”ვისმანის” ყველაზე მძლავრი როდსტერი ფრანკფურტისთვის ემზადება

Wiesmann Roadster MF5

20 აგვისტო

ექსკლუზიური ავტომობილების მწარმოებელმა გერმანულმა კომპანია ”ვისმანმა” გამოაცხადა, რომ ხელნაკეთ სპორტულ მოდელ ”როდსტერ MF5-ის” მსოფლიო პრემიერას ფრანკფურტის მოტორ შოუზე ჩაატარებს. ეს კომპანიის საწარმოო პროგრამაში ყველაზე მძლავრი როდსტერი იქნება.

ახალი ავტომობილი აღჭურვილია ”ბეემვეს” წარმოების 5.0-ლიტრიანი V10 ძრავით, რომელიც 507 ცხენის ძალას და 520 ნიუტონმეტრს ავითარებს. მასთან დაკავშირებულია 7-საფეხურიანი სეკვენტალური გადაცემათა კოლოფი, რომელზეც მძღოლი გადაცემის საფეხურებს საჭის რგოლის უკან განთავსებული ბერკეტებით ცვლის.

ამ წყვილის მეშვეობით, ”ვისმან როდსტერ MF5” ნულიდან 100 კმ/სთ სიჩქარეს 3.9 წამში ავითარებს მისი მაქსიმალური სიჩქარე კი 310 კმ/სთ-ს აღწევს. იმისათვის, რომ ასეთი ტემპერამენტის მქონე ავტომობილი დამორჩილებადი იყოს, იჟინრებმა ის სპეციალურად შემუშავებული საკიდარით აღჭურვეს. გარდა ამისა, ავტომობილს უკანა ნაწილში აქვს ავტომატურად რეგულირებადი ანტიფრთა, რომელიც დახრის კუთხეს სიჩქარის შესაბამისად, კომპიუტერის მითითებით იცვლის.

ავტომობილის მზიდი ელემენტი ალუმინის მონოკოკია, რომელსაც გვერდებზე დამცავი სეგმენტები აქვს დამაგრებული. ეს სეგმენტები სალონს და მასში მყოფთ გვერდითა დაჯახების შემთხვევაში იცავს. გარდა ამისა, სალონში ორივე ადგილს წყვილი აირბალიშიწ იცავს.

”ვისმანი” მხოლოდ 55 ცალი ”როდსტერ MF5-ის” წარმოებას გეგმავს, რომელთაგან თითოეულის ფასი 189 500 ევრო იქნება.

”ჯენერალ მოტორსი” ”იბეიზე” გაყიდვებით კმაყოფილია

eBay Boosts GM Sales

20 აგვისტო

როგორც ჩანს, ”ჯენერალ მოტორსსა” ”იბეის” შორის თანამშრომლობამ გაამართლა და ამერიკული ავტომწარმოებელი თავისი ავტომობილების ინტერნეტით გაყიდვის მექანიზმს კალიფორნიის გარდა, სხვა შტატებშიც დაამკვიდრებს.

ჯერ ერთი თვე არ გასულა მას შემდეგ, რაც ამ ორმა კომპანიამ შტატ კალიფორნიაში ექსპერიმენტული აქცია წამოიწყო და ამ პერიოდში, ”გენერლების” კალიფორნიელმა დილერებმა ”იბეის” ქსელის მეშვეობით, უკვე შეკვეთა თითქმის 2 400 ახალ ავტომობილზე მიიღეს.

უფრო მნიშვნელოვანი კი ისაა, რომ ”იბეის” მიერ ამ აქციასთან დაკავშირებით, სპეციალურად გახსნილ ვებ გვერდს დაახლოებით 632 000 მნახველი ჰყავდა. ”ჯენერალ მოტორსი” კი დარწმუნებულია, რომ ”იბეისთან” პარტნიორობის გაგრძელების შედეგად, ეს მაჩვენებლები მნიშვნელოვნად გაიზრდება, რადგან ”იბეის” ყოველთვიურად მილიონობით ვიზიტორი ჰყავს და ამ მხრივ, უსაზღვრო შესაძლებლობები გააჩნია.

”იბეი მოტორსის” საიტზე ”ჯენერალ მოტორსის” 225 დილერია რეგისტრირებული, რომლებიც მყიდველს ამერიკული ავტომწარმოებლის სამოდელო გამაში შემავალ ყველანაირ ავტომობილს სთავაზობენ. ”გენერლები” აცხადებენ, რომ ყოველდღიურად მყიდველს არჩევანის გაკეთება 20 000 ახალ ავტომობილს შორის შეუძლია. ამ მაჩვენებლებს კი ვერანაირი შოურუმი ვერ გადასწონის.

”ჩვენი და ”იბეის” წყალობით, კალიფორნიელ მყიდველებს ავტომობილის შეძენის ახალი შესაძლებლობები შეექმნთ. ამიერიდან, დილერის შოურუმმა სადგომიდან ლეპტოპში გადაინაცვლა, რაც პოტენციურ მყიდველს უფრო ფართო არჩევანის საშუალებას აძლევს და შესაბამისად, მისი მოზიდვაც უფრო ადვილდება. გააკეთე განაცხადი და მაშინვე შეიძინე, ან თუ კითხვები გაგიჩნდა, უახლოეს დილერს ელექტრონული წერილი გაუგზავნე. ყველაფერი ეს ჩვენი პროდუქციის მომხმარებლებისთვისაა”, - ამბობს ”ჯენეალ მოტორსის” ვიცე პრეზიდენტი გაყიდვების საქმეში მარკ ლანევე.

