო ავტომობილის შექმნაზე მუშაობა ჯერ კიდევ 2003 წელს დაიწყო. ავტომობილს გაძლიერებული ძარა და შეჯავშნული წინა კარებები აქვს. მის სახურავსა და წინა ბამპერის ქვეშ მოთავსებულია საპოლიციო ციმციმა ნათურები. გარდა ამისა, ავტომობილი აღჭურვილია ვიდეოთვალთვალის სისტემით და სისტემით, რომელსაც წინ მიმავალი ავტომობილის სანომრე ნიშნის ამოცნობა-გარჩევა შეუძლია. მას ასევე აქვს ძრავის დისტანციურად ამუშავების სისტემა და პოლიციელებისთვის აუცილებელი კავშირისა და კომპიუტერული მოწყობილობები.

”კარბონ მოტორზი” ახლა აშშ-ის მთავრობისგან კრედიტის სახით 310 მილიონ დოლარს ელის. თუ მისი მიღება შეძლო, საპოლიციო ავტომობილის სერიულ წარმოებას სამი წლის შემდეგ დაიწყებს.

”ჩვენ დღეიდან საკუთარი ძრავების გაყიდვას ვიწყებთ, რაც ჩვენთვის ნომერ პირველი სტრატეგიაა. ”კარბონ მოტორზთან” ხელშეკრულების გაფორმებით, ჩვენი კომპანია ახალ ბიზნესს შეუდგა და ამ მიმართულებით კიდევ არაერთ ნაბიჯს გადადგამს”, - ხელმოწერის ცერემონიაზე განაცხადა ”ბეემვეს” დირექტორთა საბჭოს წევრმა იან რობერტსონმა. მისი მონაცემებით, დიზელისძრავიანი საპოლიციო ავტომობილი, ბენზინის ძრავიანთან შედარებით, საწვავის მოხმარებას და გარემოს დაბინძურებას დაახლოებით 40 პროცენტით შეამცირებს.

ამერიკაში, ნორმალურ ეკონომიკურ სიტუაციაში, საპოლიციო ავტომობილების ბაზრის წლიური მოცულობა დაახლოებით 65 000 ავტომობილია. დღეისათვის, აშშ-ის პოლიცია ძირითადად სამ ავტომობილს - ”ფორდ ქრაუნ ვიქტორიას” (იგივე ფორდ პოლის ინტერცეპტორს), ”შევროლე იმპალას” და დოჯ ჩარჯერს” იყენებს. ”ფორდი” მერმისს თავისი ”ინტერცეპტორის” წარმოებას შეწყვეტს და მის ნაცვლად, პოლიციას ”ტოროსის” პლატფორმას შესთავაზებს, რომელსაც წამყვანი წინა ბორბლები ექნება. ”ჯენერალ მოტორსი” კი მალე ”იმპალას” ავსტრალიაში წარმოებული ”შევროლე კაპრისით” შეცვლის, რომელსაც ავსტრალიური კომპანია ”ჰოლდენი” აწარმოებს. სხვათა შორის, ეს ავტომობილი სედან ”პონტიაკ G8-ს” პლატფორმაზეა ბაზირებული.

”მერსედეს SLS AMG GT3” რბოლებისთვის მზადაა

Mercedes SLS AMG GT3

2 აპრილი

პრემიუმ სეგმენტის ავტომობილების მწარმოებელმა გერმანულმა კომპანია ”მერსედესმა” თავისი სუპერ ავტომობილის, ”თოლიას ფრთად” წოდებული SLS AMG-ს ბაზაზე, მისი სარბოლი ვერსია, SLS AMG GT3 შექმნა და მის შესახებ ფოტოები და ტექნიკურ-დინამიკური მონაცემები გამოაქვეყნა.

პირველ რიგში უნდა ითქვას, რომ სარბოლი ავტომობილიც იმავე, 6.3-ლიტრიანი V8 ძრავითაა აღჭურვილი, რომლითაც მისი საგზაო ვერსია. სამაგიეროდ, SLS AMG GT3-ს ტრანსმისია აქვს განსხვავებული. ძრავის მიერ გამომუშავებილ მაბრუნ მომენტს 6-საფეხურიანი სექვენტალური გადაცემათა კოლოფი გადაამუშავებს. მისი საფეხურების ცვლა ხდება საჭის რგოლის უკან მოთავსებული ორი ბერკეტით. კოლოფი უშუალოდ უკანა ღერძზე ზის, ძრავს კი ის კარდანის ლილვით უკავშირდება.

