”ვენგა” – ”კიას” ახალი კომპაქტვენი

Kia Venga

17 აგვისტო

ფრანკფურტის ავტო შოუს დაწყებამდე ერთი დღეც აღარ დარჩა და ავტომწარმოებელთა უმეტესობამ უკვე დაიწყო იმ სიახლეთა ფოტო ტისერების და ინფორმაციის გამოქვეყნება, რომლებსაც საზოგადოება გამოფენისას, მათს პავილიონებში იხილავს.

თავის მყიდველს სიახლეებს ”კიაც” უმზადებს, რომელთაგან ერთის, სრულიად ახალ მიკროვენ ”ვენგას” ფოტოები ინტერნეტით დღეს გავრცელდა. კორეული კომპანია ამ ავტომობილს მრავალმხრივი დანიშნულების ავტომობილს (MPV) უწოდებს. თუმცა ”ვენგა” აშკარად ჰეჩბეკია და შესაბამისი ძარის მქონე ”ფორდ ფიესტას” უპირებს მეტოქეობას, რომელიც ევროპაში ბაზრის B-სეგმენტის გამოკვეთილი ლიდერია.

ცოტა უცნაურია, მაგრამ იმ დროს, როდესაც ამერიკული ”შევროლე” თავის ახალ ავტომობილებს კორეელ ინჟინრებს ამუშავებინებს, კორეული ”კია” ახალი მოდელების შესაქმნლად თავის ევროპულ საინჟინრო განყოფილებას იყენებს - ”ვენგა” მთლიანად ევროპაშია შემუშავებული.

”ვენგას” კონცეპტუალური ვერსია (სახელით No3) ”კიამ” პირველად ჟენევის ავტო შოუზე წარადგინა. ამ ორი ავტომობილს შორის გარეგნული სხვაობა მინიმალურია. ”ვენგას” სიგრძე 4068 მმ, სიმაღლე 1600 მმ და ბაზა 2615 მილიმეტრია. ის სულ რამდენიმე მილიმეტრით გრძელია ”ფიესტაზე” და როგორც კორეული კომპანია აცხადებს, სიგრძეში სხვაობა მხოლოდ სალონის ხარჯზე მოდის.

ახალი ავტომობილისთვის სულ ორი ძრავია განკუთვნილი. ერთია 1.4-ლიტრიანი ბენზინის, მეორე კი - 1.6-ლიტრიანი დიზელის. შესაბამისად, მათი სიმძლავრე 75 და 115 ცხენის ძალაა. საინტერესოა ის ფაქტი, რომ ამ პატარა ავტომობილის სტანდარტულ აღჭურვილობაში სისტემა სტარტ/სტოპი შედის, რომელიც ისედაც მცირეაპეტიტიანი ავტომობილის საწვავის ხარჯს და მის გამონაბოლქვში ნახშირორჟანგის შემცველობას მნიშვნელოვნად ამცირებს. სისტემა ავტომობილის შუქნიშანზე, ან საცობში დგომის დროს, ავტომატურად თიშავს ძრავს და მას ავტომატურადვე რთავს, როგორც კი მძღოლი აქსელერატორის სატერფულს აწვება.

ჯერჯერობით არ გამოცხადებულა ”ვენგას” ფასი. სამაგიეროდ, უკვე ცნობილია, რომ მას ”კიას” ჩეხური ქარხანა გამოუშვებს, მისი გაყიდვები კი წელსვე დაიწყება.

გაიცანით: ბენტლი მულსანი

Bentley Mulsanne

16 აგვისტო

”ბენტლისგან” ამ ავტომობილს დიდხანს ელოდნენ. მოლოდინი მას შემდეგ დაიწყო, რაც ”ბენტლი” და ”როლს როისი” გერმანულმა კომპანიებმა - (შესაბამისად) ”ფოლკსვაგენმა” და ”ბეემვემ” დაინაწილეს, ”როლს როისი” კი ”ფანტომის” წარმოებას შეუდგა. ”ბენტლის” სამოდელო გამაში შესაბამისი კლასის ”არნაჟი” კი ჰყავდა, მაგრამ ის გვარიანად მოძველებული იყო, რის გამოც, ფასით ”ფანტომს” მცირე კონკურენციასაც ვერ უწევდა.

”ჰენესი ვენომ GT” ჟენევური პრემიერისთვის ემზადება

Hennessey Venom GT

16 აგვისტო

ამერიკული სატუნინგო ატელიე ”ჰენესი პრეფორმენს ინჯინირინგი” ადრე მხოლოდ სხვა კომპანიების პოპულარული ავტომობილების მოდერნიზებით იყო დაკავებული და ამ საქმიანობით სახელიც გაითქვა, მაგრამ როგორც ჩანს, მის ხელმძღვანელობას ეს არ აკმაყოფილებდა და მათ საკუთარი მოდელის შემუშავება გადაწყვიტეს. თანაც ისეთის, რომელიც კონკურენციას თვით ”ბუგატი ვეირონსაც” კი გაუწევს.

ავტომობილს უკვე სახელიც აქვს - ”ვენომ GT”. მას პირველად საზოგადოება მერმის, ჟენევის ავტო შოუზე იხილავს. ის შუაძრავიანი შეთანწყობით გამოირჩევა და რა თქმა უნდა, წამყვანი უკანა ბორბლები აქვს. მისი შექმნის სურვილი ატელიეს შეფმა ჯონ ჰენსიმ პირველად ორი წლის წინ გამოთქვა. მაშინ პროექტი უკვე მზად იყო, მაგრამ ამ ორი წლის განმავლობაში, მასში ბევრი რამ შეიცვალა. მაგალითად, თუ თავიდან ჩაფიქრებული იყო ორტურბოკომპრესორიანი 8.5-ლიტრიანი V10-ს გამოყენება (1000-ცხენისძალიანი სიმძლავრით), შემუშავების პერიოდში მისი სხვა აგრეგატით შეცვლა გადაწყდა.

