ბარიკელომ ინდის ახალბედების გამოცდა ჩააბარა

Barrichello passes Indy 500 oval rookie test

11 მაისი

მართალია, რუბენს ბარიკელოს ფორმულა ერთში თითქმის ოცი სეზონი აქვს გატარებული, მაგრამ ინდიქარში მაინც ახალბედაა და რადგან ასეა, ოვალზე ასპარეზობის წინ, ახალბედების ტესტები ჰქონდა გასავლელი. ბრაზილიელის სასახელოდ უნდა ითქვას, რომ ტესტები წარმატებით გაიარა და ახით, ლეგენდარულ ინდი 500-ზე ასპარეზობის უფლება მიიღო.

ინდიანაპოლისის 4-კილომეტრიან ოვალურ ტრეკზე, ბარიკელომ პირველი 10 წრე, საშუალოდ 320-328 კმ/სთ სიჩქარით გაიარა. შემდგომ 15 წრეზე, საშუალო სიჩქარე 328-336 კმ/სთ იყო, მომდევნო 15 წრეზე კი - 336 კმ/სთ და მეტი. ამგვარად, მას ოფიციალურ პრაქტიკებში უფლება მიეცა, რომლებიც 19-20 მაისს ჩატარდება.

„დღევანდელი დღით ძლიან ვისიამოვნე. მადლობელი ვარ ინდიქარის, რადგან ახალბედების საორიენტაციო პროგრამაში მონაწილეობის საშუალება მომეცა. ამ პროგრამით ვარჯიშისას, ზედმეტი ზეწოლის გარეშე, საფეხურებრივი სრულყოფის შესაძლებლობა გეძლევა. ამან ყველაფერი ძალიან გამიადვილა“, - ყვება 39 წლის ბარიკელო.

ფორმულა ერთში რუბინიუს 19 სეზონი აქვს გატარებული, რომელთა განმავლობაშიც, 322 რბოლის სტარტზე დადგა. მაგრამ გასული სეზონის შემდეგ, „უილიამსმა“ ბრუნო სენა მიიწვია, ბარიკელომ სხვა გუნდში ადგილი ვეღარ იშოვნა. მართალია, ადრე ნათქვამი ჰქონდა, რომ ოვალურ ტრეკებზე არასდროს იასპარეზებდა, მაგრამ ეს მაშინვე გადათქვა, როდესაც სარბოლი კარიერის დასრულების საშიშროების წინაშე დადგა. მეგობარ ტონი კანაანის რჩევით, კარიერა ინდიქარში გააგრძელა, სადაც მისი დებიუტი 25 მარტს, შტატ ფლორიდის ქალაქ სანკტ პეტერსბურგის ქუჩის რბოლაში შედგა. თუმცა, აქამდე ოვალურ ტრეკზე არ უასპარეზია. ბარიკელოს ჯერჯერობით ინდიქარის მხოლოდ ოთხ რბოლაში აქვს მონაწილეობა მიღებული, რომელთაგან სამი მოწინავე ათეულში დაასრულა, საუკეთესო შედეგი კი მერვე ადგილი იყო (ალაბამას დიდი პრიზი).