ალ-ატიამ საინსთან ჩამორჩენა შეამცირა

დაკარის რალი-რეიდი

12 იანვარი

დაკარის რალი-რეიდზე, რომელიც სამხრეთ ამერიკაში, არგენტინისა და ჩილეს მიწაზე მიმდინარეობს, ”ფოლკსვაგენის” საქარხნო გუნდს ბადალი არ ჰყავს. რეიდის მეცხრე ეტაპიც გერმანული კომპანიის ეკიპაჟის გამარჯვებით დასრულდა და რბოლის კლასიფიკაციაშიც, პირველი სამი ადგილიც მის ეკიპაჟებს აქვთ ოკუპირებული.

რბოლას კლსაიკურ რალიში მსოფლიოს ორგზის ჩემპიონი, ესპანელი კარლოს საინსი ლიდერობს, თუმცა მისთვის გამარჯვების იოლად დათმობას არ აპირებს ყატარელი ნასერ ალ-ატია, რომელმაც მეცხრე ეტაპი სოლიდური უპირატესობით მოიგო და ლიდერ თანაგუნდელთან ჩამორჩენა 8 წუთამდე შეამცირა.

კოპიაპოდან ლა სერენამდე 338-კილომეტრიანი გზა ალ-ატიამ 1 საათში, 59 წუთსა და 28 წამში გაიარა და საინსს 5 წუთით და 59 წამით აჯობა. ეს ყატარელი მრბოლის მიერ წლევანდელ დაკარზე მოგებული მესამე, კარიერაში კი მეექვსე ეტაპია.

”გუშინდელი ეტაპის შემდეგ ვთქვი, რომ დღეს საინსთან მინიმუმ ექვსი წუთი უნდა მომეგო, რათა პირველობისთვის ბრძოლის შანსი შემენარჩუნებინა. მთავარი კი ისაა, რომ მას დღესაც რომ გაეზარდა ჰანდიკაპი, მაშინ გუნდი მას ლიდერად მიიჩნევდა და მითითებების მოცემას დაიწყებდა, რაც საბოლოო გამარჯვების იმედებს გადამიწურავდა. ახლა კი ბრძოლა გრძელდება და იმედი მაქვს, რომ გუნდი არანაირად არ შემზღუდავს”, - ამბობს ალ-ატია, ვისაც იმედი აქვს, რომ მეათე ეტაპზე კვლავ შეძლებს ჩამორჩენის შემცირებას.

მეათე ეტაპზე, რბოლის მონაწილეებს კლასიკური რალის სპეცმონაკვეთის მარშრუტის გავლა უწევთ და რაც მთავარია, გზა ქვიშიანი არ იქნება. ეს კი იმას ნიშნავს, რომ მოწინავე ეკიპაჟს, რომელსაც გზის გაკვალვა მოუწევს, პრობლემები ნაკლებად ექნება.

ავტოინდუსტრიის ტენდენციები 2010 წელს

10 იანვარი

რენოს ელექტრონული ოთხი მუშკეტერი (მარცხნიდან): ფლუენსი, ტვიზი, კანგუ და ზოი

..........................................................

ახალი წლის დადგომისთანავე, აქტუალური გახდა კითხვა - რა ტენდენციებია მოსალოდნელი საავტომობილო ინდუსტრიაში - გაგრძელდება შარშანდელი ტენდენციები, თუ რამე რევოლუციურად ახალია მოსალოდნელი? პირდაპირ შეიძლება ითქვას, არავითარი რევოლუცია, ხმაურიანი დებიუტები კი ალბათ მრავლად იქნება. ბაზარზე გაყიდვების მოცულობის ზრდას ელიან, თუმცა ბევრი მწარმოებელი ფრთხილ პროგნოზებს აკეთებს და თვლის, რომ ამ მხრივ, წელსაც ბევრი სიძნელის გადალახვა მოუწევთ.

მთავარი ტენდენცია კი ეკოლოგიაზე ზრუნვა და ახალი ტექნოლოგიების დანერგვა უნდა იყოს, რაშიც უპირველეს ყოვლისა, ჰიბრიდული ტექნოლოგიების განვითარება და ბაზარზე ელექტრომობილების გამოჩენა მოიაზრება. ასე განსაჯეთ, დეტროიტის საერთაშორისო გამოფენის ორგანიზატორებმა, კობო სენტერში სპეციალური ”ელექტრუნული ბულვარიც” კი მოამზადეს, რომელზეც ორ ათეულზე მეტი ელექტრო და ჰიბრიდული ავტომობილის პრემიერა გაიმართება.

ჰონდა CR-Z

.................................

გავიხსენოთ გასული წლის ბოლო დიდი ავტოგამოფენის ყველაზე გამორჩეული ექსპონატები: ელექტრული ”ფოლკსვაგენ Up!”, ელექტრონული ”სმარტი”, ”მინი E”, ”აუდი E-ტრონი” და ”რენოს” ოთხი ელექტრონული მუშკეტერი (ტვიზი, ზოი, კანგუ და ფლუენსი) - ყველა მათგანს მამოძრავებელ ძალას ელექტროძრავი ანიჭებს. უფრო ადრე, ”ნისანმა” საზოგადოებას ელექტრონული ”ლიფი” უჩვენა, ცოტა მოგვიანებით კი, ტოკიოს ავტო შუზე, საზოგადოება ასევე ელექტრონული და მეტად უცნაური ”ლენდ გლაიდერით” გააკვირვა.

”მიცუბიშიმ” უკვე დაიწყო თავისი მიკრო ელექტრომობილის, i-MiEV-ის მცირესერიული წარმოება და მისი წარმოების ტექნოლოგია თავის ფრანგ პარტნიორ ”პეჟო სიტროენს” გაუზიარა. ეს ორი კომპანია კი i-MiEV-ის ბაზაზე, მალე ამ ელექტრომობილის საკუთარი ვერსიის წარმოებას შეუდგება. ამ ტრენდს არც შვედური ”ვოლვო” ჩამორჩება, რომელიც ამ დღეებში, დეტროიტის შოუზე, ჰეჩბეკ С30-ის ელექტრონულ ვერსიას წარადგენს.

შევროლე ვოლტი

.......................................

სწრაფად ვითარდება ჰიბრიდული ავტომობილების ბაზარიც. აქ უდავო ლიდერი ”ტოიოტაა”, რომლის ჰიბრიდული პრიუსუც იაპონიაში ყველაზე გაყიდვადი ავტომობილია. მართალია, გასული წლის დასაწყისში, ამ ავტომობილს სერიოზული კონკურენტი გამოუჩნდა ”ჰონდა ინსაითის” სახით, მაგრამ საბოლოოდ, უფრო ეკონომიურმა ”პრიუსმა” ახალგამომცხვარი მეტოქე უკან ჩამოიტოვა (გაყიდვების მოცულობით).

მაგრამ ჰიბრიდების ბაზარზე, მალე რამდენიმე ახალი მოთამაშე გამოჩნდება, რომელთაგან ყველაზე გამორჩეული ალბათ ”შევროლე ვოლტი” იქნება, რომლის ძირითადი მამოძრავებელიც ელექტროძრავია, შიდაწვისძრავი კი მასში ელექტროენერგიის გამოსამუშავებლად გამოიყენება. ეს ახალი სიტყვაა ჰიბრიდულ კლასში და ”ჯენერალ მოტორსი” იმედოვნებს, რომ ”ვოლტის” დახმარებით, მის იმიჯს, როგორც ხარჯიანი ავტომობილების მწარმოებლისას, ყველა მალე დაივიწყებს.

ნისან ლენდ გლაიდერი

......................................................................

ჰიბრიდული ავტომობილების წარმოებას მალე პრემიუმ კლასის ავტომობილების მწარმოებლებიც დაიწყებენ. ჩვენ უკვე გაგაცანით ”ბეემვეს” ორი ჰიბრიდული მოდელი, რომლებიც მე-7 სერიის სედანსა და ქროსოვერ X6-ზეა ბაზირებული. ამ ორ ავტომობილს ჯერჯერობით შეიძლება თავისუფლად ვუწოდოთ მსოფლიოში ყველაზე მძლავრი ჰიბრიდები. თუმცა, მათ მალე ამ წოდებას ”ფერარის” ჰიბრიდული 599 წაართმევს. თუმცა, ისიც უნდა ითქვას, რომ ეს ეგრეთ წოდებული ”მსუბუქი ჰიბრიდი” იქნება. ანუ, მასში მთავარ აგრეგატად ისევ შიდაწვის ძრავი დარჩება, რომელსაც ენერგიის დაზოგვაში, ფორმულა ერთიდან მოსული სისტემა კერს-ი (კინეტიკური ენერგიის რეკუპერაციის სისტემა) დაეხმარება.