ამ მიზნით, ”ჰენესის” კონსტრუქტორებმა ”შევროლე კორვეტ ZR1-ის” LS9 აგრეგატი შეარჩიეს, რომელსაც V8 კონფიგურაცია აქვს. ძრავი ერთი მექანიკური და ორი ტურბოდამჭირხნითაა აღჭურვილი, რომელთა მეშვეობითაც (სუნთქვა შეიკავეთ), 1 200 ცხენის ძალას ავითარებს. ეს საკმარისია იმისათვის, რომ 1088-კილოგრამიანი ავტომობილის მაქსიმალური სიჩქარე 440 კმ/სთ (სუნთქვა კიდევ ერთხელ შეიკავეთ) იყოს. ეგ კიდევ არაფერი, ”ჰენესის” ინფორმაციით, გაჩერებულ ”ვენომ GT-ს” 100 კმ/სთ-ს აკრეფა 2.4 წამში შეუძლია (არ გაიგუდოთ), 0-160 კმ/სთ-ს 5.3 წამში, 0-240-ს 8.9 წამში, 0-320-ს კი 14.3 ავითარებს. ცოტა არ იყოს, ამბიციური მახასიათებლებია, რომელთა მიხედვითაც, ეს სუპერავტომობილი ფორმულა 1-ის ბოლიდებსაც კი გაუწევს კონკურენციას. ეს კი ცოტა საეჭვოა.

”პირველი ტექსასელი არ ვარ, ვინც ბრიტანული სტილის შასის ზემძლავრი ამერიკული ძრავით აღვჭურვავ. მაგრამ დარწმუნებული ვარ, ჩვენი ავტომობილი მალე მთელს მსოფლიოში გაითქვავს სახელს და ის ისეთივე პოპულარული გახდება, როგორიც 60-იან წლებში ”AC კობრა” იყო”, - ამბობს ჯონ ჰენესი.

”ვენომ GT” ინგლისური ”ლოტუს ექსიჯის” ალუმინის პლატფორმაზეა ბაზირებული და როგორც ”ჰენესის” მიერ გამოქვეყნებულ ფოტოებზე ჩანს, გარეგნობითაც მას ჰგავს. თუმცა ზორბა უკანა ფრთის (რომელიც სიჩქარის შესაბამისად იცვლის დახრის კუთხეს), რადიატორების გვერდითა ჰაერამღებების, ძალიან დაბალი კლირენსისა და სხვა ელემენტების წყალობით, მას უფრო აგრესიული გამომეტყველება აქვს, რითაც მიგვანიშნებს, ძარის ქვეშ ნამდვილი მხეცი იმალება. ჯონ ჰენესი გვპირდება, რომ ავტომობილი ისეთივე მანევრული იქნება, როგორების წარმოებითაც ”ლოტუსია” განთქმული.

”ვენომ GT-ს” საბაზო ღირებულება 600 000 დოლარია. აქედან მყიდველს 200 000-ის გადახდა კომპანიაში განაცხადის შეტანისას მოუწევს, ამდენივეს 4 თვის შემდეგ გადაიხდის, განაცხადს შეტანიდან 9 თვის შემდეგ (სწორედ ეს დროა საჭირო ავტომობილის წარმოებისთვის) კი დარჩენილი 200 000-ის გადახდაც მოუწევს.

ყველაზე მძლავრი ჰიბრიდები მსოფლიოში

BMW Hybrids

16 აგვისტო

როდესაც ავტომწარმოებელი ჰიბრიდულ ავტომობილს ქმნის, მისი მიზანი საწვავის ხარჯის შემცირებაა. მაგრამ არსებობს სხვა მიდგომაც, რომლითაც უფრო პრემიუმ სეგმენტის მწარმოებლები ხელმძღვანელობენ. ამ შემთხვევაში, მიზანი ავტომობილის ძალური დანადგარის ეფექტურობის გაუმჯობესებაა.

ამ მიდგომით ხელმძღვანელობს ”ბეემვე”, რომელმაც ორიოდე დღის წინ, თავისი ორი უახლესი ჰიბრიდული მოდელის შესახებ გაავრცელა ინფორმაცია. ორივე ავტომობილი ჰიბრიდულ სისტემა ”ექტივჰიბრიდითაა” აღჭურვილი და თამამად შეიძლება ითქვას, რომ დღეისათვის, ორივე ყველაზე მძლავრია მათ შორის, რომლებიც ჰიბრიდომობილების ბაზარზე იყიდება.

ეს ავტომობილებია მე-7 სერიის სედანი და უგზოობის X6, რომელთა ოფიციალური პრემიერა სექტემბერში, ფრანკფურტის ავტო შოუზე გაიმართება. გარდა იმისა, რომ ეს ორი ავტომობილი თავისი სიმძლავრით გვაოცებს, ისინი შესაბამის ბენზინისძრავიან ვერსიებზე 15-20 პროცენტით ეკონომიურებიცაა.

”ბეემვე X6 ექტივჰიბრიდის” ჰიბრიდული დანადგარის სრული მაქსიმალური სიმძლავრე 480 ცხენის ძალას, მაბრუნი მომენტი კი 778 ნიუტონმეტრს აღწევს. ჰიბრიდული სისტემის ძირითადი ნაწილია 4.4-ლიტრიანი V8 ბენზინის ძრავი, რომელსაც ორი ტურბოდამჭირხნი ემსახურება. მასთან 7-საფეხურიანი, ავტომატური გადაცემათა კოლოფია შეწყვილებული. ჰიბრიდულ სისტემაში ასევე ორი ელექტროძრავიც შედის, რომელთა სიმძლავრე 91 და 86 ცხენის ძალაა. ეს ძრავები შიდაწვისას აჩქარების დროს ეხმარებიან, შენელებისა და დამუხრუჭებისას კი ისინი გენერატორის მოვალეობას ასრულებენ და ენერგიას ნიკელ-მეტალოჰიდრიდულ აკუმულატორებში აგროვებენ.

ბავარიელთა მიერ გავრცელებული ინფორმაციით, ”ბეემვე X6 ექტივჰიბრიდს” ადგილიდან 100 კმ/სთ სიჩქარის აკრეფა 5.4 წამში შეუძლია, მისი მაქსიმალური სიჩქარე კი ელექტრონიკის მეშვეობით, 208 კმ/სთ-ითაა შეზღუდული. თუ მოხდა ისე, რომ ავტომობილის საწვავის ავზი დაცარიელდა, მხოლოდ ელექტროძრავებით ის 2.5 კილომეტრს გაგატარებთ, ამ დროს კი მისი მაქსიმალური სიჩქარე 60 კმ/სთ იქნება.

რაც შეეხება საწვავის ხარჯს, ზუსტი მონაცემი ჯერ არ გამოქვეყნებულა. ინტერნეტში გავრცელებული ინფორმაციით კი, 100 კილომეტრის გასავლელად, ”X6 ექტივჰიბრიდს” დაახლოებით 10 ლიტრი ბენზინი ჰყოფნის, ეს კი თითქმის 20 პროცენტით ნაკლებია ბენზინისძრავიანი X6-ის ხარჯზე. აქ ისიც უნდა გავითვალისწინოთ, რომ ჰიბრიდული ვარიანტი ჩვეულებრივზე 181 კილოგრამით მძიმეა.

