„ტოიოტას“ დანაკარგი 500 000 ავტომობილს მიაღწევს

Toyota may lose 500,000 units of output post-quake, analyst says

14 აპრილი

როგორც ჩანს, „ტოიოტა“ წელს მსოფლიოს უდიდესი ავტომწარმოებლის სტატუსს ისევ „ჯენერალ მოტორსს“ ჩააბარებს - მიწისძვრითა და ცუნამით გამწვეული ნგრევების გამო, მისი არაერთი ქარზანა გაჩერებულია, ან მინიმალური დატვირთვით მუშაობს. წარმოების ტემპის შენელება კი ელექტროენერგიის და მაკომპლექტებელი ნაწილების დეფიციტის შედეგია. ამის გამო, იაპონური კომპანია წელს დააახლოებით ნახევარი მილიონით ნაკლებ ავტომობილს გამოუშვებს.

ანალიტიკურ კომპანია „ედვანსდ რისერჩ ჯაპანის“ სპეციალისტი კოძი ენდო ამბობს, რომ გასულ საფინანსო წელს, რომელიც 31 მარტს დასრულდა, „ტოიოტას“ საოპერაციო მოგება 100 მილიარდი იენით (დაახლოებით 1.2 მილიარდი დოლარით) შემცირდა, წელს კი დანაკარგი ორჯერ მეტი იქნება. თუმცა, ეს არაა საბოლოო რიცხვები - წლევანდელი მონაცემები კიდევ უფრო გაუარესდება, თუ ავტოინდუსტრიაში დასაქმებული კომპანიები, სრული დატვირთვით ამუშავებას სასწრაფოდ ვერ შეძლებენ.

საკუთრივ „ტოიოტას“ განცხადებით, 14-დან 26 მარტის ჩათვლით, კომპანიამ 140 000 ავტომობილი ვერ გამოუშვა, რისი მიზეზიც, მანქანის ელექტრონიკის ნაწილების, საბურავების და პლასტიკური ნაწილების სიმცირე გახდა. უკვე აღდგენილია მუშაობა ორ ქარხანაში, რომლებიც სამ მოდელს უშვებენ. პრიორიტეტულად მიჩნეულია ჰიბრიდული ავტომობილების წარმოება. სხვათა შორის, 24 მარტამდე კომპანიის 18-ვე ქარხანა გაჩერებული იყო. შარშან ამ ქარხნებში „ტოიოტამ“ სულ 3.28 მილიონი ავტომობილი აწარმოა.

ენდოს თქმით, აპრილში წარმოების ამოქმედება პრაქტიკულად შეუძლებელი იქნება, მაისში კი ქარხნები მცირე დატვირთვით თუ შეძლებენ მუშაობას. ჰიბრიდების მწარმოებელი ქარხნების ამოქმედება კი მხოლოდ იმის წყალობით მოხერხდა, რომ მათი მაკომპლექტებლების მიმწოდებლებმა მუშაობა მცირე დატვირთვით განაახლეს.

11 მარტის მიწისძვრამ მსოფლიოს მესამე უდიდესი ეკონომიკა დიდი ხნით გააჩერა, რისი მტავარი მიზეზიც ელექტროსადგურების ავარიული გამორთვა გახდა. ამ სადგურების უმეტესობა ჯერაც გაჩერებულია, მათგან ერთ-ერთი უდიდესი - ფუკუსიმას ატომური სადგური კი აღარასდროს ამოქმედდება. იაპონური საავტომობილო კომპანიები ინტენსიურად განიხილავენ ელექტროენერგიის რიგ-რიგობით მოხმარების შესაძლებლობას. თუ შეთანხმება შედგა, ისინი მორიგეობით შეძლებენ თავიანთი ქარხნების ამუავებას, თუმცა ამით ბაზარზე ახალი ავტომობილების დეფიციტის მხოლოდ ნაწილობრივ აღმოფხვრა თუ მოხერხდება.

სხვათა შორის, შედარებით მოქნილად მოქმედებს (რენოსთან ალიანსის წყალობით) მეორე უდიდესი იაპონური საავტომობილო კომპანია „ნისანი“, რომელმაც მაკომპლექტებლების ზოგი იაპონელი მიმწოდებელი უცხოელებით ჩაანაცვლა. და ამის მიუხედავად, „ნისანი“ აცხადებს, რომ მიწისძვრის შემდეგ, აპრილამდე დაახლოებით 55 000 ავტომობილით ნაკლები გამოუშვა.

ცნობისათვის, „ნისანს“ ძრავების კომპონენტების ქარხანა აქვს ფუკუშიმას პრეფექტურაში (ქალაქი ივაკი), რომლის ამოქმედებაც, რა თქმა უნდა, ვერ ხერხდება. მაგრამ კომპანიამ ამ კომპონენტების ამერიკაში შეძენა მოახერხა და ძრავების გამოშვებაც განაახლა. მალე კი ივაკის ქარხნის ამოქმედებასაც აპირებს.

მიწისძვრამ „ჰონდაც“ აზარალა. იაპონური კომპანია იძულებული გახდა, მაკომპლექტებლების ნაკლებობის გამო, თავის ამერიკულ ქარხნებშიც კი შეემცირებინა წარმოება. მიწისძვრის გამო, „ჰონდას“ იაპონიაში სამი ამწყობი ქარხანა აქვს გაჩერებული, რის შედეგადაც, მიწისძვრიდან 3 აპრილამდწ დაახლოებით 46 000 ავტომობილით ნაკლები გამოუშვა.

„ფიატმა“ შეიძლება „კრაისლერში თავისი წილი ისევ გაზარდოს

Fiat may raise Chrysler stake to 46% by June, sources say

14 აპრილი

„ფიატმა“ შეიძლება „კრაისლერში თავისი წილი ისევ გაზარდოს

სულ რამდენიმე დღე გავიდა მას შემდეგ, რაც „ფიატმა“ „კრაისლერში თავისი წილი 30 პროცენტამდე გაზარდა და საავტომობილო მედიაში უკვე გაისმა ხმები იმის შესახებ, რომ შესაძლოა, ტურინელებმა ამერიკულ კომპანიაში წილი 46 პროცენტამდე აიყვანონ. უფრო მეტიც, საქმეში ჩახედული ორი პიროვნება, რომლებმაც ვინაობის გამხელა არ ისურვეს, გამოცემა „ავტომოტივ ნიუს იუროპთან“ საუბრისას ირწმუნება, რომ წილის მორიგი ზრდა ივნისამდე მოხდება.

ამ ორი წყაროს ინფორმაციით, ამჟამად „ფიატი“ საერთაშორისო საინვესტიციო ბანკებთან მოლაპარაკებებს აწარმოებს, რისი მიზანიც, „კრაისლერის“ ვალების რეფინანსირებაა, რომლითაც ამერიკულმა კომპანიამ, აშშ-ის და კანადის მთავრობათა კრედიტები უნდა გაისტუმროს. უფრო ადრე, იტალიურმა „კორიერე დელა სერამ“ გაავრცელა ინფორმაცია, რომლის თანახმადაც, „ფიატი“ დამატებით „კრაისლერის“ აქციების 16 პროცენტის დაუფლებას ცდილობს, რისთვისაც ბანკების მხარდაჭერა სჭირდება.

„ეს რეალური გეგმაა, რომელზეც სერჯო მარკიონე მუშაობს. მას სურს, რომ „ფიატმა“ ივნისამდე მოასწროს დამატებითი აქციების შეძენა. თუმცა ალბათ, ამას გაცილებით ადრე შესძლებს“, - წერს იტალიური გაზეთი. ჯერჯერობით, ამაზე ტურინულ ავტოგიგანტს კომენტარი არ გაუკეთებია.