თავიანთ მყიდველებს ჰიბრიდულ სპორტულ ავტომობილებს მალე შესთავაზებენ ”სუბარუ”, ”ნისანი” და ”ჰონდა”. ამასთან, ეს უკანასკნელი წელსვე დაიწყებს ჰიბრიდული CR-Z-ის წარმოებას. ჰო, ჰიბრიდულ მოდელებს ასევე გამოუშვებენ ”ბენტლი”, ”მერსედეს ბენცი”, ”ლამბორგინი” და ”როლს როისიც” კი. მოკლედ, ამ ტიპის ავტომობილების სეგმენტში ნამდვილი ბუმის მოსალოდნელი.

ტოიოტა პრიუსი

...........................................

თუმცა, როგორც კი ლითიუმ-იონური აკუმულატორების ფასი მნიშვნელოვნად შემცირდება, მოსალოდნელია, რომ ჰიბრიდულ ავტომობილებს მალე ელექტრომობილები დაჩრდილავს. სხვათა შორის, აკუმულატორების სიძვირის წამალი ”რენოსა” და ”ნისანს” უკვე მოფიქრებული აქვთ - პროექტ ”ბეტერ პლეისის” ფარგლებში, ეს ორი კომპანია თავიანთი ელექტრომობილებისთვის გასაღების მნიშვნელოვან ბაზარს მიიღებს.

კიდევ ერთი მნიშვნელოვანი მოვლენა, რაც წელსაა მოსალოდნელი, ჩინური ავტოინდუსტრიის შემდგომი აღზევებაა. ჯერ ერთი, ჩინური ბაზარი მალე ალბათ მსოფლიოს უდიდესი ბაზრის სტატუსს მოიპოვებს და ამერიკისას გადაასწრებს. მეორეც, ჩინური კომპანიები სწორედ წელს დაიწყებენ საზღვარგარეთ ექსპანსიას. ამ მიმართულებით გადადგმული პირველი ნაბიჯი, ჰოლდინგ ”ჟეძიან ჯილის” მიერ შვედური ”ვოლვოს” გამოსყიდვაა.

”ფორდი” აცხადებს, რომ ”ვოლვოში” წილის შენარჩუნებას არ აპირებს, თუმცა ჩინელთა ხელში გადასულ შვედურ კომპანიასთან პარტნიორულ თანამშრომლობას კვლავაც გააგრძელებს. ეს კი ”ჯილისთვის” უცხოურ ბაზრებზე შეღწევისთვის საუკეთესო პლაცდარმი იქნება.

ცოტა ხნის წინ, ”ბეიძინ აუტომოტივმა” ”ჯენერალ მოტორსისგან” კიდევ ერთი შვედური კომპანიის, ”სააბის” ორი მოდელის, 9-5-ისა და 9-3-ის ინტელექტუალური საკუთრება, საწარმოო ხაზებთან ერთად გამოისყიდა. ეს კი იმას ნიშნავს, რომ მალე ამ ავტომობილებს ”ბეიძინ აუტომოტივი” გამოუშვებს.

კვლავ გაგრძელდება კომპანიების გაერთიანებებისა და ერთი კომპანიის მიერ მეორის შესყიდვების პროცესი, თუმცა ამ ტენდენციას უფრო კლების პერსპექტივა აქვს, რადგან ამ მიმართულებით, საერთაშორისო ბაზარზე ძირითადი რესურსი პრაქტიკულად ამოწურულია - შარშან უკვე დაფიქსირდა ”ფიატის” და ”კრაისლერის” ალიანსი, ”პორშე” თავისი ნათესავი ”ფოლკსვაგენის” ჯგუფს შეუერთდა, ”ჰამერი” ჩინური ”ტენჭონის” კუთვნილება გახდა, ”ვოლკსვაგენმა” და ”სუზუკიმ” აქციების პაკეტები გაცვალეს და სტრატეგიული ალიანსი შექმნეს.

წელს მოსალოდნელია ”ფორდის” მიერ ”ჯილისთვის” ”ვოლვოს” მიყიდვის პროცესის დასრულება. ასევე საბოლოო სახეს მიიღებს გარიგება ”ჯენერალ მოტორსსა” და BAIC-ს შორის. ასევე მოსალოდნელია ”ვოლკსვაგენის” ოჯახში სატვირთო ავტომობილების მწარმოებელი MAN-ის შესვლა. დაბოლოს, ყველაზე მსხვილი გარიგება ”პეჟო სიტროენსა” და ”მიცუბიშის” შორის უნდა შედგეს, რომლის შედეგადაც, იაპონური კომპანია ფრანგული გიგანტის ნაწილი გახდება და ამით, ლოგიკურად გაგრძელდება ამ ორი მწარმოებლის მრავალწლიანი პარტნიორობა.

”მონტევერდი” – ”ფერარიზე” განაწყენებით შექმნილი კომპანია

10 იანვარი

ალბათ, ავტომოყვარულების დიდმა ნაწილმა იცის სპორტულ სუპერ ავტომობილების მწარმოებელ კომპანია ”ლამბორგინის” დაარსების ისტორია - ფერუჩო ლამბორგინიმ ის ენცო ფერარიზე განაწყენებულმა დააარსა და მიზნად კომენდატორეს დაჩრდილვა დაისახა. დაჩრდილვისა რა გითხრათ, მაგრამ მისი გვარის მატარებელი ფირმა ისეთ მანქანებს უშვებს, რომლებსაც ბევრი ნატრობს და ცოტა ყიდულობს.

ბევრმა როდი იცის, რომ ფერუჩო ერთადერთი ბიზნესმენი როდია, რომელმაც ავტომობილების წარმოებას, ფერარიზე გულმოსულმა მიჰყო ხელი. იტალიური წარმოშობის შვეიცარიელ პეტერ მონტევერდისაც თითქმის ანალოგიური ისტორია აქვს. 12 წლის განმავლობაში, ის შვეიცარიაში ”ფერარის” ავტომობილების გავრცელებაზე მუშაობდა.

მაგრამ შემდეგ, ენცო ფერარიმ მას ერთდროულად 100 ავტომობილის შეძენა მოსთხოვა და თან ისე, რომ მათი ფასი წინასწარ უნდა გადაეხადა. მონტევერდის ამის საშუალება შეიძლება ჰქონდა კიდეც, მაგრამ კომენდატორესგან ასეთი უსამართლობა ვერ მოითმინა და ლამბორგინის მსგავსად, მანაც საკუთარი ავტომობილების წარმოება გადაწყვიტა.

უნდა ითქვას, რომ მონტევერდი ამ საქმეში საკმაოდ გაწაფული საქმოსანი იყო - თავისი გვარის მატარებელი ფირმის შექმნამდე, MBM-ის სახელით ის ერთადგილიან სარბოლ და ტურიზმის კლასის სპორტულ ავტომობილებს წლების განმავლობაში ამზადებდა. 1967 წელს კი მან გამოუშვა ავტომობილი სახელწოდებით ”მონტევერდი 375S”, რომელიც მეტად მიმზიდველი და ორიგინალური დიზაინით გამოირჩეოდა.

ლუქსის კლასის ამ კუპეს დიზაინი ცნობილმა დიზაინერმა პიეტრო ფრუამ შეიმუშავა, რომელიც თავადაც აწარმოებდა ექსკლუზიურ ავტომობილებს. ავტომობილი ”კრაისლერის” წარმოების 375-ცხენისძალიანი ძრავით აღიჭურვა, უკანა საკიდრად კი მან დე დიონის სისტემა (იმ დროისთვის უკვე საკმაოდ მოძველებული) მიიღო.

”ფერარის” ავტომობილებისგან განსხვავებით, ”მონტევერდის” პირველი მანქანა უფრო ხნიერი მომხმარებლისთვის იყო განკუთვნილი და ამიტომ, ოპციის სახით, ფირმა მყიდველს ავტომატურ ტრანსმისიასაც სთავაზობდა. ყოველივეს მიუხედავად, ”მონტევერდი” თავის ბაზელის ქარხანაში წლიურად 50 ცალ 375S ამზადებდა.

