როლს როისმა ჩინელებს დაგრძელებული გოსტი უჩვენა

Rolls-Royce Ghost gets on the Procrustean Bed: LWB Model Revealed in Shanghai

26 აპრილი

შანჰაის საავტომობილო შოუზე შედგა „როლს როისის „პატარა“ მოდელ გოსტის გრძელბაზიანი ვერსიის პრემიერა, ავტომობილისა, რომელზეც ინგლისური კომპანია ჩინეთის ბაზარზე დიდ იმედებს ამყარებს. მის წარმოებას როლსი წელსვე დაიწყებს და მას საბაზო გოსტზე დაახლოებით 20 პროცენტით ძვირად გაჰყიდის. სხვათა შორის, როლს როისის ისტორიაში, ეს პირველი ავტომობილია, რომლის პრემიერაც აზიაში ჩატარდა.

მწარმოებლის განცხადებით, ესაა ავტომობილი, რომელიც „იმ მყიდველისთვისაა განკუთვნილი, რომელსაც ფართე და კომფორტული ავტომობილი სჭირდება, თუმცა არც საბაზო გოსტის დინამიზმის უნიკალური ბალანსი და ზომიერება ეთმობა“. ამ ავტომობილს წელს შეზღუდული რაოდენობით დაამზადებენ, მერმისიდან კი მისი წარმოება სრული ტემპით დაიწყება.

გრძელბაზიანი ვერსიის ბორბლებს შორის ბაზა 170 მილიმეტრით დაგრძელდა, რისი წყალობითაც, უკანა სავარძლებზე მჯდარ მგზავრთა ფეხებისთვის ადგილი მნიშვნელოვნადაა გაზრდილი. გარდა ამისა, ავტომობილს პანორამული გამჭვირვალე სახურავიც აქვს. საერთო ჯამში, გრძელიგოსტის სიგრძემ 5.40 მეტრს მიაღწია და ამგვარად, ის მოკლებაზიანი ფანტომისას დაუახლოვდა. ვიზუალურად, დაგრძელება უფრო დიდი ზომის უკანა კარებს დაეტყო.

კაპოტქვეშ ისევ 6.6-ლიტრიანი V12 ტურბოძრავია განლაგებული, რომელიც სტანდარტულ გოსტზე და რომელიც 570 ცხენის ძალას და 780 ნიუტონმეტრს იძლევა. ამასთან, მაბრუნი მომენტის მაქსიმუმს, ეს აგრეგატი მუხლა ლილვის სულ რაღაც, 1 500 ბრ/წთ-ზე ავითარებს. როლს როისის მონაცემებით, დაგრძელებულ გოსტს ადგილიდან 100 კმ/სთ-ის აკრეფა 5 წამში შეუძლია.

გრძელბაზიანი გოსტი საზრიან საკიდარზე დგას, რომელიც ოთხივე ბორბალს დამოუკიდებლად აკონტროლებს და მუდმივად ახერხებს მართვადობასა და კომფორტს შორის ბალანსის დაცვას. საკიდარის ელექტრონულ სისტემას მრავალი სენსორი ემსახურება, რომლებიც საგზაო პირობებს, გადაადგილების სიჩქარეს და სხვა პარამეტრებს აკონტროლებენ.

ეს ავტომობილი, პირველ რიგში, აღმოსავლეთ აზიის ქვეყნებისთვისაა განკუთვნილი, სადაც გრძელბაზიან ავტომობილებზე დიდი მოთხოვნაა. განსაკუთრებული აქცენტი კი ჩინეთზე კეთდება, რომელიც უკვე მსოფლიოს უდიდესი საავტომობილო ბაზარია და სადაც თითქმის ყველა დიდ ავტოკომპანიას უფრო მეტი ავტომობილი ეყიდება, ვიდრე შინაურ ბაზარზე. ჩინეთში დაგრძელებული გოსტი 5.118 მილიონი იუანი „ეღირება, რაც 548 000 ევროსა და 784 000 დოლარის ტოლფასია.

„მაკლარენი“ მომავალში ელექტრულ ავტომობილსაც გამოუშვებს

McLaren Plans Battery-Based Model for the Future

26 აპრილი

„მაკლარენს“ თავის უახლეს სუპერ ავტომობილ MP4-12C-ს მიწოდება ჯერ არ დაუწყია, თუმცა აცხადებს, რომ ყოველწლიურად, ბაზარზე თითო ახალ ავტომობილს გამოუშვებს. უფრო მეტიც, იგეგმება ისეთი ავტომობილის გამოშვებაც, რომელიც მთლიანად, ან ნაწილობრივ, აკუმულატორებში დაგროვილი ენერგიით იმუშავებს.

ამ ნაბიჯისკენ კი ინგლისურ კომპანიას საწვავის ეკონომიის და გამონაბოლქვის ახალი, გამკაცრებული სტანდარტები უბიძგებს, რომელთა მოთხოვნითაც, ავტომწარმოებელს ევალება, რომ მის მიერ წარმოებული ავტომობილების გასაშუალებული მონაცემები ამ სტანდარტებს შეესაბამებოდეს.

„მაკლარენის“ მმართველ დირექტორ ენტონი შერიფის განცხადეით, მისი კომპანია მომავალშიც მხოლოდ ორადგილიან სუპერ ავტომობილებს გამოუშვებს და მათი წარმოებისას, უხვად გამოიყენებს ფორმულა ერთში შემუშავებულ ტექნოლოგიებს. ამ ტექნოლოგიათაგან ერთ-ერთი გამორჩეული, კარბონის კომპოზიტისგან შასის ცალკეული ელემენტების და მთლიანად, მონოკოკური შასის წარმოებაა, რაშიც უოკინგელებს უკვე 30-წლიანი გამოცდილება დაუგროვდათ.

შერიფის თქმით, MP4-12C-ს ისეთი ტემპერამენტი აქვს, რომ აჩქარებისას, „სახეზე კანს გაგაძრობთ“. ასეთი შედარება გასაკვირი არ იქნება, თუ გავითვალისწინებთ, რომ ავტომობლი აღჭურვილია საკუთარი წარმოების 3.8-ლიტრიანი V8, წყვილტურბოიანი ძრავით, რომელიც 600 ცხენის ძალას იძლევა.

შერიფს კარგად ესმის, რომ მისი კომპანიის ავტომობილების ეკონომიურობისა და გამონაბოლქვის ახალი სტანდარტების ჩარჩოში მოქცევა ძალიან ძნელი იქნება. თუმცა დასძენს, რომ ისეთი მცირე ზომის კომპანიები, როგორიც „მაკლარენია“, ამ მხრივ, მცირე შეღავათებით ისარგებლებენ. და მაინც, ინგლისური კომპანია უკვე მუშაობს იმაზე, რომ მისმა ავტომობილებმა გარემო ნაკლებად დააბინძუროს.

ავტომობილების ეკონომიურობის გასაუმჯობესებლად საუკეთესო გზა, ავტომობილების წონის შემცირება და ტურბოკომპრესორიანი ძრავების შემუშავება-დახვეწაა. პარალელურად, აუცილებელი იქნება ჰიბრიდული და ელექტრული ტექნოლოგიების დანერგვა.

„ახალ კანონს არ აღვიქვამთ, როგორც საშიშროებას. ის ჩვენთვის უფრო გამოწვევაა, რომელსაც სიამოვნებით მივიღებთ და ენთუზიაზმით მოვეკიდებით“, - დასძენს შერიფი.