„ავტომოტივ ნიუს იუროპის“ იტალიელი წყაროები კი დასძენენ, რომ წილის გაზრდის ოპერაციის წარმატებულობა იმაზე იქნება დამოკიდებული, შეძლებს თუ არა მარკიონე ბანკების დაყოლიებას. სხვათა შორის, იტალიური წარმოშობის კანადელმა მარკიონემ, ვინც ერთდროულად, „ფიატის“ და „კრაისლერის“ მთავარი აღმასრულებელია, განაცხადა, რომ ამერიკულმა კომპანიამ კანადის და აშშ-ის მთავრობების ვალები სწორედ ივნისამდე უნდა დაფაროს. მანვე აღიარა, რომ „კრაისლერის“ აქციების საკონტროლო პაკეტის დაუფლებას „ფიატი“ შარშან გეგმავდა, მაგრამ ეს ვერ მოხერხდა.

ამჟამად „კრაისლერი“ აქციონირებისთვის ემზადება. არსებობს კანადის და აშშ-ის მთავრობებისადმი დავალიანების გარკვული ზღვარი (4 მილიარდი დოლარი), რომლის შემცირების შემთხვევაშიც, „ფიატს“ „კრაისლერში თავისი წილის გაზრდის საშუალება მიეცემა. და, აქციონირებიდან მიღებული თანხის ნაწილი სწორედ ამ ვალის შესამცირებლად დაიხარჯება.

ამჟამად „კრაისლერს“ ამერიკის და კანადის მთავრობებისადმი 7.4 მილიარდი დოლარის დავალიანება აქვს. ეს ფული იმ კრედიტის ნაწილია, რომელიც ამერიკულმა კომპანიამ მათგან ორი წლის წინ ისესხა, როდესაც მართვადი გაკოტრების რეჟიმში მუშაობდა. სწორედ მაშინ გაფორმდა ხელშეკრულება „ფიატთან“, რომელმაც „კრაისლერის“ აქციების 20 პროცენტი მიიღო.

ზემოთ ნახსენები 16 პროცენტის შეძენის შემდეგ, „ფიატს“ კიდევ აქვს „კრაისლერში“ თავისი წილის შემდგომი ზრდის საშუალება. ოღონდ, ამის უფლებას 2013 წლიდან მიიღებს. ამ ოპციის გამოყენების საშუალება ტურინელებს სამი წლის განმავლობაში ექნებათ. მათ შეიძლება დამატებით 16 პროცენტის შეძენა აღარც ისურვონ და თავიანთი წილის 51 პროცენტამდე გაზრდით დაკმაყოფილდნენ. ანუ, კიდევ 5 პროცენტის შეძენა მოუწევთ. ოღონდ, მანამდე „კრაისლერის“ ვალები სრულად უნდა დაფარონ.

„ჰიუნდაი ველოსტერი“ 208-ცხენისძალიანი ტურბო ძრავით

Hyundai Veloster Turbo to produce 208 horsepower

14 აპრილი

ჯერ დეტროიტის, შემდეგ კი ჟენევის ავტო შოუებზე, „ჰიუნდაიმ“ თავისი სრულიად ახალი ავტომობილი - სამკარიანი კუპე „ველოსტერი“ წარადგინა. ავტომობილმა სპეციალისტების და დამთვალიერებელთა დიდი მოწონება დაიმსახურა. თუმცა მაშინვე ყველამ აღნიშნა, რომ ატმოსფერული 1.6-ლიტრიანი GDI (გაზოლაინ დაირექტ ინჯექშნ - ბენზინის უშუალო შეფრქვევა) აგრეგატით ამ მანქანას, „ფოლკსვაგენ შიროკოს“ 2.0-ლიტრიანი TSI ძრავით აღჭურვილ ვერსიასთან და „მინი კუპერ JWC-სთან” კონკურენცია გაუჭირდება.

იმთავითვე გავრცელდა ინფორმაცია იმის შესახებ, რომ მალე კორეული კომპანია „ველოსტერს“ ამ ძრავის ტურბოკომპრესორიანი ვერსიითაც აღჭურვავდა. არ გასულა დიდი ხანი და ეს ინფორმაცია ოფიციალურად დადასტურდა - „ჰიუნდაი“ ნიუ იორკის ავტო შოუზე 1.6-ლიტრიანი T-GDI (ტურბოკომპრესორიანი) ძრავით აღჭურვილ „ველოსტერს“ გამოფენს.

რა ტქმა უნდა, ეს ძრავი ატმოსფერული ანალოგის ბაზაზეა შექმნილი, ოღონდ, ტურბოკომპრესორი აქვს დამატებული. ეს კი საკმარისი გამოდგა იმისათვის, რომ მისი სიმძლავრე 138-დან 208 ცხენის ძალამდე გაზრდილიყო. ძრავი მაქსიმალურ სიმძლავრეს მუხლა ლილვის 6 000 ბრ/წთ-ზე ავითარებს, მისი მაქსიმალური მაბრუნი მომენტი კი, ბრუნთა რიცხვის დიდ დიაპაზონში (1 600-5 000 ბრ/წთ) 264 ნიუტონმეტრს აღწევს.

ძრავის ამ მონაცემებით, „ველოსტერს“ დაახლოებით ისეთივე დინამიკური მახასიათებლები ექნება, როგორიც „ფოლკსვაგენ გოლფ GTI-ს“ აქვს. მართალია, „ველოსტერის“ მაბრუნი მომენტი 16 ნიუტონმეტრით ნაკლებია, მაგრამ სამაგიეროდ, ის 188 კილოგრამით ნაკლებსაც (1172 კილოგრამს) იწონის. ნიუ იორკის გამოფენამდე, „ჰიუნდაი“ ტურბოძრავიანი „ველოსტერის“ დინამიკურ მახასიათებლებს არ აქვეყნებს. სავარაუდოდ, 0-100 კმ/სთ-მდე ასაჩქარებლად, მას 7 წამი დასჭირდება.

ასეთი ძრავით აღჭურვილი „ველოსტერი“ ბაზარზე მერმისს გამოჩნდება. შემდეგ კი იგივე ძრავს, კორეული კომპანია უგზოობის „ჰიუნდაი ix30-ზე“ და ნათესავი „კია-ს“ „სიი’დ-ზე“ დააყენებს.

დაბოლოს, საქართველოში „ჰიუნდაის“ წარმომადგენელი, კომპანია „ჰიუნდაი ავტო ჯორჯია“ კუპე „ველოსტერის“ პირველ ეგზემპლარს სავარაუდოდ, ზაფხულში შემოიყვანს, მასზე შეკვეთების მიღებას კი მოგვიანებით შეუდგება.

ელექტრული „ფორდ ტრანზიტ კონექტის“ დებიუტი ბირმინგემში

Ford Transit Connect Electric

13 აპრილი

„ფორდი“ ინტენსიურად მუშაობს ელექტრომობილებზე და ცდილობს, იმ დროისთვის, როდესაც განვითარებული ქვეყნების უმეტესობას, ასეთი ავტომობილებისთვის აუცილებელი ინფრასტრუქტურა ექნება, ბაზარზე ელექტრული ძრავებით აღჭურვილი რამდენიმე მოდელი გამოუშვას. ამასთან, დირბორნელები თავიანთ ელექტრიფიკაციის პროგრამას ერთდროულად რამდენიმე მიმართულებით ავითარებენ. ესაა როგორც ჩვეულებრივი ჰეჩბეკები, ასევე კომერციული ავტომობილები, როგორიცაა მთელს მსოფლიოში მეტად პოპულარული „ტრანზიტი“.

ელეტრომობილების შემუშავების საქმეში, „ფორდს“ პარტნიორობას მიჩიგანური (აშშ) კომპანია „აზურ დაინემიქს კორპორეიშნი“ უწევს, რომელსაც წელსვე 600-1000 ცალი ელექტრული „ტრანზიტის“ გამოშვება აქვს დაგეგმილი. და სანამ ეს ავტომობილი ბაზარზე რეალურად გამოჩნდება, პარტნიორებმა ის ბირმინგემის კომერციული ავტომობილების საერთაშორისო შოუზე გამოფინეს, მალე კი ამ ავტომობილის ევროპის ბაზარზეც გამოიტანენ.

