”აუდი” 100 წლის იუბილეს გუდვუდის სიჩქარის ფესტივალზე აღნიშნავს

Audi celebrate its 100th anniversar

3 ივლისი

დღეს გუდვუდში (ინგლისი, დასავლეთ სასექსი) იხსნება სიჩქარის ტრადიციული ფესტივალი, რომელზეც, ”აუდის” დაარსებიდან 100 წლის იუბილესთან დაკავშირებით, გერმანული კომპანიისადმი მიძღვნილი მონუმენტი გაიხსნა.

სკულპტურა, რომლის სიმაღლე 35 მეტრს აღწევს, სახელოვანი ინგლისელი ხელოვანის, სასექსის ლორდ მარჩის ახლო მეგობრისა და კომპანიონის, გერი ჯუდას მიერაა შექმნილი და ის ფესტივალის ყველაზე თვალსაჩინო ადგილზე - ავტოდრომის შესასლელში, ლორდის სასახლის წინ დაიდგა.

სკულპტურა მაგისტრალური გზაჯვარედინის ერთგვარი სიმბოლოა, რომლის ერთ ბოლოშიც ”აუდის” წინამორბედ ”აუტო უნიონის” სარბოლი (სარეკორდო) ავტომობილი მიჰქრის, მეორე ბოლოში კი სკულპტურას კენწეროში მოქცევია გერმანული კომპანიის უახლესი სპორტული მოდელი R8 V10, რომელსაც, თითქოს ცისკენ (აუდის მომავალი მიღწევებისკენ) აუღია გეზი.

ჟურნალ ”აუტოქარის” მიერ გავრცელებული ინფორმაციით, ქანდაკება 40 ტონას იწონის და მის მონტაჟს, 12-მა სპეციალისტმა, რომელთა განკარგულებაშიც, 100 ტონა ტვირთამწეობის ორი სპეცმანქანა იმყოფებოდა, თითქმის ერთი თვე მოანდომა.

აღსანიშნავია, რომ ავტოდრომის შესასვლელში თემატური სკულპტურის დადგმაც გუდვუდური ფესტივალის ტრადიციაა. მონუმენტებს ყოველთვის ბატონი ჯუდა ამზადებს, რომელიც ყოველთვის ორიგინალური იდეებით ახერხებს მნახველთა გაოცებას. რა თქმა უნდა, მისი სკულპტურები ან ავტოსამყაროს გამორჩეულ მოვლენებს ეხება, ან რომელიმე კომპანიის იუბილეს. ავტორი განმარტავს, რომ ”აუდისადმი” მიძღვნილი ქანდაკებით, მან კომპანიის სპორტულობას, პრესტიჟულობასა და პროგრესულობას გაუსვა ხაზი.

ჯუდა ყვება, რომ ”აუდის” საიუბილეო სკულპტურაზე მუშაობის დასაწყისში, ოცამდე ესკიზი შეასრულა, რომელთა შორისაც საუკეთესო და ყველაზე ორიგინალური შეარჩია.

სკულპტურის გარდა, გერმანული კომპანიის იუბილეს აღსანიშნავად, გუდვუდში ”აუდის” არაერთი სახელოვანი ავტომობილი გამოიფინება. რა თქმა უნდა, ფესტივალზე საპატიო სტუმრებად ის ადამიანები არიან მიწვეულნი, რომლებიც ამ კომპანიის ავტორიტეტს ქმნიდნენ. ფესტივალის დამთვალიერებლებს ტრასაზე შეუძლიათ ნახონ 30-იანი წლების ლეგენდარული ”ვერცხლისფერი ისრები” (ასე იმ დროის ”მერსედესების” გარდა, ”აუტო უნიონის” ბოლიდებიც მოიხსენიებოდნენ), 80-იანი წლების ”აუდი კვატროები” და თანამედროვე ლე მანის 24-საათიანი რბოლების ტრიუმფატორი პროტოტიპები.

ქვემოთ მოყვანილია ”აუდის” ისტორის ზოგიერთი ღირსშესანიშნავი მოვლენა:

1909 - გამოვიდა პირველი ავტომობილი (ტაიპ A), რომელიც აუდის სახელს ატარებდა

1935 - აუტო უნიონ B-ტაიპმა მონცაში იტალიის დიდი პრიზი მოიგო

1937 - ტაიპ C შტრომლინენვაგენით პირველად გადაილახა სიჩქარის 400 კმ/სთ-იანი რეკორდი

1938 - მძღოლების უსაფრთხოების გაზრდის მიზნით, დაიწყო ავტომობილების რეგულარული ქრეშ ტესტირება

1980 – აუდი პირველი კომპანიაა, რომელმაც სრულამძრავიანი, მუდმივი მოდების სისტემა სერიულ ავტომობილზე (აუდი კვატროზე) გამოიყენა. ეს ავტომობილი, რომელმაც სახელი რალის მსოფლიო ჩემპიონატზე გაითქვა, ხუთცილინდრიანი ტურბოძრავით იყო აღჭურვილი

1989 - აუდიმ პირველი ტურბოდიზელიანი ავტომობილები გამოუშვა, რომლებითაც ყველას დაუმტკიცა ასეთი ძრავების ძლიერება და ეკონომიურობა

1994 - აუდიმ პირველმა გამოიყენა ალუმინის ჩარჩო, რომელიც გრეხვისადმი გაზრდილი წინაღობით და კოროზიისადმი მედეგობით გამოირჩეოდა. ასეთ ჩარჩოზე აწყობილი A8-ს შასი, ტრადიციულ ფოლადის კონსტრუქციაზე გაცილებით მსუბუქი გამოვიდა.

2006 - აუდი პირველია, ვინც ლე მანის რბოლა დიზელისძრავიანი მანქანით მოიგო

100 წლის იუბილესთან დაკავშირებით, ”აუდიმ” ასევე მოამზადა ახალი მოდელი, რომლის პრეზენტაციასაც 16 ივლისს, გერმანიაში გეგმავს. გავრცელებული ინფორმაციით, ეს უნდა იყოს ელექტრომობილი, რომელიც ბაზრისკენ ”აუდის” ელექტრომობილების მთელ კოჰორტას გაუძღვება.