ელექტრომობილებმა შეჯახებაზე გამოცდები ჩააბარეს

Chevrolet Volt and Nissan Leaf Score Top Ratings in IIHS Crash Test

26 აპრილი

აშშ-ის ავტომაგისტრალებზე უსაფრთხოების სადაზღვევო ინსტიტუტმა (IIHS), ორ ელექტრომობილს - „ნისან ლიფს“ და „შევროლე ვოლტს“ შეჯახებაზე ტესტები (ქრეშ ტესტები) ჩაუტარა, რომლის შედეგადაც, ორივე ავტომობილმა, წინიდან, გვერდიდან და უკნიდან შეჯახებისას, ასევე გადაყირავებისას, დაცულობის საუკეთესო უნარი გამოავლინა.
ყველანაირი ტესტის დროს, ორივე ავტომობილმა მაქსიმალური შეფასება - 4 ქულა დაიმსახურა. ამასთან, ორივე ავტომობილის საბაზო კომპლექტაციაში შედის სტაბილიზაციის სისტემა, რაც უმაღლესი შეფასებისთვის აუცილებელი პირობაა. ტესტებმა ასევე გამოავლინა, რომ ორივე ავტომობილი უსაფრთხოების სისტემებით იმავე დონეზეა აღჭურვილი, როგორც ჩვეულებრივი, შიდაწვისძრავიანი ავტომობილები.
„ამ ორ ავტომობილის ბორბლებს განსხვავებული აგრეგატები ამოძრავებს, თუმცა „ვოლტისა“ და „ლიფის“ უსაფრთხოება იმავე დონეზეა, რომელზეც ჩვეულებრივ ავტომობილებზე, რომლებიც ჩვენგან უმაღლეს შეფასებებს იმსახურებს“, - ამბობს ინსტიტუტის უფროსი ადმინისტრატორი ჯოი ნოლენი.
„შევროლე ვოლტი“ სუფთა ელექტრომობილი არაა და მას პლაგ-ინ ჰიბრიდების კლასს მიაკუთვნებენ, რადგან ამ ავტომობილს, ელექტროძრავის გარდა, შიდაწვის ძრავიც ემსახურება. ოღონდ, წამყვანი მაინც ელექტროძრავია, შიდაწვისა კი ელექტროენერგიის გამომუშავებას ემსახურება. მისგან განსხვავებით, სუფთა ელექტრომობილია „ნისან ლიფი“, რომელიც მხოლოდ ლითიუმ-იონურ აკუმულატორებში დაგროვილი ენერგიით გადაადგილდება. და თუ „ლიფის“ სვლის სიშორე მართვის სტილზეა დამოკიდებული, „ვოლტს“ ერთი სრული გაწყობით (სავსე ავზით და სრულად დამუხტული აკუმულატორებით) დაახლოებით 1 600 კილომეტრის გავლა შეუძლია.
ნოლენი ხაზს უსვამს, რომ ელექტრომობილებსაც და ჰიბრიდებსაც უსაფრთხოებაზე შემოწმება ზუსტად იმავე მეთოდოლოგიით უტარდებათ, როგორითაც ჩვეულებრივ ავტომობილებს. მთავარი ისაა, რომ სტანდარტით დადგენილი სიჩქარით შეჯახებისას, სალონში მყოფთა უსაფრთხოება დაცული იყოს. უსაფრთხოების ღვედებმა და აირბალიშებმა ადამიანები სალონში არსებულ საგნებთან ძლიერი შეჯახებისგან უნდა დაიცვას.

პირისპირ შეჯახების ტესტი მანქანის 65 კმ/სთ სიჩქარით მოძრაობისას ტარდება. გვერდითა შეჯახების ტესტის სიჩქარე 50 კმ/სთ-ია. ამასთან, გამოსაცდელ მანქანას პიკაპი, ან უგზოობის მძიმე მოდელი ეჯახება. უკნიდან დაჯახების ტესტისას, გაჩერებულ საცდელ ავტომობილს, სპეციალური მოძრავი ბლოკი, 32 კმ/სთ სიჩქარით ეჯახება. გადაყირავებაზე ტესტიც სპეციალური ბლოკით ტარდება, რომელიც საცდელ ეგზემპლარზე რამდენჯერმე მეტს იწონის და მას სახურავზე გარკვეული წნევით აწვება...

ელექტრომობილი პაიკს პიკს შეუტევს

Unmodified Nissan Leaf entered in Pikes Peak Hill Climb

26 აპრილი

ელექტრომობილი „ნისან ლიფი“, რომელმაც ევროპისა და მსოფლიოს წლის საუკეთესო ავტომობილის წოდებები მიიღო, ლეგენდარულ ამერიკულ რბოლაში - პაიკს პიკზე ასვლაში მიიღებს მონაწილეობას. ოღონდ, სამთო რბოლის მონაწილეთაგან განსხვავებით, ის ყოველგვარი მოდიფიკაციის გარეშე დადგება სტარტზე.

როგორც წესი, პაიკს პიკის მონაწილე მანქანები რადიკალურადაა ხოლმე შეცვლილი. იმდენად, რომ საბაზო ვერსიასთან საერთო პრაქტიკულად არაფერი აქვთ ხოლმე. თუმცა, ეს იმისათვის კეთდება, რომ რბოლისას მაქსიმალურად უკეთესი შედეგი დააფიქსირონ. „ნისან ლიფის“ შემთხვევაში კი, მთავარი მიღწევა, უმძიმეს რბოლაში მონაწილეობა იქნება.

პაიკს პიკზე ელექტრომობილის საჭეს მსგავს რბოლებში გამოცდილი პილოტი, ჩად ჰორდი მიუჯდება, რომელიც ამერიკაში მეტად პოპულარულ სერია TORC-ში (პიკაპის კლასის ავტომობილებით ქროსი) მონაწილეობს.

ცნობისათვის, ელექტრომობილი „ნისან ლიფი“ 109-ცხენისძალიანი ელექტროძრავითაა აღჭურვილი, რომელიც ენერგიას ლითიუმ-იონური ელემენტების ბლოკისგან ღებულობს. მათი ტევადობა საკმარისია იმისათვის, რომ ავტომობილმა ერთი სრული დამუხტვით, 160 კილომეტრი გაიაროს, მისი მაქსიმალური სიჩქარე კი 145 კმ/სთ-ია.

სხვათა შორის, „ნისან ლიფი“ ერთადერთი ელექტრომობილი არაა, რომელსაც პაიკს პიკის ურთულესი აღმართი აუვლია. ელექტრული ძრავით აღჭურვილი ავტომობილები ამ რბოლაში ბოლო წლებში მუდმივად ასპარეზობენ. შარშან ბაგის ტიპის 268-ცხენისძალიანი ელექტროპროტოტიპით, იაპონელმა უკიო ჰანავამ 20-კილომეტრიანი დისტანცია 13 წუთსა და 17.575 წამში გაიარა. ეს კი წინა წლის მაჩვენებელზე დაახლოებით 93 წამით, ელექტრომობილების წინა რეკორდზე კი (რომელიც 2003 წელს ჯერი ანსერმა დაამყარა) 65 წამით უკეთესი შედეგია.

პაიკს პიკის რბოლა მეორე უძველესია ამერიკაში (მასზე ძველი მხოლოდ ინდი 500-ია). ის პირველად 1916 წელს ჩატარდა. რბოლის დისტანცია 19.99 კილომეტრია, სტარტსა და ფინიშს შორის სიმაღლეთა სხვაობა 1 423 მეტრს აღწევს. სულ კი 156 მოსახვევია გასავლელი.

ბოლო წლებში, პაიკს პიკზე ბადალი არ ჰყავს იაპონელ ნობუჰირო ტაძიმას, ვინც რბოლას სულ სხვადასხვა მარკის ავტომობილებით იგებს. შარშან მან ეს „სუძუკის“ წარმოების პროტოტიპით შეძლო და დისტანცია 10 წუთსა და 11.490 წამში გაიარა. მეორე შედეგი, საკუთარი ფორმულით მოასპარეზე პოლ დალენბახს ჰქონდა, მესამეზე კი „ჰიუნდაის“ პროტოტიპით მოასპარეზე რის მილენი გავიდა.

სახალხო „ფოლკსვაგენ ხოჭო“ სპორტული გახდა

2012 Volkswagen Beetle: All-New Bug Grows up

25 აპრილი

ამ მანქანაზე სახალხოს თქმა მას შემდეგ აღარ შეიძლება, რაც გერმანულმა კომპანიამ მისი მეორე თაობის ვერსია გამოუშვა. ვოლფსბურგელებს პირველად 60 წელი დასჭირდათ იმისათვის, რომ „ახალი ხოჭო“ გამოეშვათ. ახლა კი ის 13 წელიწადში შეცვალეს (სხვათა შორის, თუ პირველი ხოჭო 21.5 მილიონი ცალი გაიყიდა, მეორეს მილიონზე ოდნავ მეტი მყიდველი გამოუჩნდა). რა თქმა უნდა, თანამედროვე ავტომობილების სიცოცხლის ხანგრძლივობა ამაზე გაცილებით მცირეა და ამ ავტომობილის შემცვლელსაც, ავტოსამყარო უკვე რამდენიმე წელია, ელის.

