„კიონიგსეგ აგერა R“ – ომანის მეფის ასრულებული ოცნება

New Koenigsegg Agera R gets 1 115 HP

8 მარტი

როდესაც ავტომობილი 910-ცხენისძალიანი ძრავითაა აღჭურვილი, ტიუნინგის სპეციალისტებისთვის ის ნაკლებად საინტერესოა - ძრავის მნიშვნელოვნად გაძლიერების პერსპექტივა მცირეა. მაგრამ როდესაც შეკვეთას ომანის მეფე იძლევა და რა თქმა უნდა, შეკვეთის შემსრულებელს უამრავ ნავთობდოლარს პირდება, შეუძლებელი რა უნდა იყოს...

სწორედ ასეა შვედურ კომპანია „კიონიგსეგის“ უახლესი „აგერას“ შემთხვევაში. ომანის მეფეს ეს მანქანა მოსწონებია, თუმცა მისი 910 ცხენის ძალა ეცოტავა... და სანამ ტიუნინგის სპეციალისტებს მიმართავდა, მისი ოცნების დაკმაყოფილება თავად მანქანის მწარმოებელმა იკისრა. საბოლოო პროდუქტი კი ჟენევის ავტო შოუზე წარადგინა.

„კიონიგსეგ აგერა R“ 5.0-ლიტრიანი V8 აგრეგატითაა აღჭურვილი, რომელიც წყვილი ტურბოკომპრესორის დახმარებით, 1 115 ცხენის ძალას და 1 200 ნიუტონმეტრს იძლევა. ეს მონაცემები მაშინ მიიღწევა, როდესაც ავტომობილი საწვავად E85 ნარევს (ამ ნარევში 85 ეთანოლის შემცველობას აღნიშნავს) იყენებს. თუ საწვავი 95 ოქტანური რიცხვის ბენზინია, მაშინ სიმძლავრე 940 ცხენის ძალა, მაქსიმალური მაბრუნი მომენტი კი 1 100 ნიუტონმეტრია.

ძრავთან, ორდისკოიანი ქუროს მეშვეობით, 7-საფეხურიანი უახლესი, ნახევრად ავტომატური გადაცემათა კოლოფია შეწყვილებული. ამ სუპერ ტანდემის მეშვეობით, ადგილიდან ასამდე აჩქარება „აგერა R-ს“ 2.9 წამში შეუძლია, მისი მაქსიმალური სიჩქარე კი 375 კმ/სთ-ითაა შეზღუდული, თუმცა შვედური კომპანია ირწმუნება, რომ შეზღუდვის გარეშე, ავტომობილს 440 კმ/სთ-ის აკრეფაც შეუძლია.

შვედური მონსტრის მზიდი სისტემის ძირითადი ელემენტი კარბონის კომპოზიტისგან დამზადებული მონოკოკია, რომელიც სულ რაღაც, 70 კილოგრამს იწონის. მასშია ინტეგრირებული საწვავის ავზიც, რომელზეც უშუალოდ მაგრდება ძრავი. მსუბუქი მეტალებისა და კარბონის კომპოზიტის ფართოდ გამოყენების წყალობით, ავტომობილის მშრალი წონა მხოლოდ 1 330 კილოგრამია. აქედან სრულად დაკომპლექტებულ (მქნევარათი, გადაბმის ქუროთი, მშრალი კარტერით და ტურბოკომპლექტით) ძრავზე 197 კილოგრამი მოდის. ავტომობილის შესანიშნავი დინამიკური მახასიათებლების გარდა, სიმსუბუქე „აგერა R-ის“ ეკონომიურობასაც განაპირობებს. კერძოდ, 100 კილომეტრის გასავლელად, მას 14.7 ლიტრი საწვავი ჰყოფნის.

რაც შეეხება ინტერიერს, ერთი შეხედვით, მისი მთავარი თვისება უბრალოებაა, თუმცა სინამდვილეში პირიქითაა. ალუმინით, კარბონით და ძვირფასი ტყავით გაწყობილი დეტალები ექსკლუზიურ ატმოსფეროს ქმნის. ელექტრონული სისტემა ინფოტაინმენტი კი აუდიოსისტემის, სატელიტური ნავიგაციის და უკაბელო კავშირის ფუნქციებს მოიცავს და ასევე ეკრანზე მანქანის ტელემეტრიული მონაცემების გამოტანაც შეუძლია.

ასე რომ, „აგერა R-ს“ ნუღარ უწოდებთ სუპერქარს, ის ნამდვილი ჰიპერქარია.

„გუმპერტის“ 700-ცხენისძალიანი მაჩო

Geneva 2011: Gumpert Tornante by Touring

7 მარტი

ჟენევის საავტომობილო გამოფენაზე ბევრი სუპერ ავტომობილის ხილვა შეიძლება, მათ შორის ერთ-ერთი გამორჩეული კი პატარა გერმანულ კომპანია „გუმპერტის“ ახალი შედევრია, სახელად „ტორნანტე“, რაც იტალიურად მკვეთრ მოსახვევს ნიშნავს. ეს მეორე ავტომობილია, რომელიც „გუმპერტმა“ შეიმუშავა და ამ საქმეში მას იტალიური ატელიე „კაროცერია ტურინგ სუპერლეგერა“ დაეხმარა.

მოდელ „ტორნანტეს“ საფუძველს ფოლადის მილებისგან შეკრული შასი წარმოადგენს, რომელზეც კარბონის კომპოზიტისგან დამზადებული ძარის პანელებია დამაგრებული. სწორედ ძარა დაამზადა იტალიურმა ატელიემ, რომლის შესახებაც ადრე ბევრი არაფერი იყო ცნობილი.

