”ბენტლიმ” ჩინელებისთვის სპეციალური მოდელები შექმნა

Two Bentley Continental Exclusively for China

22 აპრილი

ბრიტანულმა კომპანია ”ბენტლიმ”, ჩინური ბაზრისთვის სპეციალურად მოამზადა თავისი ორი მოდელის - ”კონტინენტალ GT-ს” და ”კონტინენტალ ფლაინგ სპურ სპიდის” მოდიფიკაციები, რომლებიც მხოლოდ ჩინურ ბაზარზე გაიყიდება. ორივე ავტომობილის პრემიერა ”ბენტლიმ” პეკინის საერთაშორისო საავტომობილო გამოფენას დაამთხვია.
კომპანიის მიერ გამოფენისთვის მომზადებულ რელიზში წერია, რომ ჩინეთის ბაზარი ”ბენტლისთვის” მესამე უმსხვილესია - შარშან იქ ამ კომპანიამ 421 ავტომობილის რეალიზება შეძლო. სწორედ ამის გამო გადაწყდა, რომ კომპანიის ორი ყველაზე პოპულარული ავტომობილის მოდიფიცირება ჩინური ბაზრის მოთხოვნების შესაბამისად ჩატარებულიყო.

ორივე ავტომობილი უმნიშვნელოდაა შეცვლილი და თანაც, ორივე შემთხვევაში, ცვლილება მხოლოდ კოსმეტიკურია. ამასთან, ორივე ავტომობილი ისევ იმ აგრეგატებითაა აღჭურვილი, რომლებითაც მათი საბაზო ვერსიები. ძრავი 6.0-ლიტრიანია, V12 კონფიგურაციით. ”კონტინენტალ GT-ს” შემთხვევაში, მისი სიმძლავრე 560 ცხენის ძალაა, ”კონტინენტალ ფლაინგ სპურ სპიდის” შემთხვევაში კი - 610 ცხენის ძალა. ორივე ავტომობილზე, ძრავთან 6-საფეხურიანი ავტომატური კოლოფია შეწყვილებული.

რაც შეეხება გარეგნულ ცვლილებებს, ”კონტინენტალ GT-ს” სახელწოდებაში დაემატება ”დიზაინ სერის ჩაინა”. ამ ავტომობილის სალონი ორი ფერის ტყავით და შავი, ”როიალ” ფერის ლაკით შეღებილი ხის დეტალებითაა გაწყობილი. სალონში, ცენტრალურ კონსოლზე, წინა ფრთებსა და ზღურბლებზე გამოჩნდება წარწერა ”დიზაინ სერის ჩაინა”.

უფრო მეტი ცვლილებაა ”კონტინენტალ ფლაინგ სპურ სპიდის” შემთხვევაში. ზემოთ ჩამოთვლილი სიახლეების გარდა, ეს ავტომობილი ასევე მიიღებს უფრო კომფორტულ საკიდარს და 20-დუიმიან ბორბლებს. შეცვლილია გამოსაბოლქვი სისტემა, რისი მიზანიც, ავტომობილის ხმაურის შემცირება იყო.

”ფიატი” რეორგანიზაციას იწყებს

Fiat Separates its Auto Operations from Truck and Tractor Divisions

22 აპრილი

მარცხნიდან: მარკიონე, დი მონტეძემოლო და ელკანი

.................................................................

”ფიატ S.p.A.-ს” მთავარმა აღმასრულებელმა სერჯო მარკიონემ გამოაქვეყნა იტალიური კომპანიის ხუთწლიანი სამოქმედო ფეფმა, რომლის მიხედვითაც, მისი საავტომობილო შტო სატვირთო ავტომობილებისა (ივეკო) და ტრაქტორების მწარმოებელ (ქეის ნიუ ჰოლანდი) შტოებს დაშორდება. ამ ორის საფუძველზე კი სრულიად ახალი კომპანია, სახელად ”ფიატ ინდასტრიალ S.p.A.”.

მარკიონემ ასევე გამოაცხადა, რომ ავტომობილების მწარმოებელი ბრენდები, როგორებიცაა ”ფიატი”, ”ალფა რომეო”, ”ლანჩა”, ”ფერარი” და ”მაზერატი”, ჰოლდინგ ”ფიატ S.p.A.-ს” შემადგენლობაში დარჩებიან. ამავე ჰოლდინგში დარჩება ძრავებისა და ტრანსმისიების მწარმოებელი შტო ”ფიატ პაუერტრაინ ტექნოლოჯიზი”.

მარკიონე დასძენს, რომ ზემოთ აღნიშნული კომპანიების დაშორების პროცესი ამ წლის ბოლომდე დასრულდება. მისი აზრით, ჰოლდინგში საავტომობილო ჯგუფის დატოვება ხელს შეუწყობს ”ფიატის” და ”კრაისლერის” ჯგუფის სწრაფ და მყარ ინტეგრაციას. პარალელურად, ტურინელები ამერიკულ კომპანიაში თავის წილს, მალე 20-დან 35 პროცენტამდე გაზრდიან.

”ფიატის” ხუთწლიანი გეგმის ძირითადი გეგმა ითვალისწინებს, რომ ”ფიატის” ჯგუფში შემავალმა საავტომობილო კომპანიებმა და ”კრაიელსრის” კომპანიებმა (კრაისლერი, დოჯი, ჯიპი) ერთად განახორციელონ შესყიდვები, საინჟინრო სამუშაოები, ერთმანეთს მაკომპლექტებლები გაუზიარონ და განვითარების ერთობლივი გეგმები დასახონ.

”ჩვენი გეგმა ითვალისწინებს, რომ 2010-დან 2014 წლამდე პერიოდში, ჩვენი კომპანია, ”კრაისლერთან” ერთად, რეალურად გახდეს გლობალური ბაზრის მოთამაშე. ”კრაისლერის” გარეშე, ”ფიატი” მთელი არსებობის განმავლობაში, დიდი ბაზრიდან გარიყული კომპანიის როლში ყოფნისთვის იქნებოდა განწირული”, - ”ფაინენშლ ტაიმსთან” საუბრისას განაცხადა მარკიონემ.