მოლოდინი მას შემდეგ გაძლიერდა, რაც ექვსი წლის წინ, „ფოლკსვაგენმა“ კონცეპტუალური „რაგსტერი“ გვიჩვენა. ეს ავტომობილი აგრესიული, სპორტული გარეგნობით გამოირჩეოდა და მაშინ ბევრმა ივარაუდა, რომ შემდეგი „ხოჭო“ სწორედ სპორტული იქნებოდა. სხვათა შორის, მარკეტოლოგები ალბათ სამართლიანად მიიჩნევდნენ, რომ „ხოჭოს“ გასპორტულება უფრო გამოადგებოდა, ვიდრე სინაზე, რის გამოც, მას ხშირად „ქალების ავტომობილადაც“ მოიხსენიებენ. ამან კი ძლიერი სქესის ავტომოყვარულთა შორის, მას ღირსება შეულახა. შესაბამისად, „ახალი ხოჭო“ დიდი პოპულარობით ვერ სარგებლობდა.

და აი, შანჰაისა და ნიუ იორკის საავტომობილო შოუებზე, ასევე ქალაქ ბერლინში მოწყობილ სპეციალურ პრესკონფერენციაზე, გერმანულმა გიგანტმა კიდევ ერთი ახალი „ხოჭო“ წარმოადგინა, ამჯერად სერიული წარმოებისთვის გამზადებული. ოღონდ, მას სახელში სიტყვა „ახალი“ ჩამოაშორა. მიმომხილველთა მოლოდინი გამართლდა - ახალი ავტომობილი გარეგნულად გაცილებით სჯობს წინას. მას დაბალი სახურავი აქვს ყოველგვარი დაქანების გარეშე. ამის წყალობით, მის უკანა სავარძელზე მსხდომთა თავებისთვის, ადგილი საგრძნობლადაა გაზრდილი. სპორტულობასვე ხაზს უსვამს დაბერილი საბორბლე თაღები და მსხვილი უკანა საყრდენი. ასევე, ამ თაღებში ჩამჯდარი უზარმაზარი, 19-დუიმიანი ბორბლები.

მოკლედ და კონკრეტულად, ამ ავტომობილის გარეგნობის დახასიათება ასე შეიძლება: უფრო დიდი, ზრდასრული და უნისექსუალური. სწორედ რომ უნისექსუალური - „ფოლკსვაგენის“ მთავარ დიზაინერ ვალტერ და სილვას მთავარი მოთხოვნა გუნდისადმი, რომელიც ამ ავტომობილის სტილზე მუშაობდა, სწორედ ეს იყო. ახალი ავტომობილი მიმზიდველი უნდა ყოფილიყო ორივე სქესის მყიდველისთვის. ასე იქნება თუ არა, ამას მომავალი გვიჩვენებს, როდესაც სტატისტიკოსები გაყიდვებს ყველა რაკურსით განიხილავენ.

სადადაა გაწყობილი ინტერიერი, სადაც სპორტულობის კვალს პრაქტიკულად ვერ აღმოაჩენთ - ასეთად კარბონის კომპოზიტისგან დამზადებული ცალკეული უმნიშვნელო დეტალები არ გამოდგება. აქ ვეღარ ნახავთ უზარმაზარ წინა პანელს, რომელიც წინა მოდელზე მკვეთრად დახრილ საქარე შუშას ბოლომდე „მიჰყვებოდა“. უბრალო სავარძლები, საჭის სამწკირიანი რგოლი და „ფოლკსვაგენის“ და „აუდის“ მოდელებისგან მიღებული სხვადასხვა დეტალები და მაჩვენებლები - მთელი ეს მოკაზმულობა, მანქანის გარეგნობას არ შეეფერება. თუმცა, ეს აუცილებელი არცაა. მთავარია, რომ სალონში ყველაფერი ფუნქციურობასაა დაქვემდებარებული.

ავტომობილის გაბარიტებია: სიგრძე 4 278 მილიმეტრი, სიგანე 1 808 მილიმეტრი, სიმაღლე 1 486 მილიმეტრი და ბორბლებს შორის ბაზა - 2 537 მილიმეტრი. სიმაღლის გარდა, ყველა პარამეტრით, მესამე თაობის „ხოჭო“ წინამორბედზე დიდია (შესაბამისად,152 და 84 მილიმეტრიტ). ასევე გაზრდილია როგორც ბაზა, ასევე წინა და უკანა ბორბლების კვლების სიგანე, რისი წყალობითაც, ინტერიერის მოცულობაც გაიზარდა. 209-დან 310 ლიტრამდე არის გაზრდილი საბარგულის მოცულობა.

წინამორბედის დარად, ახალ ავტომობილზეც ძრავი წინაა განლაგებული და მას მოძრაობაში წინა ბორბლები მოჰყავს. რაც შეეხება ძრავებს, აქ არჩევანი დიდია. მყიდველს ბენზინის და დიზელის აგრეგატების ფართო არჩევანს შესთავაზებენ. ამასთან, შეთავაზებული აგრეგატების ტიპი, კონკრეტული ბაზრის მყიდველთა თავისებურებაზეა დამოკიდებული.

მაგალითად, ამერიკელ მყიდველს ბენზინის (TSI) და დიზელის (TDI) 2.0-ლიტრიან აგრეგატებს შესთავაზებენ. ამასთან, ორივეს ტურბოკომპრესორი ემსახურება. პირველი აგრეგატის სიმძლავრე 200 ცხენის ძალა, მეორისა კი 140 ცხენის ძალაა. სამაგიეროდ, დიზელს მაგისტრალზე მოძრაობისას, 6.0 ლიტრზე ნაკლები საწვავი ჰყოფნის, ქალაქში კი ხარჯი 7.0 ლიტრზე მეტია. გაცილებით უარესი ეკონომიურობით გამოირჩევა ბენზონის ძრავი. ორივე აგრეგატთან შესაწყვილებლად, 6-საფეხურიანი მექანიკური და ავტომატური კოლოფებია განკუთვნილი.

ყველაზე დიდლიტრაჟიანი, თუმცაღა საკმაოდ მოძველებულია 2.5-ლიტრიანი ხუთცილინდრიანი ატმოსფერული ძრავი, რომელიც მხოლოდ 170 ცხენის ძალას იძლევა და არც შესაშური ეკონომიურობით გამოირჩევა. ბენზინის აგრეგატებს შორის ასევე გვხვდება 1.2-ლიტრიანი TSI 105 ცხენის ძალით, 1.4-ლიტრიანი TSI 160 ცხენის ძალით და 2.0-ლიტრიანი TSI 200 ცხენის ძალით. დიზელის აგრეგატების გამაში კი ორლიტრიანის გარდა, ორი 1.6-ლიტრიანი აგრეგატიც შედის, რომელთა სიმძლავრეც 105 და 140 ცხენის ძალაა.

„ფოლკსვაგენის“ განცხადებით, ყველაზე ეკონომიურად საწვავს ის „ხოჭო“ მოიხმარს, რომელიც დიზელის 1.6-ლიტრიანი, 105-ცხენისძალიანი აგრეგატით, სისტემა სტოპ/სტარტით და კინეტიკური ენერგიის რეგენერაციის სისტემითაა აღჭურვილი. ასეთი „ხოჭო“ ას კილომეტრს (კომბინირებული რეჟიმით მოძრაობისას) 4.3 ლიტრი საწვავით გაივლის, ყოველ კილომეტრზე კი გარემოს მხოლოდ 112 გრამი ნახშირორჟანგით დააბინძურებს.

ევროპასა და ჩრდილოეთ ამერიკაში, მესამე თაობის „ხოჭოზე“ შეკვეთების მიღებას ვოლფსბურგელები ფრანკფურტის ავტო შოუს შემდეგ დაიწყებენ, თუმცა მათ მიწოდებას მომავალი წლიდან შეუდგებიან. ჯერჯერობით უცნობია ახალი ავტომობილის ღირებულება, თუმცა სავარაუდოდ, ის „ფოლკსვაგენ შიროკოზე“ 20-30 პროცენტით ძვირი ეღირება.

