”აუტო უნიონი” თავიდან იბადება

Auto Union

12 აგვისტო

არაა გამორიცხული, რომ ავტოსამყაროში კვლავ დაბრუნდეს ლეგენდარული სახელი ”აუტო უნიონი”. ამ მარკის ხელახლა დაბადება კი ორი გერმანული კომპანიის - ”პორშესა” და ”ფოლკსვაგენის” გაერთიანებას უკავშირდება. ეს კი, მას შემდეგ რაც ”პორშეს” სამეთვალყურეო საბჭომ გადადგომა აიძულა ამ გაერთაინების მთავარ მოწინააღმდეგეს, ”პორშეს” მთავარ აღმასრულებელ ვენდელინ ვედეკინგს, პრაქტიკულად გადაწყვეტილი საკითხია.

”ფოლკსვაგენის” მიერ გამოქვეყნებულ რელიზში სწერია, რომ ორი კომპანიის შერწყმის შედეგად წარმოქმნილ კომპანიაში მხარეებს თანაბარი წილი ექნებათ. ამასთან, ამის შემდეგაც, ”პორშე” თავის საქმიანობას დამოუკიდებლად წარმართავს, მისი შტაბ-ბინა კი ისევ შტუტგარტში დარჩება.

იმისათვის კი, რომ ”პორშეს” მესვეურებს არ დარჩეთ იმის შეგრძნება, რომ სპორტული ავტომობილების მწარმოებელ კომპანიას ”ფოლკსვაგენი” მართავს, გაერთიანებულ კომპანიას ”აუტო უნიონი” დაერქმევა. ოღონდ, ეს ბოლო ინფორმაცია ჯერ დადასტურებული არაა.

თავის დროზეც, სახელი ”აუტო უნიონი” ოთხი გერმანული კომპანიის - ”ჰორხის”, ”აუდის”, DKW-ს და ”ვანდერერის” გაერთიანების შედეგად წარმოიქმნა. ეს დდ გაერთიანბა 1932 წელს ჩატარდა. სწორედ მასში მუშაობით გაითქვა სახელი ლეგენდარულმა ავსტრიელმა კონსტრუქტორმა ფერდინანდ პორშემ, რომელმაც მოგვიანებით, თავის შვილთან და ოჯახის სხვა წევრებთან ერთად, დასაბამი ორ ახალ საავტომობილო კომპანიას - ”ფოლკსვაგენს” და ”პორშეს” დაუდო დასაბამი.

”აუტო უნიონმა” სახელი უპირველესად, ავტორბოლებით გაითქვა, მაგრამ მეორე მსოფლიო ომის შემდეგ ფეხზე ხეირიანად ვეღარ დადგა. ის რამდენჯერმე აღადგინეს, 1964 წელს მთლიანდ ”ფოლკსვაგენმა” გამოისყიდა, 1985 წელს კი საბოლოოდ, ”აუდის” სახელით დამკვიდრდა.

დღეისათვის, ”პორშეს” ვოლფსბურგული გიგანტის აქციების 50 პროცენტი ეკუთვნის, მაგრამ ფინანსურ კრიზისში იმყოფება და ახლა იძულებულია, თავისივე აქციების 49 პროცენტი ”ფოლკსვაგენს” დაუთმოს. პარალელურად, ორივე კომპანიის მსხვილი აქციონერია ყატარის სახელმწიფო საინვესტიციო ჯგუფი.

ინტერნეტ გამოცემა ”აუტომოტივ ნიუსის” ინფორმაციით, ორი კომპანიის შერწყმის შესახებ ახალი ინფორმაციის გამოქვეყნება ხვალაა მოსალოდნელი.

”შევროლე კორვეტ C7” 2012 წელს გამოჩნდება

Chevrolet Corvette C7

12 აგვისტო

ოთხი წლის წინ, როგორც კი ბაზარზე ”შევროლე კორვეტ C6” გამოჩნდა, საავტომობილო პრესამ მაშინვე დაიწყო მარჩიელობა იმაზე, თუ რამდენ ხანს დარჩებოდა წარმოებაში ეს ავტომობილი, როდის დაიწყებოდა მომდევნო თაობის ”კორვეტის” წარმოება, როგორი შეთანწყობა ექნებოდა მას და ა.შ. მაშინ ბევრი ვარაუდობდა, რომ C7 შუაძრავიანი სუპერავტომობილი იქნებოდა.

ბოლო ხანს, ”ჯენერალ მოტორსის” პრობლემების გამო, ინტერნეტში გაჩნდა ვარაუდები იმის თაობაზე, რომ მომდევნო ”კორვეტის” გამოჩენა 2014 წლამდე მოსალოდნელი არ იყო. მაგრამ ორშაბათს ამ მითქმა-მოთქმას წერტილი თვით ”ჯენერალ მოტორსის” მთავარმა აღმასრულებელმა ფრიც ჰენდერსონმა დაუსვა, რომელმაც დეტროიტში სპეციალურად გამართულ პრესკონფერენციაზე, საავტომობილო სამყაროს თავისი კომპანიის უახლოესი გეგმები გააცნო.

თავისი გამოსვლისას, ჰენდერსონმა განაცხადა, რომ ახალი ”კორვეტის” გაყიდვებს ”შევროლე” 2012 წელს დაიწყებს. მაგრამ ამ ავტომობილზე ამის მეტი მას ბევრი არაფერი უთქვამს. ის კი დაადასტურა, რომ ახალ ”კორვეტსაც” ძრავი წინ ექნება, ისევე როგორც მისი წარმოების 57 წლის განმავლობაში ჰქონდა. და, რა თქმა უნდა, C6-ის მსგავსად, ახალ ”კორვეტზეც” უხვად გამოიყენებენ ალუმინს, კარბონის კომპოზიტსა და მაგნეზიუმს.

დანარჩენი კი სამარჩიელოა. მაგალითად, როგორი გარეგნობა ექნება ”შევროლე კორვეტ C7-ს”? შესაძლოა, ამის პასუხი ჩიკაგოს წლევანდელი ავტო შოუს კონცეპტუალური ექსპონატი ”შევროლე სტინგრეი” იყოს, რომელიც მტაცებლური გარეგნობით გამოირჩევა. რა თქმა უნდა, წარმოებამდე ეს ავტომობილი უფრო ”დამშვიდდება”, მაგრამ კონცეპტუალურ ვერსიაზე გამოყენებული არაერთი გადაწყვეტა ალბათ მაინც დარჩება.