ელექტრული „ტრანზიტ კონექტის“ გარდა, „ფორდი“ და „აზური“ კიდევ ოთხ ელექტრომობილს ამზადებენ, რომლებსაც ბაზარზე 2013 წლამდე გამოუშვებენ. მწარმოებლების განცხადებით, ავტომობილის სვლის სიშორე ერთ სრულ დამუხტვაზე 130 კილომეტრია, რაც სრულიად საკმარისია დიდ ქალაქებში მომუშავე იმ კომპანიებისთვის, რომლებიც მცირე მოცულობით ტვირთების გადაზიდვით არიან დაკავებული.

ელექტრული ფურგონი „ტრანზიტ კონექტი“, ამავე სახელწოდების ავტომობილის გრძელბაზიან ვერსიაზეა ბაზირებული. ფურგონზე ელექტრული აგრეგატები „აზურ დაინემიქსის“ სპეციალისტებმა დააყენეს და თავიდან ამ ავტომობილს სწორედ ეს კომპანია გამოუშვებს. ავტომობილი აღჭურვილია კომპანია „ჯონსონ კონტროლზის“ მიერ მომზადებული ლითიუმ-იონური ელემენტების ბლოკით, რომლის ტევადობაც 28 კილოვატსაათია.

ელექტრული დანადგარის მონაცემები საკმარისია იმისათვის, რომ ავტომობილმა მაქსიმუმ 120 კმ/სთ სიჩქარე განავითაროს (მეტი არც სჭირდება), მისი სვლის სიშორე კი 130 კილომეტრია. თუმცა, ელემენტების ბლოკის დახვეწის შედეგად, სვლის სიშორის გაზრდაც შესაძლებელია. აკუმულატორების ბლოკის დამუხტვა, სტანდარტული საყოფაცხოვრებო ქსელიდან შეიძლება. სრული დამუხტვისთვის საჭირო დრო კი 8 საათია.

რაც შეეხება დანარჩენ ელექტრულ ავტომობილებს, რომლებსაც 2013 წლამდე გამოუშვებს, ესენია ელექტრული ჰეჩბეკი „ფოკუსი“, ჰიბრიდული „C-მაქსი“, პლაგ-ინ ჰიბრიდული „C-მაქს ენერჯი“ და კიდევ ერთი მოდელი, რომლის სახელიც ჯერჯერობით უცნობია.

„ბენტლი ტურბო R“ ბრუნდბა

Bentley Turbo R Is Coming Back

12 აპრილი

ათ წელზე მეტია, „ბენტლი“ არ აწარმოებს თავის ერთ-ერთ ყველაზე ცნობილ კუპე „ტურბო R-ს“, მაგრამ როგორც ჩანს, მალე ეს ავტომობილი ბრიტანული კომპანიის საწარმოო პროგრამას დაუბრუნდება. და თუ ბრიტანულ გამოცემა „ავტო ექსპრესს“ დავუჯერებთ, დაბრუნების შემდეგ, ის ლუქსის კლასის სუპერ კუპე გახდენა. ლუქსის კლასის სუპერი იმიტომ, რომ ის ლუქს-სედან „მულსანის“ (ფოტოზე) ბაზაზე აიგება.

„ბენტლიმ“ სედანი „მულსანი“ საზოგადოებას 2009 წელს წარუდგინა და მაშინვე მის ბაზაზე კუპეს მომზადებას შეუდგა. მაგრამ სახელოვანი მოდელის დაბრუნება გლობალური ფინანსური კრიზისის გამო შეფერხდა. თუმცა კრიზისმა ჩაიარა და პროექტიც თაროდან ჩამოიღეს.

ცნობისათვის, „ბენტლის“ გამაში კუპე „ტურბო R“ 1985-1994 წლებში ფიგურირებდა. ის „მულსან ტურბოს“ ბაზაზე მზადდებოდა. იმ დროს „ბენტლი“ და „როლს“ როისი“ ერთი კომპანია იყო. შესაბამისად, „ტურბო R“ „როლსის“ V8 ძრავით იყო აღჭურვილი, რომელიც 350 ცხენის ძალას იძლეოდა.

მართალია, თავად „ბენტლი“, რომელიც „ფოლკსვაგენის“ დიდი ქოლგის ქვეშაა გაერთიანებული, ჯერ ოფიციალურად არ ადასტურებს „ტურბო R-ის“ წარმოების დაწყებას, მაგრამ ინტერნეტით გავრცელდა ინფორმაცია იმის შესახებ, რომ ამ ავტომობილის კონვეიერზე დაყენების შემთხვევაში, ის სწორედ ახალი „მულსანის“ აგრეგატით აღიჭურვება. ესაა 6.75-ლიტრიანი V8, რომელიც სტანდარტული შესრულებით 510 ცხენის ძალას იძლევა. მაგრამ ეს აგრეგატი 600 ცხენის ძალამდ გაძლიერდება და სწორედ მისი გაძლიერებული ვერსიით აღიჭურვება „ტურბო R“.

რამდენადაც კუპე უნდა იყოს, „ტურბო R-ს“ ორი კარი ექნება. წინიდან ის „მულსანის“ ანალოგიური უნდა იყოს თავისი დიდრონი ფარებით, ზორბა რადიატორითა და თავისებური ფრთებით. მაგრამ უკანა ნაწილი მას განსხვავებული უნდა ჰქონდეს და სავარაუდოდ, დიზაინის ელემენტებს „ბრუკლენდსისგან“ ისესხებს.

აღსანიშნავია, რომ 2015 წელს „ბენტლი“ თავისი მოდელების განახლებას დაიწყებს და საწარმოო პროგრამასაც გააფართოებს. რაც მთავარია, „ფოლკსვაგენი“ ბრიტანულ კომპანიას თავისი ჯგუფის ახალ წევრთან - „პორშესთან“ მიამაგრებს, რისი წყალობითაც, „ბენტლის“ ავტომობილები ბევრ ტექნიკურ ელემენტს „პორშესგან“ მიიღებენ.

განახლების შემდეგ, ერთ-ერთი ახალი მოდელი, რომელიც ბაზარზე გამოჩნდება, უნდა იყოს „კონტინენტალ GT-ს“ ბაზაზე შექმნილი ხუთკარიანი კუპე, რომელიც, გავრცელებული ინფორმაციით, პლატფორმას მეორე თაობის „პორშე პანამერასგან“ გაიზიარებს. უფრო მეტიც, ინგლისური კოპანიის ხელმძღვანელობა ასევე სრულამძრავიანი ქროსოვერის წარმოების მიზანშეწონილობასაც განიხილავს.