„შევროლე ვოლტი“ ერთი სავსე ავზით 1 600 კილომეტრს გადის

Chevrolet Volt Could Reach 1,000 Miles

25 აპრილი

„ჯენერალ მოტორსმა“ გამოაცხადა, რომ მის მიერ გამოშვებულ, სვლის გაზრდილი სიშორის მქონე პლაგ-ინ ჰიბრიდ „შევროლე ვოლტს“, აკუმულატორების ერთი სრული დამუხტვით და ერთი სავსე ავზით, 1 600 კილომეტრის გავლა შეუძლია. ამერიკულმა კომპანიამ, შინაურ ბაზარზე, გაყიდვების დაწყებიდან პირველ ოთხ თვეში, უკვე 1 210 „ვოლტი“ გაჰყიდა. გაყიდული ავტომობილების მიერ ნაჩვენები შედეგი კი მწარმოებლისთვისაც სიურპრიზი აღმოჩნდა.

„პირველი მყიდველების მაგალითზე შეიძლება ვთქვათ, რომ ავზის სრულად ავსებამდე, „ვოლტს“ 1 600 კილომეტრის გავლა შეუძლია. ამ ეტაპზე, მასზე მოთხოვნა ძალიან მაღალია. იმდენად მაღალი, რომ შეკვეთების დაკიმაყოფილებას ძლივს ვასწრებთ“, - ამბობს „შევროლე ვოლტის“ საავტომობილო ხაზის დირექტორი ტონი პოსავაცი.

მხოლოდ ელექტროძრავით გადაადგილებისას, „შევროლე ვოლტის“ სვლის სიშორე მხოლოდ 64 კილომეტრია, რასაც 16 კილოვატსაათი ტევადობის ლითიუმ-იონური ელემენტების ბლოკი უხრუნველყოფს. ძრავი 149 ცხენის ძალას და 370 ნიუტონმეტრს გამოიმუშავებს. ეს კი საკმარისია იმისათვის, რომ ავტომობილმა ადგილიდან 100 კმ/სთ სიჩქარე 9 წამში აკრიფოს, მისი მაქსიმალური სიჩქარე კი 160 კმ/სთ-ს აღწევს.

აკუმულატორების დამუხტვა სახლის შტეპსელიდან შეიძლება. ამასთან, 240-ვოლტიანი შტეპსელიდან დამუხტვას 4 საათი სჭირდება, მაგრამ თუ ძაბვა ორჯერ ნაკლებია, მაშინ დრო 2.5-3-ჯერ იზრდება. როდესაც კომბინირებული რეჟიმით გადაადგილდება, ავტომობილი 90 კილომეტრს ერთი გალონი (3.785 ლიტრი) საწვავით გადის (შიდაწვის ძრავი ელექტროგენერატორს ამუშავებს), რაც 100 კილომეტრზე 3.9 ლიტრის ტოლფასია. მარტო ელექტროძრავით მოძრაობისას, ხარჯი (100 კმ-ზე) 2.5 ლიტრის ექვივალენტურია (იგულისხმება, რომ აკუმულატორებში დაგროვილი ელექტროენერგია თბოსადგურშია მიღებული). და თუ ელექტროძრავი შიდაწვის ძრავისა და გენერატორის მიერ გამომუშავებულ ენერგიას იყენებს, მაშინ საწვავის ხარჯი (100 კმ-ზე) 6.3 ლიტრს აღწევს.

ზემოთ მოყვანილი სვლის სიშორის - 1 600 კილომეტრის უმეტესი წილი შერეული რეჟიმით გადაადგილებაზე მოდის. ანუ, ამ დროს, „ვოლტი“ შეიძლება სხვა ეკოლოგიურად სუფთა ავტომობილებზე უკეთესი ეკონომიურობით და სუფთა გამონაბოლქვით არც კი გამოირჩეოდეს.

სამაგიეროდ, ის ძალიან ძვირია: მისი საბაზო ფასი 41 000 დოლარია, თუმცა ფედერალური შეღავათების გათვალისწინებით, „ვოლტის“ ფასი (ამერიკაში) 33 500 დოლარამდე ჩამოდის.

„რენო“ ელექტრულ „ზოის“ ბესტსელერად აქცევს

Renault Vows to Make Zoe a Best-Seller

25 აპრილი

ერთ-ერთი მთავარი მიზეზი, რაც ელექტრომობილების პოპულარიზაციას აფერხებს, მათი სიძვირეა. მალე „რენო“ ბაზარზე ოთხ ელექტრომობილს გამოიტანს და იმედოვნებს, რომ მათი მეშვეობით, ამ ტიპის ავტომობილებისადმი მყიდველთა დამოკიდბულებას რადიკალურად შეცვლის. უფრო მეტიც, ფრანგული კომპანიის მარკეტოლოგები დარწმუნებულნი არიან, რომ მათი სუბკომპაქტური ჰეჩბეკი „ზოი“ თავიდანვე პოპულარული გახდება.

ამ ოპტიმიზმის საფუძველს კი „ზოის“ დაბალი ფასია. ის ბაზარზე მერმისს გამოჩნდება და ევროპაში 15 000 ევროს ფარგლებში ეღირება. დაახლოებით იგივე ფასი უნდა ჰქონდეს დიზელის ძრავით აღჭურვილ შემდეგი თაობის „კლიოს“. შედარებისთვის, დღეისათვის ბაზარზე მხოლოდ ერთი სუფთა ელექტრომობილია - „ნისან ლიფი“ და ისიც 31 000 ევრო ღირს.

„ზოის“ სიგრძე 4.10 მეტრია. ის აღჭურვილია ელექტროძრავით, რომელიც 80 ცხენის ძალას და 222 ნიუტონმეტრს გამოიმუშავებს. მაქსიმალური სიჩქარე ხელოვნურადაა შეზღუდული 135 კმ/სთ ნიშნულზე, რაც იმის გამო გაკეთდა, რომ ასე ლითიუმ-იონურ აკუმულატორებში დაგროვილი ენერგია უფრო ეკონომიურად იხარჯება.

ერთი სრული დამუხტვა საკმარისია იმისათვის, რომ ავტომობილმა 160 კილომეტრი გაიაროს, ამისათვის საჭირო ელექტროენერგია კი სულ რაღაც, 2 ევრო დაჯდება (ევროპაში). ეს კი დაახლოებით ხუთჯერ ნაკლებია იმ თანხაზე, რაც იგივე მანძილის გასავლელად საჭირო საწვავის შესაძენად, დიზელისძრავიანი „კლიოს“ პატრონს დასჭირდება.

„რენოს“ განცხადებით, „ზოის“ აკუმულატორების დამუხტვის სამი ტიპი არსებობს: პირველია სტანდარტული, რომლის გამოყენების შემთხვევაშიც, დამუხტვას 6-8 საათი სჭირდება. სწრაფად დამმუხტავით, 10 წუთში აკუმულატორები იმდენად შეივსება, რომ „ზოიმ“ დაახლოებით 60 კილომეტრის გავლა შეძლოს. მესამე ტიპი აკუმულატორების სწრაფ შეცვლას ითვალისწინებს, რასაც დაახლოებით 3 წუთი დასჭირდება.

რა აძლევს ფრანგულ კომპანიას იმის საშუალებას, რომ ელექტრომობილი ასე იაფად გაჰყიდოს? პასუხი მარტივია - აკუმულატორების ლიზინგით გაცემა. ანუ, ავტომობილის ფასში, მისი აკუმულატორების ღირებულება გათვალისწინებული არაა. მათს საფასურს მყიდველი თანდათან, ელექტრომობილის ექსპლუატაციის პროცესში გადაიხდის. ლიზინგის ღირებულება არც ისე ბევრია - თვეში 70 ევრო.

ფრანგული კომპანიის ოპერაციების ხელმძღვანელი პატრიკ პელატა ამბობს, რომ პირველ ხანებში, წლიურად 150 000 „ზოის“ წარმოება იგეგმება. თუმცა წარმოების მოცულობა გაორმაგდება, თუ ბაზარი ამას მოითხოვს. პელატა იმედოვნებს, რომ ასეც იქნება, რადგან თუნდაც ლიზინგის ღირებულების გათვალისწინებით, ელექტრომობილის ექსპლუატაცია, შიდაწვისძრავიან ანალოგებთან შედარებით, გაცილებით იაფი დაჯდება.

ცუდია ის ფაქტი, რომ სვლის მოკრძალებული სიშორის გამო, „ზოი“ ქალაქგარეთ შორეული მგზავრობისთვის არ გამოდგება. თუმცა „რენო“ გვპირდება, რომ ამ ავტომობილის ისეთ ვერსიებსაც გამოუშვებს, რომლებსაც ეს მონაცემი გაზრდილი ექნება. შესაბამისად, ალბათ მისი აკუმულატორების ლიზინგის პირობები შეიცვლება (გაძვირდება).

