1 629 კილომეტრი ერთი სავსე ავზით

BMW 320d EfficientDynamics Completes 1,013 Mile-Long Journey

21 ივნისი

ავტომობილებზე მწერალმა ბრიტანელმა ჟურნალისტმა ტომ ფორდმა, როგორც თვითონ ამბობს, რეკორდული ვოიაჟით გამოიჩინა თავი - ბრიტანეთიდან მიუნხენში და შემდეგ უკანა გზაზე, თითქმის ბრიტანეთამდე, ”ბეემვე 320d ეფიციენტდაინემიქსით” ისე იმგზავრა, რომ ავტომობილის ერთი სავსე ავზი იმყოფინა.

თავისი დიზელისძრავიანი ”ბეემვეს” ავზი ფორდმა ლა მანშის გვირაბში შესვლის წინ აავსო, მიუნხენამდე იმგზავრა, შემდეგ კი უკან გამობრუნდა და საწვავი ლილში (საფრანგეთი) შეივსო. ავზის გავსებიდან ლილამდე, მან სულ 1 629 კილომეტრის გავლა მოახერხა.

ამ ვოიაჟის დროს, ფორდი არც კონდიციონერს იყენებდა და არც რადიოს, რათა საწვავი დაეზოგა. თუმცა, თავადვე აღნიშნა, რომ არ იყენებდა მართვის ისეთ ტექნიკას, რომელიც საწვავს დააზოგინებდა. ჟურნალისტი ყვება, რომ მიუნხენისკენ გზაზე, იყო მომენტები, როცა მონიტორი 100 კილომეტრზე მხოლოდ 3.7 ლიტრის ხარჯს უჩვენებდა. მთელი მოგზაურობის განმავლობაში კი, ყველაზე მეტი ხარჯი 100 კილომეტრზე 4.4 ლიტრი ჰქონდა. საბოლოო ჯამში, საბორტო კომპიუტერმა დააფიქსირა, რომ მოგზაურობის საშუალო სიჩქარე 95.4 კმ/სთ იყო, საწვავის საშუალო ხარჯი კი - 4.1 ლიტრი 100 კილომეტრზე.

”ვერ ვიტყვი, რომ ამ მანქანისგან განსაკუთრებულ ეკონომიურობას ველოდი. მაგრამ აღმოჩნდა, რომ მართალი არ ვიყავი. რა თქმა უნდა, ვცდილობდი, რომ საწვავი დამეზოგა, თუმცა ავტობანებზე მოძრაობისას, სიჩქარე აშკარად არ შეეფერებოდა ეკონომიურ მართვას. ჩემი შედეგის მიხედვით თუ ვიმსჯელებთ, საშუალო ბრიტანელ მძღოლს წელიწადის განმავლობაში, მანქანის ავზის მხოლოდ 12-ჯერ გავსებაც ეყოფა. და თუ საწვავის დაზოგვით თავს არ შეიწუხებთ, დარწმუნებული ვარ, ეს მანქანა ერთი ავსებული ავზით, 1300 კილომეტრს მაინც გაგატარებთ. შემიძლია ვთქვა, ”ბეემვე ეფიციენტდაინემიქსი” მართლა ძალიან ეკონომიური მანქანაა”, - განაცხადა ფორდმა.

ცნობისათვის, სედანი ”ბეემვე 320d ეფიციენტდაინემიქსი” აღჭურვილია 2.0-ლიტრიანი, ოთხცილინდრიანი ტურბოდიზელის ძრავით, რომელიც მაქსიმალურ სიმძლავრეს (163 ცხენის ძალას) 3 500-4 200 ბრ/წთ შუალედში გამოიმუშავებს, მაქსიმალურ მაბრუნ მომენტს (360 ნიუტონმეტრს) კი - 1 750-3 000 ბრ/წთ შუალედში.

ამ ძრავის მეშვეობით, ავტომობილი 100 კმ/სთ სიჩქარეს 8.2 წამში ავითარებს, მისი მაქსიმალური სიჩქარე კი 220 კმ/სთ-ია. სედანს 100 კილომეტრის გასავლელად 4.1 ლიტრი საწვავი ჰყოფნის, ყოველი კილომეტრის გავლისას კი ატმოსფეროში მხოლოდ 109 გრამ CO2-ს გამოჰყოფს.

ამ შესანიშნავი მახასიათებლების მიღწევაში, გერმანულ ავტომობილს საწვავის ხარჯის შესამცირებელი ისეთი ტექნოლოგიები ეხმარება, როგორებიცაა სტარტ-სტოპი, მუხრუჭების ენერგიის რეგენერაცია, საჭის ელექტროგამაძლიერებელი, გადაცემათა კოლოფში, ჩვეულებრივზე მეტად დაშორებული საფეხურები, დადაბლებული საკიდარი და ალუმინისგან დამზადებული აეროდინამიკური ბორბლები, რომლებიც ”მიშლენის” წარმოების, ენერგიის დამზოგავი საბურავებითაა აღჭურვილი.

”ფოლკსვაგენი” ”ლუპოს” წარმოებისთვის ემზადება

Volkswagen Lupo Previewed

20 ივნისი

”ფოლკსვაგენმა” ინტერნეტით სუბკომპაქტურ ჰეჩბეკ ”ლუპოს” ფოტოები და ტექნიკური მონაცემები გაავრცელა. ეს ავტომობილი, რომელიც კონცეპტუალურ მოდელ VW Up!-ის სახელით, ვოლფსბურგელებმა პირველად სამი წლის წინ გვაჩვენეს, ბაზარზე მერმისს გამოჩნდება და მისი საბაზო ვერსიის ფასი 8 500 ევროს ფარგლებში მოექცევა.

რა თქმა უნდა, პირველ რიგში, ”ლუპო” მცირე გაბარიტებით გამოირჩევა. მისი ორკარიანი ვერსიის სიგრძე სულ რაღაც 3.45 მეტრია. ასეთი პატარა ავტომობილების წარმოება ”ფოლკსვაგენის” სტრატეგიულ მიზანს წარმოადგენს. ჯერ ერთი, ”ლუპო” ძალიან ეკონომიური იქნება და გერმანული გიგანტის ავტომობილების საწვავის ხარჯის საშუალო მაჩვენებელსაც დაბლა დასწევს, რასაც გამონაბოლქვზე ახალი მკაცრი სტანდარტების შემოღების შემდეგ, დიდი მნიშვნელობა მიენიჭება. მეორეც, ასეთი პატარა ავტომობილების საბაზრო სეგმენტი მთელს მსოფლიოში სულ უფრო იზრდება. და მესამეც, ახალი ”ლუპოს” ბაზაზე, ვოლფსბურგელები ახალი ოჯახის შექმნას გეგმავენ, რის ხარჯზეც, მათი გაყიდვები მნიშვნელოვნად უნდა გაიზარდოს.