”მონტევერდის” ისტორიაში კი ერთ-ერთ ყველაზე გამორჩეულ ქმნილებად ასევე სპორტული ”ჰაი 450 SS” (ჰაი გერმანულად ზვიგენს ნიშნავს) იქცა. იმ დროს, სპორტული ავტომობილების ბაზარზე მოდაში ძრავის შუა განლაგება იქცა, რაც ფორმულა 1-ის აშკარა გავლენა იყო. ”მონტევერდიმაც” ჩამორჩენა არ ისურვა და ”ჰაი 450 SS-ზე” ძრავი სწორედ შუაში განალაგა. ავტომობილის შექმნაში, თავად პეტერ მონტევერდის გარდა, მონაწილეობა ატელიე ”ფისორეს” დიზაინერმა ტრევორ ფიორემაც მიიღო.

”ზვიგენი” ძალიან მოკლებაზიანი და განიერ კვალიანი გამოვიდა. ბაზის დამოკლებას ხელი იმ გარემოებამ შეუწყო, რომ ძრავი ლამის სალონში, ორად ორ სავარძელს შორის განთავსდა. ეს კი არამარტო იმ დროის, არამედ საერთოდ, ავტოინდუსტრიის ისტორიაში არგაგონილი გადაწყვეტა იყო.

”მონტევერდიმ” ეს ძრავიც, სერია ”ჰემიდან”, ”კრაისლერისგან” აიღო. აგრეგატი 450 ცხენის ძალას ავითარებდა, რაც ავტომობილის სახელწოდებაშიც აისახა. აგრეგატი ფოლადის კუთხოვანი მილებისგან შეკრულ ჩარჩოზე ხისტად მაგრდებოდა. საკიდარი წინ და უკან განსხვავებული იყო. წინ თუ რხევების ჩაქრობას ჩანგლის ტიპის წყვილები და მათტან დაკავშირებული დრეკადი ელემენტები უზრუნველყოფდა, უკან ისევ ეგზოტიკური დე დიონი დარჩა. ავტომობილის დამუხრუჭებას კი დისკოსებრი, ვენტილირებადი სისტემა უზრუნველყოფდა.

ძარა ”ფისორემ” თავის იტალიურ საწარმოში დაამზადა. ეს ნაკლებად ცნობილი ატელიეც 50 პროცენტით მონტევერდის ეკუთვნოდა. გამოუცდელ სტუდიასთან თანამშრომლობის შედეგი ის იყო, რომ ავტომობილი საკმაოდ მძიმე გამოვიდა - ის 1290 მკგ-ს იწონიდა. თუმცა, მძლავრი ძრავის წყალობით, მას ადგილიდან 100 კმ/სთ სიჩქარის 5 წამზე ნაკლებში აკრეფა შეეძლო.

”მონტევერდიმ” ეს ავტომობილი პირველად საზოგადოებას ჟენევაშუ უჩვენა. 1970 და 1971 წლებში, 450 SS კიდევ რამდენიმე გამოფენაზე გამოჩნდა და ყოველთვის, მასზე რაღაც, უმნიშვნელო დეტალი იყო შეცვლილი. 1971 წლის დეკემბერში, ეს ავტომობილი, როგორც იქნა, გაიყიდა. თითქოს, ფირმა მეტის დამზადებას აღარც აპირებდა, მაგრამ ორი წლის შემდეგ, კიდევ ერთი ”ზვიგენი” დამზადდა. ოღონდ, მას GTS უწოდეს. ესეც ”კრაისლერის” იმავე ძრავით იყო აღჭურვილი, ოღონდ უფრო გრძელი ბაზა ჰქონდა და ალუმინის ბორბლებზე იდგა.

17 წელი გავიდა, სანამ ”მონტევერდი” მესამე ”ზვიგენს” დაამზადებდა. ამჯერად, მონტევერდიმ კარბონიც გამოიყენა და ძარა ისევ გრძელ ბაზაზე დასვა. 1992 წელს ბოლო ”ჰაი” დამზადდა, ოღონდ იმ ძველი მანქანისა ამას მხოლოდ სახელიღა ჰქონდა. თანაც, იმ დროისთვის, ფირმა ”მონტევერდი” უკვე რვა წლის გაუქმებული იყო.

ბოლო ”ზვიგენს” საფუძვლიანად შეცვლილი ძარა, შასი და ”კოსუორტის” ფორმულა 1-ის ძრავი ჰქონდა.

უნდა ითქვას, რომ ყოველი ”ჰაი” სრულიად განსხვავებული ავტომობილი იყო. მონტევერდის მისი სერიული წარმოების დაწყება არც უფიქრია. თუმცა დროდადრო, მის დახვეწაზე უარს არ ამბობდა. ისე კი, თუ ვინმე ”ჰაის” შეკვეთას ისურვებდა, მონტევერდი ყველაფერს ცდილობდა, რომ შემკვეთს საბოლოო არჩევანი მოდელ 375S-ზე შეეჩერებინა. და ეს კარგად გამოსდიოდა.

ცოტა უცნაურია, მაგრამ ფაქტია, რომ პირველი პროტოტიპის გარდა, ”მონტევერდის” ამ ავტომობილის სხვა მოდიფიკაციები არც გაუყიდია. პეტერ მონტევერდი ცოცხალი აღარაა, მისი ”ზვიგენები” კი დღესაც მისი ფირმის საწარმოში დგას, რომელიც მუზეუმადაა გადაკეთებული...

რაც შეეხება იმ ერთადერთ გაყიდულ ”ზვიგენს”, ის 1971 წლის დეკემბერში, ვინმე კარლ-ჰაინც შუბერტზე გაიყიდა და მას შემდეგ, რამდენიმე მფლობელი გამოიცვალა. ბოლოს ის ამერიკელი ნორბერტ მაკნამარას ხელში აღმოჩნდა, რომელმაც საკმაოდ შელახულ მდგომარეობაში მყოფი ავტომობილი ატელიე ”ფისორეს” შეაკეთებინა და ოქროსფრად შეაღებინა. ათი წლის შემდეგ, ავტომობილი მანაც გაყიდა და მისმა ახალმა მფლობელმა, მას ძველი ფერი დაუბრუნა.

”ბონჰემის” რეტრომობილების აუქციონის სპეციალისტთა შეფასებით, ”ჰაი 450 SS-ის” ამ ეგზემპლარის ფასი 400 000-500 000 გირვანქა სტერლინგია.

”სააბის” ყიდვა ფორმულა 1-ის ბოსსაც მოუნდა

F1 boss Ecclestone joins Saab bidders

8 იანვარი

”სააბის” შეძენის მოსურნეთა რიგებს ფორმულა 1-ის კომერციულ უფლებათა ბატონ-პატრონი, ბრიტანელი მილიარდერი (ფორბსის შეფასებით, მისი ქონება 3.7 მილიარდ დოლარს შეადგენს) ბერნი ეკლსტოუნიც (სურათზე) შეუერთდა. ეკლსტოუნთან ერთად, ”ჯენერალ მოტორსს” შვედური კომპანიის გამოსყიდვის განაცხადი ლუქსემბურგულმა საინვესტიციო ფონდმა ”ჯენიი კეპიტალზმაც” წარუდგინა.

მართალია, ახალი წლის შემდეგ, ამერიკულმა კომპანიამ თავისი შვედური შტოს გამოსყიდვაზე სამი ახალი შეთავაზება მიიღო, მაგრამ ”გენერლები” მაინც ”სააბის” საქმიანობის შეჩერერბაზე ფიქრობენ, რისთვისაც საკონსულტაციო ფირმები მოიწვიეს.

თუმცა ეკლსტოუნი და ”ჯენიი კეპიტალზი” იმედოვნებენ, რომ ერთობლივი ძალისხმევით, ამერიკელებს განზრახვას გადააფიქრებინებენ და ”სააბის” აქციების საკონტროლო პაკეტს დაეუფლებიან.

”ჩვენ გვჯერა, ”სააბს”, როგორც საერთაშორისო ბრენდს, თავისი ღირებულება შენარჩუნებული აქვს და რიგ წამყვან ბაზრებზე კვლავაც პოპულარობით სარგებლობს. როგორც ინოვატორ კომპანიას, მას განვითარების კარგი პერსპექტივა გააჩნია და ყველაფერს ვეცდებით, რომ ეს პოტენციალი გამოუყენებელი არ დარჩეს”, - ნათქვამია ”ჯენიი კეპიტალზის” ოფიციალურ რელიზში.

