ავტო პანორამა: ჰამილტონმა და პერესმა ტიფოზები გააწბილეს

Sunday, September 9, 2012

ჰამილტონმა და პერესმა ტიფოზები გააწბილეს

Hamilton disappoints Tifosi with Monza victory

9 სექტემბერი

რბოლის წინ ფერნანდო ალონსომ განაცხადა, მეათე ადგილის მიუხედავად, ბრძლას ვაპირებო. ალბათ გამარჯვებისთვის ბრძოლას გულისხმობდა - მისგან ნაკლები მოსალოდნელი არც იყო. არავინ იცის, რისი იმედი ჰქონდა სერხიო პერესს, მაგრამ ფაქტია, რომ ის იტალიის დიდი პრიზის ერთ-ერთ მთავარ გმირად იქცა. უფრო მეტიც, მთავარი გმირი ის იქნებოდა, პიტ სტოპი ორი წრით ადრე რომ შეესრულებინა...

საბოლოოდ, ორივე ლუის ჰამილტონმა დაჩრდილა. ბრიტანელმა შესანიშნავად გამოიყენა პოულის უპირატესობა და მთელი რბოლის განმავლობაში, ლიდერობა მცირე ხნით, პერესს მაშინ გადააბარა, როდესაც ბოქსებში რეზინის შესაცვლელად შევიდა. მექსიკელმა პელოტონის სათავეში ხუთი წრე გაატარა, მერე კი მას ახალი რეზინით მოასპარეზე ჰამილტონმა გაასწრო.

მასა ჰამილტონს უტევს

ამ მომენტშიც კი, ძნელად თუ ვინმე წარმოიდგენდა, რომ პერესი რბოლის მეორე ნახევარში ასეთ აღმასვლას განახორციელებდა. მექსიკელმა 37-ე წრეზე შეგვახსენა თავი, როდესაც კიმი რაიკონენს გაუარა და ორი „ფერარის“ დევნას შეუდგა. თითქმის იმავდროულად, ალონსომ ფელიპე მასას გაასწრო და მეორეზე გადაინაცვლა. ამ დროს, რბოლას უკვე გამოთიშული იყო ჯენსონ ბატონი, რომელსაც როგორც ჩანს, ძრავში საწვავის მიწოდების სისტემამ უმტყუნა.

ჟან-ერიკ ვერნის ტრიუკი

მოგვიანებით, რბოლას „რედ ბულის“ ორივე პილოტიც გამოეთიშა, რაც იმას ნიშნავდა, რომ ალონსოს სალიდერო ჰანდიკაპის გაზრდაში უიღბლობა თუ შეუშლიდა ხელს. სხვათა შორის, 29-ე წრეზე მან ფეტელს ბრძოლაში გაასწრო. არადა, სანამ ამას შეძლებდა, გერმანელმა ბალახებში გასეირნება აიძულა, რის გამოც, სტიუარდებმა პიტლეინზე უქმე გავლით დასაჯეს. ჩემპიონმა სასჯელი მაშინ მოიხადა, როდესაც რბოლას ბატონი გამოეთიშა და იყო იმის შანსი, რომ ტრასაზე პეისკარი გამოსულიყო.

ფეტელის და ალონსოს ბრძოლის ადრეული ფაზა

პერესი კი მასას, რომელმაც მანამდე ალონსო გაატარა (!), 43-ე წრეზე წამოეწია და ბევრი წვალების გარეშე, მომდევნო წრეზევე გაუარა. ერთი წრეც და პერესი ალონსოსაც დაეწია, ორი წრის შემდეგ კი ჩემპიონატის ლიდერი უკან ჩამოიტოვა. თამამად შეიძლება ითქვას, რომ ეს მის კარიერაში, ჯერჯერობით ყველაზე გამორჩეული მომენტი იყო. ეგეც არ იკმარა, მაშინვე ლიდერის დევნასაც შეუდგა, თუმცა წრეები აღარ ეყო.

ამ უხეშობისთვის ფეტელი პიტლეინზე უქმედ გავლით დასაჯეს

სხვათა შორის, პერესმა ყველაზე გვიან, 29-ე წრეზე შეცვალა რეზინი. ეს კი მას შემდეგ გააკეთა, რაც ჰამილტონმა გაასწრო. საინტერესოა, რომ რამდენიმე წამით ადრე, მექსიკელმა რადიოთი შეტყობინება მიიღო, იქნებ ოთხი წრეც გაძლო და ბოქსში მერე შემოდიო. თუმცა, აშკარა იყო, რომ პერესს რეზინი აღარ უვარგოდა. და მანაც გუნდის რჩევას ყური არ უგდო და რეზინის დაუყოვნებლივ შეცვლა გადაწყვიტა. ვინ იცის, ეს ორი წრით ადრე რომ გაეკეთებინა, იქნებ რბოლის მიწურულს, მისი და ჰამილტონის ბრძოლაც გვეხილა...