”ლუპო” პატარა ავტომობილი კია, მაგრამ მისთვის ”ფოლკსვაგენმა” რამდენიმე ძრავი მოამზადა. მათგან ყველაზე პატარაა 3-ცილინდრიანი აგრეგატი, რომლის მუშა მოცულობა 1.0 ლიტრია, სიმძლავრე კი - 60 ცხენის ძალა. მეორე ძრავიც 1.0-ლიტრიანია, თუმცა მას 4 ცილინდრი აქვს და 85 ცხენის ძალას იძლევა. მესამე ძრავი კი დიზელისა იქნება. ესაა 1.2-ლიტრიანი TDI, რომლის მაქსიმალური სიძლავრეც 75 ცხენის ძალას აღწევს.

ორკარიანის გარდა, ვოლფსბურგელები ოტხკარიანი ”ლუპოს” წარმოებასაც აპირებენ, რომელიც ოდნავ გრძელი იქნება. გერმანული კომპანია იმედოვნებს, რომ წლიურად დაახლოებით 600 000 ცალი ”ლუპოს” გაყიდვას შეძლებს.

გარდა ამისა, ”ფოლკსვაგენი” ამავე ავტომობილის ბაზაზე, ელექტრომობილის წარმოებასაც გეგმავს. სავარაუდოდ, ის ბაზარზე 2013 წელს გამოჩნდბა. ამ ელექტრომობილის კონცეპტუალური ვერსიის ხილვა შარშან, ფრანკფურტის საავტომობილო გამოფენაზე იყო შესაძლებელი. თუმცა, ვოილფსბურგში მიაჩნიათ, რომ ელექტრომობილი ”ლუპო”, თავისი მაღალი ღირებულების გამო, მაინც მხოლოდ სანიშო ავტომობილი იქნება და მისი მეშვეობით, გაყიდვების საერთო მოცულობის მნიშვნელოვანი ზრდა მოსალოდნელი არაა.

”დაიმლერი” და ჩინური BYD ელექტრომობილებზე ითანამშრომლებენ

Daimler CEO says EV JV with BYD will be key in China

20 ივნისი

”დაიმლერის” მთავარი აღმასრულებელი დიტერ ცეტშე და BYD-ის შეფი ვან ჩუანფუ პარტნიორული ხელშეკრულების გაფორმებისას

..........................................

მსოფლიოში პრემიუმ კლასის ავტომობილების მეორე უდიდესმა მწარმოებელმა, გერმანულმა ”დაიმლერმა” და ჩინურმა BYD-მა (ბილდ იორ დრიმს - შექმენი შენი ოცნება), რომელსაც ისეთი ძლიერი ფინანსური მხარდამჭერი ჰყავს, როგორიც ამერიკელი მილიარდერი უორენ ბაფეტია, მაისის ბოლოს ჩამოაყალიბეს ერთობლივი საწარმო, რომლის მიზანიც, ჩინური ბაზრისთვის ელექტრომობილების ერთობლივად წარმოებაა.

ერთობლივ საწარმოში მხარეებს 50-50 პროცენტი ეკუთვნით. ამასთან, მისთვის ჩინური კომპანია 600 მილიონი იუანის ($88 მილიონი) ინვესტიციას გაიღებს, დაიმლერი კი ტექნოლოგიურ მხარდაჭერას კისრულობს. აღსანიშნავია, რომ ამ გარიგებით, გერმანული კომპანია თავისი გერმანელი მეტოქის, ”ბეემვესთვის” კონკურენციის გაწევას ცდილობს.

BYD E6

..........................................

ბავარიელებმა უფრო ადრე, ჩინურ ჰოლდინგ ”ბრილიანს ჩაინა აუტომოტივთან” ერთად, ჩამოაყალიბეს ერთობლივი საწარმო, რომლის მიზანსაც ასევე ელექტრომობილების წარმოება წარმოადგენს. ამ ერთობლივი საწარმოს მთავარი მიზანიც ჩინური ბაზრის ელექტრომობილების მომარაგებაა. თუმცა, ის ასევე საქალაქო ელექტრომობილის სხვა ბაზრებისთვის წარმოებასაც ითვალისწინებს.

ამ პარტნიორულ ურთიერთობებს მით უფრო დიდი მნიშვნელობა ენიჭება მას შემდეგ, რაც ჩინეთის მთავრობამ ქვეყნის ხუთ ქალაქში დაიწყო პილოტური პროგრამა, რომლის მიზანსაც ჰიბრიდული და ელექტრული ავტომობილების პროპაგანდა-პოპულარიზაცია და რაც მთავარია, მათი გაყიდვების სოლიდური შეღავათებით წახალისება წარმოადგენს. მოსალოდნელია, რომ ცისქვეშეთის ქვეყნის გზებზე, მალე მსოფლიოში გაყიდული ელექტრომობილების მეოთხედი ივლის.

”ჩინეთი ყველანაირად ცდილობს, რომ ჰიბრიდული და ელექტრული ავტომობილების წარმოებაში მსოფლიო ლიდერი გახდეს. ასეთი სურვილი სხვა ქვეყნებსაც ექნებოდათ, მაგრამ მათი ბაზრები გაყიდვების მოცულობების მხრივ, ჩინეთს მცირე კონკურენციასაც ვერ გაუწევენ”, - ამბობს J.D. პაუერის ბანგკოკური განყოფილების ანალიტიკოსი ბენ აშერი.

BYD-მა, რომელიც ნაწილობრივ ბაფეტის საინვესტიციო კომპანია ”ბერკშირ ჰეტუეის” კუთვნილებაა, ბენზინ-ელექტრული პლაგ-ინ ჰიბრიდების წარმოება მსოფლიოში პირველმა, ორი წლის წინ დაიწყო. სხვათა შორის, BYD-მა შარშან გერმანულ ”ფოლკსვაგენთან” გააფორმა ხელშეკრულება, რომლის მიხედვითაც, ორ კომპანიას ჰიბრიდული და ელექტრული მოდელების წარმოების საქმეში, პარტნიორობის ვარიანტები უნდა შეესწავლა.