”პორშე” გაყიდვებს გააორმაგებს

Porsche To Double Sales

20 აგვისტო

”ფოლკსვაგენის” მთავარი აღმასრულებელი მარტინ ვინტერკორნი ამავე პოსტს ”პორშეში” 15 სექტემბრიდან შეითავსებს, თუმცა დღეს უკვე ლაპარაკობს სპორტული ავტომობილების მწარმოებელი კომპანიის სამომავლო გეგმებზე, რომელთაგან უახლოესი და ალბათ ყველაზე ამბიციური ისაა, რომ ”პორშემ” მომდევნო ოთხ წელიწადში გაყიდვები უნდა გააორმაგოს.

კრიზისისა და კრიზისის შემდგომ პერიოდში ეს მიზანი თითქოს მიუღწევლად ჩანს, თუმცა ვინტერკორნი დიდ იმედებს კომპანიის უახლეს ავტომობილზე - სედან პანამერაზე ამყარებს, რომლის წარმოებაც წელს დაიწყო.

გაყიდვების გაორმაგება ნიშნავს, რომ შტუტგარტელებმა 2013 წელს დაახლოებით 150 000 ავტომობილის გაყიდვა უნდა შესძლონ. უფრო მეტიც, უფრო შორეულ მომავალში ვინტერკორნი გაყიდვების მოცულობის კიდევ უფრო გაზრდასაც აპირებს და რა თქმა უნდა, ამ მიზნის მისაღწევად, კომპანიის სამოდელო გამის კიდევ უფრო გაფართოებას გეგმავს.

კერძოდ, ”პორშე” აუცილებლად გამოუშვებს სუბკომპაქტურ სპორტულ ავტომობილს, რომელსაც ”ბოქსსტერზე” მცირე გაბარიტები ექნება. ეს ავტომობილი ”ფოლკსვაგენის” კონცეპტუალური ”ბლიუსპორტის” ბაზაზე შეიქმნება. გარდა ამისა, გეგმაშია ”კაიენზე” მომცრო ზომის უგზოობის ავტომობილის წარმოებაც. არც ისაა გამორიცხული, რომ ”პორშე” ოდესმე ”გოლფის” კლასის პრემიუმ ჰეჩბეკის წარმოებასაც გადაწყვეტს.

”დივონ GTX” რეკორდით იწყებს

Devon GTX

19 აგვისტო

სკოტ დივონი წლების განმავლობაში გაყინული ხილის ბიზნესს მისდევდა და საკმაოდ სარფიანად ვაჭრობდა, მაგრამ მთელი ამ დროის განმავლობაში იმაზე ოცნებობდა, რომ რომელიმე ამერიკულ კომპანიას ისეთი ავტომობილები გამოეშვა, რომლებიც იტალიურ სუპერებს გაუწევდა კონკურენციას.

მოგვიანებით, მან საკუთარი ავტოკომპანია - ”დივონ მოტორუორკსი” დააარსა და თავისი ოცნების ასრულება თავად გადაწყვიტა. შარშან კი მოულოდნელად, აწყობილი საქმის შეძენის შანსი გაუჩნდა, როდესაც ”კრაისლერმა” გამოაცხადა, რომ ”დოჯ ვაიპერის” ცალკე ბრენდად გაყიდვას აპირებდა.

გაკოტრების პირას მდგარ ამერიკულ კომპანიას დივონმა ”ვაიპერის” ბიზნესში 5.5 მილიონი დოლარი შესთავაზა, მაგრამ მტკიცე უარი მიიღო. შემდეგ ”კრაისლერი” ჯერ გაკოტრდა, შემდეგ იტალიურმა ”ფიატმა” შეისყიდა, რომელმაც ”ვაიპერის” დატოვება გადაწყვიტა. დივონი კი თავისი ოცნების ასრულებას ისევ საკუთარი ძალებით შეუდგა.

და აი, პებლ ბიჩის (მონტერეი, კალიფორნია) ელეგანტურობის კონკურსის დამსწრე საზოგადოებამ პირველმა იხილა სპორტული ავტომობილების ენთუზიასტის პირველი შედევრი - ”დივონ GTX”, რომელიც იმავე ”დოჯ ვაიპერის” პროპორციებს იმეორებს და ამავე სუპერავტომობილის პლატფორმაზეა აგებული.

”ვაიპერის” პლატფორმის გამოყენებას ერთი ძირითად მიზეზი ჰქონდა - ამგვარად, ”დივონ მოტორუორკსმა” თავიდან აიცილა საკუთარი პლატფორმის შექმნასთან და მის ქრეშ ტესტებთან დაკავშირებული სოლიდური ხარჯები. უფრო მეტიც, მან ძირითადი აგრეგატებიც ”ვაიპერისგან” ისესხა და ფაქტობრივად, მყიდველს სწორედ ”დოჯის” სუპერავტომობილის ახლებური ვერსია შესთავაზა. თუმცა, აქვე უნდა ითქვას, რომ ეს ვერსია საკმაოდ ორიგინალური გამოვიდა.