ორი კომპანიის შეფი დასძენს, რომ ”ფიატი” და ”კრაისლერი” ერთმანეთს ზოგიერთ მოდელს გაუცვლიან, შემდგომში კი, ახალ მოდელებს ერთობლივად შეიმუშავებენ. იტალიური კომპანია, ამერიკელი პარტნიორისგან უგზოობის მოდელებისა და მინივენების წარმოების გამოცდილებას გაიზიარებს, თავად კი მას კი მინი, სუბკომპაქტურ და კომპაქტურ პლატფორმებს შესთავაზებს. ამგვარად, ორივე კომპანიას, მათთვის ახალ სეგმენტებში შეღწევის რეალური საშუალება მიეცემა.

ამგვარი პარტნიორობა ყველაზე ინტენსიურად ”ლანჩასა” და ”კრაისლერს” შორის განხორციელდება. კერძოდ, იტალიური მარკის მართვას ”კრაისლერი” განახორციელებს. უფრო მეტიც, ”ლანჩას” უკლებლივ ყველა მოდელის შემუშავებაში, ”კრაისლერის” სპეციალისტები მიიღებენ მონაწილეობას და მათ ამერიკული კომპანია თავისი მარკითაც გამოუშვებს.

იმავდროულად, გამოცხადდა, რომ ”ფიატის” ჯგუფის აღმასრულებლის პოსტს დატოვებს ლუკა კორდერო დი მონტეძემოლო, ვინც ტურინული კონცერნის დირექტორთა საბჭოში დარჩება და პარალელურად, ”ფერარის” აღმასრულებელიც იქნება.

”ლუკა კორდერო დი მონტეძემოლომ ეს გადაწყვეტილება თავად მიიღო და ის იმ გარემოებით ახსნა, რომ შესრულებულია ყველა ის მიზანი, რომლებსაც მას აკისრებდნენ, როდესაც ამ თანამდებობაზე 2004 წელს დანიშნეს”, - ნათქვამია ”ფიატის” მიერ გამოქვეყნებულ რელიზში. ამ განცხადების გამოქვეყნებამდე, ინტერნეტით გავრცელდა ცნობები იმის შესახებ, რომ თითქოს, მონტეძემოლო არ ეთანხმება იმ ხუთწლიან გეგმას, რომელიც მარკიონემ შეიმუშავა და სწორედ ამის გამო გადაწყვიტა თანამდებობის დატოვება. სხვა ვერსიით, ის პოლიტიკაში წასვლას აპირებს.

მონტეძემოლოს ადგილს დაიკავებს ”ფიატის” ვიცე აღმასრულებელი ჯონ ელკანი, ვინც ტურინული კონცერნის ყოფილი აღმასრულებლის, ჯოვანი ანიელის შვილიშვილია. სიკვდიამდე ცოტა ხნით ადრე, ანიელის ნათქვამი აქვს, რომ ჯონი მომავალში ”ფიატის” აღმასრულებელი უნდა გახდეს. სხვათა შორის, ელკანი ანიელის ოჯახის მფლობელობაში არსებულ კომპანია ”ექსორ S.p.A.-ს” აღმასრულებელია, კომპანიისა, რომელიც ”ფიატის” აქციების 30 პროცენტს აკონტროლებს და მისი უმსხვილესი აქციონერია. თავის დროზე, სწორედ ელკანის დამსახურება იყო ის, რომ ადვოკატი მარკიონე ”ფიატის” მთავარი აღმასრულებელი გახდა.

ჰიბრიდული ტექნოლოგია ”ჰონდას” სპორტული ავტომობილისთვის

Honda CR-Z

20 აპრილი

80-იან წლებში, იაპონური კომპანია ”ჰონდა” კომპაქტურ სპორტულ ჰეჩბეკ CR-X-ს უშვებდა, რომელიც ახლაც კი პოპულარულია სიჩქარის მოყვარულ ახალგაზრდებს შორის (მათ შორის, საქართველოშიც). მაგრამ ამ მოდელის წარმოების შეწყვეტიდან (1991 წლი) თითქმის ორი ათეული წელი ისე გავიდა, რომ მისი ადგილი ცარიელი დარჩა. რამდენიმე წლის წინ, იაპონურმა კომპანიამ გამოაცხადა, რომ 21-ე საუკუნის პირველი დეკადის მიწურულს, ბაზარზე CR-X-ის შემცვლელს გამოუშვებდა. ეს შარშან უნდა მომხდარიყო, მაგრამ ეკონომიკური კრიზისის გამო, მისმა პრემიერამ ერთი წლით დაიგვიანა.
ახალ სპორტულ ჰეჩბეკს, სახელად ”ჰონდა CR-Z”, სახელი ოდნავ შეცვლილი აქვს - ექსტრემალური ხასიათის აღმნიშვნელი X-ის ადგილი Z-მა დაიკავა. ოღონდ, ამჯერად ეს ავტომობილი უბრალო სპორტქარი არაა - იაპონურმა კომპანიამ ის ჰიბრიდული სისტემით აღჭურვა და რაც მთავარია, სპორტული თვისებები შეუნარჩუნა. ასე განსაჯეთ, ახალი მოდელის გარეგნობაშიც ადვილად ამოიცნობთ მისი წინამორბედის სტილს.
CR-X-ის მსგავსად, CR-Z-იც სპორტული, დინამიური გარეგნობით გამოირჩევა. თუმცა, ”ჰონდას” დიზაინერებმა მასში პოპულარულ ჰიბრიდულ მოდელ ”ინსაითის” დიზაინის ელემენტებიც ჩააქსოვეს. მაგალითად, ორშუშიანი უკანა კარი. უფრო სწორედ, კარი, რომელსაც ქვედა ნაწილი გამჭვირვალე აქვს. სხვათა შორის, დიზაინის ეს ელემენტი CR-X-საც ახასიათებდა და როგორც ჩანს, ”ჰონდაში” ჩათვალეს, რომ ამ პოპულარულ ავტომობილთან მსგავსება, კომპანიის სხვა მოდელებსაც გამოადგება.
CR-Z-ს ინდივიდუალობას მისი უზარმაზარი რადიატორიც ანიჭებს, რომელიც საკმაოდ დაბლაა დაწეული. საქარე მინა იმდენადაა დახრილი, რომ თავისუფლად შეიძლება კაპოტის გაგრძელებად ჩაითვალოს. იგივე ითქმის სახურავსა და უკანა კარზე - სად მთავრდება პირველი და იწყება მეორე, ამის თქმა ალბათ თვით ”ჰონდას” დიზაინერებსაც გაუჭირდებათ. ავტომობილის დინამიურობაზე, მის გვერდებზე დატანილი პროფილირებული ზოლიც მიგანიშნებთ, რომელიც წინ, ბორბლის თაღთან იწყება და უკანა საყრდენის შემდეგ იკარგება.

