ფრანკფურტის ავტო შოუ

”ფოლკსვაგენ E-უპ!” - 21-ე საუკუნის ხოჭოს ელექტრონული ვერსია

VW E-Up! Concept

15 სექტემბერი

კონცეპტუალური ელექტრომობილი ჟურნალისტებს ”ფოლკსვაგენის” მთავარმა აღმასრულებელმა მარტინ ვინტერკორნმა წარუდგინა

...................................................................................................

ფრანკფურტში ”ფოლკსვაგენმა” გარემოსადმი მზრუნველობა სხვა კუთხითაც გამოავლინა - გამოფენაზე კონცეპტუალური ”უპ!-ის” (მომავალი ლუპო) ბაზაზე შექმნილი კონცეპტუალურივე ელექტრომობილი წარადგინა.

თავი რომ დავანებოთ იმას, რომ ” E-უპ!-ის” გარეგნობა წინა მოდელთან შედარებით ძალიან დაიხვეწა და საწარმოო სტანდარტს მიუახლოვდა, მისი ეს ვერსია ვოლფსბურგელებმა არა უბრალოდ გარეგნობის საჩვენებლად გამოფინეს, არამედ უფრო იმისათვის, რომ ყველასათვის დაენახვებინათ - ელექტრომობილების წარმოებისთვის ისინიც მზად არიან და ამ საქმეს მაშინვე მოჰკიდებენ ხელს, როგორც კი მაღალეფექტური აკუმულატორები გაიაფდება.

რა თქმა უნდა, ”E-უპ!-ი” ძალიან მცირე გაბარიტებით გამოირჩევა. მისი ზომებია: სიგრძე 3.19 მ, სიგანე 1.64 მ, სიმაღლე 1.47 მ და ბაზა 2.19 მეტრი. ავტომობილს სალონში ჩასაჯდომი საკმაოდ უცნაური ფორმულა 3+1 აქვს, სადაც რიცხვი 1 იმას ნიშნავს, რომ მძღოლის სავარძელი ხუთიოდ სანტიმეტრით წინაა წაწეული. საერთო ჯამში ავტომობილი ”ფიატის” პოპულარულ რეტროჰეჩბეკ ”ჩინკვეჩენტოზე” პატარაა. ”E-უპ!-ის” საბარგულის მოცულობა სულ რაღაც 85 ლიტრია, მაგრამ თუ მძღოლის უკან სავარძელს დავკეცავთ, საბარგულის მოცულობა 180 ლიტრამდე იზრდება და თუ ორივეს დავკეცავთ, 320 ლიტრსაც კი აღწევს.

”უპ!-ის” ელექტრული ვერსიის სალონი სისადავით და მინიმალიზმით გამოირჩევა - ელექტროენერგია მინიმალურად უნდა დაიხარჯოს

............................................................................................

ავტომობილი აღჭურვილია საკმაოდ მძლავრი ელექტროძრავით, რომელიც ნომინალურ 53 ცხენის ძალას, მაქსიმუმ 80 ცხენის ძალას და 210 ნიუტონმეტრ მაბრუნ მომენტს გამოიმუშავებს. მისი მეშვეობით, კონცეპტუალურ ელექტრომობილს 0-100 კმ/სთ აჩქარება 11.3 წამში შეუძლია, ადგილიდან 50 კმ/სთ-ის ასაკრეფად 3.5 წამი ჰყოფნის, მისი მაქსიმალური სიჩქარე კი 135 კმ/სთ-ია.

ავტომობილის წონა 1 085 კილოგრამია. აქედან 240 კილოგრამი აკუმულატორების ბლოკზე მოდის, რომელთა ჯამური ტევადობა 18 კილოვატსაათია. მწარმოებელი გვამცნობს, რომ აკუმულატორების საყოფაცხოვრებო ქსელიდან (პლაგ ინ სისტემით) დასამუხტად ხუთი საათია საჭირო, სპეციალურ სადგურში კი, აკუმულატორების 80 პროცენტით შევსებას დაახლოებით ერთ საათი სჭირდება.

აღსანიშნავია, რომ ავტომობილის სახურავზე მზის ელემენტებია ჩამონტაჟებული, რომელთა ფართობი 1.4 კვადრატულ მეტრს აღწევს. თუ მძღოლი მზისგან დამცავ წინაფრას გახსნის, რომლის მეორე მხარეზეც ასევე მზის ელემენტებია მოთავსებული, ამ ელემენტების ჯამური ფართობი 1.7 კვ. მეტრამდე იზრდება. მზის ელემენტებისგან ავტომობილის ელექტრონული სისტემები იკვებება და თუ მანქანა გაჩერებულია, მზისგან მიღებული ენერგია სალონის ვენტილაციასა და გაგრილებას ხმარდება.

”ფოლკსვაგენი” კონცეპცია ”უპ!-ს” ხშირად 21-ე საუკუნის ”ბიტლს” უწოდებს, რაც იმას ნიშნავს, რომ ამ პატარა პატარა ავტოს ”სახალხო ავტომობილობის” მისია აკისრია. ესე იგი, ის საკმაოდ იაფი უნდა იყოს. თუმცა, ძნელი წარმოსადგენია, რომ ლითიუმ-იონური აკუმულატორებით და მზის ელემენტებით აღჭურვილი ავტომობილი იაფი ღირდეს. და მაინც, ვოლფსბურგელები ირწმუნებიან, რომ ფრანკფურტში ნაჩვენები კონცეპციის ბაზაზე შექმნილი ელექტრომობილის წარმოებას 2013 წელს დაიწყებენ. მანამდე ორი წლით ადრე კი ბაზარს ლუპო (იგივე უპ!-ის სერიული ვერსია) ეწვევა.

ფრანკფურტის ავტო შოუ

”ფოლკსვაგენი” 1.5-ლიტრიანი ხარჯით

Volkswagen L1 Concept

15 სექტემბერი

”ფოლკსვაგენისგან” ამ ავტომობილს დიდხანს ელოდნენ და აი, ფრანკფურტში გახსნილ საავტომობილო შოუზე, გერმანულმა კომპანიამ მოლოდინი გაამართლა - გამოფენის დამთვალიერებლებს კონცეპტუალური L1 გააცნო რომელიც 100 კილომეტრზე საშუალოდ 1.38-1.49 ლიტრ (მუშაობის რეჟიმის შესაბამისად) დიზელის საწვავს მოიხმარს და ყოველი კილომეტრის გავლისას, ატმოსფეროში მხოლოდ 39 გრამ CO2-ს გამოყოფს.

ასეთი სუპერეკონომიურობა რამდენიმე ფაქტორმა განაპირობა. ესენია: სრულყოფილი აეროდინამიკა, მცირელიტრაჟიანი და ძალიან ეკონომიური ძრავი, ავტომობილის სიმსუბუქე და რხევაზე ნაკლები წინააღმდეგობის მქონე საბურავები.