ოდნავ სუსტია ”ბეემვე ექტივჰიბრიდ 7-ის” ჰიბრიდული დანადგარი, რომლის ძირითადი ნაწილი იგივე ორტურბინიანი 4.4-ლიტრიანი V8 ძრავია, რომელიც ამჯერად 440 ცხენის ძალას იძლევა. მასთან უნისონში კი 8-საფეხურიანი ავტომატი და სულ რაღაც 20-ცხენისძალიანი ელექტროძრავი მუშაობს. სისტემის ჯამური მაქსიმალური სიმძლავრე 455 ცხენის ძალას აღწევს. ”ბეემვე ექტივჰიბრიდ 7-ის” მაქსიმალური სიჩქარე 24 კმ/სთ-ია, ადგილიდან 100 კმ/სთ სიჩქარეს კი ის 4.8 წამში ავითარებს.

ბავარიული კომპანია ამ ავტომობილებს პირველ რიგში, აშშ-ის ბაზარზე შეიტანს. ჯერჯერობით ცნობილი არ არის, დაგეგმილია თუ არა მათი სხვა ბაზრებზე გაყიდვა.

ჩინური ”ჰაიმა ავტო” ჰიბრიდებს და ელექტრომობილებს გამოუშვებს

Haima Auto

14 აგვისტო

ჩინური ავტომწარმოებელი ”ჰაიმა ავტო”, რომელიც ჩინურ ავტო კომპანიებს შორის უდიდსის - FAW-ის ნაწილია, წარმოებისთვის ორ ახალ ავტომობილს - ჰიბრიდულსა და ელექტრომობილს ამზადებს, რომელთა ბაზარზე გამოჩენაც 2011 წელსაა მოსალოდნელი.

ამ ორი ავტომობილის შესაქმნელად, ”ჰაიმას” ინჟინრები უკვე ოთხი წელია მუშაობენ, მაგრამ სხვადასხვა მიზეზის გამო, რომელთაგან ყველაზე სერიოზული გლობალური ეკონომიკური კრიზისია, პროექტები გაჭიანურდა. თუმცა, ამ ეტაპზე, ორივე ავტომობილი, რომელთა სახელები ჯერ არ გამოქვეყნებულა, ეროვნულ ლაბორატორიებში უკვე გადის ინტენსიურ ტესტირებას.

სხვათა შორის, შანჰაის წლევანდელ ავტო შოუზე, ”ჰაიმამ” კონცეპტუალური ელექტრომობილი Me (სურათზე) წარადგინა, რომელიც აკუმულატორების ერთი სრული დამუხტვით 190 კილომეტრს გადის, მისი მაქსიმალური სიჩქარე კი 120 კმ/სთ-ს აღწევს. დაკიდევ, თუ აკუმულატორი სრულადაა განმუხტული, ენერგიით მისი სრულად შევსებისთვის მხოლოდ ოთხი საათია საჭირო. ჩინური პრესის ინფორმაციით, კონცეპტუალურ Me-ზე გამოყენებულ ტექნოლოგიებს ”ჰაიმა” თავის ჰიბრიდსა და ელექტრომობილზეც იყენებს.

ბოლო წლებში, ჩინური ავტოკომპანიები სულ უფრო ხშირად იპყრობენ საერთაშორისო მედიის ყურადღებას. ჯერ ერთი, ამის მიზეზი ისაა, რომ ისინი მყიდველს სულ უფრო მოწინავე ტექნოლოგიებით აღჭურვილ ავტომობილებს სთავაზობენ. მეორეც, მათმა ქვეყანამ მსოფლიო ეკონომიკური კრიზისის დროს ყველაზე ნაკლებად იზარალა და ამის შედეგად, ცისქვეშეთში ახალი ავტომობილების გაყიდვები კრიზისის დროსაც მაღალი ტემპით იზრდება.

ამ ეტაპზე, ჩინური კომპანიებიდან ყველაზე მეტად ”ჯილი” (Geely) აქტიურობს, რომელიც მერმის, ავსტრიულ სადიერო კომპანია ”დენზელთან” ერთად, თავისი ავტომობილების ევროპაში გაყიდვებს დაიწყებს. პარალელურად, ”ჯილი” ინტენსიურად ცდილობს შვედურ კომპანია ”ვოლვოს” შეძენას.

”ტოიოტა” ”პრიუსზე” იაფსა და ეკონომიურ ჰიბრიდს გამოუშვებს

Yaris-Based Hybrid

14 აგვისტო

”ტოიოტა” ერთ-ერთი პირველია იმ კომპანიებს შორის, რომელმაც მიზნად გარემოსადმი მეგობრული ავტომობილების წარმოება დაისახა და ამ კუთხითაც (გარდა იმისა, რომ მსოფლიოს უდიდესი ავტომწარმოებელია), დღეისათვის მსოფლიოს ბაზარზე ლიდერობა მის ხელთაა.

თუმცა, შორს არაა ის დრო, როდესაც მის ჰიბრიდულ ”პრიუსს”, რომელიც ამ ეტაპზე, ეკოლოგიურად სუფთა ავტომობილების ბაზრის გამოკვეთილი ლიდერი და იაპონიის ბაზრის ბესტსელერია, კონკურენტები შეავიწროებენ. ასეთთა შორის პირველი მერცხალი ელექტრომობილი ”ნისან ლიფია”, რომელიც უკვე გაეცნო საავტომობილო სამყაროს და რომლის გაყიდვებიც მერმის უნდა დაიწყოს. მერმისვე ბაზარზე ჰიბრიდულ ელექტრომობილ ”შევროლე ვოლტის” გამოჩენაა მოსალოდნელი. და როცა ამ ორი ავტომობილის გაყიდვები დაიწყება, ”პრიუსის” გაყიდვებიც უნდა შემცირდეს.

მაგრამ ”ტოიოტას” თადარიგი უკვე დაჭერილი აქვს - წარმოებისთვის ”პრიუსზე” პატარა ჰიბრიდულ ავტომობილს ამზადებს, რომელიც უფრო ეკონომიურიც იქნება და უფრო იაფიც ეღირება. ამ ავტომობილის ბაზისად კი, იაპონური კომპანია თავის სუბკომპაქტურ ჰეჩბეკ ”იარისს” იყენებს.