სხვათა შორის, ახლახანს, ”ჯენიი კეპიტალზმა” ”რენოს” ფორმულა 1-ის გუნდის აქციების საკონტროლო პაკეტი გამოისყიდა. გამორიცხული არაა, რომ ამ გარიგებაში, ლუქსემბურგულ კომპანიასთან ერთად, ეკლსტოუნიც არის გარეული. ცნობისათვის, ეკლსტოუნისა და ”ჯენიი კეპიტალზი” საინვესტიციო აქტივობას კოორდინაციას შვედი ინვესტორი ლარს კარლსტრიომი უწევს. მისი თქმით, ”სააბის” შეძენის შემთხვევაში, მის ჯგუფს წამყვანი ევროპული ბანკებიდან კრედიტების მოზიდვა აქვს გადაწყვეტილი, მოზიდულ თანხას კი კომპანიის განვითარებისთვის გამოიყენებენ.

საინტერესოა ისიც, რომ ”სააბის” შეძენა კიდევ ერთ ისეთ კომპანიას სურს, რომელიც ორი წლის წინ, თავადაც მონაწილეობდა ფ1-ის მსოფლიო ჩემპიონატში. ესაა ჰოლანდიური ”სპაიკერი”, რომელსაც კანადელი მილიარდერი ვიქტორ მიულერი (ეს კაცი წარმოშობით ყოფილი საბჭოეთიდანაა) ფლობს.

”სააბის” შეძენა ასევე სურს შვედურ კონსორციუმს, რომელსაც სათავეში ”სააბის” აეროკოსმოსური შტოს ყოფილი აღმასრულებელი და შვედეთის თავდაცვის სამინისტროს ყოფილი მაღალი მოხელე, იან ნიგრენი უდგას.

”ჯენიი კეპიტალზი” აცხადებს, რომ ”სააბის” დაუფლების შემთხვევაში, ამ კომპანიებს სხვა კომპანიებთან პარტნიორული თანამშრომლობით განავითარებს. აქცენტი კი ეკონომიური ძრავებისა და ეკოლოგიურად სუფთა ტექნოლოგიების განვითარებაზე გაკეთდება.

მართალია, ამ ეტაპზე ”ჯენერალ მოტორსში” ყველაზე რეალურად ”სააბის” დახურვას თვლიან, მაგრამ ხელსაყრელი შეთავაზების შემთხვევაში, ამერიკული კომპანია ”სააბს” გაჰყიდის. ამიტომ, ”გენერლები” ახლა სწორედ ამ შემოთავაზებათა შესწავლაში არიან.

”ჯენერალ მოტორსის” მთავარი აღმასრულებელი ედ უაითექრი ამბობს, რომ მას ეჭვი ეპარება ახალ შემოთავაზებათა რეალობაში, რისი მთავარი მიზეზიც ისაა, რომ ყველა მსურველს, ”სააბის” შესაძენად ფულის ბანკებიდან მოზიდვა აქვს გადაწყვეტილი, კრიზისის პირობებში კი დიდი კრედიტის აღება სერიოზულ პრობლემას წარმოადგენს.

მომავლის ”მერსედესს” გონება მართავს

Mercedes Benz Cyborg Sensation Concept

8 იანვარი

როდესაც ავტოდიზაინერები თავისუფალ კონცეპციებს ქმნიან, ყველაზე ხშირად თავიანთი ქმნილებისთვის რეალურ აგრეგატებს არჩევენ, თუმცა არანაკლებ ხშირია შემთხვევები, როდესაც მათი ფანტაზია ძრავებს და მართვის უჩვეულო საშუალებებსაც გასწვდება ხოლმე. და ამ დროს, შეიძლება ისეთი განსაზღვრებაც კი გაიგონოთ, რასაც თვით ნაცარქექია და ბარონი მიუნხჰაუზენიც კი ვერ შემოგთავაზებდათ...
ახალგაზრდა დიზაინერმა დერეკ ჩიკ კინმა მოამზადა კონცეპტუალური ”მერსედეს ბენც საიბორგ სენსეიშნ ვიჰაიქლი”, ავტომობილი, რომელიც თავისი გარეგნობითაც დანახვისთანავე იქცევს ყურადღებას. და სანამ მის აგრეგატს შევეხებოდეთ, გეტყვით, რომ დაახლოებით ასეთი ავტომობილი ევროპულ გზებზე 2040 წელს უნდა გამოჩნდეს. არ შეგეშინდეთ, ესეც კონცეპციის ავტორის ვერსიაა. ისე, შტუტგარტელები ასეთ მონსტრს კონვეიერს სიზმარშიც არასდროს გააკარებენ - ასეთი ავანგარდიზმი მათ არც ახლა ახასიათებს და ძნელი წარმოსადგენია, მომავალში შეიცვალონ ამ საკითხისადმი მიდგომა.

კონცეპციის მიხედვით, ავტომობილი ორადგილიანია და ალბათ არ გაგიკვირდებატ (მისი გარეგნობიდან გამომდინარე), თუ გეტყვით, რომ ის უგზოობის პირობებში თავს ისე იგრძნობს, როგორც თევზი წყალში. მაგრამ მთავარი არც ესაა. მთავარი ისაა, რაც სათაურში წერია!

ავტომობილს არც საჭის რგოლი აქვს, არც ჯოისტიკი და არც პედლები. რა საჭიროა ეს ყველაფერი, თუკი ადამიანს ”კიბორგული სენსაციის” მართვა გონების ძალითაც შეუძლია. როგორც ამბობენ, გონებით მექანიზმების მართვა მიღწევადი რამაა, მაგრამ ავტომობილში ასეთი სისტემის გამოყენება ბევრ სირთულესთან იქნება დაკავშირებული. თუმცა პროექტის ავტორს ეს სრულებით არ აშინებს.

ის შემდეგ აღწერილობას გვთავაზობს - მძღოლისთვის განკუთვნილია სპეციალური ჩაფხუტი, რომელსაც მისი აზრების წაკითხვა შეუძლია. ჩაფხუტის სენსორები ტვინის მიერ გამოცემულიმპულსებს იჭერენ და მათ კომპიუტერს გადასცემენ, რომელიც მიღებულ ინფორმაციას გადაამუშავებენ და მართვის სისტემებს ბრძანების სახით უგზავნიან.

მართვის სისტემის მუშაობის პრინციპის ასეთი ”დაწვრილებითი” აღწერა კარგია, მაგრამ პროექტში არაფერია ნათქვამი იმაზე, თუ რა ტიპის აგრეგატით აღიჭურვება ”კიბორგული სენსაცია”.

სამაგიეროდ, იბადება კითხვა. რა მოხდება იმ შემთხვევაში, თუ მძღოლს თვალი სხვა რამისკენ (ვთქვათ, ლამაზი ქალისკენ) გაექცევა და მართვაზე წამიერად მაინც არ იფიქრებს? ალბათ, კარგი არაფერი. თუმცა, სანამ ასეთი ავტომობილის წარმოების საკითხი დღის წესრიგში დადგება, გამომგონებლები ადამიანის ტვინს, წინასწარი დაპროგრამებული კიბერნეტიკული ტვინით, ან ადამიანისა და კიბერნეტიკული ტვინების ჰიბრიდით შეცვლიან...

”ტატა მეჯიკ ირისი” - ყველაზე ლამაზი მსოფლიოში

Tata Magic Iris

8 იანვარი

რა თქმა უნდა, პირიქითაა - ეს მიკრო ვენი შეიძლება მსოფლიოს უმახინჯეს ავტომობილადაც ჩაითვალოს. ის უფრო მახინჯია, ვიდრე მისი ცნობილი ნათესავი ”ნანო”, რომელიც მსოფლიოს უიაფესი ავტომობილის სტატუსს ატარებს. ”მეჯიკ ირისს” სხვა თვისებაც აქვს, რის გამოც ის შეიძლება დაცინვის ობიექტი გახდეს.

ჯერ ერთი, ის ნამდვილი ჯუჯაა. რამდენი კაცი შეძლებს მასში ჩაჯდომას? ინდურ კომპანიას, ნიუ დელის საავტომობილო შოუზე, ამის შესახებ არაფერი უთქვამს. საინტერნეტო გამოცემა ”აუტობლოგის” ცნობით, ”მეჯიკ ირისს” ხუთი ადამიანის გადაყვანა შეუძლია. ცნობილია, რომ ”მეჯიკ ირისი” 12-დუიმიანი საბურავებითაა აღჭურვილი.