ავტომობილი სულ რაღაც 380 კილოგრამს იწონის, აქედან ძარაზე 124 კილოგრამი მოდის. L1 ორცილინდრიანი, 0.8-ლიტრიანი TDI დიზელის ძრავითაა აღჭურვილი, რომელიც სამუშაო რეჟიმის მიხედვით, 27 ან 39 ცხენის ძალას (ორივე შემთხვევაში 4 000 ბრ/წთ-ზე) გამოიმუშავებს, მისი მაქსიმალური მაბრუნი მომენტი კი 100 ნიუტონმეტრია (1 900 ბრ/წთ-ზე). როგორც ”ფოლკსვაგენი” გვამცნობს, ეს ძრავი 1.6-ლიტრიანი TDI-ს ბაზაზეა შექმნილი და ფაქტობრივად, მის ნახევარს წარმოადგენს.

ძრავთან ორმაგი გადაბმის ქუროთი 7-საფეხურიანი ნახევრად ავტომტური კოლოფია (DSG) დაკავშირებული. ძრავსა და ტრანსმისიას შორის ასევე მცირე სიმძლავრის ელექტროძრავი მდებარეობს, რომელიც აჩქარების დროს, სიმძლავრეს ზრდის. დამუხრუჭების დროს კი ენერგიას აგროვებს და ლითიუმ-იონურ აკუმულატორს მუხტავს. საჭიროების შემთხვევაში კი, ამ ელექტროძრავით მცირე მანძილის გავლაც შეიძლება.

ავტომობილს ადგილიდან 100 კმ/სთ-ი აკრეფა 14,3 წამში შეუძლია, მისი მაქსიმალური სიჩქარე კი 160 კმ/სთ-ს აღწევს. ათლიტრიანი ავზი საკმარისია იმისათვის, რომ ”ფოლკსვაგენ L1-ით” 670 კილომეტრი გაიაროთ.

L1 ასევე აღჭურვილია ”პარტკ ესისტ” და სტარტ/სტოპ სისტემებით. ამათგან მეორე ავტომობილის ეკონომიურობის გაუმჯობესებას ემსახურება - შუქნიშანზე დგომისას ძრავს თიშავს, აქსელერატორზე დაჭერისას კი ძრავს ავტომატურად რთავს. ავტომობილი ”მიშლენის” წარმოების შემცირებული წინააღმდეგობის საბურავებზე დგას, რომელთა ზომებია: 95/60 R16 წინ და 115/70 R16 უკან.

გავრცელებული ინფორმაციით, ”ფოლკსვაგენი” L1-ის ბაზაზე, მსგავსი მონაცემების მქონე ავტომობილის წარმოებას 2013 წელს დაიწყებს.

გაიცანით - კონცეპტუალური ბუგატი გალიბიერი 16C

Bugatti Galibier 16C Concept

14 სექტემბერი

”ბუგატიმ” თავისი სრულიად ახალი ავტომობილი - სუპერსდანი წარმოადგინა, რომელსაც საავტომობილო სამყარო დიდხანს ელოდა. ცოტა ხნის წინ, მას ”ბორდოს” სახელით მოიხსენიებდნენ, დღეს კი ირკვევა, რომ მწარმოებელმა ავტომობილისთვის, რომლის კონცეპტუალური ვერსიის პრემიერაც კომპანიის დაარსებიდან ასი წლის იუბილეს მიეძღვნა, სახელი ”გალიბიერი” შეარჩია.
ზოგ (ავტორიტეტული გამოცემის) საიტზე ამ ავტომობილის სახელად ”გალაბიერი” სწერია, ზოგან (ასევე ავტორიტეტული გამოცემისაზე) კი - ”გალიბიერი”. სიმართლე გითხრათ, სანამ ფრანკფურტის შოუზე თავად კომპანია ამ ავტომობილის სახელს გვამცნობს, მირჩევნია, ის ”გალიბიერად” მოვიხსენიო - ეს სახელი საფრაგეთის სამხრეთში, ალპების მთიანეთში მდებარე მთა გალიბიერისთან და ამავე სახელწოდების უღელტეხილთან ასოცირდება, რომელიც ხშირად შეაქვთ ხოლმე ტურ დე ფრანსის ლეგენდარული ველომარათონის მარშრუტში. ”ბუგატის” ”გალიბიერსაც” ისეთივე ბუმბერაზი შესახედაობა აქვს და ჩვენც დღეს ის ”გალიბიერად” მოვიხსენიოთ.

”გალიბიერის” შესახებ მწირი ინფორმაცია ინტერნეტში მას შემდეგ გავრცელდა, რაც ”ბუგატიმ” თავისი სუპერსედანის პირველი ჩვენება დახურულ წვეულებაზე, სპეციალურად დაპატიჟებული სტუმრებისთვის მოაწყო. ამიტომ, ჯერჯერობით მისი მონაცემების შესახებ, ყველა მარჩიელობს.

მაგალითად, სავარაუდოა, რომ ავტომობილი იმავე 8.0-ლიტრიანი W16 ძრავითაა აღჭურვილი, რომელსაც ”ვეირონზეც” შეხვდებით. ოღონდ, თუ ამ უკანასკნელზე აგრეგატს ოთხი ტურბოკომპრესორი მსახურება (თითო ოთხ ცილინდრზე), სედანისთვის ძრავს ორი მექანიკური დამჭირხნი აკმარეს. ”გალიბიერის” ტექნიკური მონაცემები არ გამოქვეყნებულა, მაგრამ წვეულებაზე ”ბუგატის” ტექნიკურ დირექტორ ვოლფგანგ შრაიბერს უთქვამს - ეს მსოფლიოს უსწრაფესი, ყველაზე ტემპერამენტიანი და მძლავრი ოთხკარიანი სედანიაო.

ინგლისური ჟურნალი ”აუტოქარი” (სხვათა შორის, მისი ვერსიითაც, ბუგატის სედანს გალიბიერ-ი ჰქვია) გვატყობინებს, რომ ძრავის სიმძლავრე 800 ცხენის ძალას აღწევს. ამავე ჟურნალის ინფორმაციით, ძრავთან მაბრუნი მომენტის გარდამქმნელი 8-საფეხურიანი ავტომატური კოლოფია დაკავშირებული.

ავტომობილი თავისი მონუმენტური გარეგნობით გამოირჩევა. სხვანაირად არც შეიძლებოდა ყოფილიყო - მან ხომ ”როლს როისის” გიგანტურ ”ფანტომს” უნდა გაუწიოს კონკურენცია. ”ვეირონის” დარად, ისიც ორ ფერშია გამოწყობილი, ოღონდ, ახალი ავტომობილისთვის კომპანიის დიზაინერებმა ფერების უფრო ელეგანტური შეხამება აირჩიეს - შავი სარკესავით გაპრიალებულ ალუმინთან. ძარის ის ელემენტები, რომლებიც ვერცხლისფრად ელავს, ალუმინისგანაა დამზადბეული, შავი კი კარბონის კომპოზიტია.

ავტომობილი შიგნითაც ისეთივე დიდებულია, როგორც გარედან. სალონში ყავისფერი დომინირებს. ღია ყავისფერი ტყავით თითქმის ყველაფერია გაწყობილი, ზოგან კი მას ხის პანელები ფარავს, რომელსაც ალუმინის ფურცლებისგან დამზადებული არშიები აქვს შემოვლებული. სალონის კიდევ ერთი დამახასიათებელი თვისება მისი სისადავე და, რა თქმა უნდა, მდიდრულობაა.