ელექრომობილებს მხოლოდ საწვავის სიძვირე გააპოპულარულებს

High Fuel Prices to Spark EV Sales Boom

24 აპრილი

მსოფლიოს წამყვანი ავტო მწარმოებლები ასეულობით მილიონ დოლარს ხარჯავენ ელექტრომობილების და მათი წარმოებისთვის საჭირო ტექნლოგიების შესამუშავებლად, შესაბამისი ინფრასტრუქტურის მოსაწყობად და ეკოლოგიურად სუფთა ავტომობილების პოპულარიზაციისთვის. დასავლეთის მაღალგანვითარებული ქვეყნები იმედოვნებენ, რომ ელექტრომობილები მათს ეკონომიკას ნავთობზე ნაკლებად დამოკიდებულს გახდის.

თუმცა, როგორც წამყვან საკონსულტაციო-ანალიტიკურ კომპანია „დელუას“ მიერ ჩატარებულმა გამოკვლევამ აჩვენა, რომ ამ ქვეყნებში მცხოვრებ პოტენციურ მყიდველთა უმეტესობას ნაკლებად აღელვებს პლანეტის ბედი და ისინი ელექტრომობილს მხოლოდ იმ შემთხვევაში შეიძენენ, თუ საწვავის ფასი მნიშვნელოვნად გაძვირდება.

ამ საკითხზე, კომპანიამ მთელ მსოფლიოში 12 000 ავტომფლობელის (აქედან 1 000 ამერიკელი იყო) აზრი შეისწავლა. ჩატარებული ანალიზის შედეგად გამოვლინდა, რომ ამერიკელ გამოკითხულთა 78 პროცენტი ელექტრომობილს მხოლოდ იმ შემთხვევაში შეიძენს, თუ გალონი (3.785 ლიტრი) ბენზინის ფასი 5 დოლარს მიაღწევს.

ელექტრომობილებისადმი ყველაზე მეტი ენთუზიაზმი, ავტომობილის ჩინელმა პოტენციურმა მყიდველებმა გამოავლინეს. ცისქვეშეთში გამოკითხულთა 93 პროცენტი მზადაა, ელექტრომობილი შეიძინოს. იგივეს ევროპელთა 69 პროცენტი და იაპონლთა 48 პროცენტი აპირებს. ამერიკელ გამოკითხულთა შორის კი მხოლოდ 12 პროცენტი არის მზად იმისათვის, რომ ყოველგვარი პირობის გარეშე გადაჯდეს ელექტრომობილზე.

„ბაზარზე ელექტრომობილების მასობრივი ადაპტაციისთვის აუცილებელია, რომ მათი ფასი, შესაბამისი კლასის შიდაწვისძრავიანი ავტომობილების ფასს დაუახლოვდეს. ყოველ შემთხვევაში, ამერიკელები მზად არ არიან იმისათვის, რომ ელექტრომობილების შესაძენად, ზედმეტი იხადონ. რა თქმა უნდა, სახელმწიფოს მხრიდან შეღავათებს დიდი მნიშვნელობა ენიჭება“, - ამბობს „დელუას“ ვიცე აღმასრულებელი კრეიგ ჯიფი.

იმავე გამოკვლევამ აჩვენა, რომ ელექტრომობილების პოტენციურ მყიდველთა უმეტესობას, პირველ რიგში, ამ ტიპის ავტომობილების სვლის მცირე სიშორე არ მოსწონთ. მათი აზრით, მისაღები იქნება, თუ ელექტრომობილები ერთი სრული დამუხტვით, 200-300 კილომეტრის გავლას შეძლებენ. ეს კი თითქმის ორჯერ მეტია ახლანდელი ელექტრომობილების შესაძლებლობებზე. ასევე მნიშვნლობა ენიჭება დამუხტვის დროის შემცირებას, რაც თანამედროვე ტექნოლოგიებით, საკმაოდ ძნელად მიღწევადია.

„ტოიოტა“ ნორმალურ წარმოებას ნოემბერში ან დეკემბერში განაახლებს

Toyota Expects to Resume Normal Production in November or December

23 აპრილი

მართალია, „ტოიოტამ“ თავის ყველა იაპონურ ქარხანაში წარმოება ნაწილობრივ აღადგინა, მაგრამ სრულფასოვანი წარმოების განახლებამდე ჯერ კიდევ შორსაა. ახლახანს კი იაპონურმა კომპანიამ, რომელიც სტიქიის შედეგად, ქვეყნის ავტომწარმოებლებს შორის, ყველაზე მეტად დაზარალდა, გამოაცხადა, რომ მისი სრულფასოვანი ფუნქციონირების აღდგენას რამდენიმე თვე დასჭირდება.

„ტოიოტას“ განცხადებით, მთელი მსოფლიოს მასშტაბით, მისი ყველა მოდელის წარმოების ზრდა ივლისიდან დაიწყება. ნორმალურ რეჟიმში მუშაობას კი მსოფლიოს უდიდესი საავტომობილო კომპანია ნოემბერში ან დეკემბერში განაახლებს.

„გულითადად მოვუბოდიშებ ყველას, ვინც ჩვენს მიერ წარმოებული ავტომობილის შეძენა გადაწყვიტა, მაგრამ სასურველ ავტომობილს დიდი ხნის დაგვიანებით მიიღებს. ახლა ის მაინც შეგვიძლია, რომ დილერებს ვუთხრათ, რამდენად გვიანდება წარმოების განახლება, რაც მათ კლიენტებთან ურთიერთობისას დაეხმარება. ამჟამად, მათ ამის საშუალება არ აქვთ, რაც საქმეს ძლიერ ურთულებთ. მათ შექმნილი სიტუაციის შესახებ, გარკვეული პასუხის გაცემის საშუალება არ ჰქონდათ“, - ამბობს „ტოიოტას“ მთავარი აღმასრულებელი აკიო ტოიოდა.

ამჟამდ „ტოიოტას“ იაპონური საწარმოები თავიანთი შესაძლებლობების 50 პროცენტითაა დატვირთული, რაც ელექტროენერგიის და მაკომპლექტებლების დეფიციტის შედეგია. მხოლოდ 30 პროცენტითაა დატვირთული ამერიკული ქარხნები, რომლებსაც მაკომპლექტებლების მარაგი ამოწურვაზე აქვთ.

იაპონური კომპანია აცხადებს, რომ თავის მიმწოდებლებთან ურთიერთობებს შეინარჩუნებს, თუმცა ძნელბედობის ჟამს, სხვა კომპანიებისგანც მიიღებს მაკომპლექტებლებს, რათა წარმოების ნორმალურ რეჟიმში, რაც შეიძლება სწრაფად გადავიდეს.

ამ ეტაპზე, „ტოიოტას“ დაახლოებით 150 პარტნიორი კომპანია მთლიანად ან ნაწილობრივაა გაჩერებული. ესენი მეტწილად ელექტრონიკის, საბურავების და საღებავების მწარმოებლები არიან. ესოდენ სერიოზული პრობლემების მიუხედავად, „ტოიოტა“ თავის ჩრდილოამერიკულ ქარხნებში პერსონალის დათხოვნებს არ აპირებს. არადა, ეს ქარხნები კვირაში მხოლოდ სამი დღე მუშაობენ და ისიც, მცირე დატვირთვით. ყოველივეს გამო, „ტოიოტა“ მომავალში უფრო მეტ უცხოელ მიმწოდბელებთან დაიწყებს თანამშრომლობას, რათა ასეთი შოკურ სიტუაციებს უფრო იოლად დააღწიოს თავი.

„ჰიუნდაი“ მსოფლიოს მეოთხე უდიდესი ავტომწარმოებლის სტატუსს უმიზნებს

Hyundai Wants World's Fourth Largest Carmaker Spot

23 აპრილი

ბოლო რამდენიმე თვეა, „ჰიუნდაისა“ და მის ჯგუფში შემავალი „კიას“ გაყიდვები განუხრელად იზრდება, რამაც კორეულ კონგლომერატს იმის საფუძველი მისცა, რომ მსოფლიოს მეოთხე უდიდესი ავტომწარმოებლის სტატუსის მოპოვებაზე იფიქროს.