ახალი ჰიბრიდული ავტომობილის მთავარი ღირსება მისი სიიაფე იქნება. გაზეთ ”იომიურის” ცნობით, ”იარისის” ბაზაზე წარმოებული ჰიბრიდი იაპონიაში 1.5 მილიონი იენი (დაახლოებით 15 700 დოლარი) ეღირება. ეს ავტომობილი 100 კილომეტრის გასავლელად 2.5 ლიტრ ბენზინს მოიხმარს, რაც მესამე თაობის ”პრიუსის” ხარჯზე თითქმის ორჯერ ნაკლებია.

”ახლა ჩვენ დაბალფასიან ჰიბრიდულ ავტომობილს ვქმნით, როგორიც ”ჰონდა ინსაითია”. იმისათვის კი, რომ ბაზარზე კონკურენტუნარიანობა შევინარჩუნოთ, ჩვენი ჰიბრიდული ავტომობილების რაოდენობა უნდა გავზარდოთ და აქცენტი პატარა ჰიბრიდებზე გადავიტანოთ, ისეთებზე, როგორიც ”იარისია” (სურათზე)”, - ჯერ კიდევ ჟენევის ავტო შოუზე განაცხადა მესამე თაობის ”პრიუსის” მთავარმა ინჟინერმა აკიჰიკო ოცუკამ.

ჯერჯერობით უცნობია, აპირებს თუ არა ”ტოიოტა” სრულიად ელექტრული ავტომობილების წარმოებას.

”ფოლკსვაგენი” და ”პორშე” გაერთიანებაზე შეთანხმდნენ

VW-Porsche

14 აგვისტო

როგორც მოსალოდნელი იყო, ”ფოლკსვაგენმა” და ”პორშემ” შერწყმის შესახებ შეთანხმებას მიაღწიეს, რომლის შესაბამისადაც, ვოლფსბურგული გიგანტი წელსვე ”პორშეს” აქციების 42 პროცენტს გამოისყიდის, რაც მას 3.3 მილიარდი ევრო (4.7 მლრდ დოლარი) დაუჯდება. მერმის კი ”ფოლკსვაგენი” ფერდინანდ პიხისა და ვოლფგანგ პორშეს ოჯახებისგან, სპორტული ავტმობილების მწარმოებლის და მისი სადილერო ქსელის აქციებსაც გამოისყიდის, რაშიც დამატებით 3.55 მლრდ ევროს (დაახლოებით 5 მლრდ დოლარს) გადაიხდის.

”ფოლკსვაგენის” ხელმძღვანელობა აცხადებს, რომ ორი კომპანიის გაერთიანების პროცესი 2011 წელს დასრულდება. ამასთან, პორშეს და პიხის ოჯახები ”პორშეს” უმსხვილეს აქციონერებად დარჩებიან, ქვემო საქსონიის მთავრობას კი, რომელსაც ”ფოლკსვაგენის” აქციების 20 პროცენტი ეკუთვნის, ვოლფსბურგულ კომპანიასთან დაკავშირებული ნებისმიერი (მისთვის მიუღებელი) საკითხვის დაბლოკვის უფლება კვლავაც დარჩება.

გაგრძელდება მოლაპარაკება ყატარის სამთავრობო საინვესტიციო კომპანიასთან, რომელიც ამ წლის ბლოს ”ფოლკსვაგენის” 17 პროცენტის მფლობელი გახდება. ამ აქციებს არაბული სახელმწიფო ”პორშესგან” გამოისყიდის, რომელსაც გერმანული გიგანტის 51 პროცენტი ეკუთვნის.

სწორედ ამ აქციების შეძენის პროცესში დაუგროვდა ”პორშეს” უზარმაზარი ვალი, რომელიც დღეისათვის 10 მილიარდ ევროს აღწევს. ამ ვალის ნაწილს კომპანია ყატარელებისთვის ”ფოლკსვაგენის” აქციების მიყიდვით მიღებული ფულით დაფარავს, ნაწილს კი ”ფოლკსვაგენისთვის” საკუთარი აქციების მიყიდვის შედეგად მიღებული თანხით. ასევე, ვალების გასტუმრებას მოხმარდება იმ თანხის ნაწილიც, რომელსაც შტუტგარტელები საკუთარი კაპიტალის 5 მილიარდი ევროთი გაზრდის გზით მიიღებენ.

დაბოლოს, 15 სექტემბრიდან ”პორშეს” ”ფოლკსვაგენის” მთავარი აღმასრულებელი მარტინ ვინტერკორნი უხელმძღვანელებს, ”პორშეს” ახლანდელი მთავარი აღმასრულებელი მიხაელ მახტი კი ”ფოლკსვაგენის” დირექტორთა საბჭოში შევა.

”ფოლკსვაგენი” ფრანკფურტში ზეეკონომიურ ავტომობილს გამოფენს

VW 1 Liter Car

13 აგვისტო

ფრანკფურტის საავტომობილო შოუზე, გერმანული კომპანია ”ფოლკსვაგენი” თავის ზეეკონომიურ კონცეპტუალურ ავტომობილს წარმოადგენს, რომელიც მწარმოებლის მონაცემებით, 100 კილომეტრს 1 ლიტრი საწვავით გადის.

გამოცემა ”ფოკუსის” ცნობით, რომელმაც ეს ინფორმაცია უშუალოდ ”ფოლკსვაგენიდან”, ინკოგნიტო წყაროსგან მოიპოვა, ასეთი ეკონომიურობა უპირველესად, ავტომობილის უაღრესად მცირე წონის წყალობითაა მიღწეული. კონცეპტუალური მოდელი, რომლის სახელიც ჯერჯერობით უცნობია, მსუბუქი მასალებისგანაა დამზადებული. მაგალითად, მისი ძარა ნახშირბადოვანი კომპოზიტისაა, ჩარჩო კი, რომელზეც ძარა ”ზის”, ალუმინისა და მაგნიუმის მასალებითაა შეკრული. შასის დასამზადებლად, ასევე ტიტანისა და კერამიკული მასალებია გამოყენებული. საბოლოო შედეგი კი მართლაც დაუჯერებელია - ორადგილიანიუ ავტომობილი სულ რაღაც 290 კილოგრამს იწონის.

ავტომობილს მამოძრავებელ ძალას მასავით ციცქნა, ორცილინდრიანი შიდაწვის ძრავი ანიჭებს, რომლის მუშა მოცულობა ჯერჯერობით უცნობია. ის სულ რაღაც 45 ცხენის ძალას იძლევა, რაც ამ პატარა ავტომობილისთვის სრულიად საკმარისია. რაც მთავარია, როგორც ”ფოკუსი” გვაუწყებს, სწორედ ეს ძრავი მოიხმარს ას კილომეტრზე ერთადერთ ლიტრ საწვავს.