”ჯენერალ მოტორსის” ახლებური ხედვიდან გამომდინარე, რომელიც აქცენტს ეკონომიურსა და გარემოსადმი მეგობრულ ავტომობილებზე აკეთებს, ახალი ”კორვეტი” შედარებით მცირე ძრავით აღიჭურვება, რომელსაც აუცილებლად მოემსახურება დამჭირხნი. ოღონდ, ეს ტურბო იქნება, თუ მექანიკური, ამაზე ჯერ რაიმეს თქმა ძნელია. იმისათვის, რომ თავის უშუალო მეტოქეებს - ”პორშე 911-სა” და ”ნისან GT-R-ს” კონკურენცია გაუწიოს, C7-ის ძრავი და გადაცემათა კოლოფი ერთმანთთან ორდისკოიანმა ქურომ უნდა დააკავშიროს.

სავარაუდოა, რომ ახალი ავტომობილი მისი წინამორბედის ევოლუციური განვითარება იქნება. ასევე იყო C6-ის შემთხვევაშიც, რომელიც რეალურად, C5-ის გაუმჯობესებული ვარიანტია. C7-ის ბაზისად კი C6-ის მეტად წარმატებული პლატფორმის მოდერნიზებულ ვერსიას გამოიყენებენ.

ჯერ სულ ეს არის, დანარჩენს კი თქვენთან ერთად დაველოდებით...

”ჰიუნდაიმ” ”ფორდს” გადაასწრო

Hyundai World's 4th Automaker

12 აგვისტო

წლის პირველი ექვსი თვის მონაცემებით, კორეულმა ”ჰიუნდაი-კიას” ჯგუფმა გაყიდვებით უკან ჩამოიტოვა ”ფორდი” და მსოფლიოს მეოთხე უდიდესი ავტომწარმოებელი გახდა. ორი ავტოგიგანტის გაყიდვებს შორის სხვაობა სულ რაღაც 8 000 ავტომობილია.

კორეული კომპანიის წარმატება, როგორც თავად ”ჰიუნდაისა” და ”კიას” გაყიდვების ზრდამ, ასევე ”ფორდის” გაყიდვების შემცირებამ განაპირობა. კერძოდ, ამერიკული კომპანიის მიერ გაყიდული ავტომობილების რაოდენობა წინა წლის შესაბამის მონაცემებთან შედარებით, 30 პროცენტით, 2.145 მილიონამდე არის შემცირებული.

”ჰიუნდაი” და ”კია” ათი წლის წინ გაერთიანდნენ და მაშინ კორეულ საავტომობილო ჯგუფს მსოფლიოს ბაზარზე მე-11 ადგილი ეკავა. შარშან კორეელებმა ”ჰონდას” გადაასწრეს და მეხუთე ადგილზე გადაინაცვლეს და არაა გამორიცხული, რომ წელსაც ერთი საფეხურით წინ წაიწიონ (მთელი წლის მონაცემებით).

აქ ისიც უნდა აღინიშნოს, რომ ბევრი მიმომხილველი ”ჰიუნდაის” და ”კიას” ცალკე კომპანიებად განიხილავს, რისი მიზეზიც ისაა, რომ პირველმა მეორეში თავისი წილი 51-დან 38.67 პროცენტამდე შეამცირა, თუმცა მაინც მის უმსხვილეს აქციონერად რჩება. ამასთან, ორი კომპანია ავტომობილების უმეტესობისთვის ერთსადაიმავე პლატფორმას იყენებს.

”შევროლე ვოლტი” – 1 ლიტრით 100 კილომეტრი

Chevrolet Volt

12 აგვისტო

”ჯენერალ მოტორსს” ფართოდ რეკლამირებული ”შევროლე ვოლტის” წარმოება ჯერ არ დაუწყია, მაგრამ ამ ჰიბრიდულ ავტომობილს უკვე უამრავი თაყვანისმცემელი ჰყავს და ისინი მოუთმენლად ელიან სასურველი ავტომობილის დილერთა შოურუმებში გამოჩენას. მაგრამ მათგან ალბათ ბევრი არავინ ელოდა ისეთ მახასიათებლებს, როგორებიც ახლახანს საზოგადოებას ამერიკული კომპანიის მთავარმა აღმასრულებელმა ფრიც ჰენდერსონმა გააცნო.

აშშ-ის გარემოს დაცვის სააგენტოს (EPA) მიერ შედგენილი მეთოდოლოგიით ჩატარებულმა ტესტებმა დაადგინა, რომ ”ვოლტს” 230 მილის (დაახლოებით 270 კმ) გასავლელად, ერთი გალონი (3.78 ლ) საწვავი ჰყოფნის.

საერთოდ, EPA-ს მეთოდლოგია ისეა შემუშავებული, რომ ყველა ტიპის ავტომობილი თანაბარ მდგომარეობაში ჩააყენს. რამდენად სამართლიანად მიესადაგება ეს მეთოდოლოგია გაზრდლი სვლის ელექტრომობილებს (როგორიცაა შევროლე ვოლტი), ძნელი სათქმელია. თუმცა ფაქტია, რომ ჰენდერსონის მიერ გამოქვეყნებული მონაცემი (230 მილი ერთი გალონით) შესანიშნავი მაჩვენებელია. EPA-ს ახალი მეთოდოლოგია დამუშავების სტადიაშია და ჰენდერსონი ამბობს, რომ მის მიხედვით, ”ვოლტის” ეკონომიურობა 100 მილზე (დაახლოებით 160 კმ) 25 კილოვატსაათი (100 კილომეტრზე 15 კვტ.სთ) იქნება.

აქვე ისიც უნდა ითქვას, რომ სრულად დამუხტული აკუმულატორებით, ”ვოლტს” 65 კილომეტრის გავლა შეუძლია. ეს კი ის მანძილია, რასაც ქალაქის მცხოვრებნი დღის განმავლობაში გადიან. ასე რომ, ავტომობილმა შეიძლება 230 მილი ისეც გაიაროს, რომ საქმეში შიდაწვისძრავი არც ჩაერთოს. ესე იგი, მას საწვავის ნულოვანი ხარჯი ექნება. ახალი მეთოდოლოგიით დადგენილი 25 კილოვატსაათი 100 მილზე კი იმას ნიშნავს, რომ ელექტროენერგიის ჩვენებური ტარიფით (კილოვატი 16 თეთრი), 100 ”ვოლტით” კილომეტრის გავლა 2.4 ლარი დაგვიჯდება.