”ფორდი” ”ფოკუსს” მხოლოდ გერმანიაში გამოუშვებს

Ford Focus

2 ივლისი

ამერიკულმა კომპანია ”ფორდმა” გამოაცხადა, რომ თავის პოპულარულ ჰეჩბეკ ”ფოკუსის” ევროპულ ვერსიას მხოლოდ გერმანიაში, ზაარლუისის ქარხანაში გამოუშვებს. ეს კი მერმის, მას შემდეგ მოხდება, რაც ბაზარზე მომდევნო თაობის ”ფოკუსი” გამოჩნდება. პარალელურად, კომპანიის ვალენსიას (ესპანეთი) ქარხანა, მხოლოდ ”C-მაქსზე” დასპეციალდება და მას ევროპისა და სხვა ბაზრებისთვის გამოუშვებს.

”მარტში ჩვენ გამოვაცხადეთ, რომ შემდეგი თაობის ”ფოკუსისთვის” ზაარლუისის ქარხანა შევარჩიეთ. ამასთან, ამავე პლატფორმაზე შექმნილი სხვა მოდელებისთვის კიდევ ერთი ქარხანა გვჭირდებოდა. მარტიდან მოყოლებული, ამ საკითხზე ვმუშაობდით და საბოლოო არჩევანი ვალენსიაზე შეჩერდა, რომელიც ”C-მაქსით” მთელ ევროპას და მეზობელი რეგიონების ბაზრებს მოამარაგებს”, - ამბობს ”ფორდ ევროპის” დირექტორთა საბჭოს თავმჯდომარე და მთავარი აღმასრულებელი ჯონ ფლემინგი.

რაც შეეხება ”ფოკუსის” ელექტრონულ ვერსიას, მას კომპანია კანადურ ”მაგნა ინტერნეიშნლთან” (რომელიც პარალელურად, ”ოპელის” შესყიდვას ცდილობს) ერთად შეიმუშავებს და მიჩიგანის ქარხანაში გამოუშვებს. ელექტრომობილი ლითიუმ-იონური აკუმულატორების ბლოკით და პლაგ-ინ სისტემით აღიჭურვება, რომელსაც ენერგიის 110 და 220-ვოლტიანი წყაროდან შევსების უნარი ექნება.

რა ბედი ეწევა ”ფორდის” რუსულ ქარხანას, რომელიც ”ფოკუსის” გარდა, მცირე რაოდენობით სხვა მოდელებსაც აწარმოებს, ჯერჯერობით უცნობია. ცნობისათვის, ამერიკულმა კომპანიამ ეს ქარხანა ორი თვით გააჩერა.

ჰიბრიდული აგრეგატი ”პორშე პანამერასთვის”

Porsche Panamera hybrid

2 ივლისი

გასული თვეების განმავლობაში, ”პორშეს” უახლეს ავტომობილზე, ოთხკარიან კუპე ”პანამერაზე” უამრავი სტატია დაიწერა. ამ ამბის კულმინაცია შანჰაის ერთ-ერთი ცათამბჯენის 94-ე სართულზე ჩატარებული მსოფლიო პრემიერა და წარმოების დაწყება იყო. თუმცა, გერმანული კომპანიისთვის ამ ისტორიული ავტომიბილის გაყიდვები ჯერაც არ დაწყებულა.

დღეს კი ინტერნეტით გავრცელდა ინფორმაცია იმის შესახებ, რომ მალე ”პორშე” ”პანამერას” ჰიბრიდული და ეკონომიური V6 ძრავებით აღჭურვილი ვერსიების წარმოებასაც დაიწყებს. სააგენტო ”ესოშიეიტიდ პრესთან” საუბრისას, ”პორშეს” დირექტორთა საბჭოს წევრმა მიხაელ მახტმა განაცხადა, რომ მისი კომპანია მერმის უგზოობის ”კაიენის” ჰიბრიდული ვერსიის წარმოებას დაიწყებს, რის შემდეგაც ანალოგიური აგრეგატით აღჭურვილი ”პანამერას” ჯერიც დადგება.

”კაიენზე” კი ცუფენჰაუზენელები (ქალაქ შტუტგარტის გარეუბანია) ”აუდის” ჰიბრიდულ აგრეგატს გამოიყენებენ, რომელშიც ელექტროძრავთან 3.0-ლიტრიანი V6-ია შეწყვილებული. სავარაუდოდ, ისინი ”პანამერაზეც” ამავე სისტემას გამოიყენებენ.

ამასთან, ამ ეტაპზევე ცნობილია, რომ ”პანამერა” არ აღჭურვება იმ ექვსცილინდრიანი ძრავით, რომელსაც ცილინდრები ერთ რიგში აქვს განლაგებული. ”პორშეს” კვლევის და განვითარების შტოს ხელმძღვანელ ვოლფგანგ დურჰაიმერის თქმით, ამის მიზეზი ისაა, რომ ეს აგრეგატი, თავისი გაბარიტების გამო, ”პანამერას” კაპოტქვეშა სივრცეში ვერ ჩაეტევა.

V6 ძრავით აღჭურვილი ”პანამერას” ფასი კი, ამ მოდელის ვერსიებს შორის ყველაზე დაბალი იქნება. ცნობისათვის, ამ ეტაპზე, ყველაზე იაფია ”პანამერა S”, რომლის საბაზო ღირებულებაც 90 000 დოლარია.

”ბეემვე” მე-3 სერიის GT-საც გამოუშვებს

BMW 3-series GT

2 ივლისი

ერთი თვე არ გასულა მას შემდეგ, რაც ”ბეემვემ” თავისი სრულიად ახალი ავტომობილი - მე-5 სერიის GT გაგვაცნო, რომელიც შემდეგი თაობის მე-5 სერიის სედანის პლატფორმაზეა ბაზირებული. ორივე ეს ავტომობილი ბაზარზე მერმის გამოჩნდება, მაგრამ უკვე ახლა, მე-5 სერიის GT იმდენად პოპულარულია, რომ ბავარიელებმა მისი მომცრო ვერსიის წარმოებაც გადაწყვიტეს, რომლის ბაზისადაც მე-3 სერიის სედანის პლატფორმას გამოიყენებენ.