სხვათა შორის, მსგავსი მონაცემების მქონე ავტომობილით ვოლფსბურგელებმა საავტომობილო სამყარო ერთხელ უკვე გააოცეს. ეს შვიდი წლის წინ მოხდა, მაგრამ იმ ავტომობილს, რომლის ეკონომიკური მაჩვენებლებიც არავის შეუმოწმებია, განვითარება არ ეღირსა, რადგან მაშინ არც ეკოლოგიაზე ზრუნავდა ასე ვინმე და არც საწვავი იყო მეტისმეტად გაძვირებული და შესაბამისად, არც ზეეკონომიურ ავტომობილებზე იყო მოთხოვნა.

და მაინც, ის ავტომობილი (ასევე უსახელო, რის გამოც, მას მსოფლიო მას ერთლიტრიან ფოლკსვაგენად იცნობს) ერთცილინდრიანი, 0.3-ლიტრიანი დიზელის აგრეგატით იყო აღჭურვილი, რომელიც სულ რაღაც 8.5 ცხენის ძალას იძლეოდა. მაგრამ ესეც საკმარისი იყო იმისათვის, რომ ავტომობილის მაქსიმალური სიჩქარე 120 კმ/სთ ყოფილიყო. სხვათა შორის, იმავე ”ფოკუსის” ინფორმაციით, ახალ და ძველ ”ერთლიტრიან” კონცეპტუალურ მოდელებს მხოლოდ ერთი რამ - სალონის შეთანწყობა ექნება ერთნაირი. მასში ერთადერთი მგზავრის სავარძელი მძღოლის სავარძლის უკან განლაგდება.

დაბოლოს, ყველაზე საოცარი: ”ფოკუსისავე” ინფორმაციით, ”ფოლკსვაგენი” ამ ავტომობილის წარმოებას გეგმავს! სავარაუდოდ, ის კომპანიის დილერთა შოურუმებში 2013 წელს გამოჩნდება.

”ტრაბანტი” ახალ ცხოვრებას ფრანკფურტში დაიწყებს

Trabant

13 აგვისტო

ყოფილი კომუნისტური გერმანიის საავტომობილო მრეწველობის სიამაყე - ”ტრაბანტი” მალე შეიძლება ევროპის გზებს, ელექტრომობილის სახით დაუბრუნდეს. ავტომობილების მასშტაბური მოდელების გერმანულმა ფირმა ”ჰერპამ” ფრანკფურტის ავტო შოუზე გამოსაფენად ”ახალი ტრაბი” მოამზადა და იმედი აქვს, რომ გამოფენის მეშვეობით, ინვესტორებს მიიზიდავს, რომლებიც გარემოსადმი მეგობრულ ამ ავტომობილის წარმოების დაწყებაში დაეხმარებიან.

”ჰერპას” მიერ შემუშავებულ ”ტრაბისაც” ისეთივე დაკუთხული მოყვანილობა აქვს, როგორიც ძველს ჰქონდა, რომელიც 1957-1991 წლებში 3 მილიონი ცალი გაიყიდა. მაგრამ კომპანიის წარმომადგენელი დანიელ შტიგლერი ამბობს, რომ ახალი ”ტრაბი” რეტროავტომობილი არ იქნება.

”ახალი ”ტრაბი” კოხტა მანქანა იქნება, რომელსაც თავისი წარსული აქვს. რაც მთავარია, მას ელექტროამძრავი ამოძრავებს, რადგან ამას თანამედროვე ბაზრის ტენდენცია მოითხოვს”, - გამოცემა ”აუტომოტივ ნიუსთან” საუბრისას განაცხადა შტიგლერმა.

”ჰერპამ” ახალი ავტომობილის შესახებ ჯერ მხოლოდ მინიმალური ინფორმაცია გამოაქვეყნა. მაგალითად, ავტომობილის წონა 1000 კილოგრამზე ნაკლები უნდა იყოს, მის სახურავზე კი ფოტოელემენტები ჩამონტაჯდება, რომლებიც დამატებით ელექტროენერგიას გამოიმუშავებენ. რაც მთავარია, ავტომობილის სვლის მარაგი 250 კილომეტრი უნდა იყოს, რაც, ცოტა არ იყოს, გაზვიადებულად ისმის, რადგან სუფთა ელექტრომობილებისთვის ეს ფანტასტიური მაჩვენებელია.

შტიგლერი ამბობს, რომ ”ახალი ტრაბისთვის” ელექტროძრავებს ბერლინური კომპანია ”IAV აუტომოტივ ენჯინირინგი” დაამზადებს, რომელსაც საავტომობილო გენერატორებისა და სტარტერების წარმოების დიდი გამოცდილება აქვს.

”ჰერპა” ცვიკაუში, იმავე მხარეში მდებარეობს, სადაც ”ტრაბანტის” ქარხანა მდებარეობდა. ეს კომპანია მანქანების და თვითმფრინავების მასშტაბური მოდელების წარმოებითაა ცნობილი, ”ტრაბანტის” მარკით სარგებლობის უფლება კი ორი წლის წინ, ამ მარკის აღდგენის მიზნით გამოისყიდა.

”ტრაბანტის” აღდგენის საქმეში, ”ჰერპას” კიდევ ერთი პარტნიორი კომპანია ”ინდიკარია”, რომელიც სპეციალური მანქანების, ავტომობილების კომპონენტებისა და ავტომობილების პროტოტიპების წარმოებითაა ცნობილი. ეს კომპანიაც ქალაქ ცვიკაუშია ბაზირებული.

დაბოლოს, თუ ”ჰერპა” და მისი პარტნიორები ფრანკფურტში ინვესტორს მიიზიდავენ, ”ახალი ტრაბის” წარმოება 2012 წელს დაიწყება.

”აუტო უნიონი” თავიდან იბადება

Auto Union

12 აგვისტო

არაა გამორიცხული, რომ ავტოსამყაროში კვლავ დაბრუნდეს ლეგენდარული სახელი ”აუტო უნიონი”. ამ მარკის ხელახლა დაბადება კი ორი გერმანული კომპანიის - ”პორშესა” და ”ფოლკსვაგენის” გაერთიანებას უკავშირდება. ეს კი, მას შემდეგ რაც ”პორშეს” სამეთვალყურეო საბჭომ გადადგომა აიძულა ამ გაერთაინების მთავარ მოწინააღმდეგეს, ”პორშეს” მთავარ აღმასრულებელ ვენდელინ ვედეკინგს, პრაქტიკულად გადაწყვეტილი საკითხია.