ეგ კიდევ არაფერი - მამოძრავებელ ძალას მისთვის 0.661-ლიტრიანი დიზელის ძრავი გამოიმუშავებს, რომელიც წყლით გრილდება. ეს ძრავი სულ რაღაც 11 ცხენის ძალას გამოიმუშავებს, რაც საკმარისია მხოლოდ იმისათვის, რომ ავტომობილის მაქსიმალური სიჩქარე 54 კმ/სთ იყოს.

უცნაური ”ლამბორგინი”

8 იანვარი

აღმოსავლეთ ლონდონში მცხოვრებმა 32 წლის არქიტექტორმა ბენედიქტ რედკლიფმა უცნაური პროექტი განახორციელა - ფოლადის მავთულებისგან ერთ დროს პოპულარული ”ლამბორგინი კოუნტაჩის” რეპლიკა შექმნა. არქიტექტორის ქმნილება ზომებში ზუსტად ემთხვევა ორიგინალურ სუპერ კუპეს, თუმცა არც ძრავი გააჩნია, არც ტანსმისია და არც ინტერიერი.

ნახაზების შედგენას რედკლიფმა რამდენიმე კვირა მოანდომა, რაშიც მას ”ლამბორგინი” დაეხმარა. მალე კი, იტალიური კომპანიისგანვე, თავისი ჩანაფიქრის განხორციელების ოფიციალური ნებართვა აიღო. თავისი ჩანაფიქრის აწყობას კი ენთუზიასტმა ოთხი თვე მოანდომა.

აღსანიშნავია, რომ რედკლიფმა მავთულებით ”კოუნტაჩის” ყველა ფორმა გამოიყვანა. ასე განსაჯეთ, ბორბლებიც მავთულებისგან დაამზადა და მათ ”პირელის” წარწერაც გაუკეთა.

”ეს იკონური ავტომობილია, რომელსაც მნახველი ახლაც კი აღტაცებაში მოჰყავს. მართალია, ჩემი ”კოუნტაჩი” უმოძრაოა, მაგრამ ის ორიგინალურია. როცა ხალხი მას ხედავდა ლონდონის ქუჩებში, ბევრი მისაბმელზე ადიოდა და შიგნით ჩაჯდომას ცდილობდა. რა თქმა უნდა, ნამდვილ ”ლამბოს” ყოლას ვისურვებდი, მაგრამ ეს მანქანები ძალიან ძვირია. ამიტომ, მე ჩემებურად შევძელი საკუთარი ”ლამბოს” შექმნა”, - ამბობს რედკლიფი.

ცნობისათვის, ”კოუნტაჩს” ”ლამბორგინი” 1974-1989 წლებში აწარმოებდა და მისი მეშვეობით, ”ფერარის” სერიოზულ კონკურენციას უწევდა. რედკლიფი იმედოვნებს, რომ მავთულებით აწყობილ ”კოუნტაჩს” 40 000 გირვანქა სტერლინგად გაჰყიდის.

”ჰიუნდაის” ”ლურჯი სურვილი” დეტროიტში

Hyundai Blue-Will

8 იანვარი

დეტროიტის საავტომობილო შოუსთვის, კორეულმა კომპანია ”ჰიუნდაიმ” ჰიბრიდული მოდელი ”ბლიუ-ვილ” მოამზადა, რომელიც სავარაუდოდ, ამერიკულ ბაზარზე 2012 წელს გამოჩნდება. ეს პირველი ჰიბრიდული ავტომობილია, რომელიც კორეულმა კომპანიამ მოამზადა. თუმცა ჯერჯერობით გადაწყვეტილი არაა, ის მხოლოდ ამერიკის ბაზრისთვის შეიქმნა, თუ გლობალური ბაზრისთვის.

”ბლიუ-ვილი” აღჭურვილია მუდმივად ცვალებად ტრანსმისიასთან დაკავშირებული ბენზინის 1.6-ლიტრიანი ძრავით, რომლის ბლოკიც და ცილინდრების თავიც ალუმინისგანაა დამზადებული, საწვავი კი მას უშუალოდ წვის კამერაში მიეწოდება. შიდაწვის ძრავთან და ტრანსმისიასთან უნისონში 100-კილოვატიანი ელექტროძრავი მუშაობს.

აკუმულატორების ბლოკი და საწვავის ავზი უკანა სავარძლების ქვეშაა მოთავსებული, რითაც საბარგულში ადგილი ბარგისთვის გამოთავისუფლდა. ავტომობილის სახურავზე მზის ელემენტების პანელი მდებარეობს, რომელიც აკუმულატორებს მოძრაობის დროს, დამატებითი ენერგიით მუხტავს.

კორეული კომპანიის მიერ გამოქვეყნებული მონაცემების მიხედვით, ”ლურჯი სურვილს” მარტო ელექტროძრავით თითქმის 60 კილომეტრის გავლა შეუძლია. ჰიბრიდულ რეჟიმში მოძრაობისას, ავტომობილი 100 კილომეტრის გასავლელად 4.2 ლიტრ საწვავს მოიხმარს. ეგრეთ წოდებულ პლაგ-ინ რეჟიმში მოძრაობისას კი საწვავის ხარჯი 2.2ლიტრი/100 კმ-ის ექვივალენტურია.

”ფორდი” დეტროიტში ”მუსტანგ GT-ს” გამოფენს

Ford Mustang GT

8 იანვარი

დეტროიტის საავტომობილო შოუსთვის, ამერიკულმა კომპანია ”ფორდმა” თავის პოპულარულ მასკლ ქარის, ”მუსტანგის” ვერსია GT-ს (გრან ტურიზმო) მოდერნიზებული ვარიანტი მოამზადა.

განახლებული ვტომობილი 5.0-ლიტრიანი V8 ძრავითაა ეკიპირებული, რომელიც მაქსიმალურ 412 ცხენის ძალა სიმძლავრეს და 530 ნიუტონმეტრ მაბრუნ მომენტს ავითარებს. ეს აგრეგატი იმითაცაა საინტერესო, რომ ის თავის ანალოგებთან შედარებით, 20 პროცენტით ნაკლებს იწონის.

აღსანიშნავია, რომ ”ფორდი” მყიდველს კვლავ შესთავაზებს ”მუსტანგ GT-ს” ძველ ვერსიას, რომელიც 4.6-ლიტრიანი V8 აგრეგატითაა აღჭურვილი და 315 ცხენის ძალასა და 440 ნიუტონმეტრს ავითარებს.

ახალი ძრავის გარდა, განახლებული ”მუსტანგ GT” ახალი ტრანსმისიითაცაა აღჭურვილი. ამიერიდან, ძრავის მიერ გამომუშავებულ მაბრუნ მომენტს, 5-საფეხურიანის ნაცვლად, 6-საფეხურიანი კოლოფი გადაამუშავებს. მყიდველს შეუძლია აარჩიოს მექანიკური (MT82), ან ავტომატური (6R80) კოლოფი.

მწარმოებელი ჯერჯერობით არ აქვეყნებს განახლებული ავტომობილის დინამიკურ მახასიათებლებს. ჯერჯერობით ცნობილია მხოლოდ ის, რომ ახალი ”მუსტანგ GT” წინაზე სწრაფი და ტემპერამენტიანი იქნება. ცნობისათვის, ამ ავტომობილის უფრო სუსტი ვერსია ადგილიდან 100 კმ/სთ სიჩქარეს 5 წამში ავითარებს.

ასევე ცნობილია, რომ ”მუსტანგ GT-ს” ავტომატურკოლოფიანი ვერსია ქალაქში მოძრაობისას, 100 კილომეტრს 14 ლიტრი საწვავით გადის, ტრასაზე კი 9 ლიტრიც ჰყოფნის.

როგორი იქნებოდა რუმინული ”ჰამერი”

How a Romanian Hummer Would Look Like

8 იანვარი

მალე ”ჰამერი” ჩინელების ხელში გადავა და ყველას ბუნებრივად ებადება კითხვა, რა გავლენას მოახდენს ეროვნების გამოცვლა ამ ბრენდის ავტომობილების დიზაინზე. შეიძლება სტილი ძველბური დარჩეს, შეიძლება - შეიცვალოს. რა თქმა უნდა, არავის ებადება კითხვა, როგორი დიზაინი ექნებოდა ”ჰამერის” მანქანებს, თუ ის რუმინული კომპანია იქნებოდა?