გარეგნულად ორივე კლასის GT ერთმანეთის მსგავსი იქნება. მათ ძირითადად გაბარიტები და უკანა ნაწილი განასხვავებს. ბავარიული კომპანიის ბლოგ-გვერდზე გავრცელებული ფოტოს (სურათზე) მიხედვით, მე-3 სერიის GT უკნიდან ”ოპელის” ახალ ”ასტრას” ჰგავს, რომლის მსოფლიო პრემიერაც ფრანკფურტის ავტო შოუზე იგეგმება. მთლიანობაში კი ავტომობილი ”ბეემვეს” ახალ კორპორატიულ სტილში შესრულდება.

მოსალოდნელია, რომ მისი მეხუთე, უკანა კარიც მე-5 სერიის GT-ს ანალოგიური ნაწილის მსგავსი იქნება. შეგახსენებთ, რომ ამ ავტომობილის უკანა კარი ორ საფეხურად იხსნება. თუ მასში მცირე ზომის ბარგს დებთ, კარის მხოლოდ ქვედა ნაწილის გახსნაც საკმარისია. მაგრამ თუ ტვირთი მოზრდილია, მაშინ კარის ზედა სეგმენტის გახსნაც შესაძლებელია.

მე-3 სერიის GT ორი ტიპის - სრულამძრავიანი და უკანა წამყვან ბორბლიანი ტრანსმისიებით აღიჭურვება, მამოძრავებელ ძალას კი ის ოთხ და ექვსცილინდრიანი ძრავებისგან მიიღებს.

”ბეემვეს” სამოდელო გამაში, მე-3 სერიის GT ამავე სერიის სედანსა და X3-ს შორის დაიკავებს ადგილს, ბაზარზე კი მისი მთავარი კონკურენტები ”აუდის” უნივერსალი A4 ავანტი და უგზოობის Q3 იქნებიან.

უბრალოდ, სხვანაირი ”ჰამერი”

2 ივლისი

ალბათ სადაო არ უნდა იყოს ის, რომ ”ჰამერის” ავტომობილები დიდი სილამაზით არასდროს გამოირჩევიან. განსაკუთრებით ეს სამხედრო ”ჰამვის” ეხება და ამაში გასაკვირი არაფერია - ის კონკრეტული, სამხედრო დანიშნულების ავტომობილია და მის ღირსებებში სხვა თვისებები შედის, ვიდრე ესთეტიკაა. და მაინც, ბევრია ისეთიც, რომელსაც ამ მონსტრის გარეგნობაში სიძლიერის, უხეშობის ვიზუალური გამოხატულება მოსწონს.

მაგრამ ძნელად წარმოსადგენია თუნდაც ძალიან უცნაური გემოვნების მქონე ადამიანი, რომელსაც ამ ათლეტის შერბილებული ფორმები, ნაზი და იმავდროულად, ყოველგვარ ელეგანტურობას მოკლებული ფორმები მოეწონება. ძნელად წარმოსადგენია, მაგრამ თურმე, ასეთებიც არსებობენ (სამყარო ხომ მრავალფეროვანია).

ამის დასტური ამ დღეებში საინტერნეტო აუქციონ eBay-ზე გამოჩნდა. უცნობმა ენთუზიასტმა საბაზო ავტომობილად ”ჰამერ H1” აირჩია და წითელი სიმახინჯე შექმნა, რომელსაც ცხვირი სამხედრო და სპეცტექნიკის მწარმოებელი გერმანული კომპანია ”უნიმოგის” წინა ნაწილს მიამსგავსა. დანარჩენი კი თითქმის ყველაფერი ხელუხლებლად დატოვა.

რაც შეეხება სალონს, აქ ცვლილებები უფრო რადიკალურია. ხელსაწყო-მაჩვენებლების დაფა სირაქლემას ტყავითაა გაწყობილი. ცენტრალურ დაფაზე და მის ზევით, ძირითადად საქარე მინის ტიხარზე, რამდენიმე მონიტორია ”ასხმული”. გადაცემათა კოლოფის საფეხურების შესაცვლელ ბერკეტზე კი გამოშიგნული და მოქრომილი ხელყუმბარაა წამოცმული.

ჰო, მართლა, ავტომობილს სახელი არ აქვს (ყოველ შემთხვევაში, აუქციონზე სახელის გარეშეა რეგისტრირებული), მაგრამ რამდენადაც მისი კაპოტის თავზე ბულდოგის მოქრომილი სტატუეტი წამოსკუპებულა, პირობითად მას შეიძლება ”ბულდოგი” ვუწოდოთ.

და რა ღირს უცნობი ტუნერის ქმნილება? მისი შემქმნელი ირწმუნება, რომ ავტომობილის შეძენის ჩათვლით, მისი ტუნინგი 180 000 დოლარი დაუჯდა. მაგრამ აუქციონზე მხოლოდ 89 000 აქვს მოთხოვნილი...

”ჯენერალ მოტორსის” რეკორდული გაყიდვები ჩინეთში

2 ივლისი

იმ დროს, როდესაც ”ჯენერალ მოტორსის” ბედი აშშ-ის გაკოტრების საქმეთა სასამართლოსთვისაა მინდობილი, ამერიკული კომპანია ჩინეთის ბაზარზე გაყიდვების რეკორდულ მაჩვენებლებს აღწევს. რიცხვების ენაზე, ”გენერლებმა” და მათმა ერთობლივმა საწარმოებმა ცისქვეშეთში ამ წლის პირველ ექვს თვეში უკვე 814 442 ავტომობილის გაყიდვა მოასწრეს, რაც წინა წლის ანალოგიური პერიოდის ასევე რეკორდულ მაჩვენებელზე 38 პროცენტით მეტია.

”ჩინეთის საავტომობილო ბაზარი ყოველგვარ მოლოდინს აჭარბებს. ზრდა გამოწვეულია როგორც მთავრობის მიერ გატარებული სტიმულირების ღონისძიებებით, ასევე პროვინციულ საშუალო ზომის ქალაქებში პირად ტრანსპორტზე მზარდი მოთხოვნით”, - ამბობს ”ჯენერალ მოტორსის” ჩინური შტოს პრეზიდენტი კევინ უეილი.