”ფოლკსვაგენის” მიერ გამოქვეყნებულ რელიზში სწერია, რომ ორი კომპანიის შერწყმის შედეგად წარმოქმნილ კომპანიაში მხარეებს თანაბარი წილი ექნებათ. ამასთან, ამის შემდეგაც, ”პორშე” თავის საქმიანობას დამოუკიდებლად წარმართავს, მისი შტაბ-ბინა კი ისევ შტუტგარტში დარჩება.

იმისათვის კი, რომ ”პორშეს” მესვეურებს არ დარჩეთ იმის შეგრძნება, რომ სპორტული ავტომობილების მწარმოებელ კომპანიას ”ფოლკსვაგენი” მართავს, გაერთიანებულ კომპანიას ”აუტო უნიონი” დაერქმევა. ოღონდ, ეს ბოლო ინფორმაცია ჯერ დადასტურებული არაა.

თავის დროზეც, სახელი ”აუტო უნიონი” ოთხი გერმანული კომპანიის - ”ჰორხის”, ”აუდის”, DKW-ს და ”ვანდერერის” გაერთიანების შედეგად წარმოიქმნა. ეს დდ გაერთიანბა 1932 წელს ჩატარდა. სწორედ მასში მუშაობით გაითქვა სახელი ლეგენდარულმა ავსტრიელმა კონსტრუქტორმა ფერდინანდ პორშემ, რომელმაც მოგვიანებით, თავის შვილთან და ოჯახის სხვა წევრებთან ერთად, დასაბამი ორ ახალ საავტომობილო კომპანიას - ”ფოლკსვაგენს” და ”პორშეს” დაუდო დასაბამი.

”აუტო უნიონმა” სახელი უპირველესად, ავტორბოლებით გაითქვა, მაგრამ მეორე მსოფლიო ომის შემდეგ ფეხზე ხეირიანად ვეღარ დადგა. ის რამდენჯერმე აღადგინეს, 1964 წელს მთლიანდ ”ფოლკსვაგენმა” გამოისყიდა, 1985 წელს კი საბოლოოდ, ”აუდის” სახელით დამკვიდრდა.

დღეისათვის, ”პორშეს” ვოლფსბურგული გიგანტის აქციების 50 პროცენტი ეკუთვნის, მაგრამ ფინანსურ კრიზისში იმყოფება და ახლა იძულებულია, თავისივე აქციების 49 პროცენტი ”ფოლკსვაგენს” დაუთმოს. პარალელურად, ორივე კომპანიის მსხვილი აქციონერია ყატარის სახელმწიფო საინვესტიციო ჯგუფი.

ინტერნეტ გამოცემა ”აუტომოტივ ნიუსის” ინფორმაციით, ორი კომპანიის შერწყმის შესახებ ახალი ინფორმაციის გამოქვეყნება ხვალაა მოსალოდნელი.

”შევროლე კორვეტ C7” 2012 წელს გამოჩნდება

Chevrolet Corvette C7

12 აგვისტო

ოთხი წლის წინ, როგორც კი ბაზარზე ”შევროლე კორვეტ C6” გამოჩნდა, საავტომობილო პრესამ მაშინვე დაიწყო მარჩიელობა იმაზე, თუ რამდენ ხანს დარჩებოდა წარმოებაში ეს ავტომობილი, როდის დაიწყებოდა მომდევნო თაობის ”კორვეტის” წარმოება, როგორი შეთანწყობა ექნებოდა მას და ა.შ. მაშინ ბევრი ვარაუდობდა, რომ C7 შუაძრავიანი სუპერავტომობილი იქნებოდა.

ბოლო ხანს, ”ჯენერალ მოტორსის” პრობლემების გამო, ინტერნეტში გაჩნდა ვარაუდები იმის თაობაზე, რომ მომდევნო ”კორვეტის” გამოჩენა 2014 წლამდე მოსალოდნელი არ იყო. მაგრამ ორშაბათს ამ მითქმა-მოთქმას წერტილი თვით ”ჯენერალ მოტორსის” მთავარმა აღმასრულებელმა ფრიც ჰენდერსონმა დაუსვა, რომელმაც დეტროიტში სპეციალურად გამართულ პრესკონფერენციაზე, საავტომობილო სამყაროს თავისი კომპანიის უახლოესი გეგმები გააცნო.

თავისი გამოსვლისას, ჰენდერსონმა განაცხადა, რომ ახალი ”კორვეტის” გაყიდვებს ”შევროლე” 2012 წელს დაიწყებს. მაგრამ ამ ავტომობილზე ამის მეტი მას ბევრი არაფერი უთქვამს. ის კი დაადასტურა, რომ ახალ ”კორვეტსაც” ძრავი წინ ექნება, ისევე როგორც მისი წარმოების 57 წლის განმავლობაში ჰქონდა. და, რა თქმა უნდა, C6-ის მსგავსად, ახალ ”კორვეტზეც” უხვად გამოიყენებენ ალუმინს, კარბონის კომპოზიტსა და მაგნეზიუმს.

დანარჩენი კი სამარჩიელოა. მაგალითად, როგორი გარეგნობა ექნება ”შევროლე კორვეტ C7-ს”? შესაძლოა, ამის პასუხი ჩიკაგოს წლევანდელი ავტო შოუს კონცეპტუალური ექსპონატი ”შევროლე სტინგრეი” იყოს, რომელიც მტაცებლური გარეგნობით გამოირჩევა. რა თქმა უნდა, წარმოებამდე ეს ავტომობილი უფრო ”დამშვიდდება”, მაგრამ კონცეპტუალურ ვერსიაზე გამოყენებული არაერთი გადაწყვეტა ალბათ მაინც დარჩება.

”ჯენერალ მოტორსის” ახლებური ხედვიდან გამომდინარე, რომელიც აქცენტს ეკონომიურსა და გარემოსადმი მეგობრულ ავტომობილებზე აკეთებს, ახალი ”კორვეტი” შედარებით მცირე ძრავით აღიჭურვება, რომელსაც აუცილებლად მოემსახურება დამჭირხნი. ოღონდ, ეს ტურბო იქნება, თუ მექანიკური, ამაზე ჯერ რაიმეს თქმა ძნელია. იმისათვის, რომ თავის უშუალო მეტოქეებს - ”პორშე 911-სა” და ”ნისან GT-R-ს” კონკურენცია გაუწიოს, C7-ის ძრავი და გადაცემათა კოლოფი ერთმანთთან ორდისკოიანმა ქურომ უნდა დააკავშიროს.