ჰენდერსონის თქმით, ”შევროლე ვოლტის” წარმოება მერმის დაიწყება და ის ორი მოდიფიკაციის სახით დამზადდება. მათგან ერთი ჩვეულებრივი ელექტრომობილი იქნება, მეორე კი გაზრდლი სვლის (ჰიბრიდული) ელექტრომობილი, რომელშიც ავტომობილის მოძრაობის დროს, მის აკუმულატორებს შიდაწვის ძრავთან დაკავშირებული გენერატორი დამუხტავს.

ამ ეტაპზე, ”შევროლე ვოლტის” მინიმალური ფასი დაახლოებით 40 000 დოლარია. ამასთან, ამერიკაში ეკოლოგიურად სუფთა ავტომობილებზე შემოღებული შეღავათები, ამ ფასს დაახოებით 7 500 დოლარით ამცირებს. მაგრამ ჰენდერსონი აცხადებს, რომ მისი კომპანია ”ვოლტის” ფასის შესამცირებლად მუშაობას აგრძელებს და სავარაუდოდ, წარმოების დაწყების წინ, ფასი კიდევ უფრო შემცირდება.

”ტოიოტა” გეგმებს ცვლის

Toyota

11 აგვისტო

”ტოიოტას” ახალმა პრეზიდენტმა აკიო ტოიოდამ გააუქმა გეგმა, რომელიც მიზნად იაპონური კომპანიის მიერ მსოფლიო ბაზრის 15 პროცენტის დაკავებას ისახავდა. ამიერიდან, მსოფლიოს უდიდესი ავტომწარმოებელი თავის ძველ დევიზს - ხარისხი რაოდენობაზე მეტად, დაუბრუნდება.

15-პროცენტიანი მიზანი ”ტოიოტას” მისმა ყოფილმა პრეზიდენტმა ფუძიო ჩომ 2002 წელს დაუსახა. მისი გეგმით, იაპონურ კომპანიას გლობალური ბაზრის 15 პროცენტი 2010 წელს უნდა დაეკავებინა. ასეთი ოპტიმისტური განწყობის საბაბს კი კომპანიის მარკეტოლოგებს ”ტოიოტას” ზრდის მყარი ტენდენცია აძლევდა.

ინტერნეტ გამოცემა ”ავტომოტივ ნიუსის” ინფორმაციით, 2002 წელს ”ტოიოტას” გლობალური ბაზრის 10.7 პროცენტი ეკავა. მაგრამ დღეს სიტუაცია რადიკალურადაა შეცვლილი. იმავე ”ავტომოტივ ნიუსის” მიერ გამოქვეყნებული სტატისტიკით, ამ წლის პირველ ექვს თვეში, იაპონური კომპანიის გაყიდვები 26 პროცენტითაა შემცირებული. ეგ კიდევ არაფერი, ტოიოდა თავისი დიდი წინაპრების მიერ დაარსებულ კომპანიას სათავეში იმ დროს ჩაუდგა, როცა მისი საქმიანობა ზარალიანია. ეს კი ”ტოიოტას” ისტორიაში ადრე არასდროს მომხდარა.

ტოიოდა თვლის, რომ სწრაფი ზრდის ერამ, მისი კომპანიის რესურსების ასევე სწრაფი გამოფიტვა განაპირობა. ყველაზე მნიშვნელოვანი კი ისაა, რომ ”ტოიოტას” საწარმოების უმეტესობა მხოლოდ ნაწილობრივი დატვირთვით მუშაობს - კომპანიის ქარხნების წლიური პოტენციალი დაახლოებით 10 მილიონი ავტომობილია, მაგრამ მიმდინარე ფისკალური წლის განმავლობაში (რომელიც 31 მარტს იწურება), ”ტოიოტა” მხოლოდ 6.6 მილიონი ავტომობილის გაყიდვას გეგმავს.

კომპანიის ახალი მენეჯმენტი თვლის, რომ ქარხნების ჭარბი პოტენციალი სწორედ რაოდენობაზე გამოკიდებამ განაპირობა. მაგრამ ერთ-ერთი აღმასრულებლის თქმით, ”ჩვენს პრეზიდენტს რიცხვები და სტატისტიკა არ უყვარს”.

ასე რომ, არაა გამორიცხული, მალე მსოფლიოს უდიდესი ავტომწარმოებლის სტატუსი ისევ ”ჯენერალ მოტორსმა” დაიბრუნოს...

”კადილაკის” ფლაგმანი ”ბიუიკ ლაქროსზე” დაემყნობა

Cadillac

11 აგვისტო

”ჯენერალ მოტორსის” პრემიუმ ბრენდ ”კადილაკს” ახალი სტრატეგია აქვს შერჩეული, რომელიც გერმანული ”ბეემვეს” ძველი სტრატეგიის მსგავსია. სამოდელო გამაში სამი ძირითადი ავტომობილი - მცირე, საშუალო და დიდი ზომის სედანი უნდა შედიოდეს. ამ სტრატეგიის განხორციელებას ამერიკული კომპანია მერმის შეუდგება, როდესაც საშუალო ზომის ბიზნეს კლასის სედანის გამოშვებას დაიწყებს.

კარგა ხანს, პრესაში მუსირებდა ვარაუდი, რომ საშუალო ზომის ფლაგმანის ბაზისად ”კადილაკი” მონათესავე ”პონტიაკის” ანალოგიური კლასის სედან G8-ს პლატფორმას გამოიყენებდა. მაგრამ ”კადილაკმა” ამ პლატფორმაზე უარი იმის გამო თქვა, რომ მას წამყვანი უკანა ბორბლები აქვს. უფრო მეტიც, პროექტი დროებით შეჩერდა კიდეც.