ამერიკული კომპანიის ჩინური მედროშე ისევ მარკა ”ბიუიკია”, რომლის გაყიდვებიც 34 პროცენტითაა გაზრდილი. ამ მარკის მოდელებიდან კი ჩინელებში ყველაზე მეტი პოპულარობით ქვესაშუალო კლასის სედანი ”ექსსელი” (სურათზე) ლიდერობს (115 877 გაყიდული ავტო). ასევე იზრდება საშუალო ზომის სედან ”რეგალის” პოპულარობა. გასულ ექვს თვეში სულ 35 729 ცალი ”რეგალი” გაიყიდა. მალე დაიწყება კიდევ ერთი საშუალო კლასის (ოღონდ პრემიუმ) სედანის - ”ლაქროსის” გაყიდვები, რომელსაც ჩინეთში მოუთმენლად ელიან. აღსანიშნავია, რომ ორივე ეს ავტომობილი, ევროპის წლის საუკეთესო ავტომობილად არჩეული ”ოპელ ინსინიას” ბაზაზეა დამზადებული.

უეილი დარწმუნებულია, რომ ”ლაქროსის”, ჰიბრიდული ”კადილაკ ესკალადისა” და ”რეგალის” ახალი ვერსიების წყალობით, ”ჯენერალ მოტორსის” გაყიდვების ტემპი არათუ შენარჩუნდება, არამედ გაიზრდება კიდეც.

გაყიდვების ყველაზე მაღალი (49.9-პროცენტიანი) ტემპით ”ჯენერალ მოტორსის”, ”შანჰაი ოტომოტივისა” (SAIC) და კიდევ ერთი ჩინური კომპანიის - ”ვულინის” ერთობლივი საწარმო გამოირჩევა. ამ საწარმოს გაყიდვებმა 524 598 ავტომობილს მიაღწია. ცალკეულ მოდელებს შორის კი ყველაზე სწრაფად ”შევროლე სპარკის” (რომელსაც ზემოთ ნახსენები ერთობლივი საწარმო უშვებს) გაყიდვები იზრდება - პირველ ექვს თვეში 32 065 ცალი ”სპარკია” გაყიდული, რაც წინა წელთან შედარებით, 60 პროცენტით მეტია.

”მერსედეს-ბენცი” ”ტოიოტას” პლატფორმას გამოიყენებს

2 ივლისი

სულ რამდენიმე დღის წინ, საავტომობილი სამყარომ შეიტყო იმის შესახებ, რომ ”ტოიოტას” ყველაზე მცირეგაბარიტიან მოდელ iQ-ს ბაზაზე, ”ასტონ მარტინი” თავის ისტორიაში ყველაზე პატარა ავტომობილს გამოუშვებს. და აი, გუშინ გერმანულმა” გამოცემა ”აუტო მოტორ უნდ შპორტმა” გაავრცელა ინფორმაცია იმის შესახებ, რომ თავისი A და B-კლასის მომდევნო თაობის მოდელებისთვის, ”მერსედეს-ბენცი” იაპონური კომპანიის პლატფორმის გამოყენებას გეგმავს.

გერმანული ჟურნალის ინფორმაციით, ლაპარაკია პლატფორმა MC-ზე, რომელსაც იაპონური კომპანია თავის სხვადასხვა კლასის მოდელების - ”ლექსუს RX-ის”, ”ლექსუს ES-ის”, ”ტოიოტა RAV4-ის”, ”ტოიოტა კოროლასა” და ”ტოიოტა ჰაილენდერის” წარმოებისას იყენებს.

მაინც, რაში სჭირდებათ ამ კომპანიებს ესოდენ მჭიდრო თანამშრომლობა, ისინი ხომ კონკურენტები არიან? მათი კოოპერაციის მთავარი მამოძრავებელი ძალა, ახალი მოდელების შემუშავებისას თანხების დაზოგვაა, რაც ამ მოდელების ბაზარზე გამოშვებისას, მათი ფასის კონკურენტულობაში აისახება. მეორეს მხრივ, პლატფორმის მიმწოდებელი მხარე (ტოიოტა) სრულად აითვისებს იმ საწარმოების პოტენციალს, რომელსაც ამ ეტაპზე მესამედითაც ძლივს იყენებს.

აქ ბუნებრივად იბადება კითხვა: მერედა, ”ტოიოტას” ზემოთ ჩამოთვლილი მოდელები ხომ გაბარიტებით მნიშვნელოვნად აღემატებიან შტუტგარტელების სამოდელო გამის ყველაზე პატარა მოდელებს? საქმე ისაა, რომ პლატფორმა MC უნივერსალურია და მინიმალური ხარჯებია საჭირო იმისათვის, რომ ის პატარა ავტომობილებს მიესადაგოს. აქვე ისიც უნდა გავიხსენოთ, რომ უკვე დიდი ხანია, რაც საკუთარი მოდელებისთვის ”ტოიოტა” მხოლოდ ოთხ პლატფორმას იყენებს.

”მერსედეს-ბენცი” კი დიდი ხანია, თავისი პატარა მოდელების წარმოებისთვის სოლიდურ პარტნიორს ეძებს. სხვათა შორის, ამ მოდელების ბაზაზე, შტუტგარტელები ისეთივე მინი ბრენდების ჩამოყალიბებას გეგმავენ, როგორიც ”ფოლკსვაგნისთვის” ”გოლფია”, ”ოპელისთვის” კი - ”ასტრა”.

რა თქმა უნდა, იაპონური კომპანიის მიერ წარმოებული პლატფორმა გერმანული ავტომობილების შიგნით ჩაიმალება. გარედან კი A და B-კლასის მოდელები ”მერსედეს-ბენცის” კორპორატიულ სტილში შესრულდებიან და გერმანული კომპანიისვე აგრეგატებით აღიჭურვებიან. სხვანაირად არც შეიძლება იყოს, თორემ ”სამქიმიანების” შედარებით ძვირ პროდუქციას ვინღა იყიდის?

”მაზდა” სუბკომპაქტურ როდსტერს გამოუშვებს

Mazda MX-2

1 ივლისი

იაპონური კომპანია ”მაზდა” 2012 წლისთვის ახალი, სუბკომპაქტური და ფასით ხელმისაწვდომი როდსტერის გამოშვებას გეგმავს, რომელიც მის სამოდელო გამაში, ადგილს პოპულარულ MX-5-ზე ერთი საფეხურით დაბლა დაიკავებს.