”დივონ GTX” აღჭურვილია 8.4-ლიტრიანი V10 ძრავით, რომლის მაქსიმალური სიმძლავრე 650 ცხენის ძალას აღწევს (6 100 ბრ/წთ-ზე). ძრავთან კი 6-საფეხურიანი მექანიკური გადაცემათა კოლოფია დაკავშირებული. ჯერჯერობით უცნობია სპორტული ავტომობილის დინამიკური მახასიათებლები (სრულფასოვანი ტესტები ჯერ არ ჩატარებულა). სამაგიეროდ, ამ ავტომობილით უკვე დამყარდა ავტოდრომ ”ლაგუნა სეკას” რეკორდი (სერიული ავტომობილებისთვის) - ბრიტანელმა ჯასტინ ბელმა, ვისაც ”ვაიპერით” FIA-ს GT-ს ჩემპიონატი აქვს მოგებული, ერთი წრე წუთსა და 35.075 წამში გაიარა. შედარებისთვის, მონათესავე ”ვაიპერს” ლაგუნს ერთი წრე წუთსა და 35.117 წამში აქვს გავლილი, ”ნისან GT-R-ს” საუკეთესო წრე წუთი და 39.62 წამია, ”პორშე 911 ტურბოსი” კი - წუთი და 39.89 წამი.

”დივონ მოტორუორკსი” წლიურად მხოლოდ 36 ცალი GTX-ის წარმოებას გეგმავს, თითოეულს კი 500 000 მილიონ დოლარად გაჰყიდის. და თუ მყიდველი დამატებითი ოპციის სახით სარბოლ ეკიპირებასაც შეუკვეთავს, ეს მას 25 000 დოლარი დაუჯდება.

სპაიკერ C8 ელერონ სპაიდერი

Spyker C8 Aileron Spyder

19 აგვისტო

კალიფორნიის მონტერეიში, პებლ ბიჩის ელეგანტურობის კონკურსზე, ჰოლანდიურმა კომპანია ”სპაიკერმა” საზოგადოებას თავისი ახალი ორადგილიანი სუპერავტომობილი - თავღია ”C8 ელერონ სპაიდერი” წარუდგინა.

ამ ავტომობილს რბილი თავსახური აქვს, რომელიც ნახევრად ავტომატურ რეჟიმში იკეცება და როცა სრულადაა დაკეცილი, ძარის ქვეშ იმალება ისე, თითქოს არც ყოფილა. მექანიზმის ნახავრად ავტომტურობა იმაში მდგომარეობს, რომ მას ცენტრალური საკეტი აქვს და მის გარეშე არც იკეცება და არც იშლება. როცა მძღოლი საკეტს გახსნის, ელექტრო/ჰიდრავლიკური სისტემა დანარჩენ საქმეს დამოუკიდებლად აკეთებს.

”ეს ავტომობილი ჩვენი მოდელების გამის ლოგიკური გაგრძელებაა. ჩვენ უკვე ვაწარმოებთ კუპესა და კაბრიოლეტს, რომლებიც მოკლე პლატფორმაზეა ბაზირებული. ”ელერონ სპაიდერს” ჩვენი ავტომობილებისთვის დამახასიათებელი ყველა ღირსება შენარჩუნბული აქვს. ის ავიაციის სტილში, მხოლოდ ხელითაა შესრულებული”, - ავტომობილის წარდგენისას განაცხადა კომპანიის დამაარსებელმა და მთავარმა აღმასრულებელმა ვიქტორ მიულერმა.

ავტომობილის ბაზაში, სავარძლების უკან, ”აუდის” წარმოების 4.2-ლიტრიანი V8 ძრავია განლაგებული, რომელიც 400 ცხენის ძალას გამოიმუშავებს. ძრავთან 6-საფეხურიანი მექანიკური გადაცემათა კოლოფია დაკავშირებული. ამ ტანდემის დახმარებით, ავტომობილს ადგილიდან 100 კმ/სთ სიჩქარის აკრეფა 4.5 წამში შეუძლია, მისი მაქსიმალური სიჩქარე კი 300 კმ/სთ-ს აღწევს.

”სპაიკერ C8 ელერონ სპაიდერის” წარმოება სავარაუდოდ მერმის, წლის პირველ ნახევარში დაიწყება.

”ფიატ სენტიერო” - რუმინელი სტუდენტის დამოუკიდებელი კონცეპცია

Fiat Sentiero

19 აგვისტო

არ გეგონოთ, რომ ეს ”ფიატის” და ”კრაისლერის” გაერთიანების პირველი შედეგია. რასაც სურათზე ხედავთ, რუმინელი სტუდენტის, ქალაქ იასის გეორგე ენესკუს სახელობის უნივერსიტეტის კურსდამთავრებულ დრაგოშ პროდანის გამოსაშვები პროექტია.

დიზაინერის განმარტებით, ”ფიატ სენტიერო” არის კომპაქტური პიკაპი, რომელიც ევროპული ბაზრისთვისაა განკუთვნილი. შეიძლება, ეს ცოტა უცნაურად ჟღერს, რადგან ევროპაში პიკაპებს მაინცდამაინც არ სწყალობენ, მაგრამ ეს ხომ მხოლოდ გამოსაშვები პროექტია...

სამაგიეროდ, ენესკუ გვარწმუნებს, რომ მისი კონცეპცია ”ფიატის” კორპორატიულ სტილშია შესრულებული. აქ ისიც უნდა ითქვას, რომ ”ფიატ სენტიეროს” გარეგნობაში აშკარად იგრძნობა ”კრაისლერის” კონცეპტუალურ პიკაპ ”დოჯ რემპეჯთან” მსგავსება.