აეროდინამიკის გასაუმჯობესებლად, განსაკუთრებული ყურადღებით მისი უკანა ნაწილის დამუშავებას მიექცა. რა თქმა უნდა, ავტომობილის არაერთმა პროტოტიპმა, აეროდინამიკურ მილში მრავალი საათი გაატარა. ამის შედეგია ის, რომ ავტომობილის უკანა ფრთების ზედა ნაწილები შიგნითაა გადახრილი. ასე ისინი ჰაერის მეტ ნაკადს ატარებენ კუდისკენ და ავტომობილს უფრო გარსშემოდენილს ხდიან, რაც მაღალ სიჩქარეზე მას უფრო მდგრადს ხდის.

სპორტული სტილი CR-Z-ის ინტერიერშიც ხაზგასმულია. ჯერ ერთი, სალონი გადატვირთული არაა სხვადასხვა დამხმარე მოწყობილობების პანელებით. მეორეც, სავარძლები სპორტულ სტილშია შესრულებული - მათ გვერდითა საყრდენები აქვთ, რომლებიც მაღალი სიჩქარით მოძრაობისას, მძღოლის ადგილზე უკეთ დაფიქსირებისთვისაა მოწოდებული.

მართალია, სალონში დამხმარე და გასართობ მოწყობილობათა მართვის საშუალებები თვალში არ გვხვდება, მაგრამ ეს არ ნიშნავს, რომ ავტომობილს ისინი არ აქვს. მაგალითად, საბაზო კომპლექტაციაში შედის კლიმატ კონტროლის და აუდიო სისტემები, ასევე გასაღების გარეშე ძრავის დაქოქვის სისტემა. დამატებითი თანხის გადახდის შემთხვევაში კი, შესაძლებელი იქნება სალონის ტყავით გაწყობა, გამჭვირვალე სახურავის, შუქდიოდური ფარების და უფრო მძლავრი აუდიო სისტემის დაყენება.

რა თქმა უნდა, ახალ ავტომობილში მთავარი ჰიბრიდული ძალური დანადგარია. მისი მთავარი ელემენტია სერია i-VTEC-ის 1.5-ლიტრიანი ძრავი (ბენზინის), რომელიც 114 ცხენის ძალას იძლევა. ელექტროძრავის სიმძლავრე მხოლოდ 14 ცხენის ძალაა. წესით, ჰიბრიდული სისტემის ჯამური სიმძლავრე 128 ცხენის ძალა უნდა ყოფილიყო, თუმცა სტენდზე ტესტირებისას, დინამომეტრმა მხოლოდ 124 ცხენის ძალა დააფიქსირა, მაბრუნმა მომენტმა კი 174 ნიუტონმეტრს მიაღწია. ”ჰონდას” მონაცემებით, ამ აგრეგატით, CR-Z-ს 100 კილომეტრის გასავლელად, 5.0 ლიტრი ბენზინი ეყოფა.

იაპონური კომპანია აცხადებს, რომ ახალი ავტომობილის შექმნისას, დიდი დრო დაეთმო მისი გამოსაბოლქვი სისტემის დამუშავებას. ჯერ ერთი, ამით შესაძლებელი გახდა გამონაბოლქვ აირში მავნე მინარევების შემცველობის შემცირება. მეორეც, ”ჰონდას” სპეციალისტებმა შესძლეს, რომ CR-Z-ს სპორტული ავტომობილებისთვის დამახასიათებელი ბოხი ხმა ჰქონოდა.

CR-Z-ის ჰიბრიდული სისტემა სამ რეჟიმში მუშაობს. ესენია სპორტული, ეკონომიური და სტანდარტული რეჟიმები. მათი მეშვეობით, მძღოლს შეუძლია ავტომობილი სპორტულ, ან ეკონომიურ სტილში მართოს. ან, ეს ორი თვისება ერთმანეთს შეუხამოს. მანქანას აქვს ასევე ფუნქცია ”ეკო სქორ”, რომელიც მართვის ეკოლოგიურობასა და ეკონომიურობას აფასებს. მაგალითად, მოძრაობის დასრულების შემდეგ, მონიტორზე გამოისახება მონაცემები, თუ გარკვეულ მონაკვეთზე მოძრაობისას, ძრავმა რამდენი საწვავი მოიხმარა და რა რაოდენობით ნახშირორჟანგი გამოყო. შესაბამისად, კომპიუტერი მართვის შეფასებას იძლევა. შეფასება მწვანე ფოთლებით ხდება. რაც მეტია ფოთოლი, მით მაღალია მართვის შეფასება.

სხვათა შორის, ”ჰონდა CR-Z” პირველი ჰიბრიდული ავტომობილია, რომელშიც ძრავთან 6-საფეხურიანი მექანიკური კოლოფია შეწყვილებული. ეს კი მას შემდეგ გადაწყდა, რაც მარჯეტოლოგების მიერ ჩატარებულმა კვლევამ აჩვენა, რომ ასეთი კოლოფით, ავტომობილი ევროპულ ბაზარზე უფრო პოპულარული იქნება. საინტერესოა ისიც, რომ ავტომობილი მეტწილად (92%) განახლებადი მასალებითაა დამზადებული. ესე იგი, ”ჰონდა CR-Z” თითქმის მთლიანად, მეორად გადამუშავებას ექვემდებარება.

იაპონური კომპანია იმედოვნებს, რომ ”ჰონდა CR-Z” ისეთივე პოპულარული გახდება, როგორიც თავის დროზე CR-X იყო. ეს ავტომობილი უკვე იყიდება იაპონიაში, მალე კი მისი შეძენის საშუალება ევროპელებსაც მიეცემათ. მოგვიანებითვე გამოცხადდება მისი ფასი.

შემდეგ ევროპულ ალიანსში ”პეჟო-სიტროენი” შევა

Fiat Chairman Says Next European Car Alliance May Involve PSA

19 აპრილი

ასე ფიქრობს ”ფიატისა” და ”კრაისლერის” მთავარი აღმასრულებელი სერჯო მარკიონე. ”ახლა ალბათ ”PSA პეჟო-სიტროენის” ჯერია. მათ უკვე სცადეს ”მიცუბიში მოტორსთან” ალიანსის შექმნა, მაგრამ არაფერი გამოუვიდათ, თუმცა ამაზე კი ალბათ არ გაჩერდებიან”, - ამბობს მარკიონე.