ბრიტანულ გამოცემა ”აუტოექსპრესის” ცნობით, რომელიც ”მაზდას” ინკოგნიტო წყაროს ეყრდნობა, ახალ ავტომობილს MX-2-ს დაარქმევენ. იმავე წყაროს მიერ მოწოდებული ინფორმაციით, ამ ავტომობილის კონცეპტუალურ ვერსიას იაპონური კომპანია საზოგადოებას უახლოეს მომავალში, სავარაუდოდ ფრანკფურტის შოუზე უჩვენებს.

ახალი როდსტერი მცირელიტრაჟიანი, ეკონომიური ძრავებით აღიჭურვება. მათი მუშა მოცულობა 0.7-დან 1.6-ლიტრამდე იქნება, ყველაზე მძლავრი ძრავის სიმძლავრე კი 160 ცხენის ძალას მიაღწევს. თუ იმასაც გავითვალისწინებთ, რომ ავტომობილის წონა 1 000 კილოგრამზე ნაკლები უნდა იყოს, შეიძლება ვივარაუდოთ, რომ ის შედარებით მძლავრ ავტომობილებზე მანევრული იქნება.

იგივე წყარო ირწმუნება, რომ ახალი, პატარა როდსტერი კონცეპტუალური ”ფურაის” (სურათზე მისი წინა სეგმენტი ჩანს) დიზაინის ზოგიერთ ელემენტს მიიღებს. ოღონდ, მისგან განსხვავებით, ნაკლებად აგრესიული იერი ექნება.

აღსანიშნავია, რომ 2012 წელს ”მაზდა” ასევე აპირებს მომდევნო თაობის MX-5-ის (იგივე მიატას) წარმოების დაწყებას. უკვე ცნობილია, რომ ეს ისედაც კომპაქტური მოდელი ზომებში კიდევ უფრო შემცირდება, მისი წონა კი 10 პროცენტით დაიკლებს. ავტომობილი 1.4 და 1.6-ლიტრიანი ტურბოძრავების განახლებულ გამას მიიღებს. ამასთან, ახალ MX-5-ზე ძრავი ისევ წინ განლაგდება, წამყვანი კი ისევ უკანა ბორბლები იქნება.

”დოჯი” ”ალფას” მარკით და პირიქით

1 ივლისი

”კრაისლერის” ახალი მფლობელი - იტალიური ”ფიატი” ამერიკული კომპანიის რესტრუქტურიზაციას აგრძელებს. ამიერიდან ”კრაისლერის” ბრენდ ”დოჯის” ავტომობილები ევროპაში ”ალფა რომეოს” მარკით გაიყიდება, აშშ-ის ბაზარზე კი პირიქით - საკუთარ სადილერო ქსელში, ”დოჯი” ”ალფა რომეოს” ავტომობილებს საკუთარი მარკით გაჰყიდის.

ჟურნალ ”აუტოქართან” საუბრისას, ”ფიატის” მთავარმა აღმასრულებელმა სერჯო მარკიონემ, ვინც იმავდროულად, ”კრაისლერის” მთავარი აღმასრულებელიცაა, განაცხადა, რომ ”ალფა რომეოს” და ”დოჯს” ბაზარზე თითქმის ერთნაირი პოზიცია უკავია და ერთიდაიმავე მყიდველზეა ორიენტირებული. ამიტომ, ერთსადაიმავე ბაზარზე ორივე მარკის გამოჩენა შიდა კონკურენციას გაზრდის, რაც არასასურველია.

”ჩვენი მიზანი შიდა კონკურენციის გამორიცხვა, ან მინიმიზაციაა. ”დოჯი” ამერიკული მასკლ ქარების მწარმოებელია, ”ალფა რომეო” კი - იტალიურის. და ისინი ერთ ბაზარზე რომ გავუშვათ, ერთმანეთს დიდ კონკურენციას გაუწევენ, რადგან ისინი მყიდველის ერთსადაიმავე კატეგორიაზე არიან ორიენტირებულნი. ამის დაშვება კი ჩვენ არ შეგვიძლია”, - ამბობს მარკიონე.

შეგახსენებთ, რომ ”ფიატმა” გაკოტრებული ამერიკული კომპანია ერთი თვის წინ იყიდა. იტალიური კომპანია ახალი ”კრაისლერის” აქციების 20 პროცენტს დაეუფლა, თუმცა თავისი წილის 35 პროცენტამდე გაზრდის უფლება აქვს. ისე კი, ”კრაისლერის” უმსხვილესი აქციონერი ამერიკული ავტოპროფკავშირების გაერთიანებაა, რომელსაც კომპანიის აქციების 55 პროცენტი ეკუთვნის.

ჯერჯერობით უცნობია, შეეხება თუ არა ეს მიდგომა ”ალფა რომეოს” საიმიჯო სუპერავტომობილ ”8C კომპეტიციონეს” (სურათზე) და ”დოჯის” ”ვაიპერს”. სავარაუდოდ, ორივე ეს მოდელი გლობალური მასშტაბით შეინარჩუნებს იდენტობას. თუმცა, გამორიცხული არც ისაა, რომ ”ვაიპერი”, როგორც ცალკეული ბრენდი, გაიყიდოს.

ვილნევი ფორმულა 1-ში დაბრუნებაზე ოცნებობს

Formula 1

1 ივლისი

მსოფლიოს 1997 წლის ჩემპიონმა, კანადელმა ჟაკ ვილნევმა განაცხადა, რომ ფორმულა 1-ში დაბრუნებაზე ოცნებობს. ვილნევი ფორმულა 1-დან 2006 წელს წავიდა. ის სეზონი მისთვის უკიდურესად წარუმატებელი გამოდგა, რის გამოც, ჩემპიონატის ბოლო ექვს ეტაპზე, ”ბეემვე ზაუბერში” მისი მონოპოსტი პოლონელმა რობერტ კუბიცამ დაიკავა.