„შევროლე მირეი“ - სეულის გამოფენის საუკეთესო კონცეპტუალური ავტომობილი
Chevrolet Miray Named Best Concept Car at 2011 Seoul Motor Show
12 აპრილი
სეულის საავტომობილო შოუს ორგანიზატორებმა, შოუს დამსწრე ჟურნალისტებს შორის ჩაატარეს გამოკითხვა, რომლის შედეგადაც, გამოფენის საუკეთესო კონცეპტუალური, ეკოლოგიური და სერიული ავტომობილები გამოვლინდა. ჟურნალისტების აზრით, საუკეთესო კონცეპტუალური ავტომობილი „შევროლე მირეია“, ავტომობილი, რომელიც „ჯენერალ მოტორსის“ სეულის სტუდიაში მომზადდა.
„ეს აღიარება ჩვენთვის მით უფრო მნიშვნელოვანია, რომ ის „შევროლეს“ მიერ კორეაში პირველად წარდგენილმა კონცეპტუალურმა ავტომობილმა დაიმსახურა. ამ ავტომობილში ჩვენი მარკის მომავლის ხედვა და იდეებია ასახული. „შევროლე“ მომავალშიც გააგრძელებს ინოვაციური დიზაინის და ტექნოლოგიების კორეაში დანერგვას“, - ამბობს „ჯენერალ მოტორს კორეას“ პრეზიდენტი და მთავარი აღმასრულებელი მაიკ არკამონე.
კონცეპტუალური ავტომობილის სახელი - „მირეი“, კორეულად მომავალს ნიშნავს და ის „შევროლეს“ დაარსებიდან 100 წლის იუბილეს მიეძღვნა. ავტომობილის სპორტული როდსტერის გარეგნობა აქვს და ჰიბრიდული დანადგარითაა აღჭურვილი, რომელშიც შიდაწვის ძრავა და ორი პატარა ელექტროძრავი შედის.
1.5-ლიტრიანი შიდაწვის ძრავი ბაზაშია განლაგებული და ის უკანა ბორბლებს ატრიალებს. სეულის გამოფენაზე მისი მონაცემები არ გამოქვეყნებულა. რაც შეეხება ელექტროძრავებს, თითოეულის სიმძლავრე სულ რაღაც 20 ცხენის ძალაა და ისინი წინა ღერძს ემსახურება. ამგვარად, ავტომობილი სრულამძრავიანი გამოდის. ჰიბრიდულ დანადგარში ასევე შედის 1.6-კილოვატსაათიანი ლითიუმ-იონური ელემენტების ბლოკი, რომელიც შევსებას ავტომობილის მოძრაობისას, მუხრუჭებისგან ღებულობს.
„კორეულად მირეი მომავალს ნიშნავს. ჩვენი კონცეპტუალური ავტომობილი მომავლის შესაძლებლობათა შესწავლისთვის განკუთვნილი ეგზემპლარია. მან მანქანასა და მძღოლს შორის კავშირი უნდა გაამყაროს. მისი მეშვეობით, გთავაზობთ ჩვენს ნააზრევს იმაზე, თუ როგორი შეიძლება იყოს მომავლის სპორტული ავტომობილი“, - „მირეის“ პრეზენტაციისას განაცხადა არკამონემ.

საუკუნოვანი ბრენდის კონცეპტუალური „მომავალი“

Chevrolet Mi-ray Roadster Concept Revealed in Korea

11 აპრილი

„ჯენერალ მოტორსის“ ყველაზე მასობრივ ბრენდ „შევროლეს“ წელს 100 წელი უსრულდება და ამ მოვლენას, კომპანიის კორეულმა შტომ, კერძოდ კი „ჯენერალ მოტორსის“ მოწინავე დიზაინის სეულის სტუდიამ, სპეციალური კონცეპტუალური როდსტერი მიუძღვნა, რომელიც სეულის ავტო შოუზე წარადგინა. ავტომობილს „მირეი“ უწოდეს, რაც თურმე კორეულად მომავალს ნიშნავს.

ავტომობილის შემქმნელებმა, შთაგონების წყაროდ, 1963 წლის „შევროლე მონცა SS-ის“ და 1962 წლის „შევროლე კორვერ სუპერ სპაიდერი“ გამოიყენეს. ამასთან, დიზაინერებმა ძარის ზოგიერთი დეტალის ფორმები თანამედროვე საბრძოლო რეაქტიული თვითმფრინავებისგანაც ისესხეს. მთლიანობაში კი „მირეი“ გამოფენაზე საკმაოდ აგრესიული და დინამიური იერით წარსდგა.

„შევროლე მირეის“ გაბარიტებია: სიგრძე 3991 მილიმეტრი, სიგანე 1865 მილიმეტრი, სიმაღლე 1100 მილიმეტრი და ბორბლებს შორის ბაზა - 2375 მილიმეტრი. ავტომობილის ბაზისად აღებულია ალუმინისგან დამზადებული შასი, რომელზეც კარბონის კომპოზიტისგან დამზადებული ძარის პანელები მაგრდება. ალუმინი და კარბონის კომპოზიტია ასევე გამოყენებული ბორბლებში, რომლებსაც ტურბინის ფორმა აქვთ. ამასთან, წინა ბორბლები 20-დუიმიანია, უკანები კი - 21-დუიმიანი.

სალონი კოკპიტის ტიპისაა და ამ ეფექტს მაღალი ცენტრალური კონსოლი ქმნის, რომელიც მას ორ ნაწილად ჰყოფს. საჭის რგოლი და ძრავის ჩამრთველი ღილაკიც რეაქტიული თვითმფრინავის სტილშია შესრულებული. სალონს შემხვედრი ჰაერისგან გადაჭრილი საქარე შუშა იცავს, რომელიც კარებზე გადადის. ესენი კი უჩვეულოდ - წინ და ზევით იხსნება.

რაც შეეხება აღჭურვილობას, მას „შევროლეს“ სპეციალისტებმა შუა-ელექტრული უწოდეს. ეს კი იმას ნიშნავს, რომ ავტომობილის ბაზაშია განლაგებული შიდაწვის ძრავი. ესაა ბენზინის 1.5-ლიტრიანი ტურბოაგრეგატი, რომლის მიერ გამომუშავებული მაბრუნი მომენტიც, ორდისკოიანი ქუროსა და რობოტიზებული კოლოფის გავლით, უკანა ბორბლებს მიეწოდება. ამ ძრავის მონაცემები უცნობია.

სამაგიეროდ, მასთან ერთად, ავტომობილი კიდევ ორი, ოღონდ, ელექტრული ძრავითაა აღჭურვილი. ესენი წინა ღერძზეა მოთავსებული და თითოეული 20 ცხენის ძალას იძლევა. ელექტროძრავები ენერგიას ლითიუმ-იონური ელემენტების ბლოკისგან ღებულობენ, რომლის ტევადობაც სულ რაღაც 1.6 კილოვატსაათია. ეს ბლოკი სავარძლების უკან, ძირზეა მოთავსებული. გარდა ამისა, ავტომობილის ჰიბრიდულ ძალურ დანადგარში ასევე შედის სისტემა სტოპ-სტარტი და მუხრუჭების ენერგიის რეკუპერაციის სისტემა. „მირეის“ ქალაქში მხოლოდ ელექტროძრავებით გადაადგილებაც შეუძლია, თუმცა „შევროლე“ არ აკონკრეტებს, თუ რამდენია ამ შემთხვევაში სვლის სიშორე.

„შევროლე“ კონცეპტუალური როდსტერის არც დინამიკურ მონაცემებს აქვეყნებს. სამაგიეროდ, სიამაყით გვამცნობს ამ ავტომობილის მოკრძალებული აპეტიტის შესახებ. კერძოდ, „მირეის“ ქალაქში 100 კილომეტრის გავლა სულ რაღაც 3.92 ლიტრი ბენზინით შეუძლია, ტრასაზე კი ხარჯი 3.7 ლიტრამდე მცირდება.

თქმა არ უნდა - „შევროლეს“ მართლა კარგი „მომავალი“ შეუქმნია, თუმცა დღევანდელი ტენდენციით, მომავალი ელექტრომობილებისაა...

„სუიტეკ-პორშე 962 C“ - 80-იანი წლების ლეგენდა სამოქალაქო ფორმაში

Switec-Porsche 962 C Can Be Driven on the Road

11 აპრილი

გასული საუკუნის 80-იან წლებში, ლე მანის 24-საათიან რბოლებში „პორშეს“ სპორტული პროტოტიპი 962 C ბატონობდა. ამ ავტომობილზე მაშინ შეიძლება ბევრი ოცნებობდა, მაგრამ ცუფენჰაუზენელებს მისი საგზაო ვერსია არ დაუმზადებიათ. უსაფრთხოების ნორმები კი სარბოლი მონსტრის გაყიდვებს შეუძლებელს ხდიდა. მაგრამ გამოჩნდა კომპანია, რომელმაც სარბოლი პროტოტიპი საგზაო ნორმებს შეუსაბამა და ის მდიდარი ავტოგურმანებისთვის ხელმისაწვდმი გახადა. ეს კომპანია ახალ ზელანდიაში მუშაობს და მას „სუიტეკი“ ჰქვია.