რუმინელი დიზაინერის თქმით, ”ფიატ სენტიეროსთვის” ზედგამოჭრილია 3.0-ლიტრიანი V6 დიზელი, რომელიც დაახლოებით 250 ცხენის ძალას გამოიმუშავებს და რომლის მაბრუნი მომენტიც ოთხივე წამყვან ბორბალს მიეწოდება.

”ბუგატის” სამი კონცეპცია

Bugatti

19 აგვისტო

”ბუგატიმ” ოფიციალურად დაადასტურა, რომ ფრანკფურტში თავისი უახლესი ავტომობილის - ოთხკარიანი კუპეს ჩვენებას აპირებს. ამასთან, კომპანიის შეფმა ფრანც-იოზეფ პაეფგენმა ჟურნალ ”აუტოქართან” საუბრისას განაცხადა, რომ ფრანკფურტის ავტო შოუზე მისი კომპანია ოთხკარიანი მოდელის სამ კონცეპტუალურ ვერსიას წარადგენს.

კომპანიის მიზანია, ამ სამ კონცეპციაზე შოუს დამთვალიერებელთა გამოხმაურებების შეგროვება და მათი შეჯამების შემდეგ, არჩევანის გაკეთება. პაეფგენმა არ დაადასტურა (და არც უარყო) გავრცელებული ხმები იმის შესახებ, რომ ახალ ავტომობილს ”ბორდოს” დაარქმევენ. უბრალოდ, განაცხადა, რომ ამ ავტომობილისთვის ჯერ სახელი შერჩეული არაა.

მანვე განაცხადა, რომ ახალი, ოთხკარიანი ”ბუგატი” არ იქნება ბაზირებული ”ბენტლის” უახლეს სუპერავტომობილ ”მულსანის” პლატფორმაზე (ორივე კომპანია ფოლკსვაგენის ჯგუფში შედის), რომლის დებიუტიც ახლახანს, მონტერეიში (კალიფორნია), პებლ ბიჩის ელეგანტურობის კონკურსზე შედგა.

”ახალ ”ბუგატის” სულ სხვა კონცეპციით ვქმნით და მას სრულიად განსხვავებული გაბარიტები უნდა ჰქონდეს. და საერთოდ, ძალიან ძნელია ”მულსანსა” და ჩვენს ახალ ავტომობილს შორის საერთოს მონახვა. ამასთან, ოთხკარიანი ”ბუგატი” იქმნებოდა, როგორც ექსკლუზიური ავტომობილი. მას სულ 150 ცალს დავამზადებთ. ამდენად, ადვილი მისახვედრია, რომ მისი წარმოებისას სრულიად განსხვავებულ მასალებსა და ტექნოლოგიებს გამოვიყენებთ”, - ამბობს პაეფგენი.

კომპანიის შეფს არაფერი უთქვამს ოთხკარიანი ”ბუგატის” აღჭურვილობის შესახებ. ინტერნეტით გავრცელებული ხმების მიხედვით, ის ძრავს ”ვეირონისგან” ისესხებს. ესაა 8.0-ლიტრიანი W16, რომელსაც ოთხი ტურბოკომპრესორი ემსახურება. ეს ძრავი 1001 ცხენის ძალას გამოიმუშავებს და მისი მეშვეობით, ”ვეირონის” მაქსიმალური სიჩქარე 400 კმ/სთ-ზე მეტია.

”პეჟო RC-Z” ფრანკფურტამდე გაგვეცნო

Peugeot RC-Z

18 აგვისტო

”პეჟომ” წარმოებისთვის სპორტული კუპე RC-Z მოამზადა, რომლის შესახებაც, ინფორმაცია ფრანკფურტის მოტორ შოუს დაწყებამდე ერთი თვით ადრე გამოაქვეყნა.

ავტომობილი, რომელიც პოპულარულ ჰეჩბეკ 308-ს ბაზაზეა დამზადებული, ორი წლის წინ, ფრანკფურტში ნაჩვენები კონცეპტუალური მოდელის სერიული ვერსიაა. მას 308-ზე განიერი კვალი აქვს. მისი კლირენსი 20 მილიმეტრით დაბალია, სიმძიმის ცენტრი კი 40 მილიმეტრით დაბლა მდებარეობს.

ავტომობილში ჩასაჯდომი ფორმულაა 2+2 და გარეგნულად ის თითქმის არ განსხვავდება ორი წლის წინანდელი კონცეპტუალური RC-Z-გან. ასე განსაჯეთ, ფრანგულმა კომპანიამ პრაქტიკულად ხელუხლებლად დატოვა კონცეპტუალური მოდელის პანორამული სახურავი, რომელსაც რთული ფორმა აქვს და რომლის წარმოებაც ტექნოლოგიურ სირთულეებთან დაკავშირებული. ისევე როგორც კონცეპტუალურ მოდელზე, სალონი მკვეთრად წინ წაწეული, საბორბლე თაღები კი ძლიერ გამობერილია, რაც ავტომობილის აგრესიულ ხასიათზე მიგვანიშნებს.