”PSA პეჟო-სიტროენის” ევროპაში სიდიდით მეორე უდიდესი (ფოლკსვაგენის შემდეგ) ავტომწარმოებელია. მისი და ”მიცუბიში მოტორსის” ხელმძღვანელობა მოლაპარაკებას აწარმოებდა აქციების პაკეტების გაცვლის თაობაზე, თუმცა ეს მოლაპარაკება უშედეგოდ დასრულდა. არადა, ფრანგულ და იაპონურ კომპანიებს არაერთი ერთობლივი პროექტი აქვთ განხორციელებული და რამდენიმეზე ერთობლივად მუშაობენ.

მართალია, მხარეებს შორის შეთანხმება ვერ შედგა, თუმცა მათ მოილაპარაკეს, რომ მომავალში კიდევ უფრო გააღრმავებენ პარტნიორულ ურთიერთობებს. სხვათა შორის, სანამ ”ფიატი” ”კრაისლერის” აქციების 20 პროცენტს გამოისყიდდა, მარკიონე აცხადებდა, რომ ”PSA პეჟო-სიტროენთან” ალიანსის შექმნა ორივე კომპანიისთვის მისწრება იქნებოდა.

მარკიონეს არაერთხელ უთქვამს, რომ თანამედროვე კონკურენციის პირობებში, დამოუკიდებლობას მხოლოდ ის კომპანიები შეინარჩუნებენ, რომელთა წლიური წარმოება 5 მილიონზე ნაკლები არაა. თუ გავითვალისწინებთ, რომ შარშან ”ფიატმა” დაახლოებით 2 მილიონი ავტომობილი გამოუშვა, ”კრაისლერმა” კი 1.3 მილიონი, შეიძლება ვივარაუდოთ, რომ ”ფიატის” შეფს ალიანსში კიდევ ერთი მსხვილი ავტომწარმოებლის დამატება სურს.

შედარებისთვის, ”PSA პეჟო-სიტროენმა” შარშან 3.2 მილიონი ავტომობილის რეალიზება შეძლო. ესე იგი, თუ ”ფიატ-კრაისლერი” და ფრანგული კომპანია გაერთიანდება, მათი ჯამური წლიური გაყიდვები მარკიონესეულ კრიტიკულ ზღვარს გასცდება.

”ფერარი 599 GTO-ს” მთელი ტირაჟი უკვე გაყიდულია

Ferrari's 599 GTO Already Sold Out

19 აპრილი

ინტერნეტში გავრცელდა ინფორმაცია იმის შესახებ, რომ ”ფერარიმ” თავის უახლეს ავტომობილ 599 GTO-ზე შეკვეთების სრული პაკეტი მიიღო. იტალიურმა კომპანიამ თავის ისტორიაში ყველაზე სწრაფი საგზაო ავტომობილის პრეზენტაცია 16 აპრილს, ქალაქ მოდენას საჰერცოგო სასახლე ”პალაცო დუკალეში” ჩატარდა, სადაც ამჟამად სამხედრო აკადემია მდებარეობს. სხვათა შორის, ამავე სასახლეში, სამი წლის წინ, ”მაზერატიმ” თავისი ”კვატროპორტე ავტომატიკის” პრეზენტაცია ჩაატარა.

”ფერარი 599 GTO-ს” პრეზენტაციას კომპანიის უმაღლესი ხელმძღვანელობაც - დირექტორთა საბჭოს თავმჯდომარე ლუკა დი მონტეძემოლო, მთავარი აღმასრულებელი ამადეო ფელისა და ვიცე აღმასრულებელი პიერო ფერარი (ენცო ფერარის შვილი) დაესწრო. ცერემონიაში მონაწილეობა ”ფერარის” ტესტ პილოტებმა და აკადემიის კადეტებმა, ასევე ”ფერარის” 500-მა კლიენტმა მიიღო.

”ფერარი” სულ 599 ცალი ”599 GTO-ს” წარმოებას აპირებს და გავრცელებული ინფორმაციით, ყველა მათგანზე შეკვეთები უკვე მიღებული აქვს. ამ დღეებში, ავტომობილის მსოფლიო პრემიერა პეკინში, საერთაშორისო საავტომობილო გამოფენაზე ჩატარდება და წარმოიდგინეთ ჩინელების გაოცება, როდესაც ისინი დაიგებენ, რომ ამ ავტომობილით მხოლოდ ვიზუალურად ტკბობას შეძლებენ, რადგან მისი ყიდვის საშუალება უკვე აღარ მიეცემათ. რა თქმა უნდა, გამორიცხული არაა, რომ 599 შემკვეთს შორის ჩინელებიც იყვნენ. ცნობისათვის, ”ფერარი 599 GTO-ს” ღირებულება 350 000 ევროა.

”ფერარის” ისტორიაში ყველაზე სწრაფი სერიული ავტომობილი 6.0-ლიტრიანი V12 ძრავითაა აღჭურვილი, რომლის პირვანდელი ვარიანტიც ლეგენდარულ ”ფერარი ენცოზე” გამოიყენებოდა. ეს აგრეგატი 661 ცხენის ძალას ავითარებს, 41-ით მეტს, ვიდრე სტანდარტული 599 GTB. მისი მაქსიმალური მაბრუნი მომენტი კი 619 ნიუტონმეტრს აღწევს. ავტომობილი 1495 კილოგრამს იწონის, რაც 195 კილოგრამით ნაკლებია 599 GTB-ს წონაზე.

ავტომობილი ადგილიდან 100 კმ/სთ სიჩქარის აკრეფას 3.35 წამში ახერხებს, მისი მაქსიმალური სიჩქარე კი 335 კმ/სთ-ს აღწევს.

მეტოქეობა პარტნიორებს შორის

battle brews between new partners Daimler and Renault

19 აპრილი

კარლოს გონი (მარცხნივ) და დიტერ ცეტშე (მარჯვნივ) ალიანსის შექმნის ცერემონიაზე

..............................................................................

”დაიმლერმა” და ”რენო-ნისანმა” ალიანსი ახლახანს ჩამოაყალიბეს, მაგრამ არსებობს მათი საქმიანობის სფეროები, რომლებშიც ისინი კონკურენტებად დარჩებიან. ესაა ელექტრომობილებისთვის საჭირო აკუმულატორების წარმოება.