ამ კომპანიის დამაარსებელია ფორმულა 1-ის შვეიცარულ გუნდ „ზაუბერის“ ყოფილი მთავარი ინჟინერი ერნესტ შლაპფერი, რომელმაც სარბოლი 962-ის ბაზაზე, საგზაო ავტომობილის დამზადებას ოთხი წელი (2001-2005) მოანდომა. როგორც თავად ამბობს, ერთი ეგზემპლარის დამზადება 2 მილიონი ამერიკული დოლარი დაუჯდა.

ცნობისათვის, თავის დროზე, C ჯგუფის სპორტულ პროტოტიპ „პორშე 962-ის“ საჭეს ისეთი ლეგენდარული პილოტები მართავდნენ, როგორებიც არიან ბრიტანელი დერეკ ბელი (ლე მანის ხუთგზის გამარჯვებული), გერმანელი ჰანს-იოახიმ შტუკი (ლე მანის ორგზის გამარჯვებული), გერმანელი იოხენ მასი (ლე მანის ერთგზის გამარჯვებული), ასევე ამერიკელი მამა-შვილი - მარიო (ფორმულა 1-ის და ინდიქარის თითო გზის ჩემპიონი, ინდი 500-ის ერთგზის გამარჯვებული) და მაიკლ ანდრეტი (ინდიქარის ერთგზის ჩემპიონი).

შლაპფერმა საგზაო 962-ის ბაზისად სერია IMSA-ს სპეციფიკაციის ალუმუნის შასიზე ბაზირებული სარბოლი ავტომობილი გამოიყენა. გამოცდილმა ინჟინერმა, ის კარბონის კომპოზიტით გააძლიერა, სალონი კი ძვირფასი ტყავით გააწყო. სარბოლი სტილის სავარძლები ექვსწერტილოვანი ღვედებით აღჭურვა, სალონში კი ადგილი ჰაერის კონდიციონერისთვისაც გამონახა. საჭის რგოლი მოსახსნელია, იტალიურ კომპანია „მომოს“ წარმოებისა.

„სუიტეკ 962“ მამოძრავებელ ძალას 3.6-ლიტრიანი ოპოზიტური (H6) 6-ცილინდრიანი ძრავისგან ღებულობს, რომელიც წყვილი ტურბოკომპრესორითაა აღჭურვილი, რომელიც 580 ცხენის ძალას იძლევა. მაბრუნი მომენტი წამყვან უკანა ბორბლებს 5-საფეხურიანი ტრანსმისიის გავლით გადაეცემა. ამ მახასიათებლებით, დღეს ვერავის გააკვირვებ, თუმცა აქ ისიც უნდა გავითვალისწინოთ, რომ ავტომობილი მხოლოდ 830 კილოგრამს იწონის. ეს კი ნიშნავს, რომ ეს მანქანა ახალბედებისთვის ძალიან საშიში სათამაშოა.

ეს ფორმულა 1-ის და ლე მანის სერიის ყოფილმა პილოტმა, სლიმ ბორგუდმა დაადასტურა, რომელმაც „სუიტეკ 962“ გამოსცადა და მისი შესაძლებლობებით აღფრთოვანებული დარჩა.

ელექტრული „კია ნაიმოს“ პრემიერა სეულში

Kia Naimo Electric Concept Car Debuts in Seoul

11 აპრილი

„ნაიმო“ კორეულად გამოითქმის, როგორც „ნეჰ-მო“ და კორეულსავე ენაზე, ოთხკუთხა მოყვანილობას აღნიშნავს. სწორედ ეს სახელი შეარჩია კორეულმა კომპანია „კიამ“ თავისი კონცეპტუალური სუბკომპაქტური ელექტრული ქროსოვერისთვის, რომლის პრემიერაც სეულის საავტომობილო გამოფენაზე ჩატარდა.
ამ პატარა ავტომობილის სიგრძე სულ რაღაც, 3.89 მეტრია. სამაგიეროდ, მას საკმაოდ გრძელი ბაზა (2.65 მეტრი) აქვს, რამაც „კიას“ დიზაინერებს დიდი მოცულობის, კომფორტული სალონის შემუშავების საშუალება მისცა. კომპანიის წარმომადგენლების განცხადებით, „ნაიმოს“ ინტერიერში საკმარისზე მეტი სივრცეა მასში მსხდომების თავების, მხრებისა და ფეხებისთვის. ამასთან, ავრომობილს არ აქვს შუა საყრდენები, მისი წინა და უკანა კარები კი ერთმანეთის საპირისპიროდ იღება, რაც სალონში შესვლასა და იქიდან გადმოსვლას აადვილებს.
რა შეიძლება ითქვას „ნაიმოს“ გარეგნობაზე: პირველ რიგში ის, რომ ის რაღაცით კონცეპტუალურ KV7-ს მოგვაგონებს, ავტომობილს, რომელიც „კიამ“ დეტროიტის ავტო შოუზე გვიჩვენა. როგორც ჩანს, კორეული კომპანია ახალი კორპორატიული სტილის შემუშავების პროცესშია. ამასთან, ისიც უნდა ითქვას, რომ ეს სტილი ჯერ დახვეწილი არაა. „ნაიმოს“ ასევე გამოარჩევს წინა შავი საყრდენები, ასიმეტრიული გამჭვირვალე სახურავი, მინიატურული ვიდეოკამერები, რომლებითაც სარკეებია შეცვლილი და მთლიანად თხევადკრისტალური ფარები. მოკლედ, სახეზეა აშკარად მომავლის ავტომობილი.

„კია ნაიმოს“ არ აქვს საქარე შუშის საწმენდები. მათს მოვალეობას ჰაერის ჭავლის გამტყორცნი ასრულებს, რომლებიც საქარე შუშის გასწვრივაა მიმართული და მათზე წყლის წვეთების დარჩენას უშლის ხელს. საბარგულის კარსაც უჩვეულო კონსტრუქცია აქვს - ის სამ ნაწილადაა გაყოფილი. მათგან ერთი ზევით იხსნება, ორი კი - გვერდებზე.

ახლა კი აგრეგატებზეც: ავტომობილი აღჭურვილია ელექტროძრავით, რომლის მაქსიმალური სიმძლავრეც 109 ცხენის ძალა, მაქსიმალური მაბრუნი მომენტი კი 280 ნიუტონმეტრია. მისი დახმარებით, ავტომობილის მაქსიმალური სიჩქარე 150 კმ/სთ-ს აღწევს. ლითიუმ-იონური ელემენტების ბლოკი ორი პაკეტისგან შედგება და მათი ჯამური ტევადობა 27 კილოვატსაათია. ისინი საბარგულის ძირზეა მოთავსებული. „კიას“ მონაცემებით, ამ აკუმულატორების სრული დამუხტვა საკმარისია იმისათვის, რომ ავტომობილმა 200 კილომეტრი გაიაროს.

„კია“ აცხადებს, რომ „ნაიმო“ შეუერთდება იმ საცდელ ავტომობილებს, რომლებიც სხვადასხვა კონდიციებში გაივლიან ტესტირებას. ამ ტესტების მიზანი კი ჰიბრიდული, ელექტრული და ფიჭური ელემენტებით აღჭურვილი ავტომობილების სრულყოფაა. შემდეგ კი, მათში გამოყენებული ტექნოლოგიები სერიულ წარმოებაში დაინერგება.

„ჰიუნდაი“ ამერიკაში გაყიდვების რეკორდებს აუმჯობესებს

Kia, Hyundai set monthly, quarterly sales records

10 აპრილი

სამხრეთკორეულ სავტომობილო გიგანტ „ჰიუნდაის“ და მასში შემავალი კიდევ ერთი კორეული საავტომობილო მარკის, „კიას“ ამერიკული გაყიდვები მარტში მნიშვნელოვნადაა გაზრდილი. იმდენად, რომ გაყიდვების ყოველთვიური და კვარტალური რეკორდები მოხსნა.