ასეთი კითხვა რუმინელ დიზაინერ ანდრუს ჩიპრიანს დაებადა. უფრო სწორედ, მან ”ჰამერის” დიზაინის საკუთარი ვერსია დაამუშავა. მის კონცეპციას ”ჰამერ HB კონცეპტი” ჰქვია. ეს ავტომობილი ეკოლოგიური და იმავდროულად, ექსტრემალური ოფ-როუდერია. მისი ეკოლოგიურობა იმაში გამოიხატება, რომ ის V6 ძრავითაა აღჭურვილი, რომელიც საწვავად ბიოდიზელს იყენებს.

კონცეპციის მიხედვით, ავტომობილი მზიდ ჩარჩოზეა აგებული, რომელიც ფოლადის კუთხოვანი მილებისგან შეიკვრება. ძარის ელემენტები კი ალუმინისა და კარბონის კომპოზიტისგან დამზადდება. ავტომობილი უზარმაზარ ბორბლებზე დადგება, რომლებიც, მათი გაბარიტების გამო, ძარის სივრცის გარეთ გამოდის. რუმინელი ინჟინერი არ ასახელებს ძრავის სიმძლავრეს. სამაგიეროდ, ამბობს, რომ მას 6-საფეხურიანი ავტომატური კოლოფი შეუწყვილდება.

სხვათა შორის, ახლახანს ”ჰამერმა” თავისი ორი მოდელის, H3-ისა და H3T-სთვის, ძრავების გამას E85 საწვავზე (რომელშიც 85 პროცენტი ეთანოლია) მომუშავე 5.3-ლიტრიანი V8 ძრავი დაუმატა, რომელსაც ჩვეულებრივ ბენზინზეც შეუძლია მუშაობა.

სხვათა შორის, ჩიპრიანმა ”ჰამერის” საკუთარ ვერსიას ამ ამერიკული ყველგანმავალის სტილის ბევრი ელემენტი შეუნარჩუნა. სამაგიეროდ, მან საქარე მინაზე და კარებების ფანჯრებზე წაიმუშავა და საკმაოდ საინტერესო სტილიც შეიმუშავა.

”მაზდა” RX-7-ს გამოუშვებს

Mazda RX-7

8 იანვარი

”მაზდა” უახლოეს მომავალში თავის სპორტულ კონცეპტუალურ მოდელ RX-7-ს კონვეიერზე დააყენებს და როგორც სხვადასხვა წყარო იტყობინება, ამ ავტომობილით, უკვე საკმაოდ მოძველებულ RX-8-ს შეცვლის. სავარაუდოდ, RX-7 ბაზარზე 2011 წლის დასაწყისში გამოჩნდება და იმავდროულად, ”მაზდა” RX-8-ს წარმოებას შეწყვეტს.

ინტერნეტით გავრცელებული ინფორმაცია გვამცნობს, რომ RX-7 უახლესი როტორული ძრავით (რენესის16X) აღიჭურვება, რომელიც ”მაზდამ” პირველად 2007 წლის ტოკიოს ავტო შოუზე წარმოდგენილ კონცეპტუალურ მოდელ ”ტაიკიზე” გამოიყენა.

კონცეპტუალური RX-7 წყვილი როტორული ტურბოძრავითაა აღჭურვილი. თითოეულის სამუშაო მოცულობა 0.8 ლიტრია, მათი სიმძლავრე კი 350 ცხენის ძალას აღწევს. შედარებისთვის, RX-8 წყვილი როტორული ძრავითაა აღჭურვილი, რომელთაგან თითოეულის სამუშაო მოცულობა მხოლოდ 0.654 ლიტრია.

სხვათა შორის, ”მაზდამ” ახლახანს RX-8-ს მოდერნიზაცია ჩაუტარა, თუმცა ცვლილებები მხოლოდ ეკიპირებას, ფასებს და სხვა მცირე ნიუანსებს შეეხო. ამასთან, ავტომობილი ამიერიდან ორ ახალ ფერში შეიღებება. ესენია ალუმინის მეტალიკი და ”მეტროპოლიტენ” რუხი. რაც შეეხება სტანდარტული ეკიპირების ახალ ელემენტებს, ესენია: საქარე მინის საწმენდები, რომლებიც მინის დასველებისთანავე იწყებს მოქმედებას, ავტომატური განათების სისტემა, წყალამრიდი ნივთიერებით დაფარული კარის ფანჯრები და უკანა ხედვის სარკეები. ასევე კარის გაღების და ძრავის გაშვების უგასაღებო სისტემები.

განახლებული RX-8-ის კოდური სახელწოდება ამიერიდან არის ”ტაიპ G”. ამ ავტომობილის საბაზო ღირებულება კი 27 700 დოლარს შეადგენს.

”ნისან ჯუკი” - პატარა ჰეჩბეკების ალტერნატივა

Nissan Juke

7 იანვარი

”ნისანმა” გამოაცხადა, რომ ჟენევის ავტო შოუზე უახლეს მინი ქროსოვერს წარადგენს, რომელიც ოქტომბრიდან ”ჯუკის” სახელით გაიყიდება. იაპონური კომპანიის განცხადებით, ეს ავტომობილი იმ ევროპელ მყიდველს მიიზიდავს, რომელიც აქამდე მხოლოდ მცირეგაბარიტიანი ჰეჩბეკების შეძენაზე იყო ორიენტირებული.

”ჯუკი” მეოთხე ქროსოვერია ”ნისანის” ევროპულ პროგრამაში. ამ ავტომობილით, სიდიდით მეორე იაპონური ავტომწარმოებელი ცდილობს, რომ თავისი ფოკუსი ნიშურ სეგმენტებზე გადაიტანოს და ამგვარად, მყიდველს მრავალფეროვანი პროდუქცია შესთავაზოს.

”ჯუკი” კონცეპტუალურ ”ქაზანას” საკონვეიერო გაგრძელებაა. ”ქაზანა” ”ნისანმა” შარშან, ჟენევის ავტო შოაუზე წარადგინა და ამ ავტომობილმა დიდი მოწონება დაიმსახურა და ამ გარემოებამ, იაპონურ კომპანიას ამ ავტომობილის წარმოება გადააწყვეტინა.

როცა ”ჯუკი” ”ნისანის” საწარმოო პროგრამაში ჩაჯდება, ამ კომპანიის სამოდელო გამაში, ის პოპულარულ კომპაქტურ ქროსოვერ ”ქაშკაისა” და კომპაქტურ საოჯახო ავტომობილ ”ნოუტს” შორის დაიკავებს ადგილს.

”შეგვიძლია, თამამად განვაცხადოთ, რომ ქროსოვერ ”ქაშკაის” მეშვეობით, ჩვენ ევროპელი მყიდველის გემოვნებას ალღო ავუღეთ და ახლა, სანამ ბაზარზე ”ჯუკს” გამოვუშვებთ, პირველ რიგში, სწორედ ევროპელების მოთხოვნილებები და გემოვნება შევისწავლეთ”, - ამბობს ”ნისანის” ევროპული შტოს გაყიდვების და მარკეტინგის განყოფილების შეფი საიმონ თომასი.

ამ ეტაპზე ცნობილია, რომ ”ჯუკს” ”ნისანის” ბრიტანეთის ჩრდილო აღმოსავლეთში მდებარე ქარხანა გამოუშვებს. ეს ის ქარხანაა, რომელიც იაპონური კომპანიის პოპულარულ მოდელებს - ”ქაშკაის”, ”ქაშკაი+2-ს” და ”ნოუტს” აწარმოებს.

დაბოლოს, იაპონური კომპანიის საწარმოო პროგრამაში, ”ჯუკი” იმ ადგილს დაიკავებს, რომელიც აქამდე პოპულარულ მინიჰეჩბეკ ”მიკრას” ეკავა. ეს უკანასკნელი კი თავის სახელს ინდოეთის ბაზარზე შეინარჩუნებს...

მოტოციკლი, რომელიც 16 მილიონი ევრო ღირს

7 იანვარი

ჩოპერების მწარმოებელმა გერმანულმა კომპანია ”ჰაუს ოფ თანდერმა”, გასაყიდად მსოფლიოში ყველაზე ძვირადღირებული მოტოციკლი გამოფინა. ჩოპერის ღირებულება 15.8 მილიონი დოლარია, თუმცა ისიც აღსანიშნავია, რომ მოტოციკლს გემთმშენებელ ”სანრაიზ იახტსის” წარმოების იახტაც ”მოჰყვება”.