„ტორნანტეს“ გაბარიტებია: 4.475 მეტრი, სიგანე 1.971 მეტრი, სიმაღლე 1.215 მეტრი, ბორბლებს შორის ბაზა - 2.700 მეტრი. ავტომობილის საბაზო ვერსიის წონა 1300 კილოგრამია, დამატებითი აღჭურვილობის დამატების შემთხვევაში კი ის დაახლოებით 100 კილოგრამით მძიმდება.

„გუმპერტის“ ახალი სუპერ ავტომობილი 4.2-ლიტრიანი V8 ძრავითაა აღჭურვილი, რომელსაც ორი ტურბოკომპრესორი ემსახურება. ძრავის სიმძლავრე 700 ცხენის ძალაა, მაქსიმალური მაბრუნი მომენტი კი 900 ნიუტონმეტრს (4 000 ბრ/წთ-ზე) აღწევს. ძრავთან 6-საფეხურიანი ნახევრად ავტომატური კოლოფია შეწყვილებული, რომელიც საჭის რგოლის უკან მოთავსებული ბერკეტებით, საფეხურებს 40 მილიწამში ცვლის. ამ ტანდემის დახმარებით, ავტომობილს ადგილიდან 100 კმ/სთ სიჩქარის აკრეფა 3 წამში შეუძლია, მისი მაქსიმალური სიჩქარე კი 300 კმ/სთ-ზე მეტია.

მართალია, „გუმპერტმა“ თავისი ახალი ავტომობილის ტექნიკური მახასიათებლები გამოაქვეყნა, მაგრამ ისიც განაცხადა, რო ისინი შეიძლება შეიცვალოს, რადგან „ტორნანტეს“ სრულყოფის პროცესი ჯერაც არ დასრულებულა. ამასთან, კომპანია გვპირდება, რომ ჟენევის შემდეგი გამოფენისთვის, „ტორნანტეს“ ეკოლოგიურად სუფთა ვერსიას მოამზადებს. ოღონდ, ეს ჰიბრიდი იქნება, თუ ელექტრომობილი, ამას ჯერაც არ აკონკრეტებს.

„ტორნანტე“ რეგულირებადი ამორტიზატორებით აღიჭურვება, მის შენელებას კი ექბსცილინდრიანი სამუხრუჭე მექანიზმები უზრუნველყოფს, რომლებიც 378-მილიმტრიან დისკოებზე ზის. ავტომობილის წინა ნაწილი 19-დუიმიან, უკანა კი 20-დუიმიან ბორბლებზე დგას, რომლებზეც „მიშლენის“ სერია „პაილოტ სუპერ სპორტის“ 265/35 და 345/30 საბურავებია ჩაცმული.

სავარაუდოდ, „გუმპერტი“ ამ ავტომობილის გაყიდვას მერმისს შეუდგება და მას დაახლოებით 800 000 დოლარად შეაფასებს.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

6 მარტი

შკოდა ვიჟნ D

ჟენევაში ჩეხურ კომპანიას ორი სიახლე აქვს. მათგან ერთი განახლებული ლოგოა, რომელზეც ვეღარ ნახავთ წარწერას „შკოდა აუტოს“. ახალი ლოგოთი, რომელიც მის ავტომობილებზე პირველად 2012 წელს გამოჩნდება, „შკოდა“ გვამცნობს, რომ ახალი ცხოვრების დაწყებას აპირებს.

მეორე სიახლეა D სეგმენტის ჰეჩბეკი, რომელიც დამთვალიერებელმა „ვიჟნ D-ს“ სახელით გაიცნო. ამ სეგმენტში მლადა ბოლესლაველები უკვე წლების განმავლობაში, სედან „ოქტავიას“ აწარმოებენ, რომელიც საკმაოდ პოპულარულია, თუმცა „შკოდას“ ბევრი აკრიტიკებს იმისათვის, რომ ეს მოდელი სრულად თითქმის არასდროს განუახლებია და მხოლოდ რესტაილინგით და ახალი მოდიფიკაციებით შემოიფარგლება ხოლმე. თუმცა, როგორც ჩანს, ჩეხურ კონსერვატიზმსაც აქვს დასასრული და სწორედ ამის ნიშანია „ვიჟნ D“.

ეს პირველი ავტომობილია, რომელიც „შკოდამ“ თავისი ახალი შეფ დიზაინერის, იოჟეფ კაბანის ხელმძღვანელობით შეიმუშავა. და თავისი კორპორატიული სტილის შეცვლაც გადაწყვიტა. თუმცა, რადიატორს თუ დავაკვირდებით, ახლანდელ „ოქტავიასთან“ მსგავსებას მაინც აღმოვაჩენთ. და მაინც, ავტომობილს დინამიურობა ეტყობა, რაც ადრე „შკოდას“ ავტომობილებისთვის დამახასიათებელი არ იყო.

სხვათა შორის, ჩეხურ კომპანიას საბიუჯეტო ავტომობილის წარმოება აქვს გადაწყვეტილი, რომლის ფასიც 10 000 ევროს ფარგლებში მოექცევა. ჟენევაში გავრცელებული ინფორმაციით, „ვიჟნ D“ სწორედ ამ საბიუჯეტო მოდელის წინამორბედია.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

6 მარტი

სეატ IBX

ესპანური კომპანიის სამოდელო გამაში ჯერაც ვერ ნახავთ ქროსოვერს. არადა, „ფოლკსვაგენის“ ჯგუფში შემავალ სხვა ყველა სერიულ მწარმოებელს, მსგავსი ავტომობილების წარმოება, დიდი ხნის დაწყებული აქვს. თანაც, ამ ტიპის მანქანებზე მოთხოვნა ევროპაში თანდათან იზრდება. სწორედ ამ ნიშის შევსებას ცდილობს ახლა „სეატი“, რომელმაც ჟენევაში კონცეპტუალური ქროსოვერი IBX წარადგინა.