სარბოლი ავტომობილი უზარმაზარ, 18-დუიმიან ბორბლებზე დგას, რომელთაგან წინების სიგანე 300 მილიმეტრი, უკანებისა კი 325 მილიმეტრია. მათზე ჩაცმულია 287/682 ზომის წინა და 315/708 ზომის უკანა საბურავები, რომლებიც შეიძლება იყოს როგორც საწვიმარი, ასევე სლიკი და საშუალედო. ავტომობილი აღჭურვილია პნევმატური ამწევი სისტემით, რომელიც ოთხ საყრდენს იყენებს და მისი დანიშნულება საბურავების სწრაფად შეცვლა.

ავტომობილის შიგნითაც ყველაფერი ისეა, როგორც სარბოლ ავტომობილს შეეფერება. საჭის რგოლი აღარაა რგოლი - მას ზედა ნაწილი წაჭრილი აქვს, რათა პილოტმა უპრობლემოდ შეძლოს საჭის უკან მოთავსებულ მონიტორზე გამოტანილი მონაცემების გარჩევა. სავარძელს უსაფრთხოების 6-წერტილოვანი ღვედები აქვს. გარდა ამისა, პილოტის უსაფრთხოებას მოემსახურება სისტემა ჰენს (ჰედ ენდ ნეკ სეიფტი, ანუ თავის და კისრის უსაფრთხოება), რომელიც ავტომობილის სტანდარტულ აღჭურვილობაში შედის. უსაფრთხოებასვე ემსახურება ფოლადის მილებისგან შეკრული ბუდე, რომელიც პილოტს ავტომობილის გადაბრუნების შემთხვევაში დაიცავს.

სხვათა შორის, ”მერსედესი” ამ ავტომობილის სამოქალაქო ვერსიასაც გამოუშვებს. ასეთი ავტომობილების წარმოება წელს, შემოდგომაზე, გაყიდვები კი მერმისს, გაზაფხულზე დაიწყება.

”ბენტლის” ახალი 505-ცხენისძალიანი ძრავი

Bentley Presents New 505 BHP V8 Engine

2 აპრილი

ნახევარი წელი გავიდა მას შემდეგ, რაც ”ბენტლიმ” საზოგადოებას პირველად უჩვენა თავისი ახალი ლუქსის კლასის სედანი ”მულსანი”, ახლა კი დადგა დრო, როდესაც ინგლისურმა კომპანიამ ამ ავტომობილის გული - 6.75-ლიტრიანი V8 აგრეგატი გაგვაცნო, რომელსაც წყვილი ტურბოკომპრესორი ემსახურება.

ეს პრაქტიკულად იგივე ძრავია, რომელსაც ადრე ”ბენტლი” მოდელებზე, ძველ ”მულსანზე”, ”ტურბო R-სა” და ”S2 კონტინენტალზე” იყენებდა. ოღონდ, ამჯერად აგრეგატს ორი ახალი სისტემა აქვს, რომელთა წყალობითაც, 15 პროცენტით ნაკლებ საწვავს მოიხმარს და გარემოსაც ნაკლებად აბინძურებს. ეს სისტემებია შეშვების და გამოშვების ცვალებადი ფაზებისა და ცვალებადი კუმშვის ხარისხის სისტემა.

გაუმჯობესდა ძრავის სხვა მონაცემებიც: მისმა სიმძლავრემ 505 ცხენის ძალა შეადგინა, მაქსიმალური მომენტი კი 1020 ნიუტონმეტრია. თანაც, ამ მაჩვენებელს ის ძრავის მუხლა ლილვის 1 750 ბრ/წთ-ზე აღწევს. ძრავთან შეწყვილებულია ახალი, 8-საფეხურიანი ავტომატური კოლოფი. მოკლედ, ეს ტანდემი ორ ტონაზე მძიმე ავტომობილს 100 კმ/სთ-მდე 5.1 წამში აჩქარებს.

კომპანიის განცხადებით, განახლებულ ძრავს დგუშები, ბარბაცასთან მათი დამაკავშირებელი თითები და გამანაწილებელი ლილვი ახალი აქვს. საერთო ჯამში, ”ბენტლის” ინჟინრებმა ძრავის 300 დეტალი განაახლეს, ან თავიდან შექმნეს. კომპანიის მთავარი ინჟინრის, ფილ კუპერის თქმით, თითო ძრავის აწყობას დაახლოებით 30 საათი სჭირდება.