ჰო მართლა, შრაიბერმა განაცხადა, რომ ”გალიბიერ-ის” დიზაინერებმა შთაგონება ”ბუგატის” ლეგენდარული ”ტაიპ 57 ატლანტიკისგან” მიიღეს, რომელთან მსგავსების მთავარი ნიშანი ავტომობილის სიმეტრიის ღერძის გასწვრივ გამავალი ზოლია, რომელიც წინა და უკანა საქარე შუშაზეც გადადის.

”ბუგატი” აღიარებს, რომ 50 ცალი ”ვეირონი” ჯერაც გასაყიდი აქვს, მის ბაზაზე გამოშვებულ ”გრან სპორტზეც” ჯერ სუ რამდნიმე ათეული შეკვეთაა მიღებული. ამიტომ, ჯერ გადაწყვეტილი არ არის ”გალიბიერ-ის” ბედი. სავარაუდოდ, კომპანია შესაბამის გადაწყვეტილებას ფრანკფურტის შოუზე მიღებული გამოხმაურებების შემდეგ მიიღებს.

”მერსედეს-ბენცის” პლაგ-ინ კონცეპცია ”ვიჟნ S500”

Mercedes-Benz Vision S500 Plug-In Hybrid Concept

13 სექტემბერი

ფრანკფურტის საავტომობილო შოუს დამთვალიერებელს, გარემოსადმი მეგობრული ავტომობილების ნამდვილი ბუმი ელით. ძნელად თუ მოიძებნება ავტომწარმოებელი, რომელიც გამოფენაზე პავილიონს დაიქირავებს და იქ ”მწვანე” ავტომობილს არ წარადგენს. რა თქმა უნდა, გარემოსადმი მზრუნველობის მარაქაში გერმანული კომპანიებიც არიან გარეულნი, რომლებიც არაერთ ჰიბრიდულსა და ელექტრონულ სიახლეს გვიმზადებენ. მათ შორის კი ერთ-ერთი ”მერსედეს-ბენცია”.

შტუტგარტულმა გამოფენისსთვის რამდენიმე ”მწვანე” კონცეპცია მოამზადა, რომელთაგან ერთ-ერთი გამორჩეული, S-კლასის სედანის ბაზაზე დამზადბული პლაგ-ინ ჰიბრიდული ”ვიჟნ S500-ია”. ამ ავტომობილში იგივე ჰიბრიდული ტექნოლოგიაა გამოყენებული, რაც ჰიბრიდულ S400-ში და ის ერთი გალონი (3.785 ლიტრით) საწვავით 117 კილომეტრს გადის.

ჰიბრიდულ აგრეგატში ბენზინის V6 და ელექტროძრავია გაერთიანებული. ამ უკანასკნელის ენერგიით მომარაგებაზე კი ლითიუმ-იონური აკუმულატორების ბლოკი ”ზრუნვს”. მხოლოდ ელექტროძრავით, ”ვიჟნ S500-ს” 30 კილომეტრის გავლა შეუძლია. მერე კი, როდესაც აკუმულატორები დაიცლება, საქმეში ავტომატურად ერთვება შიდაწვის ძრავი და ამის შემდეგ, ავტომობილი ჩვეულებრივი ჰიბრიდივით მუშაობს.

ამ ეტაპზე, სულ ეს არის, რისი თქმაც ”სამქიმიანების” ახალ ჰიბრიდულ ავტომობილზე შეიძლება. მისი მუშაობის პრინციპის შესახებ, უფრო დაწვრილებითი ინფორმაცია ფრანკფურტის შოუს დროს გამოქვეყნდება.

”ლოტუსმა” ჰიბრიდებისთვის შიდაწვის აგრეგატი შეიმუშავა

Lotus Range Extender Engine

13 სექტემბერი

ინგლისურმა კომპანია ”ლოტუსმა”, რომელიც მალაიზიური ”პროტონის” ჯგუფში შედის, სპეციალური, სამცილინდრიანი შიდაწვის აგრეგატი შეიმუშავა, რომლის დანიშნულებაც ჰიბრიდული ავტომობილების სვლის სიშორის გაზრდაა. ამ ძრავს, რომლის სახელწოდებაც ”რეინჯ ექსტენდერია”, ის საზოგადოებას პირველად ფრანკფურტის ავტო შოუზე წარუდგენს.

შიდაწვის ძრავის სამუშაო მოცულობა 1.2 ლიტრია, ის მხოლოდ 56 კილოგრამს იწონის და 47 ცხენის ძალას გამოიმუშავებს. მწარმოებლის განცხადებით, როდესაც ამ ძრავის ბრუნთა რიცხვი წუთში 1 500-ს აღწევს, მასთან დაკავშირებული გენერატორი 1500 კილოვატ ელექტროენერგიას იძლევა და თუ ბრუნთა რიცხვი 3 500-მდე იზრდება, გენერატორის მიერ გამომუშავებული სიმძლავრე 35 კილოვატს აღწევს.

”მსოფლიო იცვლება და მასთან ერთად, ჩვენც ვიცვლებით. ჩვენ მუდმივად ვმუშაობთ მასობრივი წარმოებისთვის გამოსადეგი ტექნოლოგიებზე. ძრავი ”რეინჯ ექსტენდერი” სწორედ ამის მაგალითია. ჩვენ მას სხვა კომპანიებს ჰიბრიდული აგრეგატებისთვის შევთავაზებთ. ჩვენი კონცეპტუალური ძრავი კომპაქტური, მსუბუქი და იაფია. ის ნათელი დემონსტრაციაა იმისა, რომ თავის პროექტებს ”ლოტუსი” მისთვის ჩვეული პროფესიონლიზმით ასრულებს”, - ამბობს ”ლოტუს ინჯინიარინგის” მმართველი დირექტორი პოლ ნიუსომი.

ძრავი უცნურია იმ კუთხით, რომ მას ცილინდრების ბლოკი, ამ ბლოკის თავი და გამოსაბოლქვი კოლექტორი ერთ მთლიან ბლოკად აქვს შესრულებული. მისი დანიშნულება კი მხოლოდ ისაა, რომ მასთან დაკავშირებული გენერატორის მეშვეობით, ავტომობილის მოძრაობის პროცესშივე უზრუნველყოს აკუმულატორების ელექტროენერგიით დამუხტვა.

”ლოტუსის” გარდა, პროექტზე ასევე მონაწილეობდნენ ”იაგუარის”, ”კაპაროს” და სხვა კომპანიების სპეციალისტები. მათი ერთობლივი გარჯის საბოლოო მიზანი კი მაღალი კლასის სედანის შექმნა, რომელსაც ბიძგს ჰიბრიდული აგრეგატი მისცემს.

აუდი R8 სპაიდერი

Audi R8 Spyder

12 სექტემბერი

ფრანკფურტის წლევანდელ ავტო შოუზე ”აუდისთვის” ახალი საუკუნე იწყება. ამ ახალ დასაწყისს გერმანული კომპანია განახლებული ლოგოთი და სხვა ახალ მოდელებთან ერთად, თავისი სიამაყის, სპორტული R8-ს ღია ვერსიის, ”R8 სპაიდერის” პრემიერით იწყებს.

”აუდიმ” ამ ავტომობილის ფოტოები სხვისი ხელით, ”შემთხვევით” ინტერნეტით გაავრცელა, მაგრამ მის შესახებ ინფორმაცია ფრანკფურტისთვის შეინახა. მაგრამ ვარაუდები მაინც კეთდება და საინტერესოა, რამდენად გამართლდება ისინი შოუს დროს.