ჯერჯერობით, ესპანური კომპანია აცხადებს, რომ ამ ავტომობილის სერიული წარმოება გადაწყვეტილი არ აქვს. თუმცა აღიარებს, რომ საწარმოო პროგრამის გაფართოებას გეგმავს. და თუ ასეა, მაშინ პირველი სიახლე, რომელიც მისი მარკით ბაზარზე უნდა გამოვიდეს, სწორედ ქროსოვერის ტიპის ავტომობილი უნდა იყოს.

თუ IBX-ის ზომებს გადავხედავთ (სიგრძე 4.26 მეტრი, სიგანე 1.80 მეტრი, სიმაღლე 1.62 მეტრი), გამოდის, რომ ის მონათესავე „ფოლკსვაგენ ტიგუანზე“ პატარაა და ახლოსაა ევროპაში ძალიან პოპულარულ „ნისან ქაშკაისთან“. ამასთან, კონცეპტუალური ავტომობილი ორკარიანია და თუ მისი წარმოება მაინც გადაწყდა, კიდევ ორი კარი აუცილებლად დაემატება.

რაც შეეძლება კონცეპტის აღჭურვილობას, ისევე როგორც სხვა სადემონსტრაციო ავტომობილები, IBX-იც ელექტროძრავით და ლითიუმ-იონური აკუმულატორებითაა აღჭურვილი, რომელთა სპეციფიკაციებიც არ გამოქვეყნებულა. ითქვა მხოლოდ ის, რომ ელექტროძრავი წინა ბორბლებს ატრიალებს, აკუმულატორების ბლოკის ტევადობა კი მხოლოდ 45 კილომეტრის გასავლელადაა საკმარისი. თუმცა, არც ესაა მთავარი, რადგან ამ მანქანის სერიული ვერსია აუცილებლად შიდაწვის ძრავებით აღიჭურვება.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

6 მარტი

ფორდ B-მაქსი

„ფორდის“ სტენდზე მთავარი სიახლე სუბკომპაქტური მინივენი „B-მაქსია“, რომელმაც უკვე საკმაოდ მოძველებული „ფიუჟენი“ უნდა შეცვალოს და კონკურენცია ამ კლასის ერთ-ერთ ყველაზე პოპულარულ ავტომობილ „ოპელ მერივას“ გაუწიოს. რაც მთავარია, ის ძალიან პოპულარულ ჰეჩბეკ „ფიესტას“ პლატფორმაზეა ბაზირებული.
„B-მაქს-ს“ უჩვეულო კონსტრუქციის უკანა კარებები აქვს - ისინი მანქანის გასწვრივ იღება, რითაც სალონში მოხვედრას და იქიდან გადმოსვლას მოსახერხებელს ხდის. იგივე მიზნით, ავტომობილს არ გააჩნია შუა საყრდენი. თუმცა, ამის გამო, მისი ძარა სიხისტეს მაინც არ კარგავს. და ეს იმის წყალობით, რომ კარებების კონსტრუქციაში ფოლადის ზემტკიცე შენადნობ ბორონისგან დამზადებული დეტალები შედის. რამდენადაც გამოფენაზე წარმოდგენილი ავტომობილი წარმოებისთვისაა მომზადებული, შეიძლება დანამდვილებით ვთქვათ, რომ კარებების ასეთი კონსტრუქცია სერიულ ვერსიაზეც შენარჩუნდება.

ახალი ავტომობილი ყველა იმ ძრავს მიიღებს, რომლებსაც „ფორდი“ ჰეჩბეკ „ფიესტაზე“ იყენებს. მათ შორის იქნება სერია ეკობუსტის ეკონომიური აგრეგატებიც. რაც შეეხება ჟენევაში წარმოდგენილ ავტომობილს, ის სწორედ ეკობუსტის სერიის სამცილინდრიანი 1.0-ლიტრიანი ტურბოძრავითაა აღჭურვილი, რომელიც 100 ცხენის ძალას გამოიმუშავებს. ამ აგრეგატის ტექნიკური მონაცემები ჯრ დაზუსტებული არაა, რადგან ის ტესტირების და სრულყოფის სტადიაში იმყოფება.

„ფორდ B-მაქსის“ წარმოების დაწყება უახლოეს ორ წელიწადშია მოსალოდნელი.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

6 მარტი

ჰიუნდაი i40

ბოლო წლებში, „ჰიუნდაი“ განუხრელად ზრდის თავის ბიზნესს და როგორც ჩანს, ეს ტენდენცია კიდევ უფრო გაძლიერდება, რადგან კორეული კომპანია თანდათან სულ უფრო აფართოებს თავის სამოდელო გამას. ამის დასტურის ხილვა ჟენევის ავტო შოუზე შეიძლება, სადაც „ჰიუნდაის“ სტენდზე სამი ახალი ავტომობილი დგას. ესენია უგზოობის კონცეპტუალური „ქარბი“, წარმოებისთვის მომზადებული კუპე „ველოსტერი“ და უახლესი უნივერსალი i40.

„ჰიუნდაის“ მთავარი სიახლე სწორედ i40-ია, რადგან პირველი ორის მსოფლიო პრემიერა მანამდე, დეტროიტის ავტო შოუზე შედგა. ეს D სეგმენტის პირველი ავტომობილია, რომელიც კორეულმა კომპანიამ თავის ევროპულ ცენტრში (რიუსელსჰაიმი, გერმანია) შეიმუშავა. ამ ავტომობილმა ძველი, ჯერაც პოპულარული „სონატა“ უნდა შეცვალოს და მისი სედანისძარიანი ვერსია ბაზარზე მოგვიანებით გამოჩნდება.