”მულსანის” სერიული ვერსიის პრეზენტაცია ზაფხულში გაიმართება. კომპანია მყიდველს სალონის გაფორმების მრავალფეროვნებას სთავაზობს. გარდა ამისა, სტანდარტულ აღჭურვილობაში შედის კრუიზ კონტროლი, საქარე მინის წვიმისადმი მგრძნობიარე სისტემა, რომელიც საწმენდებს მაშინვე ჩართავს, როგორც კი შესაბამისი სენსორი წვიმის დაწყებას იგრძნობს. ცენტრალურ პანელზე მოთავსებულია 8-დუიმიანი მონიტორი, რომელიც ერთი მბრუნავი სახელურის საშუალებით იმართება. სისტემის მყარი დისკის ტევადობა 60 გიგაბაიტია, მასზევე ინტეგრირებულია სატელიტური სანავიგაციო სისტემა.

”ჰიუნდაის” პირველი სერიული ჰიბრიდი

Hyundai Sonata Hybrid

1 აპრილი

ნიუ იორკის საავტომობილო შოუზე, კორეულმა კომპანია ”ჰიუნდაიმ” თავის პოპულარულ მოდელ ”სონატას” ჰიბრიდული ვერსია წარადგინა, რომლის ჰიბრიდული ძალური დანადგარიც, მთლიანად კორეელი ინჟინრების მიერაა შემუშავებული.

ჰიბრიდულ დანადგარში შედის ბენზინის 2.4-ლიტრიანი ძრავი, რომელიც 169 ცხენის ძალას ავითარებს და რომელსაც გაზგანაწილების შეშვების და გამოშვების სისტემების ცვალებადი ფაზები აქვს. ამ ძრავთან შეწყვილებულია 6-საფეხურიანი ავტომატური კოლოფი. სისტემაში ასევე შედის 30-კილოვატიანი ელექტროძრავი.

ელექტროძრავი ენერგიას ლითიუმ-პოლიმერული აკუმულატორების ბლოკისგან ღებულობს, რომელშიც 18.6 ათასი უჯრედია გაერთიანებული. ასეთი აკუმულატორები გავრცელებული ნიკელ-მეტალოჰიდრიდულებთან შედარებით, 40 პროცენტით კომპაქტური, 30 პროცენტით მსუბუქი და 1.7-ჯერ ტევადია.

ჰიბრიდულ სისტემას სამ რეჟიმში მუშაობა შეუძლია. ის მხოლოდ შიდაწვის ძრავის მეშვეობითაც გადაადგილდება, მხოლოდ ელექტროძრავითაც და ორივეთი ერთდროულადაც. კორეული კომპანია არაფერს ამბობს იმაზე, თუ რამდენია ჰიბრიდული ”სონატას” სვლის სიშორე, როცა ის მხოლოდ ელექტროძრავის ხარჯზე გადაადგილდება. სამაგიეროდ, ცნობილია, რომ ქალაქური ციკლით მოძრაობისას, ავტომობილი 6.3 ლიტრ საწვავს მოიხმარს (100 კილომეტრზე), მაგისტრალზე მოძრაობისას კი ხარჯი 6 ლიტრამდე მცირდება.

სტანდარტული ”სონატასგან” ჰიბრიდულს დიზაინიც განასხვავებს. შეცვლილია მთავარი ფარები, რადიატორის ბადის მოყვანილობა, აეროდინამიკის დახვეწის ხარჯზე კი შემხვედრი ჰაერის ნაკადის წინააღმდეგობის კოეფიციენტი 12 პროცენტითაა შემცირებული. ინტერიერში მუშაობს მონიტორი, რომელზეც ჰიბრიდული სისტემის ცალკეული აგრეგატების და მთლიანად სისტემის მუშაობის პარამეტრების შემოწმებაა შესაძლებელი.

ჰიბრიდული ”სონატას” კონკურენტები არიან შესაბამისი სისტემით აღჭურვილი ”ტოიოტა ქამრი”, ”ნისან ალტიმა” და ”ფორდ ფიუჟნი”. აღსანიშნავია, რომ კორეული ჰიბრიდი თავის კონკურენტებზე მძლავრი და მსუბუქია, ეკონომიურობის მხრივ კი, მას მხოლოდ ”ფორდ ფიუჟნი” სჯობს.