ძნელი მისახვედრი არ უნდა იყოს, რომ რეალურად პირიქითაა - იყიდება იახტა, ჩოპერი კი მისი დანამატია, რომლითაც იახტის გამყიდველი პოტენციური მყიდველის მიზიდვას ცდილობს. თუმცა, ”ჰაუს ოფ თანდერიც” იგივე პრინციპით, მოტოციკლს თავის მცურავ ”დანამატთან” ერთად დამოუკიდებლადაც ჰყიდის.

იახტის სიგრძე 45 მეტრია და ის ”სანრაიზ იახტსის” თურქულ ნავსაშენშია აგებული. აღნიშნული კომპანია გერმანელ ბიზნესმენ ჰერბერტ ბაუმს ეკუთვნის, ვინც თურმე ”ჰარლეი დევიდსონის” ჩოპერების და კასტომ ბაიკების დიდი მოყვარული ყოფილა. ამიტომ, ”ჰაუს ოფ თანდერთან” თანამშრომლობაზე სწრაფად დათანხმდა.

იახტას აქვს ფარეხი, რომელშიც მსოფლიოს უძვირესი მოტოციკლის გარდა, სამაშველო მოტორიანი ნავი და ორი ჰიდროციკლიც ინახება. ყველა მათგანი იახტის ფერადაა შეღებილი.

რაც შეეხება ”ჰაუს ოფ თანდერის” მოტოციკლს, ის ”ჰარლეი დევიდსონის” წარმოების მოდელ ”როკერის” ბაზაზეა აგებული. ოღონდ, გერმანული კომპანიის სპესიალისტებმა მისი ჩარჩოს კონსტრუქცია გადააკეთეს და ბაიკის დიზაინიც შეცვალეს. აღსანიშნავია, რომ ბაიკს აქვს სპეციალური სახელურები, რომელთა დახმარებითაც, მას პატრონი იახტაზე შეაგორებს.

”ტოიოტამ” შარშან ამერიკაში ყველაზე მეტი ავტომობილი გაიხმო

Toyota's 1st in safety recalls

5 იანვარი

მას შემდეგ, რაც ამერიკის ბაზარზე გაყიდვები დაიწყო, ავტომობილების უკან გახმობის მხრივ, შარშანდელი წელი ”ტოიოტასთვის” ყველაზე წარუმატებელი გამოდგა - იაპონურმა გიგანტმა, სხვადასხვა (ძირითადად უსაფრთხოების) მიზეზით, აშშ-ის ბაზარზე მომუშავე ავტომწარმოებლებს შორის, შესაკეთებლად ყველაზე მეტი ავტომობილი გაიწვია.

გამოცემა ”დეტროიტ ფრი პრესის” ინფორმაციით, 2009 წლის განმავლობაში, დეფექტების აღმოსაფხვრელად, ”ტოიოტამ” სულ 4.8 მილიონი ავტომობილი გაიხმო. ავტომობილების გამოხმობის ერთ-ერთი მთავარი მიზეზი მძღოლის სავარძლის წინ მდებარე ნოხებია, რომლებიც რიგ შემთხვევებში, აქსელერატორის პედალის დაბლოკვას იწვევდა.

ამ პრობლემის აღმოსაფხვრელად, ავტომობილების მფლობელებს ”ტოიოტა” აქსელერატორის სატერფულის შეცვლას სთავაზობდა. თუმცა, აქ ისიც უნდა ითქვას, რომ ამ პრობლემის სრულად აღმოფხვრას იაპონური კომპანია აპრილამდე ვერ მოასწრებს. დილერები თავიანთ კლიენტებს სატერფულის დამოკლებას სთავაზობენ, რათა მას ნოხთან შეხების ნაკლები შანსი ჰქონდეს.

გახმობილი ავტომობილების რაოდენობის მიხედვით, მეორე ადგილზე ”ფორდია”, რომელმაც წლის განმავლობაში, უფასო სასერვისო მომსახურებაზე 8-ჯერ გამოაცხადა და საერთო ჯამში, 4.5 მილიონი ავტომობილის შეკეთება ითავა. ყველაზე მრავალრიცხოვანი დეფექტი ამერიკული კომპანიის ავტომობილებს სისტემა კრუიზ კონტროლთან დაკავშირებით აქვთ - მუხრუჭის პედალზე დაწოლისას, სისტემა ხშირად თვითნებურად ითიშებოდა. ხშირად კი სისტემის ჩამრთველი ხურდებოდა და ცეცხლიც კი უჩნდებოდა. აღსანიშნავია, რომ ამავე მიზეზით, 2005-2009 წლებში ”ფორდმა” ავტომობილები ოთხჯერ გაიხმო.

გაცილებით მცირე, რაოდენობის ავტომობილის (2.3 მილიონი) გახმობა მოუხდა ”ჯენერალ მოტორსს”, რომელმაც წლის განმავლობაში ეს 17-ჯერ გააკეთა. ეს ამ კომპანიის ისტორიაში რაოდენობრივად მესამე ყველაზე მასშტაბური გახმობაა.

საინტერესოა ის ფაქტი, რომ შარშან, აშშ-ში მომუშავე კომპანიებმა საერთო ჯამში, ავტომობილები 117-ჯერ გაიხმეს. უფასო რემონტს სულ 15.2 მილიონი ავტომობილი დაექვემდებარა. შედარებისთვის, შარშან ამერიკის ბაზარზე სულ 10 მილიონზე ოდნავ მეტი ავტომობილი გაიყიდა. საინტერესოა ისიც, რომ 2008 წელს, გახმობა თითქმის ორჯერ ნაკლებ (8.6 მილიონ) ავტომობილს შეეხო, ვიდრე შარშან.

ცნობისათვის, აშშ-ის საგზაო უსაფრთხოების ეროვნული დეპარტამენტი (NHTSA - ნეიშნლ ჰაივეი ტრეფიკ სეიფტი ადმინისტრეიშნ) ოფიციალურად მხოლოდ იმ გახმობებს აფიქსირებს, რომლებიც ავტომობილების უსაფრთხოებას მეტნაკლებად ეხება. მწარმოებლები კი, ავტომობილებს სარემონტოდ სხვა მიზეზებითაც ხშირად იხმობენ.

მარხილები სანტა კლაუსისთვის

29 დეკემბერი

Sleighs for Santa

ახალ წელს ყველა განსაკუთრებულად მომზადებული ხვდება - ნაძვის ხე, ტკბილეული, ზეიმები და საჩუქრები ის ატრიბუტიკაა, რომელთა გარეშეც ახალი წლის დადგომა წარმოუდგენელია. რა თქმა უნდა, ახალი წელი თოვლის ბაბუის, სანტა კლაუსის გარეშე არ არსებობს. ის ხომ ბავშვებს და არამხოლოდ ბავშვებს, საჩუქრებით ახარებს. თავად მისთვის საჩუქრის მირთმევაზე კი არავინ ზრუნავს.

უფრო სწორედ, ადრე არავინ ზრუნავდა. თუმცა ამ ნაკლის გამოსწორება შარშან ინგლისურმა საავტომობილო ჟურნალმა ”ქარ-მა” სცადა, რომელმაც საავტომობილო კომპანიებს სანტასთვის მისი ტრადიციული სატრანსპორტო საშუალების - მარხილის თანამედროვე ვარიანტების ესკიზების შედგენა სთხოვა და ამ თემაზე ერთგვარი საჟურნალო ფესტივალიც ჩაატარა.

და, თქვენ წარმოიდგინეთ, წამოწყება იმდენად საინტერესო გამოდგა, რომ ”ქარ-ის” რედაქციამ ის წელსაც გაიმეორა. ისევე როგორც შარშან, მასში მონაწილეობა კვლავ დიდი ავტომწარმოებლების დიზაინერებმა მიიღეს, იმ ხალხმა, რომლებიც მსოფლიოში ცნობილ ავტომობილებს აპროექტებენ. აბა, ხუმრობა ხომ არ არის - მათი ნამუშევარი პატარების საყვარელ ადამიანს უნდა მოეწონოს.