რა თქმა უნდა, i40 „ჰიუნდაის“ კორპორატიულ სტილშია შესრულებული, რომელიც „თხევადი სკულპტურის“ სახელითაა ცნობილი. მისი მთავარი ამოსაცნობი ნიშანი ექვსკუთხა რადიატორია, რომელიც შუაში ბამპერითაა გაყოფილი. სალონში კომფორტის გასაზრდელად, არაერთი ისეთი სისტემაა გამოყენებული, რომლებიც ჩვეულებრივ, პრემიუმ სეგმენტის ავტომობილებში გვხვდება. მაგალითად, წინა და უკანა სავარძლების, ასევე საჭის რგოლის გამათბობელი და საქარე შუშის დაორთქვლის საწინააღმდეგო აქტიური სისტემა, რომელიც თავად ხვდება, რომ შუშა დაორთქლილია და მაშინვე მის გამათბობელს რთავს.

i40 საწვავის ეკონომიური მოხმარებითაც გამოირჩევა. გამოფენაზე წარმოდგენილი ეგზემპლარი 1.7-ლიტრიანი დიზელითაა აღჭურვილი, რომლის კოდური სახელწოდებაცაა UII. პრემიერის მიუხედავად, „ჰიუნდაიმ“ ამ ავტომობილის ძრავების მახასიათებლების გამხელა ჯერ არ ისურვა. თუმცა, სიამაყით გამოაცხადა, რომ აღნიშნული აგრეგატი, ყოველი კილომეტრის გავლისას, ატმოსფეროში მხოლოდ 113 გრამ ნახშირორჟანგს გამოჰყოფს.

დაკიდევ, „ჰიუნდაი“ i40-ის მყიდველს ეგრეთ წოდებული ხუთწლიანი სამმაგი ზრუნვის საგარანტიო პაკეტს შესთავაზებს. სამი ზრუნვიდან ერთი ისაა, რომ გარანტიის პერიოდში, გავლილი მანძილი შეუზღუდავია; მეორე ამავე პერიოდში გზებზე დახმარებას ითვალისწინებს; მესამე კი ამავე პერიოდში უფასო ტექშემოწმებას გულისხმობს.

„ჰიუნდაი ელანტრა“ - გამოცემა „ავტოსპაის-ის“ წლის საუკეთესო ავტომობილია

HYUNDAI ELANTRA NAMED 2011 AUTOSPIES.COM CAR OF THE YEAR

24 თებერვალი

ინტერნეტში მსოფლიოს უდიდესი საავტომობილო მედია ქსელის, „ავტოსპაის-ის“ გამოკითხვამ, 2011 წლის საუკეთესო ავტომობილის წოდება „ჰიუნდაი ელანტრას“ მიანიჭა. გამოცემის რედაქტორთა შეფასებით, ახალი „ელანტრა“, თავისი ელეგანტური და სპორტული სტილით, თავისი კლასის ყველაზე გამორჩეული მოდელი გახდება.

„შეგვიძლია ვთქვათ, რომ „ჰიუნდაიმ“ კომპაქტური ავტომობილების სეგმენტი, ერთი ხელის მოსმით შეცვალა, როცა ბაზარზე მასებისთვის ხელმისაწვდომი კომპაქტური პრემიუმ ავტომობილი გამოუშვა“, - ამბობს „ავტოსპაის-ის“ დამფუძნებელი დონალდ ბუფამანტი.

ავტომობილს, რომლის საბაზო ღირებულებაც 14 830 დოლარია (სეგმენტში ერთ-ერთი ყველაზე დაბალი ფასია), თავის სეგმენტში ყველაზე უკეთ აღჭურვილი ინტერიერი აქვს. გარდა ამისა, მას ისიც გამოარჩევს, რომ მაგისტრალზე მოძრაობისას, 100 კილომეტრს 5.7 ლიტრი ბენზინით გადის. ეს კი ჰიბრიდული ავტომობილების ეკონომიურობის ტოლფასია.

„ინოვაციები, მომხმარებლის კმაყოფილების მაღალი დონე და დახვეწილი სტილი - ეს ის მახასიათებლებია, რომლებიც კომპაქტური კლასის ავტომობილებს იშვიათად ახასიათებს. „ელანტრას“ კი ეს თვისებები აქვს. ბაზარზე ამ მანქანის გამოჩენის შემდეგ, ავტომოყვარულებმა გააცნობიერეს, რომ ეკონომიური ავტომობილი ლუქსის კლასის შესაბამისად შეიძლება იყოს აღჭურვილი“, - ამბობს „ჰიუნდაი მოტორ ამერიკას“ მტავარი აღმასრულებელი ჯონ კრაფჩიკი.

„ჰიუნდაიმ“ ჰიბრიდული „სონატას“ მიწოდება დააყოვნა

Hyundai delays Sonata Hybrid deliveries

6 მარტი

„ჰიუნდაის“ ჰიბრიდულ „სონატას“ საავტომობილო ბაზარი მოუთმენლად ელის. კორეულ კომპანიას ამერიკელი დილერებისთვის მისი მიწოდება შარშან უნდა დაეწყო, თუმცა ამერიკაში მალე ჰიბრიდებთან და ელექტრომობილებთან დაკავშირებული ახალ სტანდარტებს შემოიღებენ, რის გამოც, იქ „სონატას“ დებიუტი გადაიდო.