მალე BYD-ი ელექტრომობილ E6-ის მასობრივ წარმოებას დაიწყებს. მას კი პირველ რიგში, ჩინეთის და შემდეგ ამერიკის ბაზარზე გაიტანს. ეს წელს მოხდება, მერმისს კი კომპანია ამავე ავტომობილს ევროპელ მყიდველსაც შესთავაზებს. ქალაქ შენჯენში, სადაც BYD-ის მთავარი ოფისია ბაზირებული, მალე ტაქსის რანგში მუშაობას ცალი ელექტრომობილი E6 დაიწყებს. სხვათა შორის, 40 ცალ E6-ს შენჯენის ტაქსომოტორის ოპერატორი უკვე იყენებს. ოღონდ, ეს ავტომობილები ჩინურმა კომპანიამ სპეციალურად, სარეკლამო მიზნებისთვის, სერიული წარმოების დაწყებამდე დაამზადა.

BYD-თან პარტნიორობა ”დაიმლერს” თავისი ჯუჯას - ”სმარტის” ელექტრული ვერსიის მასობრივი წარმოების დასაწყებად სჭირდება. გერმანულმა კომპანიამ 1000 ცალი ელექტრული ”სმარტის” აწყობა უკვე დაიწყო და მათ ოკეანის გაღმა, ამერიკის ბაზრისთვის გაუშვებს. სხვათა შორის, ამ ”სმარტებისთვის” აკუმულატორებს ამერიკული კომპანია ”ტესლა” აწარმოებს, რომელიც თავადაც უშვებს ელექტრულ სპორტულ მოდელ ”როდსტერს”.

”მიცუბიში” ელექტრომობილების ფასს შეამცირებს

Mitsubishi to cut price of electric cars

20 ივნისი

”მიცუბიში მოტორს კორპორეიშნი” იმედოვნებს, რომ 2012 წლიდან თავისი ელექტრომობილების ღირებულებას 30 პროცენტით, 2 მილიონ იენამდე (დაახლოებით 21 890 დოლარამდე) შეამცირებს. ეს კი იმის შედეგი იქნება, რომ დაიწყება ლითიუმ-იონური აკუმულატორების მასობრივი წარმოება. ეს კომპონენტი თანამედროვე ავტომობილებში ყველაზე ძვირად ფასობს და მათს მაღალ ფასს განაპირობებს.

სწორედ 2012 წლიდან ამოქმედდება აკუმულატორების მწარმოებელი ქარხანა, რომლის წარმადობაც წლიურად აკუმულატორების 70 000 ბლოკი იქნება. და თუ დღეისათვის, ასეთი აკუმულატორების ფასი 2.5 მილიონ იენს აღწევს, მასობრივი წარმოების შემდეგ, მათი ფასი 1 მილიონ იენზე დაბლა ჩამოვა.

სააგენტო ნიკეის ყოველდღიური ბიზნესგამოშვების კორესპონდენტთან საუბრისას, ”მიცუბიში მოტორსის” პრეს მდივანმა განაცხადა, რომ მისი კომპანიის მიზანია, თავის სუბკომპაქტურ ელექტრომობილ i-MiEV-ზე ფასი 2 მილიონ იენამდე შემცირდეს. მართალია, ამ კლასის ავტომობილისთვის, ეს მაინც ძვირი იქნება, თუმცა არა იმდენად ძვირი, როგორც ის დღეს ღირს. ცნობისათვის, გერმანიის ბაზარზე i-MiEV-ს სასტარტო ფასი 48 000 ევროა, თუმცა ამ ფასში გათვალისწინებული არაა სახელმწიფოს მიერ დაწესებული შეღავათები.

აღსანიშნავია, რომ ”მიცუბიში მოტორსი” ამ ელექტრომობილს თავისი ფრანგი პარტნიორების, ”პეჟოსა” და ”სიტროენისთვისაც” (შესაბამისად, იონ-ს და C-ზერო-ს) დაამზადებს. მათი ფასი კი (შეღავათების გაუთვალისწინებლად) 35 000 ევრო იქნება (შეღავათებით - 30 000 ევრო). წელსვე ფრანგული კომპანია თავისი ელექტრომობილების გაყიდვას შეუდგება.

ევროპაში უფრო ადრე დაიწყება ”მიცუბიში i-MiEV-ს” გაყიდვები, მერმისს კი ეს პატარა ავტომობილი ამერიკის ბაზარსაც ეწვევა. სხვათა შორის, ის იაპონიაში უკვე ერთი წელია, რაც იყიდება. შარშან, როდესაც იაპონურმა კომპანიამ თავის ქვეყანაში მისი გაყიდვები დაიწყო, ფასად ასტრონომიული თანხა, 4.59 მილიონი იენი დაადო. აქვე ისიც უნდა აღინიშნოს, რომ i-MiEV-ს მყიდველები ძირითადად ის ბიზნესმენები არიან, რომლებიც ამ ავტომობილს კომერციული დანიშნულებით იყენებენ. მალე კი, აკუმულატორების ფასების თანდათან კლებისა და სახელმწიფოს მიერ დაწესებული შეღავათების წყალობით, იგივე ავტომობილი ამომავალი მზის ქვეყანაში მხოლოდ 2 მილიონი იენი ეღირება.

აკუმულატორების გარდა, ელექტრომობილების მაღალ ფასს ასევე განაპირობებს ის ფაქტიც, რომ მასობრივად არ იწარმოება შესაბამისი დანიშნულების ელექტროძრავები, დასამუხტი მოწყობილობები და სხვა კომპონენტები. ამიტომ, ”მიცუბიში მოტორსი” მათ მწარმოებლებთანაც მჭიდროდ ითანამშრომლებს, რათა მაკომპლექტებლების ფასების შემცირებას მიაღწიოს.

”ასტონ მარტინი” მოდელ DB9-ს ცვლის

Aston Martin DB9

20 ივნისი

სუპერ ავტომობილების მწარმოებელი ბრიტანული კომპანია ”ასტონ მარტინი” თავისი ფლაგმანის, კუპე DB9-ს შემცვლელის შექმნაზე მუშაობს. ახალი ავტომობილი წინამორბედზე მძლავრიც იქნება და მსუბუქიც, მისი დებიუტი კი 2013 წელსაა მოსალოდნელი. არადა, ადრე კომპანიას გამოცხადბული ჰქონდა, რომ DB9-ს (სურათზე) შემცვლელის გამოშვება გადაიფიქრა, რის მიზეზადაც ეკონომიკური კრიზისი და ის გარემოება დასახელდა, რომ ”ასტონ მარტინმა” ექსკლუზიურ სუპერ ავტომობილ ”ვან-77-ის” წარმოება დაიწყო.