საკუთრივ „ჰიუნდაის“ მარტის გაყიდვები, შარშანდელი ანალოგიური პერიოდის გაყიდვებთან შედარებით, 32 პროცენტითაა გაზრდილი. უფრო კონკრეტულად, ერთ თვეში, მარტო ამერიკის ბაზარზე, კორეულმა კომპანიამ 61 873 ავტომობილი გაჰყიდა. სულ კი პირველ კვარტალში, 142 620 ავტომობილი აქვს გაყიდული, რაც შარშანდელი ანალოგიური პერიოდის მაჩვენებელზე 28 პროცენტით მეტია.

„ჰიუნდაის“ ამერიკული შტოს გაყიდვების შეფმა დეივ ცუხოვსკიმ განაცხადა, რომ მისი კომპანიის ავტომობილებზე მოთხოვნა ამერიკაში იმდენად დიდი იყო, რამდენიც 2009 წლის აგვისტოში, როდესაც გაყიდვების მოცულობა, ძველი ავტომობილების ჩაბარების სანაცვლოდ, ახალი ავტომობილის შეღავათიან ფასად შეძენის შეთავაზების გამო, მნიშვნელოვნად გაიზარდა.

ცუხოვსკის განცხადებაში ასევე ნათქვამია, რომ „ჰიუნდაის“ ავტომობილებს შორის, ამერიკაში ყველაზე მეტი პოპულარობით, ახალი კომპაქტური სედანი „ელანტრა“ და საშუალო ზომის სედანი „სონატა“ (ფოტოზე) გამოირჩევა. ამ ორ მოდელზე, კორეული კომპანიის ამერიკული გაყიდვების დაახლოებით 68 პროცენტი მოდის.

უფრო კონკრეტულად კი, მარტის განმავლობაში, სულ „ჰიუნდაიმ“ 22 894 ცალი „სონატა“ გაჰყიდა. შედარებისთვის, შარშანდელი მარტის გაყიდვებმა 18 935 ცალი ავტომობილი შეადგინა. რაც შეეხება „ელანტრას“, მისი გაყიდვები ორჯერ და მეტად გაიზარდა. თუ შარშან ამ სახელით მხოლოდ 8 225 ცალი ავტომობილი გაიყიდა, წელს ეს რიცხვი 19 255-მდე არის გაზრდილი.

უფრო სოლიდური ზრდაა დაფიქსირებული „ჰიუნდაის“ ჯგუფში შემავალი „კიას“ გაყიდვებში. კერძოდ, ამ ბრენდით მარტში ამერიკაში სულ 44 179 ავტომობილია გაყიდული, რაც შარშანდელ შესაბამის მაჩვენებელზე 45 პროცენტით მეტია. პირველი კვარტლის განმავლობაში, სულ 104 774 ცალი „კიაა“ გაყიდული, რაც შარშანდელ ანალოგიურ პერიოდის მაჩვენებელზე 37 პროცენტით მეტია. „კიასთვის“ ეს გაყიდვების კვარტალური რეკორდის გაუმჯობესებაა. ცნობისათვის, წინა რეკორდი შარშან დამყარდა და 97 955 გაყიდული ავტომობილი შეადგინა. ამასთან, ამ კომპანიამ ამერიკაში კვარტალში 100 000 ავტომობილზე მეტი პირველად გაჰყიდა.

„კიას“ ავტომობილებს შორის, ამერიკის ბაზარზე ყველაზე მეტი პოპულარობით, ქროსოვერი „სორენტო“ სარგებლობს, რომელიც მარტში 11 071 ცალი გაიყიდა (შარშანდელი გაყიდვები 9 156 ცალი იყო). ამ ბრენდის მეორე ყველაზე პოპულარული მოდელი სუბკომპაქტური ჰეჩბეკი „სოულია“, რომელიც მარტში 10 028 ცალი გაიყიდა, თითქმის ორჯერ მეტი, ვიდრე შარშანდელ მარტში (5 106 ცალი).

„იაგუარ B99“ – „ბერტონესეული“ ოთხკარიანი კუპე

Bertone B99 asks, "Can't we All Just Forget About the X-Type?"

3 აპრილი

ჟენევის გამოფენაზე, „ბერტონეს“ მიერ წარმოდგენილ ამ კონცეპტუალურ ავტომობილზე ბევრი ამბობდა, რომ მისი სახით, „იაგუარის“ მომავალი X-ტაიპი ვიხილეთ. თუმცა, მოგვიანებით გაირკვა, რომ ინგლისური კომპანია თავისი ყველაზე პატარა ავტომობილის ამ სახით განახლებას არ აპირებს. უფრო მეტიც, მისმა ერთ-ერთმა წარმომადგენელმა, ამ ჭორებით აშკარად გაბეზრებულმა განაცხადა - იქნებ ცოტა ხნით, X-ტაიპი ყველამ დაივიწყოთო.
ერთი რამ კი ფაქტია - კონცეპტუალურმა „იაგუარ B99-მა“, რომელიც იტალიურ სადიზაინერო სტუდა „ბერტონეს“ მიერაა შემუშავებული, ჟურნალისტების, სპეციალისტებისა და დამთვალიერებლების დიდი ინტერესი გამოიწვია. ჯერ ერთი იმიტომ, რომ „ბერტონემ“ ის საკუთარი დაარსებიდან 99 წლის იუბილეს მიუძღვნა. მეორეც, ამ ავტომობილით, იტალიური ატელიე იმ ტრენდისთვის შეწინააღმდეგებას ცდილობს, რომელიც ბაზრის შედარებით ახალ, ოთხკარიანი კუპეების სეგმენტში ჩამოყალიბდა. ეს ტრენდი კი ამ ტიპის ავტომობილების უკნისკენ დახრილ სახურავში აისახება.

„იაგუარ B99-ს“ ტიპიური სედანისთვის დამახასიათებელი, ჰორიზონტალური სახურავი აქვს. კუპეს იერს კი მას ორივე უკანა კარის მომცრო (წინას ნახევარი სიგრძის) ზომები ანიჭებს. ამის მიუხედავად, უკანა სავარძლებზე მოხვედრა მაინც ადვილია, რადგან ავტომობილს არ აქვს შუა საყრდენი და ამასთან, წინა და უკანა კარი ერთმანეთის საპირისპიროდ იღება. კართა ასეთი კონსტრუქცია სერიულ წარმოებაში მხოლოდ „როლს როისს“ აქვს დანერგილი, მაგრამ ეს სულაც არ ნიშნავს, რომ იგივეს „იაგუარიც“ არ გააკეთებს.

მოკლედ, „იაგუარ B99-ის“ სახით, ჟენევაში ოთხკარიანი კუპეს საინტერესო ვერსია ვიხილეთ. ჰო, ალბათ საინტერესოა მისი გაბარიტებიც: სიგრძე 4.5 მეტრი, სიგანე 1.95 მეტრი და სიმაღლე 1.35 მეტრი. ამ ზომებით, ის D სეგმენტს შეესაბამება. სწორედ ამიტომ წარმოიშვა ვარაუდი, რომ ეს კონცეპტქარი მომავალი X-ტაიპია.

კონცეპტუალური ავტომობილი გაზრდილი სვლის სიშორის ჰიბრიდული სისტემითაა აღჭურვილი, რომელიც „ბერტონე ენერჯის“ მიერაა შემუშავებული. ამ სისტემაში შედის ორი ელექტროძრავი, რომელთაგან თითოეულის სიმძლავრე 201 ცხენის ძალაა. ორივე ძრავი უკანაა მოთავსებული. სვლის სიშორეს კი ბენზინზე მომუშავე 1.4-ლიტრიანი ძრავი უზრუნველყოფს, რომლის სიმძლავრეც 168 ცხენის ძალაა. ამ აგრეგატის დახმარებით, ავტომობილის სვლის სიშორე 700 კილომეტრს აღწევს (მხოლოდ ელექტროძრავებით, მანძილი 100 კილომეტრამდე მცირდება), რაც ამჟამად ბაზარზე არსებული მსგავსი ტიპის „შევროლე ვოლტის“ სვლის სიშორეზე გაცილებით მეტია. თანაც, ყოველი კილომეტრის გავლისას, ის გარემოს მხოლოდ 30 გრამი ნახშირორჟანგით აბინძურებს.