”პეჟო RCZ-ის” ტოპ ვერსია აღჭურვილია 1.6-ლიტრიანი ტურბოძრავით, რომელიც 200 ცხენის ძალას ავითარებს. ძრავთან კი 6-საფეხურიანი მექანიკური გადაცემათა კოლოფია დაკავშირებული. ამ აგრეგატით, ავტომობილის 0-100 კმ/სთ-მდე აჩქარება 7.6 წამში ხდება, მისი მაქსიმალური სიჩქარე კი 225 კმ/სთ-ს აღწევს. ამ ძრავით აღჭურვილ RCZ-ს 100 კილომეტრის შერეული ციკლით გასავლელად, 7.1 ლიტრი ბენზინი სჭირდება, ყოველი კილომეტრის გავლისას კი ის ატმოსფეროში 165 გრამ CO2-ს გამოჰყოფს.

გარდა ამისა, ”ფრანგული ლომების” ახალი სპორტული ავტომობილისთვის 1.6-ლიტრიანი, ასევე ტურბო და 2.0-ლიტრიანი ტურბო დიზელია განკუთვნილი. პირველის სიმძლავრე 156 (საწვავის ხარჯი 6.9 ლ/100 კმ-ზე), მეორისა კი 163 ცხენის ძალას (საწვავის ხარჯი 5.4 ლ/100 კმ-ზე, გამონაბოლქვი 139 გ CO2 ყოველ კილომეტრზე) აღწევს. ორივე ძრავს 6-საფეხურიანი მექანიკური, ან ავტომატური კოლოფი უკავშირდება.

ჯერჯერობით არ გამოცხადებულა ”პეჟო RCZ-ის” ფასი, სამაგიეროდ ცნობილია, რომ მის წარმოებას კანადურ-ავსტრიული კომპანია ”მაგნა შტეირი” თავის ავსტრიულ ქარხანაში მერმის დაიწყებს.

ჩინური ალიანსი ჰიბრიდული ავტომობილებისთვის

BYD – SAIC

18 აგვისტო

ორმა ჩინურმა საავტომობილო კომპანიამ - BYD-მა და SAIC-მა გააფორმეს თანმშრომლობის ხელშეკრულება, რომლის მიხედვითაც, პირველი მეორეს ჰიბრიდული ავტომობილებისთვის ლითიუმ-იონურ აკუმულატორებს მიაწვდის. რამდენიმე თვის წინ, BYD-მა მსოფლიო გააკვირვა, როდესაც გამოაცხადა, რომ შექმან აკუმულატორები, რომლებითაც ავტომობილი 600 000 კილომეტრის გავლას შესძლებს. ეს კი იმას ნიშნავს, რომ ასეთი აკუმულატორების დამუხტვა, მათი ექსპლუატაციის განმავლობაში, დაახლოებით 2 000-ჯერაა შესაძლებელი.

გაზეთ ”ბეიძინ ნიუსის” ცნობით, მერმის SAIC-ი ჰიბრიდული ავტომობილების წარმოების დაწყებას აპირებს, რომლებიც შესაბამის შიდაწვისძრავიან მოდელებთან შედარებით, 20 პროცენტით ნაკლებ საწვავს მოიხმარენ. გაზეთის მონაცემებით, შანჰაის ავტოკომპანია (SAIC - შანჰაი აუტომოტივ ინდასტრი კორპორეიშნ) ჰიბრიდული დანადგარით თავის პოპულარულ სედან ”როევე 750-ს” (სურათზე) აღჭურვავს.

საერთოდ, BYD-ი (ბილდ იორ დრიმს) ლითიუმ-იონური აკუმულატორების წარმოებითაა ცნობილი. ამ კომპანიამ თავიდან სწორედ ამ პროფილით დაიწყო და შემდეგ, საკუთარი ბიზნესი ავტომობილების წარმოებითაც გააფართოვა. დღეს კი, გარდა იმისა, რომ წარმოებისთვის საკუთარი კონსტრუქციის ჰიბრიდებსა და ელექტრომობილს ამზადებს, თანამშრომლობას სხვა კომპანიებთანაც აპირებს. მათგან კი ერთ-ერთი პირველი SAIC-ია.

”კან ამ M1C” - ლეგენდარული ”მაკლარენ M1C-ის” რეპლიკა

CAN AM M1C

18 აგვისტო

”მაკლარენი” სახელგანთქმული ბრენდია ავტოსპორტის სამყაროში, სადაც განსაკუთრებული მიღწევები ფორმულა 1-ის მსოფლიო ჩემპიონატებზე აქვს. დღეს კომპანია მხოლოდ ფ1-ის რბოლებში მონაწილეობს, თუმცა იყო დრო, როცა მისი ბოლიდები კანადა ამერიკის (კან-ამ) თასსა და ინდი 500-ზეც გამოდიოდნენ.

”მაკლარენის” სარბოლი ავტომობილებიდან კი ყველაზე მეტად, კომპანიის ერთ-ერთი პირველი ქმნილება - M1C გამოირჩეოდა. თავისი 500-ცხენისძალიანი ძრავის წყალობით, მან კან-ამის რბოლებში არაერთი გამარჯვება მოიპოვა. მაგრამ სამწუხაროდ, ახალზელანდიელმა მრბოლებმა - ფ1-ის მსოფლიო ჩემპიონმა დენის ჰალმმა და ბრიუს მაკლარენმა მხოლოდ 25 ცალი M1C დაამზადეს და ყველა სარბოლი ტრასების გზას გაუყენეს. ამიტომ, სიჩქარის არასპორტსმენ მოყვარულებს, მისი შეძენის საშუალება არ მისცემიათ.