შემუშავების პროცესში მყოფი ახალი ავტომობილის შიდა-კოდური სახელწოდებაა ”პროჯექტ VH500”. კომპანიის ინჟინრებმა მისთვის სპეციალურად შეიმუშავეს წონის შემცირების პროგრამა, რისი მიზანიც, ავტომობილის ხარჯის შემცირება და დინამიკური მახასიათებლების და მართვადობის გაუმჯობესებაა. პროგრამა ითვალისწინებს, რომ ახალი ავტომობილის წონა, DB9-საზე 10 პროცენტით ნაკლები უნდა იყოს.

ახალი ავტომობილიც იმავე V12 ძრავით აღიჭურვება, რომელსაც ”ასტონ მარტინი” DB9-ზე იყენებს. ოღონდ, მას მოდერნიზება ჩაუტარდება, რის შემდეგაც, მისი სიმძლავრე გაიზრდება, ხარჯი კი - შემცირდება.

რაც შეეხება გარებნობას, DB9-ის შემცვლელი ”ვან-77-ის” სტილში შესრულდება.

”მორგანი” ოთხკარიან კუპეს გამოუშვებს

New Morgan EvaGT with BMW Turbo Teased Ahead of Pebble Beach Debut

20 ივნისი

ბრიტანული კომპანია ”მორგანი”, რომელიც რეტრო სტილის ექსკლუზიური ავტომობილების წარმოებითაა ცნობილი, თავის სამოდელო გამას მალე ახალ ავტომობილს დაამატებს. ახალ, ოთხადგილიან კუპეს ”ევაGT” ერქმევა და ის კუპე ”აერო სუპერსპორტის” ალუმინის მოდერნიზებულ შასიზე აიგება.

შასის გარდა, ახალ ავტომობილს ძარაც ალუმუნისა ექნება. ძარის დეტალები ტვიფვრით დამზადდება, თუმცა მათ კომპანიის კვალიფიცირებული მუშები ხელით დაამუშავებენ. ძნელი მისახვედრი არ უნდა იყოს, რომ ალუმინის ფართოდ გამოყენებით, ”მორგანი” კუპე ”ევაGT-ს” წონის შემცირებას ცდილობს. ამ ავტომობილის სავარაუდო წონა 1250 კილოგრამი იქნება.

კუპე ”ევაGT-სთვის” ”მორგანმა” მხოლოდ ერთი აგრეგატი შეარჩია. ესაა ”ბეემვეს” წარმოების 3.0-ლიტრიანი ტურბოძრავი, რომელიც 306 ცხენის ძალას და 400 ნიუტონმეტრს გამოიმუავებს. ამ აგრეგატის მეშვეობით, ავტომობილი 100 კმ/სთ სიჩქარეს 4.5 წამში ავითარებს, მისი მაქსიმალური სიჩქარე კი 273 კმ/სთ-ს აღწევს.

სამწუხაროდ, ”მორგანი” მხოლოდ 100 ცალი ”ევაGT-ს” წარმოებას აპირებს. მისი ფასი ჯერჯერობით უცნობია. თუმცა, ამის მიუხედავად, ”მორგანს” უკვე დაწყებული აქვს წინასწარი შეკვეთების მიღება. ამ კუპეს მსოფლიო პრემიერა აგვისტოში, პებლ ბიჩის ელეგანტურობის კონკურსზე იგეგმება.

”ჰიუნდაიმ” 5 მილიონზე მეტი ”სონატა” გაჰყიდა

Hyundai Sonata

19 ივნისი

მიმდინარე წლის მაისში, კორეული კომპანია ”ჰიუნდაის” სედან ”სონატას” გაყიდვებმა მთელს მსოფლიოში 5-მილიონიანი ზღვარი გადალახა. ამ კომპანიის ისტორიაში, ”სონატა” სულ მესამე ავტომობილია, რომელიც 5 მილიონზე მეტია გაყიდული. მანამდე იგივე ზღვარი მოდელებმა - ”აქცენტმა” (იგივე ვერნამ) და ”ელანტრამ” (იგივე ავანტემ) გადალახეს.

”ჰიუნდაიმ” მოდელ ”სონატას” გაყიდვები 1985 წელს დაიწყო. ცხრა წლის შემდეგ, კორეულმა კომპანიამ მემილიონე ”სონატა” გაყიდა, 2007 წელს კი უკვე 4 მილიონი იყო გაყიდული. ეს კი იმის ნიშანია, რომ რაც დრო გადის, ”სონატა” სულ უფრო პოპულარული ხდება, რასაც ყველაზე მეტად, აშშ-ის ბაზარზე მისი მზარდი გაყიდვები განაპირობებს.

”ხუთი მილიონი გაყიდული ავტომობილი იმის ნიშანია, რომ ჩვენი პროდუქციის ხარისხი მუდმივად უმჯობესდება, მათზე სულ უფრო მეტ სიახლეს ვნერგავთ და რაც არანაკლებ მნიშვნელოვანია, ”ჰიუნდაის” ინდივიდუალურ სტილს ვანიჭებთ”, - ამბობს ”ჰიუნდაი მოტორის” პრეზიდენტი და გენერალური დირექტორი სტივ იანგი.

საერთო ჯამში, ”ჰიუნდაიმ” კორეულ ბაზარზე 2.7 მილიონი ”სონატა” გაჰყიდა, დანარჩენი 2.3 მილიონი კი უცხოურ ბაზრებზე გავიდა. ამათგან კორეული კომპანიისთვის ყველაზე მნიშვნელოვანი ამერიკული ბაზარია, სადაც 1.3 მილიონი ”სონატაა” გაყიდული. მართალია, აქამდ გაყიდული ”სონატების” უმეტესობა კორეაში დარჩა, მაგრამ ახალი ტენდენციით, ამ სედანს უფრო მეტი მყიდველი უცხოეთში ჰყავს. კერძოდ, შარშანდელი მონაცემებით, წარმოებული ”სონატების” დაახლოებით ორი მესამედი უცხოეთში გაიტანეს.

მისი წარმოების დაწყებიდან 25 წლის განმავლობაში, ”ჰიუნდაიმ” სულ 6 თაობის ”სონატა” გამოუშვა. მეექვსე თაობის ”სონატას” წარმოება კომპანიამ, რომელმაც შარშან მსოფლიოს უდიდეს ავტომწარმოებელთა სიაში მეხუთე ადგილზე გადაინაცვლა, შარშან დაიწყო. ოღონდ მსოფლიოს ბაზრების უმეტესობაზე, მას სახელი შეუცვალეს და i45 უწოდეს.