საქმე ისაა, რომ შესაცვლელი გახდა მანქანის ხმოვანი სიგნალის სისტემა, რომელიც დაბალი სიჩქარით მოძრაობისას, შიდაწვის ძრავის ხმას გამოსცემს. ეს კი იმისთვისაა საჭირო, რომ ფეხით მოსიარულეების უსაფრთხოება იქნას დაცული - დაბალ სიჩქარეზე ჰიბრიდული „სონატა“ ელექტროძრავით გადაადგილდება და უხმაუროა. ამიტომ, ხმით მისი მოახლოების შეტყობა შეუძლებელია, რაც მოსიარულეების უსაფრთხოებას ამცირებს.

„ჰიუნდაის“ პრესმდივანი ჯიმ ტრეინორი ამბობს, ჰიბრიდული „სონატას“ მიწოდება იანვარში უნდა დაწყებულიყო. ამერიკაში რამდენიმე ათეული ავტომობილი გადაიტვირთა კიდეც, თუმცა ტრეინორი არ აზუსტებს, რამდენი. სამაგიეროდ დასძენს, რომ 700 ავტომობილი პორტშია და გემზე დატვირთვას ელოდება.

„ჰიუნდაიმ“ ჰიბრიდული „სონატას“ მიწოდება იმისთვის დააყოვნა, რომ შიდაწვის ვირტუალური ძრავის ხმის სისტემა გამოეცვალა. ამ სისტემის ძველი ვერსია სალონში, ცენტრალურ კონსოლზე არსებულ სპეციალურ ღილაკზე თითის დაჭერით ირთვება და ამავე ღილაკით ითიშება. ეს კი იმას ნიშნავს, რომ მისი ჩართვა მძღოლის სურვილზეა დამოკიდებული.

აშშ-ის პრეზიდენტმა ბარაკ ობამამ 4 იანვარს ხელი მოაწერა განკარგულებას, რომელიც ჰიბრიდულ ავტომობილებზე ისეთი სისტემების დაყენებას მოითხოვს, რომლებიც დაბალი სიჩქარით მოძრაობისას, მუდმივად გამოსცემს შიდაწვის ძრავის ხმას. ობამას განკარგულების შესასრულებლად, აშშ-ის მაგისტრალებზე მოძრაობის უსაფრთხოების ეროვნულმა ადმინისტრაციამ (NHTSA - ნეიშნლ ჰაიუეი ტრეფიკ სეიფტი ესოსიეიშნ), ახალი რეგლამენტის შემუშავება დაიწყო.

სწორედ ესაა იმის მიზეზი, რომ „ჰიუნდაიმ“ ამერიკაში ჰიბრიდული „სონატას“ მიწოდება შეაყოვნა. გადაწყდა, რომ ღილაკი მოიხსნას და ხმის სისტემამ დაბალი სიჩქარით მოძრაობისას, მუდმივად იმუშაოს.

„ჩვენ გავიგეთ, რომ მალე NHTSA ასეთი ღილაკების გამოყენებას აკრძალავს. ამიტომ, დავსვით ლოგიკური კითხვა - რატომ დავაყენოთ ეს მოწყობილობა იმისათვის, რომ მალე მოსახსნელი გაგვიხდეს?“ - ამბობს ტრეინორი.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

5 მარტი

ტოიოტა iQ EV და პრიუს+

ჯუჯა იაპონელი (iQ) უკვე საკმარისად პოპულარულია, მალე კი ბაზარზე მისი ელექტრული ვერსიაც გამოვა, თუმცაღა, მხოლოდ შეზღუდული რაოდენობით. „ტოიოტა“ ამ ავტომობილს ევროპის გზებზე ტესტირებას უკვე უტარებს, მისი მცირესერიული ვერსიის წარმოებას კი მერმისს შეუდგება.
ჯუჯა ელექტრომობილს მამოძრავებელ ძალას მცირე ელექტროძრავი ანიჭებს, რომლის მაქსიმალური სიმძლავრეც 64 ცხენის ძალაა. ის ენერგიას ლითიუმ-იონური ელემენტებისგან ღებულობს, რომელთა ტევადობა მხოლოდ 11 კილოვატსაათია. ეს კი საკმარისია იმისათვის, რომ ავტომობილმა 105 კილომეტრი გაიაროს. ელექტრული iQ-ს მაქსიმალური სიჩქარე 125.5 კმ/სთ-ია, ადგილიდან 100-ის ასაკრეფად კი მას 14 წამი სჭირდბა.

ნებისმიერ შემთხვევაში, ელექტრულ iQ-ს სატესტო ავტომობილის დანიშნულება აქვს და მისი მეშვეობით, „ტოიოტა“ ელექტრომობილების ბაზრის პერსპექტივის შესწავლას აპირებს. უფრო სწორედ, იაპონური კომპანიისთვის საინტერესოა, რამდენად მზადაა თანამედროვე ავტობაზარი ნულოვანი გამონაბოლქვის მქონე ავტომობილებისთვის.

რაც შეეხება კომპაქტვენ „პრიუსს“, რომელსაც „პრიუს პლიუსი“ უწოდეს, ის მთელ მსოფლიოში უკვე ძალიან პოპულარული ჰიბრიდული ჰეჩბეკის (პრიუსის) ბაზაზეა შექმნილი და რა თქმა უნდა, ჰიბრიდული სისტემაც მისგან აქვს მიღებული. ესაა ბენზინის 1.8-ლიტრიანი ძრავისა და ელექტროძრავის ტანდემი, რომლის ჯამური სიმძლავრეც 178 ცხენის ძალას შეადგენს. „ტოიოტა“ ირწმუნება, რომ ამ ავტომობილს ქალაქში 100 კილომეტრის გასავლელად 5.6 ლიტრი ბენზინი ჰყოფნის, შერეული ციკლით მოძრაობისას კი ხარჯი 5.8 ლიტრამდე იზრდება.