მაგალითად, პოპულარული საავტომობილო ბლოგი ”ქარსკუპი” გვატყობინებს, რომ ”R8 სპაიდერი” მხოლოდ 5.2-ლიტრიანი V10 ძრავით აღიჭურვება (კუპესძარიან ვერსიაზე 4.2-ლიტრიანი V8-ც გვხვდება), 525 ცხენის ძალას და 530 ნიუტონმეტრს გამოიმუშავებს. ამ აგრეგატით, ავტომობილმა 0-100 კმ/სთ-მდე აჩქარება 3.9 წამში უნდა მოასწროს. რამდენი იქნება მისი მაქსიმალური სიჩქარე? ალბათ კუპესაზე ნაკლები, რადგან ”სპაიდერის” წონა გაზრდილია (საჭირო სიხისტის უზრუნველსაყოფად, მის ძარას დამატებითი ელემენტები აქვს).

”R8 სპაიდერის” გარდა, ფრანკფურტში ”აუდის” პავილიონში ასევე უახლესი ”A5 სპორტბეკის” და A5-ის ყველაზე მძლავრი მოდიფიკაციის, RS5-ის ნახვა იქნება შესაძლებელი.

ფრანკფურტში ”რენო” ოთხი ელექტრონული კონცეპციით გამოვა

Renault’s Four Electric Concepts

12 სექტემბერი

სხვა ავტომწარმოებლების მსგავსად, ფრანკფურტის ავტო შოუს დამთვალიერებლები ”რენოს” სიახლეებსაც იხილავენ, რომელთაგან კომპანიის პავილიონში ცენტრალურ ადგილს ოთხი, სხვადასხვა კლასის ელექტრომობილი დაიკავებს.

სამაგიეროდ, სხვებისგან განსხვავებით, ფრანგული კომპანია თავის ოთხ ელექტრონულ მუშკეტერზე წინასწარ არაფერს ყვება. მხოლოდ ფოტო ტისერი გაავრცელა, რომელიც ზემოდანაა გადაღებული და რომელზეც ერთმანეთის გვერდიგვერდ მდგარი ელექტრომობილები ჩანს.

ამ ოთხეულიდან უპირველესად ყურადღებას ყველაზე პატარა იქცევს, რომელიც როგორც ჩანს, მხოლოდ ერთ ადამიანზეა გათვლილი და არც საბარგული გააჩნია. ის ადგილი კი, სადაც მეორე ადამიანის, ან ბარგის მოთავსება შეიძლებოდა, აკუმულატორებისთვისაა გამოყოფილი.

მეორე ავტომობილი სამკარიანი უნა იყოს და მას სახურავზე მზის ელემენტები აქვს დამონტაჟებული. ამ ელემენტების მეშვეობით, მზიან ამინდებში ძრავი აკუმულატორებისგან უფრო მცირე რაოდენობით ელექტროენერგიას გახარჯავს. ამ მანქანაში ოთხი ადგილი უნდა იყოს, მაგრამ ბარგს ისევ ვერსად ჩადებთ. ზომით მეორესთან ახლოსაა მესამე ავტომობილი, ყველაზე დიდი კი ბოლოა, რომელიც საოჯახო ავტომობილის შთაბეჭდილებას ტოვებს

ამ ოთხეულის შესახებ დაწვრილებით ინფორმაციას ავტოშოუს დაწყებისას შევიტყობთ.

”ტოიოტას” პლაგ-ინ ჰიბრიდული პრიუსი ფრანკფურტამდე

Toyota Prius Plug-In Hybrid Concept

12 სექტემბერი

სამი დღეც და ფრანკფურტის საავტომობილო შოუ დამთვალიერებლების მასპინძლობას შეუდგება. მისი მონაწილენი კი აგრძელებენ თავიანთი სიახლეების შესახებ ინტერნეტით ინფორმაციის გავრცელებას. ერთ-ერთი მათგანი მსოფლიოს უდიდესი ავომწარმოებელი ”ტოიოტაა”, რომელმაც გამოფენისთვის თავისი პოპულარული ჰიბრიდის, ”პრიუსის” პლაგ-ინ ვერსია მოამზადა.

ამ ავტომობილით, რომელიც მესამე თაობის ”პრიუსის” ბაზაზეა დამზადებული, იაპონური კომპანია ”შევროლე ვოლტთან” და ამის გერმანულ ანალოგ ”ოპელ ამპერასთან” კონკურენციას გეგმავს. სწორედ ამიტომ აღჭურვა ის ეგრეთ წოდებული პლაგ-ინ სისტემით, რომელიც აკუმულატორების საყოფაცხოვრებო ქსელიდან დამუხტვის საშუალებას იძლევა.

გარეგნულად კონცეპტუალურ ავტომობილს სერიული ”პრიუსისგან” მხოლოდ გაფორმება განასხვავებს. სამაგიეროდ, შიგნიდან ის სულ სხვა ავტომობილია. ანუ, მას განსხვავებული აღჭურვილობა აქვს და ”ტოიოტა” იმედოვნებს, რომ ამ აღჭურვილობას მეოთხე თაობის ”პრიუსზე” გამოიყენებს.

კონცეპტუალური ავტომობილის ძირითადი აგრეგატი 1.8-ლიტრიანი შიდაწვის ძრავია, რომელიც 97 ცხენის ძალას იძლევა. მასთან წყვილში მუშაობს მუდმივმაგნიტებიანი სინქრონული ელექტროძრავი, რომლის სიმძლავრეც 79 ცხენის ძალას აღწევს. ეს უკანასკნელი ელექტროენერგიას ლითიუმ-იონური აკუმულატორისგან ღებულობს.

როცა მხოლოდ ელექტროძრავის მეშვეობით გადაადგილდება, ავტომობილის მაქსიმალური სიჩქარე მხოლოდ 100 კმ/სთ-ია, აკუმულატორის ენერგია კი მას მხოლოდ 20 კილომეტრის გასავლელად ჰყოფნის. აშკარად ცოტაა. თუმცა შედარებისთვის, ახლანდელ ”პრიუსს” მხოლოდ ელექტროძრავით 16 კილომეტრის გავლა შეუძლია. და მაინც, ეს მას პოპულარობაში ხელს არ უშლის.

როდესაც კომბინირებული ციკლით მოძრაობს, ავტომობილი ყოველი კილომეტრის გავლისას, ატმოსფეროში მხოლოდ 60 გრამ CO2-ს გამოჰყოფს. სხვათა შორის, მონიტორზე მუდმივად იწერება, თუ რა შემცველობის გამონაბოლქვი აქვს ჰიბრიდულ აგრეგატს. ეს კი იმის ნიშანია, რომ ”პრიუსი” გამონაბოლქვში ნახშირორჟანგის შემცირებაზე ”ზრუნავს”.

იაპონური კომპანია მერმის პირველ 500 ცალ პლაგ-ინ ჰიბრიდულ ”პრიუსს” დაამზადებს, რომელთაგან მესამედი იაპონიაში, ამდენივე აშშ-სა და ევროპაში გაიყიდება. პირველი პარტიის დანიშნულება ისაა, რომ ”ტოიოტამ” მათი მეშვეობით, მომხმარებლის აზრი შეისწავლოს და ამის მიხედვით, ამ ავტომობილის წარმოება დაგეგმოს.