”მერსედეს ბენცი” პარიზში ახალი კუპე S-კლასს გვაჩვენებს

Mercedes-Benz S-Class

19 ივნისი

”მერსედეს ბენცი” აგრძელებს თავისი სპორტული მოდელებისთვის სახელის შეცვლას და მათს განახლებას. ამჯერად, ჯერ მოდელ CL-ზე მიდგა, რომელიც წარსულში დარჩება, მის ნაცვლად კი ბაზარზე S-კლასის კუპე გამოჩნდება, რომლის მსოფლიო პრემიერაც პარიზის საავტომობილო შოუზე გაიმართება.

ახალი ავტომობილი შტუტგარტული კომპანიის ახალ კორპორატიულ სტილშია შესრულებული, რომელიც რადიატორის ახალი ბადით და წინა ფარებით გამოირჩევა. მაგრამ მთავარი ისაა, რომ მისთვის ”სამქიმიანებმა” ახალი ძრავი მოამზადეს. ესაა 4.7-ლიტრიანი V8, რომელიც 435 ცხენის ძალას იძლევა. ამაში კი მას საწვავის უშუალოდ წვის კამერაში შეფრქვევის სისტემა და წყვილი ტურბოკომპრესორი ეხმარება.

უკვე ცნობილია, რომ სატიუნინგო კომპანია AMG, რომელიც ”მერსედეს ბენცის” ჯგუფში შედის, ამ ავტომობილისთვის 5.5-ლიტრიან V8-ს ამზადებს, რომლის მაქსიმალური სიმძლავრეც 544 ცხენის ძალა იქნება. ამავე ძრავის გაძლიერებული ვერსიის სიმძლავრე კი 571 ცხენის ძალას მიაღწევს. S-კლასის კუპეს AMG-სეული ტოპ ვერსია კი 12-ცილინდრიანი ძრავით აღიჭურვება, რომლის მონაცემებიც ჯერ კიდევ უცნობია.

მსოფლიოს უიაფესი კაბრიოლეტი? - არა

Tata Nano

19 ივნისი

ამ ფოტოზე რომ მანქანებია, ისინი ერთ-ერთი პაპარაცის მიერ ინდოეთის ქალაქ სანანდში არსებული ქარხნის ტერიტორიაზეა გადაღებული. მათში ალბათ იცანით მსოფლიოს უიაფესი ავტომობილის, ინდური ”ტატა ნანოს” ღია ვარიანტები. როგორც ინდური ბლოგი ”უილოსფერი” გვატყობინებს, ამ ორ ავტომობილს მეტად უხეში ოპერაციები ჩაუტარდათ, რომლის შედეგადაც, არ გააჩნიათ არც სახურავი და არც მისი საყრდენები. ეს კი იმას ნიშნავს, რომ ავტომობილის მზიდმა ძარამ სიხისტე დაკარგა.

მაგრამ როგორც ირკვევა, მათ სიხისტე არც სჭირდებათ და შესაბამისად, არც ქრეშ-ტესტების გავლა მოუწევთ. საქმე ისაა, რომ ღია ”ტატა ნანოს” რამდენიმე ეგზემპლარი ინდურ კომპანიას მხოლოდ იმისთვის სჭირდება, რომ ქარხნის სტუმრები, საწარმოო კორპუსებს შორის ატაროს. ამისათვის კი სულ რამდენიმე კაბრიოლეტი ”ტატა ნანოც” საკმარისია. ასე რომ, ის მსოფლიოს უიაფეს კაბრიოლეტადაც ვერ ჩაითვლება.

შეგახსენებთ, რომ ჰეჩბეკ ”ნანოს” ღირებულება ინდოეთის ბაზარზე სულ რაღაც 100 000 რუპიაა, რაც 2 500 დოლარზე ოდნავ მეტია. ინდურმა კომპანიამ მისი გაყიდვები შარშან დაიწყო. მასზე იმდენად დიდი მოთხოვნილებაა, რომ ”ტატა” იძულებული შეიქნა, სანანდში სასწრაფოდ მეორე ქარხანაც აეშენებინა.

”დაჩია” ჰიბრიდულ ქროსოვერს გამოუშვებს

Hamster Hamster

19 ივნისი

რუმინული საავტომობილო კომპანია ”დაჩია”, რომელიც ფრანგული ”რენოს” ჯგუფში შედის, მალე ჰიბრიდული ქროსოვერის წარმოებას დაიწყებს. რუმინული გამოცემა ”პრო მოტორი” გვაუწყებს, რომ ქროსოვერ ”სანდერო სტეპვეის” ბაზაზე, მისი ჰიბრიდული ვერსიის შექმნის პროცესში, ”დაჩიას” სპეციალისტების გარდა, ქალაქ პიტეშტის უნივერსიტეტის მეცნიერებიც მუშაობენ.

უკვე მზადაა კონცეპტუალური მოდელი, რომელსაც ”ჰამსტერი” (რაც ინგლისურად ზაზუნას ნიშნავს) შეარქვეს. სავარაუდოდ, მისი დებიუტი პარიზის საავტომობილო შოუზე გაიმართება. ის აღჭურვილია 1.2-ლიტრიანი დიზელით, რომელიც 75 ცხენის ძალას ავითარებს და ელექტროძრავით, რომლის სიმძლავრე სულ რაღაც 10 ცხენის ძალაა. გარდა ამისა, კონცეპტუალური ავტომობილის ეკიპირებაში ასევე შედის სისტემა სტოპ-სტარტი და მზის ელემენტების ბლოკი, რომელიც სახურავზეა განთავსებული და დამატებით ენერგიას გამოიმუშავებს.

არაოფიციალური მონაცემებით, ”დაჩია ჰამსტერის” სერიული წარმოება 2012 წელს დაიწყება. და, მიუხედავად იმისა, რომ მისი წარმოებისთვის ძვირადღირებულ ტექნოლოგიებს გამოიყენებენ, ჰიბრიდული ქროსოვერის ღირებულება 10 000 ევროზე მეტი არ იქნება.