ჰეჩბეკ „პრიუსისგან“ კომპაქტვენი სალონის და საბარგულის გაზრდილი მოცულობით გამოირჩევა. მისი საბარგულის მოცულობა 970 ლიტრია, რაც ჰეჩბეკის საბარგულზე 50 პროცენტით მეტია. საბარგო სივრცე კიდევ უფრო იზრდება, როდესაც უკანა სავარძლები დაიკეცება.

შარშან ამერიკელებმა მანქანებით თითქმის 3 000 000 000 000 მილი გაიარეს

Americans racked up 3,000,000,000,000 miles traveled last year

5 მარტი

ამერიკა ბორბლებზე დგას - ეს ლეგენდარული გამოთქმა კარგად ახასიათებს ამერიკელთა ცხოვრების წესს. ამერიკელებს ავტომობილის გარეშე ცხოვრება არ შეუძლიათ. მანქანასთან ერთად არ იბადებიან, თორემ სხვა მხრივ, ავტომობილი მათთვის ლამის პირველადი მოხმარების საგანია. და ბუნებრივია, ისინი წლის განმავლობაში, თავიანთი ოთხბორბლიანი ტრანსპორტით, ასობით კილომეტრს გადიან.

აშშ-ის ტრანსპორტის დეპარტამენტი ყოველწლიურად ატარებს სტატისტიკურ აღრიცხვას, რომლის ერთ-ერთი პუნქტიც გვამცნობს, თუ რა მანძილი გაიარეს წლის განმავლობაში ამერიკელებმა. ირკვევა, რომ ამერიკის მოსახლეობას სულ 2.9 ტრილიონ მილზე (4.64 ტრილიონი კილომეტრი) მეტი აქვს გავლილი. ეს კი წინა წლის ანალოგიურ მაჩვენაბელზე დაახლოებით 7 პროცენტით (20.5 მილიარდი მილით) მეტია.

ამერიკის შტატებს შორის, ყველზე მეტი მოძრაობა ტექსასსა და კენტუკის შორისაა. აქ საერთო ჯამში, ავტომოგზაურებს 46.6 მილიარდი მილი აქვთ გავლილი. ეს კი წინა წლის ანალოგიურ მაჩვენაბელზე 1.4 პროცენტით მეტია. ავტოტრანსპორტის მოძრაობა სულ რაღაც 0.4 პროცენტით (214 მილიონი მილით) შემცირებულა დელავერსა და ფლორიდას შორის.

გავლილი მილების გაზრდის მიუხედავად, ამერიკაში ავტოკატასტროფების და ფატალური შედეგების რიცხვი შემცირებულია და ეს მაჩვენებელი 1950 წლის შემდეგ უდაბლესია. სპეციალისტები ვარაუდობენ, რომ საწვავის ფასის ზრდის გამო, ამერიკელები ავტომობილით წელს ნაკლებად იმგზავრებენ. თუმცა, ვინ იცის...

„ფერარი FF“ და „ლამბორგინი ავენტადორი“ - პრემიერამდე გაყიდულები

Ferrari FF and Lamborghini Aventador Both Sold Out

5 მარტი

ლამბორგინი ავენტადორი

..............................

ამ ორ ავტომობილს ავტოსამყარო მოუთმენლად ელოდა, მაგრამ როდესაც ჟენევის ავტო შოუზე ისინი პირველად ვიხილეთ, გაირკვა, რომ იტალიურ კომპანიებს ისინი უკვე გაყიდული აქვთ. უფრო სწორედ, „ფერარიმ“ თავისი სრულამძრავიანი FF და „ლამბორგინიმ“ თავისი უახლესი ფლაგმანი „ავენტადორი“ იმდენი გაყიდა, რამდენის წარმოებასაც წელს აპირებენ. გაყიდეს მანამ, სანამ შოურუმებში დააყენებდნენ.

ამ ორ ავტომობილს სრულიად განსხვავებული დანიშნულება აქვს, თუმცა ბევრი რამე მათ საერთოც აქვთ: ჯერ ერთი, ორივე იტალიურია, ორივე V12 აგრეგატითაა აღჭურვილი და მათ თითქმის ერთნაირი სიმძლავრეც აქვთ. თუმცა მთავარი მსგავსება ჟენევაში გამოვლინდა - ორივეზე, წარმოების პირველ წელს, გაყიდვების პაკეტი შევსებულია.

ფერარიმ FF

..............................

„ჩვენ უკვე 800 ცალი „ფერარი FF“ გავყიდეთ. წელს სწორედ ამდენის წარმოებას ვაპირებთ“, - ჟენევაში გამართულ პრესკონფერენციაზე ამაყად განაცხადა „ფერარის“ მთავარმა აღმასრულებელმა ლუკა კორდერო იდ მონტეძემოლომ.

