„პინინფარინა კამბიანო“ - ორსახოვანი კუპე ( ვიდეო)

Pininfarina's Two-Sided Cambiano Concept Comes to Life in Geneva

9 მარტი

როგორც ჩანს, „ჰიუნდაიმ“ საავტომობილო სამყაროში ახალ მოდას დაუდო დასაბამი. ყოველ შემთხვევაში, ადრე არავის უფიქრია ისეთი კუპეს დამზადება, რომელსაც კართა ასიმეტრიული განლაგება ექნებოდა. ანუ, მძღოლის მხარეს ერთი კარი, საპირისპირო მხარეს კი - ორი.

კორეული კომპანიის მიგნება იმდენად ორიგინალური და საინტერესო გამოდგა, რომ ის „პინინფარინამ“ თავის უახლეს კონცეპტუალურ მოდელ „კამბიანოზე“ გამოიყენა. ოღონდ, „ჰიუნდაი ველოსტერისგან“ ამ ავტომობილს კართა რაოდენობა განასხვავებს. თუ კორეულ ავტომობილს უკან მეოთხე კარიც (ჰეჩბეკის სტილში) აქვს, „პინინფარინა კამბიანო“ სამკარიანი გრან ტურიზმოა. ისე კი, მეოთხე კარიც რომ ჰქონოდა, ან სპორტულ სედანს დაარქმევდნენ, ან ოთხკარიან კუპეს...

სახელი „კამბიანო“ ატელიემ იმ ქალაქისგან ისესხა, სადაც მისი შტაბ-ბინაა განლაგებული. ავტომობილი ზორბა გაბარიტებით გამოირჩევა: სიგრძე 5040 მილიმეტრი, სიგანე 2000 მილიმეტრი, სიმაღლე 1360 მილიმეტრი. სალონში ოთხი ადამიანი ეტევა, საბარგულის მოცულობა კი 450 ლიტრია.

„კამბიანოს“ ოთხი ელექტროძრავი ამოძრავებს, რომლებიც ბორბლებშია მოტავსებული. თითოეულის ნომინალური სიმძლავრე 80 ცხენის ძალა, პიკური სიმძლავრე კი 201 ცხენის ძალაა. ამგვარად, ავტომობილის მაქსიმალური სიმძლავრე 800 ცხენის ძალას, მაბრუნი მომენტი კი 640 ნიუტონმეტრს აღწევს.

„პინინფარინა“ ამბობს, რომ ყოველი ძრავის კონტროლი და მართვა, ერთმანეთისგან დამოუკიდებლად ხორციელდება. ამასთან, მათ რამდენიმე ფუნქცია ეკისრება. მაგალითად, შენელებისას ენერგიის რეგენერაცია. მათივე მეშვეობით (მაბრუნი მომენტის ცვალებადობით) ხდება ჩაჭიდების კონტროლი (ტრექშნ კონტროლ) და დამუხრუჭებისას, ბორბლის ბლოკირების საწინააღმდეგო ქმედება.

ელექტროძრავების გარდა, „კამბიანოს“ ძალურ დანადგარებში ასევე შედის დამხმარე აგრეგატი - მცირე ზომის რეაქტიული ტურბინა, რომელიც 40 კილოგრამს იწონის და 50 კილოვატ სიმძლავრეს გამოიმუშავებს. ეს ძრავი საწვავად დიზელს იყენებს, თუმცა მცირე მოდიფიკაციის შემდეგ, ნებისმიერ საწვავზე იმუშავებს. რაც მთავარია, მასთან დაკავშირებულია გენერატორი, რომელიც ენერგიით ელემენტების ბლოკს და როცა საჭიროა, პირდაპირ ელექტრულ ძრავებს ამარაგებს. ელემენტების ბლოკი უკანა სავარძლებს და უკანა ღერძს შორის მდებარეობს. ელემენტების სრულ დამუხტვას 52 წუთი ან 6 საათი სჭირდება (დამოკიდებულია დასამუხტ მოწყობილობაზე).

დაბოლოს, ავტომობილს ადგილიდან 100 კმ/სთ სიჩქარის ასაკრეფად 4.2 წამი ჰყოფნის, მისი მაქსიმალური სიჩქარე კი 250 კმ/სთ ნიშნულითაა შეზღუდული (ენერგიის ეკონომიისთვის). მხოლოდ ელემენტებში დაგროვილი ენერგიით, „კამბიანოს“ 200 კილომეტრის გავლა შეუძლია, მაგრამ როცა საქმეში ტურბინისა და გენერატორის ტანდემი ერთვემა, სვლის სიშორე 800 კილომეტრამდე იზრდება.

ვიდეო