ლამბორგინი რევენტონ როდსტერი

Lamborghini Reventon Roadster

11 სექტემბერი

ფრანკფურტის საავტომობილო გამოფენაზე, რომელიც რამდენიმე დღეში გაიხსნება, დამთვალიერებელი არაერთ სუპერავტომობილს იხილავს. ამ კლასის ავტომობილები გამოფენას ჩვენი პლანტის ლამის ყველა კონტინენტიდან ეწვევიან, მაგრამ მათ შორის ერთ-ერთი ყველაზე საინტერესო და გამორჩეული, რა თქმა უნდა, ”ლამბორგინის” ახალი საოცრება - ”რევენტონის” ბაზაზე შექმნილი როდსტერი იქნება.

თავისი კონკურენტებისგან განსხვავებით, კომპანია წინასწარ თავისი სიახლის შესახებ ინფორმაციას არ ავრცელებს. სამაგიეროდ, ინტერნეტით რამდენიმე ფოტოს ”გაჟონვას” შეუწყო ხელი და ფრანკფურტამდე ინტრიგა ამით შექმნა. ამ ფოტოების მიხედვით კი შეიძლება ითქვას, რომ სანტ’აგატელებმა თავიანთი ფაბრიკიდან მორიგი მხეცი გამოუშვეს.

მართალია, სიახლის შესახებ მწარმოებელი ჯერ არაფერს გვამცნობს, მაგრამ ვარაუდის დონეზე (მისი ნათესავის - დახურული რევენტონის მონაცემების მიხედვით) შეიძლება ითქვას, რომ ავტომობილი აღჭურვილია 6.5-ლიტრიანი V12 ძრავით, რომელიც 650 ცხენის ძალას და 660 ნიუტონმეტრს გამოიმუშავებს. ძრავთან 6-საფეხურიანი კოლოფია მიერთებული, რომლის მიერ გადამუშავებული მაბრუნი მომენტიც ოთხივე წამყვან ბორბალს უნაწილდბა. ისევ ვარაუდის დონეზე შეიძლება თქმა, რომ 0-100 კმ/სთ-მდე აჩქარებას როდსტერი 3 წამზე ოდნავ მეტს მოანდომებს, მისი მაქსიმალური სიჩქარე კი 340 მ/სთ იქნება.

სამწუხაროდ, ამ ავტომობილზე ოცნებაც არ ღირს - იტალიური კომპანია მხოლოდ 20 ცალი ასეთი მხეცის დამზადებას აპირებს, რომლებსაც იმ ენთუზიასტებს მიჰყიდის, რომლებიც 1.2 მილიონ ევროს გაიმეტებენ.

”მასზდას” სუპერმსუბუქი MX-5

Mazda MX-5 Superlight Concept

11 სექტემბერი

იაპონურ კომპანია ”მაზდას” მოდელი MX-5 ყველა დროის ერთ-ერთი ყველაზე პოპულარული როდსტერია, მის ასეთ პოპულარობას კი მარტივი ფორმულა უზრუნველყოფს, რომელიც მხოლოდ ორი ფაქტორით - სიმსუბუქითა და დინამიურობითაა განპირობბული. უკვე ოცი წელია, ეს ფორმულა მყიდველს იზიდავს და მფლობელს სიამოვნებას ანიჭებს.

და აი, ამ პოპულარული ავტომობილის წარმოების დაწყებიდან 20 წლის შემდეგ, ”მაზდამ” MX-5-ის ბაზაზე კიდევ უფრო მსუბუქი და დინამიური კონცეპტუალური ავტომობილი შექმნა, რომელსაც ”MX-5 სუპერლაითი” უწოდა და რომელსაც პირველად რამდენიმე დღეში ფრანკფურტის საავტომობილო შოუზე გამოფენს.

სახელიც მიგვითითებს, რომ ავტომობილი ზემსუბუქია. მას არც შუშები აქვს, არც სახურავი და საყრდენები. ამ უკანასკნელის ნაცვლად, მძღოლს და მის ერთადერთ მგზავრს, ამობრუნების შემთხვევაში, ორი დამცავი რკალი იცავს, რომლებიც სავარძლების უკან ამობურცულა. ამ შემსუბუქების შედგეი კი ისაა, რომ კონცეპტუალური ავტომობილი სულ რაღაც 995 კილოგრამს იწონსი.

სიმსუბუქე, სარბოლი სავარძლები და ბევრი სხვა სპორტული ელემენტი, რომლებსაც ამ ავტომობილის ინტერიერში შეხვდებით, მიგანიშნებთ, რომ ”MX-5 სუპერლაითს” სპორტული ტემპერამენტი უნდა ჰქონდეს. ვნახოთ:

კაპოტქვეშ განლაგებულია მოკრძალებული მონაცემების მქონე 1.8-ლიტრიანი ბენზინის ძრავი, რომლის მაქსიმალური სიმძლავრეც სულ რაღაც 125 ცხენის ძალაა. სხვათა შორის, დაახლოებით ასეთივე ძრავი ამოძრავებს ყველაზე დაბალფასიან ”ლოტუს ელის S-საც”, მაგრამ ის დაახლოებით 90 კილოგრამით ნაკლებსაც იწონის. ”სუპერმსუბუქის” ძრავთან ხუთსაფეხურიანი მექანიკური კოლოფია დაკავშირებული, რომელიც გადამუშავებულ მაბრუნ მომენტს უკანა წამყვან ბორბლებს აწვდის. ამ აგრეგატებით, ავტომობილი 0-100 კმ/სთ-მდე აჩქარებას 8.9 წამს უნდება. სამაგიეროდ, ის მოსახვევებს ბევრ, გაცილებით ”ჯიშიან” სპორტულ ავტომობილზე სხარტად გადის და ამით, მძღოლს დიდ სიამოვნებას ანიჭებს და 100 კილომეტრის გასავლელად, მხოლოდ 6.3 ლიტრ ბენზინს მოიხმარს.

”MX-5 სუპერლაითი” ”მაზდას” გერმანული სტუდიის მიერაა შექმნილი. სამწუხაროდ, მისი წარმოების თითქმის არანაირი შანსი არ არსებობს და ის ”მაზდას” პავილიონს მხოლოდ ფრანკფურტში დაამშვენებს, რის შემდგაც სამუზეუმო ექსპონატი გახდება.

”ოპელი” რუსებს უვარდებათ ხელში

GM to sell control of Opel to Russia-backed Magna (Reuters)

10 სექტემბერი

ჯენერალ მოტორსის მხრიდან მოლაპარაკების ხელმძღვანელი ჯონ სმიტი
ცოტაც და ოპელი ჯენერალ მოტორსის ოჯახს დატოვებს

”ჯენერალ მოტორსი” თანახმაა, თავისი ევროპული შტოს - ”ოპელ/ვოქსჰოლის” საკონტროლო პაკეტი (55 პროცენტი) საავტომობილო მაკომპლექტებლების მწარმოებელ კანადურ კომპანია ”მაგნა ინტერნეიშნლს” მიჰყიდოს, რომელსაც ფინანსურ გარანტად რუსული ”სბერბანკი” უდგას.