”დაიმლერის” მთავარი აღმასრულებელი დიტერ ცეტშე ამბობს, რომ მისი კომპანია, ელექტრომობილებისთვის განკუთვნილი აკუმულატორების წარმოების მხრივ, მსოფლიო ლიდერი გახდება. მაგრამ პრობლემა ისაა, რომ იგივე მიზანი ”რენო-ნისანის” შეფ კარლოს გონსაც ამოძრავებს.

კარლოს გონი ”ნისან ლიფის” პრეზენტაციაზე

........................................................

ორივე კომპანია ელექტრომობილების შესაქმნელად ერთობლივად მუშაობას აპირებს, მაგრამ აკუმულატორები ის სფეროა, რომელშიც ისინი მეტოქეობას გააგრძელებენ. და არაა გამორიცხული, რომ საბოლოო ჯამში, ამ მეტოქეობამ ალიანსის მომავალზეც (რა თქმა უნდა, უარყოფითად) იმოქმედოს.

ერთი კვირის წინ, როდესაც ალიანსის შექმნის თაობაზე, ოფიციალურ საბუთებს ხელი მოაწერეს, ცეტშემ და გონმა ცარიელი დატოვეს ის გრაფები, სადაც აკუმულატორების წარმოების თანამშრომლობაზე იყო ლაპარაკი. ამავე ხელშეკრულების ძალით, ისინი ერთობლივად შემუშავებულ მოდელებზე თავ-თავის აკუმულატორებს გამოიყენებენ. მაგალითად, მომავალ ”სმარტს” და ”ტვინგოს” ისინი ერთიანი ძალისხმევით შექმნიან. მაგრამ თუ ”სმარტი” ”დაიმლერის” აკუმულატორებს მიიღებს, ტვინგოს ”რენოს” წარმოების აკუმულატორები ექნება.

”ადრეც და ახლაც, ”დაიმლერი” იყო და არის იმ ტიპის კომპანია, რომელიც განსაკუთრებული გულმოდგინებით უფრთხილდება საკუთარ ინოვაციურ ტექნოლოგიებს და მათ არავის უნაწილებს. რამდენადაც ”დაიმლერის” აკუმულატორები მახასიათებლებით შეიძლება საუკეთესო იყოს, იმდენად ”რენოს” აკუმულატორებს ფასის მხრივ ექნება უპირატესობა და შესაძლოა, უფრო კონკურენტუნარიანი იყოს”, - ამბობს საავტომობილო ბაზრის კვლევების გაერთიანება ”ფროსტ ენდ სალივანის” დირექტორი ანილ ვალსანი.

”დაიმლერი” მსოფლიოში ლუქსის კლასის ავტომობილების მეორე უდიდესი მწარმოებელია. ”რენო” კი მეორე უდიდესი ფრანგული კომპანიაა. ორივე კომპანიაში მიაჩნიათ, რომ ელექტრომობილების წარმოების სფეროში ყველაზე მნიშვნელოვანი, ენერგიის შენახვის ტექნოლოგიებია. უფრო მეტიც, გერმანული კომპანიის განვითარების განყოფილების შეფი თომას ვებერი ამბობს, რომ თუ თანამედროვე ავტომობილების გულად ძრავია მიჩნეული, ელექტრომობილებში ამ ”პოზიციას” აკუმულატორებს მიანიჭებენ.

”რენოსა” და ”ნისანის” გარდა, ”დაიმლერი” ელექტრომობილების შემუშავების სფეროში, ასევე ჩინურ BYD-თან ითანამშრომლებს, რომელიც ლითიუმ-იონური აკუმულატორების (რომლებიც კომპიუტერებსა და ტელეფონებში გამოიყენება) წარმოების მხრივ, მსოფლიოს ერთ-ერთი ლიდერია. ჩინურ კომპანიასთან კოოპერაციით შექმნილი ელექტრომობილი პირველ რიგში, ჩინური ბაზრისთვის იქნება განკუთვნილი.

”ჩვენი მიზანი არის და იქნება ის, რომ ელექტრომობილების წარმოების სფეროში მსოფლიო პიონერი გახდეს. მალე ელექტრომობილების წარმოება მასობრივ ხასიათს მიიღებს და ჩვენ ამ სფეროშიც, კონკურენტუნარიანები ვიქნებით”, - ამბობს ცეტშე.

პარალელურად, ნულოვანი გამონაბოლქვის მქონე ავტომობილების წარმოების სფეროში, ლიდერობას ”რენოსა” და ”ნისანს” მათი მთავარი აღმასრულებელი კარლოს გონი უწინასწარმეტყველებს. ამ მხრივ, ეს ორი კომპანია პირველ დიდ ნაბიჯს ამ წლის მიწურულს გადადგამს, როდესაც ევროპულ ბაზარზე ელექტრომობილი ”ნისან ლიფი” გამოჩნდება. მალე კი მას ”რენოს” ოთხი ელექტრომობილი მოჰყვება, რომელთა წინასერიული პროტოტიპების ხილვაც, ფრანკფურტის შარშანდელ საავტომობილო შოუზე იყო შესაძლებელი.

ინდოეთში ელექტრონული ”შევროლე სპარკი” გაიყიდება

Electric Indian Spark on Track

18 აპრილი

”ჯენერალ მოტორსმა” და ინდურმა კომპანია ”რევა ელექტრიკ კომპანიმ” ერთობლივად შეიმუშავეს ”შევროლე სპარკის” ელექტრონული ვარიანტი, რომლის დებიუტიც ამ წლის მიწურულსაა მოსალოდნელი.

ინტერნეტ გვერდი ”ჯასტ-აუტო” გვატყობინებს, რომ ელექტრონული მოდელი, რომლის სახელიც ”e-სპარკია”, ბაზარზე მომავალი წლის დასაწყისში უნდა გამოჩნდეს. ”რევას” აღმასრულებლის მოვალეობის შემსრულებელი ჩეტან მაინი ამბობს, რომ ელექტრონული ”სპარკის” წარმოების წლიური მოცულობა 5 000 ცალი იქნება.

”ჩვენი პროექტი გრაფიკის შესაბამისად ვითარდება და იმედი გვაქვს, რომ ელექტრონული ”სპარკის” პირველი პილოტური ვერსიები მზად ამ წლის მიწურულს გვექნება. ინდოეთის ბაზარზე კი მის გაყიდვებს ალბათ მომავალი წლის დასაწყისში შევუდგებით”, - ამბობს მაინი.