„ჰიუნდაი“ იმედოვნებს, რომ წელს 5.7 მილიონი ავტომობილის გაყიდვას შეძლებს. ამ იმედს ის ფაქტორიც აძლიერებს, რომ ბოლო 11 თვეში, ამ ორი კომპანიის მიერ უკვე 5.2 მილიონი ავტომობილია გაყიდული. გაყიდული ავტომობილებიდან 3.3 მილიონი „ჰიუნდაია“, 1.91 მილიონი კი - „კია“. რაც მთავარია, ეს მაჩვენებელი წინა თვის შესაბამის მაჩვენებელზე თითქმის 21 პროცენტით მეტია.

„ჰიუნდაის“ მომდევნო წლისთვის გაცილებით ოპტიმისტური მიზნები აქვს, თუმცა მაინც აცნობიერებს, რომ მსოფლიოს მეოთხე უდიდესის სახელის მიწვდომა მაინც ძალიან ძნელი იქნება. გაყიდვების მაჩვენებლით მეოთხე ადგილი ამჟამად „რენოსა“ და „ნისანის“ ალიანსს უკავია, რომელსაც ბოლო 11 თვეში 6 მილიონზე მეტი ავტომობილი აქვს გაყიდული.

შეგახსენებთ, რომ გასული წლის მაჩვენებლებით, პირველი ადგილი „ტოიოტას“ უკავია, რომელმაც 8.42 მილიონი ავტომობილი გაჰყიდა. „ჯენერალ მოტორსი“ მას მცირედით (8.39 მილიონი) ჩამორჩა. მესამე ადგილი კი „ფოლკსვაგენის“ ჯგუფს (7.14 მილიონი) უკავია.

სხვათა შორის, მეოთხე ადგილს „ჰიუნდაის“ გარდა კიდევ ერთი კომპანია - „ფორდი“ უმიზნებს, რომლის უპირველესი მიზანიც ისაა, რომ ამერიკაში მეორე უდიდესი ავტომწარმოებლის წოდება დაიბრუნოს. ეს ადგილი მას არცთუ დიდი ხნის წინ, „ტოიოტამ“ ჩამოართვა. პირველი კი, რა თქმა უნდა, „ჯენერალ მოტორსია“.

„ჰიუნდაის“ ამბიციური მიზნის მიღწევაში შეიძლება იაპონიაში მომხდარი მიწისძვრა და ცუნამი დაეხმაროს. საქმე ისაა, რომ ამის გამო, „ტოიოტას“ კარგა ხანს გაჩერებული ჰქონდა იაპონური ამწყობი ქარხნები, ამერიკულებში კი წარმოების ტემპები შეანელა, რადგან მაკომპლექტებლების დეფიციტს განიცდიდა. გაზრდილი მოთხოვნის დასაკმაყოფილებლად, „ჰიუნდაის“ და „კიას“ ამერიკული ქარხნები სრული დატვირთვით მუშაობს.

„ჰიუნდაის“ მონტგომერის (შტატი ალაბამა) ქარხნის წლიური წარმადობა 300 000 ავტომობილია, თუმცა ის ახლა იმ რეჟიმში მუშაობს, რომ 10 პროცენტით მეტი გამოუშვას. მსგავსი სიტუაციაა ამ ქარხნიდან აღმოსავლეთით, 80 კილომეტრში მდებარე „კიას“ უესტ პოინტის (შტატი ჯორჯია), ამწყობ ქარხანაში, რომელიც სამ ცვლაში, შაბათობითაც კი მუშაობს. უფრო მეტიც, კომპანიის ხელმძღვანელობა უახლოეს მომავალში ამ რეჟიმის შეცვლას არც აპირებს.

„ფიატ-ი“ მნიშვნელოვან სეგმენტში სტრატეგიას ცვლის

Fiat changes product strategy in key segment

24 აპრილი

იტალიურმა კომპანიამ საკმაოდ უცნაური გადაწყვეტილება მიიღო - ის აღარ აპირებს ევროპის ბაზარზე ყველაზე პოპულარული, C კლასის კომპაქტურ ჰეჩბეკ „ბრავოს“ წარმოებას და მის ნაცვლად, ამავე კლასის შესაბამის ქროსოვერს გამოუშვებს, რომელიც შესაბამისი კლასის ბესტსელერ „ნისან ქაშკაის“ შთაგონებით დამზადდება.

სხვათა შორის, „ფიატ-ის“ მთავარმა აღმასრულებელმა სერჯო მარკიონემ ჯერ კიდევ დეტროიტის ავტო შოუზე განაცხადა, რომ მისი კომპანია, საწარმოო პროგრამაში არაორდინარულ სვლას გეგმავდა. მაშინ გეგმა უკვე არსებობდა, თუმცა ამ გეგმამ ჩამოყალიბებული სახე ახლახანს მიიღო. გამოცემა „აუტომოტივ ნიუს იუროპმა“ ტურინული კომპანიის წარმომადგენლებისგან შეიტყო, რომ ახალი ავტომობილი ბაზარზე 2013 წელს გამოჩნდება.

ცნობისათვის, სანამ „ქაშკაის“ გამოუშვებდა, „ნისანი“ ევროპის ბაზრის კომპაქტური ავტომობილების სეგმენტში ამინდს ვერ ქმნიდა, ამჟამად კი ამ სეგმენტში მე-5 ადგილი უკავია. კომპაქტური ავტომობილების სეგმენტი მეორე უდიდესია ევროპაში - შარშან იქ 3.16 მილიონი ავტომობილი გაიყიდა, რაც მთლიანი ბაზრის 21 პროცენტზე მეტია. სულ ევროპაში შარშან 14.3 მილიონი ავტომობილი გაიყიდა. ყველაზე დიდი კი სუბკომპაქტური ავტომობილების (B) სეგმენტია, სადაც შარშან 3.64 მილიონი ავტომობილი (საერთო ბაზრის 25 პროცენტი) გაიყიდა.

ახლანდელი „ქაშკაი“ და „ბრავო“ ბაზარზე 2007 წელს გამოჩნდა. თავიდან მათი გაყიდვების მოცულობა თითქმის თანაბარი იყო, მაგრამ შარშან „ქაშკაი“ „ბრავოზე დაახლოებით 5-ჯერ მეტი გაიყიდა (216 091 და 44 850). სხვათა შორის, „ნისანმაც“ ამ ქროსოვერით თავის დროზე, ცუდად გაყიდვადი „ალმერა“ შეცვალა. „ქაშკაიმ“ მალე მოიპოვა პოპულარობა და შარშან კომაქტური ჰეჩბეკების სეგმენტის ისეთ ლიდერსაც კი აჯობა (50 000-ზე მეტით), როგორიც არის „პეჟო 308“.

„ბრავო“ მხოლოდ ხუთკარიანი ჰეჩბეკის ძარით გამოდის. გაყიდვების პირველ სრულ წელს (2008) მხოლოდ 95 292 ცალი „ბრავო“ გაიყიდა, ორ წელიწადში კი მისი გაყიდვები თითქმის განახევრდა. თუ თავიდან კომპაქტურ სეგმენტში მას მე-12 ადგილი ეკავა, შარშან მე-18 ადგილამდე დაქვეითდა. ასე განსაჯეთ, „ფიატ ბრავო“ „შკოდა იეტიმაც“ კი ჩამოიტოვა (47 003), თავად კი მცირედით ჩამოიტოვა ჰიბრიდული „ტოიოტა პრიუსი“ (42 816).

როცა „ბრავოს“ გაყიდვებს იწყებდა, „ფიატმა“ გამოაცხადა, რომ წლიურად 120 000 ცალის გაყიდვას გეგმავდა. მაშინ ისიც ითქვა, რომ ეს მოდელი მოგებას იმ შემთხვევაში მოიტანდა, თუ წლიურად მინიმუმ 75 000 ცალი გაიყიდებოდა. ეს ზღვარი „ბრავომ“ 2007 და 2008 წლებში იოლად გადალახა, მაგრამ უკვე ორი წელია, მასთან ახლოსაც ვერ მიდის.

დეტროიტში მარკიონემ განაცხადა, რომ მთავარი საკითხი, რომლის მოგვარებაც „ფიატს“ მოუწევს, კომპაქტურ სეგმენტში სრულყოფილი სტრატეგიის შემუშავებაა. მან აღნიშნა, რომ არაპოპულარული მოდელის ბაზაზე სხვა მოდელების გამოშვება კრახისთვისაა განწირული. ის დიდხანს ეთათბირა „ფიატ-ის“ მარკეტოლოგებს და ინჟინრებს, რომლის შემდეგაც გადაწყდა, „ბრავო“ აღარ შეიცვალოს და მის ნაცვლად, ტურინელებმა კომპაქტური ქროსოვერის წარმოება დაიწყონ.