მარანელოელთა ისტორიაში, „ფერარი FF“ პირველი სრულამძრავიანი ავტომობილია. მისი 6.3-ლიტრიანი V12 660 ცხენის ძალას ავითარებს. ამ „კუდმოჭრილი“ სუპერ ავტომობილის საბაზო ღირებულება 260 000 ევროა (დაახლოებით 360 000 დოლარი). რაც შეეხება „ავენტადორს“ ის 6.5-ლიტრიანი V12 ძრავითაა აღჭურვილი, რომელიც 700 ცხენის ძალას იძლევა. ამ ავტომობილის საბაზო ფასი 267 000 ევრო, დაახლოებით 370 000 დოლარია.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

4 მარტი

რენო R-სპეისი და კაპტური

როგორც ჩანს, ფრანგული კომპანია ახალი კორპორატიული სტილის შექმნის სტადიაშია. ყოველ შემთხვევაში, ამის თქმა შეიძლება მას შემდეგ, რაც „რენოს“ ჟენვურ კონცეპტუალურ მოდელებს ნახავთ. ქროსოვერი „კაპტური“ და კუპე „დეზირი“ ამის თვალსაჩინო მაგალითია. მათ კი ჟენევაშივე გვერდს კომპაქტვენი „R-სპეისი“ უმშვენებდა. როგორც ჩანს, რაღაც ამათ მსგავსი ოთხბორბალა მალე გამოჩნდება ევროპულ ბაზარზე და ეს რაღაც ალბათ ახალი „კლიო“ იქნება.
„R-სპეისი“ იმითაა გამორჩეული, რომ მას შუა საყრდენი არ აქვს, წინა და უკანა კარებები კი ერთმანეთის საპირისპიროდ იღება. რა თქმა უნდა, ეს იმისათვის გაკეთდა, რომ სალონში მოხვედრა გაადვილებულიყო, თუმცა ასეთი რამ სერიულ ავტომობილებზე რომ არ გადავა, ამაში ეჭვის შეტანაც არ ღირს.
კომპაქტვენი საკმაოდ პატარა, სამცილინდრიანი 0.9-ლიტრიანი ტურბოძრავით აღჭურვეს, რომელიც 110 ცხენის ძალას გამოიმუშავებს და „R-სპეისს“ ადგილიდან 100-მდე 11 წამში აჩქარებს. მაქსიმალური სიჩქარე კი 200 კმ/სთ-ს აღწევს. ბევრი არაფერი? მეტი არც სჭირდება - ის ხომ საოჯახო ავტომობილია. თანაც, შესანიშნავი ეკონომიურობით გამოირჩევა და გარემოსაც მინიმალურად აბინძურებს. კერძოდ: საშუალოდ 100 კილომეტრზე მხოლოდ 3.7 ლიტრ საწვავს მოიხმარს, ყოველი კილომეტრის გავლისას კი ატმოსფეროში მხოლოდ 95 გრამ ნახშირორჟანგს გამოჰყოფს. ანუ, უკვე შეესაბამება უმკაცრეს ევრო6 სტანდარტს, რომელიც ჯერ არ ამოქმედებულა.
ამაზე ოდნავ მეტს წვავს და გამოჰყოფს უგზოობის „კაპტურის“ ორტურბოიანი ძრავი. სამაგიეროდ, მას 160 ცხენის ძალის და 380 ნიუტონმეტრის მოცემა შეუძლია. მის დინამიკურ მონაცემებზე ფრანგული კომპანია სიტყვაძუნწობს. სამაგიეროდ, გვამცნობს, რომ „კაპტური“ ყოველი კილომეტრის გავლისას, ატმოსფეროს მხოლოდ 95 გრამ ნახშირორჟანგით აბინძურებს.

ამ კონცეპციის მიზანიც ახალი სტილის ძიების პროცესის ჩვენება იყო. „კაპტურიც“ უჩვეულო კარებებით გამოირჩევა. ოღონდ, „R-სპეისისგან“ განსხვავებით, მას მხოლოდ ორი კარი აქვს და ისინი ზევით, „ლამბორგინის“ სტილში ეღება.

ფრანგული კომპანიის მთავარი დიზაინერი ლორენს ფან დენ აკერი ამბობს, რომ „კაპტური“ სპორტული ქროსოვერია, რომელმაც ახალგაზრდა მყიდველის ყურადღება უნდა მიიქციოს. თუმცა, ამ სახით ის კონვეიერზე ვერ მოხვდება - სერიულ ვერსიას ადრენალინის „ზედმეტ“ დოზას აუცილებლად მოაშორებენ. და თუ ასე მოხდა, მაშინ ახალგაზრდა მყიდველი მას უკვე სხვა თვალით შეხედავს...

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

4 მარტი

სმარტ ფორსპიდ-ი

„დაიმლერის“ ჯუჯა ავტომობილების მწარმოებელი შტოს მოდელები მალე გარეგნობას შეიცვლიან და ამის მაუწყებელი პირველი მერცხალი კონცეპტუალური „ფორსპიდ-ია“, რომელიც „სმარტმა“ როდსტერის სახით წარმოგვიდგინა. ამასთან, ის ნულოვანი გამონაბოლქვის მქონე ძალური დანადგარით აღჭურვა.
რა თქმა უნდა, ამ პატარა ავტომობილს ტემპერამენტი არ გამოარჩევს (მისმა სახელმა არ მოგატყუოთ). თუმცა, მას ეს არც სჭირდება. ის ხომ იმისთვისაა შექმნილი, რომ მეგაპოლისების გადატვირთულ ქუჩებში ნაკლები ხარჯით გატაროთ. ეს კონცეპტუალური ეგზეპლარი კი ამას ისე გააკეთებს, რომ ატმოსფეროსაც არ დააბინძურებს.
ორადგილიანი ღია „ფორსპიდ-ი“ პატარა ელექტროძრავითაა აღჭურვილი, რომლის სიმძლავრეც მხოლოდ 40 ცხენის ძალაა. ის ავტომობილის უკანა ნაწილშია განლაგებული. ამ სიმძლავრეს რამდენიმე წამით კიდევ 7 ცხენის ძალა ემატება, როცა ცენტრალურ კონსოლზე განლაგებულ ღილაკს თითს დააჭერთ. ყველაფერი კი საკმარისია იმისათვის, რომ ავტომობილმა ადგილიდან 60 კმ/სთ სიჩქარე 5.5 წამში აკრიფოს, მისი მაქსიმალური სიჩქარე კი 120 კილომეტრია საათში. ეს მონაცემები მანქანის სახელს არ შეეფერება, თუმცა საქალაქო ჯუჯასთვის საკმარისია...