ამ ავტომობილის კონსტრუქცია იმდენად მარტივი და წარმატებული გამოდგა, რომ მის მიხედვით, ენთუზიასტები და პატარა ფირმები დღესაც აწარმოებენ ავტომობილებს და საკმაოდ წარმატებითაც. თუმცა, ისინი უფრო ხშირად, შასიზე საკუთარი დიზაინის ძარას დგამენ ხოლმე.

მაგრამ გამონაკლისიც გამოჩნდა - პატარა გერმანულმა ფირმა ”LMP ინჯინირინგმა” ლეგენდარული ავტომობილის სრულფასოვანი ასლების წარმოება გადაწყვიტა. ფირმამ თავის შედევრს ”კან ამ M1C” (Can Am M1C) უწოდა. კომპანიის ინჟინრებმა სასურველი ავტომობილის ასლის დასამზადბლად ულტრათანამედროვე კომპიუტერული პროგრამები გამოიყენეს, რათა სრულფასოვანი ასლი მიეღოთ და არა უბრალო რეპლიკა, როგორებსაც ბევრი სხვა ფირმაც აწარმოებს.

ისევე როგორც ორიგინალი, ”კან ამ M1C-ს” შასიც ფოლადის მილებისგან შეკრულ ჩარჩოზეა აგებული, რომელსაც კარბონის კომპოზიტისგან დამზადებული ძარა (კოკი) ფარავს. შასიზე ”შევროლეს” მცირებლოკიანი V8 ძრავი (მონაცემები არ ქვეყნდება) დაიდგა, რომელსაც საწვავი ნარევით ზუსტად ისეთი 4 კარბურეტორი (48 IDA) ამარაგებს, როგორიც ორიგინალურ ავტომობილზე იდგა. ძრავს კი ინგლისური ”ჰიულენდის” წარმოების სარბოლი გადაცემათა კოლოფი (DG 300) შეუწყვილდა, რომელსაც 5 საფეხური აქვს. ამ ავტომობილისთვის მუხრუჭები სპეციალურად კომპანია ”AP რეისინგის” სპეციალისტებმა დაამზადეს.

”LMP ინჯინირინგმა” ჯერჯერობით მხოლოდ ერთი ცალი ”კან ამ M1C” დაამზადა, რომელიც უკვე გაყიდულია. კომპანია აცხადებს, რომ შეკვეთის შემთხვევაში, ასეთ ავტომობილებს კიდევ გამოუშვებს, თუმცა რა დაუჯდება მსურველს ლეგენდარული ავტომობილის ასლის შეძენა, ამაზე გერმანული ფირმა არაფერს ამბობს.

ისე, ძნელი მისახვედრი არ უნდა იყოს, რომ ის ძალიან ძვირი ეღირება...

”ჯენერალ მოტორსი” 4 000-დოლარიან ავტომობილს გამოუშვებს

GM Working on $4 000 Car

18 აგვისტო

”გენერლებმა” თავიანთი ულტრა იაფფასიანი ავტოს ბაზისად შეიძლება კონცეპტუალური ”შევროლე ტრექსი” (ზედა სურათზე), ან ”შევროლე გრუვი” (ქვედა) გამოიყენონ

”უოლ სტრიტ ჯორნელის” ცნობით, ”ჯენერალ მოტორსი” ადასტურებს, რომ ულტრა დაბალფასიანი ავტომობილის წარმოებას აპირებს, რომლითაც კონკურენციას ინდური ”ტატას” უიაფეს ”ნანოს” გაუწევს. მაგრამ ამერიკული კომპანიის უაიფესი ავტომობილი თავის კონკურენტთან შედარებით, მაინც თითქმის ორჯერ ძვირი ეღირება. ამასთან, ის მხოლოდ აზიის განვითარებად ქვეყნებში გაიყიდება.

”როცა ”ტატა მოტორსმა” 2 500-დოლარიანი ”ნანოს” გამოშვება დაიწყო, ამით ბევრი ავტომწარმოებლის დაინტერესება გამოიწვია. მაგრამ ჩვენ ესოდენ იაფი ავტომობილის წარმოებას არ ვგეგმავთ, რადგან ის სპეციფიკური ბაზრებისთვისაა განკუთვნილი, სადაც გამონაბოლქვზე ამერიკისა და ბრაზილიის ბაზრებისგან განსხვავებული სტანდარტები მოქმედებს. მოკლედ, ჩვენ იაფი ავტომობილის გამოშვებას ვგეგმავთ, მაგრამ ჯერ არ გადაგვიწყვეტია, სად დავიწყებთ მის წარმოებას და რომელ ბაზრებზე გავყიდით”, - ამბობს ”ჯენერალ მოტორსის” საერთაშორისო ოპერაციების ხელმძღვანელი და კომპანიის აღმასრულებელი ვიცე პრეზიდენტი ნიკ რილი.

რილის თქმით, მისი კომპანია ყველაზე იაფ ავტომობილს აუცილებლად აზიაში (ჩინეთში, ან ინდოეთში) გამოუშვებს. ამასთან, ”გენერლები” ამ პროექტთან დაკავშირებით, სხვა ავტომწარმოებელთან თანამშრომლობას არ გეგმავენ. ”ჯენერალ მოტორსის” იაფფასიანი ავტომობილის ღირებულება 4 000-5 000 დოლარის ფარგლებში იქნება.