სავარაუდოა, რომ ახალი ავტომობილი მისი წინამორბედის ევოლუციური განვითარება იქნება. ასევე იყო C6-ის შემთხვევაშიც, რომელიც რეალურად, C5-ის გაუმჯობესებული ვარიანტია. C7-ის ბაზისად კი C6-ის მეტად წარმატებული პლატფორმის მოდერნიზებულ ვერსიას გამოიყენებენ.

ჯერ სულ ეს არის, დანარჩენს კი თქვენთან ერთად დაველოდებით...

”ჰიუნდაიმ” ”ფორდს” გადაასწრო

Hyundai World's 4th Automaker

12 აგვისტო

წლის პირველი ექვსი თვის მონაცემებით, კორეულმა ”ჰიუნდაი-კიას” ჯგუფმა გაყიდვებით უკან ჩამოიტოვა ”ფორდი” და მსოფლიოს მეოთხე უდიდესი ავტომწარმოებელი გახდა. ორი ავტოგიგანტის გაყიდვებს შორის სხვაობა სულ რაღაც 8 000 ავტომობილია.

კორეული კომპანიის წარმატება, როგორც თავად ”ჰიუნდაისა” და ”კიას” გაყიდვების ზრდამ, ასევე ”ფორდის” გაყიდვების შემცირებამ განაპირობა. კერძოდ, ამერიკული კომპანიის მიერ გაყიდული ავტომობილების რაოდენობა წინა წლის შესაბამის მონაცემებთან შედარებით, 30 პროცენტით, 2.145 მილიონამდე არის შემცირებული.

”ჰიუნდაი” და ”კია” ათი წლის წინ გაერთიანდნენ და მაშინ კორეულ საავტომობილო ჯგუფს მსოფლიოს ბაზარზე მე-11 ადგილი ეკავა. შარშან კორეელებმა ”ჰონდას” გადაასწრეს და მეხუთე ადგილზე გადაინაცვლეს და არაა გამორიცხული, რომ წელსაც ერთი საფეხურით წინ წაიწიონ (მთელი წლის მონაცემებით).

აქ ისიც უნდა აღინიშნოს, რომ ბევრი მიმომხილველი ”ჰიუნდაის” და ”კიას” ცალკე კომპანიებად განიხილავს, რისი მიზეზიც ისაა, რომ პირველმა მეორეში თავისი წილი 51-დან 38.67 პროცენტამდე შეამცირა, თუმცა მაინც მის უმსხვილეს აქციონერად რჩება. ამასთან, ორი კომპანია ავტომობილების უმეტესობისთვის ერთსადაიმავე პლატფორმას იყენებს.

”შევროლე ვოლტი” – 1 ლიტრით 100 კილომეტრი

Chevrolet Volt

12 აგვისტო

”ჯენერალ მოტორსს” ფართოდ რეკლამირებული ”შევროლე ვოლტის” წარმოება ჯერ არ დაუწყია, მაგრამ ამ ჰიბრიდულ ავტომობილს უკვე უამრავი თაყვანისმცემელი ჰყავს და ისინი მოუთმენლად ელიან სასურველი ავტომობილის დილერთა შოურუმებში გამოჩენას. მაგრამ მათგან ალბათ ბევრი არავინ ელოდა ისეთ მახასიათებლებს, როგორებიც ახლახანს საზოგადოებას ამერიკული კომპანიის მთავარმა აღმასრულებელმა ფრიც ჰენდერსონმა გააცნო.

აშშ-ის გარემოს დაცვის სააგენტოს (EPA) მიერ შედგენილი მეთოდოლოგიით ჩატარებულმა ტესტებმა დაადგინა, რომ ”ვოლტს” 230 მილის (დაახლოებით 270 კმ) გასავლელად, ერთი გალონი (3.78 ლ) საწვავი ჰყოფნის.

საერთოდ, EPA-ს მეთოდლოგია ისეა შემუშავებული, რომ ყველა ტიპის ავტომობილი თანაბარ მდგომარეობაში ჩააყენს. რამდენად სამართლიანად მიესადაგება ეს მეთოდოლოგია გაზრდლი სვლის ელექტრომობილებს (როგორიცაა შევროლე ვოლტი), ძნელი სათქმელია. თუმცა ფაქტია, რომ ჰენდერსონის მიერ გამოქვეყნებული მონაცემი (230 მილი ერთი გალონით) შესანიშნავი მაჩვენებელია. EPA-ს ახალი მეთოდოლოგია დამუშავების სტადიაშია და ჰენდერსონი ამბობს, რომ მის მიხედვით, ”ვოლტის” ეკონომიურობა 100 მილზე (დაახლოებით 160 კმ) 25 კილოვატსაათი (100 კილომეტრზე 15 კვტ.სთ) იქნება.

აქვე ისიც უნდა ითქვას, რომ სრულად დამუხტული აკუმულატორებით, ”ვოლტს” 65 კილომეტრის გავლა შეუძლია. ეს კი ის მანძილია, რასაც ქალაქის მცხოვრებნი დღის განმავლობაში გადიან. ასე რომ, ავტომობილმა შეიძლება 230 მილი ისეც გაიაროს, რომ საქმეში შიდაწვისძრავი არც ჩაერთოს. ესე იგი, მას საწვავის ნულოვანი ხარჯი ექნება. ახალი მეთოდოლოგიით დადგენილი 25 კილოვატსაათი 100 მილზე კი იმას ნიშნავს, რომ ელექტროენერგიის ჩვენებური ტარიფით (კილოვატი 16 თეთრი), 100 ”ვოლტით” კილომეტრის გავლა 2.4 ლარი დაგვიჯდება.

ჰენდერსონის თქმით, ”შევროლე ვოლტის” წარმოება მერმის დაიწყება და ის ორი მოდიფიკაციის სახით დამზადდება. მათგან ერთი ჩვეულებრივი ელექტრომობილი იქნება, მეორე კი გაზრდლი სვლის (ჰიბრიდული) ელექტრომობილი, რომელშიც ავტომობილის მოძრაობის დროს, მის აკუმულატორებს შიდაწვის ძრავთან დაკავშირებული გენერატორი დამუხტავს.