”e-სპარკის” ბაზისად გამოყენებულია ”შევროპე სპარკის” პლატფორმა, რომელსაც მბიძგველ ძალას, შიდაწვის ძრავის ნაცვლად, ელექტროძრავი ანიჭებს. ავტომობილი ოთხკარიანია და მას ოთხი ადამიანის გადაყვანა შეუძლია.

მართალია, ამ ეტაპზე ავტომობილის დაწვრილებითი ტექნიკური მახასიათებლები არ ქვეყნდება, მაგრამ მაინი ამბობს, რომ სვლის სიშორის გასაზრდელად, ”e-სპარკში” ელექტროენერგიის გამოსამუშავებლად, შიდაწვის ძრავიც გამოიყენება. კერძოდ, ელექტრომოტორის გარდა, ავტომობილი ასევე აღჭურვილია 0.995-ლიტრიანი შიდაწვის ძრავით, რომელთანაც გენერატორია დაკავშირებული.

ავტომობილი უსაფრთხოების თანამედროვე სისტემებით აღჭურვილი არაა, თუმცა ის მაინც 15 000 დოლარი ეღირება. ეს იქნება ინდურ ბაზარზე პირველი ელექტრომობილი. მოგვიანებით, ორი ელექტრომობილის წარმოებას ”რევა” დამოუკიდებლადაც დაიწყებს.

”რენომ” ელექტრომობილები კონვეიერისთვის მოამზადა

Renault Fluence Z.E. and Kangoo Van Z.E.

17 აპრილი

”რენომ” პრაქტიკულად დაასრულა სერიული წარმოებისთვის ორი ელექტრომობილის - ”ფლუენს Z.E.-ს” და ”კანგუ ვა Z.E.-ს” მომზადება. ამ ორი ავტომობილის სახელწოდებაში აღნიშვნა Z.E. ნულოვან გამონაბოლქვს აღნიშნავს, რაც ელექტრომობილებისთვისაა დამახასიათებელი.

სედანი ”ფლუენს Z.E.” ევროპული კლასიფიკაციით С კლასში ერთ-ერთი პირველი ავტომობილია, რომელსაც ელექტროძრავი ამუშავებს. მისი მთავარი აგრეგატის სიმძლავრე 94 ცხენის ძალა, მაქსიმალური მაბრუნი მომენტი კი 226 ნიუტონმეტრია. ძრავს ენერგიით ლითიუმ-იონური აკუმულატორების ბლოკი ამარაგებს, რომელიც თავის მხრივ, შევსებას ჩვეულებრივი საყოფაცხოვრებო ქსელიდან ღებულობს.

აკუმულატორები სრულად 6-7 საათში იმუხტება, მათი მეშვეობით კი ავტომობილის სვლის სიშორე 160 კილომეტრს აღწევს. ამასთან, ფრანგული კომპანია მალე მას სწრაფი დამუხტვის სისტემითაც აღჭურვავს, რომლის მეშვეობიტაც, ენერგიის სრულად შევსება ნახევარ საათში მოესწრება.

”ფლუენს Z.E.-ს” ფრანგული კომპანიის თურქული, ქალაქ ბურსას ქარხანა გამოუშვებს.

რაც შეეხება ”კანგუ ვა Z.E.-ს”, ის აღჭურვილია 59-ცხენისძალიანი ელექტროძრავით, რომლის მომენტიც 226 ნიუტონმეტრს აღწევს. სვლის სიშორე ამ შემთხვევაშიც 160 კილომეტრია.

სხვათა შორის, ორივე ელექტრომობილის შეკვეთა ევროპაში უკვე შესაძლებელია. შეკვეთების შესრულებას კი ”რენო” მერმისიდან შეუდგება.

ახალი ”ბრილიანს BS2-ის” დებიუტი პეკინში შედგება

Brilliance BS2

17 აპრილი

პეკინის საერთაშორისო მოტორ შოუსთვის, ჩინურმა საავტომობილო კომპანია ”ბრილიანსმა” თავისი კომპაქტურ ჰეჩბეკ BS2-ის ახალი ვერსია მოამზადა. ადგილობრივი და უცხოელი სპეციალისტები თვლიან, რომ პეკინში წარმოდგენილ შესაბამისი სეგმენტის ავტომობილებს შორის, ეს ერთ-ერთი ყველაზე საინტერესო ექსპონატი იქნება.

ახალი ”ბრილიანს BS2” თანამედროვე, მიმზიდველი დიზაინით და ფასთან მიმართებაში, აღჭურვის საკმაოდ კარგი დონით გამოირჩევა. განახლებულ ავტომობილს შეცვლილი ფორმის წინა და უკანა ბამპერები აქვს. მისი რადიატორი კი მოქრომილი დეკორითაა შემკული.

ახალი ჰეჩბეკის სალონი ხარისხიანი მასალითაა გაწყობილი და უფრო კომფორტულიცაა, ვიდრე მისი წინამორბედი. ავტომობილისთვის ძველი მოტორებია გათვალისწინებული, რომელთა მუშა მოცულობა 1.3, 1.5 და 1.8 ლიტრია.

”ოპელ მერივა” ჯანმრთელობისთვის სასარგებლოაო

Opel Meriva

17 აპრილი

ხერხემლის ჯანმრთელობის საკითხზე სპეციალიზებულ ექიმ თერაპევტთა ასოციაციამ, ”ოპელის” ახალი ”მერივა” ჯანმრთელობისთვის სასარგებლოდ მიიჩნია და მისთვის შესაბამისი სერტიფიკატი გასცა. ახალი ”მერივას” ერგონომიკის გასაუმჯობესებლად, გერმანული კომპანიის ინჟინრებმა მძღოლის და მგზავრების სავარძლები, ზურგის საყრდენი სპეციალური საშუალებებით აღჭურვეს.

ახალი ავტომობილის სავარძლებს გააჩნია სამი სისტემა, რომლებმაც მძღოლის და მგზავრების ზურგისთვის მოხერხებული გარემო უნდა უზრუნველყოს. ერთია სისტემა ”ფლექსსპეისი”, რომელიც უკანა სავარძლებისთვისაა, მეორე სისტემაა ”ფლქსდორზ”, რომელიც წინა და უკანა კარებებს ერთმანეთის საპირისპიროდ ხსნის და ამით, მანქანაში ჩაჯდომასა და იქიდან გადმოსვლას მოსახერხებელს ხდის. მესამე სისტემას კი სპორტული ყაიდის სავარძლების ერგონომიკა წარმოადგენს.