მაკო მონელა

„სპაიდერი“ – „ვისმანის“ კონცეპტუალური ექსპერიმენტი

Wiesmann Spyder Concept

3 აპრილი

გერმანული კომპანია „ვისმანი“ თავისი სპორტული ავტობოლებითაა ცნობილი, რომლებიც დამახასიათებელი გარეგნობით, ტემპერამენტით და მდიდრული ინტერიერებით გამოირჩევა. თუმცა ჟენევის გამოფენის დამთვალიერებელს, ამ კომპანიის სტენდზე სრულიად განსხვავებული სტილის ავტომობილი - ღია „სპაიდერი“ დახვდათ.

კომპანიის წარმომადგენელთა განცხადებით, ეს კონცეპტუალური ავტომობილი, ბრენდის თაყვანისმცემელთა თხოვნბის და რჩევების გათვალისწინებით შეიქმნა. მტავარი თხოვნა კი მძლავრი და მსუბუქი, თითქმის სარბოლი ავტომობილის შექმნა იყო.

„ვისმან სპაიდერი“ „ბეემვეს“ წარმოების ბენზინის 4.0-ლიტრიანი V8 ძრავითაა აღჭურვილი, რომელიც 420 ცხენის ძალას და 400 ნიუტონმეტრს გამოიმუშავებს. ძრავი ბაზაშია განლაგებული. უცნობია ტრანსმისიის ტიპი და საფეხურების რაოდენობა. სამაგიეროდ, კომპანიის მიერ გავრცელებულ პრეს რელიზში აღნიშნულია, რომ ამ აგრეგატის დახმარებით, ორადგილიანი ღია ავტომობილი, რომელსაც არც კარი გააჩნია და არც საქარე შუშა და რომელიც 1000 კილოგრამს იწონის, „სპაიდერს“ სტანდარტული აჩქარებისთვის (0-100 კმ/სთ) 4 წამზე ნაკლები ჰყოფნის, მისი მაქსიმალური სიჩქარე კი 290 კმ/სთ-ია.

„ვისმანი“ აცხადებს, რომ კონცეპტუალური „სპაიდერი“ , კომპანიის ისტორიაში ყველაზე ექსტრემალური ავტომობილია. ძრავის და ტავად ავტომობილის ტექნიკურ-დნმიკური მახასიათებლების გარდა, მის ტემპერამენტზე ის ფაქტიც მიგვანიშნებს, რომ მას არ აქვს საქარე შუშა და კარები. ამიტომ, აუცილებელია, რომ პილოტმა (ადამიანს, რომელიც ამ მანქანის საჭეს მიუჯდება, უბრალოდ მძღოლს ვერც უწოდებ) თავი შლემით დაიცვას. ამასთან, ავტომობილის გადაბრუნების შემთხვევაში, მასში მსხდომთა თავებს უსაფრთხოების რკალებიც დაიცავს.

ჯერჯერობით, „ვისმანი“ ამ ავტომობილის სერიულ წარმოებას არ აპირებს. სამაგიეროდ აცხადებს, რომ „სპაიდერი“ იმისთვის გამოიფინა, რომ პოტენციური მყიდველის აზრი შეისწავლოს და განსაზღვროს, რამდენად წარმატებული შეიძლება იყოს ასეთი ავტომობილი ბაზარზე, რომელიც მწარმოებლებს მცირე შეცდომასაც არ პატიობს.

მართალია, „ვისმანი“ კონცეპტუალურ „სპაიდერს“ სტუდიურ ავტომობილს უწოდებს, მაგრამ ჟენევაშივე გავრცელდა ინფორმაცია იმის შესახებ, რომ გერმანული კომპანია უკვე მის სერიულ ვერსიასაც ამზადებს, რომელსაც ჟენევაშივე, მერმისს წარადგენს.

მაკო.....

სეულის ავტო შოუზე „ჰიუნდაიმ“ კონცეპტუალური „ბლიუ2“ წარადგინა

Hyundai Unveils Blue2 Concept in Seoul

3 აპრილი

სეულის საერთაშორისო საავტომობილო შოუზე, რომელიც ტარდება დევიზით „ევოლუცია, მწვანე რევოლუცია ბორბლებზე“, „ჰიუნდაიმ“ ეკოლოგიურად სუფთა კონცეპტუალური ავტომობილი წარადგინა, რომლის სახელიცაა „ბლიუ2“ (წაიკითხეთ ბლიუ სქვეარ) და რომელიც, გარდა იმისა, რომ არატრადიციულ ტექნოლოგიას იყენებს, იმითაცაა საინტერესო, რომ მისი სახით, კორეული კომპანია თავის მომავალ კორპორატიულ სტილს გვიჩვენებს.

ჯერ ვთქვათ ის, რომ კონცეპტუალური ავტომობილის სახელი, „ჰიუნდაის“ ეკოლოგიურ სუბ ბრენდ „ბლიუ დრაივისა“ და წყალბადის აღნიშვნის (H2) კომბინაციაა, რაც იმაზე მიგვითითებს, რომ ავტომობილში ენერგიის წყაროდ წყალბადს იყენებენ.

„ბლიუ2“ საშუალო ზომის სედანია, რომელიც 120-ცხენისძალიანი ელექტროძრავითაა აღჭურვილი, ამას კი ენერგიით წყალბადის ბაზაზე მომუშავე ფიჭური ელემენტები კვებავს. ამ ელემენტებში, წყალბადსა და ჟანგბადს შორის მიმდინარე ქიმიური რეაქციის შედეგად, ელექტროენერგია წარმოიქმნება, რომელსაც აკუმულატორების ბლოკი და ძრავი ღებულობს.

ავტომობილს 100 კილომეტრის გასავლელად, 2.8 ლიტრი წყალბადი ჰყოფნის, გამონაბოლქვი კი მხოლოდ წყლის ორთქლია. „ბლიუ2-ის“ ეკოლოგიურობას ის ფაქტიც უსვამს ხაზს, რომ მისი ინტერიერის გასაწყობად, ეკოლოგიურად სუფთა მასალებია გამოყენებული. დაკიდევ, ავტომობილი შემცირებული ცვეთის მქონე საბურავებზე დგას, რაც ძრავის მიერ ელექტროენერგიის მოხმარებას ამცირებს.

კონცეპტუალური ავტომობილი ასევე აღჭურვილია ელექტრონული სისტემით, რომელიც პატრონის მიახლოებას გრძნობს და მას კარის გაღებით ესალმება. უკანა ხედვის სარკეები ვიდეოკამერებითაა შეცვლილი. მესამე კამერა კი ავტომობილის სახურავზეა დამაგრებული და ის უკანა სივრცის პანორამულ გამოსახულებას იძლევა. სალონში გამოყენებულია მონიტორები, რომლებიც ორგანული შუქდიოდებითაა დამზადებული.

„ჩვენ არ გვინდა, რომ „ჰიუნდაი“ მსოფლიოს უდიდესი ავტოკომპანია იყოს. ჩვენი მიზანი ისაა, რომ ეს ბრენდი საყოველთაო პატივისცემით და სიყვარულით სარგებლობდეს. ჩვენ გვინდა, რომ ჩვენი პროდუქციის მომხმარებელი პარტნიორად გვთვლიდეს. ჩვენ არ გვინდა, ვიყოთ კომპანია, რომელსაც მხოლოდ საკუთარი ინტერესი ამოძრავებს. ჩვენ უწყვეტად გავაგრძელებთ მსოფლიო კლასის, ხარისხიანი პროდუქციის შეთავაზებას, რაც ბაზარზე შექმნილი რთული სიტუაციების დაძლევაში და ამ სირთულეების გამოწვევად აღქმაში გვეხმერება. ყველაფერი ეს კი იმის შედეგია, რომ ჩვენ ყოველთვის ყურადღებით ვუსმენთ მყიდველის რჩევებს და მათს სურვილებს ვითვალისწინებთ“, - კონცეპტუალური ავტომობილის წარდგენისას განაცხადა „ჰიუნდაი მოტორის“ პრეზიდენტმა და მთავარმა აღმასრულებელმა სტივ იანგმა.