მაგრამ გავიდა დრო, ”ჯენერალ მოტორსმა” რამდენიმე დღე ხელოვნური გაკოტრების რეჟიმში იმუშავა, ახალ კომპანიად ჩამოყალიბდა და მისმა საკონსრუქტორო შტაბმაც ძველი პროექტების თაროებიდან ჩამოღება დაიწყო. და აი, სულ რამდენიმე დღეა, რაც კომპანიამ ახალ ფლაგმანზე მუშაობა განაახლა.

ინტერნეტში გაჩნდა ინფორმაცია იმის შესახებ, რომ ახალი ავტომობილი ”ბიუიკის” უახლესი სედანის, ”ლაქროსის” პლატფორმაზე დაამყნობს, რომელიც ”ოპელ ინსინიაზე” გამოყენებული ”ეპსილონ II-ის” მოდერნიზებული ვარიანტია. ოღონდ, ეს პლატფორმა შემდგომ მოდერნიზებას გაივლის - დაგრძელდება, გაგანიერდება და რაც მთავარია, სრულამძრავიანი გახდება.

საშუალო ზომის ”კადილაკის” (ალბათ CTS) ბაზარზე გამოჩენა მერმისაა მოსალოდნელი. ერთი წლის შემდგ მას პატარა ”კადილაკიც” (BLS) მოჰყვება. სავარაუდოდ, 2011 წელსვე დიდ ”კადილაკსაც” (ალბათ XTS) ვიხილავთ.

”ჯენერალ მოტორსი” ”ტოიოტას” ეწევა

GM vs Toyota

10 აგვისტო

არაა გამორიცხული, რომ ”ჯენერალ მოტორსმა” გაყიდვების მოცულობით კვლავ გადაასწროს ”ტოიოტას” და მსოფლიოს უდიდესი ავტომწარმოებლის სტატუსი დაიბრუნოს. წლის პირველი ექვსი თვის შემდეგ, მათ შორის სხვაობა 12 000-ზე ნაკლებია, ორივეს კი სწრაფად ეწევა ”ფოლკსვაგენი”, რომელმაც მესამე პოზიცია გაიმყარა. მეოთხეზე კორეულმა ”ჰიუნდაი-კიამ” გადაინაცვლა, რომელმაც ”ფორდს” გადაასწრო.

საინტერესოა, რომ ყოველივე გლობალური ბაზრის მნიშვნელოვანი კლების ფონზე ხდება. იმ დროს, როდესაც მოწინვე ათეულში შემავალ 9 კომპანიას გაყიდვები შეუმცირდა, კორეული საავტომობილო ჯგუფი ”ჰიუნდაი-კია” ზრდას განაგრძობს, თუმცა ქვემოთ მოყვანილ ცხრილში, რომელიც ინტერნეტ გამოცემა ”ავტომოტივ ნიუსმა” გამოაქვეყნა, მისი ზრდის მონაცემები შეტანილი არაა.

შარშანდელი პირველი ექვსი თვის მონაცემებთან შედარებით, ”ტოიოტას” გაყიდვები 26 პროცენტითაა შემცირებული, ”ჯენერალ მოტორსისა” კი - 21.8 პროცენტით. თუ შარშან ამ პერიოდში იაპონურ კომპანიას თავის ამერიკელ კონკურენტზე დაახლოებით 274 000 ავტომობილით მეტი ჰქონდა გაყიდული, ახლა მათ შორის სხვაობა 12 000-ზე ნაკლებია.

”ტოიოტას” გაცილებით სწრაფად ”ფოლკსვაგენი” ეწევა, რომელმაც ჩამორჩენა მილიონზე მეტით შეამცირა. ამასთან, გერმანული კონცერნის გაყიდვები 5.1 პროცენტით არის შემცირებული.

მოწინავე ათეულში შემავალი კომპანიებიდან, გაყიდვების ყველაზე დიდი, 30.6-პროცენტიანი ვარდნა ”ფორდს” აქვს. სამაგიეროდ, ის დიდი ამერიკული სამეულის ერთადერთი წევრია, რომელმაც გაკოტრების სიმწარე არ იწვნია. სვათა შორის, ივლისში ”ცისფერმა ოვალმა” გაყიდვები 19 პროცენტით გაზარდა, თუმცა გასაგები მიზეზის გამო, ეს მაჩვენებელი ”ავტომოტივ ნიუსის” ანგარიშში არ შესულა.

გლობალური გაყიდვები (6 თვე 2009)

6 თვე 2009 6 თვე 2008 % სხვაობა

1. ტოიოტა 3 564 105 4 815 442 -26.0%

2. ჯენერალ მოტორსი 3 552 722 4 541 125 -21.8%

3. ფოლკსვაგენი 3 100 300 3 265 200 -5.1%

4. ჰიუნდაი-კია 2 153 000 -

5. ფორდი 2 145 000 3 093 000 -30.6%

6. PSA პეჟო-სიტროენი 1 586 900 1 844 700 -14.0%

7. ჰონდა 1 586 000 2 022 000 -21.6%

8. ნისანი 1 545 976 2 013 611 -23.2%

9. სუზუკი 1 152 000 1 283 000 -10.2%

10. რენო 1 106 989 1 326 164 -16.5%

”ჯენერალ მოტორსი” ავტომობილებს eBay-ზეც გაჰყიდის

GM eBay

10 აგვისტო

ესოშიეიტიდ პრესის ცნობით, ხვალ ”ჯენერალ მოტორსი” თავისი ავტომობილების გაყიდვას ინტერნეტ-აუქციონ eBay-ზე დაიწყებს. სააგენტოს ინფორმაციით, ინტერნეტით ავტომობილების გაყიდვების სქემა თავიდან მხოლოდ შტატ კალიფორნიის ტერიტორიაზე იმოქმედებს, სადაც გაყიდვებს კომპანიის 225 დილერი მოემსახურება.

ხვალ eBay ორ ქვედომენს გახსნის, რომლებზეც გასაყიდად ”შევროლეს”, ”კადილაკის”, ”ბიუიკისა” და GMC-ს ავტომობილები გამოიფინება. აუქციონის პრინციპი კი ისეთივე იქნება, როგორიც სხვა ინტერნეტ-აუქციონებზეა - მყიდველს შესაძლებლობა ექნება, თანდათან გაზარდოს ავტომობილის ფასი, ან დაუყოვნებლივ გადაიხადოს ექსპრეს ფასი.