ფეტელი "შინ" ფეხით დაბრუნდა...

„აქ გამარჯვება უბრალოდ, ფანტასტიურია. ბავშვობიდან, ხშირად ჩამოვდივარ იტალიაში და ძალიან მიყვარს ეს ქვეყანა, მისი კულტურა, ხალხი და სამზარეულო. ფ1-ში ჩემი დებიუტიდან მოყოლებული, მონცა ყოველთვის იყო ტრეკი, სადაც გამარჯვებაზე ვოცნებობდი. ეს განსაცვიფრებელი, ისტორიული ტრასაა, რომელზეც საუკეთესოთა შორის საუკეთესონი იმარჯვებდნენ. და ჩემთვის დიდი8 პატივია, რომ ამ ტრასაზე გამარჯვებულების სიაში ამიერიდან ჩემი გვარიც ჩაიწერა“, - განაცხადა ჰამილტონმა და დასძინა, რომ მთელი რბოლის განმავლობაში, ის შედარებით მშვიდ ტემპში ასპარეზობდა, თუმცა როგორც კი გაიგო, რომ პერესმა ალონსოს გაასწრო, მაშინვე ტემპი გაზარდა.

ალონსო კმაყოფილია

ჰამილტონმა ამ სეზონში მე-3, კარიერაში კი მე-20 რბოლა მოიგო, რითაც კლასიფიკაციაში მეორე ადგილზე გადაინაცვლა. ლიდერ ალონსოს ის 37 ქულით ჩამორჩება, თავად კი მხოლოდ ქულას უგებს კიმი რაიკონენს, რომელიც მოგების გარეშეც, სტაბილურობის ხარჯზე ახერხებს საჩემპიონო შანსების შენარჩუნებას. მონცაზე ის მეხუთე ადგილს დასჯერდა. არადა, მასასთვის რომ გაესწრო, კლასიფიკაციაში ახლა მეორე სწორედ ის იქნებოდა.

მესამე ადგილის მიუხედავად, კმაყოფილი დარჩა ალონსო. აბა რა იქნებოდა - თუ მონცამდე უახლოეს მდევარს (ფეტელს) 24 ქულას უგებდა, ახლა მისმა უპირატესობამ (ჰამილტონთან) 37 ქულას მიაღწია: „ძალიან ძნელი რბოლა იყო. მანქანა ძალიან დამეხმარა, ალბათ, აქ ის ყველაზე სწრაფი იყო. მესამე ადგილი შესანიშნავი შედეგია რბოლაში, რომელში გამარჯვებაც მიუწვდომელი იყო“.

სამივე მრბოლს სახელდახელო ინტერვიუ კვარცხლბეკზევე ჩამოართვა მსოფლიოს სამგზის ჩემპიონმა ნიკი ლაუდამ, ვინც პერესის წინაშე ქუდიც კი მოიხადა და ასე გამოხატა 22 წლის მექსიკელისადმი დამოკიდებულება.

„დაუჯერებელია, მონცას კვარცხლბეკზე ასვლას ვერც ვინატრებდი. ეს ჩემთვის განსაკუთრებული შედეგია. სტარტზე საბურავი სწორად შევარჩიე და გადავწყვიტე, რომ ეს კომპლექტი მოგვიანებით შემეცვალა. ამის წყალობით, რბოლის ბოლოს შედარებით უკეთესი რეზინით ვიასპარეზე და ამან კარგი სამსახური გამიწია“, - განაცხადა პერესმა, ვინც ამ სეზონში უკვე მეორედ შეძლო მეორე ადგილის დაკავება (პირველად მალაიზიაში).

მეოთხე ადგილით დაკმაყოფილდა ფელიპე მასა, რომელმაც რბოლის მიწურულს, უპრობლემოდ გაატარა ალონსო. არადა, ბრაზილიელისთვის ეს ამ სეზონში ჩატარებული საუკეთესო რბოლა იყო. მას შანსი ჰქონდა, 2010 წლის სეზონის შემდგ პირველად ასულიყო კვარცხლბეკზე. მასამ რბოლა შესანიშნავად დაიწყო და ჯერ ბატონს გაასწრო, შემდგ კი პირველ მოსახვევში ჰამილტონსაც შეუტია, თუმცა ამან მისი დაწინაურების მცდელობა აღკვეთა.