ცნობისათვის, ულტრა იაფფასიანი ავტომობილების წარმოებას ასევე გეგმავენ ”ფიატი” და ”რენო-ნისანის” ალიანსი.

”ჯენერალ მოტორსმა” ”სააბი” გაჰყიდა

Saab

18 აგვისტო

”ჯენერალ მოტორსმა” და შვედურმა კომპანია ”კენიგსეგმა” გააფორმეს ხელშეკრულება, რომლის ძალითაც, კიდევ ერთი შვედური ავტომწარმოებელი ”სააბი”, ამიერიდან სუპერავტომობილების მწარმოებელი ”კენიგსეგის” ხელში გადადის. ახლა ისღა დარჩა, რომ შვედეთის მთავრობამ ეს შეთანხმება დაამტკიცოს, რის შემდეგაც, ფინანსურ კრიზისში მყოფი ”სააბის” ანგარიშზე, კრედიტის სახით 4.3 მილიარდ შვედურ კრონს (დაახლოებით 417 მილიონ ევროს) გადარიცხავს.

სააგენტო როიტერის ინფორმაციით, ამერიკული კომპანია ”სააბს” ძალიან დაბალ ფასად ჰყიდის, თუმცა რამდენია ეს ”ძალიან დაბალი ფასი”, არ კონკრეტდება. სამაგიეროდ, ”ჯენერალ მოტორსის” ევროპული შტოს პრეზიდენტი კარლ-პეტერ ფორსტერი აცხადებს, რომ გაყიდვის შემდეგაც, მისი კომპანია ”სააბთან” ტექნოლოგიურ თანამშრომლობას გააგრძელებს.

”კენიგსეგის” გარდა, ”სააბის” გამოსყიდვაში ასევე მონაწილეობენ ნორვეგიული საინვესტიციო კომპანია ”ბაარდ ეკერი” და მისი პარტნიორი, ამერიკელი ბიზნესმენი ოგი ფაბელა. ”ჯენერალ მოტორსთან” დადებული გარიგების თანახმად, ამიერიდან ”სააბის” 23.4 პროცენტი ”კენიგსეგის” დამაარსებლის, კრისტიან ფონ კენიგსეგის ხელში გადადის. 42.6 პროცენტს მისი კიდევ ერთი კომპანია, ”აპლააცი” მიიღებს, 11.8 პროცენტი ”ბაარდ ეკერისა” გახდება, დარჩენილი 22 პროცენტი კი იმ უცნობი ინვესტორის ხელში დარჩება, რომელმაც ეს წილი ცოტა ხნის წინათ, ბიზნესმენ მარკ ბიშოპისგან გამოისყიდა.

გაყიდვის მიუხედავად, ”ჯენერალ მოტორსი” შვედური კომპანიის ტექნოლოგიურ მხარდაჭერას გააგრძელებს. ამერიკული კომპანიის მხარდაჭერით, მალე ”საბი” სამი ახალი მოდელის - 9-3X-ის, 9-4X-ის და 9-5-ის გამოშვებას დაიწყებს. ცნობისათვის, წინა წელთან შედარებით, შარშან ”სააბმა” 25.5%-ით ნაკლები, 93 338 ავტომობილი გაჰყიდა, წელს კი ეს მაჩვენებელი კიდევ უფრო შემცირდება.

რაც შეეხება ”კენიგსეგს”, ამ კომპანიის ერთადერთ საწარმოში მხოლოდ 50 ადამიანია დასაქმებული, რომლებიც წლიურად მხოლოდ რამდენიმე ავტომობილს (თითოეულის ფასი მილიონი დოლარია) აწარმოებენ.

”ლექსუსის” პირველი ჰეჩბეკი

Lexus Premium Compact Concept

17 აგვისტო

”ტოიოტას” ლუქსის კლასის ავტომობილების მწარმოებელმა შტო ”ლექსუსმა” ინტერნეტით თავისი უახლესი კონცეპტუალური მოდელის ფოტო ტისერი გამოაქვეყნა, რომელსაც საზოგადოებას პირველად ფრანკფურტის ავტო შოუზე უჩვენებს. ამ ავტომობილის (მისი სახელი ჯერ უცნობია) სერიული ვერსიის ჩვენება კი მერმის, ჟენევის ავტოგამოფენაზე იგეგმება.

ინტერნეტში გავრცელებული ინფორმაციით, ”ლექსუსმა” ჩრდილოეთ ამერიკაში უკვე დაარეგისტრირა ინდექსები CT 200h, CT 300h და CT 400h, რომლებიც შესაძლოა, სწორედ თავის პირველ ჰეჩბეკზე გამოიყენოს. თუმცა, ისიც ცნობილია, რომ ჰეჩბეკის ტიპის ავტომობილები, პირველ რიგში, ევროპულ ბაზარზეა პოპულარული.