ევროპის ბაზრის კომპაქტური სეგმენტის მოწინავე ათეული

1. ფოლკსვაგენ გოლფი 501 671 -13.4%

2. ოპელ/ვოქსოლ ასტრა* 303 957 +7.6%

3. ფორდ ფოკუსი** 288 524 -11.6%

4. რენო მეგანი*** 264 690 +5.1%

5. ნისან ქაშკაი 216 091 +15.4%

6. შკოდა ოქტავია 188 073 +0.0%

7. პეჟო 308**** 165 822 -21.3%

8. ჰიუნდაი i30 118 644 +16.8%

9. პეჟო 3008 117 417 --

10. კია სიი’დ 96 848 -9.1%

შენიშვნა

* - არ შედის კუპე და კაბრიოლეტი

** - არ შედის კაბრიოლეტი

*** - არ შედის კაბრიოლეტი

**** - არ შედის კუპე და კაბრიოლეტი

„ბუგატი გალიბიერს“ მწვანე შუქი აუნთეს

Bugatti Gives 16C Galibier Production Green Light

24 აპრილი

„ფოლკსვაგენის“ ხელმძღვანელობის გადაწყვეტილებით, „ბუგატი“ მალე სედან „გალიბიერს“ გამოუშვებს. ეს ცნობა სააგენტო „ბლუმბერგმა“ გაავრცელა. თავის მხრივ, ინფორმაცია სააგენტოს „ფოლკსვაგენის“ ორმა წარმომადგენელმა გაუმხილა, რომლებმაც ინკოგნიტოდ დარჩენა ამჯობინეს.

„ბუგატიმ“ კონცეპტუალური სედანი „16C გალიბიერი“ შარშან, ჟენევის ავტო შოუზე წარადგინა, თუმცა მას შემდეგ, ამ ავტომობილის ბედი გაურკვეველი იყო. მისი წარმოების დაწყებას პროტეჟირებას „ბუგატის“ და „ბენტლის“ შეფი ვოლფგანგ დურჰაიმერი დიდი მონდომებით ცდილობდა და ბოლოსდაბოლოს, თავისი გაიტანა კიდეც.

„ფოლკსვაგენის“ გადაწყვეტილებით, სუპერ სედანს „ბუგატის“ მოლშეიმის (საფრანგეთი) ქარხანა გამოუშვებს, სადაც ამჯერად ჰიპერქარ „ვეირონს“ ამზადებენ. მაგრამ სანამ ახალი ავტომობილის წარმოებას დაიწყებს, ქარხანას მოდერნიზაცია დასჭირდება. ამიტომ, სასურველ ავტომობილს პირველი მყიდველი 2013 ან 2014 წელზე ადრე ვერ მიიღებს.
„გალიბიერი“ იმავე W16 ძრავით აღიჭურვება, რომელიც მამოძრავებელ ძალას „ვეირონს“ ანიჭებს. მისი მუშა მოცულობა 8.0 ლიტრია, თუმცა თუ „ვეირონის“ შემთხვევაში, ის ოთხი ტურბოკომპრესორითაა აღჭურვილი (ცილინდრების ყოველ რიგზე თითო), „გალიბიერის“ შემთხვევაში, ძრავს ორსაფეხურიანი მექანიკური დამჭირხნი მოემსახურება. ამის წყალობით, მას მეტი მაბრუნი მომენტიც ექნება და რაც მთავარია, ჩავარდნების გარეშე იმუშავებს.
ასევე გავრცელდა ინფორმაცია იმის შესახებ, რომ „გალიბიერს“ ელექტროძრავითაც აღჭურვავენ. ეს კი მხოლოდ იმისთვის კეთდება, რომ მალე ევროპის ბევრი დიდი ქალაქის ცენტრში, შიდაწვისძრავიანი მანქანებით სიარულს შეზღუდავენ. ამ შემთხვევაში კი, „გალიბიერის“ მფლობელები, ასეთ უბნებში ელექტროძრავით გადაადგილებას შეძლებენ.

დურჰაიმერი ამბობს, რომ პროექტი ჯერჯერობით ადრეულ სტადიაშია. ჯერ მანქანის გაბარიტული ზომებიც კი არაა დაკონკრეტებული. არც ისაა გადაწყვეტილი, შასი კარბოლის კომპოზიტით დამზადდება, თუ ალუმინით. სამაგიეროდ, არის ვარაუდი, რომ სედანი სულ 3 000 ცალი დამზადდება. შედარებისთვის, „ვეირონი“ მხოლოდ 300 ცალი დამზადდა. გამოცემა „ქარ-ის“ ვარაუდით, „ბუგატის“ სუპერ სედანიც „ვეირონივით“ 1 მილიონი ევრო ეღირება.

რაც შეეხება სახელს, „გალიბიერი“ ჯერ საბოლოოდ დამტკიცებული არაა. ცნობისათვის, ავტომწარმოებელმა ეს სახელი საფრანგეთის ალპური ზონის უღელტეხილ „გალიბიერისგანაა“ აღებული. ამ უღელტეხილს სახელი ველომარათონმა ტურ დე ფრანსმა გაუთქვა, რომლის მარშრუტშიც ის ხშირად შედის.

“სუბარუ XV“ – „იმპრეზა“ ქროსოვერის ფორმაში

Subaru XV Concept is a High-Riding Impreza Crossover

24 აპრილი

ნიუ იორკისა და შანჰაის საავტომობილო შოუზე, რომლებიც პრაქტიკულად ერთდროულად ჩატარდა, „სუბარუმ“ თავისი ორი სიახლე - შესაბამისად, ახალი „იმპრეზა“ და ამავე ავტომობილის ბაზაზე დამზადებული კონცეპტუალური ქროსოვერი XV წარადგინა. სხვათა შორის, ამ აბრევიატურით, იაპონური კომპანია, ზოგიერთი ბაზრისთვის, მათ შორის იაპონიისთვისაც, მაღალი გამავლობის „იმპრეზას“ აწარმოებს (იგივე ავტომობილი ამერიკაში იმპრეზა აუტბექ სპორტის სახელით იყიდება). და როგორც ჩანს, მალე ამ ავტომობილს სხვა ბაზრებზეც შეიტანს, რომელთაგან ყველაზე მნიშვნელოვანი ჩინეთი იქნება.

რა თქმა უნდა, მწვანე ფოსფორისფერში გამოწყობილი ავტომობილი სრულამძრავიანი ტრანსმისიითაა აღჭურვილი, რომელიც „იმპრეზასგან“ მიიღო. ამასთან, ის გზის საფარიდან უფრო მეტადაცაა დაშორებული, რაც მას ქროსოვერად წარმოგვიდგენს. მის ამ თვისებას, ოდნავ უხეში დიზაინი და ბორბლებიც უსვამს ხაზს.

“სუბარუ XV-ს“ გაბარიტებია: სიგრძე 4 450 მილიმეტრი, სიგანე 1 800 მილიმეტრი, სიმაღლე 1 620 მილიმეტრი, ბორბლებს შორის ბაზა კი 2 635 მილიმეტრი. ამგვარად, ის 20 მილიმეტრით გრძელი, 30 მილიმეტრით განიერი და 50 მილიმეტრით მაღალია ამავე სახელწოდების კონცეპტუალურ ავტომობილზე, რომელიც „სუბარუმ“ შარშან, ჟენევის ავტო შოუზე გვიჩვენა.

კონცეპტუალური ავტომობილი 2.0-ლიტრიანი ოთხცილინდრიანი ძრავითაა აღჭურვილი, რომლის ცილინდრებსაც ოპოზიტური განლაგება აქვს. ძრავთან უსაფეხურო ვარიატორია შეწყვილებული. “სუბარუ XV“ 19-დუიმიან ბორბლებზე დგას, რომლებზეც 245/45 R19 საბურავებია ჩაცმული.

როგორც ჩანს, კონცეპტუალური ავტომობილი „სუბარუს“ ახალი კორპორატიული სტილის პიონერიცაა. და თუ ასეა, აშკარაა, რომ იაპონური კომპანია არჩევანს უფრო უხეშ ფორმებზე აკეთებს. მაგრამ ეს ავტომობილი ამ სახით ბაზარზე გამოჩნდება თუ არა, ეს ჯერ გადაწყვეტილი არ არის.