აღსანიშნავია, რომ რბოლამ დიდი შეხლა-შემოხლის გარეშე ჩაიარა, თუმცა მეცხრე წრეზე, ფრანგ ჟან-ერიკ ვერნს უცნაური ინციდენტი შეემთხვა - მოსახვევში შესვლისას მან შეცდომა დაუშვა. მანქანა კერბზე ახტა და ყალყზე დადგა, თუმცა საჰაერო ვოიაჟი ამით დაასრულა და „ტორო როსოს“ ბოლიდი მშვიდობიანად დაეშვა ასფალტზე. თუმცა ვერნმა რბოლის გაგრძელება ვეღარ შეძლო.

იტალიის დიდი პრიზი

მონცა. დისტანცია 306.720 კმ (5.793 კმ, 53 წრე)

1. ლუის ჰამილტონი (ბრიტანეთი, მაკლარენი) 1:19:41.221

2. სერხიო პერესი (მექსიკა, ზაუბერი) +00:04.356

3. ფერნანდო ალონსო (ესპანეთი, ფერარი) 00:20.594

4. ფელიპე მასა (ბრაზილია, ფერარი) 00:29.667

5. კიმი რაიკონენი (ფინეთი, ლოტუსი) 00:30.881

6. მიხაელ შუმახერი (გერმანია, მერსედესი) 00:31.259

7. ნიკო როსბერგი (გერმანია, მერსედესი) 00:33.550

8. პოლ დი რესტა (ბრიტანეთი, ფორს ინდია) 00:41.057

9. კამუი კობაიაში (იაპონია, ზაუბერი) 00:43.898

10. ბრუნო სენა (ბრაზილია, უილიამსი) 00:48.144

11. პასტორ მალდონადო (ვენესუელა, უილიამსი) 00:48.682

12. დანიელ რიკიარდო (ავსტრალია, ტორო როსო) 00:50.316

13. ჟერომ დ’ამბროზიო (ბელგია, ლოტუსი) 01:15.861

14. ჰეიკი კოვალაინენი (ფინეთი, კატერჰემი) 1 წრე

15. ვიტალი პეტროვი (რუსეთი, კატერჰემი) 1 წრე

16. შარლ პიკი (საფრანგეთი, მარუსია) 1 წრე

17. ტიმო გლოკი (გერმანია, მარუსია) 1 წრე

18. პედრო დე ლა როსა (ესპანეთი, ისპანია) 1 წრე

19. ნარაინ კართიკეიანი (ინდთი, ისპანია) 1 წრე

20გ. მარკ უებერი (ავსტრალია, რედ ბული) 2 წრე

21გ. ნიკო ჰულკენბერგი (გერმანია, ფორს ინდია) 3 წრე

22გ. სებასტიან ფეტელი (გერმანია, რედ ბული) 6 წრე

გ. ჯენსონ ბატონი (ბრიტანეთი, მაკლარენი) 21 წრე

გ. ჟან-ერიკ ვერნი (საფრანგეთი, ტორო როსო) 45 წრე

შენიშვნა: გ - გამოეთიშა

უსწრაფესი წრე: ნიკო როსბერგი - 1:27.239, 53-ე წრე

მრბოლთა კლასიფიკაცია

1. ფერნანდო ალონსო - 179 ქულა; 2. ლუის ჰამილტონი - 142; 3. კიმი რაიკონენი - 141; 4. სებასტიან ფეტელი - 140; 5. მარკ უებერი - 132; 6. ჯენსონ ბატონი - 101; 7. ნიკო როსბერგი - 83; 8. რომენ გროჟანი (საფრანგეთი, ლოტუსი) - 76; 9. სერხიო პერესი - 65; 10. ფელიპე მასა - 47; 11. მიხაელ შუმახერი - 43; 12. კამუი კობაიაში - 35; 13. პოლ დი რესტა - 32; 14. ნიკო ჰულკენბერგი - 31; 15. პასტორ მალდონადო - 29; 16. ბრუნო სენა - 25; 17. ჟან-ერიკ ვერნი - 8; 18. დანიელ რიკიარდო - 4

კონსტრუქტორთა თასი

1. რედ ბულ-რენო - 272 ქულა; 2. მაკლარენ-მერსედესი - 243; 3. ფერარი - 226; 4. ლოტუს-რენო - 217; 5. მერსედესი - 126; 6. ზაუბერ-ფერარი - 100; 7. ფორს ინდია-მერსედესი - 63; 8. უილიამს-რენო - 54; 9. ტორო როსო-ფერარი - 12

ასევე წაიკითხეთ:

40 წელი ინდი 500-ზე „მაკლარენის“ პირველი გამარჯვებიდან