ამ ეტაპზე, ”შევროლე ვოლტის” მინიმალური ფასი დაახლოებით 40 000 დოლარია. ამასთან, ამერიკაში ეკოლოგიურად სუფთა ავტომობილებზე შემოღებული შეღავათები, ამ ფასს დაახოებით 7 500 დოლარით ამცირებს. მაგრამ ჰენდერსონი აცხადებს, რომ მისი კომპანია ”ვოლტის” ფასის შესამცირებლად მუშაობას აგრძელებს და სავარაუდოდ, წარმოების დაწყების წინ, ფასი კიდევ უფრო შემცირდება.

”ტოიოტა” გეგმებს ცვლის

Toyota

11 აგვისტო

”ტოიოტას” ახალმა პრეზიდენტმა აკიო ტოიოდამ გააუქმა გეგმა, რომელიც მიზნად იაპონური კომპანიის მიერ მსოფლიო ბაზრის 15 პროცენტის დაკავებას ისახავდა. ამიერიდან, მსოფლიოს უდიდესი ავტომწარმოებელი თავის ძველ დევიზს - ხარისხი რაოდენობაზე მეტად, დაუბრუნდება.

15-პროცენტიანი მიზანი ”ტოიოტას” მისმა ყოფილმა პრეზიდენტმა ფუძიო ჩომ 2002 წელს დაუსახა. მისი გეგმით, იაპონურ კომპანიას გლობალური ბაზრის 15 პროცენტი 2010 წელს უნდა დაეკავებინა. ასეთი ოპტიმისტური განწყობის საბაბს კი კომპანიის მარკეტოლოგებს ”ტოიოტას” ზრდის მყარი ტენდენცია აძლევდა.

ინტერნეტ გამოცემა ”ავტომოტივ ნიუსის” ინფორმაციით, 2002 წელს ”ტოიოტას” გლობალური ბაზრის 10.7 პროცენტი ეკავა. მაგრამ დღეს სიტუაცია რადიკალურადაა შეცვლილი. იმავე ”ავტომოტივ ნიუსის” მიერ გამოქვეყნებული სტატისტიკით, ამ წლის პირველ ექვს თვეში, იაპონური კომპანიის გაყიდვები 26 პროცენტითაა შემცირებული. ეგ კიდევ არაფერი, ტოიოდა თავისი დიდი წინაპრების მიერ დაარსებულ კომპანიას სათავეში იმ დროს ჩაუდგა, როცა მისი საქმიანობა ზარალიანია. ეს კი ”ტოიოტას” ისტორიაში ადრე არასდროს მომხდარა.

ტოიოდა თვლის, რომ სწრაფი ზრდის ერამ, მისი კომპანიის რესურსების ასევე სწრაფი გამოფიტვა განაპირობა. ყველაზე მნიშვნელოვანი კი ისაა, რომ ”ტოიოტას” საწარმოების უმეტესობა მხოლოდ ნაწილობრივი დატვირთვით მუშაობს - კომპანიის ქარხნების წლიური პოტენციალი დაახლოებით 10 მილიონი ავტომობილია, მაგრამ მიმდინარე ფისკალური წლის განმავლობაში (რომელიც 31 მარტს იწურება), ”ტოიოტა” მხოლოდ 6.6 მილიონი ავტომობილის გაყიდვას გეგმავს.

კომპანიის ახალი მენეჯმენტი თვლის, რომ ქარხნების ჭარბი პოტენციალი სწორედ რაოდენობაზე გამოკიდებამ განაპირობა. მაგრამ ერთ-ერთი აღმასრულებლის თქმით, ”ჩვენს პრეზიდენტს რიცხვები და სტატისტიკა არ უყვარს”.

ასე რომ, არაა გამორიცხული, მალე მსოფლიოს უდიდესი ავტომწარმოებლის სტატუსი ისევ ”ჯენერალ მოტორსმა” დაიბრუნოს...

”კადილაკის” ფლაგმანი ”ბიუიკ ლაქროსზე” დაემყნობა

Cadillac

11 აგვისტო

”ჯენერალ მოტორსის” პრემიუმ ბრენდ ”კადილაკს” ახალი სტრატეგია აქვს შერჩეული, რომელიც გერმანული ”ბეემვეს” ძველი სტრატეგიის მსგავსია. სამოდელო გამაში სამი ძირითადი ავტომობილი - მცირე, საშუალო და დიდი ზომის სედანი უნდა შედიოდეს. ამ სტრატეგიის განხორციელებას ამერიკული კომპანია მერმის შეუდგება, როდესაც საშუალო ზომის ბიზნეს კლასის სედანის გამოშვებას დაიწყებს.

კარგა ხანს, პრესაში მუსირებდა ვარაუდი, რომ საშუალო ზომის ფლაგმანის ბაზისად ”კადილაკი” მონათესავე ”პონტიაკის” ანალოგიური კლასის სედან G8-ს პლატფორმას გამოიყენებდა. მაგრამ ”კადილაკმა” ამ პლატფორმაზე უარი იმის გამო თქვა, რომ მას წამყვანი უკანა ბორბლები აქვს. უფრო მეტიც, პროექტი დროებით შეჩერდა კიდეც.

მაგრამ გავიდა დრო, ”ჯენერალ მოტორსმა” რამდენიმე დღე ხელოვნური გაკოტრების რეჟიმში იმუშავა, ახალ კომპანიად ჩამოყალიბდა და მისმა საკონსრუქტორო შტაბმაც ძველი პროექტების თაროებიდან ჩამოღება დაიწყო. და აი, სულ რამდენიმე დღეა, რაც კომპანიამ ახალ ფლაგმანზე მუშაობა განაახლა.

ინტერნეტში გაჩნდა ინფორმაცია იმის შესახებ, რომ ახალი ავტომობილი ”ბიუიკის” უახლესი სედანის, ”ლაქროსის” პლატფორმაზე დაამყნობს, რომელიც ”ოპელ ინსინიაზე” გამოყენებული ”ეპსილონ II-ის” მოდერნიზებული ვარიანტია. ოღონდ, ეს პლატფორმა შემდგომ მოდერნიზებას გაივლის - დაგრძელდება, გაგანიერდება და რაც მთავარია, სრულამძრავიანი გახდება.

საშუალო ზომის ”კადილაკის” (ალბათ CTS) ბაზარზე გამოჩენა მერმისაა მოსალოდნელი. ერთი წლის შემდგ მას პატარა ”კადილაკიც” (BLS) მოჰყვება. სავარაუდოდ, 2011 წელსვე დიდ ”კადილაკსაც” (ალბათ XTS) ვიხილავთ.