გარდა ამისა, ახალ სისტემაში ინტეგრირებულია საანგარიშო, რომელიც ძველი ავტომობილის უტილიზაციის შემთხვევაში, მყიდველს ბონუსს ავტომატურად უანგარიშებს. ცნობისათვის, ამერიკაში ახლა ძალიან პოპულარულია სისტემა ”ქარ ფორ ქლანკერს” (ავტომობილი ჯართის სანაცვლოდ), რომლიც ჩვენში ”ტრეიდ ინ” სახელითაა ცნობილი. ამ სისტემის მიხედვით, მყიდველი ახალ ავტომობილს შეღავათიანი ფასით ყიდულბს, თუ ის იმავდროულად, ნახმარ მანქანას ჩააბარებს.

კომპანია ”eBay მოტორსის” ვიცე პრეზიდენტ რობ ჩესნის განცხადებით, ინტერნეტით ”ჯენერალ მოტორსის” ავტომობილების გაყიდვა ჯერჯერობით მხოლოდ ექსპერიმენტია და თუ ის გაამართლებს, ამავე მეთოდით ავტომობილების გაყიდვა მალე სხვა შტატებშიც დაიწყება.

”ვოლვო” C30-ის ბაზაზე ელექტრომობილს ამზადებს

Volvo C30 EV

10 აგვისტო

ინგლისურ ჟურნალ ”აუტოქარის” მიერ გავრცელებული ინფორმაციით, შვედური კომპანია ”ვოლვო”, რომელიც ჯერ კიდევ ”ფორდს” ხელშია, თუმცა მალე შეიძლება ჩინელებმა შეიძინონ, ჰეჩბეკ C30-ის ბაზაზე ეელქტრომობილს ამზადებს, რომელსაც საზოგადოებას პირველად ფრანკფურტის მოტორ შოუს შემდეგ, გამოფენა ”ინოვეიშნ ფორ ლაიფზე” წარადგენს.

შვედური კომპანიის სტენდზე დადგება ტესტებისთვის გამზადებული ავტომობილი, რომლის შესახებაც, ჯერჯერობით დაწვრილებითი ინფორმაცია არ ვრცელდება. ”აუტოქარის” ცნობით, ჯერჯერობით ”ვოლვოს” გადაწყვეტილი არ აქვს ამ ელექტრომობილის წარმოება. შესაბამის გადაწყვეტილებას კომპანიის ხელმძღვანელობა სატესტო პროგრამის დასრულების შემდეგ მიიღებს. სავარაუდოდ, თუ ელექტრომობილის პროექტს მწვანე შუქს აუნთებენ, ის კონვეიერზე 2012 წელს დადგება.

”ვოლვოს” ახალი ელექტრომობილის შესაძლებლობების შესახებ გარკვეული წარმოდგენის შექმნა, მისი წინამორბედის - ჰიბრიდული ”ვოლვო C30 რიჩეირჯის” (სურათზე) მიხედვით შეიძლება, რომელიც კომპანიამ ორი წლის წინ, ფრანკფურტის საავტომობილო გამოფენაზე წარადგინა. იმ ავტომობილის ჰიბრიდულ დანადგარში 1.6-ლიტრიანი შიდაწვის ძრავი შედის, რომელსაც ბიოეთანოლზე მუშაობა შეუძლია. ოთხივე ბორბალში კი თითო ელექტროძრავია ჩამონტაჟებული. შვედური კომპანიის ინფორმაციით, მხოლოდ აკუმულატორებში დაგროვილი ენერგიით, ”C30 რიჩეირჯს” 100 კილომეტრის გავლა შეუძლია...

განახლებული ”პორშე 911 ტურბო”

Porsche 911 Turbo

9 აგვისტო

გარდა იმისა, რომ თავის სამოდელო გამას ახალი ავტომობილებით ავსებს, ”პორშე” არც არსებულ მოდელებს ივიწყებს და მყიდველს მათს განახლებულ ვერსიებს უმზადებს. ასე მოხდა შარშან, როცა გერმანულმა კომპანიამ ”911 კარერა” და ”კარერა 4” განაახლა. წელს კი ”პორშემ” თავის პოპულარულ ”911 ტურბოს” ჩაუტარა მოდერნიზაცია და მყიდველს მას მერმის შესთავაზებს.

ტრადციულად, შტუტგარტელებს ამ ავტომობილის გარეგნობაში მინიმალური ცვლილებები შეაქვთ (რისთვისაც მათ ხშირად აკრიტიკებენ). სამაგიეროდ, მნიშვნელოვანი მოდიფიკაცია უტარდება აგრეგატებს და სხვადასხვა კვანძებს, დაახლოებით ისეთი, როგორსაც სატუნინგო კომპანიები უტარებენ ხოლმე.

კომპანიის ინჟინრებმა ძრავის მუშა მოცულობა 3.8 ლიტრამდე (3.6 ლ-დან) გაზარდეს, რის შედეგადაც, მისი მაქსიმალური სიმძლავრე 20 ცხენის ძალით, 500 ცხენის ძალამდე გაიზარა. ამგვარად, GT2-ის სიმძლავრემდე მას 30 ცხენის ძალა დააკლდა. სამაგიეროდ, 15-ით უფრო ძლიერია, ვიდრე მისი მთავარი კონკურენტი - ”ნისანის” GT-R, რომელმაც შტუტგარტელთა სრულამძრავიან ფლაგმანს ნურბურგრინგის წრის რეკორდი ჩამოართვა.

ამ აგრეგატით, რომელთანაც ორდისკოიანი ქუროს მეშვეობით, 7-საფეხურიანი ნახევრად ავტომატური გადაცემათა კოლოფია შეწყვილებული, განახლებული ”911 ტურბო” ადგილიდან 100 კმ/სთ სიჩქარის აკრეფას 3.2 წამში ასწრებს და ამგვარად, ის ”პორშეს” ისტორიაში ყველაზე დინამიკური სრულამძრავიანი ავტომობილია. მისი მაქსიმალური სიჩქარე კი 312 კმ/სთ-ია, წინამორბედზე მხოლოდ 2 კმ/სთ-ით მეტი.