გადაწყვეტილება ამერიკული კომპანიის დირექტორთა საბჭომ ორდღიანი თათბირის შემდეგ მიიღო, რითაც პირველ რიგში, რუსები, გერმანიის კანცლერი ანგელა მერკელი და ”ოპელის” პროფკავშირები გაახარა, რომლებიც არნახული გამოსვლებით იმუქრებოდნენ იმ შემთხვევაში, თუ ”ჯენერალ მოტორსი” ”ოპელს” ან თავისთვის დაიტოვებდა, ან მას ბელგიურ საინვესტიციო ჯგუფ ”RHJ ინტრნეშნლს” მიჰყიდდა.

ანალიტიკოსები ირწმუნებიან, რომ ”ჯენერალ მოტორსს” სხვა ალტერნატივა არ გააჩნდა გარდა იმისა, რომ ”ოპელი” და ”ვოქსჰოლი” კანადურ-რუსული ალიანსისთვის მიეყიდა. იმ შემთხვევაში, თუ ამერიკული კომპანია თავის გერმანულ/ინგლისურ ბრენდს დაიტოვებდა, მასში საინვესტიციოდ რამდენიმე (ფინანსური მრჩევლების შეფასებით, 6 მილიარდი) მილიარდი დოლარი დასჭირდებოდა, ასეთი თანხის მოზიდვა კი სარისკოდ ჩანდა.

ბელგიური კონსორციუმისთვის ”ოპელის” მიყიდვას კი სასტიკად ეწინააღმდეგებოდა გერმანიის მთავრობა. ”მაგნას” გარდა, ორივე დანარჩენი ვარიანტით კი უკიდურესად უკმაყოფილო რჩებოდა ”ოპელის” პროფესიული კავშირი, რომელიც ფრანკფურტის საავტომობილო შოუს დროს, არნახული და ”ძალიან მძაფრი” აქციებით იმუქრებოდა.

მიღებული გადაწყვეტილებით, ”გენერლები” ”ოპელის” აქციების 35 პროცენტს დაიტოვებენ, 10 პროცენტს პროფკავშირი მიიღებს, დარჩენილ 55 პროცენტს კი ”მაგნა” და ”სბერბანკი” თანაბრად გაიყოფენ. ამერიკული კომპანიის ამ გადაწყვეტილებას მერკელმა ისტორიული უწოდა და განაცხადა, რომ ამიერიდან, ”ოპელი” ახალ ცხოვრებას იწყებს.

საინტერესოა, როგორი იქნაბა ეს ”ახალი ცხოვრება”, თუ გერმანულ კომპანიას რუსები ჩაიგდებენ ხელში, რომელთა ფულითაც ”მაგნამ” ”ოპელის” ყიდვა გადაწყვიტა. ისე, რუსებს თავად კანადურ კომპანიაშიც ეკუთვნით წილი. ასე რომ, ამის გათვალისწინებით, რუსული მთავრობის ხელში (სბერბანკი სახელმწიფოს ეკუთვნის), რეალურად ”ოპელის” მეტი წილი აღმოჩნდება, ვიდრე ეს ამერიკელებს სურდათ.

თუმცა, ჯერ ყველაფერი საბოლოოდ გადაწყვეტილი არაა. ”სბერბანკის” მთავარი აღმასრულებელი გერმან გრეფი ამბობს, რომ გარიგების სტრუქტურა უაღრესად რთულია და ის ბევრ დაზუსტებას მოითხოვს. ასე რომ, ”ჯენერალ მოტორსის” გადაწყვეტილება მნიშვნელოვანი, მაგრამ არა საბოლოოა.

აღსანიშნავაია, რომ ”ოპელის” გაყიდვის შემდეგ, ”ჯენერალ მოტორსმა” პრაქტიკულად დაკარგა იმის შანსი, რომ ”ტოიოტასგან” მსოფლიოს უდიდესი ავტომწარმოებლის სტატუსი დაებრუნებინა. ნახევარი წლის მონაცმების მიხედვით, ამერიკული და იაპონური კომპანიების გაყიდვების მოცულობებს შორის სხვაობა მხოლოდ 8 000 იყო (ტოიოტას სასარგებლოდ). ”ოპელის” გაყიდვის შემდეგ კი იაპონური კომპანიის უპირატესობა საგრძნობლად გაიზრდება.

ცნობისათვის, შარშან ”ჯენერალ მოტორსის” გაყიდვების 18 პროცენტი ”ოპელზე” მოდიოდა. ამასთან, ამერიკულ ჯგუფში გერმანული კომპანია ”შევროლეს” შემდეგ სიდიდით მეორე იყო.

”ფიატ 500 აბარტ SS-ის” ფერარისეული ვარიანტი

Fiat Abarth 695 Tributo Ferrari

10 სექტემბერი

”ფიატ 500 აბარტ SS” (ესეესე) იტალიური კომპანიის მინიავტომობილის ყველაზე ტემპერამენტიანი, ”მხურვალე” ვერსიაა. არაერთმა სატუნინგო კომპანიამ სცადა უკეთესის დამზადება, მაგრამ ”ჩინკვეჩენტოს” აბარტისეული ვერსია მაინც საუკეთესოდაა მიჩნეული. მაგრამ მალე, საავტომობილო სამყარო მასზე უკეთესსაც მალე იხილავს.

ეს ფრანკფურტის საავტომობილო გამოფენაზე მოხდება, სადაც ”ფიატი” და მის ჯგუფში შემავალი ”აბარტი” და ”ფერარი”, თავიანთ ერთობლივ ნამუშევარს წარადგენენ. ავტომობილის სრული სახელწოდება ”ფიატ აბარტ 695 ტრიბუტო ფერარია”. უკვე ცნობილია, რომ ტურინული გიგანტის შეკვეთით, ”აბარტი” და ”ფერარი” ამ ავტომობილს მხოლოდ 200 ეგზემპლარად დაამზადებენ. რა თქმა უნდა, ყველა მათგანი ”ფერარის” საფირმო წითელ ფერში შეიღებება.

პატარა ბოლიდის მთავარი ნაწილი მისი 1.4-ლიტრიანი ტურბოძრავია, რომელიც მაქსიმუმ 180 ცხენის ძალას გამოიმუშავებს. ძრავთან დაკავშირებულია 6-საფეხურიანი, ნახევრად ავტომატური, ელექტრომექანიკური გადაცემათა კოლოფი, რომლის საფეხურებიც საჭის რგოლის უკან მოთავსებული ბერკეტებით იცვლება.

”695 ტრიბუტო ფერარის” საკიდარი ”ფერარის” სპეციალისტებმა მოამზადეს, მუხრუჭები კი იტალიურმა კომპანია ”ბრემბომ” შექმნა. ავტომობილი 17-დუიმიან ბორბლებზე დააყენეს, რომლებიც ”ფერარის” საფირმო სტილშია შესრულებული.

ინტერიერიც ”ფერარის” სტილშია შესრულებული - თვალში საცემია გამოკვეთილი სპორტული ყაიდა, ტყავით და კარბონით გაწყობილი დეტალები და რა თქმა უნდა, სპორტული საჭე და სავარძლები.

ჯერჯერობით არ ქვეყნდება ამ შედევრის დინამიკური მახასიათებლები და ფასი. თუმცა ძნელი მისახვედრი არ უნდა იყოს, რომ ორივე ”ფერარისთვის” შესაფერისი იქნება. უფრო დაწვრილებით კი მათ შესახებ ფრანკფურტის ავტო შოუს დროს შევიტყობთ.