შარშანდელის მსგავსად, დიზაინერებმა კვლავ მეტად ორიგინალური ნამუშევრები წარმოადგინეს, რომლებშიც მათი კომპანიების საფირმო სტილების გავლენა აშკარად იგრძნობა. სხვანაირად არც შეიძლებოდა ყოფილიყო - მართალია, სანტას მარხილების ფესტივალი უბრალო გასართობი, სავარჯიშოა, მაგრამ საბოლოო პროდუქტი მაინც ამათუიმ მწარმოებლის სახე უნდა ყოფილიყო. და ასეცაა, ყველა ნამუშევარში, მათი შემქმნელი კომპანიების კორპორატიული სტილი შეინიშნება.

აი, ნახეთ ”ასტონ მარტინის” მარხილი. მანქანისგან განსხვავებით, მას ბორბლები არ აქვს, მაგრამ ის ხომ მარხილია. სამაგიეროდ, დახვეწილი აეროდინამიკით გამოირჩევა და სავარაუდოდ, მისთვის 320 კმ/სთ სიჩქარის აკრეფა პრობლემას არ უნდა წარმოადგენდეს.

”ქარ-ის” მიმომხილველებმა, ამ მარხილის უკანა ნაწილის სტილი პოპულარულ მოდელ ”ვენტიჯისას” და ”ასტონ მარტინის” ისტორიაში ყველაზე სწრაფი და ძვირადღირებული ”ვან-77-ისას” შეადარეს. რა თქმა უნდა, მსგავსება ძალიან შორეულია, მაგრამ ფაქტი ისაა, რომ გეიდონელთა მარხილი ძალიან ორიგინალური გამოვიდა.

ამ მარხილში ყველაზე საინტერესო მაინც მისი წინა ნაწილია. უფრო ზუსტად, ის ფრთების მსგავსი წარმონაქმნი, რომლებითაც მარხილმა უნდა ისრიალოს. ისინი აეროდინამიკური ელემენტების მოვალეობასაც შეასრულებენ. მათი მეშვეობით, შემხვედრი ჰაერის ნაკადმა სასურველი მიმართულება უნდა მიიღოს და დამშვიდებული ჭავლის სახით, მას გარს შემოუაროს.

მოკლედ, ლაპლანდიაში ასეთი მარხილი აუცილებლად მოეწონებათ...

თუ ”ასტონ მარტინმა” მომავლის მარხილი შექმნა, ”აუდის” დიზაინერებმა, ენცო როთფუსის ხელმძღვანელობით, უფრო პრაგმატული გზა აირჩიეს და სანტასთვის ისეთი მარხილი, უფრო ავტომობილი დახატეს, რომლის მსგავსიც მალე ”ოთხი რგოლის” შოურუმებში გამოჩნდება. ინგოლშტადტელებს ბევრი არც უფიქრიათ და მარხილის ნაცვლად, სანტას ჩვეულებრივი ავტომობილი შესთავაზეს. ესაა ამ კომპანიის სამოდელო გამის ყველაზე პატარა მოდელი A1.

სურათზე რომ ”აუდი A1-ს” ხედავთ, იმასაც შეამჩნევდით, რომ სანტას ის მოუსრიალდა. მაგრამ მანქანა თავისი მძღოლის ნებას მაინც ემორჩილება და ალბათ მალე გასწორდება. სავარაუდოდ, ეს ავტომობილი კვატრო (სრულამძრავიანი, მაბრუნი მომენტის 60:40-ზე განაწილებით) ტრანსმისიით უნდა იყოს აღჭურვილი. თუმცა აშკარაა, ტრადიციული მარხილი თოვლში უფრო უკეთ ივლიდა...

დააკვირდით, ჩვეულებრივი მარხილი სანტას ამ მანქანის თავზე შემოუდვია, ირემი კი წინა სავარძელზე, მის გვერდით მოკალათებულა. მან პენსია აშკარად დაიმსახურა და ამიერიდან, ბავშვებს სანტასთან ერთად გაახარებს.

იქნებ, სანტა ამ მანქანით რალის მსოფლიო ჩემპიონატის პირველ ეტაპზეც ვიხილოთ...

”იაგუარმა” კი სანტას მფრინავი მარხილი შესთავაზა. ალბათ, ამჯერად ბაზისად ძველი სამხედრო თვითმფრინავი გამოიყენეს - მის სტილში, ეს სატრანსპორტო მფრინავი საშუალებაც მოძრაობაში ტურბოხრახნს (პროპელერს) მოჰყავს. ამ ესკიზის ავტორი ხელოვნების სამეფო კოლეჯის კურსდამთავრებული, 25 წლის თომას სმიტია, რომელიც ”დიდი კატის” ავტომობილების ექსტერიერის დიზაინერია, კომპანიაში მუშაობა კი გასულ ზაფხულს დაიწყო.

ისე, მწარმოებლის კორპორატიული სტილი ყველაზე ნაკლებად ამ ნამუშევარში შეინიშნება, თუმცა ეს ალბათ იმიტომ, რომ ამ ეტაპზე, ”იაგუარი” ახალი სტილის ძიებაშია და ვინ იცის, ადრე თუ გვიან, ამ სავარჯიშოს დროს გამოყენებული ზოგიერთი იდეა, იქნებ მალე რეალური კონცეპტუალური ავტომობილების გარეგნობაშიც გამოჩნდეს...

”ლენდ როვერმა” კი, როგორც ამ კომპანიას შეეფერება, ისევ სრულამძრავიანი სატრანსპორტო საშუალება შექმნა. პროექტი ”ლენდ როვერის” პერსპექტიული დიზაინის განყოფილების შეფ ოლივერ ლე გრაისის ხელმძღვანელობით, ფლორიან დოუბმა შეიმუშავა.

”მარხილს” სიგარას ფორმა აქვს და ორადგილიანია. უკანა ადგილზე თავად სანტა მოთავსებულა, წინ კი ირემი ზის, რომელიც ”ლენდ როვერმაც” დამსახურებული პენსიით უზრუნველყო. პროექტის თანმდევი რელიზი გვამცნობს, რომ ავტომობილი ასევე აღჭურვილია საჩუქრის ადგილამდე მიტანის ლაზერული სისტემით - აქ აშკარად სამხედრო ტექნოლოგიაა გამოყენებულ. ოღონდ, ამჯერად საჩუქარს მიზნამდე საბრძოლო რაკეტა კი არა, საჩუქარი მიაქვს.

სხვა კონკურსანტებისგან განსხვავებით, ”ლენდ როვერმა” თავის პროექტს ტექნიკური სპეციფიკაციაც მოაყოლა. მასში აღნიშნულია, რომ მარხილს ცვალებადი სიმაღლის საკიდარი აქვს. ამგვარად, კომპანია თავის სისტემა ”ტერაინ რესპონსს” უკეთებს რეკლამას. ყველაზე საინტერესო კი მარხილის ძალური დანადგარია. ესაა დამუხტული ნაწილაკების ამაჩქარებელი. ეს აშკარად კოსმოსური ინდუსტრიის მომავლის აგრეგატია და ბუნებრივია, რომც არ გაგვაფრთხილონ, ისედაც მივხვდებით, რომ ასეთ აგრეგატს ”ლენდ როვერის” ავტომობილებზე არ უნდა ველოდოთ. ჯერჯერობით მაინც...

დაბოლოს ”ვოქსჰოლის” – ”ოპელის” ინგლისელი ნათესავის პროექტი. ეს ყველაზე მეტად ჰგავს მარხილს და იმავდროულად, ავტომობილის (უახლესი ასტრას და ამპერას) ძარასაც. კონცეპტუალური ”ამპერას” მსგავსად, მარხილიც ჰიბრიდულ სისტემა E-REV-ით (ელექტრომობილი სვლის გაზრდილი მარაგით) არის აღჭურვილი. ეს სისტემა იმით გამოირჩევა, რომ მასში ძირითად მამოძრავებელ მომენტს ელექტროძრავი გამოიმუშავებს და თუ სანტას ვოიაჟისას, აკუმულატორებში დაგროვილი ენერგია ამოიწურა, საქმეში შიდაწვის მცირელიტრაჟიანი ძრავი და მასთან დაკავშირებული ელექტროგენერატორი ჩაერთვება, რომლებიც აკუმულატორების ბლოკს დამუხტავენ. ამ ტექნოლოგიას ”ჯენერალ მოტორსი” პირველად ”შევროლე ვოლტზე” გამოიყენებს, შემდეგ კი ”ოპელ/ვოქსჰოლ ამპერას” ჯერიც დადგება...