საინტერნეტო გამოცემა ”ფლაგუორლდის” ცნობით, დიდი პრიზების ცირკიდან წასვლის შემდეგ, ვილნევის ცხოვრება რადიკალურად შეიცვალა. ის თავისი ორი ბიჭის აღზრდითაა დაკავებული, შიგადაშიგ კი სხვადასხვა სერიების რბოლებშიც მონაწილეობს.

ამასთან, ვილნევმა სრულებით გაწყვიტა კავშირი თავის ყოფილ მენეჯერ კრეიგ პოლოკთან, ვისთან ერთადაც, 1999 წელს გუნდი ”ბრიტიშ ამერიკენ რეისინგი” (შემდგომში ჰონდა და ბრაუნ GP) ჩამოაყალიბა. სხვათა შორის, ბევრი იმ ფაქტს, რომ გაჩემპიონების შემდეგ, ვილნევის კარიერა უკან-უკან წავიდა, სწორედ პოლოკთან მის ახლო ურთიერთობას მიაწერს.

”ძალიან ახალგაზრდა ვარ იმისათვის, რომ კარიერას წერტილი დავუსვა. არც მოტივაცია მაკლია და არც ბრძოლის ჟინი”, - ამბობს ვილნევი, ვინც ხანდახან, საავტომობილო რბოლების გარდა, მოტოქროსის რბოლებშიც მონაწილეობს. 11 ივლისს კი ის მონაწილეობას ნასქარ-ის სერიის კანადურ ეტაპზე მიიღებს.

კულუარებში მოარული ხმების მიხედვით, კანადელი ავტომრბოლი მოლაპარაკებას ფ1-ის ახალ გუნდთან, ამერიკულ US F1-თან აწარმოებს, რომელიც თავისი დებიუტისთვის, გამოცდილი და სპონსორებისთვის საინტერესო პილოტის მიწვევით უნდა იყოს დაინტერესებული.

სურათზე: ჟაკ ვილნევი და მისი მეუღლე იოანა

კონკურენტებზე უფრო სპორტული ”ვოლტი”

Chevy Volt

1 ივლისი

”ჯენერალ მოტორსის” მიერ ფართოდ რეკლამირებული პროექტი შევროლე ვოლტი” უკვე იმ ეტაპზე იმყოფება, რომ მისი შეჩერება შეუძლებელია. ავტომობილის რამდენიმე ათეული პროტოტიპი სრულმასშტაბიან ტესტირებას კომპანიის უორენის (შტატი მიჩიგანი) სატესტო პოლიგონზე გადის, ”გენერლების” მარკეტოლოგები კი უკვე ფიქრობენ იმ სარეკლამო ხერხებზე, რომელთა მეშვეობითაც, ავტომობილი ბაზარზე ისეთ ძლიერ მეტოქეებთან კონკურენციას შეძლებს, როგორებიც ”ტოიოტა პრიუსი” და ”ჰონდა ინსაითია”.

პროექტის მთავარი ინჟინერი ენდრიუ ფარა ამბობს, რომ ”ვოლტი” თავის კონკურენტებთან შედარებით, ”ტოიოტა პრიუსთან” და ”ჰონდა ინსაითთან” შედარებით, უფრო სპორტული ავტომობილი იქნება და აქედან გამომდინარე, პოპულარობას ახალგაზრდა მყიდველთა შორის მოიპოვებს.

ფარამ ასევე განაცხადა, რომ წინასერიულ ვერსიასთან შედარებით, ”ვოლტის” საწარმოო ვერსიამ მცირე გარეგნული ცვლილებაც განიცადა. მაგალითად, ადგილი შეიცვალა ავტომობილის ელექტროენერგიით გასაწყობმა შტეპსელმა, რომელიც ადრე მარცხენა წინა საყრდენის ქვევით იყო მოთავსებული, მაგრამ იმ ადგილზე გადაინაცვლა, სადაც შიდაწვისძრავიან ავტომობილებს საწვავით გასაწყობი მილი აქვთ.

ასევე შეცვლილია წინა მაშუქების და უკანა სტოპ ფარების დიზაინი. თუმცა ფარა აღნიშნაცს, რომ ამ ელემენტებს ჯერ საბოლოო სახე არ მიუღია და წარმოების დაწყებამდე ისინი შეიძლება კიდევ შეიცვალოს.

დაბოლოს, მსტოვრულ ფოტოებზე სპეციელიზებულ რეპორტიორთა გასაგონად, ფარამ განაცხადა, რომ ამ ზაფხულში ”ვოლტი” ძლიერი სიცხის პირობებში ინტენსიურ ტესტებს აშშ-ის დასავლეთში (სავარაუდოდ, მოჰავეს უდაბნოში) გაივლის.

”ჯენერალ მოტორსს” ლიკვიდაცია ემუქრება

General Motors

1 ივლისი

ნიუ იორკში, აშშ-ის გაკოტრების საქმეთა სასამართლოში, დაიწყო სასამართლო გარჩევის პროცესი, რომელზეც გაკოტრების რეჟიმში მყოფი ”ჯენერალ მოტორსის” რეორგანიზაციის საკითხი განიხილება.

მოსმენის პირველ დღეს, კომპანიის მთავარმა აღმასრულებელმა ფრიც ჰენდერსონმა რესტრუქტურიზაციის გეგმა წარადგინა, რომლის მიხედვითაც, გაკოტრებული კომპანიის დადებითი აქტივები ახალ კომპანიას უნდა გადაეცეს, რომელსაც რეალურად ამოქმედების შემთხვევაში, სახელმწიფოსგან სრული მხარდაჭერა გარანტირებული ექნება.

მაგრამ თუ ახალი ”ჯენერალ მოტორსი” 10 ივლისამდე ვერ ამოქმედდება, მაშინ სახელმწიფო ძველსაც ზურგს შეაქცევს და გაკოტრების რეჯიმი კომპანიის ლიკვიდციით დასრულდება.

ჰენდერსონმა ასევე ხაზი გაუსვა იმ ფაქტს, რომ კომპანიის თანამშრომლები, პროდუქციის მომხმარებლები და მაკომპლექტებლების მიმწოდებლები ოპტიმიზმით ელიან სასამართლოს გადაწყვეტილებას და იმედი აქვთ, რომ გაკოტრებული კომპანია ”ახალი ჯენერალ მოტორსის” სახელით გააგრძელებს მუშაობას.