გაიცანით - ”მერსედეს-ბენც SLS AMG”

Mercedes-Benz SLS AMG

9 სექტემბერი

”მერსედეს-ბენცის” თავლას ყველზე ნანატრი კვიცი დაემატა. კვიცი კი არა, ნამდვილი ჯიშიანი სადოღე ბედაური, რომელსაც საავტომობილო სამყარო დიდხანს მოუთმენლად ელოდა. ავტომობილი, რომელიც რამდენჯერმე მოექცა პაპარაცების კამერების ობიექტივში და რომელსაც შტუტგარტელებმა SLS AMG უწოდეს, საზოგადოებას პირველად, ვირტუალურ სამყაროში გაეცნო.

პირველ რიგში უნდა ითქვას, რომ SLS AMG ”მერსედეს-ბენცის” ლეგენდარული ”300 SL გალვინგის” (თოლიას ფრთა) ღირსეული შთამომავალია. თავიდან გადაწყვეტილი იყო, რომ მის შექმნაში მონაწილეობა ”მაკლარენს” უნდა მიეღო, მაგრამ შემდეგ ინგლისური კომპანიის ნაცვლად, არჩევანი შტუტგარტელთა ჯგუფში შემავალ სატუნინგო და ინჟინირინგულ ატელიე AMG-ზე შეჩერდა.

ახალი ავტომობილი AMG-სავე მიერ შემუშავებული, 6.2-ლიტრიანი V8 ძრავითაა აღჭურვილი, რომელიც მაქსიმუმ 571 ცხენის ძალას (6 800 ბრ/წთ-ზე) და 650 ნიუტონმეტრს (4 750 ბრ/წთ-ზე) გამოიმუშავებს. გადაბმის ორდისკოიანი ქუროს მეშვეობით, ძრავთან 7-საფეხურიანი ნახევრად ავტომატური კოლოფია დაკავშირებული, რომელიც ამძრავ მომენტს უკანა წამყვან ბორბლებს აწვდის. ეს ტანდემი 1620-კილოგრამიან ავტომობილს ადგილიდან 100 კმ/სთ-მდ 3.8 წამში ააჩქარებს, მაქსიმალურ სიჩქარეს კი 315 კმ/სთ-ს ანიჭებს.

ისევე როგორც 1950-იანი წლების ”გალვინგს”, SLS AMG-საც ორივე კარი თოლიის ფრთის სტილში - ქვევიდან ზევით ეხსნება. ოღონდ, ”ლამბორგინისგან” განსხვავებით, კარის სამაგრი სახურავზე მდებარეობს და არა წინა საყრდენის ძირზე. როცა ორივე კარი გაღებულია, ისინი სწორედ თოლიას ფრთებს მოგვაგონეს.

ავტომობილი ალუმინის შენადნობებისგან დამზადებულ შასიზეა აწყობილი და მას წონის თითქმის იდეალური განაწილება ახასიათებს - 48-52%-ზე (შესაბამისად, წინასა და უკანაზე). SLS AMG-ს გაბარიტებია: სიგრძე 4.65 მ, სიგანე 10.95 მ და სიმაღლე 1.25 მეტრი. ბორბლებს შორის არსებული ბაზის სიგრძე კი 2.7 მეტრია.

”მერსედეს-ბენც SLS AMG-ს” მსოფლიო პრემიერა ფრანკფურტის ავტო შოუზე გაიმართება, მის გაყიდვას კი შტუტგარტული გიგანტი წელსვე დაიწყებს. გერმანიაში ამ ავტომობილის სასტარტო ფასი 177 310 ევრო იქნება. სავარაუდოდ, ”სამქიმიანები” მერმის მყიდველს SLS AMG-ს ღია ვერსიას შესთავაზებენ, უფრო გვიან კი შესაძლოა, მისი ელექტრონული ვარიანტიც კი გამოუშვან.

”ალფა რომეო მი.ტო” მულტიეარ ძრავებით

Alfa Romeo MiTo 1.4l MultiAir

9 სექტემბერი

ფრანკფურტის ავტო შოუზე, იტალიური კომპანია ”ალფა რომეო” თავის პოპულარულ ჰეჩბეკ ”მი.ტო-ს” ახალ ვერსიას წარადგენს, რომელიც ტექნოლოგია ”მულტიეარის” ახალი თაობის 1.4-ლიტრიანი ტურბოძრავითაა აღჭურვილი. ფორსირების დონის მიხედვით, ძრავი სამნაირია. მათი სიმძლავრე კი 105, 135 და 170 ცხენის ძალაა.

სისტემა ”მულტიეარი” იმითაა საინტერესო, რომ ის ძრავის სიმძლავრეს მინიმუმ (ფორსირების დონის შესაბამისად) 10 პროცენტით, ეკონომიურობას კი ასევე 10 პროცენტით აუმჯობესებს. გარდა ამისა, ”ფიატის” ძრავების ტექნოლოგიების განყოფილების მონაცემებით, ტექნოლოგია ”მულტიეარის” მიხედვით შექმნილი ძრავების გამონაბოლქვი, 40 პროცენტით ნაკლებ მავნე მყარ ნაწილაკებს და თითქმის 50 პროცენტით ნაკლებ აზოტის ოქსიდებს შეიცავს.

საშუალოდ ფორსირებული 135-ცხენისძალიანი ძრავით აღჭურვილი ”მი.ტო-ს” საშუალო ხარჯი 100 კილომეტრზე 5.6 ლიტრია, ატმოსფეროში კი ის ყოველ კილომეტრზე 129 გრამ CO2-ს გამოჰყოფს. ოდნავ მეტ, 139 გრამ CO2-ს შეიცავს 170-ცხენისძალიანი ძრავი. სამაგიეროდ, მისი ხარჯი მხოლოდ 4.8 ლიტრია. მილანური კომპანია ყველაზე სუსტი აგრეგატის შესაბამის მონაცემებს ჯერჯერობით არ ამხელს.

ძრავების ყველა მოდიფიკაციასთან შესაწყვილებლად განკუთვნილია 5 და 6-საფეხურიანი გადაცემათა კოლოფები. ამასთან, ”ალფა რომეო” პირველად გამოიყენებს მისთვის ახალ სისტემა სტარტ/სტოპს, რომელსაც პირველად ”მულტიეარ” ძრავებით აღჭურვილი ”მი.ტო” მიიღებს.

105 და 135-ცხენისძალიანი ტურბოძრავებით აღჭურვილი ”მი.ტო-ს” გაყიდევებს ”ალფა რომეო” წელსვე დაიწყებს, უფრო მოგვიანბით კი 170-ცხენისძალიანის გაყიდვებიც დაიწყება.

”მაკლარენის” ახალი სუპერავტომობილი - MP4-12C

McLaren MP4-12C

9 სექტემბერი

ლეგენდარული წინაპრების გარემოცვაში

ფორმულა ერთის მსოფლიო ჩემპიონატებში სახელმოხვეჭილი ინგლისური კომპანია ”მაკლარენი” საგზაო ავტომობილების წარმოებას დაუბრუნდა - დღეს საზოგადოებას ოფიციალურად წარუდგინა თავისი ახალი სუპერავტომობილი MP4-12C, რომლითაც კონკურენციას ისეთ პოპულარულ მოდელებს გაუწევს, როგორებიცაა ”ფერარის” უახლესი ”458 იტალია” (ახალია, მაგრამ ფერარი ხომ ყველასთვის საოცნებო მარკაა!), ”ლამბორგინი გალიარდო” და ”ასტონ მარტინ DB9”.