ელექტროძრავი ლითიუმ-იონური ელემენტების ბლოკისგან იკვებება, რომლის ტევადობაც 16.5 კილოვატსაათია. 80 პროცენტით მის შესავსებად, საათზე ნაკლებია საჭირო. აკუმულატორების ტევადობა კი საკმარისია იმისათვის, რომ ავტომობილმა ერთი სრული დამუხტვით 134 კილომეტრი გაიაროს.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

4 მარტი

ინფინიტი ეთერეა

კუპეც, ჰეჩბეკიც, უნივერსალიც და ქროსოვერიც - ეს ყველაფერი ერთ კონცეპტუალურ მოდელზე შეიძლება ითქვას, რომელიც ჟენევაში იაპონურმა „ინფინიტიმ“ წარმოადგინა. ასეა თუ ისე, ეს ავტომობილი „ინფინიტის“ პირველი გოლფ კლასის მოდელია. ამგვარად, ამ კლასის ინგოლშტადტურ (აუდი A3) და მიუნხენურ (პირველი სერიის ბეემვე) ლუქსებს ახალი კონკურენტი გამოუჩნდა.

რა თქმა უნდა, ეკოლოგიურად სუფთა აგრეგატების იგნორირება არც „ინფინიტის“ შეეძლო და მანაც „ეთერეა“ ჰიბრიდული სისტემით აღჭურვა, რომლის ძირითადი აგრეგატი ბენზინის ოთხცილინდრიანი 2.5-ლიტრიანი ტურბოძრავით აღიჭურვა, რომელიც 245 ცხენის ძალას იძლევა. მასთან უნისონში მუშაობს ელექტროძრავი და ვარიატორი. ენრგიის დაზოგვას ემსახურება მუხრუჭების კინეტიკური ენერგიის რეკუპერაციის სისტემა.

ავტომობილი დაკიდების დამოუკიდებელ სისტემაზე დგას, მისი მართვა კი ელექტრო/ჰიდრავლიკური სისტემის დახმარებით ხდება. „მავთულით მართვის“ სისტემის წყალობით, საჭის რგოლს ბორბლებთან მექანიკური კავშირი არ აქვს.

გარეგნულად, „ეთერეა“ უფრო კუპეს ტიპის ავტომობილია, ვიდრე ჰეჩბეკი, სედანი, ან ქროსოვერი. ამას მისი აგრესიული გარეგნობაც ადასტურებს. ყველაზე მეტად „დაკუნთული“ კი მისი წინა ნაწილია. ჰო, მანქანის წინა და უკანა კარებები ერთმანეთის საპირისპიროდ იღება, რითაც, სალონში მოხვედრა და იქიდან გადმოსვლა გამარტივებულია.

რა თქმა უნდა, „ეთერეა“ ამ სახით კონვეიერზე ვერ მოხვდება, თუმცა „ინფინიტი“ ადასტურებს, რომ C კლასის ავტომობილის წარმოებას დაიწყებს. დაკიდევ, ჟენევაში ნაჩვენები კონცეპტუალური ავტომობილის სტილი, მალე „ინფინიტის“ კორპორატიული სტილის სახეს მიიღებს.

ჟენევა 2011

ჟენევის ავტო შოუ - ყველაზე გრანდიოზული საავტომობილო ფორუმი

Geneva 2011

4 მარტი

ტატა პიქსელი

ინდური კომპანია მსოფლიოში უიაფესი ავტომობილითაა ცნობილი. მალე „ნანო“ ევროპის ბაზარსაც ეწვევა და ბუნებრივია, მას მარკეტინგული მხარდაჭერა ესაჭიროება. სწორედ ეს მისია დაეკისრა ჟენევაში წარმოდგენილ კონცეპტუალურ „პიქსელს“, რომელიც თავისი გარეგნობითაც გამოირჩევა და ტექნოლოგიებითაც.
რა თქმა უნდა, ავტომობილი პატარაა. სხვანაირად ვერც იქნებოდა, რადგან ის „ნანოს“ პლატფორმაზეა აგებული. მისი ყველაზე საინტერესო თვისება კი ისაა, რომ პრაქტიკულად ადგილზე მოტრიალება შეუძლია. ამას კი იმის წყალობით ახერხებს, რომ მოხვევისას, გარე რადიუსზე მყოფი ბორბარი მოძრაობის მიმართულებით ბრუნავს, შიდა რადიუსისა კი - საპირისპირო მიმართულებით.

პატარა ავტომობილი სამცილინდრიანი 1.2-ლიტრიანი ტურბოდიზელითაა აღჭურვილი, რომელთანაც უსაფეხური ვარიატორია შეწყვილებული. ძრავის მახასიათებლები არ გამოქვეყნებულა. სამაგიეროდ, ინდური კომპანია ირწმუნება, რომ სხვადასხვა მოწყობილობათა (მეთ შორის, სისტემა სტოპ-სტარტის) და შემცირებული წინააღმდეგობის მქონე საბურავების წყალობით, „პიქსელი“ 100 კილომეტრს 3.4 ლიტრი საწვავით გადის. ატმოსფეროში ყოველ კილომეტრზე გამობოლქვილი CO2-ის მასა კი მხოლოდ 89 გრამია.