”სუბარუ იმპრეზა ბერლინეტა” - ჯერ მხოლოდ სტუდიური კონცეპცია

Subaru Impreza Berlinetta Rear-Engine Concept Study

18 ივნისი

დიდი ხანია, ”სუბარუს” ფანები იმედოვნებენ და ლოცულობენ, რომ იაპონურმა კომპანიამ სპორტული კუპეს წარმოება დაიწყოს, მაგრამ ჯერჯერობით, მათი ოცნება ჰაერშია გამოკიდებული. მას შემდეგ კი, რაც ”სუბარუ” ”ტოიოტას” პარტნიორი გახდა, გაჩნდა იმედი, რომ ბოლოს და ბოლოს, მოსახდენი მოხდებოდა.
დღეს უკვე შეიძლება ითქვას, რომ მალე ”სუბარუ” აუცილებლად დაიწყებს ”ტოიოტას” FT-86-ის მისეული ვერსიის წარმოებას. მაგრამ როგორი გარეგნობა ექნება ”სუბარუსეულ” სპორტსმენს? ამის თაობაზე, ჯერ მხოლოდ მარჩიელობა შეიძლება. თუმცა, იტალიურმა სადიზაინერო ფირმა ”ბეესტუდიამ” მარჩიელობას საქმის კეთება ამჯობინა და სპორტული ”სუბარუს” მისეული, მეტად საინტერესო ხედვა შემოგვთავაზა.

ესაა ”სუბარუ იმპრეზა ბერლინეტა”, ორადგილიანი კუპე, რომელიც მისი ავტორების ჩანაფიქრით, ”იმპრეზა STI-ის” ბაზაზე უნდა შეიქმნას. მაგრამ ისინი მნიშვნელოვან ცვლილებას ითვალისწინებენ - მათ ავტომობილზე ძრავი ბაზაში მოთავსდება და თუ ”იმპრეზაზე” წინა ცილინდრები ავტომობილის წინა მხარესაა მიქცეული, კონცეპტუალურ მოდელზე (რომელიც ჯერ მხოლოდ კომპიუტერით შემუშავებული ესკიზების სახით არსებობს) წინა ცილინდრები უკან ”გაიხედავენ”. ანუ ძალური დანადგარები (ძრავი და ტრანსმისია) 180 გრადუსით მობრუნდება.

”ბეესტუდიოს” განცხადებით, მათი ”ბერლინეტა” ფოლადის ოთხკუთხა მილებისგან შეკრულ სივრცობრივ ჩარჩოზე აიგება, ძარის ნაწილები კი შუშის ბოჭკოს კომპოზიტისგან დამზადდება. შესაძლებელია შასის ალუმინის ფურცლებისგან შეკვრა, ძარის კი კარბონის კომპოზიტისგან დამზადება, რაც ავტომობილს მნიშვნელოვნად შეამსუბუქებს.

საუდელები უგზოობის ავტომობილს გამოუშვებენ

Saudi Arabia King Greenlights Gazal 1 for Production

18 ივნისი

ჟენევის წლევანდელ საავტომობილო შოუს ერთ-ერთი ვარსკვლავი უგზოობის კონცეპტუალური ავტომობილი, სახელად ”გაზალ 1” იყო, რომელიც საუდის არაბეთში შეიქმნა. მაშინ არავინ იცოდა, რა ბედი ელოდა ამ ორიგინალურ ავტომობილს. მაგრამ გავიდა სამი თვე და საუდის არაბეთის მეფე აბდულამ, სპეციალურად მოწვეულ პრესკონფერენციაზე განაცხადა, რომ ”გაზალ 1” კონვეიერზე დადგება.

”გაზალ 1-ის” შექმნაში, ერ რიადის უნივერსიტეტის სტუდენტების გარდა, მონაწილეობა ავსტრიულ კომპანია ”მაგნა შტეირის” სპეციალისტებმაც მიიღეს. მართალია, ავტომობილი გარეგნულად ”ტოიოტას” უგზოობის ”FJ კრუიზერს” ჰგავს, მაგრამ ის სულ სხვა ავტომობილის - ”მერსედეს ბენცის” G--კლასის უგზოობის მოდელის პლატფორმაზეა აგებული და V8 ძრავითაა აღჭურვილი.

გამოცემა ”არაბ ნიუსთან” საუბრისას, ”გაზალ 1-ის” შემქმნელებმა განაცხადეს, რომ ეს ავტომობილი საუდის არაბეთის და მისი მეზობელი ქვეყნების უმკაცრესი კლიმატური პირობების შესაბამისადაა შექმნილი. სავარაუდოდ, არაბულ ავტომობილს ”მაგნა შტეირის” ავსტრიული საწარმო გამოუშვებს. წლიურად კი სულ 20 000 ცალი ”გაზალ 1-ის” წარმოებაა დაგეგმილი.

ჩინელები ელექტრომობილების პროპაგანდას იწყებენ

Beijing's real goal in promoting electric vehicles

14 ივნისი

ჩინეთის მთავრობა ახალ ეკოლოგიურ კამპანიას იწყებს, რომლის მიზანიც, ქვეყანაში ეკოლოგიური მდგომარეობის გაუმჯობესება და ეკოლოგიურად სუფთა - ჰიბრიდული და ელექტრული ავტომობილების პროპაგანდა-პოპულარიზაციაა. კამპანია ჯერჯერობით პილოტურ ეტაპზეა და მხოლოდ ხუთ ქალაქს შეეხება, თუმცა სავარაუდოდ, ის მალე მთელს ქვეყანაზეც გავრცელდება.

როგორც საავტომობილო ბიზნესის მიმომხილველები ვარაუდობენ, ჩინეთის მთავრობას ამ წამოწყებისთვის სულ სხვა საბაბი აქვს - ესაა ადგილობრივი ავტომწარმოებლებისთვის განვითარებაში ხელის შეწყობა და მათთვის სტიმულის მიცემა იმისათვის, რომ თავიანთ უცხოელ პარტნიორებთან ერთად, ეკოლოგიურად სუფთა ტრანსპორტი განავითარონ.

მოსალოდნელი იყო, რომ პროგრამაში მონაწილე ხუთ ქალაქს შორის, ადგილი პეკინისთვისაც გამოიძებნებოდა - ამ ქალაქს მსოფლიოში ერთ-ერთი ყველაზე მეტად დაბინძურებული ჰაერი აქვს. მაგრამ პეკინი სიაში ვერ მოხვდა, რასაც მარტივი მიზეზი აქვს - ხუთეულში ის ქალაქები შეიტანეს, სადაც 6 ყველაზე დიდი ჩინური ავტოკომპანიის შტაბ-ბინა მდებარეობს, რომლებსაც ჰიბრიდული და ელექტრული ავტომობილების წარმოების გამოცდილება აქვთ.