ოპციის სახით, მყიდველს შეუძლია სისტემა ”ფლექსფიქსის” შეძენა, რომელიც ველოსიპედისთვის განკუთვნილ სპეციალურ საბარგულს წარმოადგენს. ამ სისტემის ერგონომიულობა იმაში მდგომარეობს, რომ აღარ იქნება საჭირო ველოსიპედის სახურავის საბარგულზე დამაგრება, რის დროსაც, მანქანის პატრონს შეიძლება ზურგის კუნთი დაეჭიმოს.

”ოპელი” აცხადებს, რომ ის სულ მეორე ავტომწარმოებელია, რომელმაც ზემოთ დასახელებული ასოციაციის სერტიფიკატი მიიღო. პირველი იყო პრემიუმ სეგმენტის გერმანული კომპანია, რომლის დასახელებისგანაც რუსელსჰაიმელები თავს იკავებენ.

”მინოტაურო” - პირველი ელექტრული ”ლამბორგინი”

Minotauro, the First Electric Lambo

17 აპრილი

პრინციპში, ეს ჯერ მხოლოდ სტუდენტური პროექტია, რომელიც მილანის დიზაინის პოლიტექნიკური სკოლის სტუდენტმა ანდრეი ავარვარიიმ, ”ლამბორგინის” მთავარი იჟინრის, ფილიპო პერინის მეთვალყურეობით შექმნა. მაგრამ რა გარანტიაა იმისა, რომ იტალიური კომპანია მალე მსგავს ელექტრომობილს თავის მყიდველს არ შესთავაზებს? თანამედროვე ავტოინდუსტრიაში ხომ ყველაფერი ძალიან მოულოდნელად და სწრაფად ხდება...

პროექტის მიხედვით, ”მინოტაურო” (მინოტავრი) არის ელექტრომობილი, რომელიც მამოძრავებელ ძალას ოთხი ასინქრონული ელექტროძრავისგან ღებულობს. იმ ძრავების სიმძლავრე, რომლებიც წინა ბორბლებს ინდივიდუალურად ემსახურებიან, 75 ცხენის ძალაა, უკანებისა კი - 175 ცხენის ძალა. ოთხივეს ჯამური სიმძლავრე 500 ცხენის ძალა გამოდის.

გარდა ამისა, ავტომობილი ასევე აღიჭურვება ენერგიის რეკუპერაციის სისტემით (კერს-ი) და ლითიუმის ბრტყელი აკუმულატორების ბლოკით, რომლის გასაგრილებლადაც, იმ ადგილას, სადაც ჩვეულებრივ ავტომობილებში კაპოტია ხოლმე, ავტომობილს ჰაერის სამკუთხა ამღებები აქვს განლაგებული.

რამდენადაც შიდაწვის V12 ძრავის ადგილი გამოთავისუფლდა, პროექტის ავტორმა ჩათვალა, რომ უმჯობესი იქნებოდა, თუ ამ სივრცეს სალონში მესამე სავარძლისთვის გამოიყენებდა. ამ ადგილზე მოთავსება პირველი მგზავრის მხრიდან შეიძლება. ჰო, ამის ართქმა დანაშაული იქნებოდა - ”მინოტაუროს” იტალიური ფირმის სტილის კარი აქვს, რომელსაც საყრდენი წინ აქვს და რომელიც ქვევიდან ზევით იხსნება. ერთი შეხედვით, ავტომობილი კომპაქტურის შეხედულებას ტოვებს, მაგრამ რეალურად, ის საკმაოდ დიდია. მისი სიგრძე 4604 მილიმეტრია. ანუ, ”მურსიელაგოზე” 6 მილიმეტრით მოკლე.

სანამ პროექტს დაიწყებდა, სტუდენტმა ”ლამბორგინისგან” სამი დავალება მიიღო, რომლებმაც არამხოლოდ ავტომობილის გარეგნობა, არამედ მისი ტექნიკური მხარე და პრაქტიკულობაც განაპირობეს. ესთეტიკური მხარე გულისხმობდა იმას, რომ დიზაინერს ”ლამბოს” თანამედროვე სტილისთვის მომრგვალებული ფორმები უნდა მიესადაგებინა. ტექნიკური დავალება ელექტრომობილის შექმნას ითვალისწინებდა. პრაქტიკულობა კი იმას გულისხმობს, რომ ასეთი ავტომობილის 2020 წელს გამოშვება უნდა იყოს შესაძლებელი.

თავად ავარვარიი კი იმედოვნებს, რომ ეს ავტომობილი ”პლეი სტეიშნის” შემდეგი თაობის თამაშში მოხვდება, რომელიც მოთამაშეს, ჯოისტიკის დახმარებით, რეალურ ტრასაზე რბოლის საშუალებას მისცემს...

”აუდი S8” ”ლამბორგინის” ძრავით

Audi S8

15 აპრილი

”აუდი” წარმოებისთვის თავისი ფლაგმანის, სედან A8-ს” სპორტულ ვერსია S8-ის მოდერნიზებულ ვერსიას ამზადებს, რომელიც ბაზარზე მერმისს გამოჩნდება. ინტერნეტით გავრცელებული ინფორმაცია გვამცნობს, რომ განახლებული სედანი გარეგნულად თითქმის არ შეიცვლება.

სამაგიეროდ, მისი ძრავების გამას ახალი, ყველაზე მძლავრი აგრეგატი დაემატება. ესაა ორი ტურბოკომპრესორით სღჭურვილი 5.2-ლიტრიანი V10, რომელიც ”ლამბორგინი გალიარდოზე” გამოიყენება (ორივე კომპანია ფოლკსვაგენის ჯგუფში შედის). მოდერნიზაციის შემდეგ, ამ ძრავის სიმძლავრე 600 ცხენის ძალას, მაბრუნი მომენტი კი 745 ნიუტონმეტრს მიაღწევს.

ახალი S8-ს პრემიერა ან პარიზის ავტო შოუზე ჩატარდება, ან დეტროიტისაზე, რომელიც მერმისს გაიმართება. ავტომობილის გაყიდვები კი 2011 წლის ზაფხულში დაიწყება.