მაკო Monella

„ჰიუნდაი“ ცალკე პრემიუმ ბრენდის შექმნას არ აპირებს

Hyundai rules out separate premium brand

2 აპრილი

„ჰიუნდაი მოტორი“ აცხადებს, რომ არ აპირებს ცალკე პრემიუმ სუბ ბრენდის ჩამოყალიბებას, როგორც ეს თავის დროზე „ტოიოტამ“ (ლექსუსი), „ნისანმა“ (ინფინიტი) და „ჰონდამ“ (აკურა) გააკეთეს. ამის მიზეზი კი ისაა, რომ ცალკე ბრენდის შექმნას და მისი იმიჯის პოპულარიზაციას უზარმაზარი ინვესტიცია სჭირდება და იმავდროულად, თავად „ჰიუნდაის“ და მის მფლობელობაში მყოფი „კიას“ იმიჯიც იზარალებს.

სხვათა შორის, როდესაც სამი წლის წინ, ბაზარზე მოდელი „ჯენეზისი“ გამოჩნდა, ბევრმა ჩათვალა, რომ ამ სახელს კორეული კომპანია პრემიუმ ბრენდისთვის გამოიყენებდა. ბოლო ხანს, ამ როლში სახელი „ეკუსიც“ განიხილებოდა. მაგრამ „ჰიუნდაი“ ორივე ვარიანტს უარყოფს.

„ცალკე ბრენდის ჩამოყალიბება „ჰიუნდაის“ გეგმებში არ შედის“, - ჟურნალისტებთან შეხვედრისას განაცხადა კორეული კომპანიის ვიცე ტავმჯდომარე შინ იონ-ვუნმა. ამასთან, მას არც ის განუმარტავს, რა ელის სახელებს“ჯენეზისს“ და „ეკუს-ს“, რომლებიც პრაქტიკულად ერთი კლასის ავტომობილებს ჰქვია. ძნელი სათქმელია, ეს განცხადება საპირველაპრილო ხუმრობაა, თუ რეალობა, თუმცა სავარაუდოდ, ამ სახელებს „ჰიუნდაი“ სხვადასხვა ბაზრებზე გამოიყენებს - ეს მარკეტინგული ტაქტიკა მისთვის უცხო არაა.

კომპანიის პრესმდივანი ფრენკ არენსი ამბობს, რომ „ჰიუნდაი“ ცდილობს, თავისი ავტომობილები წარმოაჩინოს, როგორც „თანამედროვე პრემიუმი“ და ამიტომ, ახალი პრემიუმ ბრენდის ჩამოყალიბება, პირველ რიგში, სწორედ „ჰიუნდაის“ დააზარალებს. ამასთან, ახალი პრემიუმ ბრენდის რეკლამას, სადილერო ქსელის შექმნას და სხვა, ამ საქმესთან დაკავშირებულ საქმიანობას, უზარმაზარი ხარჯები დასჭირდება.

ბოლო წლებში, „ჰიუნდაი“ აშკარად ხარისხიანსა და გარეგნულად მიმზიდველ ავტომობილებს აწარმოებს, რაც სპეციალისტებმა უკვე აღიარეს და ეს კომპანიის გაყიდვების განუხრელ ზრდაშიც აისახა. თუმცა, კომპანიის მარკეტოლოგები ამბობენ, რომ ფართო აუდიტორიას ჯერ კიდევ არ აქვს სრულად აღქმული ის ფაქტი, რომ კორეული კომპანიის ავტომობილები, სიიაფის გარდა, ხარისხით და დახვეწილი დიზაინითაც გამოირჩევა. ამიტომ, კომპანიის მთავარი მიზანი ახლა სწორედ ამ ნაკლის გამოსწორებაა, რასაც გარკვეული დრო დასჭირდება.

სხვათა შორის, იაპონური კომპანიების მიერ პრემიუმ ბრენდების შექმნას სხვადასხვა შედეგი მოჰყვა. მაგალითად, თუ „ლექსუსმა“, რომელიც 1989 წელს შეიქმნა, თავი უკვე მთელი მსოფლიოს მასშტაბით დაიკვიდრა, „აკურას“ ეს აშკარად არ გამოსდის. არადა, „ჰონდა“ იაპონური სამეულიდან პირველი იყო, რომელმაც ასეთი ნაბიჯი გადადგა. საშუალოდ წარმატებულია „ინფინიტი“.

ასე რომ, „ჰიუნდაი“ ამ ატეპზე პრემიუმ ბრენდის ჩამოყალიბებას საჭიროდ არ მიიჩნევს, თუმცა რა იქნება მომავალში, ამის თქმა მაინც ძნელია...

„ბერტონე“ თავის კონცეპტუალურ ავტომობილებს ჰყიდის

Bertone Concepts for Sale at Villa d'Este

31 მარტი

მალე საავტომობილო რარიტეტის მოყვარულებს სანუკვარი ავტომობილების შეძენის საშუალება მიეცემათ - ვილა დ’ესტეს საავტომობილო ელეგანტურობის კონკურსის პარალელურად, რომელიც 21 მაისს გაიმართება, ჩატარდება აუქციონი, რომელზეც იტალიური სადიზაინერო ატელიე „კაროცერია ბერტონე“ თავის კონცეპტუალურ ავტომობილებს გამოიტანს.

აუქციონს ამ საქმეზე სპეციალიზებული „RM ოქშენზი“ ჩაატარებს. ავტომობილები, რომლებაც აუქციონზე გამოიტანენ, პირველად იყიდება. ანუ, ისინი მხოლოდ „ბერტონეს“ ფარეხს ამშვენებდნენ. ამიტომ, აუქციონის ორგანიზატორები და ატელიეს ხელმძღვანელობა მედოვნებს, რომ ყველა ავტომობილი, საწყის ფასზე გაცილებით ძვირად გაიყიდება.

„ეს ავტომობილები „ბერტონეს“ შემოქმედების ისტორიის განუყოფელი ნაწილია და მათი შეძენის შემთხვევაში, მყიდველი საავტომობილო ისტორიის გამორჩეულ ექსპონატებს დაეუფლება. ესეც რომ არა, ჩვენს აუქციონზე გამოვიტანთ იმ ექვს ავტომობილს, რომლებიც კერძო მფლობელის ხელში ადრე არასდროს ყოფილა. ისინი სააქციონო ბაზრის დებიუტანტებია და ვფიქრობთ, ავტოკოლექციონერებს ეს ფაქტიც მოხიბლავს“, - ამბობს „RM იუროპის“ მმართველი დირექტორი მაქს ჯირარდო.

აუქციონზე შემდეგ ავტომობილებს გამოიტანენ:

1967 წლის ლამბორგინი მარცალის პროტოტიპი, სერიული ნომრით 1001. ამ ავტომობილით, მონაკოს პრინცმა რენიემ და პრინცესა გრეისმა 1967 წლის მონაკოს დიდ პრიზის აღლუმზე გაინავარდეს. ფასი 1 000 000 – 1 800 000 ევრო;

1970 წლის ლანჩა სტრატოს HF ძერო, სერიული ნომრით C/1160CPL, ფასი 1 000 000 – 1 800 000 ევრო;

1963 წლის შევროლე ტესტუდო, სერიული ნომრით 20927w207657, ფასი 500 000 – 800 000 ევრო;

1974 წლის ლამბორგინი ბრავო, სერიული ნომრით NS46 01, ფასი 150 000 – 220 000 ევრო;

1980 წლის ლამბორგინი ათონი, სერიული ნომრით S155/01, ფასი 150 000 – 220 000 ევრო;

1978 წლის ლანჩა სიბილო, სერიული ნომრით S 12201, ფასი 60 000 – 100 000 ევრო.