ჩინეთის მთავრობის პილოტური პროგრამის მიხედვით, ჰიბრიდული ავტომობილების მყიდველებისთვის, სუბსიდიის სახით, 50 000 იუანია ($7 321) გათვალისწინებული, ელექტრომობილების მყიდველები კი მთავრობისგან ჯილდოს სახით 60 000 იუანს ($8,785) მიიღებენ. ამასთან, ხუთივე ქალაქი ვალდებულია, რომ თავის ფარგლებში, აკუმულატორების დასამუხტი სადგურების და ნახმარი აკუმულატორების მიღება-გადამუშავების სადგურების ქსელი შექმნას.

სხვათა შორის, ეს ქალაქები ეკოლოგიურად სუფთა ავტომობილების მყიდველებს, თავადაც უწესებენ შეღავათებს. მაგალითად, ქალაქ შენჯენში, ჰიბრიდული და ელექტრული ავტომობილების მყიდველებს, შეღავათად 20 000 იუანი ($2 928) დაუწესდათ. ყველაფერი ეს აშკარას ხდის, რომ ის კომპანიები, რომლებიც ჩინეთში ჰიბრიდულ და ელექტრულ ავტომობილებს შეიტანენ, სოლიდური შეღავათებით ისარგებლებენ.

პილოტურ პროგრამაში შემდეგი ქალაქები მონაწილეობენ: შანჰაი, ჩანჩუნი, შენჯენი, ჰანჯოუ და ჰეფეი. სწორედ ამ ქალაქებში მდებარეობს 6 უდიდესი ჩინური საავტომობილო კომპანიის მთავარი ოფისები. ეს კომპანიებია: შანჰაი ავტომოტივ ინდასტრი კორპორეიშნი (SAIC) - რა თქმა უნდა, შაჰნაიში, FAW ჯგუფი - ქალაქ ჩანჩუნში, BYD ავტოს შტაბ-ბინა შენჯენში მდებარეობს, ”ჩერი ავტომობილისა” - ფეჰეის გარეუბან ვუჰუში, ”ჯეძიან ჯილი ჰოლდინგ” ჯგუფი და ”ზოიტ” ჯგუფი კი - ჰანჯოუში.

საინტერესოა, რომ ამ კომპანიებს, ჩინეთის ტერიტორიაზე გამართულ საავტომობილო გამოფენებზე, არაერთი ჰიბრიდული და ელექტრული კონცეპტუალური მოდელი აქვთ ნაჩვენები, რაც იმას ნიშნავს, რომ ისინი მათ წარმოებას მალე დაიწყებენ. უფრო მეტიც, ყველას ქვეყნის და აღნიშნული ქალაქების მთავრობებთან ახლო საქმიანი და პარტნიორული ურთიერთობა აქვთ. მაგალითად, BYD-მა ახლახანს გამოაცხადა, რომ ასეულობით ელექტრომობილ e6-ს (სურათზე) ქალაქ შენჯენის ტაქსის პარკისთვის დაამზადებს. ანალოგიური მოქმედება სხვა კომპანიების მხრიდანაცაა მოსალოდნელი.

ამ კომპანიების გარდა, სამთავრობო, თუნდაც საპილოტო პროგრამაში კიდევ რამდენიმე ჩინური კომპანია და მათი ქალაქი ვერ მოხვდა. მათგან ყველაზე დიდებია ”ჩანგან ავტომობილი” (ქალაქი ჩონპინი) და ”ბეიძინ ავტომოტივ ინდასტრი ჰოლდინგი” (იგივე BAIC, ქალაქი პეკინი).

”ჩანგანი” ფულს არ იშურებს ახალი ტექნოლოგიების შემუშავებასა და შეძენაში. მისი სპეციალისტები ჰიბრიდებზე, პლაგ-ინ ჰიბრიდებზე, ელექტრომობილებსა და ფიჭურ საწვავზე მომუშავე ტექნოლოგიებზე მუშაობენ. მაგრამ აქამდე ამ კომპანიას ბაზარზე თითქმის არ აქვს პლაგ-ინ ჰიბრიდული და ელექტრული ავტომობილები. იგივე სიტუაციაშია ”ბეიძინ ავტომოტივიც”, რომელმაც პეკინის გამოფენაზე პლაგ-ინ ჰიბრიდული და ელექტრული კონცეპტუალური მოდელები კი წარადგინა, მაგრამ მათი წარმოების დაწყებას აგვიანებს. ამიტომაც, ისინი პილოტურ პროგრამაში არ დაუშვეს.

ამ პილოტურ პროგრამას კიდევ ერთი დადებითი თვისება აქვს: ადგილობრივმა კომპანიებმა კარგად გაიგეს, თუ რა მიმართულებით უნდა განახორციელონ ინვესტიციები, რომ მაქსიმალური მოგება მიიღონ და ამ ინვესტიციებმა მათი სწრაფი განვითარება უზრუნველყოს. არადა, ადრე არავინ იცოდა, ქვეყნის მთავრობა რომელ ტექნოლოგიებს მიანიჭებდა უპირატესობას - პლაგ-ინ ჰიბრიდებისას, ელექტრომობილებისას, თუ ფიჭური უჯრედებისას. ახლა აშკარად გაირკვა - ფიჭურ საწვავებს ჩინეთში არ სწყალობენ და აქედან გამომდინარე, შესაბამისი ტექნოლოგიების განვითარებას მომავალი არ აქვს. არადა, SAIC-ს ფიჭური ელემენტების შემუშავებაზე, არაერთი ათეული მილიონი დოლარი აქვს დახარჯული...

”სააბი” და ”ბეემვე” პარტნიორობას აპირებენ

Saab, BMW in talks to develop new 9-2, paper says

14 ივნისი

სააგენტო ბლუმბერგი გვამცნობს, რომ ავტომობილების მწარმოებელი შვედური კომპანია ”სააბი” მოლაპარაკებას გერმანულ ”ბეემვესთან” აწარმოებს. მოლაპარაკების თემა ტექნოლოგიების და მაკომპლექტებლების გაცვკლას ეხება, ეს კი ”სააბს” ახალი, კომპაქტური ავტომობილის წარმოებისთვის ესაჭიროება.

კომპაქტური ”სააბის” კონცეპტუალური ესკიზი

..........................................

თუ მხარეები პარტნიორობის დაწყებას გადაწყვეტენ, ”ბეემვე” ”სააბს” ძრავებს და ტრანსმისიებს მიაწვდის. რაც მთავარია, შვედურ კომპანიას, ბავარიელთა პლატფორმების გამოყენების საშუალება მიეცემა. ეს ინფორმაცია ბლუმბერგს მოლაპარაკებაში მონაწილე ორმა პიროვნებამ მიაწოდა, რომლებმაც ვინაობის გამხელა არ ისურვეს.