”მაკლარენის” შეფი ”ბუგატი ვეირონს” ”საზიზღარ ღორს” უწოდებს

McLaren Boss Describes the Bugatti Veyron as "Pig Ugly"

15 აპრილი

”მაკლარენ ავტომოტივის” მთავარმა აღმასრულებელმა რონ დენისმა, ჟურნალ ”არაბიან ბიზნესთან” საუბრისას, ”ბუგატი ვეირონი” საკმაოდ უხამსად მოიხსენიალეგენდარულ სუპერ ავტომობილ F1-ის მწარმოებელი კომპანიის და ფორმულა 1-ის გუნდის პატრონმა მსოფლიოს უძვირესი სერიული ავტომობილი ყველასათვის მოულოდნელი სიტყვებით დაახასიათა.

”შემიძლია ვთქვა, რომ ”ბუგატი ვეირონი” ნაგავია. დარწმუნებული ვარ, რომ ნებისმიერ ქალში შეიძლება მშვენიერების დანახვა, მაგრამ ”ბუგატი ვეირონს” როცა ვუცქერ, თავში მხოლოდ ერთი აზრი მომდის - ეს საზიზღარი ღორია. ”ვეირონი” ჩემთვის არაფერს წარმოადგენს. უკვე რამდენიმე წელია, ამ მანქანას ვხედავ და მისი ერთი ნაწილიც კი ვერ ვნახე ისეთი, რაც მომეწონება”, - ამბობს დენისი.

თუ გავითვალისწინებთ იმ ფაქტს, რომ ”მაკლარენ ავტომოტივი” მალე დაიწყებს თავის სუპერ ავტომობილ MP4-12C-ის წარმოებას, რომელიც მართალია, ”ვეირონის” კლასის არაა, მაგრამ მაინც მის კონკურენტად მოიაზრება, შეიძლება დენისის ეს სიტყვები მეტოქის მისამართით ნასროლ ქვად ჩავთვალოთ. მაგრამ ასეთი განმარტება მაინც გასაოცარია.

დენისი კი ამას არ სჯერდება და ამბობს, რომ ”ვეირონის” დინამიკური მონაცემები არც ისეთი შთამბეჭდავია, როგორც საყოველთაოდაა მიჩნეული. თავისი შეხედულების გასამყარებლად, დენისს მაგალითად მოჰყავს სატელევიზიო გადაცემა ”ტოპ გიარის” მე-13 სეზონის მეორე ეპიზოდი, რომლის დროსაც, აბუ დაბიში ერთმანეთს ორი სუპერ ავტომობილი - ”ბუგატი ვეირონი” და ”მაკლარენ F1” შეაჯიბრეს.

”აბუ დაბიში ჩვენ ”ვეირონი” არაერთხელ დავამარცხეთ. როგორც ჩანს, გადამღები ჯგუფი ვარაუდობდა, რომ პირიქით იქნებოდა და ისინი გაწბილებულები დარჩნენ. დაახლოებით ათი ცდა დაგვჭირდა იმისათვის, რომ ”ვეირონს” კარგი სტარტი გამოსვლოდა და დაგვწეოდა. მანამდე კი, სტარტის ნიშანზე, მისი საბურავები ადგილზე სრიალებდნენ, როცა ჩვენი მანქანა წინ მიქროდა”, - ყვება დენისი.

”მაკლარენი” MP4-12C-ის წარმოებას მერმისს, წლის დასაწყისში დაიწყებს. დენისი თვლის, რომ ეს ავტომობილი მის კონკურენტებზე მსუბუქი, მძლავრი და კოხტაა და ამიტომ, თავის კლასში საუკეთესოა.

”ჯილიმ” თავისი ლიმუზინი გადააკეთა

Geely GE

15 აპრილი

პეკინის ავტო გამოფენაზე, უდიდესი ჩინური კერძო საავტომობილო კომპანია ”ჯილი”, რომელმაც ახლახანს შვედური ”ვოლვო” შეიძინა, თავისი პრემიუმ კლასის სედანის, GE-ს სახეშეცვლილ ვერსიას წარადგენს.

ცნობისათვის, ”ჯილიმ” ამ ავტომობილის პრემიერა შარშან, შანჰაის საერთაშორისო ავტო გამოფენაზე ჩაატარა. ავტომობილი ძლიერ ჰგავდა ”როლს როისის” სუპერ სედან ”ფანტომს”, რის გამოც, ინგლისურმა კომპანიამ ”ჯილი” პლაგიატში დაადანაშაულა და მას სასამართლოში ჩივილით დაემუქრა.

იმისათვის, რომ პრობლემები თავიდან აეცილებინა, ”ჯილიმ” გადაწყვიტა, რომ თავისი ლიმუზინისთვის გარეგნობა შეეცვალა. შედეგი ისეთია, როგორიც ”როლს როისს” აბსოლუტურად დააკმაყოფილებს - ახალი GE მომრგვალებული ფორმებით გამოირჩევა და ”ფანტომს” აღარაფრით მოგვაგონებს.

ამ ავტომობილის შესახებ დაწვრილებით ინფორმაციას ”ჯილი” პეკინური გამოფენისთვის ინახავს.

პეკინში JAC-ი ”ტოიოტა iQ-ს” კონკურენტს წარადგენს

JAC Vision IV Concept

15 აპრილი

პეკინის საერთაშორისო საავტომობილო გამოფენაზე, ჩინური საავტომობილო კომპანია ”ძიანჰუაი ავტომობილი” (JAC) კონცეპტუალურ მინი ჰეჩბეკ ”ვიჟნ IV კონცეპტს” წარადგენს. ეს არის ახალი მინი ავტომობილის პროტოტიპი, რომელსაც გამონაბოლქვში CO2-ის მცირე შემცველობა აქვს.

ავტომობილი, რომლის დიზაინიც JAC-ის იტალიელმა დიზაინერებმა დაამუშავეს, გაბარიტებით ახლოსაა ”ტოიოტას” ცნობილ ჯუჯა iQ-სთან, რომლის ბაზაზეც ავტომობილის გამოშვებას მალე ”ასტონ მარტინიც” კი დაიწყებს.

ავტომობილი ელექტროძრავისა და მცირელიტრაჟიანი შიდაწვის ძრავის ჰიბრიდული სისტემითაა აღჭურვილი, რაც ნაკლებ საწვავსაც მოიხმარს და გარემოსაც ნაკლებად დააბინძურებს. ჯერჯერობით, ამ ავტომობილის შესახებ, რაიმე ტექნიკური მახასიათებლები არ ქვეყნდება.