„ჰიუნდაი აქცენტი“ - კიდევ ერთი კორეული სუპერ ეკონომიური

2011 NYIAS: Hyundai Pulls the Wraps off U.S. Market 2012 Accent

22 აპრილი

ნიუ იორკის საერთაშორის ავტო შოუზე, „ჰიუნდაიმ“ თავისი კიდევ ერთი ახალი ავტომობილი წარმოადგინა, რომელსაც ავტომაგისტრალზე ასი კილომეტრის გასავლელად, 5.8 ლიტრი საწვავი ჰყოფნის (ანუ, ერთი გალონით 40 მილს გადის). ეს არის მეოთხე თაობის „აქცენტი“, რომელიც კორეული კომპანიის კორპორატიულ სტილში (ფლუიდიკ სკალპჩა - თხევადი სკულპტურა) არის შესრულებული.

ახალი „აქცენტი“, რომლის გაყიდვებიც ზაფხულში დაიწყება, ნიუ იორკის შოუს დამსწრეთა წინაშე, ხუთკარიანი ჰეჩბეკის და ოთხკარიანი სედანის ძარით წარსდგა. მისი გაბარიტებია: ოთხკარიანის სიგრძე 4 370 მილიმეტრი, ხუთკარიანისა - 4 115 მილიმეტრი, ორივეს სიგანე 1 700 მილიმეტრი, ბორბლებს შორის ბაზა - 2 570 მილიმეტრი. ბაზა 70 მილიმეტრითაა გაზრდილი, სიგანე კი მხოლოდ 5 მილიმეტრით.

ავტომობილი ბენზინის გამა-სერიის 1.6-ლიტრიანი ოთხცილინდრიანი ძრავით არის აღჭურვილი, რომელიც 138 ცხენის ძალას იძლევა. სხვათა შორის, ეს ძრავი „ჰიუნდაიმ“ უფრო ადრე, ახალ „ელანტრასა“ და კუპე „ველოსტერზე“ გამოიყენა, რომელიც ბაზარზე ახალი გამოსულია. ძრავი საწვავი ნარევის უშუალოდ წვის კამერაში შეფრქვევის სისტემითაა აღჭურვილი. მასთან 6-საფეხურიანი მექანიკური, ან ავტომატური კოლოფია შეწყვილებული.

მიუხედავად იმისა, რომ ავტომობილი უამრავი სისტემითაა აღჭურვილი (VSM - მანქანის სტაბილურობის მართვა, ESC - სტაბილურობის ელექტრონული კონტროლი, TCS - ტრექშნ კონტროლის სისტემა, ABS - მუხრუჭების ბლოკირებისსაწინააღმდეგო სისტემა, EBD - სამუხრუჭე ძალის ელექტრონული განაწილება და 6 აირბალიში), ის მანიც საკმაოდ ისფი ღირს - ახალი „აქცენტის“ საბაზო ვერსიის ფასი (ამერიკაში - საქართველოში ის მოგვიანებით შემოვა) 12 445 დოლარია. მაქსიმალური ფასი კი 16 795 დოლარს აღწევს. ამ ფასში შედის ძრავის 10-წლიანი (ან 160 000 კილომეტრზე) გარანტია.

„ახალი „აქცენტით“ სუბკომპაქტური კლასის ავტომობილების დონეს მაღლა ვწევთ, რადგან ამ ავტომობილში, უფრო მაღალი კლასის შესაფერისი ტექნოლოგიებია გამოყენებული. ეს არის კოხტა, თავის კლასში ყველაზე ეკონომიური და უსაფრთხოების თანამედროვე სისტემებითა აღჭურვილი ავტომობილი და მიუხედავად იმისა, რომ ეს სისტემები საბაზო კომპლექტაციაში შედის, ჩვენ მისი ფასის წინა თაობის მოდელის დონეზე შენარჩუნება შევძელით“, - ნათქვამია „ჰიუნდაის“ მიერ ნიუ იორკის შოუზე გამოქვეყნებულ რელიზში.

„ნისან ლიფი“ მსოფლიოს საუკეთესო ავტომობილიც გახდა

Nissan Leaf Receives World Car of the Year Title

21 აპრილი

2011 წელი ელექტრომობილების ეპოქის დასაწყისად შეიძლება ჩაითვალოს - ჯერ იყო და, ელექტრომობილი „ნისან ლიფი“ ევროპის წლის საუკეთესო ავტომობილად დასახელდა, შემდეგ, გაზრდილი სვლის სიშორის მქონე ჰიბრიდი „შევროლე ვოლტი“ ჩრდილოეთ ამერიკის წლის საუკეთესო ავტომობილი გახდა. ახლახანს კი, ნიუ იორკის საერთაშორისო ავტო შოუზე, დასრულდა მსოფლიოს წლის საუკეთესო ავტომობილის კონკურსი, რომლის შედგებითაც, საუკეთესოდ ისევ „ნისან ლიფი“ აღიარეს.

კონკურსში თავიდან 39 ავტომობილი შეიტანეს, რომელთაგან პირველი ეტაპის შემდეგ, ათი დარჩა, ფინალურ ეტაპზე კი მათგან მხოლოდ სამი გავიდა - „ნისან ლიფის“ გარდა, ფინალში ასევე გავიდნენ მე-5 სერიის „ბეემვე“ და „აუდი A8“. გარდა ამისა, წლის საუკეთესო სპორტული ავტომობილის წოდება „ფერარი 458 იტალიას“ ერგო, რმელსაც მეროქეობას „მერსედეს ბენცის“ SLS AMG და „პორშე 911 ტურბო“ უწევდნენ.

ნომინაციაში „წლის საუკეთესო“ დიზაინი, საუკეთესოდ „ასტონ მარტინ რეპიდი“ აღიარეს. ამ წოდებისთვის მისი კონკურენტები იგივე „ფერარი 458 იტალია“ და „ალფა რომეო ჯულიეტა“ იყვნენ. ასევე დასახელდა წლის საუკეთესო „მწვანე“ ავტომობილი. რაოდენ გასაოცარიც უნდა იყოს, ამ ნომინაციაში „შევროლე ვოლტმა“ „ნისან ლიფს“ აჯობა. მათ გარდა, ფინალურ ეტაპზე „ბეემვეს“ „320d ეფიშნტდაინემიქსიც“ გავიდა.

სხვათა შორის, შარშან და შარშანწინ, მსოფლიოს წლის საუკეთესო ავტომობილად „ფოლკსვაგენის“ მოდელები - „პოლო“ (2010 წელს) და „გოლფი“ (2009 წელს0 დაასახელეს. 2008 წელს კი ეს წოდება „მაზდა2-მა“ მიიღო.

კონკურს „მსოფლიოს წლის საუკეთესო ავტომობილის“ განმარტებაში წერია: „ჩვენი შეფასებით, მოდელი „ლიფი“ ელექტრულ სამყაროში „ნისანის“ მიერ გაჭრილი კარიბჭეა. ეს ხუთადგილიანი, ხუთკარიანი ჰეჩბეკი, მსოფლიოში პირველი მასობრივად წარმოებადი ელექტრომობილია. ის უნიკალურ, სპეციალურად შემუშავებულ პლატფორმაზეა აგებული და აღჭურვილია ლითიუმ-იონური ელემენტების პაკეტიტა და ელექტროძრავით, რომელიც 108 ცხენის ძალას გამოიმუშავებს. ამ ძრავით, „ლიფი“ ადგილიდან 100 კმ/სთ სიჩქარეს 11.5 წამში ავითარებს, მისი მაქსიმალური სიჩქარე კი 145 კმ/სთ-ია. „მას ერთი დამუხტვით 160 კილომეტრის გავლა შეუძლია, სრული დამუხტვისთვის კი თითქმის 8 საათი სჭირდება. რაც მთავარია, მანქანას ნულოვანი გამონაბოლქვი აქვს. დაბლა განლაგებული სიმძიმის ცენტრის წყალობით, ავტომობილი ჭარბი და არასაკმარისი მოხვევადობისადმი მიდრეკილი პრაქტიკულად არაა. მოკლედ, ჩვეულებრივი ავტომობილია, ოღონდ ჩუმი“.