სიმძლავრის და დინამიკური მახასიათებლების გაუმჯობესების გარდა, ავტომობილი უფრო ეკონომიურიც გახდა - შერეული ციკლით მოძრაობისას, 100 კილომეტრის გასავლელად, ის სულ რაღაც 11.4 ლიტრ ბენზინს წვავს. წინა ”911 ტურბოს” ეს მაჩვენებელი 1.4 ლიტრით უარესი აქვს.

ძრავის გარდა, ავტომობილს სტაბილიზაციის სიატემა და სრულმოდებიანი ტრანსმისიაც შეეცვალა. ამ უკანასკნელზე, მაბრუნი მომენტის ღერძებს შორის განაწილებას ელექტრონიკა აკონტროლებს.

განახლებული ”911 ტურბო” საზოგადოების წინაშე პირველად ფრანკფურტის მოტორ შოუზე წარსდგება, მისი გაყიდვები კი წლის ბოლოს დაიწყება. გერმანიაში მისი კუპე და კაბრიოლეტი ვერსიების საბაზო ღირებულება შესაბამისად, 145 871 და 157 057 ევრო იქნება.

”მაზდა MX-5 სუპერლაითი” ფრანკფურტისთვის ემზადება

Mazda MX-5 Superlight

8 აგვისტო

იაპონური კომპანია ”მაზდა” წელს თავისი პოპულარული ავტომობილის, როდსტერ MX-5-ის წარმოების დაწყებიდან 20 წლის იუბილეს აღნიშნავს და ამასთან დაკავშირებით, ფრანკფურტის ავტო შოუზე ჩვენებისთვის, ამავე ავტომობილის ბაზაზე შექმნილი სპიდსტერი ”MX-5 სუპერლაითი” მოამზადა.

ამ ავტომობილის შესახებ, ამ ეტაპზე, ბევრი არაფერია ცნობილი, თუმცა მასზე გარკვეული წარმოდგენა შეიძლება სახელიდან და ფოტოებიდან შევიქმნათ. მაგალითად, ”სუპერლაით” ნიშნავს, რომ ავტომობილის დამზადებისას, მსუბუქი მასალებია გამოყენებული. მათ შორის, აუცილებლად იქნება ალუმინი. სიმსუბუქე ის ფაქტორია, რითაც ”მაზდა” ავტომობილის ეკონომიურობისა და დინამიკური მახასიათებლების გაუმჯობესებას ცდილობს.

ავტომობილის შესამსუბუქებლად, ”მაზდას” ფრანკფურტული სტუდიის სპეციალისტებმა მას საქარე შუშაც კი მოხსნეს. უსახურავო მანქანაში მძღოლის და მისი ერთადერთი მგზავრის დასაცავად, უკანა საყრდენის ნაცვლად, ავტომობილის მზიდ სისტემას ორი მცირე ზომის რკალი დაუმატეს.

ჯერჯერობით უცნობია, რომელი ძრავითაა აღჭურვილი ”MX-5 სუპერლაითი”. თითქოს, სამარჩიელო არაფრი უნდა იყოს - ჩვეულებრივ MX-5-ზე 1.8 და 2.0-ლიტრიან ძრავებს იყენებენ, მაგრამ ისიც გასათვალისწინებელია, რომ აგრეგატისადმი ”მაზდას” მთავარი მოთხოვნა საწვავის ეკონომიური მოხმარებაა.

”MX-5 სუპერლაითი” შოუკარია, რომლითაც ”მაზდა” პოტენციური მომხმარებლის აზრს შეისწავლის. რა თქმა უნდა, ამ ეტაპზე ძნელია იმის თქმა, აპირებს თუ არა იაპონური კომპანია ამ ავტომობილის (თუნდაც შეზღუდული რაოდენობით) წარმოებას.

”ოპელი” გაყიდვებს ზრდის

Opel Sells Well

8 აგვისტო

მართალია, ”ოპელი” ფინანსურ პრობლემებს განიცდის და მალე მას ახალი მფლობელი ეყოლება, მაგრამ გერმანული კომპანია ევროპის ბაზარზე გაყიდვების მაჩვენებლებს მაინც აუმჯობესებს და თუ შარშან ივლისში, მის წილად ძველი კონტინენტის ბაზრის 6.45 პროცენტი მოდიოდა, ერთი წლის შემდეგ ეს მაჩვენებელი 7.2 პროცენტამდე გაიზარდა.

”ოპელი” გაყიდვებს ამ წლის თვიდან თვემდე აუმჯობესებს. იანვრიდან ივლისამდე პერიოდში, გერმანული კომპანიის წილი ევროპის ბაზარზე 7.03 პროცენტია, რაც იმას ნიშნავს, რომ ის მესამე ყველაზე გაყიდვადი ბრენდია.

”ოპელისთვის” ყველაზე წარმატებული ბაზარი გერმანიაა, რომელიც ”ჯენერალ მოტორსის” გერმანული ბრენდისთვის ძირითად ბაზრად რჩება. შარშანდელ ივლისთან შედარებით, იქ კომპანიის გაყიდვები 51.5 პროცენტითაა გაზრდლი. ეს მაშინ, როდესაც მთლიაბი ბაზარის ზრდამ 29.5 პროცენტი შეადგინა.

”ოპელი” გაყიდვებს სწრაფად ზრდის საფრანგეთში, სადაც მისი გაყიდვების რაოდენობა ერთი წლის განმავლობაში 41.5 პროცენტით გაიზარდა (შედარებისთვის, საკუთრივ ფრანგული ბაზარი მხოლოდ 3.1 პროცენტითაა გაზრდილი). გერმანული კომპანიის მიერ გამოქვეყნებული სტატისტიკის მიხედვით, საფრანგეთში განსაკუთრებით კარგად ”მერივა” და ”კორსა” იყიდება.

”ოპელის გაყიდვები ასევე ესპანეთსა (ბოლო ერთ თვეში 0.8 პროცენტით) და ბელგიაშიც (12.4-პროცენტით) იზრდება. მართალია, პირენეული მაჩვენებელი არც ისე შთამბეჭდავად გამოიყურება, მაგრამ ისიც უნდა გავითვალისწინოთ, რომ იქ ბაზარი 10.3 პროცენტითაა შემცირებული. ბელგიის ბაზარზე კი ახალი ავტომობილების გაყიდვები 8.7 პროცენტითაა შემცირებული.