ერთი შეხედვით, ახალი ავტომობილის სახელი-აბრევიატურა უცნაურად მოსჩანს. თუმცა ფორმულა ერთის მოყვარულებმა იციან, რომ აღნიშვნა MP4 ”მაკლარენის” საფირმო ნიშანია, რომელსაც ის უკვე 30 წელია, (აქამდე მხოლოდ ფ1-ში) იყენებს. ასო C ნიშნავს, რომ შასი კარბონის ბოჭკოს (carbonfibre) საფუძველზე დამზადებული მონოლითური სტრუქტურაა, რომელმაც საფუძველშივე უნდა უზრუნველყოს მეტოქეებთან უპირატესობა. რაც შეეხება რიცხვ 12-ს, ეს კომპანიის შიდა (ინგლისურ ჟურნალ აუტოქარის ცნობით, საიდუმლო) ინდექსია, რომლითაც ავტომობილის შესაძლებლობები ფასდება.

MP4-12C-ის ძირითადი მზიდი ელემენტი

MP4-12C-ის მთავარი ნაწილი მისი მზიდი ელემენტი - კარბონის კომპოზიტისგან დამზადებული შასია, რომელზეც წინიდან და უკნიდან ცალკე კვანძებად გამოყოფილი ელემენტები მაგრდება. წინიდან ესაა საჭის მექანიზმი და საკიდარი, უკნიდან კი - ძრავი მასთან დაკავშირებული გადაცემათა კოლოფით და ტრანსმისიით, ასევე უკანა საკიდარით (ეს შეთანწყობა ფორმულა 1-ში გამოიყენბა). შასის სტრუქტურაში შედს საწვავის ავზი, რომელიც ორად ორი სავარძლის უკან, ძირზეა მოთავსებული. ამგვარი მონოკოკური შასი უაღრესად ხისტია და მთლიანობაში, ავტომობილის შესანიშნავი ტექნიკურ-დინამიკური მახასიათებლების საწინდარი. რა თქმა უნდა, შასის სპეციალური სამაგრები გააჩნია, რომელზეც ავტომობილის ძარის ელემენტები მაგრდება.

ძრავი ”მაკლარენის” სპეციალისტების მიერაა შემუშავებული. მოსალოდნელი იყო, რომ ინგლისური კომპანია ახალი ავტომობილისთვის თავისი პარტნიორის, ”მერსედეს-ბენცის” ძრავს გამოიყენებდა, მაგრამ ასე არ მოხდა. შესაძლოა, აგრეგატის შემუშავების პროცესში შტუტგარტელი სპეციალისტებიც მონაწილეობდნენ, მაგრამ ფაქტია, რომ ძრავს ინგლისური ფირმის ნიშანი ამშვენებს. ბარემ იმასაც შეგახსენებთ, რომ ლეგენდარულ F1-ს ”ბეემვეს” გული უცემდა.

მოკლედ: MP4-12C-ს ბაზაში, შასის უკანა ტორსზე 3.8-ლიტრიანი V8 კონფიგურაციის მქონე ტურბოძრავი მაგრდება, რომლის ცილინდრების რიგებს შორისაც 90-გრადუსიანი კუთხეა. ძრავს ორი ტურბოკომპრესორი ემსახურება, რომელთა დახმარებითაც, მაქსიმალური სიმძლავრე 600 ცხენის ძალას, მაქსიმალური მაბრუნი მომენტი კი 595 ნიუტონმეტრს აღწევს. ამასთან, ამ მომენტის 80 პროცენტს უკვე მაშინ ავითარებს, როდესაც მუხლა ლილვის ბრუნთა რიცხვი 2 000 ბრ/წთ-ია.

ძრავთან ორდისკოიანი ქუროს მეშვეობით დაკავშირებულია 7-საფეხურიანი ნახევრად ავტომატური გადაცემათა კოლოფი, რომელიც რამდენიმე რეჟიმში მუშაობს. მათგან ორი ძირითადია ნორმალი და სპორტი. ასევე შესაძლებელია მისი ზამთრის რეჟიმსა და ავტომატურ რეჟიმზე გადაყვანა. კოლოფში საფეხურების შეცვლა საჭის რგოლის უკან განლაგებული ბერკეტებით ხდება (როგორც ფორმულა 1-შია).

საკუთარი ძრავისა და ფირმა ”გრაციანოს” წარმოების გადაცემათა კოლოფის ტანდემით, MP4-12C 0-100 კმ/სთ-მდე აჩქარებას დაახლოებით 30 წამში ასწრებს, მისი მაქსიმალური სიჩქარე კი 320 კმ/სთ-ია.

რაც შეეხება დანარჩენ აღჭურვილობას: ავტომობილის უკან მოთავსებულია აქტიური სპოილერი, რომელიც გარდა იმისა, რომ მაღალი სიჩქარით მოძრაობისას, ავტომობილის მდგრადობას უზრუნველყოფს, დინამიკური მუხრუჭის როლსაც ასრულებს. ამასთან, სიჩქარის შესაბამისად იცვლის დახრის კუთხეს, დაბალი სიჩქარით მოძრაობის დროს კი თავის ”ბუნგაში” (ფოსოში) იმალება.

MP4-12C ასევე ელექტრონიკის მიერ რეგულირებადი საკიდარით, კარბონ-კერამიკული მუხრუჭებით, ”პირელის” საბურავებით და პასიური და აქტიური უსაფრთხოების სისტემებითაა აღჭურვილი. დაკიდევ, ავტომობილის ორივე კარი (ეგრეთ წოდებული გილიოტინური ტიპის) ქვევიდან ზევით, წინა მხარეს იღება (როგორც ლამბორგინის მოდელებზე).

კომპიუტერი ავტომობილს სამ რეჟიმში ამუშავებს. ამ რეჟიმების არჩევისას, ელექტრონული ტვინი აქსელერატორის რეაქციის სიმკვეთრეს, საჭის მექანიზმის მგრძნობიარობას, სტაბილიზაციის სისტემის მონაცემებს, გადაცემათა კოლოფის საფეხურების შეცვლის სიჩქარეს და, რა თქმა უნდა, საკიდარის სიხისტეს ცვლის.

”მაკლარენის” შეფი რონ დენისი აცხადებს, რომ მისი კომპანია წლიურად 1 000 ცალი MP4-12C-ს წარმოებას გეგმავს. ბაზარზე ეს ავტომობილი ორი წლის შემდეგ გამოჩნდება. ევროპაში მისი სავარაუდო ფასი 142 200-200 000 ევროს ფარგლებში მოექცევა. კომპანიის განცხადებით, წარმოებული ავტომობილების 25 პროცენტი ბრიტანეთში, ამდენივე აშშ-ში, დანარჩენი კი მსოფლიოს ბაზარზე (ძირითადად ევროპასა და ახლო აღმოსავლეთში) გაიყიდება.