ჯერჯერობით, ახალი ავტომობილის შესახებ ოფიციალური ინფორმაცია არ გამოქვეყნებულა. ცნობილია მხოლოდ ის, რომ ამ ჰეჩბეკის ბაზაზე, ”ლექსუსი” ჰიბრიდსაც გამოუშვებს, რომელიც 187-ცხენისძალიანი სისტემით აღიჭურვება. სისტემაში ოთხცილინდრიანი, 2.4-ლიტრიანი შიდაწვის ძრავი (147 ცხენის ძალით) და ელექტრომოტორი (40 ცხ.ძ) გაერთიანდება. შიდაწვის ძრავის მიერ გამომუშავებულ მაბრუნ მომენტს კი, ჩვეულებრივი გადაცემათა კოლოფის ნაცვლად, უსაფეხურო ვარიატორი გადაამუშავებს. ჰიბრიდული სისტემის სავარაუდო ხარჯი 100 კილომეტრზე დაახლოებით 6.50 ლიტრი უნდა იყოს.

”ლექსუსი” იმედოვნებს, რომ თავის ისტორიაში პირველი ჰეჩბეკისძარიანი ავტომობილით, სერიოზულ კონკურენციას ისეთ ძლიერ მეტოქეებს გაუწევს, როგორებიც ”აუდი A3” და პირველი სერიის ”ბეემვეა”.

”ჰიუნდაი ix35” - ჯერ მხოლოდ ფოტო ტისერები

Hyundai ix35

17 აგვისტო

ფრანკფურტის მოტორ შოუზე, კორეული ”ჰიუნდაი” თავისი უგზოობის პოპულარული მოდელის, ”ტუსანის” შემცვლელს, ix35-ს გამოფენს, რომლის ფოტო ტისერებიც კომპანიის ვებსაიტზე უკვე გამოჩნდა. თუმცა, ამ ფოტოების გარდა, ”ჰიუნდაი” თავისი სიახლის შესახებ თითქმის არაფერს გვიყვება.

ინტერნეში გავრცელებული ინფორმაციით, კორეაში ეს ავტომობილი ”ტუსან ix-ის” სახელით გაიყიდება, ევროპაში კი მას ix35-ს დაარქმევენ. ჯერჯერობით უცნობია, რა სახელით წარდგება ის აშშ-ის ბაზარზე.

მართალია, ტისერების მიხედვით შეუძლებელია იმის წარმოდგენა, თუ როგორი გარეგნობა ექნება ახალ ავტომობილს, თუმცა უფრო ადრე გავრცელებული მსტოვრული ფოტოების მიხედვით შეიძლება ვივარაუდოთ, რომ ”ჰიუნდაი ix35” ჟენევის წლევანდელ ავტო შოუზე წარმოდგენილი კონცეპტუალური ”ix-ონიკის” სტილშია შესრულებული.

”ჰიუნდაი” აცხადებს, რომ ix35 თავიდან ბოლომდე ევროპაში, კომპანიის ფრანკფურტულ ტექნიკურ ცენტრშია შემუშავებული და მასში არაერთი ახალი ტექნოლოგიაა გამოყენებული. საერთო ჯამში, ”ჰიუნდაისთვის” ის წინ გადადგმული დიდი ნაბიჯია.

”ჰიუნდაი ix35” ევროპულ ბაზარზე კონკურენციას ისეთ სერიოზულ მეტოქეებს გაუწევს, როგორებიც ”ფოლკსვაგენ ტიგუანი” და ”ტოიოტა RAV-4-ია”. ამ ავტომობილის გარდა, კორეული კომპანია ფრანკფურტში ასევე განახლებულ ”სანტა ფეს” წარადგენს. ორივე ავტომობილის შესახებ დაწვრილებითი ინფორმაცია კი შოუს დაწყებამდე ცოტა ხნით ადრე გამოქვეყნდება.

ფრანკფურტამდე: მინი კუპე კონცეპტი

Mini Coupe Concept

17 აგვისტო

ფრანკფურტის მოტორ შოუსთვის, ინგლისური კომპანია ”მინი” ორ მთავარ სიახლეს ამზადებს, რომელთაგან ერთი წარმოებისთვის გამზადებული ქროსოვერია, მეორე კი ორკარიანი სპორტული კონცეპტუალური მოდელი, რომლის შესახებაც ჯერ ბავრი არაფერია ცნობილი.

ინტერნეტ გამოცემა ”ინსაიდ ლაინი” ვარაუდობს, რომ კონცეპტუალური ავტომობილი ან ორადგილიანი კუპე იქნება, ან ღია სპიდსტერი. ნებისმიერ შემთხვევაში, ორივე ავტომობილი ”მინის” ერთადერთ, R57 პლატფორმაზეა ბაზირებული.

გამოცემის სპეციალისტებმა კონცეპტუალური ”მინის” სავარაუდო ფოტო რობოტი შეადგინეს, რომელზეც ჩანს, რომ უკანა ნაწილით, ავტომობილი ”აუდი TT-ს” ჰგავს. თუმცა, კომპანიაში ირწმუნებიან, რომ მათი სპორტული ავტომობილის ნახვისას ეჭვი არავის შეეპარება, რომ ეს ”მინის” ოჯახის წევრია.

რაც შეეხება ძრავებს, ამ ეტაპზე, არც ამ მხრივაა რაიმე ცნობილი. ინგლისური კომპანია გვპირდება, რომ ორადგილიანი სპორტული მოდელიც ისეთივე ეკონომიური იქნება, როგორებიც მისი ნათესავებია. არც ისაა გამორიცხული, რომ ახლო მომავალში, მასზე ”ბეემვეს” უახლესი სამცილინდრიანი ძრავი ვიხილოთ, რომელსაც ბავარიელები მე-3 და 1-ლი სერიის მოდელებისთვის ამზადებენ.