”ოპელის” ავტომობილებიდან, ერთ-ერთი ყველაზე პოპულარული მოდელი უახლესი ”ინსინიაა”, რომელმაც შარშან ევროპის წლის საუკეთესო ავტომობილის წოდება მოიპოვა. კომპანიის სტატისტიკით, ”ინსინიაზე” უკვე 140 000 შეკვეთაა მიღებული, რაც იმას ნიშნავს, რომ ის ევროპის ბაზრის საშუალო ზომის სედანების სეგმენტის ლიდერია.

”პრიუსს” აკუმულატორები არ ჰყოფნის

Toyota Prius

7 აგვისტო

იმ დროს, როდესაც ”ნისან ლიფი” ბაზარზე გამოსასვლელად ემზადება, ჰიბრიდულ ავტომობილებზე მოთხოვნა მთელს მსოფლიოში გიგანტური ტემპებით იზრდება, რასაც ბევრი ქვეყნის სახელმწიფოების მიერ, ეკოლოგიურად სუფთა ავტომობილებზე დაწესებული სოლიდური შეღავათებიც უწყობს ხელს.

ჰიბრიდულ ბაზარზე ყველაზე პოპულარული ავტომობილი ”ტოიოტა პრიუსია”, რომელიც იაპონიაში რამდენიმე თვე ყველანაირ ავტომობილს შორისაც ბესტსელერი გახდა. ეს ავტომობილი იმდენად პოპულარულია, რომ მესამე თაობის ”პრიუსის” წარმოების დაწყების შემდეგაც ”ტოიოტა” მეორე თაობის მოდელის წარმოებას არ წყვეტს.

მაგრამ ამ ავტომობილზე მზარდმა მოთხოვნამ ”ტოიოტას” უკვე პრობლემები შეუქმნა. საქმე ისაა, რომ იაპონური ელექტროტექნიკური გიგანტი ”პანასონიკი” ”პრიუსისთვის” საკმარისი რაოდენობით აკუმულატორების დამზადებას ვერ აუდის, ”ტოიოტას” კი ამ მეტად მნიშვნელოვანი ელემენტის სხვა მიმწოდებელი არ ჰყავს. კიდევ უფრო ცუდი ისაა, რომ ეს პრობლემები ალბათ მერმისაც გაგრძელდება.

ამჟამად ”ტოიოტა” თავის პოპულარულ ჰიბრიდულ ავტომობილს მხოლოდ იაპონიაში, წლიურად 500 000 ცალს აწარმოებს. ზუსტი მონაცემი იმისა, თუ წლიურად რამდენ აკუმულატორს უშვებს ”პანასონიკი”, უცნობია, თუმცა კომპანიის ხელმძღვანელობა ”ტოიოტას” პირდება, რომ მერმის წარმოებას მილიონამდე გაზრდის.

”ტოიოტას” მმართველი დირექტორი ტაკაჰიკო იძიჩი ამბობს, რომ ქარხანა, რომელიც ”პრიუსს” აწარმოებს, სრული დატვირთვით მუშაობს, მაგრამ სამწუხაროდ, ”პანასონიკი” აკუმულატორების დროულად მიწოდებას ვერ ასწრებს, რაც ქარხნის სადგომზე უაკუმულატორო ავტომობილების დაგროვებას იწვევს. ამის გამო კი, ზოგიერთ ბაზარზე, სასურველი ჰიბრიდის მისაღებად, მყიდველს ლოდინი უწევს.

”ნისან ლიფი” ჰიბრიდების წინააღმდეგ

Nissan Leaf

7 აგვისტო

”ნისანი” თავის მასობრივ ელექტრომობილ ”ლიფზე” დიდ იმედებს ამყარებს. იაპონური კომპანია იმედოვნებს, რომ ამ ავტომობილით კონკურენციას გაუწევს იაპონური ბაზრის ბესტსელერებს, ორ უახლეს ჰიბრიდულ ავტომობილს - ”ტოიოტა პრიუსსა” და ”ჰონდა ინსაითს”.

”ნისანის” ჩრდილოამერიკული შტოს ვიცე პრეზიდენტი ლარი დომინიკი, ვინც პროდუქციის დაგეგმარებას კურირებს, ამბობს, რომ ჰიბრიდულ ავტომობილებთან შედარებით, ისეთ ელექტრომობილებს, როგორიც ”ლიფია”, ფულის დაზოგვის გაცილებით სოლიდური პოტენციალი აქვთ, რაც ბაზარზე მათ უზარმაზარ უპირატესობას ჰპირდება.

”ჩვენ დარწმუნებულები ვართ, რომ ”ლიფის” ექსპლუატაცია ავტომფლობელებს ჰიბრიდეზე გაცილებით იაფი დაუჯდებათ”, - ამბობს დომინიკი და დასძენს, რომ ჰიბრიდული ავტომობილები კარგად შემუშავებული ტექნოლოგიებით მზადდება, თუმცა ექსპლუატაციის პარამეტრებით, ისინი ელექტრომობილებს მაინც ვერ გაუწევენ კონკურენციას.

”ლიფს” ხუთი ზრდასრული ადამიანის გადაყვანა შეუძლია, აკუმულატორების სრული დამუხტვით კი მისი სვლის მარაგი 160 კილომეტრს აღწევს, რაც ელექტრომობილებისთვის შესანიშნავი მაჩვენებელია. პლაგ-ინ სისტემა ავტომობილის საყოფაცხოვრებო ელექტროქსელიდან დამუხტვის საშუალებას იძლევა. ამასთან, რეგენერაციული მუხრუჭების მეშვეობით, აკუმულატორების ენერგიის მარაგი დამუხრუჭების დროსაც ივსება.

”ლიფის” სუსტი მხარე ისაა, რომ აკუმულატორების სრულად დამუხტვას (საყოფაცხოვრებო ქსელიდან) 8 საათი სჭირდება. თუმცა, ამ მინუსს ის გარემოება აბათილებს, რომ აკუმულატორების 80 პროცენტით შესავსებად, ნახევარი საათიც საკმარისია (ეს კი 120 კილომეტრია).