მათი განცხადებით, მოლაპარაკება ჯერ მხოლოდ ადრეულ სტადიაშია და ის არაოფიციალურ სტატუსს ატარებს. მოსალოდნელია, რომ მხარეები შეთანხმებამდე ორ თვეში მივლენ. შვედურ მხარეს ძლიერი პარტნიორი იმისათვის სჭირდება, რომ კომპაქტური მოდელის შემუშავებას აპირებს, რომლის შესაფერისი პკატფორმა და აგრეგატები მას არ გააჩნია. ”ბეემვეს” კი ”მინის” სახით, შესანიშნავი ბაზა აქვთ.

სააბ 92

..........................................

სხვათა შორის, კომპაქტურ ავტომობილს (სააბ 92) შვედური კომპანია 1950-იან წლებში აწარმოებდა. მაგრამ დიდი ხანია, ”სააბმა” ეს სეგმენტი დატოვა და ახლა იქ დაბრუნებას აპირებს. ეს კი ”სააბის” ახალი მფლობელის, ჰოლანდიურ კომპანია ”სპაიკერის” წამოწყებაა, რომელსაც მიზნად შვედური კომპანიის გამოცოცხლება აქვს დასახული.

”სპაიკერმა” ”სააბი” თებერვალში გამოისყიდა ”ჯენერალ მოტორსისგან”, ბოლო სამი თვე კი ამ ბიზნესის თავის ხელში აღებასა და ამერიკულ ავტო გიგანტთან კავშირების გაწყვეტაში გაატარა. ბლუმბერგთან საუბრისას, ”სპაიკერის” მთავარმა აღმასრულებელმა ვიქტორ მიულერმა განაცხადა, რომ ”სააბი” პარტნიორობის თაობაზე, მოლაპარაკებას რამდენიმე კომპანიასთან აწარმოებს. მაგრამ მას ”ბეემვე” არ უხსენებია. სამაგიეროდ დაადასტურა, რომ შვედური კომპანიის ინტერესი სხვა კომპანიების ტექნოლოგიების და აგრეგატების მისთვის ხელმისაწვდომობაა.

”სააბიც” ადასტურებს, რომ პარტნიორი, ან პარტნიორები ესაჭიროება და ალიანსის შექმნასაც არ გამორიცხავს. კომპანიის განცხადებით, მოდელ 9-3-ზე პატარა ავტომობილის წარმოება, ჯერჯერობით ”სააბის” გეგმებში არ შედის, თუმცა კომპანია თავის საწარმოო პროგრამაში ასეთი მოდელის გამოჩენას ისურვებდა.

თავის მხრივ, ”ბეემვე” თავს არიდებს ”სააბთან” მოლაპარაკებების არსებობაზე საუბარს. თუმცა აცხადებს, რომ ადასტურებს, რომ რამდენიმე კომპანიასთან აწარმოებს მოლაპარაკებას, რომლებიც მისი ტექნოლოგიების გამოყენებით არიან დაინტერესებულნი. უფრო მეტიც, ბავარიელები ირწმუნებიან, რომ შვედურ კომპანიასთან არანაირი კონტაქტი არ აქვთ.

მაგრამ შვედური გაზეთი ”დაგენს ინდუსტრი” ავრცელებს ინფორმაციას, რომლის თანახმადაც, ”სააბი” თავის საშუალო ზომის ქროსოვერ 9-4X-ისთვის, ”ბეემვეს” დიზელის ძრავების გამოყენებასაც გეგმავს. შვედური კომპანია ამ ავტომობილის წარმოებას ”ჯენერალ მოტორსის” მექსიკურ საწარმოში გეგმავს.

”სპაიკერი” იმედოვნებს, რომ 2012 წელს ”სააბის” წარმოების მოცულობა გაორმაგდება და წლიურად 85 000 ავტომობილს მიაღწევს.

”ფოლკსვაგენის” ელექტრო ტაქსი ბერლინისთვის

Volkswagen Berlin Taxi

12 ივნისი

”ავტო პანორამას” მკითხველს ემახსოვრება ელექტრომობილი, რომელიც ”ფოლკსვაგენმა” სპეციალურად, მილანის ტაქსის როლში სამუშაოდ შექმნა. ახლა მსგავსი ავტომობილი ვოლფსბურგულმა გიგანტმა ბერლინისთვისაც მოამზადა და მას ”ფოლკსვაგენ ბერლინ ტაქსი” უწოდა.
ისევე როგორც მილანური ტაქსი, ბერლინურიც კომპაქტური გაბარიტებით გამოირჩევა, თუმცა თავის მგზავრებს კომფორტს მაინც სთავაზობს. მისი სიგრძე 3.730 მეტრი, სიგანე 1.660 მეტრი და სიმაღლე 1.600 მეტრია. მასში ჩაჯდომის გასაადვილებლად, იმ მხარეს, საიდანაც მგზავრებს უწევთ ჩაჯდომა, კარი გასაწევია. მძღოლის მხარეს კი ავტომობილს მხოლოდ ერთი, ჩვეულებრივი კარი აქვს.

სალონში ვერ ნახავთ სავარძელს მძღოლის გვერდზე. ეს ადგილი ბარგის დასაწყობადაა გამოყოფილი. ამასთან, ბარგის დაფიქსირება სპეციალური სამაგრითაა შესაძლებელი. მძღოლის სავარძლის გვერდზე დამაგრებულია სენსორული მონიტორი, რომელზეც სხვადასხვა ინფორმაციის (მარშრუტის, მგზავრობის ღირებულების, გზაში ყოფნის დროის და სხვა) გამოტანაა შესაძლებელი. მისი მეშვეობით ასევე შესაძლებელია სხვადასხვა ცნობის მიღება და სალონში სასურველი კლიმატის დაყენება.

”ფოლკსვაგენ ბერლინ ტაქსი” მოძრაობაში 85-კილოვატიან ელექტროძრავს მოჰყავს, რომელსაც ენერგიით ლითიუმ-იონური აკუმულატორების ბლოკი კვებავს. ამ ბლოკის ტევადობა კი საკმარისია იმისათვის, რომ ავტომობილმა შეუჩერებლად 300 კილომეტის გავლა შეძლოს. ამასთან, აკუმულატორების დაახლოებით 80 პროცენტით შესავსებად, ერთი საათიც საკმარისია.

”ფოლკსვაგენი” ელექტრო ტაქსების წარმოების დაწყებას 2013 წელს გეგმავს.