თუ სასამართლო რესტრუქტურიზაციის გეგმას მწვანე შუქს აუნთებს, გაკოტრების კანონის 363-ე მუხლის შესაბამისად, გაკოტრებული ”ჯენერალ მოტორსი” თავის დადებით აქტივებს (მათ შორის, თავის ოთხ ძირითად ბრენდს - ბუიკს, შევროლეს, კადილაკს და GMC-ს) ”ახალ ჯენერალ მოტორსს” მიჰყიდის, გარიგების ფინანსურ უზრუნველყოფას კი თავის თავზე აშშ-ის ხაზინა იკისრებს, რომელიც ამ საქმისთვის მილიარდობით დოლარს გაიღებს და ახალი ”ჯენერალ მოტორსის” თანააქციონერი გახდება.

რესტრუქტურიზაციის გეგმის მიხედვით, ახალი ”ჯენერალ მოტორსის” აქციების 17.5 პროცენტი ავტოპროფკავშირების ხელში გადავა, 12 პროცენტს კანადის მთავრობა მიიღებს, 10 პროცენტი კი სხვადასხვა ფასიანი ქაღალდების მფლობელთა ჯგუფს გადაეცემა. დანარჩენი აქციების უმეტესობას (60 პროცენტს) კი აშშ-ის მთავრობა მიიღებს, რომელიც მათ თავად კომპანიას მაშინვე მიჰყიდის, როგორც კი ის მომგებიან ბიზნესზე გადავა.

სურათზე: ფრიც ჰენდერსონი სასამართლოს ”ჯენერალ მოტორსის” რესტრუქტურიზაციის გეგმას აცნობს

რაიკონენი ფინეთის რალიზე იასპარეზებს

Formula 1

1 ივლისი

ფორმულა 1-ის მსოფლიო ჩემპიონატის კალენდარში, უნგრეთისა და ევროპის დიდ პრიზებს შორის არსებულ ერთთვიან პაუზას ”ფერარის” ფინელი პილოტი, კიმი რაიკონენი რალის მსოფლიო ჩემპიონატის ფინურ ეტაპზე საასპარეზოდ გამოიყენებს.

რალი ფინელების ეროვნულ სპორტის სახეობად თავისუფლად შეიძლება ჩაითვალოს - ფინელ პილოტებს მსოფლიო ჩემპიონის 14 ტიტული (32-დან) აქვთ მოპოვებული და რა გასაკვირი უნდა იყოს, რომ რალი რაიკონენსაც სისხლში ჰქონდეს. ასეც არის - როცა დროს გამონახავს, ის ყოველთვის ცდილობს რომელიმე რბოლაზე გამოსვლას. მაგალითად, ზამთარში ეროვნული ჩემპიონატის ორ ეტაპზე იასპარეზა (ერთზე მე-13 ადგილი დაიკავა, მეორე კი ვერ დაასრულა), მაისის ბოლოს კი იტალიურ ”რალი დელა მარკაზე” გამოვიდა (რბოლა ვერ დაასრულა).

მსოფლიო ჩემპიონატის ფინურ ეტაპზე, რომელიც ასევე ”ათასი ტბის რალის” სახელითაცაა ცნობილი, რაიკონენის ნავიგატორი კვლავ მისი თანამემამულე კაი ლინდსტრომი იქნება, ვინც თავის დროზე, მსოფლიოს ოთხგზის ჩემპიონის, ფინელი ტომი მაკინენის ნავიგატორი იყო. ისევე როგორც წინა სამ შემთხვევაში, ისინი მაკინენის ფირმის მიერ მომზადებული ”ფიატ აბარტ გრანდე პუნტო S2000-ით” იასპარეზებენ.

”ეს შესანიშნავი რბოლაა, კიმისთვის კი ის ორმაგად საინტერესო იქნება, რამდენადაც მასზე პირველად გამოვა. ფინეთის რალი მსოფლიოში ერთ-ერთი უსწრაფესი რბოლაა, მისი დისტანცია კი ზამთრის ”არქტიკ რალიზე” თითქმის ორჯერ გრძელია. კიმი ძალიან ნიჭიერი მრბოლია და ის ამ ნიჭს ნებისმიერი ტექნიკით ასპარეზობისას ავლენს. თუმცა, ისიც უნდა გავითვალისწინოთ, რომ მაინც რალის დამწყები მრბოლია. ნებისმიერ შემთხვავეში, აქ მისი გამოსვლა ძალიან საინტერესო იქნება”, - ფინურ გაზეთ ”ილტალეჰტისთან” საუბრისას განაცხადა ლინდსტრომმა.

აღსანიშნავია, რომ როგორც წესი, ფორმულა ერთის პილოტებს კონტრაქტები სხვა ტურნირებში გამოსვლის უფლებას არ აძლევს, მითუმეტეს, ეს გაზრდილი რისკის მატარებელ ტურნირებს ეხება. მაგრამ ამჯერად, რაიკონენმა ”ფერარისგან” ფინეთის რალიზე ასპარეზობის უფლება მიიღო.

ავსტრალიური სუპერავტომობილი ”ფერარის” ახალი მეტოქე

Joss Supercar

1 ივლისი

”ჯოს სუპერქარი” პირველი ავსტრალიური შუაძრავიანი სპორტული ავტომობილია, რომელსაც, თუ მის შემქმნელს დავუჯერებთ, ისეთი ავტორიტეტების უკან მოტოვება შეუძლია, როგორებიც ”პორშე”, ”ლამბორგინი” და ”ფერარია”.

პატარა ფირმა ”ჯოს სუპერქარი” და იმავე სახელწოდების ავტომობილი ავსტრალიელ ენთუზიასტ მეტ თომასის შექმნილია. პირველად მან საზოგადოებას თავისი პირმშოს პროტოტიპი ხუთი წლის წინ უჩვენა, მაგრამ საჭირო სახსრების არქონის გამო, პროექტის განხორციელება გაუჭიანურდა. მაგრამ დღეს ავტომობილი წარმოებისთვის მზადაა.