აკუმულატორების გარეშე, ”ნისან ლიფის” ღირებულება 20 000 ევროზე ნაკლები იქნება. ჯერ საბოლოოდ დადგენილი არაა, მაგრამ აკუმულატორებს კომპანია ალბათ ლიზინგით გასცემს და მის საფასურს მყიდველი ექსპლუატაციის პროცესში, მოხმარებული ენერგიის და მომსახურების საფასურთან ერთად დაფარავს. ეს კი ელექტრომობილს კიდევ უფრო მიმზიდველს გახდის.

”ნისან ლიფის” გაყიდვები იაპონიაში, აშშ-სა და ევროპაში მერმის დაიწყება.

”აუდი” ახალ ”კვატროს” გამოუშვებს

Audi Quattro

6 აგვისტო

”ოთხ რგოლში” ახალი ”კვატროსთვის” საუკეთესო მასალად კუპე A5 მიაჩნიათ
Ur-კვატრო და მისი სარბოლი ვერსია

გერმანული კომპანია ”აუდი”, დაარსებიდან 100 წლის იუბილეს აღნიშნავს. საზეიმო ცერემონიებსა და სხვადასხვა ღონისძიებებში, რომლებსაც კომპანია იუბილეს აღსანიშნავად ატარებს, მისი წარსულის არაერთი ლეგენდარული ავტომობილი მონაწილეობს, რომელთა შორისაც, ერთ-ერთი ყველაზე გამორჩეული, რალის მსოფლიო ჩემპიონატის ტრიუმფატორი და ტურბო ერას ერთ-ერთი პირველი მერცხალი ”აუდი კვატროა”.

ახლახანს ცნობილი გახდა, რომ ლეგენდარული სახელი კვლავ დაბრუნდება ”ოთხი რგოლის” საწარმოო პროგრამაში - მერმის, ”აუდი” თანამედროვე ”კვატროს” წარმოებას დაიწყებს. გერმანული კომპანიის წარმომადგენლები ამბობენ, რომ Ur-კვატროს ანუ, ორიგინლურ კვატროს ყველაზე მატად კუპე A5 ჰგავს და ალბათ, ახალი კვატროც მის ბაზაზე დამზადდება.

”კვატროს” წარმოებისას, ”აუდი” ბევრ ახალ ტექნოლოგიასა და მსუბუქ მასალებს გამოიყენებს, რომელთა წყალობითაც, ავტომობილის წონა 1 400 კილოგრამზე ნაკლები უნდა იყოს. ეს კი იმას ნიშნავს, რომ ის სტანდარტულ A5-ზე 240 კილოგრამით ნაკლები იქნება. წონის შესამცირებლად, ”აუდი” ავტოსპორტში აპრობირებულ ტექნოლოგიებს გამოიყენებს. მაგალითად, შუშას პოლიკარბონატი შეცვლის, ფოლადის დეტალებს კი ალუმინისა ჩაენაცვლება. ასე განსაჯეთ, ჰაერის კონდიცირების სისტემაც კი მცირეგაბარიტიანი და მსუბუქი იქნება.

”კვატრო” მსუბუქი მასალისგან დამზადებულ 19 ან 20-დუიმიან ბორბლებზე დადგება, მას კერამიკული მუხრუჭები და აქტიური უკანა სპოილერი ექნება, რომელიც ავტომობილის სიჩქარის შესაბამისად იცვლის დახრის კუთხეს. რაც შეეხება საკიდარს, ის მაგნიტური, თვითრეგულირებადი უნდა იყოს და მახასიათებლებს გზის საფარისა და მოძრაობის რეჟიმის შესაბამისად შეიცვლის.

რა თქმა უნდა, მთელი ეს ავლა-დიდება, შესაბამისი აგრეგატების გარეშე მნიშვნელოვნად გაფერმკრთალდება. ”აუდის” კი შესანიშნავი ძრავების (თუნდაც დიზელის) წარმოების დიდი გამოცდილება აქვს და რა თქმა უნდა, ახალი ”კვატროსთვის” საუკეთესო აგრეგატების შერჩევა არ გაუჭირდება.

ახალი ”კვატროს” საბაზო აგრეგატი შეიძლება გახდეს 4.2-ლიტრიანი V8, რომელსაც აუცილებლად დაემატება ტურბოკომპრესორი (კვატრო ტურბოს გარეშე რა კვატრო იქნება). მაგრამ თანამედროვე ტენდენციის გათვალისწინებით (ნაკლები ცილინდრი, მეტი სიმძლავრე), უფრო რეალური წყვილტურბოიანი V6 უნდა იყოს, რომლის სიმძლავრეც 425 ცხენის ძალაა. არანაკლებ რეალურია ოთხცილინდრიანი, ასევე წყვილტურბოიანი 2.0-ლიტრიანი ძრავი, რომლის სიმძლავრეც 300 ცხენის ძალას აღწევს.

”კვატროსთვის” გამოსადეგ ძრავებზე მარჩიელობა დიდხანს შეიძლება... გერმანული გამოცემა ”აუტო მოტორ უნდ შპორტი” არც ჰიბრიდული აგრეგატების გამოყენების შესაძლებლობას უგულვებელყოფს. ჟურნალის ვარაუდით, არ უნდა გაგვიკვირდეს, თუ თანამედროვე კვატროს თითო ბორბალს თითო ელექტროძრავი მოემსახურება, რომელთა მეშვეობითაც, ელექტროგაწევაზე მუშაობისას, ავტომობილის სვლის მარაგი 30 კილომეტრი უნდა იყოს. და როდესაც აკუმულატორების განმუხტვის ხარისხი გარკვეულ ზღვარს მიაღწევს, მართვის სისტემა ავტომსტურად აამოქმედებს მცირელიტრაჟიან შიდაწვის ძრავს, რომელთან დაკავშირებული გენერატორიც აკუმულატორებს მოძრაობისასვე დამუხტავს.

სავარაუდოდ, ახალი კვატროს წარმოება მერმის უნდა დაიწყოს, როდესაც Ur-კვატროს 30 წელი შეუსრულდება. რა თქმა უნდა, გამორჩეული ავტომობილი შეზღუდული რაოდენობით დამზადდება, მისი ფასი კი, ისევე როგორც ტექნიკურ-დინამიკური მახასიათებლები, S5-ისა და R8-ს ფასებს ორის ჩაეტევა.