თომასი ირწმუნება, რომ ”ჯოს სუპერქარი” ადგილიდან 100 კმ/სთ სიჩქარის აკრეფას 2.98 წამში ახერხებს, მისი მაქსიმალური სიჩქარე კი თითქმის 338 კმ/სთ-ია. ამის საშუალებას სვტომობილს 6.8-ლიტრიანი V8 ძრავი აძლევს, რომლის თითოეული ცილინდრის ”სუნთქვასაც” მხოლოდ ორი სარქველი ემსახურება. ესოდენ არქაული კონსტრუქციის მიუხედავად, ძრავი 500 ცხენის ძალასა და 650 ნიუტონმეტრს მაინც იძლევა. მასთან კი, სამდისკოიანი გადაბმულობის ქურის მეშვეობით, ”პორშეს” 5-საფეხურიანი მექანიკური კოლოფია (G50) დაკავშირებული.

ავტომობილის მზიდი ელემენტი ფოლადის მილებითაა შეკრული, რომელიც კარბონის ბოჭკოს კომპოზიტური გარსითაა შემოვლებული. ეს კი მის სოლიდურ სიხისტეს განაპირობებს. ”ჯოს სუპერქარი” სპორტული ავტომობილისთვის შესაფერისი გაბარიტებითაც გამოირჩევა: მისი სიგრძე 4150, სიგანე 1860, სიმაღლე 1050 და ბაზა 2560 მილიმეტრია. ზეთით და საწვავით სრულად გაწყობილი ავტომობილი კი 940 კილოგრამს იწონის.

რაც შეეხება ”ჯოს სუპერქარის” გარეგნობას, ის ერთდროულად სამი ცნობილი სპორტული ავტომობილის ერთგვარი ნაზავია. პროპორციებით ის ”მაკლარენ F1-ს” მოგვაგონებს. ამავე ავტომობილს საქარე შუშა მიუგავს. ავტომობილის წინა ნაწილი ახლოსაა ”ასკარი KZ1-თან”, უკნიდან კი ის უფრო ”სალეენ S7-ს” წააგავს. ავტომობილი მხოლოდ ერთ, ზღვის ფერში შეიღებება.

თომასი იმედოვნებს, რომ პირველ 25 ცალ ”ჯოს სუპერქარს” სწრაფად გაჰყიდის. შემდეგ კი წარმოების მოცულობა შეკვეთებზე იქნება დამოკიდებული. ავტომობილის ღირებულება კი 600 000 ავსტრალიური დოლარია, რაც დღევანდელი კურსით, დაახლოებით 480 000 აშშ დოლარის ტოლფასია.

დაბოლოს, მეტ თომასს დიდი სურვილი აქვს, რომ მისმა ავტომობილმა GT კლასის რბოლებსა და ლე მანის 24-საათიან რბოლაში მიიღოს მონაწილეობა. ჰოდა, ის არ გამორიცხავს, რომ ამისათვის შეიძლება თავადვე შექმნას გუნდი, რომელიც ამ ოცნების განხორციელებაშიც დაეხმარება.

”შკოდამ” ახალი ეკონომიური ძრავის წარმოება დაიწყო

Skoda 1.2l HTP Engine

1 ივლისი

”ფოკლსვაგენის” ჯგუფში შემავალმა ჩეხურმა კომპანია ”შკოდამ”, მლადა ბოლესლავში მდებარე ძრავების ქარხანაში სამცილინდრიანი, 1.2-ლიტრიანი HTP სერიის ბენზინის ძრავის მოდიფიცირებული ვერსიის წარმოება დაიწყო, რომელიც ”შკოდას” ტექნიკური განვითარების დეპარტამენტის სპეციალისტების მიერაა მომზადებული.

აგრეგატმა მრავალმხრივი მოდიფიკაცია გაიარა. ერთ-ერთი ყველაზე მნიშვნელოვანი ცვლილება ისაა, რომ შეიცვალა გაზგამანაწილებელი სისტემის ჯაჭვის კონსტრუქცია. შემცირდა მუხლა ლილვის წონა. ოპტიმიზაცია ჩაუტარდა წვის კამერას, ასევე შეშვების და გამოშვების სისტემებს. ჩატარებული სამუშაოების შემდეგ, ძრავი უფრო გაწონასწორებული, ეკონიომიური, მსუბუქი გახდა. ასევე მნიშვნელოვნად შემცირდა მის მიერ ატმოსფეროში გამოტყორცნილ აირში სათბურის ეფექტის მქონე მინარევები.

”შკოდას” დირექტორთა საბჭოს წევრი ეკჰარდ შოლცი, ვინც კომპანიის განვითარების დეპარტამნტს ხელმძღვანელობს, აცხადებს, რომ გაუმჯობესდა ამ ძრავის ორივე ვერსია, რომელთაგან ერთს თითო ცილინდრზე მხოლოდ ორი სარქველი აქვს, მეორეს კი - ოთხი.

1.2-ლიტრიანი HTP პირველ რიგში, ”შკოდას” ორი მოდელის - ”ფაბიასა” და ”რუმსტერისთვის” არის განკუთვნილი. მას ასევე მიიღებენ ”ფოკლსვაგენის” ჯგუფის კომპანიების შემდეგი მოდელები: ”ფოკლსვაგენის” ”პოლო” და ”ფოქსი”, ასევე ”სეატის” ”იბიცა” და ”კორდობა”.

ცნობისათვის, 1.2-ლიტრიანი HTP ძრავის წინა ვერსია 60 და 70 ცხენის ძალას და 108 ნიუტონმეტრს (3 000 ბრ/წთ-ზე) იძლეოდა, მისი მეშვეობით, ”ფაბიას” 100 კმ/სთ-ის ასაკრეფად 15.1 წამი სჭირდებოდა, მისი მაქსიმალური სიჩქარე კი მხოლოდ 156 კმ/სთ-ს აღწევდა. ას კილომეტრზე მას 5.9 ლიტრი ბენზინი სჭირდებოდა, ყოველი კილომეტრის გავლისას კი ატმოსფეროს 140 გრამი ნახშირორჟანგით აბინძურებდა.

ჯერჯერობით, ”შკოდას” ახალი ძრავის ტექნიკურ-ეკონომიკური მახასიათებლები არ გამოუქვეყნებია, თუმცა სავარაუდოა, რომ ის ყველა ასპექტში წინამორბედზე გაცილებით უკეთესი იქნება.